လုံကျိုကျိုး၏ တာအိုခရီးစဉ်

လုံကျိုကျိုး၏ ပြောပြချက်အရ ထန်ထျန်းသည် သူ၏ ကြီးပြင်းလာပုံ ကို ဖြည်းဖြည်းချင်း သိလာခဲ့သည်။

လွန်ခဲ့သော နှစ်ပေါင်း တစ်သိန်းခန့်က လုံကျိုကျိုးသည် တောင်ပေါ်ရွာလေးတစ်ရွာမှ သာမန် ဆယ်ကျော်သက် လူငယ်လေးတစ်ဦးသာ ဖြစ်ခဲ့သည်။

ဖခင်ဖြစ်သူနှင့်အတူ အမဲလိုက်ထွက်ရင်း လမ်းခရီးတွင် သံလိုလို၊ ကျောက်လိုလို အပိုင်းအစတစ်ခုကို မတော်တဆ ကောက်ရခဲ့ပြီး စူးစမ်းလိုစိတ်ဖြင့် သိမ်းဆည်းထားခဲ့သည်။

သို့သော် နောက်ပိုင်းရက်များတွင် ထိုအပိုင်းအစမှာ နေ့စဉ်နှင့်အမျှ နေမင်းနှင့် လမင်းတို့၏ အနှစ်သာရများကို တိတ်တဆိတ် စုပ်ယူပြီး လုံကျိုကျိုး၏ ခန္ဓာကိုယ်ထဲသို့ ပြန်လည် စီးဆင်းစေခဲ့သည်။

အချိန်ကြာလာသည်နှင့်အမျှ လုံကျိုကျိုးက ပိုမိုသန်မာလာပြီး နောက်ဆုံးတွင် ဘာမှမသိလိုက်ဘဲ ကျင့်ကြံခြင်းလောက၏ တံခါးချပ်ကို တစ်ကိုယ်တည်း တွန်းဖွင့်နိုင်ခဲ့သည်။

တစ်နေ့တွင် လုံကျိုကျိုးက တောထဲ၌ အမဲလိုက်နေရင်း အန္တရာယ်နှင့် ကြုံတွေ့နေရသော အမျိုးသမီးတစ်ဦးကို ကယ်တင်ခဲ့သည်။

ထိုအမျိုးသမီး ဒဏ်ရာပျောက်ကင်းသွားသောအခါ လုံကျိုကျိုးကို တောင်ပေါ်ရွာလေးမှ ခေါ်ထုတ်ကာ ပြင်ပ ကမ္ဘာကြီးထဲသို့ ခေါ်သွားခဲ့သည်။

လုံကျိုကျိုး မထင်မှတ်ထားသည်မှာ ထိုအမျိုးသမီးက ကြီးမားသော မြို့ကြီးတစ်မြို့ရှိ ထိပ်သီးမိသားစုတစ်ခု၏ သမီးပျိုဖြစ်နေခြင်းပင်။

ပို၍ မထင်မှတ်ထားသည်မှာ အသက်ကယ်တင်ခြင်း ကျေးဇူးနှင့် နေ့ညမပြတ် ပြုစုစောင့်ရှောက်မှုတို့ကြောင့် ထိုမိန်းကလေးက သူ့အပေါ် သံယောဇဉ်တွယ်ကာ ဘဝကို ပုံအပ်ရန် ဆုံးဖြတ်ခဲ့ခြင်းဖြစ်သည်။

နောက်ဆက်တွဲ ဇာတ်ကွက်ကိုတော့ လူတိုင်း ခန့်မှန်းနိုင်ကြမည် ထင်ပါသည်။

မိသားစု အကြီးအကဲတစ်ယောက်အနေဖြင့် သူ့ အဖိုးတန်သမီးပျိုကို တောင်ပေါ်ရွာမှ လာသည့် တောသားလေးတစ်ယောက်နှင့် မည်သို့ သဘောတူနိုင်မည်နည်း

ထို့ကြောင့် သူတို့နှစ်ဦးမှာ အတင်းအဓမ္မ ခွဲခြင်း ခံခဲ့ရသည်။ အမျိုးသမီးမှာ အကျယ်ချုပ် ချုပ်နှောင်ခံရပြီး လုံကျိုကျိုးမှာမူ အပြင်းအထန် နှိပ်စက် ခံရကာ နှင်ထုတ်ခြင်း ခံခဲ့ရသည်။

သို့သော် ထိုလျှို့ဝှက်ဆန်းကြယ်သော အပိုင်းအစ၏ ပြုစုပျိုးထောင်မှုကြောင့် လုံကျိုကျိုးက ပါရမီ ထူးချွန်လွန်းသော ကျော်လွန်သူတစ်ဦး ဖြစ်နေခဲ့ပြီဖြစ်သည်။ ကျင့်ကြံခြင်းလောကနှင့် တကယ်တမ်း ထိတွေ့ခွင့်ရသောအခါ သူက အရှိန်အဟုန်ဖြင့် တိုးတက်လာပြီး နှစ်နှစ်အတွင်းမှာပင် ချီသန့်စင်ခြင်း အဆင့် ကျင့်ကြံသူလေးဘဝမှ တိုက်ရိုက် အင်မော်တယ် အဆင့်သို့ တက်လှမ်းနိုင်ခဲ့သည်။

ဤကဲ့သို့ ကြောက်မက်ဖွယ်ကောင်းသော ပါရမီကြောင့် သူက ဂိုဏ်းကြီးတစ်ခု၏ ဂိုဏ်းချုပ်ထံတွင် တိုက်ရိုက်တပည့် ဖြစ်လာခဲ့သည်။

အင်မော်တယ် ဖြစ်ပြီးနောက် သူက ထိုမြို့ကြီးသို့ ပြန်သွားကာ အကျယ်ချုပ်ကျနေသော အမျိုးသမီးကို ကယ်တင်ရန် ကြိုးစားခဲ့သည်။

သို့သော် သူ ပြန်လာတာ နောက်ကျသွားခဲ့ပြီ။

သူ ပြန်မရောက်ခင် တစ်ရက်အလိုမှာပင် အမျိုးသမီးက မိသားစုချင်း မဟာမိတ်ဖွဲ့ရန် လက်ထပ်ပေးမည့် ကိစ္စကို အသေခံ ငြင်းဆန်ကာ အဆိပ်သောက် သေဆုံးသွားခဲ့သည်။

သူ ပြန်ရောက်လာချိန်တွင် မိသားစုနှစ်ခုစလုံးက အမျိုးသမီး သေဆုံးရခြင်းမှာ လုံကျိုကျိုးကြောင့်ဟု အပြစ်ပုံချကာ သူ့ကို သတ်ရန် ကြိုးစားကြသည်။

ဒေါသအဟုန်ဖြင့် လုံကျိုကျိုးက ထိုမိသားစုနှစ်ခုစလုံးကို ဓားတစ်ချက်တည်းဖြင့် အပြတ်ရှင်းပစ်ခဲ့ပြီး အဆုံးမဲ့ နောင်တများနှင့်အတူ ကျင့်ကြံခြင်းလမ်းစဉ်ပေါ်သို့ ပြန်လည် လျှောက်လှမ်းခဲ့သည်။

နောက်ပိုင်းနှစ်များတွင် သူက သူ့ ဂိုဏ်းကို ဦးဆောင်ကာ အရှိန်အဟုန်ဖြင့် တိုးတက်လာပြီး မရေမတွက်နိုင်သော ပါရမီရှင်များကို ခြေဖဝါးအောက်တွင် နင်းခြေခဲ့သည်။

ဤခရီးစဉ်အတွင်း သူက တောက်လောင်နေသော မီးလျှံများ ဝန်းရံနေသည့် လေးကြီးတစ်လက်ကို သူ့ အသက် ရတနာ အဖြစ် ရရှိခဲ့သည်။

လူတစ်ယောက်နှင့် လေးတစ်လက်... သူက ခေတ်တစ်ခေတ်လုံးကို သတ်ဖြတ်ကျော်ဖြတ်ခဲ့ပြီး ရွယ်တူပါရမီရှင် အားလုံးကို ခေါင်းမဖော်နိုင်အောင် ဖိနှိပ်ထားနိုင်ခဲ့သည်။

နောက်ပိုင်းတွင် အင်မော်တယ် ဧကရာဇ် အထွတ်အထိပ်သို့ ရောက်ရှိသောအခါ လုံကျိုကျိုးက မြားတစ်စင်ဖြင့် ကောင်းကင်ယံကို ဖောက်ထွက်ကာ သူ၏ကမ္ဘာတွင် ကောင်းကင်ထိပ်ဆုံး သို့ တက်လှမ်းနိုင်သည့် တစ်ဦးတည်းသောသူ ဖြစ်လာခဲ့သည်။

သို့သော် ဤကာလတွင်ပင် လုံကျိုကျိုးက သူ့ကိုယ်သူ သာမန်မဟုတ်ကြောင်း သတိပြုမိလာပြီး သူ့ ကံကြမ္မာအပေါ် သံသယများ ဝင်လာခဲ့သည်။

သို့သော် ထိုစဉ်က အားနည်းနေသေးသဖြင့် သံသယရှိရုံမှတစ်ပါး ဘာမှ မလုပ်နိုင်ခဲ့ပေ။

ထို့နောက် လုံကျိုကျိုးက ကောင်းကင်ထိပ်ဆုံး သို့ ဝင်ရောက်ခဲ့သော်လည်း အရှိန်လျော့မသွားဘဲ ပါရမီရှင်မှန်သမျှကို ချေမှုန်းရင်း၊ သတ်ဖြတ်ခြင်း လမ်းစဉ်ဖြင့် ဆက်လက် တက်လှမ်းခဲ့သည်။

သို့သော် ကျင့်ကြံမှု အဆင့် မြင့်မားလာပြီး ဤကမ္ဘာ၏ အနှစ်သာရကို ပိုမို ရှင်းလင်းစွာ မြင်တွေ့လာရသည့်အခါ လုံကျိုကျိုးက သး့ကိုယ်ပေါ်ရှိ သဲလွန်စအချို့ကို ရှာတွေ့သွားခဲ့သည်။

သူက ဝူကျိတာအို အထွတ်အထိပ်သို့ ရောက်ရှိချိန်တွင် ဝေးကွာသော နေမင်းကို ကြည့်ကာ နေနတ်ဘုရားလေး ကို အစွမ်းကုန် ဆွဲပြီး သူ၏ တစ်ဘဝလုံးစာ စွမ်းအားများ စုစည်းထားသည့် မြားတစ်စင်းကို ပစ်လွှတ်လိုက်သည်။

ထိုမြားတစ်စင်းက ကောင်းကင်ယံကို ထိုးဖောက်ပြီး ကမ္ဘာ့အတားအဆီးကိုပင် ပေါက်ထွက်လုနီးပါး ဖြစ်သွားစေကာ ကောင်းကင်တစ်ဝက်ကို နှစ်ခြမ်းကွဲသွားစေခဲ့သည်။

မြားပစ်ပြီးသည်နှင့် ရွှေရောင်ဝတ်စုံနှင့် ဆံပင်နီနီနှင့် လူငယ်တစ်ဦးက လုံကျိုကျိုး၏ ရှေ့မှောက်သို့ ပေါ်လာတော့သည်။

"သူက သူ့ကိုယ်သူ နေနတ်ဘုရား လို့ ခေါ်ခဲ့တယ်"

လုံကျိုကျိုးက ပြော၏။ "သူ့ကို တွေ့ပြီးနောက်မှာတော့ အရာအားလုံးကို ငါ နားလည်သွားခဲ့တယ်"

" မတော်တဆ ရခဲ့တဲ့ ဟင်းလင်းပြင် ခေါင်းလောင်း အပိုင်းအစနဲ့ တိုက်ဆိုင်စွာ ရခဲ့တဲ့ နေနတ်ဘုရားလေး ဆိုတာတွေဟာ တကယ်တော့ တိုက်ဆိုင်မှုမဟုတ်ဘဲ ကြိုတင် သတ်မှတ်ထားပြီးသားတွေပဲ"

"ငါက ငါ့ကိုယ်ငါ ကံကောင်းသူလို့ ထင်ခဲ့တယ်၊ ပြိုင်ဘက်ကင်း ပါရမီရှင်လို့ ထင်ခဲ့တယ်။ ဒါပေမဲ့ တကယ်တမ်းမှာတော့ ဒါတွေအားလုံးက နေနတ်ဘုရားရဲ့ စီစဉ်မှုတွေပဲ ဖြစ်နေခဲ့တယ်"

"သူ့ကို တွေ့ပြီးတဲ့နောက် သူက ငါ့ကို လက်ဆောင် နှစ်ခု ပေးခဲ့တယ်"

"ပထမ လက်ဆောင်ကတော့ ပြည့်စုံလုနီးပါး ဖြစ်နေတဲ့ ကမ္ဘာတစ်ခုပဲ။ အဲဒီကမ္ဘာက ငါ့ကို ဝူကျိတာအို အထွတ်အထိပ်ကနေ ကျိကျွင်း အဆင့်ကို တက်လှမ်းစေပြီး ကမ္ဘာလောကကို အမှန်တကယ် ကျော်လွန်သွားစေခဲ့တယ်"

"နောက်ထပ် လက်ဆောင်တစ်ခုကတော့ လွန်ခဲ့တဲ့ အတိတ်က မှတ်ဉာဏ်တွေပဲ"

"ဒါက... ငါ့ရဲ့ အရင်ဘဝ မှတ်ဉာဏ်တွေပေါ့"

လုံကျိုကျိုး၏ ပြောပြချက်ကို နားထောင်ပြီးနောက် ထန်ထျန်းမှာ တိတ်ဆိတ်သွားသည်။

ဤကမ္ဘာတွင် တကယ်ပဲ တိုက်ဆိုင်မှုနှင့် မတော်တဆမှုများ ဤမျှလောက် များပြားနေပါသလား

တိုက်ဆိုင်မှုဟု ထင်ရသော အရာများ၏ နောက်ကွယ်တွင် ဖြစ်ကောင်းဖြစ်နိုင်သည်မှာ ကြိုတင် ကံစီမံထားခြင်းများ ဖြစ်ပေလိမ့်မည်။

လုံကျိုကျိုး၏ ဖော်ပြချက်အရ သူသည် ယခင်က အင်အားကြီးသူတစ်ဦး၏ လူပြန်ဝင်စားခြင်း ဖြစ်သည်မှာ သေချာသည်။ အစွမ်းထက်သော နေနတ်ဘုရားက ဤအရာကို သိထားသဖြင့် သူ၏ ကြီးပြင်းလာမှု လမ်းခရီးတွင် အရေးကြီးသော အလှည့်အပြောင်းများကို စီစဉ်ပေးခဲ့ခြင်း ဖြစ်သည်။

ဤအလှည့်အပြောင်းများက လုံကျိုကျိုးကို ကျိကျွင်းအဆင့်သို့ အရှိန်အဟုန်ဖြင့် ရောက်ရှိစေခဲ့သည်။

ဤသို့ တွေးမိသောအခါ ထန်ထျန်းက ချန်ဝူဟွေ့ ပြောခဲ့သည့် စကားကို ပြန်လည် သတိရသွားသည်။

"မင်းတို့လို ကမ္ဘာလောကကို ကျော်လွန်သွားတဲ့ တည်ရှိမှုတွေနဲ့ ယှဉ်ရင် ကျွန်တော် တို့လို သာမန်လူတွေကတော့ ရွှံ့နွံထဲမှာ ရုန်းကန်နေရတဲ့ ပိုးစုန်းကြူးတစ်ကောင်ပါပဲ"

အကယ်၍ ဤကမ္ဘာကြီးသာ ပြဿနာမရှိခဲ့လျှင် ကျိကျွင်းကဲ့သို့သော ယုတ္တိမရှိအောင် အစွမ်းထက်သည့် ကျင့်ကြံသူမျိုး ပေါ်ပေါက်လာမည် မဟုတ်ပေ။

၎င်းက သဘာဝအတိုင်း ကျင့်ကြံရုံဖြင့် ရောက်ရှိနိုင်သော အဆင့်မဟုတ်ဘဲ အလွန်ထူးခြားသော အခွင့်အရေးများ ရှိမှသာ ရောက်ရှိနိုင်သည်။

ရှိသူမှာ ရှိပြီး၊ မရှိသူမှာ လုံးဝမရှိသော အခွင့်အရေးမျိုး ဖြစ်သည်။

ဤကွာဟချက်ကို ဖျက်ဆီးပစ်ရန်အတွက် တစ်ကမ္ဘာလုံးကို အမြစ်ပြတ် ပြောင်းလဲပြီး ပြည့်စုံအောင် လုပ်ရန် လိုအပ်သည်။

သို့သော် ဤကဲ့သို့ လုပ်နိုင်သူမှာ ကျိကျွင်းအထက် အဆင့်များသာ ဖြစ်သည်။

သို့သော်လည်း အခွင့်ထူးခံ ကျိကျွင်းအထက် အဆင့်များက ဤကွာဟချက်ကို အဘယ်ကြောင့် ဖျက်ဆီးလိုမည်နည်း

ဤသည်မှာ အဖြေမရှိသော ပုစ္ဆာတစ်ခုပင်။

"အဲဒီ မှတ်ဉာဏ်တွေကို မင်း ပေါင်းစပ်လိုက်ပြီလား"

ထန်ထျန်းက မေးလိုက်သည်။

လုံကျိုကျိုးက ခေတ္တမျှ တိတ်သွားပြီးနောက် ဖြည်းဖြည်းချင်း ခေါင်းညိတ်ပြသည်။

"နေနတ်ဘုရားက ငါ့ကို အတင်းအကျပ် မလုပ်ခဲ့ဘူး။ သူ ငါ့ကို ရွေးချယ်ခွင့် ပေးခဲ့တယ်"

"လက်ဆောင်နှစ်ခုကို လက်ခံမလား၊ ဒါမှမဟုတ် ငြင်းပယ်မလား... ငါ ဘယ်လို ရွေးချယ်မှုပဲ လုပ်လုပ် သူ ငါ့ကို ဒုက္ခပေးမှာ မဟုတ်ဘူး"

"ဒါပေမဲ့ ကျင့်ကြံသူတစ်ယောက်အနေနဲ့ ကိုယ့်ခေါင်းပေါ်မှာ ပိုမြင့်တဲ့ အဆင့်ရှိနေတာကို သိသိကြီးနဲ့ ဘယ်လိုလုပ် မရှာဘဲ နေနိုင်မှာလဲ"

" အဲဒါကြောင့် နောက်ဆုံးမှာတော့ ငါ လက်ဆောင်တွေကို လက်ခံလိုက်တယ်"

"အဲဒီနောက်မှာတော့ ငါ့ရဲ့ မှတ်ဉာဏ်တွေ နိုးထလာခဲ့တယ်။ အရင်က သရုပ်မှန်ကို သိလာရသလို ရှောင်လွှဲလို့မရတဲ့ တာဝန်တွေနဲ့ မစ်ရှင်တွေကို ပြန်လည် ပခုံးထမ်းခဲ့ရတယ်"

" ဒါပေမဲ့ ကောင်းတဲ့အချက်ကတော့ ငါ့ရဲ့ ကိုယ်ပိုင်စိတ်ဆန္ဒက အဓိကနေရာမှာ ရှိနေဆဲပဲ၊ ငါ့ကိုယ်ငါ လုံးဝ ပျောက်ကွယ်သွားတာမျိုးတော့ မဟုတ်ဘူး"

ထန်ထျန်း တိတ်ဆိတ်သွားပြီး ဤအပေါ် မည်သို့ မှတ်ချက်ပေးရမှန်း မသိတော့ပေ။

ကျိကျွင်းအဆင့်၏ ဆွဲဆောင်မှုကို မည်သည့်ကျင့်ကြံသူမှ ငြင်းပယ်နိုင်မည်မဟုတ်ပေ။ အနာဂတ်တွင် ဆူးခင်းလမ်း ဖြစ်နေမည်ကို သိနေလျှင်ပင် စတေးရန် ဝန်လေးကြမည်မဟုတ်။

လုံကျိုကျိုး အနေဖြင့် သူ့ မူလစိတ်ဆန္ဒကို ထိန်းထားနိုင်ခြင်းမှာပင် အလွန် ကံကောင်းလှသည်။

လုံကျိုကျိုး၏ တာအိုခရီးစဉ်ကို နားထောင်ပြီးနောက် ထန်ထျန်းက မူလ အကြောင်းအရာသို့ ပြန်သွားလိုက်သည်။

"ကုရှောင်းရွှယ် အကြောင်း ပြောရအောင်"

"ကြောင်လေး (နတ်ဘုရားမျက်နှာသာပေးခံရသူ) ကို လူတွေ လောဘတက်ကြတာကို ငါ နားလည်နိုင်ပါတယ်။ ဒါပေမဲ့ ကုရှောင်းရွှယ်မှာရော ဘာတွေ ထူးခြားနေလို့လဲ"

ထန်ထျန်းက မေးလိုက်သည်။