အခန်း (၄၃၂)

အခန်း။ ၄၃၂

ချီချီလေး၏ စွမ်းရည်များကို နားလည်သဘောပေါက်သွားပြီးနောက် လုချွမ်းသည် စိတ်အေးချမ်းသာစွာဖြင့် သမီးဖြစ်သူနှင့်အတူ အခြေစိုက်စခန်းသို့ ပြန်လာခဲ့သည်။

ချီချီလေး၏ လက်ရှိအင်အားနှင့်ဆိုလျှင် လုချွမ်းကိုယ်တိုင် လှုပ်ရှားလျှင်ပင် သူမကို ရင်ဆိုင်ရန်မှာ အလွန်ပင် ခဲယဉ်းလိမ့်မည်ဟု ဆိုရပေမည်။ အဆင့် ၅ နှင့် အဆင့် ၆ အကြားက ကွာဟချက်မှာ ကျော်ဖြတ်ရန် မလွယ်ကူလှပေ။ အဆင့် ၆ ဇွန်ဘီဘုရင်ဖြစ်သော လုချွမ်းသည် အဆင့် ၅ ဇွန်ဘီရုပ်သေးအများအပြားကို စေခိုင်းနိုင်သော်လည်း အဆင့် ၆ ဇွန်ဘီရုပ်သေးမှာမူ မသေနိုင်သူ ၁ တစ်ကောင်တည်းသာ ရှိသေးသည်။

မသေနိုင်သူ ၁ ၏ တိုက်ခိုက်ရေးစွမ်းရည်မှာ ဆင့်ကဲပြောင်းလဲထားသော ဇွန်ဘီအားလုံးတွင် အသန်မာဆုံးဖြစ်နိုင်သော်လည်း အချိန်ထိန်းချုပ်မှုနှင့် စိတ်စွမ်းအင်ထိန်းချုပ်မှုဟူသော ထူးခြားစွမ်းရည်နှစ်ရပ်ကို ပိုင်ဆိုင်ထားသည့် ချီချီလေးနှင့် ရင်ဆိုင်ရပါက မည်သို့မျှ တတ်နိုင်လိမ့်မည်မဟုတ်ပေ။ စိတ်စွမ်းအင်ထိန်းချုပ်မှု တစ်ခုတည်းနှင့်ပင် မသေနိုင်သူ ၁ အဖို့ လုံလောက်နေပြီဖြစ်ရာ ချီချီလေး၏ ဆန်းကြယ်လှသော အချိန်ထိန်းချုပ်မှုစွမ်းရည်နှင့်ဆိုလျှင်မူ ပြောနေစရာပင် မလိုတော့ချေ။

ထို့နောက်တွင် လုချွမ်းသည် ချီချီလေးအား အခန်းထဲ၌ ကျင့်စဉ်အဆင့်ကို ဆက်လက်

တည်ငြိမ်အောင် ပြုလုပ်စေပြီး သူကိုယ်တိုင်မှာမူ မီးဖိုချောင်သို့ဝင်ကာ သမီးဖြစ်သူ အဆင့် ၆ သို့ အောင်မြင်စွာ တက်လှမ်းနိုင်ခြင်းအတွက် အနှစ်သာရရှိလှသော ဂုဏ်ပြုညစာတစ်နပ်ကို ပြင်ဆင်ပေးခဲ့သည်။

...

အချိန်များ တရွေ့ရွေ့ ကုန်ဆုံးသွားခဲ့ရာ မျက်တောင်တစ်ခတ်အတွင်းမှာပင် တစ်ပတ်ခန့် ကြာမြင့်သွားခဲ့ပြီ ဖြစ်သည်။

ဤကာလအတွင်း လုချွမ်းသည် ဇွန်ဘီမွေးမြူရေးစခန်းအတွက် အသားအစာများ ရရှိစေရန် လီမြစ်အတွင်း၌ ကြမ်းတမ်းသည့် ငါးသားရဲများကို ဖမ်းဆီးခြင်းဖြင့် အလုပ်များနေခဲ့သည်။ မသေနိုင်သူ ၁ ကို အဆင့်မြှင့်တင်ရန်အတွက် မွေးမြူရေးစခန်းရှိ ဆင့်ကဲပြောင်းလဲထားသော ဇွန်ဘီအများအပြားကို အသုံးပြုလိုက်ရသဖြင့် ဇွန်ဘီအသစ်များကို အလျင်အမြန် ပြန်လည်မွေးမြူရန် လိုအပ်နေခြင်းပင်။

ကျိရုရွှယ်မှာမူ ဖခင်ဖြစ်သူအား ငါးဖမ်းရာတွင် ကူညီပေးသည့်အပြင် ကျန်ရှိသော အချိန်များတွင် အိပ်ခန်းအတွင်း၌သာ ကျင့်စဉ်များကို ကြိုးစားအားထုတ်နေခဲ့သည်။ သူမသည် သာမန်

လူသားများ လက်လှမ်းမမီနိုင်သော အဆင့် ၆ သို့ ရောက်ရှိနေပြီဖြစ်သော်လည်း ဤမျှနှင့် ကျေနပ်နေခြင်း မရှိပေ။ ဂြိုဟ်သားကျူးကျော်မှုမှာ ဆိုက်ရောက်တော့မည်ဖြစ်ရာ ထိုဂြိုဟ်သားများရှေ့တွင် အဆင့် ၆ စွမ်းရည်မှာ မည်သို့မျှ အရေးမပါလှသဖြင့် သူမအနေဖြင့် ပိုမိုသန်မာလာရန် လိုအပ်နေခြင်းပင်။

လီမြစ် အခြေစိုက်စခန်း၊ အမှတ် ၂ ဇွန်ဘီမွေးမြူရေးစခန်း

လုချွမ်း၏ စိတ်အာရုံစေခိုင်းမှုအောက်တွင် ဇွန်ဘီရုပ်သေးအုပ်စုမှာ လှေကားထစ်များဆီသို့ ရောက်ရှိလာခဲ့ကြသည်။

အောက်ဘက်ရှိ တံတိုင်းများအတွင်း၌ စုပြုံနေသော ဆင့်ကဲပြောင်းလဲထားသည့် ဇွန်ဘီအရေအတွက်ကို ကြည့်ရင်း လုချွမ်း၏ မျက်နှာထက်တွင် ကျေနပ်အားရသော အမူအရာတစ်ခု ပေါ်ပေါက်လာခဲ့သည်။

တစ်ပတ်ကြာ အစာကျွေးမွေးပြီးနောက် ဇွန်ဘီမွေးမြူရေးစခန်းတွင် အဆင့် ၂ နှင့် အဆင့် ၃ ရှိသော ဆင့်ကဲဇွန်ဘီ အမြောက်အမြား စုဆောင်းမိသွားပြီဖြစ်ရာ ယခုအခါ သူ၏ အဆင့် ၅ ဇွန်ဘီရုပ်သေးအဆင့်မြှင့်တင်မှုများအတွက် ပြန်လည်အသုံးပြုရန် အသင့်ဖြစ်နေပြီ ဖြစ်သည်။

ဒုန်း... ဒုန်း... ဒုန်း...

နောက်တစ်ခဏ၌ ဧရာမဇွန်ဘီ ၁ နှင့် အခြားဇွန်ဘီရုပ်သေးများသည် တံတိုင်းပေါ်မှ ခုန်

ဆင်းသွားကြပြီး တံတိုင်းအတွင်းရှိ ဆင့်ကဲဇွန်ဘီများကို စတင်သုတ်သင်တော့သည်။ ယခင်

လုပ်ဆောင်ချက်များအတိုင်းပင် ထိုဇွန်ဘီများထံမှ ရရှိသော အမြုတေများကို အဆင့် ၄ ဇွန်ဘီရုပ်သေးများအဖြစ် ပြောင်းလဲပစ်မည်ဖြစ်ပြီး ထိုမှတစ်ဆင့် လုံလောက်သော အမြုတေများကို ပြန်လည်ထုတ်ယူမည် ဖြစ်သည်။

နာရီဝက်ခန့် ကြာပြီးနောက် လုချွမ်းသည် အဆင့် ၄ အမြုတေ လေးခုကို အောင်မြင်စွာ ရရှိခဲ့သည်။

ထို့နောက်တွင် လုချွမ်းသည် ထိုအမြုတေများနှင့်အတူ ကျိရုရွှယ်ကို ခေါ်ဆောင်ကာ ဇွန်ဘီရုပ်သေးအုပ်စုနှင့်အတူ လီမြစ်ဆီသို့ ထွက်ခွာလာခဲ့ကြသည်။

ပလုံ... ပလုံ...

ကျယ်ပြောလှသော လီမြစ်ပြင်ထက်တွင် လှိုင်းတံပိုးများမှာ တလိမ့်လိမ့် တက်နေကြပြီး လန်းဆန်းလှသော မြစ်လေညင်းမှာလည်း ကမ်းစပ်တစ်လျှောက် တိုက်ခတ်နေခဲ့သည်။ လုချွမ်းနှင့် ကျိရုရွှယ်တို့ သားအဖသည် ဇွန်ဘီရုပ်သေးအုပ်စုနှင့်အတူ မြစ်ကမ်းနားသို့ ရောက်ရှိလာခဲ့ကြသည်။

ဝုန်း...

လုချွမ်း၏ စိတ်အာရုံဖြင့် စေခိုင်းလိုက်သည်နှင့် မြစ်လယ်တွင် ရေတိုင်ကြီးတစ်ခု ပေါက်ကွဲထွက်သွားခဲ့ပြီး ရေထဲမှ မီးခိုးရောင်သန်းသော အညိုရောင်ပုံရိပ်တစ်ခုမှာ ရုတ်ချည်း ထိုးထွက်လာခဲ့သည်။

"ဝူး..."

ရေလှိုင်း ၁ သည် ဟိန်းဟောက်သံတစ်ချက်နှင့်အတူ ရေမျက်နှာပြင်ထက်တွင် လျှင်မြန်စွာ လှုပ်ရှားလာခဲ့သည်။ ၎င်း၏အောက်ခြေရှိ ရေဝဲဂယက်၏ ပင့်တင်ပေးမှုကြောင့် ကမ်းစပ်သို့ ရောက်ရှိလာခဲ့သည်။

ရေလှိုင်း ၁ ဆိုက်ရောက်လာသည်နှင့်အမျှ ၎င်းလှုံ့ဆော်လာသော မြစ်လှိုင်းလုံးကြီးများမှာ ကမ်းခြေသို့ ရိုက်ခတ်သွားခဲ့ပြီး ရေမှုန်ရေမွှားများမှာလည်း အရပ်မျက်နှာအနှံ့သို့ လွင့်စင်သွားခဲ့သည်။ လုချွမ်းသည် ရေစိုမခံရစေရန် နောက်သို့ ခြေလှမ်းအနည်းငယ် ဆုတ်လိုက်ပြီးနောက် လက်ထဲရှိ အဆင့် ၄ အမြုတေ လေးခုကို ရေလှိုင်း ၁ ထံသို့ ချက်ချင်းပင် ပေးအပ်လိုက်လေတော့သည်။

မျက်တောင်တစ်ခတ်အတွင်းမှာပင် ထိုအမြုတေများကို မျိုချပြီးနောက် အခြားဇွန်ဘီရုပ်သေးများ အဆင့်တက်စဉ်ကကဲ့သို့ပင် ပြင်းထန်လှသော စွမ်းအင်များသည် ရေလှိုင်း ၁ ၏ ခန္ဓာကိုယ်အတွင်း၌ သောင်းကျန်းလာပြီး ၎င်း၏ အသားစိုင် အစိတ်အပိုင်းတိုင်းကို ပြုပြင်ပြောင်းလဲကာ အားဖြည့်ပေးနေခဲ့သည်။

"ဝူး... ဝူး... ဝူး..."

တုန်ရင်စွာဖြင့် ဟိန်းဟောက်နေစဉ် ရေလှိုင်း ၁ သည် ရေထုအပေါ် ထိန်းချုပ်မှုကို လက်လွှတ်လိုက်ရသဖြင့် ၎င်း၏အောက်ရှိ ရေဝဲဂယက်မှာလည်း ပျက်စီးသွားကာ မြစ်ရေပြင်ထက်၌ ပျောက်ကွယ်သွားခဲ့သည်။ ရေလှိုင်း ၁ မှာ ရေပြင်ပေါ်တွင် တောင့်တင်းစွာ လဲလျောင်းနေရုံမှတစ်ပါး အခြားမတတ်နိုင်တော့ဘဲ ခန္ဓာကိုယ် တုန်ယင်နေမှုကြောင့် ပတ်ဝန်းကျင်သို့ ရေလှိုင်းငယ်လေးများသာ လွင့်ပျံ့နေခဲ့တော့သည်။

အချိန်ကြာလာသည်နှင့်အမျှ ရေလှိုင်း ၁ ၏ အရှိန်အဝါမှာ ပိုမိုအားကောင်းလာခဲ့ပြီး ထိန်းမနိုင်သိမ်းမရသော စွမ်းအင်များက ၎င်းအား အဆင့် ၅ သို့ အဆက်မပြတ် တွန်းပို့နေခဲ့သည်။ အရှိန်အဝါမှာ အဆင့် ၄ ၏ အထွတ်အထိပ်သို့ ရောက်ရှိသွားချိန်တွင် ရေလှိုင်း ၁ ၏ အတွင်းပိုင်းရှိ စွမ်းအင်များသည် ထွက်ပေါက်တစ်ခုကို ရှာဖွေတွေ့ရှိသွားသကဲ့သို့ ခန္ဓာကိုယ်အတွင်းရှိ အချက်အချာနေရာတစ်ခုသို့ အရှိန်အဟုန်ပြင်းစွာ စုစည်းသွားခဲ့သည်။

ဝုန်း...

စွမ်းအင်အဟုန်မှာ သွေးကြောမျှင်များတစ်လျှောက် တိုးဝှေ့စီးဆင်းသွားပြီးနောက် ထိုအချက်အချာနေရာ၌ ကွယ်ပျောက်သွားခဲ့သည်။ ပြင်ပတွင်မူ အဆင့် ၄ အထွတ်အထိပ်သို့ ရောက်ရှိနေသော ရေလှိုင်း ၁ ၏ အရှိန်အဝါမှာ အဆင့် ၅ သို့ တဖြည်းဖြည်း ကူးပြောင်းလာခဲ့သည်။

ဒုန်း...

နောက်တစ်ခဏ၌ အဆင့် ၅ နှင့် ထိုက်တန်သော အစွမ်းထက်သည့် အရှိန်အဝါများသည် ရေလှိုင်း ၁ ထံမှ ပန်းထွက်လာခဲ့ပြီး ဆန်းကြယ်လှသော အပြာရောင် ဝိညာဉ်အလင်းတန်းတစ်ခုမှာ ပတ်ဝန်းကျင်သို့ ဖြာထွက်သွားခဲ့သည်။ ချက်ချင်းဆိုသလိုပင် လှိုင်းထနေသော မြစ်ရေပြင်မှာ ဆူပွက်နေသည့် ရေနွေးအိုးကဲ့သို့ ကမောက်ကမ ဖြစ်သွားခဲ့ပြီး လှိုင်းပုတ်သံများလည်း အဆက်မပြတ် ထွက်ပေါ်နေခဲ့သည်။

"ဝူး..."

အဆင့်တက်လှမ်းမှု အောင်မြင်သွားသော ရေလှိုင်း ၁ သည် ဝမ်းမြောက်စွာဖြင့် ဟိန်းဟောက်လိုက်ရာ ၎င်း၏အောက်ခြေမှ ရေဝဲတစ်ခုမှာ ရုတ်ချည်းမြင့်တက်လာပြီး ၎င်း၏ခန္ဓာကိုယ်ကို ရေတိုင်ကြီးတစ်ခုဖြင့် ကောင်းကင်ယံသို့ ပင့်တင်ပေးလိုက်သည်။

တစ်ချိန်တည်းမှာပင် ရေလှိုင်း ၁ ၏ စေခိုင်းမှုအောက်၌ မြစ်အတွင်းမှ ရေတိုင်များစွာမှာ ကောင်းကင်သို့ ထိုးထွက်လာခဲ့ကြပြီး တဝုန်းဝုန်း မြည်ဟီးလျက် ခမ်းနားထည်ဝါသော မြင်ကွင်းတစ်ခုကို ဖန်တီးပေးနေခဲ့သည်။

ရေလှိုင်း ၁ ၏ အောင်မြင်စွာ အဆင့်တက်လှမ်းနိုင်မှုကို ကြည့်ရင်း လုချွမ်း၏ မျက်နှာထက်တွင် သာယာသော အပြုံးတစ်ခု ပေါ်ပေါက်လာခဲ့တော့သည်။

အဆင့် ၅ သို့ ဤကဲ့သို့ တက်လှမ်းနိုင်ခြင်းသည် ရေလှိုင်း ၁ ၏ ပြင်ပရုပ်သွင်ကို များစွာပြောင်းလဲစေခြင်း မရှိသော်လည်း ၎င်း၏ ခန္ဓာကိုယ်ကြံ့ခိုင်မှုမှာမူ သိသိသာသာ တိုးတက်အားကောင်းလာခဲ့သည်။

နိုးထလာသော စွမ်းရည်နှစ်ရပ်မှာလည်း လုချွမ်း၏ ရှေ့လျှောက် မျှော်မှန်းချက်များနှင့် ကိုက်ညီနေသဖြင့် သူသည် အတော်လေး ကျေနပ်အားရနေမိသည်။

၎င်းစွမ်းရည်များအနက် ပထမတစ်ခုကို လုချွမ်းက ရေထိန်းချုပ်မှုဟု အမည်ပေးလိုက်သည်။ ၎င်းမှာ ရေလှိုင်း ၁ ၏ ယခင်ရှိပြီးသား ရေထိန်းစွမ်းရည်ကို အဆင့်မြှင့်တင်ထားခြင်းဖြစ်ပြီး ယခင်ကထက် ဆယ်ဆမက ပိုမိုအစွမ်းထက်လာခြင်းပင်။

အခြားစွမ်းရည်တစ်ခုကိုမူ ရေဝိညာဉ်ခန္ဓာဟု အမည်ပေးလိုက်သည်။ ၎င်းမှာ မီးလျှံ ၁ ၏ မီးဝိညာဉ်ခန္ဓာနှင့် ဆင်တူပြီး မိမိ၏ခန္ဓာကိုယ်ကို ရေဒြပ်စင်အဖြစ် ပြောင်းလဲကာ မြစ်ရေနှင့် တစ်သားတည်း ပေါင်းစည်းသွားနိုင်သည့် စွမ်းရည်မျိုး ဖြစ်သည်။

ချက်ချင်းပင် လုချွမ်းသည် အဆင့် ၅ သို့ ရောက်ရှိသွားသော ရေလှိုင်း ၁ ၏ စွမ်းအားကို စမ်းသပ်ရန်အတွက် ချီချီလေးနှင့်အတူ ငါးဖမ်းထွက်ရန် ဆုံးဖြတ်လိုက်သည်။

ဝုန်း...

ရုတ်ချည်းဆိုသလိုပင် မြစ်ပြင်ကြီးမှာ ကမောက်ကမ ဖြစ်သွားခဲ့သည်။ ရေလှိုင်း ၁ ၏ အစွမ်းထက်လှသော ရေထိန်းစွမ်းရည်ကြောင့် လီမြစ်ရေပြင်မှာ လှိုင်းထန်လာပြီး ဧရာမ ဝဲဂယက်ကြီးများက မြစ်ရေကို ဆူပွက်ချောက်ချားစေခဲ့သည်။ မကြာမီမှာပင် ဆင့်ကဲပြောင်းလဲထားသော ငါးသားရဲအမြောက်အမြားကို သယ်ဆောင်လာသည့် လှိုင်းလုံးကြီးများမှာ ကမ်းခြေသို့ ရိုက်ခတ်လာခဲ့တော့သည်။

ကမ်းစပ်တွင် စုပုံနေသော ငါးသားရဲအုပ်ကြီးကို မြင်သောအခါ လုချွမ်း၏ မျက်ဝန်းများမှာ တောက်ပသွားခဲ့ပြီး ချီချီလေးနှင့်အတူ ပျော်ရွှင်စွာဖြင့် စတင်ဖမ်းဆီးခဲ့ကြသည်။ မကြာမီမှာပင် ငါးဖမ်းခြင်းလုပ်ငန်းမှာ ပြီးဆုံးသွားခဲ့ရာ ယခင်ကထက် အချိန်သုံးပုံတစ်ပုံခန့် ပိုမိုမြန်ဆန်သွားခဲ့သည်။

"ဒါပေမဲ့ နောက်ထပ် ငါးဖမ်းကွင်းအသစ်တစ်ခုကိုတော့ ပြောင်းရတော့မယ်"

မြစ်အတွင်းရှိ ငါးသားရဲအရေအတွက်မှာ သိသိသာသာ နည်းပါးသွားသည်ကို သတိပြုမိလိုက်သဖြင့် လုချွမ်းက အနည်းငယ် မျက်မှောင်ကြုတ်ကာ ပြောလိုက်သည်။ ကံကောင်းထောက်မစွာဖြင့် လီမြစ်မှာ ရှည်လျားလှသဖြင့် မြစ်၏အစိတ်အပိုင်းတစ်ခုတွင် ငါးနည်းသွားပါက မြစ်အောက်ပိုင်းသို့ ရွှေ့ပြောင်းကာ လုပ်ဆောင်နိုင်သည်။

...

နဂါးပြည်နယ်၊ ကျန်းကျိုး အခြေစိုက်စခန်းရှိ အစည်းအဝေးခန်းမအတွင်းရှိ လေထုမှာ အလွန်အမင်း တင်းမာနေခဲ့သည်။ အခြေစိုက်စခန်း၏ ခေါင်းဆောင်မှာ မျက်မှောင်ကို ပြင်းထန်စွာ ကြုတ်ထားရင်း ခုလေးတင် ဝင်ရောက်လာသော အရာရှိကို ကြည့်ကာ လေးနက်စွာ မေးမြန်းလိုက်သည်။

"မင်းတို့ ဘာတွေ ရှာဖွေတွေ့ရှိခဲ့လဲ။ ကျန်းကျိုးမြို့မှာ ဇွန်ဘီလှိုင်းလုံးကြီးတစ်ခု ဘယ်လိုလုပ် ပေါ်လာနိုင်ရတာလဲ"

"တပ်မှူး... ကျွန်တော်တို့ စုံစမ်းစစ်ဆေးချက်အရဆိုရင် ဒီဇွန်ဘီလှိုင်းလုံးကြီးကို ဇွန်ဘီဘုရင်

တစ်ယောက်က ထိန်းချုပ်နေတာ ဖြစ်နိုင်ခြေ အတော်လေး များပါတယ်"

အရာရှိက မျက်နှာပျက်ပျက်ဖြင့် တင်ပြလိုက်သည်။

ဘာ...

ဤစကားကို ကြားလိုက်ရသောအခါ အစည်းအဝေးသို့ တက်ရောက်နေကြသော အဆင့်မြင့်

အရာရှိအားလုံး၏ အမူအရာမှာ ရုတ်ချည်း ပြောင်းလဲသွားခဲ့ပြီး သူတို့၏ မျက်နှာထက်တွင် မျှော်လင့်ချက်မဲ့နေသော အရိပ်အယောင်များ ပေါ်ပေါက်လာခဲ့တော့သည်။