အခန်း (၉၃-၉၄)

အခန်း (၉၃) သိုင်းကွက်များ ကျင့်ကြံခြင်း

ယန်ကျင့် မည်သည့် စာအုပ်များ လိုအပ်သည်ကို ကြားလိုက်ရသောအခါ အစောင့်မှာ အံ့အားသင့်သွား၏။

အဘယ်ကြောင့်ဆိုသော် ဆေးတောင်ထွတ် ဆေးဖော်ခန်းတွင် ချန်လော့ ရှိနေစဉ်က သူသည် ပထမဆုံး နှစ်သုတ် ဆေးအိုးပေါက်ကွဲပြီးနောက် ဆေးလုံး တစ်လုံးကို အောင်မြင်စွာ ဖော်စပ်နိုင်ခဲ့ကြောင်း ကောလာဟလများ ထွက်ပေါ်နေသည်ကို သူ ကြားဖူးသောကြောင့် ဖြစ်သည်။

ချန်လော့၏ ဆေးဖော်စပ်ခြင်း စွမ်းရည်များက ပထမအဆင့် အထွတ်အထိပ်သို့ ရောက်ရှိနေပြီ ဖြစ်ကြောင်းကိုပင် သူ ကြားဖူးသေး၏။

'ဆေးဆရာများ အတွက် ပြည့်စုံသော လမ်းညွှန်' နှင့် 'ဆေးဖော်စပ်ခြင်း လျှို့ဝှက်ချက်များ' တို့သည် အစောပိုင်းအဆင့် သို့မဟုတ် အလယ်အလတ်အဆင့် ရှိ ဆေးဆရာများသာ လိုအပ်သော စာအုပ်များ ဖြစ်သည်။

အထွတ်အထိပ် ဆေးဆရာ တစ်ယောက်က ဘာလို့ ဒီစာအုပ်တွေကို လိုအပ်ရမှာလဲ…

အစောင့်၏ မျက်နှာပေါ်ရှိ တုံ့ဆိုင်းမှုကို မြင်သောအခါ ဘေးတွင် ရပ်နေသော ယန်ကျင့်က သူ၏ ကိုယ်ကျိုးရှာ ရည်ရွယ်ချက်များကို တစ်ဖက်လူ ရိပ်မိသွားနိုင်သည်ဟု သဘောပေါက်လိုက်ပြီး ရုတ်တရက် အနည်းငယ် ထိတ်လန့်သွား၏။

မည်သို့ပင်ဆိုစေ သူက ချန်လော့၏ မျက်နှာသာပေးမှုကို ယခုလေးတင် ရရှိထားခြင်း ဖြစ်သည်။ အကယ်၍ ဤကောင်က ချန်လော့ကို သွားတိုင်လိုက်ပါက သူ သေချာပေါက် အဆုံးသတ်သွားနိုင်သည်။

ဤအရာကို တွေးမိသောအခါ ယန်ကျင့်သည် အစောင့်၏ မျက်နှာကို ဒေါသတကြီးဖြင့် ရုတ်တရက် ဖြတ်ရိုက်လိုက်သည်။

ဖြန်း…

"ဘာစောင့်နေတာလဲ... အစ်ကိုကြီးချန်က စောင့်နေတာနော်..."

ပါးရိုက်ခံရပြီးနောက် အစောင့်သည် ဒေါသထွက်သွားသည်။

သို့သော် ချန်လော့ ဟူသော အမည်ကို ကြားလိုက်ရသောအခါ သူ၏ ရင်ထဲတွင် တုန်လှုပ်သွားပြီး သူ့အတွက် စာအုပ်ကို နာခံမှုရှိစွာဖြင့် သွားရှာပေးရုံမှလွဲ၍ အခြား ရွေးချယ်စရာ မရှိတော့ချေ။

အစောင့် ထွက်သွားသည်ကို ကြည့်ရင်း ယန်ကျင့်က စိတ်သက်သာရာ ရသွားပြီး သက်ပြင်းချလိုက်၏။

သူ၏ နီရဲနေသော လက်ဖဝါးကို ဖြည်းညင်းစွာ ခါလိုက်ရင်း၊ သူ၏ မျက်နှာပေါ်တွင် ထူးဆန်းသော အပြုံးတစ်ခု ပေါ်လာသည်။

"လူတွေ အများကြီးက အခြားသူတွေကို အနိုင်ကျင့်ပြီး အာဏာရှင်တွေလို ပြုမူရတာကို ဘာလို့ သဘောကျနေကြလဲ ဆိုတာ မဆန်းတော့ပါဘူး... တကယ်ကို ခံစားလို့ ကောင်းတာပဲ..."

အချိန် အနည်းငယ် အကြာတွင် အစောင့်က သိုင်းစာအုပ်များကို ကမ်းပေးလာ၏။

ယန်ကျင့်က ပြုံး၍ သိုင်းစာအုပ်များကို ယူကာ မထွက်ခွာမီ "လမ်းညွှန်ချက်" အချို့ ပေးခဲ့သေးသည်။

"နောက်တစ်ခါ အလုပ်လုပ်ရင် ဒီထက် ပိုမြန်အောင် လုပ်..."

ထိုသို့ ပြောပြီးနောက် ယန်ကျင့်သည် နောက်လှည့်မကြည့်ဘဲ ထွက်သွား၏။

အစောင့်က ယန်ကျင့် ထွက်သွားသည်ကို ကြည့်ရင်း အံကြိတ်နေသော်လည်း ချန်လော့၏ အသွင်အပြင်ကို တွေးမိသောအခါ သူ၏ ဒေါသကို မျိုချလိုက်ရုံမှလွဲ၍ အခြား ရွေးချယ်စရာ မရှိတော့ချေ။

…

ပင်မခန်းမသို့ ပြန်ရောက်သောအခါ ချန်လော့က ယွီယန်ဇီ၏ ထိုင်ခုံတွင် ထိုင်နေ၏။

ယန်ကျင့်က မျက်နှာပေါ်တွင် အပြုံးတစ်ခုဖြင့် ချန်လော့ထံသို့ ပြေးလာသည်။

"အစ်ကိုကြီးချန်... ဒါ အစ်ကိုကြီး တောင်းထားတဲ့ သိုင်းကွက်တွေပါ..."

ချန်လော့က သိုင်းကွက် စာအုပ် လေးအုပ်ကို ကောက်ယူ၍ တစ်ချက် ကြည့်လိုက်သည်... "မုန်တိုင်းလက်သီး"၊ "အေးစက်သော မိုးကြိုးလက်ဝါး"၊ "လေပြင်းဝှေ့ခြေထောက်သိုင်း" နှင့် "ကြယ်ခုနစ်ပွင့် ဓားသိုင်း"။

"ကောင်းတယ်... သေချာ လုပ်ခဲ့တာပဲ..."

ချန်လော့က သိုင်းကွက် လေးခုကို သူ၏ သိုလှောင်အိတ်ထဲသို့ ထည့်လိုက်ပြီး လှည့်ကာ အချိန်ဆွဲမနေဘဲ ထွက်ခွာသွား၏။

ယန်ကျင့်က ထိုနေရာတွင် ရပ်နေပြီး သူ၏ မျက်လုံးများထဲတွင် အံ့အားသင့်သည့် အရိပ်အယောင်တစ်ခု ရှိနေသည်။

‘သူ ဒီအတိုင်း ထွက်သွားကြတာလား... ဘာဆုမှ မပေးဘဲနဲ့လား…’

ချန်လော့၏ ပုံရိပ်က ပင်မခန်းမမှ ပျောက်ကွယ်သွားပြီးနောက်မှသာ ချန်လော့က သူ့ကို အခြား မည်သည့်အရာဖြင့်မျှ ဆုချရန် ရည်ရွယ်ချက် မရှိကြောင်း ယန်ကျင့် သဘောပေါက်သွား၏။

ဒါပေမဲ့ ငါ လိုချင်တာရပီးပီပဲလေ ဟားးဟားး…

ချန်လော့၏ ဂုဏ်သတင်းဖြင့် သူ သွားလေရာ နေရာတိုင်းတွင် သူ လုပ်ချင်သမျှကို လုပ်နိုင်၏။

“ပြီးတော့ အစကတည်းက ချန်လော့က ငါ့နာမည်ကို မေးခဲ့တာက တစ်ခုခု မှားယွင်းသွားရင် ငါ့ကို ကူညီပေးနိုင်ဖို့ ငါ့နာမည်ကို သိချင်လို့ “

“ချန်လော့က ငါ့ရဲ့ ကျောထောက်နောက်ခံ ဖြစ်နေတာကပဲ ငါ့အတွက် အကြီးမားဆုံး ဆုလာဘ် မဟုတ်ဘူးလား…”

“ဒါက ဝိညာဉ်ကျောက်တုံး ရာချီရတာထက် အများကြီး ပိုကောင်းတယ်…”

ဤအရာကို တွေးမိသောအခါ ယန်ကျင့်၏ မျက်နှာက အပြုံးတစ်ခုဖြင့် ချက်ချင်း လင်းလက်သွား၏။

သို့သော် အမှန်တကယ်တော့ ချန်လော့သည် ဤမျှလောက်အထိ မတွေးခဲ့ပေ။

သူနာမည် မေးတာက လေးစားမှု သက်သက်ပဲ…

မည်သို့ပင်ဆိုစေ အနာဂတ်တွင် သူ၏ အကူအညီ လိုအပ်ဦးမည် ဖြစ်၏။

‘ဆုမပေးတဲ့ ကိစ္စနဲ့ ပတ်သက်ပြီး... အဲဒီအတွက် အကြောင်းပြချက် လိုသေးလို့လား…’

ချန်လော့သည် အပြည့်အဝ တစ်ခါတည်း ပေးချေခဲ့ပြီး ဖြစ်သည်။

‘အရင်က ငါ သူ့ကို ပေးခဲ့တဲ့ အိတ်က အတော်လေး ရက်ရောနေပြီ... သူ့ကို ထပ်ပေးရင် ငါက အရူး ဖြစ်မနေဘူးလား’

ထို့အပြင် သူ၏ လစဉ် ထောက်ပံ့ကြေး ရပ်ဆိုင်းခံလိုက်ရကြောင်း သတင်းကို သူ ယခုလေးတင် ရရှိခဲ့သော်လည်း အစပိုင်းတွင် သူ ဂရုမစိုက်ခဲ့ပေ။

တစ်လလျှင် ဝိညာဉ်ကျောက်တုံး ၅၀ ဆိုသည်မှာ ချန်လော့အတွက် ဘာမျှ မဟုတ်ချေ။

သို့သော် သူသည် အနှစ် ၂၀ လုံးလုံး ရပ်ဆိုင်းခံလိုက်ရပြီး စုစုပေါင်း ဝိညာဉ်ကျောက်တုံး ၁၂၀၀၀ အထိ ရှိကြောင်း ချန်လော့ ကြားလိုက်ရပြီးနောက်မှသာ…

ထိုအခိုက်အတန့်မှာပင် ချန်လော့က သူ၏ ရင်ဘတ်ကို ဓားဖြင့် ထိုးခံလိုက်ရသကဲ့သို့ ခံစားလိုက်ရ၏။

ဝိညာဉ်ကျောက်တုံး ၁၂၀၀၀ က သူ ရက်ပေါင်း ၁၂၀ ကြာ ကျင့်ကြံရန် အတွက် လုံလောက်သည်။ အဆ ၁၀၀ တိုးပွားစေသော အာနိသင်ဖြင့် ဆိုလျှင် အကြမ်းဖျင်းအားဖြင့် ရက်ပေါင်း ၁၂၀၀၀ သို့မဟုတ် ၃၂ နှစ်ခန့် ဖြစ်၏။

လူရွှင်တော်တွေ တစ်ခါက ပြောခဲ့ဖူးသလို "တခြားလူတွေရဲ့ အချိန်ကို အကြောင်းပြချက် မရှိဘဲ ဖြုန်းတီးတာက လူသတ်တာနဲ့ အတူတူပဲ..." တဲ့…

ချန်လော့ကလည်း ဤသို့ ပြောချင်သည်။

"တခြားလူတွေရဲ့ ပိုက်ဆံကို အကြောင်းပြချက် မရှိဘဲ ယူတာက ပိုက်ဆံအတွက် လူသတ်တာနဲ့ အတူတူပဲ..." တဲ့…

သို့သော် ချန်လော့က မကန့်ကွက်ရဲပေ။ အဘယ်ကြောင့်ဆိုသော် ပြစ်ဒဏ်ပေးရခြင်း၏ အကြောင်းရင်းမှာ ချန်လော့က ထိုဂိုဏ်းသားကို လူဝက် တစ်ကောင်အဖြစ် ပြောင်းလဲပစ်ခဲ့ခြင်းကြောင့် ဖြစ်၏။

အကယ်၍ ဤကိစ္စက လူသူကင်းမဲ့သော နေရာတစ်ခုတွင် ဖြစ်ပျက်ခဲ့ပါက ချန်လော့က သေချာပေါက် ငြင်းဆိုပေလိမ့်မည်။

ပြဿနာမှာ ချန်လော့က လူတိုင်း၏ ရှေ့တွင် ဤသို့ တမင်တကာ လုပ်ဆောင်ခဲ့ခြင်း ဖြစ်ရာ သူ လွတ်မြောက်ရန် နည်းလမ်း မရှိတော့ချေ။

အကယ်၍ သူက ပြစ်ဒဏ်ကို သဘောမတူပါက အကြီးအကဲများက သူ့ကို လူဝက် အဖြစ် ပြောင်းလဲပစ်မည်ကို စိုးရိမ်ရ၏။

ချန်လော့က ကုတင်ပေါ်တွင် ထိုင်၍ အကူအညီမဲ့စွာ သက်ပြင်းချလိုက်သည်။

"မဖြစ်ဘူး... အဲဒီ ဝိညာဉ်ကျောက်တုံးတွေကို ဘာပဲဖြစ်ဖြစ် ပြန်ရအောင် ယူရမယ်..."

"ဒီဝိညာဉ်ကျောက်တုံး ၁၂၀၀၀ ကို လောလောဆယ်တော့ ဂိုဏ်းချုပ်ရဲ့ စာရင်းထဲ ထည့်ထားလိုက်မယ်..."

ချန်လော့က တီးတိုး ရေရွတ်လိုက်၏။

သူက ချန်ရှင်းဂိုဏ်းတွင် အနှစ်နှစ်ဆယ်လုံး နေနိုင်မည် မဟုတ်ကြောင်း သေချာသော်လည်း ဝိညာဉ်ကျောက်တုံး ၁၂၀၀၀ ကို အကြွေးတစ်ခု အဖြစ် တိုက်ရိုက် ပြောင်းလဲကာ ဂိုဏ်းချုပ်ကို အကြွေးတင်စေခြင်းမှ မတားဆီးနိုင်ပေ။

ချန်လော့က သက်ပြင်းတစ်ချက် ချလိုက်ပြီး ဝိညာဉ်ကျောက်တုံးများ အကြောင်း စဉ်းစားခြင်းကို ရပ်တန့်ကာ သိုင်းကွက် စာအုပ် အချို့ကို ထုတ်ယူလိုက်၏။

ပါရမီ မြှင့်တင်ပြီးနောက် ချန်လော့၏ သိုင်းကွက်အမျိုးမျိုးကို ကျင့်ကြံသည့် အမြန်နှုန်းက သိသိသာသာ တိုးတက်လာသည်။

ပျမ်းမျှ လူတစ်ယောက် အတွက်မူ သူတို့တွင် သိုင်းကွက်များ များလေလေ ပြဿနာ ပိုများလေလေ ဖြစ်၏။

အဘယ်ကြောင့်ဆိုသော် သိုင်းကြမ်း တစ်အုပ်စီက ကျင့်ကြံရန် အချိန် လိုအပ်သောကြောင့်လည်း ၎င်းကို ပြီးပြည့်စုံအဆင့် ရောက်အောင် အမြဲတမ်း ကျင့်ကြံနိုင်မည် မဟုတ်သောကြောင့် ဖြစ်သည်။

ထို့ကြောင့် လူအများစုက အဓိက အဆင့်တစ်ခုစီတွင် ကျင့်ကြံရန် သိုင်းကွက် သုံးခုမှ ငါးခုကိုသာ ရွေးချယ်လေ့ ရှိကြ၏။

ချန်လော့ကတော့ ကွာခြားသည်။

‘ သူ့မှာ စနစ် ရှိတယ်လေ... သူ့ကို သိုင်းကွက် တစ်ရာ ပေးလိုက်ရင်တောင် သူက အားလုံးကို ကျင့်ကြံနိုင်တယ်…’

ထို့ကြောင့် ချန်လော့ အတွက်မူ သိုင်းကွက် များလေလေ ပိုကောင်းလေလေ ဖြစ်၏။

သိုင်းကွက်ကို ထုတ်ယူပြီးနောက် ချန်လော့က အချိန်မဖြုန်းတော့ဘဲ ချက်ချင်း စတင် ကျင့်ကြံတော့သည်။

"ဝိညာဉ်ကျောက်တုံး ၁၀၀ ကို အသုံးပြု၍ အဆ ၁၀၀ တိုးပွားစေသော အာနိသင်ကို အသက်သွင်းလိုက်ပါပြီ..."

"သင်က 'မုန်တိုင်းလက်သီး' ကို တစ်နာရီကြာ ကျင့်ကြံခဲ့တယ် ….အဆတစ်ရာ တိုးပွားပြီးနောက် ' မုန်တိုင်းလက်သီး' ကို နာရီတစ်ရာကြာ ကျင့်ကြံပြီးသွားပါပြီ..."

"သင်၏ မုန်တိုင်းလက်သီး က အစပြုအဆင့် ကို ရောက်ရှိသွားပါပြီ..."

…

"သင်က 'အေးစက်သော မိုးကြိုးလက်ဝါး' ကို ရှစ်နာရီကြာ ကျင့်ကြံခဲ့တယ်... အဆတစ်ရာ တိုးပွားသွားပြီးနောက် သင်က 'အေးစက်သော မိုးကြိုးလက်ဝါး' ကို နာရီ ရှစ်ရာကြာ ကျင့်ကြံပြီးသွားပါပြီ..."

"သင်၏ 'မိုးကြိုးလက်ဝါး' က အသေးစားအောင်မြင်မှုအဆင့် ကို ရောက်ရှိသွားပါပြီ..."

...

"သင်က 'လေပြင်းဝှေ့ခြေထောက်သိုင်း' ကို တစ်နေကုန် ကျင့်ကြံနေတယ်... သင်က 'လေပြင်းဝှေ့ခြေထောက်သိုင်း' ကို ရက်တစ်ရာကြာ ကျင့်ကြံပြီးသွားပါပြီ..."

“သင်၏ "လေပြင်းဝှေ့ခြေထောက်သိုင်း" က အကြီးစားအောင်မြင်မှုအဆင့် ကို ရောက်ရှိသွားပါပြီ…”

…

"သင်က ကြယ်ခုနစ်ပွင့် ဓားသိုင်း ကို သုံးရက် အပြည့် ကျင့်ကြံခဲ့တယ်... သင်က ကြယ်ခုနစ်ပွင့် ဓားသိုင်း ကို ရက် ၃၀၀ ကြာ ကျင့်ကြံပြီးသွားပါပြီ..."

"သင်၏ ကြယ်ခုနစ်ပွင့် ဓားသိုင်း က ပြီးပြည့်စုံအဆင့် ကို ရောက်ရှိသွားပါပြီ..."

…

ချန်လော့က ဆက်တိုက် ကျင့်ကြံနေခဲ့ပြီး သူ၏ သိုင်းကွက် ကျွမ်းကျင်မှုများက တဖြည်းဖြည်း တိုးတက်လာ၏။

သိုင်းကွက် တစ်ခုတည်းကိုသာ အထူးပြုမည့် အစား သူက ၎င်းတို့ အားလုံးကို အတူတကွ ကျင့်ကြံခဲ့သည်။

ဤသည်က သာမန် လူများအတွက် ရူးသွပ်နေပုံ ပေါက်၏။ သိုင်းကွက် တစ်ခုကို ကျင့်ကြံခြင်းကပင် သူတို့၏ စွမ်းအင် အားလုံးကို ကုန်ခမ်းစေရန် လုံလောက်ပြီး သူတို့ ဘာမှ မအောင်မြင်နိုင်သည်လည်း ဖြစ်နိုင်သည်။

အကယ်၍ မင်းက သိုင်းကွက် အများအပြားကို ရမ်းသန်း လေ့လာဖို့ ကြိုးစားမယ် ဆိုရင် အရာရာကို တတ်ယောင်ကား ဖြစ်နေပြီး ဘာတစ်ခုမှ ကျွမ်းကျင်မှာ မဟုတ်ဘူး…

သို့သော်လည်း ချန်လော့က သိုင်းကွက် တစ်ခုစီ၏ ကျွမ်းကျင်မှုကို အလွန် လျင်မြန်သော အရှိန်ဖြင့် မြှင့်တင်ရန် အစွမ်းထက်သော စနစ်ကို အားကိုးခဲ့၏။

သူ ကျင့်ကြံသည့် ဆယ်ရက်မြောက် နေ့တွင် ချန်လော့သည် သိုင်းကွက် လေးခုစလုံးကို ပြီးပြည့်စုံအဆင့် သို့ အောင်မြင်စွာ ကျင့်ကြံနိုင်ခဲ့သည်။

အကယ်၍ ဤသတင်းသာ ထွက်သွားပါက လူတိုင်း အတော်လေး ထိတ်လန့်သွားကြမည် ဖြစ်၏။

“ဆယ်ရက် အတွင်းမှာ သိုင်းကွက် စာအုပ် လေးအုပ်စလုံးကို ပြီးပြည့်စုံအဆင့် ရောက်အောင် ကျင့်ကြံနိုင်ခဲ့တယ်... ပြီးတော့ ဒီ သိုင်းကွက်တွေက မတူညီတဲ့ သိုင်းကွက် အမျိုးအစား လေးမျိုးကနေ လာတာလေ…”

ဤကဲ့သို့သော ပါရမီသည် မကြုံစဖူး ပြိုင်ဘက်ကင်းလွန်းပေသည်။

အခန်း (၉၄) လက်အောက်ငယ်သားများ

ချန်လော့ ဆေးတောင်ထွတ်သို့ ရောက်ရှိပြီး တစ်လ အကြာတွင်…

ဆေးတောင်ထွတ်၏ အဝင်အထွက် တစ်ခု၌…

ယန်ချင်းချွမ်က သစ်သားခွေးခြေခုံလေး တစ်ခုပေါ်တွင် ထိုင်နေပြီး သူ၏ မျက်ခုံးများ တွန့်ကွေးနေကာ မျက်နှာပေါ်တွင် စိုးရိမ်ပူပန်မှုများ အပြည့် ရှိနေသည်။

"အစ်ကိုကြီးယန်... အဲဒီ ချန်လော့ က တစ်သက်လုံး ဆေးတောင်ထွတ်မှာ ပုန်းနေဖို့ စီစဉ်ထားတာလား..."

အနီးအနားတွင် ရပ်နေသော အတွင်းဂိုဏ်းသား တစ်ယောက်က မမေးဘဲ မနေနိုင်တော့ချေ။

သူတို့က ဆေးတောင်ထွတ်တွင် အပြည့်အဝ တစ်လလုံးလုံး စောင့်ဆိုင်းနေခဲ့သော်လည်း ချန်လော့၏ အရိပ်အယောင်ကိုပင် မတွေ့ရပေ။

ထို့အပြင် ဆေးတောင်ထွတ်ရှိ ချန်လော့၏ လုပ်ရပ်များကြောင့် ယခုအခါ မည်သူကမျှ သူတို့အတွက် ဘာမှ မလုပ်ရဲကြတော့ချေ။

ချန်လော့က သူတို့ သတိမထားမိချိန်တွင် ခိုးထွက်သွားမည်ကို တားဆီးရန် လူအင်အား နည်းပါးနေပြီ ဖြစ်သော ယန်ချင်းချွမ်နှင့် သူ့အဖွဲ့မှာ ဆေးတောင်ထွတ်၏ အဝင်အထွက်များတွင် စောင့်ဆိုင်းနေရုံမှလွဲ၍ အခြား ရွေးချယ်စရာ မရှိတော့ပေ။

ထို့နောက် တစ်လ ကုန်ဆုံးသွားပြီး သူတို့က ချန်လော့ကို မတွေ့ရသလို သူနှင့် ပတ်သက်သည့် သတင်းအစအနကိုမျှ မကြားရပေ။

ယန်ချင်းချွမ် သက်ပြင်းချလိုက်ပြီး သူ၏ မျက်လုံးများထဲတွင် အကူအညီမဲ့မှုများ ပြည့်နှက်နေ၏။

အမှန်တကယ်တော့ သူသည် ဗဟုသုတ ကြွယ်ဝသူ တစ်ယောက် ဖြစ်သည်။ မည်သို့ပင်ဆိုစေ သူသည် တိုက်ရိုက်တပည့် တစ်ယောက် ဖြစ်ရာ ချန်လော့၏ တည်နေရာကို ရှာဖွေရန် အလွန် လွယ်ကူသည်။

ထို့အပြင် ချန်လော့က မည်သည့်အရာကိုမျှ ဖုံးကွယ်ထားရန် ရည်ရွယ်ချက် မရှိခဲ့ပေ။

သို့သော် ပြဿနာမှာ သူသည် ဤအတွင်းဂိုဏ်းသားများ အားလုံးကို ဆေးတောင်ထွတ် ကဲ့သို့သော နေရာမျိုးသို့ ဦးဆောင်၍ ခေါ်မသွားနိုင်ခြင်း ဖြစ်၏။

ထိုအချိန်ရောက်လျှင် သူတို့သည် ချန်လော့ကို မလှုပ်ရှားနိုင်မီမှာပင် ဆေးတောင်ထွတ် အကြီးအကဲ၏ ရိုက်ထုတ်ခြင်းကို ခံရပေလိမ့်မည်။

"အဲဒီ ခွေးကောင်... သူက တကယ်ပဲ တစ်သက်လုံး သူ့ရဲ့ အခွံထဲမှာ ပုန်းနေဖို့ စီစဉ်ထားတာလား..."

ယန်ချင်းချွမ်က မကျိန်ဆဲဘဲ မနေနိုင်တော့ချေ။

စမ်းသပ်လေ့ကျင့်ရေးကွင်းမှ ထွက်ခွာလာပြီးနောက် ချန်လော့က နေရာ နှစ်ခုတွင်သာ နေထိုင်ခဲ့၏။

တစ်ခုက ချင်းယန်တောင်ထွတ် ဖြစ်ပြီး နောက်တစ်ခုက ဆေးတောင်ထွတ်၏ အနောက်ဘက် ခန်းမ ဖြစ်သည်။

သူက သူတို့ကို လှုပ်ရှားဖို့ အခွင့်အရေး တစ်စက်လေးတောင် မပေးခဲ့ဘူး…

ထိုစဉ် ယန်ချင်းချွမ်က ဆေးတောင်ထွတ်မှ ဂိုဏ်းသား တစ်ယောက် သူ့ထံသို့ အပြေးအလွှား လာနေသည်ကို ရုတ်တရက် မြင်လိုက်ရ၏။

ယန်ချင်းချွမ်က ထိုဂိုဏ်းသားကို အဝေးမှ တစ်ချက် ကြည့်လိုက်ပြီး သူ၏ ရုပ်ရည်ကို ပြောင်းလဲရန် မည်သည့် ရုပ်ဖျက် နည်းစနစ်ကိုမျှ အသုံးမပြုထားကြောင်း အတည်ပြုပြီးနောက် သူ့ကို လျစ်လျူရှုထားလိုက်သည်။

သူ ဤနေရာသို့ လာရသည့် တစ်ခုတည်းသော ရည်ရွယ်ချက်မှာ ချန်လော့ကို ရှာဖွေရန် ဖြစ်ပြီး အခြား မည်သူနှင့်မျှ မပတ်သက်ချင်ပေ။

သို့သော် ထိုဂိုဏ်းသားက ယန်ချင်းချွမ်ထံသို့ တိုက်ရိုက် လျှောက်လာ၏။

ယန်ချင်းချွမ်က အကူအညီမဲ့စွာ သက်ပြင်းမချဘဲ မနေနိုင်တော့ချေ။

လွန်ခဲ့သော တစ်လတာ ကာလအတွင်း လမ်းညွှန်မှု တောင်းခံရန် လူများစွာ သူ့ထံ လာရောက်ခဲ့ကြသော်လည်း သူသည် အားလုံးလိုလိုကို လျစ်လျူရှုခဲ့၏။

သူ့ကို ထပ်မနှောင့်ယှက်ရန် သူတို့ကို သတိပေးထားပြီး ဖြစ်သော်လည်း ၊ သူတို့သည် ဤမျှအထိ ဇွဲကောင်းနေမည်ဟု သူ တစ်ခါမှ မထင်ထားခဲ့ပေ…

"ကောင်းပြီလေ... သူတို့ရဲ့ ဇွဲလုံ့လကို ထောက်ထားပြီး လှည့်ကွက် အနည်းငယ် သင်ပေးလိုက်ပါမယ်..."

ယန်ချင်းချွမ်က ပြောရင်းနှင့် သူ၏ ဂုဏ်သတင်းကြောင့် ရောက်လာသော ထိုဂိုဏ်းသားကို လမ်းညွှန်ချက် အနည်းငယ် ပေးရန် ဆုံးဖြတ်လိုက်၏။

“ ဘာပဲဖြစ်ဖြစ် ဒီနေရာမှာ သူ လုပ်စရာ ဘာမှမရှိဘူးလေ…”

သို့သော် သူ စကားမပြောရသေးမီမှာပင် ထိုဂိုဏ်းသားက ကျယ်လောင်စွာ အော်ဟစ်လိုက်သည်။

"အစ်ကိုကြီးယန်... ဆေးဖော်ခန်းထဲမှာ ချန်လော့ရဲ့ လူတွေထဲက တစ်ယောက်ကို ကျွန်တော်တို့ ဝိုင်းထားလိုက်ပြီ..."

"သူ့ကို ဖမ်းဖို့ မြန်မြန် လူတချို့ ခေါ်သွားလိုက်ပါ... မဟုတ်ရင် သူ ထွက်ပြေးသွားလိမ့်မယ်..."

ယန်ချင်းချွမ်မှာ အံ့အားသင့်သွား၏။

သူ လုံးဝ ဆွံ့အသွားသည်။

‘ချန်လော့ရဲ့ လူ ဟုတ်လား... သူတို့က သူ့ကို ဝိုင်းဖမ်းဖို့တောင် ကူညီပေးတာလား..’

‘တကယ်ကြီးလားဟ... ချန်လော့ ဆေးလုံးတောင်ထိတ်ပေါ် ရက်စက်မှု လုပ်ပြီးကတည်းက ဘယ်ဂိုဏ်းသားမှ ငါ့အတွက် ဘာမှ မလုပ်ရဲကြတော့ဘူး မဟုတ်ဘူးလား…’

‘ရှာရခက်တဲ့ လူတွေကို ဒီအတွင်းဂိုဏ်းသားတွေကများ ငှားထားတာလား…’

သူက ဘေးရှိ အတွင်းဂိုဏ်းသားများကို ကြည့်လိုက်ရာ သူတို့ အားလုံး ဇဝေဇဝါ ဖြစ်နေကြပြီး မည်သည့်အရာ ဖြစ်ပျက်သွားသည်ကို လုံးဝ မသိကြကြောင်း တွေ့လိုက်ရ၏။

တစ်ဖက်လူများသည်လည်း သူကဲ့သို့ပင် မည်သည့်အရာ ဖြစ်ပျက်နေသည်ကို မသိကြောင်း ပြသနေသည်။

‘ဒီဂိုဏ်းသားကို ဘယ်သူက ရှာတွေ့ခဲ့တာလဲ... ပြီးတော့ ချန်လော့ရဲ့ လူကို ဘာလို့ သူတို့က ဝိုင်းဖမ်းပေးနေတာလဲ... ပြီးတော့ ချန်လော့ရဲ့ လူက ဘယ်သူတွေလဲ…’

ဤအချိန်၌ ယန်ချင်းချွမ်မှာ ရေတွက်၍ မရနိုင်သော မေးခွန်းများဖြင့် ပြည့်နှက်နေပြီး မည်သည့်အရာ ဖြစ်ပျက်နေသည်ကို လုံးဝ နားမလည်နိုင်တော့ချေ။

ယန်ချင်းချွမ်က ဘာမှ မတုံ့ပြန်သည်ကို မြင်သောအခါ ထိုဂိုဏ်းသားက ပို၍ စိုးရိမ်လာ၏။

"အစ်ကိုကြီးယန်... အချိန်က ဘယ်သူ့ကိုမှ မစောင့်ဘူးနော်... အစ်ကိုကြီး နည်းနည်း နောက်ကျသွားရင် အဲဒီ ခွေးကောင် လွတ်သွားလိမ့်မယ်..."

"အဲဒီကောင်နဲ့ ချန်လော့က တော်တော် ရင်းနှီးကြတယ်... သူ့ကိုသာ ဖမ်းထားရင် ချန်လော့ကို အလျှော့ပေးအောင် လုပ်လို့ ရနိုင်တယ်..."

ထိုလူ၏ မျက်နှာပေါ်ရှိ အမူအရာကို ကြည့်ခြင်းအားဖြင့် သူ လိမ်ပြောနေပုံ မပေါ်ပေ။

ဒါပေမဲ့ သူက ဘာလို့ ငါ့ကို ကူညီရတာလဲ…

ထိုအခိုက်အတန့်၌ ယန်ချင်းချွမ်၏ စိတ်ထဲ၌ အတွေးတစ်ခု ရုတ်တရက် လင်းလက်သွား၏။

‘ချန်လော့က ထောင်ချောက်ဆင်ဖို့ တစ်ယောက်ယောက်ကိုများ ငှားလိုက်တာလား…’

သို့သော် ပြန်စဉ်းစားကြည့်တော့ တစ်ခုခု မှားယွင်းနေမှန်း သဘောပေါက်သွားသည်။

ဒါပေမဲ့ မဖြစ်နိုင်ဘူး...

လောချင်းယွီက ချန်လော့အား တိုက်ခိုက်ခွင့် ပြုမည် မဟုတ်သလို ချန်လော့၏ ခွန်အား အရဆိုလျှင်လည်း ယန်ချင်းချွမ်၏ ပြိုင်ဘက် လုံးဝ မဟုတ်ပေ။

"လမ်းပြပါ..."

အချိန် အတန်ကြာပြီးနောက် နောက်ဆုံးတွင် ယန်ချင်းချွမ်က ပြောလိုက်ပြီး သူ၏ နောက်ကွယ်ရှိ အတွင်းဂိုဏ်းသားများကို လှည့်ကြည့်လိုက်၏။

"မင်းတို့ အားလုံး ဒီမှာပဲ နေပြီး စောင့်ကြည့်ကြ... ချန်လော့ အခွင့်ကောင်းယူပြီး ခိုးထွက်မသွားအောင် သတိထား..."

မေးခွန်းများစွာ ရှိနေသော်လည်း သေချာ စဉ်းစားပြီးနောက် ယန်ချင်းချွမ်က ထိုဂိုဏ်းသား နောက်သို့ လိုက်ရန် ဆုံးဖြတ်လိုက်၏။

မည်သို့ပင်ဆိုစေ ဤနေရာတွင် နေရသည်မှာ အတော်လေး ပျင်းစရာ ကောင်းနေသဖြင့် ထိုသကောင့်သားများ ဘာလုပ်နေကြသည်ကို သွားကြည့်ခြင်းက ပိုကောင်းပေလိမ့်မည်။

ထို့အပြင် ဤအတွင်းဂိုဏ်းသားများက အဝင်အထွက်ကို စောင့်ကြပ်နေဦးမည် ဖြစ်ရာ ချန်လော့ကိုယ်တိုင် အာရုံလွှဲသည့် နည်းဗျူဟာကို အသုံးပြုချင်လျှင်တောင် အလုပ်ဖြစ်မည် မဟုတ်ချေ။

ထိုသတင်းလာပို့သော တပည့်က ယန်ချင်းချွမ်ကို ဆေးဖော်ခန်းဆီသို့ အလွန် မြန်ဆန်သော အရှိန်ဖြင့် ဦးဆောင် ခေါ်သွားရာ တကယ်ကို အလျင်လိုနေကြောင်း ထင်ရှားသည်။

တစ်ချိန်တည်းမှာပင် ဆေးဖော်ခန်း အတွင်း၌ အတွင်းဂိုဏ်းသား တစ်ယောက်ကို အခြား ဂိုဏ်းသားများက ဝန်းရံထားကြ၏။

ထိုဂိုဏ်းသားများက သူ့ကို စိုက်ကြည့်နေကြပြီး သူတို့၏ မျက်လုံးများထဲတွင် ဒေါသများ တောက်လောင်နေကာ သူတို့၏ လက်သီးများကို ဆုပ်ထားကြသော်လည်း မည်သူကမျှ မလှုပ်ရှားရဲကြပေ။

ဝန်းရံခံထားရသော ထိုဂိုဏ်းသားမှာမူ ဤဂိုဏ်းသားများကို လုံးဝ ဂရုမစိုက်သည့်အလား မောက်မာနေဆဲ ဖြစ်၏။

သူ့ကို ဝန်းရံထားသော ဂိုဏ်းသားများထဲတွင် သူ့ထက် သန်မာသူ များစွာ ရှိသော်လည်း ၊ သူသည် ဂရုမစိုက်သော အမူအရာဖြင့် ရှိနေဆဲသာ။

အလွန်အမင်း မောက်မာနေသော ထိုဂိုဏ်းသားမှာ ချန်လော့ အတွက် အလုပ်လုပ်ပေးနေသော ယန်ကျင့်မှလွဲ၍ အခြားသူ မဟုတ်ပေ။

ချန်လော့ အတွက် စာအုပ်များ သွားယူပေးစဉ် အကူအညီ အနည်းငယ် တောင်းခံခဲ့သည့် ထိုနေ့ကတည်းက သူသည် ကမ္ဘာသစ် တစ်ခုသို့ တံခါးဖွင့်လိုက်သကဲ့သို့ ဖြစ်သွားခဲ့၏။

ဤရက်များ အတွင်း သူသည် ဂိုဏ်းထဲတွင် အာဏာရှင် တစ်ယောက်လို ပြုမူရန် ချန်လော့၏ အမည်ကို စတင် အသုံးပြုလာခဲ့သည်။

ပထမ နှစ်ရက် အတွင်း သူသည် အခြား ဂိုဏ်းသားများကို သူ၏ အလုပ်များ လုပ်ခိုင်းခြင်း သို့မဟုတ် သူ့အတွက် အသေးအမွှားများ လုပ်ခိုင်းခြင်း တို့ဖြင့် ပျော်ရွှင်နေတတ်၏။

ထိုအကင်းပါးသူများက ချန်လော့နှင့် သူ၏ ဆက်ဆံရေးကို ထောက်ထား၍ စကားများများ တစ်ခွန်းမှ မပြောရဲကြဘဲ အရာအားလုံးကို လက်ခံရုံသာ တတ်နိုင်ခဲ့ကြသည်။

သို့သော် ဤသို့ဖြင့် ယန်ကျင့်သည် ရုတ်တရက် မောက်မာလာပြီး အခြေအနေကို အခွင့်ကောင်းယူရန် စတင်လာ၏။

ယခုအခါ ချန်လော့က သူ့ကို မဆက်သွယ်လျှင်တောင် သူသည် ချန်လော့ လိုအပ်သော သိုင်းကွက်များကို ရှာဖွေရန် ကျမ်းစာကြည့်တိုက်သို့ အခါအားလျော်စွာ သွားလေ့ရှိသည်။

အကယ်၍ အစောင့်များက သူ့ကို မြင်ပြီး အမိန့်စာ တောင်းရဲပါက သူတို့သည် ရိုက်နှက် ကန်ကျောက်ခံရမည် ဖြစ်၏။

အခြား တစ်ဖက်လူတွင် တာအိုလက်တွဲဖော် ရှိမရှိကို ဂရုမစိုက်ဘဲ ချောမောလှပသော မိန်းကလေး ဂိုဏ်းသား အချို့ကို မြင်လျှင် သူတို့ထံ တိုက်ရိုက် သွားရောက်ကာ သူ၏ တာအိုလက်တွဲဖော် ဖြစ်လာရန် တောင်းဆိုသည်ကိုပင် တွေ့ခဲ့ရသေးသည်။

မူလက တန်းစီစောင့်ဆိုင်းရန် လိုအပ်သော ဆေးဖော်ခန်းကိုလည်း သူသည် ဂရုမစိုက်ဘဲ တိုက်ရိုက် ဝင်ရောက်လေ့ ရှိ၏။

နေရာကောင်း တစ်ခုကို မျက်စိကျပြီးနောက် ထိုသူက ဆေးဖော်စပ်နေဆဲ ဖြစ်သည်ကိုပင် ဂရုမစိုက်ဘဲ ဆေးဖော်ခန်းထဲမှ နှင်ထုတ်ကာ သူကိုယ်တိုင် ဆေးဖော်စပ်ခြင်းကို စတင်တတ်သေး၏။

သို့သော် မည်သူကမျှ တစ်ခွန်းမှ မဟရဲကြပေ။ သူတို့၏ နောက်ကွယ်တွင် ချန်ရှင်းဂိုဏ်း၏ "နံပါတ်တစ် လူဆိုး" ဖြစ်သော ချန်လော့ ရှိနေသဖြင့် သူတို့ ဘာမှ မတတ်နိုင်ကြချေ။

ယန်ကျင့်သည် "ဆေးတောင်ထွတ်၏ လူဆိုး" ဟူသော နာမည်ပြောင်ကိုပင် ရရှိခဲ့ပြီး ၊ သူသည် အစ်ကိုကြီး တစ်ယောက်လို ပြုမူကာ သူ၏ လက်အောက်ငယ်သားများကို ခေါ်ယူခဲ့သေး၏

သို့သော် ချန်လော့ကို ကျော်လွန်သွားမည်ကို စိုးရိမ်သဖြင့် သူသည် လက်လွတ်ကျွံပစ် မလုပ်ရဲပေ။

ထို့ကြောင့် သူသည် အပြင်ဂိုဏ်းသား ဆယ်ယောက်ခန့်ကိုသာ သူ၏ နောက်လိုက်များအဖြစ် ခေါ်ယူခဲ့သည်။

ဆိုလိုသည်မှာ ထိုအပြင်ဂိုဏ်းသားများက ဆေးတောင်ထွတ်သို့ ဝင်ရောက်ခွင့် မရှိပေ။ မဟုတ်ပါက သူတို့သည် ယခု ယန်ကျင့်၏ ရှေ့တွင် ရပ်ကာ ဤအတွင်းဂိုဏ်းသားများနှင့် တိုက်ခိုက်နေကြမည်မှာ သေချာ၏။