စစ်ပွဲကြီး စတင်ခြင်း (၂)

နောက်တစ်ခဏ၌ ကြောက်မက်ဖွယ်ရာ အပူချိန်တစ်ခု ရုတ်တရက် ပေါက်ကွဲထွက်လာသည်။

ထိုထူးဆန်းသော နတ်ဘုရားစစ်သူကြီးများမှာ နေရာတင် ချက်ချင်း ကျဆုံးသွားခဲ့သည်။

"သူတော်စင်ဘုရင်"

ကုချင်းဖန်သည် ဘေးပတ်ဝန်းကျင်ရှိ အင်အားကြီးအဖွဲ့အစည်းများ၏ နည်းဗျူဟာများကို ကြည့်ပြီး သူတော်စင်ဘုရင်နယ်ပယ်၏ တည်ရှိမှုကို ပိုမို ရှင်းလင်းစွာ နားလည်လာခဲ့သည်။

တိတိကျကျ ပြောရလျှင် သူသည် ကောင်းကင်သွေးပြန်ကြောကို အသုံးမပြုပါက သူ၏အစွမ်းမှာ သူတော်စင်ဘုရင်အဆင့်သို့ အမှန်တကယ် မရောက်ရှိသေးဘဲ သူတော်စင်ဘုရင်တစ်ပိုင်းအဆင့်သာ ရှိသေးသည်။

သို့သော်လည်း ကျင့်ကြံသူတစ်ဦး၏ အစွမ်းဆိုသည်မှာ နယ်ပယ်အဆင့်တစ်ခုတည်းပေါ်တွင် မူတည်သည်မဟုတ်ပေ။ နတ်ဘုရားစွမ်းရည်များနှင့် အခြေခံအုတ်မြစ်တို့မှာလည်း မရှိမဖြစ် လိုအပ်လှသည်။

သူတော်စင်ဘုရင်အဆင့် ပညာရှင်အချို့၏ တိုက်ခိုက်မှုအောက်တွင် ရှေးဟောင်းကုယွဲ့ပြည်နယ်၏ အနက်ရှိုင်းဆုံးနေရာ၌ ကြောက်မက်ဖွယ် စွမ်းအားများ ပေါက်ကွဲထွက်ပေါ်နေပြီး ထိုလှိုင်းလုံးကြီးများမှာ ကောင်းကင်နှင့် မြေကြီးကို ဖျက်ဆီးပစ်နိုင်လောက်သည့်အလား ရှိနေကာ မိုင်ပေါင်း သန်းချီဝေးကွာသည့် နေရာမှပင် ရှင်းလင်းစွာ ကြားနေရသည်။

"သူတော်စင်ဘုရင်တွေက ရှေးဟောင်းကုယွဲ့ပြည်နယ်ရဲ့ အနက်ရှိုင်းဆုံးမှာ အဲဒီနတ်ဆိုးနဲ့ တိုက်ခိုက်နေပြီ၊ ကျုပ်တို့ လုပ်ရမှာက ပြည်နယ်ထဲမှာ ကျန်နေတဲ့ တခြားနတ်ဆိုးအားလုံးကို အမြစ်ပြတ် သုတ်သင်ဖို့ပဲ။ ဒီနတ်ဆိုးတွေကို ရှေးဟောင်းကုယွဲ့ပြည်နယ်ထဲကနေ အရှင်ထွက်သွားခွင့် လုံးဝ မပေးရဘူး"

"မဟုတ်ရင်တော့ ဘေးဒုက္ခကြီး ကျရောက်လာမှာ အသေအချာပဲ"

ချင်ကျန့်ထျန်း က လေးနက်သော အသံဖြင့် ပြောကြားလိုက်သည်။

ချင်းရှုန်းထောင်းနှင့် အခြားသူများက ကောင်းကင်လှည့်ဖြားဧကရာဇ်ကို ရင်ဆိုင်ရန် တာဝန်ယူထားသော်လည်း ပြည်နယ်ထဲရှိ အခြားနတ်ဆိုးများကိုလည်း လျစ်လျူရှုထား၍ မရပေ။ အကယ်၍ ပြည်နယ်တစ်ခုလုံးရှိ နတ်ဆိုးများ ပြန့်နှံ့သွားပါက ၎င်းမှာ အလယ်ပိုင်းနယ်မြေတစ်ခုလုံးအတွက် အိပ်မက်ဆိုးတစ်ခု ဖြစ်လာပေလိမ့်မည်။

အခြားအင်အားစုများမှ ကျင့်ကြံသူများကလည်း ၎င်းကို ကြားသောအခါ ခေါင်းညိတ်လိုက်ကြသည်။

"ကျုပ်တို့ နားလည်ပါပြီ"

"ဒီတိုက်ပွဲမှာ နတ်ဆိုးတွေကို အပြတ်အသတ် ချေမှုန်းပစ်မယ်"

"သတ်ကြ"

ကျင့်ကြံသူအများအပြားမှာ အားကောင်းလှသော အရှိန်အဝါများကို ထုတ်ဖော်လိုက်ကြပြီး သူတို့၏ ပူနွေးပြင်းထန်သော သွေးသားစွမ်းအားများမှာ တောက်လောင်နေသော နေမင်းကြီးကဲ့သို့ ထွက်ပေါ်လာသည်။ ထိုစုစည်းထားသော အရှိန်အဝါများမှာ ပတ်ဝန်းကျင်ရှိ ထူးဆန်းအေးစက်သော လေထုအားလုံးကို လွှင့်ပါးသွားစေခဲ့သည်။

ထို့နောက်တွင် မြေပြင်ကြီးမှာ တုန်ခါလာခဲ့သည်။

ခြောက်သွေ့နေသော မြေပြင်ကြီးမှာ ရုတ်တရက် အက်ကွဲသွားပြီး မြေအောက်တွင် မြှုပ်နှံထားသော အလောင်းများမှာ တစ်စုံတစ်ခုသော စွမ်းအားဖြင့် ပြန်လည်နိုးထလာကာ ရုတ်ချည်းပင် အသက်ဝင်လာကြသည်။ ထိုအလောင်းများမှာ မြေအောက်မှ တွားသွားထွက်ပေါ်လာပြီး လူအုပ်ကြီးကို တိုက်ခိုက်လာကြသည်။

"လူတစ်ယောက် သေသွားရင် အလင်းတိုင်က ငြိမ်းသွားပြီပဲ၊ ဘာလို့ ပြန်ရှင်လာရဦးမှာလဲ"

ကျင့်ကြံသူတစ်ဦးမှာ ခက်ထန်သော အမူအရာဖြင့် သူ၏ရှည်လျားသော ဓားကို ဝေ့ယမ်းလိုက်ရာ ကျယ်ပြောလှသော ဓားချီများ ထွက်ပေါ်လာပြီး အလောင်းပေါင်း ဒါဇင်ချီကို ခဏချင်းအတွင်း ခေါင်းဖြတ်ပစ်လိုက်သည်။ မည်းနက်ကာ နံစော်နေသော သွေးများမှာ အရပ်မျက်နှာအနှံ့ ပန်းထွက်ကုန်သည်။

အချို့သော ကျင့်ကြံသူများမှာ ထိုသွေးများနှင့် မတော်တဆ ထိမိသွားရာ ထိမိသောနေရာများမှာ ချက်ချင်းပင် မည်းနက်ပုပ်ပွသွားပြီး ပြင်းထန်သော နာကျင်မှုကြောင့် သူတို့၏ မျက်နှာများမှာ တွန့်လိမ်သွားကြသည်။

"သတိထားကြ၊ ဒီသွေးတွေက အဆိပ်ရှိတယ်"

"အားလုံးပဲ အဲဒီအလောင်းတွေရဲ့ သွေးနဲ့ မထိမိအောင် သတိထားကြ"

ကျန်ရှိနေသော ကျင့်ကြံသူများမှာလည်း ဤမြင်ကွင်းကို ကြည့်ကာ မျက်နှာပျက်သွားကြသည်။ ထို့နောက်တွင် ကျင့်ကြံသူအားလုံးမှာ ပိုမို၍ သတိထားကာ တိုက်ခိုက်လာကြသည်။ ပြန်လည်နိုးထလာသော အလောင်းများ၏ သွေးထဲတွင် ထူးဆန်းသော ပြောင်းလဲမှုများ ဖြစ်ပေါ်နေသဖြင့် ပြင်းထန်သော အဆိပ်များ ဖြစ်နေသော်လည်း သတိထားပါက ထိုအလောင်းများမှာ ကြီးမားသော ခြိမ်းခြောက်မှု မဟုတ်ပေ။

ထိုအချိန်တွင် မည်းနက်သော မြူခိုးများ လှိုင်းထလာခဲ့သည်။

မြင့်မားလှသော ပုံရိပ်ကြီးတစ်ခုမှာ မြူခိုးများထဲမှ ဖြည်းညှင်းစွာ ထွက်ပေါ်လာပြီး သူ၏ ခြောက်သွေ့ကာ အပြာနက်ရောင်ရှိသော လက်ကြီးကို ဆန့်ထုတ်လိုက်ရာ ကျင့်ကြံသူ ဒါဇင်ပေါင်းများစွာကို သူ၏လက်ဝါးထဲတွင် တစ်ခါတည်း ဆုပ်ကိုင်လိုက်သည်။

သူ၏ လက်ချောင်း ၅ ချောင်းကို အားဖြင့် ဆုပ်ညှစ်လိုက်သောအခါ ထိုကျင့်ကြံသူများ၏ ခန္ဓာကိုယ်များမှာ နေရာတင် ပေါက်ကွဲထွက်သွားခဲ့သည်။ အသားစများနှင့် သွေးအမြောက်အမြားမှာ တစ်စုံတစ်ခုသော စွမ်းအားဖြင့် ဆွဲယူခံလိုက်ရပြီး ထိုပုံရိပ်ကြီးထံသို့ စုစည်းသွားခဲ့သည်။

"ယုတ်မာတဲ့ သတ္တဝါ"

ဧကရာဇ်တစ်ပိုင်းတစ်ဦးမှာ ၎င်းကို မြင်တွေ့ရသောအခါ ဒေါသတကြီးဖြင့် လက်သီးတစ်ချက် ပစ်သွင်းလိုက်ရာ ကြောက်မက်ဖွယ် စွမ်းအားများက မည်းနက်သော မြူခိုးလွှာများကို ထိုးဖောက်သွားပြီး အတွင်းမှ မြင်ကွင်းကို ပေါ်လာစေခဲ့သည်။

မြူခိုးများထဲတွင် မီတာအနည်းငယ် မြင့်မားသော နတ်ဆိုးတစ်ကောင် ရှိနေပြီး ရုပ်ရည်မှာ လူသားမျိုးနွယ်နှင့် ဆင်တူလှသည်။ သို့သော် သူ၏ ခန္ဓာကိုယ်တစ်ခုလုံးကို သွေးရောင်လွှမ်းသော အနက်ရောင်အရှိန်အဝါများက ဖုံးအုပ်ထားပြီး ပတ်ဝန်းကျင်တွင် အဆုံးမရှိသော နာကျည်းနေသည့် ဝိညာဉ်များက အော်ဟစ်ငိုယိုနေကြသကဲ့သို့ပင်။

တစ်ချိန်တည်းမှာပင် သူ ဝါးမြိုနေစဉ်တွင် ပါးစပ်မှ သွေးများ စီးကျနေသည်ကို မြင်တွေ့ရသဖြင့် အလွန်ပင် ထိတ်လန့်ဖွယ် ကောင်းလှသည်။

"နတ်ဆိုး"

ထို ဧကရာဇ်တစ်ပိုင်း၏ မျက်နှာမှာ လေးနက်သွားသည်။ သူ၏ ဒေါသတကြီး တိုက်ခိုက်မှုမှာ နတ်ဆိုးကို အနည်းငယ်မျှ မထိခိုက်စေခဲ့ခြင်းက တစ်ဖက်လူ၏ အစွမ်းမှာ လျှော့တွက်၍မရကြောင်း ပြသနေသည်။ သို့သော်လည်း ဤတိုက်ပွဲတွင် အလယ်ပိုင်းနယ်မြေရှိ အင်အားစု အများစု စုစည်းထားခြင်း ဖြစ်သည်။ ဤကဲ့သို့သော နတ်ဆိုးတစ်ကောင်တည်းနှင့် ပြဿနာရှာရန်မှာ အရည်အချင်း မပြည့်မီသေးပေ။

"ဘုန်း"

နတ်ဆိုး အမြောက်အမြား ပေါ်ထွက်လာပြီး သေဆုံးနေသော အလောင်းများစွာမှာလည်း ပြန်လည်နိုးထကာ အလယ်ပိုင်းနယ်မြေမှ ကျင့်ကြံသူများနှင့် ပြင်းထန်သော တိုက်ပွဲများ ဖြစ်ပွားခဲ့သည်။

အားကောင်းလှသော သွေးသားစွမ်းအားနှင့် ထူးဆန်းသော အရှိန်အဝါများ ထိပ်တိုက်တွေ့ဆုံနေကြသည်။ အင်အားစုနှစ်ခုလုံးမှာ ရှေးဟောင်းကုယွဲ့ပြည်နယ်အတွင်း အဆက်မပြတ် တိုက်ခိုက်နေကြသည်။ ခဏတာအတွင်းမှာပင် ကျင့်ကြံသူများနှင့် နတ်ဆိုးများစွာ ကျဆုံးနေကြသည်။ ကျယ်ပြောလှသော ပြည်နယ်ကြီးမှာ နတ်ဆိုးများ၏ အသိုက်အအုံကြီးတစ်ခုအလား ဖြစ်နေပြီး သူတို့၏ အရေအတွက်မှာ အဆုံးမရှိသကဲ့သို့ပင်။ တိုက်ပွဲတိုင်းတွင် သွေးများ စီးကျနေပြီး ပြတ်တောက်နေသော ခြေလက်များမှာလည်း လွင့်ပျံနေသဖြင့် အလွန်ပင် ရက်စက်ကြမ်းကြုတ်လှသော မြင်ကွင်း ဖြစ်သည်။

"ဘုန်း"

ချင်ကျန့်ထျန်း သည် သူတော်စင်လက်နက်ကို ကိုင်ဆောင်ထားပြီး ထိုအဖိုးတန်ရတနာထဲတွင် ဝှက်ဖဲအဖြစ် ထားရှိထားသော စွမ်းအားများကို အပြည့်အဝ ထုတ်ဖော်လိုက်ရာ မိုင်ပေါင်း ထောင်ချီသော ဟင်းလင်းပြင်မှာ ပြားချပ်သွားပြီး သူတော်စင်တစ်ဦး၏ တိုက်ကွက်နှင့် ညီမျှသော စွမ်းအားဖြင့် နတ်ဆိုးပေါင်းများစွာကို သတ်ဖြတ်ပစ်လိုက်သည်။

သို့သော် မကြာမီမှာပင် ဟင်းလင်းပြင်မှာ ကွဲအက်သွားပြီး မြေစေးရုပ်တုတစ်ခု ရုတ်တရက် ပေါ်လာခဲ့သည်။ နောက်တစ်ခဏတွင် မြင့်မြတ်သော ရွတ်ဖတ်သံများကို ကြားလိုက်ရပြီး အားကောင်းကာ ထူးဆန်းသော စိတ်ဝိညာဉ်စွမ်းအားများ ပြန့်နှက်လာခဲ့သည်။ ကျင့်ကြံမှု အားနည်းသော ကျင့်ကြံသူအချို့မှာ ထိုစွမ်းအားနှင့် ထိမိသောအခါ ကြောင်အသွားကြပြီး တစ်စုံတစ်ခုသော အခြေအနေထဲသို့ ကျရောက်သွားသကဲ့သို့ ဖြစ်သွားသည်။

ချက်ချင်းဆိုသလိုပင် အချို့မှာ သွေးများ အန်ထုတ်ကာ မျက်လုံးများ ပြူးထွက်လျက် ဒေါသတကြီးဖြင့် ခန္ဓာကိုယ်များ တောင့်တင်းသွားပြီး အသက်မဲ့ကာ လဲကျသွားကြသည်။

"နိုးကြစမ်း"

ချင်ကျန့်ထျန်း က ဒေါသတကြီး အော်ဟစ်လိုက်ရာ သူ၏အသံတွင် သူ၏ နတ်ဘုရားဝိညာဉ်စွမ်းအားအားလုံး ပါဝင်နေပြီး ကောင်းကင်နှင့် မြေကြီးကို တုန်ခါသွားစေသည်။ ထိုထူးဆန်းသော စိတ်ဝိညာဉ်စွမ်းအား၏ သက်ရောက်မှုကို ခံထားရသော ကျင့်ကြံသူများစွာမှာ ရုတ်တရက် နိုးလာကြပြီး ထိုမြေစေးရုပ်တုကို ပြန်ကြည့်ချိန်တွင် သူတို့၏ မျက်လုံးများထဲ၌ ကြောက်ရွံ့မှုများ ပြည့်နှက်နေသည်။

"သဘာဝဘေးအန္တရာယ်အဆင့် နတ်ဆိုး"

အစွမ်းထက်သော ပုဂ္ဂိုလ်တိုင်း၏ မျက်နှာမှာ ပြောင်းလဲသွားသည်။ သဘာဝဘေးအန္တရာယ်အဆင့် နတ်ဆိုး အားအနည်းဆုံးမှာ တာအိုနန်းတော်နယ်ပယ်နှင့် ညီမျှပြီး အားအကောင်းဆုံးမှာ မဟာသူတော်စင်နှင့်ပင် ယှဉ်နိုင်သည်။ သူတို့ရှေ့မှ နတ်ဆိုးမှာ စိတ်ဝိညာဉ်စွမ်းအား ထုတ်လွှတ်ရုံမျှနှင့် ကျင့်ကြံသူများစွာကို ညစ်ညမ်းစေနိုင်ခြင်းက ထိုနတ်ဆိုး၏ အစွမ်းမှာ သာမန်မဟုတ်ကြောင်း ပြသနေသည်။

ဤကဲ့သို့သော နတ်ဆိုးမျိုးမှာ အနည်းဆုံး သူတော်စင်အဆင့်သဘာဝဘေးအန္တရာယ်နှင့် ညီမျှသည်။ အကယ်၍ ထိုနတ်ဆိုးမျိုးသာ တခြားတစ်နေရာတွင် ပေါ်လာပါက ပြည်နယ်တစ်ခုလုံးကို ပျက်စီးစေနိုင်သော ကြောက်မက်ဖွယ် ကပ်ဘေးတစ်ခုကို ဖြစ်စေနိုင်ပေလိမ့်မည်။

သို့သော် ဤနေရာမှာ ရှေးဟောင်းကုယွဲ့ပြည်နယ် ဖြစ်သည် ဤနေရာမှ နတ်ဆိုးများကို နှိမ်နင်းရန်အတွက် အလယ်ပိုင်းနယ်မြေမှ အစွမ်းထက်သော ပညာရှင်အများစု စုဝေးနေကြခြင်း ဖြစ်သည်။ သူတော်စင်အဆင့် နတ်ဆိုးမှာ ကြောက်စရာကောင်းသော်လည်း လွှမ်းမိုးနိုင်လောက်သည့်အထိတော့ မဟုတ်ပေ။

အကြောင်းမှာ ဤတိုက်ပွဲတွင် အနိုင်ရရန်အတွက် အင်အားစုအားလုံးမှာ သူတို့၏ အရင်းအမြစ်များကို အစွမ်းကုန် ထုတ်သုံးထားကြသောကြောင့်ပင်။ သူတော်စင်လက်နက်များ၊ မဟာသူတော်စင်လက်နက်များ သာမက သူတော်စင်ဘုရင်လက်နက်များကိုပင် ယူဆောင်လာခဲ့ကြသည်။

ထို့ကြောင့် ထိုသူတော်စင်အဆင့် နတ်ဆိုး ပေါ်လာပြီး မကြာမီမှာပင် ဖျက်ဆီးလိုသော နတ်ဘုရားအလင်းတန်းများမှာ ကောင်းကင်နှင့် မြေကြီးကို ဖြတ်သန်းသွားပြီး တောက်ပလှသော ဓားအလင်းတန်းက မြေစေးရုပ်တု၏ ခန္ဓာကိုယ်ကို ပိုင်းဖြတ်လိုက်ရာ ချက်ချင်းပင် ပြိုလဲပျက်စီးသွားခဲ့သည်။

"အဲဒါ နတ်ဓားဂိုဏ်း ရဲ့ သူတော်စင်ဘုရင်လက်နက်ပဲ"

"နတ်ဓား ဆိုတဲ့ နာမည်က တကယ်ပဲ ထိုက်တန်ပါပေတယ်"

ထိုဓားအလင်းတန်း လာရာအရပ်ကို မြင်တွေ့ရသောအခါ ကျင့်ကြံသူများစွာမှာ စိတ်အားတက်ကြွသွားကြပြီး ရိုသေလေးစားသော အမူအရာများ ဖြစ်ပေါ်လာသည်။ နတ်ဓားဂိုဏ်း အလယ်ပိုင်းနယ်မြေမှ ရှေးဟောင်းအင်အားစုတစ်ခု ဖြစ်သည်။ နတ်ဓားဂိုဏ်းမှာ အခြေခံအင်အားအရ ဧကရာဇ်အဆင့် အင်အားစုလေး ခုနှင့် မနှိုင်းယှဉ်နိုင်သော်လည်း ယခင်က သူတော်စင်ဘုရင်အဆင့် ပညာရှင်တစ်ဦးကို ထုတ်ဖော်နိုင်ခဲ့ဖူးသည်။ ရှေးယခင်ကတည်းက ယနေ့တိုင် တည်ရှိနေခြင်းက သူတို့၏ အခြေခံ ခိုင်မာမှုကို ပြသနေသည်။

ယခုအခါ နတ်ဓားဂိုဏ်းမှ ပညာရှင်များမှာ ဂိုဏ်း၏ သူတော်စင်ဘုရင်လက်နက် ဖြစ်သော နတ်ဓားကို ယူဆောင်ကာ ရောက်ရှိလာကြခြင်း ဖြစ်သည်။ ထိုလက်နက်ဖြင့် သူတော်စင်အဆင့် နတ်ဆိုးကို ချက်ချင်း သတ်ဖြတ်နိုင်ခဲ့ခြင်းက ဂိုဏ်း၏ ကျော်ကြားမှုကို ပိုမို တိုးတက်စေခဲ့သည်။ သို့သော်လည်း ထိုဂိုဏ်းမှ ပညာရှင်များ၏ မျက်နှာမှာ အနည်းငယ် ဖြူဖျော့နေသည်။ အကြောင်းမှာ ဧကရာဇ်တစ်ပိုင်းအဆင့်ဖြင့် သူတော်စင်ဘုရင်လက်နက်ကို အတင်းအကျပ် အသုံးပြုရခြင်းမှာ စွမ်းအင်ကုန်ဆုံးမှု အလွန်များပြားလှသောကြောင့်ပင်။

ထိုအချိန်တွင် လူအများ ဝမ်းသာအားရ အော်ဟစ်ရန် အချိန်မရမီမှာပင် ပိုမို ကြောက်မက်ဖွယ်ကောင်းသော အရှိန်အဝါများ လှိုင်းထလာခဲ့ပြီး ယခင်မြေစေးရုပ်တုထက် မနိမ့်သော သဘာဝဘေးအန္တရာယ်အဆင့် နတ်ဆိုးများမှာ တစ်ခုပြီးတစ်ခု ပေါ်ထွက်လာခဲ့သည်။ ထိုနတ်ဆိုးများ ပေါ်လာသည်နှင့် သာမန်နတ်ဆိုး အရေအတွက်မှာလည်း သိသိသာသာ တိုးလာခဲ့သည်။ ယခုအချိန်တွင် ရှေးဟောင်းကုယွဲ့ပြည်နယ်ရှိ နတ်ဆိုးအားလုံးမှာ ဤနေရာသို့ စုရုံးလာကြသကဲ့သို့ပင် ရှိနေသည်။

နှစ်ဖက်စလုံး၏ တိုက်ပွဲမှာ ပိုမို၍ ပြင်းထန်လာခဲ့သည်။ ၎င်းကို မြင်တွေ့ရသောအခါ အင်အားစုအသီးသီးမှ ဧကရာဇ်တစ်ပိုင်းအဆင့် ပညာရှင်များမှာလည်း မည်သည့်အရာကိုမျှ ချန်မထားတော့ဘဲ သူတို့၏ အခြေခံအင်အားအားလုံးကို အသုံးပြုကာ ထိုအစွမ်းထက်သော နတ်ဆိုးများကို တုံ့ပြန်တိုက်ခိုက်လာကြသည်။

မှတ်ချက်- ဧကရာဇ်တစ်ပိုင်းနယ်ပယ်နှင့် ညီမျှသော နတ်ဆိုးကို ဖျက်ဆီးခြင်းအဆင့်ဟု ခေါ်ဆိုရမည် ဖြစ်သည်။ ယခင်က သဘာဝဘေးအန္တရာယ်အဆင့်ဟု မှားယွင်းရေးသားခဲ့မိသည်ကို ပြင်ဆင်ပြီး ဖြစ်ပါသည်။