အခန်း (၂၈၆-၂၈၇)

အခန်း (၂၈၆) - အတူယှဉ်တွဲနေထိုင်နိုင်သော ညောင်ပင်

ရွှီရှင်း၏ အကဲဖြတ်နိုင်စွမ်းအောက်တွင် ထိုညောင်ပင်ကြီး နှစ်ပင်စလုံးသည် အပြာရောင်အလင်းတန်းများ ထွက်ပေါ်နေသည်။

၎င်းတို့မှာ အပြာရောင်အဆင့် အပင်များပင် ဖြစ်၏။

ညောင်ပင်နှစ်ပင်လုံးသည် အပြာရောင်အဆင့် မြေဆီလွှာပေါ်တွင် ပေါက်ရောက်နေကြပြီး၊ ဤကန်ဘေးတစ်ဝိုက်တွင် အပြာရောင်အဆင့် မြေဆီလွှာမှာ ဤနှစ်ကွက်တည်းသာ ရှိသည်။

ကျန်ရှိသော မြေကြီးများမှာ အစိမ်းရောင်အဆင့်များသာ ဖြစ်ကြပြီး အဖြူရောင်အဆင့်ဟူ၍ပင် မရှိချေ။

ဤညောင်ပင်ကြီးနှစ်ပင်၏ အရွယ်အစားမှာ အထပ်မတိုးရသေးခင်က နှစ်ထပ်ရှိသော အပြာရောင်အဆင့် သစ်ပင်အိမ်နှင့် အရွယ်အစားချင်း မတိမ်းမယိမ်းပင် ရှိသည်။

သိပ်သည်းလှသော အပင်အုပ်မှာ မြေပြင်မှ ခုနစ်မီတာခန့် အမြင့်တွင် ရှိနေပြီး လေမြစ်များစွာလည်း တွဲလောင်းကျနေ၏။

ကြည့်ရသည်မှာ သစ်ပင်အိမ်တစ်ခုနှင့်ပင် တူလှပေသည်။

ရွှီရှင်းသည် ညောင်ပင်တစ်ပင်အနားသို့ ချက်ချင်းလျှောက်သွားပြီး ၎င်း၏ ပင်စည်ကို လက်ဖြင့် လှမ်းထိကြည့်လိုက်သည်။

[ညောင်ပင် (အပြာရောင်အဆင့်): သစ်သားကုန်ကြမ်း ရယူနိုင်သော ထူးခြားသည့် သစ်ပင်မျိုးဖြစ်သည်။ သာမန်ညောင်ပင်နှင့် အလွန်ဆင်တူသော်လည်း၊ မီတာတစ်ရာအတွင်း သစ်ပင်အိမ်တစ်ခု ရှိနေပါက ထိုသစ်ပင်အိမ်နှင့် အတူယှဉ်တွဲနေထိုင် နိုင်စွမ်း ရှိသည်။]

သစ်ပင်အိမ်တော့ မဟုတ်ပေ၊ သို့သော် ဤညောင်ပင်၏ ဖော်ပြချက်မှာမူ သာမန်ထက် များစွာ ထူးကဲလွန်းလှသည်။

မီတာတစ်ရာအတွင်းရှိ သစ်ပင်အိမ်နှင့် အတူယှဉ်တွဲနေထိုင်နိုင်တဲ့ ထူးခြားသော သစ်ပင်မျိုးတဲ့လား။

ရွှီရှင်း၏ မျက်လုံးများ ပြူးကျယ်သွားရသည်။

"အတူယှဉ်တွဲနေထိုင်ခြင်း" ဆိုသည့် စကားလုံးကို သူ နောက်ဆုံးမြင်ခဲ့ရသည်မှာ "နှလုံးသားအပင်" ၏ ဖော်ပြချက်တွင် ဖြစ်သည်။

အတူယှဉ်တွဲနေထိုင်ခြင်း ဆိုသည်မှာ ကပ်ပါးနေထိုင်ခြင်းမျိုး မဟုတ်ပေ။

အပင်နှလုံးသားကဲ့သို့ပင်၊ ၎င်းသည် သစ်ပင်အိမ်အတွက် အလွန်အားကောင်းသော ကာကွယ်ရေးစွမ်းရည်များကို ပေးစွမ်းနိုင်ပြီး နှစ်ဦးနှစ်ဖက် အပြန်အလှန် အကျိုးပြုနိုင်ခြင်း ဖြစ်သည်။

မမျှော်လင့်ဘဲ သူတို့ ရုတ်တရက် ရှာတွေ့လိုက်သည့် ဤညောင်ပင်နှစ်ပင်မှာလည်း သစ်ပင်အိမ်နှင့် အတူယှဉ်တွဲနေထိုင်နိုင်စွမ်း ရှိနေချေပြီ။

ထို့အပြင် ရွှီရှင်းသည် "ထူးခြားသော သစ်ပင်အမျိုးအစား" ဟူသော ဝေါဟာရအပေါ် အလွန်ပင် အာရုံစိုက်မိနေသည်။

ဤစကားလုံးကို သူ ပထမဆုံး တွေ့ရှိခဲ့သည်မှာ အပြာရောင်အဆင့် သံပုဆိန်၏ ဖော်ပြချက်တွင် ဖြစ်ပြီး၊ ၎င်းသည် အချို့သော ထူးခြားသည့် သစ်ပင်များကို ခုတ်လှဲနိုင်သည်ဟု ပါရှိခဲ့၏။

နောက်ပိုင်းတွင်မှ သစ်ပင်အိမ်များသည် ထိုထူးခြားသော သစ်ပင်အမျိုးအစားများထဲမှ တစ်ခုဖြစ်ကြောင်း သူ သိရှိခဲ့ရခြင်း ဖြစ်သည်။

ယခု ဤညောင်ပင်သည်လည်း ထိုနည်းတူပင်။

သစ်ပင်အိမ် မဟုတ်သော်လည်း သစ်ပင်အိမ်များနှင့် မျိုးနွယ်တူဖြစ်ကာ၊ အပြာရောင်အဆင့် သို့မဟုတ် ထိုထက်မြင့်သော သံပုဆိန်ဖြင့်သာ ခုတ်လှဲနိုင်ပေလိမ့်မည်။

သစ်ပင်အိမ်နှင့် သဘောသဘာဝချင်း တစ်ထပ်တည်းပင်။

ဤအချက်က ရွှီရှင်းကို များစွာ တွေးတောမိစေသည်။

အကယ်၍ သစ်ပင်အိမ်နှင့် တူလှသော ဤအပင်ကို သစ်ပင်အိမ်အနီးတွင်သာ စိုက်ပျိုးလိုက်မည်ဆိုပါက မည်သို့သော ထူးခြားဆန်းပြားသည့် အာနိသင်များကို ပေးစွမ်းနိုင်မည်နည်း။

သူတို့သည် သစ်ပင်အိမ်၏ နောက်ထပ် အစိတ်အပိုင်းတစ်ခုကို ရှာတွေ့လိုက်ခြင်းများလား။

၎င်းသည် နှလုံးသားအပင်ကဲ့သို့ပင် သစ်ပင်အိမ်အတွက် အစွမ်းထက်သော စွမ်းရည်တစ်ခုခုကို ယူဆောင်လာပေးနိုင်မည်လား။

ကျိချောင်းယန်သည်လည်း ညောင်ပင်ပင်စည်ကို လှမ်းထိကြည့်လိုက်ပြီးနောက်၊ ဖော်ပြချက်ကို ဖတ်ကြည့်ပြီးကာမှ သူ၏ တည်ကြည်နေသော မျက်နှာထားမှာ အနည်းငယ် ပြေလျော့သွားသည်။

"ဒါက သစ်ပင်အိမ် မဟုတ်ဘဲ သာမန်ညောင်ပင်တစ်ပင်ပဲ ဖြစ်ပုံရတယ်"

ကျိချောင်းယန်သည် ဝေဆာနေသော ညောင်ပင်အုပ်ကို မော့ကြည့်ရင်း -

"ဒါပေမဲ့ ဒီညောင်ပင်က သစ်ပင်အိမ်နဲ့ တစ်ခုခု ပတ်သက်နေသလိုမျိုး ငါ အမြဲ ခံစားနေရတယ်။ ဖြစ်နိုင်ရင်တော့ ဒီဟာရဲ့ မျိုးစေ့ကို ငါတို့ ယူသွားသင့်တယ်" ဟု ဆိုသည်။

သူသည် ရွှီရှင်းကဲ့သို့ အကဲဖြတ်နိုင်စွမ်း မရှိသဖြင့်၊ သူ မြင်တွေ့ရသော ဖော်ပြချက်တွင် ညောင်ပင်နှင့် သစ်ပင်အိမ်ကြားက ဆက်နွှယ်မှုကို သေသေချာချာ သိရှိနိုင်မည် မဟုတ်ပေ။

သို့သော်လည်း သူ၏ အာရုံအရ ဤအပင်မှာ သစ်ပင်အိမ်နှင့် ဆက်စပ်နေနိုင်ကြောင်း သိရှိနေခြင်း ဖြစ်သည်။

"တကယ်ပဲ သစ်ပင်အိမ်နဲ့ ပတ်သက်နေတာပါ"

ရွှီရှင်းက ညောင်ပင်ကို သေသေချာချာ ထပ်မံ အကဲခတ်လိုက်သည်။

"...ဪ၊ မင်းရဲ့ အကဲဖြတ်နိုင်စွမ်းက ပိုပြီး အသေးစိတ်တဲ့ ဖော်ပြချက်ကို ပေးနိုင်တာကိုး။ ဒါဆို ဘယ်လို ပတ်သက်မှုမျိုးလဲ"

ကျိချောင်းယန်မှာ ရွှီရှင်း၏ အတည်ပြုပြောကြားမှုကို အနည်းငယ် အံ့သြသွားသော်လည်း ချက်ချင်းပင် နားလည်သွားခဲ့၏။

"ပိုပြီး အသေးစိတ်တဲ့ အချက်အလက်တွေကို ငါ မြင်နိုင်တယ်။ ဒီအပင်က သစ်ပင်အိမ်ရဲ့ မီတာတစ်ရာ အကွာအဝေးအတွင်းမှာ ပေါက်နေမယ်ဆိုရင် သစ်ပင်အိမ်နဲ့ အတူယှဉ်တွဲနေထိုင်နိုင်တယ်လို့ ဆိုထားတယ်" ဟု ရွှီရှင်းက ပြန်ဖြေလိုက်သည်။

ညောင်ပင်၏ အပင်အုပ်မှာ အလွန်ပင် သိပ်သည်းလှသော်လည်း၊ အပင်အုပ်ကြားက ဟာကွက်လေးများမှတစ်ဆင့် အတွင်းပိုင်းကို သူ မြင်တွေ့နိုင်သေးသည်။

အပင်အုပ်အတွင်း၌ သစ်ပင်အိမ်ကဲ့သို့ အခန်းများ မရှိဘဲ သစ်ကိုင်းများသာ ရှိနေသဖြင့် ကြည့်ရသည်မှာ သာမန် ဝေဆာနေသော ညောင်ပင်တစ်ပင်နှင့်သာ တူနေပေသည်။

"အတူယှဉ်တွဲနေထိုင်တာလား မီတာတစ်ရာအတွင်းမှာလား"

ကျိချောင်းယန်က ရွှီရှင်းဘက်သို့ လှည့်ကြည့်ကာ ထိုစကားလုံးများကို နှလုံးသားအပင်နှင့် ဆက်စပ်၍ စဉ်းစားနေမိသည်။

"ဘယ်လိုမျိုး အတူယှဉ်တွဲနေထိုင်မှာလဲ၊ သစ်ပင်အိမ်အတွက် ဘယ်လို လုပ်ဆောင်ချက်အသစ်တွေ ပေးနိုင်မှာလဲဆိုတာ မင်း သိနိုင်လား"

"ငါလည်း မသေချာဘူး"

ရွှီရှင်းက ခေါင်းခါပြလိုက်၏။

"သစ်ပင်အိမ်နဲ့ အတူယှဉ်တွဲနေထိုင်နိုင်တယ်လို့ပဲ ဖော်ပြထားတာလေ။ ဒါပေမဲ့ ငါတို့ ခန့်မှန်းကြည့်လို့တော့ ရတာပေါ့"

ရွှီရှင်း၏ စိတ်ထဲတွင် ဤညောင်ပင်ကို သစ်ပင်အိမ်ဘေး၌ စိုက်ပျိုးထားသည့် မြင်ကွင်းများကို ပုံဖော်ကြည့်နေမိသည်။

အကယ်၍ ဝေဆာလှသော ညောင်ပင်နှစ်ပင်၏ အပင်အုပ်များမှာ တစ်ခုနှင့်တစ်ခု ချိတ်ဆက်သွားမည်ဆိုလျှင်...

ကျိချောင်းယန်မှာ စက္ကန့်အနည်းငယ်မျှ တိတ်ဆိတ်သွားပြီးနောက် -

"သစ်ပင်အိမ်ရဲ့ အတွင်းခန်း ဧရိယာကို ချဲ့ထွင်ပေးနိုင်တာမျိုးလား" ဟု မေးလိုက်၏။

ရွှီရှင်းက ဖြည်းဖြည်းချင်း ခေါင်းညိတ်ပြလိုက်သည်။

"...အဲဒီလို ဖြစ်ဖို့ တကယ်ကို အခွင့်အလမ်း များတယ်"

သူတို့နှစ်ဦးလုံး ထိုဖြစ်နိုင်ခြေကို ပြင်းပြင်းထန်ထန် ခံစားမိကြသည်။

သူတို့၏ သစ်ပင်အိမ် ညောင်ပင်အုပ်များသည် ဘေးတိုက် ကျယ်ပြန့်လာခြင်းမျိုး တစ်ခါမျှ မရှိခဲ့ဖူးပေ။

သာမန်အခြေအနေတွင် ညောင်ပင်များသည် ဧရိယာအကျယ်ကြီးကို လွှမ်းခြုံကာ ကြီးထွားနိုင်ကြသည်။

သို့သော် သစ်ပင်အိမ်ကို စိုက်ပျိုးပြီးနောက်တွင်မူ သစ်ပင်အိမ်၏ အပင်အုပ်မှာ အထပ်အရေအတွက် တိုးလာခြင်းမှလွဲ၍ ၎င်း၏ လွှမ်းခြုံထားသော ဧရိယာမှာ လုံးဝ ပြောင်းလဲခြင်း မရှိခဲ့ပေ။

အစိမ်းရောင်အဆင့် သစ်ပင်အိမ်အငယ်စားမှာ ၂၅ စတုရန်းမီတာခန့်၊ အပြာရောင်အဆင့်မှာ ၅၀ စတုရန်းမီတာနှင့် သူတို့၏ ခရမ်းရောင်အဆင့် သစ်ပင်အိမ်မှာမူ ၁၀၀ စတုရန်းမီတာခန့်သာ အမြဲတမ်း ရှိနေခဲ့သည်။

သစ်ပင်အိမ် အဆင့်တက်ချိန်တွင်လည်း ၎င်း၏ အကာအကွယ်ပေးနိုင်သော ဧရိယာဖြစ်သည့် အောက်ခြေအပိုင်းသာ ပိုမိုခိုင်မာလာခြင်းဖြစ်ပြီး၊ အပေါ်ပိုင်းက အပင်အုပ် အရွယ်အစားနှင့် အတွင်းခန်း ဧရိယာမှာမူ လုံးဝ ပြောင်းလဲခြင်း မရှိခဲ့ပေ။

ရှင်ကျန်သူအများစုအတွက် သစ်ပင်အိမ်၏ အတွင်းခန်း ဧရိယာမှာ အမှန်တကယ်ပင် မလုံလောက်လှပေ။

အထူးသဖြင့် အပင်စိုက်ပျိုးရန်အတွက်ဆိုလျှင် နေရာမှာ အလွန်ကျဉ်းမြောင်းလွန်းလှသလို၊ အထပ်တစ်ခုချင်းစီ၏ အမြင့်မှာလည်း နိမ့်လွန်းလှသဖြင့် နေရာလွတ်ကို အပြည့်အဝ အသုံးမချနိုင်ကြဘဲ အချို့အရာများကို အပြင်ဘက်တွင်သာ ထွက်စိုက်နေကြရခြင်း ဖြစ်သည်။

ယခုအခါ ရာသီဥတုက တဖြည်းဖြည်း အေးမြလာပြီဖြစ်ရာ သစ်ပင်အိမ်အပြင်ဘက်က နေရာအနည်းငယ်မှာသာ အပင်စိုက်ပျိုးရန် အဆင်ပြေသေးသည်။

ထို့အပြင် ဆောင်းရာသီမှာလည်း မကြာခင် ရောက်ရှိလာတော့မည်ဖြစ်ရာ၊ နှင်းနှင့် ရေခဲဘေးဒဏ်များအောက်တွင် အပြင်၌ အပင်စိုက်ရန်မှာ လုံးဝ မဖြစ်နိုင်တော့ဘဲ အိမ်တွင်းစိုက်ပျိုးရေးမှာ များစွာ အရေးပါလာပေလိမ့်မည်။

အကယ်၍ ဤညောင်ပင်က သစ်ပင်အိမ်၏ အတွင်းခန်း ဧရိယာကို အမှန်တကယ် ချဲ့ထွင်ပေးနိုင်မည်ဆိုပါက တကယ့်ကို ပြည့်စုံသွားပေလိမ့်မည်။

"တစ်ယောက်တစ်ပင်စီ ယူကြမလား"

ရွှီရှင်းက ညောင်ပင်နှစ်ပင်ကို ညွှန်ပြလိုက်သည်။

ဤမျှကြီးမားပြီး ရင့်မှည့်နေသော ညောင်ပင်ကြီးများကိုတော့ အမြစ်ပါမကျန် ပြောင်းရွှေ့စိုက်ပျိုးရန် မဖြစ်နိုင်ပေ။

ကျောပိုးအိတ်ထဲ ထည့်လိုက်လျှင် အလေးချိန် ဆယ်ပုံတစ်ပုံသာ ရှိမည်ဆိုသော်ငြားလည်း သူတို့ သယ်ဆောင်နိုင်မည့် အရွယ်အစား မဟုတ်ပါချေ။

ထို့ကြောင့် ၎င်းတို့ကို ခုတ်လှဲပြီး မျိုးစေ့ကိုသာ ထုတ်ယူရမည်ဖြစ်သည်။

ညောင်ပင်နှစ်ပင်ဆိုသည်မှာ မျိုးစေ့နှစ်စေ့ဖြစ်ရာ တစ်ယောက်တစ်စေ့စီ ယူရန်မှာ ကွက်တိပင် ဖြစ်ပေသည်။

"ငါ့ဘက်ကတော့ သဘောတူပါတယ်"

ကျိချောင်းယန်က ခေါင်းညိတ်ပြ၏။

"ဒါပေမဲ့ တခြားအရင်းအမြစ်တွေကို အရင်ရှာကြည့်ကြရအောင်၊ ဒါကိုတော့ နောက်ဆုံးမှ လုပ်ကြတာပေါ့။ ဒီနေရာက တကယ့်ကို ထူးဆန်းလွန်းလှတယ်။ ဆူဆူညံညံတွေ အများကြီးလုပ်မိရင် မမျှော်လင့်ထားတဲ့ ကိစ္စတွေ ဖြစ်လာနိုင်လို့ပါ"

ကျိချောင်းယန် ပြောသည်မှာ မှန်ကန်လှပေသည်၊ ရွှီရှင်းလည်း ထိုသို့ပင် တွေးထားခြင်း ဖြစ်သည်။

သူသည် ကျောက်ဆောင်အက်ကြောင်းကြားတွင် တပ်ထားသော ရတနာပုလဲ အပိုင်းအစကို လှမ်းကြည့်လိုက်၏။

ဤနေရာရှိ အရာအားလုံးမှာ ထိုအရာကြောင့် ဖြစ်ပေါ်နေခြင်းများလား မသိနိုင်ပေ။

ထိုအရာမှာ ရွှေ့ပြောင်းနိုင်မည့် ပုံစံရှိသော်လည်း၊ ၎င်းကို နောက်ဆုံးမှ ကိုင်တွယ်ခြင်းကသာ အကောင်းဆုံး ဖြစ်ပေလိမ့်မည်။

ထိုအရာကို သွားထိလိုက်သည်နှင့် အပြောင်းအလဲများစွာ ဖြစ်ပေါ်လာနိုင်သည် မဟုတ်ပါလား။

ရွှီရှင်းသည် မြေပြင်ပေါ်ရှိ ရောင်စုံ ပန်းကလေးများကို ငုံ့ကြည့်လိုက်ပြီး၊ ဆောင့်ကြောင့်ထိုင်ကာ တစ်ပွင့်ကို အသာအယာ ခူးယူလိုက်သည်။

[ရောင်စုံပန်း (အစိမ်းရောင်အဆင့်): လှပသော ပန်းတစ်မျိုး ဖြစ်သည်။ သစ်ပင်အိမ်အတွင်း စိုက်ပျိုးထားပါက သစ်ပင်အိမ်၏ အလှဆင်မှုအဆင့် ကို တိုးမြင့်စေနိုင်သည်။ ပန်းပွင့်ချိန်မှာ ခုနစ်ရက်ကြာမြင့်ပြီးနောက် ညှိုးနွမ်းသွားလိမ့်မည်။ အကယ်၍ ပန်းပွင့်နေစဉ်အတွင်း ခူးယူလိုက်ပါက အလှဆင်မှုအဆင့် တိုးမြှင့်ပေးနိုင်စွမ်းမှာ တစ်ဝက်ခန့် လျော့ကျသွားမည်ဖြစ်သော်လည်း၊ ထာဝရ ညှိုးနွမ်းသွားခြင်းမရှိဘဲ ပန်းပွင့်ပုံစံအတိုင်း ရှိနေပေလိမ့်မည်။]

"ဟ... ဒါ တကယ့်ကို ပစ္စည်းကောင်းပဲ"

ရွှီရှင်း၏ မျက်လုံးများ ဝင်းခနဲ ဖြစ်သွားသည်။

အလှဆင်မှုအဆင့် အမြဲတမ်း လိုအပ်နေသော သူအဖို့၊ ၎င်းကို တိုးမြှင့်ပေးနိုင်သည့် အရာမှန်သမျှမှာ ပစ္စည်းကောင်းများသာ ဖြစ်ပေသည်။

သူ၏ အနုပညာခန်းနှင့် အဂ္ဂိရတ်ခန်းများမှာလည်း အလှဆင်ပစ္စည်းအသစ်များကို အမြဲ စောင့်မျှော်နေကြသည် မဟုတ်ပါလား။

သူသည် ကန်ဘေးတစ်လျှောက် ပေါက်ရောက်နေသော ရောင်စုံပန်းခင်းကြီးကို လှမ်းကြည့်လိုက်၏။

"အင်း... အကုန်လုံးကို နုတ်ယူပြီး သယ်သွားမယ်"

ရွှီရှင်းက သူ၏ မေးစေ့ကို ပွတ်ရင်း တစ်ယောက်တည်း ရေရွတ်လိုက်မိသည်။

ဤပန်းအမျိုးအစားသည် သစ်ပင်အိမ်တစ်ခုချင်းစီ၏ အလှဆင်မှု ကန့်သတ်ချက်အပေါ် သက်ရောက်မှု အနည်းငယ်သာ ရှိနိုင်၏။

သူကိုယ်တိုင် အလှဆင်ပစ္စည်းတွေ လုပ်နိုင်သော်လည်း များများရှိလေ ပိုကောင်းလေ မဟုတ်ပါလား။

များလေ ကောင်းလေပင်။

ဒါ့အပြင် ဤပန်းများသည် အခြားရှင်ကျန်သူများအတွက်ပါ အလှဆင်မှုအမှတ်များကို ပေးစွမ်းနိုင်မည့် အခွင့်အရေး ဖြစ်လာပေလိမ့်မည်။

သူတို့၏ အနုပညာခန်းအတွက်မှာမူ ကိုယ်တိုင် ထုဆစ်ထားသည့် လက်ရာများ လိုအပ်ပြီး၊ ၎င်းတို့ကသာ အလှဆင်မှုအမှတ်ကို များစွာ တိုးမြှင့်ပေးနိုင်ခြင်း ဖြစ်ပေသည်။

သို့သော် ယခုအချိန်တွင်မူ ထိုအရာများကို အမြောက်အမြား ထုတ်လုပ်ရန် အချိန်မရသေးသဖြင့် အခြားစူးစမ်းရှာဖွေသူများအတွက်တောင် မလုံလောက်သေးဘဲ၊ သာမန်ရှင်ကျန်သူများအတွက်ဆိုလျှင် ပို၍ပင် ခက်ခဲပေလိမ့်မည်။

သို့သော် စိုက်ပျိုးရုံဖြင့် ရနိုင်သော ဤပန်းများသည်ကား ထိုပြဿနာမျိုး မရှိပေ။

ဘာပဲဖြစ်ဖြစ် ဒါတွေက ကိုယ့်အားအင်ကို သုံးနေရတာမှ မဟုတ်တာ၊ စိုက်ပျိုးရေးခန်းထဲမှာ ထည့်စိုက်ထားရုံပဲလေ။

"ဒီပန်းတွေကို ဆေးရောင်တွေ လုပ်တဲ့နေရာမှာလည်း သုံးလို့ရတယ်လို့ ငါ့ဆီမှာ အသိပေးချက် တက်လာတယ်။ ဆီဆေးပန်းချီကားတွေရဲ့ အလှဆင်မှုအမှတ်ကို တိုးပေးနိုင်တာပေါ့"

ကျိချောင်းယန်ကလည်း ဆောင့်ကြောင့်ထိုင်ကာ ပန်းတစ်ပွင့်ကို ခူးရင်း အံ့သြတကြီး ပြောလိုက်သည်။

ကျိချောင်းယန်၏ အနုပညာရှင် စွမ်းရည်ထဲမှ ဆီဆေးပန်းချီအတွက် ဆေးရောင်တွေ လိုအပ်ကြောင်း ရွှီရှင်းကို အရင်က ပြောပြခဲ့ဖူးသည် မဟုတ်ပါလား။

"ဒါဆိုရင်တော့ ဒါက တကယ့်ကို ပစ္စည်းကောင်းပဲ။ ငါတို့ ပြန်တဲ့အခါ အကုန်လုံးကို သယ်သွားကြတာပေါ့"

ရွှီရှင်းကတော့ ဒီနေရာက အရာအားလုံးကို တူးထုတ်သွားရန် ဆုံးဖြတ်ပြီးသား ဖြစ်သည်။

ပန်းတွေ၊ သစ်ပင်တွေ... ယူလို့ရသမျှ အကုန်ယူမည်။

ဒါတွေက တကယ့်ကို အဖိုးတန်တဲ့ အရာတွေ မဟုတ်ပါလား။

သူသည် မြက်ပင်အချို့ကိုပင် လှမ်းနုတ်ကြည့်လိုက်သေးသော်လည်း၊ ထိုမြက်ပင်များမှာမူ အဖိုးတန်အရင်းအမြစ်များ မဟုတ်ကြချေ။

သို့သော်လည်း အကောင်းဆုံးအရာကတော့ ဟိုဖြူဖွေးလင်းလက်နေတဲ့ ရတနာပုလဲ အပိုင်းအစပဲ ဖြစ်ရမည်။

ရွှီရှင်းသည် ခပ်ဖျော့ဖျော့ အဖြူရောင်အလင်းတန်းများ ထွက်ပေါ်နေသည့် ရတနာပုလဲ အပိုင်းအစကို မျက်မှောင်ကြုတ်ကာ စူးစိုက်ကြည့်နေမိ၏။

"အီးးး"

ခဲခဲလေးက ရွှီရှင်း၏ ခြေထောက်နားမှာ ရပ်လျက် သူမ၏ လက်သည်းလေးများဖြင့် သူ၏ ခြေထောက်ကို တို့လိုက်ပြီး၊ ထို့နောက်တွင်မူ ရေတံခွန်ရှိရာဘက်သို့ လက်ညှိုးထိုးပြလိုက်တော့သည်။

"ဘာဖြစ်လို့လဲ ခဲခဲလေး"

ရွှီရှင်း သတိပြန်ဝင်လာပြီး ခဲခဲလေး ညွှန်ပြရာဘက်သို့ လှမ်းကြည့်ကာ ဇဝေဇဝါဖြင့် မေးလိုက်၏။

"ဟို ရေတံခွန်လေးမှာ တစ်ခုခု မှားနေလို့လား"

နံရံက အလျားလိုက် အက်ကြောင်းထဲမှ ရေများမှာ ဖြည်းဖြည်းချင်း စီးကျနေပြီး အဖြူရောင် ရေလိုက်ကာလေးတစ်ခု ဖြစ်ပေါ်နေသည်။

ရေကျသံ တဒုန်းဒုန်းနှင့်အတူ ကန်ထဲတွင် အေးဆေးစွာ ကူးခတ်နေကြသော ငါးများ၊ ရေမျက်နှာပြင်ပေါ်တွင် လင်းလက်နေသည့် အဖြူရောင်အလင်းတန်းများ....ဤကန်ကြီးတစ်ခုလုံးမှာ နတ်ဘုံနတ်နန်းထဲက ရေကန်တစ်ခုအလား ထင်မှတ်ရပြီး လူကို အလွန်ပင် သက်သောင့်သက်သာ ရှိစေပေသည်။

ရွှီရှင်းပင်လျှင် "ဒီနေရာမှာ နေရရင် တကယ် ကောင်းမှာပဲ" ဟု တွေးလိုက်မိသေးသည်။

"အီးးး"

ခဲခဲလေးက သူမ၏ လက်သည်းလေးကို ယမ်းပြရင်း ရွှီရှင်းကို အမူအရာဖြင့် ပြနေပြန်သည်။

ရွှီရှင်းမှာ ခဲခဲလေး၏ ဆိုလိုရင်းကို နားလည်သွားသဖြင့် မျက်နှာထားမှာ ချက်ချင်းပင် တည်ကြည်သွားကာ ရေတံခွန်လေးကို သေသေချာချာ စစ်ဆေးကြည့်လိုက်၏။

"...ဟို ရေတံခွန်နောက်ကွယ်မှာ လျှို့ဝှက်နေရာတစ်ခု ရှိနေတယ်လို့ ပြောချင်တာလား"

"အီးးး"

ခဲခဲလေးက သူမ၏ ခေါင်းလုံးလုံးလေးကို တရစပ် ညိတ်ပြနေရှာ၏။

ရေများမှာ မညီမညာ စီးကျနေသဖြင့် ရေတံခွန်မှာ အဖြူရောင်ပိတ်ကားကြီးတစ်ခုအလား မြင်ကွင်းကို လုံးဝ ပိတ်ဆို့ထားသောကြောင့် ရေလိုက်ကာနောက်ကွယ်က မြင်ကွင်းကို မမြင်ရခြင်း ဖြစ်သည်။

ဒါ့အပြင် ဤရေတံခွန်လေးမှာလည်း သိပ်မကြီးလှသဖြင့် ရွှီရှင်းအနေဖြင့် ထိုဘက်ကို လုံးဝ ထည့်မစဉ်းစားမိခဲ့ခြင်း ဖြစ်ပေသည်။

ဒါဟာ တကယ့် ရေကန့်လန့်ကာ လိုဏ်ဂူ များလား။

ဂူအတွင်းထဲမှာ ရတနာတွေ ဖုံးကွယ်ထားတာလား။

သို့သော်လည်း ရှေ့က ဧရိယာတစ်ခုလုံးမှာ ကန်ရေပြင်ကြီးက နေရာယူထားသဖြင့် ထိုနေရာသို့ ရောက်ရန်အတွက် ရေကူးသွားရပေမည်။

"ရေတံခွန်နောက်မှာ နေရာလွတ် ရှိတယ် ဟုတ်လား။ ရေကန့်လန့်ကာလိုဏ်ဂူလား"

ကျိချောင်းယန်သည်လည်း ရေတံခွန်ကို လှမ်းကြည့်လိုက်ရင်း မျက်လုံးများ ပြူးသွားရသည်။

"ဒါဆို ဒီနေရာက ဟို ဧရာမဦးခေါင်းကြီးရဲ့ အနောက်ဘက်ပိုင်းပေါ့ ဟုတ်လား"

"အတိအကျပဲ"

ရွှီရှင်း ခေါင်းညိတ်ပြလိုက်၏။

ထိုရေတံခွန်နောက်ကွယ်က နေရာလွတ်မှာ ဤဧရာမဦးခေါင်းကြီး၏ လျှို့ဝှက်ချက်ကို ဖော်ထုတ်ပေးနိုင်မည့် နေရာ ဖြစ်နေနိုင်ပေသည်။

သူတို့နှစ်ဦး တစ်ယောက်ကိုတစ်ယောက် ကြည့်ကာ ခေါင်းညိတ်ပြလိုက်ကြ၏။

သွားကြည့်ကြတာပေါ့။

ဒါဟာ သူတို့နှစ်ဦးလုံး၏ ဆန္ဒပင် ဖြစ်သည်။

သူတို့နှစ်ဦးလုံး ကန်ထဲသို့ ခုန်ဆင်းလိုက်ကြပြီး ထိုဘက်သို့ ဦးတည်ကူးခတ်သွားကြတော့သည်။

"အီးးး"

ခဲခဲလေးက ငွေရောင်ဘုရင်၏ ဦးခေါင်းပေါ်သို့ တိုက်ရိုက် ခုန်တက်လိုက်၏။

"ဝူးးး"

"အီး အီး အီး"

"ဝူးးး"

သားရဲနှစ်ကောင်မှာ အချင်းချင်း ခေတ္တမျှ ဆက်သွယ်ပြောဆိုပြီးနောက်၊ ငွေရောင်ဘုရင်သည်လည်း ကန်ထဲသို့ ခုန်ဆင်းကာ ရေတံခွန်လေးရှိရာဘက်သို့ ကူးခတ်သွားတော့သည်။

ငွေရောင်ဘုရင် ရေကူးချိန်တွင် ဦးခေါင်းမှာ ရေပေါ်တွင်သာ ရှိနေသဖြင့် ၎င်း၏ ဦးခေါင်းပေါ်မှာ လှဲနေသော ခဲခဲလေးမှာ ရေမစိုဘဲ အေးဆေး လိုက်ပါသွားနိုင်ပေသည်။

ထိုအတောအတွင်း ရွှီရှင်းမှာမူ ကန်အောက်ခြေသို့ ငုပ်လျှိုးဆင်းသွားခဲ့ပြီ ဖြစ်သည်။

ဤကန်၏ အောက်ခြေမှာ ဆယ်မီတာခန့် နက်သဖြင့် သာမန်လူများအတွက်မူ အတော်လေး နက်လှသော်လည်း၊ မြွေကြေးခွံချပ်ဝတ်ကို ဝတ်ဆင်ထားပြီး ရေငုပ်အတွေ့အကြုံများစွာ ရှိသော ရွှီရှင်းအတွက်မူ အောက်ခြေအထိ ဆင်းရန်မှာ ဘာမှ မခဲယဉ်းပေ။

သူ အောက်သို့ ငုပ်ဆင်းသွားရခြင်းမှာ ငါးများစွာ ကူးခတ်နေသည့်အပြင် ကန်အောက်ခြေတွင် ပုံဆောင်ခဲ များစွာ ရှိနေသည်ကို သူ မြင်လိုက်ရသောကြောင့် ဖြစ်သည်။

အနီရောင် ပုံဆောင်ခဲများ၊ ခရမ်းရောင် ပုံဆောင်ခဲများနှင့် အရောင်စုံ ပုံဆောင်ခဲများပင်။

သူ ကန်ထဲသို့ ဝင်လိုက်သည်နှင့် ကန်အောက်ခြေရှိ ရောင်စုံ ကျောက်တုံးများ၏ အလှကြောင့် မှင်သက်သွားရတော့၏။

အရေးကြီးဆုံးအချက်မှာ ထိုကျောက်တုံးများအနက် အချို့မှာ အပြာရောင်အဆင့် အလင်းတန်းများ ထွက်ပေါ်နေပြီး၊ တစ်လုံးမှာမူ ခရမ်းရောင်အဆင့် အလင်းတန်းများပင် ထွက်ပေါ်နေခြင်း ဖြစ်ပေသည်။

ခရမ်းရောင်အဆင့် ပုံဆောင်ခဲလား။

ခရမ်းရောင်အဆင့် ပစ္စည်းဆိုမှတော့ အရင်ဆုံး သိမ်းထားမှ ဖြစ်မည်။

သူသည် ကန်အောက်ခြေသို့ ချက်ချင်း ငုပ်ဆင်းကာ ခရမ်းရောင်အဆင့် ပုံဆောင်ခဲကို တိုက်ရိုက် ကောက်ယူလိုက်ပြီး၊ အပြာရောင်အဆင့် ပုံဆောင်ခဲ အချို့ကိုပါ ကျောပိုးအိတ်ထဲသို့ အမြန်ထည့်ကာ ရေမျက်နှာပြင်ပေါ်သို့ ပြန်တက်လာခဲ့တော့သည်။

ကျိချောင်းယန်ကိုတော့ မမြင်ရတော့ပေ၊ သူသည် ရေတံခွန်နောက်ကွယ်သို့ ရောက်နှင့်နေပြီ ဖြစ်ရမည်။

ရွှီရှင်းသည်လည်း ရေတံခွန်ရှိရာဘက်သို့ သူ၏ လက်ကို လှမ်းလိုက်တော့၏။

---

အခန်း ၂၈၆ ပြီး။

အပိုင်း (၂၈၇) - ရေတံခွန်နောက်ကွယ်မှ ရင်းနှီးနေသော မြင်ကွင်း

မှန်းဆချက်မှာ မှန်ကန်လှပေသည်။

ရေတံခွန်နောက်ကွယ်တွင် မည်သည့်နံရံမှ ရှိမနေဘဲ သူသည် အတွင်းဘက်သို့ တိုက်ရိုက် ထိုးဖောက်ဝင်ရောက်သွားခဲ့၏။

ရွှီရှင်းက ခရမ်းရောင်အဆင့် ပုံဆောင်ခဲကို ကောက်ယူနေစဉ်မှာပင် ကျိချောင်းယန်၊ ငွေရောင်ဘုရင်နှင့် ခဲခဲလေးတို့မှာ အထဲသို့ ရောက်နှင့်နေကြပြီ ဖြစ်သည်။

ငွေရောင်ဘုရင်နှင့် ခဲခဲလေးတို့မှာ ရေတံခွန်ကို ဖြတ်ကျော်လာခဲ့ကြသဖြင့် ခဲခဲလေးမှာ တစ်ကိုယ်လုံး ရွှဲရွှဲစိုနေတော့သည်။

သားရဲနှစ်ကောင်သည် ဂူပေါက်ဝသို့ ရောက်သည်နှင့် ကိုယ်ပေါ်က ရေများကို အားရပါးရ ခါချလိုက်ကြရာ ရေစက်များမှာ ရွှီရှင်း၏ မျက်နှာပေါ်သို့ စင်ထွက်လာတော့၏။

ရွှီရှင်းက ခဲခဲလေး၏ ရေစိုနေသော ခေါင်းလုံးလုံးလေးကို ပွတ်ပေးလိုက်ရင်း မြေပြင်မှ ထရပ်လိုက်သည်။

ထရပ်လိုက်သည့် ခဏမှာပင် သူသည် ဟန်ချက်ပျက်သွားပြီး လဲကျလုနီးပါး ဖြစ်သွားခဲ့ရ၏။

"...သံတွေလား"

မြေပြင်မှာ ချောမွတ်နေသော သံမျက်နှာပြင် ဖြစ်နေပြီး ရေစိုနေသဖြင့် အလွန်ချောနေခြင်း ဖြစ်သည်။

သတိမထားပါက ရွှီရှင်းမှာ အမှတ်မထင် ချော်လဲသွားပေလိမ့်မည်။

သူ့အနောက်ဘက်တွင်မူ ရေတံခွန်၏ ပါးလွှာသော အစိတ်အပိုင်းများမှတစ်ဆင့် ဝင်လာသော စူးရှလှသည့် အဖြူရောင်အလင်းတန်းများက အခန်းတစ်ခုလုံးကို လင်းထိန်နေစေသည်။

"ဒီအခန်းက..."

ရွှီရှင်း၏ မျက်နှာအမူအရာ ချက်ချင်း ပြောင်းလဲသွား၏။

သူ မျှော်လင့်ထားခဲ့သည်မှာ လိုဏ်ဂူကဲ့သို့ မြေအောက်ဂူတစ်ခု ဖြစ်သော်လည်း ယခု မြင်တွေ့နေရသည်မှာ သံမဏိအခန်း တစ်ခု ဖြစ်နေသည်မဟုတ်ပါလား။

အခန်းမှာ သိပ်မကြီးလှဘဲ စတုရန်းမီတာ ဆယ်ဂဏန်းခန့်သာ ရှိကာ အမြင့်မှာ ငါးမီတာ၊ ခြောက်မီတာခန့် ရှိပြီး မျက်နှာပြင် ခြောက်ဖက်လုံးကို သံမဏိများဖြင့်သာ ပြုလုပ်ထားခြင်း ဖြစ်သည်။

၎င်းမှာ အဘက်ဘက်မှ ပိတ်ဆို့ထားသည့် သံခဲတုံးကြီး တစ်ခုအတွင်း ရောက်နေရသကဲ့သို့ပင်။

ဤတည်ဆောက်ပုံမှာ သူ့အတွက် အလွန်ရင်းနှီးနေသည့်အပြင် မနှစ်မြို့ဖွယ် အမှတ်ရစရာများကိုပါ ပြန်လည်နှိုးဆွပေးလိုက်သလို ရှိနေ၏။

အနီရောင်မြူခိုးများ၏ လိုက်လံတိုက်ခိုက်မှုကို ခံရစဉ်က လှေကားအတိုင်း အသည်းအသန် တက်ခဲ့ရသည့် ထိုအမှတ်တရပင်။

ဤကမ္ဘာသို့ ရောက်ရှိလာပြီးကတည်းက သူသည် ဤကဲ့သို့သော သံမဏိအခန်းမျိုးကို မြေအောက်ကမ္ဘာသို့ ဆင်းသည့် လမ်းကြောင်း၏ အောက်ခြေအကျဆုံးနေရာတွင် တစ်ခါသာ မြင်ဖူးခဲ့ခြင်း ဖြစ်ပေသည်။

ထိုစဉ်က သူသည် သံချေးတက်နေသော ရှည်လျားလှသည့် သံလမ်းကြောင်းအတိုင်း ဆင်းလာခဲ့ပြီးနောက် ယခုပုံစံနှင့် ဆင်တူသော သံမဏိအခန်းထဲသို့ ရောက်ရှိခဲ့ဖူး၏။

အဲဒီအခန်းထဲမှာတော့ ကမ္ဘာမြေက ပစ္စည်းတွေကို သယ်လာပြီး စွန့်စားသူအဝတ်အစားတွေ ဝတ်ထားတဲ့ အရိုးစုကြီး တစ်ခု ရှိခဲ့သလို၊ အရိုးစုရဲ့ နောက်ကွယ်က နံရံမှာလည်း သူနားမလည်တဲ့ ဂရိစာသားအချို့ကို ထွင်းထုထားခဲ့သည် မဟုတ်ပါလား။

"အီးးး"

ခဲခဲလေးသည်လည်း စူးရှစွာ အော်ဟစ်လိုက်ပြီး ရွှီရှင်း၏ ပုခုံးပေါ်သို့ အလျင်အမြန် တက်လိုက်တော့သည်။

၎င်းသည်လည်း ထိုစဉ်က အတွေ့အကြုံကို မှတ်မိနေပုံရ၏။

ထိုစဉ်က ခဲခဲလေးသည် ရွှီရှင်းနှင့်အတူ မြေအောက်ကမ္ဘာသို့ ဆင်းခဲ့ဖူးပြီး ထိုနေရာက ဧရာမ မွန်းစတားကြီးများကို မြင်ကာ တော်တော်လေး ထိတ်လန့်ခဲ့ဖူးသည် မဟုတ်ပါလား။

ရွှီရှင်းက ခဲခဲလေး၏ ခေါင်းလုံးလုံးလေးကို ပုတ်ပေးရင်း သံမဏိအခန်း ကြမ်းပြင်ပေါ်က အက်ကြောင်းများဆီသို့ အလိုအလျောက် လှမ်းကြည့်လိုက်မိသည်။

ပြီးခဲ့သည့်အကြိမ်က ဤသံမဏိအခန်း ကြမ်းပြင်အက်ကြောင်းများကြားမှ ထူထပ်လှသော အနီရောင်မြူခိုးများ လှိုင်ကာ ထွက်ပေါ်လာခဲ့သဖြင့် ရွှီရှင်းမှာ အပေါ်သို့ အသည်းအသန် တက်ပြေးခဲ့ရပြီး၊ သံချေးတက်နေသော လမ်းကြောင်းမှတစ်ဆင့် သံတံခါးကို အမြန်ပိတ်ကာ သီသီလေး လွတ်မြောက်လာခဲ့ခြင်း ဖြစ်သည်။

ယခု ပြန်တွေးကြည့်လျှင်ပင် သူ ရင်တုန်မိနေဆဲ ဖြစ်၏။

ဤနေရာ၏ တည်နေရာကို စဉ်းစားကြည့်လိုက်သောအခါ...

စောစောက ဆားတွင်းဂူ တစ်ခုလုံးကို ရုတ်တရက် ပြည့်နှက်သွားစေသည့် အနီရောင်မြူခိုးများသည် ဤအခန်း၏ အက်ကြောင်းများထဲမှ ထွက်ပေါ်လာခြင်းများလား။

ရွှီရှင်းသည် အခန်း၏ ကြမ်းပြင်နှင့် နံရံများ ဆုံရာ နေရာများကို သေသေချာချာ ကြည့်လိုက်ရာ၊ အမှန်တကယ်ပင် သေးငယ်လှသော အနက်ရောင် အဟကွက်လေးများကို မြင်တွေ့လိုက်ရ၏။

ဖြစ်နိုင်သည်မှာ သူ ထင်ထားသည့်အတိုင်းပင် ဖြစ်ရပေမည်။

ဤအခန်း၏ နံရံလေးဖက်အနက် တစ်ဖက်၏ အနောက်ကွယ်မှာ ဆားတွင်းဂူ ဖြစ်နေပေလိမ့်မည်။

ရွှီရှင်းက နံရံလေးဖက်စလုံးကို လှည့်ပတ်ကြည့်လိုက်သည်။

သူသည် ရေတံခွန်နှင့် ကန်ရေပြင်မှတစ်ဆင့် ဝင်လာခဲ့ခြင်းဖြစ်ရာ၊ ဤနေရာသည် သံမဏိအခန်း၏ တံခါးပေါက် ဖြစ်ပေလိမ့်မည်။

သူ အတင်းအကျပ် ဖွင့်ခဲ့ရသော တံခါးနှင့် တစ်ပုံစံတည်းပင် ဖြစ်သော်လည်း၊ ယခုမူ ထိုသံတံခါးကြီးမှာ အပြည့်အဝ ပွင့်လျက်သား ရှိနေခြင်း ဖြစ်သည်။

နံရံလေးဖက်စလုံးတွင် ထူးခြားသည့်အရာ ဘာမှမရှိပုံရပေ။

အခန်းတစ်ခုလုံးမှာ ဟာလာဟင်းလင်း ဖြစ်နေပြီး နံရံများမှာလည်း ပြောင်ချောနေသဖြင့် သံပြားများဖြင့် ပတ်ပတ်လည် ပိတ်လှောင်ထားသည့် အကျဉ်းထောင်တစ်ခုနှင့်ပင် တူလှတော့သည်။

အရင်အခန်းထဲမှာတော့ အရိုးစုကြီးက ထောင့်တစ်နေရာမှာ ထိုင်နေခဲ့သော်လည်း ဤအခန်းထဲမှာတော့ ဘာမှ မရှိချေ။

သို့သော် ရွှီရှင်းမှာမူ ရုတ်တရက် သတိကြီးစွာ ထားလိုက်မိသည်။

အရင် သံမဏိအခန်းတုန်းက ဤတံခါးသည် သူ့အလိုအလျောက် ပိတ်သွားခဲ့သည် မဟုတ်ပါလား။

ထိုအချိန်တွင် ကျိချောင်းယန်မှာ အခန်းအတွင်း လှည့်လည်ကြည့်ရှုနေပြီး ထောင့်ပေါင်းစုံကို စေ့စေ့စပ်စပ် စစ်ဆေးနေချေပြီ။

"ဘယ်လိုလဲ... ထူးခြားတာ တစ်ခုခု တွေ့လား" ရွှီရှင်းက မေးလိုက်၏။

"မတွေ့ဘူး" ကျိချောင်းယန်က ခေါင်းခါပြသည်။

"ဒီအခန်းထဲမှာ ဘာမှမရှိဘူး၊ စာသားလေး တစ်ကြောင်းတောင် မထွင်းထားဘူး။ နံရံအားလုံးက လုံးဝ ပြောင်ချောနေတာပဲ"

ထိုစကားကို ကြားသောအခါ ရွှီရှင်းသည် တံခါးနှင့် မျက်နှာချင်းဆိုင်ရှိ သံနံရံအနားသို့ လျှောက်သွားလိုက်သည်။

တည်နေရာအရဆိုလျှင်၊ စောစောက ဆားတွင်းဂူထဲမှာ အက်ကွဲသွားခဲ့သည့် နံရံသည် ဤနံရံဖြစ်ဖို့ များလှပေသည်။

အစောပိုင်းက အခြေအနေကို ပြန်စဉ်းစားကြည့်လျှင်၊ အက်ကွဲနေသော နံရံမှ ထွက်ပေါ်လာသည့် ဖြူဖွေးသောအလင်းမှာ ဤအခန်းအတွင်းက ပတ်ဝန်းကျင်နှင့် တစ်ထပ်တည်း ကျနေသလို၊ ဆားတွင်းဂူထဲမှာ သူ ထွက်ပြေးစဉ်က ကြားခဲ့ရသော လေတိုးသံမှာလည်း ဤသံမဏိအခန်း ကြမ်းပြင်အက်ကြောင်းမှ မြူခိုးများ မှုတ်ထုတ်နေသည့် အသံနှင့် အလွန်ပင် ဆင်တူလှပေသည်။

ယခုအခါ သူ သေချာသလောက် ရှိသွားပြီ မှာ ဆားတွင်းဂူ၏ အက်ကွဲနေသော နံရံနောက်ကွယ်တွင် ဤသံမဏိအခန်း ရှိနေခြင်းပင် ဖြစ်၏။

သို့သော် ဘာကြောင့် နတ်ဘုံနတ်နန်းနှင့် တူလှသော နေရာလေး၏ ရေတံခွန်နောက်ကွယ်မှာ ဤကဲ့သို့သော သံမဏိအခန်း ရှိနေရသနည်း။

သူ၏ မှန်းဆချက်များကို ကျိချောင်းယန်အား ရှင်းပြလိုက်သည်။

"မင်း ဘယ်လိုထင်လဲ..."

ရွှီရှင်းက နံရံကို စိုက်ကြည့်ရင်း - "ငါတို့ ဒီနံရံကို ဖောက်ကြည့်မယ်ဆိုရင် မူလနေရာကို ပြန်ရောက်သွားနိုင်မလား" ဟု မေးလိုက်၏။

"ဖြစ်နိုင်တာပဲ၊ ဒီနားမှာ တခြား အပြင်ထွက်ပေါက်လည်း မရှိတော့တာဆိုတော့ စမ်းကြည့်ရတာ တန်ပါတယ်"

ကျိချောင်းယန်က ရေတံခွန်ဘက်သို့ တစ်ချက် လှမ်းကြည့်လိုက်ရင်း - "ဒါပေမဲ့ အရင်ဆုံး အပြင်က အရင်းအမြစ်တွေကို အရင် သွားသိမ်းကြတာပေါ့" ဟု ဆိုသည်။

"အင်း... ဟုတ်တာပေါ့။ ဒါပေမဲ့ ဒီသံမဏိအခန်းက အရင်အခန်းနဲ့ တစ်ပုံစံတည်းပဲ"

ရွှီရှင်းက ရေတံခွန်ဘေးက တံခါးကို လက်ညှိုးညွှန်ပြလိုက်သည်။

"တံခါးပုံစံကအစ လုံးဝ တူနေတာ"

"မှန်တယ်"

ကျိချောင်းယန်က အပေါ်ဘက်ကို မော့ကြည့်လိုက်ရင်း - "ဒီတစ်ခါတော့ ငါတို့မှာ အပေါ်တက်ပြေးဖို့ လမ်းကြောင်း မရှိဘူး။

အကယ်၍ တံခါးက ပိတ်သွားပြီး မြူတွေ ထွက်လာမယ်ဆိုရင်တော့ ကိုင်တွယ်ရ တကယ် မလွယ်ဘူး"

ကျိချောင်းယန်၏ အတွေ့အကြုံမှာလည်း ထပ်တူပင် ဖြစ်သည်။

တံခါးပိတ်ပြီး အနီရောင်မြူခိုးများ ထွက်ပေါ်လာချိန်တွင် သူလည်း သီသီလေး လွတ်မြောက်လာခဲ့ခြင်း မဟုတ်ပါလား။

ထို့ကြောင့် သူတို့နှစ်ဦးစလုံးမှာ ထူပိန်းလှသော အနံ့ဆိုးနံသည့် အနီရောင်မြူခိုးများနှင့် ပိတ်ဆို့နေသော အခန်းများ၏ ပေါင်းစပ်မှုကို အနည်းနှင့်အများ ကြောက်ရွံ့နေကြဆဲ ဖြစ်ပေသည်။

သို့သော်လည်း ရွှီရှင်း၏ စိတ်ထဲတွင် မှန်းဆချက်တစ်ခု ရှိနေ၏။

အကယ်၍ တံခါးသာ ပိတ်သွားပြီး မြူခိုးတွေ ထွက်လာမယ်ဆိုရင် နံရံကော အက်ကွဲလာမလား။

သူတို့တွေ ဆားတွင်းဂူထဲကို ပြန်ဝင်လို့ ရသွားမလား..။

အခန်း ၂၈၇ ပြီး။