အခန်း (၂၃၆၇-၂၃၆၈)

အပိုင်း(၂၃၆၇)

ဝေ့ဝူယင် နှင့် မိုးကုပ်စက်ဝိုင်းများ အကြား မကြာမီ ကျင်းပမည့် ဥဿုံ အဂ္ဂိရတ် တိုက်ပွဲ ၏ အမျိုးမျိုးသော အခြေအနေများနှင့် စည်းမျဉ်းများအပေါ် ပြည့်စုံသော ဆွေးနွေးမှုတစ်ခု ပြုလုပ်ပြီးနောက်၊ သူတို့ ရှစ်ဦးစလုံးသည် ဤတိုက်ပွဲကို လူအများမြင်ကွင်းမှ ဝေးကွာသော နေရာတွင် ပြုလုပ်ရန်နှင့် သူတို့၏ သဘောတူညီချက် အကြောင်းအရာနှင့် ပတ်သက်၍ လျှို့ဝှက်မှု ပုံစံတစ်မျိုးကို ထိန်းသိမ်းထားရန် သဘောတူညီခဲ့ကြလေသည်။ မိုးကုပ်စက်ဝိုင်း ခုနစ်ပါးစလုံး ပါဝင်ယှဉ်ပြိုင်ကြမည် ဖြစ်သောကြောင့်၊ သူတို့အချင်းချင်း ယှဉ်ပြိုင်နေကြခြင်း မဟုတ်လျှင်တောင်မှ၊ သတင်းစကားများ အလွန်အမင်း ပျံ့နှံ့သွားပါက ကြီးမားသော ဂယက်ရိုက်ခတ်မှုများကို ဖြစ်ပေါ်စေနိုင်ပေသည်။

သို့သော်လည်း၊ ပရိသတ် တစ်ခုတော့ ရှိရမည် ဖြစ်လေသည်။ သူတို့ အားလုံးသည် ဂုဏ်ယူဝင့်ကြွားပြီး ယုံကြည်မှုရှိသော သတ္တဝါများ ဖြစ်ကြသောကြောင့် ဤသည်မှာ ညှိနှိုင်း၍မရနိုင်သော အခြေအနေ တစ်ရပ် ပင် ဖြစ်ပေသည်။

ထို့အပြင်... သူ၏ အင်ပါယာ အတွင်း၌ အဂ္ဂိရတ် တာအိုတွင် ထိုအဆင့်အတန်းရှိသော ပါရမီရှင် တစ်ဦး ရှိနေကြောင်းကို ဝေ့ဝူယင်အား သက်သေပြခိုင်းခဲ့ကြပြီး၊ ၎င်းမှာ ဆွေးနွေးမှု၏ သိသာထင်ရှားသော အစိတ်အပိုင်း တစ်ခုကို ယူငင်သွားခဲ့သည့် အနှောင့်အယှက် တစ်ခု ဖြစ်ခဲ့လေသည်။ သူတို့သည် စကားလုံး လှည့်ကွက်များဖြင့် လှည့်စားခံရခြင်းကို ငြင်းဆန်ခဲ့ကြသဖြင့်၊ ဝေ့ဝူယင်သည် ထိုပုဂ္ဂိုလ် တည်ရှိနေကြောင်းကို လျှို့ဝှက်ကျိန်စာများ မှတစ်ဆင့် ပွင့်လင်းစွာ ဝန်ခံရန်မှလွဲ၍ အခြား ရွေးချယ်စရာ မရှိတော့ချေ။ အကယ်၍ သူသာ ရှုံးနိမ့်သွားခဲ့မည်ဆိုလျှင်၊ သက်ဆိုင်ရာ ပုဂ္ဂိုလ်ကို သူတို့လက်သို့ အပ်လျှက် လောင်းကြေး ပြီးမြောက်မှုကို အပျက်သဘောဆောင်ကာ နှောင့်ယှက်မည် မဟုတ်ကြောင်း ဝန်ခံခဲ့ရလေသည်။

အရာအားလုံး ပြောဆို လုပ်ဆောင်ပြီးသွားသောအခါ သူတို့သည် အလွန်အမင်း ဝမ်းမြောက်ဝမ်းသာ ဖြစ်သွားခဲ့ကြပြီး၊ ပြိုင်ပွဲ ပြီးဆုံးသည့် အချိန်အထိ ထိုပါရမီရှင်က မည်သူမည်ဝါဖြစ်ကြောင်းကို ဝေ့ဝူယင်ဘက်က လျှို့ဝှက်ထားချင်နေသည်ကိုပင် ဂရုမစိုက်ခဲ့ကြချေ။

ဝေ့ဝူယင်သည် မိုးကုပ်စက်ဝိုင်းများ သာမက သူတို့၏ သက်ဆိုင်ရာ တာအို ဥပဒေ ထိန်းသိမ်းသူများ ကိုပါ လျှို့ဝှက်ကျိန်စာများ အသီးသီး ပြုလုပ်စေခဲ့လေသည်။ ဤသည်က တာအို ဥပဒေ ထိန်းသိမ်းသူများ အနေဖြင့် လောင်းကြေးကို ထိန်းသိမ်းထားရန် တာဝန်ရှိလာမည် ဖြစ်ပြီး ပြင်းထန်သော အချိန် ကန့်သတ်ချက်များကိုပင် ချမှတ်ထားခဲ့ပေသည်။

ဝေ့ဝူယင်သည် အသေးစိတ် အချက်အလက်များနှင့် ပတ်သက်၍ မည်သည့် ကွက်လပ်လေး တစ်ခုကိုမျှ ဖြေရှင်းခြင်း မရှိဘဲ ချန်လှပ်မထားခဲ့ဘဲ၊ ဖြစ်လာနိုင်ချေရှိသော ဟာကွက်လေးများကိုပင် အခြေအနေများနှင့် အပြန်အလှန် နားလည်သဘောပေါက်မှုများဖြင့် ဖြည့်ဆည်းထားခဲ့ကြပေသည်။

"နင် တကယ်ပဲ နင့်ရဲ့ ပန်းတိုင်ကို အောင်မြင်သွားခဲ့တာပဲ..."

ကောင်းကင်စစ်ဝိညာဉ်သည် ဝေ့ဝူယင်က သူ အလိုရှိသော ရလဒ်ဆီသို့ အပြစ်ကင်းစင်စွာ ရောက်ရှိသွားစေရန် အခြေအနေအား ကိုင်တွယ်သွားပုံ အပေါ် အံ့အားသင့်နေခဲ့လေသည်။ ဤ မိုးကုပ်စက်ဝိုင်းများ သို့မဟုတ် တာအို ဥပဒေ ထိန်းသိမ်းသူများသည် အရူးများ မဟုတ်ကြောင်း သူမ သိရှိထားပေသည်။ သူတို့က မည်ကဲ့သို့ အရူးများ ဖြစ်နိုင်မည်နည်း ။ သူတို့ ဝေ့ဝူယင်၏ အကြံအစည်များ အတွင်းသို့ အပြစ်ကင်းစင်စွာ ကျဆင်းသွားရခြင်း၏ အကြောင်းရင်းမှာ နှစ်ချက် ရှိလေသည်။

ပထမအချက်အနေဖြင့်... အလွန်မြင့်မားသည့် အဂ္ဂိရတ် ပါရမီကို ပိုင်ဆိုင်ထားသည့်တိုင် ဝေ့ဝူယင်သည် ဥဿုံ အဂ္ဂိရတ် တိုက်ပွဲ တစ်ခုတွင် ကောင်းကင် ရှန့်ထို အဂ္ဂိရတ်ပညာရှင်များကို အနိုင်ရနိုင်သည်ဟု တွေးရလောက်သည် အထိ မောက်မာမနေကြောင်းကို သူတို့ မသိရှိခဲ့ကြချေ။ သူတို့က အကြောင်းမဲ့ ကောင်းကင် အဂ္ဂိရတ် ရှန့်ထိုများ ဖြစ်နေကြခြင်း မဟုတ်ချေ။ ယင်းအစား သူ၏ အဓိက ရည်မှန်းချက်မှာ ရှုံးနိမ့်ရန် ပင် ဖြစ်ပေသည်။

မှန်ပေသည်။

ရှုံးနိမ့်ရန် ပင်...။

ဝေ့ဝူယင်သည် အစကတည်းက အနိုင်ရရန် တစ်ကြိမ်တစ်ခါမျှ မတွေးတောခဲ့ဖူးချေ။ အထူးသဖြင့် သူ၏ ရည်မှန်းချက်ကို ရောက်ရှိရန် အတွက် မိုးကုပ်စက်ဝိုင်း ခုနစ်ပါးစလုံး၏ သဘောတူညီမှု လိုအပ်နေသောကြောင့် ဖြစ်ပေသည်။

အခြေအနေ မည်သို့ပင် ရှိစေကာမူ... သူတို့၏ ခွင့်ပြုချက်ကို ရယူရန်အတွက် အဂ္ဂိရတ်ပညာရှင် ခုနစ်ပါးစလုံးကို သူ ရင်ဆိုင်ရမည် ဖြစ်ပြီး၊ တစ်ဦးချင်းစီ ဖြစ်စေ သို့မဟုတ် အားလုံး တစ်ပြိုင်နက်တည်း ဖြစ်စေ ရင်ဆိုင်ရမည် ဖြစ်ပေသည်။ အခြေအနေ နှစ်ခုစလုံးသည် သူ အနိုင်ရရန် အခွင့်အရေးများ အတွက် အားနည်းချက်များ ဖြစ်ကြလေသည်။ ရှုံးနိမ့်ခြင်း ဆိုသည်မှာ အင်ပါယာဆန်သော ဟန်ပန်တစ်ခုနှင့် ဆန့်ကျင်ဘက် ဖြစ်နေပေသည်။ သူတို့အတွက် ကံဆိုးစွာပင် ဝေ့ဝူယင်၏ အင်ပါယာ လမ်းကြောင်းသည် သူတို့ ထင်သကဲ့သို့ ပုံမှန် မဟုတ်လှချေ။

ထို့အပြင်... ယခင်က ဝေ့ဝူယင်ထံတွင် အောင်ပွဲခံရန် မျှော်လင့်ချက် လုံးဝ မရှိခဲ့ချေ။ ဤရည်မှန်းချက်ကို စတင် တွေးတောချိန်တွင် သူသည် မဟာ အဆင့် လောကရှန့်ထို အဂ္ဂိရတ်ပညာရှင် တစ်ဦးသာ ဖြစ်နေသေးသည်။ အဂ္ဂိရတ် တိုက်ပွဲများသည် အားနည်းသော ပြိုင်ပွဲဝင်များကို အံဝင်ခွင်ကျ ဖြစ်စေရန် ချိန်ညှိမှုများ ပြုလုပ်ပေးလေ့ မရှိကြချေ။ အထူးသဖြင့် ကောင်းကင် ရှန့်ထို အဂ္ဂိရတ်ပညာရှင်များကို သူတို့၏ အထူးပြု နယ်ပယ်တွင် ရင်ဆိုင်ရမည် ဖြစ်သောကြောင့် မျှော်လင့်ချက် မရှိသလောက် ဖြစ်သည်။ ၎င်းမှာ ယုံကြည်မှု သို့မဟုတ် ကံကြမ္မာ ကိစ္စ မဟုတ်ဘဲ၊ ကျွမ်းကျင်မှု၊ ကျင့်ကြံခြင်း နှင့် စွမ်းရည် ကွာခြားချက် သက်သက်သာ ဖြစ်လေသည်။

စုရီသည် ဤအစီအစဉ်များကို အရှိန်မြှင့်တင်ရန် မကြုံစဖူးသော အခွင့်အရေး တစ်ရပ်ကို သူ့အား ပေးအပ်ခဲ့သည်။ ဤနောက်ဆုံး ပြကွက်အတွက် စင်မြင့်ကို ပြင်ဆင်ရန် အရေးပါသော တွန်းအား တစ်ခုအဖြစ် လုပ်ဆောင်ပေးခဲ့သည်။ သို့သော်လည်း... ထိုအချိန်မတိုင်မီ ကတည်းက ဤနေရာ၊ ဤအခြေအနေ၊ ဤပန်းတိုင်သို့ လာရောက်ရန် အခြား နည်းလမ်းတစ်ခုကို သူ စီစဉ်နေခဲ့ပြီး ဖြစ်လေသည်။

အထွတ်အထိပ် သူတော်စင်များ ကို ရန်စခြင်း၊ ဂလက်ဆီ တစ်ခုလုံးက စိတ်ဝင်တစား စောင့်ကြည့်နေချိန်တွင် အလွန်အမင်း မောက်မာကာ ရန်လိုစွာ ပြုမူခြင်း၊ နှင့် သူရဲကောင်း တာအို နန်းတော်နှင့် လျှို့ဝှက် ကစားပွဲ အတွင်း အဂ္ဂိရတ် ပါရမီများကို ဖော်ထုတ်ပြသခြင်း တို့မှာ သူ၏ အစီအစဉ်များ အောင်မြင်လာစေရန်အတွက် အခြေခံ အုတ်မြစ်များ အားလုံးပင် ဖြစ်ကြလေသည်။

လက်ရှိ ရလဒ်များအပေါ် အခြေခံ၍ အကြံဉာဏ်များနှင့် တွက်ချက်မှုများတွင် ပြောင်းလွယ်ပြင်လွယ် ရှိနေစေရန် သူ သေချာပေါက် ဆုံးဖြတ်ထားသော်လည်း၊ ဉာဏ်အလင်းရ သူတော်စင် နွေဦးကွင်းပြင်၏ မှတ်ဉာဏ်များကို စုပ်ယူခဲ့ချိန်ကတည်းက သူ၏ မူလ ရည်မှန်းချက်မှာ အများအားဖြင့် ပြောင်းလဲခြင်း မရှိခဲ့ချေ။

အနိုင်ရရန် ကိစ္စနှင့် ပတ်သက်၍မူ...

သာလွန်ခြင်း အဆင့် အရည်အသွေးရှိ လျှို့ဝှက် လောက အဆင့် ဆေးလုံးများကို ဖော်စပ်နေစဉ် ပိုင်ရှု၏ မှော်သန့်စင် ဆေးအိုး ခန္ဓာကိုယ်သည် ပြင်းထန်သော ပျက်စီးမှုများကို ခံစားခဲ့ရပြီးနောက် လောလောဆယ် အသုံးပြု၍ မရနိုင်တော့ချေ။

မည်သည့် အဂ္ဂိရတ် တိုက်ပွဲ တွင်မဆို အဂ္ဂိရတ်ပညာရှင် တစ်ဦး၏ ခွန်အားကို သိသာထင်ရှားစွာ ထောက်ပံ့ပေးသည့် အစိတ်အပိုင်း တစ်ခုမှာ သူတို့၏ မီးဖို ပင် ဖြစ်လေသည်။ ထို့နောက်တွင်... သူ့ထံတွင် မည်သည့် စိတ်ကူးယဉ် အကြံဉာဏ်များမျှ မရှိဘဲ သူ ရည်ရွယ်ထားသော ရှုံးနိမ့်မှုကိုသာ လက်ခံလိုက်လေသည်။

ယွီပေါင်ယွဲ့... ပေါ်လာသည် အထိ...။

ဒုတိယမြောက် ပိုင်ရှုကို ရရှိပြီးနောက်တွင် ခန့်မှန်းရခက်မှု၏ ပြောင်းလဲနိုင်စွမ်းသည် ပြန်လည် အသက်ဝင်လာခဲ့သည်။ အထူးသဖြင့် အတုမဲ့ ဖန်တီးခြင်း အဂ္ဂိရတ် ကြယ်တာရာများ ကို ရရှိပြီးနောက်တွင် ပို၍ပင် မှန်ကန်လှပေသည်။ အစွမ်းကုန် သန့်စင်ခြင်း ဂလက်ဆီ သို့ မဝင်ရောက်မီ သူ၏ အစီအစဉ်များ အားလုံးက ဘယ်သောအခါမျှ ထည့်သွင်းစဉ်းစားနိုင်ခဲ့မည် မဟုတ်သော အနိုင်ရရန် အခွင့်အရေး တစ်ခု သူ့တွင် ရှိနေပြီ ဖြစ်လေသည်။ မည်မျှပင် သေးငယ်စေကာမူ... ၎င်းက ရှိနေခဲ့ပြီ ဖြစ်ပေသည်။ ၎င်းက အကျိုးအမြတ်များကို အမြင့်ဆုံးအထိ ရယူရန် အခွင့်အရေးပင်တည်း။

အရာအားလုံး အဆင်ပြေသွားပြီ ဖြစ်သည်။ မရေမတွက်နိုင်သော ကြယ်တာရာ အလင်းတန်းများ က ဂလက်ဆီ ၏ အပြင်ဘက်မှနေ၍ အစွမ်းကုန် သန့်စင်ခြင်း ဂလက်ဆီ သို့ စတင် ရောက်ရှိလာသည်နှင့်အမျှ ဝေ့ဝူယင်သည် အဆုံးအစမရှိသော အမှောင် ဟင်းလင်းပြင် ကို အကဲခတ်ကြည့်ရှုနေခဲ့လေသည်။

သူ၏ အစစ်အမှန် ရည်ရွယ်ချက်မှာ ဤအရာအတွက် သက်သက် မဟုတ်ဘဲ၊ ကတိပေးထားသော နှစ်နှစ်ကြာ ချိန်းတွေ့မှုအတွက် စာရင်းကို အပြီးသတ်ရန် ပင် ဖြစ်လေသည်။

မည်သို့ပင်ဆိုစေ ယွီစွန်းလီသည် သူ ဘယ်သောအခါမျှ လျစ်လျူမရှုနိုင် သို့မဟုတ် မေ့ဖျောက်မထားနိုင်သော အမျိုးသမီးမျိုး ပင် ဖြစ်ပေသည်။

မည်သည့် ယောက်ျားက ထိုကဲ့သို့ လုပ်နိုင်မည်နည်း။ မည်သည့် ယောက်ျားက ထိုကဲ့သို့ လုပ်ရက်မည်နည်း။

...

မူလအာရုဏ်ဦး နန်းတော်...

သခင်လေးရှန့်သည် ချွေးများ အဆက်မပြတ် ကျဆင်းနေသည်။ သူ၏ ကျောပြင်မှာလည်း ပင်ပန်းနွမ်းနယ်ဟန်ဖြင့် ကိုင်းညွတ်နေပြီး ပြင်းထန်စွာ အသက်ရှူနေရ၏။ မိုးကုပ်စက်ဝိုင်းထက်မှ ကြယ်တစ်လုံး ကဲ့သို့ နူးညံ့သော အလင်းရောင်များ ဖြာထွက်နေသည့် ဆွဲသီးတစ်ခုကို သူ၏ လက်နှစ်ဖက်ဖြင့် ဆုပ်ကိုင်ထားသည်။ ထိုလက်များထက်တွင် သွေးကြောများ ထောင်ထနေ၏။ ထိုသွေးကြောများထဲ၌ သခင်လေးရှန့်၏ ပြင်းထန်လှသော ဝိညာဉ်အင်အားများက ခုန်ပေါက်လှုပ်ရှားနေလေသည်။

ဆွဲသီးအား မပွင့်လာစေရန် ဖိနှိပ်ထားရသည်မှာ အချိန်အတော်ကြာမြင့်ခဲ့သည်။ ထို့ပြင် အလွန်အမင်း ပင်ပန်းခက်ခဲလှသော အားထုတ်မှုများကိုလည်း ပြုလုပ်ခဲ့ရ၏။ အောင်မြင်စွာ ဖိနှိပ်နိုင်ပြီးနောက်မှသာ ဤသခင်လေးသည် ကြမ်းပြင်ပေါ်သို့ ခွေခေါက်ကျသွားခဲ့သည်။ အရိုးများအားလုံး ပျော့ခွေသွားသည့်အလား ပြိုလဲသွားခြင်း ဖြစ်၏။ ထို့နောက် သူသည် ဖော်ပြ၍မရနိုင်လောက်အောင် သက်သာရာရသွားဟန်ဖြင့် သက်ပြင်းတစ်ချက်ကို ငြိမ်းချမ်းစွာ ချလိုက်လေသည်။

အကယ်၍ ဤနေရာသည် မူလအာရုဏ်ဦး နန်းတော်၏ ဆင့်ပွား ဒိုင်မန်းရှင်း နယ်မြေအတွင်း၌သာ ရှိမနေခဲ့လျှင် ဤလုပ်ရပ်ကို အောင်မြင်နိုင်မည် မဟုတ်ချေ။ ထို့ပြင် ဆေဘာ အစီအရင်က ပြင်ပမှ အင်အားလှိုင်းများကို ဖြတ်တောက်ပေးထားခြင်းကြောင့်လည်း သူ တည်ငြိမ်မှုကို ထိန်းသိမ်းနိုင်ခဲ့ခြင်း ဖြစ်သည်။ သူ ဤမျှ ဒုက္ခရောက်ရသည့် အကြောင်းရင်းမှာ အခြားသူကြောင့် မဟုတ်ပေ။ အရိပ်ကွယ် အဖွဲ့ မှ အထွတ်အထိပ် သူတော်စင် တစ်ပါး ရောက်ရှိလာခြင်းကြောင့်ပင် ဖြစ်၏။ အထူးသဖြင့် အရာခပ်သိမ်းကို ဖုံးလွှမ်းနိုင်သော ဆည်းဆာ အရှင်သခင် ရောက်လာခြင်းကြောင့်ပင် ဖြစ်သည်။

"ဟ... ဟ...”

ငြိမ်သက်သွားသော ဆွဲသီးကို ကြည့်ရင်း သခင်လေးရှန့်၏ နှုတ်ခမ်းများက ကွေးတက်သွားသည်။ ထို့နောက် ပြုံးလိုက်ပြီး ငယ်ရွယ်သော ခွန်အားများနှင့် လိုက်ဖက်လှသည့် အောင်ပွဲခံ ရယ်မောသံကြီး ထွက်ပေါ်လာ၏။ အောင်မြင်မှုကြောင့် ရူးသွပ်စွာ မူးယစ်သွားသည့်အလား ပျော်ရွှင်နေခြင်း ဖြစ်သည်။ သူသည် ခေါင်းကို နောက်သို့ပင် ပစ်ချကာ လွတ်လပ်ပေါ့ပါးစွာ လှုပ်ခါနေလေသည်။ သူ၏ လုပ်ရပ်ကြောင့် မည်မျှ ကြီးမားသော ဘေးအန္တရာယ်ကြီးကို ရှောင်လွှဲနိုင်ခဲ့ကြောင်း နားလည်နိုင်သူ အလွန်နည်းပါးလှ၏။ အထူးသဖြင့် ဝေ့ဝူယင် သည် လုံးဝ သိရှိမည် မဟုတ်ပေ။

ကံမကောင်းစွာဖြင့် သူသည် ဆွဲသီးအပေါ်၌သာ အာရုံစိုက်လွန်းနေခဲ့သည်။ ထို့ကြောင့် ဝေ့ဝူယင် က လုံရှီယာ၏ ရုပ်ခန္ဓာကို ဖျက်ဆီးပစ်ခဲ့ကြောင်း သူ မသိလိုက်ချေ။ တစ်မိနစ်ခန့်ကြာအောင် အားရပါးရ ရယ်မောပြီးနောက် သူသည် ဖြည်းညှင်းစွာ မတ်တတ်ရပ်လိုက်သည်။ သူ၏ ညောင်းညာနေသော အရိုးများကို အကြောဆန့်လိုက်သောအခါ ကျောရိုးတစ်လျှောက်မှ အလွန် သက်သောင့်သက်သာရှိသော ခံစားမှုကို ရရှိသွား၏။ ထိုအခါ သူသည် မျက်စိကိုမှိတ်လျက် ထိုသာယာမှုကို ခံစားနေလေသည်။

ဆင့်ပွား ဒိုင်မန်းရှင်း အတွင်း၌ လေပွေ ကဲ့သို့ လည်ပတ်နေသော အမှောင်ထုတစ်ခု ပေါ်ထွက်လာသည်။ ထိုအမှောင်ထုသည် ဖြည်းညှင်းစွာ ပုံပန်းသဏ္ဍာန် ပြောင်းလဲသွားပြီး အမျိုးသမီးတစ်ဦး၏ ကောက်ကြောင်းအလှများကို ပိုင်ဆိုင်ထားသော အရိပ်သဏ္ဍာန်တစ်ခု အဖြစ်သို့ ရောက်ရှိသွား၏။ ထိုပုဂ္ဂိုလ်၏ တိကျသော မျက်နှာသွင်ပြင်ကို မှိုင်းညို့နေသော အမှောင်ထုက ဖုံးကွယ်ထားသည်။ သို့သော် ၎င်း၏ ဆွဲဆောင်မှုရှိလှသော ကိုယ်လုံးကိုယ်ပေါက်မှာမူ အမျိုးသားရော အမျိုးသမီးများ၏ နှလုံးသားကိုပါ လှုပ်ခတ်သွားစေနိုင်လောက်ကြောင်း တစ်ချက်ကြည့်ရုံဖြင့် သိသာထင်ရှားလှပေသည်။

"..."

သခင်လေးရှန့်သည် နှာခေါင်းရှုံ့လိုက်ပြီး သမ်းဝေလိုက်သည်။ ပင်ပန်းနွမ်းနယ်မှုများက သူ၏ စိတ်အာရုံထဲသို့ တဖြည်းဖြည်း ဝင်ရောက်လာ၏။ အရိပ်သဏ္ဍာန်သည် သခင်လေးရှန့်နှင့် မီတာအနည်းငယ်အကွာအထိ တဖြည်းဖြည်း ချဉ်းကပ်လာခဲ့သည်။ ထို့နောက် ထိုအရိပ်၏ ဦးခေါင်းသည် ငယ်ရွယ်သော သခင်လေးကို စိတ်ဝင်တစား စိုက်ကြည့်နေပုံရသည်။

"အနည်းဆုံးတော့ သူ သတိမထားမိခဲ့ဘူးပဲ..."

သခင်လေးရှန့်က ကျေနပ်စွာ ပြုံးလျက် ပြောလိုက်သည်။ ထို့နောက် သူသည် မျက်လုံးများကို ဖွင့်လိုက်၏။ မျက်တောင် တစ်ချက် ခတ်လိုက်သည်။ ထို့နောက် မျက်လုံးများကို ပြန်မှိတ်လိုက်လေ၏။

"အနည်းဆုံးတော့ သူမ သတိမထားမိခဲ့ဘူးပဲ..."

သူက ထပ်မံ ရေရွတ်လိုက်သည်။ ထို့နောက် သူသည် မျက်လုံးများကို ပြန်ဖွင့်လိုက်၏။

ထိုအရိပ်သဏ္ဍာန်က ထိုနေရာ၌ ရှိနေဆဲ ဖြစ်သည်။ သူ၏ နှလုံးသားထဲတွင် ယခင်က တစ်ခါမျှ မခံစားဖူးသော အလွန်အမင်း ထိတ်လန့်ကြောက်ရွံ့မှုများက အရှိန်အဟုန်ပြင်းစွာ တိုးဝင်လာ၏။ ထို့နောက် သူ လက်များကို ဝှေ့ယမ်းကာ စကားများ ထစ်အလျက် ပြောလိုက်သည်။

"ကျ... ကျ... ကျွန်တော် ရှင်းပြ... ရှင်းပြလို့ရပါတယ်..."

အရိပ်သဏ္ဍာန်က အပေါ်ဘက်သို့ ရုတ်တရက် မော့ကြည့်လိုက်သည်။ ထို့နောက် လက်တစ်ဖက်ကို ဝှေ့ယမ်းလိုက်ရာ ကျယ်ပြန့်သော အမှောင်ထု ဝတ်ရုံလက်က ပေါ်ထွက်လာ၏။ ထိုအမှောင်ထု ဝတ်ရုံက သခင်လေးရှန့်ကို မှိုင်းညို့နေသော အရိပ်အလင်းတန်းများဖြင့် လွှမ်းခြုံသွားလေသည်။ ထိုအလင်းတန်းများသည် ကောင်းကင်နှင့် အာကာသ တို့ကိုပင် ပဲ့တင်ထပ်စေနိုင်စွမ်း ရှိပုံပေါ်၏။ လက်တစ်ချက် ဝှေ့ယမ်းလိုက်သည်နှင့် တစ်ပြိုင်နက် ထိုသူနှစ်ဦးသည် အမှောင်ထုထဲတွင် လုံးဝ ပျောက်ကွယ်သွားလေတော့သည်။

***

အပိုင်း(၂၃၆၈)

ဝေ့ဝူယင် ၏ အစစ်အမှန် ခန္ဓာကိုယ်သည် ဟင်းလင်းပြင်ထဲသို့ စိုက်ကြည့်နေသည်။ သူ၏ ကောင်းကင် မျက်လုံးများသည် အာကာသ နှင့် အရာဝတ္ထုမျိုးစုံကို ဖောက်ထွင်းကြည့်ရှုနေ၏။ ထို့နောက် မူလအာရုဏ်ဦး နန်းတော် အတွင်းရှိ ဆင့်ပွား ဒိုင်မန်းရှင်း နယ်မြေကို အာရုံစူးစိုက်လိုက်သည်။ ရုတ်တရက် ကျူးကျော်ဝင်ရောက်လာမှုတစ်ခုကြောင့် သူ သတိဝင်သွားခြင်း ဖြစ်၏။ ဆင့်ပွား ဒိုင်မန်းရှင်း အတွင်း ထားရှိသော ကြိုတင်ပြင်ဆင်ထားမှုများကို အသုံးပြုကာ လှုပ်ရှားဖို့ ပြင်လိုက်သော်လည်း လမ်းခုလတ်တွင်ပင် ရပ်တန့်သွားခဲ့သည်။ အကြောင်းမှာ ထိုအရိပ်သဏ္ဍာန်၏ မျက်နှာသွင်ပြင်က သူ၏ စိတ်အာရုံထဲသို့ ဝင်ရောက်လာသောကြောင့် ဖြစ်၏။ ကျန်ကျန်းဝမ်ထံမှ ရရှိထားသော မှတ်ဉာဏ်များကို ခေတ္တမျှ စဉ်းစားတွေးတောပြီးနောက် သူသည် ခေါင်းခါလိုက်သည်။ ထို့နောက် ဤကိစ္စကို ခေတ္တ ဘေးဖယ်ထားလိုက်လေသည်။

ပို၍ အရေးကြီးသော ကိစ္စမှာ အစွမ်းကုန် ပေါင်းစည်းခြင်း စိတ်အာရုံနယ်မြေ မှ သူရရှိခဲ့သော အကျိုးအမြတ်များပင် ဖြစ်သည်။ ထိုနယ်မြေသည် ပေါင်းစည်းခြင်း အမတေ ကို ထုတ်လုပ်နိုင်သော အကျိုးကျေးဇူးများ ရှိ၏။ ထို့ကြောင့် ၎င်းကို ရယူနိုင်သော ကျင့်ကြံသူ များအတွက် အလွန် ကြီးမားလှသော ကောင်းချီးတစ်ခု ဖြစ်လေသည်။ ထို အမတေ သည် သန့်စင်ပြီးသား စိတ်စွမ်းအင်များမှနေ၍ အသွင်ပြောင်းထားသော အထူးရုပ်ဝတ္ထုတစ်ခု ဖြစ်၏။ ၎င်းသည် ဝိညာဉ် ကို အားဖြည့်ပြုစုပျိုးထောင်ရာတွင် မယုံကြည်နိုင်လောက်အောင် ထူးကဲသော အာနိသင် ရှိလေသည်။

ဤအလဲအလှယ်အတွက် သဘောတူညီချက် အစိတ်အပိုင်းတစ်ခုအနေဖြင့် သူသည် ဤစိတ်အာရုံနယ်မြေသို့ ကန့်သတ်အချိန်တစ်ခုအထိ ဝင်ရောက်ခွင့် ရရှိခဲ့သည်။ ဖီဆန်လေးသည် ပြိုင်ဘက်ကင်းသော အရည်အသွေးများကို ပိုင်ဆိုင်ထား၏။ ထို့ကြောင့် ၎င်းကို အသွင်ပြောင်း ကြားခံနယ်တစ်ခုအဖြစ် အသုံးပြုနိုင်ကြောင်းကို မိုးကုပ်စက်ဝိုင်း များက ကြိုတင်ခန့်မှန်းနိုင်ခဲ့ခြင်း မရှိပေ။ ၎င်းက အလွန် များပြားလှသော အထွတ်အထိပ် နေစွမ်းအင်များကို ပေါင်းစည်းခြင်း အမတေ အဖြစ်သို့ အသွင်ပြောင်းပေးနိုင်သည်။ ထို့ပြင် ဖီဆန်လေး သည် သူ၏ ခန္ဓာကိုယ် အစိတ်အပိုင်းတစ်ခုလည်း ဖြစ်၏။ သူသည် ကြယ်တာရာ ပါရဂွန် ကိုယ်ခန္ဓာကို ပိုင်ဆိုင်ထားသူ ဖြစ်ရာ ကုန်ဆုံးသွားသော စွမ်းအင်များကို အလွန် လျင်မြန်သော နှုန်းထားဖြင့် ပြန်လည်ဖြည့်တင်းပေးနိုင်စွမ်း ရှိပေသည်။

ဤအရာ၏ ရလဒ်အနေဖြင့် အလွန် များပြားလှသော ပေါင်းစည်းခြင်း အမတေ များကို ရရှိခဲ့သည်။ ထိုအရာများကို အလွန် လျင်မြန်ပြီး အထိရောက်ဆုံးသော နည်းလမ်းဖြစ်သည့် ခပ်ကြမ်းကြမ်း အသွင်ပြောင်းခြင်းဖြင့် ဖန်တီးခဲ့ခြင်း ဖြစ်၏။ ၎င်းသည် ထိတ်လန့်ဖွယ်ရာကောင်းလောက်အောင် များပြားသော ပေါင်းစည်းခြင်း အမတေ များကို ထုတ်လုပ်ပေးနိုင်သည့် သံသရာစက်ဝန်း တစ်ခုပင် ဖြစ်လေသည်။

ဤရရှိမှု တစ်ခုတည်းကပင် သူ၏ စွန့်စားခန်း တစ်ခုလုံးအတွက် အလွန် တန်ဖိုးရှိလှကြောင်း သက်သေပြရန် လုံလောက်နေပြီ ဖြစ်သည်။

ဝေ့ဝူယင်သည် လေ့လာဆန်းစစ်မှုများကို သူ၏ ဒုတိယ စိတ်အာရုံ ထံသို့ လွှဲပြောင်းပေးထားခဲ့သည်။ ထိုစိတ်အာရုံကလည်း ၎င်းကို ရူးသွပ်မိုက်မဲစွာဖြင့် နှစ်ခြိုက်သဘောကျနေ၏။ အချိန်တိုအတွင်းမှာပင် သူ၏ ဒုတိယ စိတ်အာရုံက ပေါင်းစည်းခြင်း အမတေ ၏ အခြားသော အရေးကြီးသည့် အသုံးဝင်မှု သုံးခုကို ရှာဖွေတွေ့ရှိခဲ့ပြီး ဖြစ်သည်။ ထိုအသုံးဝင်မှုများသည် အစစ်အမှန် ဝိညာဉ် သို့မဟုတ် ကျင့်ကြံခြင်း ဝိညာဉ်၏ အဆင့်ကို မြှင့်တင်ရန်အတွက် ပြုစုပျိုးထောင်ပေးခြင်းနှင့် ကျင့်ကြံခြင်း တိုးတက်မှုများ ချောမွေ့စေရန် တည်ငြိမ်မှုပေးသော အမှတ်တစ်ခုအနေဖြင့် ဥပဒေသ မျိုးစေ့၏ လိုအပ်ချက်ကို လျှော့ချပေးခြင်း စသည့် အကျိုးကျေးဇူးများအပြင် အပိုထပ်ဆောင်း တွေ့ရှိချက်များ ဖြစ်ပေသည်။

ပထမအချက်အနေဖြင့် ၎င်းကို အဂ္ဂိရတ် ပစ္စည်းတစ်ခုအဖြစ် အသုံးပြုနိုင်ပြီး ဝေ့ဝူယင် လျစ်လျူရှုထားခဲ့သော ဆေးဖော်စပ်ခြင်း ဖော်မြူလာ အများအပြားအတွက် အစားထိုးပစ္စည်းတစ်ခုအဖြစ် အသုံးပြုနိုင်ခြေ ရှိသည်။ အစားထိုးပစ္စည်းများသည် အလွန် ရှားပါးလှ၏။ အကြောင်းမှာ ၎င်းတို့သည် သန့်စင်ပြီးနောက်၌ မူလပစ္စည်းနှင့် အတိအကျ ကိုက်ညီစေရန် အသွင်ပြောင်းနိုင်ရမည် ဖြစ်သောကြောင့်တည်း။ ဤသည်မှာ အလွန် ခက်ခဲသော လိုအပ်ချက်တစ်ခု ဖြစ်သည်။

ထုတ်ကုန်တစ်ခုကို ဖန်တီးရန် အစားထိုးပစ္စည်းများကို အသုံးပြုသော ဆေးဘက်ဝင် အပင်ပညာရပ် သို့မဟုတ် သံရည်ကျို ဖန်တီးခြင်း ပညာရပ်များနှင့် ခြားနားစွာပင် အဂ္ဂိရတ် ပညာရပ်၏ အစားထိုးခြင်းမှာ အသွင်ပြောင်းခြင်းနှင့် သန့်စင်ခြင်း ဖြစ်သည်။ ထို့ပြင် အစားထိုးမည့် ပစ္စည်း၏ ဂုဏ်သတ္တိများနှင့် အသေးစိတ် အချက်အလက်များ အတိအကျ ပါဝင်စေရန်အတွက် အသွင်ပြောင်းရခြင်းလည်း ဖြစ်၏။

ဤတွေ့ရှိချက်က ၎င်းသည် ထုတ်ကုန်အသစ်တစ်ခုအတွက် အခြေခံအဖြစ် လုပ်ဆောင်ပေးနိုင်သော အကောင်းဆုံး ပစ္စည်းတစ်ခု ဖြစ်ကြောင်းကိုလည်း ဆိုလိုပေသည်။

ဒုတိယအချက်အနေဖြင့် ဝိညာဉ်ကို ပြုစုပျိုးထောင်ခြင်းသည် ကျင့်ကြံသူများ၊ သားရဲများ သို့မဟုတ် ကျင့်ကြံခြင်း ဝိညာဉ် များအတွက်သာ ကန့်သတ်ထားခြင်း မဟုတ်ပေ။ ဝေ့ဝူယင် သည် သူ၏ အ‌ခြေတည် ဆေဘာ ဝိညာဉ် ကို တိုးတက်စေမည့် လမ်းကြောင်းကို ရှာတွေ့ခဲ့ပြီး ဖြစ်သည်။ စုရီ ၏ ဆေဘာ ဓားဝိညာဉ် ကဲ့သို့ စတုတ္ထအဆင့်သို့ တက်လှမ်းနိုင်မည့် အလားအလာများ ရှိနေ၏။

လက်ရှိ တတိယအဆင့် အခြေတည် ဆေဘာ ဝိညာဉ် ဖြစ်သော ဒြပ်စင်သည် သူ၏ 'သေမျိုး နှင့် သူတော်စင်' တိုက်ပွဲတွင် အနိုင်ရရှိရန်အတွက် အလွန် အရေးပါခဲ့သည်။ ထို့ပြင် နက်နဲသော ဆေဘာ စွမ်းအင်က သူ ဆေဘာ ကို ဆွဲထုတ်လိုက်တိုင်း သူ၏ ကန့်သတ်ချက်များကို အကြိမ်ကြိမ် ကျော်လွန်သွားစေရန် အခွင့်အရေး ပေးခဲ့ပြီး သူ၏ လွှမ်းမိုးနိုင်သော ခွန်အားအတွက် ကြီးမားစွာ အထောက်အကူ ပြုခဲ့ပေသည်။

စုရီသည် စတုတ္ထအဆင့် အခြေတည် ဓားဝိညာဉ် ကို ပိုင်ဆိုင်ထားသည်။ ၎င်းကို ပိုင်ဆိုင်ထားခြင်းက ကောင်းကင်ရှန့်ထို တစ်ပါးအနေဖြင့် သူတော်စင် တစ်ပါးနှင့် တိုက်ခိုက်ရာတွင် သူ့ အတွက် သိသာထင်ရှားသော အထောက်အကူကို ရရှိစေခဲ့ပြီး လွယ်ကူစွာ အနိုင်ရရှိစေခဲ့၏။ ထို့ပြင် ထိုသူမှာ သာမန် သူတော်စင် တစ်ပါး မဟုတ်ပေ။ ဝေ့ဝူယင် သည် ထိုအရာကို လိုချင်တောင့်တနေခဲ့သည်။ ဒြပ်စင်ကလည်း ၎င်းကို လိုချင်နေ၏။

စုရီ နှင့် ညှိနှိုင်းစဉ်အတွင်း သူက အခြေတည် ဝိညာဉ် များအတွက် ကျင့်ကြံခြင်း နည်းလမ်းတစ်ခုကိုလည်း ထုတ်ဖော်ပြသခဲ့သည်။

နည်းလမ်းကား ရိုးရှင်းသည်။ အဂ္ဂိရတ် တာအိုပင်။ အဂ္ဂိရတ် တာအိုသည် အခြေတည် ဝိညာဉ် များကို ဖန်တီးနိုင်သကဲ့သို့ လိုအပ်သော ပစ္စည်းများနှင့်အတူ အခြေတည် ဝိညာဉ် တစ်ခုကို တိုးတက်စေနိုင်စွမ်း ရှိသည်။ အမှန်စင်စစ်... ဝေ့ဝူယင်သည် သူ၏ ပေါ့ဆမှုအတွက် အနည်းငယ် စိတ်ပျက်မိသည်။ သူ၏ ဒုတိယ စိတ်အာရုံကပင် ၎င်း၏ ရိုးရှင်းမှုအတွက် ကျိန်ဆဲနေခဲ့၏။

သူ့ အနေဖြင့် အခြေတည် ဆေဘာဝိညာဉ် ကို သက်ဆိုင်ရာ ဝိညာဉ်ပြုစုပျိုးထောင်ရေး ပစ္စည်းများ၊ စွမ်းအင်များ သို့မဟုတ် အမတေ များဖြင့် သန့်စင်ရန်သာ လိုအပ်သည်။ ထို့ပြင် အကောင်းဆုံးသော ဝိညာဉ်ပြုစုပျိုးထောင်ရေး ပစ္စည်းမှာ ဝိညာဉ်အလင်း ဖြစ်၏။ စုရီ သည် သူ၏ အခြေတည် ဆေဘာဝိညာဉ် ကို စတုတ္ထအဆင့်သို့ သန့်စင်ရန်အတွက် တဒင်္နယ်မြေဓား၏ ဓားအလင်း အပေါ်၌ အားကိုးခဲ့သည်။ သို့သော် သူသည် အခြားသော ပစ္စည်းများနှင့်အတူ အခြေတည် ဓားဝိညာဉ်၏ အခြေခံကို ခိုင်မာအောင် ပြုလုပ်ပြီးမှသာ ထိုသို့ ပြင်းထန်သော သွေးတိုးစမ်းမှုနှင့် သန့်စင်မှုကို ခံနိုင်ရည်ရှိအောင် ပြုလုပ်ခဲ့ခြင်း ဖြစ်သည်။

သူ၏ အိုမီဂါ ဆေဘာ ဝိညာဉ် အလင်း၊ အယ်ဖာ မူလ ဝိညာဉ် အလင်း၊ ပုံသဏ္ဍာန်မဲ့ ဆန်းကြယ် ဝိညာဉ် အလင်း၊ သတ္တမမြောက် အရင်းအမြစ် ဝိညာဉ် အလင်း တို့နှင့်အတူ ပေါင်းစည်းခြင်း အမတေ ကို ပေါင်းစပ်လိုက်လျှင် ဒြပ်စင် အနေဖြင့် စတုတ္ထအဆင့်သို့ တက်လှမ်းနိုင်ရန်မှာ အချိန်ပြဿနာတစ်ခုသာ ဖြစ်လေတော့သည်။

ဒုတိယ စိတ်အာရုံမှ တွေ့ရှိခဲ့သော တတိယမြောက် အသုံးဝင်မှုမှာ ပေါင်းစည်းခြင်း အမတေသည် ဖန်တီးနေစဉ်အတွင်း အတုအယောင် နတ်ဘုရား ကိုယ်ပွား ကျင့်စဉ် အတွက် အံ့မခန်း အခြေခံတစ်ခုအဖြစ် လုပ်ဆောင်ပေးနိုင်ခြင်း ဖြစ်သည်။ ဒုတိယ စိတ်အာရုံ၏ အယူအဆအရ ထိုသို့ပြုလုပ်ခြင်းဖြင့် ကိုယ်ပွားများသည် ၎င်းတို့၏ သာမည နှင့် အဓိက ဥပဒေသများကို အသုံးပြုနိုင်မည် ဖြစ်သည်။ ဤသည်မှာ ယခင်က တစ်ခါမျှ မရှိခဲ့ဖူးသော အရာပင် ဖြစ်၏။ ဥပဒေသများ၏ အာဏာသည် တစ်ဦးတစ်ယောက်၏ ဝိညာဉ် နှင့် ချိတ်ဆက်နေပြီး ၎င်းကို ထုတ်ယူရန် စဉ်းစား၍မရနိုင်ပေ။ ဝေ့ဝူယင် နှင့် သူ၏ ကြယ်တာရာ ဝိညာဉ် များပင်လျှင် ပြင်းထန်သော ဆိုးကျိုးများနှင့်အတူ ထိုလုပ်ရပ်ကို အောင်မြင်အောင် မစွမ်းဆောင်နိုင်ပေ။ သို့သော် အထောက်အကူပြု အခြေခံအဖြစ် ပေါင်းစည်းခြင်း အမတေ နှင့် ပြင်ပသို့ ထုတ်ယူခြင်းဖြင့် ၎င်းကို အောင်မြင်နိုင်ပေမည်။

အကျိုးဆက်များမှာ သေးငယ်မည် မဟုတ်ချေ။ အကယ်၍ အောင်မြင်ခဲ့လျှင် ဤသည်မှာ သူ၏ အစီအစဉ်များအတွက် အကန့်အသတ်မရှိ အသုံးဝင်မည် ဖြစ်သည်။

ပေါင်းစည်းခြင်း အမတေကြောင့် ရရှိလာမည့် အကျိုးအမြတ်များကို အကဲဖြတ်နေစဉ် ဝေ့ဝူယင် သည် ဝိညာဉ်ဆက်သွယ်မှု တစ်ခုကို လက်ခံရရှိခဲ့သည်။ ၎င်းမှာ တောက်ပသော ကြယ်နန်းတော် မှ ဖြစ်၏။

"လောကရှန့်ထို အာရုဏ်ဦး... ဧည့်သည်အများစု ရောက်လာကြပြီ။ သူတို့ရဲ့ လုပ်အားခတွေကို ဘယ်တော့ ပေးမလဲဆိုတာ သိချင်နေကြတယ်..."

ထိုအသံမှာ တောက်ပသော ကြယ်နန်းတော် ၏ ဒုတိယ နန်းတော်သခင် နှစ်ဦးအနက်မှ တစ်ဦးဖြစ်သော ဉာဏ်အလင်းရ သူတော်စင် ကျိုးရိယန် ၏ အသံ ဖြစ်သည်။

ဝေ့ဝူယင်က လှောင်ပြောင်လိုက်သည်။ သို့သော် သူက လောဘဇောတိုက်နေသူများကို ဂရုမစိုက်ပေ။ ၎င်းမှာ သူတို့၏ အပြစ် မဟုတ်ချေ။ အကယ်၍ သူသာ အစွမ်းကုန် သန့်စင်ခြင်း ဂလက်ဆီ သို့ လာရောက်ပါက ဆုလာဘ်များ ပေးမည်ဟု ကတိမပေးခဲ့လျှင်၊ ကြယ်တံတား အသုံးပြုခများကိုပါ ကျခံပေးမည်ဟု ကတိမပေးခဲ့လျှင်၊ အထူးသဖြင့် သူတို့ကို ခေါ်ဆောင်လာရန် သူ၏ အမည်ကို အသုံးမပြုခဲ့လျှင် အနီးအနားရှိ ဂလက်ဆီ အသေးစားများမှ အုပ်စိုးရှင်များသည် ဤခရီးစဉ်ကို တက်ကြွစွာ လာရောက်ကြမည် မဟုတ်ပေ။

အကယ်၍ သူသာ လုံရှီယာ၏ ရုပ်ခန္ဓာကို ဖျက်ဆီးပစ်ခဲ့ကြောင်း ထုတ်ဖော် ကြေညာခဲ့လျှင် သူတို့သည် သူ၏ မျက်နှာသာပေးမှုကို ရရှိရန် အလုအယက် ကြိုးစားကြမည် ဖြစ်သည်။ သို့သော် ၎င်းမှာ အလွယ်တကူ လျစ်လျူရှုခံရနိုင်သော ကိစ္စတစ်ခု ဖြစ်၏။ ယခုလောလောဆယ်တွင် သူသည် ဤ 'ဧည့်သည်' များနှင့် သူ၏ အကြွေးများကို ရှင်းလင်းရပေမည်။

မည်သို့ပင်ဆိုစေကာမူ သူတို့သည် ဧည့်သည်များသာမက လောကရှန့်ထို အဂ္ဂိရတ် ပညာရှင် တစ်ဦးနှင့် ကောင်းကင်ရှန့်ထို အဂ္ဂိရတ် ပညာရှင် ခုနစ်ဦးတို့၏ အဂ္ဂိရတ် တိုက်ပွဲကို စီစဉ်ထားသော သက်သေများလည်း ဖြစ်လာခဲ့ကြသည်။ အထူးသဖြင့် နောက်ဆုံးပြကွက်အတွက် အချိန်ကိုက်မှုသည် ဤထက် ပို၍ ကောင်းမွန်နိုင်မည် မဟုတ်ချေ။

ဝေ့ဝူယင်သည် အရာအားလုံးကို ခိုင်မာစွာ တည်ဆောက်ထားပြီး အစကတည်းက သေချာစွာ စီစဉ်ထားခဲ့သည်။ ၎င်းမှာ အစွမ်းကုန် သန့်စင်ခြင်း ဂလက်ဆီ မှ မိုးကုပ်စက်ဝိုင်းများ နှင့် နေထိုင်သူများကို ချက်ချင်း အံ့ဩသွားစေခဲ့၏။

တောက်ပသော ကြယ်နန်းတော်သည် အဆင့်နိမ့်သော ဂလက်ဆီ အချို့မှ ဧည့်သည်များကို ဖိတ်ကြားရန် ဦးဆောင်ခဲ့သည်။ ထို့ကြောင့်ပင် အမှောင် ဟင်းလင်းပြင် တစ်ခွင်၌ စွဲမက်ဖွယ်ကောင်းသော ကြယ်တာရာ ရွှေ့ပြောင်းခြင်း အလင်းတန်းများ အစီအရီ ထွက်ပေါ်လာစေခဲ့သည်။

၎င်းတို့ တစ်ခုစီတွင် ထင်ရှားသော ပုဂ္ဂိုလ်များ၊ သူတို့၏ တပည့်များ၊ အဖော်များ နှင့် အခြားသူများ ပါဝင်ကြသည်။ တာအို လက်တွဲဖော်များ မှသည် အစောင့်အရှောက် သူရဲကောင်းများအထိ ပါဝင်လေသည်။ တောက်ပသော ကြယ်နန်းတော် ၏ ဖိတ်ကြားချက်မှာ ကုန်ကျစရိတ် အခမဲ့ ဖြစ်သည့် အပြင် ရောက်ရှိလာပါက ဘေးကင်းလုံခြုံရေးနှင့် ဆုလာဘ်များအတွက် အာမခံချက်များ ပါဝင်သောကြောင့် ငြင်းဆန်ရန် အလွန် ခက်ခဲလှပေသည်။

"ဘာဖြစ်တယ်..."

မိုးကုပ်စက်ဝိုင်း ပေါင်းစပ်ခြင်းက နားမလည်နိုင်သော မျက်နှာအမူအရာဖြင့် မေးလိုက်သည်။

"ဒီလောက် မြန်မြန်လား..."

သူ၏ မေးခွန်းထုတ်ခံရသူမှာ သလဲသီးရောင် ဝတ်စုံကို ဝတ်ဆင်ထားသော အဘွားအို တစ်ဦး ဖြစ်သည်။ ထိုဝတ်စုံပေါ်တွင် ရှုပ်ထွေးလှသော သစ်ကိုင်းများထက်၌ ရွှေရောင် ငှက်ငယ်လေးများ နားခိုနေသည့် ပုံကို ထိုးသွင်းထား၏။ အချို့မှာ ပျံသန်းတော့မည့်ဟန် ရှိပြီး အချို့မှာ မိမိကိုယ်ကို သန့်စင်နေကြကာ အချို့ကမူ ကောင်းကင်ဆီသို့ တေးဆိုနေကြသည်။

သူမ၏ အသွင်အပြင်မှာ အနည်းငယ် ကြောက်မက်ဖွယ် ကောင်းနေ၏။ သူမ၏ မျက်လုံးများမှာ ချိုင့်ဝင်နေပြီး အရေပြားများက ပုံမှန်မဟုတ်ဘဲ တင်းမာနေသည်။ ထို့ပြင် သူမသည် အပြစ်အနာအဆာကင်းသော ကိုယ်နေဟန်ထားဖြင့် မတ်မတ်ရပ်နေလေသည်။ သူမထံမှ အစစ်အမှန် သူတော်စင် တစ်ပါး၏ အော်ရာ ထွက်ပေါ်နေ၏။ ထို့ပြင် သူမသည် ဆဋ္ဌမအဆင့်အောက်တွင် မရှိနိုင်ပေ။ ၎င်းက သူမ၏ ထူးချွန်လှသော ခွန်အားကို ညွှန်ပြနေပေသည်။

အကယ်၍ သူမကို ပြတ်သားသော ဆည်းဆာ ဂလက်ဆီ မှ သူတော်စင်နှင့် နှိုင်းယှဉ်ပါက သူမ၏ ကျင့်ကြံခြင်း အခြေခံ ခိုင်မာမှုမှာ အံ့မခန်းဖြစ်ကြောင်း လွယ်ကူစွာ ဆုံးဖြတ်နိုင်မည် ဖြစ်သည်။ ထိုဂလက်ဆီမှ သူတော်စင် ဆယ်ပါးသည် တတိယအဆင့်ကို တစ်ခါမျှ မကျော်လွန်ခဲ့ဖူးပေ။ သူမသည် ကောင်းကင်ရှန့်ထို အဂ္ဂိရတ် ပညာရှင် တစ်ဦး၏ လက်အောက်ခံအဖြစ် ထိုက်တန်သူ ဖြစ်သည်။ ထို့အပြင်... ထိုပညာရှင်မှာ ဂလက်ဆီအဆင့် အဂ္ဂိရတ် တာအို၏ အစစ်အမှန် မိုးကုပ်စက်ဝိုင်း တစ်ပါးပင် ဖြစ်လေသည်။

သူမသည် သူတော်စင် မာသာလတ်ခ် ဖြစ်ပြီး သာမန် ကျင့်ကြံသူ တစ်ဦး မဟုတ်ပေ။ သူမ၏ အင်အားလှိုင်းများက ကြောက်မက်ဖွယ် ကောင်းသော ဝိညာဉ်အင်အား လက္ခဏာများကို ပြသနေသည်။ အတိအကျ ဆိုရသော်... သူမသည် ဝိညာဉ်သခင် တစ်ဦး ဖြစ်၏။ သူမ၏ မျက်လုံးအစုံမှာ ချိုင့်ဝင်နေသော်လည်း အာရုံခံနိုင်စွမ်းမှာ ဂလက်ဆီ၏ အထက်တန်းလွှာများအကြားတွင် နာမည်ကြီးလှပေသည်။

***