အခန်း (၈၃-၈၄)

မဟာယာနအဆင့်ရောက်မှ စနစ်က ပေါ်လာသတဲ့

Mahayana 83

အခန်း ၈၃ ။ အတိဒုက္ခဖြတ်ကျော်ခြင်းအဆင့်

နိုင်ငံတော် ကံကြမ္မာစွမ်းအား ဟာကွက်ဖြစ်သွားခြင်းသည် စစ်တုရင်ခုံကိုသာမက ယွီယင်ကိုပါ သက်ရောက်မှု ရှိခဲ့သည်။ သူမ၏ အတိဒုက္ခဖြတ်ကျော်ခြင်းအဆင့်မှာ စစ်သူကြီး ရှန်ဝူကဲ့သို့ မတည်ငြိမ်တော့ပေ။

သူမ နားမလည်နိုင်သည်မှာ - စစ်သူကြီး ရှန်ဝူသည် စစ်တပ်၏ အင်အားကို အသုံးပြု၍ အတိဒုက္ခဖြတ်ကျော်ခြင်းအဆင့်သို့ တက်လှမ်းထားခြင်းဖြစ်ရာ၊ ယုတ္တိအရ သူမထက် အားနည်းနေသင့်သည်။ သို့သော် ဘာကြောင့် သူသည် ပုံမှန်မဟုတ်ဘဲ ဤမျှအထိ သန်မာနေရတာလဲ။

ယွီယင်သည် အကြောင်းရင်းကို နားမလည်သော်လည်း၊ ထိုအတွက်ကြောင့် တိုက်ခိုက်မှုကို မနှေးကွေးစေဘဲ ပို၍ပင် ပြင်းထန်သွက်လက်လာခဲ့သည်။

စစ်သူကြီး ရှန်ဝူသည် စစ်တပ်အတွင်း၌ နှစ်ပေါင်းများစွာ တိုက်ပွဲဝင်ခဲ့သူဖြစ်ရာ၊ တိုက်ခိုက်မှု အတွေ့အကြုံများမှာ ခန္ဓာကိုယ်၏ ဗီဇအဖြစ်ပင် ပြောင်းလဲနေပြီဖြစ်သည်။ ၎င်းအပြင် နတ်ဘုရားသိုက် စွမ်းအား၏ အကူအညီပါ ပါဝင်နေသဖြင့် ယွီယင်နှင့် ရင်ဆိုင်ရာတွင် အဘက်ဘက်မှ သာလွန်နေခဲ့သည်။

၎င်းအပြင် အန်းလင်မင်းသားအပါအဝင် ခန္ဓာပေါင်းစည်းခြင်းအဆင့် ငါးဦးလည်း ရှိနေသေးသည်။

အတိဒုက္ခဖြတ်ကျော်ခြင်းအဆင့်သည် မန္တန်များ သက်ရောက်မှု မရှိဘူးဆိုလျှင် တခြားနည်းလမ်းတွေ သုံးတာပေါ့။

အန်းလင်မင်းသားက မိမိ၏ သမီးနှစ်ဦးကို ပေးဆပ်ကာ ချုံချီဘုရင်ကို ခေါ်ယူလာခြင်းမှာ ထိုရည်ရွယ်ချက်ကြောင့်ပင် ဖြစ်သည်။ ချုံချီဘုရင်၏ ခန္ဓာကိုယ် ကြံ့ခိုင်မှုမှာ ကျန်းခုန်းဟူလောက် မကြောက်စရာကောင်းသော်လည်း၊ အတိဒုက္ခဖြတ်ကျော်ခြင်းအဆင့်နှင့် အကြိမ်အနည်းငယ်တော့ ရင်ဆိုင်တိုက်ခိုက်နိုင်စွမ်း ရှိသည်။

ထိုမျှဆိုလျှင် လုံလောက်ပြီ။

မိုးကြိုးငါးပါး မန္တန်ဂိုဏ်း၏ အကြီးအကဲသည် မိုးကြိုးငါးပါးမန္တန်ကို ထပ်မံ အသုံးပြုကာ မိုးကြိုးအတိဒုက္ခကို ပုံတူဖန်တီးလိုက်သည်။ မိုးကြိုးငါးပါးမန္တန်မှာ "မန္တန်" ဟု ခေါ်သော်လည်း၊ "တာအို" နှင့် ပို၍ နီးစပ်သဖြင့် 'မန္တန်များ သက်ရောက်မှု မရှိခြင်း' ဟူသော စည်းမျဉ်းထဲတွင် မပါဝင်ပေ။

စောစောက ယွီယင်ကိုယ်တိုင် လှုပ်ရှားပြီးမှသာ မိုးကြိုးအတိဒုက္ခကို ဖျက်ဆီးနိုင်ခဲ့ခြင်းက သက်သေပင်။

ယွင်မုန့်ရေကန်သခင်ကလည်း သူ သေချာ သန့်စင်ထားသော ရွှမ်ချုံးရေကို ထုတ်ယူလိုက်သည်။ ထိုရေတစ်စက်မှာပင် ပေါင်တစ်သောင်းခန့် အလေးချိန်ရှိပြီး၊ သူ့လက်ထဲတွင် ထိုရေ တစ်ပန်းကန်လုံး ရှိနေသည်။

ချန်ခုံးဂိုဏ်းချုပ်ကလည်း ဧရာမ တူကြီးတစ်လက်ကို ကိုင်ဆောင်ကာ ယွီယင်ထံသို့ လွှဲပေါက်လိုက်သည်။

အန်းလင်မင်းသားသည် 'ကောင်းကင်ပေတံ' ကို ထုတ်ယူလိုက်သည်။ ဤပေတံသည် ရန်သူ၏ အားနည်းချက်များကို တိုင်းတာရှာဖွေနိုင်သည်။ သို့သော် သူသည် ခန္ဓာပေါင်းစည်းခြင်းအဆင့်သာ ရှိသေးသဖြင့် ယွီယင်၏ အားနည်းချက်များကို အတိအကျမရှာနိုင်ဘဲ အကြမ်းဖျင်းသာ သိနိုင်သည်။ ထို့ပြင် သူသည် မန္တန်များကိုသာ အသုံးပြုတတ်သဖြင့် ယွီယင်အပေါ် သက်ရောက်မှု မရှိပေ။

အတိဒုက္ခဖြတ်ကျော်ခြင်းအဆင့် ကျင့်ကြံသူများ အသုံးပြုသော မန္တန်မှသာ အတိဒုက္ခဖြတ်ကျော်ခြင်းအဆင့်အပေါ် သက်ရောက်မှု ရှိနိုင်သည်။

အန်းလင်မင်းသားသည် ယွီယင်ကို တိုက်ရိုက် မတိုက်ခိုက်နိုင်သော်လည်း၊ သူမ၏ အားနည်းချက်များကို စစ်သူကြီး ရှန်ဝူအား လှမ်း၍ ပြောပြနိုင်သည်။

"ပိုင်ဟွေ၊ ထုံထျန်း၊ ချမ်တင်း၊ ချန်ကွမ်း၊ ရှန်ရှင်း... အဲ့ဒီ နေရာငါးခုထဲက တစ်ခုကို သူ အဆုံးစွန်ထိ မကျင့်ကြံရသေးဘူး။"

"သူမရဲ့ ဝိညာဉ်စွမ်းအားတွေ တစ်ပတ်လည်သွားတိုင်း ခဏလေး ရပ်တန့်သွားတတ်တယ်။"

"ကိုယ်တွင်းအင်္ဂါ ခြောက်ခုထဲက တစ်ခုမှာ..."

"စိတ်အာရုံမှာ..."

အန်းလင်မင်းသားက အားနည်းချက် တစ်ခုပြောလိုက်တိုင်း ယွီယင်သည် ပစ်မှတ်ထား တိုက်ခိုက်ခံရသဖြင့်၊ မူလက တိုက်လေ ရဲရင့်လေဖြစ်နေသော သူမမှာ တဖြည်းဖြည်း မောပန်းလာပြီး စစ်သူကြီး ရှန်ဝူ၏ တိုက်ကွက်များနှင့် အခြားသူများ၏ အနှောင့်အယှက်များကို မခုခံနိုင်တော့ပေ။

ထို့ပြင် သူမ၏ ကျင့်ကြံမှုအဆင့်မှာလည်း အတက်အကျ ဖြစ်နေပြီး၊ နိုင်ငံတော် ကံကြမ္မာစွမ်းအားက သူမကို အတိဒုက္ခဖြတ်ကျော်ခြင်းအဆင့်တွင် ဆက်လက် ရပ်တည်နိုင်ရန် မပံ့ပိုးပေးနိုင်တော့ပေ။

"မင်း တစ်ယောက်တည်းနဲ့ ငါတို့ နှစ်ယောက်ကို တားနိုင်မယ် ထင်နေလား။"

စစ်ရေးဌာနဝန်ကြီးနှင့် တာ့လီရုံးတော်ချုပ်တို့သည် ဒဏ်ရာပြင်းထန်စွာ ရရှိနေသော အရာရှိခန့်အပ်ရေး ဌာနဝန်ကြီးကို ခြေထောက်ဖြင့် ကန်ထုတ်လိုက်ပြီးနောက်၊ အန်းလင်မင်းသားတို့ဘက်သို့ အမြန် ပြေးသွားကြသည်။

တိုက်ပွဲ ပြီးဆုံးတော့မည်ကို သူတို့ သိရှိကြသည်။ ယခုအချိန်တွင်မှ တိုက်ပွဲထဲဝင်မပါလျှင်၊ နောက်ပိုင်း ဆုလာဘ်ခွဲဝေချိန်တွင် သူတို့အတွက် အစုအပုံ ပါတော့မည် မဟုတ်ပေ။

ထိုနှစ်ဦးမှာ ခန္ဓာပေါင်းစည်းခြင်းအဆင့်များထဲတွင် အလွန်သန်မာသူများ မဟုတ်ကြသော်လည်း၊ ကုလားအုတ်ကျောရိုးကို ကျိုးသွားစေသော နောက်ဆုံး ကောက်ရိုးပင်လေးအလား ဖြစ်သွားကာ ယွီယင်ကို လုံးဝ မခုခံနိုင်တော့အောင် ပြုလုပ်လိုက်ကြသည်။

ယွီယင်သည် မူလ ခန္ဓာပေါင်းစည်းခြင်း အထွတ်အထိပ်အဆင့်သို့ ပြန်ကျသွားပြီး အတိဒုက္ခဖြတ်ကျော်ခြင်းအဆင့်သို့ ပြန်မတက်နိုင်တော့ပေ။

အန်းလင်မင်းသားသည် အလွန်ဝမ်းသာသွားပြီး ကောင်းကင်ပေတံကို ကိုင်ကာ ယွီယင်၏ အားအနည်းဆုံး နေရာကို ရိုက်ချိုးရန် ပြင်လိုက်သည်။

စစ်သူကြီး ရှန်ဝူ၏ မျက်နှာတွင် အမူအရာ သိပ်မပြောင်းလဲသော်လည်း ဝမ်းသာနေကြောင်းကိုမူ မြင်တွေ့နိုင်သည်။ သူသည် အန်းလင်မင်းသား ထီးနန်းလုရာတွင် ကူညီပေးခဲ့ခြင်းမှာ မည်သည့်အရာကိုမျှ မက်မော၍ မဟုတ်ဘဲ ယွီယင်ကို အနိုင်ယူချင်၍သာဖြစ်သည်။

ယခင်က သူသည်လည်း မိမိကိုယ်မိမိ ပါရမီရှင်တစ်ဦးဟု ယူဆကာ လူသားဧကရာဇ် ဖြစ်ချင်ခဲ့သည်။ သို့သော် ကျိုကျိုးမြေကြောက သူ့ကို လူသားဧကရာဇ်လောင်းအဖြစ်ပင် မရွေးချယ်ခဲ့ပေ။ ထိုအချိန်မှစ၍ သူ၏ စိတ်ထားများ ပြောင်းလဲသွားခဲ့သည်။ သူ လူသားဧကရာဇ်လောင်း မဖြစ်နိုင်ဘူးဆိုရင်၊ လူသားဧကရာဇ်လောင်းကို အနိုင်ယူပြီး ကျိုကျိုးမြေကြောရဲ့ ရွေးချယ်မှု မှားယွင်းကြောင်း သက်သေပြမည်။

ကျန်းလီကို သူ ဘယ်တော့မှ နိုင်မည်မဟုတ်ကြောင်း သူ သိသည်။ ပိုင်ဟုန်ထူကလည်း အစစ်အမှန် အတိဒုက္ခဖြတ်ကျော်ခြင်းအဆင့်ဖြစ်နေသဖြင့် သူ မနိုင်နိုင်ပေ။ ထို့ကြောင့် ယွီယင် တစ်ယောက်သာ ကျန်တော့သည်။

သူမက ကိုယ်ပိုင်အင်အားစု တည်ဆောက်ဖို့ ဂရုမစိုက်ခဲ့တာကိုး။ အခုတော့ သူမကို ကူညီမယ့်သူဆိုလို့ အရာရှိခန့်အပ်ရေး ဌာနဝန်ကြီး တစ်ယောက်ပဲ ရှိတော့တယ် မဟုတ်လား။

စစ်သူကြီး ရှန်ဝူ၏ လက်ဝါးချက်ကြောင့် ယွီယင်၏ ကိုယ်တွင်းအင်္ဂါများမှာ ရှုပ်ထွေးသွားပြီး၊ သွေးကြောများ ပြောင်းပြန်စီးဆင်းကာ သွေးများ အဆက်မပြတ် အန်ထွက်လာသည်။ သူမ၏ အခြေအနေမှာ အရင် ဖျားနာဟန်ဆောင်နေစဉ်ကထက်ပင် ပို၍ ဆိုးရွားနေပြီဖြစ်သည်။

အသက်အန္တရာယ်နှင့် နီးကပ်နေပြီ ဖြစ်သည်။

သူမသည် ယခင်က တစ်ခါမှ မကြုံဖူးသော အန္တရာယ်နှင့် ရင်ဆိုင်နေရသော်လည်း သူမ၏ စိတ်နှလုံးမှာမူ အလွန်တည်ငြိမ်နေသည်။ အစောကြီးကတည်းက သူမသည် အတားအဆီးတစ်ခုကို ထိတွေ့ခဲ့ဖူးသော်လည်း၊ နိုင်ငံတော် ကံကြမ္မာစွမ်းအားက သူမကို အမြဲဆွဲထားသဖြင့် ရှေ့သို့ မတက်နိုင်ခဲ့ပေ။ ယခုမူ သူမကို ကာလရှည်ကြာ တားဆီးထားခဲ့သော ထိုအတားအဆီးမှာ အလွယ်တကူ ပေါက်ထွက်သွားပြီ ဖြစ်ပြီး နိုင်ငံတော် ကံကြမ္မာစွမ်းအားကပင် တားဆီး၍ မရတော့ပေ။

အန်းလင်မင်းသား၏ ရယ်မောသံများ၊ စစ်သူကြီး ရှန်ဝူ၏ လေခွင်းသံများ၊ မိုးကြိုးငါးပါး မန္တန်၏ မိုးခြိမ်းသံများ၊ ချုံချီဘုရင်၏ ဟိန်းဟောက်သံများ၊ အရာရှိခန့်အပ်ရေး ဌာနဝန်ကြီး၏ မျှော်လင့်ချက် ကင်းမဲ့နေသော အော်သံများ...

သူမ မျက်လုံးကို မှိတ်လိုက်သော်လည်း မြင်နေရသည်ထက် ပို၍ ရှင်းလင်းနေသည်။ ထိုဆူညံသော အသံများမှာ သူမနှင့် တဖြည်းဖြည်း ဝေးကွာသွားပြီး၊ စိတ်အာရုံမှာ ဖုန်တစ်စက်မျှ မရှိဘဲ ကြည်လင်သန့်စင်နေသည်။ သူမသည် တရားထိုင်နေသည့်အလား စိတ်အာရုံ၊ ကောင်းကင်နှင့် မြေကြီးတို့နှင့် တစ်သားတည်း ဖြစ်သွားသည်။

ဒါဟာ စစ်မှန်တဲ့ အတိဒုက္ခဖြတ်ကျော်ခြင်းပဲ...

ယွီယင်သည် အတိဒုက္ခဖြတ်ကျော်ခြင်း၏ စစ်မှန်သော အဓိပ္ပာယ်ကို တဖြည်းဖြည်း နားလည်လာခဲ့သည်။ ထို့ကြောင့်ပင် မည်သူကမျှ အတိဒုက္ခဖြတ်ကျော်ခြင်းအဆင့်သို့ မည်သို့ တက်လှမ်းရမည်ကို မပြောပြခဲ့ကြခြင်းဖြစ်သည်။ အကယ်၍ ပြောပြလိုက်ပါက ဘယ်တော့မှ အဆင့်တက်နိုင်တော့မည် မဟုတ်ပေ။

အတိဒုက္ခဖြတ်ကျော်ခြင်းဟု ခေါ်ဆိုရခြင်းမှာ အတိဒုက္ခကို ဖြတ်ကျော်ရသောကြောင့်ဖြစ်သည်။ ထိုအတိဒုက္ခမှာ "အသေဆယ်ပုံ၊ အရှင်မရှိ" သော သေရေးရှင်ရေး အတိဒုက္ခမျိုး ဖြစ်ရမည်။ သေခြင်းတရားကြားမှ အသက်ရှင်သန်ခွင့်ကို ရှာဖွေရမည်။ အကယ်၍ ခန္ဓာပေါင်းစည်းခြင်းအဆင့် ကျင့်ကြံသူတစ်ဦးသည် အတိဒုက္ခဖြတ်ကျော်ခြင်း၏ အဓိပ္ပာယ်ကို ကြိုတင်သိရှိနေပါက၊ သေရေးရှင်ရေး အတိဒုက္ခကို တမင်တကာ ဖန်တီးယူလိမ့်မည်။ ထိုသို့ တမင်တကာ ဖန်တီးထားသော အတိဒုက္ခကို မည်မျှပင် လိမ္မာပါးနပ်စွာ ဖြတ်ကျော်နိုင်ပါစေ၊ အတိဒုက္ခဖြတ်ကျော်ခြင်းအဆင့်သို့ တက်လှမ်းနိုင်မည် မဟုတ်ပေ။

ခန္ဓာပေါင်းစည်းခြင်းအဆင့် ကျင့်ကြံသူတစ်ဦးသည် အတိဒုက္ခကို တမင်မဖန်တီးသော်လည်း၊ တကယ့် သေရေးရှင်ရေး အတိဒုက္ခနှင့် ကြုံတွေ့ရချိန်တွင် 'ဒီအတိဒုက္ခကို ကျော်ဖြတ်နိုင်ရင် ငါ အတိဒုက္ခဖြတ်ကျော်ခြင်းအဆင့် ရောက်ပြီ' ဟု တွေးမိလျှင်လည်း အဆင့်တက်နိုင်မည် မဟုတ်ပေ။

အခြား ပုဂ္ဂိုလ်ကြီးတစ်ဦးက တစ်စုံတစ်ယောက် အဆင့်တက်လာစေရန် ရည်ရွယ်၍ သေရေးရှင်ရေး အတိဒုက္ခကို တမင်တကာ ဖန်တီးပေးလျှင်လည်း အဆင့်တက်နိုင်မည် မဟုတ်ပေ။

ယွီယင်သည် မိမိကိုယ်မိမိ သေခြင်းတရားဖြင့် ဖိနှိပ်ကာ အလားအလာများကို နှိုးဆွ၍ အတိဒုက္ခဖြတ်ကျော်ခြင်းအဆင့်သို့ တက်လှမ်းရန် ကြိုးစားခဲ့သည်။ သူမ၏ အစပြုရည်ရွယ်ချက် မှားယွင်းနေသော်လည်း၊ မတော်တဆ ကြုံတွေ့ရမှုများကြောင့် ဖြစ်စဉ်မှာ မှန်ကန်သွားခဲ့သည်။

အတိဒုက္ခဖြတ်ကျော်ခြင်းအဆင့်သို့ တက်လှမ်းရန် အလွန်ခက်ခဲလှသည်။ ခန္ဓာပေါင်းစည်းခြင်း အထွတ်အထိပ်အဆင့် ကျင့်ကြံသူတစ်ဦးအတွက် သေရေးရှင်ရေး အတိဒုက္ခဆိုသည်မှာ ဘယ်က ရနိုင်မလဲ။ မိမိနှင့်အဆင့်တူ ကျင့်ကြံသူ ဆယ်ဦးနှင့် ရင်ဆိုင်ရလျှင်ပင် လွတ်အောင် ပြေးနိုင်သေးရာ ၎င်းကို သေရေးရှင်ရေး အတိဒုက္ခဟု မခေါ်နိုင်ပေ။

ထျန်းယွမ်အင်ပါယာမှာ ရှုပ်ထွေးပြီး ကျင့်ကြံသူများ အလွယ်တကူ သတ်ဖြတ်လေ့ရှိသော်လည်း၊ ၎င်းမှာ ဝိညာဉ်သန္ဓေအဆင့်လောက်အထိသာ ဖြစ်သည်။ ဝိညာဉ်အသွင်ပြောင်းခြင်းအဆင့် ကျင့်ကြံသူဆိုသည်မှာ ဆယ်နှစ်နေမှ တစ်ယောက်လောက် သေရန်ခဲယဉ်းပြီး၊ ခန္ဓာပေါင်းစည်းခြင်းအဆင့်ဆိုလျှင် ပြောနေစရာပင် မလိုတော့ပေ။

အတိဒုက္ခဖြတ်ကျော်ခြင်းအဆင့်သို့ တက်လှမ်းရန်အတွက် မိမိ၏ စိတ်နှလုံးကို အသုံးပြု၍ 'တာအို' ကို သက်သေပြရန်လည်း လိုအပ်သေးသည်။ ၎င်းမှာ ယွီယင်အတွက် မခက်ခဲပေ။

ပြောရလျှင်လည်း ရယ်စရာကောင်းလှသည်။ နယ်ပယ်ပြင်ပ နတ်ဆိုးများကို ခုခံတိုက်ခိုက်ခြင်းသည် အတိဒုက္ခဖြတ်ကျော်ခြင်းအဆင့်များအတွက် အသေအပျောက် အများဆုံး အချိန်ဖြစ်သလို၊ ခန္ဓာပေါင်းစည်းခြင်းအဆင့်များအတွက်မူ အတိဒုက္ခဖြတ်ကျော်ခြင်းအဆင့်သို့ တက်လှမ်းရန် အကောင်းဆုံး အချိန်အခါလည်း ဖြစ်နေပြန်သည်။

အန်းလင်မင်းသားသည် ယွီယင်၏ အားနည်းချက်များ လျင်မြန်စွာ လျော့နည်းလာပြီး နောက်ဆုံးတွင် လုံးဝ ပျောက်ကွယ်သွားသည်ကို ထိတ်လန့်တကြား တွေ့လိုက်ရသည်။ တစ်ခဏအတွင်းမှာပင် သူမသည် အပြစ်အနာအဆာကင်းသော ပုဂ္ဂိုလ်တစ်ဦးအဖြစ် ပြောင်းလဲသွားခဲ့သည်။

ဒါ... ဒါ ဘယ်လိုလုပ် ဖြစ်နိုင်မှာလဲ။

သူ မယုံကြည်ချင်သလို၊ မယုံလည်း မယုံရဲပေ။

အပြစ်အနာအဆာကင်းသော ကျင့်ကြံသူဆိုသည်မှာ တစ်မျိုးတည်းသာ ရှိသည်။

ကောင်းကင်၏ ကြီးမြတ်သော အရှိန်အဝါကြီး ကျဆင်းလာသည်။ မိုးကြိုးငါးပါး မန္တန်ဂိုဏ်း၏ အကြီးအကဲသည် ပထမဆုံး သတိပြုမိသွားပြီး ခေါင်းကို ဆတ်ခနဲ မော့ကြည့်လိုက်သည်။ အတုအယောင်က အစစ်အမှန်နှင့် တွေ့လိုက်ရသကဲ့သို့၊ ထိန်းချုပ်၍မရသော ကြောက်ရွံ့မှုများ ဖြစ်ပေါ်လာပြီး ကြက်သီးမွေးညင်းများပင် ထသွားတော့သည်။

လူတိုင်းသည် တစ်ခုခုကို ခံစားမိသွားကြပြီး ကောင်းကင်ကို မော့ကြည့်လိုက်ကြသည်။ ဤအခိုက်အတန့်တွင် အထွတ်အထိပ် ပုဂ္ဂိုလ်ကြီးတစ်ဦး မွေးဖွားလာတော့မည်။

တာအိုဂိုဏ်း၏ အမြင့်ဆုံး တောင်ထိပ်တွင် ရပ်နေသော ပိုင်ဟုန်ထူသည် ထျန်းယွမ်အင်ပါယာ ရှိရာအရပ်သို့ လှမ်း၍ မျှော်ကြည့်လိုက်သည်။ မျက်စိဖြင့် မမြင်နိုင်လောက်အောင် ဝေးကွာနေသော်လည်း၊ မိမိနှင့် အဆင့်တူညီသော အစွမ်းထက် ပုဂ္ဂိုလ်တစ်ဦး ပေါ်ထွက်လာတော့မည်ကို သူ ခံစားသိရှိနေသည်။

"အကြာကြီး စောင့်ခဲ့ရတယ်။ နောက်ဆုံးတော့ မင်းလည်း ငါနဲ့ အဆင့်တူ သွားပြီပဲ။"

ဟုန်ချန်းနတ်သမီးသည်လည်း မက်မွန်ပင်ပေါ်တွင်ထိုင်ကာ ဖြူဖွေးသော ခြေသလုံးလေးများကို ရှေ့နောက် လွှဲယမ်းရင်း ထျန်းယွမ်အင်ပါယာ ရှိရာအရပ်ကို လှမ်းကြည့်နေသည်။

အပြင်လောကက တော်တော်လေး စိတ်ဝင်စားစရာ ကောင်းပုံရတယ်။ ဒါပေမဲ့ ငါက ကြောက်တတ်တော့ အပြင်မထွက်ရဲဘူး... ဘယ်လိုလုပ်ရမလဲ။

"ဝုန်း"

ကောင်းကင်၏အရှိန်အဝါများက အတိဒုက္ခအဖြစ် ပြောင်းလဲသွားသည်။

ယွီယင်သည် အတိဒုက္ခဖြတ်ကျော်ခြင်းအဆင့်သို့ တရားဝင် ခြေချလိုက်ပြီ ဖြစ်လေတော့သည်။

***

မဟာယာနအဆင့်ရောက်မှ စနစ်က ပေါ်လာသတဲ့

Mahayana 84

အခန်း ၈၄ ။ အကွက်ဆင်ခြင်း

ယွီယင် မျက်လုံးဖွင့်လိုက်သည်။ သူမ၏ အသားအရေမှာ ကျောက်စိမ်းကဲ့သို့ ဖြူဝင်းနေပြီး၊ လှပသော မျက်လုံးများမှာ အရောင်လက်နေကာ၊ သူမ၏ လှုပ်ရှားမှုတိုင်းတွင် အလွန်မြင့်မြတ်သော အရှိန်အဝါများ ယိုဖိတ်နေသည်။

မည်သူကမျှ ယွီယင်၏အလှတရားကို မခံစားဝံ့ကြပေ။ ထိုနေရာတွင် ရှိနေသူတိုင်း၏ ရင်ထဲတွင် ကြောက်ရွံ့မှုများ ဖြစ်ပေါ်နေသည်။ အတိဒုက္ခဖြတ်ကျော်ခြင်းအဆင့်သို့ ရောက်ရှိနေသော နိုင်ငံတော် အရှင်သခင်တစ်ပါး မည်မျှ ကြောက်စရာကောင်းသည်ကို မည်သူကမျှ မမှန်းဆနိုင်ကြပေ။ ကိုးပြည်ထောင် အင်ပါယာများထဲတွင် ယွီယင် တစ်ဦးတည်းသာ ဤအဆင့်သို့ ရောက်ရှိထားသူ ဖြစ်သည်။

ပြေး….

မည်သူကမျှ ဤစကားလုံးကို နှုတ်မှ ထုတ်မပြောကြသော်လည်း၊ အားလုံးက တူညီသော ရွေးချယ်မှုကို ပြိုင်တူ ပြုလုပ်လိုက်ကြသည်။

ယွီယင်သည် ဖြူသွယ်သော လက်ချောင်းလေးကို ဆန့်ထုတ်ကာ အရှေ့သို့ ညင်သာစွာ ထောက်လိုက်ရာ၊ စစ်သူကြီး ရှန်ဝူမှလွဲ၍ ကျန်သူများအားလုံး လှုပ်မရတော့ဘဲ အေးခဲသွားကြသည်။

ယွီယင်၏ နှုတ်ခမ်းထောင့်လေး ကွေးတက်သွားသည်။ ကျန်းလီ အမြဲသုံးလေ့ရှိသော ဤနည်းလမ်းကို ကိုယ်တိုင် သုံးကြည့်ရသည်မှာ တကယ်ကို ခံစားလို့ ကောင်းလှသည်။

စစ်သူကြီး ရှန်ဝူသည် မိမိ ထွက်ပြေး၍ မလွတ်နိုင်တော့မှန်း သိရှိလိုက်သည်။ သူ ပြေးနိုင်လျှင်ပင် စစ်တပ်က ပြေး၍ မလွတ်နိုင်ပေ။ စစ်တပ်မရှိသော သူသည် သာမန် ခန္ဓာပေါင်းစည်းခြင်းအဆင့် တစ်ဦးသာ ဖြစ်ရာ၊ နိုင်ငံတော် ကံကြမ္မာစစ်တုရင်ခုံကို ပိုင်ဆိုင်ထားသော ယွီယင်၏ လက်ထဲမှ လွတ်မြောက်ရန် လုံးဝ မဖြစ်နိုင်ပေ။

သူ ရွေးချယ်စရာ မရှိတော့ဘဲ ဆက်လက် တိုက်ခိုက်ရန်သာ ရှိတော့သည်။

သူသည်လည်း အတိဒုက္ခဖြတ်ကျော်ခြင်းအဆင့် ဖြစ်နေသော်လည်း၊ ခွန်အားသက်သက်သာရှိပြီး အတိဒုက္ခဖြတ်ကျော်ခြင်းအဆင့်၏ စွမ်းရည်များကိုမူ မထုတ်ဖော်နိုင်ပေ။ ဥပမာအားဖြင့် ဟင်းလင်းပြင်ကို အေးခဲစေနိုင်သော အစွမ်းကို ဟင်းလင်းပြင် ပါရမီမရှိသော လူသားဧကရာဇ်ကျန်းကော ယွီယင်ပါ တတ်ကျွမ်းသော်လည်း၊ သူကမူ မလုပ်နိုင်ပေ။

သူမက အခုမှ အတိဒုက္ခဖြတ်ကျော်ခြင်းအဆင့်ကို ရောက်ခါစဆိုတော့ အသားမကျသေးလောက်ဘူး။ ငါ့ရဲ့ ခွန်အားသက်သက်နဲ့ တိုက်ရင်တောင် နိုင်ကောင်းနိုင်နိုင်ပါသေးတယ်။ စစ်သူကြီး ရှန်ဝူက မိမိကိုယ်မိမိ အားပေးနေမိသည်။

ယွီယင်သည် စစ်သူကြီး ရှန်ဝူကို အခြေအနေ ပြန်လည်ထိန်းချုပ်ခွင့် လုံးဝ မပေးတော့ပေ။ နိုင်ငံတော် ကံကြမ္မာစွမ်းအားများကို အသုံးပြုကာ ပျက်စီးနေသော စစ်တုရင်ခုံကို ပြန်လည်ခေါ်ယူလိုက်ပြီး၊ ကြယ်နေရာများသို့ စစ်တုရင် လေးရုပ် ချလိုက်သည်။ ထိုအခါ ပုံစံမတူညီသော လက်နက်ပေါင်း ၁၀၈,၀၀၀ ထွက်ပေါ်လာပြီး ထိုဟင်းလင်းပြင်တစ်ခုလုံးကို ဖုံးလွှမ်းသွားသည်။ အပေါ်၊ အောက်၊ ရှေ့၊ နောက်၊ ဘယ်၊ ညာ နေရာတိုင်းမှ လက်နက်များဖြင့် စစ်သူကြီး ရှန်ဝူအား အလုံးလိုက် ဝိုင်းရံလိုက်ပြီး၊ ဓားသွားများအားလုံးက အတွင်းသို့ ချိန်ရွယ်ထားကြသည်။

သူမက လက်ကို ညင်သာစွာ ဝှေ့ယမ်းလိုက်ရာ လက်နက်ပေါင်း ၁၀၈,၀၀၀ သည် အတွင်းသို့ ထိုးစိုက်သွားကြတော့သည်။

လက်နက်များ ပျောက်ကွယ်သွားချိန်တွင်၊ စစ်သူကြီး ရှန်ဝူ ရှိခဲ့သော နေရာ၌ သွေးမြူများသာ ကျန်ရစ်တော့သည်။

အတိဒုက္ခဖြတ်ကျော်ခြင်းအဆင့်များ၏ သွေးတစ်စက်မှ ပြန်လည်မွေးဖွားခြင်းအစွမ်းကိုလည်း စစ်သူကြီး ရှန်ဝူ မသုံးတတ်ခဲ့ပေ။

သူသည် နတ်ဘုရားသိုက်ဂိုဏ်း၏ အရေးပါသော ပုဂ္ဂိုလ်တစ်ဦးဖြစ်ကြောင်းနှင့် အချက်အလက်များ ပေး၍ အသက်ချမ်းသာခွင့်တောင်းခံမည့် အခွင့်အရေးကိုပင် မရလိုက်ပေ။

စစ်သူကြီး ရှန်ဝူ သေဆုံးသွားသည်နှင့် စစ်တပ်ကို ကွပ်ကဲမည့်သူမရှိတော့သဖြင့်၊ နိုင်ငံတော် ကံကြမ္မာ စစ်တုရင်ခုံကြီးသည်လည်း အပြည့်အစုံ ပြန်လည်ဖြစ်တည်လာခဲ့သည်။

ယွီယင်သည် အတိဒုက္ခဖြတ်ကျော်ခြင်းအဆင့်သို့ အောင်မြင်စွာ တက်လှမ်းသွားကြောင်းကို မြို့တော်ရှိ လူတိုင်း သိရှိသွားကြပြီး၊ မည်သည့် အပြောင်းအလဲမျှ ထပ်မံ ဖြစ်ပေါ်လာမည် မဟုတ်တော့ကြောင်း နားလည်ကာ ဧကရီအား ဖူးမြော်ရန် ထွက်လာကြသည်။

ခုနက တိုက်ပွဲကြောင့် နန်းတော်ကြီးမှာ ပြာပုံအဖြစ် ပြောင်းလဲသွားပြီ ဖြစ်သည်။ ယွီယင်သည် လေထဲသို့ ဖြည်းညှင်းစွာ ပျံတက်သွားပြီး၊ သူမနှင့်အတူ အန်းလင်မင်းသား အပါအဝင် လူခုနစ်ဦးလည်း ပါလာခဲ့သည်။ သူမသည် ဤခုနစ်ဦးကို လူပုံအလယ်တွင် ကွပ်မျက်တော့မည်ဖြစ်သည်။

လူတိုင်း၏ စိတ်ထဲတွင် သိရှိနေကြသည် - ဧကရီသည် တစ်လောကလုံးကို အုပ်စိုးနေပြီ ဖြစ်ရာ၊ ပုန်ကန်သူများ အသက်ရှင်ခွင့် မရှိတော့ပေ။

ဆွေစဉ်မျိုးဆက် (၉) ဆက်တိုင်တိုင် သုတ်သင်ခံရပေတော့မည်။

ယခင် တော်ဝင်မိသားစုဟောင်းမှ လူတစ်ယောက်မျှ ကျန်ရစ်တော့မည် မဟုတ်ပေ။ မိုးကြိုးငါးပါး မန္တန်ဂိုဏ်း၊ ချန်ခုံးဂိုဏ်းနှင့် ယွင်မုန့်ရေကန်တို့သည်လည်း မိဖုရားခေါင်ကြီး၏ ဖိနှိပ်မှုအောက်တွင် အဆင့်နိမ့် ဂိုဏ်းများအဖြစ် ကျဆင်းသွားတော့မည်။ စစ်ရေးဌာနဝန်ကြီးနှင့် တာ့လီရုံးတော်ချုပ်တို့မှာလည်း ပိုင်ဆိုင်မှုများ အသိမ်းခံရတော့မည်။ ချုံချီဘုရင်၏ မျိုးနွယ်စုဝင်များကိုမူ... ပိုင်ဇီဧကရာဇ်က အင်ပါယာကို ဒုက္ခပေးနေသော ဘုရင်ရှစ်ပါးထဲမှ တစ်ပါး လျော့သွားသည့်အတွက် ဝမ်းသာနေမည်မှာ သေချာသည်။

ယဉ်ကျေးမှုဌာနဝန်ကြီးအပါအဝင် အန်းလင်မင်းသားဘက်သို့ ပါသွားသော အမတ်များမှာမူ သူတို့တစ်ယောက်တည်း သေရမည်လား၊ သို့မဟုတ် ဆွေ (၃) ဆက်၊ မျိုး (၉) ဆက်ပါ သုတ်သင်ခံရမည်လား ဆိုသည်ကို မသိရသေးပေ။

အရာရှိခန့်အပ်ရေး ဌာနဝန်ကြီး ဆွန်းယွမ်ကမူ မင်းပြောင်းမင်းလွဲကို ကာကွယ်ပေးခဲ့သည့် ကျေးဇူးရှိသဖြင့်၊ နောင်တွင် တစ်ဦးတည်းအောက်၊ လူအများအထက်၌ ရပ်တည်ရတော့မည်ဖြစ်သည်။

ဤအရာများ မဖြစ်ပေါ်သေးသော်လည်း၊ ယွီယင်၏စရိုက်ကို သိရှိပြီး သူမ၏ပါရမီကို လေးစားသော ပြည်သူများကမူ သူမ အတိဒုက္ခဖြတ်ကျော်ခြင်းအဆင့်သို့ ရောက်ရှိသွားချိန်တွင် အရာအားလုံး အဆုံးအဖြတ်ပေးပြီးသားဖြစ်သွားကြောင်း နားလည်ထားကြသည်။

ဤသည်မှာ ထျန်းယွမ်အင်ပါယာရှိ ယွီယင်၏ ဂုဏ်သိက္ခာပင် ဖြစ်သည်။

ဧကရာဇ်တစ်ပါး၏ လှည့်ကွက်များ မလို၊ ဘက်မလိုက်သော သီးခြားအမတ်များ မလို၊ အုပ်စုဖွဲ့ခြင်းများ မလိုဘဲ လူယုံ အနည်းငယ်သာ ရှိသည်။ အန်းလင်မင်းသားသည် ယခုမှပင် ယွီယင်သည် ယခင် ထျန်းယွမ်ဧကရာဇ်များနှင့် မတူဘဲ 'လူသားဧကရာဇ်' နှင့် ပို၍ တူကြောင်း သဘောပေါက်သွားခဲ့သည်။

လူသားဧကရာဇ်သည် အင်အားကိုသာ အဓိကထားပြီး၊ နောက်လိုက်အင်အားစုများကို မည်သည့်အခါကမျှ ဂရုမစိုက်ပေ။

ယခင် ထျန်းယွမ်ဧကရာဇ်များသည် အတိဒုက္ခဖြတ်ကျော်ခြင်းအဆင့်သို့ မရောက်နိုင်မှန်း မိမိကိုယ်ကိုယ် သိထားကြသဖြင့်၊ အကြံအစည်ပေါင်းစုံသုံးကာ အမတ်များကို စည်းရုံးပြီး ဧကရာဇ်၏ အာဏာကို ထိန်းသိမ်းရန် ကြိုးစားခဲ့ကြသည်။ အန်းလင်မင်းသားသည်လည်း ဘိုးဘေးများနည်းတူ အုပ်စုဖွဲ့ကာ အင်အားကြီးမားနေပြီဟု ထင်မှတ်ခဲ့ခြင်းဖြစ်သည်။

အကြွင်းမဲ့ အင်အားကြီးမားမှု ရှေ့မှောက်တွင် သူ့လှည့်ကွက်များမှာ ကလေးကစားစရာမျှသာ ဖြစ်ကြောင်းကို သူ ယခုမှပင် နားလည်သွားတော့သည်။

ယွီယင်သည် ထိုလူခုနစ်ဦးကို ကွပ်မျက်လိုက်ပြီး သူတို့၏အလောင်းများကို နေပူထဲတွင် ဒီအတိုင်း ပစ်ထားလိုက်သည်။

"ဆွန်းယွမ်... မင်းရဲ့ သစ္စာရှိမှုကို ချီးကျူးပါတယ်... နေပါဦး... မင်း ဘာလုပ်နေတာလဲ။" ယွီယင်သည် လှည့်ကာ အရာရှိခန့်အပ်ရေး ဌာနဝန်ကြီး ဆွန်းယွမ်ကို ချီးကျူးရန် ပြင်လိုက်စဉ်၊ သူ့မျက်နှာပေါ်မှ ကြောက်မက်ဖွယ်ကောင်းသော အပြုံးကြီးကို တွေ့လိုက်ရသည်။

တစ်ချိန်တည်းမှာပင်၊ မြို့တော်တစ်ခုလုံးကို လွှမ်းခြုံထားသော အစီအရင်ကြီးတစ်ခု ရုတ်တရက် ထွက်ပေါ်လာခဲ့သည်။

ယွီယင် မျက်လုံးပြူးသွားပြီး ဤအစီအရင်ကို ချက်ချင်း မှတ်မိလိုက်သည်။

ဝိညာဉ်ဖြတ် အစီအရင်။

၎င်းမှာ မိစ္ဆာလမ်းစဉ်က မြို့တစ်မြို့လုံး၊ တိုင်းပြည်တစ်ခုလုံးကို ဖျက်ဆီးရန် သုံးလေ့ရှိသော လူသတ်အစီအရင်ကြီး ဖြစ်သည်။

ယုတ္တိအရဆိုလျှင် နိုင်ငံတော်အတွင်း ဤကဲ့သို့သော အစီအရင်ကြီး ရှိနေပါက အလွယ်တကူ သိရှိနိုင်ရမည်။ သို့သော် ဤအစီအရင်ကြီးမှာ အင်ပါယာနှင့် အပြိုင်တည်ရှိနေသော အခြားဟင်းလင်းပြင်တစ်ခုထဲတွင် သီးသန့်ရှိနေခဲ့ခြင်းဖြစ်သည်။

ယခုအခါ ထိုဟင်းလင်းပြင်သည် ကျိုကျိုးနှင့် ပေါင်းစပ်သွားရာ၊ ဝိညာဉ်ဖြတ် အစီအရင်ကြီးသည်လည်း အင်ပါယာအတွင်းသို့ ရုတ်တရက် ပေါ်လာခြင်းဖြစ်သည်။

"ဆွန်းယွမ်... မင်း သေဖို့သာ ပြင်ထားတော့။" အမြဲတမ်း အေးစက်နေတတ်သော ယွီယင်၏အသံတွင် ဒေါသတရားများ အထင်းသား ပါဝင်လာခဲ့သည်။

ဝိညာဉ်ဖြတ် အစီအရင်ကို စတင်ရန် အချိန်အနည်းငယ် လိုအပ်သဖြင့်၊ ဆွန်းယွမ်ကို အေးခဲပစ်လိုက်နိုင်လျှင် အချိန်မီသေးသည်။

သို့သော် ဆွန်းယွမ်သည် ယွီယင်၏ အေးခဲမှုကို အလွယ်တကူ ရုန်းထွက်လိုက်ပြီး၊ သူမနှင့် ရင်ပေါင်တန်းနိုင်သော အရှိန်အဝါမျိုးကို ထုတ်ဖော်လိုက်သည်။

သူသည်လည်း အတိဒုက္ခဖြတ်ကျော်ခြင်းအဆင့် ဖြစ်နေသည်။

"ဘယ်လိုလုပ်ပြီး အသံတိတ် အဆင့်တက်သွားနိုင်တာလဲ။" ယွီယင် လုံးဝ မယုံကြည်နိုင် ဖြစ်နေသည်။ သူမ ခုနက အဆင့်တက်စဉ်က ကျိုကျိုးတစ်ခုလုံး သိရှိသွားသည်မှာ သဘာဝဖြစ်သည်။ သို့သော် ဆွန်းယွမ်သည် ကောင်းကင်ကြီးကိုပင် လှည့်စားကာ အတိဒုက္ခဖြတ်ကျော်ခြင်းအဆင့်သို့ ဘယ်လို တက်လှမ်းသွားတာလဲ။

ဒါ လုံးဝ မဖြစ်နိုင်ဘူး။

"နတ်ဘုရားသိုက်စွမ်းအား ရှေ့မှာ မဖြစ်နိုင်ဘူး ဆိုတာ မရှိဘူး။" ဆွန်းယွမ်သည် ရက်စက်သော အပြုံးကို ပြုံးလိုက်ပြီး - "ဝိညာဉ်ဖြတ် အစီအရင်... အသက်သွင်းစမ်း။"

ရှုပ်ထွေးပြီး ရှေးကျလှသော အစီအရင်ကြီးသည် ဖြည်းညှင်းစွာ လည်ပတ်လာပြီး၊ လမ်းကြောင်းများ ရောယှက်ကာ ကြယ်တာရာများကိုပင် ပြောင်းလဲသွားစေသည်။ နဂါးနှင့် မြွေများ ထကြွသောင်းကျန်းပြီး ကောင်းကင်နှင့် မြေကြီးပင် ပြောင်းပြန်လှန်သွားတော့သည်။

သုံးစက္ကန့်မျှ အချိန်အတွင်းမှာပင်၊ နိုင်ငံတော်ကြီးအတွင်း၌ လူတစ်ယောက်မျှ မကျန်တော့ဘဲ သွေးမြူများ ဖုံးလွှမ်းသွားတော့သည်။ လူများ ပျောက်ကွယ်သွားသော်လည်း အဝတ်အစားများမှာမူ မသိလိုက်သဖြင့်၊ မူလ သခင်များ၏ အလိုဆန္ဒအတိုင်း ဆက်လက် လှုပ်ရှားနေကြသည်။

မြို့တော်ကြီး တစ်ခုလုံးမှာ မျက်စိတစ်မှိတ်အတွင်းတွင် လှုပ်ရှားနေသော အဝတ်အစားများသာ ရှိသည့် 'သွေးမြို့တော်ကြီး' အဖြစ် ပြောင်းလဲသွားပြီး အလွန်ကြောက်မက်ဖွယ်ကောင်းလှသည်။

မကြာမီ သွေးမြူများ လွင့်စင်သွားပြီးနောက်၊ အဝတ်အစားများ မြေပြင်ပေါ်သို့ ဖြည်းညှင်းစွာ ကျဆင်းသွားကြရာ ထိုနေရာတွင် လူများ ရှိခဲ့ဖူးသည့် အထောက်အထားပင် မကျန်တော့ပေ။

အထက် ခန္ဓာပေါင်းစည်းခြင်း အစောပိုင်းအဆင့်ရှိ ထျန်းရှားဂိုဏ်း ဒု-ဂူသခင်မှသည် အောက်ခြေ ချီသန့်စင်ခြင်းအဆင့်ရှိ သာမန် ပြည်သူများအထိ... ဆွန်းယွမ် ဆယ်စုနှစ်ပေါင်းများစွာ ပြင်ဆင်ထားခဲ့သော ဝိညာဉ်ဖြတ်အစီအရင် ရှေ့မှောက်တွင် မည်သူမျှ မခုခံနိုင်ဘဲ ချက်ချင်း သေဆုံးသွားကြရသည်။

မြို့တော်ရှိ ပြည်သူ ၈ သန်း၊ စစ်တပ် ၁ သန်း၊ စုစုပေါင်း အသက် ၉ သန်းမှာ ချက်ချင်း ပျောက်ကွယ်သွားခဲ့ရသည်။

ဂိုဏ်းဝင်တစ်ဦးသည် လူ ၁,၀၀၀ သာ သတ်ခွင့်ရှိသည်ဆိုသော စည်းကမ်းမှာ၊ အခြားသူများ လူသတ်ပြီး မိမိထက် ကျင့်ကြံမှု မြင့်မားသွားမည်ကို စိုးရိမ်သဖြင့် ဆွန်းယွမ်ကိုယ်တိုင် နတ်ဘုရားသိုက်ဆရာတော်၏ နာမည်ကို အသုံးချကာ သတ်မှတ်ထားခြင်းသာဖြစ်သည်။

ဆွန်းယွမ်ကိုယ်တိုင်ကမူ ထိုစည်းကမ်းကို လိုက်နာမည် မဟုတ်ပေ။

လူ ၉ သန်း သေဆုံးသွားသည်နှင့် ကုသိုလ်တော်စွမ်းအားများ ခန္ဓာကိုယ်အတွင်း ပြည့်နှက်သွားပြီး၊ နတ်ဘုရားဘုံသို့ တက်လှမ်းရန် ခြေတစ်လှမ်းသာ လိုတော့သည်အထိ ဖြစ်သွားသည်။

"သေစမ်း။"

ယွီယင်သည် ဒေါသတကြီးဖြင့် တိုက်ခိုက်လိုက်သော်လည်း၊ လည်ချောင်းထဲတွင် ချိုမြမြသံချေးအရသာကို ခံစားလိုက်ရပြီး သွေးများ အန်ကျလာကာ အရှိန်အဝါများ ရုတ်တရက် ကျဆင်းသွားသည်။

နိုင်ငံတော် ပျောက်ကွယ်သွားခြင်း၊ စစ်တပ် ပျောက်ကွယ်သွားခြင်းတို့သည် နိုင်ငံတစ်ခုအပေါ် မည်မျှ သက်ရောက်မှုရှိမည်ကို မှန်းဆကြည့်နိုင်သည်။ ယွီယင်သည် နိုင်ငံတော် ကံကြမ္မာစွမ်းအားနှင့် ချိတ်ဆက်ထားသူဖြစ်ရာ၊ ကံကြမ္မာစွမ်းအား ထိခိုက်သွားသည်နှင့် သူမလည်း ပြင်းထန်သော အတွင်းဒဏ်ရာကို ရရှိသွားခြင်းဖြစ်သည်။

"ဧကရီ... ထျန်းယွမ်အင်ပါယာက အားကြီးတဲ့သူက အုပ်ချုပ်ရတာလေ၊ ထီးနန်းကို လွှဲပေးလိုက်ပါတော့။" ဆယ်စုနှစ်ပေါင်းများစွာ အကွက်ချခဲ့မှုသည် ယခုမှ အောင်မြင်သွားပြီဖြစ်ရာ၊ အောင်မြင်မှုက သူ့ကို လက်ယပ်ခေါ်နေပြီဟု ဆွန်းယွမ် ခံစားလိုက်ရသည်။

သူ ယွီယင်နှင့် တိုက်ခိုက်ရာတွင် အဘက်ဘက်မှ သာလွန်နေခဲ့သည်။

ယွီယင် မည်မျှပင် ပါရမီထူးချွန်ပါစေ၊ အတိဒုက္ခဖြတ်ကျော်ခြင်းအဆင့်သို့ ရောက်ခါစ၊ အခြေအနေ မတည်ငြိမ်သေးဘဲ ဒဏ်ရာအပြင်းအထန် ရနေချိန်တွင် နတ်ဘုရားဘုံသို့ တက်လှမ်းတော့မည့် အတိဒုက္ခဖြတ်ကျော်ခြင်းအဆင့်တစ်ဦးကို အနိုင်ယူရန် လုံးဝ မဖြစ်နိုင်ပေ။

ဆွန်းယွမ်သည် အရာအားလုံးကို ကြိုတင် တွက်ချက်ထားပြီးသား ဖြစ်သည်။ ယွီယင်ကို ကာကွယ်ပေးရမည့် လူသားဧကရာဇ်ကျန်းမှာ မရှိနေသလို၊ သူ့ကို တားဆီးနိုင်မည့် အခြားသူများမှာလည်း ဤနေရာသို့ အချိန်မီ ရောက်လာနိုင်မည် မဟုတ်ပေ။

သူသာ ယွီယင်ကို အနိုင်ယူပြီး ထျန်းယွမ်ဧကရာဇ်သစ် ဖြစ်လာပါက၊ နိုင်ငံတော် ကံကြမ္မာစစ်တုရင်ခုံကို အသုံးပြု၍ နိုင်ငံတစ်ဝန်းလုံးကို ဖုံးလွှမ်းမည့် ဝိညာဉ်ဖြတ် အစီအရင်ကို ထပ်မံ ခင်းကျင်းနိုင်သည်။ ထိုအခါ ရရှိလာမည့် နတ်ဘုရားသိုက်စွမ်းအားများက သူ့အား လူသားဧကရာဇ်ကျန်းနှင့် အဆင့်တူညီသွားအောင် တွန်းတင်ပေးနိုင်လိမ့်မည်။

လောကတွင် ဒုတိယမြောက် မဟာယာနအဆင့်ပုဂ္ဂိုလ်ကြီး ဖြစ်လာတော့မည်။

"နှုတ်ဆက်ပါတယ်... ဧကရီ။"

ဆွန်းယွမ်သည် အောင်ပွဲ သေချာနေပြီဟု ယုံကြည်ကာ ယွီယင်ကို သတ်မည့် နောက်ဆုံး တိုက်ကွက်ကို အသုံးပြုရန် ပြင်လိုက်စဉ်၊ သံမဏိအလား ခိုင်မာသော လက်တစ်ဖက်က သူ့လက်ကောက်ဝတ်ကို တင်းကျပ်စွာ ဆုပ်ကိုင်လာပြီး လှုပ်မရအောင် တားဆီးလိုက်သည်။

ဆွန်းယွမ်သည် ထိတ်လန့်တကြား နောက်လှည့်ကြည့်လိုက်ရာ၊ ဒေါသကြောင့် မျက်နှာတစ်ခုလုံး မည်းမှောင်နေသော လူငယ်တစ်ဦးက သူ့အား စိုက်ကြည့်နေသည်ကို တွေ့လိုက်ရသည်။

လူသားဧကရာဇ်ကျန်း။

***