အခန်း (၂၁-၂၂)

အခန်း (၂၁) - နဂါးလိပ် မီးလျှံဝိညာဉ်

နန်းတော်၏ ပတ်ဝန်းကျင်တစ်ခွင်တွင် အဖြူအမည်း ရောယှက်နေသော မီးခိုးလုံးကြီးများမှာ အဆက်မပြတ် လိပ်တက်နေပြီး နန်းတော်အောက်ခြေတွင်မူ ပူပြင်းလှသော ချော်ရည်များက တငြိမ့်ငြိမ့် စီးဆင်းလျက် ရှိချေသည်။

အုတ်နီခဲများ၊ ရွှေတိုင်လုံးကြီးများဖြင့် တည်ဆောက်ထားသော ထိုနန်းတော်မှာ ပူပြင်းလှသည့် ချော်ရည်မြစ်အတွင်း ရေချိုးနေသော ရှေးဟောင်းဘီလူးကြီးတစ်ကောင်အလား ခန့်ညားထည်ဝါစွာ မတ်တပ်ရပ်လျက် ရှိနေ၏။

ပင်မဆောင်၏ အနက်ရှိုင်းဆုံးနေရာတွင်မူ ကျောမှီမြင့်မြင့် ပါရှိသော ရာဇပလ္လင်ပေါ်၌ နဂါးငယ်တစ်ကောင် ခွေလျက် ရှိနေသည်ကို တွေ့ရပေမည်။

ထိုနဂါးငယ်မှာ တစ်ကိုယ်လုံး လိမ္မော်နီရောင် တောက်လျက်ရှိရာ ခဲနေသော ချော်ရည်ခဲများနှယ် ရှိလှပြီး ခန္ဓာကိုယ်အတွင်း၌လည်း ရွှေရောင်အလင်းတန်းများ စီးဆင်းနေသဖြင့် အလွန်ပင် တင့်တယ်လှပလှချေသည်။

ယင်းက နဂါးဦးခေါင်း၊ နဂါးအမြီးနှင့် နဂါးခြေသည်း လေးခု ရှိသော်လည်း ကိုယ်အထက်ပိုင်းမှာမူ လိပ်တစ်ကောင်၏ ပုံသဏ္ဌာန် ဖြစ်နေ၏။

၎င်း၏ လိပ်ခွံပေါ်တွင် အနီညိုရောင် ကျောက်တုံးများမှာ မညီမညာ ဖုံးလွှမ်းနေပြီး ထိုကျောက်တုံးများအကြားရှိ အကွက်များမှာ လိပ်ခွံ၏ ပုံစံကို ဖော်ဆောင်နေလေသည်။

၎င်းကား အခြားမဟုတ်၊ ချော်ရည်နန်းတော်၏ နန်းတော်စောင့်ဝိညာဉ် ဖြစ်သော ‘နဂါးလိပ် မီးလျှံဝိညာဉ်’ ပင် ဖြစ်ပေတော့သည်။

ထိုစဉ် အနားယူနေသော နဂါးလိပ် မီးလျှံဝိညာဉ်သည် မျက်လုံးများကို ဖြည်းညှင်းစွာ ဖွင့်လိုက်ပြီး နန်းတော်အမိုးဆီသို့ မော့ကြည့်လိုက်၏။

ချော်ရည်နန်းတော်သည် အနည်းငယ် တုန်ခါသွားပြီး ၎င်း၏ အမြင်အာရုံကို နန်းတော်အမိုးအား ဖောက်ထွက်စေကာ တိမ်တိုက်များနှင့် မီးခိုးများကြားမှ ဝေဝါးသော ပုံရိပ်တစ်ခုကို မြင်တွေ့စေသည်။

ထိုသူမှာ မီးလျှံတောင် မသေမျိုးမြို့တော်၏ မြို့စားမင်းပင် ဖြစ်ချေသည်။ မြို့စားမင်း၏ ရိပ်မိခြင်းကို ရှောင်ရှားရန်အတွက် နဂါးလိပ် မီးလျှံဝိညာဉ်သည် အသေအချာ စေ့စေ့မကြည့်ဘဲ အောက်ဘက်သို့သာ အကြည့်ကို လွှဲလိုက်လေရာ ၎င်း၏ အမြင်အာရုံမှာ အလွန်လျင်မြန်လှသဖြင့် မီးလျှံတောင် မသေမျိုးမြို့တော်တစ်ခုလုံးကို ဖြတ်ကျော်ကာ တောင်ခြေရှိ ပူပြင်းလှသော မီးလျှံသီးတောအုပ်ဆီသို့ ဆိုက်ဆိုက်မြိုက်မြိုက် ရောက်ရှိသွားတော့သည်။

နဂါးလိပ် မီးလျှံဝိညာဉ်၏ နီရဲနေသော မျက်ဝန်းအိမ်အတွင်းရှိ ရွှေရောင်မျက်ဆုံများမှာ တောက်ပလာပြီး မြို့ပြ၊ တောအုပ်နှင့် မြို့သူမြို့သားများမှာ ၎င်း၏ အမြင်အာရုံတွင် ပျောက်ကွယ်သွားကာ ခမ်းနားလှသော အစီအရင်ကြီးတစ်ခုသာ ပေါ်ထွက်လာချေသည်။

ထိုအစီအရင်ကြီးတွင် အစီအရင်မျက်စိ နှစ်ခု ပါရှိရာ အကြီးတစ်ခုမှာ တောင်အတွင်း၌ ရှိပြီး အငယ်တစ်ခုမှာ မြို့စားမင်း၏ စံအိမ်တွင် ရှိနေသည်။

ထို့ပြင် ကျိုးမျိုးနွယ်စု၊ ကျန်းမျိုးနွယ်စုနှင့် နင်းမျိုးနွယ်စုတို့၏ နေအိမ်များ၊ ထောင်နှင့် စစ်တပ်တို့တွင်လည်း အစီအရင်တိုင် ငါးတိုင်ကို အသီးသီး စိုက်ထူထားလေသည်။

ဤအစီအရင်မှာ မီးလျှံတောင်တန်းတစ်ခုလုံးနီးပါးကို လွှမ်းခြုံထားပြီး တောင်ခြေရှိ အသေးစားအစီအရင်များစွာနှင့်လည်း ဆက်နွယ်နေသဖြင့် မသေမျိုးမြို့တော်၏ အပြာရောင်အစီအရင် အင်းကွက်များမှာ ကောင်းကင်နှင့် မြေပြင်ကို ပိုက်စိပ်တိုက် ဖုံးလွှမ်းထားသော ကွန်ရက်ကြီးတစ်ခုနှယ် ဖြစ်နေတော့သည်။

နဂါးလိပ် မီးလျှံဝိညာဉ်သည် ဤကဲ့သို့ ပိတ်လှောင်ခံထားရသည့် ခံစားချက်ကြောင့် အလွန်ပင် စိတ်တိုသွားကာ ရှေ့ခြေထောက်များဖြင့် မြေပြင်ကို ကန်လျက် ရုတ်တရက် ခုန်တက်လိုက်၏။

၎င်း၌ အတောင်ပံ မရှိသော်လည်း လေထဲတွင် လျင်မြန်စွာ ပျံသန်းနိုင်ပြီး လိမ္မော်ရွှေရောင် အလင်းတန်းတစ်ခုအဖြစ် ဟင်းလင်းပြင်တွင် ကခုန်နေတော့သည်။

ထို့နောက် နဂါးလိပ် မီးလျှံဝိညာဉ်သည် မြို့စားမင်း၏ စံအိမ်ဆီသို့ အကြည့်ပို့လိုက်ရာ ထိုနေရာတွင် ခန္ဓာကိုယ် တောင့်တင်းခိုင်မာပြီး မျက်လုံးအိမ်ကြီးမားသော လူငယ်တစ်ဦးမှာ တင်ပျဉ်ခွေထိုင်လျက် ၎င်း၏ ဝိညာဉ်စွမ်းအားများကို လှည့်ပတ်နေသည်ကို တွေ့ရ၏။

ထိုသူကား မြို့စားမင်း၏ မြေးဖြစ်သူ မုန့်ချုံပင် ဖြစ်သည်။ မုန့်ချုံသည် ပုံမှန်နှင့်မတူဘဲ ဝိညာဉ်စွမ်းအားများကို စုဆောင်းနေခြင်း မဟုတ်ဘဲ ပြန်လည် ထုတ်လွှတ်နေခြင်း ဖြစ်ချေသည်။

မြို့စားမင်း၏ အသံမှာ မုန့်ချုံ၏ နားထဲတွင် ပဲ့တင်ထပ်နေဆဲ ရှိသေး၏။

“မုန့်ချုံ... ငါ့မြေး၊ မင်းနဲ့ ချော်ရည်နန်းတော်ရဲ့ အငွေ့အသက်ကို ဆက်သွယ်ပေးဖို့ ကံကြမ္မာသတ်မှတ်ခြင်း အဆောင်လက်ဖွဲ့ကို ငါ သုံးထားပြီးပြီ။ အကောင်းဆုံး ခြေလှမ်းတွေကို တွက်ချက်ဖို့ စိတ်ဝိညာဉ်မဟာဗျူဟာ နံ့သာတိုင်ကိုလည်း ထွန်းညှိထားတယ်။ ငါ့စကားကို မှတ်ထားပါ... မင်းဟာ ‘ဓာတ်ငါးပါးညှိနှိုင်းခြင်းပညာရပ်’ ကို ဝိညာဉ်စွမ်းအား သန့်စင်ခြင်း တတိယအဆင့်အထိ ရောက်အောင် ပထမဆုံး ကျင့်ကြံနိုင်သူ ဖြစ်ရမယ်။ ဒါဟာ အောင်မြင်ဖို့အတွက် အရေးကြီးဆုံး အချက်ပဲ”

မုန့်ချုံသည် သက်ပြင်းအရှည်ကြီး တစ်ချက်ချလိုက်ပြီး ၎င်း၏ မျက်လုံးကြီးများထဲတွင် ပြတ်သားသော ဆုံးဖြတ်ချက်များဖြင့် ပြည့်နှက်နေတော့သည်။

နဂါးလိပ် မီးလျှံဝိညာဉ်သည် မြို့စားမင်း စံအိမ်မှနေ၍ ကျိုးမျိုးနွယ်စု စံအိမ်ဆီသို့ အကြည့်ကို ပြောင်းလိုက်ပြန်ရာ မြေအောက်လျှို့ဝှက်ခန်းတစ်ခုတွင် ကျိုးကျဲရှန်နှင့် ကျိုးကျူတို့မှာ အစီအရင်ကြီးတစ်ခု၏ ရှေ့၌ ရပ်နေကြသည်ကို မြင်ရလေသည်။

ကျိုးကျဲရှန်က “ဒါဟာ ငါတို့ ကျိုးမျိုးနွယ်စုမှာပဲ ရှိတဲ့ ဝိညာဉ်ရေစီးကြောင်း အစီအရင်ပဲ။ ကျိုးကျူ... မင်း ဒီအစီအရင်ထဲကို ဝင်ပြီး ဝိညာဉ်စွမ်းအားတွေကို ထုတ်ပစ်လိုက်ပါ၊ ပြီးရင် ‘ဓာတ်ငါးပါးညှိနှိုင်းခြင်းပညာရပ်’ ကို ပြန်ပြီး ကျင့်ကြံရမယ်” ဟု ဆို၏။

ကျိုးမျိုးနွယ်စုသည် မျိုးနွယ်စုကြီး သုံးခုအနက် ပထမဆုံးဖြစ်သဖြင့် အခြေခံ အလွန်ခိုင်မာလှချေသည်။ ချော်ရည်နန်းတော်ကို ရယူရန်အတွက် ၎င်းတို့သည် ဟိုးယခင်ကတည်းကပင် အစီအစဉ်များစွာ ချမှတ်ခဲ့ကြသည်။

ထိုအစီအစဉ်များထဲတွင် မိသားစုဝင်များဖြစ်သော ကျိုးကျဲရှန်နှင့် ကျိုးကျူတို့ကို ‘ရွှံ့နွံစီးဆင်းခြင်းဂိုဏ်း’ သို့ စေလွှတ်၍ ပညာသင်ကြားစေခြင်းလည်း ပါဝင်ခဲ့၏။

‘ရွှံ့နွံစီးဆင်းခြင်းဂိုဏ်း’ သည် စက်မှုပညာရပ်များ တွင် အထူးကျွမ်းကျင်သော ဂိုဏ်းတစ်ခု ဖြစ်ပေရာ ၎င်းတို့နှစ်ဦးမှာ ထိုပညာရပ်များကို တတ်မြောက်ပြီးနောက် မျိုးနွယ်စု၏ အမိန့်ကို စောင့်ဆိုင်းရန် ပြန်လည်ရောက်ရှိနေကြခြင်း ဖြစ်သည်။

မျှော်လင့်မထားဘဲ ‘ပညာရပ်ဆက်ခံခြင်းခေါင်းလောင်းသံ’ ထွက်ပေါ်လာသည့်အတွက် ၎င်းတို့မှာ ရွေးချယ်မှုတစ်ခု ပြုလုပ်ခဲ့ရသည်။

ကျိုးမျိုးနွယ်စုသည် ကျိုးကျဲရှန်ကို မူလအတိုင်း ထားရှိရန် ဆုံးဖြတ်ခဲ့ပြီး ကျိုးကျူကိုမူ ‘ဓာတ်ငါးပါးညှိနှိုင်းခြင်းပညာရပ်’ သို့ ပြောင်းလဲကျင့်ကြံရန် တာဝန်ပေးခဲ့ခြင်း ဖြစ်ချေသည်။

ကျိုးကျူသည်လည်း မဆိုင်းမတွပင် အစီအရင်ထဲသို့ ဝင်ရောက်သွားတော့သည်။

ကျိုးကျူ၏ ကျင့်ကြံခြင်းအဆင့်မှာ ဝိညာဉ်စွမ်းအား သန့်စင်ခြင်း အဋ္ဌမအဆင့်အထိ ရှိခဲ့သဖြင့် ယခုကဲ့သို့ စွမ်းအားများကို ပြန်လည် စွန့်လွှတ်ရခြင်းမှာ ကြီးမားသော ဆုံးရှုံးမှု ဖြစ်သော်လည်း ‘ဓာတ်ငါးပါးညှိနှိုင်းခြင်းပညာရပ်’ မှာ ချော်ရည်နန်းတော်ကို ရရှိရန်အတွက် အဓိကသော့ချက် ဖြစ်နေပေရာ အခြားရွေးချယ်စရာ မရှိတော့ပေ။

အစီအရင်၏ အင်အားကြောင့် ကျိုးကျူ၏ ခန္ဓာကိုယ်အတွင်းမှ ဝိညာဉ်စွမ်းအားများမှာ အတင်းအကျပ် အထုတ်ခံရသဖြင့် ၎င်း၏ မျက်နှာတွင် နာကျင်မှုများ ပေါ်ပေါက်လာ၏။

သို့သော် ကျိုးကျူတွင် ထူးခြားသော ကိုယ်ပိုင်အနာရောဂါ ပျောက်ကင်းစေသည့် စွမ်းရည်ရှိသဖြင့် ဒဏ်ရာများကို လျင်မြန်စွာ ပြန်လည် ကုသနိုင်ခဲ့ပေသည်။

ဤသည်မှာလည်း ၎င်းကို အသစ်ပြန်လည် ကျင့်ကြံစေရန် ရွေးချယ်ခဲ့ရသည့် အဓိက အကြောင်းရင်းပင် ဖြစ်ပါတော့သတည်း။

အခန်း (၂၂) - ဝိညာဉ်စွမ်းအား

သန့်စင်ခြင်းအဆင့် (၂) သို့ တက်လှမ်းခြင်း

နဂါးလိပ် မီးလျှံဝိညာဉ်သည် ၎င်း၏ အကြည့်တို့ကို ရုပ်သိမ်းလိုက်ပြီးနောက် ကျန်းမျိုးနွယ်စုထံသို့ အာရုံစိုက်လိုက်လေသည်။

ထိုစဉ် ကျန်းမျိုးနွယ်စုမှ အကြီးအကဲနှစ်ဦးသည် ကျန်းကျန့်အား ဖျောင်းဖျနားချလျက် ရှိကြ၏။ ကျန်းကျန့်သည် နဖူးစည်းအလယ်တွင် သူငယ်အိမ်ပုံသဏ္ဌာန် ကျောက်မျက်ရတနာ တစ်ခုကို ဆင်မြန်းထားသည့် လူငယ်ကျင့်ကြံသူတစ်ဦး ဖြစ်ချေသည်။

ယင်းခဏ၌ ကျန်းကျန့်သည် ပြတ်သားစွာပင် ခေါင်းခါယမ်းလိုက်ပြီး "မဖြစ်နိုင်ဘူး၊ ကျွန်တော် 'ဓာတ်ငါးပါးညှိနှိုင်းခြင်းပညာရပ်' ကိုပဲ ကျင့်ကြံဖို့ ဆုံးဖြတ်လိုက်ပြီ၊ ဘယ်သူမှ တားလို့မရဘူး" ဟု ဆိုလေသည်။

အကြီးအကဲတစ်ဦးက သက်ပြင်းချလျက် "ကျန်းကျန့်... မင်းက ငါတို့ကျန်းမျိုးနွယ်စုရဲ့ ဒီမျိုးဆက်ထဲမှာ အထူးချွန်ဆုံးပဲ၊ မင်းမှာပါတဲ့ 'ထိုးထွင်းသိမြင်မှု' အထူးပါရမီက ငါတို့မျိုးနွယ်စုရဲ့ ကျင့်စဉ်တွေနဲ့ အကိုက်ညီဆုံးပဲလေ၊ အခုလို တခြားပညာရပ်ကို ပြောင်းလဲကျင့်ကြံမယ်ဆိုရင် ဒီလိုထူးခြားတဲ့ ပါရမီကို ဖြုန်းတီးပစ်သလို ဖြစ်လိမ့်မယ်" ဟု ချော့မော့ပြောဆို၏။

သို့သော် ကျန်းကျန့်က ငြင်းဆန်မြဲဖြစ်ကာ "ဒီ 'ထိုးထွင်းသိမြင်မှု' အာရုံကြောင့်ပဲ ကျွန်တော် ဒီပညာရပ်ကို အမြန်ဆုံး ကျင့်ကြံရမယ်လို့ သိနေတာပါ၊ ဒါဟာ ကျွန်တော့်ရဲ့ လမ်းစဉ်အတွက် များစွာအကျိုးရှိစေမှာပါ" ဟု ပြန်လည် တုံ့ပြန်လေသည်။

"မျိုးနွယ်စု မှတ်တမ်းတွေအရ အရင်ဘိုးဘေးတွေထဲမှာလည်း ဒီလိုပါရမီရှင်တွေ ရှိခဲ့ဖူးတယ်၊ ဒီပါရမီက အံ့အားသင့်စရာ အာရုံခံစားမှုကို ပေးနိုင်တာမှန်ပေမဲ့ အမြဲတမ်း မှန်ကန်နေမယ်လို့တော့ မဆိုလိုဘူး၊ အာရုံမှားယွင်းခဲ့တဲ့ သာဓကတွေ အများကြီးရှိခဲ့တယ်၊ ကျန်းကျန့်... မင်းအနေနဲ့ ဒီပါရမီအပေါ်မှာပဲ အလွန်အကျွံ မမှီခိုသင့်ဘူး"

အကြီးအကဲက ဆက်လက်ပြောကြားသော်လည်း ကျန်းကျန့်ကမူ "ကျွန်တော့်ရဲ့ အာရုံခံစားမှု မှားယွင်းခဲ့တာမျိုး တစ်ခါမှ မကြုံဖူးသေးဘူး၊ ဒီတစ်ကြိမ်မှာလည်း ကျွန်တော့်အာရုံကိုပဲ ယုံကြည်ဖို့ ရွေးချယ်ပါတယ်၊ အကြီးအကဲတို့ စိုးရိမ်ပေးတာကို ကျေးဇူးတင်ပေမဲ့ ဆက်ပြီး မဖျောင်းဖျပါနဲ့တော့" ဟု အပြတ်အသားဆို၏။

နောက်ဆုံးတွင် အကြီးအကဲသည် သက်ပြင်းချကာ တစ်လှမ်းဆုတ်ပေးလိုက်ရပြီး "ဒါဆိုရင်လည်း ကျန်းကျန့်... အရင်ဆုံး မျိုးနွယ်စုခွဲ၀ထဲက တစ်ယောက်ကို ဒီပညာရပ် အရင်ကျင့်ခိုင်းကြည့်ပြီး ဘာဖြစ်လာမလဲဆိုတာ စောင့်ကြည့်ကြတာပေါ့" ဟု အကြံပြုသည်။

ထိုအခါ ကျန်းကျန့်သည် ကျယ်လောင်စွာ ရယ်မောလိုက်ပြီး "အဲဒီလို မပြောပါနဲ့ အကြီးအကဲ၊ ပင်မမျိုးနွယ်နဲ့ မျိုးနွယ်ခွဲဆိုတာ ဘာကွာလို့လဲ၊ မျိုးနွယ်ခွဲကို အန္တရာယ်ကြားထဲ အရင်ပို့မယ်ဆိုရင် ကျွန်တော်က ပင်မမျိုးနွယ်ဝင်တစ်ယောက်အနေနဲ့ သတ္တိကြောင်လွန်းရာ ရောက်မှာပေါ့"

"ကျန်းမျိုးနွယ်စုရဲ့မျိုးနွယ်ဝင် တစ်ယောက်ဖြစ်တဲ့အတွက် ကျွန်တော်ကိုယ်တိုင်ပဲ စံပြအနေနဲ့ ရဲရဲဝံ့ဝံ့ ရှေ့ကနေ ချီတက်ရမှာပေါ့၊ မဟုတ်ရင် ပင်မမျိုးနွယ်ဆိုတာ မျိုးနွယ်စုကို အုပ်ချုပ်ဖို့ ဘယ်မှာ အခွင့်အရေးရှိတော့မှာလဲ၊ ကျွန်တော် ဆုံးဖြတ်ပြီးပါပြီ" ဟု အတည်ပြုလိုက်လေသည်။

အကြီးအကဲနှစ်ဦးသည် စိုးရိမ်စိတ်နှင့်အတူ ကျေနပ်အားရမှုတို့ ဒွန်တွဲလျက် သက်ပြင်းချလိုက်ကြပြီး တစ်ဦးက "ကောင်းပြီလေ... ဒါဆိုရင် ဒီကျောက်ကျိမ်းပြားကို မင်းယူထားလိုက်" ဟု ဆိုကာ ကမ်းပေး၏။

"ဒါဟာ မင်းရဲ့ အခြေအနေကို သိသွားတဲ့ အကြီးအကဲဘိုးဘေး ကျန်းရွှမ်းကောကိုယ်တိုင် ပေးသနားလိုက်တာပဲ၊ ဒီထဲမှာ 'အသက်နှုတ်ဓားပျံချိတ်' လို့ခေါ်တဲ့ ကိရိယာဖန်တီးမှု ပညာရပ် ပါဝင်တယ်"

ကျန်းကျန့်သည် ဇဝေဇဝါဖြစ်သွားကာ "ကျွန်တော်က အခု ဝိညာဉ်စွမ်းအားတွေကို ဖျောက်ပစ်ပြီး အချိန်နဲ့အမျှ လုနေရတာလေ၊ ဒီလို အရေးကြီးတဲ့အချိန်မှာ ဘယ်လိုလုပ် ကိရိယာတွေ ဖန်တီးနေနိုင်မှာလဲ" ဟု မေးမြန်းရာ၊ အကြီးအကဲက ပြုံးလျက် "မလောပါနဲ့၊ အရင်ဆုံး သေချာဖတ်ကြည့်လိုက်ပါဦး" ဟု ဆိုလေသည်။

ကျန်းကျန့်သည် ကျောက်ကျိမ်းပြားကို နဖူးတွင်ကပ်၍ စိတ်ဝိညာဉ်အာရုံကို အသုံးပြုကာ ကြည့်ရှုလိုက်ရာ၊ များမကြာမီမှာပင် ဝမ်းသာအားရ ဖြစ်သွားတော့သည်။

"အံ့ဩစရာပါပဲ"

"ဒီကိရိယာဖန်တီးတဲ့ လျှို့ဝှက်ပညာရပ်က အားကောင်းပေမဲ့ အားနည်းချက်တွေလည်း ရှိတာပဲ၊ ပထမတစ်ခုက ငါတို့မျိုးနွယ်စုရဲ့ ကျင့်စဉ်နဲ့မှ တွဲဖက်သုံးလို့ရတာ၊ ဒုတိယတစ်ခုက ချိတ်တစ်ခု ဖန်တီးတိုင်း ကျင့်ကြံသူရဲ့ ဝိညာဉ်စွမ်းအား တစ်ဆင့်စီ ထာဝရ လျော့နည်းသွားတာပဲ၊ အများကြီး ဖန်တီးမိရင် ဝိညာဉ်စွမ်းအား အကန့်အသတ်က နိမ့်ဆင်းသွားပြီး ဘယ်တော့မှ ပြန်မရနိုင်တော့ဘူး"

"ဒါပေမဲ့ လက်ရှိ ကျွန်တော့်အတွက်တော့ အကောင်းဆုံးပဲ၊ ဘာပဲဖြစ်ဖြစ် ကျွန်တော့်ရဲ့ ဝိညာဉ်စွမ်းအားတွေကို ဖျောက်ပစ်ရမှာဆိုတော့ ဒါကို အသုံးချပြီး 'အသက်နှုတ်ဓားပျံချိတ်' အဖြစ် ပြောင်းလဲလိုက်မယ်ဆိုရင် ဝိညာဉ်စွမ်းအား ကုန်စင်မှုကိုလည်း မြန်ဆန်စေသလို အားကောင်းတဲ့ ခုခံရေးရတနာတစ်ခုလည်း ရလာမှာပဲ၊ ဘိုးဘေး ကျန်းရွှမ်းကောနဲ့ အကြီးအကဲတို့ကို ကျေးဇူးတင်ပါတယ်"

အကြီးအကဲများက ကျေနပ်စွာ ပြုံးလျက် "ဒါဟာ မင်းနဲ့ ထိုက်တန်လို့ရတာပါ၊ မင်းဟာ ကျန်းမျိုးနွယ်စုရဲ့ ဂုဏ်ဆောင်နိုင်တဲ့ သားကောင်းတစ်ယောက်ပဲ၊ ဒီတစ်ကြိမ်မှာ အရာရာ အောင်မြင်ပါစေလို့ ငါတို့ ဆုတောင်းပေးပါတယ်" ဟု ဆိုကြသည်။

နဂါးလိပ် မီးလျှံဝိညာဉ်သည် ကျန်းကျန့်အား ခဏမျှ စောင့်ကြည့်ပြီးနောက် နင်းမျိုးနွယ်စုထံသို့ အကြည့်လွှဲလိုက်၏။

နင်းမျိုးနွယ်စု အကြီးအကဲနှင့် အခြားသော အကြီးအကဲများသည် တိတ်တဆိတ် ဆွေးနွေးလျက် လူရွေးချယ်မှုကို အပြီးသတ်ရန် ကြိုးပမ်းနေကြသည်။

စာသင်ဆောင်အကြီးအကဲက မျက်မှောင်ကြုတ်ကာ "ဒီစာရင်းက မသင့်တော်ဘူး၊ 'ဓာတ်ငါးပါးညှိနှိုင်းခြင်းပညာရပ်' ဆိုတာ မသေမျိုးနန်းတော်ရဲ့ ပညာရပ်ဆက်ခံခြင်းခေါင်းလောင်းကနေ ရတာဆိုပေမဲ့ အခုထိ သုံးဆင့်ပဲ ရှိသေးတာ၊ ဒီပညာရပ်ကို ပြောင်းလဲကျင့်ကြံဖို့ဆိုတာ ရှေ့အလားအလာက မသေချာသလို ဘယ်သူမှလည်း စိတ်ပါလက်ပါ ရှိကြမှာမဟုတ်ဘူး" ဟု ကန့်ကွက်လေသည်။

"အခုလို အတင်းအကျပ် လူသတ်မှတ်မယ်ဆိုရင် မကျေနပ်မှုတွေ ဖြစ်လာလိမ့်မယ်၊ ဒီစာရင်းမှာ မျိုးနွယ်စုခွဲတွေပဲ များနေပြီး ပင်မမျိုးနွယ်ဝင်က အနည်းငယ်ပဲ ပါတယ်၊ ဒါကို လူသိရှင်ကြား ထုတ်ပြန်ရင် ဘယ်သူမှ လက်ခံမှာ မဟုတ်ဘူး"

တိုက်ပွဲဆောင်အကြီးအကဲကမူ အေးစက်စရာ ကောင်းလှစွာ "ငါတို့ နင်းမျိုးနွယ်စုရဲ့ ပင်မမျိုးနွယ်ဝင်က အမြဲတမ်း နည်းပါးခဲ့တာပဲ၊မျိုးနွယ်စုခွဲက များတာဆိုတော့ သူတို့ဘက်က လူအင်အား ပိုစိုက်ထုတ်ရတာ တရားမျှတပါတယ်၊ ပင်မမျိုးနွယ်ဝင်တွေ အများကြီး ပါဝင်ခဲ့လို့ မသေမျိုးနန်းတော် ရှာဖွေရေးမှာ အနစ်နာခံခဲ့ရရင်... အဲဒီလိုမဟုတ်ဘဲ နောက်ပိုင်း ပညာရပ်တွေကို ဆက်မရခဲ့ရင်တောင် သူတို့ရဲ့ ကျင့်ကြံမှုတွေက တစ်ဝက်တစ်ပျက်နဲ့ ပျက်စီးသွားလိမ့်မယ်၊ ဒါဟာ ပင်မမျိုးနွယ်အတွက် အလွန်ကြီးမားတဲ့ ဆုံးရှုံးမှုပဲ"

"လွန်ခဲ့တဲ့ ဆယ်စုနှစ်တစ်ခုက ပြည်တွင်းစစ်မျိုး နောက်တစ်ကြိမ် မဖြစ်စေချင်တော့ဘူး" ဟု အကျဉ်းချုံး ပြောဆိုလိုက်သည်။

လွန်ခဲ့သော ဆယ်စုနှစ်တစ်ခုကျော်က နင်းမျိုးနွယ်စုသည် မြောက်လေပြည်မှ တမ်းတခြင်းပြည်သို့ ပြောင်းရွှေ့အခြေချခဲ့စဉ် လမ်းခရီး၌ ချောင်းမြောင်းတိုက်ခိုက်ခြင်း ခံခဲ့ရသည်။

ထိုစဉ်က ပင်မမျိုးနွယ်ဝင် အများအပြား သေဆုံးခဲ့ပြီး ရွှေအမြုတေအဆင့် ဘိုးဘေးမှာလည်း ပြင်းထန်စွာ ဒဏ်ရာရခဲ့၏။ မီးလျှံတောင် မသေမျိုးမြို့တော်သို့ ရောက်ရှိလာပြီးနောက် နင်းမျိုးနွယ်စု၏ ရွှေအမြုတေအဆင့် ကျင့်ကြံသူများသည် ဒဏ်ရာကုသရန် နှစ်ပေါင်းများစွာ အချိန်ကုန်ခဲ့ရသဖြင့် မြို့တော်ရှိ အခြားသော အဆင့်တူကျင့်ကြံသူများကြားတွင် အထင်မကြီးလောက်စရာ ဖြစ်ခဲ့ရသည်။

ထိုအခြေအနေတွင် မျိုးနွယ်စုခွဲတို့သည် အင်အားတောင့်တင်းလာသည်နှင့်အမျှ ရည်မှန်းချက် ကြီးမားလာကာ ပင်မမျိုးနွယ်၏ အုပ်ချုပ်မှုကို ဖြုတ်ချရန် ပြည်တွင်းပဋိပက္ခများ ဖန်တီးခဲ့ကြသော်လည်း နောက်ဆုံးတွင် ပင်မမျိုးနွယ်ကပင် အထိနာစွာဖြင့် ကပ်သီးကပ်သတ် အနိုင်ရရှိခဲ့သည်။

ထိုအချိန်မှစ၍ ပင်မမျိုးနွယ်ဝင်တို့သည် ဘေးထွက်မျိုးနွယ်တို့အပေါ် အလွန်အမင်း သတိထားလာကြပြီး မျိုးနွယ်စုခွဲကို အားပျော့စေကာ ပင်မမျိုးနွယ်စုကို အားကောင်းစေမည့် နည်းလမ်းမျိုးစုံကို အသုံးပြုခဲ့ကြသည်။

သို့သော်လည်း 'ဓာတ်ငါးပါးညှိနှိုင်းခြင်းပညာရပ်' အတွက် လူရွေးချယ်ရာတွင်မူ ထိုမူဝါဒကို ကျင့်သုံးရန် ခက်ခဲနေလေသည်။ အကြောင်းမှာ ထိုပညာရပ်၏ ရှေ့အလားအလာကို မည်သူမျှ အာမခံချက် မပေးနိုင်သောကြောင့် ဖြစ်သည်။

အကြီးအကဲများသည် အခြေအနေအရ အစဉ်အလာအတိုင်းသာ ဆောင်ရွက်လိုကြသဖြင့် မျိုးနွယ်စုခွဲဝင် ကိုယ်စားလှယ်များကို အလွယ်တကူ သတ်မှတ်နိုင်ခဲ့သော်လည်း ပင်မမျိုးနွယ်ဝင်များကြားတွင်မူ အချင်းချင်း အကျိုးစီးပွား ငြိစွန်းမှုများကြောင့် အငြင်းပွားနေကြဆဲ ဖြစ်၏။

နင်းမျိုးနွယ်စုအကြီးအကဲသည် ထိုအငြင်းပွားမှုများကို အတော်ကြာ နားထောင်ပြီးနောက် "ပင်မမျိုးနွယ်က လူဘယ်လောက်ပဲပါပါ၊ ခေါင်းဆောင်ကောင်းတစ်ယောက်တော့ ရှိဖို့လိုမယ်၊ မျိုးနွယ်စုခွဲဝင် အင်အားစုတွေကို ထိန်းချုပ်နိုင်စွမ်းရှိတဲ့ ပင်မမျိုးနွယ်ဝင် မရှိရင် အခြေအနေက လက်လွန်သွားနိုင်တယ်" ဟု ကြားဖြတ် ပြောဆိုလိုက်သည်။

အကြီးအကဲများသည် မျက်နှာပျက်သွားကြကာ၊ မျိုးနွယ်စုအကြီးအကဲအနေဖြင့် အမှန်တကယ် အရည်အချင်းရှိသူ တစ်ဦးကို စေလွှတ်လိုနေကြောင်း နားလည်လိုက်ကြ၏။

မျိုးနွယ်စုအကြီးအကဲက ဆက်လက်၍ "ငါတို့မျိုးနွယ်စုရဲ့ ဝိညာဉ်စွမ်းအား သန့်စင်ခြင်းအဆင့်ဝင်တွေထဲမှာ ဒီတာဝန်ကို ထမ်းဆောင်နိုင်သူ ဘယ်သူရှိလဲ" ဟု မေးမြန်းရာ၊ အကြီးအကဲအားလုံး၏ စိတ်ထဲတွင် လူတစ်ယောက်တည်းကိုသာ ပြေးမြင်မိကြလေသည်။

"နင်းရှောင်ဟွေ့ပဲ ရှိတယ်"

"သူမက မွေးကတည်းက 'နှင်းကျောက်စိမ်းလက်' ပိုင်ရှင်ဖြစ်ပြီး၊ 'နှင်းအဆောင်လက်ဖွဲ့' တွေကို သဘာဝအတိုင်း အပြစ်အနာအဆာကင်းအောင် ဖန်တီးနိုင်တဲ့ ပါရမီရှင်လေ"

"ဒီလို ပါရမီရှင်တစ်ယောက်ကိုမှ စေလွှတ်မယ်ဆိုတာကတော့..."

"ငါ ကန့်ကွက်တယ်" အဆောင်လက်ဖွဲ့ဆောင် အကြီးအကဲက ရုတ်တရက် ကြားဖြတ်၍ ပြင်းထန်စွာ ကန့်ကွက်လိုက်သဖြင့် အငြင်းပွားမှုများ နောက်တစ်ကြိမ် အရှိန်မြင့်လာပြန်သည်။

မျိုးနွယ်စုအကြီးအကဲသည် စိတ်ပျက်လက်ပျက်ဖြင့် စောင့်ဆိုင်းနေပြီးနောက် "နင်းရှောင်ဟွေ့ရဲ့ သဘောထားကို အရင်ဆုံး မေးကြည့်ရင်ရော" ဟု အကြံပြုရာ၊ အဆောင်လက်ဖွဲ့ဆောင် အကြီးအကဲသည် ချက်ချင်းထရပ်ကာ "ငါကိုယ်တိုင်ပဲ သွားမေးလိုက်မယ်" ဟု ဆိုကာ ထွက်ခွာသွားတော့သည်။

မကြာမီမှာပင်၊

"အကြီးအကဲ" ဟု နင်းရှောင်ဟွေ့က လာရောက် ဂါရဝပြု၏။

သူမသည် အကြောင်းအရာကို သိရှိသွားသည်နှင့် ချက်ချင်းပင် မျက်နှာပျက်သွားကာ "သမီးက 'နှင်းကျောက်စိမ်းလက်' နဲ့ မွေးဖွားလာတာ၊ အဆောင်လက်ဖွဲ့ ပညာရပ်မှာ အောင်မြင်မယ့်သူပါ၊ အခုလို လမ်းကြောင်းမမှန်တဲ့ ကျင့်စဉ်ကို ကျင့်ခိုင်းတယ်ဆိုတာ ဘယ်အကြီးအကဲက သမီး အောင်မြင်မှာကို မနာလိုဖြစ်နေလို့လဲ၊ ဘွားဘွားကို သွားတိုင်လိုက်မယ်" ဟု ဒေါသတကြီး ပြောဆိုလေသည်။

အဆောင်လက်ဖွဲ့ဆောင် အကြီးအကဲက တည်ငြိမ်စွာဖြင့် "ငါ မင်းဘက်က ရှိပါတယ် ရှောင်ဟွေ့၊ လာ... ငါကိုယ်တိုင် မင်းနဲ့အတူ လိုက်ခဲ့ပေးမယ်" ဟု ဆိုသည်။

နင်းရှောင်ဟွေ့၏ စကားများကို ကြားရသောအခါ နဂါးလိပ် မီးလျှံဝိညာဉ်သည် ဒေါသတကြီးဖြင့် မီးခိုးများ မှုတ်ထုတ်လိုက်ကာ သူမအား အလွန်အမင်း အထင်အမြင်သေးသွားပုံ ရလေသည်။

၎င်းသည် မီးလျှံတောင် မသေမျိုးမြို့တော်ရှိ အင်အားစုကြီးလေးခုအနက် နင်းမျိုးနွယ်စုကို အဆိုးဆုံးဟု သတ်မှတ်လိုက်၏။

၎င်း၏ အာရုံကို လွှဲဖယ်တော့မည့်ဆဲဆဲတွင် အကြည့်တို့သည် ရုတ်တရက် ရပ်တန့်သွားသည်။

နင်းမျိုးနွယ်စု စုဝေးရာနေရာနှင့် မလှမ်းမကမ်းရှိ ရိုးရှင်းသော ဝင်းခြံတစ်ခုအတွင်းရှိ လက်လုပ်ခန်းမငယ်လေးထဲတွင် လူငယ်လေးတစ်ဦးသည် တင်ပျဉ်ခွေထိုင်ကာ ကျင့်ကြံအားထုတ်နေသည်ကို တွေ့လိုက်ရ၏။

ထိုလူငယ်၏ နှာခေါင်းမှ သွေးများ တစစ စီးကျနေသော်လည်း၊ သူကျင့်ကြံနေသော ပညာရပ်မှာ 'ဓာတ်ငါးပါးညှိနှိုင်းခြင်းပညာရပ်' ဖြစ်နေရုံသာမက...

သူသည် ဝိညာဉ်စွမ်းအား သန့်စင်ခြင်းအဆင့် (၂) သို့ပင် ရောက်ရှိနေပြီ ဖြစ်ချေသည်။