နတ်ကျား အာကျဲ

တောင်ကြားဂူဟောင်း။

တန်ဝမ်ကျဲ မျက်လုံးပွင့်လာသည်။အဝေးတစ်နေရာမှ ကြက်ဖတွန်သံ ကြားလိုက်ရသည်။ ခေါင်းလှည့်ကြည့်လိုက်သောအခါ ကိုယ်လုံးတီးနှင့် နှစ်တစ်ထောင် မြေခွေးမသည် ကြက်ဖကြီးတစ်ကောင်ကို ဖမ်းကိုင်ကာ အစိမ်းလိုက် ဝါးစားနေသည်ကို တွေ့လိုက်ရသည်။

အစာပလာ အနည်းငယ်ပါသော ကြက်ကလီစာများမှာ သူမ၏ အကြိုက်ဆုံးဖြစ်ပြီး သူမက စတော်ဘယ်ရီသီး ဟု ခေါ်သော ကြက်ဖင်ဆီဘူးကိုမူ နောက်ဆုံးမှစားရန် ချန်ထားလေ့ရှိသည်။

သူ ပြန်ရောက်လာပြီ။

အချိန်အများကြီး ကုန်ဆုံးသွားခြင်းမရှိပေ။ အကယ်၍ ကြက်သားဆာရှိမိ ကို အားရပါးရ စုပ်ယူနေသည့် ဖိအားအလွန်ကြီးမားသော ဤနှစ်တစ်ထောင် မြေခွေးမသာ အနားမှာမရှိလျှင် သူ နိုးတောင် နိုးလာဦးမည်မဟုတ်ပေ။

ရက် ၃၀ ကြာ အခမဲ့ခရီးစဉ်။

အခြေအနေတွေ တိုးတက်လာသည်နှင့်အမျှ တန်ဝမ်ကျဲအတွက် မည်သည့်ကမ္ဘာက မိမိနှင့် အမှန်တကယ် သက်ဆိုင်သည်ကို ခွဲခြားရန် ခက်ခဲလာသည်။သူသည် ဖုတ်ကောင်ကမ္ဘာတွင် ရက် ၃၀ နေနိုင်သလိုလျှို့ဝှက်နယ်မြ ကမ္ဘာတွင်လည်း ရက် ၃၀ သွားနေနိုင်သည်။

နှစ်ခုစလုံးက အခမဲ့ဖြစ်ပြီး တကယ့်လက်တွေ့ ကမ္ဘာများပင် ဖြစ်သည်။

စိတ်ညစ်နေစရာ မလိုပါ သူ သွားချင်သည့်နေရာသို့ သူ သွားမည်သာ။

သူသည် စိတ်ကြိုက်မစ်ရှင် နှစ်ခုကို ပြီးမြောက်ခဲ့သည်။

သရဲသခင်ကို သတ်ဖြတ်ခြင်းအတွက် မှော်ငွေ +၁,၂၀၀ နှင့် အနီရောင်ဝတ် မိန်းကလေးငယ်ကို သတ်ဖြတ်ခြင်းအတွက် +၆၀၀ ရရှိခဲ့သည်။

စုစုပေါင်း ၁,၈၀၀ ဖြစ်သည်။ သူ၏ လက်ရှိ ငွေများနှင့် ပေါင်းလိုက်လျှင် ယခု သူ့အိတ်ထဲတွင် ၁၃,၀၆၄ ကျန်ရှိတော့သည်။

ငွေ အနည်းငယ် တိုးလာသော်လည်း အခြားနယ်ပယ်များတွင် ရရှိမှုက ပို၍ကြီးမားသည်။

နက်ကျားဗိုလ်ချုပ်၏ နှစ်သက်မှု +၄ ရရှိခဲ့သည်။ ကျန့်ကွေ ၏ နှစ်သက်မှုမှာ သူနားမလည်သော အကြောင်းရင်းကြောင့် +၂ ဖြစ်ပြီးမှ -၁ ပြန်ဖြစ်သွားသော်လည်း အနည်းဆုံးတော့ ဆရာကြီးကျန့်နှင့် ဆက်သွယ်မှုတစ်ခု ရရှိခဲ့ပြီဖြစ်သည်။နောင်တွင် နှစ်သက်မှုများ ပိုရအောင် ကြိုးစားနိုင်လျှင် ဆရာကြီးကျန့်နှင့် ပခုံးချင်းယှဉ် တိုက်ခိုက်နိုင်မည့် အခွင့်အရေး ရှိနေပါသေးသည်။

ကံစမ်းမဲနှိုက်ရန်တော့ အခုလောလောဆယ် မလိုသေးပေ။

နှစ်တစ်ထောင် မြေခွေးမက သူ့ကို စောင့်ကြည့်နေသဖြင့် တစ်ခုခု ရုတ်တရက် ပေါ်လာလျှင် သူမ၏ သံသယကို နှိုးဆွသကဲ့သို့ ဖြစ်ပေလိမ့်မည်။

သို့သော် နက်ကျားဗိုလ်ချုပ်၏ နှစ်သက်မှုမှာ +၄ သို့ ရောက်ရှိသွားပြီဖြစ်ရာ စစ်သူကြီး ကျိုးချန်းနှင့် အဆင့်တူသွားပြီဖြစ်သည်။ မြေကြီးနင်းကာ နတ်ဘုရားကို ပင့်ဖိတ်ပြီး မိစ္ဆာတွေကို နှိမ်နင်းရန်မှာ ပြဿနာမရှိတော့ပေ။

နှစ်သက်မှု တိုးရန်ခက်ခဲသော စစ်သူကြီး ကျိုးချန်းနှင့်မတူဘဲ နက်ကျားဗိုလ်ချုပ်မှာ မကောင်းဆိုးဝါး သုတ်သင်သည့် ကိစ္စများတွင် အလွန် စိတ်ထက်သန်သူ ဖြစ်သည်။

အကြီးမားဆုံး ရရှိမှုမှာ အတွေ့အကြုံမှတ် များပင် ဖြစ်သည်။

အနီရောင်ဝတ် မိန်းကလေးငယ် ဂူအဆိပ် နတ်ဆိုးညီအစ်မများနှင့် သရဲသခင်တို့ကို မပြောပါနှင့်ဦး သူ၏ မိစ္ဆာကလေးငယ် မွေးမြူသတ်ဖြတ်ရေး စီမံကိန်းကို စုစုပေါင်း ၁၂ ကြိမ် ပြုလုပ်ခဲ့ရာ တစ်ကြိမ်လျှင် အတွေ့အကြုံမှတ် ၈၀၀ မှ ၁,၂၀၀ ခန့် ရရှိခဲ့သည်။

သဘာဝရန်သူ မရှိသဖြင့် မိစ္ဆာကလေးငယ်များမှာ အလွန်များပြားလှသည်။ သူတို့ကို ရှောင်မင်က နားမလည်အောင် ခေါ်ထုတ်လာပြီးနောက် တစ်ကောင်မကျန် အကုန်သတ်ဖြတ်ခြင်း ဖြစ်သည်။

စုစုပေါင်း အတွေ့အကြုံမှတ် ၁၅,၂၀၀ ရရှိခဲ့သည်။

ယခုအခါ သူသည် အဆင့် ၅ ရောက်ရန် အတွေ့အကြုံမှတ် ၁,၂၁၅ သာ လိုတော့သည်။ ရှေ့က မြေခွေးမသည် သူ၏ လိုအပ်ချက်ကို သေချာပေါက် ဖြည့်ဆည်းပေးနိုင်လိမ့်မည်။

နှစ်တစ်ထောင် ကြေးနီချပ်ဝတ် အလောင်းကောင်နှင့်မတူဘဲ၊ပုစဉ်းရင်ကွဲ ရေထိသည့်နေရာ မှ ရန်အဖိုးကြီးကဲ့သို့ ဖုတ်ကောင်ဖြစ်ရန် မြေမြှုပ်ထားရသည့် ခန္ဓာကိုယ်မှာ အနှစ်နှစ်ဆယ် ကြာတတ်သည်။

ထို့နောက်တွင်လည်းအကယ်၍ သွေးမစုပ်ရဘဲ မြေအောက်မှာသာ အာဟာရ မှီဝဲနေရလျှင် ၎င်း၏ အင်အားမှာ အလွန်နှေးကွေးစွာသာ တိုးတက်မည် ဖြစ်သည်။

၎င်းနှင့် ဆန့်ကျင်ဘက်အနေဖြင့် နှစ်တစ်ထောင် မြေခွေးမသည် နတ်ဆိုးဖြစ်သွားသည်နှင့် သူမ၏ အင်အားမှာ အလွန်လျင်မြန်စွာ တိုးတက်လာသည်။ ရံဖန်ရံခါ လူသားတစ်ယောက် နှစ်ယောက်ကို ဖြားယောင်းကာ ယန်ဓာတ် စုပ်ယူခြင်းမှာ ဖုတ်ကောင် သွေးစုပ်ရသည်ထက် အများကြီး ပိုလွယ်ကူသည်။

“မြေခွေးမ။”

တန်ဝမ်ကျဲ ထရပ်လိုက်သည်။

သူ ကျင့်စဉ်မကျင့်မီနှင့် အမွေတွေ မဆက်ခံရသေးခင်ကတော့ သူ ကြောက်သလိုလို ဟန်ဆောင်ခဲ့ရသည်။ ယခု အရာအားလုံး ရှိနေပြီဖြစ်ရာ သူ ထပ်ပြီး ဟန်ဆောင်နေဖို့ လိုသေးသလား။

ဆရာကြီးတန်က အခုတော့ တင်းတင်းမာမာ တုံ့ပြန်တော့မည်။

“ဟင်...”

နှစ်တစ်ထောင် မြေခွေးမသည် မျက်နှာတစ်ခုလုံး သွေးတွေပေနေပြီး ပါးစပ်ထဲတွင်လည်း ခါယမ်းနေဆဲ ကြက်ဖကြီးကို ကိုက်ထားရင်း သူ့ကို ဇဝေဇဝါဖြင့် လှည့်ကြည့်သည်။

အစာစားရမည့် အချိန် ရောက်ပြီလား။

သူမကတော့ ဒီနေ့အတွက် ကြက်ဖကြီး သရေစာကို စားပြီးပြီ ဖြစ်သည်။ အခုက အဓိက ဟင်းလျာအတွက် အချိန်ဖြစ်ပြီး ကြက်သားဟင်းပွဲကြီး ဖြစ်ပေလိမ့်မည်။

“မင်း ငါ့ကို ကျင့်စဉ်အတွက် ကူညီပေးဖို့ လိုတယ်။”

တန်ဝမ်ကျဲသည် ညာခြေဖြင့် မြေကြီးကို နင်းလိုက်သည်။နတ်ဘုရား စေလွှတ်ခြင်းထက် သူသည် ဤနှစ်တစ်ထောင် မြေခွေးမကို မိမိလက်ဖြင့် ကိုယ်တိုင်သတ်ရန် နတ်ဝင်ပူးခြင်းကိုသာ ပိုနှစ်သက်သည်။

ထို့အပြင် နက်ကျားဗိုလ်ချုပ်မှာလည်း ထိုမျှအထိ တက်ကြွသူမဟုတ်ပေ။ယဇ်ပလ္လင် မပြင်ဆင်ထားဘဲ နတ်ဘုရား စေလွှတ်ခြင်း မလုပ်နိုင်လျှင် ဒုက္ခရောက်ပေလိမ့်မည်။

“ဘုန်း၊ ဘုန်း၊ ဘုန်း၊ ဘုန်း”

သူသည် မြေပြင်ပေါ်သို့ ခြေရာများ ဆက်တိုက် ထင်ကျန်အောင် နင်းလိုက်သည်။

နှစ်တစ်ထောင် မြေခွေးမ၏ မျက်နှာအမူအရာ ပြောင်းလဲသွားသည်။

“မင်း စွမ်းအား ငှားရမ်းတာလား။”

သူမသည် တန်ဝမ်ကျဲကို မုန်းတီးစွာ စိုက်ကြည့်လိုက်ပြီး သူမ၏ လက်များမှာ သားရဲလက်သည်းများအဖြစ် ပြောင်းလဲသွားပြီ ဖြစ်သည်။

“မင်းက မော်ရှန်း တပည့် မဟုတ်ဘူးလို့ ပြောနေသေးတယ်ပေါ့။”

ခဏတာ အိပ်စက်ပြီးနောက်တွင် ဤမျှအထိ အလျှော့ပေးခဲ့သော လူသားက ဘာကြောင့် သူ့ကို ရန်စရဲရသည်ကို သူမ နားမလည်နိုင်ပေ။ သူမက သူ့ကြက်ကို စားထားလို့ သူမက သူ့စကား နားထောင်ရမယ်လို့ သူ တကယ်ပဲ ထင်နေတာလား။

တန်ဝမ်ကျဲသည် သားရဲပုံစံ ဖြစ်သွားကာ သန်မာသော ကျားသစ်ကြီးတစ်ကောင်ကဲ့သို့ ခြေလေးဖက် ထောက်လိုက်သည်။

သူ၏ လည်ချောင်းထဲမှ ကြောက်မက်ဖွယ်ကောင်းသော ကျားဟိန်းသံ တိုးတိုး ထွက်ပေါ်လာသည်။

တောင်ကြားထဲတွင် မြေခွေးနှင့် ကျားတို့၏ ပြင်းထန်သော တိုက်ပွဲကြီး စတင်တော့မည် ဖြစ်သည်။

နှစ်တစ်ထောင် မြေခွေးမ၏ အင်အားမှာ အလွန် ထူးကဲလှသည်။ သူမတွင် မြားဒဏ်ရာ ရှိနေသော်လည်း ၎င်းမှာ နတ်ဘုရား ပင့်ဖိတ်ထားသော လမ်းဘေးက တာအိုဆရာလေး တစ်ယောက်ကို ခြေမွပစ်ရန် တားဆီးနိုင်မည် မဟုတ်ပေ။

လွန်ခဲ့သော နှစ်ပေါင်း ရာချီကကဲ့သို့ပင် ထိုအမျိုးသမီး တာအိုဆရာမမှာ တန်ဝမ်ကျဲထက် အဆပေါင်းများစွာ သန်မာပြီး သူမ၏ ဂိုဏ်းမှ နတ်ဘုရားပစ္စည်း နှစ်ခုကို သုံး၍ စွမ်းအားငှားခဲ့သော်လည်း နောက်ဆုံးတွင်မြေခွေးမ၏ ရိုက်ပုတ်သတ်ဖြတ်ခြင်းကိုသာ ခံခဲ့ရသည်။

ထိုအမျိုးသမီးမှာ နတ်ဘုရား အရှင်သခင်ကို ပင့်ဖိတ်ခဲ့ခြင်း ဖြစ်ပြီး ယခု တန်ဝမ်ကျဲမှာမူ နက်ကျား တစ်ကောင်ကိုသာ ပင့်ထားခြင်း ဖြစ်သည်။ နတ်ဘုရား စွမ်းအား အပိုင်းအစလေးကို ထားလိုက်ဦး နက်ကျား၏ အစစ်အမှန် ခန္ဓာကိုယ်ကြီး လူ့ပြည်သို့ ဆင်းသက်လာလျှင်ပင် နှစ်တစ်ထောင် မြေခွေးမမှာ ဂရုစိုက်မည် မဟုတ်ပေ။ ဤလောကတွင် သူမကို တားဆီးနိုင်မည့်အရာ ဘာမှမရှိတော့ဟု သူမ ယုံကြည်သည်။

အကယ်၍ တစ်စုံတစ်ယောက်က သူမကို သတ်ချင်သည်ဆိုလျှင် ၎င်းမှာ ဘာသာကြီး သုံးခုမှ ရဟန္တာ တစ်ပါးပါးသာ ဖြစ်ရပေလိမ့်မည်။

တန်ဝမ်ကျဲသည် အခြားသူများ လျင်မြန်စွာ သွားရန်ခက်ခဲသော တောင်လမ်းအတိုင်း အရှိန်အဟုန်ဖြင့် ပြေးလွှားနေသည်။နတ်ကျားဗိုလ်ချုပ်၏ သတ်ဖြတ်လိုစိတ်များ တက်ကြွနေသောကြောင့် ဖြစ်နိုင်သည်။သူ၏ လက်သည်းများမှာ ကျားလက်သည်းများကဲ့သို့ ရှည်လျား ထက်မြက်လာသည်။

သူ၏ ကိုယ်ဟန်မှာလည်း ကြောင်မျိုးနွယ် သားရဲတစ်ကောင်ကဲ့သို့ တဖြည်းဖြည်း ပြောင်းလဲသွားသည်။

မြေခွေးမ၏ ရှေ့သို့ ခုန်ဝင်လိုက်ပြီး တန်ဝမ်ကျဲသည် သူမ၏ နှလုံးသားကို လက်သည်းဖြင့် ကုတ်ခြစ်လိုက်သည်။လေပြင်းများက သူ၏ ညာဘက် ကျားလက်သည်းကို ဖြတ်သန်းသွားပြီး တောင်ကြားထဲမှ လေသံမှာ ရုတ်တရက် ကျယ်လောင်လာသည်။

မြေခွေးမ၏ ရင်ဘတ်မှာ ထူထဲပြီး ခံစစ်ကောင်းလှသော်လည်း နက်ကျားဗိုလ်ချုပ်၏ ဝိညာဉ်ဆိုးအရှိန်အဝါကို အပြည့်အဝ ဖော်ဆောင်နေသော တန်ဝမ်ကျဲ၏ ရှေ့တွင်မူ စက္ကူကဲ့သို့သာ ဖြစ်သည်။လက်သည်း တစ်ချက်တည်းနှင့်ပင် သူမကို ဒဏ်ရာရစေနိုင်သည်။

အသားများ စုတ်ပြတ်သွားပြီး သူမ၏ ရင်ဘတ်မှ အသားစကြီးတစ်ခု ကွာကျသွားသည်။

နှစ်တစ်ထောင် မြေခွေးမသည် သူမ၏ မောက်မာမှုအတွက် သူမ၏ အသားဖြင့် အစားပေးလိုက်ရသည်။

ထိုအချိန်တွင်မှ တန်ဝမ်ကျဲ၏ နှေးကွေးပြီး ကျားတစ်ကောင်ကဲ့သို့ ဟိန်းသံကို သူမ ကြားလိုက်ရသည်။

“နက်ကျားက နှလုံးသားကို ဆွဲထုတ်ခြင်း။”

သူ ပြေးလွှားနေသဖြင့် မြေကြီးမှာ တုန်ခါနေပြီး တန်ဝမ်ကျဲသည် မြေခွေးမနှင့် အကွာအဝေးကို လျှော့ချရန် ထပ်မံ ခုန်အုပ်လိုက်ပြန်သည်။

ဤအချိန်တွင် မြေခွေးမသည် သားရဲတစ်ကောင်ကဲ့သို့ အမဲလိုက်ခံရသူ၏ အသက်အန္တရာယ် စိုးရိမ်မှုကို ပြန်လည် ခံစားလိုက်ရသည်။ မြေခွေးတစ်ကောင်က ကျားတစ်ကောင်နှင့် တွေ့လျှင် အကောင်းဆုံး ရွေးချယ်မှုမှာ တိုက်ခိုက်ရန် မဟုတ်ဘဲ ထွက်ပြေးရန်သာ ဖြစ်သည်။

“နတ်ကျားက လင်းတအပေါ်က ဖြတ်ပျံခြင်း”

သူမ၏ အပေါ်မှ ဖြတ်သွားသော ကျားဆိုးကြီး၏ ဟိန်းသံက သူမ၏ ကိုယ်ပေါ်က အမွေးအမှင်များကို ထောင်ထစေသည်။

မြေပြင်ပေါ်သို့ ပြန်ဆင်းသက်ပြီးနောက် ကျားလက်သည်းများက ထပ်မံ တိုက်ခိုက်ပြန်သည်။

မြေခွေးမသည် လိမ့်ကာ ရှောင်တိမ်းလိုက်ရသည်။

“ကျားတစ်ကောင်က သိုးနှစ်ကောင်ကို သတ်ခြင်း။”

ကျားလက်သည်းများက ဘယ်ညာ တိုက်ခိုက်သည်။ သွေးစွန်းနေသော သိုးနှစ်ကောင်မှာ ထိတ်လန့်တကြား ခုန်ပေါက်နေပြီး ၎င်းတို့၏ မျက်လုံးနီကြီးများမှာ ကြောက်ရွံ့မှုများဖြင့် ပြည့်နေသည်။

အခြားနေရာမှာဆိုလျှင် သူမ၏ ရင်ဘတ်ကို ဖော်ကာ ကရုဏာ သက်ရန် တောင်းပန်ခြင်းက အလုပ်ဖြစ်ကောင်း ဖြစ်နိုင်ပေလိမ့်မည်။ သို့သော် နတ်ကျားဗိုလ်ချုပ်၏ စွမ်းအားကို ပင့်ဖိတ်ထားသော တန်ဝမ်ကျဲမှာမူ စိတ်ထဲတွင် သတ်ဖြတ်လိုစိတ်များ ဆူပွက်နေပြီး မိန်းမလှလေးအပေါ် သနားညှာတာလိုစိတ် အနည်းငယ်မျှပင် မရှိပေ။

ဒဏ်ရာဟောင်းတွေ မကျက်သေးခင်မှာပဲ ဒဏ်ရာသစ်တွေ ထပ်တိုးလာပြန်သည်။

သို့သော် ဤအခွင့်အရေးကို သုံးကာ နှစ်တစ်ထောင် မြေခွေးမသည် ရင်ဘတ်က ဒဏ်ရာကို အောင့်အည်းပြီး ချုံပုတ်ကြားထဲသို့ လွတ်အောင် ပြေးဝင်လိုက်သည်။

သူမတွင် မော်ရှန်းတပည့်များနှင့် တိုက်ခိုက်ခဲ့ဖူးသော အတွေ့အကြုံရှိသဖြင့် စွမ်းအားငှားရမ်းခြင်းမှာ ခန္ဓာကိုယ်အပေါ် ဖိအားအလွန်များကြောင်း သူမ သိသည်။ တန်ဝမ်ကျဲအနေဖြင့် မကြာမီ ရပ်တန့်ရပေလိမ့်မည်။ ထိုမျှမက သူသည် နုံးချိသွားပြီး လှုပ်ရှားနိုင်တော့မည် မဟုတ်ရာ နောက်ဆုံးတွင် သူမ စိတ်ကြိုက် လုပ်နိုင်မည် ဖြစ်သည်။

သူမသည် ပုန်းစရာ နေရာတစ်ခုရှာပြီး ထိုအချိန် ရောက်လာမည့်အရာကို တိတ်တဆိတ် စောင့်ဆိုင်းရန်သာ လိုသည်။ မြေခွေးမသည် တန်ဝမ်ကျဲကို ဖမ်းမိပြီးနောက် ဘာလုပ်မည်ဟူသော အစီအစဉ်ကိုပင် စိတ်ထဲတွင် ဆွဲထားပြီးပြီ ဖြစ်သည်။

သူမ သူ့ကို နောက်ထပ် အခွင့်အရေး ပေးရန် အစီအစဉ် မရှိတော့ပေ။ ထိုအချိန်တွင် သူ ဘယ်လောက်ပဲ စကားကောင်းတွေ ပြောပြော သူမသည် သူ၏ ယန်ဓာတ်ကို အပြတ်အသတ် စုပ်ယူပစ်မည် ဖြစ်သည်

အကျေနပ်ဆုံး အကြမ်းတမ်းဆုံးနှင့် အမြန်ဆန်ဆုံး နည်းလမ်းဖြင့် ဖြစ်သည်။ သူ့ကို တစ်ခဏချင်းအတွင်း အခြောက်ခံပစ်ကာ အဆုံးမဲ့ နာကျင်မှုကို ပေးမည်။

ချုံပုတ်များ လှုပ်ခါသွားပြီးနောက် နှစ်တစ်ထောင် မြေခွေးမသည် သူမ၏ မူလပုံစံသို့ ပြန်ပြောင်းလိုက်သည်။ဗိုက်တွင် သွေးစွန်းနေသော မြေခွေးဖြူလေး တစ်ကောင်သည် နှာခေါင်းကို ရှုံ့ကာ အမဲလိုက်သူ၏ နောက်ယောင်ခံမှုကို ရှောင်တိမ်းရင်း သားရဲကြီးများ မဖြတ်နိုင်သော လမ်းကျဉ်းလေးကို ရှာဖွေနေသည်။

ခဏကြာ ပြေးလွှားပြီးနောက် မြေခွေးဖြူလေးသည် တောင်အောက်ရှိ ဂူငယ်လေးတစ်ခုထဲသို့ တိုးဝင်လိုက်သည်။ နေရာမှာ အလွန်ကျဉ်းမြောင်းပြီး လမ်းဆုံးနေသော်လည်း ရှေ့တွင် စမ်းချောင်းလေး တစ်ခု ရှိနေသဖြင့် သူမ ဖြတ်သန်းလာခဲ့သော သွေးနံ့ကို ဖုံးကွယ်ရန် လုံလောက်လှသည်။

ဘယ်က ရောက်လာမှန်းမသိသော ထိုကျားဆိုးကြီးမှာ သူ၏ နှာခေါင်းကို သုံးစား၍ ရတော့မည် မဟုတ်ပေ။ သူမသည် သွေးစွန်းနေသော ခန္ဓာကိုယ်ကို အစွမ်းကုန် ကျုံ့ထားလိုက်သည်။

အပြင်ဘက်မှ ခြေသံများ နီးကပ်လာသော်လည်း အကြာကြီး မရပ်ဘဲ ပြန်ဝေးသွားသည်။

နှစ်တစ်ထောင် မြေခွေးမ သက်ပြင်းချရန် ပြင်လိုက်စဉ်မှာပင်မြေခွေး၏ အမွေးအမှင်အားလုံးကို ထောင်ထသွားစေသည့် ထိုကျားဆိုးကြီး၏ ဟိန်းသံကို ထပ်မံ ကြားလိုက်ရပြန်သည်။

“နတ်ကျားက သိုးငယ်လေးကို ပိတ်ဆို့ဖမ်းဆီးခြင်း”