အခန်း (၂၃၈၇-၂၃၈၈)

အပိုင်း(၂၃၈၇)

တစ်ချိန်တည်း၌ စူးခိုင်မင် ၏ ကနဦး ပြင်ဆင်မှုများမှာ အလွန်အမင်း တောက်ပနေခြင်း မရှိဘဲ၊ အထွတ်အထိပ် လျှို့ဝှက်လောက အဆင့်ရှိ မှော်သန့်စင် ဆေးအိုး ခုနစ်လုံးကိုသာ ထုတ်ယူထားခဲ့သည်။ သူမသည် သူမ၏ အဂ္ဂိရတ် ဆေးဖော်စပ်ခြင်း ပုံစံဖြစ်သော လွတ်လပ်သော ပုံစံဖြင့် တိတ်ဆိတ်စွာ လုပ်ဆောင်နေခဲ့၏။ ကောင်းကင်ရှန့်ထို နတ်ဘုရားထုတ်ယူခြင်း နှင့် ကောင်းကင်ရှန့်ထို တန်ခိုးရှင်ကြီးထွားခြင်း တို့နှင့် ခြားနားစွာပင် သူမ၏ နည်းလမ်းများသည် ယေဘုယျ မကျချေ။ သူမသည် နည်းလမ်းတစ်ခုစီတိုင်းတွင် မတူညီသော အဂ္ဂိရတ် အစီအရင်များကို အသုံးပြုရသည်ကို ပိုမို နှစ်သက်လေသည်။

သူမသည် အလွန်ပင် စနစ်တကျ ရှိလှသည်။ အသုံးပြုရမည့် အဂ္ဂိရတ် အစီအရင်များ သို့မဟုတ် ကျင့်စဉ်များကို မရွေးချယ်မီ ပစ္စည်းတစ်ခုစီတိုင်းကို သေချာစွာ လေ့လာဆန်းစစ်ပြီး စောင့်ကြည့်လေ့လာခဲ့၏။ သူမသည် ပစ္စည်းများကို ပထမဆုံး မှော်သန့်စင် ဆေးအိုး ရှေ့သို့ တစ်ခုချင်းစီ ယူဆောင်လာကာ၊ စွမ်းအင်နှင့် အမတေ ကို ထုတ်ယူရန်အတွက် သူမ၏ ကျင့်စဉ်များနှင့် အစီအရင်များကို တည်ငြိမ်စွာ ထုတ်ဖော်လိုက်သည်။

သာမန်အားဖြင့်ဆိုလျှင် ဤအချိန်တွင် အဂ္ဂိရတ် ပညာရှင် တစ်ဦးသည် မိမိ၏ တိုးတက်မှုကို သေချာစွာ ချိတ်ပိတ်ရန်နှင့် အခြား ပစ္စည်းတစ်ခုအပေါ် အာရုံစိုက်နိုင်ရန်အတွက် ပိတ်လှောင်ခြင်း လုပ်ငန်းစဉ်ဆီသို့ အလုအယက် သွားကြမည် ဖြစ်သည်။ သို့သော် သူမကို အဘယ်ကြောင့် ကောင်းကင်ရှန့်ထို အဆုံးမဲ့ပိတ်လှောင်ခြင်း ဟု ခေါ်ဆိုကြကြောင်း စူးခိုင်မင် က သက်သေပြလိုက်လေသည်။ ပထမဆုံး ပစ္စည်းမှ ထုတ်ယူခြင်း ပြီးစီးသွားပြီးနောက်၊ သူမသည် ထိုစွမ်းအင်များနှင့် အမတေ များကို သူမ၏ ရင်ဘတ်ထဲသို့ ဖိသွင်းလိုက်ပြီး သူမ၏ ရင်သားအကွဲကြောင်းအတွင်းသို့ နစ်မြုပ်သွားစေခဲ့သည်။

ထိုမြင်ကွင်းကြောင့် မည်သည့် အဂ္ဂိရတ် ပညာရှင် ကမျှ လိင်ပိုင်းဆိုင်ရာ ဆန္ဒများကို မခံစားခဲ့ရချေ။ ၎င်းအစား စွမ်းအင်နှင့် အမတေ သည် သူမကို မည်သည့် ထိခိုက်မှုမျှ မဖြစ်စေဘဲ သူမ၏ ခန္ဓာကိုယ်အတွင်း၌ အချိန်မတိုင်မီ ပိတ်လှောင်ထားနိုင်ခြင်းကြောင့် အံ့အားသင့်သွားခဲ့ကြလေသည်။ စွမ်းအင်နှင့် အမတေ ကို နေရာချထားသော နေရာတွင် သူမ၏ ရင်ဘတ်ထက်၌ သေးငယ်သော သင်္ကေတတစ်ခု ပေါ်ထွက်လာခဲ့လေသည်။

သူမသည် ဂရုတစိုက်ဖြင့် လေကို ပြင်းပြင်းရှူသွင်းလိုက်သည်။ ထို့နောက် တူညီသော မှော်သန့်စင် ဆေးအိုး ဖြင့် ဒုတိယ ပစ္စည်းကို စတင် ထုတ်ယူလိုက်၏။ မည်သည့် ပြဿနာမျှမရှိဘဲ စွမ်းအင်နှင့် အမတေကို ယခင်နေရာ၏ အပေါ်ဘက် အနည်းငယ်ရှိ သူမ၏ ခန္ဓာကိုယ် အစိတ်အပိုင်းတစ်ခုတွင် ထပ်မံ သိုလှောင်လိုက်သည်။ နောက်ထပ် သင်္ကေတတစ်ခု ပေါ်ထွက်လာပြီး စွမ်းအင်နှင့် အမတေ ကို တုန်လှုပ်မှု တစ်စက်လေးမျှမရှိဘဲ ပိတ်လှောင်ထားလေသည်။

ဤသို့ဖြင့် အကြိမ် ၃၃၀ တိုင်တိုင် ထပ်ခါတလဲလဲ ဖြစ်ပွားခဲ့သည်။

ထို့နောက် သူမသည် ပစ္စည်းများကို ကြီးထွားစေရန်နှင့် ပြုစုပျိုးထောင်ရန် ဒီဇိုင်းထုတ်ထားသော ဒုတိယ မှော်သန့်စင် ဆေးအိုးသို့ တစ်ခုချင်းစီ ယူဆောင်လာခဲ့သည်။ စွမ်းအင်နှင့် အမတေ တစ်ခုစီ၏ ဂုဏ်သတ္တိ အစက်အပြောက်တိုင်းကို သူမ အလွန် ရင်းနှီးကျွမ်းဝင်နေသည့်အလား ထပ်မံ လေ့လာဆန်းစစ်ခဲ့၏။ ထို့နောက် ၎င်းတို့ တစ်ခုစီကို ပြုစုပျိုးထောင်ရန် မတူညီသော အစီအရင် သို့မဟုတ် ကျင့်စဉ်ကို ထုတ်ဖော်လိုက်သည်။ သူမသည် တစ်ခါတစ်ရံတွင် သူမ၏ ကိုယ်ပိုင် သွေးကိုပင် အသုံးပြုခဲ့ရာ၊ ကောင်းကင်ရှန့်ထို နတ်ဘုရားထုတ်ယူခြင်းထက် အရည်အသွေးပိုင်းတွင် သာလွန်သွားစေသည့် အံ့မခန်း ပေါက်ကွဲမှု အာနိသင်ကို ဖြစ်ပေါ်စေခဲ့လေသည်။ သူမသည် ကောင်းကင်ရှန့်ထို တန်ခိုးရှင်ကြီးထွားခြင်း ၏ ပစ္စည်းထက် အနည်းငယ်မျှသာ နိမ့်ကျနေခဲ့ခြင်း ဖြစ်သည်။

သူမသည် ဤအရှိန်အဟုန်ကို စနစ်တကျ ထိန်းသိမ်းထားပြီး၊ တစ်ခုစီတိုင်းအတွက် သူမ တတ်နိုင်သမျှ အသန့်စင်ဆုံးနှင့် အရည်အသွေး အမြင့်မားဆုံး ပစ္စည်းများကို အဆက်မပြတ် ဖန်တီးနေခဲ့သည်။ အရည်အသွေးတွင် ကောင်းကင်ရှန့်ထို နတ်ဘုရားထုတ်ယူခြင်း ကို အမြဲတမ်း ကျော်လွန်နေပြီး၊ အချို့သော စွမ်းအင်များနှင့် အမတေ များတွင် ကောင်းကင်ရှန့်ထို တန်ခိုးရှင်ကြီးထွားခြင်း နှင့်ပင် တန်းတူညီမျှနေခဲ့လေသည်။ ၎င်းသည် စနစ်တကျရှိသော လွတ်လပ်သော ပုံစံ ၏ အစစ်အမှန် အံ့မခန်းကောင်းသော ပြသမှုတစ်ခုပင် ဖြစ်ပေသည်။

ကောင်းကင်ရှန့်ထို နတ်ဘုရားထုတ်ယူခြင်း နှင့် ကောင်းကင်ရှန့်ထို တန်ခိုးရှင် ကြီးထွားခြင်းတို့ နှစ်ဦးစလုံး၏ ကြိုတင်သတ်မှတ်ထားသော အဂ္ဂိရတ် လုပ်ငန်းစဉ် များနှင့် ပတ်သက်၍မူ သူတို့သည် ဆိုးရွားနေခြင်း မဟုတ်ပေ။ သို့သော် လိုက်လျောညီထွေ ပြောင်းလဲနိုင်စွမ်း ကင်းမဲ့နေခဲ့၏။ ထို့ကြောင့်ပင် စူးခိုင်မင် သည် ကောင်းကင်ရှန့်ထို နတ်ဘုရားထုတ်ယူခြင်း ကို အဆက်မပြတ် ကျော်လွန်နိုင်ပြီး ကောင်းကင်ရှန့်ထို တန်ခိုးရှင်ကြီးထွားခြင်း ၏ အထူးပြု ကျွမ်းကျင်မှုနှင့် တန်းတူညီမျှ ဖြစ်နေရခြင်း ဖြစ်လေသည်။

သူမ၏ နည်းလမ်းများသည် အလွန်အမင်း နှေးကွေးသော်လည်း သူမသည် အလွန် သေသပ်တိကျလှပေသည်။

သို့သော် အဂ္ဂိရတ် ထုတ်ယူခြင်း လုပ်ငန်းစဉ် နှင့် အဂ္ဂိရတ် ကြီးထွားခြင်း လုပ်ငန်းစဉ် တို့ကို အပြီးသတ်ကာ အဂ္ဂိရတ် ပိတ်လှောင်ခြင်း လုပ်ငန်းစဉ် သို့ နောက်ဆုံး ရောက်ရှိလာသောအခါ၊ လျှို့ဝှက် သင်္ကေတများ မှတစ်ဆင့် ချက်ချင်း ပိတ်လှောင်မှုကို ထုတ်ဖော်ကာ ဆုံးရှုံးသွားသော အချိန်များကို သူမ ပြန်လည် အစားထိုးနိုင်ခဲ့သည်။ စွမ်းအင်နှင့် အမတေ တိုင်းကို အပြစ်အနာအဆာကင်းသော တိကျမှုဖြင့် ချိတ်ပိတ်လိုက်ပြီး၊ လုပ်ငန်းစဉ် တစ်လျှောက်လုံးတွင် စွမ်းအင် သို့မဟုတ် အမတေ တစ်စက်လေးမျှပင် ဆုံးရှုံးသွားခြင်း မရှိခဲ့ချေ။

ဤလုပ်ငန်းစဉ်ကို သူမ အပြီးသတ်လိုက်သောအခါ၊ စုစုပေါင်း အချိန် တစ်နှစ်၊ တစ်လ နှင့် ခြောက်ရက်တိတိ ကြာမြင့်သွားခဲ့လေသည်။

တစ်ချိန်တည်းမှာပင် ကောင်းကင်ရှန့်ထို နတ်ဘုရားထုတ်ယူခြင်း သည် သူ၏ အဂ္ဂိရတ် ပိတ်လှောင်ခြင်း လုပ်ငန်းစဉ် ကို ဆယ့်တစ်လ၊ နှစ်ရက် နှင့် ခုနစ်နာရီ ဖြင့် ပြီးစီးသွားခဲ့သည်။

ကောင်းကင်ရှန့်ထို တန်ခိုးရှင်ကြီးထွားခြင်း သည် ဆယ့်တစ်လ၊ ဆယ့်ခြောက်ရက် နှင့် နှစ်နာရီ အကြာတွင် သူတို့၏ အဂ္ဂိရတ် ပိတ်လှောင်ခြင်း လုပ်ငန်းစဉ် ကို အပြီးသတ်နိုင်ခဲ့သည်။

ပစ္စည်းတစ်ခုစီတိုင်း၏ အစောပိုင်း ကိုင်တွယ်မှုသည် အလွန်အမင်း အရေးကြီးလှသည်။ အသေးငယ်ဆုံးသော အမှားတစ်ခုကပင် ရှောင်လွှဲ၍မရနိုင်သော ကျရှုံးမှုဆီသို့ ချက်ချင်း ဦးတည်သွားစေနိုင်၏။ ဥဿုံ အဂ္ဂိရတ် တိုက်ပွဲ တွင် ပါဝင်သော အဂ္ဂိရတ် ပညာရှင် တစ်ဦးတစ်ယောက်မျှ သူတို့၏ ဆေးဖော်စပ်ခြင်းတွင် ပေါ့ဆမှု မရှိခဲ့ကြပေ။

"မိုးကုပ်စက်ဝိုင်း တစ်ပါးစီတိုင်းရဲ့ ကနဦး ဆေးဖော်စပ်ခြင်း လုပ်ငန်းစဉ် သုံးခုရဲ့ ဆရာကြီးအဆင့် ပြသမှုတွေပါပဲ...."

ဟောင်ချန်းရွှယ် သည် မေ့ရှောင်ယန်၊ ထျန်းရှီယာ နှင့် လော့နင် တို့နှင့်အတူ သူ သိရှိထားသမျှ အကောင်းဆုံး နည်းလမ်းများကို ရှင်းပြပြီးနောက် အံ့ဩချီးကျူးစွာ အော်ဟစ်လိုက်သည်။ အံ့အားသင့်ဖွယ် ကောင်းသည်မှာ လော့နင် ၏ အသိပညာ နက်ရှိုင်းမှုက အခြားသူများ၏ မျှော်မှန်းချက်ထက် အတော်လေး ကျော်လွန်နေခဲ့ခြင်း ဖြစ်၏။ သူမသည် အမှန်တကယ်ပင် ရိုးရိုးရှင်းရှင်း မြေကြီးရှန့်ထို အဂ္ဂိရတ် ပညာရှင် တစ်ဦး ဟုတ်မဟုတ် သူတို့ သံသယဝင်လာကြလေသည်။

တစ်နှစ်နှင့် ခြောက်လ အပြည့် ကြာမြင့်ပြီးနောက်၊ မိုးကုပ်စက်ဝိုင်းများ အားလုံးသည် သူတို့၏ ထုတ်ယူခြင်း၊ ကြီးထွားစေခြင်း နှင့် ပိတ်လှောင်ခြင်း ဟူသော ဆေးဖော်စပ်ခြင်း အဆင့်သုံးဆင့်ကို အပြီးသတ်နိုင်ခဲ့ကြသည်။ တစ်ချိန်တည်းမှာပင် သူတို့သည် အစီအရင်များ၊ ကျင့်စဉ်များ၊ ဝင်္ကပါများ၊ နှင့် သူတို့၏ ရတနာများကိုပင် ကျွမ်းကျင်ပိုင်နိုင်စွာ အသုံးပြုပြသသွားကြလေသည်။

"ကျွန်မလည်း သဘောတူပါတယ်.... နှိုင်းယှဉ်ကြည့်ရင် ယေဘုယျအားဖြင့် ကျွမ်းကျင်မှု လိုအပ်ချက် လက္ခဏာတွေ ရှိနေပေမဲ့၊ တစ်ဦးချင်းစီအနေနဲ့ ကြည့်ရင်တော့ သူတို့တစ်ဦးစီတိုင်းက သူတို့ရဲ့ အဂ္ဂိရတ် ကျွမ်းကျင်မှုတွေကို အံ့မခန်း အပြစ်အနာအဆာကင်းစွာ ထုတ်ဖော်ပြသသွားကြတာပါ...."

တူညီသော ပစ္စည်းကို ပေးအပ်ထားသော်လည်း အချိန်၊ အရည်အသွေး၊ အမတေ နှင့် စွမ်းအင် ပမာဏတို့ကြားရှိ ထင်ရှားသော ကွာဟချက်ကို သတိပြုမိရင်း ထျန်းရှီယာ က မှတ်ချက်ချလိုက်သည်။

အားလုံးထဲ၌ ကောင်းကင်ရှန့်ထို နတ်ဘုရားထုတ်ယူခြင်း က ပစ္စည်းများကို အမြန်ဆုံး ထုတ်ယူနိုင်မည်ဖြစ်ပြီး၊ ကောင်းကင်ရှန့်ထို တန်ခိုးရှင်ကြီးထွားခြင်း က ၎င်းတို့ကို အကောင်းဆုံး ပြုစုပျိုးထောင်နိုင်မည်ဖြစ်ကြောင်း ရှင်းလင်းနေသည်။ အမှန်တကယ်တော့ ကောင်းကင်ရှန့်ထို နတ်ဘုရားထုတ်ယူခြင်း သည် အချိန်နှင့် ပတ်သက်၍ အငြင်းပွားဖွယ်မရှိသော အားသာချက် ရှိနေစဉ်၊ ကောင်းကင်ရှန့်ထို တန်ခိုးရှင်ကြီးထွားခြင်း သည် ထုတ်ယူပြီးနောက် ပြုစုပျိုးထောင်ထားသော ပစ္စည်းများ၏ အရည်အသွေးနှင့် သန့်စင်မှုအပိုင်းတွင် အနိုင်ရရှိခဲ့လေသည်။

မည်သို့ပင်ဆိုစေကာမူ ကောင်းကင်ရှန့်ထို နတ်ဘုရားထုတ်ယူခြင်း သည် အနှေးကွေးဆုံး မိုးကုပ်စက်ဝိုင်း ထက် ခုနစ်လအပြည့် စောနေခဲ့သည် မဟုတ်ပါလော။ သို့သော် ဤရလဒ်သည် လူအများစုက အပြည့်အဝ မျှော်လင့်ထားပြီးသား ဖြစ်သည်။ သူတို့၏ နည်းလမ်းများက အလွန်အမင်း ကွဲပြားခြားနားနေပြီး၊ သူတို့၏ အထူးပြု ကျွမ်းကျင်မှုများက သူတို့ကို တိကျသော အားသာချက်များ ရရှိစေသောကြောင့်သာ ဖြစ်လေသည်။

ကောင်းကင်ရှန့်ထို သန့်စင်ခြင်း၊ ကောင်းကင်ရှန့်ထို ဖန်တီးခြင်း (ထျန်းရှီကျောက်ရွှမ်) နှင့် ကောင်းကင်ရှန့်ထို လောကအသွင်ပြောင်းခြင်း တို့သည် အဂ္ဂိရတ် လုပ်ငန်းစဉ်၏ နောက်ပိုင်း အဆင့်များတွင် ပိုမို ကြီးမားသော အားသာချက် ရှိသင့်ပေသည်။ ၎င်းက သူတို့ကို ယှဉ်ပြိုင်သူများထံ အမီလိုက်နိုင်ရန် သို့မဟုတ် ကျော်တက်သွားရန် အခွင့်အရေး ပေးလိမ့်မည် ဖြစ်၏။

ကောင်းကင်ရှန့်ထို ပေါင်းစပ်ခြင်း နှင့် ပတ်သက်၍မူ... နောက်ဆုံး အဆင့် လုပ်ငန်းစဉ်ဟူသည် အခက်ခဲဆုံး ဖြစ်သည်။ အစွမ်းကုန် သန့်စင်ခြင်း ဂလက်ဆီ တစ်ခုလုံးတွင် သူသည် အောင်မြင်မှုနှုန်း အမြင့်ဆုံးအဖြစ် နာမည်ကြီးရသည့် အကြောင်းရင်းတစ်ခု ရှိပေသည်။

"အဂ္ဂိရတ် ပညာရှင် တစ်ဦးအနေနဲ့ အစောပိုင်း အဆင့်တွေကို ကျော်ဖြတ်နိုင်သရွေ့ သူတို့ဟာ အဂ္ဂိရတ် ဆေးဖော်စပ်ခြင်း ရဲ့ အစစ်အမှန် အဆင့်တွေဆီကို ဝင်ရောက်နိုင်ပါပြီ.... သန့်စင်ခြင်း.... ဖန်တီးခြင်း.... နဲ့ အသွင်ပြောင်းခြင်း ပါပဲ...."

ဟောင်ချန်းရွှယ် သည် သူ၏ ကြယ်တာရာ မျက်လုံးများထဲတွင် နက်ရှိုင်းသော မျှော်လင့်ချက်များဖြင့် ပြောလိုက်သည်။

"ကောင်းကင်ရှန့်ထို အဆုံးမဲ့ပိတ်လှောင်ခြင်း က လွတ်လပ်သော ပုံစံ အသုံးပြုသူ တစ်ယောက် ဖြစ်မယ်လို့ ကျွန်မ မမျှော်လင့်ထားဘူး.... သူမ တစ်ယောက်တည်းပဲလား...."

လော့နင် က စူးစမ်းချင်စိတ်ဖြင့် မေးလိုက်သည်။ သူမကိုယ်တိုင်ကလည်း လွတ်လပ်သော ပုံစံ အသုံးပြုသူ တစ်ဦး ဖြစ်၏။ ဝေ့ဝူယင်၏ မျိုးဆက်တစ်ခုလုံးသည် ကြိုတင်သတ်မှတ်ထားသော လုပ်ငန်းစဉ် ထက် လွတ်လပ်သော ပုံစံ လုပ်ငန်းစဉ် ကို ပိုမို နှစ်သက်ကြသည်။ ၎င်းမှာ လူကြိုက်နည်းသော ဆေးဖော်စပ်ခြင်း နည်းလမ်း တစ်ခု ဖြစ်နေပြီး ဖြစ်၏။

"ဟုတ်ပါတယ်...."

ထျန်းရှီယာ က ပြတ်သားစွာ ပြောလိုက်သည်။ လွတ်လပ်သော ပုံစံ ကို အသုံးပြုခြင်းသည် လိုက်ပါရန် အလွန်တရာ ခက်ခဲသော လမ်းကြောင်းတစ်ခု ဖြစ်သည်။ ဓမ္မဓိဋ္ဌာန်ကျကျ ပိုမိုကောင်းမွန်သော ရလဒ်များကို ရရှိနိုင်သော်ငြား၊ ဤလုပ်ရပ်များကို ရဲဝံ့စွာ လုပ်ဆောင်သူ အလွန် နည်းပါးလှ၏။ အကြောင်းရင်းမှာ ကျင့်စဉ်များနှင့် အစီအရင်များကို ကျွမ်းကျင်ပိုင်နိုင်ရန်မှာ အလွန်အမင်း ခက်ခဲသောကြောင့် ဖြစ်သည်။ တစ်ချိန်တည်းမှာပင် မည်သည့်အရာကို အသုံးပြုရမည်ကို ဆုံးဖြတ်ရာတွင် အံ့မခန်း ဉာဏ်ရည်ဉာဏ်သွေး လိုအပ်သောကြောင့်ပင်တည်း။

"အတိအကျကြီးတော့ မဟုတ်ဘူး...."

မေ့ရှောင်ယန် က ထျန်းရှီယာ ကို ပြင်ဆင်ပေးလိုက်သည်။

"ကောင်းကင်ရှန့်ထို သန့်စင်ခြင်းကလည်း လွတ်လပ်သော ပုံစံ အသုံးပြုသူ ပါပဲ...."

"အစစ်အမှန်တော့ မဟုတ်ဘူး...."

ထျန်းရှီယာ က တုံ့ဆိုင်းမနေဘဲ ကန့်ကွက်လိုက်သည်။

"တကယ်လို့ သူ့ကို လွတ်လပ်သော ပုံစံ အသုံးပြုသူ လို့ သတ်မှတ်နိုင်ရင်၊ ကောင်းကင်ရှန့်ထို ဖန်တီးခြင်းလည်း အတူတူပဲပေါ့...."

"..."

ထိုမှတ်ချက်ကြောင့် မေ့ရှောင်ယန် မျက်မှောင်ကြုတ်သွားခဲ့သည်။

"အစစ်အမှန် လွတ်လပ်သော ပုံစံ အသုံးပြုသူ မဟုတ်ဘူး ဟုတ်လား...."

လော့နင်သည် နားမလည်နိုင် ဖြစ်သွားသည်။ သို့သော် ကောင်းကင်ရှန့်ထို သန့်စင်ခြင်း သည် အဘယ်ကြောင့် လွတ်လပ်သော ပုံစံ အသုံးပြုသူ ဖြစ်နေရကြောင်းကို သူမ အနည်းငယ် နားလည်ခဲ့၏။ မည်သို့ပင်ဆိုစေကာမူ သူသည် ကြွယ်ဝသော ဉာဏ်အလင်းရ ပညာရှင် မြူခိုး ကို ပိုင်ဆိုင်ထားသည်။ သို့သော် ထျန်းရှီကျောက်ရွှမ် ကလည်း အတိုင်းအတာတစ်ခုအထိ ပိုင်ဆိုင်ထားသည် မဟုတ်ပါလော။

***

အပိုင်း(၂၃၈၈)

ဟောင်ချန်းရွှယ်က လော့နင်၏ မေးခွန်းကို ရှင်းပြလိုက်သည်။

"လွတ်လပ်သော ပုံစံ ဆိုတာ ဘယ်အရာက အစစ်အမှန်ဖြစ်တယ်၊ မဖြစ်ဘူးဆိုတာနဲ့ ပတ်သက်ပြီး အများကြီး ငြင်းခုံရလေ့ရှိတဲ့ လုပ်ငန်းစဉ်တစ်ခုပါ.... ဘယ်လိုလဲဆိုတော့... ကြိုတင်သတ်မှတ်ထားတဲ့ ပုံစံက ဆေးဖော်စပ်ခြင်း လုပ်ငန်းစဉ် တစ်လျှောက်လုံးမှာ သွေဖည်မှုမရှိဘဲ နည်းလမ်း ခုနစ်ခုကို အသုံးပြုပါတယ်... အဲဒါတွေက များသောအားဖြင့် တစ်ခုနဲ့တစ်ခု ဆက်စပ် စီးဆင်းနေတတ်ပါတယ်.... ဆေးဖော်စပ်ခြင်း ရဲ့ နောက်ပိုင်း အဆင့်တွေမှာ အပြစ်အနာအဆာတွေ ပေါ်ထွက်လာရင်တောင်မှ အဲဒါတွေကို လျှော့ချပစ်တာ ဒါမှမဟုတ် ဖယ်ရှားပစ်တာတွေ လုပ်နိုင်ပြီး ပိုကောင်းတဲ့ ကိုက်ညီမှုကို ရရှိစေပါတယ်...."

"တစ်ချိန်တည်းမှာပဲ လွတ်လပ်သော ပုံစံ လုပ်ငန်းစဉ်က ပစ္စည်းနဲ့ သီးသန့် လုပ်ငန်းစဉ်အတွက် အကောင်းဆုံး နည်းလမ်းကို အသုံးပြုပါတယ်.... အစစ်အမှန် ဖြစ်ခြင်း၊ မဖြစ်ခြင်း ရဲ့ အငြင်းပွားဖွယ် အချက်ကတော့၊ ကိုက်ညီတဲ့ ကျင့်စဉ်တွေနဲ့ အစီအရင်တွေကို ကြိုတင်သတ်မှတ်ထားတြ့ နည်းလမ်း ခုနစ်ခုထဲက တစ်ခု ဒါမှမဟုတ် တစ်ခုထက်ပိုတဲ့ နည်းလမ်းတွေနဲ့ လဲလှယ်အသုံးပြုတဲ့ လုပ်ရပ်ဟာ လွတ်လပ်သော ပုံစံ ကို ဖော်ဆောင်သလား၊ မဖော်ဆောင်ဘူးလား ဆိုတာပါပဲ.... ကောင်းကင်ရှန့်ထို သန့်စင်ခြင်း က အဲဒီနည်းလမ်းကို လိုက်လျောညီထွေ အသုံးပြုတာပါ...."

လော့နင် အံ့အားသင့်သွား၏။ ၎င်းသည် သူမ မမျှော်လင့်ထားသော စိတ်ဝင်စားဖွယ် ငြင်းခုံစရာ ကိစ္စတစ်ခု ဖြစ်သည်။ အကယ်၍ သင်သည် ထုတ်ယူခြင်း၊ ကြီးထွားစေခြင်း နှင့် ပိတ်လှောင်ခြင်း တို့အတွက် ကြိုတင်သတ်မှတ်ထားသော လုပ်ငန်းစဉ် ကို အသုံးပြုပြီး၊ သန့်စင်ခြင်း အတွင်း၌ နည်းလမ်းကို ပြောင်းလဲကာ၊ ဖန်တီးခြင်း၊ အသွင်ပြောင်းခြင်း နှင့် ပေါင်းစည်းခြင်း တို့အတွက် မူလအစုံသို့ ပြန်သွားမည်ဆိုလျှင်၊ ၎င်းကို ကြိုတင်သတ်မှတ်ထားသည်ဟု ဆိုနိုင်မည်လား၊ မဆိုနိုင်ဘူးလား။ လွတ်လပ်သော ပုံစံ ဖြစ်သလား၊ မဖြစ်ဘူးလား။

"အခု ခင်ဗျား မြင်တဲ့အတိုင်းပါပဲ...."

ဟောင်ချန်းရွှယ် သည် အားနည်းသော အပြုံးတစ်ခုနှင့်အတူ သက်ပြင်းချလိုက်သည်။ ထိုသီးသန့် အငြင်းပွားမှုအပေါ် မည်သည့်ဘက်မှ ရပ်တည်ရမည်ကို လော့နင် မသိခဲ့ပေ။ သူမ သိသည်က စူးခိုင်မင်မှာ လွတ်လပ်သော ပုံစံ အသုံးပြုသူ တစ်ဦး ဖြစ်သည်ဟူသောအချက်သာ ဖြစ်သည်။ ဤအချက်က လော့နင် ကို သူမအား ပိုမို အာရုံစိုက်လာစေခဲ့လေသည်။

တစ်ချိန်တည်း၌ ဝေ့ဝူယင်ကမူ သူ၏ မှော်သန့်စင် ဆေးအိုး ရှေ့တွင် မတ်တတ်ရပ်ကာ ဝိညာဉ် ကျောက်စိမ်းပြား အမျိုးမျိုးကို ဖတ်ရှုရင်း တရားထိုင်နေခဲ့သည်။

သူ စတင်ရခြင်းပင် မရှိသေးပေ။

လွန်ခဲ့သော တစ်နှစ်ခွဲကာလသည် မိုးကုပ်စက်ဝိုင်းများ အတွက်တော့ အံ့မခန်း ကျင့်စဉ်များ၊ အစီအရင်များ၊ နည်းလမ်းများနှင့် ကိရိယာများကို အပြစ်အနာအဆာကင်းပြီး အံ့မခန်းကောင်းလောက်အောင် အနားမယူဘဲ ထုတ်ဖော်ပြသခဲ့သော အချိန်ကာလတစ်ခု ဖြစ်ခဲ့သည်။ ကျင့်စဉ်များနှင့် နည်းလမ်းအမျိုးမျိုးက လူထုကို ယခင်က တစ်ခါမျှ မရှိခဲ့ဖူးသော လှိုင်းလုံးကြီးတစ်ခုဖြင့် ဉာဏ်အလင်းပွင့်စေခဲ့ပြီး၊ အစွမ်းကုန် သန့်စင်ခြင်း ဂလက်ဆီ ၏ အဂ္ဂိရတ် တာအို အပေါ် ရိုသေလေးစားမှုများကို ကြီးထွားလာစေခဲ့ရာ၊ သူတို့၏ မိုးကုပ်စက်ဝိုင်းများ ဟူသော အမည်နာမနှင့် အမှန်တကယ်ပင် ထိုက်တန်ကြောင်း သက်သေပြခဲ့လေသည်။

တစ်ဦးတည်းသော နယ်ခြားသားမှ လွဲ၍...။

သူသည် ပြိုင်ပွဲသို့ ရဲဝံ့စွာ ဝင်ရောက်လာခဲ့ပြီး၊ အစွမ်းကုန် သန့်စင်ခြင်း ဂလက်ဆီ ၏ မိုးကုပ်စက်ဝိုင်း တစ်ပါးစီတိုင်းကို အဂ္ဂိရတ် တာအို နှင့် အဂ္ဂိရတ် တာအို ယှဉ်ပြိုင်သည့် ပြိုင်ပွဲတစ်ခုတွင် အတင့်ရဲစွာ စိန်ခေါ်ခဲ့သည်။

သူသည် ပထမအချီကို ချက်ချင်း အနိုင်ရရှိရန်အတွက် အတော်လေး မမျှော်လင့်ထားသော၊ အနည်းငယ် ကြည့်မကောင်းသော လှည့်ကွက်တစ်ခုကို အသုံးပြုခဲ့၏။

သို့သော် အဂ္ဂိရတ် နည်းစနစ်များနှင့် ကျွမ်းကျင်မှုများ၏ အစစ်အမှန် တိုက်ပွဲ စတင်သောအခါ၊ ပရိသတ်များသည် သူက ဆိုဖာတစ်ခုပေါ်တွင် သက်တောင့်သက်သာ ထိုင်နေခြင်း သို့မဟုတ် အလွန်အမင်း သက်တောင့်သက်သာရှိပုံ ပေါ်သော ကုတင်တစ်ခုပေါ်တွင် အိပ်စက်နေခြင်းများကိုသာ မြင်တွေ့ခဲ့ရသည်။ မကြာသေးမီကမှ သူ ခြေဆန့်လက်ဆန့် လုပ်လိုက်ပြီး၊ သူ၏ မှော်သန့်စင် ဆေးအိုး ရှေ့တွင် ရပ်ကာ၊ ပေးထားသော ပစ္စည်းများ သို့မဟုတ် သူ ပြင်ဆင်နေသည့် နည်းစနစ်များကို လေ့လာဆန်းစစ်နေသည့်အလား ဝိညာဉ် ကျောက်စိမ်းပြား တစ်ခုကို စတင် ဖတ်ရှုနေခဲ့လေသည်။

ဂရုမစိုက်ဟန် အော်ရာတစ်ခုနှင့်အတူ သူ၏ ပျင်းရိနေသော အပြုအမူက အတော်လေး စော်ကားနေသကဲ့သို့ ခံစားရစေပြီး၊ လူအိုကြီး အချို့ကို စိတ်ပျက်ဒေါသထွက်စွာဖြင့် တံတွေးနှင့် ထွေးချင်စိတ် ပေါက်သွားစေခဲ့သည်။ သူတို့သည် ဝေ့ဝူယင်၏ ခေါင်းကို လူငယ်တပည့်တစ်ယောက်ကဲ့သို့ ခေါက်ပစ်ချင်ရုံမှလွဲ၍ အခြား ဘာမှ မလိုလားကြပေ။

"ဒီ ပျင်းရိနေတဲ့ သောက်ကောင်..."

ဖြန်း...

"ဆရာစွန်း... ပါးစပ်ပိတ်ထားလိုက်စမ်း..."

အလွန်အမင်း နိမ့်ကျသော ကျင့်ကြံခြင်း အဆင့်ရှိသည့် လူငယ်တပည့်တစ်ဦးက ဆရာဖြစ်သူ၏ ခေါင်းကို တိုက်ရိုက် ရိုက်ချလိုက်၏။ သူ၏ လက်ဝါးပေါ်တွင် ပူလောင်သော နာကျင်မှုကို ခံစားလိုက်ရသည်။ သူ၏ နုပျိုသော မျက်နှာတွင် ဒေါသများနှင့် အကြောက်တရားများ ပြည့်နှက်နေပြီး၊ ထိုအကြောက်တရားမှာ သူ လေးစားရသော ဆရာ့ကြောင့် မဟုတ်ပေ။

ဆရာဖြစ်သူ အံ့အားသင့်သွားသည်။ ဆရာတစ်ယောက်ကို တပည့်က ဘယ်တုန်းကများ အပြစ်တင် ဆုံးမတဲ့အနေနဲ့ ရိုက်ဖူးလို့နည်း။ သူသည် အလွန်အမင်း အံ့ဩသွားပြီး စကားပင် မပြောနိုင်တော့ချေ။ ထို့နောက် သူ့ကို ကြည့်နေကြသော အပေါင်းအသင်းများ၏ စူးရှသော အကြည့်များကို ခံစားလိုက်ရသောအခါ သူ၏ နှလုံးသားထဲတွင် အရှက်ရမှုများ စတင် ဖြစ်ပေါ်လာခဲ့သည်။ အရှက်ရမှုက ဒေါသအဖြစ်၊ ထို့နောက် လူသတ်လိုသော ရည်ရွယ်ချက်အဖြစ်သို့ ပြောင်းလဲသွားလေသည်။

"ခွေးမသား... မင်း... မင်း သေချင်နေတာလား..."

ဆရာစွန်း သည် သူ၏ ကျင့်ကြံခြင်း စွမ်းအားများကို ပေါက်ကွဲထုတ်လိုက်ရာ၊ အတွေးတစ်ချက်တည်းဖြင့် လူငယ်တပည့်လေးကို တစ်စက္ကန့်အတွင်း ချေမွပစ်နိုင်စွမ်း ရှိလေသည်။ တပည့်လေးသည် လက်ရှိတွင် အသက်ရှင်ခြင်းနှင့် သေဆုံးခြင်းကြားမှ ပါးလွှာသော မျဉ်းပေါ်တွင် ရောက်နေသော်လည်း၊ သူ၏ ဒေါသထွက်နေသော ဆရာကို သူ အနည်းငယ်မျှပင် ဂရုမစိုက်ခဲ့ပေ။

သူသည် ကလဲ့စားချေလိုသော သရဲတစ္ဆေတစ်ကောင်ကို စိုက်ကြည့်နေသကဲ့သို့ ဝိညာဉ် ပုံရိပ် ကိုသာ အာရုံစိုက်နေခဲ့သည်။ တပည့်လေးမှာ ဆရာဖြစ်သူ၏ လက်ချက်ဖြင့် သရဲတစ္ဆေတစ်ကောင် မဖြစ်သွားမီလေးမှာပင်၊ ညင်သာသော ဖိအားတစ်ခုက ဆရာစွန်း ၏ ပခုံးပေါ်သို့ ကျရောက်လာခဲ့သည်။

"ဘာလဲ... ငါ့ကို ဘာလို့ လာထိတာလဲ... အွတ်..."

ဆက်မပြောရဲတော့သော စကားလုံးများဖြင့် သူ၏ လည်ချောင်းက ဆို့နင့်သွားခဲ့သည်။ သူသည် ဝိညာဉ် ပုံရိပ် ကို ကြည့်ရန် ရုန်းကန်လိုက်၏။ ခန့်မှန်း၍မရနိုင်သော တည်ရှိမှုကို ပိုင်ဆိုင်ထားသည့် အလွန်တရာ ချောမောလှသော လူငယ်လေးတစ်ဦးက ဝိညာဉ်နှင့် အာကာသ ကန့်လန့်ကာများကို ဖောက်ထွင်းကာ သူ့ကို တိုက်ရိုက် ကြည့်ရှုနေသကဲ့သို့ ဖြစ်နေလေသည်။

တစ်စက်လေးမျှ တုံ့ဆိုင်းမနေဘဲ သူသည် သူ၏ လက်ဝါးဖြင့် သူ၏ လည်ချောင်းကို ရိုက်ချလိုက်ရာ၊ သွေးများနှင့် ကြေမွနေသော အသားစများကို အန်ထွက်သွားစေခဲ့သည်။ သူ၏ ကိုယ်ပိုင် လက်ဖြင့် သူ၏ လည်ချောင်းကို ဖျက်ဆီးလိုက်သောကြောင့် သူ အော်ဟစ်ခြင်း သို့မဟုတ် ညည်းတွားခြင်း မပြုလုပ်နိုင်တော့ချေ။ ထို့နောက် သူသည် ဝိညာဉ် ပုံရိပ် ဆီသို့ ဦးတည်ကာ အလျင်စလို ခေါင်းဆောင့် ဦးညွတ်မှုများကို ထပ်ခါတလဲလဲ ပြုလုပ်လိုက်၏။ သူ၏ ကျောပြင်၊ လက်များနှင့် မျက်ခုံးများပေါ်မှ ရေခဲတမျှ အေးစက်သော ချွေးများ စီးကျလာခဲ့သည်။ သူ၏ နဖူးမှပင် သွေးများ ထွက်လာခဲ့လေသည်။

သူ၏ တပည့်လေးသည်လည်း သူနှင့်အတူ ရှိနေပြီး ဆရာဖြစ်သူကိုယ်စား အသည်းအသန် ခွင့်လွှတ်ပေးရန် တောင်းပန်နေခဲ့သည်။

ဆရာစွန်းသည် သူ၏ ဒေါသအဟုန်ထဲတွင်၊ ဤမျှ ဂရုမစိုက်ဘဲ ရိုင်းစိုင်းသော အပြုအမူကို ပြသနေသည့် နယ်ခြားသားသည် အထွတ်အထိပ် တည်ရှိမှု တစ်ပါးဖြစ်ကြောင်းကို မေ့လျော့သွားခဲ့သည်။ သူသည် မေ့လျော့ကာ အလွန် ကြီးမားလှသော အမှားတစ်ခုကို ကျူးလွန်မိခဲ့ခြင်း ဖြစ်၏။ သူသည် တုံ့ဆိုင်းခြင်းမရှိဘဲ မိမိကိုယ်ကိုယ် အပြစ်ပေးကာ သူ၏ ခန္ဓာကိုယ်ရှိ ရှိသမျှ အားအင်အားလုံးဖြင့် ခွင့်လွှတ်ပေးရန် တောင်းပန်နေခဲ့လေသည်။

တစ်ချိန်တည်း၌... ဝေ့ဝူယင် ၏ မျက်လုံးများ ကျဉ်းမြောင်းသွားပြီးနောက် သူ၏ လက်ထဲရှိ ဝိညာဉ် ကျောက်စိမ်းပြား ဆီသို့ ပြန်လည် ငုံ့လိုက်လေသည်။ လက်ရှိတွင် သူသည် အထွတ်အထိပ် တည်ရှိမှု တစ်ပါးအဖြစ် ဆောင်ရွက်နေခြင်း ဖြစ်သောကြောင့်၊ သင့်လျော်သော ဝေဖန်မှုမျိုး မဟုတ်ဘဲ ကျင့်ကြံသူ များက သူ့ကို အတင်းအဖျင်း ပြောဆိုနေခြင်းကို ခွင့်မပြုနိုင်ပေ။

သူ၏ ထိုလုပ်ရပ်က မရေမတွက်နိုင်သည့် ကျင့်ကြံသူများကို ထိတ်လန့် တုန်လှုပ် သွားစေခဲ့သည်။ အစစ်အမှန် ခွန်အား၏ ရှေ့မှောက်တွင်၊ အစွမ်းကုန် သန့်စင်ခြင်း ဂလက်ဆီ ၏ စည်းမျဉ်းများသည် သူတို့ကို အကာအကွယ်ပေးနိုင်စွမ်း မရှိချေ။ ထို့အပြင်... သူတို့သည် အစွမ်းကုန် သန့်စင်ခြင်း ဂလက်ဆီ ၏ စည်းမျဉ်းများကို အားကိုးလျှင်တောင်မှ၊ အကာအကွယ်ပေးခံထားရသော သူ၏ အဆင့်အတန်းအရ၊ မည်သူ့ကိုမဆို အလွယ်တကူ ချေမွပစ်နိုင်ပြီး သူတို့၏ အသက်များအတွက် ဒဏ်ကြေး အနည်းငယ်သာ ပေးဆောင်ရမည် ဖြစ်လေသည်။

အထွတ်အထိပ် တည်ရှိမှု တစ်ခုကို ထားလိုက်ပါဦး... သာမန် အဂ္ဂိရတ် ပညာရှင် တစ်ဦးကို လုံလောက်သော ကျောထောက်နောက်ခံ မရှိဘဲ လူသိရှင်ကြား စော်ကားခြင်းမှာ သေခြင်းတရားနှင့် မခြားနားပေ။

ဝေ့ဝူယင် သည် တစ်နှစ်ခွဲကျော်ကြာသည်အထိ လှုပ်ရှားမှု တစ်ချက်လေးမျှ မလုပ်ခဲ့ချေ။ မိုးကုပ်စက်ဝိုင်းများသည် စတုတ္ထမြောက် ဆေးဖော်စပ်ခြင်း လုပ်ငန်းစဉ် ဖြစ်သည့် သန့်စင်ခြင်း လုပ်ငန်းစဉ် သို့ ဝင်ရောက်နေကြပြီဖြစ်သော်လည်း၊ သူကမူ မည်သည့် ပစ္စည်းထံမှ အမတေ သို့မဟုတ် စွမ်းအင် အနည်းငယ်မျှကိုပင် ထုတ်ယူရခြင်း မရှိသေးပေ။ ပွဲကို လာရောက်ကြည့်ရှု ခံစားနေကြသော ဧည့်သည်များ၏ မျက်လုံးထဲတွင်မူ ဝေ့ဝူယင် သည် ဤအချီကို အရှုံးပေးလိုက်ပြီဟု သူတို့ အပြည့်အဝ ယုံကြည်နေကြလေသည်။

သို့သော် မိုးကုပ်စက်ဝိုင်း တစ်ပါးစီတိုင်းသည် သူတို့၏ ထုတ်ကုန်ကို ဖော်စပ်ရန် ပေးအပ်ထားသော အခွင့်အရေး သုံးကြိမ်စလုံးတွင် ကျရှုံးနိုင်သေးပြီး၊ မသန့်စင်သော ထုတ်ကုန်တစ်ခုကိုပင် မရရှိနိုင်ဘဲ ဖြစ်သွားနိုင်လေသည်။ မိုးကုပ်စက်ဝိုင်းများသည် ကောင်းကင်ရှန့်ထို အဂ္ဂိရတ် ပညာရှင်များ ဖြစ်သော်လည်း၊ ကောင်းကင်ရှန့်ထို အဂ္ဂိရတ် ပညာရှင်များ အတွက် လူမှုရေးအရ သတ်မှတ်ချက်များသည် အဂ္ဂိရတ် တာအို နှင့် တူညီမှု မရှိချေ။

အဂ္ဂိရတ် ပညာရှင် တစ်ဦးသည် သိသာထင်ရှားသော ပံ့ပိုးမှု သို့မဟုတ် တိုက်ရိုက် ပြင်ပ အကူအညီမပါဘဲ မည်သည့် အမျိုးအစားမဆို လျှို့ဝှက်ကောင်းကင် အဆင့် ထုတ်ကုန်တစ်ခုကို အောင်မြင်စွာ ဖော်စပ်နိုင်သရွေ့ သူတို့သည် ကောင်းကင်ရှန့်ထို အဂ္ဂိရတ် ပညာရှင် အဖြစ် အသိအမှတ်ပြုခြင်း ခံရမည် ဖြစ်သည်။

မိုးကုပ်စက်ဝိုင်းများ သည် လျှို့ဝှက်ကောင်းကင် ထုတ်ကုန်များအတွက် အံ့မခန်း အောင်မြင်မှုနှုန်းများကို ပိုင်ဆိုင်ထားကြသော်လည်း၊ ၎င်းတို့သည် အများအားဖြင့် ဝိညာဉ် ဆေးလုံး၊ အမိန့်တော် ဆေးရည်၊ ဟင်းလင်းပြင် ဆေးတောင့် သို့မဟုတ် လျှို့ဝှက် ဆေးအနှစ် ကဲ့သို့သော ယေဘုယျ ထုတ်ကုန်များထက် သူတို့၏ ကိုယ်ပိုင် မျိုးဆက် အထူးပြု ထုတ်ကုန်များဖြင့်သာ အဆုံးအဖြတ်ပေးခံရလေ့ ရှိလေသည်။

မိုးကုပ်စက်ဝိုင်း ခုနစ်ပါးစလုံးသည် သူတို့၏ ဆေးဖော်စပ်မှုများကို သုံးကြိမ်ဆက်တိုက် ကျရှုံးနိုင်ခြေမှာ ဖြစ်နိုင်ခြေ နယ်ပယ်ထဲတွင် အပြည့်အဝ ရှိနေပြီး၊ ထိုသို့ဖြစ်လာရန် အခွင့်အရေး နည်းပါးသော်လည်း၊ ထိုဖြစ်နိုင်ခြေက ဝေ့ဝူယင် ကို သရေကျရန် အခွင့်အရေးတစ်ခု ပေးစွမ်းနိုင်လေသည်။ သူတို့ အရှုံးပေးခဲ့သကဲ့သို့ အရှုံးမပေးခြင်းမှာ လုံးဝ ယုတ္တိရှိလှပေသည်။

သို့သော် ပြိုင်ဘက်များ၏ ကျရှုံးမှုအပေါ် လောင်းကြေးထပ်ခြင်းမှာ အမြစ်တွယ်နေသော ဤအဂ္ဂိရတ် ပညာရှင်များ၏ မျက်လုံးထဲတွင် အရှက်ရဖွယ် လုပ်ရပ်တစ်ခု ဖြစ်သည်။

သို့သော်လည်း... ကျင့်ကြံသူတိုင်းသည် နောက်ဆုံးအချိန်အထိ လက်မလျှော့ရဟူသော ယုံကြည်ချက်ကို အပြည့်အဝ နားလည်ထားကြ၏။ အကယ်၍ သူတို့သာ သူတို့၏ စိန်ခေါ်မှုများအတွင်း လက်လျှော့ခဲ့မည်ဆိုလျှင်၊ ယနေ့အချိန်အထိ သူတို့ အသက်ရှင်နေမည် မဟုတ်ပေ။ အခြား တစ်စုံတစ်ယောက်ကသာ အသက်ရှင်နေလိမ့်မည် ဖြစ်လေသည်။

ထို့ကြောင့်ပင်... ထိုဖြစ်နိုင်ခြေသည် မည်မျှပင် ယုံကြည်ရခက်ခဲစေကာမူ၊ မဖြစ်နိုင်သလောက် ရှိစေကာမူ နယ်ခြားသား ပညာရှင်လိုပင် သူတို့သည် အနိုင်ရရှိရန် အခွင့်အရေးအတွက် မည်သည့်မျှင်ကြိုးလေးကိုမဆို ဆုပ်ကိုင်ထားကြမည်သာ ဖြစ်သည်။

သို့သော်လည်း မိုးကုပ်စက်ဝိုင်းများ အားလုံးသည် ပရိသတ်၏ မျက်စိရှေ့မှောက်တွင် သူတို့၏ ဂုဏ်သိက္ခာကို တစ်စက်လေးမျှ ထိခိုက်စေမည် မဟုတ်ပေ။ သူတို့သည် အဆင့်မြင့် စွမ်းအင်များနှင့် အမတေ များကို ကိုင်တွယ်နေပြီး၊ အပြစ်အနာအဆာများ ထပ်ခါတလဲလဲ မဖြစ်ပေါ်စေရန် အပ်ပေါက်ထဲသို့ အပ်ချည်ထိုးသကဲ့သို့ အလွန် သေချာစွာ ထုတ်ဖော်ရသည့် အံ့မခန်း အစီအရင်များနှင့် ကျင့်စဉ်များကို အသုံးပြုနေကြပေသည်။ ထို့ကြောင့်ပင် ဘာမှ မလုပ်ပဲ အနိုင် ရရှိနိုင်ချေမှာ ၁ ရာခိုင်နှုန်းအောက်ပင် လျော့နည်းနေသည်ဟု ဆိုရပေလိမ့်မည်။ ထို့ကြောင့်ပင် ဒုတိယ အချီမြောက် အတွက် မိုးကုပ်စက်ဝိုင်းများ၏ အောင်ပွဲက သေချာသွားပြီဟု ဆိုရပေတော့မည်။