အခန်း (၁၇၇-၁၇၈)

အပိုင်း ၁၇၇

"ကျင်းလင်မြူနီစီပယ် ပါတီကော်မတီက အတွင်းရေးမှူးကျန်းတစ်ယောက် ဒီနေ့ ငါတို့ လုံထန်ကို ဘာကိစ္စနဲ့ ရောက်လာတာလဲ"

​အစည်းအဝေးခန်းထဲသို့ လှမ်းဝင်လိုက်သည်နှင့် လင်းဖန် သည် ဘေးတစ်စောင်းတွင် ထိုင်နေသော အတွင်းရေးမှူးကျန်းနှင့် သူ၏ဘေးမှ အရပ်ဝတ်ဝတ်ထားသော သန်မာထွားကြိုင်းသည့် လူလတ်ပိုင်းအမျိုးသားတစ်ဦးကို တွေ့လိုက်ရသဖြင့် ဇဝေဇဝါဖြင့် မေးလိုက်သည်။ အတွင်းရေးမှူးကျန်းဘေးမှ ထိုလူသည် အသားညိုညို၊ စူးရှသောအကြည့်ရှိပြီး ရာထူးအာဏာကြီးမားသူတစ်ဦး၏ အရှိန်အဝါမျိုး ပိုင်ဆိုင်ထားရာ သာမန်လူတစ်ယောက် မဟုတ်သည်မှာ သိသာလှသည်။

​"ဟားဟား! မတွေ့ရတာ ကြာပြီဖြစ်တဲ့ ဥက္ကဋ္ဌလင်းကတော့ ပိုပြီး ခန့်ညားလာတာပဲ"

အတွင်းရေးမှူးကျန်းက ပြုံး၍ နှုတ်ဆက်သည်။

- "မိတ်ဆက်ပေးပါရစေ ဒါကတော့ စစ်ဘက်ဆိုင်ရာ အထူးပစ္စည်းကိရိယာဌာနက ဗိုလ်ချုပ် မာရှင်း (Major General Ma Xin) ပါ။"

​"မစ္စတာ လင်းဖန်၊ တွေ့ရတာ ဝမ်းသာပါတယ်"

ထိုလူက တွေဝေမနေဘဲ ညာဘက်လက်ကို ကမ်းပေးကာ လင်းဖန် ကို စိုက်ကြည့်လိုက်သည်။

​'အော်... စစ်ဘက်ဆိုင်ရာ အထူးပစ္စည်းကိရိယာဌာနလား'

လင်းဖန် အနည်းငယ် နားလည်သွားကာ ရှေ့သို့လှမ်း၍ လက်ဆွဲနှုတ်ဆက်လိုက်ပြီး

"နှစ်ယောက်စလုံး အားမနာကြပါနဲ့၊ အရင်ထိုင်ကြပါဦး"

ဖော်ဖော်ရွေရွေ ပြောရင်း အလယ်ဗဟိုရှိ ကုလားထိုင်တွင် ဝင်ထိုင်လိုက်သည်။

​သူ ရှန်ကျန်မှာ ရှိစဉ်ကပင် အရှေ့တောင်စစ်ဒေသ၊ စစ်ဦးစီးဌာနနှင့် ထောက်ပို့ရေးဌာနတို့မှ ပုဂ္ဂိုလ်များနှင့် အဆက်အသွယ် ရှိခဲ့ဖူးသလို၊ ယန်ကျင်းတွင်လည်း အထူးတပ်ဖွဲ့များနှင့် သဘောတူညီမှု ရယူခဲ့ဖူးသည်။

လက်ရှိ လုံထန်၏ လုံခြုံရေးဌာနတွင်ရှိသော ဝန်ထမ်းသောင်းချီထဲမှ အများစုမှာလည်း အထူးတပ်ဖွဲ့ဝင်ဟောင်းများနှင့် အရှေ့တောင်စစ်ဒေသမှ ထိပ်တန်း ကင်းထောက်ဟောင်းများ ဖြစ်ကြရာ စစ်ဘက်နှင့် သူ၏ဆက်ဆံရေးမှာ မစိမ်းလှပေ။

​ထို့ကြောင့် မာရှင်း ရောက်လာခြင်းအပေါ် သူ အံ့ဩမနေတော့ပေ။ ပန်ကူးစမတ်ဖုန်းအကူစနစ်ကို စတင်မိတ်ဆက်စဉ်ကတည်းက စစ်ဘက်က တစ်နေ့နေ့တွင် တံခါးလာခေါက်မည်ကို သူ ကြိုတင်ပြင်ဆင်ထားပြီးသား ဖြစ်သည်။ AI နည်းပညာသည် အရပ်ဘက်သာမက စစ်ဘက်အတွက်ပါ နှိုင်းယှဉ်၍မရသော အကျိုးကျေးဇူးများ ပေးနိုင်သည်မဟုတ်ပါလား။

​"စကားကို လိုရင်းပဲ ပြောရအောင် ဒီနေ့ ကျွန်တော် ဒီကိုလာတာက နံပါတ် (၁) ပုဂ္ဂိုလ်ရဲ့ လွှဲအပ်ချက်အရ မစ္စတာလင်းနဲ့ တွေ့ဆုံဖို့ပါ"

ခဏအကြာတွင် မာရှင်းက တိုက်ရိုက်ပြောလိုက်သည်။

- "ပထမအချက်က မစ္စတာ လင်းဖန်ကို အမျိုးသားသိပ္ပံအကယ်ဒမီရဲ့ တစ်သက်တာ အကယ်ဒမီလူကြီး (Lifelong Academician) အဖြစ် ခန့်အပ်တဲ့ စာလွှာနဲ့ လက်မှတ်ကို ပေးအပ်ဖို့ပါ။"

​"ဒုတိယအချက်ကတော့ လုံထန်နဲ့ ပူးပေါင်းဆောင်ရွက်ချင်ပါတယ် ခင်ဗျားတို့ ကုမ္ပဏီရဲ့ AI နည်းပညာ အောင်မြင်မှုတွေကို လိုအပ်တဲ့ ငွေကြေး ဒါမှမဟုတ် တခြားနည်းပညာတွေနဲ့ အလဲအလှယ် လုပ်ချင်ပါတယ်"

​"အော်... ဟုတ်လား"

ထိုစကားကို ကြားသောအခါ လင်းဖန် ၏ မျက်လုံးများ ဝင်းလက်သွားသည်။ စစ်ဘက်က AI ကို လိုချင်နေသည်မှာ မထူးဆန်းပေ။ အမေရိကန်တွင်ပင် ၂၀၀၃ ခုနှစ်ကတည်းက PAL အစီအစဉ်ဖြင့် စစ်သားများအတွက် AI လက်ထောက် (Siri ၏ အခြေခံ) ကို ဖော်ထုတ်ခဲ့ဖူးသည်။ တရုတ်နိုင်ငံကလည်း ၂၀၀၅ ခုနှစ်ကတည်းက AI ကို အမျိုးသားအဆင့် မဟာဗျူဟာအဖြစ် သတ်မှတ်ခဲ့ပြီး ဖြစ်သည်။

​ယခု လုံထန်၏ ပန်ကူးစနစ်က Apple ၏ Siri ထက် များစွာ သာလွန်နေသဖြင့် စစ်ဘက်က ဤနည်းပညာ အထောက်အပံ့ကို လိုချင်နေခြင်းမှာ သဘာဝကျလှသည်။ သို့သော် နိုင်ငံတော်က သူ့ကို 'သိပ္ပံအကယ်ဒမီလူကြီး' ဘွဲ့အထိ ပေးအပ်လိမ့်မည်ဟုတော့ သူ မထင်မှတ်ထားခဲ့ပေ။ ဤဘွဲ့မှာ တရုတ်နိုင်ငံ၏ အဆင့်မြင့်ဆုံးနှင့် အမြင့်မြတ်ဆုံး ဂုဏ်ထူးဆောင်ဘွဲ့ ဖြစ်သည်။

​【ဒင်】

【ဂုဏ်ယူပါတယ် စနစ်ရှင်သည် ဘဝမှတ်တိုင်တစ်ခုဖြစ်သော 'တရုတ်အမျိုးသား သိပ္ပံအကယ်ဒမီ၏ တစ်သက်တာ အကယ်ဒမီလူကြီး' ဘွဲ့ကို ရရှိခဲ့ပြီ ဖြစ်သည် ထို့ကြောင့် အမွေဆက်ခံမည့် စည်းစိမ်ကို ကျပန်းရွေးချယ်ပေးပါမည်...】

​【ဂုဏ်ယူပါတယ် စနစ်ရှင်သည် အခြားကမ္ဘာရှိ Starry Universe အင်ပါယာမှ အင်ဂျင်နီယာ ချန်ထျန်းကန်း၏ အမွေကို ဆက်ခံခွင့်ရရှိပြီး 'ဟိုလိုဂရပ်ဖစ် ပရိုဂျက်ရှင်' (Holographic Projection Technology) နည်းပညာကို ရရှိပါသည်】

​ရုတ်တရက် ထွက်ပေါ်လာသော စနစ်၏ အချက်ပေးသံကြောင့် လင်းဖန် ၏ အတွေးများ ပြတ်တောက်သွားသည်။ ထိုခဏချင်းမှာပင် မှတ်ဉာဏ်စီးကြောင်းများစွာသည် သူ၏ ဦးနှောက်အတွင်းသို့ လျှပ်စစ်စီးသကဲ့သို့ တိုးဝင်လာခဲ့သည်။ သတိပြန်ဝင်လာချိန်တွင် သူ၏မျက်နှာ၌ ထူးဆန်းသောအမူအရာတစ်ခု ပေါ်လာတော့သည်။

​ယခုတစ်ကြိမ် ရရှိလိုက်သော အမွေမှာ ဟိုလိုဂရပ်ဖစ် ပရိုဂျက်ရှင် (Holographic Projection) နည်းပညာ ဖြစ်နေသည်မှာ အံ့မခန်းပင်။

​၎င်းသည် အလင်းယိုင်ခြင်းနှင့် အလင်းကွန့်ခြင်း (Interference and Diffraction) နိယာမများကို သုံး၍ အရာဝတ္ထုတစ်ခု၏ 3D ပုံရိပ်စစ်ကို လေဟာနယ်ထဲတွင် ဖော်ပြပေးနိုင်သော နည်းပညာဖြစ်သည်။ ဤနည်းပညာသည် စင်မြင့်ဖျော်ဖြေပွဲများ၊ ကားပြပွဲများနှင့် အပြန်အလှန် ဆက်သွယ်မှုစနစ်များအတွက် တော်လှန်ရေးတစ်ရပ် ဖြစ်လာပေလိမ့်မည်။

​လက်ရှိကမ္ဘာတွင် VR (Virtual Reality) နှင့် AR (Augmented Reality) နည်းပညာများ ရှိနေသော်လည်း ၎င်းတို့မှာ ဟိုလိုဂရပ်ဖစ်၏ အစားထိုးပစ္စည်းများသာ ဖြစ်သည်။

အစစ်အမှန် ဟိုလိုဂရပ်ဖစ် နည်းပညာသည် မည်သည့်မျက်မှန်မှ မလိုဘဲ လူချင်း မျက်နှာချင်းဆိုင် စကားပြောနိုင်အောင် စွမ်းဆောင်ပေးနိုင်သည်။

​အကယ်၍ လင်းဖန် သာ ဤနည်းပညာကို Nirvana S ဖုန်းတွင် ထည့်သွင်းနိုင်မည်ဆိုပါက ထိုဖုန်းသည် ကမ္ဘာပေါ်တွင် အဆင့်မြင့်ဆုံး ဖုန်းဖြစ်လာမည်မှာ သေချာသည်။

မိမိဖုန်းထဲမှ AI အကူစနစ်လေးက လေဟာနယ်ထဲတွင် လူပုံစံလေးအဖြစ် ထွက်ပေါ်လာပြီး စကားပြောနေသည်ကို မြင်ရမည့်ခံစားချက်မှာ မည်မျှ ထူးခြားလိုက်မည်နည်း။ ထို့ကြောင့် ဤနည်းပညာသည် နောက်ထပ် အောင်မြင်မှုကြီးတစ်ခု ဖြစ်လာပေတော့မည်။

...........................................................

အပိုင်း ၁၇၈

"မစ္စတာလင်း စိတ်မပူပါနဲ့၊ ကျွန်တော်တို့ စစ်ဘက်ဟာ တရားမျှတတဲ့ အရောင်းအဝယ်ဖြစ်ဖို့ကို အထူးအလေးထားပါတယ် ဘယ်သူ့အပေါ်မှာမှ အခွင့်အရေးယူမှာ မဟုတ်ပါဘူး ခင်ဗျားတောင်းဆိုတဲ့ အချက်တွေက ကျွန်တော်တို့ တတ်နိုင်တဲ့ ဘောင်ထဲမှာ ရှိနေသရွေ့ အကောင်းဆုံးဖြစ်အောင် ဖြည့်ဆည်းပေးမှာပါ။"

​"ဒါပေမဲ့ ခင်ဗျားဘက်က တကယ်လို့ မလိုလားဘူးဆိုရင်လည်း ကျွန်တော်တို့ အတင်းအကျပ် မတောင်းဆိုပါဘူး။"

​လင်းဖန် အတန်ကြာ တိတ်ဆိတ်နေသည်ကို ကြည့်ပြီး မာရှင်းမှာ ရင်တထိတ်ထိတ် ဖြစ်နေရသည်။ သူ တစ်ခုခု နားလည်မှုလွဲသွားမည်ကို စိုးရိမ်သဖြင့် အမြန်ပင် ရှင်းပြလိုက်ခြင်း ဖြစ်သည်။ စစ်ဘက်၏ အထူးဌာန မှတ်တမ်းများအရ ဤအသက် ၁၉ နှစ်အရွယ် လူငယ်မှာ ထူးခြားပြောင်မြောက်သော ဦးနှောက်ရှိရုံသာမက နှိုင်းယှဉ်၍မရသော ကြွယ်ဝမှုများကိုလည်း ပိုင်ဆိုင်ထားသည်။

​လွန်ခဲ့သည့် အချိန်အနည်းငယ်က လူအချို့သည် သူတို့၏ မိဘအရှိန်အဝါကို သုံးပြီး လုံထန်ကို အကျပ်ကိုင်ရန် ကြိုးစားခဲ့သော်လည်း အားလုံး ဖမ်းဆီးခံခဲ့ရသည်။ ဤအချက်ကပင် နိုင်ငံတော်သည် လင်းဖန် ကို မည်မျှ အလေးထားသည်ကို သက်သေပြနေသည်။

အကယ်၍ စစ်ဘက်အပေါ် လင်းဖန် အမြင်မကြည်လင်ဖြစ်သွားပါက ထိုအကျိုးဆက်ကို မည်သူမျှ တာဝန်ယူနိုင်လိမ့်မည် မဟုတ်ပေ။

​"ရပါတယ်"

​"ဘာ... ခင်ဗျား သဘောတူတယ် ဟုတ်လား"

မာရှင်းသည် ရှေ့မှ လူငယ်ကို မယုံနိုင်သလို ကြည့်လိုက်သည်။

​"ဟုတ်ပါတယ် AI နည်းပညာကို စစ်ဘက်ဆီ လွှဲပြောင်းပေးနိုင်ပါတယ်"

လင်းဖန် က ခေါင်းငြိတ်ကာ အတည်ပြုလိုက်သည်။

​လင်းဖန်သည် တရုတ်စစ်သားများကို အမြဲတမ်း လေးစားမှုရှိသည်။ စစ်ဘက်အဆင့်မြင့် အရာရှိများနှင့် တိုက်ရိုက် အဆက်အသွယ် မရှိခဲ့ဖူးသော်လည်း မိမိနိုင်ငံနှင့် လူမျိုးအတွက် ဤနည်းပညာကို ဝေမျှရန် သူ လိုလိုလားလား ရှိနေခြင်းဖြစ်သည်။

ဟုတ်ပါသည်၊ ဤသည်မှာ ပန်ကူးစမတ်ဖုန်းအကူစနစ်တွင် ပါဝင်သော နည်းပညာအဆင့်ကိုသာ ဆိုလိုခြင်းဖြစ်ပြီး အဓိက ကျောရိုးကုဒ် (Core Code) များကိုမူ လွှဲပြောင်းပေးမည် မဟုတ်ပေ။

​"ကောင်းတယ် အရမ်းကောင်းတယ်"

မာရှင်း၏ မျက်နှာတွင် ဝမ်းသာရိပ်များ အထိုင်းအထိုင်း ပေါ်လာပြီး လင်းဖန် ကို ကြည့်သည့် အကြည့်မှာလည်း ပို၍ လေးစားအားကိုးလာပုံ ရသည်။

​အမှန်စင်စစ် ယခင်က ထောက်ပို့ရေးဌာနနှင့် Longteng Group တို့ကြား ဖြစ်ပွားခဲ့သော ပဋိပက္ခများကို အထူးပစ္စည်းကိရိယာဌာနက မသိဘဲ မနေပေ။ ထို့ကြောင့်လည်း ယခုတစ်ကြိမ်လာရောက်ရာတွင် ဆက်ဆံရေး ပျက်ပြားသွားမည်ကို အထူးစိုးရိမ်ကာ သတိကြီးစွာ ထားခဲ့ရခြင်း ဖြစ်သည်။ သို့သော် ကောလာဟလများထဲကကဲ့သို့ မဟုတ်ဘဲ လင်းဖန် မှာ အလွန်စကားပြောရ လွယ်ကူနေသဖြင့် သူ အံ့ဩနေမိသည်။

​"ဗိုလ်ချုပ်မာ... ဝမ်းသာတာကို ခဏလေး ခေတ္တရပ်ပေးပါဦး ဒီပူးပေါင်းဆောင်ရွက်မှုမှာ အပေးအယူ အချက်အလက်တွေ ရှိပါတယ်"

လင်းဖန် က မာရှင်း၏ အပြုံးကို ဖြတ်တောက်ကာ တိုက်ရိုက်ပင် ပြောလိုက်သည်။

​မာရှင်းမှာ ဒေါသထွက်မသွားသည့်အပြင် ပြုံးလျက်ပင် ပြန်ဖြေသည်။

- "အကယ်ဒမီလူကြီးလင်း... စိတ်မပူပါနဲ့၊ ကျွန်တော်တို့ စစ်ဘက်က ယဉ်ကျေးမှုကို အလေးထားပါတယ် တကယ်လို့ အပေးအယူ ကတိကဝတ်တွေ မရှိဘူးဆိုရင် ခင်ဗျားက ဒီနည်းပညာကို ကျွန်တော့်လက်ထဲ ထည့်ပေးရင်တောင် ကျွန်တော် ပြန်ယူသွားရဲမှာ မဟုတ်ပါဘူး"

​"ကျွန်တော်တို့ တတ်နိုင်တဲ့ အတိုင်းအတာထဲမှာ ရှိမယ်ဆိုရင် ခင်ဗျား စိတ်ကြိုက် တောင်းဆိုနိုင်ပါတယ် ဟုတ်ပါတယ်... နိုင်ငံတော် ဥပဒေနဲ့တော့ မဆန့်ကျင်ရဘူးပေါ့။"

​"ဟားဟားဟား ဗိုလ်ချုပ်မာက ဒီလောက် ပွင့်လင်းမှတော့ ကျွန်တော်လည်း ဖုံးကွယ်မနေတော့ပါဘူး စမတ်ဖုန်းဘတ္တလာ နည်းပညာအားလုံးကို လွှဲပေးနိုင်ပါတယ်၊ ဒါပေမဲ့ Core Code တော့ မဟုတ်ဘူးပေါ့"

လင်းဖန် က အဓိပ္ပာယ်ပါပါ ပြောလိုက်သည်။

- "ဒါပေမဲ့ ပန်ကူထက် မနိမ့်ကျတဲ့ စစ်ဘက်သုံး သီးသန့် AI စနစ်သစ်တစ်ခုကို ကျွန်တော် ကိုယ်တိုင် ဖော်ထုတ်ပြီး လွှဲပြောင်းပေးပါ့မယ်။"

​"အလဲအလှယ်အနေနဲ့... စစ်ဘက်က အစိုးရနဲ့ ညှိနှိုင်းပေးပြီး ကျွန်တော်တို့ လုံထန်ကို ၃ နှစ်ကြာ အခွန်ကင်းလွတ်ခွင့် ပေးဖို့ မျှော်လင့်ပါတယ်။"

​လုံထန်သည် လက်ရှိတွင် ပန်ကူးစနစ်ဖြင့် ဈေးကွက်ထဲမှ ငွေများကို ကျုံးသွင်းနေသော်လည်း နောက်ဆက်တွဲ လုပ်ငန်းကြီးများအတွက်မူ ဤငွေမှာ 'သမုဒ္ဒရာထဲ ရေတစ်ပေါက်' မျှသာ ဖြစ်သည်။ ဆီလီကွန်ပုံဆောင်ခဲ သုတေသနအတွက် ရင်းနှီးမြှုပ်နှံမှုမှာပင် ဖုန်းလုပ်ငန်းထက် မနည်းပေ။ ထို့ပြင် ယခု 'ဟိုလိုဂရပ်ဖစ် ပရိုဂျက်ရှင်' နည်းပညာကိုပါ ရရှိထားပြီဖြစ်ရာ ၎င်းနှင့် ပတ်သက်သည့် စက်မှုကွင်းဆက်များ တည်ဆောက်ရန် နေရာအမြောက်အမြား လိုအပ်မည်ဖြစ်သည်။

ထို့ကြောင့် လင်းဖန် သည် စစ်ဘက်ကို အသုံးချကာ ချွေတာနိုင်သမျှ ချွေတာရန် ကြံစည်ခြင်း ဖြစ်သည်။

​မာရှင်းသည် ထိုစကားကို ကြားသောအခါ သောက်လက်စ လက်ဖက်ရည်ပင် သီးမလို ဖြစ်သွားသည်။ လုံထန်ကဲ့သို့ ကမ္ဘာကျော် ကုမ္ပဏီကြီးတစ်ခုအတွက် ၃ နှစ်စာ အခွန်ဆိုသည်မှာ နည်းနောသည့် ပမာဏမဟုတ်ပေ။ နက္ခတ်ဗေဒဆိုင်ရာ ကိန်းဂဏန်းများ ဖြစ်ပေလိမ့်မည်။

​မာရှင်း မဖြေနိုင်မီမှာပင် လင်းဖန် က ဆက်ပြောသည်။

- "နောက်ဆုံးအချက်က အရေးကြီးဆုံးပါ စစ်ဘက်အနေနဲ့ ဒီ AI စနစ်ကို အခြေခံပြီး တခြား ထုတ်ကုန်တွေ ထပ်မံ ဖော်ထုတ်နိုင်ပေမဲ့ အဲဒီပစ္စည်းတွေကို စစ်ဘက်မှာပဲ သုံးရပါမယ်။"

"တကယ်လို့ စီးပွားဖြစ် ဈေးကွက်ထဲ ထုတ်ချင်တယ်ဆိုရင်တော့ ကျွန်တော်တို့ အဖွဲ့နဲ့ သေချာ ပြန်ညှိနှိုင်းရပါမယ် အနည်းဆုံးတော့ မူပိုင်ခွင့်ခ (Patent Fee) တစ်စိတ်တစ်ပိုင်းကိုတော့ ကျွန်တော်တို့ ရသင့်တာပေါ့"

​"ဒါကတော့ ပြဿနာမရှိပါဘူး၊ ကျွန်တော်တို့ စီးပွားဖြစ် ရည်ရွယ်ချက်နဲ့ လုံးဝ သုံးမှာ မဟုတ်ပါဘူး"

ဟု မာရှင်းက အာမခံလိုက်သည်။

"အခွန် ၃ နှစ် ကင်းလွတ်ခွင့်ကတော့ ကျွန်တော့်မှာ ဆုံးဖြတ်ပိုင်ခွင့် မရှိလို့ အထက်ကို တင်ပြပေးရပါမယ်၊ ဒါပေမဲ့ ဒါက ဖြစ်နိုင်ခြေ အလွန်များပါတယ်။"

​စစ်ဘက်အတွက် သီးသန့်ဖော်ထုတ်ပေးမည့် AI ဆိုလျှင် ဘာကိုမှ ငြင်းစရာ အကြောင်းမရှိပေ။ ငွေသားဖြင့် အမြောက်အမြား ပေးချေရန်ပင် စစ်ဘက်က ဝန်လေးမည် မဟုတ်ပေ။

​"ဒါနဲ့... ကျွန်တော် သိချင်တာက စစ်ဘက်အနေနဲ့ ကျွန်တော်တို့ အဖွဲ့ရဲ့ စီးပွားရေး လုပ်ငန်းတွေအတွက် အထူးထုတ်လုပ်မှုနဲ့ သုတေသန လုပ်ပိုင်ခွင့်လိုင်စင် (Special License) တစ်ခု ထုတ်ပေးနိုင်မလား"

ဟု လင်းဖန် က ရုတ်တရက် သတိရကာ မေးလိုက်သည်။

​မာရှင်း ကြောင်သွားပြီး

- "အကယ်ဒမီလူကြီးလင်း... ခင်ဗျား တားမြစ်ထားတဲ့ ပစ္စည်းတွေ ထုတ်ချင်လို့လား"

​"ဟား..အဲလိုတော့ မဟုတ်ပါဘူး"

လင်းဖန် က ရယ်ရင်း ပြန်ပြောသည်။

- "တကယ်တော့ ကျွန်တော်က နေ့တိုင်း အသစ်အသစ်တွေကို လေ့လာနေတာဆိုတော့ တစ်ခါတစ်ရံ စိတ်ကူးသစ်တွေ ရတတ်တယ် တစ်ခါတလေ Hardware၊ တစ်ခါတလေ Software ပေါ့။"

"ဥပမာ - အခု ကျွန်တော် ဘက်ထရီအသစ်တစ်ခုကို လေ့လာနေတယ် ဒါက အမျိုးသားအဆင့် နည်းပညာတွေ ပါဝင်နေတော့ ထုတ်လုပ်ဖို့ဆိုရင် အထူးခွင့်ပြုချက်တွေ လိုအပ်မှာပဲ ခင်ဗျားတို့ သိတဲ့အတိုင်း ကျွန်တော်တို့ နိုင်ငံရဲ့ လုပ်ထုံးလုပ်နည်းတွေက နည်းနည်း ရှုပ်ထွေးတာကိုး..."

​မာရှင်းနှင့် အတွင်းရေးမှူးကျန်းတို့ နားလည်သွားကြသည်။ ပြည်တွင်းရှိ စီးပွားရေး လုပ်ထုံးလုပ်နည်းများမှာ ပြည်ပနှင့် မတူဘဲ အလှည့်အပတ် များလှသည် မဟုတ်ပါလား။

​"ကောင်းပါပြီ၊ ခင်ဗျားရဲ့ တောင်းဆိုချက်ကို အထက်ကို ကျွန်တော် တင်ပြပေးပါ့မယ်"

ဟု မာရှင်းက ပြောလိုက်သည်။

​စီးပွားရေး ဆွေးနွေးမှုများ ပြီးဆုံးသွားသဖြင့် သူတို့သုံးဦးသည် အစည်းအဝေးခန်း၌ လက်ဖက်ရည် ဆက်သောက်ရင်း ခေတ္တမျှ စကားစမြည် ပြောဆိုပြီးနောက် အသီးသီး ပြန်လည် ထွက်ခွာသွားကြတော့သည်။

.....................................................