မြောက်ပိုင်းဟုန်မှ ဧည့်သည်

"မင်းရဲ့သမီးတစ်ပါး ကောင်းကင်ဘုံမှာရှိနေတာနဲ့တင် မင်းလုပ်ချင်တာအကုန်လုပ်လို့ရပြီလို့ တကယ် ထင်နေတာလား။ ကျစ်လင်က မင်းကို သူ့အဖေအဖြစ်အသိအမှတ်ပြုရဲ့လားဆိုတာတောင် မင်းကိုယ်တိုင် မသိသေးဘဲနဲ့"

အနောက်ပိုင်း နဂါးဘုရင်သည် အေးစက်စွာ လှောင်ပြောင်လိုက်၏။

ယခုတစ်ကြိမ် တောင်ပိုင်းဟုန်ကို ထိုးစစ်ဆင်ခြင်းမှာ အဝေးမှနေ၍လက်ထပ်ဝင်ရောက်လာသော ခရမ်းရောင်မုတ်ဆိတ်နဂါးဖြူအတွက် သတိပေးချက် အသေးစားလေးတစ်ခု ပေးရန်လည်း ရည်ရွယ်ထားလေသည်။

အနာဂတ်တွင် သူမသည် အရှေ့ပိုင်းနဂါးနန်းတော်၏ မျက်နှာကို ထောက်ထားပြီး ပိုမို နာခံတတ်လာကောင်း နာခံတတ်လာနိုင်ပေသည်။ အကယ်၍ သူမကို တိုက်ရိုက်ပစ်မှတ်မထားလျှင်ပင်၊ သူမ တန်ဖိုးထားသောအရာများကို ဝင်ရောက် စွက်ဖက်နိုင်သေး၏။

"အားလုံး ပြန်ကြတော့၊ တောင်ဘက်ကို အချိန်မရွေးချီတက်ဖို့ အသင့်ပြင်ထားကြ"

"နတ်ဆိုးတစ်သောင်းခန်းမလည်း ကိုယ့်ကိုယ်ကိုယ် ထုတ်ဖော်ဖို့ အချိန်တန်လောက်ပြီ"

အနောက်ပိုင်း နဂါးဘုရင်သည် လက်ချောင်းများကို ချိုးလိုက်ရင်းတွက်ချက်လိုက်လေသည်။ တောင်ပိုင်းဟုန်ရှိ ကျင့်ကြံသူများ၏ စွမ်းအားကို သူ၏ ခန့်မှန်းချက်အရ၊သူ လွှတ်လိုက်သော မဟာနတ်ဆိုးကြီးများသည် ယခုအချိန်တွင် အတော်အတန် ရုတ်ရုတ်သဲသဲဖြစ်အောင် လုပ်ဆောင်ပြီးလောက်လေပြီဖြစ်၏။

သူသည် ကျောက်ယီထံမှ သတင်းကိုသာ စောင့်မျှော်နေခြင်း ဖြစ်ပါသည်။ ထိုအချိန်ကျမှ အနောက်ပိုင်းဟုန်အရှင်သခင်၏ ကျော်ကြားမှုကို မည်သည့်အရာဖြင့် တည်ဆောက်ခဲ့သနည်း ဆိုသည်ကို နတ်ဆိုးတစ်သောင်းခန်းမအား သူ ပြသပေမည်။

ထိုအချိန်မှာပင်

အနောက်ပိုင်း နဂါးဘုရင်သည် ရုတ်တရက် တောင့်တင်းသွားပြီး၊အလျင်အမြန် မတ်တပ်ရပ်ကာ မြောက်ဘက်သို့လှမ်းကြည့်လိုက်၏။

ကောင်းကင်ဘုံနယ်ပယ် ပြီးပြည့်စုံခြင်းအဆင့်သို့ ရောက်ရှိနေသော မဟာနတ်ဆိုးကြီးတစ်ပါးအနေဖြင့်၊ ဤကုန်းမြေနှင့်ရေပြင်အပေါ် သူ၏ ထိန်းချုပ်နိုင်စွမ်းမှာ အခြားသူများ၏ မျှော်လင့်ချက်များထက်များစွာ သာလွန်လေသည်။

သူသည် အသေးအဖွဲအပြောင်းအလဲလေးများကိုပင်ကြိုတင် အာရုံခံနိုင်စွမ်း ရှိလေ၏။

ယခုအရာမှာမူ အသေးအဖွဲ အပြောင်းအလဲလေးတစ်ခုမျှသာ မဟုတ်ချေ။

အနောက်ပိုင်းဟုန်သို့ ဝင်ရောက်လာသောများပြားလှသည့် အရှိန်အဝါများက သူ့ကိုပင် ရင်ခုန်မြန်စေခဲ့လေသည်။

အဘယ်ကြောင့် မြောက်ဘက်မှ သွေးဆာနေတဲ့ နတ်ဘုရားများက တောင်ဘက်ကို ရုတ်တရက် ဦးတည်လာရသနည်း။

နဂါးသားတော်လေးပါးသည် ၎င်းတို့ ဖခင်၏ ပုံမှန်မဟုတ်သော အမူအရာကို သတိထားမိလိုက်ကြပြီး၊သူ၏ အကြည့်အတိုင်း အလျင်အမြန် မော့ကြည့်လိုက်ကြလေသည်။

နောက်တစ်ခဏတွင် နဂါးဘုရင်နန်းတော်အတွင်း၌ မောက်မာဝင့်ကြွားသော အသံတစ်ခု ပဲ့တင်ထပ်သွားခဲ့၏။

"မျက်စိမှိတ်ထားကြ၊ပါးစပ်ပိတ်ထားကြ၊ မကြည့်သင့်တာကို မကြည့်နဲ့၊ မမေးသင့်တာကို မမေးနဲ့"

ထိုအရှိန်အဝါများသည် ညှိနှိုင်းရန်အခွင့်အရေးပင်မပေးဘဲ အနောက်ပိုင်းဟုန်၏ ပိုင်နက်အတွင်းသို့ ဝင်ရောက်လာကာ၊ ထိုနယ်မြေ၏ အရှင်သခင်ကိုပင် အမိန့်ပေးလျက်ရှိလေသည်။

ထိုကဲ့သို့သော လုပ်ရပ်မျိုးကို မည်သူကမျှသည်းခံနိုင်မည် မဟုတ်ချေ။

သို့သော် အနောက်ပိုင်း နဂါးဘုရင်သည် တစ်ခဏမျှသာ စဉ်းစားပြီးနောက် သူ၏ အကြည့်ကို အမှန်တကယ်ပင်လွှဲဖယ်လိုက်ကာ၊ ဘာမှ မမြင်ရသကဲ့သို့ ပလ္လင်ပေါ်တွင် ပြန်လည်ထိုင်ချလိုက်၏။

ထိုစွမ်းအားစု နှစ်ခုကို စေလွှတ်လိုက်သော အင်အားစုများနှင့် ၎င်းတို့လိုက်နာသောအမိန့်များကို မစဉ်းစားဘဲနှင့်ပင် ရှင်းလင်းစွာသိမြင်နိုင်ပေသည်။

သူ မည်မျှပင် သိချင်စိတ် ပြင်းပြနေပါစေ၊ နောက်ထပ်မေးခွန်းများ မေးရန် မဝံ့ရဲတော့ချေ။

တစ်ချိန်တည်းမှာပင်

အနောက်ပိုင်းဟုန် ကောင်းကင်ယံ၏ အခြားတစ်နေရာ၊ လည်ပတ်နေသော တိမ်တိုက်များနှင့် မြူခိုးများကြားတွင်၊ဧရာမ အနက်ရောင်အရိပ်ကြီးတစ်ခုသည် ခန့်မှန်းရခက်စွာလူးလွန့်နေပြီး၊ တစ်ခါတစ်ရံ မြင်တွေ့ရသောထက်ရှလှသည့် နဂါးလက်သည်းများသည် ကောင်းကင်အမိုးခုံးကြီးကိုပင် ဆွဲဖြဲပစ်နိုင်စွမ်းရှိပုံရလေ၏။

ထိုအရိပ်ကြီး၏ ဘေးတွင်၊လက်နှစ်ဖက်ကို နောက်ပစ်ထားလျက်ခမ်းနားထည်ဝါသော ပန်းထိုးဝတ်ရုံများကို ဆင်မြန်းထားသည့် လူရိပ်သုံးခု ရပ်နေလေသည်။

ရှေ့တွင်ရှိသော အမျိုးသားနှစ်ဦးမှာ အသက်ကြီးရင့်သူများ ဖြစ်ကြပြီး၊ဖုံးကွယ်ထားသော်လည်း ငြင်းပယ်၍မရနိုင်သောမြင့်မြတ်ခြင်းကို ထုတ်ဖော်ပြသနေကြလေသည်။

၎င်းတို့အနက် တစ်ဦးမှာ အနောက်ပိုင်းနဂါးနန်းတော်ကို ယခင်က သတိပေးခဲ့သူပင်။

၎င်းတို့၏ နောက်တွင်၊ တူညီသောခမ်းနားသည့် ဝတ်စုံဟန်ပန်ကိုဆင်မြန်းထားသော အရပ်ရှည်ရှည်နှင့် ချောမောသော လူငယ်တစ်ဦး ရှိနေပြီး၊သူ၏ အသွင်အပြင်မှာ ထက်ရှပြီးတက်ကြွမှု ရှိနေပုံပေါ်လေသည်။

"သခင်ရွှယ် ၊ မြောက်ပိုင်းဟုန်ကနေ ပထမဆုံး ထွက်လာရတဲ့ ခံစားချက်က ဘယ်လိုနေလဲ" ဟု ၎င်းတို့အနက်မှ တစ်ဦးက မေးမြန်းလိုက်လေသည်။

ထိုစကားကို ကြားသောအခါလူငယ်သည် အောက်ဘက်ရှိ ကုန်းမြေနှင့်ရေပြင်ကို ပေါ့ပေါ့ပါးပါး ကြည့်ရှုလိုက်၏။

"ကျွန်တော်က အထူးအဆန်းလေးတွေ တွေ့ရမလားလို့လာခဲ့တာ၊ဒါပေမဲ့ သိပ်ပြီး စိတ်ဝင်စားစရာ မကောင်းလှပါဘူး" ဟု လျစ်လျူရှုဟန်ဖြင့် ပြောလိုက်လေသည်။

အသက်ကြီးသူနှစ်ဦးက တိတ်ဆိတ်စွာပြုံးလိုက်ကြလေ၏။ ဤလူငယ်သည် မြို့လေးမြို့ကိုဖွင့်လှစ်ခဲ့ပြီး၊ မသေမျိုးနိယာမများကို ကျင့်ကြံခဲ့ကာ၊ ရတနာမြေတစ်ခုကိုပင် တာဝန်ယူ အုပ်ချုပ်နေသူ ဖြစ်လေသည်။

သူ၏ ကျော်ကြားမှုသည် ဟုန်လေးမျက်နှာစလုံးတွင် ပျံ့နှံ့လျက်ရှိနေ၏။ သူသည် လူငယ်များ၏ ဟန်ပန်မျိုးရှိသည်ဖြစ်ရာ၊ အနည်းငယ် မောက်မာနေခြင်းမှာ မျှော်လင့်ထားပြီးသားဖြစ်လေသည်။

မည်သို့ပင်ဆိုစေကာမူ သူ ပြောခဲ့သည်များမှာ အမှန်တရားပင်။

မြောက်ပိုင်းကို ဖယ်ထားလျှင်၊ အရှေ့ပိုင်းဟုန်သည် အနည်းငယ်စိတ်ဝင်စားစရာ ကောင်းနိုင်သော်လည်း၊ကျန်ရှိသော ဟုန်နှစ်ခုမှာမူ... ၎င်းတို့သည် မသေမျိုးများက မေ့လျော့ထားသော နယ်မြေများ ဖြစ်ကြပြီး၊ မည်သည့် စိတ်ဝင်စားမှုကိုမျှနှိုးဆွနိုင်စွမ်းမရှိကြချေ။

"ဒီကိစ္စကို လောလောဆယ်ဒီမှာပဲ ထားလိုက်ရအောင်။လိုက်နာရမယ့် အမိန့်တွေ ရှိနေသေးတယ်။ ကမ္မကုသိုလ်မသေမျိုးကို မြောက်ပိုင်းဟုန်ဆီ လုံခြုံစွာပြန်ပို့ပြီးတာနဲ့၊ ဂိုဏ်းချုပ် စစ်ထူရဲ့ သဲလွန်စကိုစုံစမ်းဖို့အတွက် ကျုပ်တို့သေချာပေါက်ပြန်လာခဲ့မယ်။ အဲ့ဒီအချိန်ကျရင် သခင်ရွှယ်၊ မင်းပိုပြီး အနီးကပ်လေ့လာကြည့်နိုင်မှာပါ၊ တော်တော်လေးစိတ်ဝင်စားစရာကောင်းတာ တစ်ခုခုကို တွေ့ကောင်း တွေ့နိုင်တယ်လေ"

၎င်းတို့၏ စကားဝိုင်းတွင် စိုးရိမ်ပူပန်မှုကင်းမဲ့နေလေ၏။

စစ်ထူကျွင်းလွှေ့ သည် ပြဿနာတစ်ခုခုနှင့် ရင်ဆိုင်နေရသည်မှာ သေချာသော်လည်း၊ သူ၏ အသက်အန္တရာယ်ကို ခြိမ်းခြောက်နိုင်ဖွယ်မရှိဟု ၎င်းတို့က ယုံကြည်ထားကြလေသည်။

၎င်းမှာ အနန္တတာအိုအင်ပါယာဂိုဏ်းတွင် အမွေအနှစ် အတော်လေးနည်းပါးသော ဂိုဏ်းချုပ်များထဲမှ တစ်ဦးဖြစ်သော်ငြားလည်း၊ မြေကမ္ဘာနယ်ပယ်တွင် သူ၏ အငြင်းပွားဖွယ်မရှိသော ခွန်အားမှာတော့ အစစ်အမှန်ပင်။

ကောင်းကင်ဘုံနယ်ပယ် ကျွမ်းကျင်သူတစ်ဦးနှင့် ရင်ဆိုင်ရလျှင်ပင်၊ အနန္တတာအိုအင်ပါယာဂိုဏ်း၏ နည်းလမ်းများဖြင့် သူသည် အနည်းဆုံး သူ၏ အသက်ရှင်သန်ရာလမ်းကြောင်းကို သေချာအောင် လုပ်ဆောင်နိုင်ပေသည်။

သို့သော် ထိုကဲ့သို့သော ခွန်အားကို အမှန်တကယ် ပိုင်ဆိုင်ထားသူများမှာလည်း သတ္တိများနည်းပါးကြလေသည်။ အနန္တတာအိုအင်ပါယာဂိုဏ်းဟူသော အမည်နာမသည် မိုးထိအောင်မြင့်မားသော တောင်ကြီးတစ်လုံးကဲ့သို့ ဖြစ်နေပြီး၊ တောတောင်ထဲမှ မည်သည့် ကျင့်ကြံသူ၏ ကျောရိုးကိုမဆို ချိုးနှိမ်ပစ်ရန် လုံလောက်လေသည်။

...

တောင်ပိုင်းဟုန်၊ နန်ယန် ရတနာမြေ

သူ၏ ဂိုဏ်းသို့ပြန်ရောက်ပြီးနောက်၊ ရှန်းယီ သည် တောင်ထိပ်ပေါ်ရှိခန်းမကြီးသို့ သွားရောက်ခဲ့လေ၏။

သူ၏ရှေ့တွင်တိတ်ဆိတ်စွာရှိနေသော ခန်းမခွဲသခင်များကို ကိုယ်စားပြုသည့် ကျောက်ရုပ်သုံးတုံးအား စိုက်ကြည့်လိုက်လေသည်။

ခယ်ရှစ်စန်း သည် အလွန်အမင်းစိတ်လှုပ်ရှားနေသဖြင့် သူ၏ ပခုံးများပင် တုန်ရီနေလေ၏။ သူ၏ သခင် မည်သည့်အတွက်ကြောင့် ယခုတစ်ကြိမ် ထွက်ခွာသွားသည်ကို သူသိရှိပြီး၊ တောင်ပိုင်းဟုန် တစ်ခုလုံးကို သက်ရောက်မှုရှိစေခဲ့သော ကောင်းကင်ဖြစ်စဉ်ကို နန်ယန်ရတနာမြေ အတွင်းမှပင် အာရုံခံသိရှိနိုင်ပါသည်။

အဘိုးကြီး ခယ်သတ္တမအပြီးတွင်၊ သူသည် နောက်ဆုံး၌ မိမိ၏ကိုယ်ပိုင်မျိုးနွယ်စုနှင့် တွေ့ဆုံခွင့်ရရှိခဲ့ပြီ ဖြစ်လေသည်။

ထို့အပြင် ရောက်ရှိလာသူမှာ အိမ်ရှေ့မင်းသားဖြစ်ပြီး၊အလွန် အရေးပါသော ပုဂ္ဂိုလ်တစ်ဦးပင်။

အိမ်ရှေ့မင်းသားနှင့် ချီကျောက်ယီတို့ကို ဝါးမြိုပြီးနောက် မည်သည့် အဆင့်များအထိ ရောက်ရှိနိုင်မည်ကို သူ မတွေးဝံ့အောင်ပင် ဖြစ်နေလေသည်။

ဖြစ်နိုင်သည်မှာ၊ သူသည် သူ၏ အဘိုးနှင့် တန်းတူ မဟာနတ်ဆိုးကြီးတစ်ပါး ဖြစ်လာရန် အခွင့်အရေး ရရှိနိုင်၏။

ထိုစဉ် ရှန်းယီကလည်း သူ့ကို ထပ်မံ စောင့်ဆိုင်းခိုင်းခြင်းမပြုတော့ချေ။

သူသည် နဂါးအလောင်းနှစ်လောင်းကို တိုက်ရိုက် ထုတ်ယူကာ သွေးမြစ်တစ်စင်းအဖြစ် ဖန်တီးလိုက်ပြီး ခယ်ရှစ်စန်း၏ ခန္ဓာကိုယ်အတွင်းသို့ စီးဆင်းဝင်ရောက်စေလိုက်လေသည်။

ယခု ဤအခြေအနေတွင်၊ စက္ကန့်တိုင်းသည် အရေးပါပြီး၊ခွန်အား အနည်းငယ်မြင့်တက်လာခြင်းတိုင်းသည် တောင်ပိုင်းနဂါးဘုရင်ကို အောင်မြင်စွာ သတ်ဖြတ်နိုင်မည့်အလားအလာကို တိုးပွားစေနိုင်၏။

အကယ်၍ ယခုတစ်ကြိမ် တစ်စုံတစ်ခုမှားယွင်းသွားခဲ့ပါက၊ နန်ယန်ရတနာမြေမှ ထွက်ခွာလာပြီးကတည်းက သူ လုပ်ဆောင်ခဲ့သမျှ အရာအားလုံးသည် အချည်းနှီးဖြစ်သွားမည်ဖြစ်ပြီး လုံးဝ အဓိပ္ပာယ်မဲ့သွားမည်ဟု ဆိုနိုင်ပေသည်။

"လာစမ်းပါ... ငါ့ကို ခွန်အားနည်းနည်းလောက် ထုတ်ပြလိုက်စမ်းပါ"

ရှန်းယီသည် အချိန်အတော်ကြာပျောက်ဆုံးနေခဲ့သောတင်းမာမှုမျိုးကို နောက်တစ်ကြိမ် ခံစားလိုက်ရ၏။

မည်သို့ပင်ဆိုစေကာမူ၊ ကောင်းကင်ဘုံနယ်ပယ်၏ အလယ်အလတ်အဆင့်နှင့် နှောင်းပိုင်းအဆင့်ကြားရှိ ကွာဟချက်မှာ အလွန်ကြီးမားလှပေသည်။

ထို့အပြင်၊ ချီကျောက်ယီသည် ကျောက်စိမ်းဦးချို ငွေရောင်နဂါး တစ်ကောင်ဖြစ်သောကြောင့်၊ သူ၏ သွေးမျိုးဆက်မှာ အတော်လေးအားနည်းချက်ရှိလာပေလိမ့်မည်။

အလောင်းနှစ်လောင်းကို ပေါင်းစပ်လိုက်လျှင်ပင်၊ ခယ်ရှစ်စန်းကို ဤအတားအဆီးအားကျော်လွှားနိုင်ရန် သေချာပေါက်ကူညီနိုင်မည် မဟုတ်ချေ။

ဖြစ်နိုင်သည်မှာ ဤနဂါးနတ်ဆိုး နှစ်ပါးစလုံးသည် တူညီသောအဆင့်အတွင်း ၎င်းတို့၏ ရွယ်တူများကြားတွင် ထူးချွန်ကြပြီး၊ သန့်စင်ဆုံးသွေးမျိုးဆက်ကိုအမွေဆက်ခံထားသော သားအကြီးဆုံးများဖြစ်သောကြောင့်လည်း ဖြစ်နိုင်ပေသည်။

လုပ်ငန်းစဉ်မှာ ရှန်းယီ မျှော်လင့်ထားသည်ထက် များစွာ ပို၍ချောမွေ့နေခဲ့လေသည်။

သွေးမြစ်က သူ၏ ကိုယ်တွင်းသို့ စီးဝင်သွားသည့် အခိုက်အတန့်တွင်၊ခယ်ရှစ်စန်း၏ ခန္ဓာကိုယ်သည် ထိန်းမနိုင်သိမ်းမရ တုန်ခါလာ၏။

သူ၏ ရွှေရောင် အကြေးခွံများမှေးမှိန်သွားကာ သူ၏ ကျောက်တုံးသဘာဝကို ဖော်ပြလာလေသည်။ ကျောက်တုံးအရေခွံများ ကွာကျသွားသည်နှင့်အမျှ၊ သူသည် အဝါရောင်အဆိပ်နဂါးတူညီမှု နည်းပါးလာပြီး၊ ရှန်းယီ သိရှိထားသည့် လက်သည်းငါးခု အစစ်အမှန်နဂါးနှင့် ပို၍တူညီလာလေသည်။

ကြွယ်ဝလှသော ထိုသွေးမျိုးဆက်စွမ်းအားမှ ဆွဲဆောင်မှုရှိသော ရနံ့တစ်ခုထွက်ပေါ်လာလေ၏။

ခယ်ရှစ်စန်း၏ ပုံသဏ္ဍာန်သည် ကြီးထွားလာစပြုပြီး၊လူသားပုံစံတွင်ပင် ပေသုံးဆယ်ကျော်အထိ အရပ်မြင့်လာလေသည်။

သူ၏ ပခုံးများမှာ တောင်ကြီးများကဲ့သို့ ကျယ်ပြန့်ပြီး၊သူ၏ အဘိုးကိုပင် ကျော်လွန်သွားသော ခန့်ညားထည်ဝါသည့် ကိုယ်လုံးကိုယ်ပေါက်ရှိလာပါသည်။

"ဟူး"

ရှန်ယီသည် နတ်ဆိုးမူလများကို စုစည်းကာ အရှေ့ပိုင်းခန်းမခွဲသခင်အား သူ၏ နတ်ဆိုးဝိညာဉ်ကို တည်ငြိမ်စေရန်၊ဤခန္ဓာကိုယ်သစ်ကို တဖြည်းဖြည်းထိန်းချုပ်နိုင်လာစေရန်နှင့် သူ၏ အရှိန်အဝါကို ပိုမိုကောင်းမွန်စွာဖုံးကွယ်နိုင်စေရန် ကူညီသည့်အနေဖြင့် ကျွေးမွေးလိုက်လေသည်။

ဤအရာသည် သူ၏ ဝှက်ဖဲဖြစ်ရာ၊ တတ်နိုင်လျှင် ထုတ်ဖော်မပြသခြင်းက အကောင်းဆုံးဖြစ်ပေလိမ့်မည်။

နောက်ဆုံးတွင်၊ ခယ်ရှစ်စန်း မျက်လုံးဖွင့်လိုက်ရာ ကြောက်မက်ဖွယ်ကောင်းသောအလင်းတန်းများက ထိုမျက်လုံးများအတွင်း၌ လျှံတက်လာလေသည်။

သူသည် တရားထိုင်နေသောပုံစံဖြင့် ဆက်လက် ထိုင်နေပြီး၊ အခြားသူများအမြင်တွင်မူ တောင်ပိုင်း နဂါးဘုရင်၏ အရှိန်အဝါ အနည်းငယ်ကို ပိုင်ဆိုင်ထားပုံပေါ်လေသည်။

ကောင်းကင်ဘုံနယ်ပယ် နှောင်းပိုင်းအဆင့်

ရှန်းယီသည် အလောတကြီးဝမ်းသာအားရ မဖြစ်သေးဘဲ သေချာစွာစောင့်ကြည့်နေလိုက်လေသည်။

ခဏအကြာတွင် သူသည် တိုးညှင်းစွာ သက်ပြင်းချလိုက်၏။

၎င်းတို့သည် တူညီသောအဆင့်တွင် ရှိနေသော်ငြားလည်း၊ တောင်ပိုင်း နဂါးဘုရင်သည် သိသာထင်ရှားစွာပင်များစွာ ပိုမိုနက်ရှိုင်းသော အခြေခံအုတ်မြစ် ရှိလေသည်။

စီနီယာယဲ့ နှင့် နှိုင်းယှဉ်လျှင်ပင် သူသည် အားနည်းနေသေး၏။

လုံလောက်အောင် မတည်ငြိမ်သေးပေ။

မည်သို့ပင်ဆိုစေကာမူ၊ ရှန်းယီ လိုအပ်သည်မှာ နဂါးဘုရင်အိုကြီးအား ကျော်လွန်ရန်သို့မဟုတ် ဖိနှိပ်ရန် မဟုတ်ဘဲ၊ ရုတ်ရုတ်သဲသဲသိပ်မဖြစ်စေဘဲ သို့မဟုတ် သတင်းများမပေါက်ကြားစေဘဲ သူ့ကို သတ်ဖြတ်ရန် ဖြစ်လေသည်။

"ကိုယ့်ဘာသာကိုယနည်းလမ်းတစ်ခု စဉ်းစားရတော့မယ်"

ရှန်းယီသည် ခယ်ရှစ်စန်းကို နတ်ဆိုးဖိနှိပ်ကျောက်တုံး အဖြစ်ပြန်လည်ပြောင်းလဲကာ သူ၏ နေရာတွင် ဝင်ထိုင်ရန်လက်ဟန်ပြလိုက်ပြီး၊ ထို့နောက် ခန်းမကြီး၏ အလယ်ဗဟိုရှိဖျာပေါ်တွင် ဝင်ထိုင်လိုက်လေသည်။

သူ၏ လက်ရှိ ခွန်အားသည် ကောင်းကင်ဘုံနယ်ပယ် အလယ်အလတ်အဆင့်နှင့် ညီမျှသော်လည်း၊ရှန်းယွဲ့ကျန်းချင်းထျန်းဖြစ်စေ သို့မဟုတ် အထွတ်အထိပ် မရဏကမ္ဘာဖြစ်စေ၊ နှစ်ခုစလုံးသည် သာမန်နတ်ဘုရားစွမ်းရည်များထက် များစွာ ပိုမို အားကောင်းကြရာ၊ သူ့ကို ကောင်းကင်ဘုံနယ်ပယ် အလယ်အလတ်အဆင့်တွင် ပိုမိုအားကောင်းသူများထဲတွင် ပါဝင်စေပေသည်။

သို့သော်လည်း၊ ကောင်းကင်ဘုံနယ်ပယ် နှောင်းပိုင်းအဆင့်တွင် ရှိနေသူများနှင့် ယှဉ်လျှင်မူ သူသည် အလှမ်းဝေးနေဆဲပင်။

သူ့ကိုယ်သူ ထပ်မံတိုးတက်စေရန်အတွက်၊ နတ်ဘုရားစွမ်းရည် သို့မဟုတ် မသေမျိုးနိယာမအပေါ်တွင်သာ မူတည်နေတော့လေသည်။

ပထမတစ်ခုအတွက်၊ နတ်ဆိုးတစ်သောင်းခန်းမကို ဖြည့်တင်းရန် တာအိုပေါင်းစည်းခြင်းအဆင့်နတ်ဆိုးကျောက်တုံး(တိုင်)များ အမြောက်အမြားလိုအပ်သော်လည်း၊လက်ရှိအချိန်တွင် သင့်လျော်သောအခွင့်အရေးမရှိသည့်အပြင် အချိန်ကလည်း နီးကပ်နေလေပြီဖြစ်၏။

"မသေမျိုးနိယာမ..."

ရှန်းယီသည် စနစ်မျက်နှာပြင်ကို ခေါ်ထုတ်လိုက်ပြီး၊သူ၏ အကြည့်သည် နတ်ဆိုးတစ်သောင်းကပ်ဘေးသွေးနတ်ဘုရားကျင့်စဉ်အပေါ်သို့ ကျရောက်သွားလေသည်။

၎င်းမှာ အနန္တတာအိုအင်ပါယာဂိုဏ်းမှ ယွဲ့ထျန်းကျီရရှိခဲ့သော အစပြုခြင်းအဆင့်ကျင့်စဉ် အပိုင်းအစလေးတစ်ခုသာဖြစ်သည်။ ကျင့်စဉ်၏ ကျန်ရှိနေသောအပိုင်းများကို ရယူရန်အတွက် မြောက်ပိုင်းဟုန်သို့ သေချာပေါက်သွားရောက်ရမည်။

"ဒါပေမဲ့ အဲ့ဒီအတွက် ဘယ်သူ့မှာအချိန်ရှိမှာလဲ"

ရှန်းယီသည် အသက်ပြင်းပြင်းတစ်ချက် ရှူလိုက်လေ၏။ နန်ယန်၏ ဂိုဏ်းချုပ် ဖြစ်လာပြီးကတည်းက၊ ကျင့်ကြံခြင်း ကျင့်စဉ်များအတွက် စိုးရိမ်ပူပန်ခဲ့ရသည်မှာ အချိန်အတော်ကြာခဲ့ပြီ ဖြစ်လေသည်။

ယခုအခါ ရုတ်တရက် နတ်ဆိုးကျင့်ကြံခြင်း ကျင့်စဉ်များကို နောက်တစ်ကြိမ်ပြန်လည် သရုပ်ဖော်ရမည်ဖြစ်၍၊ အနည်းငယ် စိမ်းသက်နေသကဲ့သို့ ခံစားလိုက်ရလေသည်။

သူ၏ အရိုးများအတွင်း ကိန်းအောင်းနေသော နှိပ်စက်ညှဉ်းပန်းမှုများကို အနည်းငယ်ပြန်လည် အမှတ်ရလိုက်ရုံဖြင့် သူ၏ ကျောရိုးတစ်လျှောက်လုံးစိမ့်တက်သွားစေလေသည်။

သူသည် လက်ကိုဆန့်ထုတ်လိုက်ပြီး နတ်ဆိုးပုံဆောင်ခဲတစ်ခုကို ဖန်တီးလိုက်၏။

နတ်ဆိုးသက်တမ်းအနှစ်တစ်ထောင်သာ လိုအပ်သော ဤကဲ့သို့သောအရာမျိုးကို ရှန်းယီ မထိတွေ့ခဲ့သည်မှာ ကြာမြင့်ခဲ့ပြီဖြစ်လေသည်။

သို့သော် ယခုအချိန်တွင်နိုးထလာနိုင်သည့် နတ်ဆိုးဝိညာဉ်များသည် အစပိုင်းက အရာများနှင့် နှိုင်းယှဉ်၍ မရနိုင်တော့ချေ။

သူသည် သူ၏ လက်ဖဝါးကို ငုံ့ကြည့်လိုက်၏။

ဤလက်များပေါ်တွင် စွန်းထင်းနေသော နတ်ဆိုးသွေးများမှာ တာအိုပေါင်းစည်းခြင်းအဆင့်အထက်ရှိသူများကိုသာ ရေတွက်လျှင်ပင်ဂဏန်းနှစ်လုံးဖြင့် ရေတွက်ရလိမ့်မည်။

ထိုအထဲတွင် ခန်းမခွဲသခင်အတော်များများလည်း ပါဝင်ပြီး၊ အားလုံးကို စနစ်မျက်နှာပြင်အတွင်းသို့ လက်ခံရရှိထားပြီး ဖြစ်လေသည်။

[ပထမနှစ်တွင် သင်သည် နတ်ဆိုးတစ်သောင်းကပ်ဘေးသွေးနတ်ဘုရားကျင့်စဉ်၏ အပိုင်းအစကို ဖွင့်လှစ်ခဲ့ပြီး နတ်ဆိုးပုံဆောင်ခဲတစ်ခုကို ပေါ့ပေါ့ပါးပါးစားသုံးလိုက်ရာ၊အိပ်ပျော်နေသော နတ်ဆိုးဝိညာဉ်အကြွင်းအကျန်များ၏ နိုးထလာမှုကို နှိုးဆွပေးခဲ့သည်...]

များပြားလှသော နတ်ဆိုးသက်တမ်းကို သူ၏ ကိုယ်တွင်းသို့ လောင်းထည့်လိုက်သည်နှင့်အမျှ၊

ရုတ်တရက် ရှန်းယီ၏ ပတ်ပတ်လည်တွင် ထောင်သောင်းနှင့်ချီသောနတ်ဆိုးများ၏ ဟိန်းဟောက်သံများ ပဲ့တင်ထပ်သွားခဲ့၏။

၎င်းတို့၏ စုပေါင်းထားသော နာကြည်းချက်များသည် ကောင်းကင်ယံကိုပင် ထိုးဖောက်ထွက်သွားမတတ်ခြိမ်းခြောက်နေလေတော့သည်။