အခန်း (၆၀၁-၆၀၂)

Vol. 45 Ch. 601-602

အပိုင်း ၆၀၁ - ကောင်းကင်ရုံးတော်ကို တစ်ကိုယ်တော် ရင်ဆိုင်မည်

ချောင်ရူသည် အနောက်နန်းဆောင်နှင့် ဓားဌာန၏ အမည်ကို သူ့အား ကာကွယ်ပေးရန်အတွက် အလွဲသုံးစားလုပ်ကာ အနာဂတ်နှင့် ကံတရားကို လောင်းကြေးထပ်ခဲ့ကြောင်း ယွမ်ရှောင် ချက်ချင်း သဘောပေါက်သွား၏။ ကောင်းကင်ရုံးတော်တွင် ထိုကဲ့သို့ အစစ်အမှန် မိတ်ဆွေမျိုး ရှာပါးလှပြီး အချိန်ကြာကြာ ဖုံးကွယ်မထားနိုင်ရာ ပေါ်သွားသည်နှင့်တပြိုင်နက် အားလုံး၏ ရန်သူ ဖြစ်လာပေလိမ့်မည်။ ထို့ကြောင့် သူက ဆွဲဆောင်အားပြင်းသော်လည်း ရိုးသားစစ်မှန်သော ဤအမျိုးသမီးကို လေးနက်စွာ မေးခွန်းထုတ်ခဲ့သည်။

"ဘာကြောင့် ကိုယ့်ကိုကိုယ် အန္တရာယ်တောထဲ မဆင်မခြင် ဝင်လိုက်ရတာလဲ"

"ထွေထွေထူးထူး မရှိပါဘူး။ မှန်တယ်လို့ ငါ ခံစားရတဲ့ ဘက်ကို ရွေးချယ်လိုက်တာပဲ"

ချောင်ရူသည် သူ့အပေါ် အနိုင်ကျင့်ရသည်ကို စွဲလန်းနေသည်ဟု အထင်မှားခဲ့သော်လည်း အမှန်တကယ် ချစ်မြတ်နိုးနေခြင်း ဖြစ်ကာ ချစ်သူအတွက် မီးတွင်းထဲ ခုန်ချရန်ပင် ဝန်မလေးချေ။ သူ့အမြင်တွင် ကောက်ကျစ်သော မြွေတစ်ကောင် ဖြစ်ခဲ့သော်လည်း အမှန်တရားသည် ရဲရင့်လှသော နဂါးတစ်ကောင် ဖြစ်နေသောအခါ ယွမ်ရှောင်အနေဖြင့် သူမကို သဘောကျစပြုလာသည်။

"ဒီလိုတွန့်ဆုတ်မနေနဲ့။ အချိန်ရှိတုန်း မိုးကြိုးဌာနကနေ ထွက်ပြေးပါ"

"ငါ မပြေးတော့ဘူး"

ချောင်ရူက စိုးရိမ်တကြီး တိုက်တွန်းလိုက်သော်လည်း သူသည် ခေါင်းယမ်း၍ ပြတ်ပြတ်သားသား ပြောလိုက်၏။

"သိပ်မကြာခင် ငါ လိမ်ထားတာ ပေါ်သွားတော့မယ်နော်။ ထွက်ပြေးပါဆို"

"ဒီအချိန်လေးကို အခွင့်ကောင်းယူပြီး ငါက မိုးကြိုးဌာန၊ ရွေးချယ်ပွဲမှာ အနိုင်ယူပစ်လို့ အဆင့်ခြောက်အထိ ရာထူးတက်လိုက်မယ်။ နတ်ဘုရားဂိတ်ကို သွားခွင့်ရရင် ဒီကောင်တွေ လူမြင်ကွင်းမှာ မထိရဲတော့ဘူးမလား"

ကူကျန်းရှောင်သည် သူ့ကို ဖမ်းဆီး၍ ကောင်းကင်ပျံသန်းမြို့တော် လူသတ်မှု တရားခံအဖြစ် စွပ်စွဲနိုင်သော အကြောင်းအရင်းမှာ အဆင့်အတန်း မရှိသောကြောင့်ပင်။ အဆင့် ခြောက် အရာရှိ ဖြစ်လာလျှင် အကာအကွယ် တစ်ခု ရနိုင်မည် ဆိုသော်လည်း နောက်ထပ် ပွဲစဥ်နှစ်ခုအတွင်း အလိမ်ပေါ်သွားလျှင် အန္တရာယ်ကြီးလွန်းပေသည်။

"စိတ်မပူနဲ့။ ငါ့မှာ အဖွဲ့အစည်းနောက်ခံ ရှိတယ်။ ကောင်းကင်ရုံးတော်အတွင်းပိုင်းကို ထိုးဖောက်ဝင်ရောက်ဖို့ ဒီရာထူး လိုအပ်တယ်"

ယွမ်ရှောင်က အဖြူရောင်မုသားကို ဆက်လက် အသုံးပြုကာ ချောင်ရူအား နှစ်သိမ့်ပေးနေရ၏။

"ဒီအဖွဲ့အစည်းက ဘယ်လောက်အစွမ်းထက်လဲ"

"လျှို့ဝှက်ထားရတယ်။ ဒါပေမယ့် မင်းဆိုရင်တောင် အဖွဲ့အစည်းထဲမှာ အလယ်အလတ်လောက်ပါပဲ"

"ဒီလောက်တောင်ဆိုရင် မိုးကြိုးဌာနလောက်ကို ကြီးမားတာပေါ့။ ကောင်းကင်ရုံးတော်မှာ ငါ့လိုလူတွေ မနည်းဘူး ထင်တယ်။ အကုန်လုံးက မကြိုက်ပေမယ့် သည်းခံနေနေရတာပဲ"

ချောင်ရူက အံ့သြတကြီးဖြစ်သွားကာ ခပ်တိုးတိုး ရေရွတ်ရင်း ချီးကျူးသည်။

"ငါက မတရားမှုတွေကို ပေါ်တင်ရင်ဆိုင်ဖို့ အဖွဲ့အစည်းရဲ့ ဓားတစ်လက် ဖြစ်တယ်။ စိတ်အေးအေးထားပါ။ ငါ့ကို ကာကွယ်ပေးမယ့် လူတွေ အများကြီး ရှိတယ်"

"ဒါဆိုရင် မနေ့ညက ဘာလို့ ငါ့ကို ဖိအားပေးပြီး ဓားဌာနနဲ့ ဆက်သွယ်ခိုင်းရတာလဲ"

သူမက သံသယဖြင့် ချက်ချင်း ထောက်ပြလိုက်သောအခါ သူသည် မျက်နှာပြောင်တိုက်၍ ဆက်လိမ်နေရ၏။ ထို့နောက် သူမကို မိုးကြိုးဌာနအတွင်း ပုန်းအောင်းနေရန် မှာကြားကာ မိုးကြိုးကိုးသွယ် ရင်ပြင်၌ ရွေးချယ်ပွဲ ပြီးဆုံးလျှင် ပြန်တွေ့မည်ဟု သူက ဆုံးဖြတ်သည်။ သူမက စိုးရိမ်လွန်းသဖြင့် မျက်ရည်များဝဲလာကာ ကျန်ရစ်သော တိုက်ပွဲနှစ်ချီ၌ ဂရုတစိုက် ကိုင်တွယ်ရန် အထပ်ထပ် မှာနေမိသည်။

"သိပ်ပေါ့ဆမနေနဲ့။ ပိုင်လင်းအာက မိုးကြိုးဌာနရဲ့ ထိပ်တန်းစီရင်သူ ငါးယောက်ထဲက ဖုန်းချီနဲ့ စေ့စပ်ထားတယ်။ သူက ပိုင်လင်းအာထက် အများကြီး ပိုသန်မာပြီး ဝိညာဥ်ရေးရာ ကျွမ်းကျင်လို့ တိုက်ကွက်တွေဟာ ထူးဆန်းပြီး ကာကွယ်ရခက်တယ်"

"ငါ သတိထားပါမယ်။ ဒါပေမယ့် ဒီလိုတွေ့ဖို့ဆိုတာ ဖြစ်နိုင်ချေ နည်းမှာပါ"

ယွမ်ရှောင်က အပြင်ပန်းတွင် ဤသို့ ပြောလိုက်သော်လည်း ဝိညာဥ်နှင့် ပတ်သက်သော ဖန်ဆင်းရှင်မျိုးစေ့မှာ အလွန်ရှားပါးသောကြောင့် ရင်ဆိုင်တွေ့ရန် စိတ်ထဲမှ ဆုတောင်းနေ၏။

"သိပ်ပြီး ယုံကြည်လွန်းမနေနဲ့။ ဖုန်းချီက သူမအတွက် လက်စားချေချင်လို့ ချောင်ရှန်းဆီမှာ တောင်းဆိုလိုက်ရင် ဘယ်လိုလုပ်မလဲ။ ပေါ့ပေါ့ဆဆ မဖြစ်စေနဲ့။ အရေးကြီးတာ တစ်ခုက သူ့ကို သတ်လို့မရဘူး"

"ဘာကြောင့်လဲ"

ချောင်ရူ၏ လေးနက်သော အမှာစကားကြောင့် သူ နားမလည်နိုင် ဖြစ်သွားရသည်။ ဖုန်းချီ၏ ဖခင်က အဆင့်နှစ် ကောင်းကင်အရာရှိ တစ်ယောက် ဖြစ်ကာ ကောင်းကင်ရုံးတော်၌ သြဇာတိက္ကမကြီးမား၍ မျိုးနွယ်တစ်ခု၏ ဦးဆောင်သူ ဖြစ်သည့်အပြင် မိုးကြိုးဌာနထက်ပင် ပို၍ ကြီးမားသော အင်အားတစ်ခု နောက်ခံ ရှိ၏။ ထိုအချက်ကို သိလိုက်ရသောအခါ ယွမ်ရှောင်က အရှုပ်အထွေးများ ဖြစ်မလာစေရန် ဖုန်းချီကို မသတ်ပါဟု ကတိပေးလိုက်သဖြင့် သူမ စိတ်အေးသွားပုံရသည်။

"အချိန် မရှိတော့ဘူး။ ငါ သွားရတော့မယ်"

သူမက ရင်ခွင်အတွင်း ခန္ဓာကိုယ်ချင်း ထိကပ်အောင် တိုးဝင်ရင်း လက်ချောင်းလေးများဖြင့် ရင်ဘတ်ကို ထိတွေ့ကစားလာသောအခါ ယွမ်ရှောင် တားဆီးလိုက်ရသည်။

"ရွေးချယ်ပွဲ ပြီးရင် လာရှာနော်"

ချောင်ရူက ဆွဲဆောင်အား ပြင်းပြင်းဖြင့် ကြာကြည့်တစ်ချက်ပစ်၍ ဆွဲဆောင်နေစဥ်မှာပင် ယွမ်ရှောင်သည် မိုးကြိုးကိုးသွယ် ရင်ပြင်သို့ လှည့်ထွက်လာခဲ့သည်။ ယောကျ်ားပီသသော ကျောပြင်ကို ကြည့်နေရင်း မိုးကြိုးဌာန၏ သင်းကွဲ ဖြစ်နေသော ဘဝတွင် သူမ၏ အသက်ကို စွန့်စားရန် ထိုက်တန်သော သူရဲကောင်းအဖြစ် သတ်မှတ်လိုက်သည်။ ကောင်းကင်ရုံးတော်ကဲ့သို့ အင်အားစုကြီး၏ အမှောင်ဘက်ခြမ်းကို တစ်ကိုယ်တော် ရင်ဆိုင်ရဲသည့် လူငယ်လေးတစ်ယောက်၏ ဘဝမှာ အံ့မခန်း ဖြစ်နေပေလိမ့်မည်။

ကျောက်စိမ်းဖြူ စင်မြင့်အထက်တွင် အရာရှိတိုင်း မှုန်ကုပ်ကုပ် မျက်နှာထားဖြင့် ရှိနေကြစဥ် ယွမ်ရင်က စကားစလာသည်။

"တစ်ခုခုတော့ မှားနေတယ်"

"မင်း ဘာပြောချင်တာလဲ"

ပုံမှန်အားဖြင့် သဘောထားချင်း တိုက်ဆိုင်လေ့မရှိသော မဟာစစ်သူကြီးနှစ်ယောက်သည် ညီညွတ်နေကြပြီး ပြင်ပရန်သူနှင့် ရင်ဆိုင်ရသောအခါ ပြောနေစရာမလိုအပ်သည့် မိုးကြိုးဌာန၏ စည်းမျဥ်းပင် ဖြစ်ပုံရသည်။ ယွမ်ရင်က လမင်းဓားနတ်ဘုရားထံ အကျိုးအကြောင်း မေးရန် သတင်းပို့ အဆောင် ပို့လိုက်သည်နှင့်တပြိုင်နက် ကူကျန်းရှောင်သည် မိုးကြိုးဌာနတစ်ခုလုံးကို ပိတ်ဆို့ထားရန် အမိန့်ပေးလိုက်၏။

"မဟာစစ်သူကြီးတို့ ရွေးချယ်ပွဲမှာ ကျုပ်တကယ် မစွက်ဖက်ခဲ့ပါဘူး။ ပိုင်မောင်နှမနဲ့ လုယောင် ထိပ်တိုက်တွေ့တာက တကယ်ကို တိုက်ဆိုင်မှုသက်သက်ပါ"

ချောင်ရှန်းသည် အမိန့်ကို ဖော်ဆောင်ရန် ထွက်မသွားခင် ဦးညွှတ်၍ အလေးအနက် ရှင်းပြခဲ့သောအခါ ယွမ်ရင်က ခေါင်းညိတ်ပြသည်။

"ပိုင်တောက်က ကာကွယ်ဖို့ အစွမ်း မရှိတာပါ။ မင်းနဲ့ မဆိုင်ဘူး"

ထိုစကားသည် ချောင်ရှန်း အပြစ်ကင်းသည်ဟု မဆိုလိုဘဲ ဤပြဿနာအကြား ဝင်မပါလိုကြောင်းသာ ဖော်ပြခဲ့သည်။

"နယ်စားဖုန်း"

ထိုအခိုက်တွင် အပြာရောင် ဝတ်ရုံကို ရိုးရိုးရှင်းရှင်း ဝတ်ဆင်ထားကာ တာအိုရသေ့တစ်ပါးကဲ့သို့ မျက်ခုံးမွေး အရှည်ကြီးများဖြင့် လူတစ်ယောက် ရောက်လာသောအခါ မိုးကြိုးဌာန၏ အရာရှိအားလုံး မတ်တပ်ရပ်ကာ ခရီးဦးကြို ပြုလိုက်ရသည်။ သူ၏ ရုပ်ဆင်းသွင်ပြင်အရ ခွန်အားသန်မာပုံ မရသော်လည်း ထူးဆန်းသည်မှာ မျက်လုံးအိမ်အတွင်း မျက်ဆံများ ရှိနေရမည့်အစား ရေဝဲများသာ လှည့်ပတ်နေကြပြီး အကြည့်တစ်ချက်ဖြင့် ဝိညာဥ်ကို ပြန့်ကြဲသွားစေနိုင်သဖြင့် ကြက်သီးမွေးညှင်း ထသွားပေလိမ့်မည်။

အပိုင်း ၆၀၂ - ဝိညာဥ် ပူးကပ်ခြင်း

ဝိညာဥ်ကျင့်ကြံခြင်းသည် ရုန်းလမ်းစဥ်၊ သိုင်းလမ်းစဥ်နှင့် ဓားလမ်းစဥ် ကဲ့သို့ ကျင့်ကြံရေး စနစ်တစ်ခု ဖြစ်ကာ စစ်ဧကရာဇ်နှင့် နယ်စားဖုန်းတို့ နှစ်ယောက်လုံး ထိပ်တန်း ဝိညာဥ်ကျင့်ကြံသူ အဖြစ် ကျော်ကြားသည်။ ဖုန်းရွှမ်၏ အနားတွင် ဖုန်းချီလည်း လိုက်ပါလာပြီး မိုးကြိုးဌာနတွင် အသက်သုံးဆယ်အောက်၌ ပြိုင်ဘက်ကင်းသည်အထိ ထူးချွန်သော ဝိညာဥ်အင်မော်တယ် ဖြစ်၏။ လက်ရှိတွင် သူ၏ မျက်နှာထားက ခက်ထန်ကြမ်းကြုတ်ကာ လူသတ်ငွေ့များ ဖုံးလွှမ်းနေ၍ ချစ်ရသူ ပိုင်လင်းအာ အသတ်ခံလိုက်ရသောကြောင့်ပင်။ ဤသားအဖသည် ပိုင်တောက်နှင့် တွေ့ဆုံပြီးဖြစ်သည်မှာ ထင်ရှား၍ ဖုန်းချီက နှလုံးသားကြေကွဲလောက်အောင် ဝမ်းနည်း ပူဆွေးနေ၏။

မိုးကြိုးဌာန၏ အဆင့်မြင့်အရာရှိများကို မျက်စိထဲ မထည့်ထားဟန်ဖြင့် ဖုန်းရွှမ်သည် ချောင်ရှန်းကို တိုက်ရိုက် မေးခွန်းထုတ်လိုက်သည်။

"ရွေးချယ်ပွဲ ပြိုင်ဘက်တွေကို မင်း စီစဥ်နိုင်လား"

"ဟုတ်ကဲ့"

ချောင်ရှန်းက ကိုယ့်ကိုကိုယ် ကာကွယ်ပြောဆိုရန် မတတ်နိုင်ခင်မှာပင် အမိန့်ပေးခံလိုက်ရ၏။

"လုယောင်ကို နောက်တစ်ချီမှာ အားနည်းတဲ့ ပြိုင်ဘက်နဲ့ တွေ့ပေးပြီး နောက်ဆုံးကျရင် ဖုန်းအာနဲ့ စီစဥ်ပေးလိုက်စမ်း"

၎င်းသည် ပိုင်တောက်ကဲ့သို့ အမှားတစ်ခု ဖြစ်လာနိုင်ပြီး ပိုင်လင်အာ အရှုံးပေးချင်သော်လည်း ဖခင်ဖြစ်သူ၏ ယုံကြည်မှု လွန်ကဲသောကြောင့် အသက်ဆုံးရှုံးခဲ့ရသည် မဟုတ်ပါလော။ ချောင်ရှန်းသည် မငြင်းပယ်ရဲသဖြင့် အကြံဉာဏ်တောင်းခံရန် မဟာစစ်သူကြီးနှစ်ယောက်ထံ ကြည့်လိုက်ရာ စကားသံ ထွက်ပေါ်လာသည်။

"အစ်ကိုဖုန်း၊ သေချာလား"

"အေး။ ငါ့သားရဲ့ အတွင်းစိတ်မှာ နတ်ဆိုးတစ်ကောင် ခြောက်လှန့်နေတယ်။ သူက ဒီတိုက်ပွဲကို ရှောင်လိုက်ရင် တစ်ဘဝလုံး စိတ်အနှောင့်အယှက် ဖြစ်နေလိမ့်မယ်"

ချစ်သူ အသတ်ခံလိုက်ရသည်ကိုပင် လက်စားမချေနိုင်လျှင် ယောက်ျားတစ်ယောက်မှာ ရှင်သန်နေစရာ အကြောင်းမရှိပေ။ အကယ်၍ ယွမ်ရှောင်သည်လည်း တူညီသော အခြေအနေတွင် ရှိလျှင် နှစ်ခါပြန် စဥ်းစားမနေဘဲ တိုက်ခိုက်ပေလိမ့်မည်။

ယွမ်ရင်သည် ဖုန်းရွှမ်ကို ခေါ်ဆောင်ကာ အခြားသူများ မသိစေလိုဟန်ဖြင့် ကောင်းကင်အထက်ရှိ တိမ်တိုက်များအတွင်း ဝင်ရောက်သွားခဲ့သည်။

"အစ်ကိုဖုန်း၊ ကျုပ် စကားနည်းနည်း ပြောချင်တယ်။ လုယောင်က ပုံမှန်အတိုင်း မဟုတ်ဘဲ စွမ်းအား မြင့်တက်လာနေတယ်။ ဖုန်းချီ လက်စားချေချင်တာကို ကျုပ် နားလည်ပေမယ့် တစ်ဖက်လူက လူဝင်စားတစ်ယောက် ဖြစ်နိုင်တယ်။ တကယ်လို့ သူက အစစ်အမှန် လုယောင် မဟုတ်ဘဲ အစွမ်းထက် အင်မော်တယ်တစ်ယောက် ပူးကပ်နေတာဆိုရင် ကောင်းကျိုးထက် ဆိုးကျိုး များလိမ့်မယ်"

"သိတယ်။ သိတယ်။ ဒါကြောင့် ငါကိုယ်တိုင် တိုက်ခိုက်မယ်"

ဖုန်းရွှမ်သည် အေးစက်စက် ရယ်မောရင်း ဝိညာဥ်ပူးကပ်ခြင်း အသုံးပြုရန် စီစဥ်ထားကြောင်း ရှင်းပြသည်။ သူကိုယ်တိုင်လည်း နားခိုရာဂိုဏ်းနှင့် ပတ်သက်သူတစ်ယောက်ကို သတ်ဖြတ်လိုစိတ် ပြင်းပြနေကာ ဓားဌာနမှ စုံစမ်းစစ်ဆေးချင်သည်ဆိုလျှင်တောင် လုယောင်၏ ဝိညာဥ်ကို ချုပ်နှောင်ထားနိုင်စွမ်း ရှိ၏။

"ဒီကိစ္စကလည်း မူမမှန်ဘူး။ လမင်းဓားနတ်ဘုရားဆီ အကျိုးအကြောင်း မေးထားတယ်။.တကယ်လို့ ချောင်ရူ လိမ်ညာနေတာဆိုရင် သူ့ကို ရိုးရိုးလေး အဆုံးသတ်လိုက်လို့ ရပါတယ်"

"ချောင်ရူက ငါတို့ကို လိမ်ရဲတယ်လား"

"ဒီကောင်မက ရူးနေတာဆိုတော့ ဖြစ်နိုင်ချေ ရှိတယ်"

ဉာဏ်ကောင်းပုံရသော ယွမ်ရင်သည် ထိုအချက်ကို ခဏအတွင်း စဥ်းစားနိုင်ခဲ့သည်။ လမင်းဓားနတ်ဘုရားထံမှ သတင်းပို့အဆောင် ပြန်ရောက်လာချိန်တွင် ရွေးချယ်ပွဲ တိုက်ပွဲများ ပြီးမပြီး မသိရသေးပေ။ ထိုအချိန်တွင် မိုးကြိုးကိုးသွယ် ရင်ပြင်၌ ဒေါသတကြီး ဆဲဆိုသံများ တခဲနက် ထွက်ပေါ်လာသောကြောင့် လုယောင် ရောက်လာကြောင်း သိနိုင်၏။ အဖြူရောင်ဝတ် လူငယ်လေးသည် ဖိအားများကို တစ်ကိုယ်တော် ရင်ဆိုင်နေရသော်လည်း တည်ငြိမ်စွာ ရပ်နေပြီး မိုးကြိုးဌာန၏ အင်မော်တယ်သန်းချီကမူ အားပါးတရ ကျိန်ဆဲနေကြသည်။

"သစ္စာဖောက်"

မိုးကြိုးဌာန၏ စီရင်သူတစ်ယောက် ဖြစ်သော်လည်း အဆင့်တက်လာသည်နှင့် တပြိုင်နက် ဓားဌာနသို့ ပြောင်းရွှေ့သွားခြင်းက သူ၏ အမည်ကို အမည်းစက်ထင်ကျန်စေရန် လုံလောက်၏။ သို့သော် အရေးမပါသူများ အာခေါင်ကွဲအောင် ဆဲဆိုနေပါစေ၊ သူက လျစ်လျူရှုထားပြီး လုပ်စရာရှိသည်များ ဆက်လုပ်ရန် ဆုံးဖြတ်ထားသည်။ ကောင်းကင်ပျံသန်းမြို့တော်တွင် သေမျိုးလောကများနှင့် ပတ်သက်သည့် အမှန်တရားကို လျူမူ ထုတ်ဖော်ခဲ့သော်လည်း ကောင်းကင်ရုံးတော်၌ သတင်းတစ်စွန်းတစ်ပင် ထွက်မလာခဲ့သဖြင့် လက်မည်းကြီးများမှ နောက်ကွယ်တွင် ချုပ်ကိုင်ထားကြောင်း သိနိုင်၏။ ကောင်းကင်အရာရှိ အဆင့်ခြောက်အောက် အင်မော်တယ်များဆိုလျှင် သေမျိုးလောက၏ ပူဇော်သက္ကာရကို လက်ခံခွင့် မရှိသောကြောင့် မျက်မြင်မတွေ့ရသဖြင့် ယုံကြည်မည် မဟုတ်ချေ။

ဤသို့ဖြင့် ရွေးချယ်ပွဲ ပြန်လည် စတင်ပြီဖြစ်ကာ လက်ရှိအချီ ရောက်သည်အထိ တောင့်ခံထားနိုင်သော ပါရမီရှင် ၃၆ယောက်သာ ကျန်ရစ်၏။ ထိုအချီ ပြီးဆုံးသွားလျှင် ၁၈ယောက်သာ ကျန်ခဲ့မည် ဖြစ်ကာ နောက်ဆုံးအချီပြီးလျှင် ပါရမီရှင် ကိုးယောက်သည် အဆင့်ခြောက် အရာရှိအဖြစ် တရားဝင် ရာထူးတိုး၍ အင်မော်တယ် ပြိုင်ပွဲ၌ မိုးကြိုးဌာန ကိုယ်စားပြုများ ဖြစ်လာကြပေလိမ့်မည်။ မိုးကြိုးအဆင့်သတ်မှတ်ချက်က တောက်ပလင်းလက်လာကာ လုယောင်နှင့် ဟယ်ပုဆိုသော အမည်များ ပထမဆုံး ထွက်ပေါ်လာသောကြောင့် ထပ်မံ၍ တိုက်ခိုက်ရပေတော့မည်။ ဤအချီတွင်လည်း ပထမဆုံး ပြိုင်ပွဲဝင်ရမည် ဖြစ်သောကြောင့် ယခင်ပွဲစဥ်များ ကြိုးကိုင်ခံရသည် ဖြစ်ဖြစ် မဖြစ်ဖြစ်၊ ယခု ခြယ်လှယ်ခံထားရကြောင်း သိသာနေကာ နောက်ဆုံးအချီနှစ်ခုမှာ သေရေးရှင်ရေးတမျှ အရေးကြီးလာ၏။

ယွမ်ရှောင်သည် တိမ်တိုက်အမှတ်တစ်သို့ တက်ပြီး ပြိုင်ဘက်ကို မြင်လိုက်ရသောအခါ ဤတစ်ကြိမ်ထက် နောက်ဆုံးအချီကသာ အရေးပါကြောင်း နားလည်သွားသည်။ ရန်သူက သဘောထားကြီးစွာဖြင့် အားနည်းသူတစ်ယောက်ကို ပြိုင်ဘက်အဖြစ် စီစဥ်ပေးကာ သူ့ကို အချိန်မဖြုန်းခဲ့ပေ။ ဟယ်ပုဆိုသူမှာ ပိုင်လင်းအာထက် အားနည်းသောကြောင့် တိုက်ပွဲစစချင်း လက်နှစ်ဖက်မြှောက်ကာ အရှုံးပေးသွားခဲ့သည်။

"လုယောင် ငါ့ကို မသတ်ပါနဲ့။ အရှုံးပေးတယ်"

"ကောင်းပြီ"

အချိန်က အသက်တမျှ အရေးကြီးနေသောအခါ ယွမ်ရှောင်သည် တိမ်တိုက်အပေါ်မှ ထွက်ခွာသွားရန် ခြေလှမ်းပြင်လိုက်စဥ် ဟယ်ပုက စကားဆိုလာပြန်သည်။

"နေဦး"

"ဘာကိစ္စ ရှိသေးလဲ"

"မင်းရော မင်းအမေ မျက်ကန်းကြီးရော ငရဲမှာ ကောင်းကောင်း မနေပါရစေနဲ့"

ဟယ်ပု၏ စော်ကားမှုကြောင့် ပရိသတ်များ ပွဲကျသွားသော်လည်း ဓားအလင်းတန်းတစ်ခု ဖြတ်ခနဲ လက်သွားကာ အသံများ တိတ်ဆိတ်သွားစေ၏။ တစ်ဖက်လူ၏ ခေါင်းက နုတ်နုတ်စင်းခံလိုက်ရပြီး နေရာတွင် မတ်တပ်ရပ်နေသည်မှာ ခေါင်းပြတ်ခန္ဓာကိုယ်ကြီးသာ ဖြစ်ကာ ယွမ်ရှောင်သည် ဓားဝိညာဉ်ကို ပြန်လည် ရုတ်သိမ်း၍ ဆက်လျှောက်သွားခဲ့သည်။

"လုယောင်၊ ပြိုင်ဘက်က လက်နက်ချတာတောင် မင်းက ပေါ်တင် လူသတ်ရဲတယ်။ အင်မော်တယ်တစ်သန်းကျော် သက်သေခံနိုင်တယ်။ မင်းက ဥပဒေကို ချိုးဖောက်လိုက်ပြီ"

"ဓားဌာနတောင် မင်းကို ကာကွယ်ပေးနိုင်မှာ မဟုတ်ဘူး"

"အခုချက်ချင်း အရေးယူပေးပါ"

အပြစ်တင်သံများ ကျယ်လောင်စွာ ထွက်ပေါ်လာသော်လည်း ယွမ်ရှောင်က ခပ်ပြုံးပြုံး ရှိနေသဖြင့် ယွမ်ရင်မှာ မှတ်ချက် မပေးဘဲ မနေနိုင်တော့ပေ။

"ဒီကောင်က တိုက်ပွဲကို ကြိုးကိုင်ထားမှန်း သိလို့ ဘာမှတောင် ထိန်းချုပ်မနေတော့ပါလား"

"ထားလိုက်ပါ။ သူ့အတွက် သေလမ်းကလွဲရင် ရွေးစရာ မရှိဘူး"

ဖုန်းရွှမ်ကမူ တစ်ချက်သာ စိုက်ကြည့်၍ သတ်ဖြတ်လိုစိတ် ပြင်းထန်စွာဖြင့် အေးစက်စက် ပြောလိုက်လေသည်။