အခန်း (၂၄၇-၂၄၈)

အခန်း ၂၄၇ ရန်သူ့တိုက်ခိုက်မှု

"အစ်ကိုကြီး... ဒုတိယအစ်ကို"

ရှောင်မိုက မော့ကြည့်လိုက်ရာ သူ၏ အစ်ကိုနှစ်ယောက်ကို မြင်တွေ့လိုက်ရပြီး သူ၏ ရင်ထဲတွင် ပျော်ရွှင်မှုများ ပြည့်နှက်သွားခဲ့သည်။

လွန်ခဲ့သော နှစ်အနည်းငယ်ကနှင့် နှိုင်းယှဉ်လျှင် သူ၏ အစ်ကိုနှစ်ယောက်၏ ရုပ်အဆင်းက သိပ်မပြောင်းလဲသွားသော်လည်း သူတို့၏ ခန္ဓာကိုယ်များကမူ ပိုမို အရပ်ရှည်ကာ တောင့်တင်းလာခဲ့သည်။

"ဟားဟားဟားဟား" ကျန်းရှန်းဟန်က ကျယ်လောင်စွာ ရယ်မောရင်း ရှေ့သို့လျှောက်လာကာ သူ၏ ညီငယ်၏ လက်မောင်းကို ပုတ်လိုက်သည်။ "တကယ်ပဲ မင်းကိုး ညီငါးရ။ ညီငါး... မင်းက ငယ်ငယ်တုန်းကလိုပဲ အသားဖြူတုန်းပဲ၊ ဒါပေမဲ့ ခန္ဓာကိုယ်ကတော့ အများကြီး ပိုသန်မာလာတယ်နော်။"

လိုထိုက်ကလည်း ချစ်ခင်ကြင်နာစွာဖြင့် "ငါတို့ ညီအစ်ကိုတွေ ပြန်ဆုံရလိမ့်မယ်လို့ ငါ မထင်ထားခဲ့ဘူး။ မင်းအခြေအနေတွေကောဘယ်လိုနေလဲ ညီငါး" ဟု ပြောလိုက်သည်။

"မဆိုးပါဘူး" ရှောင်မိုက ပြုံးကာ ခေါင်းညိတ်လိုက်သည်။ "အစ်ကိုကြီးနဲ့ ဒုတိယအစ်ကိုရော ဒီနှစ်တွေထဲမှာ ဘယ်လိုနေကြလဲ။"

"အရမ်းကောင်းပါတယ်။ ကျင့်ကြံရတာ နည်းနည်း ပင်ပန်းတာကလွဲရင်ပေါ့။" လိုထိုက်က ပြုံး၍ ပြောလိုက်သည်။

"ငါတို့ နဂါးနက်ဂိုဏ်းမှာ အခြေကျပြီးတဲ့နောက် မင်းဆီကို လာရှာချင်ခဲ့ကြတာ ညီငါး။ ဒါပေမဲ့ မင်းက အရိပ်အယောင်တောင် မကျန်ဘဲ ပျောက်ကွယ်သွားလိမ့်မယ်လို့ ဘယ်သူက သိမှာလဲ။ အဲဒါကြောင့် မင်းတစ်ခုခုများ ဖြစ်သွားပြီလားဆိုပြီး အစ်ကိုကြီးက အတော်ကြာတဲ့အထိ စိတ်ဓာတ်ကျနေခဲ့သေးတယ်။"

"မင်းများ ပြည့်တန်ဆာအိမ်တွေဆီ ရောင်းစားခံလိုက်ရပြီလားဆိုပြီး စိတ်ပူလို့ အစ်ကိုကြီးက အနီးအနားက ပြည့်တန်ဆာအိမ်တချို့ဆီတောင် သွားရှာခဲ့သေးတယ်။"

"ဟေး... မင်း ဘာတွေပြောနေတာလဲ" ကျန်းရှန်းဟန်က အလျင်အမြန် လက်ကာပြလိုက်သည်။ "ညီငါး ပျောက်သွားပေမဲ့ ညီငါးက ဘုန်းကံပါတဲ့သူဆိုတော့ သေချာပေါက် ဘေးကင်းမှာပါလို့ ငါ ယုံကြည်ထားခဲ့တယ်။ ကြည့်လေ... အခု ညီငါးက ငါတို့ကိုတောင် လာရှာပြီပဲ။"

"ဒါနဲ့ ညီငါး... ဒီနှစ်ယောက်က ဘယ်သူတွေလဲ။"

ကျန်းရှန်းဟန်က ရှောင်မို၏ အနောက်ရှိ အမျိုးသမီးနှစ်ဦးကို ကြည့်လိုက်သည်။

အမျိုးသမီးနှစ်ဦးစလုံးက အလွန်တရာ လှပကြသည်။

ပါးလွှာသော ပိုးသားဝတ်စုံကို ဝတ်ဆင်ထားပြီး ပြုံးနေသော အမျိုးသမီးက ညို့ငင်နိုင်စွမ်းရှိသော ဆွဲဆောင်မှုကို ထုတ်လွှင့်နေပြီး သူမ၏ အပြုံးနှင့် မျက်မှောင်ကြုတ်မှုတိုင်းက ဖမ်းစားနိုင်စွမ်း ရှိသည်။

သို့သော် ပန်းနုရောင် ဂါဝန်ကို ဝတ်ဆင်ထားသော အမျိုးသမီးကမူ သန့်စင်မွန်မြတ်မှုတစ်ခုကို ထုတ်လွှင့်နေပြီး သူမ၏ အလှတရားက ပိုးသားဝတ်စုံနှင့် အမျိုးသမီးထက်ပင် အဆင့်အနည်းငယ် ပိုသာလွန်နေကာ ဤလောကနှင့် မသက်ဆိုင်သည့်အလားပင်။

"အစ်ကိုကြီး၊ ဒုတိယအစ်ကို... သူတို့က လမ်းမှာဆုံခဲ့တဲ့ သူငယ်ချင်းနှစ်ယောက်ပါ။ ကျွန်တော်တို့က တစ်ယောက်ကိုတစ်ယောက် စောင့်ရှောက်ရင်း ခရီးအတူတူသွားလာနေတာ ကြာပါပြီ။" ရှောင်မိုက ပေါ့ပေါ့ပါးပါးပင် လိမ်ညာပြောဆိုလိုက်သည်။

"ဟားဟားဟား... ဒီလိုကိုး" ကျန်းရှန်းဟန်က ခေါင်းညိတ်လိုက်သည်။ "သူတို့က ညီငါးရဲ့ သူငယ်ချင်းတွေဆိုတော့ ငါတို့ရဲ့ သူငယ်ချင်းတွေလည်း ဖြစ်တာပေါ့။ သွားကြစို့။ ငါတို့ရဲ့ ခြံဝင်းထဲသွားပြီး လက်ဖက်ရည်သောက်ရင်း စကားကောင်းကောင်း ပြောကြတာပေါ့။"

"ကောင်းပါပြီ။" ရှောင်မိုက သဘာဝကျကျပင် သဘောတူလိုက်သည်။

ကျန်းရှန်းဟန်က ရှောင်မို၏ ပခုံးကို ဖက်ကာ ဂိုဏ်းထဲသို့ လျှောက်သွားခဲ့သည်။ သူတို့ကြားတွင် စိမ်းကားမှု လုံးဝမရှိခဲ့ဘဲ လမ်းတစ်လျှောက်တွင် အမျိုးသမီးများကို သတိထားရန်၊ အထူးသဖြင့် လှပသော အမျိုးသမီးများကို သတိထားရန် ကျန်းရှန်းဟန်က ရှောင်မိုကို သတိပေးခဲ့သေးသည်။

ဒီအတွက် ရှောင်မိုက ခပ်ဖျော့ဖျော့သာ ပြုံးလိုက်ပြီး ဘာမှ ပြန်မပြောခဲ့ပေ။

မကြာမီမှာပင် ရှောင်မိုနှင့် အဖွဲ့သည် သူ၏ အစ်ကိုကြီးနှင့် ဒုတိယအစ်ကိုတို့ နေထိုင်ရာ ခြံဝင်းဆီသို့ ရောက်ရှိလာခဲ့ကြသည်။

ကျန်းရှန်းဟန်နှင့် လိုထိုက်တို့က အတူတကွ နေထိုင်ကြသည်။ ခြံဝင်းကို အတွင်းစည်းတပည့်များသာ အသုံးပြုနိုင်သော ဝိညာဉ်စုဆောင်းခြင်း မှော်ဝင်္ကပါတစ်ခုဖြင့် ဝန်းရံထားပြီး ယင်းက နေ့စဉ် အနားယူချိန်များတွင်ပင် ကျင့်ကြံခြင်းကို တိုးတက်စေရန် ကူညီပေးနိုင်သည်။

ဤဝိညာဉ်စုဆောင်းခြင်း မှော်ဝင်္ကပါက ရဲ့ရွှယ်တောင်ထွတ်နှင့် ယှဉ်လျှင် ဘာမှမဟုတ်သော်လည်း ဂိုဏ်းတပည့်များစွာ၏ ခံစားခွင့်ထက်တော့ ပိုကောင်းနေဆဲပင်။

ဝမ်ရှင်းနှင့် စစ်လီတို့က တစ်ဖက်တွင် ထိုင်နေကြပြီး သူတို့ကို မနှောင့်ယှက်ခဲ့ပေ။

ရှောင်မိုက သူ၏ အစ်ကိုနှစ်ယောက်နှင့်အတူ နှစ်များစွာအတွင်း သူကြုံတွေ့ခဲ့ရသည်များကို စကားစမြည် ပြောဆိုနေခဲ့သည်။

ချန်ကျိန်းဟောင်က ကျင့်ကြံခြင်းအတွက် သူတို့၏ အစ်ကိုသုံးကို သတ်ဖြတ်ခဲ့ကြောင်း ရှောင်မို ပြောပြသောအခါ ကျန်းရှန်းဟန်နှင့် လိုထိုက်တို့ နှစ်ဦးစလုံးက မယုံကြည်နိုင်သော မျက်နှာအမူအရာများ ဖြစ်သွားခဲ့ကြသည်။

"ဖုန်းယဲ့မြို့တော်ကို ကျွန်တော် ဖြတ်သွားတုန်းက အစ်ကိုလေးက သာမန်ပြည်သူ သောင်းနဲ့ချီပြီး သွေးယဇ်ပူဇော်ဖို့ လုပ်နေခဲ့တာ။ နောက်ဆုံးတော့ လမ်းကြုံလာတဲ့ ကျင့်ကြံသူတစ်ယောက်က အစ်ကိုလေးကို သတ်ပစ်လိုက်ပြီး အစ်ကိုသုံးကလည်း လွတ်မြောက်မှုရပြီး သံသရာထဲကို ဝင်သွားခဲ့တယ်။"

ရှောင်မို၏ စကားသံ အဆုံးတွင် ကျန်းရှန်းဟန်နှင့် လိုထိုက်တို့ နှစ်ဦးစလုံး တိတ်ဆိတ်သွားကြပြီး သူတို့၏ မျက်လုံးများတွင် ဝမ်းနည်းမှု အရိပ်အယောင်တစ်ခု လက်ခနဲ ဖြစ်သွားခဲ့သည်။

"ဟူး..." အချိန်အတော်ကြာပြီးနောက် ကျန်းရှန်းဟန်က သက်ပြင်းချလိုက်ပြီး သူ၏ လက်သီးများကို ဆုပ်ထားကာ သူ၏ မျက်နှာအမူအရာတွင် ကိုယ့်ကိုယ်ကိုယ် အပြစ်တင်မှုများ ပြည့်နှက်နေခဲ့သည်။

လိုထိုက်က ထိုအချိန်က ဖြစ်ပျက်ခဲ့သည်များကို ရှောင်မိုအား ပြောပြခဲ့သည်။ "အစ်ကိုကြီးနဲ့ ငါက နဂါးနက်ဂိုဏ်းထဲ ရွေးချယ်ခံရတုန်းက အစ်ကိုသုံးနဲ့ အစ်ကိုလေးမှာ လုံလောက်တဲ့ ပါရမီမရှိဘူးဆိုပေမဲ့ အပြင်စည်းတပည့်တွေတော့ ဖြစ်လာနိုင်သေးတယ်။"

"အဲဒီတုန်းက အတွင်းစည်းနဲ့ အပြင်စည်းက အတူတူပဲလို့ ငါတို့ ထင်ခဲ့တာ။"

"ငါတို့ ညီအစ်ကိုတွေက မူလကတည်းက စိတ်တူကိုယ်တူပဲလေ။ ငါတို့မှာ ကျင့်ကြံခြင်း သယံဇာတတွေရလာရင် အတူတူ မျှသုံးကြတာပဲ။ အစ်ကိုကြီးနဲ့ ငါက အစ်ကိုသုံးနဲ့ အစ်ကိုလေးကို အတွင်းစည်းထဲ ဆွဲခေါ်ချင်ခဲ့ကြတယ်။"

"ဒါပေမဲ့ မင်းရဲ့ အစ်ကိုလေးက အဲဒီတုန်းက ငြင်းခဲ့တယ်။ အစ်ကိုလေးက အပြင်ထွက်ပြီး နောက်တစ်ခေါက် ထပ်ကြည့်ချင်သေးတယ်လို့ ပြောတယ်။"

"အခြားနည်းလမ်း မရှိတော့ရင် နဂါးနက်ဂိုဏ်းရဲ့ အပြင်စည်းတပည့်အဖြစ် ပြန်လာခဲ့မယ်လို့ မင်းရဲ့ အစ်ကိုလေးက ပြောခဲ့တာ။"

"ဒါပေမဲ့ မင်းရဲ့ အစ်ကိုသုံးက စိတ်မချဘူး။ အစ်ကိုလေး အပြင်ဘက်မှာ အနိုင်ကျင့်ခံရမှာ စိုးရိမ်လို့ သူနဲ့အတူတူ လိုက်သွားခဲ့တယ်။"

"အစ်ကိုကြီးနဲ့ ငါကလည်း သူတို့နဲ့အတူတူ လိုက်သွားချင်ခဲ့တာ။"

"ဒါပေမဲ့ မင်းရဲ့ အစ်ကိုသုံးက ငါတို့ကိုလည်း ငြင်းခဲ့တယ်။"

"မင်းရဲ့ အစ်ကိုသုံးက ငါတို့ကို သေချာ ကျင့်ကြံဖို့ ပြောခဲ့ပြီး သူတို့ ဂိုဏ်းတစ်ခုခုနဲ့ မတွေ့ရင် မကြာခင် ပြန်လာခဲ့မယ်လို့ ပြောခဲ့တယ်။"

"နောက်ဆုံးကျတော့ ဒီလိုကိစ္စတွေ ဖြစ်လာလိမ့်မယ်လို့ ငါတို့ မျှော်လင့်မထားခဲ့ဘူး။"

ကျန်းရှန်းဟန်က ခေါင်းခါလိုက်သည်။ "ဒီကျင့်ကြံခြင်းလမ်းစဉ်က နေရာတိုင်းမှာ သွေးဆောင်ဖြားယောင်းမှုတွေနဲ့ ပြည့်နှက်နေတာ။ သွေးဆောင်မှုကို တွန်းလှန်နိုင်တဲ့သူ အရမ်းနည်းတယ်။ ဒါပေမဲ့ အစ်ကိုလေးက ကျင့်ကြံခြင်းအတွက်နဲ့ ဒီလောက်တောင်..."

သူတို့ ပိုပြောလေလေ သူတို့၏ စိတ်ဓာတ်များ ပိုကျဆင်းလာလေလေ ဖြစ်သည်။

ဒါပေမဲ့ အခြေအနေက ဒီအထိရောက်လာပြီဆိုတော့ သူတို့ ဘာမှ ပြောင်းလဲလို့မရတော့ဘူးဆိုတာကိုလည်း သူတို့ သိထားကြသည်။

သူတို့သုံးယောက်က သေရည်သာ ဆက်သောက်နေခဲ့ကြသည်။ သေရည်သုံးပတ်လောက် အသောက်မှာ မူးယစ်မှုလေး အနည်းငယ် ဝင်လာပြီး အစ်ကိုကြီးက အားရပါးရ ငိုချလိုက်ပြီးနောက် သူတို့၏ စိတ်ခံစားချက်များ နောက်ဆုံးတွင် အနည်းငယ် ပြေလျော့သွားခဲ့သည်။

"အစ်ကိုကြီး၊ ဒုတိယအစ်ကို... အဲဒီ ဧကရာဇ်သားရဲဂိုဏ်းက ဘာလုပ်ချင်နေတာလဲ။" ရှောင်မိုက စကားလမ်းကြောင်းပြောင်းကာ မေးလိုက်သည်။

ကျန်းရှန်းဟန်က ခေါင်းခါလိုက်သည်။ "တကယ်တော့ ငါတို့လည်း သေချာ မသိပါဘူး။ ဒုတိယအစ်ကိုနဲ့ ငါက အတွင်းစည်းတပည့်တွေပဲ ရှိသေးတာလေ။ ဒါပေမဲ့ မကြာသေးခင်က ငါတို့ရဲ့ နဂါးနက်ဂိုဏ်းမှာ တစ်ခုခု ထွက်ပေါ်လာတော့မယ်ဆိုတဲ့ ကောလာဟလတွေ ခပ်ရေးရေး ထွက်နေတယ်။"

လိုထိုက်က ရှောင်မိုအတွက် သေရည်တစ်ခွက် ငှဲ့ပေးရင်း ထပ်ပြောလိုက်သည်။ "ဒီအရာနဲ့ပတ်သက်တဲ့ သတင်းကိုတော့ မနေ့က ငါ ဂိုဏ်းတူအစ်ကိုတချို့နဲ့ သေရည်သွားသောက်တုန်းက နည်းနည်းပါးပါး ကြားခဲ့ရတယ်။"

"အို... ဘာကိုဆိုလိုတာလဲ။" ကျန်းရှန်းဟန်၏ မျက်လုံးများက တောက်ပသွားပြီး သူကိုယ်တိုင်လည်း အနည်းငယ် စပ်စုချင်နေခဲ့သည်။

"အမှန်လား အမှားလားတော့ ငါမသိဘူး။ တပည့်တွေကြားက ကောလာဟလ တချို့ပါပဲ။"

လိုထိုက်က ခေါင်းခါလိုက်သည်။

"ဒီရတနာက ဒဏ္ဍာရီလာ သားရဲဆိုးကြီး ဟွန်တွန်းသားရဲကြီးလို့ ငါကြားတယ်။"

"အခု နဂါးနက်ဂိုဏ်းက အုပ်စုနှစ်စု ကွဲနေတယ်။ အုပ်စုတစ်စုက နတ်ဘုရားသားရဲ ဟွန်တွန်းကို နှိုးပြီး သူတို့ရဲ့ ကိုယ်ပိုင်အကျိုးအတွက် အသုံးပြုဖို့ ထောက်ခံကြတယ်။ အဲဒီလိုဆိုရင် ဟွန်တွန်းသားရဲကြီး ကြီးပြင်းလာတဲ့အခါ နဂါးနက်ဂိုဏ်းရဲ့ ကာကွယ်စောင့်ရှောက်သူ နတ်ဘုရား ဖြစ်လာလိမ့်မယ်။"

"ဒါပေမဲ့ ဂိုဏ်းချုပ်ကတော့ ဟွန်တွန်းသားရဲကြီးဟာ မွေးရာပါ ဆိုးယုတ်တဲ့အတွက် ဒီလိုအရာမျိုးက လောကကြီးထဲမှာ မပေါ်လာသင့်ဘူးလို့ ခံစားရပြီး ဟွန်တွန်းသားရဲကြီးကို ပြန်လည်ချိတ်ပိတ်ဖို့ ဒါမှမဟုတ် သတ်ပစ်ဖို့တောင် ဆန္ဒရှိနေတယ်။"

"ဧကရာဇ်သားရဲဂိုဏ်းက ငါတို့ကို ဝန်းရံဖို့ ဒီလောက် အင်အားအများကြီးနဲ့ ရောက်လာတာ မဆန်းတော့ပါဘူး။" ကျန်းရှန်းဟန်က ရုတ်တရက် သဘောပေါက်သွားခဲ့သည်။ "ဧကရာဇ်သားရဲဂိုဏ်း တစ်ခုလုံးက သားရဲယဉ်ပါးစေတဲ့ ကျင့်စဉ်ပညာရပ်တွေအပေါ် အခြေခံထားတာဆိုတော့ သူတို့က ဟွန်တွန်းသားရဲကြီးကို ထိန်းချုပ်ချင်နေတာ မဟုတ်ဘူးလား။"

"ဟုတ်တယ်။" လိုထိုက်က ခေါင်းညိတ်လိုက်သည်။ "သူတို့ရဲ့ ကျင့်ကြံခြင်းက နတ်ဘုရားသားရဲရဲ့ အဆင့်အတန်းနဲ့ ဆက်စပ်နေတာလေ။ ဒီအခွင့်အရေးကို သူတို့က ဘယ်လိုလုပ် လက်လွှတ်ခံနိုင်မှာလဲ။"

"ဒါပေမဲ့ ညီငါးက စိတ်ပူစရာမလိုပါဘူး။" ကျန်းရှန်းဟန်က ရှောင်မို၏ ပခုံးကို ပုတ်လိုက်သည်။ "ငါတို့ရဲ့ နဂါးနက်ဂိုဏ်းချုပ်က ကောင်းကင်ဘုံတက်လှမ်းခြင်းအဆင့်ကို မရောက်သေးပေမဲ့ မသေမျိုးအဆင့်ရဲ့ အထွတ်အထိပ်မှာ ရှိနေတယ်။ ဂိုဏ်းကာကွယ်ရေး မှော်ဝင်္ကပါရဲ့ အထောက်အပံ့နဲ့ဆိုရင် ဂိုဏ်းချုပ်ရဲ့ အင်အားက ဧကရာဇ်သားရဲဂိုဏ်းထက် သေချာပေါက် မနိမ့်ကျနိုင်ဘူး။"

"ကျွန်တော် စိတ်မပူပါဘူး။" ရှောင်မိုက ခေါင်းညိတ်လိုက်သည်။

"သွားကြစို့။ မင်းကို ဧည့်သည်တော်တောင်ထွတ်ဆီ ခေါ်သွားပေးမယ် ညီငါး။ ဒုတိယအစ်ကိုနဲ့ ငါက အတွင်းစည်းတပည့်တွေပဲ ဖြစ်နေသေးပေမဲ့ မင်းကို သက်သောင့်သက်သာ နေနိုင်အောင်တော့ ငါတို့ သေချာပေါက် စီစဉ်ပေးမှာပါ။"

ကျန်းရှန်းဟန်က နောက်ဆုံးတစ်ခွက်ကို သောက်လိုက်ပြီး မတ်တတ်ရပ်လိုက်သည်။

သို့သော် သူတို့အဖွဲ့ ခြံဝင်းထဲမှ ထွက်လာချိန်လေးမှာပင်။

နဂါးနက်ဂိုဏ်း တစ်ခုလုံးတွင် ခေါင်းလောင်းထိုးသံတစ်ခု ဟိန်းထွက်လာခဲ့သည်။

"ဒါက..."

ကျန်းရှန်းဟန်က ခေါင်းလောင်းသံ ထွက်ပေါ်လာရာဘက်သို့ လှမ်းကြည့်လိုက်ရာ သူ၏ မူးယစ်နေမှုများ ချက်ချင်း ပျောက်ကွယ်သွားခဲ့သည်။

"ရန်သူ့တိုက်ခိုက်မှုလား"

အခန်း ၂၄၈ နဂါးနက်ဂိုဏ်း... ဒီစိန်ခေါ်မှုကို လက်ခံရဲသလား

နဂါးနက်ဂိုဏ်း၏ အထက်ကောင်းကင်ယံတွင် ဧကရာဇ်သားရဲဂိုဏ်း၏ ဝတ်စုံများကို ဝတ်ဆင်ထားသော ကျင့်ကြံသူအနည်းငယ်က လေထဲတွင် ခြေလှမ်းလှမ်းကာ ဖြည်းညှင်းစွာ ချဉ်းကပ်လာကြသည်။

သူတို့က နဂါးနက်ဂိုဏ်း၏ သတိပေးခေါင်းလောင်းသံကို လျစ်လျူရှုထားပုံရကာ နဂါးနက်ဂိုဏ်း တစ်ခုလုံးသည် သူတို့ အလိုရှိသလို ဝင်ထွက်သွားလာနိုင်သော အိမ်နောက်ဖေးခြံဝင်းတစ်ခုမျှသာ ဖြစ်နေသည့်အလား တည်ငြိမ်အေးဆေးစွာ ပြုမူနေကြသည်။

ချန်ဖန်းအမည်ရှိ ကျင့်ကြံသူက သူ၏ဘေးရှိ အကြီးအကဲကို လှည့်ကာ မေးလိုက်သည်။ "အကြီးအကဲဟူ... နဂါးနက်ဂိုဏ်းက လူတွေ သဘောတူမယ်လို့ ထင်ပါသလား။"

အကြီးအကဲဟူက တိုးတိုးလေး ရယ်မောလိုက်ပြီး သူ၏ လေသံက ပြတ်သားနေခဲ့သည်။ "ဟီးဟီးဟီး... သူတို့ သဘောတူရမှာ သဘာဝပဲလေ။"

"နဂါးနက်ဂိုဏ်းက မအပါဘူး။ ငါတို့ ဧကရာဇ်သားရဲဂိုဏ်းနဲ့ ရန်သူဖြစ်ရတဲ့ အကျိုးဆက်တွေကို သူတို့ သိတယ်။ ဒီတစ်ခေါက် ငါတို့က သူတို့ကို ထွက်ပေါက်တစ်ခု ပေးနေတာလေ။ ဒီလို ယဉ်ကျေးပျူငှာမှုကို သူတို့ ငြင်းဆန်မှာ မဟုတ်ဘူး။"

သူ၏ဘေးတွင် ချောမောသော ကျင့်ကြံသူ ချန်ယွင်ရှီးကလည်း နှုတ်ခမ်းကို တွန့်ကွေးလိုက်ပြီး သူ၏ လေသံတွင် မထီမဲ့မြင်ပြုမှုများ ပြည့်နှက်နေခဲ့သည်။

"နဂါးနက်ဂိုဏ်းချုပ်က မသေမျိုးအဆင့်ပဲ ရှိသေးတာ။ ဂိုဏ်းကာကွယ်ရေး မှော်ဝင်္ကပါကို အားကိုးပြီး ဒီလောက် ခေါင်းမာနေပေမဲ့ ငါတို့က နဂါးနက်ဂိုဏ်းနဲ့ စစ်မဖြစ်ရဲဘူးလို့ သူ တကယ် ထင်နေတာလား။ အဲဒီ ဟွန်တွန်းသားရဲကြီးကို ငါတို့ သေချာပေါက် ရယူရမယ်။"

ဟူကူက သူ၏လက်ကို အနည်းငယ် ဝှေ့ယမ်းလိုက်ပြီး သူ၏ မျက်နှာအမူအရာက တည်ငြိမ်နေခဲ့သည်။ "အလောတကြီး လုပ်စရာမလိုပါဘူး။ နဂါးနက်ဂိုဏ်းက အလွယ်တကူ ကိုင်တွယ်လို့ရတဲ့ အပျော့စားလေး မဟုတ်ဘူး။ စစ်ပွဲစပြီဆိုတာနဲ့ ထိခိုက်သေဆုံးမှုတွေက ရှောင်လွှဲလို့မရဘူးလေ။ ငါတို့မှာ တခြားနည်းလမ်းတွေ အများကြီး ရှိသေးတယ်။ လောစရာ မလိုပါဘူး။"

သူ စကားမဆုံးမီမှာပင် သူ၏ အကြည့်များက အဝေးသို့ ရောက်ရှိသွားပြီး ပေါ့ပါးသော လေသံဖြင့် ပြောလိုက်သည်။ "ကြည့်စမ်း... အခု သူတို့ ငါတို့ကို လာကြိုနေကြပြီ မဟုတ်လား။"

သူ၏ စကားသံ အဆုံးတွင် နဂါးနက်ဂိုဏ်းချုပ် လော့ကျဲက အကြီးအကဲ အနည်းငယ်ကို ဦးဆောင်ကာ ရှေ့သို့ ပျံသန်းလာပြီး ဟူကူနှင့် သူ၏အဖွဲ့ကို တားဆီးလိုက်သည်။

လော့ကျဲက ဤဧကရာဇ်သားရဲဂိုဏ်း၏ မဟာအကြီးအကဲကို အေးစက်စွာ စိုက်ကြည့်လိုက်ပြီး မျက်မှောင်ကြုတ်ကာ မေးလိုက်သည်။ "အကြီးအကဲဟူက တပည့်နှစ်ယောက်တည်း ခေါ်ပြီး ငါ့ရဲ့ နဂါးနက်ဂိုဏ်းကို လာတာ အင်အားပြဖို့ သီးသန့်လာတာလား။"

ဟူကူက အလောတကြီးမရှိဘဲ ပြုံး၍ ပြန်ဖြေလိုက်သည်။ "ဂိုဏ်းချုပ်လော့ကျဲ... ခင်ဗျားရဲ့ စကားတွေက အရမ်း လေးလံလွန်းနေပါပြီ။ ကျွန်တော်တို့ ဒီကိုလာတဲ့ ခရီးစဉ်က ခင်ဗျားတို့ ဂိုဏ်းနဲ့ အခြေအနေတစ်ခုကို ဆွေးနွေးဖို့ပါ။ အကယ်၍ လူတွေ အများကြီး ခေါ်လာရင် ခင်ဗျားတို့ ဂိုဏ်းကို သံသယဝင်စေမှာ မဟုတ်ဘူးလား။"

လော့ကျဲက မျက်မှောင်ကို တင်းကျပ်စွာ ကြုတ်လိုက်ပြီး "အခြေအနေတစ်ခု" ဟု ပြန်မေးလိုက်သည်။

ဟူကူက သူ၏ လက်များကို နောက်ကျောဘက်တွင် ယှက်ထားလိုက်ပြီး သူ၏ လေသံက အေးချမ်းနေခဲ့သည်။ "အကယ်၍ ငါတို့ ဂိုဏ်းနှစ်ခုစလုံး စစ်ပွဲကြီး ဆင်နွှဲမယ်ဆိုရင် နောက်ဆုံးမှာ ငါ့ရဲ့ ဧကရာဇ်သားရဲဂိုဏ်းက နိုင်ခဲ့ရင်တောင်မှ ပျက်စီးဆုံးရှုံးမှုတွေ ရှိလာမှာ ရှောင်လွှဲလို့မရဘူး။ ဒါကြောင့် ငါ့ရဲ့ ဧကရာဇ်သားရဲဂိုဏ်းချုပ်က အဆိုပြုလာတယ်။ ဒီကိစ္စကို မျိုးဆက်သစ် လူငယ်လေးတွေပဲ ဖြေရှင်းခိုင်းရင် ဘယ်လိုနေမလဲလို့။"

"စကားကို လှည့်ပတ်မပြောဘဲ ရှင်းရှင်းပဲ ပြောစမ်းပါ။" လော့ကျဲက ဤမြေခွေးအိုကြီး ဘာတွေ ကြံစည်နေသလဲဟု တွေးတောကာ ဟူကူကို သတိထား၍ စိုက်ကြည့်လိုက်သည်။

"ချန်ဖန်း... ချန်ယွင်ရှီး" ဟူကူက ခေါင်းလှည့်ကာ လှမ်းခေါ်လိုက်သည်။

"တပည့် ရှိပါတယ်" သူတို့နှစ်ယောက်က ပြန်ဖြေသံပေးကာ ရှေ့သို့ ထွက်လာကြပြီး သူတို့၏ မျက်လုံးများတွင် လူငယ်ကျင့်ကြံသူများ၌သာရှိသော မာနတရားနှင့် ထက်မြက်မှုများက တောက်ပနေခဲ့သည်။

"ငါ့ဘေးက ဒီဧကရာဇ်သားရဲဂိုဏ်း တပည့်နှစ်ယောက်က သန္ဓေတည်ဝိညာဉ်အဆင့်ကို ရောက်ရှိနေကြပါပြီ။ ဒီနေ့ သူတို့က ခင်ဗျားတို့ ဂိုဏ်းဆီကနေ အကြံဉာဏ်တောင်းခံဖို့ ရောက်လာတာပါ။ အသက်ရှင်ခြင်းနဲ့ သေဆုံးခြင်းက ကံတရားအပေါ်မှာပဲ မူတည်ပြီး ဘယ်သူမှ ဝင်စွက်ဖက်ခွင့် မရှိဘူး။"

ဟူကူ၏ အသံက ကျယ်လောင်နေပြီး အဝေးဆီသို့ ပြန့်နှံ့သွားကာ နဂါးနက်ဂိုဏ်း တစ်ခုလုံးတွင် ပဲ့တင်ထပ်သွားသဖြင့် ကျင့်ကြံသူတိုင်းက ၎င်းကို ရှင်းလင်းစွာ ကြားလိုက်ရသည်။

"တန်းတူရည်တူ ယှဉ်ပြိုင်မှုတစ်ခုမှာ ခင်ဗျားတို့ ဂိုဏ်းရဲ့ ခန်းမဆောင်နဲ့ တောင်ထွတ်တိုင်းက လူနှစ်ယောက် စေလွှတ်နိုင်ပါတယ်။ ချန်ဖန်းနဲ့ ယွင်ရှီးက သူတို့ကို တစ်ယောက်ပြီးတစ်ယောက် ရင်ဆိုင်တိုက်ခိုက်သွားလိမ့်မယ်။ အကယ်၍ သူတို့ ရှုံးခဲ့ရင် နဂါးနက်ဂိုဏ်းက အနိုင်ရတယ်လို့ မှတ်ယူပြီး ငါ့ရဲ့ ဧကရာဇ်သားရဲဂိုဏ်းက ဘာစကားတစ်ခွန်းမှ မဆိုဘဲ ချက်ချင်း ဆုတ်ခွာသွားမယ်။ ဂိုဏ်းချုပ်လော့ကျဲ... ဒီစိန်ခေါ်မှုကို ခင်ဗျား လက်ခံရဲသလား။"

လော့ကျဲက ချက်ချင်း အကြောင်းမပြန်ခဲ့ဘဲ သူ၏ မျက်နှာအမူအရာတွင် တွေဝေမှု အရိပ်အယောင်တစ်ခု ဖြတ်ပြေးသွားခဲ့သည်။

"ဂိုဏ်းချုပ်လော့ကျဲ... ခင်ဗျား ကြောက်နေတာလား။" ချန်ဖန်းက လှောင်ပြုံးပြုံးကာ ရန်စသည့် လေသံဖြင့် ပြောလိုက်သည်။

"စိတ်မပူပါနဲ့။ တရားမျှတမှု ရှိစေဖို့အတွက် သဘာဝကျကျပဲ ငါတို့ရဲ့ ကျင့်ကြံခြင်းအဆင့်ကို ဂူဗိမာန်အဆင့်ရဲ့ အစောပိုင်းအဆင့်အထိ ဖိနှိပ်ထားပေးပါ့မယ်။ ခင်ဗျားတို့က နဂါးနက်ဂိုဏ်းရဲ့ ကျင့်ကြံသူတွေကို နဂါးတံခါးအဆင့်ရဲ့ အစောပိုင်းအဆင့်မှာပဲ ထားဖို့ လိုပါတယ်။ နဂါးနက်ဂိုဏ်းက ဒီလောက် သတ္တိလေးတောင် မရှိဘူးလား။"

"တောက်... မင်းတို့ကို ငါပဲ ရှင်းပေးမယ်။" နဂါးနက်ဂိုဏ်း တပည့်တစ်ယောက်က ဒေါသတကြီး အော်ဟစ်ကာ ရှေ့သို့ ထွက်လာခဲ့သည်။

"တူးကူးချိုး... နောက်ဆုတ်စမ်း။" လော့ကျဲက တင်းမာစွာ အော်ငေါက်လိုက်သည်။

"ဂိုဏ်းချုပ်..." တူးကူးချိုးအမည်ရှိ တပည့်ဖြစ်သူက မကျေနပ်မှုများ ပြည့်နှက်နေသော်လည်း ဂိုဏ်းချုပ်၏ အမိန့်ကို မဖီဆန်ရဲသဖြင့် သွားများကို တင်းတင်းကြိတ်ကာ လူအုပ်ထဲသို့ နောက်ဆုတ်သွားခဲ့ရသည်။

"ငါတို့ စိန်ခေါ်မှုကို လက်ခံတယ်။" လော့ကျဲက အေးစက်စွာ ပြောလိုက်ပြီး သူ၏ လေသံက ပြတ်သားနေခဲ့သည်။

အခြေအနေက ဤအထိ ရောက်လာပြီဖြစ်ရာ သူတို့ ဆန္ဒရှိသည်ဖြစ်စေ၊ မရှိသည်ဖြစ်စေ ဤတိုက်ပွဲကို လက်ခံရမည်သာ ဖြစ်သည်။

လူငယ်များဆိုသည်မှာ သဘာဝအတိုင်း ခွန်အားများ ပြည့်ဝနေတတ်ပြီး ကျင့်ကြံခြင်း လမ်းစဉ်တွင် ပိုမို ရှေ့ဆက်နိုင်ရန် သူတို့ကို ပံ့ပိုးပေးထားသည်မှာ ဤထက်မြက်မှုပင် ဖြစ်သည်။

အကယ်၍ တစ်နေ့တွင် ကျင့်ကြံသူတစ်ယောက်က တက်ကြွမှု မရှိတော့ပါက သူတို့၏ စိတ်နှလုံးနှင့် ဝိညာဉ်က ပျက်စီးသွားပြီဖြစ်ပြီး သူတို့၏ တာအိုလမ်းစဉ်က အဆုံးသတ်သို့ ရောက်ရှိနေပြီ ဖြစ်ပေလိမ့်မည်။

ယခု တစ်ဖက်လူက ဗြောင်ကျကျ ရန်စနေချိန်တွင် သူတို့သာ လက်မခံပါက ဂိုဏ်း၏ စိတ်ဓာတ်ကို ကျဆင်းစေရုံသာမက တပည့်များကိုလည်း စိတ်ပျက်အားငယ်စေလိမ့်မည်။ အဲဒီအချိန်ကျရင် စစ်မှန်တဲ့ စစ်ပွဲကြီးကို စောင့်စရာမလိုဘဲ နဂါးနက်ဂိုဏ်း တစ်ခုလုံးရဲ့ အငွေ့အသက်က အားနည်းသွားနေလောက်ပြီ ဖြစ်သည်။

ထို့အပြင် လော့ကျဲ၏ အမြင်တွင် သူက ဧကရာဇ်သားရဲ ဂိုဏ်းချုပ်နှင့် တူညီသော ကျင့်ကြံခြင်းအဆင့်၌ မရှိသော်လည်း သူ၏ တပည့်များ၏ ပါရမီက ကြီးမြတ်သော မိစ္ဆာဂိုဏ်းကြီးဆယ်ခုမှ တပည့်များထက် အလျှင်းမနိမ့်ကျပေ။

"ကောင်းပြီ။ ဂိုဏ်းချုပ်လော့ကျဲက တကယ်ကို ပွင့်လင်းဖြောင့်မတ်တာပဲ။" ဟူကူက လက်ခုပ်တီးကာ ပြုံးလိုက်သည်။ "ဒီလိုဆိုမှတော့ အခုအချိန်လောက် ကောင်းတဲ့အချိန် မရှိတော့ဘူး။ ငါတို့ အခုပဲ စလိုက်ကြရင် ဘယ်လိုလဲ။"

သူက ခေါင်းလှည့်ကာ ဘေးရှိ ချန်ဖန်းကို ကြည့်ပြီး ညွှန်ကြားလိုက်သည်။ "ချန်ဖန်း... မင်း အရင်သွားပြီး တောင်ထွတ်တစ်ခုကို ရွေးချယ်ပြီးတော့ပ နဂါးနက်ဂိုဏ်းက တာအိုရောင်းရင်းတွေနဲ့ သေချာ ယှဉ်ပြိုင်ကြည့်လိုက်။"

"ဟုတ်ကဲ့ပါ အကြီးအကဲ။" ချန်ဖန်း၏ မျက်လုံးများထဲတွင် တိုက်ပွဲကို ဆာလောင်နေသော စိတ်လှုပ်ရှားမှု တစ်ခု လက်ခနဲ ဖြစ်သွားခဲ့သည်။ "ရွေးချယ်နေစရာတောင် မလိုပါဘူး။ ကျွန်တော်တို့ရဲ့ ခြေအောက်မှာရှိတဲ့ တောင်ထွတ်ကနေပဲ စလိုက်ကြတာပေါ့။"

သူ စကားမဆုံးမီမှာပင် ချန်ဖန်းက ကြာမြစ်တောင်ထွတ်၏ ထိပ်ဆီသို့ တည့်မတ်စွာ ကျဆင်းသွားသော အလင်းတန်းတစ်ခုကဲ့သို့ အလောတကြီး ခုန်ဆင်းသွားခဲ့သည်။

သူက တောင်ထိပ်တွင် ရပ်လိုက်ပြီး သူ၏ အသံကို ဝိညာဉ်စွမ်းအင်များ ထည့်သွင်းကာ နဂါးနက်ဂိုဏ်း တစ်ခုလုံးသို့ ပျံ့နှံ့သွားစေသည်။ "တိုက်ခိုက်နိုင်တဲ့ လူတစ်ယောက် လွှတ်လိုက်စမ်း။ အကယ်၍ ဘယ်သူမှ စိန်ခေါ်မှုကို လက်မခံရင် ဒီသခင်လေးက တောင်ထွတ်တိုင်းနဲ့ ခန်းမဆောင်တိုင်းကို လိုက်ပြီး တိုက်ခိုက်ပစ်မယ်။"

"တာအိုရောင်းရင်း... အလွန်အမင်း မာနကြီးနေတာက ကောင်းတဲ့အရာတော့ မဟုတ်ပါဘူး။" နဂါးနက်ဂိုဏ်း၏ ခေါင်းဆောင်တပည့် ဝမ်လင်းက ဓားရှည်တစ်လက်ကို ကိုင်ဆောင်လျက် လေးနက်သော အမူအရာဖြင့် ဖြည်းညှင်းစွာ ထွက်လာခဲ့သည်။ "ကျွန်တော်က နဂါးနက်ဂိုဏ်း ကြာမြစ်တောင်ထွတ်က ဝမ်လင်းပါ။ ကျေးဇူးပြုပြီး လမ်းညွှန်ပြသပေးပါဦး တာအိုရောင်းရင်း။"

"မင်းတို့ တောင်ထွတ်မှာ မင်းက လူငယ်မျိုးဆက်တွေထဲ အသန်မာဆုံးလား။" ချန်ဖန်းက မျက်မှောင်ကြုတ်လိုက်ပြီး မထီမဲ့မြင် လေသံဖြင့် ပြောလိုက်သည်။ "သွား... သွား... သွား... တခြားလူ သွားပြောင်းလိုက်။ မင်းက ငါ့မျက်စိထဲ ထည့်ကြည့်စရာတောင် မလိုဘူး။"

ဤမျှလောက် အထင်အမြင်သေးခံရသဖြင့် ဝမ်လင်းက မျက်မှောင်ကို ပြင်းပြင်းထန်ထန် ကြုတ်လိုက်ပြီး ဩရှသောအသံဖြင့် ပြောလိုက်သည်။ "တာအိုရောင်းရင်း... ကျွန်တော့် လက်ထဲက ဓားကို အရင် အနိုင်ယူကြည့်လိုက်ပါ။"

စကားပြောအပြီးတွင် သူက သူ၏ ဓားရှည်ကို တုန်ခါလိုက်ရာ ဓားအလင်းတန်းများ ပေါက်ကွဲထွက်လာပြီး ကြာပန်းဖတ်များ ပွင့်လန်းလာသည့်အလား ထိုးဖောက်နိုင်သော ဓားချီများကို သယ်ဆောင်ကာ ချန်ဖန်းထံသို့ တည့်မတ်စွာ ခုတ်ပိုင်းသွားခဲ့သည်။

"ငါ ပြောပြီးပြီလေ... မင်းက အရည်အချင်း မပြည့်မီပါဘူးလို့။"

ချန်ဖန်းက ကူကယ်ရာမဲ့ဟန်ဖြင့် သက်ပြင်းချလိုက်ပြီးနောက် ကျယ်လောင်သော လေချွန်သံတစ်ခုကို မှုတ်ထုတ်လိုက်သည်။

"ရွှီး..."

စူးရှသော ဖီးနစ်ငှက် ဩသံတစ်ခုက ကောင်းကင်ယံကို ဆုတ်ဖြဲသွားပြီး မီးတောက်များက ကောင်းကင်ယံတွင် ပြည့်နှက်သွားကာ ပူပြင်းသော အပူလှိုင်းလုံးကြီးများ သူ၏ဆီသို့ တဟုန်ထိုး ဝင်ရောက်လာခဲ့သည်။

ပျံသန်းလာသော ထိုအရာက တစ်ကိုယ်လုံး ကျောက်စိမ်းကဲ့သို့ ကြက်သွေးရောင် တောက်ပနေပြီး နတ်ဘုရားသားရဲဖြစ်သည့် စစ်မှန်သော ဖီးနစ်ငှက်တစ်ကောင်နှင့် တူနေသော်လည်း ၎င်းက နတ်ဘုရားသားရဲ မဟုတ်ဘဲ ကြမ်းကြုတ်သော သားရဲဆိုးကြီး တစ်ကောင်သာ ဖြစ်သည်။

နတ်ဘုရားသားရဲများနှင့် ဝိညာဉ်သားရဲများသည် မိစ္ဆာမျိုးနွယ်ဝင်များဖြစ်ကြပြီး သူတို့၏ ဝိညာဉ်ဉာဏ်ပညာကို ဖွင့်လှစ်ထားကာ လူသားအသွင်ယူနိုင်ပြီး လောက၏ အကြောင်းတရားများကို နားလည်ကြသည်။

သားရဲဆိုးများကတော့ လုံးဝ ကွာခြားသည်။

သူတို့က မွေးရာပါ ကျင့်ကြံနိုင်စွမ်း ရှိကြသော်လည်း သူတို့၏ သွေးဆက်နွယ်မှုစွမ်းအားက သူတို့၏ အမြင့်ဆုံးအကန့်အသတ်ကို ကန့်သတ်ထားပြီး သူတို့၏ ဝိညာဉ်ဉာဏ်ပညာက အားနည်းကာ နိမ့်ကျလှသည်။

အမြင့်ဆုံးအဆင့် သားရဲဆိုးကြီးပင်လျှင် ဆယ့်လေးနှစ်အရွယ် ကလေးတစ်ယောက်ထက် ပိုမိုကြီးမားသော ဉာဏ်ရည်ဉာဏ်သွေး မရှိပေ။

ဧကရာဇ်သားရဲဂိုဏ်းမှ ကျင့်ကြံသော သားရဲယဉ်ပါးစေသည့် နည်းလမ်းသည် ဤသားရဲဆိုးများကို ထိန်းချုပ်ခြင်းပင် ဖြစ်သည်။

သားရဲဆိုး၏ အဆင့်အတန်းက သူ၏ပိုင်ရှင် ကျင့်ကြံခြင်းအဆင့်၏ အမြင့်ဆုံး အကန့်အသတ်ကို တိုက်ရိုက် ဆုံးဖြတ်ပေးသည်။

ထို့ကြောင့် ဧကရာဇ်သားရဲဂိုဏ်းမှ ကျင့်ကြံသူများသည် သူတို့၏ သားရဲဆိုးများကို မကြာခဏ လဲလှယ်ရန် လိုအပ်သည်။

တတိယအဆင့်အထက်ရှိ သားရဲဆိုးများက ရှားပါးပြီး ၎င်းတို့ကို ယဉ်ပါးစေရန်မှာ ကောင်းကင်ဘုံသို့ တက်လှမ်းရသကဲ့သို့ ခက်ခဲသောကြောင့် ဤအချက်က ဂိုဏ်းအတွင်း အထက်သုံးဆင့် ကျင့်ကြံသူများကို ရှားပါးသွားစေသည်။

သို့သော် ချန်ဖန်း ဆင့်ခေါ်လိုက်သော ဤမီးလျှံကျောက်စိမ်း ဖီးနစ်ငှက်က တကယ်တော့ တတိယအဆင့် သားရဲဆိုးကြီး ဖြစ်နေခဲ့သည်။

မီးလျှံကျောက်စိမ်း ဖီးနစ်ငှက်၏ အင်အားက ကျောက်စိမ်းသန့်စင်ခြင်းအဆင့်ရှိ တည်ရှိမှုတစ်ခုနှင့် နှိုင်းယှဉ်နိုင်သော်လည်း ၎င်းကို သန္ဓေတည်ဝိညာဉ်အဆင့် ကျင့်ကြံသူတစ်ဦးက ယဉ်ပါးအောင် ပြုလုပ်နိုင်ခဲ့ခြင်းက ချန်ဖန်း၏ ပါရမီသည် တကယ်ကို ထူးကဲကြောင်း ပြသနေခဲ့သည်။

"ဘုန်း"

မီးလျှံကျောက်စိမ်း ဖီးနစ်ငှက်က ကောင်းကင်ယံကို ဖြတ်သန်းသွားပြီး မီးတောက်များက ဟုန်းဟုန်းတောက်လောင်သွားခဲ့သည်။ မျက်တောင်တစ်ခတ်အတွင်းမှာပင် ဝမ်လင်းသည် အော်ဟစ်သံတစ်ချက်ပင် မထုတ်နိုင်လိုက်ခင် ပြာအဖြစ်သို့ ပြောင်းလဲသွားခဲ့သည်။