အခန်း (၉၇-၉၈)

အခန်း (၉၇) တရားဥပဒေ စိုးမိုးရေး အဖွဲ့

ယန်ချင်းချွမ်က ပင်မခန်းမ အပြင်ဘက်တွင် ရပ်၍ အပြည့်အဝ တစ်နာရီလုံးလုံး သူ၏ ဘဝတွင် တွေးတောနိုင်သမျှ ညစ်ညမ်းသော စကားလုံးတိုင်းကို အသုံးပြုကာ ကျိန်ဆဲနေခဲ့၏။

နားထောင်ပြီးနောက် ဘေးရှိ ဂိုဏ်းသားများမှာ သူတို့၏ နားများကိုပင် ဆေးကြောချင်စိတ် ပေါက်လာကြသော်လည်း ချန်လော့ကမူ ပေါ်မလာသေးပေ။

"အစ်ကိုကြီး... ဒါက အလုပ်မဖြစ်ရင် အခုပဲ လုပ်လိုက်ကြရအောင်..."

သူ၏ ဘေးတွင် ရပ်နေသော ဂိုဏ်းသား တစ်ယောက်က ယန်ချင်းချွမ်၏ စိတ်ပိုင်းဆိုင်ရာ တိုက်ခိုက်မှုများကို ထပ်မံ သည်းမခံနိုင်တော့သဖြင့် အကြံပြုလိုက်၏။

ယန်ချင်းချွမ်မှာ အံ့အားသင့်သွားသည်။

သူက သူ၏ ခြေရင်းရှိ ယန်ကျင့်ကို ငုံ့ကြည့်လိုက်၏။

သူ တစ်ခဏမျှ တိတ်ဆိတ်သွားသည်။

အမှန်တကယ်တော့ သူ ရောက်လာသည့် အချိန်မှစ၍ ယခုအထိ လှုပ်ရှားရန် တစ်ခါမျှ တကယ် မစဉ်းစားခဲ့ဖူးပေ။

အစအဆုံး ချန်လော့ကို ရန်စရန် သူက နှုတ်ဖြင့်သာ အသုံးပြုနေခဲ့ခြင်း ဖြစ်၏။

သူ၏ ခြေအောက်ရှိ ကောင်က အတွင်းဂိုဏ်းသား တစ်ယောက်သာ ဖြစ်သော်လည်း

ဂိုဏ်းအတွင်း၌ လူသတ်ခြင်းနှင့် ညှဉ်းပန်း နှိပ်စက်ခြင်းက သေးငယ်သော ကိစ္စ မဟုတ်ပေ။

အကယ်၍ သေရေးရှင်ရေး တိုက်ပွဲ ကွင်းပြင်ပေါ်တွင်သာ ဆိုပါက သဘာဝကျကျပင် မည်သူကမျှ ဘာမှ ပြောမည် မဟုတ်ချေ။

သို့သော် ဤနေရာက သေရေးရှင်ရေး တိုက်ပွဲ ကွင်းပြင် မဟုတ်ပေ။

ဒီဂိုဏ်းသားက သေရေးရှင်ရေး တိုက်ပွဲကို သဘောတူခဲ့တာ မဟုတ်ဘူးလေ…

ဒါဆို ငါ အခု လုပ်နေသမျှ အရာအားလုံးက ဂိုဏ်းရဲ့ စည်းမျဉ်းတွေကို ချိုးဖောက်နေတာပဲ…

သူ၏ ဆရာ ဓားတောင်ထွတ် အကြီးအကဲက အစွမ်းထက်သော ကျောထောက်နောက်ခံ တစ်ယောက် ဖြစ်သော်လည်း ဤကျောထောက်နောက်ခံက ချန်လော့၏ နောက်ကွယ်ရှိ လော့ချင်းယွီနှင့် အဆင့်တူ မဟုတ်ပေ။

လော့ချင်းယွီသည် ဘိုးဘေးများမှလွဲ၍ သူမ တစ်ယောက်တည်းနှင့်ပင် ဂိုဏ်း တစ်ခုလုံးကို ဖိနှိပ်နိုင်စွမ်း ရှိသူ ဖြစ်၏။

သူ့ဆရာက လောချင်းယွီမှလွဲ၍ တစ်ယောက်ချင်း တိုက်ပွဲမှာ ပြိုင်ဘက်ကင်းတဲ့ သူမျိုးလေ... တခြား တစ်ယောက်ယောက်သာ ဆိုရင်တော့ သူတို့ အရိုက်ခံရဖို့ပဲ ရှိမယ်…

သို့သော် ယခု ချန်လော့က ဘာပဲဖြစ်ဖြစ် အပြင်မထွက်လာဘဲ ငြင်းဆန်နေသဖြင့် အခက်တွေ့နေသူမှာ သူကိုယ်တိုင် ဖြစ်နေ၏။

အကယ်၍ ယခု သူ မလှုပ်ရှားပါက သူ ယခုလေးတင် လုပ်ခဲ့သမျှ အရာအားလုံးက သူ့ကိုယ်သူ အရှက်ခွဲခြင်းသာ ဖြစ်သွားပေလိမ့်မည်။

လူများက သူ့ကို စကားသာ ပြောတတ်ပြီး လက်တွေ့ မလုပ်ရဲသော၊ သတ္တိ လုံးဝ မရှိသော စက္ကူကျား တစ်ကောင်အဖြစ် ထင်မြင်သွားကြလိမ့်မည်။

ချန်လော့က အစကတည်းက အရာအားလုံးကို ရိပ်မိနေသောကြောင့် အပြင်မထွက်လာခြင်း ဖြစ်သည်ဟု ဂိုဏ်းသား အချို့က တွေးကောင်း တွေးမိပေလိမ့်မည်။

ယန်ချင်းချွမ် မလှုပ်ရှားရဲဘူးဆိုတာ သိနေလို့ သူက အတွင်းမှာ ဒီလောက် တည်တည်ငြိမ်ငြိမ်နဲ့ ထိုင်နေနိုင်တာပေါ့…

ဆေးတောင်ထွတ်တွင် ဂိုဏ်းသား၏ ခြေလက်များကို ဖြတ်တောက်ပစ်ခဲ့သည့် ချန်လော့၏ လုပ်ရပ်နှင့် ယနေ့ ယန်ချင်းချွမ်၏ စက္ကူကျား အပြုအမူတို့ကို နှိုင်းယှဉ်ကြမည် ဖြစ်ပြီး လူပြက်မှာ ယန်ချင်းချွမ် ကိုယ်တိုင် ဖြစ်ကြောင်း ကောက်ချက်ချကြလိမ့်မည်။

ယန်ချင်းချွမ်၏ အမူအရာက အတော်လေး မသက်မသာ ဖြစ်နေ၏။

ယခု သူက အကျပ်ရိုက်နေပြီ ဖြစ်သည်။

သို့သော် ယခု အခြေအနေက ဤသို့ ဖြစ်လာပြီ ဖြစ်ရာ သူ့တွင် ရွေးချယ်စရာ တစ်ခုသာ ကျန်တော့ပုံ ရ၏။

အတန်ကြာအောင် စဉ်းစားပြီးနောက် သူက လူတိုင်း၏ စောင့်ကြည့်နေသော အကြည့်များအောက်တွင် သူ၏ ခါးမှ ဓားရှည်ကို ဆွဲထုတ်လိုက်သည်။

မျက်ခွံများ လေးလံလာသည်အထိ အချိန်အကြာကြီး စောင့်ဆိုင်းနေခဲ့ရသော ဂိုဏ်းသားများမှာ ထိုမြင်ကွင်းကြောင့် ချက်ချင်း စိတ်ဝင်စားသွားကြ၏။

ဤလူ အများစုက ဆေးဖော်ခန်းမှ ဤနေရာအထိ လိုက်လာခဲ့ကြခြင်း ဖြစ်သည်။

သူတို့ မြင်တွေ့ချင်သည်မှာ ယန်ချင်းချွမ်နှင့် ချန်လော့တို့ကြားရှိ ထိပ်တိုက် ရင်ဆိုင်မှု မဟုတ်သလို အတွင်းဂိုဏ်းသားများက ချန်လော့ကို သတ်ဖြတ်သည့် မြင်ကွင်းများကိုလည်း မဟုတ်ပေ။ ယန်ချင်းချွမ်က ယန်ကျင့်ကို မည်သို့ ဖြေရှင်းမည်နည်း ဆိုသည်ကိုသာ ဖြစ်၏။

ချန်လော့၏ အသက်ရှင်ခြင်း သို့မဟုတ် သေဆုံးခြင်းက သူတို့နှင့် ဘာမှ မဆိုင်ပေ။ အလွန်ဆုံး ချန်လော့ သေဆုံးပြီးနောက် ယန်ကျင့်ကို ကာကွယ်ပေးနိုင်မည့်သူ မရှိတော့သဖြင့် ယန်ကျင့်ကို အတားအဆီး မရှိဘဲ ပညာပေးနိုင်မည် ဟူသော အဓိပ္ပာယ်သာ ဖြစ်သည်။

သို့သော် ချန်လော့ သေဆုံးသွားခြင်း မရှိပါက သူတို့ အမျှော်လင့်ဆုံး အရာမှာ ယန်ကျင့် ပညာပေး ခံရခြင်းပင် ဖြစ်၏။

ယန်ချင်းချွမ်က သူ၏ ဓားရှည်ကို မြှောက်လိုက်သည်နှင့်အမျှ လူတိုင်း၏ အကြည့်များက သူဆီသို့ ရောက်ရှိသွားကြသည်။

တစ်ချိန်တည်းမှာပင် မလှမ်းမကမ်းတွင် လူတစ်စုကလည်း ဤအရာ အားလုံးကို စောင့်ကြည့်နေကြ၏။

ဖွတ်…

ငွေရောင် အလင်းတန်း တစ်ခု ဖြတ်သန်းသွားပြီး သွေးဖြူရောင် လမ်းကြောင်း တစ်ခုကို ချန်ရစ်ထားခဲ့သည်။

"အား..."

ယန်ကျင့်က သူ၏ ဘယ်ဘက် လက်မောင်း လွင့်ထွက်သွားသည်နှင့် နာကျင်စွာ အော်ဟစ်လိုက်၏။

ထိုနေရာတွင် ရှိနေသော ဂိုဏ်းသားများက ရွှင်လန်းစွာ အော်ဟစ်လိုက်ကြသည်။

သူတို့က ရှေ့သို့ ပြေးသွားပြီး မြေပြင်ပေါ်ရှိ ပြတ်တောက်သွားသော လက်မောင်းကို ကောက်ယူလိုက်ကြ၏။

သူတို့က ထိုလက်မောင်းကို ယန်ကျင့်၏ ကိုယ်လုံးအလား ထင်မှတ်ကာ ထိုးကြိတ် ကန်ကျောက်ကြတော့သည်။

ယန်ချင်းချွမ်က ဤအရာ အားလုံးကို တည်ငြိမ်သော အမူအရာဖြင့် ကြည့်နေ၏။

မည်သို့ပင်ဆိုစေ သူက ရွှေအမြုတေအဆင့် ကျင့်ကြံသူ တစ်ဦး ဖြစ်ပြီး ချန်ရှင်းဂိုဏ်းတွင် နှစ်ပေါင်းများစွာ ရှိနေခဲ့သူ ဖြစ်သည်။

သူက လူပေါင်းများစွာကို သတ်ဖြတ်ခဲ့ဖူး၏။

သူက ခေါင်းမော့၍ ပင်မခန်းမ အပြင်ဘက်သို့ ကြည့်ကာ တစ်ခုခု ပြောရန် ပြင်လိုက်သည်။

သို့သော် နောက်တစ်စက္ကန့်တွင် အလွန် ကြီးမားသော စွမ်းအား တစ်ခုက သူ၏ ရင်ဘတ်မှ ရုတ်တရက် ပေါက်ကွဲထွက်လာ၏။

ဘုန်း…

အသံကျယ်တစ်ခုနှင့်အတူ ယန်ချင်းချွမ် လွင့်စင်သွားသည်။

အသံကို ကြားလိုက်ရသောအခါ လူတိုင်းက ယန်ချင်းချွမ်ကို လှည့်ကြည့်လိုက်ကြ၏။

ယန်ချင်းချွမ်က မြေပြင်ပေါ်တွင် တစ်ဝက်တစ်ပျက် လဲကျနေပြီး သူ၏ နှုတ်ခမ်းထောင့်တွင် သွေးအနည်းငယ် ရှိနေကာ ကြောက်မက်ဖွယ် ကောင်းသော အမူအရာဖြင့် ရှိနေသည်ကို တွေ့လိုက်ရသည်။

ထို့နောက် ရင်းနှီးနေသော အခြား အသံတစ်ခု ဖြည်းညင်းစွာ ထွက်ပေါ်လာ၏။

"ယန်ချင်းချွမ်... ဆေးတောင်ထွတ်မှာ လူတစ်ယောက်ကိုတောင် သတ်တော့မလို့လား ဘာလဲ ဒီအဘိုးကြီး ကို မရှိတော့ဘူးများထင်နေလား..."

အဖြူရောင် ဝတ်ရုံ ဝတ်ဆင်ထားသော အဘိုးအို တစ်ဦးက မလှမ်းမကမ်းမှ ပျံသန်းလာ၏... ဤသူမှာ ယွီယန်ဇီမှလွဲ၍ အခြားသူ မဟုတ်ပေ။

ယွီယန်ဇီကို မြင်သောအခါ ဂိုဏ်းသားများ ချက်ချင်း ဒူးတစ်ဘက် ထောက်လိုက်ကြသည်။

"အကြီးအကဲကို ဂါရဝပြုပါတယ်..."

လူအုပ်ကြီးက တစ်ခဲနက် အော်ဟစ်လိုက်ကြပြီး သူတို့၏ အသံများတွင် ကြောက်ရွံ့မှုများ ရောယှက်နေ၏။

"အကြီးအကဲ... ကျေးဇူးပြုပြီး ကျွန်တော့်အတွက် တရားမျှတမှု ရှာပေးပါ..."

ယန်ကျင့်က မြေပြင်ပေါ်တွင် လဲကျနေပြီး သူ၏ ပါးစပ်နှင့် ပြတ်တောက်သွားသော လက်မောင်း အစိတ်အပိုင်းများမှ သွေးများ ပန်းထွက်နေသည်။

သို့သော် ယွီယန်ဇီက သူ့ကို တစ်ချက်ပင် မကြည့်ခဲ့ပေ။

ယွီယန်ဇီက ထိုဂိုဏ်းသားအပေါ် မည်သည့် သနားကြင်နာမှုမျှ မခံစားရသလို ယန်ချင်းချွမ်က အရမ်း လွန်လွန်းသည်ဟုပင် ထင်နေ၏။

ဆေးတောင်ထွတ်၏ အကြီးအကဲ တစ်ယောက် အနေဖြင့် ချန်လော့နှင့် ပထမဆုံး အကြိမ် တွေ့ဆုံစဉ်က ယွီယန်ဇီ ပြောခဲ့သကဲ့သို့ပင်။

ဆေးတောင်ထွတ်တွင် ဖြစ်ပျက်သမျှ အရာအားလုံးကို သူ သိသည်။

ယန်ကျင့် ဘာတွေ လုပ်ခဲ့သလဲ ဆိုတာကို သူ အသိဆုံး ဖြစ်၏။

ချန်လော့ရဲ့ လက်အောက်ငယ်သား ဟုတ်လား... ချန်လော့က သူ့ကို စာအုပ် နည်းနည်းလောက် သယ်ပေးဖို့ပဲ အကူအညီ တောင်းခဲ့တာလေ... အဲဒီ ကောင်လေးက လုံးဝ နားလည်မှု လွဲနေတာပဲ…

သို့တိုင် ယွီယန်ဇီက သူ၏ လုပ်ရပ်များကို မျက်ကွယ်ပြုထားခဲ့ပြီး ကျမ်းစာကြည့်တိုက်မှ စာအုပ်များ ယူဆောင်ကာ သူ့ဟာ မဟုတ်သော အကျိုးအမြတ်များကို ရယူခွင့် ပြုထားခဲ့၏။

ဤအရာများက စည်းမျဉ်းများကို ချိုးဖောက်ခြင်း ဖြစ်သည်မှာ သေချာသော်လည်း ယွီယန်ဇီ၏ အမြင်တွင် စည်းမျဉ်းများက အမှန်တကယ်တော့ ထိုမျှ အရေးမကြီးပေ။

စည်းမျဉ်းစည်းကမ်းတွေကို လိုက်နာတဲ့ လူတွေက အောင်မြင်မှု ရခဲတယ်…

သူက တစ်ခါတစ်ရံ စည်းမျဉ်းများကို ချိုးဖောက်ပြီး မိမိကိုယ်ကိုယ် အတွက် အကျိုးအမြတ်များ ဖန်တီးသူများကို အမှန်တကယ် ပို၍ သဘောကျ၏။

ယန်ကျင့်က သူ၏ ကိုယ်ကျိုးအတွက် အကျိုးအမြတ် အချို့ ရရှိရန် ချန်လော့၏ အမည်ကို အသုံးပြုနေရုံသာ ဆိုပါက သူ ဘာမှ ပြောမည် မဟုတ်သလို ဤကဲ့သို့သော အပြုအမူမျိုးကိုပင် အတော်လေး သဘောကျပေလိမ့်မည်။

လူတွေက မွေးရာပါ တစ်ကိုယ်ကောင်းဆန်ကြတယ်... ပြီးတော့ အဲဒီလို လုပ်တာက ဘာမှ မမှားပါဘူး…

သို့သော် ယန်ကျင့်က တစ်ကိုယ်ကောင်းဆန်ရုံသာမက လုံးဝ ဦးနှောက်မရှိသူ ဖြစ်၏။

သူ့တွင် အစစ်အမှန် စွမ်းရည် မရှိသလို ကိုယ်ကျိုးရှာရန် အခြားသူများ၏ ဂုဏ်သတင်းကို လုံးလုံးလျားလျား အားကိုးနေရသော်လည်း ရမ်းသန်း ပြုမူရဲဲသေးသည်။

ရက်အနည်းငယ် အတွင်းမှာပင် ဤကဲ့သို့သော လူက အတွင်းဂိုဏ်းသား အများစုကို စော်ကားပြီး ဖြစ်၏။ ဤကဲ့သို့သော လူမှာ အရူး တစ်ယောက် သက်သက်သာ ဖြစ်သည်။

ချန်လော့က ရမ်းသန်း ပြုမူပြီး လူများစွာကို စော်ကားခဲ့သော်လည်း သူ့တွင် ကိုယ်ပိုင် ခွန်အား ရှိ၏။

သူ၏ ချီသန့်စင်ခြင်းအဆင့် ကိုးဆင့်မြောက်က အခြေခံတည်ဆောက်ခြင်း နောက်ပိုင်းအဆင့် ကျင့်ကြံသူကို အနိုင်ယူနိုင်တယ်လေ…

ဆေးတောင်ထွတ်တွင် ထိုဂိုဏ်းသားကို သတ်ဖြတ်ခြင်းက ယွီယန်ဇီကို အနည်းငယ် မနှစ်မြို့စေခဲ့သည်မှာ အမှန်ပင်။

ဒါပေမဲ့ ချန်လော့က အကျင့်ပျက်ချင်လို့ အဲဒီလို လုပ်ခဲ့တာ မဟုတ်ဘူး... သူ့ရဲ့ အဓိက ရည်ရွယ်ချက်က တခြားလူတွေကို ခြောက်လှန့်ဖို့လေ…

နှစ်ခုကြားမှာ ကြီးမားတဲ့ ကွာခြားချက်တွေ ရှိတယ်…

ယွီယန်ဇီက ဤနေရာရှိ အရာအားလုံးကို သတိပြုမိထားပြီး ဖြစ်၏။

ယန်ချင်းချွမ် မလှုပ်ရှားမီကတည်းက ယန်ချင်းချွမ်ကို သူ တာဆီးနိုင်ပေသည်။

သို့သော် ယွီယန်ဇီ ထိုသို့ မလုပ်ခဲ့ရခြင်းမှာ အမှန်တကယ်တော့ ဤရမ်းသန်း ပြုမူနေသော ဂိုဏ်းသားကို ပညာပေးလိုသောကြောင့် ဖြစ်၏။

ယွီယန်ဇီက ယန်ကျင့်ကို လျစ်လျူရှု၍ ယန်ချင်းချွမ်ကို ကြည့်လိုက်သည်။

"ဂိုဏ်းရဲ့ ဥပဒေတွေကို ချိုးဖောက်လို့ မရဘူး..."

"ဆေးတောင်ထွတ်မှာ မင်း လူသတ်ဖို့လုပ်ခဲ့တာဆိုတော့ ဂိုဏ်းရဲ့ စည်းမျဉ်းတွေ အရ မင်းကို တရားဥပဒေ စိုးမိုးရေး အဖွဲ့က ခေါ်သွားသင့်တယ်..."

"အခု မင်းကို တရားဥပဒေ စိုးမိုးရေး အဖွဲ့ဆီ လွှဲပေးလိုက်မယ်..."

ထိုသို့ ပြောပြီးနောက် သူက ယန်ချင်းချွမ်ကို ကောက်ယူ၍ တရားဥပဒေ စိုးမိုးရေး အဖွဲ့ဆီသို့ လျှောက်သွားတော့၏။

အခန်း (၉၈) မိုးမလင်းမီ အမှောင်မိုက်ဆုံး အချိန်

ယွီယန်ဇီက ယန်ချင်းချွမ်ကို ဖမ်းခေါ်သွားသည်ကို ကြည့်ရင်း လူတိုင်း ဆွံ့အသွားကြသည်။

ဤတိုက်ရိုက်တပည့် နှစ်ယောက်အကြား ဘာလို့ ဤလောက်တောင် ကြီးမားတဲ့ ကွာခြားချက်တွေ ရှိနေရတာလဲ…

ချန်လော့က ဆေးတောင်ထွတ်တွင် ဂိုဏ်းသားတစ်ယောက်၏ ခြေလက်များကို ဖြတ်တောက်ပစ်ခဲ့စဉ်က ယွီယန်ဇီလည်း ဆေးတောင်ထွတ်တွင် ရှိနေကြောင်း သူတို့ မှတ်မိနေကြ၏။

ထိုအချိန်က ယွီယန်ဇီက တစ်ခွန်းမှ မဟခဲ့သလို ချန်လော့ကိုလည်း လုံးဝ မထိခဲ့ကြောင်း သူတို့ ကြားခဲ့ရသည်။

နောက်ပိုင်းတွင် ချန်လော့ကို အနောက်ဘက် ခန်းမသို့ပင် ပြောင်းရွှေ့နေထိုင်ခွင့် ပြုခဲ့သေး၏။

သို့သော် ယခု ယန်ချင်းချွမ်က ယန်ကျင့်၏ လက်တစ်ဖက်ကို ဖြတ်တောက်ရုံသာ ရှိသေးသော်လည်း ယွီယန်ဇီက ယန်ချင်းချွမ်ကို တိုက်ရိုက် တိုက်ခိုက်ခဲ့ပြီး တရားဥပဒေ စိုးမိုးရေး အဖွဲ့ထံသို့ပင် ပို့ဆောင်တော့မည် ဖြစ်သည်။

အနီးအနားတွင် ရပ်နေသော ယန်ကျင့်က မြင်သောအခါ ရယ်မောလိုက်၏။

"မင်းတို့ မြင်လား... မင်းတို့ မြင်လိုက်ကြလား..."

"ဒါက အစ်ကိုကြီး ချန်လော့ ကို ဆန့်ကျင်တဲ့ အကျိုးဆက်တွေပဲ..."

"ခွေးကောင်လေးတွေ... မင်းတို့ အားလုံးကို ငါ မှတ်ထားမယ်... ဘယ်သူမှ လွတ်မှာ မဟုတ်ဘူး..."

ယန်ကျင့်က သူ၏ ပြတ်တောက်သွားသော လက်မောင်းနှင့် အဆက်မပြတ် စီးကျနေသော သွေးများကို မေ့သွားသည့်အလား ဘေးပတ်လည်ရှိ ဂိုဏ်းသားများကို ကျယ်လောင်စွာ အော်ဟစ်လိုက်၏။

လူတိုင်း၏ အမူအရာက မည်းမှောင်သွားပြီး ကြက်သီးများ ထသွားကြသည်။

သို့သော် ထိုအချိန်မှာပင် ထွက်သွားပြီ ဖြစ်သော ယွီယန်ဇီက ယန်ချင်းချွမ်ကို ဆွဲကိုင်လျက် ရုတ်တရက် ပြန်လှည့်လာ၏။

သူက ယန်ကျင့်ကို ကြည့်လိုက်ရာ သူ၏ မျက်လုံးများထဲတွင် အေးစက်သော အလင်းတန်း တစ်ခု လင်းလက်သွားသည်။

ယန်ကျင့် ၎င်းကို မြင်သောအခါ အကြီးအကဲက သူ့ကို အထူး ကာကွယ်ပေးရန် ပြန်လာသည်ဟု ထင်မှတ်ကာ သူ၏ မျက်နှာပေါ်တွင် အပြုံးတစ်ခု ချက်ချင်း ပေါ်လာ၏။

သို့သော် အကြီးအကဲ စကားပြောလိုက်သည့် အခိုက်အတန့်မှာပင် သူ၏ အမူအရာက ချက်ချင်း ပြောင်းလဲသွားသည်။

"ယန်ကျင့်... တိုက်ရိုက်တပည့် ချန်လော့ ရဲ့ နာမည်ကို အသုံးပြုပြီး ဂိုဏ်းထဲမှာ ပြဿနာ အမျိုးမျိုး ဖန်တီးခဲ့တယ်..."

"မင်းကို အတွင်းဂိုဏ်းကနေ အခုချက်ချင်း ထုတ်ပယ်လိုက်တယ်... နောက်ဘယ်တော့မှ ပြန်ဝင်ခွင့် မပြုဘူး..."

ထိုသို့ ပြောပြီးနောက် သူသည် ယ ဇဝေဇဝါ ဖြစ်နေကြသော အတွင်းဂိုဏ်းသားများကို လှည့်ကြည့်လိုက်၏။

"သူ့ကို ဆေးတောင်ထွတ်ကနေ မောင်းထုတ်လိုက်ကြ..."

ထို့နောက် ဂိုဏ်းသားများ သတိပြန်ဝင်လာကြပြီး သူတို့၏ မျက်နှာပေါ်တွင် စိတ်လှုပ်ရှားမှုများ ပေါ်လာသည်။

သူတို့က ယန်ကျင့် အနီးသို့ ပြေးသွားပြီး သူ့ကို မ တင်ကာ ဆေးတောင်ထွတ် အောက်သို့ ပြေးဆင်းသွားကြ၏။

ယွီယန်ဇီက ဤမြင်ကွင်းကို ကြည့်ပြီးနောက် လှည့်ထွက်သွားသည်။

တစ်ချိန်တည်းမှာပင် ယန်ကျင့်က လူအုပ်ကြီး၏ မ တင်ခြင်းကို ခံရကာ တောင်အောက်သို့ ရောက်ရှိသွား၏။

သူ၏ ရင်ထဲတွင် ကြောက်ရွံ့မှု တစ်ခုက ဖြည်းညင်းစွာ မြင့်တက်လာပြီး သူ၏ ကိုယ်ပိုင် နိဂုံးကို ကြိုတင် မြင်တွေ့လိုက်ရသကဲ့သို့ ပင်…

…

မကြာမီမှာပင် သွေးထောင် အတွင်း၌…

ယန်ချင်းချွမ်က ယွီယန်ဇီ၏ တိုက်ခိုက်မှုကြောင့် ဒဏ်ရာရသွားသော သူ၏ ရင်ဘတ်ကို ဖက်ကာ အချုပ်ခန်း တစ်ခုထဲတွင် ထိုင်နေသည်။

အချုပ်ခန်း အပြင်ဘက်တွင် သူ၏ ဆရာ ဖြစ်သော အကြီးအကဲ ယွီချုံယန်က တိတ်ဆိတ်စွာ ရပ်နေ၏။

"ဒီကိစ္စမှာ မင်း တကယ်ကို အရမ်း လွန်သွားခဲ့တယ်..."

"မင်းက ဆရာတူ ဦးလေး ယွီယန်ဇီ ရဲ့ ဆေးတောင်ထွတ်ကို သွားပြီး လူသတ်ဖို့တောင် ကြိုးစားခဲ့သေးတယ်..."

"ဒါပေမဲ့ မင်းညီရဲ့ အခြေအနေကို ထောက်ထားပြီး ဒီတစ်ကြိမ်တော့ မင်းကို ငါ အပြစ်မပေးတော့ဘူး... ဒါပေမဲ့ နောက်တစ်လလောက်တော့ မင်း သွေးထောင်ထဲမှာပဲ နေတာ ပိုကောင်းမယ်..."

"စိတ်အေးအေးထားပြီး ကိုယ့်ကိုယ်ကိုယ် ကျင့်ကြံဖို့ မင်း တစ်ယောက်တည်း နေဖို့ လိုတယ်..."

အကြီးအကဲ ယွီချုံယန်၏ စကားများကို ကြားပြီးနောက် ယန်ချင်းချွမ်က ခေါင်းညိတ်ရုံသာ တတ်နိုင်တော့၏။

"ဆရာ့ရဲ့ သွန်သင်ဆုံးမမှုတွေကို ကျွန်တော် လိုက်နာပါ့မယ်..."

အကြီးအကဲ ယွီချုံယန်က ခေါင်းညိတ်ပြပြီး သွေးထောင်မှ ထွက်သွားသည်။

မျက်စိတစ်မှိတ်အတွင်းမှာပင် သွေးထောင် အပြင်ဘက်၌ ယွီယန်ဇီနှင့် အကြီးအကဲ ယွီချုံယန်တို့ အတူတကွ ရပ်နေကြ၏။

မလှမ်းမကမ်းရှိ ဂိုဏ်းကို ကြည့်ရင်း သူတို့ နှစ်ယောက်စလုံး သက်ပြင်းမချဘဲ မနေနိုင်ကြတော့ပေ။

"ချန်လော့ ဝင်လာကတည်းက ဒီဂိုဏ်းတစ်ခုလုံးက အမြဲတမ်း ရုတ်ရုတ်သဲသဲ ဖြစ်နေတာပဲ..."

အကြီးအကဲ ယွီချုံယန်က အကူအညီမဲ့သော မျက်နှာဖြင့် ပြောလိုက်၏။

သို့သော် ၎င်းကို ကြားသောအခါ ဘေးတွင် ရပ်နေသော ယွီယန်ဇီက ပြုံး၍ ခေါင်းယမ်းလိုက်သည်။

"အဲဒါက ချန်လော့ရဲ့ ပြဿနာလား... တကယ်တော့ ဘယ်သူ့ရဲ့ ပြဿနာလဲ ဆိုတာကို မင်း စိတ်ထဲမှာ နားမလည်ဘူးလား..."

သူ့စကားကို ကြားသောအခါ အကြီးအကဲ ယွီချုံယန်က ခါးသက်သက် ပြုံးလိုက်၏။

သေချာတာကတော့ သူ သိတာပေါ့... ဒါပေမဲ့ အဲဒါက ချန်လော့နဲ့ ဘာဆိုင်လို့လဲ…

ဂိုဏ်းသို့ ဝင်ရောက်လာကတည်းက ချန်လော့သည် ကိုယ်ကျင့်တရားနှင့် မညီသော အရာများစွာကို အမှန်တကယ် လုပ်ဆောင်ခဲ့သည်။

သို့သော် သူတို့၏ အမြင်တွင် ထိုအရာများက အမှန်တကယ်တော့ အရေးမကြီးပေ။ သူတို့က ဂိုဏ်းထဲတွင် နှစ်ပေါင်းများစွာ ရှိနေခဲ့ပြီး အတက်အကျ မျိုးစုံကို မြင်တွေ့ခဲ့ရပြီး ဖြစ်၏။

ချန်လော့ ကဲ့သို့ပင် ရတနာများ လုယူရန် ကြိုးစားရင်း တိုက်ရိုက်တပည့် တစ်ယောက်၏ ညီဖြစ်သူကို မတော်တဆ သတ်ဖြတ်မိခြင်းက အဆန်းတကြယ် မဟုတ်ပေ။

ဤကဲ့သို့သော ပြဿနာမျိုး ကြုံတွေ့ရသောအခါ ဂိုဏ်းများနှင့် အကြီးအကဲများတွင် ယေဘုယျအားဖြင့် ဖြေရှင်းနည်း နှစ်မျိုး ရှိသည်။

အကယ်၍ လူသတ်သမားက မည်သည့် စည်းမျဉ်းကိုမျှ မချိုးဖောက်ခဲ့ဘဲ ပျိုးထောင်ပေးရန် အလားအလာ ရှိပါက ဤကိစ္စကို ဖိနှိပ်ထားလိုက်ရန် ဖြစ်၏။

မည်သို့ပင်ဆိုစေ နှစ်ဘက်စလုံးက ဂိုဏ်း၏ အနာဂတ်ကို ကိုယ်စားပြုပြီး သေဆုံးသွားသော ဂိုဏ်းသား တစ်ယောက် အတွက် သေရေးရှင်ရေး တိုက်ခိုက်ရန် အမှန်တကယ် မလိုအပ်ပေ။

အကယ်၍ လူသတ်သမားက အလားအလာ သိပ်မရှိပါက သို့မဟုတ် လူသတ်ရန် အသုံးပြုခဲ့သော နည်းလမ်းများက မသင့်လျော်ပါက ထိုသူကို တရားဥပဒေ စိုးမိုးရေး အဖွဲ့ထံ လွှဲပြောင်းပေးမည် သို့မဟုတ် လူသတ်သမား၏ ကံကြမ္မာကို အကြီးအကဲများအား ဆုံးဖြတ်ခွင့် ပေးမည် ဖြစ်၏။

ဤနည်းအားဖြင့် ဂိုဏ်း၏ ဘက်လိုက်မှု ကင်းရှင်းခြင်းကို အာမခံနိုင်ပြီး ဂိုဏ်းသားများကလည်း ကျေးဇူးတင်ကြမည် ဖြစ်သည်။

ဤနည်းလမ်းများက ရိုးရှင်းပြီး အသုံးမကျပုံ ပေါက်သော်လည်း ၎င်းတို့က တကယ်ကို အလုပ်ဖြစ်ကြ၏။

ဒါဆို လော့ချင်းယွီက ဘယ်လို လုပ်ခဲ့တာလဲ…

ချန်လော့၏ စွမ်းရည်များကို သွေးတိုးစမ်းရန် အတွက် ချန်လော့ကို သတ်မည့်သူ ရှာဖွေရန် ယန်ချင်းချွမ်ကိုပင် အမိန့်ပေးခဲ့သေး၏။

ဒီနေရာက ဂိုဏ်း တစ်ခုလေ... ဈေး မဟုတ်ဘူး…

ဂိုဏ်းထဲမှာ လူသတ်တာလား... ဒါက ဂိုဏ်းရဲ့ စည်းမျဉ်းတွေကို လုံးဝ ဂရုမစိုက်တာပဲ…

ဒါပေမဲ့ သူတို့ ဘာတတ်နိုင်မှာလဲ…

လော့ချင်းယွီက အရမ်း အစွမ်းထက်လွန်းတယ်... သူမကို ဆန့်ကျင်တဲ့သူတွေကို သူမက တိုက်ရိုက် အရေးယူလိမ့်မယ်…

သူတို့က လော့ချင်းယွီကို မနိုင်နိုင်ကြတာကြောင့် နောက်ဆုံးမှာ သူမကို အလျှော့ပေးရုံမှလွဲပြီး တခြား ရွေးချယ်စရာ မရှိတော့ဘူး…

အကောင်းဆုံး အခြေအနေကတော့ ဂိုဏ်းတစ်ခုလုံး ရုတ်ရုတ်သဲသဲ ဖြစ်သွားပြီး ဂိုဏ်းသား အားလုံးက ပိုပိုပြီး ကြောက်ရွံ့လာကာ သူတို့က နောက်လူတွေ ဖြစ်လာနိုင်တယ်လို့ စိုးရိမ်လာကြတာပဲ…

"ခဏလောက်တော့ သည်းခံလိုက်ပါ... နတ်ဆိုးလမ်းစဉ် ပြိုင်ပွဲက နောက်ထပ် လဝက်လောက်ပဲ လိုတော့တာ..."

ယွီယန်ဇီက အကြီးအကဲ ယွီချုံယန်၏ ပခုံးကို ပုတ်ကာ ပြောလိုက်၏။

"ဒီနတ်ဆိုးလမ်းစဉ် ပြိုင်ပွဲကို ငါတို့ရဲ့ ချန်ရှင်းဂိုဏ်းမှာ ကျင်းပမှာလေ... အဲဒီအချိန်ကျမှ လော့ချင်းယွီက ပြဿနာ ရှာနေတာကို မရပ်ဘူးဆိုရင် ဘိုးဘေးတွေက သူမကို နှုတ်ပိတ်ဖို့ ဝင်စွက်ဖက်ရလိမ့်မယ်..."

အကြီးအကဲ ယွီချုံယန်က နောက်တစ်ကြိမ် သက်ပြင်းမချဘဲ မနေနိုင်တော့ချေ။

"ဒါနဲ့ စကားမစပ်... ဘိုးဘေးတွေက တော်တော်လေး သည်းခံနိုင်တာပဲ... လော့ချင်းယွီက ဂိုဏ်းကို ဗြောင်းဆန်အောင် လုပ်နေတာတောင် သူတို့က တားဖို့ ဘာမှ မလုပ်ကြဘူး..."

ယွီယန်ဇီက ခါးသက်သက် ပြုံးလိုက်၏。 "ဘိုးဘေးတွေကလည်း လော့ချင်းယွီကို ကြောက်နေကြတာလေ... ပြီးခဲ့တဲ့ အကြိမ်က ဘိုးဘေး လော့ရှင်း သူမကို ဖိနှိပ်ဖို့ ကြိုးစားတုန်းက သူမက သူ့ကို မှောက်လှန်ပစ်လုနီးပါး ဖြစ်သွားတာ... တခြား ဘိုးဘေး နှစ်ယောက်ရဲ့ အကူအညီနဲ့မှ လော့ချင်းယွီကို နောက်ဆုံးမှာ ထိန်းချုပ်နိုင်ခဲ့တာ..."

"လော့ချင်းယွီက ဂိုဏ်းကို လုံးဝ မဖျက်ဆီးသရွေ့တော့ ဘိုးဘေးတွေက မမြင်သလိုပဲ ဟန်ဆောင်နေကြမှာပဲ..."

အကြီးအကဲ ယွီချုံယန်က အကူအညီမဲ့စွာ ပြုံးရုံသာ တတ်နိုင်တော့၏။

အမှန်တကယ်ပင် လော့ချင်းယွီ၏ ခွန်အားက ဘိုးဘေး အချို့ကိုပင် ကျော်လွန်နေပြီ ဖြစ်ပြီး ချန်ရှင်းဂိုဏ်း၏ မျိုးဆက်များ အနက် အစွမ်းအထက်ဆုံး အဖွဲ့ဝင် တစ်ဦးဟု ဆိုနိုင်၏။

ထို့အပြင် သူမ၏ ခွန်အားက နတ်ဝိညာဉ်အဆင့် တစ်ဝက် သို့ ရောက်ရှိနေပြီ ဖြစ်ပြီး ဝိညာဉ်ပြောင်းလဲခြင်းအဆင့် သို့ ရောက်ရန် ဆံချည်တစ်မျှင်စာသာ လိုတော့သည်။ ဘိုးဘေးများက သူမကို ကြောက်ရွံ့ရုံသာမက အလွန် တန်ဖိုးလည်း ထားကြ၏။

"လော့ချင်းယွီက ပုံမှန်ဆိုရင် အကျိုးဆက်တွေကို မစဉ်းစားဘဲ ပြုမူတတ်ပေမဲ့ အလုံးစုံ အခြေအနေနဲ့ ပတ်သက်လာရင်တော့ သူမကို ယုံကြည်လို့ ရပါတယ်..."

"ငါတို့ နောက်ထပ် နှစ်ပတ်လောက် စောင့်နိုင်ရင် နတ်ဆိုးလမ်းစဉ် ပြိုင်ပွဲ အချိန်ရောက်ရင် အခြေအနေတွေ တည်ငြိမ်သွားလောက်ပါပြီ..."

ယွီယန်ဇီ ပြောလိုက်ချိန်တွင် နှစ်ပတ် အကြာ၌ ဖြစ်ပေါ်လာမည့် အံ့သြဖွယ် ကောင်းသော ဘဝကို သူ ကြိုတင် မြင်ယောင်နေပုံ ရ၏။

သို့သော် ၎င်းကို ကြားသောအခါ ဘေးတွင် ရပ်နေသော အကြီးအကဲ ယွီချုံယန်က နောက်တစ်ကြိမ် သက်ပြင်းချလိုက်သည်။

"ဘာလဲ... ငါ့ရဲ့ ခန့်မှန်းချက်တွေကို မင်း ယုံကြည်မှု မရှိဘူးလား..."

ယွီယန်ဇီက မေးလိုက်၏။

အကြီးအကဲ ယွီချုံယန်က ခါးသက်သက် ပြုံး၍ ခေါင်းယမ်းလိုက်သည်။ "ယုံပါတယ်... တော်တော်လေးကို ယုံကြည်မှု ရှိပါတယ်... နောက်ထပ် လဝက်လောက် နေရင် ဒီအသေးအမွှား ကိစ္စတွေ အားလုံး ပျောက်ကွယ်သွားမယ်ဆိုတာ ငါ သေချာပါတယ်..."

"ဒါဆို ဘာလို့ သက်ပြင်းချနေတာလဲ..."

" 'မင်းက အရမ်း မာကျောတယ်' ဆိုတဲ့ စကားပုံကို မင်း တစ်ခါမှ မကြားဖူးဘူးလား..."

"ဘာပြောလိုက်တာ..."

"မိုးမလင်းမီ အမှောင်မိုက်ဆုံး အချိန် လေ..."

အကြီးအကဲ ယွီချုံယန်က ဤသို့ ပြောပြီးနောက် တစ်ခဏမျှ တန့်သွားပြီး ဆက်ပြောလိုက်၏။

"နှစ်ပတ်နေရင် အခြေအနေတွေ တည်ငြိမ်သွားနိုင်တယ်... ဒါပေမဲ့ ဒီနေ့ကစပြီး နှစ်ပတ်အတွင်းမှာရော..."

"ချင်းချွမ်က အကျဉ်းချခံထားရတာ မှန်ပေမဲ့ အဲဒီ အတွင်းဂိုဏ်းသားတွေက မထွက်သွားကြသေးဘူးလေ..."

ယွီယန်ဇီက တစ်စုံတစ်ခုကို သဘောပေါက်သွားပုံ ရပြီး အတန်ကြာပြီးနောက် အကူအညီမဲ့စွာ သက်ပြင်းချရုံသာ တတ်နိုင်တော့၏။