အန္တရာယ်အလွန်များသော အခြေအနေ၂

"မင်း ငါ့ကို အတင်းအကျပ်လုပ်ခိုင်းတာပဲ" ဤအခြေအနေနှင့် ရင်ဆိုင်ရချိန်မှာတော့ လူသားခန္ဓာကိုယ်ဆေးလုံး အကြောင်းကိုပူပန်နေရန် အချိန်မရှိတော့ဘဲ၊ ၎င်း၏ နတ်ဆိုးစွမ်းအားကို ချက်ချင်းထုတ်ဖော်ကာ မျောက်အိုကြီးကို အသေအကြေ တိုက်ခိုက်ရန်ပြင်ဆင်လိုက်သည်။

တောင်ပိုင်းဟုန်ရှိ ဤမျှကြီးကျယ်ခမ်းနားသော ပွဲတော်ကြီးတွင် ပြိုင်ဘက်ကသာဒဏ်ရာရသွားခဲ့လျှင်၊ ၎င်းသည် မလွဲမသွေပင်ခြေတစ်လှမ်း နောက်ကျသွားလိမ့်မည်။

မျောက်အိုကြီးကို ဤသို့စွန့်စားရသည်မှာ တန်ဖိုးမရှိဟု ခံစားရအောင်လုပ်နိုင်မှသာ၊ ၎င်းအနေဖြင့် အသက်ရှင်လျက်ထွက်ပြေးလွတ်မြောက်နိုင်မည့် အခွင့်အရေး ရရှိနိုင်မည်။

စကားဆုံးသည်နှင့်၊ ကျားသစ်နတ်ဆိုးသည် နောက်ကျောမှ တိတ်ဆိတ်စွာထိုးစိုက်လာသော သေသပ်လှပသည့် အမွေးဓားသွားတစ်ချောင်းကို သတိမပြုမိလိုက်ပေ။ မျောက်အိုကြီးကပင် အမွေးဓားသွား ဖြတ်သန်းသွားနိုင်ရန်နေရာချန်ပေးကာ ၎င်း၏ ဆုပ်ကိုင်ထားမှုကို တမင်တကာလျှော့ချပေးလိုက်သေး၏။

ဒုတ်

ပူနွေးလှသောနတ်ဆိုးသွေးများသည် အမွေးထူထူလက်ချောင်းများကြားမှ ယိုဖိတ်ကျလာခဲ့သည်။

ကျားသစ်နတ်ဆိုးက ထိတ်လန့်တကြားနောက်လှည့်ကြည့်လိုက်သည့် အခိုက်အတန့်တွင်၊ ထိုအမွေးဓားသွားထဲ၌ အချိန်ကြာမြင့်စွာ စုဆောင်းထားခဲ့သောကြောက်မက်ဖွယ်ကောင်းသည့် နတ်ဆိုးစွမ်းအားများသည် နောက်ဆုံးတွင် ပေါက်ကွဲထွက်လာခဲ့ပြီး၊ သိပ်သည်းသော အဖြူရောင်အမွေးများမှ မရေမတွက်နိုင်သော ထက်မြက်သည့်ဓားသွားများအဖြစ်သို့ ပြောင်းလဲသွားကာ၊ဓားသွားတစ်ခုစီတိုင်းသည် တာအိုလက်နက် တစ်ခုထက် မနိမ့်ကျသောအင်အားဖြင့် ကျားသစ်နတ်ဆိုး၏ ခန္ဓာကိုယ်အတွင်း ပျံ့နှံ့သွားပြီး ၎င်း၏ အသားနှင့် သွေးများကို ရူးသွပ်စွာ မွှေနှောက်ဖျက်ဆီးပစ်လေသည်။

၎င်းတို့အနက် အရှည်ဆုံးသော ဓားသွားသည် ထိုနတ်ဆိုးကြီးကို တိုက်ရိုက်ပင် နှစ်ပိုင်းပိုင်းဖြတ်လိုက်၏။

တောင်တန်းလွင်ပြင်များတစ်ခွင်တွင်၊ သတိလစ်မေ့မြောနေသူများမှလွဲ၍ အသိရှိနေသေးသော ကျင့်ကြံသူတိုင်း၏ မျက်လုံးများသည် ထိုပက်ဖြန်းသွားသော အနီရောင်သွေးများဆီသို့ အာရုံရောက်သွားကြသည်။

သူတို့သည် အလိုအလျောက်တံတွေးမြိုချလိုက်မိကြပြီး သူတို့၏ မျက်နှာများတွင် ထိတ်လန့်မှုများ ပြည့်နှက်နေကြ၏။

တောင်ပိုင်းဟုန်မှ ကျင့်ကြံသူများအနေဖြင့် ဤလူများသည် တာအိုပေါင်းစည်းခြင်းနယ်ပယ် နတ်ဆိုးကြီးများအကြား အပြန်အလှန်သတ်ဖြတ်မှုမျိုးကို တစ်ခါမျှ မမြင်တွေ့ခဲ့ဖူးသကဲ့သို့၊၎င်း၏နောက်ကွယ်ရှိ အကြောင်းရင်းများကိုလည်း နားလည်နိုင်စွမ်း မရှိကြချေ။

ယခု ကျားသစ်နတ်ဆိုး ရုတ်တရက်အသတ်ခံလိုက်ရချိန်တွင်၊ သူတို့၏ ရှင်သန်နိုင်မည့် အခွင့်အရေးမှာ ပို၍ပင်နည်းပါးသွားပုံရပြီး၊ သားရဲတစ်ကောင်၏ ဗိုက်ထဲမှ အခြားတစ်ကောင်၏ ဗိုက်ထဲသို့ပြောင်းလဲသွားခြင်းမျှသာ ဖြစ်လေသည်။

"ဒီကုန်းမြေနဲ့ ရေပြင်မှာ ဘာတွေများ ဖြစ်ပျက်နေတာလဲ..." အဘိုးအိုသည် တောင်ထိပ်ဆီသို့ ယိမ်းယိုင်ကာဆုတ်ခွာသွားပြီး၊ သူ၏ အမူအရာမှာ အနည်းငယ် ကြောင်တောင်တောင်ဖြစ်သွားခဲ့၏။

ဤကြောက်မက်ဖွယ်ကောင်းသော မဟာနတ်ဆိုးကြီးများ မည်သည့်နေရာမှရောက်လာသနည်းဆိုတာကို သူ နားမလည်နိုင်အောင် ဖြစ်နေသည်။

တာအိုပေါင်းစည်းခြင်းနယ်ပယ် မဟာနတ်ဆိုးကြီး သုံးကောင်ရောက်ရှိလာသည်ကို သူ ကြည့်နေစဉ်၊ သူ၏ လက်ဖဝါးထဲတွင် တင်းကျပ်စွာဆုပ်ကိုင်ထားသော တိုကင်ပြားသည် တိတ်တဆိတ်လွတ်ကျသွားခဲ့၏။

လတိုကင်ပြားမြေပြင်နှင့် ထိခါနီးအချိန်လေးမှာပင်။

အန်းယီ၏ ကြည်လင်သော အသံသည် မျောက်အိုကြီး၏ စိတ်ထဲတွင် ရုတ်တရက်ပဲ့တင်ထပ်သွားခဲ့၏။

"ကောက်လိုက်။"

"..."

မျောက်အိုကြီးသည် ၎င်း၏ လက်ချောင်းကို အနည်းငယ်ကွေးလိုက်ရာ၊ နတ်ဆိုးစွမ်းအားများ လှိုင်းထသွားပြီး မူလကပြန့်ကျဲနေသော လရောင်များသည် အမှတ်အသားပြားထံသို့ပြန်လည်စုဝေးသွားကာ တစ်ဖန်အလင်းရောင်များ ထွက်ပေါ်လာပြီး အဘိုးအို၏ လက်ဖဝါးထဲသို့ ဖြည်းညင်းစွာ ပြန်လည် ပျံသန်းသွားခဲ့သည်။

ဘတ်..

အဘိုးအိုသည် လတိုကင်ပြားကို ကိုင်ဆောင်ထားရင်း၊တိမ်တိုက်များထဲသို့ ပြန်လည်ထွက်ခွာသွားသော အမွေးထူထူနှင့် ဧရာမလက်မောင်းကြီးကို လိုက်လံကြည့်ရှုနေမိသည်။ ထို့နောက် ကောင်းကင်တစ်ခွင်လုံး လုံးဝ ငြိမ်သက်သွားခဲ့၏။

သိပ်သည်းသော နတ်ဆိုးစွမ်းအားများသည် လျင်မြန်စွာကွယ်ပျောက်သွားခဲ့ပြီး၊ ကျန်ရစ်ခဲ့သော သွေးစီးချောင်းအပျက်အစီးများမှလွဲ၍ မည်သည့်အရာမျှ မဖြစ်ခဲ့သကဲ့သို့ပင်။

သူသည် သူ၏လက်ထဲရှိ တိုကင်ပြားကို ငုံ့ကြည့်ကာ အချိန်အတော်ကြာစဉ်းစားနေပြီးနောက်၊ နောက်ဆုံးတွင် တစ်စုံတစ်ခုကို နားလည်သွားခဲ့၏။

သူတို့... အသက်ရှင်ခဲ့ကြပြီဖြစ်လေ၏။

ထိုသို့ဖြစ်ရသည်မှာ ဤတိုကင်ပြားကြောင့်၊ ပို၍ တိတိကျကျဆိုရလျှင် ၎င်း၏ နောက်ကွယ်ရှိ မသေမျိုးဂိုဏ်းခုနစ်ဂိုဏ်း ကြောင့်ပင်။

ရုတ်တရက် လှုပ်ရှားခဲ့သော ထို နတ်ဆိုးမသေမျိုးသည် တိတ်ဆိတ်နေခဲ့သော်လည်း၊ ၎င်းသည် တစ်ဖက်လူ၏ ရည်ရွယ်ချက်ကို နားလည်နေဆဲပင်။

"သေချာ အလုပ်လုပ်ပါ၊ မင်းကို မတရား ဆက်ဆံမှာ မဟုတ်ပါဘူး။" ဤသည်ကို နားလည်သွားသောအခါ၊ အဘိုးအို၏ စိတ်လှုပ်ရှားမှုများ ရုတ်တရက်မြင့်တက်လာပြီး သူ၏ လက်မောင်းများပင် တုန်ယင်လာခဲ့၏။

ဤမျှအန္တရာယ်များသော အခြေအနေမျိုးတွင်ပင်၊ ဂိုဏ်းခုနစ်ဂိုဏ်းသည် ယခင်က ဂိုဏ်းခုနစ်ဂိုဏ်း အတိုင်းပင် ဖြစ်နေဆဲပါလား။

"ငါ့နောက်လိုက်ခဲ့၊ မသေမျိုးဂိုဏ်းကို ကြိုဆိုကြစို့"ထိုအတွေးဖြင့် သူသည် လက်ကိုမြှောက်ကာ အော်ဟစ်လိုက်ပြီး၊ဘေးအန္တရာယ်မှ လွတ်မြောက်လာကြသော ကျင့်ကြံသူအများအပြားကို ဦးဆောင်၍ ကောင်းကင်ယံဆီသို့ အရိုအသေ ပေးလိုက်ကြလေသည်။

"ဟင်" အဝေးရှိ ကောင်းကင်ယံတွင်၊ အလျင်စလို ပြေးလွှားလာသော ပုံရိပ်တစ်ခုသည် လေထဲတွင် ခေတ္တရပ်တန့်သွားခဲ့၏။

ပိဟိုင် ဂိုဏ်းချုပ်သည် မယုံနိုင်စရာကောင်းလောက်အောင် သူ့ကိုယ်သူငုံ့ကြည့်လိုက်မိသည်။ ဂိုဏ်းချုပ်ရှန်းကို ထွက်ရှာရန်အတွက်၊ သူသည် သူ၏ အငွေ့အသက်များကို ဖုံးကွယ်ထားရန် အလွန်ကြိုးစားအားထုတ်ခဲ့ရ၏။

သူ အသက်ကြီးလာသောကြောင့် ကျင့်ကြံခြင်းများကျဆင်းသွားပြီး ဤသာမန်ကျင့်ကြံသူများပင် သူ၏ တည်ရှိမှုကို ခံစားမိနိုင်သွားသည်လော။

"ဟင်း..။" ပိဟိုင် ဂိုဏ်းချုပ်သည် ခေါင်းယမ်းလိုက်ပြီး အရှေ့သို့တိုက်ရိုက်ဆက်သွားလိုက်၏။

မြေကမ္ဘာနယ်ပယ် ကျင့်ကြံသူများသည် အမှန်တကယ်ပင် အလွန်ကျယ်ပြန့်သောအာရုံခံနိုင်စွမ်း ရှိကြသော်လည်း၊ကျယ်ပြောလှသော တောင်ပိုင်းဟုန် နှင့် နှိုင်းယှဉ်ပါက၊ ဘေးအန္တရာယ်တစ်ခုကို ကြိုတင်သိမြင်နိုင်ရန် သူတို့၏ အာရုံခံနိုင်စွမ်းကိုသာအားကိုးနေခြင်းမှာ လုံးဝ မဖြစ်နိုင်ပေ။

မြေကမ္ဘာနယ်ပယ်ကို ထားလိုက်ပါ၊ ကောင်းကင်ဘုံနယ်ပယ် ဆိုလျှင်ပင် ထိုနည်းတူပင် ဖြစ်ပေလိမ့်မည်။

ဥပမာအားဖြင့် ယခုအချိန်တွင်၊ တာအိုပေါင်းစည်းခြင်းအဆင့် နတ်ဆိုးကြီးများ ဤနေရာတွင် သောင်းကျန်းနေကြောင်းကို သူ အမှန်တကယ် အာရုံခံမိခဲ့သော်လည်း၊ သူ ရောက်ရှိလာချိန်တွင် နောက်ကျသွားခဲ့ပြီ ဖြစ်သည်။

သူသည် အချို့ကို ကယ်တင်နိုင်ရန် ကံတရားကိုသာအားကိုးနိုင်ပြီး၊ အကယ်၍မကယ်နိုင်ခဲ့လျှင်လည်း...

ထို့အပြင်၊ သူတို့၏ ဝင်ရောက်စွက်ဖက်မှုနှင့်အတူ တောင်ပိုင်းနဂါးနန်းတော်၏ အကူအညီဖြင့်၊ နတ်ဆိုးများသည် သတင်းအချက်အလက်များကို တဖြည်းဖြည်း ပိုမိုရရှိလာမည်ဖြစ်ရာ၊ ၎င်းတို့အနေဖြင့် သားတော်ခုနစ်ပါးကို ရှောင်ရှားရန် ပိုမို လွယ်ကူသွားမည်ဖြစ်ပြီး၊ ချောင်းမြောင်းတိုက်ခိုက်မှုများကိုပင် တမင်ပြင်ဆင်လာနိုင်ပေသည်။

သို့သော် သူ၏ရှေ့မှ မြင်ကွင်းမှာ အစစ်အမှန် ဖြစ်ပုံရလေ၏။

ဤလက်အောက်ခံ အင်အားစုများမှ ကျင့်ကြံသူများ အားလုံး အမှန်တကယ် အသက်ရှင်ကျန်ရစ်ခဲ့ကြပြီး၊ တော်တော်လေးလည်း တက်ကြွနေပုံရသည်။

သူတို့ကို ကယ်တင်နိုင်မည့် ဒုတိယမြောက် လူဆိုတာ မရှိနိုင်ပေ။

"ငါ ဂိုဏ်းချုပ်ရှန်း ကို တွေ့ပြီလို့ ထင်တယ်။" ပိဟိုင် ဂိုဏ်းချုပ်သည် သူ၏ တာအိုချပ်ပြားကို ထုတ်ယူကာ သူ၏ဂိုဏ်းသို့ သတင်းစကားများ စတင် ပေးပို့လိုက်ရင်စ အတိအကျဘာများဖြစ်ခဲ့သည်ကို ရှင်းလင်းစွာသိရှိနိုင်ရန် မြေပြင်ဆီသို့ ဆင်းသက်သွားလေသည်။

...

တောင်ပိုင်းဟုန် ဂိုဏ်းခုနစ်ဂိုဏ်း သည် တောင်ပိုင်း နဂါးဘုရင် နှင့် ထိပ်တိုက်ရင်ဆိုင်မှု အခြေအနေကို ဆက်လက် ထိန်းသိမ်းထားဆဲပင်။

နှစ်ဖက်စလုံးသည် တစ်ဖက်ကိုတစ်ဖက် စိုက်ကြည့်နေကြ၏။

ယဲ့ကျိုး သည် အကဲစမ်းမှုများ ဆက်တိုက်ပြုလုပ်နေခဲ့သော်လည်း၊ အကြိမ်တိုင်းတွင် ထိုနဂါးအိုကြီးက အရှက်မရှိချက်ချင်းတုံ့ပြန်နေသဖြင့်၊ သူ့ကို တိုက်ခိုက်ရန် အခွင့်အရေးလုံးဝမပေးခဲ့ပေ။

ဤ ကောင်းကင်ဓားဂိုဏ်းချုပ်သည် အလွန်တရာ ထက်မြက်လွန်းလှသည်။

မျက်နှာချင်းဆိုင် ထိပ်တိုက်ရင်ဆိုင်ရသည်ထက်၊ တောင်ပိုင်း နဂါးဘုရင်သည် တစ်စစီလှီးထုတ်ကာသတ်ဖြတ်ခြင်းကို ပိုမိုနှစ်သက်လေ၏။ ၎င်းသည် ပိုမိုနှေးကွေးသော်လည်း၊ ပို၍ နာကျင်ရပေသည်။

ကျင့်ကြံသူများ၏ နယ်ပယ်အဆင့် တိုးတက်မှုနှုန်းသည် နတ်ဆိုးများထက်များစွာ ပိုမို မြန်ဆန်လှပြီး၊ နတ်ဆိုးများအတွက် နှစ်ပေါင်းသိန်းနှင့်ချီ၍ အချိန်ယူရသည့် အရာကို နှစ်ပေါင်းသောင်းနှင့်ချီသည့် အချိန်အတွင်း ရောက်ရှိနိုင်လောက်အောင် လုံလောက်သော်လည်း၊ ပေးဆပ်ရမှုတော့ ရှိဆမြဲပင်။

မိုးမြေ၏ စမ်းသပ်မှုများကို ခံစားရုံသာမက၊ သူတို့အတွက် အဆင့်တစ်ဆင့်ချင်းစီတိုင်းတွင် အဟန့်အတားများကိုလည်း သတ်မှတ်ထားခြင်း ခံရသည်။

ပို၍ အရေးကြီးသည်မှာ၊ သူတို့၏ ခွန်အားသည် သူတို့၏ တာအို နှလုံးသားနှင့်လည်း နီးကပ်စွာ ဆက်စပ်နေခြင်းပင်။

ဥပမာအားဖြင့် အဘိုးကြီးချင်း သည်၊ သူ၏ အဖိုးတန် တပည့်နှင့် ပတ်သက်သည့် ကိစ္စများမှလွဲ၍ကျန်သည့်အချိန်များတွင် တည်ငြိမ်အေးဆေးစွာနေထိုင်တတ်ပြီး ခိုင်မာပြတ်သားကာ ချိုးဖျက်၍မရသော တာအို နှလုံးသား တစ်ခုကို ထိန်းသိမ်းထားနိုင်ပေသည်။

သို့သော် ကျင့်ကြံသူတိုင်း ထိုကဲ့သို့သော တည်ငြိမ်မှုမျိုး မရှိကြချေ။

ယဲ့ကျိုး ကဲ့သို့သော သူဆိုလျှင်၊ သတ်ဖြတ်ခြင်းအငွေ့အသက်များရှိနေပြီး အလွန် ထက်ရှလွန်းလှသည်။

ကောင်းကင်ဓား တစ်လက်အနေဖြင့်၊ သူ့ကို အမြဲတစေ ဓားအိမ်ထဲတွင်သာထည့်ထားပြီး သူ၏ သတ်ဖြတ်ချင်သည့်ရည်ရွယ်ချက်ကို ဖော်ပြခွင့်မပြုပါက၊ သူသည် မကြာမီမှာပင် ထိခိုက်လာပေလိမ့်မည်။

ထို့ကြောင့် သူသည် အဘိုးကြီးချင်း၏ လက်ထဲရှိ ဓားတစ်လက်အဖြစ်သာ ဆက်လက်တည်ရှိနေနိုင်တော့သည်။