အခန်း (၂၂၃-၂၂၄)

အခန်း (၂၂၃) - တာအိုနယ်ပယ်သို့ တက်လှမ်းခြင်း၊ လေမီးခိုးဘူးသီးခြောက်

“ထူးဆန်းတယ်...” ရွှေရောင်မျက်လုံး မိစ္ဆာမျောက်ဝံက သံသယဖြင့် ရေရွတ်လိုက်လေသည်။

“အရက်ထဲက ဆေးစွမ်းအာနိသင်တွေ ဒီလောက်အများကြီး စုပ်ယူပြီးသွားတာတောင် ဘာလို့ ငါ ဘာမှမခံစားရတာပါလိမ့်...”

ရွှေရောင်မျက်လုံး မိစ္ဆာမျောက်ဝံ၏ အာရုံထဲတွင် ရွှီနင်သည် ဝဲကတော့ကြီးတစ်ခုနှင့် တူနေသည်။ မိစ္ဆာမျောက်ဝံအရက်ထဲရှိ ဆေးစွမ်းအာနိသင်များမှာ သူ၏ခန္ဓာကိုယ်ထဲသို့ ဝင်ရောက်သွားပြီးနောက် လုံးဝပျောက်ကွယ်သွားခဲ့လေသည်။

“မင်းရဲ့ မျိုးဆက်သစ်လေးဆီမှာ လျှို့ဝှက်ချက်တွေ အများကြီးရှိပုံရတယ်”

ရွှေရောင်မျက်လုံး မိစ္ဆာမျောက်ဝံက ဝမ့်ယယ်ကို ပြောလိုက်သည်။

ယခုအချိန်တွင် ဝမ့်ယယ်မှာ ရွှီနင် အန္တရာယ်မရှိနိုင်မှန်း သိသွားသဖြင့် စိတ်အေးသွားခဲ့ချေပြီ။

“ဖြစ်နိုင်တယ်...”

ဝမ့်ယယ်သည် ရွှီနင်၏ ပုံမှန်မဟုတ်သော အခြေအနေကို သတိထားမိသော်လည်း သိပ်ပြီး ဂရုမစိုက်နေပေ။

ရွှီနင်တွင် ကံကောင်းသော တွေ့ကြုံမှုတစ်ခုခု ရှိထားရမည်ဟု သူ ကြိုတင်ခန့်မှန်းမိပြီးဖြစ်သည်။ သို့မဟုတ်ပါက ရွှီနင် မည်မျှပင် ပါရမီပါစေကာမူ သုံးနှစ်ပင်မပြည့်မီ ဤနယ်ပယ်အထိ ရောက်ရှိလာရန်မှာ အလွန်ခက်ခဲပေလိမ့်မည်။

သေချာသည်မှာ ဝမ့်ယယ်သည် ရွှီနင်၌ သိုင်းပညာမျက်နှာပြင်ကဲ့သို့သော အထောက်အကူပြုစနစ်တစ်ခု ရှိနေမည်ဟုတော့ လုံးဝ တွေးမိမည်မဟုတ်ချေ။

“အပြင်ထွက်သွားကြရအောင်၊ သူ့ကို အနှောင့်အယှက်မပေးနဲ့တော့” ဝမ့်ယယ်က စတင်ပြောဆိုလိုက်သည်။

ရွှေရောင်မျက်လုံး မိစ္ဆာမျောက်ဝံက ခေါင်းညိတ်လိုက်သည်။ မိစ္ဆာမျောက်ဝံအရက်၏အစွမ်းမှာ မည်မျှပြင်းထန်ကြောင်းကို ကောင်းစွာ သိထားပေသည်။

ရွှီနင်က ၎င်းတို့ကို စုပ်ယူပြီးသွားပါက မကြာမီ တာအိုနယ်ပယ်သို့ ချိုးဖောက်ဝင်ရောက်နိုင်ပေလိမ့်မည်။

ဝမ့်ယယ်နှင့် ရွှေရောင်မျက်လုံး မိစ္ဆာမျောက်ဝံတို့သည် ရေတံခွန်ဂူထဲမှ ထပ်မံထွက်ခွာသွားကြလေသည်။

အရက်ကန်အောက်ခြေရှိ ရွှီနင်သည် ရွှေရောင်မျက်လုံး မိစ္ဆာမျောက်ဝံနှင့် ဝမ့်ယယ်တို့ ရောက်လာသည်ကို အာရုံခံမိသော်လည်း ရေပေါ်သို့တက်ကာ သူတို့နှင့် စကားမပြောခဲ့ပေ။

အဘယ်ကြောင့်ဆိုသော် သူသာ ရေပေါ်တက်သွားပါက မိစ္ဆာမျောက်ဝံအရက်ထဲမှ များပြားလှသော ဆေးစွမ်းများနှင့် အရက်များကို မည်သို့မည်ပုံ စုပ်ယူသိမ်းဆည်းနိုင်သလဲဟု သေချာပေါက် မေးမြန်းကြပေလိမ့်မည်။

မည်သို့ပင်ဖြစ်စေ ကျန်ရှိနေသေးသော စွမ်းအင်များကိုပါ အကုန်အစင် စုပ်ယူကာ အဆင့်တက်လှမ်းပြီးမှသာ သူတို့၏ မေးခွန်းများကို ရှောင်လွှဲရန် အကြောင်းပြချက်တစ်ခု ရှာဖွေရပေတော့မည်။

စွမ်းအင်စုပ်ယူမှု အသိပေးချက်များသည် ရွှီနင်၏ မျက်စိရှေ့တွင် ပေါ်လာသလို နားထဲတွင်လည်း ပဲ့တင်ထပ်နေဆဲ ဖြစ်သည်။ သူသည် စက်ရုပ်တစ်ရုပ်ပမာ စုပ်ယူရန်အတွက် အကြိမ်ကြိမ် အတည်ပြုပေးနေဆဲပင်။

‘ငါ့ရဲ့ စွမ်းအင်လက်ကျန်တွေက တာအိုနယ်ပယ်ကို တက်လှမ်းဖို့ လိုအပ်ချက်ကို ပြည့်မီသွားပြီပဲ’

ရွှီနင်၏ စွမ်းအင်လက်ကျန်သည် ယူနစ် ၄၀၀,၀၀၀ ကျော်လွန်သွားခဲ့ချေပြီ။

သူသည် အရက်ကန်ထဲမှ စွမ်းအင် ယူနစ် ၃၀၀,၀၀၀ ကျော်ကို စုပ်ယူနိုင်ခဲ့ခြင်း ဖြစ်သည်။ ဤကံကောင်းသော တွေ့ကြုံမှု မတိုင်မီကလည်း စွမ်းအင်ယူနစ် သောင်းဂဏန်းခန့်ကို စုဆောင်းထားပြီး ဖြစ်လေသည်။

‘ကန်ထဲမှာ စွမ်းအင်ယူနစ် ၂၀,၀၀၀ ကျော်လောက် ကျန်နေဦးမှာပဲ...’

ရွှီနင် စိတ်ထဲမှ ခန့်မှန်းတွက်ချက်လိုက်သည်။

အချိန်များ ဆက်လက်ကုန်ဆုံးသွားလေသည်။ နောက်ဆုံးစွမ်းအင်စုပ်ယူမှု အသိပေးချက်နှင့်အတူ ရွှီနင်သည် မိစ္ဆာမျောက်ဝံအရက်ထဲရှိ စွမ်းအင်များကို အပြီးတိုင် စုပ်ယူလိုက်လေသည်။

သူ သိုင်းပညာမျက်နှာပြင်ကို တစ်ချက်ကြည့်လိုက်သည်။ သူ၏ စွမ်းအင်လက်ကျန်သည် ယူနစ် ၄၅၀,၀၀၀ ကျော်သွားခဲ့ချေပြီ။

‘ငါ တာအိုနယ်ပယ်ကို တက်လှမ်းနိုင်ပြီပဲ’

ရွှီနင်သည် အရက်ကန်အောက်ခြေမှ ခုန်ထွက်လိုက်သည်။ ပို၍တိတိကျကျ ဆိုရလျှင် ရေကန်ထဲမှ ခုန်ထွက်လိုက်ခြင်းပင်။

အဘယ်ကြောင့်ဆိုသော် မိစ္ဆာမျောက်ဝံအရက်ကန်ထဲရှိ အရည်များသည် အရောင်အဆင်း၊ အနံ့အသက် ကင်းမဲ့သွားကာ ကြည်လင်သော ရေကန်အဖြစ်သို့ ပြောင်းလဲသွားသောကြောင့်ဖြစ်သည်။

ရွှီနင်သည် စိတ်လှုပ်ရှားမှုကို ထိန်းချုပ်ကာ “+” လက္ခဏာကို နှိပ်လိုက်လေသည်။

––

တာအိုနယ်ပယ်၏ ပထမအဆင့်သို့ တက်လှမ်းရန် စွမ်းအင်ယူနစ် ၃၀၀,၀၀၀ အသုံးပြုမည်လော။

လုပ်မည်/မလုပ်ပါ

––

သိုင်းပညာမျက်နှာပြင်မှ အသိပေးချက် ပြောင်းလဲသွားသည်ကို ရွှီနင် သတိပြုမိလိုက်သည်။

ယခင်က မျက်နှာပြင်တွင် “xxx ကျင့်စဉ်ကို အဆင့်မြှင့်တင်ရန် စွမ်းအင် xxx ယူနစ် အသုံးပြုမည်လော” ဟု ဖော်ပြလေ့ရှိသော်လည်း ယခုအခါ နယ်ပယ်ကို တက်လှမ်းတော့မည်ဖြစ်ကြောင်း တိုက်ရိုက်ဖော်ပြနေလေသည်။

‘တာအိုနယ်ပယ်ကို ရောက်သွားပြီးတဲ့နောက်မှာ လူတိုင်းရဲ့ လမ်းကြောင်းတွေက တူညီတော့မှာ မဟုတ်ဘူး။ ဒါကြောင့် သတ်မှတ်ထားတဲ့ တာအိုနယ်ပယ်ကျင့်စဉ်ဆိုတာ မရှိတော့ဘူး။ ဒီနယ်ပယ်မှာ တစ်ဆင့်ပြီးတစ်ဆင့် အဆင့်တက်ဖို့ ကိုယ့်ကိုယ်ကိုယ်ပဲ အားကိုးရတော့မှာ’

ဤသိုင်းပညာ ဗဟုသုတအချက်အလက်ကို ပင်လယ်ပြင်၌ ရွက်လွှင့်နေစဉ်က ဝမ့်ယယ် သူ့အား ပြောပြခဲ့ဖူးလေသည်။

“ဟူး...”

ရွှီနင် အသက်ပြင်းပြင်းရှူလိုက်ပြီး အတည်ပြုရန် ရွေးချယ်လိုက်လေသည်။

နောက်တစ်စက္ကန့်တွင် စွမ်းအင်ယူနစ် ၃၀၀,၀၀၀ ကုန်ဆုံးသွားပြီး ရွှီနင်၏ ခန္ဓာကိုယ်အတွင်းရှိ ဓာတ်စွမ်းအင်မျိုးစေ့ ခြောက်ခုစလုံး ချက်ချင်း ပေါက်ကွဲထွက်သွားတော့သည်။

ကြောက်မက်ဖွယ် စွမ်းအင်များသည် ရွှီနင်၏ ခန္ဓာကိုယ်တစ်ခုလုံးသို့ ပျံ့နှံ့သွားလေသည်။

‘ဓာတ်သဘာဝစွမ်းအင်တွေက ငါ့ခန္ဓာကိုယ်ထဲ ပေါင်းစပ်ဝင်ရောက်ပြီး ပြောင်းလဲပေးနေပြီပဲ’

သူ၏ ခန္ဓာကိုယ် တဖြည်းဖြည်း ပြောင်းလဲလာနေသည်ကို ရွှီနင် ခံစားမိနေသည်။

ဓာတ်သဘာဝစွမ်းအင်များ ခန္ဓာကိုယ်ထဲသို့ ပေါင်းစပ်ဝင်ရောက်သွားပြီးနောက် ရွှီနင်၏ အရေပြား၊ ကြွက်သားမြှေး၊ အရိုး၊ ကလီစာများနှင့် ခန္ဓာကိုယ်အတွင်းရှိ အင်္ဂါအစိတ်အပိုင်းတိုင်းမှာ ပြောင်းလဲသွားခဲ့လေသည်။

ထိုသို့ပြောင်းလဲမှုတွင် ပြင်းထန်သော နာကျင်မှုများပါ ပူးတွဲပါလာလေသည်။ သူ၏ ခန္ဓာကိုယ်ကို အရည်ကျိုကာ အသစ်ပြန်လည်ပုံသွင်းနေသကဲ့သို့ပင်။

ဤနာကျင်မှုမျိုးမှာ ရွှီနင်အတွက် မပြောပလောက်ပေ။ မည်သို့ပင်ဆိုစေ သူသည် ပင်လယ်နီမိစ္ဆာသခင်၏ လျှို့ဝှက်နယ်မြေတွင် စိတ်ပိုင်းဆိုင်ရာ စမ်းသပ်မှုကို ဖြတ်သန်းခဲ့ဖူးသဖြင့် သူ၏ စိတ်ဆန္ဒမှာ အလွန် ခိုင်မာနေပြီ ဖြစ်သည်။

‘ခန္ဓာကိုယ်ပေါင်းစပ်ခြင်းနယ်ပယ်ဆိုတာ ခန္ဓာကိုယ်ကို အသစ်တဖန် ပြန်လည်တည်ဆောက်တဲ့ လုပ်ငန်းစဉ်ပဲ’

ခန္ဓာကိုယ်က နာကျင်နေသော်လည်း ရွှီနင်မှာ ကြည်ဖြူစွာ သည်းခံနေလေသည်။

တာအိုနယ်ပယ်၏ ပထမအဆင့်သည် ဟင်းလင်းပြင်နယ်ပယ်၏ ပထမအဆင့်နှင့် ကွဲပြားခြားနားပေသည်။

ခန္ဓာကိုယ်ပုံသွင်းခြင်းနယ်ပယ်၏ ပြောင်းလဲမှုသည် ဟင်းလင်းပြင်နယ်ပယ် သိုင်းပညာရှင်တစ်ဦးအား ဓာတ်သဘာဝ(ဂုဏ်သတ္တိ)စွမ်းအင်များကို ပိုမိုကောင်းမွန်စွာ ခံနိုင်ရည်ရှိစေရန် ဖြစ်သည်။

သို့သော် ခန္ဓာကိုယ်ပေါင်းစပ်ခြင်းနယ်ပယ်၏ ခန္ဓာကိုယ်ပြန်လည်ပုံသွင်းမှုသည် တာအိုနယ်ပယ်သခင်တစ်ဦးအား ဓာတ်သဘာဝ(ဂုဏ်သတ္တိ)စွမ်းအင်များကို ခန္ဓာကိုယ်နှင့် ပေါင်းစပ်စေကာ သာမန်ရုပ်ခန္ဓာကို အခြေခံမှစ၍ ပြောင်းလဲပစ်ရန် ဖြစ်သည်။

ဟင်းလင်းပြင်နယ်ပယ်သည် ခန္ဓာကိုယ်နှင့် ခွဲထွက်ကာ ဓာတ်သဘာဝ(ဂုဏ်သတ္တိ)စွမ်းအင်များကိုသာ အားကိုးရသည့် အဓိကနယ်ပယ်တစ်ခု ဖြစ်သော်လည်း၊ တာအိုနယ်ပယ်သည် ထိုစွမ်းအင်များကို ရုပ်ခန္ဓာထဲသို့ ပြန်လည်ရောက်ရှိစေပြီး ရုပ်ပိုင်းဆိုင်ရာနှင့် အတွင်းပိုင်းစွမ်းအင်များ ပေါင်းစပ်ကာ ပေါက်ကွဲထွက်စေနိုင်သော စွမ်းအားကို ရရှိစေသည့် ကြီးမားသော နယ်ပယ်တစ်ခု ဖြစ်ပေသည်။

ဤသည်မှာ တာအိုနယ်ပယ်သို့ တက်လှမ်းပြီးနောက် သက်တမ်းပိုမိုရှည်လာရသည့် အကြောင်းရင်းဖြစ်ပြီး၊ ၎င်းတို့၏ ရုပ်ရည်အသွင်အပြင်ကို မအိုမင်းအောင် ထိန်းထားနိုင်ရခြင်း၏ အကြောင်းရင်းလည်း ဖြစ်ပေသည်။

‘ဓာတ်သဘာဝစွမ်းအင်မျိုးစေ့တွေ များလေလေ ခန္ဓာကိုယ် ပြောင်းလဲမှု ရလဒ်က ပိုကောင်းလေလေပဲ။ တာအိုနယ်ပယ်မှာ ထပ်ပြီး အဆင့်တက်သွားတဲ့အခါ ငါ့ရဲ့ အခြေခံအုတ်မြစ်က ပိုမိုခိုင်မာလာပြီး ခွန်အားတွေလည်း ပိုကြီးမားလာလိမ့်မယ်’

ဓာတ်သဘာဝစွမ်းအင်မျိုးစေ့ ခြောက်ခု စုစည်းနိုင်ခြင်းက သူ့အတွက် မည်မျှအထောက်အကူဖြစ်စေကြောင်း ရွှီနင် ကောင်းစွာ သိရှိထားသည်။

ဝမ့်ယယ်လည်း ဤအချက်ကို သတိထားမိသဖြင့် ယန့်လုဂိုဏ်း ပြန်လည်တည်ထောင်ရန် မျှော်လင့်ချက်ကို သူ့အပေါ် ထားရှိရန် ရွေးချယ်ခဲ့ခြင်းဖြစ်သည်။

ရွှီနင်၏ ခန္ဓာကိုယ်မှာ ဆက်လက်ပြောင်းလဲနေဆဲပင်။ နောက်ဆုံးတွင် ရွှီနင်၏ ခန္ဓာကိုယ်ထဲမှ ပြင်းထန်သော မြည်ဟည်းသံကြီးနှင့်အတူ သူ ကျယ်လောင်စွာ အော်ဟစ်လိုက်လေသည်။

‘ရေနဲ့ မီး စွမ်းအင် ပါဝင်တဲ့ တာအိုနယ်ပယ်ခန္ဓာကိုယ်ကို အောင်မြင်စွာ ပေါင်းစပ်နိုင်ခဲ့ပြီပဲ’

သူ၏ ခန္ဓာကိုယ်အတွင်း လှိုင်းလုံးများပမာ တိုးထွက်လာသော စွမ်းအားများကို ရွှီနင် ခံစားလိုက်ရသည်။

‘ဒီစွမ်းအား ခံစားချက်က...’

ရွှီနင်သည် သူ့ခန္ဓာကိုယ် အသားစိုင်များမှ ပြည့်လျှံနေသော ခွန်အားများကို ခံစားလိုက်ရပြီး အနည်းငယ် သာယာယစ်မူးသွားမိသည်။

ဟင်းလင်းပြင်နယ်ပယ်တွင် သဘာဝစွမ်းအင်များမှာ အလွန်ပြင်းထန်လွန်းသဖြင့် ဟင်းလင်းပြင်နယ်ပယ် သိုင်းပညာရှင်များအားလုံးသည် ရုပ်ခန္ဓာ၏ အရေးပါမှုကို လျစ်လျူရှုကာ ရန်သူများကို တိုက်ခိုက်ရာ၌ ဓာတ်သဘာဝစွမ်းအင်များကိုသာ အသုံးပြုကြလေသည်။

သို့သော် ယခုအခါ သဘာဝစွမ်းအင်များသည် သူ့ခန္ဓာကိုယ်ထဲသို့ ပေါင်းစပ်ဝင်ရောက်သွားပြီဖြစ်ရာ ရုပ်ပိုင်းဆိုင်ရာ ခွန်အားများမှာ အရည်အသွေးပိုင်းအရ သိသိသာသာ ပြောင်းလဲသွားစေခဲ့ပြီ ဖြစ်သည်။

“သိုင်းပညာမျက်နှာပြင်”

ရွှီနင်၏ သိုင်းပညာမျက်နှာပြင်သည် သူ့ရှေ့တွင် ပေါ်လာလေသည်။

––

အမည် - ရွှီနင်

နယ်ပယ် - တာအိုနယ်ပယ် ပထမအဆင့် - ခန္ဓာကိုယ်ပေါင်းစပ်ခြင်းနယ်ပယ် +

သိုင်းပညာ -

ရေမီးနှစ်သွယ်မူလကျမ်းစာ (ဓာတ်စွမ်းအင်မျိုးစေ့ ၆ မျိုး)

ရေစီးပမာဓားသိုင်း (အဆင့် ၉)

ဖြာထွက်မီးလျှံဓားသိုင်း (အဆင့် ၉)

ဒီရေလက်သီး (အဆင့် ၉)

ချော်ရည်လက်သီး (အဆင့် ၉)

ရေအရိပ်ပြောင်းလဲမှု (အဆင့် ၉)

အရိုးမီးလျှံသမထကျင့်စဉ် (အဆင့် ၉)

အသက်ဆေးကျမ်း (အဆင့် ၉)

မှင်ရောင်လမင်းဆေးကျမ်း (အဆင့် ၉)

အသုံးပြုနိုင်သောစွမ်းအင် - ၁၅၁,၅၀၀ ယူနစ်

––

‘တာအိုနယ်ပယ်ကို ရောက်ပြီပဲ’

ရွှီနင်သည် တာအိုနယ်ပယ်ကို သိုင်းပညာမျက်နှာပြင်က အသစ်ပြန်လည်ခွဲခြားသတ်မှတ်ကာ နယ်ပယ်အကွက်တွင် ထည့်သွင်းထားသည်ကို တွေ့လိုက်ရသည်။

‘တာအိုနယ်ပယ်ကို တက်လှမ်းပြီးတဲ့နောက်ပိုင်း ကျင့်စဉ်တွေ အားလုံးက သဘာဝစွမ်းအင်နဲ့ ရုပ်ခန္ဓာကို ပေါင်းစပ်ရတဲ့ ကျင့်စဉ်တွေချည်းပဲ။ ငါ့ဆီမှာ မရှိသေးပေမဲ့ ကိစ္စမရှိပါဘူး၊ နောက်မှပဲ အကြီးအကဲ ဝမ့်ယယ်ဆီကနေ တောင်းလိုက်မယ်...’

ရွှီနင် စိတ်ထဲမှ တွေးလိုက်လေသည်။

ဤသည်မှာ မိမိအပေါ် စောင့်ရှောက်ပေးမည့်သူ ရှိခြင်း၏ အားသာချက်ပင်။ လိုအပ်သော အရင်းအမြစ်များကို သီးသန့်သွားရောက်ရှာဖွေရန် မလိုအပ်တော့ချေ။

“သိုင်းပညာမျက်နှာပြင် ဖျောက်ထားလိုက်ပါ”

ရွှီနင်သည် သိုင်းပညာမျက်နှာပြင်ကို စိတ်ဖြင့် ထိန်းချုပ်လိုက်သည်။ ယခင်က ဟင်းလင်းပြင်နယ်ပယ်သို့ တက်လှမ်းပြီးနောက် သာမန်လူသားနယ်ပယ် ကျင့်စဉ်များကို ဖျောက်ထားကာ ဟင်းလင်းပြင်နယ်ပယ် ကျင့်စဉ်များကိုသာ ထားရှိခဲ့သည်။

ယခုတစ်ကြိမ်တွင်လည်း ရွှီနင်သည် ဟင်းလင်းပြင်နယ်ပယ် ကျင့်စဉ်များကို ထပ်မံဖျောက်ထားလိုက်ပြီး အသုံးပြုနိုင်သော စွမ်းအင်များကိုပါ ရှင်းလင်းလိုက်လေသည်။ သိုင်းပညာမျက်နှာပြင်သည် နောက်တစ်ကြိမ် ပြန်လည်ပေါ်လာသည်။

––

အမည် - ရွှီနင်

နယ်ပယ် - တာအိုနယ်ပယ် ပထမအဆင့် - ခန္ဓာကိုယ်ပေါင်းစပ်ခြင်းနယ်ပယ် +

သိုင်းပညာ -

အသုံးပြုနိုင်သောစွမ်းအင် - ၁၅၀,၀၀၀ ယူနစ်

––

ဟင်းလင်းပြင်နယ်ပယ် ကျင့်စဉ်များကို ဖျောက်ထားလိုက်သည်နှင့် သိုင်းပညာအကွက်မှာ နေရာလွတ်များ ကျန်ရစ်လေသည်။ ရိုးရှင်းပြီး ရှင်းလင်းသော မျက်နှာပြင်လေးကြောင့် ရွှီနင် သက်တောင့်သက်သာ ခံစားလိုက်ရသည်။

“ရွှီနင်”

သူ အဆင့်တက်ပြီးသည်နှင့် ဝမ့်ယယ်၊ ရွှေရောင်မျက်လုံး မိစ္ဆာမျောက်ဝံနှင့် ချင်းယင်တို့ အားလုံး အပြေးရောက်လာကြသည်။

“မင်း အဆင့်တက်သွားပြီလား”

ရွှေရောင်မျက်လုံး မိစ္ဆာမျောက်ဝံ၏ ရွှေရောင်မျက်လုံးများက တောက်ပသွားလေသည်။

“တာအိုနယ်ပယ် ပထမအဆင့်၊ ခန္ဓာကိုယ်ပေါင်းစပ်ခြင်းနယ်ပယ်ပဲ။ ရွှီနင်... မင်း လုပ်နိုင်ခဲ့ပြီကွ”

ဝမ့်ယယ် တုန်ရီသွားသည်။

ရွှီနင်သည် သူမျှော်မှန်းထားသည်ထက် ပိုမိုမြန်ဆန်စွာ တာအိုနယ်ပယ်သို့ တက်လှမ်းနိုင်ခဲ့လေသည်။

ချင်းယင်တစ်ကောင်တည်းသာ ဝံပုလွေမျက်လုံးများဖြင့် ထူးဆန်းစွာ ကြည့်နေလေသည်။ ၎င်းသည် ဝမ်းသာနေသလို၊ သံသယလည်းဖြစ်နေကာ အနည်းငယ်လည်း ကြောက်ရွံ့နေသည်။

ရွှီနင် တာအိုနယ်ပယ်သို့ တက်လှမ်းသွားခြင်းမှာ ၎င်းအတွက် ကောင်းကျိုးရော ဆိုးကျိုးပါ ဖြစ်စေသည်။ ရွှီနင် ဝမ်ရှန့်ပြည်နယ်သို့ သွားသည့်အခါ သူသည်လည်း နောက်မှလိုက်သွားရမည်ဖြစ်ပြီး ရွှီနင်က သူ၏ သခင်အသစ်ဖြစ်လာမည်ဟု ဝမ့်ယယ်က ပြောထားခဲ့ဖူးလေသည်။

စွမ်းအားကြီးမားသော သခင်၏ ကာကွယ်မှုကို ရရှိခြင်းက မိမိအတွက် ကောင်းမွန်သောအရာ ဖြစ်သည်မှာ သေချာပေသည်။ သို့သော် ယခင်က ရွှီနင်နှင့် ထိပ်တိုက်တွေ့ခဲ့ဖူးသဖြင့် ရွှီနင် မုန်းတီးသွားမည်ကို စိုးရိမ်နေမိခြင်း ဖြစ်သည်။

ချင်းယင်သည် ရွှီနင်၊ မီးခိုးရောင်လေးတို့နှင့် အတူနေထိုင်ရမည့်ပုံကို ကြိုတင်တွေးတောနေမိသည်။ ထိုအချိန်ရောက်လျှင် ၎င်းမှာ သခင်နှင့် ကြောင်ကလေး၏ အနိုင်ကျင့်ခြင်းကို ခံရမည့် ခွေးတစ်ကောင် ဖြစ်လာပေတော့မည်။

‘ငါတို့ရဲ့ ဆက်ဆံရေးကို ပြန်ကောင်းလာအောင် နည်းလမ်းရှာရမယ်...’

ချင်းယင် မျက်လုံးများကို ကစားလိုက်လေသည်။

“ဟုတ်ပါတယ်၊ ကျွန်တော် ခန္ဓာကိုယ်ပေါင်းစပ်ခြင်းနယ်ပယ်ကို တက်လှမ်းနိုင်ခဲ့ပါပြီ”

ရွှီနင်က ထိုနှစ်ဦးကို ထပ်မံ၍ ကျေးဇူးတင်စကား ပြောလိုက်သည်။

“ကျေးဇူးတင်ပါတယ် အကြီးအကဲဝမ့်ယယ်၊ ကျေးဇူးတင်ပါတယ် အကြီးအကဲကျင်းမုန်။ အကြီးအကဲတို့နှစ်ယောက်သာ မရှိခဲ့ရင် ကျွန်တော် တာအိုနယ်ပယ်ကို ဒီလောက်မြန်မြန် တက်လှမ်းနိုင်ခဲ့မှာ မဟုတ်ပါဘူး”

“အကြီးအကဲဝမ့်ယယ်... ကျွန်တော့်ကို ဂိုဏ်းအမှတ်အသားတံဆိပ်ပြားပေးပါ”

ရွှီနင်က လိုရင်းကို တန်းပြောလိုက်သည်။

သူသည် ဝမ့်ယယ်ထံမှ ကြီးမားသော ကျေးဇူးကို ရရှိထားသဖြင့် ယန့်လုဂိုဏ်း ပြန်လည်တည်ထောင်ရေးကို လုံးဝ ငြင်းဆန်နိုင်မည် မဟုတ်ချေ။ ထို့အပြင် ယန့်လုဂိုဏ်းကို ပြန်လည်တည်ထောင်ကာ ဂိုဏ်းချုပ်အသစ် ဖြစ်လာခြင်းက သူ့အတွက် အလွန်အကျိုးရှိပေသည်။

“ကောင်းတယ်၊ ကောင်းတယ်၊ ကောင်းတယ်ကွာ”

ရွှီနင်က ဂိုဏ်းအမှတ်အသားတံဆိပ်ပြားကို လိုလိုလားလား လက်ခံလိုက်သည်ကို မြင်သောအခါ ဝမ့်ယယ် အလွန် ဝမ်းသာသွားလေသည်။

ဤသည်က ရွှီနင်၏ စိတ်နေသဘောထားကိုလည်း ပြသနေသည်။ အနည်းဆုံးတော့ ယခုအချိန်တွင် သူသည် ကတိတည်သူတစ်ဦး ဖြစ်ပေသည်။

“ယန့်လုဂိုဏ်းရဲ့ အနာဂတ်က မင်းအပေါ်မှာပဲ မူတည်နေပြီ”

ဝမ့်ယယ်သည် ဂိုဏ်းအမှတ်အသားကို လက်နှစ်ဖက်ဖြင့် ထုတ်ယူကာ ရွှီနင်အား ကမ်းပေးလိုက်သည်။ သူ၏ မျက်နှာထားမှာ လေးနက်တည်ကြည်နေပြီး မျက်လုံးများထဲတွင်လည်း မျှော်လင့်ချက်များ ပြည့်နှက်နေလေသည်။

ရွှီနင်သည် တံဆိပ်ပြားကို လက်နှစ်ဖက်ဖြင့် ရိုသေလေးစားစွာ လက်ခံယူလိုက်သည်။

သူသည် တံဆိပ်ပြားတစ်ခုတည်းကိုသာ လက်ခံရရှိခဲ့ခြင်းမဟုတ်ဘဲ ဝမ်ရှန့်ပြည်နယ်၌ ဂိုဏ်းတစ်ခုကို ပြန်လည်တည်ထောင်မည့် မျှော်လင့်ချက်ကိုပါ လက်ခံရရှိခဲ့ခြင်းဖြစ်ကြောင်း ရွှီနင် ကောင်းစွာ သိရှိထားသည်။

တံဆိပ်ပြားကို သေချာစွာ ကြည့်ရှုပြီးနောက် ရွှီနင်သည် ၎င်းကို သိုလှောင်ရေးလက်စွပ်ထဲသို့ ထည့်သိမ်းလိုက်လေသည်။

“မင်းက ငါ့ရဲ့ မိစ္ဆာမျောက်ဝံအရက်ကို သုံးပြီး တာအိုနယ်ပယ်ကို တက်လှမ်းသွားတာဆိုတော့ ဒါလည်း ရေစက်တစ်ခုလို့ သတ်မှတ်လို့ရပါတယ်”

ရွှေရောင်မျက်လုံး မိစ္ဆာမျောက်ဝံက ရုတ်တရက် ဝင်ပြောလိုက်သည်။

“ဒီလိုဆိုမှတော့ ငါလည်း မင်းကို ရတနာတစ်ခု ပေးရတာပေါ့”

ထိုသို့ပြောပြီးနောက် ရွှေရောင်မျက်လုံး မိစ္ဆာမျောက်ဝံသည် ခေါင်းမော့ကာ ပါးစပ်ကို ဟလိုက်သည်။ မျက်စိတစ်မှိတ်အတွင်းမှာပင် ဖြူစင်နေသော ဘူးသီးခြောက်တစ်ခုသည် မိစ္ဆာမျောက်ဝံ၏ ပါးစပ်ထဲမှ ထွက်ပေါ်လာလေသည်။

“ဒါ မင်းအတွက်ပဲ”

ရွှေရောင်မျက်လုံး မိစ္ဆာမျောက်ဝံက ထိုအရာကို ရွှီနင်၏ရှေ့သို့ ပစ်ချပေးလိုက်သည်။

ဖြူစင်နေသော ဘူးသီးခြောက်သည် မြေပြင်ပေါ်သို့ ‘ဒုန်း’ ခနဲ ကျသွားလေသည်။

ဤဘူးသီးခြောက်မှာ အရှည်တစ်မီတာခန့်နှင့် အကျယ်တစ်မီတာခွဲခန့် ရှိသည်။ အပေါ်ယံတွင်မူ သာမန်ဘူးသီးခြောက်ပုံစံသာ ရှိလေသည်။

“ဒါက... လျှို့ဝှက်ရတနာတစ်ခုလား”

ရွှီနင်သည် ဤအရာ၏ တန်ဖိုးကို မသိသော်လည်း ဝမ့်ယယ်မှာမူ အံ့အားသင့်နေပုံရသည်။

“ဟုတ်တယ်၊ ဒါ လျှို့ဝှက်ရတနာတစ်ခုပဲ”

ရွှေရောင်မျက်လုံး မိစ္ဆာမျောက်ဝံက ခေါင်းညိတ်ကာ ရွှီနင်ကို ကြည့်လိုက်သည်။

“ဒီ လေမီးခိုးဘူးသီးခြောက်ကို မင်း ယူထားလိုက်၊ နောင်တစ်ချိန်ကျရင် ဒါက မင်းရဲ့ ဝှက်ဖဲတွေထဲက တစ်ခု ဖြစ်လာလိမ့်မယ်”

အခန်း(၂၂၄) - ရန်သူများရောက်ရှိလာခြင်း

‘ဒါက တကယ်ပဲ လျှို့ဝှက်ရတနာတစ်ခုလား’

ရွှေရောင်မျက်လုံး မိစ္ဆာမျောက်ဝံ၏ ရက်ရောမှုကြောင့် ရွှီနင်လည်း အံ့အားသင့်သွားမိလေသည်။

တာအိုနယ်ပယ်မှ သိုင်းပညာရှင်အချို့သည် တာအိုလက်နက်များအပြင် လျှို့ဝှက်ရတနာများကိုပါ အသုံးပြုတတ်ကြကြောင်း ဝမ့်ယယ်ထံမှ သူသိထားခဲ့ဖူးလေသည်။

လျှို့ဝှက်ရတနာများဆိုသည်မှာ လူသားတို့ဖန်တီးထားခြင်းမဟုတ်ဘဲ သဘာဝလောကကြီးမှ အလိုအလျောက်ဖြစ်တည်လာသော ထူးဆန်းသည့် အရာဝတ္ထုများပင်ဖြစ်ပေသည်။ထိုအရာဝတ္ထုများအတွင်း၌ ကိန်းအောင်းနေသော စွမ်းအားများကို နိုးကြားလာစေရန်အတွက်သာ ပြုပြင်မွမ်းမံကြရခြင်းဖြစ်သည်။

လျှို့ဝှက်ရတနာများတွင်လည်း ကွာခြားချက်များရှိလေသည်။ အားနည်းသောလျှို့ဝှက်ရတနာတစ်ခုသည် သာမန်တာအိုလက်နက်တစ်ခုကိုပင် ယှဉ်နိုင်မည်မဟုတ်သော်လည်း၊ ဒဏ္ဍာရီလာ ထိပ်တန်းလျှို့ဝှက်ရတနာများကမူ အသုံးပြုသူ၏ခွန်အားကို ဆယ်ဆခန့်အထိပင် မြှင့်တင်ပေးနိုင်စွမ်းရှိပေသည်။

သေချာသည်ကတော့ လျှို့ဝှက်ရတနာများအများစုသည် တာအိုလက်နက်များထက် ပိုမိုအစွမ်းထက်ကြပေသည်။

“စီနီယာကျင်းမုန်၊ ဒီလေမီးခိုးဘူးသီးခြောက်ကို ကျွန်တော် လက်မခံနိုင်ပါဘူး။”

ရွှီနင်က ငြင်းဆန်လိုက်သည်။

”စီနီယာရဲ့ မိစ္ဆာမျောက်ဝံအရက်ဆီကနေ အကျိုးကျေးဇူးတွေ ရထားပြီးသားမို့ ဒီရတနာကို ကျွန်တော် ထပ်မယူသင့်တော့ပါဘူး”

ရွှေရောင်မျက်လုံးမိစ္ဆာမျောက်ဝံက ခေါင်းခါပြလိုက်သည်။

”ယူထားလိုက်စမ်းပါ။ ဒီလေမီးခိုးဘူးသီးခြောက်က ငါ့အတွက်အသုံးမဝင်ဘူး။ ဒါက လူသားတစ်ယောက် ဖန်တီးပြုပြင်ထားတာကွ။ ငါက ငါ့ရဲ့ သွေးမျိုးဆက်စွမ်းအင်နဲ့ ကိုက်ညီတဲ့ လျှို့ဝှက်ရတနာတွေကိုပဲ သုံးလို့ရတာ။”

ရွှေရောင်မျက်လုံးမိစ္ဆာမျောက်ဝံက ထိုသို့ပြောလိုက်သော်လည်း၊ ဤလေမီးခိုးဘူးသီးခြောက်၏ တန်ဖိုးကြီးမားမှုကိုမူ ရွှီနင်လျစ်လျူမရှုနိုင်ခဲ့ချေ။

၎င်းမှ လေမီးခိုးဘူးသီးခြောက်ကို ထုတ်ပေးရခြင်း၏ အဓိကအကြောင်းရင်းမှာ ရွှီနင်နှင့် ရင်းနှီးသောဆက်ဆံရေးတစ်ခု တည်ဆောက်လိုသောကြောင့်ပင်။

မိစ္ဆာမျောက်ဝံအရက်ကို အပြည့်အဝစုပ်ယူနိုင်ရန် ရွှီနင်အနေဖြင့် တစ်နှစ်ခန့်အချိန်ယူရလိမ့်မည်ဟု ရွှေရောင်မျက်လုံးမိစ္ဆာမျောက်ဝံက တွက်ဆထားခဲ့သဖြင့် ရွှီနင့်အပေါ် အထင်သေးမိသလို ဖြစ်သွားခဲ့သည်။

နောက်ဆုံးတွင်မူ ရွှီနင်သည် နှစ်ရက်တည်းဖြင့် ၎င်း၏ တစ်နှစ်ဟူသော တွက်ဆချက်ကို လုံးဝချေဖျက်ပစ်နိုင်ခဲ့လေသည်။ဤမျှထူးချွန်လှသော ပါရမီရှင်မျိုးဆိုသည်မှာ တွေ့ရခဲလှကြောင်း ရွှေရောင်မျက်လုံးမိစ္ဆာမျောက်ဝံကြီး နားလည်သွားခဲ့ချေပြီ။

“ရွှီနင်၊ ယူထားလိုက်ပါ။”

ဝမ့်ယယ်ကဝင်ပြောလိုက်သည်။

“ကျင်းမုန်ကလည်း မင်းရဲ့ အကြီးအကဲတစ်ယောက်ပဲလေ။ အကြီးအကဲကပေးတဲ့ လက်ဆောင်ကို မငြင်းပါနဲ့။”

တစ်ဖက်တွင် ဝမ့်ယယ်သည် ရွှေရောင်မျက်လုံးမိစ္ဆာမျောက်ဝံ၏ ရည်ရွယ်ချက်ကို ရိပ်မိနေသလို၊ အခြားတစ်ဖက်တွင်လည်း လျှို့ဝှက်ရတနာတစ်ခုပါရှိနေခြင်းက ရွှီနင်အတွက် ပို၍လုံခြုံစိတ်ချရမည်ဟု တွေးမိသောကြောင့်ဖြစ်သည်။

ထိုစကားကိုကြားပြီးနောက်ရွှီနင်လည်းဆက်လက်၍မငြင်းဆန်တော့ချေ။

“ဒါဆိုရင်လည်း ကျေးဇူးအများကြီးတင်ပါတယ် အကြီးအကဲကျင်းမုန်။”

ရွှီနင်သည် ရွှေရောင်မျက်လုံးမိစ္ဆာမျောက်ဝံထံမှ လက်ဆောင်ကို နောက်ဆုံးတွင် လက်ခံလိုက်လေသည်။

“ဒီလေမီးခိုးဘူးသီးခြောက်လျှို့ဝှက်ရတနာက ကြောက်စရာကောင်းတဲ့ အဆိပ်ငွေ့တွေ၊ အခိုးအငွေ့တွေကို စုပ်ယူနိုင်စွမ်းရှိတယ်။ အဲဒါတွေကို မီးခိုးရောင်မြူခိုးတွေ၊ လေငွေ့တွေအဖြစ် ပြောင်းလဲပြီးရင် မင်းစိတ်ကြိုက် အသုံးပြုလို့ရနိုင်တယ်။ ဒါပေမဲ့ မင်းအသုံးပြုလိုက်တိုင်း သူ့အထဲမှာရှိတဲ့ မီးခိုးရောင်မြူခိုးတွေနဲ့ လေငွေ့တွေက ကုန်ခမ်းသွားလိမ့်မယ်။ အထဲကအခိုးအငွေ့တွေ ကုန်သွားပြီဆိုရင်တော့ ပြန်ဖြည့်တင်းဖို့ နည်းလမ်းရှာရလိမ့်မယ်။ စုပ်ယူလိုက်တဲ့ အဆိပ်ငွေ့တွေနဲ့ အခိုးအငွေ့တွေက ပိုကြောက်စရာကောင်းလေ၊ ပြုပြင်ပြောင်းလဲပြီးတဲ့အခါ ပိုပြီးအစွမ်းထက်လာလေပဲ။”

“ဒီရတနာကို ငါမတော်တဆရခဲ့တာ။ ဒါပေမဲ့ လူသားတစ်ယောက် ဖန်တီးထားတာဖြစ်နေလို့ ငါသုံးလို့မရဘူး။ ဒါကြောင့် သူ့ရဲ့အစွမ်းကိုတော့ မင်းကိုယ်တိုင်ပဲ လက်တွေ့ခံစားကြည့်ရလိမ့်မယ်။”

“သြော်၊ ဒီလိုကိုး။”

ရွှီနင်က သူ့ရှေ့ရှိ ဖြူလွှလွှဘူးသီးခြောက်လေးကိုကြည့်ကာ ခေါင်းညိတ်လိုက်သည်။

သူ့အမြင်တွင်တော့ ဤအရာသည် မိစ္ဆာလမ်းစဉ်မှ လက်နက်တစ်ခုနှင့် အနည်းငယ်တူနေသည်ဟု ထင်မိလေသည်။

ရွှေရောင်မျက်လုံးမိစ္ဆာမျောက်ဝံက ဆက်ပြောလေသည်။

“လျှို့ဝှက်ရတနာဆိုတာ တာအိုလက်နက်တွေနဲ့ မတူဘူးကွ။ တာအိုလက်နက်ကို သုံးမယ်ဆိုရင် ထိန်းချုပ်မှုအမှတ်အသားတစ်ခု ဖန်တီးရုံနဲ့ရပေမဲ့၊ လျှို့ဝှက်ရတနာကတော့ မင်းရဲ့ သွေးတစ်စက်ချပေးဖို့ လိုအပ်တယ်။ တာအိုလက်နက်ကို ခိုးယူချင်တယ်ဆိုရင် ထိန်းချုပ်မှုအမှတ်အသားကို ဖျက်ပစ်လိုက်ရုံပဲ။ ဒါပေမဲ့ လျှို့ဝှက်ရတနာကိုလိုချင်ရင်တော့ သူ့ရဲ့ ပိုင်ရှင်ကိုသတ်ပစ်မှပဲ ရနိုင်လိမ့်မယ်။”

“မြန်မြန် မင်းရဲ့သွေးနဲ့ ချိတ်ဆက်လိုက်စမ်းပါ။”

ရွှေရောင်မျက်လုံးမိစ္ဆာမျောက်ဝံက တိုက်တွန်းလိုက်သည်။

“ကောင်းပါပြီ။”

ရွှီနင်တုံ့ဆိုင်းမနေတော့ချေ။ သူ၏လက်တွင် ဒဏ်ရာအသေးစားလေးတစ်ခု ဖန်တီးလိုက်ပြီး သွေးတစ်စက်ညှစ်ထုတ်ကာ လေမီးခိုးဘူးသီးခြောက်ပေါ်သို့ချလိုက်လေသည်။

ရွှီနင့်လက်ချောင်းထိပ်မှ သွေးစက်လေးမှာ ကြည်လင်တောက်ပသော အနီရောင်ရှိနေပြီး ၎င်းအတွင်း၌ ကြောက်မက်ဖွယ်ကောင်းသော စွမ်းအင်ပမာဏများ ကိန်းအောင်းနေပေသည်။

အကယ်၍ မိစ္ဆာလမ်းစဉ်မှ သိုင်းပညာရှင်အချို့သာ ဤသွေးတစ်စက်ကို ရရှိသွားပါက၊ သူတို့၏မိစ္ဆာကျင့်စဉ်များကို အလွန်လျင်မြန်စွာကျင့်ကြံနိုင်မည်ဖြစ်သည်။

ပေါက်…

သွေးစက်ကလေးသည် လေမီးခိုးဘူးသီးခြောက်၏ မျက်နှာပြင်ပေါ်သို့ ကျရောက်သွားပြီးနောက် တိုးညင်းသောအသံလေးတစ်ခု ထွက်ပေါ်လာကာ အတွင်းသို့ အပြည့်အဝ စိမ့်ဝင်သွားလေတော့သည်။

ချက်ချင်းပင် လေမီးခိုးဘူးသီးခြောက်လေးသည် တုန်ခါလာလေသည်။ ထို့နောက် ဖြူလွှလွှဘူးသီးခြောက်လေးနှင့် သူ၏ကြား၌ ထူးဆန်းသောဆက်သွယ်မှုတစ်ခုကို ရွှီနင်အာရုံခံမိနေလေသည်။

စိတ်ဖြင့်စေခိုင်းလိုက်သည်နှင့် ဖြူလွှလွှဘူးသီးခြောက်လေးသည် ရုတ်တရက် လေထဲသို့ပျံတက်သွားပြီး၊ တစ်မီတာခန့်မြင့်ကာ အရွယ်အစားတစ်ဝက်ခန့်ရှိရာမှ လက်ဝါးနှစ်ဖက်စာ အရွယ်အစားလေးအဖြစ်သို့ လျင်မြန်စွာ ကျုံ့ဝင်သွားလေတော့သည်။

လေထဲတွင်ဝဲပျံပြီးနောက် ရွှီနင့်လက်ဝါးထဲသို့ တည့်မတ်စွာဆင်းသက်လာခဲ့သည်။

လေမီးခိုးဘူးသီးခြောက်လေးအတွင်းမှ ထူးဆန်းသော အငွေ့အသက်တစ်ခုကို ရွှီနင်အာရုံခံမိနေလေသည်။

၎င်းကို အပြင်သို့ ထုတ်လွှတ်လိုက်သည်နှင့် တိုက်ခိုက်ရန် အမိန့်ပေးနိုင်ပြီ ဖြစ်ပေသည်။

‘သိုင်းပညာမျက်နှာပြင်ရဲ့ အကူအညီနဲ့ဆိုရင် အဆင့်တက်ပြီးတာနဲ့ ငါက ခန္ဓာကိုယ်ပေါင်းစပ်ခြင်းနယ်ပယ်ရဲ့ အထွတ်အထိပ်ကို ချက်ချင်းရောက်သွားလိမ့်မယ်။ ဒါ့အပြင် ငါ့မှာ စွမ်းအင်မျိုးစေ့ခြောက်ခုရဲ့ အခြေခံရယ်၊ လေမီးခိုးဘူးသီးခြောက်ရယ်လည်း ရှိသေးတယ်။ ဒါတွေနဲ့သာဆို ကြယ်တာရာချီနယ်ပယ်က သိုင်းပညာရှင်တစ်ယောက်ကို အနိုင်ယူနိုင်ဖို့ ရာခိုင်နှုန်းတော်တော်များသွားပြီ။’

ဤသည်ကား သိုင်းပညာမျက်နှာပြင်၏ အားသာချက်ပင်ဖြစ်သည်။ သူ၏ခွန်အားများ လျင်မြန်စွာ တိုးတက်လာနေကြောင်း ရွှီနင်ကိုယ်တိုင် သိရှိထားသည်။ ယခုအခါ ကျောက်စိမ်းညဂိုဏ်းသားများကို ပြန်လည်တိုက်ခိုက်ရန် လုံလောက်သောအင်အား ရှိနေပြီဖြစ်သည်။

“လေမီးခိုးဘူးသီးခြောက်ကိုပေးတဲ့အတွက် ကျေးဇူးတင်ပါတယ် အကြီးအကဲကျင်းမုန်။ နောင်တစ်ချိန် အကူအညီလိုတာရှိရင် အချိန်မရွေးပြောပါ။”

ရွှီနင်သည် လေမီးခိုးဘူးသီးခြောက်ကို သူ၏ သိုလှောင်လက်စွပ်ထဲသို့ သိမ်းဆည်းလိုက်ရင်း ရွှေရောင်မျက်လုံးမိစ္ဆာမျောက်ဝံကြီးအား ပြောလိုက်သည်။

“ကောင်းပြီ။”

ရွှေရောင်မျက်လုံးမိစ္ဆာမျောက်ဝံမှာ ရွှီနင်၏ သဘောထားအပေါ် အတော်လေး ကျေနပ်သွားပုံရသည်။

“ရွှီနင်၊ အခု မင်း တာအိုနယ်ပယ်ကို ရောက်သွားပြီဆိုတော့ ရှေ့ဆက်ပြီး ဘာတွေလုပ်ဖို့ အစီအစဉ်ရှိလဲ။”

အချိန်အတော်ကြာ နှုတ်ဆိတ်နေခဲ့သော ဝမ့်ယယ်က မေးလိုက်သည်။

တာအိုနယ်ပယ်သို့ရောက်ရှိပြီး ကျောက်စိမ်းညဂိုဏ်းကို မောင်းထုတ်နိုင်မှသာ ဝမ်ရှန့်ပြည်နယ်သို့ သွားရောက်မည်ဖြစ်ကြောင်း ရွှီနင်က သူ့ကို ပြောထားခဲ့ဖူးသည်။

“ကျောက်စိမ်းညဂိုဏ်းရဲ့ ပြဿနာတွေကို အရင်ဆုံးရှင်းလင်းဖို့ စီစဉ်ထားပါတယ်။”

ရွှီနင်က သူ၏ အတွေးများကို ပွင့်ပွင့်လင်းလင်းပင် ပြောပြလိုက်သည်။

“ဒါပေမဲ့ မင်းက ခန္ဓာကိုယ်ပေါင်းစပ်ခြင်းနယ်ပယ်ရဲ့ အစောပိုင်းအဆင့်မှာပဲ ရှိသေးတာလေ။ ကျောက်စိမ်းညဂိုဏ်းရဲ့ ဂိုဏ်းချုပ်နဲ့ အကြီးအကဲတွေကို ယှဉ်နိုင်ဖို့ အလှမ်းဝေးနေသေးတယ်။”

ဝမ့်ယယ်က စိုးရိမ်တကြီးဖြင့် ပြောလိုက်သည်။ အဆင့်တက်သွားသည့်အရှိန်ဖြင့် ဘဝင်မြင့်ကာ ကျောက်စိမ်းညဂိုဏ်းသားများကို အတင်းဝင်ရောက် တိုက်ခိုက်မည်ကို သူစိုးရိမ်နေမိသည်။

အကယ်၍သာ ရွှီနင်တစ်ခုခုဖြစ်သွားခဲ့လျှင် အလွန်ကြီးမားသော ဆုံးရှုံးမှုကြီး ဖြစ်သွားပေလိမ့်မည်။

“အရင်တုန်းကဆိုရင်တော့ ကျွန်တော့်မှာ သိပ်ပြီးယုံကြည်ချက် မရှိခဲ့ပါဘူး။ ဒါပေမဲ့ စီနီယာကျင်းမုန်ဆီက လေမီးခိုးဘူးသီးခြောက်ကို ရပြီးတဲ့နောက်မှာတော့ ကျွန်တော် ပိုပြီး ယုံကြည်မှု ရှိလာပါပြီ။”

စကားသက်သက်ဖြင့် ဝမ့်ယယ်ကိုနားချ၍ မရနိုင်မှန်းသိထားသဖြင့် ရွှီနင်သည် သူ၏ ခွန်အားများကို လက်တွေ့ပြသရန် ပြင်ဆင်လိုက်လေသည်။

ရွှီနင်အော်ဟစ်လိုက်ပြီး သူ၏ စွမ်းအားများကို ထုတ်ဖော်လိုက်သည်။

ယခုအခါ ဓာတ်စွမ်းအင်မျိုးစေ့ ခြောက်ခုစလုံးသည် ရွှီနင်၏ခန္ဓာကိုယ်နှင့် အပြည့်အဝ ပေါင်းစပ်သွားပြီဖြစ်ရာ သူ၏ အစွမ်းအစများကို အပြည့်အဝ ထုတ်ဖော်လိုက်သောအခါ ခန္ဓာကိုယ်မှ အလင်းရောင်တစ်လွှာ ဖြာထွက်လာလေသည်။

ထိုအလင်းရောင်များအထက်တွင် အပြာရောင်နှင့်အနီရောင်တို့ ရောယှက်ကာ ယှက်နွှယ်နေကြသည်။

”ဒါက...”

ရွှေရောင်မျက်လုံးမိစ္ဆာမျောက်ဝံနှင့် ဝမ့်ယယ်တို့၏ မျက်နှာအမူအရာများ ထပ်မံပြောင်းလဲသွားပြန်သည်။

“ဒါက ဓာတ်စွမ်းအင်မျိုးစေ့တွေကို ခန္ဓာကိုယ်နဲ့ အပြည့်အဝ ပေါင်းစပ်နိုင်သွားတဲ့ရလဒ်ပဲ။”

ဝမ့်ယယ်မှာ အလွန်တုန်လှုပ်သွားရသည်။

ခန္ဓာကိုယ်ပေါင်းစပ်ခြင်းနယ်ပယ် သိုင်းပညာရှင်တစ်ဦး အဆင့်စတင်တက်လှမ်းချိန်တွင် ဓာတ်စွမ်းအင်မျိုးစေ့များသည် သူတို့၏ခန္ဓာကိုယ်နှင့် အကြမ်းဖျင်းမျှသာ ပေါင်းစပ်သွားလေ့ရှိသည်။

နောက်ထပ် လေ့ကျင့်မှုများစွာ ပြုလုပ်ပြီးမှသာ ဓာတ်စွမ်းအင်မျိုးစေ့များကို ခန္ဓာကိုယ်နှင့် အပြည့်အဝ ပေါင်းစပ်နိုင်မည်ဖြစ်သည်။

ထိုသို့ အပြည့်အဝ ပေါင်းစပ်နိုင်သွားပြီဆိုပါက၊ တာအိုနယ်ပယ်၏ ဒုတိယအဆင့်သို့ တက်လှမ်းရန် အရည်အချင်း ပြည့်မီသွားပြီဟု ဆိုနိုင်ပေသည်။ သို့သော် ယခုမူ ရွှီနင်သည် အဆင့်စတင်တက်လှမ်းကာစသာ ရှိသေးသော်လည်း မျိုးစေ့များကို အပြည့်အဝ ပေါင်းစပ်ပြီးစီးနေခဲ့ချေပြီ။

ထို့အပြင် ရွှီနင်သည် ဓာတ်စွမ်းအင်မျိုးစေ့ ခြောက်ခုကိုပါ ခန္ဓာကိုယ်နှင့် ပေါင်းစပ်ထားသေးသည်။ သူ၏မျိုးစေ့များ ပေါင်းစပ်ရသည့်အခက်အခဲမှာ သာမန်ခန္ဓာကိုယ်ပေါင်းစပ်ခြင်းနယ်ပယ် သိုင်းပညာရှင်များထက် များစွာပိုမိုမြင့်မားလှပေသည်။

‘ဒါက ဟင်းလင်းပြင်နယ်ပယ် အဆင့်ကိုးဖြစ်တဲ့ အစစ်အမှန်ပိုင်နက်နယ်ပယ်မှာတုန်းက သူချထားခဲ့တဲ့ အခြေခံအုတ်မြစ်တွေက ကြောက်စရာကောင်းလွန်းတယ်ဆိုတဲ့ အဓိပ္ပာယ်ပဲ။ သူ့ရဲ့အခြေခံတွေက အရမ်းခိုင်မာလွန်းလို့ အဆင့်တက်လိုက်တာနဲ့တစ်ပြိုင်နက် ခန္ဓာကိုယ်ပေါင်းစပ်ခြင်းနယ်ပယ်ရဲ့ အထွတ်အထိပ်ကို ရောက်သွားတာပဲ။’

ရွှေရောင်မျက်လုံးမိစ္ဆာမျောက်ဝံကြီးသည် မိစ္ဆာသားရဲတစ်ကောင်ဖြစ်သော်လည်း အတွေ့အကြုံများစွာရှိထားပြီး လူသားတာအိုနယ်ပယ် သိုင်းပညာရှင်တစ်ဦး၏ သိုင်းပညာစနစ်ကို နက်ရှိုင်းစွာ နားလည်သဘောပေါက်ထားသူ ဖြစ်လေသည်။

“ကျွန်တော့်ရဲ့ လက်ရှိစွမ်းရည်နဲ့ဆိုရင် ကျောက်စိမ်းညဂိုဏ်းရဲ့ ကြယ်တာရာချီနယ်ပယ်က ဂိုဏ်းချုပ်ရှေ့မှာ အနည်းဆုံးတော့ အသက်အန္တရာယ်ကနေ ကာကွယ်နိုင်စွမ်းရှိပါတယ်။”

ရွှီနင်က ပြောလိုက်သည်။

”တစ်ဖက်လူက ကျွန်တော့်ရဲ့ ခွန်အားကိုသိသွားရင် သေချာပေါက် စိုးရိမ်စိတ်ဝင်သွားပြီး မျက်နှာချင်းဆိုင် ရင်ဆိုင်ရဲမှာမဟုတ်တော့ဘူး။ ကျွန်တော်ပေါ်လာတာကလည်း သူတို့အတွက် ကြီးမားတဲ့ ခြိမ်းခြောက်မှုတစ်ရပ် ဖြစ်သွားစေမှာမို့ ကျောက်စိမ်းညဂိုဏ်းသားတွေ အရင်ကလို ထင်ရာစိုင်းရဲတော့မှာ မဟုတ်ပါဘူး။”

ရွှီနင်၏စကားများမှာ အတော်လေး ချင့်ချိန်ပြောဆိုထားခြင်းဖြစ်သည်။ အမှန်တကယ်တွင် ကြယ်တာရာချီနယ်ပယ် ဂိုဏ်းချုပ်ကိုပင် အနိုင်ယူနိုင်သည့်စွမ်းအား ရှိနေပြီဟု သူကိုယ်တိုင် ယုံကြည်ထားပေသည်။

ဝမ့်ယယ်သည် နက်ရှိုင်းသော တွေးတောမှုထဲသို့ နစ်မြုပ်သွားလေသည်။

“ကျောက်စိမ်းညဂိုဏ်းဆိုတာ ဘာဂိုဏ်းလဲ၊ မင်းတို့ ပြဿနာတက်နေတာလား။”

ရွှေရောင်မျက်လုံးမိစ္ဆာမျောက်ဝံက မေးလိုက်သည်။

ရွှေရောင်မျက်လုံးမိစ္ဆာမျောက်ဝံ နားမလည်ဖြစ်နေသည်ကို မြင်လိုက်ရသဖြင့် ရွှီနင်က ရှင်းပြလိုက်သည်။

“ဒီပြင်ပလူတွေက ချောက်နက်ကြီးမြောက်ပိုင်းဆီရောက်လာကြတယ်ပေါ့။”

ရှင်းပြချက်ကိုကြားပြီးနောက် ရွှေရောင်မျက်လုံးမိစ္ဆာမျောက်ဝံက မျက်လုံးလှန်လိုက်သည်။

”ငါ့အကူအညီလိုလား။”

ရွှီနင်၏မျက်လုံးများ အရောင်တောက်သွားသည်။

ရွှေရောင်မျက်လုံးမိစ္ဆာမျောက်ဝံသည် တာအိုနယ်ပယ်အစောပိုင်းအဆင့်၏ အထွတ်အထိပ်သို့ ရောက်ရှိနေသော မိစ္ဆာသားရဲတစ်ကောင်ဖြစ်ပြီး ၎င်း၏စွမ်းအားမှာ တာအိုနယ်ပယ်အဆင့်သုံး သိုင်းပညာရှင်တစ်ဦးနှင့် ညီမျှပေသည်။ ၎င်းသာ ဝင်ရောက်စွက်ဖက်မည်ဆိုပါက ကျောက်စိမ်းညဂိုဏ်းသည် ဝမ်ရှန့်ပြည်နယ်သို့ သေချာပေါက် ဆုတ်ခွာသွားရမည်သာ။ သို့သော် သေချာပြန်လည်စဉ်းစားပြီးနောက်တွင် ရွှေရောင်မျက်လုံးမိစ္ဆာမျောက်ဝံ၏ အဆိုပြုချက်ကို ရွှီနင်ငြင်းပယ်လိုက်သည်။

”မလိုပါဘူး အကြီးအကဲကျင်းမုန်။”

ဤကိစ္စသည် ရွှေရောင်မျက်လုံးမိစ္ဆာမျောက်ဝံနှင့် မည်သို့မျှ သက်ဆိုင်ခြင်းမရှိပေ။၎င်းထံမှ အကျိုးကျေးဇူးများစွာကို သူရရှိခဲ့ပြီးဖြစ်ရာ နောက်ထပ်အခွင့်အရေးများ ထပ်မံယူရန် မသင့်တော်တော့ချေ။

“လက်ရှိအခြေအနေကို တည်ငြိမ်အောင်ထိန်းချုပ်ဖို့ ကျွန်တော့်မှာ လုံလောက်တဲ့ အင်အားရှိတယ်လို့ ယုံကြည်ပါတယ်။”

ရွှီနင်တစ်ယောက် ယုံကြည်မှုအပြည့် ရှိနေလေသည်။

“ဒီလိုဆိုရင်လည်း ငါဝင်မပါတော့ပါဘူး။”

ရွှေရောင်မျက်လုံးမိစ္ဆာမျောက်ဝံက ဆက်လက်၍ အတင်းအကြပ် မတိုက်တွန်းတော့ပေ။

“အဲဒီလိုဆိုမှတော့ ပြည်နယ် ၁၇ခုဆီပဲပြန်ကြတာပေါ့။”

ရွှီနင်၏ ခိုင်မာသော ရပ်တည်ချက်ကို မြင်လိုက်ရသောအခါ ဝမ့်ယယ်လည်း ရွှီနင်၏ ရွေးချယ်မှုကို လက်ခံလိုက်လေသည်။

“ဟုတ်ကဲ့ပါ။”

ရွှီနင်က ပြန်ဖြေလိုက်သည်။

“ကျင်းမုန်၊ ငါတို့သွားတော့မယ်။”

ဝမ့်ယယ်က ရွှေရောင်မျက်လုံးမိစ္ဆာမျောက်ဝံအား နှုတ်ဆက်လိုက်သည်။

“ကောင်းပြီ။”

ရွှေရောင်မျက်လုံးမိစ္ဆာမျောက်ဝံက ခေါင်းညိတ်ပြလိုက်သည်။

“အကြီးအကဲကျင်းမုန်၊ ကျွန်တော်တို့ကို အရင်သွားခွင့်ပြုပါဦး။”

ရွှီနင်က လက်ယှက်ကာ အရိုအသေပြုလိုက်သည်။

ထို့နောက် ကျင်းမုန်ကိုယ်တိုင် ဝမ့်ယယ်နှင့် ရွှီနင်တို့ကို ကျွန်း၏ ကမ်းစပ်အထိ လိုက်လံ ပို့ဆောင်ပေးခဲ့လေသည်။

ထပ်မံနှုတ်ဆက်ပြီးနောက် ဝမ့်ယယ်သည် ငွေရောင်လှေကို ထုတ်ယူကာ ရွှီနင်နှင့် ချင်းယင်တို့ကို ခေါ်ဆောင်၍ ထွက်ခွာသွားလေတော့သည်။

လှေပေါ်တွင်…

“အကြီးအကဲဝမ့်ယယ်၊ အကြီးအကဲဆီမှာ တာအိုနယ်ပယ်ကျင့်စဉ်တွေများ ရှိမလား၊ ကျွန်တော် လေ့ကျင့်ချင်လို့ပါ။”

ရွှီနင်က ဝမ့်ယယ်ကို ပြောလိုက်သည်။

ယခုအခါ ဂိုဏ်းအမှတ်အသားတံဆိပ်ပြားကို လက်ခံထားပြီးဖြစ်ရာ ဤကဲ့သို့တောင်းဆိုခြင်းမှာ မသင့်တော်စရာမရှိဟု သူထင်မြင်ထားသည်။

”တာအိုနယ်ပယ်ကျင့်စဉ်တွေ ဟုတ်လား။”

လှေကိုထိန်းကျောင်းနေသောဝမ့်ယယ်ကရယ်မောလိုက်လေသည်။

“တာအိုနယ်ပယ်ရဲ့ အစောပိုင်းအဆင့်တွေမှာ ဘယ်လိုလုပ်ပြီး တာအိုနယ်ပယ်ကျင့်စဉ်တွေ ရှိနိုင်မှာလဲကွ။”

ဝမ့်ယယ်က ရှင်းပြလေသည်။

”တာအိုနယ်ပယ်ရဲ့အဆင့်လေးကို ရောက်သွားမှသာ ကျင့်စဉ်တွေနဲ့ဆင်တူတဲ့ တိုက်ခိုက်ရေးနည်းစနစ်တွေကို မင်းရနိုင်လိမ့်မယ်။ အဲဒီမတိုင်ခင်အထိတော့ ဟင်းလင်းပြင်နယ်ပယ်မှာ မင်းသင်ယူခဲ့တဲ့ကျင့်စဉ်တွေက လုံလောက်တယ်။ တာအိုနယ်ပယ်ရဲ့ အစောပိုင်းအဆင့်သုံးဆင့်က ခန္ဓာကိုယ်ရဲ့စွမ်းအားအပေါ်မှာပဲ လုံးဝနီးပါး မှီခိုနေရတာလေ။ ဒါတွေနဲ့ပတ်သက်ပြီး မင်း ဘာမှပူပန်နေစရာမလိုဘူး။”

“သြော်၊ အဲဒီလိုကိုး။”

ဝမ့်ယယ်၏ရှင်းပြချက်ကိုကြားပြီးနောက် သူအနည်းငယ် လောကြီးသွားမိမှန်း ရွှီနင်သဘောပေါက်လိုက်သည်။

ထို့နောက် ဝမ့်ယယ်က လှေကိုဆက်လက်၍ မောင်းနှင်သွားလေသည်။

…

ရက်အနည်းငယ်ကြာပြီးနောက်...

ကျိဖုန်းပြည်နယ်…

ဂိုဏ်းချုပ်လူကျန့်ရှင်၏ တာဝန်ပေးအပ်ခြင်းခံရသော အကြီးအကဲလွမ်ရှစ်ကျန်းသည် ဟင်းလင်းပြင်နယ်ပယ်အဆင့်မြင့် တပည့်အယောက်နှစ်ဆယ်နှင့် အတူ ကျိဖုန်းပြည်နယ်သို့ ရောက်ရှိနေပြီဖြစ်လေသည်။

“မင်းတို့တစ်ဆယ့်ငါးယောက်က ယွဲ့ဝမ့်ဂိုဏ်းကိုသွားပြီး ငါတို့လူတွေကို ကယ်တင်ခဲ့ကြ၊ ပြီးရင် ယွဲ့ဝမ့်ဂိုဏ်းရဲ့ဂိုဏ်းချုပ်နဲ့ အကြီးအကဲတွေကို ရှင်းပစ်လိုက်။”

လွမ်ရှစ်ကျန်းက တပည့်တစ်ဆယ့်ငါးယောက်ကို လက်ညှိုးထိုးကာ အမိန့်ပေးလိုက်သည်။

“ဟုတ်ကဲ့ပါ အကြီးအကဲလွမ်။”

ရွေးချယ်ခံရသော တပည့်တစ်ဆယ့်ငါးယောက်က ရိုသေလေးစားစွာ ပြန်လည်တုံ့ပြန်လိုက်ကြသည်။

ထိုတစ်ဆယ့်ငါးယောက်ထဲတွင် အများစုမှာ တာအိုနယ်ပယ်တစ်ဝက်အဆင့် သိုင်းပညာရှင်များဖြစ်ကြပြီး မည်သူကမျှ ဂိုဏ်းတူအစ်ကိုမော့ထက်အားမနည်းကြပေ။

“ကျန်တဲ့သူတွေ ငါနဲ့အတူ ယွဲ့လန်ဂိုဏ်းကို လိုက်ခဲ့ကြ။”

လွမ်ရှစ်ကျန်းက ထပ်မံအမိန့်ပေးလိုက်ပြီး ကျန်ရှိနေသော တပည့်ငါးယောက်နှင့်အတူ ယွဲ့လန်ဂိုဏ်းဆီသို့ အလျင်အမြန် ထွက်ခွာသွားလေတော့သည်။

တစ်နာရီခန့်အကြာတွင် လွမ်ရှစ်ကျန်းနှင့် အခြားတပည့်ငါးယောက်သည် ယွဲ့လန်ဂိုဏ်းရှေ့သို့ ရောက်ရှိလာကြသည်။

“ယွဲ့လန်ဂိုဏ်းဆီ ဘယ်သူတွေလာနေတာလဲ။”

ဂိုဏ်းအပြင်ဘက်တွင် တာဝန်ကျနေသောတပည့်များသည် လွမ်ရှစ်ကျန်းတို့ကို ချက်ချင်း သတိထားမိသွားကြသည်။

သူတို့သည် အခြေအနေကို ချက်ချင်းတုံ့ပြန်လိုက်ကြပြီး သတိထားကာလျှို့ဝှက်စွာ သတင်းပေးပို့လိုက်ကြလေသည်။

လွမ်ရှစ်ကျန်းသည် ထိုတပည့်များကို လျစ်လျူရှုကာ မြေပြင်ကို လက်သီးဖြင့် ထိုးချလိုက်သည်။ ချက်ချင်းဆိုသလိုပင် မြေပြင်ပေါ်၌ ပင့်ကူအိမ်သဖွယ် အက်ကွဲကြောင်းများပေါ်လာပြီး ယွဲ့လန်ဂိုဏ်းတစ်ခုလုံး သိမ့်သိမ့်တုန်သွားလေတော့သည်။