ကောင်းကင်နယ်ပယ်သို့ ချိုးဖောက်ဝင်ရောက်ခြင်း၊ စစ်မှန်သော နတ်ဘုရားစွမ်းရည်များ (အပိုင်း ၃)

သူ၏ နတ်ဝိညာဉ် အနည်းငယ်လှုပ်ခတ်သွားမှုနှင့်အတူ၊ တောင်ပိုင်းဟုန်ရေပြင်နယ်မြေ တစ်လျှောက်ပြန့်ကျဲနေသော တာအိုပေါင်းစည်းခြင်းနယ်ပယ်အဆင့်ရှိ မဟာနတ်ဆိုးကြီးများ၏ နတ်ဆိုးကျောက်တိုင်ဆယ်ခုကျော်သည် လှုပ်ရှားလာခဲ့ပြီး၊ရေအောက်ရှိခြေရာလက်ရာများကို အပူတပြင်း ရှာဖွေနေကြလေသည်။

မကြာမီတွင်ပင်၊ မျောက်အိုကြီး တစ်ကောင်က သတင်းတစ်ခု ပြန်လည်ပေးပို့လာခဲ့၏။

"သခင်ကို အစီရင်ခံပါတယ်။ ကျွန်တော် ရှာတွေ့ပါပြီ။"

သတင်းစကားကို ကြားလျှင်၊ရှန်းယီသည် ဆက်လက် တုံ့ဆိုင်းမနေတော့ဘဲ၊သူ၏ဘေးရှိ တုနှိုင်းမဲ့ဂိုဏ်း ဂိုဏ်းချုပ်ထံသို့ တိုက်ရိုက်နှုတ်ဆက်လိုက်၏။

"စီနီယာတန်း အရင်ပြန်နှင့်ပါ။ ရှန်းယီ မှာ လုပ်စရာကိစ္စလေးတွေရှိနေလို့ပါ။ ပြီးရင် ချက်ချင်း ပြန်လာခဲ့ပါ့မယ်။"

အကယ်၍ သူသာ ချီ မိသားစု၏ သားအကြီးဆုံးကို အနောက်ပိုင်းဟုန်သို့ ပြန်ခွင့်ပြုလိုက်မည်ဆိုပါက၊ ကောင်းကင်ဘုံနယ်ပယ်အလယ်အလတ်အဆင့်ရှိ အဖော်မဲ့နေသောနဂါးနတ်ဆိုး တစ်ကောင်ကို သူ နောက်ထပ်ရှာတွေ့နိုင်တော့မည် မဟုတ်ပေ။

"အာ။"

တန်းရှန့်ကျွင်း သည် ဘာမှမတုံ့ပြန်နိုင်သေးမီမှာပင်၊အနက်ရောင်ဝတ်စုံနှင့် ပုံရိပ်သည် မြင်ကွင်းမှ ပျောက်ကွယ်သွားသည်ကို မြင်တွေ့လိုက်ရလေသည်။

လွန်ခဲ့သောအခိုက်အတန့်လေးကမှ၊ သူသည် တစ်ဖက်လူ၏ တည်ငြိမ်မှုကို စိတ်ထဲမှချီးကျူးနေခဲ့သော်လည်း၊ယခုအခါတွင်မူ သူသည် တာအိုချပ်ပြားကို ခါးသီးသောအမူအရာဖြင့် ကိုင်ဆောင်ထားရင်း ခပ်တိုးတိုးရေရွတ်နေရတော့သည်။

"အနည်းဆုံးတော့ ဒါလေးကိုတော့ ယူသွားပါလား။"

တန်းရှန့်ကျွင်း သည် အမှန်တကယ်ပင် နားမလည်နိုင်အောင်ဖြစ်နေမိသည်။ အေးစိမ့်တောင် ဘိုးဘေး ပင်လျှင် ဤနေရာတွင်သေဆုံးသွားခဲ့ပြီဖြစ်ရာ၊ ယခုလိုအချိန်မျိုးတွင် သူတို့၏ ဂိုဏ်းချုပ်ရှန်းကို ရန်စဝံ့လောက်အောင် မည်သူကများ မျက်စိကန်းနေသနည်းဟု သူတွေးတောနေမိသည်။

တောင်ပိုင်းဟုန် ရေပြင်နယ်မြေအတွင်း၌၊ ပုံရိပ်နှစ်ခုသည် လျင်မြန်စွာရှေ့သို့ပြေးလွှားနေကြပြီး၊ အနောက်ပိုင်းဟုန်ဆီသို့ အလျင်စလို ဦးတည်နေကြ၏။

"ညီအစ်ကို ခယ်၊အရင်က ကျွန်တော်တို့ကြားထဲမှာ နားလည်မှုလွဲတာတွေ အများကြီးရှိခဲ့တယ်။ ကျွန်တော်က ဘာကိုမှဖုံးကွယ်မထားဘဲ ပွင့်ပွင့်လင်းလင်းပြောတတ်တဲ့သူမို့၊ ရင်ထဲ မထားပါနဲ့။"

ချီကျောက်ယီ သည် သက်ပြင်းချလိုက်ပြီး ရုတ်တရက်တိတ်ဆိတ်မှုကို ဖြိုခွဲကာစကားပြောလိုက်သည်။

"မင်း ရယ်ချင်တယ်ဆိုရင်လည်း ပွင့်ပွင့်လင်းလင်းသာရယ်လိုက်ပါ၊ ဖုံးကွယ်ထားစရာ မလိုပါဘူး။"

ခယ်မိသားစု အိမ်ရှေ့မင်းသား က သူ့ကို သရော်လှောင်ပြောင်လိုသောအမူအရာဖြင့် တစ်ချက် ကြည့်လိုက်သည်။ ယခုအခါ သူသည် သူ၏ ဖခင်ရောသားတော်ခုနစ်ပါးကိုပါ စော်ကားမိသွားပြီ ဖြစ်ရာ၊တောင်ပိုင်းဟုန် တွင် သူ နေထိုင်စရာနေရာ မရှိတော့သဖြင့် ခိုလှုံရာအသစ်တစ်ခုကို ချက်ချင်း ရှာဖွေရတော့မည်။

ချီကျောက်ယီ အနေဖြင့်မူ၊ သူသည် နတ်ဆိုးစစ်သည်အများအပြားကို ဆုံးရှုံးခဲ့ရပြီး မျက်နှာပျက်ခဲ့ရသော်လည်း၊နောက်ဆုတ်ရန် လမ်းမရှိတော့သည့် ကောင်းကင်ဘုံနယ်ပယ် အလယ်အလတ်အဆင့် ကျွမ်းကျင်သူတစ်ဦး၏ ကူညီမှုကိုရရှိခဲ့ပြီဖြစ်ရာ၊ သူသည် အလွန်ပင် ပျော်ရွှင်နေမိပေသည်။

"မင်းက ဒီလောက်တည့်တိုးကြီးပြောလာမှတော့၊ ငါလည်း ပွင့်ပွင့်လင်းလင်းပဲပြောပါတော့မယ်။"

သူ၏ အတွေးများကို ထောက်ပြခံလိုက်ရသော်လည်း ချီကျောက်ယီ သည် ဒေါသမထွက်ခဲ့ပေ။

"တောင်ပိုင်း နဂါးနန်းတော်မှာ မင်းရဲ့ အခြေခံက အရမ်းအားနည်းလွန်းတယ်။ ဒါက မင်းအဖေ အရမ်းသတ္တိကြောင်လွန်းလို့ပဲ။ ငှက်တွေတောင် ချေးလှည့်မပါချင်တဲ့ ဒီလိုခေါင်ဖျားတဲ့ နေရာမှာ တကယ်တမ်းတိုက်ခိုက်လုယူစရာ ဘာမှမရှိပါဘူး။"

သူက အေးစက်စက် ရယ်မောလိုက်ပြီး "အခု ငါ့အဖေနိုးထလာပြီဆိုတော့၊အရှေ့ဘက်က မိန်းမက သေချာပေါက်အတော်လေး ချုပ်ထိန်းနေရတော့မှာ။မင်း ငါ့ကို ကူညီဖို့ဆန္ဒရှိနေသရွေ့၊ ငါ အိမ်ရှေ့မင်းသားနေရာကို ရောက်ပြီး အနောက်ပိုင်း နဂါးသိုက်ထဲကို ဝင်ရောက်နိုင်တဲ့အခါ၊ မင်းက အနောက်ပိုင်းဟုန်ရဲ့ နဂါးဘုရင်တစ်ပိုင်းဖြစ်လာမှာ။မင်း လိုချင်တာ မှန်သမျှ၊ ငါ အကုန် ပေးမယ်။"

"လိုချင်တာ မှန်သမျှအကုန်ပေးမယ်တဲ့လား..." ခယ်မိသားစု အိမ်ရှေ့မင်းသား က အဓိပ္ပာယ်ပါပါဖြင့် လှမ်းကြည့်လိုက်သည်။

"အဲဒါက ကျစ်ရှန်း ဆိုရင်တောင်ပေးမှာပဲပေါ့။"

၎င်းကို ကြားသောအခါ၊ ချီကျောက်ယီ သည် ခဏမျှမှင်တက်သွားပြီးနောက်၊ရက်စက်သော အပြုံးတစ်ခုဖြင့် အံကိုကြိတ်လိုက်၏။

"သေချာတာပေါ့... သူမ တင်မကဘူး၊ တောင်ပိုင်းဟုန်မှာ မင်း ခံစားခဲ့ရတဲ့မကျေနပ်ချက်တွေ အတွက်တောင် ငါ မင်းအတွက်ကလဲ့စားချေပေးမယ်။"

"ရှန်း ဆိုတဲ့ကောင်က မင်းတို့ရဲ့ တောင်ပိုင်းဟုန် မှာသာ တစ်ခုခုအရာရောက်တာပါ။ ဒီ စွန့်ပစ်ခံ နေရာရဲ့အပြင်ဘက်မှာ သူက ဘာမှမဟုတ်ပါဘူး။ သူ အပြင်ကိုတောင်ထွက်ကြည့်ရဲမှာ မဟုတ်ဘူး။"

"အခြေအနေကတော့၊မင်း ငါ့အတွက် စိတ်ရောကိုယ်ပါတကယ်ပေးဆပ်ပြီး တိုက်ခိုက်ပေးရမယ်။"

ချီကျောက်ယီ က သူ့ကို အလေးအနက်ကြည့်ရင်း ပြောလိုက်သည်။

"..."

ခယ်မိသားစု အိမ်ရှေ့မင်းသားသည် ခဏမျှ တိတ်ဆိတ်သွားပြီးနောက်၊ ပေါ့ပေါ့ပါးပါး ပြုံးလိုက်၏။

"ငါ နောက်နေတာပါ။ အတည် မမှတ်ပါနဲ့။"

ဤ ချီ မိသားစု၏ သားအကြီးဆုံးသည်၊ အစစ်အမှန်အရည်အချင်းမရှိသော်လည်း ရည်မှန်းချက်တွေကတော့ အပြည့်ပင်။

သို့သော်လည်း၊ ထိုကဲ့သို့သော တည်ရှိမှုမျိုးကပင် သူ့အပေါ် အားကိုးရန်လိုအပ်နေခြင်းဖြစ်သည်။ မည်သို့ပင်ဆိုစေ၊ အနောက်ပိုင်း နဂါးနန်းတော် တွင်၊မျက်စိ ပါသူတိုင်းသည် ဤကဲ့သို့သော အရှုံးသမားကို လိုလိုလားလားနောက်မှ လိုက်ချင်ကြမည် မဟုတ်ပေ။

သေချာသည်မှာ၊ ချီကျောက်ယီ သည် သူ့အတွက် ကလဲ့စားချေပေးနိုင်မည်ဟု သူ မယုံကြည်ပေ။ သို့သော် အနောက်ပိုင်းဟုန်ကို ယာယီ ခိုလှုံရာအဖြစ်အသုံးပြုခြင်းနှင့် အနာဂတ်တွင် မြောက်ပိုင်းဟုန်သို့ ပြောင်းရွှေ့ရန်ခြေကုပ်ယူခြင်းမှာ မဆိုးလှသောရွေးချယ်မှု တစ်ခုပင်။

ယခုအတွက်တော့၊ ဦးစွာအနောက်ပိုင်းဟုန် သို့ သွားရမည်။

ခယ်မိသားစု အိမ်ရှေ့မင်းသားသည် ရှေ့သို့ကြည့်ရန်မျက်လုံးများကို ပင့်လိုက်ရာ၊ ရတနာပန်းပွင့်ဂိုဏ်း၏ ပုံရိပ်ကို ဝိုးတဝါးမြင်တွေ့နိုင်နေပြီ ဖြစ်သည်။

၎င်းကို ဖြတ်ကျော်ပြီးပါက၊ သူသည် သူ၏ ရင်ထဲရှိမကျေနပ်ချက်များကို နောက်ဆုံးတွင် စွန့်လွှတ်နိုင်တော့မည်။

ကမ္ဘာကြီးမှာ အလွန်ကျယ်ဝန်းလှပေသည်။ သူသည် တစ်ကြိမ်သာရှုံးနိမ့်ခဲ့သေးပြီး၊ အခြေအနေကိုပြောင်းပြန်လှန်ပစ်ရန် အခွင့်အရေးများစွာ ရှိနေသေး၏။

'ရှန်းမျိုးနွယ်၊ မင်း ဒီဘုရင်ကိုစောင့်နေလိုက်စမ်းပါ။'