အခန်း (၁၅၅-၁၅၆)

အပိုင်း ၁၅၅

ကျတော့်ကို ရှယ်ယာနည်းနည်းရောင်းပေး

"ဟော"

ရှေ့က ပြည်တွင်း အင်တာနက် ဘုရင်ကြီးနှစ်ဦး တစ်ယောက်တစ်လှည့် စကားနာထိုးရင်း ဘဝအကြောင်းတွေ၊ ခရီးရှည်အကြောင်းတွေ သက်ပြင်းချနေကြသည်ကို ကြည့်ပြီး လင်းဖန်၏ မျက်နှာတွင် ထူးဆန်းသော အမူအရာတစ်ခု ပေါ်လာသည်။

"ဒါနဲ့ စကားမစပ်၊ မင်းရဲ့ လုပ်ငန်းက ဒီလောက် အောင်မြင်နေတာ၊ မင်းကို ဂရုစိုက်ပေးမယ့်သူ ဘေးနားမှာ မရှိတာ တကယ်ကို အဆင်မပြေဘူး။"

စကားလမ်းကြောင်းကို ရုတ်တရက်ပြောင်းကာ မာဟွာထန်က လင်းဖန်ကို ကြည့်ပြီး ပြောလိုက်သည်။

- "မင်းရဲ့ မရီးကို ငါ အကူအညီတောင်းပေးရမလား ရှန်ချန်းမှာ အရည်အချင်းရှိတဲ့ မိန်းကလေးတွေ အများကြီးပဲလေ"

မာဟွာထန်တွင် အခြားမကောင်းသော ရည်ရွယ်ချက်မရှိပေ။ သူသည် စိတ်ရင်းဖြင့် အောင်သွယ်တော် လုပ်ပေးချင်ရုံသာ ဖြစ်သည်။ Penguin နှင့် Longteng တို့ကြား စီးပွားရေးအရ ရင်းနှီးမှုနှင့် အကျိုးစီးပွား ထပ်တူကျမှုများကိုသာ မကြည့်ပါနှင့်။

အမှန်အတိုင်း ပြောရလျှင် Penguin သည် Longteng အပေါ် မည်မျှ အကြွေးတင်နေသည်ကိုပင် မသိနိုင်တော့ပေ။ ယခု ဟောင်ကောင်ဈေးကွက်သို့ ဝင်ရောက်နိုင်ခြင်းကြောင့် Penguin Group ၏ ထုတ်ကုန်များသည် ထိုဒေသတွင် အခိုင်အမာ ခြေကုပ်ယူနိုင်ခဲ့ပြီး အရှေ့တောင်အာရှသို့ပါ တိုးချဲ့နိုင်တော့မည် ဖြစ်သည်။ ထိုနေရာတွင် အဓိကအကျဆုံး အချက်မှာ Longteng Group ပင် ဖြစ်သည်။

Nirvana ဖုန်းများသာ မရှိပါက ဟောင်ကောင်မှတစ်ဆင့် အရှေ့တောင်အာရှနှင့် ကမ္ဘာသို့ ခြေဆန့်ရန်မှာ မလွယ်ကူပေ။ Penguin Group သည်လည်း ဤစစ်ရထားပေါ်တွင် လိုက်ပါပြီး ကမ္ဘာလုံးဆိုင်ရာ ဆက်သွယ်ရေး ဘုရင်ကြီးများနှင့် ယှဉ်ပြိုင်နိုင်စွမ်း ရရှိလာခဲ့သည်။

ကျေးဇူးတရားကို ဆပ်ရန် ခက်ခဲလှသလို၊ လင်းဖန်အနေဖြင့် ဤကျေးဇူးကို လုံးဝ အသုံးချလိမ့်မည် မဟုတ်ဟုလည်း မာဟွာထန်က ခံစားနေရသည်။

သူ့နောက်ကွယ်က အင်အားစု၊ စစ်တပ်၏ ပံ့ပိုးမှု၊ ပြည်သူ့လုံခြုံရေး ဝန်ကြီးဌာနနှင့် စီးပွားရေး ဝန်ကြီးဌာနတို့၏ ထောက်ခံမှုများ ရှိနေသည့်အတွက် သူ့ကို မည်သူကများ ရန်ပြုရဲပါမည်နည်း? ထိုသို့လုပ်ခြင်းမှာ 'ကျင်းထဲမှာ မီးထွန်းပြီး သေလမ်းရှာတာ' (မိမိကိုယ်ကိုယ် သေကြောင်းကြံခြင်း) နှင့် အတူတူပင် ဖြစ်လိမ့်မည်။

"ဒါနဲ့ လင်းညီလေးက အမျိုးသား ကောလိပ်ဝင်ခွင့် စာမေးပွဲမှာ အမှတ်အကောင်းဆုံး ရခဲ့တဲ့သူဆိုတော့ ပညာတတ် အမျိုးသမီးတွေကို ကြိုက်မှာပေါ့။ Shuimu တက္ကသိုလ်က မိန်းကလေးတွေဆိုရင်ကော ဘယ်လိုလဲ"

လျူယွီတုန်ကလည်း ပွင့်ပွင့်လင်းလင်းပင် ဝင်ပြောလိုက်သည်။ ခဏချင်းအတွင်းမှာပင် ဝိုင်းထဲရှိ အင်တာနက် ဘုရင်ကြီးနှစ်ဦးမှာ လင်းဖန်၏ ဘဝလက်တွဲဖော် ကိစ္စအတွက် အောင်သွယ်တော်လုပ်ရန် အပြိုင်အဆိုင် ဖြစ်သွားကြသည်။

တရုတ်တစ်နိုင်ငံလုံးတွင် လင်းဖန်ကဲ့သို့ အခွင့်အရေးမျိုး ရရှိသူ မည်မျှ ရှိပါမည်နည်း။

"ဟား..အကိုတို့ရာ၊ ကျွန်တော်က ငယ်ပါသေးတယ်၊ လောလောဆယ် အဲဒီလို အစီအစဉ် မရှိသေးပါဘူး။"

လင်းဖန်က ပြုံးရင်း ပြောလိုက်သည်။

- "တစ်နေ့နေ့ ကျွန်တော် လက်တွဲဖော် ရှာချင်လာတဲ့အခါကျရင် အကိုတို့ကို ပြောဖို့ မေ့မှာ မဟုတ်ပါဘူး။ အဲဒီကျရင်တော့ မရီးတို့ကို အကူအညီတောင်းပြီး ရှာခိုင်းရမှာပေါ့။"

ဤသို့ ပြောလိုက်စဉ်မှာပင် လင်းဖန်၏ စိတ်ထဲ၌ လှပသော်လည်း အထီးကျန်ဆန်သည့် ပုံရိပ်တစ်ခု၊ ဆီးနှင်းထဲရှိ ဇီးပန်းလေးကဲ့သို့သော အမျိုးသမီးတစ်ဦး၏ ပုံရိပ်က ရုတ်တရက် ပေါ်လာသည်။

"ဒါကတော့ ပြဿနာ မရှိပါဘူး"

လျူယွီတုန်နှင့် မာဟွာထန်တို့ကလည်း ထိုကိစ္စကို ဆက်ပြီး အတင်းအကျပ် မလုပ်တော့ပေ။ သူတို့၏ သဘောထားကို ပြသလိုက်ရုံသာ ဖြစ်သည်။ ထိုအချိန်တွင် လင်းဖန်က တောင်းဆိုချက်အသစ်တစ်ခု လုပ်လိုက်သည်။

- "အကိုတို့ နှစ်ယောက်လုံးဆီမှာ ရင်းနှီးမြှုပ်နှံမှုတွေ ထပ်လိုဦးမလားဆိုတာ ကျွန်တော် သိချင်လို့ပါ။"

"ဟော"

ထိုစကားကို ကြားသောအခါ မာဟွာထန်နှင့် လျူယွိတုန်တို့ ကြောင်သွားကြသည်။ သူက Penguin နှင့် Jindong အုပ်စုကြီး နှစ်ခုလုံးမှာ ရင်းနှီးမြှုပ်နှံဖို့ ကြံစည်နေတာလား။

Penguin ကတော့ အကြောင်းမဟုတ်ပေမယ့် Jindong ကတော့ အခြေအနေ မတူပေ။ လင်းဖန်၏ အမည်အောက်ရှိ Fengteng Investment သည် အမေရိကန်ဒေါ်လာ ၁၀ ဘီလီယံ အသုံးပြုကာ Jindong ၏ ရှယ်ယာ ၃၆ ရာခိုင်နှုန်းကို ဝယ်ယူထားပြီး ဖြစ်သည်။

အဓိက ပိုင်ရှင်ဖြစ်သူ လျူယွီတုန် ကိုယ်တိုင်ပင် အကြီးတန်း အမှုဆောင်များ၏ ရှယ်ယာအားလုံး ပေါင်းမှ ၄၃.၆ ရာခိုင်နှုန်းသာ ပိုင်ဆိုင်ထားခြင်း ဖြစ်သည်။

အကယ်၍ Fengteng Investment က ရှယ်ယာတွေ ထပ်ယူမယ်ဆိုရင် Jindong ရဲ့ အရှင်သခင်က ပြောင်းလဲသွားနိုင်စရာ ရှိသည်။

"ကျွန်တော် Fengteng Investment ကိုယ်စား Penguin Group နဲ့ Jindong Logistics မှာ ရင်းနှီးမြှုပ်နှံချင်ပါတယ်။"

သူတို့နှစ်ဦး၏ သံသယဖြစ်နေသော အမူအရာကို ကြည့်ပြီး လင်းဖန်က ဖြည့်စွက်ပြောလိုက်သည်။

Longteng Group ၏ ထုတ်ကုန် ထုတ်လုပ်မှုများမှာ ပိုမိုများပြားလာပြီး ပြင်ပမှ လော့ဂျစ်စတစ် (Logistics) ကုမ္ပဏီများကိုသာ ငှားရမ်းနေရခြင်းမှာ လိုအပ်ချက်ကို ဖြည့်ဆည်းရန် မလုံလောက်တော့ပေ။ အကယ်၍ တိုက်ရိုက် ဆက်သွယ်ဆောင်ရွက်နိုင်သည့် လော့ဂျစ်စတစ် ကုမ္ပဏီတစ်ခု ရှိနေပါက အခက်အခဲများစွာကို သက်သာစေမည်ဖြစ်သည်။

ကိုယ်ပိုင် လော့ဂျစ်စတစ် စနစ် တည်ထောင်ရန်အတွက် Longteng Group က လုပ်ဆောင်နေသည်မှာ မှန်သော်လည်း ၎င်းမှာ အချိန်အတော်ယူရပြီး နှစ်နှစ်၊ သုံးနှစ်အတွင်း ပြီးမြောက်နိုင်မည့် ကိစ္စမဟုတ်ပေ။

Jindong Logistics သည် Jindong Group ၏ လက်အောက်ခံဖြစ်ပြီး နိုင်ငံတစ်ဝန်းရှိ ကိုယ်ပိုင်ကုန်လှောင်ရုံများမှတစ်ဆင့် ကုန်သည်များအတွက် လော့ဂျစ်စတစ် ဝန်ဆောင်မှုများကို ပေါင်းစပ်ပေးထားကာ ကုန်ပစ္စည်း စီမံခန့်ခွဲမှုနှင့် အော်ဒါများကို စနစ်တကျ ကိုင်တွယ်ပေးသည်။

၎င်းသည် ပြည်တွင်းရှိ စမတ် လော့ဂျစ်စတစ် စနစ်များတွင် ထူးခြားပြီး အသေးစား၊ အလတ်စား ပစ္စည်းများ၊ အေးခဲစနစ်၊ B2B နှင့် နိုင်ငံဖြတ်ကျော် ဝန်ဆောင်မှုများအပြင် လူထုအခြေပြု (Dada) စသည့် လော့ဂျစ်စတစ် ကွန်ရက် ခြောက်ခုကို ပိုင်ဆိုင်ထားသည်။

အင်အားအရ ကြည့်လျှင်လည်း Jindong Logistics သည် Shunfeng (SF Express) ပြီးလျှင် ပြည်တွင်းရှိ လော့ဂျစ်စတစ် ကုမ္ပဏီအများစုကို ကျော်လွန်ကာ ဒုတိယနေရာတွင် ရှိနေသည်။

ထို့ကြောင့် လင်းဖန်သည် Jindong Logistics ကို ပစ်မှတ်ထားခြင်း ဖြစ်သည်။

"ပြဿနာ မရှိပါဘူး Longteng ရဲ့ ဥက္ကဋ္ဌကသာ Penguin မှာ လာပြီး ရင်းနှီးမြှုပ်နှံမယ်ဆိုရင် ရှယ်ယာဈေးတွေတောင် တက်သွားဦးမှာ။"

ခဏအကြာတွင် မာဟွာထန်က ပထမဆုံး ပြန်လည်ဖြေကြားလိုက်သည်။

ဒါက နောက်ပြောင်နေတာ မဟုတ်နိူင်တော့။

Longteng Group ရဲ့ ဥက္ကဋ္ဌက Penguin မှာ ရင်းနှီးမြှုပ်နှံထားတယ်ဆိုတဲ့ သတင်းသာ ထွက်လာရင် ရင်းနှီးမြှုပ်နှံသူ အများစုက Penguin ကို ပိုပြီး ယုံကြည်လာကြမှာဖြစ်ပြီး ရှယ်ယာဈေးတွေလည်း ထိုးတက်သွားမှာ အသေအချာပါပဲ။

"ကောင်းပြီ၊ မင်း ဘယ်လောက် ရှယ်ယာ လိုချင်သလဲ ပြောပါ၊ ငါ ပေးပါ့မယ်။ လိုအပ်ရင် Longteng Group အနေနဲ့ ကုမ္ပဏီရဲ့ စီမံခန့်ခွဲမှုနဲ့ လုပ်ငန်းလည်ပတ်မှုတွေမှာ တိုက်ရိုက် ပါဝင်နိုင်ပါတယ်"

လျူယွိတုန်ကလည်း ချက်ချင်းပင် သဘောထားကို ဖော်ပြလိုက်သည်။

အကယ်၍ လင်းဖန်က Jindong Group တစ်ခုလုံးကို ရွေးချယ်ခဲ့လျှင် သူ ဤမျှ ရက်ရောလိမ့်မည် မဟုတ်သော်လည်း Jindong Logistics ကတော့ အခြေအနေ မတူပေ။ Jindong Group ကိုယ်တိုင်ကလည်း ၎င်းကို သီးခြား လည်ပတ်ရန် ပြင်ဆင်နေခြင်း ဖြစ်သည်။

၂၀၁၈ ခုနှစ် အစပိုင်းတွင် Jindong Logistics သည် ပြင်ပမှ ရင်းနှီးမြှုပ်နှံမှု အမေရိကန်ဒေါ်လာ ၂.၅ ဘီလီယံ ခန့်ကို လက်ခံခဲ့သော်လည်း လျူယွိတုန်၏ ကိုယ်ရေးကိုယ်တာ ပြဿနာများကြောင့် အောင်မြင်မှု မရရှိခဲ့ပေ။

နှစ်ဝက်ပိုင်းတွင် တစ်ဦးချင်း ဖောက်သည်များအတွက် အမြန်ချောပို့ လုပ်ငန်းကို စတင်ခဲ့သော်လည်း ရန်ပုံငွေ မလုံလောက်မှုကြောင့် ရလဒ်မှာ အလွန်ဆိုးရွားခဲ့သည်။

ထို့ကြောင့် Fengteng ကဲ့သို့သော အင်အားကြီးကုမ္ပဏီက လာရောက်ရင်းနှီးမြှုပ်နှံပေးမည်ဆိုလျှင် ထိုထက်ကောင်းသည့်အရာ မရှိတော့ပေ။

"အကိုတို့ သက်သက်သာသာပဲ ထားပေးပါ၊ ကျွန်တော်က မူလရှယ်ယာတွေကိုပဲ လိုချင်တာပါ။"

လင်းဖန်၏ မျက်လုံးများမှာ တောက်ပနေပြီး သူ၏ လေသံမှာလည်း အလွန်ပင် လေးနက်လှသည်။

လျိုယိတုန်းက မစဉ်းစားဘဲ

"ပြဿနာ မရှိဘူး"

ဟု ပြန်ဖြေလိုက်သော်လည်း မာဟွာထန်ကမူ တွန့်ဆုတ်သွားသည်။ ၎င်းမှာ ရင်းနှီးမြှုပ်နှံမှုကို လက်ခံရန် မဟုတ်ဘဲ လက်ရှိ Penguin Group တွင် မူလရှယ်ယာ အနည်းငယ်သာ ကျန်ရှိတော့သောကြောင့် ဖြစ်သည်။

စာရင်းဝင် ကုမ္ပဏီတစ်ခုဖြစ်သည့်အားလျော်စွာ မူလရှယ်ယာများကို ရင်းနှီးမြှုပ်နှံသူများက မျက်စိကျနေကြပြီးဖြစ်ရာ ယခုမှ ထိုရှယ်ယာများကို စွန့်လွှတ်ပေးရန်မှာ မလွယ်ကူလှပေ။

"ကျွန်တော် Penguin Group ရဲ့ ရှယ်ယာ အများကြီး မလိုချင်ပါဘူး၊ ၄ ဒါမှမဟုတ် ၅ ရာခိုင်နှုန်းလောက်ဆို ရပါပြီ။"

လင်းဖန်က မာဟွာထန်၏ တွန့်ဆုတ်မှုကို ရိပ်မိပုံရပြီး တိုက်ရိုက်ပင် ပြောလိုက်သည်။

- "လော့ဂျစ်စတစ် ကိစ္စမှာတော့ များလေ ကောင်းလေပါပဲ။"

"မင်းအတွက်တော့ ဒါက သိပ်မများဘူးပေါ့!"

မာဟွာထန်က သူ့ကို အားမလိုအားမရ ကြည့်လိုက်သည်။ Penguin Group ၏ လက်ရှိ ဈေးကွက်တန်ဖိုးမှာ အမေရိကန်ဒေါ်လာ ၄၀၀ ဘီလီယံ ရှိနေပြီး ၄ ရာခိုင်နှုန်းဆိုလျှင်ပင် ဒေါ်လာ ၁၆ ဘီလီယံ ရှိနေသည်။

တရုတ်နိုင်ငံတွင် ထို ၁၆ ဘီလီယံမှာ ယွမ်ငွေ ဘီလီယံ ၁၀၀ နှင့် ညီမျှသည်။

ထို့အပြင် Penguin Group သည် စာရင်းဝင် ကုမ္ပဏီတစ်ခု ဖြစ်သည့်အတွက် တည်ထောင်သူဖြစ်သည့် သူ့မှာပင် ရှယ်ယာ အများကြီး မရှိတော့ပေ။ အကယ်၍ သူက ရှယ်ယာတွေကို ရောင်းချပေးမယ်ဆိုရင် သူ့ဆီကနေပဲ ဖဲ့ပေးရမှာဖြစ်ပြီး အဲဒါက မာဟွာထန်ရဲ့ ဒါရိုက်တာအဖွဲ့ ဥက္ကဋ္ဌ နေရာကို ထိခိုက်လာနိုင်စရာ ရှိသည်။

မည်သူမျှ မိမိပင်ပန်းကြီးစွာ တည်ထောင်ခဲ့သော ကုမ္ပဏီကို သူတစ်ပါးလက်ထဲ လွယ်လွယ်ကူကူ မထည့်ပေးလိုကြပေ။

ယခင်က အမေရိကန်တွင် Apple တည်ထောင်သူ ကြုံတွေ့ခဲ့ရသော သင်ခန်းစာမှာ အကောင်းဆုံး ဥပမာပင် ဖြစ်သည်။

အမှန်စင်စစ် အပြင်ပန်းတွင် ကြေညာထားသော အချက်အလက်များထက် မာဟွာထိန်တွင် အရန်အစီအစဉ်များ ရှိနေမည်မှာ အသေအချာပင် ဖြစ်သည်။ အကယ်၍ သူ၏ ရာထူးကို ခြိမ်းခြောက်လာပါက ထိုပြင်ပရှယ်ယာများက သူ၏ ထိန်းချုပ်မှုကို တစ်မူထူးခြားသော အဆင့်သို့ မြှင့်တင်ပေးနိုင်မည်ဖြစ်သည်။ အလွန်အမင်း မလိုအပ်ဘဲ သူ၏ ဖဲချပ်အားလုံးကို ထုတ်ပြလိမ့်မည် မဟုတ်ပေ။

...................................................

အပိုင်း ၁၅၆

လီကျဲခိုင်က နောင်တရတယ်တဲ့လား

"ဒါနဲ့ပတ်သက်လို့ ငါ ပြန်သွားပြီး အရင်ဆွေးနွေးလိုက်ဦးမယ်။ ဘယ်လောက်အထိ ဖဲ့ပေးလို့ရမလဲဆိုတာတော့ အခုလောလောဆယ် မသေချာသေးဘူး။"

ခဏတာ စဉ်းစားပြီးနောက် မာဟွာထန်က လေးလေးနက်နက် ပြောလိုက်သည်။

Penguin Group တွင် သူ၏ ရာထူးအရ စကားတစ်ခွန်းဆိုလျှင် အရာရောက်သည်ဟု ဆိုနိုင်သော်လည်း၊ ရှယ်ယာအမြောက်အမြား ပိုင်ဆိုင်ထားကြသော ရင်းနှီးမြှုပ်နှံသူများစွာ ရှိနေသေးသည်။ အကယ်၍ သူက ရင်းနှီးမြှုပ်နှံသူအသစ်ကို အဆင်အခြင်မဲ့ လက်ခံလိုက်ပါက ထိုသူများ၏ ကန့်ကွက်မှုကို မလွဲမသွေ ကြုံရပေလိမ့်မည်။

ထို့ကြောင့် မာဟွာထန်ကိုယ်တိုင်ပင် ရှယ်ယာမည်မျှ ပေးနိုင်မည်ကို အာမမခံရဲခြင်း ဖြစ်သည်။

"ကောင်းပါပြီ"

လင်းဖန်လည်း နားလည်ပါသည်။ Penguin ကဲ့သို့ အရှိန်အဟုန်ဖြင့် တက်လှမ်းနေသော အင်တာနက် ကုမ္ပဏီများသည် ပြဿနာပေါင်းစုံ ကြုံနေရသော Jindong နှင့် မတူပေ။ ဦးနှောက်ကြည်လင်နေသရွေ့တော့ မိမိရှယ်ယာတွေကို တခြားသူလက်ထဲ အလကားသက်သက် ထည့်ပေးချင်မည့်သူ မရှိနိုင်ပေ။

"အကိုမာက ပြောပြီးပြီဆိုတော့ ကျွန်တော်လည်း ကျွန်တော့်သဘောထားကို ပြောပါရစေ၊ ၃၀ ရာခိုင်နှုန်းပေးမယ်။ မလောက်သေးဘူးဆိုရင်လည်း ထပ်တိုးလို့ရပါတယ်။"

ဘေးနားမှ လျူယွီတုန်က မည်သည့်အမူအရာမျှမပျက်ဘဲ ရင်ဘတ်ကို ပုတ်ကာ ပြောလိုက်သည်။

လွန်ခဲ့သော နှစ်များအတွင်း Jindong Group သည် Jindong Logistics ကို စတော့ဈေးကွက်သို့ တင်နိုင်ရန်အတွက် ပြည်ပမှ စွန့်ဦးတီထွင် ရင်းနှီးမြှုပ်နှံမှုများကို အဆက်မပြတ် ဆွဲဆောင်ခဲ့သည်။ စာရင်းဝင်သွားသည်နှင့် ထိုရှယ်ယာများသည် အဆပေါင်းရာချီသော အမြတ်အစွန်းများကို ထုတ်ပေးနိုင်မည်ဖြစ်သည်။

ထို့ကြောင့် ၄၀ ရာခိုင်နှုန်းအထိ ပေးရန်ပင် လျူယွိတုန်က ဝန်မလေးဘဲ ကတိပေးရဲခြင်း ဖြစ်သည်။

"၄၉ ရာခိုင်နှုန်း။"

လင်းဖန်က သေချာစဉ်းစားပြီးနောက် ထိုကဲ့သို့ ထိရှလွယ်သော ကိန်းဂဏန်းတစ်ခုကို ပြောလိုက်သည်။

လက်ရှိတွင် Jindong Logistics သည် အလွန်အမင်း ရေပန်းစားခြင်း မရှိသေးသလို စွန့်ဦးရင်းနှီးမြှုပ်နှံသူ အနည်းငယ်သာ စိတ်ဝင်စားကြသော်လည်း၊ တစ်နေ့တွင် ၎င်းသည် Longteng Group ၏ တစ်ဦးတည်းသော မိတ်ဖက်ဖြစ်လာပါက အခြေအနေ ပြောင်းလဲသွားပေလိမ့်မည်။ စာရင်းဝင်ပြီးနောက် ရှယ်ယာဈေးနှုန်းမှာ Jindong Mall ထက်ပင် နိမ့်ကျလိမ့်မည် မဟုတ်ပေ။

သူက ရှယ်ယာအများကြီး ထပ်မတောင်းရခြင်းမှာ လျူယွီတုန်ကို အိမ်ရှင်ထက် ဧည့်သည်က ပိုဗိုလ်ကျသလိုမျိုး ခံစားချက် မပေးချင်သောကြောင့် ဖြစ်သည်။ ထို့အပြင် Longteng Group သည် နောင်တွင် ကိုယ်ပိုင် လော့ဂျစ်စတစ် စနစ်တစ်ခုကို မလွဲမသွေ တည်ထောင်မည်ဖြစ်ရာ ဤနေရာတွင် အင်အားကုန်ခံနေရန် မလိုအပ်ပေ။

နောင်တွင် စာရင်းဝင်ပြီးနောက် အထူးအခြေအနေမရှိပါက လင်းဖန်သည် ထိုရှယ်ယာများကို ဆက်လက်ကိုင်တွယ်ထားမည်မဟုတ်ဘဲ အမြတ်ရချိန်တွင် ပြန်လည်ရောင်းချခြင်းကသာ အကောင်းဆုံး ရွေးချယ်မှု ဖြစ်သည်။

"ဒါဆိုရင် နောက်မှ ကျွန်တော့်အတွင်းရေးမှူးကို ရှယ်ယာလွှဲပြောင်းစာချုပ် ယူခိုင်းလိုက်မယ်။"

လျူယွီတုန်က ပြုံးလျက် သဘောတူလိုက်သည်။

Jindong Logistics ကို စာရင်းသွင်းရန် သူ ကြိုးစားနေသည်မှာ ကြာပြီဖြစ်သော်လည်း ရန်ပုံငွေ မလုံလောက်မှုနှင့် စွန့်ဦးရင်းနှီးမြှုပ်နှံသူများ၏ ဝန်လေးမှုကြောင့် မအောင်မြင်ခဲ့ပေ။ ယခုအခါ ကုမ္ပဏီ၏ နေ့စဉ်လုပ်ငန်းဆောင်တာများကို ဝင်ရောက်စွက်ဖက်ခြင်း မပြုဘဲ ဖွံ့ဖြိုးတိုးတက်မှုအတွက် ရန်ပုံငွေ အလုံအလောက် ထောက်ပံ့ပေးနိုင်မည့် မိတ်ဖက်မျိုး ရရှိလာခြင်းမှာ သူ အလိုချင်ဆုံး အရာပင် မဟုတ်ပါလား။

"ကောင်းပြီ၊ ဒါဆို သဘောတူပြီပေါ့။"

လင်းဖန်ကလည်း ပြုံးရင်း ပြောလိုက်သည်။

"ဒါနဲ့ လင်းညီလေး၊ မင်းက ငါတို့ ကုမ္ပဏီနှစ်ခုလုံးမှာ ရင်းနှီးမြှုပ်နှံဖို့ ကြံနေတာဆိုတော့ Longteng Group ကော ရင်းနှီးမြှုပ်နှံသူတွေ လက်ခံဖို့ အစီအစဉ် ရှိလား"

ရုတ်တရက် မာဟွာထန်က အကြံပြုချက်အသစ်တစ်ခု ပေးလိုက်ရာ လျူယွိတုန်ပင် စိတ်ဝင်စားသွားသည်။

စီးပွားရေးလောကတွင် စာရင်းဝင် ကုမ္ပဏီတစ်ခု၏ ရှယ်ယာများကို အရောင်းအဝယ်ပြုလုပ်ခြင်း၊ ပိုမိုကြီးမားသော ရင်းနှီးမြှုပ်နှံသူများကို ဖိတ်ခေါ်ခြင်းနှင့် ငွေကြေးအမြောက်အမြား ရယူခြင်းတို့မှာ ပုံမှန်ပင် ဖြစ်သည်။ အရင်းအနှီးရှိမှသာ ပိုမိုကောင်းမွန်စွာ ဖွံ့ဖြိုးတိုးတက်နိုင်မည်ဖြစ်သည်။

Penguin နှင့် Jindong တို့သည်လည်း ဤလမ်းစဉ်အတိုင်းပင် ဖြစ်သည်။

သို့သော် ကြီးမားသော အလားအလာရှိသည့် ကုမ္ပဏီအကြောင်း ပြောကြကြေးဆိုလျှင် လင်းဖန် ပိုင်ဆိုင်သည့် Longteng သည် ထိပ်တန်း အလားအလာရှိသော လုပ်ငန်းတစ်ခု ဖြစ်နေသည်မှာ အသေအချာပင်။

Longteng Group တွင် နည်းပညာ၊ ဆော့ဖ်ဝဲ၊ မိုဘိုင်းဖုန်း၊ ကွန်ပျူတာ၊ ဂိမ်းနှင့် စက်မှုလုပ်ငန်းဟူ၍ လုပ်ငန်းခွဲ ခြောက်ခု ရှိသည်။ ၎င်းတို့အနက် နည်းပညာ၊ ဆော့ဖ်ဝဲနှင့် မိုဘိုင်းဖုန်း လုပ်ငန်းများကို ရင်းနှီးမြှုပ်နှံမှု အဖွဲ့အစည်းများစွာက မျက်စိကျနေကြသည်။

Longteng Technology သည် လုပ်ငန်းစုကြီးတစ်ခုလုံး၏ အဓိက (Core) ဖြစ်ပြီး သတ္တုကိုယ်ထည်၊ ရေစိုခံစနစ်နှင့် လုံခြုံရေးစနစ်စသည့် မူပိုင်ခွင့်များအားလုံးမှာ ၎င်းတို့၏ ထုတ်ကုန်များ ဖြစ်သည်။ လွန်ခဲ့သော ရက်အနည်းငယ်ကပင် Samsung ကုမ္ပဏီသည် မူပိုင်ခွင့်များ အသုံးပြုခအတွက် အမေရိကန်ဒေါ်လာ သန်း ၅၀၀ ပေးချေကာ သုံးနှစ်စာ အသုံးပြုခွင့် ရယူခဲ့သည်။

ဤကုမ္ပဏီ၏ နောင်အလားအလာမှာ အလွန်ကြီးမားသည်မှာ ယုံမှားသံသယဖြစ်ဖွယ် မရှိပေ။

Longteng Software တွင်မူ Tenglong OS ဟူသော ထုတ်ကုန်တစ်ခုတည်းသာ ရှိသော်လည်း ၎င်းသည် Android နှင့် ယှဉ်ပြိုင်နိုင်စွမ်း ရှိသည်။ နောင်တွင် ၎င်းကို ကွန်ပျူတာ OS အဖြစ်ပါ အသုံးပြုလာနိုင်ပါက မည်မျှအထိ မြင့်မားသွားမည်ကို မည်သူမျှ မခန့်မှန်းနိုင်ပေ။

ထို့အပြင် ကျန်လုပ်ငန်းခွဲများမှာလည်း ငွေကြေးလည်ပတ်မှု ကောင်းမွန်နေပြီး တစ်ခုချင်းစီမှာ အလားအလာရှိသော လုပ်ငန်းများ ဖြစ်ကြသည်။ ထို့ကြောင့် မာဟွာထိန်နှင့် လျိုယိတုန်းတို့မှာ ထိုသို့ မမေးဘဲ မနေနိုင်ကြခြင်း ဖြစ်သည်။

"ဟား! ကျွန်တော့်ရဲ့ အာဏာကို တခြားသူတွေနဲ့ ခွဲဝေယူဖို့ ကျွန်တော် ခွင့်ပြုမယ်လို့ အကိုတို့ ထင်လို့လား"

လင်းဖန်က တိုက်ရိုက် မဖြေဘဲ ရယ်မောကာ စကားလမ်းကြောင်း လွှဲလိုက်သည်။

သို့သော် သူ၏ ဆိုလိုရင်းမှာ ရှင်းလင်းပါသည်။ Longteng Group ကို စာရင်းဝင်ရန် မလိုအပ်သလို အစမှ အဆုံးအထိ သူကိုယ်တိုင် သို့မဟုတ် သူ၏ လက်အောက်ခံ ကုမ္ပဏီမှတစ်ဆင့် ၁၀၀ ရာခိုင်နှုန်း ထိန်းချုပ်ထားလိုခြင်း ဖြစ်သည်။

အမှန်စင်စစ် ကုမ္ပဏီတစ်ခုတွင် ရှယ်ယာ ၅၁ ရာခိုင်နှုန်း ပိုင်ဆိုင်ထားခြင်းမှာ အကြွင်းမဲ့ ထိန်းချုပ်နိုင်စွမ်း ရှိသည်ဟု မဆိုနိုင်ပေ။ အကြောင်းမှာ ရင်းနှီးမြှုပ်နှံသူအသစ်များ ဝင်လာသည်နှင့်အမျှ ထိုရှယ်ယာ ပမာဏမှာ လျော့နည်းသွားနိုင်သောကြောင့် ဖြစ်သည်။

ထိုအချိန်တွင် မိမိလုပ်ချင်သလို လုပ်ရန်မှာ မလွယ်ကူတော့ပေ။ ၅၁ ရာခိုင်နှုန်းသည် ထိန်းချုပ်မှုရှိသည်ဟု ဆိုနိုင်သော်လည်း ၁၀၀ ရာခိုင်နှုန်း ပိုင်ဆိုင်ခြင်းကသာ မိမိစိတ်ကြိုက် စီမံနိုင်မည့် အခွင့်အရေးကို ပေးစွမ်းနိုင်သည်။

မာဟွာထန်နှင့် လျူယွိတုန်တို့လည်း ထိုစကားကို ကြားသောအခါ တစ်ယောက်ကိုတစ်ယောက် ကြည့်လိုက်ကြပြီး ရှယ်ယာကိစ္စကို ထပ်မပြောကြတော့ပေ။

"လင်းညီလေး၊ မင်းတို့ အခုနောက်ဆုံး ထုတ်ထားတဲ့ Kaitian ONE က တော်တော်လေး ခေတ်စားနေတယ်နော်။"

ထိုအချိန်တွင် လျူယွိတုန်က စကားလမ်းကြောင်းပြောင်းကာ အဓိကအချက်ကို ရောက်သွားသည်။

"ဟုတ်တယ်၊ ဟောင်ကောင်မှာ လူတိုင်း Nirvana X ကို ကိုင်နေကြတာတင် မကဘူး၊ အခု Kaitian ONE ကိုပါ ကိုင်နေကြတာ တကယ်ကို မယုံနိုင်စရာပဲ။"

မာဟွာထန်ကလည်း ပြုံးရင်း ပြောလိုက်သည်။

- "လီကျဲခိုင်တောင် နောင်တရနေတယ်လို့ ကြားမိတယ်။"

လင်းဖန်က နှုတ်ခမ်းမဲ့ကာ အေးအေးလူလူ ပြောလိုက်သည်။

- "လီကျဲခိုင်က သူ့အဖေ လီကျားချန်းကို မမီပါဘူး။ ဟောင်ကောင်သားတွေက စိတ်ကျဉ်းမြောင်းလွန်းတာကို သူတို့ဆီကနေ အများကြီး သင်ယူခဲ့ရတယ်။"

အစပိုင်းတွင် Longteng Group သည် Yingke Expansion Group နှင့် မဟာဗျူဟာမြောက် ပူးပေါင်းဆောင်ရွက်ရန် မျှော်လင့်ခဲ့သော်လည်း လီကျဲခိုင်က ငြင်းဆန်ခဲ့ကာ ငါးနှစ်စာ သဘောတူညီချက်ကိုသာ လက်မှတ်ရေးထိုးခဲ့သည်။ အမှန်စင်စစ် လီကျဲခိုင်သည် ဟောင်ကောင် ဆက်သွယ်ရေးဈေးကွက်ကိုသာ သူ ထိန်းချုပ်ထားနိုင်လျှင် မည်သည့်ဖုန်းကို ရောင်းရမည်မှာ သူ၏ ဆုံးဖြတ်ချက်သာ ဖြစ်လိမ့်မည်ဟု တွေးတောခဲ့ခြင်း ဖြစ်သည်။

သို့သော် လူဦးရေ သန်းအနည်းငယ်သာရှိသော ဟောင်ကောင်တွင် Longteng Group ၏ Nirvana X ရောင်းအားမှာ ဆယ်သန်းကျော်သွားလိမ့်မည်ဟု သူ လုံးဝ မထင်မှတ်ထားခဲ့ပေ။

ယခုအခါ တက်ဘလက် ကွန်ပျူတာ ဈေးကွက်သို့ပါ ဝင်ရောက်လာပြီး Kaitian ONE သည် ရောင်းချပြီး လဝက်ပင် မပြည့်သေးမီ ရောင်းအား ၅ သန်းကျော်သွားပြီဖြစ်သည်။ ဟောင်ကောင်တက္ကသိုလ်မှ စီးပွားရေးပညာရှင်တစ်ဦးကမူ Longteng Group သည် ဟောင်ကောင်သားများ၏ စိတ်ထဲတွင် ပြည်တွင်းဖြစ်ကို ကိုယ်စားပြုသည့် အမှတ်တံဆိပ်တစ်ခု ဖြစ်လာနေပြီဖြစ်ကာ အမေရိကန်သားများ၏ စိတ်ထဲရှိ Apple ၏ အဆင့်အတန်းမျိုးနှင့်ပင် တူညီနေပြီဟု ဆိုသည်။

လက်ရှိတွင် Longteng Group ၏ ဟောင်ကောင်ဈေးကွက် ဝေစုမှာ ၈၀ ရာခိုင်နှုန်းအထိ ရှိနေပြီး အကယ်၍ သူတို့သာ အလျော့မပေးခဲ့လျှင် အခြားသော အမှတ်တံဆိပ်များအတွက် ၂၀ ရာခိုင်နှုန်းပင် ကျန်ရှိလိမ့်မည် မဟုတ်ပေ။

...................................................