အခန်း (၁၇၁-၁၇၂)

ငါ့မှာ အမွေတွေကို ဆက်ခံနိုင်တဲ့ စနစ်ရှိတယ်

အပိုင်း ၁၇၁

"ဒီ... ဒါကတော့"

​ယွီချန်ရှီသည် လုံထန်စီအီးအို ကျန်းဖန် ၏ တိကျသည့် သဘောထားကို ခန့်မှန်းရခက်နေသဖြင့် စကားကို အဆုံးမသတ်နိုင်ဘဲ တုံ့ဆိုင်းနေမိသည်။ သို့သော် သူ စကားမဆုံးမီမှာပင် အစည်းအဝေးခန်း အပြင်ဘက်မှ ပြတ်သားသော ခြေသံများ ထွက်ပေါ်လာသည်။

​"သူဌေး"

​ထိုအချိန်တွင် ကျန်းဖန်သည် သူ၏နေရာမှ ထရပ်ကာ ရှေ့သို့ တန်းတန်းမတ်မတ် လျှောက်သွားပြီး လာရောက်သူကို ရိုသေစွာ နှုတ်ဆက်လိုက်သည်။

​"အင်း"

​လင်းဖန် က ခေါင်းငြိတ်ပြရင်း အစည်းအဝေးခန်းအတွင်းရှိ အခြားလူလတ်ပိုင်း အမျိုးသားတစ်ဦးထံသို့ အကြည့်ကို တန်းတန်းမတ်မတ် ပို့လိုက်ပြီး ပြုံးလျက် မေးလိုက်သည်။

"ဒီမှာရှိနေတာ Warwick ရဲ့ စီအီးအို မစ္စတာ ယွီချန်ရှီ ဖြစ်ရမယ်"

​"မင်္ဂလာပါ ဥက္ကဋ္ဌလင်း... ကျွန်တော် ယွီချန်ရှီပါ"

​ယွီချန်ရှီ ထိုင်မနေတော့ဘဲ အမြန်ထရပ်ကာ ရှေ့သို့တိုး၍ လက်ဆွဲနှုတ်ဆက်ရန် လက်ကမ်းပေးလိုက်သည်။ သူ၏ မျက်လုံးများထဲတွင် အံ့အားသင့်မှုများ ပြည့်နှက်နေသည်။ လင်းဖန် မှာ အလွန်ငယ်ရွယ်ကြောင်း ကြားဖူးသော်လည်း လူကိုယ်တိုင် ရှေ့မှောက်သို့ ရောက်လာချိန်တွင်မူ သူ မယုံနိုင်အောင် ဖြစ်ရသည်။ ရှေ့တွင်ရှိနေသော ဤချောမောသည့် လူငယ်မှာ အလွန်ဆုံးရှိမှ အသက် ၂၀ ကျော်ကာစသာ ရှိဦးမည်။ ဤလူငယ်ကပင် လုံထန်ဂရု၏ ပဲ့ကိုင်ရှင် ဖြစ်နေလိမ့်မည်ဟု သူ မထင်မှတ်ထားခဲ့ပေ။

​"မင်္ဂလာပါ မစ္စတာယွီ... ခင်ဗျားရဲ့ နာမည်ကို ကြားဖူးတာ ကြာပါပြီ"

​လင်းဖန် က အပိုအလုပ်များ မလုပ်ဘဲ ယွီချန်ရှီ၏ လက်ကို တည်ငြိမ်စွာ ဆုပ်ကိုင်နှုတ်ဆက်လိုက်သည်။ အပြန်အလှန် နှုတ်ဆက်ပြီးနောက် နှစ်ဦးသား နေရာယူလိုက်ကြကာ အစည်းအဝေးခန်း တံခါးကို ပြန်ပိတ်လိုက်ရာ လေထုမှာ ရုတ်တရက် ပို၍ လေးနက်သွားတော့သည်။

​"ဥက္ကဋ္ဌလင်းရော မစ္စတာကျန်းပါ ရှိနေပြီဆိုတော့ ကျွန်တော်လည်း အထွေအထူး ဖုံးကွယ်မနေတော့ပါဘူး ကျွန်တော် ဒီကိုလာတာ ကျွန်တော်တို့ ဥက္ကဋ္ဌကြီးရဲ့ မျှော်လင့်ချက်တွေနဲ့ လာတာပါ တစ်ခုက ခင်ဗျားတို့ ကုမ္ပဏီရဲ့ ရှယ်ယာတွေကို ဝယ်ယူဖို့ဖြစ်ပြီး နောက်တစ်ခုကတော့ ကောင်းမွန်တဲ့ ပူးပေါင်းဆောင်ရွက်မှု အခြေအနေတစ်ရပ် တည်ဆောက်ဖို့ပါပဲ"

​ထိုင်လိုက်သည်နှင့် ယွီချန်ရှီက သူလာရင်းကိစ္စအားလုံးကို ဖွင့်ပြောလိုက်သည်။ ဤအခိုက်အတန့်တွင် ကျန်းဖန် နှင့် လင်းဖန် တို့သည် ရှေ့မှောက်ရှိ Warwick စီအီးအို၏ စရိုက်ကို ပို၍ သိမြင်သွားကြသည်။ ပွင့်လင်းပြတ်သားစွာ ပြောဆိုတတ်သူမှာ အများ၏ ကြည်ညိုမှုကို ပိုမိုရရှိနိုင်သည်မှာ အမှန်ပင်။

​"ကျွန်တော့်မှာ ပိုက်ဆံမလိုပါဘူး၊ ဒါကြောင့် ရှယ်ယာကိစ္စကို ထပ်မပြောပါနဲ့တော့ ပူးပေါင်းဆောင်ရွက်ရေးအကြောင်းပဲ ပြောကြရအောင်"

​လင်းဖန် က စားပွဲပေါ်ရှိ လက်ဖက်ရည်ကို တစ်ငုံသောက်ကာ ပြုံးလျက် ခေါင်းငြိတ်ပြလိုက်သည်။

"ခင်ဗျားတို့ ကုမ္ပဏီက ဘယ်လိုမျိုး ပူးပေါင်းချင်တာလဲ"

​ထိုအဖြေကို ကြားသောအခါ ယွီချန်ရှီသည် ရှယ်ယာကိစ္စကို ဆက်လက် ဇွတ်မတက်တော့ပေ။ ဆက်ပြောနေပါက နှစ်ဦးနှစ်ဖက် ဆုံးရှုံးမှုသာ များမည်ကို သူသိသည်။ သူက တိုက်ရိုက်ပင် ပြောလိုက်သည်။

"ကျွန်တော်တို့က စမတ်ဖုန်းဘတ္တလာအတွက် ခင်ဗျားတို့ ကုမ္ပဏီရဲ့ မူပိုင်ခွင့် ခွင့်ပြုချက်ကို ရယူချင်တာပါ"

​ထိုစကားကို ကြားသောအခါ လင်းဖန် က ယွီချန်ရှီကို ကြည့်ကာ အဓိပ္ပာယ်ပါပါ ပြောလိုက်သည်။

"စမတ်ဖုန်းအကူစနစ်အတွက်တော့ ခွင့်ပြုချက် မရှိပါဘူး အခုလည်း မရှိနိုင်သလို အနာဂတ်မှာလည်း ရှိလာမှာ မဟုတ်ဘူး"

​"ဒါပေမဲ့ ကျွန်တော်တို့ ကုမ္ပဏီနှစ်ခုကြားမှာ တချို့သော မူပိုင်ခွင့်တွေကို အပြန်အလှန် အသုံးပြုခွင့်ပေးတာမျိုးတော့ လုပ်လို့ရပါတယ် ဒါဟာ ပြီးပြည့်စုံတဲ့ ခေတ်ကာလတစ်ခုပါ၊ ပူးပေါင်းဆောင်ရွက်ခြင်းကသာ နှစ်ဦးနှစ်ဖက် အကျိုးရှိမယ့် ရလဒ်တွေကို ထွက်ပေါ်စေမှာပါ"

​လင်းဖန် ၏ အကြည့်နှင့် ရင်ဆိုင်လိုက်ရချိန်တွင် ယွီချန်ရှီသည် အပေါ်မှ ဖိနှိပ်ထားသော အရှိန်အဝါတစ်ခုကို ပထမဆုံးအကြိမ် ခံစားလိုက်ရသည်။ Warwick ဥက္ကဋ္ဌ ရန်ကျန်းဖေး၏ အကွက်စေ့သော အရှိန်အဝါနှင့်မတူဘဲ ရှေ့တွင်ရှိနေသော လုံထန်ဥက္ကဋ္ဌ၏ အရှိန်အဝါမှာ ပြောမပြတတ်အောင် မြင့်မြတ်သော မာန်မာနတို့ဖြင့် ပြည့်နှက်နေသည်။ ၎င်းမှာ အသက် ၂၀ မပြည့်သေးဘဲ စီးပွားရေးလောက၏ အမြင့်ဆုံးအထွတ်အထိပ်သို့ ရောက်ရှိကာ ပြိုင်ဘက်ကင်းသူအဖြစ် ငုံ့ကြည့်နေသည့် လူငယ်တစ်ဦး၏ ယုံကြည်ချက်ပင် ဖြစ်သည်။

​"ဥက္ကဋ္ဌလင်းဟာ တကယ့်ကို စီးပွားရေးရဲ့ အနှစ်သာရကို တိုက်ရိုက် မြင်နိုင်တဲ့ လူငယ်သူရဲကောင်းပဲ ကျွန်တော်တို့ ကုမ္ပဏီအနေနဲ့ ခင်ဗျားတို့ ကုမ္ပဏီနဲ့ မူပိုင်ခွင့် အပြန်အလှန်လဲလှယ်ရေး သဘောတူညီချက်ကို လက်မှတ်ရေးထိုးဖို့ ဆန္ဒရှိပါတယ် အသေးစိတ်ကိစ္စရပ်တွေကို ဆွေးနွေးဖို့ နောက်ပိုင်းမှာ ကျွမ်းကျင်ပညာရှင်တွေကို လွှတ်လိုက်ပါ့မယ်"

​ယွီချန်ရှီ သက်ပြင်းတစ်ချက်ချကာ လေးနက်သော အသံဖြင့် မေးလိုက်သည်။

"ဒါပေမဲ့ ပန်ကူးစမတ်ဖုန်းအကုကိစ္စကတော့ တကယ်ပဲ ညှိနှိုင်းလို့ မရတော့ဘူးလား"

​ပြည်တွင်းဖုန်းလောက၏ ဘီလူးကြီးဖြစ်သလို ကမ္ဘာကျော် နည်းပညာကုမ္ပဏီတစ်ခုဖြစ်သည့် Huawei (Warwick) သည် အင်အားတောင့်တင်းသော်လည်း AI နယ်ပယ်တွင်မူ အမှန်တကယ်ပင် အနည်းငယ် နောက်ကျနေခဲ့သည်။ အကယ်၍ သူတို့အနေဖြင့် Longteng ၏ 'ပန်ကူ' စမတ်ဖုန်းဘတ္တလာ၏ ထောက်ပံ့မှုကို မရရှိပါက Huawei ဖုန်းများသည်လည်း Apple ဖုန်းများကဲ့သို့ပင် မှေးမှိန်သော အခြေအနေသို့ ဆိုက်ရောက်သွားပေလိမ့်မည်။

​လင်းဖန် ၏ မျက်လုံးများ ဝင်းလက်သွားကာ နှုတ်ခမ်းတွင် အပြုံးတစ်ခု ပေါ်လာသည်။ သူက အေးဆေးစွာပင် ပြောလိုက်သည်။

"'ပန်ကူး ကို Android နဲ့ Apple စနစ်တွေပေါ်မှာ ထည့်သွင်းလို့ မရပါဘူး"

​အမှန်စင်စစ် လင်းဖန် သည် တရုတ်ကုမ္ပဏီများအပေါ် ဆန့်ကျင်လိုစိတ် မရှိပေ။ လူတိုင်း အတူတကွ တိုးတက်လာသည်ကိုပင် မြင်လိုသေးသည်။ ဈေးကွက်တစ်ခုလုံးကို ကုမ္ပဏီတစ်ခုတည်းက လက်ဝါးကြီးအုပ်ထားခြင်းမှာ ညီညွတ်မျှတမှု မရှိဟု သူယူဆသည်။

လုံထန်ဂရု၏ ထုတ်ကုန်များမှာ အလွန်အစွမ်းထက်သော်လည်း အခြားကုမ္ပဏီများ၏ ထုတ်ကုန်များတွင်လည်း ထူးခြားသော ဝိသေသများ ရှိနေသည်ကို သူ မငြင်းပယ်ပေ။ အယူအဆပေါင်းစုံ ယှဉ်ပြိုင်ကြမှသာ အတွေးအခေါ်သစ်များ ပွင့်လင်းလာပြီး လူသားမျိုးနွယ်၏ တိုးတက်မှုကို အထောက်အကူပြုနိုင်မည် ဖြစ်သည်။

​"ဟုန်မန် စနစ်ကို ဆိုလိုတာလား"

​ယွီချန်ရှီ ချက်ချင်းပင် သဘောပေါက်သွားကာ စိတ်လှုပ်ရှားစွာ မေးလိုက်သည်။

​"ခင်ဗျားတို့ ကုမ္ပဏီရဲ့ ဟုန်မန်ဖြစ်ဖြစ်၊ Dami ရဲ့ MIUI ဖြစ်ဖြစ်၊ Flyme ဖြစ်ဖြစ် အားလုံးဟာ သီးခြား လုပ်ဆောင်နိုင်စွမ်းတွေ ရှိနေကြပြီ"

​လင်းဖန် က ပြုံးလျက် ပြောလိုက်သည်။

"ကျွန်တော်တို့ အဖွဲ့အနေနဲ့ ပြည်တွင်းဈေးကွက်အတွက် ဟုန်မန်စနစ်နဲ့ ကိုက်ညီမယ့် 'ပန်ကူးစမတ်ဖုန်းအကူ' ကို အထူးထုတ်လုပ်ပေးနိုင်ပါတယ်"

​"ဒါဆိုရင်တော့ တကယ့်ကို ကျေးဇူးတင်ပါတယ်ဗျာ"

​ထိုစကားကို ကြားရသောအခါ ယွီချန်ရှီ၏ မျက်နှာတွင် အပြုံးများ ပွင့်လင်းသွားပြီး ကျေးဇူးတင်စကား ဆိုကာ လက်အုပ်ချီ နှုတ်ဆက်လိုက်တော့သည်။

​ထိုကာလအတွင်း လုံထန်ဂရု၏ 'ပန်ကူး' စမတ်ဖုန်းအကူစနစ်ကို ဒေါင်းလုဒ်ဆွဲသည့် ပမာဏမှာ အလွန်လျင်မြန်လွန်းသဖြင့် အသုံးပြုသူဦးရေမှာ ဆက်တိုက် တိုးပွားနေခဲ့ရာ ဆာဗာကွန်ရက်မှာ အနည်းငယ် ဝန်ပိနေခဲ့သည်။

ထို့ကြောင့် ကျန်းဖန် က ယွီချန်ရှီနှင့် ပူးပေါင်းဆောင်ရွက်ရန် ကမ်းလှမ်းလိုက်ပြီး ကွန်ရက်အဆင့်မြှင့်တင်ရန်အတွက် Warwick အဖွဲ့အား ငှားရမ်းလိုက်သည်။ နှစ်ဦးနှစ်ဖက် သဘောတူညီမှု ရရှိသွားကြပြီး ပျော်ရွှင်စရာကောင်းသော ပူးပေါင်းဆောင်ရွက်မှုတစ်ခု ဖြစ်လာခဲ့သည်။

​"သူဌေး... ကျွန်တော်တို့ရဲ့ 'ပန်ကူး' က ပြောင်းလဲမှုတွေတင်မကဘဲ အချို့လူတွေရဲ့ လောဘတွေကိုပါ ဆွဲဆောင်လိုက်သလိုပဲ"

​နံနက် ၁၁ နာရီခန့်တွင် ယွီချန်ရှီ ထွက်ခွာသွားသည်ကို ကြည့်ရင်း ကျန်းဖန် က မျက်မှောင်ကြုတ်ကာ ပြောလိုက်သည်။

လုံထန်ဂရုတွင် Nirvana ဖြစ်စေ၊ အခြားအရာဖြစ်စေ ၎င်းတို့အတွက် အစားထိုးစရာ နည်းလမ်းများ မရှိသည်မဟုတ်သဖြင့် လူအများက လုံထန်ကို အလေးမထားခဲ့ကြပေ။

​သို့သော် AI ကမူ မတူပေ။ ဤသည်မှာ ပြည်ပရှိ ထိပ်တန်းသုတေသန အဖွဲ့အစည်းများပင် တုန်လှုပ်နေရသော နယ်ပယ်တစ်ခု ဖြစ်သည်။ ယခုအချိန်အထိ လုံထန်၏ အဆင့်ကို မည်သူမျှ မလိုက်နိုင်သေးပေ။ လက်ရှိ AI ဈေးကွက်ကို လုံထန်ဂရုက လက်ဝါးကြီးအုပ်ထားနိုင်သည် မဟုတ်ပါလား။

​မည်သည့်စီးပွားရေးက အမြတ်အစွန်း အများဆုံး ရသနည်း.. လက်ဝါးကြီးအုပ်ထားနိုင်သော စီးပွားရေးမှာ အမြတ်ဆုံးပင် ဖြစ်သည်။

အဘယ်ကြောင့်ဆိုသော် ဈေးနှုန်းသတ်မှတ်ပိုင်ခွင့်မှာ မိမိလက်ထဲတွင် ရှိနေသောကြောင့် ဖြစ်သည်။ ယခင်က သူဘာမှ မခံစားရသော်လည်း၊ ယခု Warwick စီအီးအို ကိုယ်တိုင် တံခါးအထိ လာရောက်ချိန်တွင်မူ လုံထန်ဂရုအပေါ်သို့ ကြောက်မက်ဖွယ် မုန်တိုင်းတစ်ခု ကျရောက်တော့မည်ကို ကျန်းဖန် အပြည့်အဝ ခံစားလိုက်ရသည်။ အကယ်၍ မဆင်ခြင်ပါက အပိုင်းပိုင်းအစစ ဖြစ်သွားနိုင်ပေသည်။

​"စိုးရိမ်မနေပါနဲ့၊ ကြက်တွေ ခွေးတွေလောက်ကို အမှုထားနေစရာ မလိုပါဘူး"

​ဘေးတွင်ရှိနေသော လင်းဖန် က လက်ကာပြလိုက်သည်။ သူ၏ မျက်နှာအမူအရာမှာ တစ်ချက်ကလေးမျှ မပျက်ယွင်းဘဲ ထိုခြိမ်းခြောက်မှုများကို ဂရုမစိုက်သည့်အလား ရှိနေသည်။

​အင်း

သူ့ကိုကြည့်ပြီး ကျန်းဖန် တစ်ယောက် သက်ပြင်းချကာ ခေါင်းခါရုံသာ တတ်နိုင်တော့သည်။ မိုးပြိုရင် တောင်က ခံလိမ့်မည်။

လုံထန်ဂရု၏ တကယ့်ပဲ့ကိုင်ရှင်မှာ အမြဲတမ်း လင်းဖန် သာ ဖြစ်သည်။ အကြီးအကဲဖြစ်သူက ဘာမှ မတုံ့ပြန်လျှင် နောက်လိုက်ဖြစ်သူက ဘာတတ်နိုင်ဦးမည်နည်း။

​"ဌာနခွဲတွေရဲ့ တည်ဆောက်မှု အခြေအနေ ဘယ်လိုရှိလဲ"

​ရုတ်တရက် လင်းဖန် တစ်ခုခုကို သတိရသွားသဖြင့် မေးလိုက်သည်။

​"ချင်ချန်နဲ့ ရှုတု ကိစ္စတွေကတော့ ပြီးသွားပါပြီ ရှန်ချန် စက်မှုဇုန်အသစ်နဲ့ ယန်ကျင်း စက်မှုဇုန်တွေကတော့ ထပ်မံချဲ့ထွင်နေဆဲဖြစ်ပြီး ဒီနှစ် ဒီဇင်ဘာလလောက်ဆိုရင် အပြည့်အဝ အသုံးပြုနိုင်မယ်လို့ မျှော်လင့်ရပါတယ်"

ဟု ကျန်းဖန် က တည်ငြိမ်စွာ ပြန်ဖြေလိုက်သည်။

​"ကောင်းပြီ"

​လင်းဖန် ခေါင်းငြိတ်လိုက်သည်။ ထိုအခြေအနေများအပေါ် သူ တော်တော်လေး စိတ်ကျေနပ်မှု ရရှိသွားခဲ့ပေသည်။

..............................................................

အပိုင်း ၁၇၂

"အရင်က ပြောထားတဲ့ ကိစ္စတွေရော ဘယ်လိုရှိလဲ"

​အောက်ထပ်ရှိ စိမ်းလန်းစိုပြည်သော စက်မှုဇုန်ကြီးကို ငုံ့ကြည့်ရင်း လင်းဖန် က မေးလိုက်သည်။

​"လွန်ခဲ့တဲ့ ရက်ပိုင်းကတင် ကျွန်တော်တို့အဖွဲ့ဟာ NANFU (နန်ဖူ) ကုမ္ပဏီကို အပိုင်ဝယ်ယူခဲ့ပြီးပါပြီ အမေရိကန်ဒေါ်လာ တစ်ဘီလီယံတန်ဖိုးရှိတဲ့ ထုတ်လုပ်မှုပစ္စည်းတွေကိုလည်း ဝယ်ယူခဲ့ပြီး စက်ရုံအဆောက်အအုံတွေကို စတင်ချဲ့ထွင်နေပါပြီ"

ဟု ကျန်းဖန် က ချက်ချင်းပင် ပြန်ဖြေသည်။

​"မဆိုးဘူး"

​ထိုစကားကို ကြားသောအခါ လင်းဖန် ခေါင်းငြိတ်လိုက်သည်။ NANFU (နန်ဖူ) ကုမ္ပဏီသည် ကမ္ဘာ့အကြီးဆုံး အယ်လ်ကာလိုင်း ဘက်ထရီ ထုတ်လုပ်သူ ၅ ဦးထဲမှ တစ်ဦးဖြစ်သည်။ ၎င်းသည် တရုတ်ဘက်ထရီ လုပ်ငန်းလောကတွင် ခေတ်မီဆုံးစက်ကိရိယာများနှင့် သိပ္ပံနည်းကျ နည်းပညာအင်အား အတောင့်တင်းဆုံး လုပ်ငန်းတစ်ခုလည်း ဖြစ်သည်။

​နန်ဖူအမှတ်တံဆိပ် ဘက်ထရီများသည် (၁၈) နှစ်ဆက်တိုက် အရောင်းရဆုံး စာရင်းဝင်ခဲ့သည်။ 'အရည်အသွေး၊ စီးပွားရေးအကျိုးအမြတ်နှင့် လုပ်အားကုန်ထုတ်စွမ်းအား' တို့တွင် နှစ်စဉ် လုပ်ငန်းနယ်ပယ်၌ နံပါတ် (၁) နှင့် အာရှတွင် နံပါတ် (၂) နေရာ၌ ရပ်တည်နေသည်။ စက်ရုံအဆောက်အအုံများ၊ ထုတ်လုပ်မှုလိုင်းများနှင့် ဆက်စပ်ပစ္စည်းများ အားလုံးမှာ ကမ္ဘာကျော် ဘက်ထရီကုမ္ပဏီများ၏ အဆင့်မြင့်အဆင့်တွင် ရှိနေသည်။

​နန်ဖူကုမ္ပဏီမှ ထုတ်လုပ်သော NR6 စွမ်းအားမြင့် နီကယ်ခြောက်ဘက်ထရီများကဲ့သို့သော ထုတ်ကုန်သစ်များသည် ပြည်တွင်းဈေးကွက်တွင် ခေတ်မီပြီး ဝယ်ယူသူဗဟိုပြုသော ဈေးကွက်ကွန်ရက်ကို တည်ဆောက်နိုင်ခဲ့ကာ လက်ရှိတွင် ၅၆ ရာခိုင်နှုန်းသော ဈေးကွက်ဝေစုကို ရရှိထားသည်။ ကမ္ဘာ့ဈေးကွက်တွင်လည်း EXCELL ကုန်အမှတ်တံဆိပ်ကို အမေရိက၊ ဥရောပ၊ အာရှ၊ သြစတြေးလျ စသည့် နိုင်ငံနှင့် ဒေသပေါင်း ၅၀ ကျော်တွင် မှတ်ပုံတင်ထားပြီး နိုင်ငံပေါင်း ၆၀ ကျော်သို့ တင်ပို့ရောင်းချနေသည်။

​ထို့ထက်ပို၍ အရေးကြီးသည်မှာ နန်ဖူကုမ္ပဏီတွင် လက်ရှိဝန်ထမ်းပေါင်း ၁,၈၀၀ ကျော်နှင့် အဆင့်မြင့်၊ အလယ်အလတ်အဆင့် ပညာရှင် ၄၅၀ ကျော်ရှိနေခြင်းပင်။ စက်ကိရိယာများသာ အဆင်သင့်ဖြစ်ပါက ထုတ်လုပ်မှုပမာဏကို ချက်ချင်းပင် ချဲ့ထွင်နိုင်ပေလိမ့်မည်။

​"သူဌေး... ကျွန်တော် ပွင့်ပွင့်လင်းလင်း ပြောရရင် ဘက်ထရီလုပ်ငန်းက ရေနက်ပိုင်း ရောက်နေသလိုပါပဲ ဘာလို့ ဒီအလုပ်ကို တခြားကုမ္ပဏီတွေကို တိုက်ရိုက်ကန်ထရိုက် မပေးတာလဲ အဲဒီအစား ကျွန်တော်တို့က ဘာလို့ ဒီလောက်ဒုက္ခခံပြီး ကုမ္ပဏီကို ကိုယ်တိုင်ဝယ်ယူပြီး ထုတ်လုပ်ဖို့ ကြိုးစားနေတာလဲ"

​ကျန်းဖန် က တွေဝေမနေတော့ဘဲ ဇဝေဇဝါဖြစ်နေသော မျက်နှာဖြင့် လင်းဖန် ကို ကြည့်ကာ မေးလိုက်သည်။

လုံထန်အနေဖြင့် ဘက်ထရီနည်းပညာကို သူတစ်ပါးလက်ထဲ မအပ်ချင်သော်လည်း၊ ဤလုပ်ငန်းသည် ဖုန်းအစိတ်အပိုင်းများ ထုတ်လုပ်ခြင်းထက်ပင် ပို၍ခက်ခဲပြီး အလွန်အမင်း အဆင့်မြင့်သည့် နည်းပညာစုဆောင်းမှု ရှိမှသာ အခိုင်အမာ ရပ်တည်နိုင်မည်ဖြစ်သည်။

​"ကျုပ်လက်ထဲမှာ ဂရပ်ဖင်း (Graphene) ဘက်ထရီတွေထက် မနိမ့်ကျတဲ့ နည်းပညာအသစ်တစ်ခု ရှိတယ်"

​ကျန်းဖန် ကို စိုက်ကြည့်ရင်း လင်းဖန် က အေးဆေးစွာ ပြောလိုက်သည်။

​ထိုအခိုက်အတန့်တွင် ကျန်းဖန် တစ်ယောက် စကားမဲ့သွားတော့သည်။ နည်းပညာသာ ရှေ့တန်းရောက်နေပါက မဖြေရှင်းနိုင်သည့် ပြဿနာဆိုသည်မှာ မရှိတော့ပေ။

​ထို့နောက် လင်းဖန် သည် ကျန်းဖန် နှင့် အခြားသူများ၏ လုပ်ငန်းဆောင်ရွက်မှု အစီရင်ခံစာကို နားထောင်ပြီးနောက် မနားမနေဘဲ ဓာတ်ခွဲခန်းသို့ ပြန်သွားခဲ့သည်။ နေ့လယ်စာကိုပင် ဓာတ်ခွဲခန်းထဲမှာပင် စားသောက်ခဲ့သည်။ သူ့အတွက် ယခုအချိန်တွင် အရေးကြီးဆုံးမှာ ဆီလီကွန်ပုံဆောင်ခဲ ဘက်ထရီကို ဖော်ထုတ်ရန်ပင် ဖြစ်သည်။

​မွန်းလွဲ ၃ နာရီ

​"ဖောင်း"

​ပြတ်သားသော အသံတစ်ခုနှင့်အတူ စားပွဲပေါ်တွင် တစ်ဖန်ပြန်၍ ကွဲအက်သွားသော ဆီလီကွန်ပုံဆောင်ခဲကို လင်းဖန် ကြည့်လိုက်သည်။ စိတ်ပျက်အားငယ်သွားမည့်အစား သူ၏မျက်နှာတွင် ဝမ်းသာပီတိများ ပြည့်နှက်နေသည်။ ယခုအချိန်အထိ ဆီလီကွန်ပုံဆောင်ခဲ ပေါင်းစပ်မှုမှာ ထုတ်လုပ်မှုနည်းပညာအဆင့်သို့ ရောက်ရှိနေပြီဖြစ်သည်။

​အားနည်းချက်တစ်ခုမှာ သန့်စင်မှုအပိုင်းက လိုအပ်ချက်ကို မမီသေးခြင်းပင်။

ထို့ကြောင့် စမ်းသပ်မှုအတွင်း ဖိအားပေးလိုက်တိုင်း ဆီလီကွန်ပုံဆောင်ခဲမှာ အမြဲတမ်း ကွဲအက်သွားခဲ့သည်။ အကယ်၍ ဤနည်းပညာပိုင်းဆိုင်ရာ ပြဿနာကို မဖြေရှင်းနိုင်ပါက နောက်ဆုံးထွက်ရှိလာမည့် ဆီလီကွန်ပုံဆောင်ခဲ ဘက်ထရီ၏ စွမ်းဆောင်ရည်မှာ သာမန် လစ်သီယမ်အိုင်ယွန်း (Lithium-ion) ဘက်ထရီများကဲ့သို့သာ ရှိနေပေလိမ့်မည်။

သန့်စင်မှု လျော့နည်းခြင်းကြောင့် ဘက်ထရီသက်တမ်းကို ထိခိုက်စေမည့်အပြင် သိုလှောင်ထားသော လျှပ်စစ်ဓာတ်အားများပင် ယိုစိမ့်သွားနိုင်သည်။

​"ဟူး..."

​လင်းဖန် သက်ပြင်းတစ်ချက်ချကာ ခေါင်းခါလိုက်ပြီး ဆက်လက်မပြုလုပ်တော့ပေ။ ကျန်ရှိနေသော အဆင့်ကို ကြိုးစားရုံဖြင့် မဖြေရှင်းနိုင်တော့။ တစ်ခါတစ်ရံ သိပ္ပံပညာသည် အချိန်ကာလတစ်ခု သို့မဟုတ် ထိုးထွင်းသိမြင်မှုကို လိုအပ်တတ်သည်။

​"သူဌေး... အမည်မသိ IP တစ်ခုက အဖွဲ့ရဲ့ ဆာဗာထဲကို ထိုးဖောက်ဝင်ရောက်နေတယ်"

​လင်းဖန် ဓာတ်ခွဲခန်းမှ ထွက်ရန် ပြင်လိုက်စဉ်မှာပင် ရှုံ့တာ၏ ကလေးသံလေး ထွက်ပေါ်လာသည်။

​"ဘာ..နောက်တစ်ခါလား"

​လင်းဖန် မျက်မှောင်ကြုတ်လိုက်ပြီး မျက်နှာမှာ အနည်းငယ် ပျက်ယွင်းသွားသည်။

"ဒီကောင်တွေ ပြီးခဲ့တဲ့တစ်ခေါက်က သင်ခန်းစာ မရသေးဘူးထင်တယ် ထပ်ခါတလဲလဲ လာစိန်ခေါ်နေတာ တကယ်ကို အကြောင်းမဲ့လွန်းတယ်"

​ပြီးခဲ့သည့်တစ်ခေါက်က အဆင့်မြှင့်တင်ထားသော 'ပန်ဒါအမွှေးတိုင်ထွန်း' ဗိုင်းရပ်စ် အမေရိကန်၊ ကိုရီးယား၊ ပြင်သစ်၊ ဗြိတိန် စသည့်နိုင်ငံများတွင် ပြန့်နှံ့သွားပြီးနောက် လုံထန်၏ ဆာဗာများမှာ အတော်လေး ငြိမ်သက်သွားခဲ့သည်။

သို့သော် လဝက်ပင် မပြည့်သေးဘဲ ရန်သူက တံခါးဝသို့ တစ်ဖန်ပြန်ရောက်လာပြန်ပြီ။

​"ရှုံ့တာ... တစ်ဖက်လူရဲ့ ပင်မနေရာကို ထိုးဖောက်ပြီး သူ့ရဲ့ အချက်အလက်တွေကို ရှာလိုက်"

​"ဟုတ်ကဲ့"

​စကားဆုံးသည်နှင့် ရှုံ့တာသည် ဒေတာစီးကြောင်းတစ်ခုအဖြစ်သို့ ချက်ချင်းပြောင်းလဲသွားပြီး အမည်မသိ IP ၏ ကွန်ရက်ကို ဖောက်ထွင်းလိုက်သည်။ ဒေတာအားလုံးမှာ သူ့မျက်စိရှေ့တွင် ကြည်လင်နေသည်။ ခဏအကြာတွင် သူသည် တစ်ဖက်လူ၏ Host ကို ရှာဖွေတွေ့ရှိသွားပြီး အတွင်းသို့ ဝင်ရောက်သွားခဲ့သည်။

​"သူဌေး... ဒီလူက ဂျာမနီမှာ ရှိနေတာ၊ သူ့အချက်အလက်တွေကို ကြည့်လိုက်ပါဦး"

​ထိုအချိန်တွင် ဓာတ်ခွဲခန်းရှိ ကွန်ပျူတာဖန်သားပြင်ပေါ်၌ ဖိုင်တစ်ခု ပေါ်လာပြီး အချက်အလက်များနှင့် ဓာတ်ပုံများစွာ ပြသလာသည်။

​'အမေရိကန်တစ်ယောက်ပဲ၊ တကယ်ကို ယုတ်မာလိုက်တာ'

​လင်းဖန် အချက်အလက်ပေါ်ရှိ ထူးခြားသော စာသားကို ကြည့်လိုက်သည်။ ဤလူမှာ ပရော်ဖက်ရှင်နယ် ဟက်ကာတစ်ဦး ဖြစ်ရုံသာမက ကမ္ဘာ့အကြီးဆုံး နိုင်ငံရေးဟက်ကာအဖွဲ့ဖြစ်သော 'Anonymous' (အမည်မဖော်လိုသူများအဖွဲ့) မှ အဖွဲ့ဝင်လည်း ဖြစ်သည်။ အခြားသူများ မသိသော်လည်း ဤ 'Anonymous' ဆိုသည်မှာ အမေရိကန်အစိုးရ၏ လက်အောက်ခံအဖွဲ့ဖြစ်ကြောင်း သူ ဘယ်လိုလုပ် မသိဘဲ နေမည်နည်း။

​"ရှုံ့တာ... ဒီလူနဲ့ Anonymous အဖွဲ့ခွဲဝင်တွေရဲ့ အချက်အလက်အားလုံးကို ဂျာမနီ လုံခြုံရေးဌာနကို ပို့လိုက် အမေရိကန်တွေ ဘာဆက်လုပ်မလဲဆိုတာ ငါကြည့်ချင်သေးတယ်"

​"သူဌေး... ပို့လိုက်ပါပြီ"

​မိနစ်ပိုင်းအတွင်းမှာပင် ရှုံ့တာက ပြန်လည်အကြောင်းကြားသည်။

​လင်းဖန် မျက်လုံးများကို စူးရှစွာထား၍ အမိန့်ပေးလိုက်သည်။

"ဒါ့အပြင် လုံထန်ဆာဗာမှာ ခုခံတွန်းလှန်ရေး စနစ်တစ်ခု တည်ဆောက်လိုက် တစ်စုံတစ်ယောက်က တိုက်ခိုက်လာတာနဲ့ တစ်ဖက်လူရဲ့ ပင်မနေရာကို တိုက်ရိုက် ပြန်တိုက်ခိုက်စေရမယ်"

​"ပြီးတော့ ဒီလူတွေရဲ့ အချက်အလက်အားလုံးကို သက်ဆိုင်ရာ နိုင်ငံတွေရဲ့ အမျိုးသားလုံခြုံရေးဌာနတွေကို ပေးပို့လိုက်"

​ခြင်္သေ့က သူ့အစွမ်းကို မပြပါက အခြားသူများက နာမကျန်းဖြစ်နေသော ကြောင်တစ်ကောင်ဟု ထင်နေကြလိမ့်မည်။ လုံထန်ဂရုသည် အကြီးစားတိုက်ခိုက်မှုပေါင်း ၃ ကြိမ်ထက်မနည်း ခံခဲ့ရပြီးဖြစ်သည်။ နောင်တွင်လည်း ပြိုင်ဘက်များစွာ ရှိနေသဖြင့် လူများစွာက စွန့်စားတိုက်ခိုက်လာကြဦးမည်မှာ သေချာသည်။ အောင်မြင်သည်ဖြစ်စေ၊ မအောင်မြင်သည်ဖြစ်စေ ထို DDOS တိုက်ခိုက်မှုများသည် ဆာဗာအရင်းအမြစ်များကို အလွန်အမင်း ဝန်ပိစေသည်။ ဤအတိုင်းသာ ဆက်သွားပါက လုံခြုံရေးဟာကွက်များ ဖြစ်ပေါ်လာပေလိမ့်မည်။ ဤသည်မှာ လင်းဖန် အဖြစ်မခံနိုင်သောအရာ ဖြစ်သည်။

​တစ်ချိန်တည်းမှာပင် လုံထန်ဂရု၏ ကွန်ရက်လုံခြုံရေးဌာနအတွင်း

​"ညွှန်ကြားရေးမှူး... ဟက်ကာရဲ့ ခြေရာတွေ ပျောက်သွားပါပြီ၊ ဝဘ်ဆိုက်ပေါ်က အရာအားလုံး ပုံမှန်အတိုင်း ဖြစ်သွားပါပြီ"

​တာဝန်ကျနေသော လုံထန်မှ နည်းပညာရှင်များသည် ဝန်ဆောင်မှုများ ပုံမှန်ပြန်ဖြစ်သွားသည်ကို မြင်သောအခါ သက်ပြင်းချနိုင်တော့သည်။ ခုနက တိုက်ခိုက်မှုမှာ အလွန်လျင်မြန်လွန်းသဖြင့် သူတို့ပင် အချိန်မီ မတုံ့ပြန်နိုင်ခဲ့ပေ။

​"လမ်းကြောင်းတွေကို ပြန်ပြင်ပါ၊ ကာကွယ်ရေးအတားအဆီးတွေကို အားဖြည့်ထား၊ နောက်တစ်ကြိမ် ဒီလိုမျိုး ထပ်မဖြစ်စေနဲ့"

ဟု ကွန်ရက်လုံခြုံရေးဌာန ညွှန်ကြားရေးမှူး စီမာလဲ့က လေးနက်သည့် အသံဖြင့် အမိန့်ပေးလိုက်သည်။

​"ဟုတ်ကဲ့ပါ"

​နည်းပညာရှင်များသည် ကီးဘုတ်ပေါ်တွင် လက်ချောင်းများ ပြေးလွှားရင်း ဆာဗာ၏ လည်ပတ်မှုစနစ်များကို အဆက်မပြတ် ညှိနှိုင်းနေကြသည်။ ဟက်ကာတိုက်ခိုက်မှုဆိုသည်မှာ မည်သည့်ကုမ္ပဏီအတွက်မဆို ရှောင်လွှဲ၍မရသောအရာ ဖြစ်သည်။ တစ်ခုတည်းသော နည်းလမ်းမှာ ၎င်းတို့ကို တားဆီးရန်နှင့် ဆုံးရှုံးမှုကို လျှော့ချရန်ပင် ဖြစ်သည်။

​ထို့ကြောင့်ပင် လုံထန်ဂရုသည် စီမာလဲ့ကို Huaxia Hongke Alliance မှ ခေါ်ယူကာ ကွန်ရက်လုံခြုံရေးဌာနကို တည်ထောင်ခဲ့ခြင်း ဖြစ်သည်။ ဤလုပ်ရပ်မှာ မှန်ကန်ကြောင်း သက်သေပြနေသည်။ တစ်နှစ်နီးပါးအတွင်း ကွန်ရက်လုံခြုံရေးဌာနသည် ပြင်ပမှ တိုက်ခိုက်မှု အများစုကို ခုခံကာကွယ်နိုင်ခဲ့သည်။ ကျန်ရှိသော အဓိက တိုက်ခိုက်မှုများကိုမူ ရှုံတာက ကိုင်တွယ်ဖြေရှင်းပေးခဲ့သဖြင့် လုံထန်နည်းပညာဌာနမှာ ယခုအချိန်အထိ အခိုင်အမာ ရပ်တည်နေဆဲပင် ဖြစ်သည်။

.....................................................