အခန်း (၁၀၃-၁၀၄)

စူပါ-ဖမ်း(SFS)

SFS 103

အခန်း ၁၀၃ ။ ဆုကြေးအသစ်- အိုမင်းရင့်ရော်မှုကို နှေးကွေးစေခြင်း

သစ်ပင်ပန်းမန် တစ်ပင်မှမရှိဘဲ ပြောင်တလင်းခါနေသော လှေကားထစ် လယ်ကွက်များကြားတွင် လမ်းလျှောက်ရင်း လင်းယန် အနည်းငယ် နှမြောတသ ဖြစ်မိသည်။

ဤနေရာက ချင်းရှန်းရွာ တစ်ရွာလုံးတွင် တစ်ခုတည်းသော ပြောင်တလင်းခါနေသည့် နေရာဟုပင် ဆို၍ရသည်။ သာမန် လယ်ကွက်များဆိုလျှင်တောင် ဘေးပတ်လည်တွင် စိမ်းလန်းသော အပင်များ ရှိနေတတ်ပြီး၊ လယ်ကွင်းထဲတွင်လည်း အချိန်အများစု၌ သီးနှံများ စိုက်ပျိုးထားလေ့ရှိသည်။ သို့သော် ဤလယ်ကွက်ကတော့ ကွဲပြားနေသည်။

တောင်ကုန်းတစ်ခုလုံး မက်မွန်ပင်များ စိုက်ပျိုးရန် ပြင်ဆင်ထားခြင်းဖြစ်သည်!

မက်မွန်ပင် ပျိုးပင်များကို သေချာပေါက် စနစ်ထဲမှ ထုတ်ယူထားခြင်းဖြစ်သည်။ သို့သော် အခြားသူများ မရိပ်မိစေရန်အတွက် သူ တကူးတက တောင်အပြင်ဘက်သို့ ထွက်ကာ ကွက်လပ်တစ်ခု ရှာပြီးမှ၊ ကုန်တင်ကားတစ်စီး ငှား၍ ရွာထဲသို့ ပြန်သယ်လာခဲ့ခြင်း ဖြစ်သည်။ ဤပျိုးပင်များ၏ အရည်အသွေးက အလွန် ကောင်းမွန်လှပြီး၊ နောက်နှစ် နွေဦးပေါက်လာသည်နှင့် တစ်ပြိုင်နက် ပန်းပွင့်ပြီး အသီးသီးနိုင်မည် ဖြစ်သည်။

ပျိုးပင်လေးများ တစ်ပင်ပြီးတစ်ပင် မြေကျင်းထဲသို့ စိုက်ပျိုးခံရသည်ကို ကြည့်ရင်း၊ ပြောင်တလင်းခါနေသော လှေကားထစ် လယ်ကွက်များက မျှော်လင့်ချက်များဖြင့် ပြန်လည်ပြည့်နှက်လာသလို ခံစားရသည်။ ဤခံစားချက်က တကယ်ကို ကောင်းမွန်လှသည်။

"မက်မွန်သီးတွေ အကုန်လုံး ရင့်မှည့်လာတဲ့ အချိန်ကျရင်၊ ဒီနေရာက ဘယ်လို ဂေဟစနစ်မျိုးများ ဖြစ်လာမလဲ မသိဘူး။"

ဤအကြောင်းများကို တွေးမိတိုင်း လင်းယန်၏ရင်ထဲတွင် မျှော်လင့်ချက်များစွာ ဖြစ်ပေါ်လာရသည်။ သို့သော် မက်မွန်ပင်များ၏ အကျိုးရလဒ်ကို မြင်တွေ့ရရန်မှာ သာမန် လယ်ယာသီးနှံများနှင့်ယှဉ်လျှင် အချိန်ပိုမို ကြာမြင့်မည်ဖြစ်သည်။ ကံကောင်းသည်က ဤမက်မွန်ပင်များကို စိုက်ပျိုးပြီးသွားပါက ဤမက်မွန်ခြံကြီးသည် နှစ်ပေါင်းတစ်ထောင်တိုင်တိုင် တည်ရှိနေနိုင်ပြီး နောင်လာနောက်သားများကိုပါ အကျိုးပြုနိုင်မည် ဖြစ်သည်။

သေချာသည်မှာ လင်းယန်ကိုယ်တိုင်တောင် ထိုအသက်အရွယ်အထိ နေရမည် မဟုတ်ချေ။

စနစ်က ဤမက်မွန်ပင်များသည် နှစ်တစ်ထောင်တိုင်တိုင် အသက်ရှင်နိုင်သည်ဟု အသိပေးထားသော်လည်း လင်းယန်ကတော့ သံသယ အနည်းငယ် ရှိနေဆဲပင်။

'သာမန် စိုက်ပျိုးတဲ့ မက်မွန်ပင်တွေက အလွန်ဆုံး အသက် ၄၀ ဝန်းကျင်လောက်ပဲ ရှင်သန်နိုင်ကြတာ။ မသေသွားဘူးဆိုရင်တောင် အိုမင်းရင့်ရော်တဲ့အဆင့်ကို ရောက်သွားပြီး စီးပွားရေးအရ အသုံးမဝင်တော့လို့ အကုန်ခုတ်လှဲခံရတာချည်းပဲ။'

'ဒါက သေချာပေါက် ဓာတ်မြေသြဇာနဲ့ ပိုးသတ်ဆေးတွေ သုံးလွန်းလို့ ဖြစ်လာတဲ့ ရလဒ်ပဲ။ မြောက်ပိုင်းဒေသတွေမှာဆိုရင် သက်တမ်းက ပိုတောင် တိုတောင်းသေးတယ်။'

'တောရိုင်း မက်မွန်ပင်တွေဆိုရင်တော့ နှစ် ၃၀၀ - ၄၀၀ ဝန်းကျင်လောက် ရှင်သန်နိုင်ကြတယ်။'

'ဒီမက်မွန်ပင်တွေကျတော့... ငါက ဓာတ်မြေသြဇာနဲ့ ပိုးသတ်ဆေးလည်း မသုံးဘူးဆိုတော့... တကယ်ပဲ နှစ်တစ်ထောင်လောက် ရှင်သန်နိုင်မှာလား?'

လင်းယန် အလွန်သံသယဖြစ်နေမိသည်။

အကယ်၍ တကယ်သာ ဤသို့ဖြစ်ခဲ့ပြီး၊ မက်မွန်သီးများကလည်း အရသာရှိမည်ဆိုပါက... လင်းယန်၏ ပဏာမစိတ်ကူးအရ ဤအရာကို အသုံးပြု၍ မက်မွန်ပင် မျိုးစိတ်သစ်တစ်မျိုးကို သေချာပေါက် ဖန်တီးနိုင်မည်ဖြစ်သည်။ ဤသို့ဆိုလျှင် မက်မွန်သီး စိုက်ပျိုးသော တောင်သူများအနေဖြင့် ဆယ်စုနှစ် အနည်းငယ် ကြာတိုင်း မက်မွန်ပင် အဟောင်းများကို ခုတ်လှဲပြီး အသစ်ပြန်လည် အစားထိုး စိုက်ပျိုးရသည့် ဒုက္ခမှ ကင်းဝေးသွားမည်ဖြစ်ပြီး၊ မြေလွတ်သွားမည့် အချိန်ကာလများကိုပါ ရှောင်ရှားနိုင်ပေမည်။

သို့သော် ဤအတွေးအမြင်များ မှန်ကန်မှု ရှိမရှိဆိုသည်ကို အချိန်နှင့် သက်သေပြရန် လိုအပ်ပါသေးသည်။

စိုက်ပျိုးရေးလုပ်ငန်းဆိုသည်မှာ ဤသို့ပင် ဖြစ်သည်။ အထီးကျန်မှုကို ခံနိုင်ရည်ရှိပြီး သဘာဝတရား၏ လမ်းကြောင်းအတိုင်း လိုက်ပါစီးမျောတတ်ရန် လိုအပ်သည်။ ဤသို့သော အတွေးအခေါ်မျိုးမှာ လက်ရှိခေတ်၏ အချိန်နှင့် အပြေးအလွှား ယှဉ်ပြိုင်နေရသော မြင့်မားသည့် ဖိအားများအောက်ရှိ အလုပ်များနှင့်တော့ လုံးဝ ဆန့်ကျင်ဘက်ပင်။ သို့သော် မြို့ပြများရှိ ၉၉၆ (မနက် ၉၊ ည ၉၊ တစ်ပတ် ၆ ရက် အလုပ်လုပ်ခြင်း) စနစ်များနှင့်ယှဉ်လျှင်၊ သဘာဝတရားကို လိုက်လျောညီထွေဖြစ်အောင် နေထိုင်ရသည့် ဤလုပ်ရပ်က အများကြီး ပို၍ သက်သောင့်သက်သာ ရှိလှသည်။

ထို့အပြင်... သက်သောင့်သက်သာ ရှိရုံတင်မကဘဲ၊ ပိုက်ဆံလည်း ရသေးသည် မဟုတ်လား။

နောက်ဆုံး မက်မွန်ပင် ပျိုးပင်လေးကို လင်းယန် ကိုယ်တိုင်ကိုယ်ကျ စိုက်ပျိုးပြီးစီးသွားချိန်တွင်၊ အချိန်အတော်ကြာ ငြိမ်သက်နေခဲ့သော စနစ်၏ တာဝန်များပြဘုတ်သည်လည်း နောက်ဆုံးတွင် လင်းလက်လာခဲ့သည်။

[အသိပေးချက်! Host သည် တာဝန်ကို အောင်မြင်စွာ ပြီးမြောက်သွားသည့်အတွက် ဂုဏ်ယူပါသည်။]

[Host သည် ငွေသားဆုကြေး 1,000,000 ကို ရရှိပါသည်။]

[Host သည် သက်တမ်း (Lifespan) +10 ကို ရရှိပါသည်။]

[Host သည် စိုက်ပျိုးရေးသုံး စက်ယန္တရားပုံစံထုတ် ဒီဇိုင်းကို ရရှိပါသည်။]

"ဟား... ဆုကြေးတွေ မိုက်လှချည်လား!"

စနစ်က ပေးလိုက်သော အရာများက လင်းယန်ကို မျက်စိပွင့်သွားစေသည်။

ငွေသားဆုကြေး အမေရိကန်ဒေါ်လာ တစ်သန်း! လက်ရှိ ငွေလဲနှုန်းအရဆိုလျှင် တရုတ်ယွမ် ၆ သန်းခွဲ ဝန်းကျင်ခန့်ရှိသည်။ ကိစ္စသေးသေးလေးပါပဲ။ ရေလေးနည်းနည်း ပက်ဖျန်းလိုက်သလိုပါပဲ။ လှေကားထစ် လယ်ကွက်များ တည်ဆောက်ရာတွင် ကုန်ကျခဲ့သည့် စရိတ်များကို ပြန်ကာမိသွားသည်ဟု ဆိုရမည်။ လင်းယန်က ဤငွေကြေးလေးများကို သိပ်ဂရုမစိုက်လှပေ။

သို့သော် သက်တမ်းတိုးသည့် ဆုကြေး ရရှိသွားခြင်းကတော့ သူ့ကို အလွန်အမင်း အံ့အားသင့်သွားစေခဲ့သည်။ သက်တမ်းဆိုသည့်အရာကို ဘယ်လိုတိုင်းတာရတာလဲ? မည်သို့ပင်ဆိုစေ သူက အလွန် ငယ်ရွယ်သေးသည် မဟုတ်လား။ ထို့အပြင် လူ့ဘဝတွင် ကြိုတင် မခန့်မှန်းနိုင်သော မတော်တဆမှုများ အများအပြား ရှိတတ်သည်။ မည်သည့် အချိန်တွင် ရောဂါဘယများ ဝင်ရောက်လာမည်လဲ ဆိုသည်ကို ဘယ်သူက ကြိုသိနိုင်မှာလဲ?

လက်ရှိ လင်းယန်၏ လူရိုင်းတစ်ယောက်လို သန်မာကြံ့ခိုင်လှသော ခန္ဓာကိုယ်ဖြင့်ဆိုလျှင် ဖျားနာရန် ဆိုသည်မှာ အလွန်ရှားပါးသော ကိစ္စတစ်ခု ဖြစ်နေသည်မှာ မှန်သော်လည်း...

သူ ဝိုးတဝါး သဘောပေါက်လိုက်သည်မှာ၊ အကယ်၍ သူသာ အသက် ၈၀ အထိ နေရမည်ဆိုလျှင်... ဤတိုးလာသော သက်တမ်းက သူ့ကို အသက် ၉၀ အထိ နေရအောင် လုပ်ပေးလိုက်ခြင်းပင်!

ဤသည်မှာ အရေးအကြီးဆုံးအချက် မဟုတ်သေးပေ!

အရေးအကြီးဆုံးမှာ... နောင်အနာဂတ်တွင် သက်တမ်းတိုးသည့် ဆုကြေးများ ထပ်မံ ရရှိလာဦးမည်လား ဆိုသည်ကို ဘယ်သူသိမှာလဲ? အကယ်၍ ဤကဲ့သို့သော ဆုကြေး ၁၀ ခုလောက်သာ ထပ်ရလိုက်လျှင်၊ သူ အသက် ၁၈၀ အထိ နေနိုင်သွားပြီ! ကမ္ဘာပေါ်တွင် အသက်အရှည်ဆုံး လူသားတစ်ယောက် ဖြစ်လာတော့မည်။

သေချာသည်မှာ... ဤမျှလောက် ရှည်လျားသော သက်တမ်းကိုရရှိလျှင်တောင်မှ၊ လင်းယန်အတွက်တော့ လတ်တလော အသုံးဝင်ဦးမည် မဟုတ်ပေ။ မည်သို့ပင်ဆိုစေ သူက ငယ်ရွယ်သေးသည် မဟုတ်လား။

သို့သော် ဤသက်တမ်း တိုးလာမှုနှင့်အတူ လင်းယန်သည် အထဲတွင် ပါဝင်နေသော လက်တွေ့ကျသည့် အကျိုးကျေးဇူးတစ်ခုကို သတိထားမိလိုက်သည်။

"အိုမင်းရင့်ရော်မှုကို နှေးကွေးစေတာပဲ!"

"စနစ်က ပေါင်းထည့်ပေးလိုက်တဲ့ ဒီဆယ်နှစ် သက်တမ်းအတွင်းမှာ၊ ခန္ဓာကိုယ်က နည်းနည်းလေးမှ အိုမင်းရင့်ရော်သွားမှာ မဟုတ်ဘူး။"

"ဆိုလိုတာက... ငါ အသက် ၃၀ ပြည့်သွားရင်တောင်၊ ဒီခန္ဓာကိုယ်က အသက် ၂၀ အရွယ် အတိုင်းပဲ ဆက်ရှိနေဦးမှာ! လုံးဝ ကျဆင်းသွားမှာ မဟုတ်ဘူး!"

"ဒီလို အိုမင်းရင့်ရော်မှုကို နှေးကွေးစေတာကတော့... တကယ်ကို နတ်ဘုရားတွေရဲ့ အစွမ်းလိုပဲ။"

"အကယ်၍သာ မိန်းကလေးတွေသာ ဒီစွမ်းရည်ကို ရသွားမယ်ဆိုရင်... သေချာပေါက် ရူးသွပ်သွားကြမှာပဲ!" ဟု လင်းယန် အလွန်တရာ အံ့ဩမိန်းမောစွာဖြင့် တွေးလိုက်မိသည်။

သူကိုယ်တိုင်ပင်လျှင် ဤဆုကြေးမှာ အနည်းငယ် ကြောက်စရာ ကောင်းလောက်အောင် အစွမ်းထက်နေသည်ဟု ခံစားမိသည်။ ထို့အပြင် နောင်အနာဂတ်တွင် သက်တမ်းတိုးသည့် ဆုကြေးများ ထပ်မံရရှိလာဦးမည် ဆိုပါက... သူက အမြဲတမ်း အသက် ၂၀ အရွယ် ခန္ဓာကိုယ်ဖြင့်သာ ဆက်ရှိနေမည်ဆိုလျှင်... တကယ်ကို အနည်းငယ် ကြောက်စရာ ကောင်းနေသည်။

'ဘာပဲဖြစ်ဖြစ် ငါက ဒီတောင်ကြားရွာလေးမှာပဲ နေနေတာဆိုတော့ ကိစ္စမရှိပါဘူးလေ။'

အိုမင်းရင့်ရော်မှု နှေးကွေးခြင်း ကိစ္စ လူသိရှင်ကြားဖြစ်သွားမည်ကိုတော့ လင်းယန် လုံးဝ ဂရုမစိုက်ပေ။

အခုလက်ရှိ အင်တာနက်ပေါ်တွင် သူ အနည်းငယ် နာမည်ကြီးနေသည်မှာ မှန်သော်လည်း၊ အချိန်ကာလက အရာအားလုံးကို တဖြည်းဖြည်း မေ့ပျောက်သွားစေမည်သာဖြစ်သည်။ အဲ့ဒီအချိန်ကျလျှင် သူ လုံးဝ အေးအေးချမ်းချမ်းဖြင့် ရသေ့တစ်ပါးလို အောင်းနေလို့ ရပြီ။ ရင်းနှီးသော သူငယ်ချင်း သုံးလေးယောက်ခန့်ရှိပြီး၊ ဤအေးချမ်းသာယာလှသော တောရွာလေးတွင် နေထိုင်ရသည်မှာ လုံလောက်လှပြီ။

နောက်ဆုံး ဆုကြေးဖြစ်သော စိုက်ပျိုးရေးသုံး စက်ယန္တရား ဒီဇိုင်းပုံစံနှင့် ပတ်သက်၍မူ သူ သိပ်ပြီး အာရုံမစိုက်မိလှပေ။ သူက စက်မှုအင်ဂျင်နီယာ ကျောင်းဆင်းတစ်ယောက်မှ မဟုတ်တာ။ ဒီဇိုင်းပုံစံတွေ ပေးလည်း သူ နားလည်မည် မဟုတ်ပေ။

သို့သော် ဒီဇိုင်းပုံစံကို သူ့လက်ထဲသို့ ရောက်ရှိလာချိန်တွင်၊ ထိုပုံစံပေါ်တွင် ရေးဆွဲထားသော မျဉ်းကြောင်းများ အားလုံးက သူ၏ ဦးနှောက်ထဲသို့ ရုတ်တရက် စီးဝင်လာခဲ့သည်။ အထဲတွင် ပါဝင်သော အကြောင်းအရာများကို အနည်းငယ်မျှပင် နားလည်အောင် ကြိုးစားနေစရာ မလိုဘဲ အလိုအလျောက် အကုန်လုံး သဘောပေါက် နားလည်သွားခဲ့သည်!

စနစ်၏ ဤစွမ်းရည်က သူ့ကို တကယ် နတ်ဘုရားများ၏ အစွမ်းလို ခံစားရစေသည်!

အံ့ဩစရာ အကောင်းဆုံးကတော့... ထိုစိုက်ပျိုးရေးသုံး စက်ယန္တရားပင် ဖြစ်သည်!

"သောက်ကျိုးနည်း... ဒါက ဘယ်နေရာမှာ လယ်ယာသုံး စက်ယန္တရားဖြစ်နေလို့လဲ? ဒါက လုံးဝ ဇီဝတုပစက်ရုပ်ကြီးပဲ!" လင်းယန် လုံးဝ အံ့အားသင့်သွားသည်။

သူသည် စိုက်ပျိုးရေးသုံး စက်ယန္တရား အမျိုးမျိုးကို မြင်ဖူးခဲ့ပြီးဖြစ်သည်။ အများစုမှာ ဘီးများဖြင့် သွားလာရသော စက်ပစ္စည်းများသာဖြစ်ပြီး၊ အလွန်ဆုံးမှ အီလက်ထရောနစ် နည်းပညာ အနည်းငယ် ထည့်သွင်းထားကာ Smart လုပ်ဆောင်ချက် အနည်းငယ် ပါဝင်ရုံသာဖြစ်သည်။ သို့သော်လည်း လူကိုယ်တိုင် ထိန်းချုပ်မောင်းနှင်ရန် လိုအပ်နေသေးသည်။

ထိုအထဲတွင် အဆင့်အမြင့်ဆုံးဟု ဆိုနိုင်သည်မှာ မျိုးစေ့ချ ဒရုန်းများ ဖြစ်နိုင်ပေသည်။ သို့သော် သယ်ဆောင်သည့် အရာ ပြောင်းလဲသွားခြင်းမျှသာ ဖြစ်ပြီး၊ တကယ်တမ်း မျိုးစေ့ချသည့် စက်၏ အခြေခံ သဘောတရားမှာ အတူတူပင်ဖြစ်သည်။ ဤသို့သော စက်ယန္တရားများသည် ပျိုးပင်များကို ပြုစုပျိုးထောင်ရာတွင် သတ်မှတ်ထားသော စံချိန်စံညွှန်းများ လိုအပ်သည်။ အကယ်၍ ပျိုးပင်များက သတ်မှတ်ထားသော စံနှုန်းနှင့် မကိုက်ညီပါက၊ စက်ယန္တရားများ၏ အမှားအယွင်း ဖြစ်နိုင်ချေမှာ အလွန် မြင့်မားသွားမည် ဖြစ်သည်။

သို့သော် ဤ ဇီဝတုပ စိုက်ပျိုးရေးစက်ရုပ်ကတော့ လုံးဝ ကွဲပြားခြားနားနေသည်။

"ဒီဇိုင်းပုံစံအရဆိုရင်၊ ဒီစက်ရုပ်ထဲကို ဘယ်လို မော်ဂျူလာပရိုဂရမ်မျိုးကိုမဆို ထည့်သွင်းလို့ ရတယ်။ ဒါက လုံးဝ အသစ်စက်စက် စိုက်ပျိုးရေး ပလက်ဖောင်းတစ်ခုပဲ။ ပြီးတော့ လူသားတွေ မျိုးစေ့ချတဲ့ ပုံစံအတိုင်း လိုက်လံ တုပနိုင်တယ်။ အဆစ်အမြစ်လှုပ်ရှားမှု အမြန်နှုန်းကလည်း အရမ်းမြန်ပြီး၊ အလုပ်လုပ်နိုင်စွမ်းက အလွန် မြင့်မားတယ်။"

"ဒီလို အယူအဆတွေက အခုခေတ်မှာလည်း ရှိနေတာပါပဲ။ အဆင့်မြင့် ကားစက်ရုံ တော်တော်များများမှာဆိုရင်၊ အကုန်လုံး စက်ရုပ်တွေကချည်းပဲ ထုတ်လုပ်နေကြတာ။ လူတွေက ကြီးကြပ်တဲ့ နေရာမှာပဲ ပါဝင်တော့တာလေ။"

"ဒါပေမဲ့ အဲ့ဒီလို စက်ရုပ်ပစ္စည်းတွေက တစ်လုံးကိုတင် ယွမ် သိန်းချီ၊ သန်းချီ ပေးရတာ။ ဒီစိုက်ပျိုးရေးသုံး စက်ရုပ်က ဒီဇိုင်းပိုင်းမှာ ပိုပြီး အဆင့်မြင့်နေတော့၊ ကုန်ကျစရိတ်ကလည်း အရမ်း ကြီးမားလိမ့်မယ်။"

"ဒါပေမဲ့ ယွမ် သန်းဆယ်ချီ ကုန်မယ်ဆိုရင်တောင် ငါ့အတွက်တော့ ပြဿနာ မဟုတ်ပါဘူး။"

"အင်း... ဒီ စိုက်ပျိုးရေး စက်ရုပ်က လျှပ်စစ်စွမ်းအင်ကို အသုံးပြုထားတာပဲ။ ဘက်ထရီ စွမ်းအင်က အသုံးပြုဖို့ လုံလောက်တယ်... ၁၀ မိနစ်?"

"သောက်ကျိုးနည်း! ငါ့ကို နောက်နေတာလား?"

"ဒီစိုက်ပျိုးရေး စက်ရုပ်က တကယ်ကို ရိုးရှင်းလွယ်ကူပြီး အဆင့်လည်း မြင့်ပါတယ်။ ဒါပေမဲ့ ၁၀ မိနစ်ဆိုတာက ဘာသဘောလဲ?"

"ဘာအသုံးကျမှာလဲကွ!" လင်းယန် ဒေါသထွက်လွန်း၍ ရယ်ပင် ရယ်ချင်သွားသည်။

သို့သော် မကြာမီမှာပင် အလွန်အရေးကြီးသော ပြဿနာတစ်ခုကို သူ သတိထားမိသွားသည်။

ဤ ခေတ်ရှေ့ပြေးလွန်းလှသော စိုက်ပျိုးရေးစက်ရုပ်၏ အဓိက စွမ်းအင်အရင်းအမြစ်က ဘက်ထရီ လုံးဝ မဟုတ်ပေ!

ထို ၁၀ မိနစ်သာခံသော ဘက်ထရီဆိုသည်မှာ... အရေးပေါ် အရန်စွမ်းအင် သက်သက်သာဖြစ်သည်!

***

စူပါ-ဖမ်း(SFS)

SFS 104

အခန်း ၁၀၄ ။ ကြိုးမဲ့ လျှပ်စစ်အားသွင်း နည်းပညာ

လှေကားထစ် လယ်ကွက်များရှိရာ တောင်ထိပ်တွင် လင်းယန် မတ်တပ်ရပ်နေသည်။ အပြင်ပန်းကြည့်လျှင် အဝေးသို့ ငေးမောကြည့်နေပြီး၊ အပြည့်အဝ ပြုပြင်မွမ်းမံထားသော ဤ 'မြေပုံ' အသစ်ကို ခံစားကြည့်ရှုနေသည်ဟု ထင်ရသည်။ သို့သော် တကယ်တမ်းတွင်မူ သူသည် စနစ်၏ နေရာလွတ်အတွင်းသို့ အပြည့်အဝ နစ်မြုပ်နေပြီး၊ ခေတ်ရှေ့ပြေးလွန်းလှသော ဒီဇိုင်းပုံစံကို လေ့လာနေခြင်းဖြစ်သည်။

ဒီဇိုင်းပုံစံပေါ်ရှိ အသေးစိတ် အချက်အလက်တိုင်းက အလွန်ပြီးပြည့်စုံလှသည်။

ပါဝင်သော အစိတ်အပိုင်း အရေအတွက်မှာ ကားတစ်စီး၏ တည်ဆောက်ပုံထက်ပင် အများကြီး သာလွန်နေပြီး၊ အပြည့်အဝ အီလက်ထရောနစ် စနစ်များဖြင့် ဖွဲ့စည်းထားသည်။

စိုက်ပျိုးရေးသုံး စက်ရုပ်၏ ကိုယ်ထည်တစ်ခုလုံးကပင် အနာဂတ်ဆန်သော အငွေ့အသက်များဖြင့် ပြည့်နှက်နေသည်။ အပြင်ဘက် အခွံကို အထူး အလွိုင်းသတ္တုစပ်ဖြင့် ပြုလုပ်ထားပြီး၊ ထူးခြားသော သတ္တုစပ်ဖော်စပ်နည်းပါဝင်သည်။

အရာအားလုံးက အလွန် အဆင့်မြင့်လွန်းလှသဖြင့် လင်းယန်ပင် ဆွံ့အသွားရသည်။

'အစကတော့ ရိုးရိုး 'လယ်စိုက်စနစ်' လေးပဲလို့ ထင်ခဲ့တာ။'

'ဒါပေမဲ့ 'စူပါ' ဆိုတဲ့ စကားလုံး နှစ်လုံးကို ငါ တကယ်ပဲ လျစ်လျူရှုထားမိတာပဲ! ဒါက အံ့ဖွယ်စိုက်ပျိုးရေးစနစ်လေ။ လယ်စိုက်တာနဲ့ နည်းနည်းလေး ပတ်သက်နေရင်တောင် စနစ်ရဲ့ လုပ်ပိုင်ခွင့် နယ်ပယ်ထဲမှာ အကျုံးဝင်နေတာပဲ။ ဒီစိုက်ပျိုးရေးသုံး စက်ရုပ်ဆိုတာလည်း အဲ့ဒီလိုမျိုးပဲ ဖြစ်ရမယ်။'

'ကုန်ကျစရိတ်က အရမ်းကြီးမားပြီး၊ တည်ဆောက်ဖို့ အရမ်းခက်ခဲတာကလွဲရင်... ကျန်တာ လုံးဝ အပြစ်ပြောစရာ မရှိဘူး။ ဒါက ပြီးပြည့်စုံတဲ့ ပလက်ဖောင်းတစ်ခုပဲ။ ဒီဇိုင်းတချို့ကို နည်းနည်း ပြင်လိုက်ရုံနဲ့ စိုက်ပျိုးရေး အတွက်တင် မကဘူး တခြား နေရာတွေမှာပါ သုံးလို့ ရသွားပြီ။ သီးသန့် မော်ဂျူလာပရိုဂရမ်တွေ ထည့်သွင်းလိုက်ရုံနဲ့ အသုံးဝင်မှုတွေ ပြောင်းလဲသွားနိုင်တယ်။'

'ဥပမာ... အိမ်အကူအနေနဲ့ အိမ်သန့်ရှင်းရေး လုပ်တာ၊ ဟင်းချက်တာ စတဲ့ ဝန်ဆောင်မှုတွေ လုပ်ခိုင်းလို့ ရတယ်။ စစ်ရေးတိုက်ခိုက်မှု စနစ်တွေ ထည့်သွင်းလိုက်ရင်... သေနတ်တွေ၊ ဒုံးပျံတွေ တပ်ဆင်နိုင်ပြီး ကားတောင် မောင်းလို့ ရသေးတယ်။ အသေခံ ဗုံးခွဲတိုက်ခိုက်မှုတွေတောင် လုပ်ခိုင်းလို့ ရတယ်။'

'သေချာတာကတော့... ဒီအရာကို တည်ဆောက်ရမယ့် ကုန်ကျစရိတ်က၊ ဒရုန်းတစ်စီး တည်ဆောက်တာထက် အများကြီး ပိုပြီး ဈေးကြီးလိမ့်မယ်။' လင်းယန် ခေါင်းယမ်းလိုက်သည်။

ဤအရာက လုံးဝကို သူဌေးများ၏ ကစားစရာ အရုပ်တစ်ခုသာ ဖြစ်သည်။ ခေတ်သစ်နည်းပညာ အဆင့်အတန်းဖြင့်ဆိုလျှင် ပိုက်ဆံသာ တကယ်ပုံအောပြီး လုပ်မည်ဆိုပါက ဤအဆင့်မျိုးကို သေချာပေါက် တည်ဆောက်နိုင်မည် ဖြစ်သည်။

သို့သော်...

ဒီလောက် တန်ဖိုးကြီးတဲ့ အရာကို ဘယ်သူကများ လယ်စိုက်ဖို့ သုံးချင်မှာလဲ?

လုံးဝကို သံသရာရှည်မယ့် အလုပ်ပဲလေ။

ထို့အပြင် စွမ်းအင် သက်တမ်းက အကြီးမားဆုံး ပြဿနာဖြစ်နေသည်။

ဂီယာအပိုင်းများက မူလကတည်းက နေရာအများကြီး ယူစရာမလိုပေ။ ယခု စက်ရုပ်များ၏ အကြီးမားဆုံး ပြဿနာမှာ ဘက်ထရီက နေရာအရမ်းယူလွန်းနေခြင်းဖြစ်သည်။

'ဒါပေမဲ့... ဒီစက်ရုပ်ရဲ့ ဘက်ထရီက အရေးပေါ် အရန်သုံးဖို့ သက်သက်ပဲ။ တကယ့် စွမ်းအင် အရင်းအမြစ်က... အဆင့်မြင့် စမတ်ဖုန်းတွေမှာ သုံးတဲ့ ကြိုးမဲ့ အားသွင်းစနစ်မျိုး ဖြစ်နေတယ်!?'

လင်းယန်သည် စက်ရုပ်ကိုယ်ထည်ပေါ်တွင် လျှပ်စစ်လှိုင်းများ ဖမ်းယူရန်အတွက် နေရာ (၁၂) နေရာ တိတိ ပါရှိနေသည်ကို တွေ့လိုက်ရသည်။ သို့သော် အားလုံးပေါင်းလိုက်လျှင်ပင် နေရာယူသည့် ပမာဏက အလွန် သေးငယ်လှသည်။

'ငါ ဝယ်ထားတဲ့ ဖုန်းမှာလည်း ကြိုးမဲ့အားသွင်းစနစ်ပါတာပဲ။ ဒါပေမဲ့ အားသွင်းခုံပေါ် တင်ထားမှ ရတာလေ။ ဒီကြိုးမဲ့ အားသွင်းစနစ်ကကျတော့... အဝေးကနေ လွှင့်ထုတ်လိုက်တဲ့ လျှပ်စစ်လှိုင်းတွေကို ဖမ်းယူတာလား? ဒီမှာ ရေးထားတာက... မိုင်တစ်ရာပတ်လည်ကနေ အဝေးထိန်း လျှပ်စစ်စွမ်းအင် ပို့လွှတ်တာကို ဖမ်းယူနိုင်တယ်တဲ့လား?'

လင်းယန် ဤအချက်အလက်များကို ကြည့်ပြီး အိပ်မက်မက်နေသလိုပင် ခံစားရသည်။

'လျှပ်စစ်စွမ်းအင် ပို့လွှတ်တဲ့ ပုံစံက ဖုန်းတာဝါတိုင်တွေ ဆောက်သလိုမျိုး၊ လျှပ်စစ်ပို့လွှတ်ရေး တာဝါတိုင်တွေ ဆောက်ရမယ်။ တာဝါတိုင်တစ်ခုရဲ့ ကြိုးမဲ့ လျှပ်စစ် ပို့လွှတ်နိုင်တဲ့ အကွာအဝေးက မိုင်တစ်ရာ ဝန်းကျင် ရှိပြီး၊ မိုက်ခရိုဝေ့ဖ်လှိုင်းတွေကနေတစ်ဆင့် ပို့လွှတ်ပေးတာတဲ့။'

'ဒီစက်ရုပ်ကတော့ အဝေးထိန်း လျှပ်စစ်စွမ်းအင်ကို ဖမ်းယူတဲ့ သက်သက်ပဲ။ လျှပ်စစ်တာဝါတိုင်ကနေ လျှပ်စစ်လှိုင်းတွေ ဆက်တိုက် လွှင့်နေသရွေ့... လေးလံတဲ့ ဘက်ထရီကြီးတွေ သယ်စရာမလိုဘဲ အချိန်အကန့်အသတ်မရှိ အလုပ်လုပ်နိုင်မယ်!?'

လင်းယန် ဤစက်ရုပ်၏ တည်ဆောက်ပုံ ဒီဇိုင်းကို ကြည့်ပြီး အလွန်အမင်း အံ့ဩမိန်းမောသွားရသည်။

သို့သော်...

'သောက်ကျိုးနည်း... ဒါက တစ်ဝက်တစ်ပျက်ကြီးပဲလေ!'

'လျှပ်စစ်တာဝါတိုင်မရှိရင်၊ ငါ ဒီစက်ရုပ်ကို တကယ် တည်ဆောက်နိုင်ခဲ့ရင်တောင်... အလှပြရုံ သက်သက်ပဲ ဖြစ်နေမှာပေါ့။'

လင်းယန် ခေါင်းယမ်းလိုက်သည်။ တစ်ချိန်တည်းမှာပင် သူ့ဖုန်းကိုထုတ်၍ အကြမ်းဖျင်း ရှာဖွေကြည့်လိုက်သည်။

ရှာကြည့်လိုက်တော့မှပဲ... ခေတ်သစ်နည်းပညာများတွင်လည်း ဤကဲ့သို့သောအရာမျိုး တကယ် ရှိနေကြောင်း သိလိုက်ရသည်။ ဤ ကြိုးမဲ့ (လေထဲမှတစ်ဆင့်) အားသွင်းသည့် နည်းလမ်းကို လူသုံးများသော ဖုန်းအမှတ်တံဆိပ်တစ်ခုကပင် လုပ်ဆောင်နိုင်နေပြီဖြစ်သည်။ အခန်းထဲတွင် ကြိုးမဲ့ လျှပ်စစ်ပို့လွှတ်သည့် စက်ပစ္စည်းကို တပ်ဆင်ထားလိုက်ရုံဖြင့်၊ ဖုန်းက အချိန်မရွေး အားဝင်နေမည် ဖြစ်သည်!

စနစ်က ပေးသောအရာကတော့...

အကွာအဝေး ပိုမို ကျယ်ပြန့်ပြီး၊ ကုန်ကျစရိတ်လည်း သေချာပေါက် ပိုမို ကြီးမားမည် ဖြစ်သည်။ ၎င်း၏ အလုပ်လုပ်ပုံ သဘောတရားမှာ တကယ်တော့ သိပ်မရှုပ်ထွေးလှပေ။ လျှပ်စစ်လှိုင်းများ၏ တုန်ခါမှု ကြိမ်နှုန်း မတူညီမှုကို အသုံးပြု၍ ဖမ်းယူခြင်းသာဖြစ်သည်။

'စနစ်ရဲ့ ကြိုးမဲ့ အားသွင်းစနစ်က ဒီဇိုင်းပိုင်း ပိုမို ဆင်ခြင်တုံတရားကျပြီး၊ စွမ်းအင် ဆုံးရှုံးမှုလည်း ပိုနည်းတယ်။'

'ပြီးတော့ ဒီလို အားသွင်းတဲ့ နည်းလမ်းကို လွန်ခဲ့တဲ့ နှစ်တစ်ရာလောက်ကတည်းက သိပ္ပံပညာရှင် တီစလာက သုတေသန လုပ်ခဲ့ပြီး အောင်မြင်ခဲ့ဖူးတယ်။'

'လေထဲကနေ လျှပ်စစ်ပို့လွှတ်နိုင်တဲ့ အကွာအဝေးက ပိုဝေးပေမဲ့... စွမ်းအင်ဆုံးရှုံးမှုက အရမ်းများပြီး၊ အဲ့ဒီခေတ်က ကုန်ကျစရိတ်ကလည်း မိုးပျံမတတ် ကြီးမားလွန်းတယ်။'

လင်းယန် အံ့ဩလွန်း၍ လျှာသပ်လိုက်မိသည်။

သူသည် နည်းပညာနှင့် ပတ်သက်၍ အသိအမြင်သစ်တစ်ခု ထပ်မံရရှိသွားခဲ့သည်။ သေချာသည်မှာ... နည်းပညာဆိုသည်မှာ အဆက်မပြတ် တိုးတက်ပြောင်းလဲနေခြင်းဖြစ်သည်။ သို့သော် ခေတ်ကြီးကို ပြောင်းလဲစေနိုင်သော နည်းပညာအချို့မှာ... သတ်မှတ်ထားသော ကာလတစ်ခုတွင် လက်တွေ့ အသုံးချနိုင်ရန် လုံးဝ မဖြစ်နိုင်သေးချေ။ အဓိကအကြောင်းရင်းမှာ အခြေခံသိပ္ပံပညာရပ်များ စုဆောင်းရရှိမှု မလုံလောက်သေးသောကြောင့်ပင်။

တကယ့် အဆင့်မြင့် နည်းပညာ ထုတ်ကုန်များဆိုသည်မှာ ရှုပ်ထွေးသော ဒီဇိုင်းများ ပါဝင်သည်။ နယ်ပယ် အသီးသီးမှ နည်းပညာများ အားလုံး အတိုင်းအတာတစ်ခုအထိ စုဆောင်းရရှိပြီးမှသာ၊ တုံးလေးတွေ ဆင့်စီသလိုမျိုး တည်ဆောက်နိုင်မည် ဖြစ်သည်။ အကယ်၍ ကြားထဲမှ အစိတ်အပိုင်း တစ်ခုခု လိုအပ်နေပါက လက်တွေ့အသုံးပြုရန် မဖြစ်နိုင်တော့ပေ။

ဥပမာ - အမေရိကန်က လွန်ခဲ့သည့် အချိန်တိုလေးအတွင်းက ထုတ်ပြန်ခဲ့သော သတင်းတစ်ခုကဲ့သို့ပင်။ သူတို့သည် လွန်ခဲ့သည့် နှစ်သုံးဆယ်က အဆင့်အမြင့်ဆုံး ဗုံးကြဲလေယာဉ်များကို ထုတ်လုပ်နိုင်ခဲ့သော်လည်း၊ နှစ်သုံးဆယ်ကြာပြီးနောက် ယနေ့အချိန်တွင် ပြန်လည် မထုတ်လုပ်နိုင်တော့ပေ။ အကြောင်းရင်းမှာ ထိုလေယာဉ်တွင် ပါဝင်သော အစိတ်အပိုင်း အချို့ကို ယခုအခါ မည်သူကမျှ မထုတ်လုပ်နိုင်တော့သောကြောင့် ဖြစ်သည်။

ထိုနည်းတူပင်။ လင်းယန် ရရှိထားသော ဤစက်ရုပ်၏ ဒီဇိုင်းပုံစံကလည်း ဤသဘောတရားနှင့် အတူတူပင်ဖြစ်သည်။

'အရမ်း ရှုပ်ထွေးတယ်လို့ ထင်ရတဲ့ အရာတချို့က... သူ့ရဲ့ အခြေခံသဘောတရားကို နားလည်သွားတဲ့ အခါကျတော့ တော်တော်လေး ရိုးရှင်းသွားတာပဲ' ဟု လင်းယန် တွေးကာ ဒီဇိုင်းပုံစံကို ချက်ချင်း သိမ်းဆည်းလိုက်သည်။ စနစ်ထဲတွင် ပုံထားသော မျိုးစေ့များနှင့်အတူ သွားထားလိုက်သည်။

တစ်နည်းအားဖြင့် ပြောရလျှင်...

ဤဒီဇိုင်းပုံစံက လင်းယန်အတွက်တော့ ဟိုမျိုးစေ့များလောက် ဆွဲဆောင်မှု မရှိပေ။

'ဒီမျိုးစေ့တွေက တကယ်တော့ မဲဖောက်တဲ့ ဘူးလေးတွေနဲ့ တူတယ်။ တကယ် မစိုက်ကြည့်မချင်း ဘာသီးနှံ ထွက်လာမလဲ ဆိုတာကို လုံးဝ သိနိုင်မှာ မဟုတ်ဘူး! ဒါပေမဲ့ စိုက်ပြီးသွားတဲ့ အခါတိုင်းမှာ... အံ့ဩစရာကောင်းတဲ့ အရာတွေ အများကြီး အမြဲတမ်း ရတတ်တယ်' ဤအကြောင်းများကို တွေးမိသောအခါ လင်းယန် ခေါင်းယမ်းလိုက်မိသည်။

ဤကဲ့သို့ မျှော်လင့်ချက် ကြီးမားနေခြင်းက အဆိပ်အတောက်တစ်ခုလို ဖြစ်နေမှန်း သိသော်လည်း၊ သူ မနေနိုင်ဘဲ ဆက်လက် ခုန်ဆင်းချင်နေမိဆဲပင်။ ထိုမျိုးစေ့များတွင် မည်ကဲ့သို့သော အံ့ဖွယ် အစွမ်းသတ္တိများ ရှိနေရသလဲ ဆိုတာကို သူ တကယ် သိချင်နေသည်။

'ဒီစနစ်က ပေးတဲ့ ဆုကြေးတွေအရဆိုရင်... မက်မွန်ခြံကနေ ထွက်လာမယ့် မက်မွန်သီးတွေရဲ့ အနာဂတ် အသုံးဝင်မှုက သေးငယ်မှာ မဟုတ်ဘူး။'

'ဆုကြေးထဲမှာ အိုမင်းရင့်ရော်မှုကို နှေးကွေးစေတဲ့စွမ်းရည် ပါလာတယ်ဆိုတော့... မက်မွန်ပင်ကနေ ထွက်လာမယ့် မက်မွန်သီးတွေကရော ဒီလို အာနိသင်မျိုးများ ရှိနေမလား?'

လင်းယန် တွေးတော ချက်ချင်းတွေဝေသွားမိသည်။

တကယ်တော့ ဤသည်မှာ ခန့်မှန်းချက် သက်သက်သာ ဖြစ်သည်။ အကယ်၍ တကယ်သာ ဖြစ်လာခဲ့လျှင် 'အနောက်ဘက်သို့ ခရီးသွားခြင်း' ဇာတ်လမ်းထဲက 'မသေဆေး မက်မွန်သီး' တွေလို ဖြစ်သွားမှာပေါ့။ တစ်ကိုက် စားလိုက်တာနဲ့ နှစ်ထောင်သောင်းချီ အသက်ရှင်သွားနိုင်တယ်ဆိုတဲ့ အသီးမျိုးလေ။

သို့သော် လက်တွေ့ဘဝတွင်လည်း အိုမင်းရင့်ရော်မှုကို နှေးကွေးစေသော သစ်သီးများ အများအပြား ရှိပါသည်။ သလဲသီး၊ စွန်ပလွံသီး၊ ပန်းသီး၊ သစ်တော်သီး အစရှိသည်တို့တွင် ဤအာနိသင်မျိုးရှိကြသည်။ သေချာသည်မှာ လက်ဖက်ရည်တွင်လည်း ဤအာနိသင် ပါဝင်သည်။

သို့သော်... မိမိကိုယ်ကို နေ့စဉ်နေ့တိုင်း ကျန်းမာရေး လိုက်စားနိုင်မည်ဟု ဘယ်သူက အာမခံနိုင်မှာလဲ? အိုမင်းရင့်ရော်မှု ဆိုသည်မှာ လူတစ်ဦးချင်းစီအပေါ်တွင်လည်း မူတည်သေးသည်။ တချို့ မင်းသားတွေဆိုလျှင် အသက် ၆၀ ပြည့်နေပြီ ဖြစ်သော်လည်း၊ အသက် ၂၀ ကျော် အရွယ်နှင့် ဘာမှ မကွာခြားလှပေ။ တချို့ လူငယ်တွေကျတော့ အဘိုးကြီးတွေလို ဖြစ်နေကြသည်။

သက်တမ်းဆိုသည်မှာ တကယ်တော့ အလွန် နက်နဲဆန်းကြယ်လှသော အရာဖြစ်သည်။ လင်းယန်ကဲ့သို့သော လူငယ်တစ်ယောက် အတွက်တော့ ဤကွာခြားချက်ကို လုံးဝ ခံစားသိရှိနိုင်မည် မဟုတ်ပေ။

သို့သော် လောင်ဝမ်၊ အဘိုးစူး တို့ကဲ့သို့သော သက်ကြီးရွယ်အိုများ အတွက်တော့... ဤကဲ့သို့သော ထုတ်ကုန်မျိုးက သေလောက်အောင် ဆွဲဆောင်မှု ရှိလှသည်။ ငွေကြေး ပိုကြွယ်ဝလေ၊ အာဏာ ပိုရှိလေ၊ ကိုယ့်ကိုယ်ကိုယ် ပို၍ အသက်ရှည်ချင်ကြလေ ဖြစ်သည်။ ရှေးခေတ် ဧကရာဇ်မင်း အများအပြားဆိုလျှင် သူတို့၏ ဘဝနှောင်းပိုင်း ကာလများတွင် လေထဲ တိုက်အိမ်ဆောက်သလို မသေဆေးများကို အသည်းအသန် ရှာဖွေခဲ့ကြသည် မဟုတ်လား။

'ဒီမက်မွန်ပင်တွေက ဘယ်လို မက်မွန်သီးမျိုးတွေများ သီးလာမလဲဆိုတာ... တကယ်ကို မျှော်လင့်စရာ ကောင်းလာပြီ'

လင်းယန် တောင်အောက်သို့ ဆင်းရန် ပြင်နေစဉ်၊ ဝူယင်းတစ်ယောက် တောင်ထိပ်သို့ တက်လာပြီး သူ့ကို လာရှာလေသည်။

"ကျောင်းဘက်ကနေ ရှင့်ကို ကိစ္စရှိလို့ လာရှာနေတယ်"

***