အခန်း (၃၀၇-၃၀၈)

အခန်း (၃၀၇) - လကွယ်ည၏ ထူးခြားမှု (၂)

"ဒါနဲ့ နေဦး ရွှီရှင်း... နောက်ထပ် တစ်ခုရှိသေးတယ်။ ရှင့်ရဲ့ သစ်ပင်အိမ်ဘေးမှာ ကန်ကြီးတစ်ကန် ရှိတယ် မဟုတ်လား"

လီဝမ်ရှီးက ကန်ကြီး၏ အကျယ်အဝန်းကို ခန့်မှန်းပြသည့်အလား လက်မောင်းများဖြင့် ဝိုင်းပြလိုက်သည်။

"ဘာဖြစ်လို့လဲ။ ကန်ထဲမှာ သတ္တုတွင်းရှိလို့လား"

"...ရှင်ကတော့ ချက်ချင်း ခန့်မှန်းမိတာပဲနော်"

လီဝမ်ရှီး အနည်းငယ် အံ့သြသွားရသည်။

"ဟုတ်တယ်... ကြည့်ရတာတော့... အင်း... မီတာ ၃၀၊ ၄၀ လောက် အနက်မှာလားမသိဘူး။ ကျွန်မ ပြန်ခါနီးမှာ သတိထားမိလိုက်တာ၊ အထဲမှာ သတ္တုရိုင်းတွေ ရှိနေတယ်။ အဲဒီကန်ထဲက သတ္တုရိုင်းတွေက ကျွန်မတို့ တစ်ခါမှ မမြင်ဖူးသေးတဲ့ အမျိုးအစားတွေလို့ ခံစားရတယ်"

မီတာ ၃၀ ကနေ ၄၀ အနက် ဟုတ်လား...။

ဒါဟာ ပြီးခဲ့တဲ့အကြိမ်က သူ ရေငုပ်ဝတ်စုံနဲ့ ဆင်းတုန်းက မြင်ခဲ့ရတဲ့ အစိမ်းရောင် သတ္တုရိုင်းတွေ မဟုတ်ပါလား။

အစိမ်းရောင် သတ္တုရိုင်း...။

ဒါဟာ တကယ်ပဲ ကြေးနီသတ္တုရိုင်း များ ဖြစ်နေမလား။

ရွှီရှင်း၏ ရင်ခုန်သံများ မြန်လာခဲ့ရသည်။

အကယ်၍သာ ၎င်းမှာ တကယ့် ကြေးနီသတ္တုရိုင်း ဖြစ်နေမည်ဆိုပါက၊ သူသာ ၎င်းကို တူးဖော်နိုင်လျှင် လျှပ်စစ်ပစ္စည်းများကို ဖန်တီးနိုင်တော့မည်ဖြစ်ရာ သူ၏ သစ်ပင်အိမ်သည် လျှပ်စစ်ခေတ်ဦးသို့ ခြေလှမ်းလှမ်းနိုင်တော့မည် မဟုတ်ပါလား။

သို့သော်လည်း ပြီးခဲ့သည့်အကြိမ်က ရေထဲတွင် အန္တရာယ်ရှိသည်ဟု ခဲခဲလေးက တားမြစ်ခဲ့သဖြင့်၊ သူသည် ရေခပ်ရန်မှလွဲ၍ ထိုကန်ကြီးအနားသို့ သိပ်မသွားဖြစ်ခဲ့ပေ။

အခုဆိုလျှင် အခြေအနေက ဘယ်လိုရှိနေမည်နည်း။

အန္တရာယ်တွေ ရှိနေဆဲလားဆိုသည်ကို မည်သူမျှ မသိနိုင်ပေ။

အပြာရောင်အဆင့် ငါးကို စားသုံးပြီးနောက် ရေဖိအားဒဏ်ကို ပိုမိုခံနိုင်ရည်ရှိလာခဲ့သော်လည်း သူသည် ထိုကန်ထဲသို့ ထပ်မံ မငုပ်ဖြစ်ခဲ့သေးချေ။

ဒီတစ်ခါ ပြန်ရောက်ရင်တော့ သေသေချာချာ ပြန်ကြည့်ရမယ်။

"ကဲ... နင်တို့တွေပဲ ဆက်ပြီး စကားပြောနေကြတော့၊ ငါ သွားရတော့မယ်"

ပြတင်းပေါက်မှတစ်ဆင့် လှမ်းကြည့်လိုက်ရာ ငွေရောင်ဘုရင်မှာ မတ်တတ်ရပ်နေသည်ကို ရွှီရှင်း မြင်လိုက်ရ၏။

ရွှီရှင်း ခေါင်းပြူထွက်လာသည်နှင့် ၎င်းက ချက်ချင်းပင် တစ်ချက် အော်ဟစ်လိုက်ရာ အင်အားပြန်ပြည့်သွားပြီဖြစ်ကြောင်း အချက်ပြနေခြင်းပင်။

"ကောင်းပါပြီ၊ လမ်းမှာ သတိထားသွားဦးနော်"

ဆိုဖာပေါ်တွင် လူးလှိမ့်နေဆဲဖြစ်သော ခဲခဲလေးကို ချီကာ ရွှီရှင်းသည် လီဝမ်ရှီး၏ အကူအညီဖြင့် သစ်ပင်အိမ်အောက်သို့ ဆင်းလာခဲ့သည်။

သူသည် ချက်ချင်း ထွက်မသွားသေးဘဲ တည်နေရာကူးပြောင်းစက်ရှိရာသို့ လျှောက်သွားလိုက်၏။

သူသည် နေရာကူးပြောင်းလက်ပတ်နှင့် ပတ်သက်၍ စမ်းသပ်ကြည့်ချင်သေးသောကြောင့် ဖြစ်သည်။

ခဲခဲလေး၏ လက်ပတ်မှာ ယခုအခါ သူ၏ ကျောပိုးအိတ်ထဲတွင် ရှိနေ၏။

"ခဲခဲလေး... အိမ်ပြန်ဖို့အတွက် ကူးပြောင်းရေးတံခါးကို အသက်သွင်းလိုက်"

ရွှီရှင်းက ခဲခဲလေးကို မီတာအနည်းငယ်အကွာတွင် ချထားပေးလိုက်သည်။

"အီး"

ခဲခဲလေးက ခေါင်းလေးကို စောင်းကာ ရွှီရှင်း ဘာလုပ်ခိုင်းနေသလဲဆိုသည်ကို နားမလည်နိုင်သလို ကြည့်နေသော်လည်း၊ ချက်ချင်းပင် ခုန်ဆွခုန်ဆွနှင့် သွားကာ "ရွှီရှင်း၏ သစ်ပင်အိမ်" ဟု ရေးထားသော သံမဏိတိုင်ကို လှမ်းထိလိုက်ပြီးနောက် အနောက်သို့ ပြန်ခုန်ဆုတ်လာခဲ့၏။

ခရမ်းရောင်အလင်းတန်းများ ပြောင်းလဲသွားကာ ထူးခြားသော အသံများနှင့်အတူ နေရာကူးပြောင်းရေးတံခါးမှာ ပွင့်လာခဲ့ပြီး ခရမ်းနက်ရောင် ဝဲဂယက်ကြီး ပြန်လည် ပေါ်ထွက်လာတော့သည်။

လက်ပတ်ကို ကိုင်မထားစေကာမူ ခဲခဲလေးသည် ကူးပြောင်းရေးတံခါးကို အောင်မြင်စွာ အသက်သွင်းနိုင်ခဲ့ချေပြီ။

ကြည့်ရသည်မှာ လက်ပတ်ကို လက်ထဲတွင် ကိုင်မထားရင်တောင် ၎င်းမှာ စက်ကို ထိန်းချုပ်နိုင်စွမ်းရှိပြီး ကိုယ်ပေါ်တွင် ဝတ်ဆင်ထားရန်ပင် မလိုကြောင်း သေချာသွားခဲ့ပြီ ဖြစ်သည်။

ခုနက ခဲခဲလေးသည် သူ့ထံမှ မီတာအနည်းငယ်အကွာတွင် ရှိနေသော်လည်း လက်ပတ်မှာ အလုပ်လုပ်နေဆဲဖြစ်ရာ၊ ၎င်း၏ သက်ရောက်မှု အကွာအဝေးမှာ အတော်လေး ကျယ်ပြန့်သည်ဟု ဆိုရပေမည်။

ဒါဟာ ပိုပြီး အဆင်ပြေလှပေသည်။

ဤအချက်ကို နားလည်သွားပြီးနောက် ရွှီရှင်းသည် ငွေရောင်ဘုရင်ကို စီးနင်းကာ ချီရွှယ်ဖေး၏ သစ်ပင်အိမ်ရှိရာသို့ ဦးတည်ထွက်ခွာခဲ့တော့သည်။

သူသည် အရင်ဆုံး အနောက်ဘက်က သစ်ပင်အိမ်ပျက်ကြီးဆီသို့ အရင်သွားရမည်ဖြစ်ပြီး၊ ထိုမှတစ်ဆင့် မြောက်ဘက်ရှိ လီယာကျွင်း၏ သစ်ပင်အိမ်ဟောင်းကို ဖြတ်ကျော်ကာ မာဟုန်ယွီ၏ သစ်ပင်အိမ်ဟောင်းရှိရာသို့ ဝင်ကာ နောက်ဆုံးမှ အရှေ့ဘက်ရှိ ချီရွှယ်ဖေး၏ အကာအကွယ်နယ်မြေအတွင်းသို့ ဝင်ရောက်နိုင်မည် ဖြစ်ပေသည်။

လမ်းတစ်လျှောက်တွင် သေဆုံးသွားသော ရှင်ကျန်သူများ၏ သစ်ပင်အိမ်ဟောင်း အကာအကွယ်နယ်မြေများကို ဖြတ်သန်းကာ ထိုနေရာများတွင် ဟန့်တားမှု အငွေ့အသက်များ ကျန်ရှိနေဆဲဖြစ်သဖြင့် လောလောဆယ်တွင်တော့ အန္တရာယ်တစ်စုံတစ်ရာအတွက် စိုးရိမ်စရာ မရှိသေးပေ။

မကြာမီမှာပင် သူတို့သည် လီယာကျွင်း၏ သစ်ပင်အိမ် မူလအကာအကွယ်နယ်မြေအတွင်းသို့ ဝင်ရောက်လိုက်ကြရာ၊ ငွေရောင်ဘုရင်၏ ကိုယ်ပေါ်ရှိ သွေးရောင်အစင်းကြောင်းများမှာ တဖြည်းဖြည်း လင်းထိန်လာခဲ့ပြန်သည်။

ဤထူးခြားသော နယ်မြေကို ထပ်မံ ဖြတ်ကျော်ရပြန်လေပြီ။

ငွေရောင်ဘုရင်၏ ခွန်အားများမှာ တစ်ဖန်ပြန်လည် နိုးထလာခဲ့ချေပြီ။

တစ်နေကုန် ပြေးလွှားထားရသော်လည်း ယခုအခါ ၎င်းမှာ အင်အားအပြည့် ဖြစ်နေပြန်သည်။

ဤမြှင့်တင်မှု အာနိသင်မှာ တကယ့်ကို ထူးကဲလှပေသည်။

အထူးသဖြင့် မီမီကဲ့သို့ တိုက်ခိုက်မှု ပြင်းထန်သော်လည်း ခံနိုင်ရည်နည်းပါးတဲ့ ဗီဇပြောင်းသားရဲများအတွက်ဆိုလျှင် ၎င်းမှာ တကယ့် စွမ်းအားရှင်တစ်ဦးအလား ဖြစ်သွားစေသည် မဟုတ်ပါလား။

အခွင့်အရေးရရင်တော့ ဒီမြှင့်တင်မှု အာနိသင်ရဲ့ အရင်းအမြစ်ကို ရှာဖွေပြီး လက်ဝယ်ပိုင်ဆိုင်နိုင်အောင် လုပ်ရပေမည်။

"အီးးး"

ရွှီရှင်း ထိုအကြောင်းကို တွေးနေစဉ်မှာပင် ခဲခဲလေးက ရုတ်တရက် သတိပေးသံ ပြုလိုက်၏။

"ငွေရောင်ဘုရင်... ရပ်လိုက်"

ခဲခဲလေး၏ သတိပေးသံကို ကြားသည်နှင့် ရွှီရှင်းသည် ငွေရောင်ဘုရင်ကို ရပ်ရန် အလိုလိုနေရင်း အမိန့်ပေးလိုက်မိသည်။

ငွေရောင်ဘုရင်သည် ခြောက်သွေ့နေသော တောအုပ်အတွင်း၌ အရေးပေါ် ဘရိတ်အုပ်ကာ ရပ်တန့်လိုက်ရ၏။

ကြယ်ရောင်လင်းသော ညအောက်တွင် ၎င်း၏ ကိုယ်ပေါ်က သွေးရောင်အစင်းကြောင်းများမှာ ထင်ရှားစွာ လင်းလက်နေပေသည်။

"ဘာဖြစ်လို့လဲ"

ရွှီရှင်း ပတ်ဝန်းကျင်ကို သတိကြီးစွာဖြင့် ဝေ့ကြည့်လိုက်သည်။

"အနားမှာ အန္တရာယ်ရှိလို့လား"

"အီးးး"

ခဲခဲလေးက သူမ၏ ခေါင်းလုံးလုံးလေးကို ညိတ်ပြရင်း သူမ၏ လက်သည်းလေးဖြင့် ရှေ့ဘက်သို့ ညွှန်ပြနေတော့သည်။

ရွှီရှင်းသည် ခဲခဲလေး၏ အာရုံခံနိုင်စွမ်းကို လုံးဝ သံသယမရှိပေ။

အဘယ်ကြောင့်ဆိုသော် ခဲခဲလေးမှာ မှားယွင်းလေ့ မရှိသောကြောင့် ဖြစ်သည်။

သူ မြေပုံကို စစ်ဆေးကြည့်သော်လည်း ပတ်ဝန်းကျင်တွင် ခြိမ်းခြောက်မှုပြသသည့် အနီရောင်အစက်များကို ရှာမတွေ့ပေ။

မြေပြင်ပေါ်မှာ ဘာမှမရှိဘူးလား။

ဒါဆိုရင်... နောက်ထပ် မြေအောက်က ဗီဇပြောင်းသတ္တဝါတွေများလား။

ဒါပေမဲ့ ဘာလို့ အခုမှ ပေါ်လာရတာလဲ။ ဒီနေရာက အကာအကွယ်နယ်မြေ မဟုတ်ဘူးလား။

ရွှီရှင်း တစ်စုံတစ်ခုကို ရုတ်တရက် သတိရသွားကာ ကောင်းကင်ကို မော့ကြည့်လိုက်မိသည်။

ဒီနေ့ညဟာ လကွယ်ညပင်။

ဒါ့အပြင် ဒီနေရာဟာ ငွေရောင်ဘုရင်ရဲ့ သွေးရောင်အစင်းကြောင်းတွေ လင်းလာစေတဲ့ ထူးခြားတဲ့ နယ်မြေဖြစ်နေပြန်၏။

ပိုဆိုးတာက လက်ရှိနေရာဟာ တကယ့် အကာအကွယ်နယ်မြေ မဟုတ်တော့ဘဲ၊ ဟန်ပြအကာအကွယ်နယ်မြေ သာ ဖြစ်နေခြင်းပင်။

ဤကဲ့သို့သော နယ်မြေမျိုးမှာ ဂျုံခင်းထဲက စာခြောက်ရုပ်နှင့် တူလှပေသည်။

ခြောက်လှန့်ရန်အတွက်သာ ထိရောက်ပြီး အမှန်တကယ် ကာကွယ်ပေးနိုင်သည့် လုပ်ဆောင်ချက် မရှိပေ။

ဤအချက်များ ပေါင်းစပ်လိုက်သည့်အခါတွင်မူ ယခု ပတ်ဝန်းကျင်မှာ အလွန် အန္တရာယ်ကြီးမားနေနိုင်ချေ ရှိပေသည်။

ဘယ်လိုလုပ်ရမလဲ။ ရှေ့က ဧရိယာက အန္တရာယ်ဇုန် ဖြစ်နေပြီလား။

မနက်ဖြန် နေသာတဲ့အချိန်ကျမှ အစ်မရွှယ်ဖေးဆီ သွားပြီး ချိတ်ဆက်တာက ပိုကောင်းမလား။

လကွယ်ညရဲ့ ထူးခြားတဲ့ နယ်မြေဆိုတာ တကယ်ကို အန္တရာယ် ရှိလှသည် မဟုတ်ပါလား။

နေဦး။

ဒီဗီဇပြောင်းသတ္တဝါတွေကို သွေးရောင်မျိုးနွယ်စု ရဲ့ လက်ပါးစေတွေလို့ ယူဆလို့ ရတယ် မဟုတ်လား။

ဒါဆိုရင်...

ရွှီရှင်းသည် သူ၏ကျောပိုးအိတ်ထဲမှ ဂူထဲတွင် ရရှိခဲ့သော စွမ်းအင်အမြုတေ အပိုင်းအစကို ချက်ချင်း ဆွဲထုတ်လိုက်တော့သည်။

၎င်းကို ထုတ်ယူလိုက်သည်နှင့် ပတ်ဝန်းကျင်မှာ ညင်သာလှသော ဖြူဖွေးသည့် အလင်းတန်းများဖြင့် လင်းထိန်သွားခဲ့သလို၊ ၆ ဒီဂရီ၊ ၇ ဒီဂရီခန့်သာရှိသော အပူချိန်မှာလည်း ချက်ချင်းပင် ၂၀ ဒီဂရီကျော်သို့ မြင့်တက်သွားခဲ့ရာ၊ သူ၏ ရင်ခွင်ထဲက ခဲခဲလေးမှာပင် ကျေနပ်အားရစွာဖြင့် အသံပြုနေရှာတော့သည်။

ဒီအမြုတေက မြေအောက်က ဗီဇပြောင်းသတ္တဝါတွေ ပေါ်မလာအောင် တားဆီးပေးနိုင်မလား။

"ခဲခဲလေး... အခု ရှေ့ကို ဆက်သွားလို့ ရပြီလား"

ရွှီရှင်းသည် စွမ်းအင်အမြုတေကို ကိုင်ထားရင်း ခဲခဲလေး၏ ခေါင်းကို ပုတ်ကာ မေးလိုက်၏။

"...အီး"

ခဲခဲလေးက ရှေ့ဘက်သို့ ခေတ္တမျှ စူးစမ်းကြည့်ပြီးနောက် ခေါင်းညိတ်ပြလိုက်သည်။

"အီးးး"

"ဝူးးး"

ငွေရောင်ဘုရင်သည်လည်း ခေါင်းကို လှည့်၍ တစ်ချက် အော်လိုက်ရာ၊ ရှေ့တွင် အန္တရာယ် မရှိတော့ကြောင်း အချက်ပြနေခြင်းပင် ဖြစ်သည်။

"ကောင်းပြီ... ဒါဆို ဆက်သွားကြစို့။ အန္တရာယ်ရှိရင် ခဲခဲလေး သတိပေးဖို့ မမေ့နဲ့နော်။ ငွေရောင်ဘုရင်... မင်းလည်း ချက်ချင်း ရပ်လိုက်"

"အီးးး"

"ဝူးးး"

ငွေရောင်ဘုရင်သည် ချက်ချင်းပင် လှုပ်ရှားလိုက်ပြီး ရှေ့သို့ တစ်ဟုန်ထိုး ပြေးထွက်သွားတော့သည်။

စွမ်းအင်အမြုတေ အပိုင်းအစမှ ထွက်ပေါ်နေသော အလင်းတန်းမှာ သေးငယ်လှသည်တော့ မဟုတ်ပေ။

အနည်းဆုံး မီတာဆယ်ဂဏန်းအတွင်းမှာတော့ နေ့ခင်းဘက်ကဲ့သို့ လင်းထိန်နေစေသလို၊ ပိုမိုဝေးကွာသော နေရာများသို့လည်း အလင်းရောင်မှာ အနည်းငယ် မှိန်ဖျော့စွာ ရောက်ရှိနေပေသည်။

ယင်း၏ အမှန်တကယ် သက်ရောက်မှု အကွာအဝေးမှာ မီတာ ၁၀၀ ဝန်းကျင်လောက် ရှိမလားပင်။

ရွှီရှင်း ရှေ့သို့ တိုးသွားသည်နှင့်အမျှ ပတ်ဝန်းကျင်နှင့် မြေပုံပေါ်က လှုပ်ရှားမှုများကို စောင့်ကြည့်နေမိသည်။

"...ဟင်"

ရွှီရှင်း၏ မျက်စိသူငယ်အိမ်များ ကျုံ့ဝင်သွားပြီး မျက်မှောင်ကြုတ်လိုက်မိ၏။

မြေပုံပေါ်တွင် မမျှော်လင့်ထားသော အရာတစ်ခု ပေါ်လာချေပြီ။

သူတို့ ခုနလေးတင် ဖြတ်ကျော်ခဲ့သော နေရာများ၏ ပတ်ဝန်းကျင်တွင် အနီရောင်အစက်များမှာ အစီအရီ ပေါ်ထွက်လာခြင်းပင်။

ငွေရောင်ဘုရင်၏ အရှိန်မှာ အလွန်ပင် မြန်ဆန်လှပေသည်။

အထူးသဖြင့် သွေးရောင်အစင်းကြောင်းများ၏ မြှင့်တင်မှုကြောင့် ၎င်းသည် တောအုပ်အတွင်း၌ အတားအဆီးမရှိ လျင်မြန်စွာ လှုပ်ရှားနိုင်ပေသည်။

မြေပုံပေါ်တွင်မူ သူတို့၏ အနောက်ဘက်တွင် အနီရောင်အစက်များမှာ တိတ်တဆိတ် ပေါ်လာလိုက်၊ ခဏအကြာတွင် ပြန်လည် ပျောက်ကွယ်သွားလိုက်နှင့် လှိုင်းလုံးကြီးများအလား ဖြစ်ပေါ်နေသည်မှာ ရင်ထိတ်ဖွယ်ရာ ကောင်းလှပေသည်။

ဒါတွေက... မြေအောက်က သတ္တဝါတွေပဲ ဖြစ်ရမယ်။

အခန်း ၃၀၇ ပြီး။

အခန်း (၃၀၈) - တည်နေရာကူးပြောင်းစက် တပ်ဆင်ခြင်းနှင့် လုဖေးအာနှင့် ဆွေးနွေးခြင်း

ရွှီရှင်းသည် ချက်ချင်းပင် အနောက်သို့ လှည့်ကြည့်လိုက်၏။

သူ့အနောက်ဘက်ရှိ မြေပြင်မှာ အလွန်ပင် ငြိမ်သက်နေပြီး သာမန်မျက်စိဖြင့် ကြည့်ရုံမျှနှင့်တော့ ထူးခြားမှုတစ်စုံတစ်ရာကို မြင်တွေ့နိုင်မည်မဟုတ်ပေ။

"အီးးး..."

ခဲခဲလေးသည်လည်း သူမ၏ ခေါင်းလုံးလုံးလေးကို ပြူထွက်၍ လှည့်ကြည့်လိုက်ပြီးနောက်၊ ချက်ချင်းပင် ရွှီရှင်း၏ ရင်ခွင်ထဲသို့ ပြန်လည်တိုးဝင်ကာ ကြောက်လန့်တကြားနှင့် အသံတိုးတိုးလေး ပြုနေရှာသည်။

ရွှီရှင်း ခေတ္တမျှ စဉ်းစားလိုက်ပြီးနောက် ဘာတွေဖြစ်နေသလဲဆိုသည်ကို အကြမ်းဖျင်း သဘောပေါက်သွားခဲ့ပြီ ဖြစ်သည်။

သူ ခန့်မှန်းခဲ့သည့်အတိုင်းပင် ဖြစ်ရပေမည်။

လကွယ်ည၊ ထူးခြားသော နယ်မြေနှင့် ဟန်ပြအကာအကွယ်နယ်မြေ။

ဤသုံးခု ပေါင်းစပ်သွားခြင်းက ဤနေရာကို အတော်လေး အန္တရာယ်ရှိသော ဇုန်တစ်ခု ဖြစ်သွားစေခဲ့ခြင်းပင်။

ထို့ကြောင့် ရွှီရှင်းတို့ ဖြတ်သန်းသွားသည့်အခါ၊ ဤနယ်မြေအတွင်း၌ စတင်နိုးထနေပြီဖြစ်သော မြေအောက်သတ္တဝါများသည် သူတို့၏ လှုပ်ရှားမှုကို သိရှိသွားကြပြီး မြေပေါ်သို့ တိုးထွက်ကာ တိုက်ခိုက်ရန် ပြင်ဆင်ခဲ့ကြသည်။

သို့သော်လည်း စွမ်းအင်အမြုတေ အပိုင်းအစ၏ အာနိသင်ကြောင့် ထိုမြေအောက်သတ္တဝါများသည် နောက်ဆုတ်သွားကြပြီး မြေပေါ်သို့ တက်ရောက်တိုက်ခိုက်ရန် မဝံ့မရဲ ဖြစ်သွားကြခြင်း ဖြစ်သည်။

ဆိုလိုသည်မှာ ၎င်းတို့သည် မြေပေါ်သို့ ဦးခေါင်းပြူရန် ကြိုးစားလိုက်တိုင်း အမြုတေ၏ ဟန့်တားမှုကို ခံစားလိုက်ရသဖြင့် မြေအောက်သို့ အမြန်ပြန်ငုပ်သွားကြခြင်း ဖြစ်ရမည်။

ထို့ကြောင့်ပင် မြေပုံပေါ်တွင် အနီရောင်အစက်များမှာ လင်းခနဲဖြစ်လိုက်၊ ချက်ချင်းပင် ပြန်မှိန်သွားလိုက်နှင့် လှိုင်းလုံးများအလား ဖြစ်ပေါ်နေခြင်း ဖြစ်ပေသည်။

မြေအောက်သတ္တဝါတွေ ထွက်ပြေးသွားကြပြီပေါ့။

"ဒီအမြုတေက တကယ့်ကို အစွမ်းထက်တာပဲ၊ ရရချင်းမှာတင် အသုံးတည့်သွားပြီ"

ရွှီရှင်းသည် အမြုတေကို ဆုပ်ကိုင်ထားရင်း သူ၏ ကံကောင်းမှုကို ကျေနပ်နေမိသည်။

သူသည် အမြုတေကို မျက်စိရှေ့သို့ မြှောက်ကာ အသေအချာ ကြည့်လိုက်၏။

ညင်သာလှသော အဖြူရောင်အလင်းတန်းမှာ မျက်စိကျိန်းခြင်း လုံးဝမရှိသလို၊ အားနည်းသွားမည့် အရိပ်အယောင်လည်း မပြပေ။

ထိုစဉ် သူ မေးခွန်းတစ်ခုကို ရုတ်တရက် တွေးမိသွားသည်။

အကယ်၍ ဗီဇပြောင်းသတ္တဝါတွေအားလုံးဟာ ဒီအမြုတေရဲ့ အလင်းတန်းကို ကြောက်ကြတာဆိုရင်၊ အခုချိန်မှာ သူဟာ...။

အကာအကွယ်နယ်မြေထဲကပဲ သွားနေစရာမလိုတော့ဘဲ အန္တရာယ်ရှိတဲ့ဇုန်တွေထဲကိုပါ တိုက်ရိုက် ဝင်ရောက်လို့ ရနိုင်မလား။

ဤအမြုတေရှိနေသရွေ့ သူ၏ပတ်ဝန်းကျင် အဖြူရောင်အလင်းတန်း ရောက်ရှိရာ နေရာတိုင်းသည် အမြုတေ၏ အကာအကွယ်ကို ရရှိနေမည်ဖြစ်ပြီး၊ ဗီဇပြောင်းသတ္တဝါများသည်လည်း ထိုအလင်းဒဏ်ကြောင့် မြေအောက်ကန်ထဲက အသားစားငါးတွေလိုမျိုး သေဆုံးသွားတာ ဒါမှမဟုတ် ထွက်ပြေးသွားတာမျိုး ဖြစ်နိုင်သည် မဟုတ်ပါလား။

ဒါဆိုရင် ဒီအမြုတေဟာ ရွေ့လျားနေတဲ့ အကာအကွယ်နယ်မြေ တစ်ခုနဲ့ တူနေပြီပေါ့။

နေဦး... ဒီအမြုတေက ထွက်တဲ့ အဖြူရောင်အလင်းက သစ်ပင်အိမ်အမြုတေက ထွက်တဲ့ အလင်းနဲ့ ဆင်တူနေတာပဲ...။

ဒီနှစ်ခုကြားမှာ ဘယ်လို ဆက်နွှယ်မှုမျိုး ရှိနေတာလဲ။

ဘာပဲဖြစ်ဖြစ် အခုဆိုရင် သူ အန္တရာယ်ရှိတဲ့ဇုန်ထဲကို ခြေလှမ်းလှမ်းဖို့ စမ်းသပ်ကြည့်လို့ ရနိုင်ချေ ရှိနေပြီ။

အရင်က သူ သတိပြုမိခဲ့တဲ့ စွမ်းအားမြှင့်တင်မှု အာနိသင် ရဲ့ မြစ်ဖျားခံရာဟာ အဲဒီ အန္တရာယ်ရှိတဲ့ ဇုန်ထဲမှာ ရှိနေတာလေ။

အကယ်၍ ဤယူဆချက်သာ မှန်ကန်ခဲ့လျှင် သူ အခုပဲ ၎င်းကို သွားရောက် ရှာဖွေနိုင်ပြီ ဖြစ်သည်။

အစ်မရွှယ်ဖေးဆီမှာ တည်နေရာကူးပြောင်းစက် တပ်ဆင်ပြီးတာနဲ့ အန္တရာယ်ရှိတဲ့ ဇုန်ဘက်ကို တစ်ချက်လောက် သွားကြည့်ရမယ်။

သူ ရှေ့သို့ ဆက်လက် ထွက်ခွာခဲ့သည်။

အနောက်ဘက်တွင် အနီရောင်အစက် လှိုင်းလုံးကြီးများ ကျန်ရစ်ခဲ့ကာ၊ လူတစ်ယောက်နှင့် သားရဲနှစ်ကောင်သည် ထူးခြားသော နယ်မြေကို လျင်မြန်စွာ ဖြတ်ကျော်လျက် မာဟုန်ယွီ၏ သစ်ပင်အိမ်ဟောင်း အကာအကွယ်နယ်မြေအတွင်းသို့ ဝင်ရောက်လိုက်ကြ၏။

ငွေရောင်ဘုရင်၏ ကိုယ်ပေါ်က သွေးရောင်အစင်းကြောင်းများမှာ လုံးဝ ကွယ်ပျောက်သွားခဲ့သလို၊ မြေပုံပေါ်တွင်လည်း အနောက်က လိုက်ပါလာသော အနီရောင်အစက်များမှာ ထပ်မံ ပေါ်မလာတော့ပေ။

ထိုနေရာက ထူးခြားမှုတွေဟာ စွမ်းအားမြှင့်တင်မှု နယ်မြေနဲ့ တကယ့်ကို တိုက်ရိုက် သက်ဆိုင်နေတာပဲ။

ဤနေရာသည် သူတို့၏ သစ်ပင်အိမ်များနှင့် အလွန်ပင် နီးကပ်နေသဖြင့် တစ်ချိန်ချိန်တွင်တော့ သေချာပေါက် ရှင်းလင်းပစ်ရမည့် ခြိမ်းခြောက်မှုတစ်ခု ဖြစ်ပေသည်။

ခြောက်သွေ့နေသော တောအုပ်ကြီးကို ဖြတ်ကျော်ပြီးနောက် နောက်ဆုံးတွင် ရွှီရှင်းသည် ချီရွှယ်ဖေး၏ သစ်ပင်အိမ်အောက်သို့ ရောက်ရှိလာခဲ့၏။

ဇွတ်အတင်း လိုက်လာခဲ့သော ခဲခဲလေးမှာမူ သူ၏ ရင်ခွင်ထဲတွင် အိပ်မောကျနေချေပြီ။

ငွေရောင်ဘုရင်ကတော့ အားအင်အပြည့် ရှိနေဆဲပင်။

လမ်းတစ်လျှောက်လုံး ပြေးလာခဲ့သော်လည်း ထူးခြားသော နယ်မြေကို ဖြတ်သန်းစဉ်က အင်အားများ ပြန်လည်ဖြည့်တင်းခြင်း ခံခဲ့ရသဖြင့် ယခုထိ လန်းဆန်းနေဆဲ ဖြစ်သည်။

"အစ်မရွှယ်ဖေး ရှိလားဗျို့"

ရွှီရှင်း သစ်ပင်အိမ်အောက်မှ လှမ်းအော်ခေါ်လိုက်၏။

ချီရွှယ်ဖေး၏ အသံမှာ တတိယထပ်မှ ချက်ချင်း ပြန်လည်ထွက်ပေါ်လာသည်။

"ရှိတယ်... ခဏလေးနော်၊ အခုချက်ချင်း ဆင်းလာခဲ့မယ်"

သူမက အခုချက်ချင်းဟု ဆိုသော်လည်း ရွှီရှင်းမှာ မိနစ်အတော်ကြာအောင် စောင့်ဆိုင်းခဲ့ရသည်။

တတိယထပ်ဆီမှ စမ်းသပ်ကိရိယာများ အလုပ်လုပ်နေသည့် အသံအချို့ကိုလည်း ဝေဝါးစွာ ကြားနေရ၏။

ရွှီရှင်းသည် ကျိချောင်းယန် ဖမ်းဆီးထားသော အမျိုးသမီးရှိသည့် သစ်ပင်အိမ်ဘက်သို့ လှမ်းကြည့်လိုက်ရာ မီးလင်းဖို၏ အလင်းရောင်ကြောင့် အထဲတွင် လင်းထိန်နေသည်ကို တွေ့ရသည်။

ထိုစဉ် ထိုအမျိုးသမီးသည် ပြတင်းပေါက်ဘေးမှနေ၍ သူမ၏ ဦးခေါင်းတစ်ဝက်ခန့် ပြူထွက်ကာ သူ့ကို လှမ်းကြည့်နေပြီး၊ ရွှီရှင်းနှင့် အကြည့်ချင်းဆုံသွားသည်နှင့် ချက်ချင်းပင် အထဲသို့ ပြန်ဝင်သွားတော့သည်။

"လာပြီ၊ လာပြီ"

အပေါ်မှ အသံကြားလိုက်ရပြီးနောက် ချီရွှယ်ဖေးသည် သစ်ပင်မြစ်များပေါ်မှ ဆင်းလာကာ ရွှီရှင်း၏ ဘေးသို့ ဆင်းသက်လိုက်သည်။

"အားနာပါတယ် ရွှီရှင်းရယ်၊ အစ်မက စမ်းသပ်မှုတစ်ခု လုပ်နေရင်းတန်းလန်းမို့လို့ ချက်ချင်း ရပ်လို့မရတာနဲ့။ မဟုတ်ရင် ကုန်ကြမ်းတွေ အလကား ဖြစ်သွားမှာ စိုးလို့ပါ"

"ရပါတယ်ဗျာ၊ နားလည်ပါတယ်"

ရွှီရှင်းက ခေါင်းညိတ်ပြလိုက်ရင်း "တည်နေရာကူးပြောင်းစက် ထားမယ့်နေရာကို ရွေးလိုက်ပါဦး" ဟု ဆိုလိုက်၏။

"ကောင်းပြီလေ"

ချီရွှယ်ဖေးက ရွှီရှင်းကို သူမ ရွေးချယ်ထားသော နေရာသို့ ဦးဆောင်ခေါ်သွားခဲ့သည်။

ထိုအတောအတွင်း ရွှီရှင်းသည် သူမအတွက် အပြာရောင်အဆင့် နေရာကူးပြောင်းလက်ပတ်တစ်ခုကို ချက်ချင်း ဖန်တီးပေးလိုက်၏။

ဒါဟာ သူ ကြိုတင် စီစဉ်ထားသည့်အတိုင်းပင် ဖြစ်သည်။

စူးစမ်းရှာဖွေသူများ အဖွဲ့ဝင် တစ်ဦးချင်းစီ၏ နယ်မြေတွင် ကူးပြောင်းစက် တစ်ခုစီ ရှိလာမည်ဖြစ်ရာ၊ တစ်နယ်မြေလျှင် အပြာရောင်အဆင့် လက်ပတ်တစ်ခုစီ ပေးထားခြင်းက အဆင်ပြေဆုံး ဖြစ်ပေလိမ့်မည်။

ကျန်ရှိသော သူများကိုမူ အစိမ်းရောင်အဆင့် လက်ပတ်များသာ ပေးအပ်မည်ဖြစ်ပြီး၊ အခြေအနေပေါ် မူတည်၍ လုံးဝ မပေးဘဲလည်း နေနိုင်ပေသည်။

"ဒီနေရာဆိုရင် ဘယ်လိုလဲ"

ချီရွှယ်ဖေးသည် ဖမ်းဆီးထားသော အမျိုးသမီး၏ အိမ်နှင့် နီးကပ်သော နေရာတစ်ခုကို ရွေးချယ်လိုက်သည်။

နေရာကူးပြောင်းလာသူများမှာ မအီမသာ ဖြစ်တတ်သဖြင့် အကာအကွယ် လိုအပ်သည်ကို သူမ သိထားသလို၊ ဤကူးပြောင်းစက်ကိုလည်း စောင့်ကြည့်စေချင်ပုံရပေသည်။

ရွှီရှင်း ဘာမှမပြောဘဲ တည်နေရာကူးပြောင်းစက်ကို ချက်ချင်း အသက်သွင်းလိုက်ပြီး၊ အပြာရောင်အဆင့် လက်ပတ်ကို ချီရွှယ်ဖေးထံ ကမ်းပေးလိုက်၏။

"စမ်းကြည့်လိုက်ပါဦး။ ကျွန်တော်တို့ သုံးယောက်စလုံးရဲ့ နေရာတွေကို ချိတ်ဆက်ကြည့်လိုက်ပါ"

"စက်ကို အသက်သွင်းတဲ့အခါ အနောက်ကို နည်းနည်း ဆုတ်နေနော်၊ မဟုတ်ရင် တိုက်ရိုက် ဆွဲယူခံလိုက်ရလိမ့်မယ်" ဟု ရွှီရှင်းက သတိပေးလိုက်သည်။

"ကျိချောင်းယန်ရဲ့ သစ်ပင်အိမ်၊ ရွှီရှင်းရဲ့ သစ်ပင်အိမ်၊ လီဝမ်ရှီးရဲ့ သစ်ပင်အိမ် တဲ့လား"

ချီရွှယ်ဖေးက သတိပေးချက်ကို ဖတ်ကြည့်ရင်း တိုးတိုးလေး ရယ်မောလိုက်သည်။

"ဒီနာမည်တွေကို နင်ပဲ ပေးတာလား။ တကယ့်ကို ရိုးရှင်းလွန်းတာပဲ။ ဒါဆို ငါ့ရဲ့ တည်နေရာကရော ချီရွှယ်ဖေး၏ သစ်ပင်အိမ် လို့ပဲ ဖြစ်သွားမှာလား"

---

အခန်း ၃၀၈ ပြီး။