အခန်း (၂၂၅-၂၂၆)

အခန်း (၂၂၅) - ဓားတစ်ချက်တည်းဖြင့် ထိုးဖောက်ခြင်း

“ယွဲ့လန်ဂိုဏ်းရဲ့ ဂိုဏ်းချုပ်နဲ့ အကြီးအကဲတွေ ထွက်ခဲ့ကြစမ်း။”

လွမ်ရှစ်ကျန်း၏ အသံသည် ယွဲ့လန်ဂိုဏ်းတစ်ခုလုံးသို့ ပဲ့တင်ထပ်ကာ ပျံ့နှံ့သွားလေသည်။

ယွဲ့လန်ဂိုဏ်းသားအားလုံး ထိတ်လန့်တုန်လှုပ်သွားကြသည်။

လွမ်ရှစ်ကျန်းက ယွဲ့လန်ဂိုဏ်းကို ဖျက်ဆီးပစ်ချင်နေသော်လည်း ထိပ်တိုက်ရင်ဆိုင်တိုက်ခိုက်လိုစိတ်လည်း ရှိနေသည်။ သူ့ကိုယ်သူ မည်သူဖြစ်ကြောင်း ထုတ်ဖော်ကာ ပိုမိုကြီးမားသော ထိတ်လန့်မှုမျိုးကို ဖန်တီးချင်နေခြင်းဖြစ်သည်။

သို့မှသာ ပြည်နယ်ဆယ့်ခုနစ်ခုမှ အခြားဂိုဏ်းများကို ကျောက်စိမ်းညဂိုဏ်း မည်မျှကြောက်စရာကောင်းကြောင်း သိစေပြီး ပြန်လည်ခုခံဝံ့မည်မဟုတ်ပေ။

ဤအချိန်တွင် ယွဲ့လန်ဂိုဏ်း၏ စည်းဝေးခန်းမအတွင်း၌…

မီရှင်းယယ်၊ ယွမ်ချန်၊ ချိုးရန့်ရှန်း၊ တုယွမ်နှင့် သွမ့်ချင်းဟွေးတို့ အတူတကွ ထိုင်နေကြသည်။

သူတို့သည် ယွဲ့လန်ဂိုဏ်းတွင် အသန်မာဆုံးသူများဖြစ်ကြရာ ဂိုဏ်းကိုကာကွယ်ရန် ဤနေရာ၌ စောင့်ကြပ်နေခြင်း ဖြစ်လေသည်။

ယွဲ့လန်ဂိုဏ်း ရုတ်တရက် တုန်ခါသွားပြီးနောက် လွမ်ရှစ်ကျန်း၏ အသံ ပျံ့နှံ့လာသောအခါ လူငါးယောက်စလုံး၏ မျက်နှာအမူအရာများ အကြီးအကျယ် ပြောင်းလဲသွားကြသည်။

ယွဲ့လန်ဂိုဏ်း၏ အပြင်ဘက်တွင် ကြောက်မက်ဖွယ်ကောင်းသော အရှိန်အဝါတစ်ခု ရောက်ရှိနေကြောင်း သူတို့အားလုံး အာရုံခံမိလိုက်ကြသည်။

ထိုကြောက်မက်ဖွယ် အရှိန်အဝါပိုင်ရှင်သည် ညအမှောင်ထဲမှ အလင်းရောင်တစ်ခုပမာ အလွန်အမင်း စွမ်းအားကြီးမားလွန်းလှသဖြင့် လျစ်လျူရှုထားရန်မှာ မဖြစ်နိုင်ပေ။

“တာအိုနယ်ပယ် သိုင်းပညာရှင်ပဲ။”

ချိုးရန့်ရှန်း ရုတ်တရက် မတ်တတ်ရပ်လိုက်ပြီး ထိတ်လန့်နေသော မျက်နှာထားဖြင့် ဂိုဏ်းအပြင်ဘက်သို့ လှမ်းကြည့်လိုက်လေသည်။

“ကျောက်စိမ်းညဂိုဏ်းက လူတွေပဲ။”

အခြားသူများလည်း မတ်တတ်ရပ်လိုက်ကြသည်။

“သူတို့က တာအိုနယ်ပယ် သိုင်းပညာရှင်တစ်ယောက်ကိုတောင် စေလွှတ်လိုက်တယ်ဆိုတော့ ဘာတွေများ ကြံစည်နေကြတာလဲ။”

သူတို့အားလုံး စိုးရိမ်ပူပန်စိတ်များ ဝင်ရောက်လာကြသည်။

ယခင်က တပည့်များကိုသာ စေလွှတ်လေ့ရှိသော်လည်း ဤတစ်ကြိမ်တွင်မူ တာအိုနယ်ပယ် သိုင်းပညာရှင်ကိုယ်တိုင် လာရောက်ခဲ့ခြင်း ဖြစ်သည်။

တာအိုနယ်ပယ် သိုင်းပညာရှင်တစ်ယောက် ရောက်လာခြင်းမှာ သာမန်ကိစ္စမဟုတ်ကြောင်း ချိုးရန့်ရှန်းနှင့် အခြားသူများက ကောင်းစွာ သိရှိထားကြပေသည်။

“ယွမ်ချန်”

ချိုးရန့်ရှန်းက ယွမ်ချန်ကို ရုတ်တရက် လှမ်းကြည့်လိုက်သည်။

“အကြီးအကဲချိုး”

ယွမ်ချန်၏ မျက်နှာထားမှာ လေးနက်နေသည်။ ချိုးရန့်ရှန်း အမိန့်ပေးတော့မည်ကို သူ သိလိုက်သည်။

“ယွမ်ရှန်းဂိုဏ်းကို သွားပြီး ယွဲ့လန်ဂိုဏ်းဆီ တာအိုနယ်ပယ် သိုင်းပညာရှင် ရောက်လာတဲ့အကြောင်း ပြောပြလိုက်။”

ချိုးရန့်ရှန်းက ဆက်ပြောသည်။

“ဝမ်ရှန့်ပြည်နယ်က ယွမ်ရှန်းဂိုဏ်းရဲ့ တာအိုနယ်ပယ် သိုင်းပညာရှင်တွေလည်း ရောက်နေလောက်ပြီ။ သူတို့ကို သွားရှာပြီး အကူအညီတောင်းလိုက်။”

“ဟုတ်ကဲ့ပါ”

ယခုအချိန်သည် တွေဝေနေရမည့် အချိန်မဟုတ်ကြောင်း ယွမ်ချန် သိထားသဖြင့် ဂိုဏ်း၏ အနောက်ဘက်ပေါက်မှနေ၍ အလျင်အမြန် ထွက်ခွာသွားလေတော့သည်။

သူသည် အားအနည်းဆုံးသူဖြစ်ရာ ဆက်နေလျှင်လည်း သိပ်အထောက်အကူပြုနိုင်မည် မဟုတ်ကြောင်း သိထားပေသည်။

“သွားကြည့်ကြရအောင်”

ချိုးရန့်ရှန်းက ပြောလိုက်သည်။

“ကောင်းပြီလေ”

အခြားသုံးယောက်မှာလည်း မျက်စိတစ်မှိတ်အတွင်း ဂိုဏ်းအပြင်ဘက်သို့ ရောက်ရှိသွားကြသည်။

ဂိုဏ်းသားများအားလုံး ကြောက်လန့်နေကြမည်ကို သူတို့ ကောင်းကောင်း သိထားကြသည်။ အကယ်၍ သူတို့သာ ထွက်မလာပါက ဂိုဏ်းသားများမှာ ပို၍ပင် ထိတ်လန့်သွားကြပေလိမ့်မည်။

နောက်တစ်စက္ကန့်တွင် ဂိုဏ်းအပြင်ဘက်၌ လူလေးယောက် ပေါ်လာလေသည်။

သူတို့၏ ရှေ့တွင်တော့ လွမ်ရှစ်ကျန်းနှင့် ဟင်းလင်းပြင်နယ်ပယ်အဆင့်မြင့် တပည့် ငါးယောက်တို့ ရပ်နေကြသည်။

‘သူက တကယ်ပဲ တာအိုနယ်ပယ် သိုင်းပညာရှင်ပဲ...’

လွမ်ရှစ်ကျန်းနှင့် ရင်ဆိုင်ရချိန်တွင် မီရှင်းယယ်၊ ချိုးရန့်ရှန်းနှင့် အခြားနှစ်ယောက်တို့မှာ ပြင်းထန်သော ဖိအားများကို ခံစားလိုက်ကြရသည်။

ထိုခံစားချက်ကြောင့် သူတို့ အသက်ရှူကျပ်သွားသလိုပင် ခံစားလိုက်ရသည်။

ဤသည်မှာ သာမန်လူသားနယ်ပယ်တွင် ရှိနေစဉ်က ဟင်းလင်းပြင်နယ်ပယ် သိုင်းပညာရှင်နှင့် ကြုံတွေ့ရသည့် အခြေအနေမျိုးပင် ဖြစ်သည်။

“ခင်ဗျားက ဘယ်သူလဲ။”

ဂိုဏ်းချုပ် မီရှင်းယယ်၏ အသံမှာ ဂိုဏ်းတစ်ခုလုံးသို့ ပျံ့နှံ့သွားလေသည်။

တစ်ဖက်လူသည် စွမ်းအားကြီးမားသော ရန်သူဖြစ်ကြောင်း သိထားသော်လည်း မီရှင်းယယ်က အသံကျယ်ကျယ်ဖြင့် မေးမြန်းလိုက်ခြင်း ဖြစ်သည်။

သူ၏အသံမှာ ယွဲ့လန်ဂိုဏ်းတစ်ခုလုံးသို့ ပျံ့နှံ့သွားသည်။ သူ၏အသံကို ဂိုဏ်းသားအားလုံး ကြားအောင် လုပ်ရမည်ဖြစ်သည်။ သို့မှသာ သူတို့ တည်ငြိမ်သွားကြမည် ဖြစ်သည်။

“ဝမ်ရှန့်ပြည်နယ် ကျောက်စိမ်းညဂိုဏ်းက တာအိုနယ်ပယ် သိုင်းပညာရှင် လွမ်ရှစ်ကျန်းပဲ။”

လွမ်ရှစ်ကျန်းက သူ့ကိုယ်သူ မိတ်ဆက်လိုက်သည်။

“ဘာဖြစ်လို့ ယွဲ့လန်ဂိုဏ်းဆီ ဒီလောက် ရန်လိုတဲ့ပုံစံနဲ့ ရောက်လာရတာလဲ။”

ချိုးရန့်ရှန်းက ရှေ့တစ်လှမ်း တိုးလာပြီး အရှိန်အဝါအရ အရှုံးမပေးကြောင်း သက်သေပြလိုက်သည်။

သူ့အနောက်တွင် မီရှင်းယယ်နှင့် အခြားနှစ်ယောက်တို့မှာလည်း အချိန်မရွေး တိုက်ခိုက်ရန် အသင့်ပြင်ထားကြသည်။ အထူးသဖြင့် တုယွမ်နှင့် သွမ့်ချင်းဟွေးတို့သည် တာအိုနယ်ပယ် ပထမအဆင့်သို့ အတင်းအကျပ် ထိုးဖောက်ဝင်ရောက်ရန် တိတ်တဆိတ် ပြင်ဆင်နေကြလေပြီ။

သူတို့နှစ်ယောက်သည် စွမ်းအင်သတ္တိမျိုးစေ့ နှစ်ခုကို စုစည်းထားနိုင်ခဲ့သော်လည်း အတင်းအကျပ် အဆင့်တက်မည်ဆိုပါက အခြေခံအုတ်မြစ် မခိုင်မာတော့သည့်အပြင် သူတို့၏ ဓာတ်စွမ်းအင်မျိုးစေ့များ ပေါင်းစည်းခြင်း လုပ်ငန်းစဉ်ကိုပါ ထိခိုက်စေမည် ဖြစ်ပေသည်။

“လွန်ခဲ့တဲ့ ရက်အနည်းငယ်က ခင်ဗျားတို့ ယွဲ့လန်ဂိုဏ်းက တပည့်တစ်ယောက်ဟာ ငါတို့ဂိုဏ်းက တပည့်တွေကို အကြောင်းမဲ့ ဖမ်းဆီးခဲ့တဲ့အပြင် အဓိကတပည့်တစ်ယောက်ကိုပါ သတ်ပစ်ခဲ့တယ်။ သူက သိပ်ကို ရက်စက်ကြမ်းကြုတ်လွန်းတယ်။ ဒီတစ်ခါတော့ တရားမျှတမှု လာရှာတာပဲ။”

လွမ်ရှစ်ကျန်းမှာ ရန်လိုနေပြီး အဖြစ်အမှန်ကို လိမ်ညာပြောဆိုနေလေသည်။

ပျောက်ဆုံးနေသော ဂိုဏ်းတူအစ်ကိုမော့မှာ သူ၏စကားအရ အသတ်ခံလိုက်ရပြီ ဖြစ်သည်။

လူလေးယောက်၏ မျက်နှာအမူအရာများမှာ တစ်ပြိုင်နက်တည်း ပြောင်းလဲသွားကြသည်။

ရွှီနင် ကြိုတင်ပေးပို့ထားသော သတင်းများအရ လွမ်ရှစ်ကျန်း ပြောနေသည့် တပည့်ဆိုသည်မှာ ရွှီနင်ဖြစ်ကြောင်း သူတို့အားလုံး သိထားကြသည်။

“ပေါက်ကရတွေ။”

ရွှီနင်၏ ဆရာဖြစ်သူ မီရှင်းယယ်လည်း ရှေ့သို့ ထွက်လာလေသည်။

သူသည် ခြေတစ်လှမ်းတာအိုနယ်ပယ် သိုင်းပညာရှင်အဆင့်သို့ တက်လှမ်းထားပြီး ဖြစ်သည်။ သို့မဟုတ်ပါက လွမ်ရှစ်ကျန်းနှင့် ရင်ဆိုင်ရချိန်တွင် ခံစားရမည့် ဖိအားများမှာ ပိုမိုကြီးမားနေပေလိမ့်မည်။ ထိုသို့ဆိုလျှင် လွမ်ရှစ်ကျန်းကို တည့်တည့်ကြည့်ဝံ့မည်ပင် မဟုတ်ချေ။

“ခင်ဗျားတို့ ကျောက်စိမ်းညဂိုဏ်းက တပည့်တွေက အရင်ဆုံး ရန်စပြီး လူသတ်ခဲ့ကြတာလေ။ ပြီးတော့ အဲဒီ ကျောက်စိမ်းညဂိုဏ်းက တပည့်တွေကို ဖမ်းထားရုံပဲ ဖမ်းထားတာပါ၊ ဘယ်သူ့ကိုမှ မသတ်ထားဘူး။”

မီရှင်းယယ်က ငြင်းခုံလိုက်သည်။

သို့သော် လွမ်ရှစ်ကျန်းက ထိုအရာများကို ဂရုမစိုက်ပေ။ သူက အကြောင်းပြချက်တစ်ခုသာ လိုအပ်နေခြင်း ဖြစ်သည်။

“အဲဒီတပည့်ကို အပ်လိုက်စမ်း၊ မဟုတ်ရင် ဒီနေ့က မင်းတို့ ယွဲ့လန်ဂိုဏ်း ပျက်စီးမယ့်နေ့ပဲ။”

လွမ်ရှစ်ကျန်း၏ အသံမှာ ယွဲ့လန်ဂိုဏ်း၏ ထောင့်တိုင်းသို့ ပျံ့နှံ့သွားလေသည်။

ယခုလေးတင်မှ တည်ငြိမ်သွားသော တပည့်များမှာ တစ်ဖန် ပြန်လည် ထိတ်လန့်လာကြပြန်သည်။

တပည့်များအားလုံးသည် လွမ်ရှစ်ကျန်းက တာအိုနယ်ပယ် သိုင်းပညာရှင်တစ်ယောက်အဖြစ် မိမိကိုယ်ကိုယ် မိတ်ဆက်လိုက်သည်ကို ကြားခဲ့ပြီး ဖြစ်သည်။

ယခု သူက ယွဲ့လန်ဂိုဏ်းကို ဖျက်ဆီးပစ်မည်ဟု ပြောလိုက်သောအခါ လူတိုင်း ထိတ်လန့်သွားကြတော့သည်။

“သိပ်လွန်မလာနဲ့နော်။”

ချိုးရန့်ရှန်းသည် တာအိုနယ်ပယ် နည်းစနစ်ကို စတင်သက်ဝင်စေပြီး တာအိုနယ်ပယ်သို့ အတင်းအကျပ် တက်လှမ်းရန် ဓာတ်စွမ်းအင်မျိုးစေ့ကို အသက်သွင်းနေလေပြီ။

“လူကို အပ်မှာလား၊ မအပ်ဘူးလား။”

လွမ်ရှစ်ကျန်းက လူလေးယောက်ကို အေးစက်စွာ ကြည့်လိုက်သည်။

“မအပ်နိုင်ဘူး။”

ချိုးရန့်ရှန်းက နောက်မဆုတ်ဘဲ ပြောလိုက်သည်။

ရွှီနင်က ဂိုဏ်းထဲ၌ မရှိသည်ကိုပင် အသာထားဦး၊ သူတို့အနေဖြင့် မည်သို့မျှ အပ်ပေးမည် မဟုတ်ပေ။

အကယ်၍ ရွှီနင် ဂိုဏ်းထဲတွင် ရှိနေလျှင်တောင် သူတို့ ဤသို့လုပ်မည် မဟုတ်ချေ။

အပြင်လူတစ်ယောက်၏ ဖိအားပေးမှုကြောင့် ကိုယ့်တပည့်ကို ထုတ်ပေးရမည်ဆိုပါက တစ်ဂိုဏ်းလုံး စိတ်ပျက်သွားကြပေလိမ့်မည်။

ထိုသို့သာ အမှန်တကယ် လုပ်လိုက်ပါက ယွဲ့လန်ဂိုဏ်းသားများ၏ စိတ်ဓာတ်များ ပြိုကွဲသွားမည်ဖြစ်ပြီး နောက်ဆုံးရလဒ်အနေဖြင့် ဂိုဏ်းပြိုကွဲသွားမည်သာ ဖြစ်ပေသည်။

“ဒီလိုဆိုမှတော့ တိုက်ကြတာပေါ့။”

လွမ်ရှစ်ကျန်း၏ အမိန့်ပေးသံနှင့်အတူ သူ၏နောက်မှ တပည့်ငါးယောက်သည် အရိပ်များအဖြစ် ပြောင်းလဲကာ ဂိုဏ်းထဲသို့ ဝင်ရောက်သွားကြလေသည်။

“ရှင်းယယ်၊ မင်းက အဲဒီကောင်တွေကို သွားရှင်း၊ ငါတို့က ဒီတာအိုနယ်ပယ် သိုင်းပညာရှင်ကို ရင်ဆိုင်လိုက်မယ်။”

ချိုးရန့်ရှန်းက အမိန့်ပေးလိုက်သည်။

မီရှင်းယယ်က ဂိုဏ်းချုပ်ဖြစ်သော်လည်း ချိုးရန့်ရှန်း တံခါးပိတ်ကျင့်ကြံရာမှ ထွက်လာပြီးနောက်တွင် လူတိုင်းက သူ၏အမိန့်ကို နာခံကြသည်။

“ကောင်းပါပြီ”

မီရှင်းယယ်က ခိုင်မာပြတ်သားနေသော အကြီးအကဲသုံးဦးကို တစ်ချက်ကြည့်လိုက်ပြီး အံကြိတ်ကာ ရန်သူတပည့်ငါးဦးကို တိုက်ခိုက်ရန် ဂိုဏ်းထဲသို့ ဝင်သွားလေသည်။

သူသည် ဂိုဏ်းအတွင်းရှိ ဟင်းလင်းပြင်နယ်ပယ် အဆင့်မြင့် သိုင်းပညာရှင်များနှင့် ပူးပေါင်းကာ ရန်သူတပည့်ငါးယောက်ကို ရင်ဆိုင်ရမည်ဖြစ်ပြီး တပည့်များ၏ လုံခြုံရေးကိုလည်း အာမခံချက်ပေးရမည် ဖြစ်သည်။

မီရှင်းယယ် လှည့်ထွက်ကာ ဂိုဏ်းထဲသို့ ဝင်သွားသော်လည်း လွမ်ရှစ်ကျန်းက တားဆီးခြင်း မပြုပေ။

သူ့မျက်နှာပေါ်တွင် သရော်လှောင်ပြောင်လိုသည့် အမူအရာတစ်ခု ပေါ်လွင်နေသည်။

ထိုအချိန်တွင် ချိုးရန့်ရှန်း၏ ခန္ဓာကိုယ်ထဲမှ မြည်ဟည်းသံတစ်ခု ထွက်ပေါ်လာလေသည်။

သူသည် ဟင်းလင်းပြင်နယ်ပယ်၏ အတားအဆီးများကို အတင်းအကျပ် ချိုးဖျက်ကာ တရားဝင် တာအိုနယ်ပယ် သိုင်းပညာရှင်တစ်ယောက် ဖြစ်လာခဲ့ချေပြီ။

“တာအိုနယ်ပယ်ကို အတင်းအကျပ် ထိုးဖောက်တာလား...”

လွမ်ရှစ်ကျန်း၏ နှုတ်ခမ်းထောင့်တွင် လှောင်ပြုံးတစ်ခု ပေါ်လာသည်။

“ဒီလိုလုပ်လိုက်ရင် မင်းရဲ့ အခြေခံအုတ်မြစ်တွေ အကုန် ပျက်စီးသွားမှာပေါ့...”

“ဒါ့အပြင် ဒီလိုလုပ်တော့ရော ဘာထူးမှာမို့လို့လဲ။ အတင်းအကျပ် အဆင့်တက်ထားတဲ့ ခန္ဓာကိုယ်ပေါင်းစပ်ခြင်းနယ်ပယ် သိုင်းပညာရှင်တစ်ယောက်က ငါ့ရှေ့မှာတော့ အပြောပလောက်ပါဘူးကွာ။”

လွမ်ရှစ်ကျန်း ရုတ်တရက် ပျောက်ကွယ်သွားလေသည်။

သူ ပြန်ပေါ်လာချိန်တွင် ချိုးရန့်ရှန်း၏ ရှေ့သို့ ရောက်နေလေပြီ။

‘မြန်လိုက်တာ...’

ချိုးရန့်ရှန်း တစ်ခဏမျှ မတုံ့ပြန်နိုင်ဖြစ်သွားသည်။

“ဟား...”

လွမ်ရှစ်ကျန်း လက်သီးတစ်ချက် ထိုးချလိုက်သည်။

ချိုးရန့်ရှန်းက အလျင်အမြန် တုံ့ပြန်ကာ ကာကွယ်လိုက်လေသည်။

ဖုန်း...

မျက်စိတစ်မှိတ်အတွင်းမှာပင် ချိုးရန့်ရှန်း လွင့်ထွက်သွားတော့သည်။

သူသည် ခန္ဓာကိုယ်ပေါင်းစပ်ခြင်းနယ်ပယ်သို့ ယခုလေးတင်မှ ရောက်ရှိလာသည်ဖြစ်ရာ သူနှင့် လွမ်ရှစ်ကျန်းကြားတွင် ကြီးမားသော ကွာဟချက်တစ်ခု ရှိနေသေးသည်။

ချိုးရန့်ရှန်း၏ လက်မောင်းမှ အရိုးများမှာ ကျိုးအက်လာလေသည်။

ထို့အပြင် ကျိုးအက်သွားသော နေရာများကြားတွင် တာအိုနယ်ပယ်၏ ကုသမှုကို ဆန့်ကျင်သော စွမ်းအားများ ဝင်ရောက်လာသည်။

‘ဒါက ဂုဏ်သတ္တိစွမ်းအင်နဲ့ ခန္ဓာကိုယ်စွမ်းအား ပေါင်းစပ်ထားတဲ့ ကြောက်စရာကောင်းတဲ့ စွမ်းအားပဲ...’

ချိုးရန့်ရှန်းသည် တာအိုနယ်ပယ်သို့ ရောက်ရှိပြီးနောက် ခန္ဓာကိုယ်ခွန်အားမှာ သိသိသာသာ မြင့်တက်လာမည်ဖြစ်ကြောင်း ကောင်းကောင်း သိထားသည်။

ထို့ပြင် သူ၏ အသား၊ သွေးနှင့် ဂုဏ်သတ္တိစွမ်းအင်တို့ ပေါင်းစပ်သွားပါက ပိုမိုကြီးမားသော စွမ်းအားကို ရရှိလာမည် ဖြစ်သည်။

ယခုလေးတင် လွမ်ရှစ်ကျန်း ထိုးလိုက်သော လက်သီးချက်သည် တောင်တန်းငယ်တစ်ခုကိုပင် လုံးဝ ကြေမွသွားစေနိုင်သည်။ အကယ်၍ သူသာ အတင်းအကျပ် အဆင့်မတက်ထားပါက ထိုလက်သီးချက်ကြောင့် သေဆုံးသွားနိုင်ပေသည်။

“ငါတို့လည်း ရှိသေးတယ်ကွ။”

နောက်ထပ် ပေါက်ကွဲသံ နှစ်သံ ထွက်ပေါ်လာလေသည်။

တုယွမ်နှင့် သွမ့်ချင်းဟွေးတို့လည်း ခန္ဓာကိုယ်ပေါင်းစပ်ခြင်းနယ်ပယ်သို့ အတင်းအကျပ် ထိုးဖောက်ဝင်ရောက်လိုက်ကြသည်။

သူတို့နှစ်ယောက်သည် တာအိုလက်နက်များကို ထုတ်ယူကာ လွမ်ရှစ်ကျန်းကို တိုက်ခိုက်လိုက်ကြသည်။

တာအိုနယ်ပယ်သို့ ရောက်ရှိပြီးနောက် တာအိုလက်နက်ကို အသုံးပြုပါက ပိုမိုကြီးမားသော စွမ်းအားကို ထုတ်ဖော်နိုင်မည် ဖြစ်သည်။

ချိုးရန့်ရှန်းသည်လည်း နာကျင်မှုကို ကြိတ်မှိတ်ခံစားကာ သူ၏ တာအိုလက်နက်ကို ထုတ်ယူလိုက်သည်။ သူတို့သုံးယောက်သား လွမ်ရှစ်ကျန်းကို ဝိုင်းရံလိုက်ကြလေသည်။

ထိုမြင်ကွင်းကို မြင်လိုက်ရသော်လည်း လွမ်ရှစ်ကျန်းက အနည်းငယ်မျှပင် ထိတ်လန့်သွားခြင်း မရှိပေ။ သူသည် ကြေးလက်သီးစွပ် တာအိုလက်နက်ကို ထုတ်ယူကာ လက်တွင် စွပ်လိုက်သည်။

သူက ဦးဆောင်ကာ သူတို့သုံးဦးကို ရင်ဆိုင်လိုက်လေသည်။

ဖုန်း... ဖုန်း... ဖုန်း...

ရူးသွပ်စွာ တိုက်ခိုက်နေကြသော ထိုလူလေးယောက်၏ ပုံရိပ်များသည် အရိပ်များသဖွယ် ဖြစ်နေသည်။ သူတို့၏ အောက်ရှိ မြေပြင်မှာ လုံးဝ ပြတ်တောက်နေပြီး နက်ရှိုင်းသော ကျင်းပေါက်ကြီးများ မကြာခဏ ပေါ်လာသည်။ ဘေးနားရှိ တောင်တန်းပင်လျှင် ထိခိုက်မှုရှိခဲ့ပြီး မည်သည့်အချိန်တွင်မဆို ပြိုကျမည့်အလား မျက်နှာပြင်ပေါ်တွင် အက်ကြောင်းများ စတင်ပေါ်လာလေသည်။

ဖူး...

အသက်ရှူကြိမ် အနည်းငယ်အတွင်းမှာပင် တုယွမ်၏ အားနည်းချက်တစ်ခုကို လွမ်ရှစ်ကျန်းက အမိအရဖမ်းမိသွားပြီး လက်သီးဖြင့် အထိုးခံလိုက်ရသည်။

လွမ်ရှစ်ကျန်း၏ တာအိုနယ်ပယ်စွမ်းအားနှင့် လက်သီးစွပ် တာအိုလက်နက် ပေါင်းစပ်မှုကြောင့် တုယွမ်၏ ရင်ဘတ်တွင် သွေးသံရဲရဲ အပေါက်ကြီးတစ်ခု ဖြစ်သွားလေသည်။

တာအိုနယ်ပယ်၏ ကျန်ရှိနေသော စွမ်းအားများသည် တုယွမ်၏ ခန္ဓာကိုယ်ထဲသို့ ပျံ့နှံ့သွားလေသည်။

တုယွမ်သည် ကြိုးပြတ်သွားသော စွန်တစ်ကောင်ပမာ လွင့်ထွက်သွားတော့သည်။ သူသည် သတိမလစ်မီ လေထဲသို့ လွင့်စင်သွားပြီး အသက်ရှင်လျက် ရှိမရှိကိုမူ မည်သူမျှ မသိနိုင်ပေ။

“တုယွမ်...”

ချိုးရန့်ရှန်းမှာ အလွန်အမင်း ဒေါသထွက်သွားသည်။

သွမ့်ချင်းဟွေး၏ မျက်လုံးများမှာ ရက်စက်ကြမ်းကြုတ်နေလေသည်။

သူနှင့် ချိုးရန့်ရှန်း၊ တုယွမ်တို့၏ ဆက်ဆံရေးမှာ သာမန်မျှသာ ဖြစ်သော်လည်း စွမ်းအားကြီးမားသော ရန်သူနှင့် ရင်ဆိုင်ရချိန်တွင် သူတို့အားလုံး စည်းလုံးနေကြပေသည်။

‘ငါ အစွမ်းကုန် တိုက်တော့မယ်။’

ချိုးရန့်ရှန်းနှင့် သွမ့်ချင်းဟွေးတို့သည် သူတို့၏ အသက်ကို ပဓာနမထားဘဲ တိုက်ခိုက်လိုက်ကြသည်။

“သနားစရာကောင်းလိုက်တာ။”

လွမ်ရှစ်ကျန်းက ရန်သူများကို တစ်ဖန် ရင်ဆိုင်လိုက်ပြန်သည်။

သူတို့သုံးယောက်ပေါင်းပြီး လွမ်ရှစ်ကျန်းကို တိုက်ခိုက်စဉ်ကပင် ဖိနှိပ်ခံခဲ့ရသည်။ ယခု လူနှစ်ယောက်တည်းသာ ကျန်တော့ရာ လွမ်ရှစ်ကျန်းကို အချိန်ကြာကြာ ယှဉ်ပြိုင်နိုင်မည် မဟုတ်ပေ။

မကြာမီ သူတို့နှစ်ယောက်စလုံး ဒဏ်ရာပြင်းထန်စွာ ရသွားကြလေသည်။

‘ယွဲ့လန်ဂိုဏ်းက ဒီနေ့မှာ ဇာတ်သိမ်းသွားတော့မှာလား...’

ချိုးရန့်ရှန်းသည် မြေပြင်ပေါ်တွင် ဒူးထောက်ကျသွားပြီး သူ့ဒဏ်ရာကို လက်ဖြင့် ဖိထားလိုက်သည်။ သူ့ခန္ဓာကိုယ်ထဲသို့ ကျူးကျော်ဝင်ရောက်လာသော တာအိုနယ်ပယ် စွမ်းအားများကို တားဆီး၍မရနိုင်တော့ချေ။

သူ့ဘေးရှိ သွမ့်ချင်းဟွေးမှာလည်း မိန်းမောတွေဝေနေပြီး အချိန်မရွေး သတိလစ်သွားနိုင်လေသည်။ ယွဲ့လန်ဂိုဏ်း၏ အန္တရာယ်အများဆုံး အချိန်သို့ ရောက်ရှိနေပြီဖြစ်ကြောင်း ချိုးရန့်ရှန်း ကောင်းကောင်း သိထားပေသည်။

“အားနည်းလိုက်တာ...”

လွမ်ရှစ်ကျန်းမှာ စိတ်ရှည်သည်းခံနိုင်စွမ်း မရှိတော့ချေ။ သူသည် ချိုးရန့်ရှန်းကို အရင်ဆုံး သတ်ဖြတ်ရန် ရှေ့သို့ လျှောက်သွားလိုက်သည်။

ယခုလေးတင် ချိုးရန့်ရှန်း၏ တိုက်ခိုက်လိုစိတ်မှာ အလွန်ပြင်းပြခဲ့ရာ ထိုအချက်က လွမ်ရှစ်ကျန်းကို အနည်းငယ် ဒေါသထွက်စေခဲ့သည်။

သို့သော် လွမ်ရှစ်ကျန်း တိုက်ခိုက်ရန် ပြင်လိုက်စဉ်မှာပင် ဟင်းလင်းပြင်ထဲမှ မီးခိုးရောင် မြူခိုးလုံးကြီးတစ်ခု ရုတ်တရက် ပေါ်လာပြီး မီတာရာချီ ကျယ်ဝန်းသော နေရာကို ဖုံးလွှမ်းသွားလေသည်။

‘ဘာတွေ ဖြစ်နေတာလဲ။’

လွမ်ရှစ်ကျန်းတစ်ယောက် အန္တရာယ်ကို ရုတ်တရက် အာရုံခံမိလိုက်သည်။

သူသည် မသိစိတ်က ထွက်ပြေးရန် ကြိုးစားလိုက်သည်။ သို့သော် မီးခိုးရောင် မြူခိုးများထဲတွင် အလင်းရောင်တစ်ခုက သူ့မျက်စိရှေ့၌ ရုတ်တရက် လက်ကနဲ ဖြစ်သွားပြီးနောက် လွမ်ရှစ်ကျန်း၏ ရင်ဘတ်မှာ အေးစက်သွားသည်ကို ခံစားလိုက်ရသည်။

သူ ငုံ့ကြည့်လိုက်ရာ ကြေးဓားတစ်လက်သည် သူ့ရင်ဘတ်ကို ဖောက်ထွင်းသွားသည်ကို မြင်လိုက်ရလေတော့သည်။

အခန်း (၂၂၆) - ဘေးအန္တရာယ်အား ကာကွယ်နိုင်ခြင်း

လွမ်ရှစ်ကျန်းသည် ကြေးဓားမှ ပေါက်ကွဲထွက်လာသော တာအိုနယ်ပယ်၏ ကြမ်းတမ်းလှသော စွမ်းအားများကို ခံစားလိုက်ရပြီး ထိုစွမ်းအားများက သူ၏အသက်စွမ်းအင်များကို တဖြည်းဖြည်း ဝါးမြိုနေလေသည်။

စိမ်းသက်နေသော လူငယ်လေးတစ်ဦး၏ မျက်နှာက သူ့အား အေးစက်သော မျက်လုံးများဖြင့် စိုက်ကြည့်နေသည်။

“မင်းက ဘယ်သူလဲ...”

လွမ်ရှစ်ကျန်းက အားယူကာ ခက်ခက်ခဲခဲ မေးလိုက်လေသည်။

သူက ပြန်လည်ခုခံချင်သေးသော်လည်း တာအိုနယ်ပယ်၏ ကြမ်းတမ်းသောစွမ်းအားနှင့် ကြေးဓားမှ ထွက်ပေါ်နေသော ရက်စက်ကြမ်းကြုတ်သည့် အငွေ့အသက်များကြောင့် သူ၏ခန္ဓာကိုယ်မှာ တောင့်တင်းနေခဲ့ပြီဖြစ်ကာ အသက်ရှူသံများလည်း တဖြည်းဖြည်း အားနည်းလာချေပြီ။

ယေဘုယျအားဖြင့်ဆိုရလျှင် သိုင်းပညာရှင်တစ်ယောက်သည် နှလုံးကို အဖောက်ခံရလျှင်တောင် ချက်ချင်းသေဆုံးသွားမည်မဟုတ်ပေ။ သို့သော် သူတို့၏ခန္ဓာကိုယ်ထဲသို့ တာအိုနယ်ပယ်စွမ်းအားများ ဝင်ရောက်သွားပါက ဆက်လက်တောင့်ခံထားနိုင်ရန် အလွန်ခက်ခဲသွားပေလိမ့်မည်။

“ခင်ဗျား ဒီကိုလာတာ ကျုပ်ကိုရှာဖို့မလား”

ရွှီနင်က ခေါင်းတစ်ချက် စောင်းလိုက်သည်။

ချောက်နက်ကြီးမြောက်ပိုင်းနယ်မြေသို့ ပြန်လည်ရောက်ရှိလာပြီးနောက် ရွှီနင်သည် ယွဲ့ဝမ့်ဂိုဏ်းသို့ အရင်ဆုံး သွားရောက်ခဲ့လေသည်။

ယွဲ့ဝမ့်ဂိုဏ်းသို့ ရွှီနင်ရောက်ရှိသွားသည်နှင့် ယွီယဲ့ဂိုဏ်းမှ တပည့်ဆယ့်ငါးယောက်နှင့် ဆုံတွေ့ခဲ့ရသည်။

ယခင်တပည့်အုပ်စုကဲ့သို့ပင် သူတို့သည်လည်း ရွှီနင်၏ အလွယ်တကူ နှိမ်နင်းခြင်းကိုခံလိုက်ရပြီး အရှင်လတ်လတ် ဖမ်းဆီးခံလိုက်ရလေသည်။

ရွှီနင်တစ်ယောက် တာအိုနယ်ပယ်သို့ တက်လှမ်းသွားနိုင်ခဲ့ခြင်းက ယွမ့်ယွမ်၊ စစ်ယင်နှင့် အခြားသူများကို အလွန်အမင်း အံ့အားသင့်သွားစေခဲ့သည်။

မီးခိုးရောင်လေးနှင့် ရွှီးဟူကျွင်းတို့ပင်လျှင် ရွှီနင် ဤမျှမြန်မြန်ဆန်ဆန် အဆင့်တက်သွားလိမ့်မည်ဟု ထင်မှတ်မထားခဲ့ကြပေ။

ထို့နောက်တွင် ယွီယဲ့ဂိုဏ်းမှ အကြီးအကဲ လွမ်ရှစ်ကျန်းသည် ယွဲ့လန်ဂိုဏ်းကို ဖျက်ဆီးပစ်ရန်အတွက် ယွဲ့လန်ဂိုဏ်းသို့ သွားရောက်နေပြီဖြစ်ကြောင်း ဖမ်းဆီးထားသော တပည့်များထံမှ ရွှီနင် သိရှိလိုက်ရသည်။ ထို့ကြောင့် ဝမ့်ယယ်နှင့်အတူ ယွဲ့လန်ဂိုဏ်းသို့ အလျင်စလို ပြေးသွားခဲ့လေသည်။

ယွဲ့လန်ဂိုဏ်းအနီးသို့ ရောက်ရှိသွားသည်နှင့် တုယွမ်နှင့် သွမ့်ချင်းဟွေးတို့ သတိလစ်နေသည်ကို ရွှီနင် မြင်လိုက်ရပြီး ချိုးရန့်ရှန်းမှာလည်း အချိန်မရွေး အသတ်ခံရနိုင်သော အခြေအနေတွင် ရှိနေလေသည်။

အရေးကြီးသော ထိုအခိုက်အတန့်တွင် ရွှီနင်သည် ကြေးဓားနှင့် လေမီးခိုးဘူးသီးခြောက်ကို အသက်သွင်းလိုက်ပြီး လွမ်ရှစ်ကျန်းအား မျက်စိတစ်မှိတ်အတွင်းမှာပင် ပြင်းထန်စွာ ဒဏ်ရာရသွားစေခဲ့သည်။

လွမ်ရှစ်ကျန်းသည် ခန္ဓာကိုယ်ပေါင်းစပ်ခြင်းနယ်ပယ်၏ အထွတ်အထိပ်သို့ ရောက်ရှိနေသူဖြစ်သော်လည်း ရွှီနင်၏ ဓာတ်စွမ်းအင်မျိုးစေ့ ခြောက်ခုနှင့် ယှဉ်လျှင် သူ၏အခြေခံမှာ အားနည်းနေဆဲပင် ဖြစ်သည်။

ထို့အပြင် ဤသို့ အောင်မြင်စွာ သတ်ဖြတ်နိုင်ခဲ့ခြင်း၏ အရေးအကြီးဆုံးသော အကြောင်းရင်းမှာ လေမီးခိုးဘူးသီးခြောက်၏ စွမ်းအားကြောင့်ပင်။

ရွှီနင်သည် ဤတစ်ကြိမ်တွင် လေမီးခိုးဘူးသီးခြောက်ကို အသက်သွင်းလိုက်ပြီး မီးခိုးရောင် မြူခိုးများကို ထုတ်လွှတ်လိုက်သော်လည်း အဆိပ်ကိုမူ အသုံးမပြုခဲ့ပေ။

သို့သော်လည်း လေမီးခိုးဘူးသီးခြောက်မှ မီးခိုးရောင် မြူခိုးများနှင့် လေမီးခိုးများ ထွက်ပေါ်လာချိန်တွင် ခန္ဓာကိုယ်ပေါင်းစပ်ခြင်းနယ်ပယ် သိုင်းပညာရှင်တစ်ယောက်၏ အာရုံခံနိုင်စွမ်းကို လုံးဝ ပိတ်လှောင်ထားနိုင်ပြီး ရွှီနင်ကိုမူ မြူခိုးများအတွင်းရှိ အရာအားလုံးကို အာရုံခံနိုင်စွမ်း ရှိစေလေသည်။

ဤသို့ဖြင့် ရွှီနင်၏ တိုက်ခိုက်မှုမှာ အလွယ်တကူ အောင်မြင်သွားခဲ့လေသည်။

“မင်းက... ဟို ယွဲ့လန်ဂိုဏ်းက တပည့်ပဲ...”

သေခါနီးအချိန်ရောက်မှသာ လွမ်ရှစ်ကျန်းတစ်ယောက် ရွှီနင်မည်သူဖြစ်ကြောင်းကို သိရှိသွားခဲ့တော့သည်။

အန္တရာယ်ကို အာရုံခံမိပြီးနောက်တွင် သူ၏ အသက်ကယ်ရတနာကို အသုံးပြုကာ ထွက်ပြေးရန် ကြံရွယ်ခဲ့သေးသည်။

သို့သော် မီးခိုးရောင်မြူခိုးများနှင့် လေမီးခိုးများ၏ ဖုံးလွှမ်းခြင်းကို ခံလိုက်ရပြီးနောက်တွင် နေရာရွှေ့ပြောင်းရေးပစ္စည်းမှာ အစွမ်းမပြနိုင်တော့ချေ။

“ကျွန်တော်က ယွီယဲ့ဂိုဏ်းနဲ့ ညှိနှိုင်းချင်ရုံသက်သက်ပါ။ ဒါပေမဲ့ ခင်ဗျားတို့က ယွဲ့လန်ဂိုဏ်းကို ဖျက်ဆီးပစ်ချင်နေကြတယ်။ ဒီလိုအခြေအနေရောက်နေမှတော့ အသေအကြေ တိုက်ခိုက်ဖို့ပဲ ရှိတော့တယ်”

ရွှီနင်သည် ကြေးဓားထဲမှ ဝံပုလွေပြာ၏ စိတ်ဆန္ဒကို နောက်တစ်ကြိမ် ထပ်မံအသက်သွင်းလိုက်လေသည်။

ထို့နောက် ကြမ်းတမ်းလှသော စွမ်းအားများ ပေါက်ကွဲထွက်လာကာ လွမ်ရှစ်ကျန်း၏ နောက်ဆုံးကျန်ရစ်နေသော အသက်ငွေ့လေးကိုပါ ရုတ်သိမ်းသွားလေတော့သည်။ ကြေးဓားနှင့် ကြေးယပ်တောင်တို့၏ လျှို့ဝှက်ချက်များကို ဝမ့်ယယ်ထံမှ ရွှီနင် မေးမြန်းထားခဲ့ပြီး ဖြစ်သည်။

ဤကြေးဓားနှင့် ယပ်တောင်အစုံသည် အထူးတာအိုလက်နက် အမျိုးအစားတစ်ခု ဖြစ်သည်။ ဤအထူးတာအိုလက်နက် နှစ်ခုကို အဆင့်မြင့် တာအိုနယ်ပယ် မိစ္ဆာသားရဲတစ်ကောင်ဖြစ်သော နှင်းမုန်တိုင်း ဝံပုလွေပြာ၏ သွေးအဆီအနှစ်ဖြင့် ပေါင်းစပ်ဖန်တီးထားခြင်း ဖြစ်လေသည်။

ထိုနှင်းမုန်တိုင်း ဝံပုလွေပြာသည် ချင်းယင်၏ သွေးမျိုးဆက်အရင်းအမြစ်ပင် ဖြစ်သည်။

ဤတာအိုလက်နက်နှစ်ခုကို လူသားသိုင်းပညာရှင်များ အသုံးပြုနိုင်သကဲ့သို့ ချင်းယင်သည်လည်း ၎င်း၏ သွေးမျိုးဆက်စွမ်းအားကို အသက်သွင်းခြင်းဖြင့် အသုံးပြုနိုင်ပေသည်။

ဝမ့်ယယ်၏ ဒဏ်ရာများ ပြန်လည်ဆိုးရွားလာချိန်တွင် ဤအထူးတာအိုလက်နက်နှစ်ခုကို ကူကျွမ့်နှင့် အခြားလူတစ်ယောက်တို့က ခိုးယူသွားခဲ့ကြခြင်း ဖြစ်သည်။ အချိန်အတန်ကြာ ပျောက်ဆုံးနေခဲ့ပြီးနောက် နောက်ဆုံးတွင် ရွှီနင်၏လက်ထဲသို့ ရောက်ရှိလာခဲ့လေသည်။

အကြောင်းစုံကို နားလည်သွားပြီးနောက်တွင် ရွှီနင်သည် ယပ်တောင်ကို ချင်းယင်အား ပြန်ပေးခဲ့ပြီး ဓားကိုသာ မိမိအတွက် ချန်ထားခဲ့လေသည်။

တာအိုနယ်ပယ်သို့ တက်လှမ်းပြီးနောက်တွင် ရွှီနင်သည် ဤဓားကို အလွယ်တကူ အသုံးပြုနိုင်သွားပြီ ဖြစ်သည်။ သူသည် ဝံပုလွေစိတ်ဆန္ဒ၏ ရက်စက်ကြမ်းကြုတ်သော စွမ်းအားများကို ယခင်ကကဲ့သို့ တန်ပြန်သက်ရောက်မှုဒဏ် မခံရတော့ဘဲ အပြည့်အဝ ထိန်းချုပ်နိုင်နေပြီ ဖြစ်လေသည်။

‘ဒီမီးခိုးရောင် မြူခိုးတွေက ရုတ်တရက်ကြီး ရောက်လာတာပဲ၊ ဘာတွေဖြစ်နေတာလဲ’

ချိုးရန့်ရှန်းသည်လည်း ဤမီးခိုးရောင်မြူခိုးများ၏ ဖုံးလွှမ်းခြင်းကို ခံလိုက်ရပြီး သူ၏အာရုံခံနိုင်စွမ်းများ လုံးဝ ပိတ်ဆို့သွားခဲ့လေသည်။ သူသည် အလွန်အမင်း အန္တရာယ်များသော အခြေအနေသို့ ရောက်ရှိနေခဲ့ပြီ ဖြစ်သော်လည်း ရုတ်တရက် ထွက်ပေါ်လာသော ဤမီးခိုးရောင်မြူခိုးများက အရာအားလုံးကို ပြောင်းလဲသွားစေခဲ့သည်။

‘ဒီမီးခိုးရောင် မြူခိုးတွေက တကယ်ကို ကြောက်စရာကောင်းတာပဲ’

ချိုးရန့်ရှန်းသည် မီးခိုးရောင်မြူခိုးများထဲမှ ကြောက်မက်ဖွယ်ကောင်းသော စွမ်းအားတစ်ခုကို အာရုံခံမိနေသည်။ အကယ်၍ ထိုစွမ်းအားများသာ လှုပ်ရှားလာပါက သူ့ကို အလွယ်တကူ သတ်ဖြတ်ပစ်နိုင်ပေလိမ့်မည်။

မီးခိုးရောင်မြူခိုးများထဲမှ ထွက်ပြေးရန် ချိုးရန့်ရှန်း ပြင်ဆင်နေချိန်မှာပင် သူ၏ဘေးပတ်ဝန်းကျင်ရှိ မီးခိုးရောင်မြူခိုးများ ရုတ်တရက် စီးဆင်းလှုပ်ရှားလာသည်ကို သတိပြုမိလိုက်သည်။

ရွှီ...

နှစ်စက္ကန့်၊ သုံးစက္ကန့်အတွင်းမှာပင် မီးခိုးရောင်မြူခိုးများသည် ဖြူလွှနေသော ဘူးသီးခြောက်တစ်ခုထဲသို့ စုပ်ယူခြင်း ခံလိုက်ရလေသည်။

အဖြူရောင်ဘူးသီး‌ခြောက်ပိုင်ရှင်ကို မြင်လိုက်ရသောအခါ ချိုးရန့်ရှန်းမှာ သူ့မျက်လုံးများ မှုန်ဝါးသွားသလို ခံစားလိုက်ရသည်။ သူ သေချာမမြင်ရဘူးဟုပင် ထင်မှတ်သွားမိသည်။

“ရွှီနင်ပါလား”

အထပ်ထပ်အခါခါ သေချာကြည့်ပြီးနောက်မှ ချိုးရန့်ရှန်းတစ်ယောက် သေချာသွားတော့သည်။

ရွှီနင်၏ အရှိန်အဝါများက အလွန်အမင်း ပြောင်းလဲသွားခဲ့ချေပြီ။

လွမ်ရှစ်ကျန်း၏ အလောင်းက သူ၏ဘေးတွင် လဲကျနေလေသည်။

“အကြီးအကဲချိုး”

ရွှီနင်သည် ချိုးရန့်ရှန်း၏ဘေးသို့ အလျင်အမြန် သွားရောက်လိုက်ပြီး သူ၏ တာအိုနယ်ပယ်စွမ်းအားများကို ချိုးရန့်ရှန်း၏ ခန္ဓာကိုယ်ထဲသို့ ပို့ဆောင်ကာ ဒဏ်ရာများကို တည်ငြိမ်သွားစေရန် လုပ်ဆောင်ပေးလိုက်သည်။

လက်ရှိတွင် ရွှီနင်၌ တာအိုနယ်ပယ်သခင်တစ်ဦး၏ ဒဏ်ရာများကို ကုသပေးနိုင်သော ဆေးလုံးများ မရှိပေ။

ချိုးရန့်ရှန်း ပြင်းထန်စွာ ဒဏ်ရာရထားကြောင်းကို သူ အာရုံခံသိရှိနိုင်လေသည်။

ချိုးရန့်ရှန်းသည် တာအိုနယ်ပယ်သို့ အတင်းအဓမ္မ ချိုးဖျက်ဝင်ရောက်ခဲ့သဖြင့် သူ၏အခြေခံမှာ မတည်မငြိမ် ဖြစ်နေခဲ့ပြီးဖြစ်သည်။ ထို့အပြင် လွမ်ရှစ်ကျန်း၏ ပြင်းထန်သော တိုက်ခိုက်မှုများကိုလည်း ခံခဲ့ရသဖြင့် သူ၏ခန္ဓာကိုယ်မှာ အပြင်းအထန် ဒဏ်ရာရနေခဲ့လေသည်။

“ငါ့အတွက် စိတ်မပူပါနဲ့၊ အကြီးအကဲ တုယွမ်နဲ့ အကြီးအကဲ သွမ့်ချင်းဟွေးဆီ အရင်သွားကြည့်လိုက်ပါဦး”

ချိုးရန့်ရှန်းက ရွှီနင်ကို ပြောလိုက်သည်။

ရွှီနင်သည် တုယွမ်နှင့် သွမ့်ချင်းဟွေးတို့ထံသို့ သွားရောက်စစ်ဆေးလိုက်လေသည်။

‘အကြီးအကဲ တုယွမ်ရဲ့ ဒဏ်ရာတွေက အရမ်းပြင်းထန်တာပဲ...’

တုယွမ်မှာ သေမင်းနှင့် အလွန်နီးကပ်နေပြီဖြစ်ကြောင်း ရွှီနင် တွေ့ရှိလိုက်ရသည်။ သူသည် အချိန်မရွေး သေဆုံးသွားနိုင်ပေသည်။

သူသည် တာအိုနယ်ပယ်စွမ်းအားတစ်မျှင်ကို တုယွမ်၏ ခန္ဓာကိုယ်ထဲသို့ အလျင်အမြန် ပို့ဆောင်ပေးလိုက်ပြီး လွမ်ရှစ်ကျန်း၏ တာအိုနယ်ပယ်စွမ်းအားများကို ဖြိုခွဲပစ်လိုက်သည်။

သို့တိုင်အောင် တုယွမ်မှာ သတိရမလာသေးပေ။ သို့သော် ကံကောင်းထောက်မစွာဖြင့် သူသည် လတ်တလောတွင် အသက်ရှင်နေသေးသည်။

ရွှီနင်သည် သွမ့်ချင်းဟွေး၏ ဒဏ်ရာများကို တည်ငြိမ်သွားစေရန် သွားရောက်ကုသပေးလိုက်သည်။

ယခင်က သွမ့်ချင်းဟွေးသည် မီရှင်းယယ်နှင့် ရန်ငြိုးရန်စများ ရှိခဲ့သော်လည်း သေရေးရှင်ရေး အခြေအနေတွင် ယွဲ့လန်ဂိုဏ်းအတွက် မားမားမတ်မတ် ရပ်တည်ပေးခဲ့သဖြင့် သူ့အပေါ်တွင် ရွှီနင် မည်သည့် စိမ်းသက်မှုကိုမျှ မခံစားရတော့ချေ။

သွမ့်ချင်းဟွေးမှာ ဖြည်းညင်းစွာ သတိပြန်လည်လာခဲ့လေသည်။

“အကြီးအကဲတို့... ဂိုဏ်းထဲမှာ ပြဿနာတချို့ ရှိနေပုံရတယ်၊ ကျွန်တော် သွားရှင်းလိုက်ပါဦးမယ်”

ရွှီနင်သည် ပျောက်ကွယ်သွားပြီး ဂိုဏ်းထဲသို့ ဝင်ရောက်သွားတော့သည်။

ယွဲ့လန်ဂိုဏ်းထဲတွင် ပြဿနာရှာနေသော ယွီယဲ့ဂိုဏ်းမှ တပည့်ငါးယောက် ရှိနေသေးသည်။

“ရွှီနင်က တကယ်ပဲ တာအိုနယ်ပယ်ကို တက်လှမ်းသွားနိုင်ခဲ့တာပဲ...”

သွမ့်ချင်းဟွေးမှာ ခပ်ဖွဖွ ချောင်းဟန့်လိုက်ရင်း အချိန်အတော်ကြာသည်အထိ စိတ်မငြိမ်မသက် ဖြစ်နေလေသည်။

ရွှီနင်သည် တာအိုနယ်ပယ်သို့ တက်လှမ်းနိုင်ရန်အတွက် အခွင့်အရေးရှာဖွေရန် ထွက်သွားခဲ့ကြောင်း ဂိုဏ်းချုပ်နှင့် အကြီးအကဲများအားလုံး သိထားကြသည်။

သူတို့ ထင်မှတ်မထားခဲ့သည်မှာ ရွှီနင်က ထိုအခွင့်အရေးကို တကယ်ရှာတွေ့ခဲ့ပြီး ဤမျှအရေးကြီးသော အချိန်တွင် ပြန်လည်ရောက်ရှိလာခြင်းပင်။ ထို့အပြင် ရွှီနင်၏ လက်ရှိခွန်အားသည် သာမန် ခန္ဓာကိုယ်ပေါင်းစပ်ခြင်းနယ်ပယ် သိုင်းပညာရှင်တစ်ယောက်ထက် များစွာ သာလွန်နေပြီ ဖြစ်သည်။

“ဟုတ်တယ်၊ သူက ယွဲ့လန်ဂိုဏ်း တည်ထောင်ကတည်းက ပထမဆုံး အထူးချွန်ဆုံး ပါရမီရှင်ပဲ...”

ချိုးရန့်ရှန်းက မျက်လုံးများထဲတွင် စိတ်သက်သာရာရသွားသည့် အရိပ်အယောင်များဖြင့် ပြောလိုက်လေသည်။

“မဟုတ်ဘူး... သူက ပြည်နယ်ဆယ့်ခုနစ်ခုရဲ့ သမိုင်းတစ်လျှောက်မှာ နံပါတ်တစ် ပါရမီရှင်ဖြစ်လာနိုင်တယ်”

အဘိုးအိုတစ်ဦးက သူတို့နှစ်ဦး၏ဘေးတွင် ရုတ်တရက် ပေါ်လာလေသည်။

ချိုးရန့်ရှန်းနှင့် သွမ့်ချင်းဟွေးတို့ နှစ်ဦးစလုံး ပြင်းထန်စွာ ဒဏ်ရာရထားသဖြင့် ထိုအဘိုးအိုကို လုံးဝ သတိမထားမိခဲ့ကြပေ။

အဘိုးအိုကို မြင်လိုက်ရသောအခါ သူတို့နှစ်ဦး၏ မျက်နှာများ ပြန်လည်တင်းမာသွားကြသည်။ ထိုသူမှာ လွမ်ရှစ်ကျန်း၏ အကူအညီဟု သူတို့ ထင်မှတ်သွားကြသည်။

“မလန့်ပါနဲ့”

အဘိုးအိုက သူတို့နှစ်ဦး၏ သတိထားနေမှုကို မြင်လိုက်ရသဖြင့် ရှင်းပြလိုက်သည်။

“ကျုပ်က ရွှီနင်နဲ့ သိပါတယ်... ကျုပ်နာမည်က ဝမ့်ယယ်ပါ”

“အဘိုးအိုဝမ့်ယယ်လား...”

ဝမ့်ယယ်၏ မိတ်ဆက်စကားကို ကြားပြီးနောက် ချိုးရန့်ရှန်းနှင့် သွမ့်ချင်းဟွေးတို့၏ ရင်ထဲတွင် တုန်လှုပ်သွားကြလေသည်။

အဘိုးအိုဝမ့်ယယ်သည် ယွီယဲ့ဂိုဏ်းမှ မြောက်ပိုင်းချောက်နက်နယ်မြေရှိ ပြည်နယ်ဆယ့်ခုနစ်ခုသို့ လာရောက်ရခြင်း၏ အကြောင်းရင်းများအနက် တစ်ခုဖြစ်ကြောင်း သူတို့ ကောင်းကောင်း သိထားကြသည်။

ယခုမူ ထိုသူက သူတို့၏ရှေ့တွင် ဤသို့ ပေါ်လာခဲ့လေပြီ။

“ဒီဆေးတွေက မင်းတို့ရဲ့ ဒဏ်ရာတွေကို သက်သာစေလိမ့်မယ်”

ဝမ့်ယယ်၏ လက်ဖဝါးထဲတွင် ဆေးသုံးလုံး ပေါ်လာလေသည်။ နှစ်လုံးက ချိုးရန့်ရှန်းနှင့် သွမ့်ချင်းဟွေးတို့၏ လက်ထဲသို့ ကျရောက်သွားပြီး ကျန်တစ်လုံးကိုမူ သတိလစ်နေသော တုယွမ်၏ ပါးစပ်ထဲသို့ ထည့်ပေးလိုက်သည်။

ရွှီနင်တွင် တာအိုနယ်ပယ်သခင်တစ်ဦး၏ ဒဏ်ရာများကို ကုသပေးနိုင်သော ဆေးလုံးမရှိသော်လည်း ဝမ့်ယယ်တွင်မူ ရှိနေပေသည်။

အမှန်တော့ ဝမ့်ယယ်နှင့် ရွှီနင်တို့သည် ယွဲ့ဝမ့်ဂိုဏ်းမှ တစ်ချိန်တည်း ထွက်ခွာလာခဲ့ကြပြီး ယွဲ့လန်ဂိုဏ်းသို့ အမြန်ပြန်လာခဲ့ကြခြင်း ဖြစ်သည်။

သို့သော် ရွှီနင်မှာ သူ၏ဂိုဏ်းကို ကာကွယ်လိုစိတ် ပြင်းပြနေသဖြင့် မြန်ဆန်စွာ ခရီးဆက်ခဲ့လေသည်။ ဝမ့်ယယ်မှာ သူ၏အမြန်နှုန်းကို မမီလိုက်သဖြင့် ယခုမှသာ ရောက်ရှိလာခြင်း ဖြစ်လေသည်။

မြေပြင်ပေါ်ရှိ လွမ်ရှစ်ကျန်း၏ အလောင်းကို ကြည့်ရင်း မည်သည့်အရာများ ဖြစ်ပျက်ခဲ့သည်ကို ဝမ့်ယယ် သိရှိသွားလေပြီ။

“အဟွတ်... အဟွတ်...”

ဆေးလုံးကို မျိုချလိုက်ပြီးနောက် တုယွမ်မှာ တုံ့ပြန်မှု စတင်လာလေသည်။

တုယွမ်၏ တုံ့ပြန်မှုကို မြင်လိုက်ရသဖြင့် ချိုးရန့်ရှန်းနှင့် သွမ့်ချင်းဟွေးတို့မှာ စိုးရိမ်ပူပန်မှု မရှိတော့ဘဲ ဆေးလုံးကို ချက်ချင်း မျိုချလိုက်ကြတော့သည်။

ဆေးလုံးများ ဗိုက်ထဲသို့ ရောက်ရှိသွားသည်နှင့် သူတို့၏ ဒဏ်ရာများ လျင်မြန်စွာ သက်သာလာသည်ကို ခံစားလိုက်ကြရသည်။

“ကျေးဇူးတင်ပါတယ် စီနီယာဝမ့်ယယ်”

ချိုးရန့်ရှန်းနှင့် သွမ့်ချင်းဟွေးတို့သည် မတ်တတ်ရပ်ကာ ဝမ့်ယယ်ကို ကျေးဇူးတင်စကား ပြောကြားလိုက်ကြသည်။

ရွှီနင်ပြောခဲ့သော တာအိုနယ်ပယ်အတွက် အခွင့်အရေးဆိုသည်မှာ အဘိုးအိုဝမ့်ယယ်နှင့် သက်ဆိုင်လိမ့်မည်ဟု သူတို့အားလုံး ခန့်မှန်းမိကြလေသည်။

ယွဲ့လန်ဂိုဏ်းထဲမှ ယွီယဲ့ဂိုဏ်း၏ တပည့်ငါးယောက်ကိုလည်း ရွှီနင်က အလွယ်တကူ နှိမ်နင်းလိုက်လေသည်။

ရွှီနင်တစ်ယောက် တာအိုနယ်ပယ်သို့ တက်လှမ်းသွားပြီဖြစ်ကြောင်းနှင့် ဂိုဏ်း၏ ဘေးအန္တရာယ်ကို ဖြေရှင်းပေးခဲ့ကြောင်း သိလိုက်ရသောအခါ မီရှင်းယယ်မှာ အရာအားလုံး မှုန်ဝါးနေသလို ခံစားလိုက်ရသည်။ အရာအားလုံးက လက်တွေ့မဆန်သကဲ့သို့ ဖြစ်နေသည်။

တိုက်ဆိုင်စွာဖြင့် ဝမ့်ယယ်နှင့် အကြီးအကဲသုံးဦးတို့သည်လည်း ထိုအချိန်မှာပင် ဂိုဏ်းသို့ ပြန်လည်ရောက်ရှိလာကြလေသည်။

“ဆရာ... ဒီပုဂ္ဂိုလ်က စီနီယာဝမ့်ယယ်ပါ။ ကျွန်တော် တာအိုနယ်ပယ်ကို တက်လှမ်းနိုင်အောင် သူက ကူညီပေးခဲ့တာပါ”

ရွှီနင်က မိတ်ဆက်ပေးလိုက်သည်။

“အဘိုးအိုဝမ့်ယယ်လား”

မီရှင်းယယ်မှာ အံ့အားသင့်သွားသော်လည်း အရိုအသေပေးလိုက်လေသည်။

“သူကတော့ ကျွန်တော့်ဆရာ မီရှင်းယယ်ပါ၊ ယွဲ့လန်ဂိုဏ်းရဲ့ ဂိုဏ်းချုပ်ပါ”

ရွှီနင်က ထပ်မံမိတ်ဆက်ပေးလိုက်သညမ။

ခေတ္တမျှ စကားပြောဆိုပြီးနောက် မီရှင်းယယ်က ပြောလိုက်သည်။

“အကြီးအကဲသုံးယောက်ကို ငါ အနားယူဖို့ ခေါ်သွားလိုက်မယ်... ရွှီနင်၊ မင်းက စီနီယာဝမ့်ယယ်ကို အရင်ဧည့်ခံလိုက်ပါဦး”

“ဟုတ်ကဲ့ပါ”

ရွှီနင်က ပြန်ဖြေလိုက်လေသည်။

“အကြီးအကဲဝမ့်ယယ်... ယွဲ့လန်ဂိုဏ်းထဲမှာ လမ်းလျှောက်ချင်သေးလား”

ထိုလေးယောက် ထွက်သွားပြီးနောက် ရွှီနင်က ပြောလိုက်သည်။

“ထားလိုက်ပါတော့... မင်းရဲ့ ခွန်အားတွေကို အရင်ပြန်ဖြည့်တင်းလိုက်ပါဦး”

ဝမ့်ယယ်က မုတ်ဆိတ်မွေးများကို ပွတ်သပ်ရင်း ပြုံးကာ ပြောလိုက်လေသည်။

ထိုစကားကိုကြားသော် ရွှီနင်က ခေါင်းညိတ်လိုက်သည်။

သူ၏ခန္ဓာကိုယ်မှာ အားနည်းနေသောအခြေအနေတွင် ရှိနေကြောင်း သူ အာရုံခံမိလေသည်။ ဤခံစားချက်မှာ သူ သိုင်းပညာလေ့ကျင့်စဉ်က သို့မဟုတ် သာမန်လူသားနယ်ပယ်တွင် ရန်သူများနှင့် တိုက်ခိုက်ပြီးနောက် ခွန်အားများ ကုန်ခမ်းသွားချိန်နှင့် ဆင်တူနေပေသည်။

“အခု မင်းသိပြီလား၊ တာအိုနယ်ပယ်သခင်တစ်ယောက်က အဆင့်တက်ပြီးတာနဲ့ ဝမ်ရှန့်ပြည်နယ်ကို ဘာလို့သွားကြတာလဲ ဆိုတာကို”

ဝမ့်ယယ်က ပြောလိုက်သည်။

“ကျွန်တော် သိပါပြီ”

ရွှီနင်က မချိပြုံး ပြုံးလိုက်သည်။

ကုန်ခမ်းသွားသော တာအိုနယ်ပယ်စွမ်းအားများကို ပြန်လည်ဖြည့်တင်းရန်အတွက် ပတ်ဝန်းကျင်ရှိ ဝိညာဉ်စွမ်းအင်များကို စုပ်ယူရန် လိုအပ်ပေသည်။

သို့သော် မြောက်ပိုင်းချောက်နက်နယ်မြေပေါ်ရှိ ဝိညာဉ်စွမ်းအင်များမှာ အလွန်ပင် ပါးလွှာလှသည်။

သာမန်လူသားနယ်ပယ်တွင် ရှိနေစဉ်က ရွှီနင်သည် အချိန်တိုအတွင်း သူ၏အကောင်းဆုံးအခြေအနေသို့ ပြန်လည်ရောက်ရှိနိုင်ခဲ့သည်။

ယခုမူ သူ၏အစွမ်းအစများကို အပြည့်အဝ ထုတ်မသုံးရသေးခင်မှာပင် ပြန်လည်ဖြည့်တင်းရသည့် လုပ်ငန်းစဉ်မှာ အလွန်နှေးကွေးနေကြောင်း သူ ခံစားလိုက်ရသည်။

“ခန္ဓာကိုယ်ပေါင်းစပ်ခြင်းနယ်ပယ် သိုင်းပညာရှင်တစ်ယောက်အတွက်တော့ အဆင်ပြေပေမဲ့ ကြယ်တာရာချီနယ်ပယ်ကို ရောက်သွားပြီဆိုရင်တော့ တိုက်ပွဲတစ်ခုအပြီးမှာ အနားယူဖို့ ဘယ်လောက်ကြာမလဲဆိုတာ မသိနိုင်တော့ဘူး။ ခွန်အားတွေတောင် ကျဆင်းသွားစေနိုင်သေးတယ်”

ထိုသို့ပြောရင်း ဝမ့်ယယ်က တာအိုနယ်ပယ်စွမ်းအားများကို ပြန်လည်ဖြည့်တင်းပေးနိုင်သည့် ဆေးလုံးနှစ်လုံးကို ထပ်ထုတ်ပေးလိုက်သည်။

ရွှီနင်က ယူကာ မျိုချလိုက်ပြီး သူ၏ တာအိုနယ်ပယ်စွမ်းအားများ ပြန်လည်ဖြည့်တင်းမှုကို အရှိန်မြှင့်လိုက်လေသည်။

“ပြီးတော့ ဒီသိုလှောင်ရေးလက်စွပ်က ယွီယဲ့ဂိုဏ်းက အကြီးအကဲဆီက ရလာတာ”

ဝမ့်ယယ်က သိုလှောင်ရေးလက်စွပ်ကို ရွှီနင်အား ကမ်းပေးလိုက်လေသည်။