အခန်း (၄၃၁)

အခန်း။ ၄၃၁

ဝုန်း... ဝုန်း...

အချိန်ကြာလာသည်နှင့်အမျှ ကျိရုရွှယ်စုပ်ယူလိုက်သော ပြင်ပစွမ်းအင်များမှာ ပိုမိုများပြားလာခဲ့ပြီး သူမ၏ သွေးကြောမျှင်များအတွင်း စုစည်းနေသော ဝိညာဉ်စွမ်းအင်များမှာလည်း ပြင်းထန်သော မြစ်ရေအဟုန်ကဲ့သို့ တိုးဝှေ့စီးဆင်းလာကာ ဟိန်းဟောက်သံများပင် ထွက်ပေါ်နေခဲ့သည်။

မျက်တောင်တစ်ခတ်အတွင်းမှာပင် ကျိရုရွှယ်၏ အရှိန်အဝါမှာ အဆင့် ၅ ၏ အထွတ်အထိပ်သို့ ရောက်ရှိသွားခဲ့သည်။ ရှေ့မှောက်ရှိ ခိုင်မာလှသော အဆင့်အတားအဆီးကိုသာ ကျော်ဖြတ်နိုင်မည်ဆိုပါက သူမသည် အဆင့် ၆ သို့ အောင်မြင်စွာ တက်လှမ်းနိုင်တော့မည် ဖြစ်သည်။

ဝုန်း... ဝုန်း... ဝုန်း...

ကျိရုရွှယ်၏ ထိန်းချုပ်မှုအောက်တွင် သူမ၏အတွင်းရှိ ဝိညာဉ်စွမ်းအားများက မရေမတွက်နိုင်သော မြစ်လက်တက်များအလား မရပ်မနား တိုးဝှေ့စီးဆင်းကာ ထိုအတားအဆီးကို အဆက်မပြတ် တိုက်ခိုက်နေခဲ့သည်။

တစ်ကြိမ်ချင်းစီ တိုက်ခိုက်လိုက်တိုင်း အဆင့် ၆ ၏ အတားအဆီးမှာ အနည်းငယ်စီ လျော့ရဲလာခဲ့သည်။ သို့သော် ထိုသို့ပြုလုပ်ရာမှ ဖြစ်ပေါ်လာသော နာကျင်မှုဒဏ်ကြောင့် ယခင်ဘဝက ဧကရီတစ်ပါးဖြစ်ခဲ့သူ ကျိရုရွှယ်မှာ မျက်မှောင်ကြုတ်ခြင်းပင် မရှိသော်လည်း သူမ၏ ခန္ဓာကိုယ်မှာမူ အနည်းငယ် တုန်ယင်နေခဲ့သည်။

ဧည့်ခန်းအတွင်း၌ သူ၏ဇွန်ဘီများကို စေခိုင်း၍ ဟင်းသီးဟင်းရွက်စိုက်ခင်းထဲတွင် ရေနုတ်မြောင်းများ တူးခိုင်းနေသော လုချွမ်းသည်လည်း ထူးခြားသော လှုပ်ရှားမှုကို အာရုံခံမိလိုက်သဖြင့် သူ၏စိတ်အာရုံကို ချက်ချင်းပင် ပြန်လည်ရုပ်သိမ်းလိုက်သည်။

"ချီချီလေး အဆင့်တက်တော့မှာလား"

ဒုတိယထပ်မှ ထွက်ပေါ်လာသော ကြီးမားလှသည့် အရှိန်အဝါကို ခံစားလိုက်ရသဖြင့် လုချွမ်းမှာ အံ့အားသင့်သွားခဲ့သည်။ အမြုတေများကို ဝါးမြိုပြီး အဆင့်တက်ရသော ဇွန်ဘီဘုရင်ဖြစ်သည့် သူ့ထက်ပင် ချီချီလေး၏ အဆင့်တက်နှုန်းမှာ မနိမ့်ကျလှသဖြင့် သူ မမျှော်လင့်ထားမိပေ။

သို့သော် ပြန်လည်စဉ်းစားကြည့်သောအခါတွင်မူ လုချွမ်းအနေဖြင့် ဤသည်မှာ ထူးဆန်းသည်ဟု မခံစားရတော့ချေ။ ချီချီလေးမှာ မွေးရာပါ ပါရမီရှင်တစ်ဦးဖြစ်ပြီး ငယ်စဉ်ကတည်းကပင် ထူးခြားစွမ်းရည်နှစ်ခုကို နိုးထစေခဲ့သူ ဖြစ်သည်။ ထို့ပြင် ယခင်ဘဝက မှတ်ဉာဏ်များနှင့် အမွေအနှစ်များကိုလည်း တဖြည်းဖြည်း ပြန်လည်ရရှိနေသူဖြစ်ရာ ဤမျှမြန်ဆန်သော အရှိန်အဟုန်ဖြင့် ကျင့်ကြံနိုင်ခြင်းမှာ မဖြစ်နိုင်သည့်ကိစ္စ မဟုတ်ပေ။

ထိုသို့တွေးတောရင်း လုချွမ်းသည် ဆိုဖာပေါ်မှ အလျင်အမြန် ထရပ်လိုက်ကာ ဒုတိယထပ်သို့ တက်လာခဲ့ပြီး ချီချီလေး၏ အိပ်ခန်းတံခါးဝတွင် တိတ်ဆိတ်စွာ စောင့်ဆိုင်းနေခဲ့သည်။ ဘာပဲဖြစ်ဖြစ် တစ်ကျော့ပြန် ပြန်လည်မွေးဖွားလာခဲ့သော အင်အားကြီးသူတစ်ဦးအဖို့ အဆင့် ၆ သို့ တက်လှမ်းရန်မှာ ပြဿနာရှိမှာမဟုတ်ဘူးဟု သူ ယုံကြည်နေသည်။

အိပ်ခန်းအတွင်း၌မူ ကျိရုရွှယ်၏ အာရုံအားလုံးမှာ အဆင့်အတားအဆီးကို ကျော်ဖြတ်ရန်

အပေါ်၌သာ အပြည့်အဝ နှစ်မြှုပ်ထားသဖြင့် သူမ၏ဖခင် တံခါးဝသို့ ရောက်ရှိနေသည်ကိုပင် သတိမပြုမိတော့ချေ။

တိုက်ခိုက်မှုတစ်ခုချင်းစီက ကျိရုရွှယ်ကို အတော်အတန် နာကျင်စေခဲ့ပြီး သူမ၏ မျက်မှောင်ကြုတ်မှုကို ပို၍တင်းကျပ်လာစေကာ နဖူးပြင်ထက်တွင်လည်း ချွေးစက်ကလေးများ စို့တက်လာခဲ့သည်။

"တောက်... ဒီဘဝမှာ တိုက်ပွဲအတွေ့အကြုံက အရမ်းနည်းသေးတာပဲ။ လေ့ကျင့်မှုတွေ အများကြီး လိုအပ်နေလို့ ငါ့ရဲ့ ကျင့်စဉ်အဆင့် အတားအဆီးက ကျောက်ဆောင်တစ်ခုလို မာကျောနေတာ"

သူမ၏ အတွင်းပိုင်းမှ အတားအဆီးများ တဖြည်းဖြည်း အရည်ပျော်ကျလာသည်ကို ခံစားနေရစဉ် ကျိရုရွှယ်သည် ဝမ်းသာမှုနှင့်အတူ အနည်းငယ်မျှ မကျေမနပ် ဖြစ်နေမိသည်။

အချိန်များ တရွေ့ရွေ့ ကုန်ဆုံးသွားသည်နှင့်အမျှ ကျိရုရွှယ်၏ ဇွဲလုံ့လကြောင့် အတားအဆီးများ အရည်ပျော်နှုန်းမှာ ပိုမိုမြန်ဆန်လာခဲ့သည်။

ဒုန်း...

နောက်တစ်ခဏ၌ ခိုင်မာလှသော အဆင့်အတားအဆီးမှာ ပြင်းထန်လှသော ဝိညာဉ်စွမ်းအင် အဟုန်အောက်တွင် လုံးဝဥဿုံ ပွင့်ထွက်သွားခဲ့သည်။ ကျိရုရွှယ်၏ ခန္ဓာကိုယ်အတွင်းမှ မိုးထစ်ချုန်းသံကဲ့သို့ ကျယ်လောင်လှသော အသံကြီးတစ်ချက် ထွက်ပေါ်လာပြီး တစ်ခန်းလုံးကို တုန်ခါသွားစေခဲ့သည်။

ထိုအချိန်တွင် စိတ်စွမ်းအင်၏ လွှမ်းမိုးမှုအောက်၌ ကျိရုရွှယ်၏ သေးငယ်သော ခန္ဓာကိုယ်မှာ လေထဲသို့ ဖြည်းညှင်းစွာ မြောက်တက်လာခဲ့သည်။ သူမထံမှ ပြင်းထန်လှသော အရှိန်အဝါများမှာ အရပ်မျက်နှာအနှံ့သို့ ဖြာထွက်သွားခဲ့ရာ တစ်ခန်းလုံးမှာ မုန်တိုင်းဒဏ်သင့်ထားသကဲ့သို့ ဖရိုဖရဲ ဖြစ်သွားခဲ့ရသည်။

"နောက်ဆုံးတော့ ငါ အဆင့်တက်သွားပြီ"

ခန္ဓာကိုယ်အတွင်း စွမ်းအင်များ တိုးပွားလာမှုကို ခံစားလိုက်ရသဖြင့် ကျိရုရွှယ်၏ မျက်နှာထက်တွင် အပြုံးတစ်ခု ပေါ်ပေါက်လာခဲ့သည်။ သို့သော် ယခုအချိန်မှာ အောင်ပွဲခံရမည့်အချိန် မဟုတ်သေးကြောင်း သူမ သိရှိနားလည်ထားသည်။ အရေးကြီးဆုံး တာဝန်မှာ သူမ၏ ကျင့်စဉ်အဆင့်ကို တည်ငြိမ်အောင် ပြုလုပ်ရန်သာ ဖြစ်သည်။

ထို့ကြောင့် ကျိရုရွှယ်သည် လေထဲတွင်ပင် တင်ပျဉ်ခွေထိုင်လျက် မလှုပ်မယှက် နေနေခဲ့သည်။ ပြင်ပစွမ်းအင်များကို အဆက်မပြတ် စုပ်ယူကာ ဝိညာဉ်စွမ်းအင်များအဖြစ် ပြောင်းလဲလိုက်ပြီး အဆင့်တက်စဉ်က ဆူပွက်နေခဲ့သော ဝိညာဉ်စွမ်းအင်များကို ပြန်လည်တည်ငြိမ်သွားစေရန် ပြုလုပ်လိုက်ရာ မကြာမီမှာပင် အခန်းတွင်း၌ ပြန်လည်တိတ်ဆိတ်သွားခဲ့သည်။

ခဏအကြာတွင် အရှိန်အဝါများကို ပြန်လည်ထိန်းချုပ်နိုင်ခဲ့သော ကျိရုရွှယ်သည် သူမ၏ မျက်ဝန်းများကို ဖြည်းညှင်းစွာ ဖွင့်လိုက်သည်။ သူမ၏ မျက်ဝန်းများထဲတွင် ဝမ်းမြောက်မှုများဖြင့် ပြည့်နှက်နေခဲ့သည်။

အဆင့် ၆ သို့ အောင်မြင်စွာ တက်လှမ်းနိုင်ခဲ့ပြီးနောက် သူမ၏ ခန္ဓာကိုယ်မှာ ပိုမိုကြံ့ခိုင်လာရုံသာမက သူမ၏ ထူးခြားစွမ်းရည်နှစ်ခုစလုံးမှာလည်း ပိုမိုအားကောင်းလာခဲ့သည်။

အချိန်ထိန်းချုပ်မှုတွင် အချိန်၏ နက်နဲသော အဓိပ္ပာယ်ကို နားလည်သဘောပေါက်မှုမှာ ပို၍နက်ရှိုင်းလာခဲ့ပြီး စိတ်စွမ်းအင် ထိန်းချုပ်မှုတွင်လည်း စိတ်စွမ်းအင်ကို ရုပ်လုံးဖော်နိုင်စွမ်းမှာ သိသိသာသာ တိုးတက်လာခဲ့သည်။

အနီးနားရှိ စားပွဲပေါ်မှ အပင်အိုးလေးတစ်အိုးကို ကြည့်ရင်း ကျိရုရွှယ်သည် အာရုံစိုက်လိုက်ကာ အချိန်ထိန်းချုပ်မှုကို ချက်ချင်း အသက်သွင်းလိုက်သည်။ သူမသည် လက်ဝါးခန့်သာရှိသော ထိုအပင်လေးပေါ်သို့ ထူးဆန်းသော အချိန်တိုးမြင့်မှုစွမ်းအင်များကို ထည့်သွင်းပေးလိုက်သည်။

မျက်တောင်တစ်ခတ်အတွင်းမှာပင် အိုးထဲရှိ အပင်လေးမှာ တုံ့ပြန်မှုပြသလာခဲ့ပြီး ကြီးထွားဆေးများ ကျွေးထားသကဲ့သို့ သာမန်မျက်စိဖြင့် မြင်နိုင်သော အရှိန်အဟုန်ဖြင့် တရိပ်ရိပ် ကြီးထွားလာခဲ့လေတော့သည်။

ပင်စည်မှာ တစ်ဖြည်းဖြည်း သန်မာထွားကြိုင်းလာပြီး မျှစ်စို့လေးတစ်ခုအလား အပေါ်သို့ တရိပ်ရိပ် ထိုးတက်သွားခဲ့သည်။ ထူထဲစိမ်းလန်းသော အရွက်အလွှာများမှာလည်း အဆက်မပြတ် ဖြာထွက်လာခဲ့ရာ မကြာမီမှာပင် အောက်ဘက်ရှိ အပင်အိုးတစ်ခုလုံးကို လုံးဝဖုံးလွှမ်းသွားခဲ့သည်။

မျက်တောင်ခတ်ရုံမျှ အချိန်အတွင်းမှာပင် မူလက လက်ဝါးခန့်သာရှိသော အပင်လေးမှာ မီတာဝက်ခန့်အထိ မြင့်တက်လာခဲ့ပြီး စိမ်းလန်းသော အရွက်များကြားတွင် လှပသော အဖြူရောင်ပန်းပွင့်လေးများမှာလည်း အပြိုင်အဆိုင် ပွင့်လန်းလာခဲ့ကြသည်။

ဤမျှမြန်ဆန်လှသော အရှိန်အဟုန်ဖြင့် ကြီးထွားလာသည့် အပင်လေးကို ကြည့်ရင်း ကျိရုရွှယ်၏ မျက်နှာထက်တွင် ကျေနပ်အားရမှုများ ပေါ်ပေါက်လာခဲ့သည်။

အချိန်၏ နက်နဲသော အဓိပ္ပာယ်မှာ ပိုမိုအားကောင်းလာသဖြင့် သူမအနေဖြင့် အပင်များကို အချိန်တိုအတွင်း အလျင်အမြန် ရင့်မှည့်စေနိုင်ပြီ ဖြစ်သည်။ နောင်တစ်ချိန် အပြင်ထွက်သည့်အခါ ဟင်းသီးဟင်းရွက်များ ပြတ်လပ်သွားပါက မျိုးစေ့များသာ သယ်ဆောင်သွားရုံဖြင့် ထိုနေရာတွင်ပင် ချက်ချင်းစိုက်ပျိုး၍ စားသုံးနိုင်မည်ဖြစ်သည်။ ဟင်းသီးဟင်းရွက်များသာမက သစ်သီးပင်များကိုလည်း ထိုနည်းအတိုင်းပင် ပြုလုပ်နိုင်သည်။

အချိန်ထိန်းချုပ်မှုစွမ်းရည်ကို စမ်းသပ်ပြီးနောက် ကျိရုရွှယ်သည် စိတ်စွမ်းအင်ကို ရုပ်လုံးဖော်နိုင်စွမ်းအား ဆက်လက်စမ်းသပ်ရန် ပြင်ဆင်လိုက်သည်။

မျက်တောင်တစ်ခတ်အတွင်းမှာပင် ကြီးမားလှသော စိတ်စွမ်းအင်များမှာ အခန်းတွင်းသို့ ပျံ့နှံ့သွားခဲ့ပြီး အိပ်ခန်းအတွင်းရှိ အရာအားလုံးကို ငြိမ်သက်သွားစေခဲ့သည်။ ထို့နောက် တစ်မီတာခန့်ရှိသော တစ်ဝက်တစ်ပျက် ကြည်လင်နေသည့် ဒိုင်းလွှားပေါင်းများစွာ ပေါ်ပေါက်လာခဲ့ပြီး ကျိရုရွှယ်ကို အရပ်မျက်နှာအနှံ့မှ ဝန်းရံထားခဲ့သည်။

နောက်တစ်ခဏ၌ ထိုဒိုင်းလွှားများမှာ အပိုင်းပိုင်းအပြတ်ပြတ် ကွဲထွက်သွားခဲ့ပြီး မရေမတွက်

နိုင်သော စိတ်စွမ်းအင်အပ်ကလေးများအဖြစ်သို့ ပြောင်းလဲသွားခဲ့သည်။ ၎င်းတို့သည် ငါးအုပ်ကြီးတစ်ခုအလား လေထဲတွင် စုဝေးမိသွားကြပြီး လေထုကို တိုးဝှေ့ဖြတ်သန်းရင်း ခပ်သဲ့သဲ့မျှ မြည်ဟီးသံများကို ထွက်ပေါ်စေခဲ့သည်။

စိတ်စွမ်းအင်ကို ရုပ်လုံးဖော်နိုင်စွမ်း ပိုမိုအားကောင်းလာခြင်းကြောင့် ကျိရုရွှယ်သည် သူမ၏ စိတ်စွမ်းအင်များအပေါ်တွင် ပိုမိုတိကျကာ အားစိုက်စရာမလိုဘဲ ထိန်းချုပ်နိုင်လာခဲ့ပြီ ဖြစ်သည်။

ကျိရုရွှယ်သည် ဝမ်းမြောက်ပီတိဖြစ်နေသော စိတ်ဖြင့် လေထဲမှ ဖြည်းညှင်းစွာ ဆင်းသက်လာခဲ့သည်။ သူမ၏ စိတ်အာရုံဖြင့် စေခိုင်းလိုက်သည်နှင့် လေထဲရှိ စိတ်စွမ်းအင်အပ်များမှာလည်း အမှုန့်အမွှားများအဖြစ် ပျက်စီးသွားခဲ့တော့သည်။

သူမ၏ဖခင် တံခါးအပြင်ဘက်တွင် ရှိနေသည်ကို အာရုံခံမိလိုက်သဖြင့် ကျိရုရွှယ်သည် ပြုံးလျက် တံခါးကို ဖွင့်လိုက်သည်။

"ဖေဖေ"

"ချီချီလေး... အဆင့်တက်သွားတာ ဂုဏ်ယူပါတယ်"

လုချွမ်းက ပြုံးရွှင်စွာဖြင့် ချီချီလေးကို နှုတ်ဆက်လိုက်သည်။

အဆင့် ၆ ဆင့်ကဲပြောင်းလဲသူတစ်ယောက် ဖြစ်လာတယ်ဆိုတော့ ဖေဖေ့သမီးလေး ချီချီက တကယ်ကို ချီးကျူးဖို့ကောင်းတာပဲ။

"ဟဲဟဲ... ဖေဖေ့ကိုတော့ မမီသေးပါဘူး။ ဖေဖေက အဆင့် ၆ ကို ရောက်နေတာ ကြာပြီပဲဟာကို"

ကျိရုရွှယ်က နှိမ့်ချစွာဖြင့် ပြုံးရယ်လိုက်သည်။

"အဆင့်တက်သွားပြီးပြီဆိုတော့ သမီးရဲ့ စွမ်းရည်တွေလည်း အတော်လေး တိုးတက်လာမှာပေါ့"

ချီချီလေးထံမှ ထွက်ပေါ်နေသော ခပ်သဲ့သဲ့မျှ ဖိအားပေးသည့် အရှိန်အဝါကို အာရုံခံမိလိုက်

သဖြင့် လုချွမ်းက မျက်ဝန်းများ တောက်ပလျက် နူးညံ့စွာ မေးမြန်းလိုက်သည်။

"ဒါပေါ့ ဖေဖေရဲ့... သမီး ပြမယ်"

ကျိရုရွှယ်က ဂုဏ်ယူဝင့်ကြွားစွာဖြင့် ပြောလိုက်သည်။

"ကောင်းပြီ... သမီးရဲ့ လက်ရှိစွမ်းအားကို ဖေဖေ ကြည့်ရသေးတာပေါ့ ဟားဟား"

လီမြစ်ကမ်းနားတွင်

ဝုန်း... ဝုန်း...

ရေလှိုင်း ၁ ၏ စေခိုင်းမှုအောက်တွင် လီမြစ်ပြင်ကြီးမှာ ကမ္ဘာပျက်ကိန်း ဆိုက်ရောက်နေသကဲ့သို့ ဖြစ်နေပြီး ဧရာမ လှိုင်းလုံးကြီးများမှာ ကမ်းစပ်သို့ ရိုက်ခတ်လာခဲ့သည်။

ဆင့်ကဲပြောင်းလဲထားသော ငါးသားရဲအုပ်စုကြီးမှာလည်း ရေလှိုင်း ၁ ၏ ရည်ရွယ်ချက်ရှိရှိ လမ်းညွှန်မှုကြောင့် လှိုင်းတံပိုးများနှင့်အတူ ကမ်းခြေသို့ ပါလာခဲ့ကြသည်။

ဝူး... ဝူး...

ချက်ချင်းဆိုသလိုပင် ထိုငါးသားရဲများသည် ထူးဆန်းသော ဟိန်းဟောက်သံများ ထွက်ပေါ်စေလျက် ၎င်းတို့၏ ခန္ဓာကိုယ်များကို လူးလွန့်ကာ မြစ်ထဲသို့ ပြန်လည်ခုန်ဝင်ရန် ကြိုးပမ်းကြတော့သည်။

ဒုန်း... ဒုန်း... ဒုန်း...

ထိုအချိန်တွင် ခိုင်မာလေးလံလှသော စိတ်စွမ်းအင်တံတိုင်းကြီးတစ်ခုက ငါးသားရဲများ၏ လမ်းကြောင်းကို ပိတ်ဆို့လိုက်ရာ ၎င်းတို့၏ ပြင်းထန်လှသော တိုက်ခိုက်မှုများအောက်တွင်ပင် ထိုတံတိုင်းကြီးမှာ မလှုပ်မယှက် တည်ရှိနေခဲ့သည်။

နောက်တစ်ခဏ၌

ရှူး... ရှူး... ရှူး...

လေထုကို ခွဲထွက်သွားသော အသံကြီးမှာ ကောင်းကင်ယံမှ ကျဆင်းလာခဲ့ပြီး မရေမတွက်

နိုင်သော စိတ်စွမ်းအင်အပ်များမှာ မိုးပေါက်များ သွန်ချလိုက်သကဲ့သို့ ဖြစ်သွားခဲ့သည်။

အောက်ဘက်ရှိ ငါးသားရဲများမှာ ရဲရဲနီသော သွေးပွင့်များအဖြစ်သို့ ပေါက်ကွဲထွက်သွားခဲ့ပြီး တစ်ကောင်မျှ အသက်မရှင်ဘဲ သေမင်းတမန် မြေပြင်တစ်ခုအဖြစ်သို့ ပြောင်းလဲသွားခဲ့လေတော့သည်။

"ချီချီလေး... သမီးက တကယ့်ကို အံ့ဩဖို့ကောင်းတာပဲ"

မျက်တောင်တစ်ခတ်အတွင်းမှာပင် အကုန်အစင် သုတ်သင်နိုင်သော ချီချီလေး၏ ထိတ်လန့်

ဖွယ် စွမ်းအားကို ဘေးမှကြည့်နေသည့် လုချွမ်းက ချီးကျူးကာ အံ့ဩနေမိတော့သည်။