မြောင်ယန်၏ ဘဝဇာတ်ကြောင်း
Vol. 62 Ch. 652
အရှင်ဝူဟွေ့၏ ပြောပြချက်အရ ထန်ထျန်းက ဟုန်းယွင်တာအိုအရှင်နှင့် မြောင်ယန်တို့၏ ဆက်ဆံရေးကို တခြားရှုထောင့်တစ်ခုမှ နားလည်ခွင့်ရခဲ့သည်။
မြောင်ယန်ရှိခဲ့သော ထိုအင်အားကြီးအင်အားစု၏ အမည်မှာ ကျွမ်းချင်းနန်းတော် ဖြစ်သည်။
ဤနယ်မြေအတွင်းရှိ အင်အားကြီးအင်အားစု တစ်ဒါဇင်ကျော်ထဲတွင် ကျွမ်းချင်းနန်းတော်၏ အင်အားမှာ ထိပ်ဆုံး၌ ရှိနေပြီး ဟုန်းယွင်ရှိသော အင်အားစုထက်ပင် ပိုမိုတောင့်တင်းလှသည်။
မြောင်ယန်၏ ခေတ်တွင် ကျွမ်းချင်းနန်းတော်၌ ပါရမီရှင်များစွာ ထွက်ပေါ်ခဲ့သဖြင့် အင်အားကြီးအင်အားစုအားလုံး၏ ထိပ်တန်းနေရာသို့ တက်လှမ်းနိုင်မည့် အလားအလာများပင် ရှိခဲ့သည်။
မြောင်ယန်၏ ပါရမီမှာ အလွန်ကောင်းမွန်သော်လည်း ထိုခေတ်က ကျွမ်းချင်းနန်းတော်တွင် သူမက အထူးချွန်ဆုံးတော့မဟုတ်ပေ။
စကျင့်ကြံချိန် ချိန်မှစ၍ ဟိုမင် အမည်ရှိသော စီနီယာအမတစ်ဦးက သူမ၏အပေါ်တွင် အမြဲတမ်း သာလွန်နေခဲ့သည်။
ဟိုမင်က ပါရမီထူးချွန်ရုံသာမက သန့်စင်လှသော 'မူလ တာအိုနှလုံးသား ’ ကို ပိုင်ဆိုင်ထားသူဖြစ်သည်။ ကျင့်ကြံခြင်းလမ်းတွင် အလွန်လျင်မြန်သဖြင့် ထိုစဉ်က မျှော်လင့်အထားရဆုံး တပည့်တစ်ဦး ဖြစ်ခဲ့သည်။
ထို့အပြင် သူမ၏ စရိုက်နှင့် ကိုယ်ကျင့်တရားမှာလည်း ကောင်းမွန်သဖြင့် ကျွမ်းချင်းနန်းတော် အဆင့်မြင့်အကြီးအကဲ များ၏ ချစ်ခင်မှုကို ရရှိထားသလို တပည့်အချင်းချင်းကြားတွင်လည်း လေးစားမှု အလွန်များပြားရာ အလင်းရောင်ခြည်ပေါင်း သောင်းခြောက်ထောင်ကို စုစည်းထားသကဲ့သို့ တည်ရှိနေသူပင် ဖြစ်သည်။
အကယ်၍ ချောချောမွေ့မွေ့ နှင့်သာ ဆက်လက်ကြီးထွားလာမည်ဆိုလျှင် ကျွမ်းချင်းနန်းတော်၏ ‘မြင့်မြတ်သမီးတော်’ ရာထူးမှာ ဟိုမင်ထံသို့ သေချာပေါက် ရောက်ရှိမည် ဖြစ်သည်။
ဤအချက်ကို လူတိုင်းသိသလို မြောင်ယန်ကလည်း သိနေသည်မှာ အသေအချာပင် ဖြစ်သည်။
သို့သော် မြောင်ယန်မှာ ဤအတိုင်း အလျှော့မပေးလိုပေ။ တကယ့်စွမ်းရည်ချင်း ယှဉ်ပြိုင်ရာတွင် မယှဉ်နိုင်သဖြင့် သူမက အမှောင် နည်းလမ်းအချို့ကို စတင်စမ်းသပ်တော့သည်။
သူမက အလွန်ပါးနပ်လှသည်။ ဟိုမင်ကို တိုက်ရိုက်ရင်ဆိုင်ရန် မရွေးချယ်ဘဲ ဟိုမင်၏အနားရှိ တခြားသူများထံမှ စလုပ် တော့သည်။
သဘာဝအလှတရား ရှိသဖြင့် မြောင်ယန်က တိတ်တဆိတ်နှင့် အလွန်ပြင်းထန်သော ‘မြူဆွယ်ခြင်းကျင့်စဉ်’ တစ်ခုကို ကျင့်ကြံခဲ့သည်။
သူမ၏ ပါရမီမှာ မဆိုးလှသဖြင့် ထိုမြူဆွယ်ခြင်းကျင့်စဉ်ကို မကြာခင်မှာပင် အထွတ်အထိပ်အဆင့်သို့ ရောက်အောင် ကျင့်ကြံနိုင်ခဲ့သည်။ ထို့နောက် တိုက်ဆိုင်မှုအမျိုးမျိုးကို ဖန်တီးကာ ဟိုမင်နှင့် ရင်းနှီးသော လူငယ်တပည့်များနှင့် စတင်ထိတွေ့တော့သည်။
ထိုစဉ်က အားလုံးမှာ လူပျိုဖော်ဝင်စ သွေးကြွနေသော လူငယ်လေးများဖြစ်ရာ မြောင်ယန်၏ အထွတ်အထိပ်မြူဆွယ်ခြင်းကျင့်စဉ်၏ တိုက်ခိုက်မှုကို မည်သို့ခုခံနိုင်ပါမည်နည်း။
မကြာခင်မှာပင် ဟိုမင်အနားရှိ လူငယ်တပည့်အချို့မှာ မြောင်ယန်၏ ဆွဲဆောင်မှုအောက် ရောက်သွား ပြီး စိတ်ဝိညာဉ်ပင် လွင့်စင်မတတ် မိန်းမောသွားကြတော့သည်။
သို့သော် မြောင်ယန်မှာ အလွန်စိတ်ရှည်လှသည်။ ဤအချက်ကို လုပ်ပြီးနောက် ဟိုမင်ကို အလျင်စလို မတိုက်ခိုက်ဘဲ အသင့်တော်ဆုံး အခွင့်အရေးကို တိတ်တဆိတ် စောင့်ဆိုင်းနေခဲ့သည်။
မကြာခင်မှာပင် အခွင့်အရေး ရောက်လာခဲ့သည်။
၎င်းမှာ အလွန်အရေးကြီးသော ‘တပည့်ညီလာခံ’ တစ်ခု ဖြစ်ပြီး အင်အားကြီးအင်အားစုအားလုံးမှ အထူးချွန်ဆုံး ပါရမီရှင်များကို စေလွှတ်ကြရသည်။ ညီလာခံ၏ ရလဒ်မှာ အရေးကြီးသော အကျိုးအမြတ်ခွဲဝေမှုများနှင့်လည်း သက်ဆိုင်နေသည်။
ညီလာခံ မတိုင်မီမှာပင် မြောင်ယန်က စတင်လှုပ်ရှားတော့သည်။
သူမက ဟိုမင်အနားရှိ လူငယ်တပည့်များနှင့် ထိတွေ့နေစဉ်အတွင်း သူ့ကိုယ်သူ ကံဆိုးမိုးမှောင်ကျနေသူ၊ ဟိုမင်၏ အရိပ်အောက်တွင် တစ်နေ့ကုန် ရှင်သန်နေရသူအဖြစ် သနားစဖွယ် ပုံဖော်ခဲ့သည်။
ထို့နောက် ဟိုမင်ကို လူတိုင်းချစ်ကြသည်မှာ ထိုမူလတာအိုနှလုံးသား ကြောင့်သာ ဖြစ်ကြောင်း၊ အကယ်၍ ထိုတာအိုနှလုံးသား သာ မရှိတော့လျှင် ဟိုမင်မှာလည်း သာမန်တပည့်တစ်ဦးသာ ဖြစ်သွားမည်ဖြစ်ပြီး သူ်အပေါ်ရှိ အမှောင်ရိပ်များလည်း ပျောက်ကွယ်သွားမည်ဖြစ်ကြောင်း တိုက်ရိုက်တစ်မျိုး၊ သွယ်ဝိုက်တစ်မျိုးနှင့် ပြောပြခဲ့သည်။
ထိုအခါ မြောင်ယန်၏ မြူဆွယ်ဖြားယောင်းမှုအောက်တွင် စိတ်မထိန်းနိုင်တော့သော လူငယ်တပည့်များမှာ ဟိုမင်ကို တကယ်ပင် လုပ်ကြံတော့သည်။
၎င်းတို့က အပြင်သို့ထွက်ခွာမည့် အခွင့်အရေးတစ်ခုကို အသုံးချကာ ဟိုမင်ကို ကျွမ်းချင်းနန်းတော်၏ အပြင်ဘက်တွင် ထာဝရ ထားရစ် ခဲ့သည်။
ထို့နောက် ဟိုမင်၏ မူလတာအိုနှလုံးသား ကို ထုတ်ယူကာ ကျွမ်းချင်းနန်းတော်သို့ ပြန်သယ်လာခဲ့ပြီး သူတို့ရင်ထဲရှိ ‘ပန်းဖြူလေး’ မြောင်ယန်ထံသို့ လက်ဆောင်ပေးရန် ပြင်ဆင်ခဲ့ကြသည်။
ဟိုမင် သေဆုံးမှုမှာ ကျွမ်းချင်းနန်းတော် တစ်ခုလုံးကို တုန်လှုပ်သွားစေခဲ့သည်။
ဤဝမ်းနည်းဖွယ် ဖြစ်ရပ်ဆိုးအတွင်း မြောင်ယန်မှာ သူ့ကိုယ်သူ အစအနမကျန်အောင် ခဝါချထားနိုင်ခဲ့ပြီး မည်သူမျှ ဖမ်းဆုပ်နိုင်မည့် သက်သေမကျန်ခဲ့သဖြင့် စိတ်လွတ်သွားသော တပည့်တစ်စု၏ ခဏတာ စိတ်လိုက်မာန်ပါ လုပ်ရပ်အဖြစ်သာ ထင်မှတ်ရသည်။
သို့သော် ကျွမ်းချင်းနန်းတော် အဆင့်မြင့် အကြီးအကဲ များမှာ လူအ များမဟုတ်ကြပေ။ မကြာခင်မှာပင် ဤကိစ္စ၏ နောက်ကွယ်မှ ကြိုးကိုင်သူမှာ အမြဲတမ်း ဒုတိယနေရာမှာသာ ရှိနေခဲ့သော မြောင်ယန်ဖြစ်ကြောင်း သူတို့ ရိပ်မိသွားကြသည်။
ဒါပေမဲ့ တပည့်ညီလာခံမှာ နီးကပ်နေပြီ ဖြစ်ရာ အကယ်၍ သူတို့က မြောင်ယန်ကို အပြစ်ပေးလိုက်မည်ဆိုလျှင် ဤအရေးကြီးသော ညီလာခံတွင် တခြားအင်အားစုများကို ရှုံးနိမ့်သွားမည်ဖြစ်ပြီး ထိုအခါ ကျွမ်းချင်းနန်းတော်၏ အကျိုးအမြတ်များစွာ ဆုံးရှုံးသွားလိမ့်မည်။
နောက်ဆုံးတွင် ဆွေးနွေးဆုံးဖြတ်ပြီးနောက် အကျိုးအမြတ်က ကိုယ်ကျင့်တရားကို အနိုင်ယူသွားခဲ့သည်။ သူတို့က တစ်ဖက်ပိတ် မျက်စိမှိတ်ကာ မြောင်ယန်ကို ခေတ္တမျှ လွှတ်ပေးထားရန် ရွေးချယ်ခဲ့ကြသည်။
ဘာပဲဖြစ်ဖြစ် သေဆုံးသွားသော ပါရမီရှင်မှာ မည်မျှပင် ထူးချွန်ပါစေ၊ အသုံးမဝင်တော့ပေ။
ဤအခြေအနေအောက်တွင် မြောင်ယန်က ဟိုမင်၏ တာအိုနှလုံးသားကို ‘မျက်ရည်များဖြင့်’ လက်ခံရယူခဲ့ပြီး ဟိုမင်၏ နေရာကို အစားထိုးယူခဲ့သည်။
မြောင်ယန်မှာ တကယ်ပင် ပါးနပ်လှသည်။ ဤကဲ့သို့သော နည်းလမ်းဖြင့် ရာထူးတက်လာခြင်းမှာ သိက္ခာမရှိသလို ရေရှည်မခံနိုင်ကြောင်း သူမ နားလည်သဖြင့် ကြိုတင် ပြင်ဆင်မှုများ ပြုလုပ်ခဲ့သည်။
အလွန်တိုတောင်းသော အချိန်အတွင်း ဟိုမင်၏ တာအိုနှလုံးသားကို အလုံးစုံ ပေါင်းစပ်နိုင်ခဲ့ပြီးနောက် တပည့်ညီလာခံတွင် နာမည်ကျော်ကြားလာခဲ့ကာ ကျွမ်းချင်းနန်းတော်၏ ဂုဏ်သတင်းကို မြှင့်တင်ပေးနိုင်ခဲ့သလို အကျိုးအမြတ်များစွာကိုလည်း ရယူပေးနိုင်ခဲ့သည်။
အောင်မြင်မှုများ ရရှိပြီးနောက် ညီလာခံပြီးဆုံးသွားချိန်တွင် ကျွမ်းချင်းနန်းတော်မှာလည်း သူမကို အပြစ်ပေးရန် မသင့်တော်တော့သဖြင့် သူမ၏ တည်ရှိမှုကို ဤအတိုင်းပင် အသိအမှတ်ပြုလိုက်ရတော့သည်။
ထို့ပြင် ဤညီလာခံအတွင်းမှာပင် မြောင်ယန်နှင့် ဟုန်းယွင်တို့မှာ ပထမဆုံးအကြိမ် ဆုံတွေ့ခဲ့ကြခြင်း ဖြစ်သည်။
“ကျွမ်းချင်းနန်းတော်က ဒီအမည်းစက် သမိုင်းကြောင်းကို အပြင် လူမသိအောင် ဖုံးကွယ်ထားခဲ့တာ”
“အကယ်၍ နောက်ပိုင်းမှာ ကျွမ်းချင်းနန်းတော် ပျက်စီးသွားပြီး အလုံးစုံ စစ်ဆေးတဲ့အခါမှ ဒီအချက်အလက်တွေကို ရှာမတွေ့ခဲ့ရင် ဟိုမင်က မတော်တဆမှုတစ်ခုကြောင့် သေဆုံးသွားခဲ့တယ်လို့ပဲ လူတိုင်းက ထင်နေကြမှာ”
“ဒါကြောင့် ဟုန်းယွင်က မြောင်ယန်နဲ့ တွေ့တဲ့အချိန်မှာ မြောင်ယန်က... ဒုတိယနေရာမှာ ရှိနေခဲ့ပေမဲ့ ကြိုးစားအားထုတ်မှုနဲ့ သေဆုံးသွားတဲ့ စီနီယာအမရဲ့ တာဝန်တွေကို ပခုံးထမ်းပြီး ဂိုဏ်းရဲ့ ဂုဏ်သိက္ခာကို အားမာန်ပါပါ ကာကွယ်ခဲ့တဲ့ ပုံရိပ်အဖြစ် အကွက်ချ ပုံဖော်ခြင်း ခံထားရပြီးသားပဲ”
အရှင်ဝူဟွေ့က ပြောလိုက်သည်။
ထန်ထျန်းမှာ နားထောင်ရင်း အတော်လေး စိတ်ဝင်စားနေသည်။
ဤမြောင်ယန်မှာ တကယ်ပင် လက်စွမ်းလက်စ ရှိလှသည်။
အရှင်ဝူဟွေ့က ကိစ္စများစွာကို စာကြောင်းတစ်ကြောင်းတည်းဖြင့်သာ ပြောပြသွားသော်လည်း မြူဆွယ်ခြင်းကျင့်စဉ်တစ်ခုတည်းနှင့် အလင်းရောင်ခြည်ပေါင်း သောင်းခြောက်ထောင် စုစည်းထားသည့် ဟိုမင်ကို သေအောင် လုပ်နိုင်ခဲ့ပြီး ထို့နောက် အပြစ် လွတ်အောင် ရှောင်တိမ်းကာ တစ်ဖက်လူ၏ နေရာကို ရယူနိုင်ခဲ့သည်။
ဤကြားထဲက အခက်အခဲများနှင့် ပရိယာယ်များမှာ စာကြောင်း တစ်ကြောင်းနှစ်ကြောင်းနှင့် ပြောပြ၍ ကုန်နိုင်မည် မဟုတ်ပေ။
“အဆင့်တက် လာတဲ့ ဖြစ်စဉ်က နည်းနည်း ယုတ်မာပေမဲ့ အတော်လေးတော့ ဇွဲရှိတယ်လို့ ပြောလို့ရတာပေါ့”
“ဟုန်းယွင်က သူမရဲ့ ဒီအချက်ကို သဘောကျတယ်ဆိုတာကလည်း အကြောင်းပြချက် ရှိတာပဲလေ”
ထန်ထျန်းက ပြောလိုက်သည်။
အရှင်ဝူဟွေ့က ခါးသီးစွာ ပြုံးလျက် “အကယ်၍ ဒီလောက်ပဲဆိုရင်တော့ တော်သေးတာပေါ့”
“ကျင့်ကြံခြင်းလောကက မူလကတည်းက ရက်စက်ပါတယ်၊ ဒီလိုမျိုး ကိစ္စတွေက ခဏခဏ ဖြစ်နေကျပဲလေ”
“ဒါပေမဲ့ မြောင်ယန်က အဲဒီလောက်တင် မကဘူး”
ထို့နောက် အရှင်ဝူဟွေ့က ဆက် ပြောပြပြန်သည်။
ဟိုမင်၏ နေရာကို အောင်မြင်စွာ ဆက်ခံပြီးနောက် မြောင်ယန်မှာ နောက်ဆုံးတွင် သူမ အိမ်မက်မက်ခဲ့သော ဘဝကို ပိုင်ဆိုင်ခွင့် ရရှိခဲ့သည်။
သူ့ ရာထူးနေရာကို မည်သူမျှ မခြိမ်းခြောက်နိုင်စေရန်အတွက် နောက်ပိုင်းရက်များတွင် မြောင်ယန်က နည်းလမ်းများစွာကို အသုံးပြုကာ သူမကို အန္တရာယ် ပေးနိုင်သည့် တပည့်မှန်သမျှကို နှိပ်ကွပ်ခဲ့သည်။
အချို့မှာ ရုတ်တရက် ပြဿနာကြီးများအတွင်း ပိတ်မိသွားကြပြီး အချို့မှာ အကြောင်းပြချက်မရှိဘဲ ဂိုဏ်းစည်းကမ်းများကို ချိုးဖောက်မိကြကာ အချို့မှာမူ ကျင့်ကြံနေစဉ်အတွင်း မတော်တဆ ဖြစ်ရပ်အချို့ကြောင့် ‘သွေးရူးသွေးတန်း’ ဖြစ်သွားကြသည်။
ဖြစ်ရပ်အားလုံးမှာ မြောင်ယန်နှင့် ပတ်သက်မှု မရှိသလို ထင်ရသည်။
သို့သော် အသေအချာ စုံစမ်းကြည့်လျှင် သူမ၏ အရိပ်အယောင်မှာ အမြဲတမ်း အတိုက်ဆိုင်ဆုံး နေရာများတွင် ပေါ်လာလေ့ရှိသည်။
သို့သော် တိုက်ရိုက်သက်သေ ရှာမတွေ့ခြင်း၊ ထို့ပြင် မြောင်ယန်မှာ အပြင်လောကတွင် အကြိမ်ကြိမ် အောင်မြင်မှုများ ရရှိထားပြီး လက်ရှိ ကျွမ်းချင်းနန်းတော် လူငယ်မျိုးဆက်တွင် အစွမ်းထက်ဆုံး ဖြစ်နေခြင်းတို့ကြောင့် ကျွမ်းချင်းနန်းတော် အဆင့်မြင့် အကြီးအကဲ များမှာ သူမအပေါ် နောက်တစ်ကြိမ် မျက်စိမှိတ် ထားခဲ့ကြပြန်သည်။
ပုံမှန်အတိုင်းဆိုလျှင် ခြိမ်းခြောက်မှုအားလုံးကို ဖယ်ရှားပြီးနောက် ကျွမ်းချင်းနန်းတော်၏ မြင့်မြတ်သမီးတော် ရာထူးအတွက် မြောင်ယန်မှာ တစ်ဦးတည်းသော ရွေးချယ်စရာ ဖြစ်လာခဲ့သည်။
သို့သော် မြင့်မြတ်သမီးတော် ရာထူးကို အတည်ပြုရမည့် အချိန်သို့ ရောက်သောအခါ ကျွမ်းချင်းနန်းတော်မှာ အချိန်ဆွဲနေခဲ့ပြီး မြောင်ယန်ကို အလွယ်တကူ စိတ်တိုင်းကျလုပ်ခွင့် မပေးခဲ့ပေ။
ရှုထောင့်ပေါင်းစုံမှ စုံစမ်းကြည့်ပြီးနောက် မြောင်ယန်မှာ အဆင့်မြင့် အကြီးအကဲ များ၏ အတွေးကို သဘောပေါက်သွားခဲ့သည်။