အခန်း (၄၇-၄၈)

အခန်းး ၄၇ - ဥပဒေအပြင်ဘက်ကလူသား၏ သရုပ်မှန်။

လူပေါင် အံ့အားသင့်သွားသည်။ ဤမျိုးစိတ်မှာ ခြင်္သေ့နှင့် ကျားတို့ကို မျိုးစပ်ထားခြင်းဖြစ်ပြီး အလွန်ရှားပါးလှသည်။သို့သော် ရှေ့တွင်မြင်နေရသော အသွင်ပြောင်းကျားမှာ သူစိတ်ကူးထားသည်နှင့် လုံးဝကွဲပြားနေပြီး ၎င်း၏ ရုပ်သွင်ပြင်မှာ အလွန်ပင် ခန့်ညားထည်ဝါလှသည်။

၎င်း၏ အေးစက်လှသော မျက်လုံးအစုံနှင့်တစ်ချက်ကြည့်ရုံဖြင့် သူတို့အားလုံး ကျောချမ်းသွားကြလေသည်။တောအုပ်ထဲမှ ၎င်း၏ ကိုယ်ခန္ဓာတစ်ခုလုံး ထွက်လာသောအခါ သင်္ချိုင်းသူခိုးအဖွဲ့သား အများအပြားမှာ မသိစိတ်ဖြင့် နောက်သို့ ဆုတ်လိုက်ကြသည်။

“သူ တော်တော်ဗိုက်ဆာနေပုံပဲ...”

တစ်စုံတစ်ယောက်၏ အသံမှာ တုန်ရီနေသည်။အသွင်ပြောင်းကျားမှာ သတ္တဝါအကြီးကြီး ဖြစ်သော်လည်း ၎င်း၏ ဝမ်းဗိုက်မှာ ချောင်ကျနေပြီး အချိန်အတော်ကြာ အစာမစားရသေးပုံရသည်။

အဘိုးကြီးက ချက်ချင်းဆိုသလို

“အားလုံး လူစုခွဲလိုက်ကြ။ငါတို့ သူ့ကို နှိုးလိုက်မိပြီ။ စောစောက ယမ်းဖောက်တာက သူအိပ်နေတဲ့ ဂူနဲ့ အရမ်းနီးနေပုံရတယ် ဒါမှမဟုတ်ရင် ဒါက သင်္ချိုင်းစောင့်သားရဲတစ်ကောင်ဖြစ်နိုင်တယ်။”

သူ့ခန့်မှန်းချက် မှန်ပါသည်။အသွင်ပြောင်းကျားမှာ သူတို့၏ ယမ်းပေါက်ကွဲသံကြောင့် နိုးလာခြင်း ဖြစ်သည်။

“ဂျွတ် ဂျွတ်”

အသွင်ပြောင်းကျား၏ ခြေသည်းများအောက်ရှိ ချုံပုတ်များမှာ ချက်ချင်းပင် ကြေမွသွားသည်။ထိုအချိန်မှာပင် ၎င်း၏ အကြည့်မှာ သေနတ်ကိုင်ကာ အနီးဆုံးတွင် ရှိနေသော သင်္ချိုင်းသူခိုး ဆီသို့ ကျရောက်သွားသည်။

“ဟေ့ကောင် ဒီကိုလာခဲ့။”

ခွမ်းဟူက လက်ထဲက လေးဂွကို မြှောက်တင်လိုက်သည်။ကြောက်လန့်နေသောကြောင့် သူ၏ နဖူးတွင် ချွေးစေးများ ထွက်နေပြီဖြစ်သည်။

တောတောင်ထဲသို့ မကြာခဏ သွားလာပြီး တောကောင်များနှင့် ရင်ဆိုင်ဖူးသူများသာ သိကြသည်မှာ ကျားများသည် စာအုပ်ထဲတွင် ဖော်ပြထားသကဲ့သို့ သတ်ဖြတ်ရန် သို့မဟုတ် ကိုင်တွယ်ရန် မလွယ်ကူကြောင်းပင်။

ထို့အပြင်ရှေ့တွင်ရှိနေသော သတ္တဝါမှာ မယုံနိုင်လောက်အောင် ကြီးမားနေသည်။

“ဟေး...ဟေးးး”

လုပေါင်က ရုတ်တရက် ထအော်လိုက်သည်။

အသွင်ပြောင်းကျားသည် လှုပ်ရှားမှုကို မရပ်တန့်သော်လည်း ခေါင်းလှည့်ကာ လုပေါင်ကို ကြည့်လိုက်သည်။လုပေါင်ကို မြင်သောအခါ ၎င်း၏ အေးစက်ရက်စက်သော အကြည့်မှာ အနည်းငယ် ပြောင်းလဲသွားပြီး ခေတ္တမျှ ရပ်တန့်သွားသည်။

‘ငါ့ရဲ့ စွမ်းအားက သိပ်မထိရောက်တာလား။’

လူပေါင်သည် သူ၏ တိရစ္ဆာန်များနှင့် ရင်းနှီးနိုင်စွမ်း မှာ ဤသတ္တဝါအပေါ်တွင် မျောက်ဘုရင်နှင့် တွေ့စဉ်ကလောက်ပင် အာနိသင်မရှိသည်ကို ပထမဆုံးအကြိမ် သတိပြုမိလိုက်သည်။

“ဝေါင်းးး”

သင်္ချိုင်းသူခိုးက လွတ်မြောက်ရန် နောက်ဆုတ်လိုက်စဉ်မှာပင် အသွင်ပြောင်းကျားက စတင်ခုန်အုပ်တော့သည်။ ၎င်း၏ ကြီးမားသော ကိုယ်ထည်မှာ မယုံနိုင်လောက်အောင် ဖျတ်လတ်လှပြီး လျှပ်စီးကဲ့သို့ မြန်ဆန်လှသည်။

“အမလေးးးး”

သင်္ချိုင်းသူခိုးကအလန့်တကြား အော်လိုက်မိသည်။ သူ့ရှေ့တည့်တည့်သို့ ရောက်လာသော အသွင်ပြောင်းကျားကို ကြည့်ကာ လက်ထဲမှ သေနတ်ဖြင့် ဒိုင်း ခနဲ ပစ်လိုက်တော့သည်။

သို့သော် ပို၍ အံ့ဩစရာကောင်းသည်မှာ ယအသွင်ပြောင်းကျား၏ ဖျတ်လတ်မှုပင်ဖြစ်သည်။၎င်းက ဘေးသို့ ဝဲခနဲ ခုန်ရှောင်လိုက်သဖြင့် ကျည်ဆန်မှာ လွဲချော်သွားတော့သည်။

“ဝုန်းးး”

“ဒိုင်းးးး”

“အားလုံး ဝိုင်းတိုက်ကြ။”

မြားများ ကျည်ဆန်များနှင့် ဒုန်းများပင် ပါဝင်လာသည်။ ခြင်္သေ့ကျားမှာ ပြေးလွှားခုန်ပေါက် ရှောင်တိမ်းနေပြီး ၎င်း၏ ထူးကဲလှသော ဖျတ်လတ်မှုမှာ လူတိုင်းကို ကျောချမ်းစေသည်။

“ဆရာ... ယမ်းတွေ။”

မြားနှင့် လေးများကို ရှောင်နိုင်သည်မှာ လက်ခံနိုင်သော်လည်း ကျည်ဆန်ကို ရှောင်နိုင်ခြင်းက သူတို့၏ အကြောက်တရားကို ထိတ်လန့်မှုဖြင့် ပြည့်နှက်စေသည်။

အထူးသဖြင့်အသွင်ပြောင်းကျား၏ အေးစက်သော အကြည့်ဖြင့် ပေါင်လုံးခန့်ရှိသော သစ်ပင်တစ်ပင်ကို လက်သည်းဖြင့် ခြစ်ထုတ်လိုက်သောအခါ သူတို့ အလွန်ကြောက်လန့်သွားကြတော့သည်။

၎င်းနှင့် ထိတွေ့မိသည်နှင့် သေဖို့သာ ရှိတော့သည်။

Live ကြည့်နေသော ပရိသတ်များမှာလည်း ရူးမတတ် ဖြစ်နေကြသည်။ ဤမျှ ရက်စက်ကြမ်းကြုတ်သော သတ္တဝါမျိုးကို မည်သူက မြင်ဖူးပါမည်နည်း။

နောက်ဆုံးတွင် သူတို့သည် တောရဲတိရစ္ဆာန်များ၏ ဘုရင် ဆိုသည်မှာ အဘယ်နည်း။ကျားနှင့် ခြင်္သေ့တို့သည် အဘယ်ကြောင့် အစာကွင်းဆက်၏ ထိပ်ဆုံးတွင် ရှိနေသနည်းဆိုသည်ကိုပါ နားလည်သွားကြသည်။ သူတို့သည် တိရစ္ဆာန်ဥယျာဉ်ထဲက ကျားများ ခြင်္သေ့များကို ကြည့်ကာ အထင်မှားခဲ့ကြခြင်း ဖြစ်သည်။

“ဘုရားရေ...”

အန်နာဘဲလ်သည်ပြန်လှည့်ရန် လမ်းမရှိတော့သလို ခံစားနေရသည်။ သူတို့သည် လုပေါင်၏ Live ထဲတွင် လုံးဝ နစ်မျောနေပြီး ကြည့်ရှုသူ ၉ သန်းနီးပါး ရှိနေခြင်းက သူမကို တုန်လှုပ်စေသည်။

တရုတ်ပြည်မှ Streamer တစ်ယောက်ကို မည်သူနှင့် ယှဉ်နိုင်ပါမည်နည်း။ အခြားနိုင်ငံများမှ ထိပ်တန်း Streamer အများအပြားမှာ လုပေါင်၏ Live နှင့် ယှဉ်လျှင် အရောင်မှိန်ကုန်ကြသည်။

“ဒီလို Live လွှင့်တာက အရမ်းအန္တရာယ်များတယ်...”

လုလင်းဟွာသည်လုပေါင်၏ ဘေးကင်းရေးသာမက Live ၏ ဘေးကင်းရေးအတွက်ပါ စိုးရိမ်လာသည်။ အကယ်၍ အခြား Streamer သာဆိုလျှင် ၎င်းကို ပိတ်ပင်ထားသည်မှာ ကြာပြီဖြစ်သည်။

သင်္ချိုင်းသူခိုးများ သေနတ်များ ယခု ဤသတ္တဝါကြီး သူ စိုးရိမ်သော်လည်း တစ်ဖက်တွင်လည်း စိတ်လှုပ်ရှားနေသည်။

အဘယ်ကြောင့်ဆိုသော်Ocean Live Stream ၏ အသုံးပြုသူအသစ်များမှာ အရှိန်အဟုန်ဖြင့် တိုးပွားနေသောကြောင့်ပင်။

“ကဲ... ရတနာနတ်ဘုရားနဲ့အတူ အမဲလိုက်ကြစို့။”

လုပေါင်သည်သူ၏ ခြေထောက်ကို ဖက်ထားသော ဟေးမီကို ဆွဲထုတ်ကာ တောအုပ်ဘက်သို့ ညွှန်ပြလိုက်သည်။

“ဝုတ် ဝုတ်”

ဟေးမီမှာအလွန်ကြောက်နေသဖြင့် နောက်သို့ အတင်းဆုတ်နေသည်။

“ဒီမှာနေတာ မလုံခြုံဘူး။ မြန်မြန်သွားပြီး တစ်ခုခု ဖမ်းခဲ့စမ်းပါ။ သူ ဗိုက်ဆာနေတာ ဗိုက်ဝသွားရင် အဆင်ပြေသွားလိမ့်မယ်။”

လုပေါင်ကဟေးမီ၏ ခေါင်းကို ပွတ်ပေးလိုက်သည်။

ဟေးမီ သတိဝင်လာပြီး အမြီးကို လိမ်ကာ တောနက်ထဲသို့ ပျောက်ကွယ်သွားသည်။

“ဝေါင်းးးး”

ကျယ်လောင်သော ဟိန်းသံကြီး ထပ်မံထွက်ပေါ်လာပြန်သည်။ လုပေါင်သည် နွယ်ပင်များနှင့် မှိုများ ဖုံးလွှမ်းနေသော ကျောက်တုံးကြီးပေါ်သို့ ခုန်တက်သွားသော အသွင်ပြောင်းကျားကြီးကို အံ့ဩတကြီး ကြည့်နေမိသည်။ ယမ်းပေါက်ကွဲမှုက ၎င်းကို မည်သည့် ထိခိုက်မှုမျှ မပေးနိုင်ခဲ့ပေ။

“မကောင်းတော့ဘူး သူက အရမ်းမြန်လွန်းတယ်။”

အဘိုးကြီး၏ မျက်နှာမှာ အလွန်တင်းမာနေသည်။ထို့နောက် သူ တစ်ခုခုကို သတိရသွားကာ ခွမ်းဟူ ကို မျက်ရိပ်ပြလိုက်သည်။ ခွမ်းဟူက ချက်ချင်း နားလည်သွားပြီး အခြားသူများနှင့်အတူ လုပေါင်ရှိရာသို့ ပြေးလာကြသည်။

“တောက်... ခင်ဗျားတို့ကတော့ တော်တော်လည်တာပဲ။”

လုပေါင်ကထိုမြင်ကွင်းကို ကြည့်ကာ မျက်စောင်းထိုးလိုက်သော်လည်း ထွက်မပြေးဘဲ ထိုလူများကို သူ့နောက်တွင် ခိုလှုံခွင့် ပေးလိုက်သည်။

Live လွှင့်နေစဉ်အတွင်း လူသေလျှင် မကောင်းပေ။ ထို့အပြင် သူသည် မျောက်ကန်ချက်ကို တတ်မြောက်ထားသဖြင့် ခြင်္သေ့ကျားနှင့် ထိပ်တိုက်ရင်ဆိုင်ရန် ယုံကြည်မှု ရှိနေသည်။

“ညီလေး... ငါတို့အသက်ကို ကယ်ပေးပါကွာ ငါတို့တွေ ညီလေးကို အများကြီး ဆုချပါ့မယ်။”

ခွမ်းဟူကလုပေါင် ထွက်မပြေးသည်ကို မြင်သောအခါ ချက်ချင်းပင် ကျေးဇူးတင်စကား ဆိုလိုက်သည်။

“ဘာဆုလဲဗျာ မကြာခင် ရဲတွေ လာဝိုင်းတော့မှာ။ ခင်ဗျားတို့ ဥပဒေချိုးဖောက်နေတာကို သိရဲ့လား။”

လုပေါင်ကမျက်စောင်းထိုးရင်း လေးကိုချကာ သစ်ပင်နောက်မှ ထွက်လာသည်။

ထောင်ကျရမည့် ရာဇဝတ်သားတစ်စုက သူ့ကို ဆုချချင်နေသည်တဲ့လား။

“ငါတို့တွေက ဒီကို ဂျင်ဆင်း လာတူးကြတာပါ ဒါက ဥပဒေမချိုးဖောက်ပါဘူး။ ဒီလက်နက်တွေကလည်း သေနတ်ဟောင်းတွေပါ။ ပြစ်မှုဆိုင်ရာ ဥပဒေ ပုဒ်မ ၁၂၈ အရဆိုရင် ဒီအခြေအနေက မပြင်းထန်တာကြောင့် ကျုပ်တို့ ညီအစ်ကိုတွေဟာ ထောင်ဒဏ် ၃ နှစ်အောက် သို့မဟုတ် ထိန်းသိမ်းရုံလောက်ပဲ ကျခံရမှာပါ။”

ခွမ်းဟူကသူ၏ ဖြူဖွေးသော သွားများကို ဖြဲပြရင်း ရယ်မောလိုက်သည်။

‘ဥပဒေကို အလွတ်ကျက်ထားတာလား။တကယ့်ကို ဥပဒေပြင်ပကလူသားတွေလိုပဲအထင်ကြီးစရာပဲ။’

လုပေါင်တွေးလိုက်သည်။ အကယ်၍ ဤလူများသည် ဥပဒေပါရဂူ ကျန်းစန် ကဲ့သို့သော ရှေ့နေမျိုးကိုသာ ငှားလိုက်လျှင် တစ်ဖက်က ရှေ့နေကိုပင် ထောင်ချပစ်နိုင်လိမ့်မည်။

“အသွင်ပြောင်းကျားကြီး လာနေပြီ။”

ပြင်းထန်သော လေပြင်းတစ်ခုနှင့်အတူ အသွင်ပြောင်းကျားကြီး ချဉ်းကပ်လာရာ လုပေါင်က မဆိုင်းမတွဘဲ ရှေ့မှ ကာကွယ်လိုက်သည်။

“ဝေါင်းးး”

အသံမှာ နားကွဲမတတ် ကျယ်လောင်လှသည်။ သူ မျှော်လင့်ထားသည့်အတိုင်း အသွင်ပြောင်းကျားကြီး ရပ်သွားသည်။၎င်းက ဒေါသတကြီး ဟိန်းဟောက်နေသော်လည်း သူ့ကို တိုက်ရိုက် တိုက်ခိုက်ခြင်း မပြုပေ။

ဟိန်းသံအဆုံးတွင် တောအုပ်တစ်ခုလုံး တိတ်ဆိတ်သွားသည်။လုပေါင်က လက်တစ်ဖက်ကို ဖြည်းညှင်းစွာ မြှောက်ကာ အချက်ပြလိုက်သည်။ဤစွမ်းအားကို ရရှိပြီးနောက်ပိုင်း ယခုကဲ့သို့ ရန်လိုပြီး သူ့ကို အချိန်မရွေး ဆွဲဖြဲပစ်တော့မည့် သတ္တဝါမျိုးနှင့် ပထမဆုံးအကြိမ် တွေ့ဖူးခြင်း ဖြစ်သည်။

ရုတ်တရက် ခြင်္သေ့ကျားကြီး၏ လည်ပင်းတွင် သံချေးတက်နေသော ကြေးခေါင်းလောင်းတစ်ခု ဆွဲထားသည်ကို မြင်လိုက်ရသဖြင့် လုပေါင်၏ နှလုံးခုန်သံ ခေတ္တရပ်သွားသည်။

ဒါကို တစ်စုံတစ်ယောက်က ဆွဲပေးထားတာလား။

“စိတ်အေးအေးထားပါ ရတနာလေးရဲ့။ ဗိုက်ဆာနေတာလား။ငါက ဝံပုလွေဂူ ကျားဂူနဲ့ မျောက်ဘုရင်ဂူတွေမှာ အိပ်ခဲ့ဖူးတဲ့ Streamer အကြီးစားလေ။အခု ငါ Live လွှင့်နေတာမို့လို့ မျက်နှာသာပေးပြီး ပူးပေါင်းပေးပါဦး။ သိပ်ပြီး ရိုင်းစိုင်းမနေပါနဲ့။ ဘာစားချင်လဲ ပြော ငါ ဖမ်းပေးမယ်။”

လုပေါင်က ဖြည်းဖြည်းချင်း ချဉ်းကပ်ကာ ဖျောင်းဖျလိုက်သည်။

“ဝေါင်းးး”

အသွင်ပြောင်းကျားကြီးမှာ အလွန်စိတ်လှုပ်ရှားနေပြီး ဟိုဟိုဒီဒီ လမ်းလျှောက်ရင်း တိုးတိုးလေး ဟိန်းဟောက်နေသည်။ ၎င်း၏ အေးစက်သော မျက်လုံးများတွင် သွေးဆာနေသည့် အရိပ်အယောင်များ ပြည့်နှက်နေသည်။

“ဟိုမှာ ဆိတ်ရှိသေးတယ်။”

ချန်ဂျွန်ဂျွန်ကတောင်လေးကို လှမ်းကြည့်လိုက်သည်။

“ဟင် အော်... ဟိုမှာ ဆိတ် ဆိတ်။”

တောင်လေးကသတိဝင်လာပြီး အဝေးက ကျောက်တုံးပေါ်တွင် သေနေသော တောဆိတ်တစ်ကောင်ကို ညွှန်ပြလိုက်သည်။၎င်းမှာ သူတို့ အမဲလိုက်ထားပြီး ညစာအတွက် ဖုတ်စားရန် ပြင်ထားသော ဆိတ်ဖြစ်သည်။

“ဆိတ်က ဟိုမှာ။”

ချန်ဂျွန်ဂျွန်ကလုပေါင်ကို အချက်ပြလိုက်သည်။

လုပေါင်လည်းဆိတ်ကို မြင်သွားသည်။ သူက နောက်သို့ လှည့်ကြည့်ကာ လက်နှစ်ဖက်ကို ခါယမ်းရင်း

“ဒါက တောဆိတ်လေဗျာ နိုင်ငံတော်က ကာကွယ်ထားတဲ့ သတ္တဝါ ကျွန်တော် ဒါကို ကျွေးလို့ မဖြစ်ဘူး။”

‘ငါက အကောင်းမြင်စိတ်တွေ ဖြန့်ဝေနေတဲ့ Streamer ပါဆိုမှ ငါ့ကို ဒုက္ခပေးချင်နေကြတာလား။’

“ဘယ်က ကာကွယ်ထားတဲ့ သတ္တဝါလဲဗျ။ ဒါ တောဆိတ်မဟုတ်ပါဘူး။ ရွာသားတွေဆီက ဝယ်လာတဲ့ အိမ်မွေးဆိတ်ပါ။ ဒီလို လူသူမရှိတဲ့နေရာမှာ ဘယ်က တောဆိတ်ကို သွားဖမ်းမလဲ။စိတ်မပူပါနဲ့ ညီလေးရာ တို့တွေက ဥပဒေကို လေးစားတဲ့ နိုင်ငံသားကောင်းတွေပါ။”

ခွမ်းဟူသည် လုပေါင်၏ Live မှာ တကယ်ဖြစ်လိမ့်မည်ဟု ယုံကြည်သွားသည်။ မဟုတ်လျှင် ဤကဲ့သို့သော အခြေအနေမျိုးတွင် မည်သူက ဤမျှ အသေးစိတ်များကို ဂရုစိုက်နေပါမည်နည်း။

‘ခင်ဗျားတို့က တကယ်ပဲ အေးဆေးနေနိုင်တာလား။ရှေ့မှာ အသွင်ပြောင်းကျားကြီး ရှိနေတာကို။”

..

လူပေါင်က ထိုလူများ၏ ပြစ်မှုမှာ သိပ်မပြင်းထန်ဟု တွေးမိသည်။

‘ရှေ့နေတွေကဒီလောက်အထိ ဘဝင်မြင့်နေတာ မဆန်းပါဘူးလေ။’

အခန်း ၄၈ - ငါ့ကို အရေးမပါတဲ့ဥပဒေတွေနဲ့ လာပတ်ချင်တာလား။

အိပ်ပျော်နေရင်း အနှိုးခံရသဖြင့် စိတ်တိုနေသည့်အပြင် ဗိုက်ကလည်း ဆာ အပြင်ထွက်လာတော့လည်း တိုက်ခိုက်ခံရပြန်သဖြင့် အသွင်ပြောင်းကျား ၏ လက်ရှိအခြေအနေမှာ အလွန်ပင် မတည်မငြိမ် ဖြစ်နေသည်။

ဒါပေါင်သည် ယုန်တစ်ကောင်ကို ပါးစပ်ဖြင့်ခဲကာ ပြေးလာရင်း ခြေလှမ်းအနည်းငယ်အကွာတွင် ရပ်တန့်သွားသည်။ သူ မော့ကြည့်လိုက်သောအခါ အသွင်ပြောင်းကျား၏ အရှိန်အဝါကြောင့် ကြောက်လန့်တကြား အမြီးလေးကုပ်သွားတော့သည်။

“ဂူး...ဂူး”

နှင်းလုံးလေးသည် အတောင်ပံကို ခတ်ကာ အနားသို့ တိုးကပ်လာသည်။သူသည် ပျံသန်းနိုင်သည်ဟု မိမိကိုယ်ကိုယ် ယုံကြည်မှုရှိ၍လားမသိ ထိုသတ္တဝါကြီးကို အနီးကပ်ကြည့်ရန် ငုံ့ကြည့်လိုက်သည်။

“ဝေါင်းးး”

ခြင်္သေ့ကျားသည် ဂနာမငြိမ်စွာ ရှေ့တိုးနောက်ဆုတ် လမ်းလျှောက်နေသည်။ နှင်းလုံးလေး အနားသို့ ရောက်လာသောအခါ ၎င်းက ကျောက်တုံးများကိုပင် ကွဲအက်စေနိုင်လောက်သည့် ဟိန်းသံကြီးဖြင့် အော်ဟစ်လိုက်ရာ လုပေါင်ပင်လျှင် နားထဲတွင် ခေတ္တမျှ အူသွားရသည်။

အဝေးက နားထောင်စဉ်ကမူ အားကောင်းမောင်းသန်ပြီး ခန့်ညားသည်ဟု ထင်ရသော်လည်း အနီးကပ်တွင်မူ အရာအားလုံးကို ဖျက်ဆီးပစ်နိုင်လောက်သည့် အစွမ်းရှိပုံရသည်။

ရုတ်တရက် လုပေါင်၏ မျက်မှောင် ကျုံ့သွားသည်။နှင်းလုံးလေး ခေတ္တမျှ သတိလစ်သွားသကဲ့သို့ ဖြစ်ကာ မြက်ခင်းပေါ်သို့ ဘုတ်ခနဲ ပြုတ်ကျသွားသည်။သူသည် အတောင်ပံများကို အတင်းခတ်နေသော်လည်း ပြန်လည်ပျံသန်းနိုင်ခြင်း မရှိတော့ပေ။

၎င်းမှာ အသွင်ပြောင်းကျားနှင့် အလွန်နီးကပ်နေသည်။အသွင်ပြောင်းကျားသည် စနိုးဘောကို တိုက်ခိုက်ရန် စတင်လှုပ်ရှားတော့သည်။

“ဖယ်စမ်းးးးး”

လုပေါင်သည် ခြင်္သေ့ကျားနှင့် ဖြည်းဖြည်းချင်း နားလည်မှုယူရန် ကြိုးစားချင်သော်လည်း ယခုတော့ ရှေ့သို့ ခုန်ဝင်လိုက်ရတော့သည်။အသွင်ပြောင်းကျားသာ နှင်းလုံးလေးကို တိုက်ခိုက်လိုက်လျှင် ထိုငှက်ကလေး သေမှာ သေချာသည်။

“ဝေါင်းးးး”

ထိုအချိန်တွင် လုပေါင်သည် မိမိကိုယ်ကိုယ် လျှပ်စီးကဲ့သို့ မြန်ဆန်နေသည်ဟု ခံစားလိုက်ရသည်။လေတိုက်နှုန်းမှာ နှေးကွေးသွားသလို လှုပ်ခါနေသော မြက်ပင်များမှာလည်း ရပ်တန့်နေသလိုပင်။အသွင်ပြောင်းကျား၏ လှုပ်ရှားမှုများပင်လျှင် အလွန်နှေးကွေးသွားသည်။

အမှန်တကယ် နှေးသွားသည်လော။မဟုတ်ပါ။လူပေါင်ကိုယ်တိုင်က မြန်သွားခြင်းပင်ဖြစ်သည်။

“ဘုတ်”

အားလုံး၏ အံ့ဩနေသော အကြည့်များရှေ့တွင် ခန္ဓာကိုယ်ချင်း တိုက်မိသံ ထွက်ပေါ်လာပြီး လုပေါင်နှင့် အသွင်ပြောင်းကျားတို့ မြေပြင်ပေါ်သို့ဘ လူးလိမ့်သွားကျတော့သည်။အသွင်ပြောင်းကျားမှာ အလွန်ကြီးမားသော်လည်း လုပေါင်က ၎င်း၏လည်ပင်းကို အသေအလဲ ဖက်ထားကာ ခြေထောက်များဖြင့်လည်း ၎င်း၏ကိုယ်လုံးကို ပတ်ထားလိုက်သည်။

“ဒါပေါင် နှင်းလုံးလေးကို ခေါ်သွားစမ်းးးး”

လုပေါင်က သတ်ဖြတ်တော့မည့်မျက်နှာဖြင့် ဒါပေါင်ကို အော်ပြောလိုက်သည်။အသွင်ပြောင်းကျား၏ အားမှာ အလွန်ကြီးမားလှသည်။ ၎င်း၏ ကြွက်သားများ ရုန်းကန်လိုက်တိုင်း လုပေါင်ဝတ်ထားသော ကျပ်နေသည့် အင်္ကျီများမှာ စတင် စုတ်ပြတ်လာသည်။

ဒါပေါင်သည် ချက်ချင်း တုံ့ပြန်လိုက်သည်။ သူသည် နှင်းလုံးလေးကို တစ်ချက်ကြည့်ကာ လုပေါင် ဖိထားသော ခြင်္သေ့ကျားကို ဝိုင်းဝန်းတိုက်ခိုက်တော့သည်။

“မင်းကိုငါသွားတော့လို့ပြော‌နေတယ်လေ။”

သတ္တိရှိလှသော ဒါပေါင်ကို ကြည့်ကာ လုပေါင် ဒါသထွက်မိသလို စိတ်လည်းပူမိ သွားသည်။ ယခုအချိန်တွင် သူသည် အသွင်ပြောင်းကျား၏ အားအစစ်အမှန်နှင့် တိုက်ခိုက်ခြင်းခံ နေရပြီ ဖြစ်သည်။လုပေါင်သည် လက်မောင်းများကို အားပြုကာ အသွင်ပြောင်းကျားကိုဆွဲချကာ ဘေးသို့ လူးလိမ့်ရှောင်ထွက်လိုက်သည်။

ဒါပေါင်၏ တိုက်ခိုက်မှု လွဲချော်သွားပြီးနောက် သူသည် အားမလိုအားမရ အော်ဟစ်ကာ ရှေ့သို့ ထပ်မံ ခုန်ဝင်ပြန်သည်။

ဟေးမီသည်လည်း တောအုပ်ထဲမှ ခုန်ထွက်လာပြီး လူကြီးလက်မောင်းခန့် တုတ်ခိုင်သော ခြင်္သေ့ကျား၏ အမြီးကို ကိုက်ကာ ဒေါသတကြီး ဆွဲယမ်းနေတော့သည်။

“ထွက်သွားကြစမ်းးးးအသုံးမကျတဲ့ကောင်တွေ။”

“ဟဲဟဲ”

“ဝေါင်းးး”

အသွင်ပြောင်းကျား၏ ဟိန်းသံမှာ နာကျင်သံအဖြစ် ပြောင်းလဲသွားသည်။ လုပေါင်၏ ခွန်အားမှာ ကြီးမားလှသဖြင့် ၎င်း၏လည်ပင်းကို ချုပ်ကာ ကျောပေါ်တွင် ကပ်နေသောအခါ လူနှင့် တိရစ္ဆာန်မှာ မြေပြင်ပေါ်တွင် လူးလိမ့်နေပြီး ခွေးနှစ်ကောင်ကလည်း အတင်းလိုက်ကိုက်နေကြသည်။

နှင်းလုံးလေးသည် တဖြည်းဖြည်း သတိပြန်ဝင်လာကာ အတောင်ပံကို ယိုင်တိုင်တိုင်ခတ်ရင်း အထက်သို့ ပျံတက်သွားသည်။

“ဂူး... မင်းတို့ကိုလည်း ကောင်းကောင်းကြီး ဆဲသတ်ပြစ်မယ် ဂူး...”

လုပေါင်မှာ ဒေါသထွက်လွန်းသဖြင့် သွေးအန်မတတ် ဖြစ်နေရသည်။နှင်းလုံးလေးသည် ယိုင်တိယိုင်တိုင်ဖြင့် ဆဲဆိုရင်း တောထဲသို့ ပြန်ဝင်သွားသည်။

“ဖယ်ကြစမ်း ဖယ်ကြစမ်း အားလုံး ဖယ်ကြစမ်းးး”

“ဟဲဟဲ”

‘သခင်လေး မကြောက်ပါနဲ့၊ ကျွန်တော်တို့ ကာကွယ်ပေးပါ့မယ်’

ဟေးမီသည် ကိုက်လေလေ အားတက်လေလေဖြစ်နေကာ မရပ်မနား လိုက်ကိုက်နေတော့သည်။

“တို့တွေ ဝိုင်းကူသင့်လား...ဂလု”

သင်္ချိုင်းသူခိုးတစ်ဦးကတံတွေးကို ခက်ခက်ခဲခဲ မျိုချရင်း တုန်ရီသောအသံဖြင့် မေးလိုက်သည်။

မစ္စတာဟွမ်မှာမူ ထွက်သွားပြီဖြစ်သည်။ သက်တော်စောင့်တစ်ဦးက သူ့ကို ထမ်းသွားပြီး တောနက်ထဲတွင် ပျောက်ကွယ်သွားကြသည်။ ကျန်ရှိသော သက်တော်စောင့် သုံးဦးမှာလည်း ရှာဖွေရေးကို လက်လျှော့ကာ သူတို့နောက်သို့ သတိဖြင့် လိုက်သွားကြသည်။

“ခေါင်းဆောင်။”

“သူတို့ကို လွှတ်ထားလိုက်။”

ခွမ်းဟူသည် မစ္စတာဟွမ်တို့ သွားရာလမ်းကို ကြည့်ပြိးနောက် လုပေါင်နှင့် ခြင်္သေ့ကျားဆီသို့ ပြန်လှည့်ကြည့်ရင်း

“ဆရာ... တို့တွေလည်း အခု ထွက်သွားသင့်ပြီလား။”

အဘိုးကြီး၏ မျက်လုံးများမှာ အသွင်ပြောင်းကျား၏ လည်ပင်းရှိ ကြေးခေါင်းလောင်း ပေါ်တွင် ရပ်တန့်နေသည်။ သူသည် ခွမ်းဟူကို ဆွဲကာ တစ်စုံတစ်ခုကုိ တိုးတိုးလေး ပြောလိုက်သည်။

ခွမ်းဟူမှာ အံ့ဩသွားပြီးနောက် အသွင်ပြောင်းကျားလည်ပင်းမှ ကြေးခေါင်းလောင်းကို ကြည့်ကာ ဝမ်းသာအားရ ဖြစ်သွားသည်။

သူတို့သည် တစ်နှစ်ပတ်လုံး ဤအရာများနှင့် ထိတွေ့နေရသူများ ဖြစ်သဖြင့် တစ်ချက်ကြည့်ရုံနှင့် သိသည်။ဤနေရာရှိ ဂူသင်္ချိုင်းမှာ မစ္စတာဟွမ်ပြောသကဲ့သို့ ရိုးရိုးရှင်းရှင်း မဟုတ်ပေ သို့မဟုတ် မစ္စတာဟွမ်က အမှန်အတိုင်း မပြောခဲ့ခြင်းလည်း ဖြစ်နိုင်သည်။

“ထွက်သွားကြစမ်းးး”

လုပေါင်မှာဒေါသတကြီး အော်ဟစ်နေပြီး အသွင်ပြောင်းကျား ပြန်ထမလာနိုင်အောင် အတင်းချုပ်ထားရသည်။

“ဟဲဟဲ”

“အသုံးမကျတဲ့ကောင်တွေ သူ တစ်ချက်ကိုက်လိုက်ရင် မင်းတို့ကိုဟိုကစားတော့မယ် ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ခွေးသားတွေရဲ့။”

“ဟဲဟဲ”

အလွန်တင်းမာနေသော Live မြင်ကွင်းမှာ ရုတ်တရက် ရယ်စရာမြင်ကွင်းအဖြစ် ပြောင်းလဲသွားသည်။လူနှင့် ကျားက လူးလိမ့်နေပြီး ခွေးနှစ်ကောင်က လိုက်ကိုက် ငှက်က ဆဲဆိုနေသည့် မြင်ကွင်းမှာ ပရိသတ်ကို ရယ်မောစေသည်။

“ငါ အရမ်းရင်ခုန်နေတာပဲ ဒါပေမဲ့ ဘာလို့ ရယ်ချင်နေတာလဲ မသိဘူး။”

“ ‘သခင့်အားကိုးနဲ့ မောက်မာတဲ့ခွေး’ ဆိုတဲ့ စကားပုံက ဒီခွေးနှစ်ကောင်နဲ့ တကယ့်ကို ကွက်တိပဲ။”

“ရတနာနတ်ဘုရား တကယ့်ကို မိုက်တယ်။ သူသာ အသွင်ပြောင်းကျားကို တကယ်နှိမ်နင်းချင်ရင် အဲဒီအကောင် ပြန်ခုခံနိုင်ပါ့မလား။”

“ငါ အသွင်ပြောင်းကျား အကြောင်း ရှာကြည့်ဖူးတယ် သူတို့က ရုပ်ဆိုးတယ်လေ။ ဒါပေမဲ့ ဒီအကောင်က အရမ်းလှတယ်။ပြီးတော့တကယ့်ကို ကြမ်းတမ်းတာပဲ။”

“သင်္ချိုင်းသူခိုးအဖွဲ့တောင် အံ့ဩနေကြပြီ။”

အလေးအနက်ထားရမည့် အခြေအနေ ဖြစ်သော်လည်း အကြိမ်တစ်ရာမက လူးလိမ့်နေကြသည်ကို ကြည့်ပြီးနောက် မည်သူမျှ တည်ငြိမ်မနေနိုင်တော့ပေ။

“ဒီနေ့ ကြည့်ရှုသူ ဆယ်သန်းကျော်သွားနိုင်တယ်။”

ထိုအချိန်တွင်လုလင်းဟွာ၏ နဖူးတွင် ချွေးစေးများ ထွက်နေပြီး စိတ်လှုပ်ရှားလွန်း၍ လက်များပင် တုန်နေသည်။ Ocean Live တွင် မကြုံစဖူးသော Streamer အကျော်အမော်တစ်ဦး ပေါ်ထွက်လာတော့မည် ဖြစ်သည်။ ၎င်းမှာ အကောင့်တုများဖြင့် ဆယ်သန်းပြည့်ခြင်းမျိုး မဟုတ်ဘဲ စစ်မှန်သော ဆယ်သန်းပင် ဖြစ်သည်။

သူသည် လူပေါင် ထိခိုက်မှာကိုလည်း စိုးရိမ်နေသလို အာဏာပိုင်များ၏ စစ်ဆေးမေးမြန်းခြင်း ခံရမှာကိုလည်း ကြောက်နေသည်။ သူ၏ ခံစားချက်မှာ အံ့ဩခြင်းနှင့် ဝမ်းသာခြင်းတို့ ရောပြွမ်းနေသည်။

မိနစ် ၂၀ အကြာတွင်... ဒါပေါင်မှာ ရပ်ကြည့်နေပြီး ဟေးမီမှာမူ မြေပြင်ပေါ်တွင် လဲလျောင်းကာ အမောဖြေနေသည်။ နှင်းလုံးလေးကတော့ သစ်ပင်ပေါ်တွင် အမွေးအတောင်များကို ပြုပြင်နေသည်။ လုပေါင်တစ်ယောက်သာ ခြင်္သေ့ကျားနှင့် နပန်းလုံးနေဆဲ ဖြစ်သည်။

“တို့တွေ တိုက်တာ ရပ်လို့ရမလား ငါအရမ်းမောနေပြီ။”

လုပေါင်မှာချွေးရွှဲနေသော်လည်း သူ၏ ခွန်အားမှာ တဖြည်းဖြည်း တိုးလာနေပုံရသည်။

အခြားတစ်ဖက်တွင်မူ အသွင်ပြောင်းကျားမှာ အားအင်ကုန်ခမ်းနေပုံရသည်။

“ဝေါင်း”

၎င်းက တိုးတိုးလေး ဟိန်းဟောက်လိုက်ရာ လုပေါင်က နားလည်လိုက်သည်။

လုပေါင် လက်လွှတ်လိုက်သောအခါ အသွင်ပြောင်းကျားသည် အမောတကောဖြင့် မြေပြင်ပေါ်တွင် လဲလျောင်းနေတော့သည်။

၎င်း၏ ကြီးမားသော ကိုယ်ထည်မှာ အနည်းငယ် တုန်ခါနေပြီး မျက်လုံးထဲမှ အေးစက်ဒေါသထွက်မှုများ ပျောက်ကွယ်ကာ ဝေဝါးသောအကြည့်များဖြင့် အစားထိုးဝင်ရောက်လာသည်။

လုပေါင် ပြန်လှည့်ကြည့်လိုက်သောအခါ ထိုလူအုပ်မှာ မည်သို့သော လူစားမျိုးလဲဆိုသည်ကို သူ နားမလည်နိုင်တော့ပေ။သူသည် သူ၏ အပေါ်အင်္ကျီကို ချွတ်၍ ဘေးသို့ ပစ်လိုက်ပြီးနောက် ဆိတ်ကို သွားယူလိုက်သည်။ တစ်ချက်ကြည့်ရုံနှင့် ၎င်းမှာ တောဆိတ်မှန်း သူသိသည်။

‘လူရမ်းကားတစ်စုကရွာသားဆီက ဝယ်လာတာတဲ့။ တောက်’

“ခေါင်းဆောင်... ကျုပ်တို့ ဘာလို့ ဒီမှာ ဆက်နေနေတာလဲ။”

တောင်လေး က ခွမ်းဟူကို ဆွဲကာ မေးလိုက်သည်။

“သူသာ တကယ် Live လွှင့်နေတာဆိုရင် ကျုပ်တို့ ပြေးလို့မလွတ်ဘူး။ဒီမှာပဲနေပြီး အဖမ်းခံဖို့ စောင့်နေတာ အကောင်းဆုံးပဲ။”

ခွမ်းဟူသည် လုပေါင် Live လွှင့်သည်ဖြစ်စေ မလွှင့်သည်ဖြစ်စေ ဤနေရာတွင် ဆက်နေခြင်းက အကောင်းဆုံးဖြစ်ကြောင်း နားလည်သွားသည်

“ဖျောက်သင့်တာ အကုန်ဖျောက်ပြီးပြီ၊ယ မီးရှို့သင့်တာ အကုန်ရှို့ပြီးပြီ။”

“ဂျွန်ဂျွန်... နောက်မှ ရှေ့နေကို ဆက်သွယ်လိုက်။”

“ဟုတ်ကဲ့”

နှစ်ပေါင်းများစွာ ဤအလုပ်ကို လုပ်လာကြသူများဖြစ်သဖြင့် အရာရာကို မည်သို့ စနစ်တကျ ကိုင်တွယ်ရမည်ကို သူတို့ ကောင်းကောင်းသိကြသည်။

အသွင်ပြောင်းကျားသည် ဆိတ်သားများကို စတင်စားသုံးနေပြီဖြစ်သည်။ ဟေးမီသည် လူစွမ်းကောင်း ဟန်ဆောင်ချင်သဖြင့် မျက်လုံးပြူးကာ ကြည့်နေသော်လည်း အနားသို့ မကပ်ရဲဘဲ ရှက်ကိုးရှက်ကန်းနှင့် နောက်ဆုတ်သွားသည်။ဒါပေါင်နှင့် နှင်းလုံးလေးတို့လည်း ထိုမြင်ကွင်းကို ကြည့်ကာ ထိတ်လန့်နေကြသည်။

လူပေါင်သည် ရုတ်တရက် အသံတစ်ခုကို ကြားလိုက်ရသည်။၎င်းမှာ သူနှင့် ရင်းနှီးသော အသံဖြစ်သည်။သူ၏ ထူးကဲသော အကြားအာရုံဖြင့် ခွဲခြားကြည့်ပြီးနောက် သူ သေချာသွသိားသည်မှာ ၎င်းမှာ ရဟတ်ယာဉ် အသံပင် ဖြစ်သည်။

‘ငါ ထင်တဲ့အတိုင်းပဲ... ကိစ္စတွေက တော်တော်ကြီးသွားပြီ။ ဒီလောက် လူတွေအများကြီး ကြည့်နေမှတော့ အာဏာပိုင်တွေ ချက်ချင်း တုန့်ပြန်မှာပေါ့။”

“ဟေး... ခင်ဗျားတို့ တစ်ယောက်မှ ဒီကနေ ထွက်မသွားနဲ့နော်။ ကျွန်တော်က အကောင်းမြင်စိတ်တွေ ဖြန့်ဝေနေတဲ့ Streamer တစ်ယောက်အနေနဲ့ ပြောမယ်တစ်ယောက်ယောက်သာ ထွက်ပြေးဖို့ ကြိုးစားရင်...”

“ဘုန်းးး”

လေးကြိုးသံမှာ မိုးကြိုးပစ်သကဲ့သို့ထွက်ပေါ်လာသည်။လုပေါင်၏ လှုပ်ရှားမှုမှာ အလွန်မြန်ဆန်လှသည်။သံသစ်သားမြား မှာ ခွမ်းဟူ၏ ဘေးနားရှိ သစ်ပင်ကြီးထဲသို့ နက်နက်ရှိုင်းရှိုင်း စိုက်ဝင်သွားပြီး မြားအမြီးပိုင်းမှာ တုန်ခါနေတော့သည်။

ခွမ်းဟူနှင့် အဖွဲ့သားများမှာ ထိတ်လန့်သွားကြသည်။ ဤမြား၏ အရှိန်နှင့်ဆိုလျှင် လူကိုသာ ပစ်လိုက်ပါက တစ်ဖက်သို့ ဖောက်ထွက်သွားမည် မဟုတ်ပါလား။

“ညီလေးရာ... တို့တွေကြားမှာ ဘာရန်ငြိုးမှ မရှိပါဘူး မင်းကလည်း...”

ခွမ်းဟူကသူတို့မှာ ရန်သူမဟုတ်ကြောင်း ပြသရန် လက်ကို အမြန်မြှောက်ပြလိုက်သည်။

“ဘာ ဘယ်သူက ခင်ဗျားညီလေးလဲ လာနောက်မနေနဲ့။ ကျွန်တော်လို အကောင်းမြင်စိတ်ရှိတဲ့ Streamer က ခင်ဗျားတို့လို လူတွေနဲ့ တန်းတူလား။ခင်ဗျားတို့ ဥပဒေချိုးဖောက်နေတာကို မေ့နေကြတာလား။”

ရဟတ်ယာဉ်သံမှာ လုပေါင်၏ နားထဲတွင် ပို၍ ကျယ်လောင်လာသည်။ မကြာခင် အားလုံး ကြားကြရတော့မည်။ သူသည် ဤလူများနှင့် မည်သို့သော ပတ်သက်မှုမျှ မရှိစေရပေ။

“ဟားဟား... ညီလေးကလည်း စနောက်နေပြန်ပြီ။ တို့တွေက ဂျင်ဆင်းရှာတဲ့သူတွေ ပါ ဘယ်လိုလုပ် ဥပဒေချိုးဖောက်မှာလဲ။ ကျုပ်တို့မှာ ဘိုးဘွားပိုင် တားမြစ်ပစ္စည်းလေးတွေ ရှိရုံပါ ဥပဒေနဲ့ စည်းကမ်းကို ဖောက်ဖျက်မယ့် အလုပ်မျိုး ဘယ်တော့မှ မလုပ်ပါဘူး။”

ခွမ်းဟူကမျက်နှာချိုသွေးကာ ပြောလိုက်သည်။

“ခင်ဗျားက ငါ့ကို အရေးမပါတဲ့ဥပဒေတွေနဲ့ လာပတ်ချင်တာလား။”

လုပေါင်က မျက်စောင်းထိုးလိုက်သည်။

“ဟင်”

ခွမ်းဟူသည်ရုတ်တရက် ခေါင်းလှည့်ကာ ကောင်းကင်ကို ကြည့်လိုက်သည်။

သူ့ဘေးက အဘိုးကြီးလည်း မော့ကြည့်လိုက်သည်။ အခြားသူများမှာမူ ခေတ္တမျှ ကြောင်နေပြီးနောက်မှ ရဟတ်ယာဉ်သံကို ကြားလိုက်ရသည်ာ

“လူတွေ လာနေပြီ။”

ထိုအချိန်တွင် ခွမ်းဟူနှင့် အခြားသူများမှာ လုပေါင် ဘာကြောင့် ရုတ်တရက် သူစိမ်းဆန်သွားသည်ကို နားလည်သွားကြတော့သည်။