ဝူရှန့်ကျိကျွင်း၏ အကာအကွယ်
Vol. 62 Ch. 648
မုန်တိုင်းအပြီးတွင် ဟုန်းယွင်တောင်တစ်ခုလုံး ညည်းတွားသံများဖြင့် ပြည့်နှက်နေသည်။
တောင်ထိပ်တစ်ဝက်မှာ ထန်ထျန်း၏ လက်သီးတစ်ချက်ဖြင့် ဖျက်ဆီး ခံလိုက်ရသဖြင့် အနည်းဆုံး တပည့်ပေါင်း သိန်းချီ၍ ဘေးဒုက္ခကြုံတွေ့ခဲ့ရသည်။
သို့သော် ထိုသို့မဖြစ်ပွားမီကပင် ထန်ထျန်းက သူတို့အားလုံးကို တောင်အောက်သို့ ရွှေ့ပြောင်းပေးခဲ့ပြီး ဖြစ်သည်။ ယခုအခါ သူတို့အားလုံး စုဝေးနေကြပြီး တစ်ယောက်ချင်းစီမှာ အစွန်းကုန် ထိတ်လန့်တုန်လှုပ်နေကြ၏။
သူက ယနေ့တွင် တိမ်တိုက်တောင်၏ အရှိန်အဝါကို မြှင့်တင်ပေးရန်သာ လာခြင်းဖြစ်ပြီး အစုလိုက်အပြုံလိုက် သတ်ဖြတ်ရန် စိတ်မကူးခဲ့ပေ။
အစောပိုင်းက လက်သီးသုံးချက်သည်လည်း သူတို့ကို သင်ခန်းစာပေးရုံသာဖြစ်ပြီး တိုက်ရိုက်သတ်ပစ်ခဲ့ခြင်း မဟုတ်ပေ။
သို့သော်ငြားလည်း ဤသည်မှာ အလွန်ကြောက်မက်ဖွယ်ကောင်းသော တိုက်ခိုက်မှုတစ်ခု ဖြစ်သည်။ ထိုက်ယိ မြင့်မြတ်နယ်မြေ စတင်တည်ထောင်ချိန်မှစ၍ ဤမျှအဆင့်ရှိသော တိုက်ခိုက်မှုကို တစ်ခါမျှ မကြုံတွေ့ခဲ့ဖူးချေ။
မြင့်မြတ်နယ်မြေအတွင်းရှိ ရေတွက်လို့ရသော တာအိုအရှင် အထွတ်အထိပ် အနည်းငယ်မှာလည်း အပြင်သို့ ထွက်လာကြပြီး ဟုန်းယွင်တောင်မှ အခြေအနေကို အဝေးမှ လှမ်းကြည့်နေကြသည်။
သူတို့က ထန်ထျန်း၏ ခွန်အားအစစ်အမှန်ကို ခန့်မှန်း၍မရသဖြင့် တိုက်ရိုက်မလာရဲကြဘဲ အခြေအနေကိုသာ စောင့်ကြည့်နေကြခြင်း ဖြစ်သည်။
ထိုအချိန်တွင် ချန်ဝူဟွေ့ ရောက်ရှိလာခဲ့သည်။
လုံကျိုကျိုး မရှိခိုက်တွင် ချန်ဝူဟွေ့က မြင့်မြတ်နယ်မြေ၏ ကိစ္စအတော်များများကို စီမံခန့်ခွဲနေရသူဖြစ်ရာ လုံကျိုကျိုး၏ ကိုယ်စားလှယ်ဟုပင် ဆိုနိုင်သည်။
ထို့ကြောင့် ထန်ထျန်းအပေါ် သူထားရှိမည့် သဘောထားမှာ အလွန်ပင် အရေးကြီးလှသည်။
သူ့ကို မြင်လိုက်ရသည်နှင့် လူတိုင်း၏ အကြည့်များမှာ သူ၏ထံသို့ ချက်ချင်း ရောက်ရှိသွားတော့သည်။
ဟုန်းယွင်တောင် တောင်ထိပ်ရှိ ခန်းမကြီးအတွင်း ပုန်းကွယ်နေသော သူများမှာလည်း ကယ်တင်ရှင်ကို တွေ့လိုက်ရသကဲ့သို့ အားကိုးတကြီးဖြင့် အော်ဟစ်အကူအညီတောင်းကြတော့သည်။
"အရှင်ဝူဟွေ့... ကယ်ပါဦး"
"တိမ်တိုက်တောင်က လူတွေက လွန်လွန်းတယ်၊ ဟုန်းယွင်တောင် တစ်ဝက်ကို ဖျက်ဆီးပစ်လိုက်တာက ကျွန်တော် တို့ မြင့်မြတ်နယ်မြေရဲ့ ဂုဏ်သိက္ခာကို စိန်ခေါ်နေတာပါပဲ"
"ကျွန်တော်တို့အတွက် တရားမျှတအောင် လုပ်ပေးပါ"
သူတို့က ထန်ထျန်းကို တိုက်ရိုက် လက်ညှိုးထိုးကာ နာကျင်စွာ အော်ဟစ်နေကြသည်။
သို့သော် ချန်ဝူဟွေ့က သူတို့ကို ပြန်မဖြေခဲ့ပေ။ သူက ဟုန်းယွင်တောင်၏ ပျက်စီးနေသော အခြေအနေကို ကြည့်ပြီး သက်ပြင်းတစ်ချက် ခပ်တိုးတိုးချကာ ထန်ထျန်း၏ ရှေ့သို့ လျှောက်လာခဲ့သည်။
လူတိုင်းက သူသည် ထန်ထျန်းကို အပြစ်တင် စစ်ဆေးတော့မည်ဟု ထင်မှတ်နေချိန်တွင် ချန်ဝူဟွေ့က ဘယ်သူမှ မမျှော်လင့်ထားသည့် စကားတစ်ခွန်းကို ပြောလိုက်သည်။
"သခင်လေးထန်... ဘာမှမဖြစ်ဘူးမလား"
ဟုန်းယွင်တောင်မှ လူများ : "..."
အရှင်ဝူဟွေ့... မင်း ဘာဖြစ်နေတာလဲ
မျက်စိရှေ့က အခြေအနေက မရှင်းလင်းလို့လား?
ထန်ထျန်းက ကောင်းကင်ယံမှာ အေးအေးဆေးဆေး ရပ်နေတာလေ၊ မျက်နှာကလည်း သွေးရောင်လွှမ်းလို့၊ အမောပင် မဖောက်ဘူး၊ ကြည့်ရတာ တစ်ခုခု ဖြစ်နေတဲ့ ပုံစံမျိုး ပေါက်နေလို့လား
မင်း အရင်ဆုံး ဟုန်းယွင်တောင်ရဲ့ အခြေအနေကို စိုးရိမ်ပေးသင့်တာ မဟုတ်ဘူးလား
ချန်ဝူဟွေ့၏ စကားတစ်ခွန်းကြောင့် သူတို့ ပြင်ဆင်ထားသမျှ တိုင်တောမယ့် စကားလုံးများမှာ လည်ချောင်းဝတွင်တင် တစ်ဆို့သွားတော့သည်။
အဝေးမှ ကြည့်နေကြသော အစွမ်းထက် တာအိုအရှင် အချို့မှာလည်း အံ့အားသင့်သွားကြသည်။
ဒီထန်ထျန်းကတော့ တကယ်ကို မရိုးရှင်းဘူးပဲ။
ချန်ဝူဟွေ့၏ မေးခွန်းကို ထန်ထျန်းက ပြုံး၍ ဖြေလိုက်သည်။ "ဘာမှမဖြစ်ပါဘူး"
"ငါက ဟုန်းယွင်တာအိုအရှင်ကို သွားတွေ့ချင်ရုံပါ"
"မင်း ရောက်လာတာ ကံကောင်းသွားတယ်၊ မဟုတ်ရင် ငါ အတင်းဝင်သွားရတော့မှာ"
ချန်ဝူဟွေ့၏ မျက်ခုံးများ သိသိသာသာ လှုပ်သွားသည်။ ထန်ထျန်းတွင် အတင်းဝင်ရောက်နိုင်သည့် ခွန်အားအစစ်အမှန် ရှိနေသည်ကို သူ သိသည်လေ။
ထိုသို့ မလုပ်ခဲ့ခြင်းမှာ သူ၏ ကျိကျွင်း အဆင့်အတန်းကို စောစောစီးစီး အသိမပေးချင်၍သာ ဖြစ်မည်။
"ဟုန်းယွင်တာအိုအရှင်နဲ့ ဘာကိစ္စ ရှိလို့လဲ"
ချန်ဝူဟွေ့က အသံပို့၍ မေးလိုက်သည်။
ထန်ထျန်းက ခေါင်းညိတ်ကာ "ငါ မြင့်မြတ်နယ်မြေကို လာတဲ့လမ်းမှာ ကြုံခဲ့ရတဲ့ ဟင်းလင်းပြင် မုန်တိုင်းကို မှတ်မိသေးလား"
"အဲဒါ ဟုန်းယွင် လုပ်တာပဲ"
ချန်ဝူဟွေ့ ခဏမျှ ဆွံ့အသွားသည်။
ထို ဟင်းလင်းပြင် မုန်တိုင်းမှာ တကယ်ပင် ထူးဆန်းလှသည်။ ထိုစဉ်က တစ်စုံတစ်ယောက်က တမင်လုပ်ခဲ့ခြင်းလားဟု သူ သံသယဝင်ခဲ့သော်လည်း စုံစမ်းစစ်ဆေးရန် ပြင်ဆင်ချိန်တွင် လုံကျိုကျိုးက သူ့ကို တားဆီးခဲ့သဖြင့် ထိုကိစ္စမှာ ပြီးစလွယ်ပင် ပြီးဆုံးသွားခဲ့ရသည်။
တကယ်တော့... ဟုန်းယွင်တာအိုအရှင် ဖြစ်နေတာလား
ဒါပေမဲ့ သူက ဘာကြောင့် ဒီလောက် အင်အားအများကြီးသုံးပြီး ထန်ထျန်းကို လုပ်ကြံချင်ရတာလဲ
ချန်ဝူဟွေ့ စဉ်းစားမရသော်လည်း ထပ်မမေးတော့ပေ။
အကြောင်းမှာ ထန်ထျန်းကဲ့သို့ လူမျိုးက ဟုန်းယွင်တောင်ကို အတင်းဝင်ရောက်တိုက်ခိုက်သည်အထိ ဖြစ်လာသည်ဆိုလျှင် ၎င်းမှာ သေချာပေါက် သာမန်ကိစ္စ မဟုတ်နိုင်ကြောင်း သူ နားလည်သည်။
ပြီးတော့ ကျိကျွင်း အဆင့်တွေရဲ့ ကိစ္စမှာ သူ ဝင်ပါလို့ မရဘူးလေ။
"ဒါဆို ကျွန်တော် လိုက်ခဲ့ပေးရမလား"
ချန်ဝူဟွေ့က မေးလိုက်သည်။
ထန်ထျန်းက ခေတ္တစဉ်းစားပြီးနောက် ခေါင်းညိတ်လိုက်သည်။ "ရတယ်၊ အတူတူသွားကြတာပေါ့"
"ငါ မင်းကို မေးစရာတွေလည်း ရှိနိုင်တယ်"
ဟုန်းယွင်တာအိုအရှင်ရဲ့ ပတ်သက်မှုတွေကိုတော့ ချန်ဝူဟွေ့က ပိုသိမှာ သေချာသည်။
အဖြေကို ရရှိပြီးနောက် ချန်ဝူဟွေ့က အကာအကွယ်အောက်တွင် ရှိနေဆဲဖြစ်သော ဟုန်းယွင်တောင် ခန်းမကြီးကို ကြည့်ကာ အေးဆေးစွာ ပြောလိုက်သည်။
"အစီအရင်ကို ဖွင့်လိုက်စမ်း"
ဟုန်းယွင်တောင်မှ လူများမှာ ချက်ချင်းပင် မှင်သက်သွားကြသည်။
ချန်ဝူဟွေ့ ရောက်လာခြင်းက သူတို့အတွက် မျှော်လင့်ချက်ဟု ထင်ခဲ့ကြသော်လည်း ထန်ထျန်း မည်မျှပင် အစွမ်းထက်ပါစေ အရှင်ဝူဟွေ့ ရှေ့မှာတော့ ရမ်းကားရဲမှာ မဟုတ်ဘူးဟု ယူဆခဲ့ကြသော်လည်း...
အဖြစ်မှန်က သူတို့ ထင်သလို မဟုတ်ခဲ့ပေ။
ချန်ဝူဟွေ့က ထန်ထျန်းကို အလွန်အမင်း ယဉ်ကျေးရုံသာမက သူတို့ကိုပါ နောက်ဆုံး အကာအကွယ်ကို ဖွင့်ပေးရန်နှင့် ဟုန်းယွင်တောင်၏ အချက်အချာနေရာကို ထန်ထျန်းအတွက် လုံးဝ ဖွင့်ပေးရန် အမိန့်ပေးနေခြင်း ဖြစ်သည်။
ဒါက သူတို့ကို အဝတ်အစားတွေ အကုန်ချွတ်ခိုင်းတာနဲ့ ဘာကွာလို့လဲ
ခဏအတွင်းမှာပင် လူတိုင်း ဝေခွဲမရ ဖြစ်နေကြသည်။
ထိုစဉ် အဝေးမှ စောင့်ကြည့်နေကြသော အခြား တာအိုအရှင်များမှာလည်း မနေနိုင်တော့ဘဲ ဝင်ပြောကြတော့သည်။
"အရှင်ဝူဟွေ့... ဒါက လုပ်ထုံးလုပ်နည်းနဲ့ မညီဘူး ထင်တယ်နော်"
တစ်ယောက်က စပြောလိုက်သည်။
ထိုကန့်ကွက်မှုကို ချန်ဝူဟွေ့က ဘာမှပြန်မပြောဘဲ အနက်ရောင် တိုကင်ပြားတစ်ခုကိုသာ ထုတ်ပြလိုက်သည်။
ထိုတိုကင်ပြား ပေါ်လာသည်နှင့်တစ်ပြိုင်နက် ထိုက်ယိ မြင့်မြတ်နယ်မြေ တစ်ခုလုံး အနည်းငယ် တုန်ခါသွားခဲ့သည်။
၎င်းမှာ... လုံကျိုကျိုး၏ ကိုယ်ပိုင် တိုကင်ပြားပင်။
ထိုတိုကင်ပြားကို မြင်လိုက်ရသည်နှင့် အခြား တာအိုအရှင်များမှာ သူတို့၏ အော်ရာ များကို ချက်ချင်း ပြန်သိမ်းလိုက်ကြပြီး ဟင်းလင်းပြင်ထဲတွင် ဒူးထောက်လိုက်ကြသည်။
သူတို့က ရိုသေစွာဖြင့် နှုတ်ဆက်ကြ၏။ "ဝူရှန့်ကျိကျွင်း ကို အရိုအသေပေး ပါတယ်"
ဤတိုကင်ပြား ရှိနေခြင်းမှာ လုံကျိုကျိုး ကိုယ်တိုင် ရောက်ရှိနေသကဲ့သို့ပင်။
ဤတိုကင်ပြားကို ကိုင်ဆောင်ထားသော ချန်ဝူဟွေ့က လုံကျိုကျိုး မရှိခိုက်တွင် ထိုက်ယိ မြင့်မြတ်နယ်မြေ၌ အာဏာအရှိဆုံးနှင့် အဆင့်အတန်း အမြင့်ဆုံးသူ ဖြစ်သည်။ သူက မည်သူ့ကိုမဆို သတ်ပိုင်ခွင့်၊ အသက်ချမ်းသာပေး ပိုင်ခွင့် အာဏာ ရှိသည်။
ထို့ကြောင့် မည်သူမှ ထပ်မံ၍ ကန့်ကွက်ခြင်း မပြုရဲကြတော့ပေ။
ချန်ဝူဟွေ့က လူများကို တစ်ချက်ကြည့်ကာ အေးစက်စွာ ပြောလိုက်သည်။ "ဒီနေရာမှာ မင်းတို့ကို ငါ ပြောစရာ တစ်ခုရှိတယ်"
"ထန်ထျန်းကို ဝူရှန့်ကျိကျွင်း ကိုယ်တိုင်က တိုက်ရိုက် အကာအကွယ် ပေးထားတာ"
"ဒီနေ့ကစပြီး ထိုက်ယိ မြင့်မြတ်နယ်မြေက ဘယ်သူမဆို ထန်ထျန်းကို ထိခိုက်စေမယ့် လုပ်ရပ်မျိုး မလုပ်ရဘူး"
"မဟုတ်ရင်... ချက်ချင်း သတ်ပစ်မယ်"
သိပ်မကျယ်လှသော ထိုအသံမှာ မြင့်မြတ်နယ်မြေ တစ်ခုလုံးသို့ ချက်ချင်း ပျံ့နှံ့သွားသည်။
ဤခဏတွင်မှ လူတိုင်း နားလည်သွားကြတော့သည်။ ထန်ထျန်း ပြန်ရောက်လာပြီးနောက် ဤမျှတိုတောင်းသော အချိန်အတွင်းမှာပင် ဤမျှ ကြီးမားသော ဩဇာအာဏာ ရှိနေခြင်းမှာ အရှင် ဝူဟွေ့က အလေးထားရုံတင် မကဘဲ ဝူရှန့်ကျိကျွင်း ကိုယ်တိုင်က အကာအကွယ် ပေးထားခြင်းမှာ သူ၏ အကြီးမားဆုံးသော အားကိုးရာ ဖြစ်နေသောကြောင့်ပင်။
ထိုက်ယိ မြင့်မြတ်နယ်မြေတွင် လုံကျိုကျိုးက တစ်ဦးတည်းသော၊ ငြင်းပယ်၍မရသော အမြင့်မြတ်ဆုံး နတ်ဘုရား ဖြစ်သည်။
သို့ဖြစ်ရာ အမြင့်မြတ် ဆုံး နတ်ဘုရား ၏ အကာအကွယ်ကို ရရှိထားသော ထန်ထျန်းသည်လည်း ငြင်းပယ်၍မရသော တစ်ယောက်အောက်၊ လူသောင်းပေါင်း၏ အထက်တွင် ရှိနေသူ ဖြစ်ပေသည်။
ဝူရှန့်ကျိကျွင်း၏ တိုကင်ပြားကို ကိုင်ထားသော ချန်ဝူဟွေ့ပင်လျှင် ထန်ထျန်းကို မျက်နှာသာ ပေးနေရခြင်းမှာ အံ့သြစရာ မဟုတ်တော့ပေ။
မကြာမီမှာပင် လူတိုင်း အရာအားလုံးကို နားလည်သွားကြတော့သည်။
ထန်ထျန်း၏ ပုံမှန်မဟုတ်သော ခွန်အားနှင့် ပတ်သက်၍လည်း လူတိုင်းက ဒုတိယနေရာမှာပဲ ထားလိုက်ကြသည်။
နောက်ကွယ်မှာ ဝူရှန့်ကျိကျွင်း ရှိနေမှတော့ တာအိုအရှင်တွေနဲ့ အကြီးအကဲတွေကို လက်သီးတစ်ချက်တည်းနဲ့ လွင့်ထွက်သွားအောင် လုပ်နိုင်တာကလည်း သိပ်ပြီး လက်မခံနိုင်စရာ ကိစ္စ မဟုတ်တော့ဘူးလေ...
ထန်ထျန်းကတော့ ချန်ဝူဟွေ့သည် သူ၏ ခွန်အားအစစ်အမှန်ကို ဖုံးကွယ်ပေးနေခြင်း ဖြစ်မှန်း သိသဖြင့် ဘာမှဝင်မပြောဘဲ ငြိမ်သက်စွာသာ ကြည့်နေလိုက်သည်။
လူအုပ်ကြီးကို တစ်ချက်ဝေ့ကြည့်ပြီးနောက် ချန်ဝူဟွေ့က ဟုန်းယွင်တောင်မှ လူများကို ထပ်မံ ကြည့်လိုက်သည်။
"အစီအရင်ကို ဖွင့်လိုက်စမ်း"