အခန်း (၅၉-၆၀)
Vol. 5 Ch. 59-60
အခန်း (၅၉) - နင်းကျော့ နှင့် ယွမ်တာရှန့်
ယွမ်ယီက “စိတ်မပူပါနဲ့၊ ငါက လူသားပဲလေ။ သဘာဝအတိုင်း အစားနည်းတော့ သိပ်မဆာတတ်ပါဘူး” ဟု ဆိုသည်။
ထို့နောက် သူက ရယ်မောလျက် “မင်းက ငါ့ညီပဲ၊ ခုနက ငါ့ကို ကာကွယ်ပေးလို့ ကျေးဇူးတင်ပါတယ်။ နောင်ကျရင် ဟိုတောင်းစားဂိုဏ်းက ကောင်တွေ ငါ့ကို ထပ်နှိပ်စက်ဦးမှာပဲ၊ ဒါပေမဲ့ မင်းကိုတော့ ငါ အငတ်မထားပါဘူး” ဟု ဆက်ပြောလိုက်၏။
ယွမ်တာရှန့် ပါးစပ်ဟကာ လက်ဝါးပေါ်သို့ အစာအချို့ ထွေးထုတ်ပေးပြီး ယွမ်ယီအား ကမ်းပေးလေသည်။
ယွမ်ယီက “မလိုပါဘူး၊ မလိုပါဘူး” ဟု လက်ကာပြသော်လည်း လည်စလုပ်ကတော့ အလိုအလျောက် လှုပ်ရှားသွားခဲ့ချေပြီ။
ဇွတ်အတင်းပင် ရှေ့တစ်လှမ်းတိုးကာ ယွမ်ယီ၏ ပါးစပ်နားသို့ လက်ဝါးကပ်ပေးရင်း အသံတစ်ချက် ပြုလိုက်၏။
“ဟီးဟီး၊ ဒါဆိုရင်တော့ ငါ အားမနာတော့ဘူးနော်။” ယွမ်ယီ၏ မျက်ဝန်းများမှာ နီမြန်းလာပြီး ယွမ်တာရှန့်၏ လက်ကို ပွေ့ကိုင်ကာ ကျန်ရှိနေသော အစာအကြွင်းအကျန်များကို အငမ်းမရ စားပွဲပစ်တော့သည်။
“ကောင်းလိုက်တာ၊ ကောင်းလိုက်တာ။” ယွမ်ယီက ပြုံးနေလေသည်။ သူသည် အလွန်အမင်း ပိန်ချုံးနေပြီး အခြားသူများဆီကရသည့် အဝတ်အစားများမှာလည်း သူနှင့် မတော်ဘဲ ဖရိုဖရဲ ဖြစ်နေသည့်အတွက် ကြည့်ရသည်မှာ လူနှင့်တူသော မျောက်တစ်ကောင်နှယ် ဖြစ်နေပေရာသည်။
ယွမ်တာရှန့်ကလည်း ဆူညံစွာ အော်ဟစ်လျက် လိုက်ပါရယ်မောလေ၏။ လူတစ်ယောက်နှင့် မျောက်တစ်ကောင်မှာ ပျော်ရွှင်မှုထဲတွင် နစ်မျောနေကြသည်။
“ဦးလေးတာရှန့်၊ ဦးလေးတာရှန့်...”
နောက်ဆုံးတွင် ယွမ်အာ၏ ခေါ်သံကြောင့် သတိဝင်လာခဲ့သည်။
မျက်လုံးဖွင့်လိုက်သည့် ခဏတွင် အဖေနှင့်သား ရုပ်ချင်းဆင်လှသဖြင့် ယွမ်အာအား သူ၏ အရှင်ဟောင်းဟုပင် မျောက်ကြီးမှာ ထင်ယောင်ထင်မှား ဖြစ်သွားမိသည်။
မျောက်ကြီး၏ အမြင်အာရုံများ ကြည်လင်လာချိန်တွင် လေထဲမှ အနံ့ဆိုးတစ်ခုကို ရလိုက်သဖြင့် မျက်ခုံးများ တွန့်ချိုးသွား၏။
သူသည် ပုပ်စော်နံသောအနံ့ကို ရရှိလိုက်ခြင်း ဖြစ်ချေသည်။
ယွမ်အာက တံတွေးတစ်ချက် မျိုချလိုက်ပြီး အလျင်အမြန်ပင် ရှင်းပြလိုက်သည်။
မျောက်ကြီးသည် သူ၏စကားကို ဆုံးအောင်ပင် နားမထောင်တော့ဘဲ မတ်တတ်ထရပ်ကာ တဲအပြင်သို့ ထွက်လာခဲ့တော့သည်။
သူသည် အမြင့်ဆယ်ပေကျော်ရှိပြီး စစ်တိုက်ဆင်တစ်ကောင်ကဲ့သို့ သန်မာထွားကြိုင်းလှ၏။ တစ်ကိုယ်လုံးရှိ အမာရွတ်များမှာ သူဖြတ်သန်းခဲ့ရသော တိုက်ပွဲပေါင်းများစွာကို သက်သေထူနေသည့် ဂုဏ်ပြုတံဆိပ်များသဖွယ်ပင်။
“မျောက်မင်းကို ဂါရဝပြုပါတယ်”
အကြီးအကဲများက တညီတညွတ်တည်း ဦးညွတ်လိုက်ကြသည်။
မျောက်ကြီးကမူ သူတို့ကို တစ်ချက်ကလေးမျှ လှည့်မကြည့်ဘဲ မြေပြင်ပေါ်ရှိ မျောက်အလောင်းများစွာကိုသာ အာရုံစိုက်နေလေသည်။ ခဏမျှ တိတ်ဆိတ်သွားပြီးနောက် ရုတ်တရက် ခေါင်းကို နောက်သို့လှန်ကာ ဒေါသတကြီး ဟိန်းဟောက်လိုက်တော့သည်။
နားကွဲမတတ် ဟိန်းဟောက်သံကြောင့် ထွက်ပေါ်လာသော အသံလှိုင်းများက အကြီးအကဲအများအပြားကို မြေပြင်ပေါ်သို့ လွင့်စဉ်လဲကျသွားစေ၏။
ယွမ်တာရှန့်၏ မျက်လုံးများ နီမြန်းလာပြီး တကယ့်ကို ပေါက်ကွဲသွားချေပြီ။
အကြီးအကဲများအားလုံးမှာလည်း ချွေးစေးများ ပြန်လာကြသည်။
ယွမ်အာကမူ တမင်သက်သက် နောက်နားတွင် ကျန်ရစ်နေခဲ့ပြီး အကြီးအကဲများ၏ အကြောက်အကန် ဖြစ်နေမှုကို ကြည့်ကာ အလွန် ကျေနပ်နေလေသည်။
ထို့နောက် သူက အချိန်ကိုက်ပင် ရှေ့သို့ တိုးလာကာ “ဦးလေးမျောက်၊ ဦးလေးမျောက်၊ ဒီလောက်ကြီးမားတဲ့ အဖြစ်အပျက်မျိုး ဖြစ်သွားမှတော့ ကျွန်တော်တို့ တရားခံအစစ်ကို သေချာပေါက် ရှာဖွေပြီး ပြင်းပြင်းထန်ထန် အပြစ်ပေးမှာပါ” ဟု ပြောလိုက်၏။
ယွမ်တာရှန့်က တဖြည်းဖြည်း ငြိမ်သက်သွားပြီး ယွမ်အာကို ရင်းနှီးသည့်အကြည့်ဖြင့် ကြည့်ကာ စိတ်အေးသွားလေသည်။
သူက လက်ညှိုးတစ်ချောင်းကို ဖြည်းညှင်းစွာ ဆန့်ထုတ်ပြီး ယွမ်အာ၏ ရင်ဘတ်ကို သာသာလေး တို့လိုက်၏။
ယွမ်အာ၏ ရင်ခုန်သံများ မြန်လာကာ နောက်သို့ တစ်လှမ်းဆုတ်လျက် ကပျာကယာ ခေါင်းညိတ်ပြလိုက်သည် — “ဦးလေးမျောက်၊ ကျွန်တော့်ကို ယုံပါ၊ ဦးလေးကို စိတ်မပျက်စေရပါဘူး။”
“ဒါပေမဲ့ အခုချိန်မှာတော့ ဂိုဏ်းက အကျပ်အတည်းကြီးနဲ့ ရင်ဆိုင်နေရတာပါ။ မီးလျှံတောင်တန်း ပွဲတော်မှာ ကျွန်တော်တို့ အစွမ်းကုန် ကြိုးစားရမှာ ဖြစ်ပါတယ်”
“အခု လူအင်အား တအားနည်းနေတော့ ဦးလေးမျောက်ကိုပဲ အားကိုးရတော့မှာပါ။”
“ဒီအချိန်မှာ အားအင်တွေကို ချွေတာထားပေးပါ။ ဦးလေးက ကျွန်တော်တို့ရဲ့ ပင်မမဏ္ဍိုင်ကြီးပဲလေ။”
ယွမ်တာရှန့်က တိတ်ဆိတ်နေဆဲဖြစ်ပြီး တဲထဲသို့ ဖြည်းဖြည်းချင်း ပြန်ဝင်သွားကာ လူအများရှေ့မှ ပျောက်ကွယ်သွားတော့သည်။
ယွမ်အာက လဲကျနေသော အကြီးအကဲများကို ကြည့်ကာ ခပ်ပြုံးပြုံးဖြင့် လက်ဖျားခါယမ်းလျက် “အားလုံး ထကြပါဦး” ဟု ဆိုသည်။
ထိုအချိန်မှစ၍ သူထုတ်သမျှ အမိန့်တိုင်းကို အကြီးအကဲများက မငြင်းဆန်ရဲတော့ဘဲ နာခံကြတော့၏။
ယွမ်အာ ထွက်သွားသည့်အခါမှ အကြီးအကဲများက တိုးတိုးတိတ်တိတ် စတင်ပြောဆိုကြတော့သည်။
“ယွမ်အာက မျောက်ရဲ့အရှိန်အဝါကို အသုံးချနေတာပဲ။ သူ့မှာ ခေါင်းဆောင်တစ်ယောက်ရဲ့ အရည်အချင်းရော ရှိရဲ့လား” ဟု တစ်စုံတစ်ယောက်က လှောင်ပြောင်သည်။
“မျောက်မင်းက ဒေါသထွက်ပြီး လူမသတ်ဘူးပဲ။ သူ့အကျင့်က အရင်ကထက်စာရင် အေးဆေးသွားတာလား။”
“ဘာလဲ၊ မင်းက သူ့ကို သောင်းကျန်းစေချင်လို့လား။”
“ငါ ဆိုလိုတာက သူ အိုမင်းသွားပြီး အခြေအနေတွေ ဆိုးရွားလာလို့ ဟန်ကိုယ်ဖို့ လုပ်နေတာမျိုး ဖြစ်နိုင်မလားလို့ပါ” ဟု ရည်မှန်းချက်ကြီးသော အကြီးအကဲတစ်ဦးက တွေးတောနေသည်။
အသက်အကြီးဆုံး အကြီးအကဲက ထိုစကားကို ကြားသောအခါ နှာခေါင်းတစ်ချက် ရှုံ့လိုက်ပြီး လှည့်ထွက်သွားတော့၏။
အခြားအကြီးအကဲများ မမြင်ဖူးသော်လည်း သူကမူ ချော်ရည်နတ်ဆိုး ချော်ရည်တွင်းသို့ ဂိုဏ်းက သွားရောက်စူးစမ်းစဉ်က ယွမ်တာရှန့်၏ တိုက်ပွဲကို ကိုယ်တိုင်မြင်တွေ့ခဲ့ဖူးသည်။
“အဲဒီ မီးလျှံမြွေရဲ့ တိုက်ခိုက်နိုင်စွမ်းက ရွှေအမြုတေအဆင့်ဝက်လောက် ရှိတာ။”
“ဒါပေမဲ့ နောက်ဆုံးမှာတော့ ယွမ်တာရှန့်ရဲ့ ဆွဲဖြဲခြင်းကို ခံလိုက်ရတာပဲ...”
“ယွမ်တာရှန့်က အိုမင်းသွားပြီ ဖြစ်နိုင်ပေမဲ့ သူ့ရဲ့ တိုက်ခိုက်နိုင်စွမ်းကတော့ ကြောက်စရာကောင်းနေတုန်းပဲ။ သူ့မှာ ပါရမီရှိတာ အမှန်ပဲ၊ အနည်းဆုံးတော့ အထက်တန်းအဆင့် ပါရမီမျိုးပေါ့။”
“ကျင့်စဉ်တစ်ခုခုကို မကျင့်ကြံထားတာက သူ့အတွက် အကြီးမားဆုံး နောင်တ ဖြစ်ကောင်းဖြစ်နိုင်ပေမဲ့ ငါတို့ဂိုဏ်းအတွက်တော့ ဒါက အကြီးမားဆုံး ကံကောင်းခြင်းပဲ။”
ငှက်အော်သံများက သူ့နားနားသို့ ကပ်လျက် ထွက်ပေါ်လာသည်။
နင်းကျော့မှာ အနားယူနေရာမှ နိုးလာခဲ့၏။
သူ့ကို နှိုးလိုက်သူမှာ နောက်ကျောတွင် ထိန်းချုပ်တံ တပ်ဆင်ထားသည့် စက်မှုတူရုယန်ငှက်ဖြစ်သည်။
အဆိုပါ ထိန်းချုပ်တံက အချိန်သတ်မှတ်၍ အော်ဟစ်စေရန် ထိန်းချုပ်ပေးထားပြီး နင်းကျော့အား နှိုးပေးခြင်း ဖြစ်၏။
“အချိန်တန်ပြီ။” နင်းကျော့သည် သူ၏ရင်ဘတ်ပေါ်မှ အမှတ်အသားကို ချက်ချင်းခံစားလိုက်ရပြီး သူ၏ ဝိညာဉ်မှာ မသေမျိုးနန်းတော်ထဲသို့ ဝင်ရောက်သွားတော့သည်။
သူသည် ရုပ်သေးခန္ဓာကိုယ်တစ်ခုကို အလျင်အမြန် တပ်ဆင်လိုက်ပြီး အဆင့်များကို တရစပ် ကျော်ဖြတ်လေတော့သည်။
ထိုသို့သွားရင်း အခြားသူများ အဆင့်ကျော်ဖြတ်ရန် ကြိုးပမ်းထားသည့် အမှတ်အသားများကို သတိပြုမိသဖြင့် စောင့်ကြည့်ရေး ကိရိယာကို စစ်ဆေးကြည့်ရာ ကျိုးကျူနှင့် ကျန်းကျန့်တို့ ပူးပေါင်းလုပ်ဆောင်နေကြပြီ ဖြစ်ကြောင်း သိလိုက်ရ၏။
“ကာလတိုအတွင်းမှာတော့ သူတို့က ငါ့အတွက် ခြိမ်းခြောက်မှု မဖြစ်နိုင်သေးဘူး။”
“အဓိက စိုးရိမ်ရတာက ယွမ်တာရှန့်ပဲ၊ မုန့်ချုံကတောင် ဒုတိယပဲ ရှိသေးတယ်”
နင်းကျော့သည် အဆင့်များကို ဆက်လက်ကျော်ဖြတ်နေခဲ့သည်။
ယခုအခါ သူသည် ပညာရပ်ပေါင်း နှစ်ဆယ်ကျော်ကို ကျွမ်းကျင်နေပြီဖြစ်ပြီး အားလုံးမှာလည်း လက်ရည်ဝနေပြီ ဖြစ်၏။ သူ၏ ဝိညာဉ်စွမ်းအားသာ လုံလောက်မည်ဆိုပါက ဤအဆင့်များကို ကျော်ဖြတ်ရန်မှာ လွန်စွာ လွယ်ကူလှပေသည်။
အတတ်နိုင်ဆုံး ရှေ့သို့ တိုးသွားပြီးနောက် နင်းကျော့သည် ပြန်လည်ဆုတ်ခွာလာခဲ့၏။
သူသည် အခန်း (၈) အထိ ဆုတ်ခွာလာပြီး လှုပ်ရှားမှုများကို ရပ်တန့်လျက် စိတ်ရှည်စွာ စောင့်ဆိုင်းနေတော့သည်။
မကြာမီမှာပင် တံခါးမှာ ရုတ်တရက် ပွင့်သွားပြီး မျောက်ရုပ်သေးကြီးတစ်ကောင် အတွင်းသို့ တိုးဝင်လာလေသည်။
“လာပြီပဲ။” နင်းကျော့က တိုးတိုးလေး ရေရွတ်ရင်း ထိုမျောက်ကို ရင်ဆိုင်ရန် ဖြည်းဖြည်းချင်း ထရပ်လိုက်၏။
သူတို့၏ အကြည့်ချင်း ဆုံသွားကြသည်။
ယွမ်တာရှန့်သည် မိမိရှေ့ရှိ စက်မှုရုပ်သေးမှာ သာမန်မဟုတ်ကြောင်း ချက်ချင်း သိလိုက်၏။
နင်းကျော့ရုပ်သေးကို အတန်ကြာ အကဲခတ်ပြီးနောက် ယွမ်တာရှန့်သည် ထင်ရှားသော ထောင်ချောက်များအပြင် အခြား မည်သည့် လျှို့ဝှက်ထောင်ချောက်များ ရှိနိုင်ဦးမည်နည်းဟု ပတ်ဝန်းကျင်ကို ဝေ့ဝဲကြည့်ရှုလိုက်သည်။
“သူက ငါ့ကို အရင်က ကွန်ဖူးရုပ်သေးတွေလိုပဲ အစောင့်ရုပ်သေးလို့ အထင်မှားနေပုံရတယ်” ဟု နင်းကျော့က စိတ်ထဲမှ မှတ်ချက်ပြုလိုက်၏။
ဤသည်မှာ သူဖြစ်စေချင်သည့် ရလဒ်ပင် ဖြစ်ချေသည်။
ဤကိစ္စတွင် စမ်းသပ်မှု တိုးတက်မှုစာရင်းနှင့် သူ၏ နာမည်ဝှက်တို့က ယွမ်တာရှန့်အား မသေမျိုးနန်းတော်ကို တစ်ယောက်တည်း သတ္တိရှိရှိ စိန်ခေါ်နေသူဟု အထင်မှားသွားစေရန် အဓိက အခန်းကဏ္ဍမှ ပါဝင်ခဲ့သည်။
ခဏမျှ အကဲခတ်ပြီးနောက် ယွမ်တာရှန့်သည် အဆင့်ကို စတင်ကျော်ဖြတ်ရန် ကြိုးစားလေတော့သည်။
နင်းကျော့ကလည်း ချက်ချင်းပင် လှုပ်ရှားလိုက်၏။
အသုံးပြုသည့် ပညာရပ် — အအေးဓာတ်ပွေ့ပိုက်ခြင်းပညာရပ်။
အသုံးပြုသည့် စက်မှုအစိတ်အပိုင်း — ပျံလွှားလက်များ။
အသုံးပြုသည့် ပညာရပ် — တစ်ချက်အသက်ရှူခြင်း ပညာရပ်။
အသုံးပြုသည့် စက်မှုအစိတ်အပိုင်း — ဝိညာဉ်စွမ်းအားထုတ်လွှတ်သည့် ကွင်း။
စက်မှုလက်မောင်းတစ်ခုမှာ ယွမ်တာရှန့်ထံသို့ အရှိန်အဟုန်ဖြင့် ပျံသန်းသွားပြီး ၎င်း၏ လက်ဝါးမှ အေးစက်သော အအေးဓာတ်များ ထွက်ပေါ်နေသည်။
ပုံမှန်အားဖြင့် အအေးဓာတ်မှာ ထိတွေ့မှုရှိမှသာ ထိရောက်တတ်သော်လည်း ဝိညာဉ်စွမ်းအားထုတ်လွှတ်သည့် ကွင်းက ရှေ့မှ လည်ပတ်နေသဖြင့် အသက်ရှူသံကဲ့သို့ အရှိန်က အအေးဓာတ်ကို ရှေ့သို့ တွန်းပို့ပေးလိုက်၏။
ယပ်တောင်ပုံသဏ္ဌာန် အအေးဓာတ်များမှာ ချက်ချင်းပင် ပျံ့နှံ့သွားတော့သည်။
ယွမ်တာရှန့်က အလျင်အမြန် ရှောင်တိမ်းလိုက်သော်လည်း သူ၏ ဘယ်ဘက်ခြေထောက် အစိတ်အပိုင်းအချို့မှာ ဆီးနှင်းများ ဖုံးလွှမ်းသွားခဲ့ချေပြီ။
ယွမ်တာရှန့်၏ မျက်လုံးများမှာ ချက်ချင်းပင် ရက်စက်ကြမ်းကြုတ်သော အရောင်များ တောက်ပလာတော့၏။
ပညာရပ်များကို ထုတ်ဖော်နိုင်သော အစောင့်ရုပ်သေးမျိုးကို သူ ပထမဆုံးအကြိမ် တွေ့ဖူးခြင်း ဖြစ်သည်။
ယွမ်တာရှန့်မှာ တွန့်ဆုတ်မနေဘဲ အရှိန်အဟုန်ပြင်းစွာဖြင့် နင်းကျော့အနီးသို့ အပြေးဝင်လာတော့သည်။
နင်းကျော့က သာသာယာယာ ခုန်ထွက်လိုက်ပြီး တစ်ချက်အသက်ရှူခြင်း ပညာရပ်ကို အသုံးပြုကာ သူ၏ ခြေကျင်းဝတ်ရှိ ဝိညာဉ်စွမ်းအားထုတ်လွှတ်သည့် ကွင်းများမှတစ်ဆင့် နောက်သို့ တွန်းထုတ်ဆုတ်ခွာလိုက်၏။
နင်းကျော့သည် အကွာအဝေးကို လျင်မြန်စွာ ချဲ့လိုက်သည်။
သူ ဆုတ်ခွာနေစဉ်မှာပင် တိုက်ခိုက်မှုများကို ဆက်တိုက် ပြုလုပ်နေခဲ့၏။
ပျံလွှားလက်ပေါင်းများစွာက အအေးဓာတ်ပွေ့ပိုက်ခြင်းပညာရပ်၊ မီးတောက်ဖမ်းယူခြင်း ပညာရပ်၊ ရွှေဓာတ်စုစည်းခြင်း ပညာရပ်၊ အစားထိုးဆက်သွယ်ခြင်း ပညာရပ် စသည်တို့ကို အကြိမ်ကြိမ် ထုတ်ဖော်တိုက်ခိုက်နေသည်။
တစ်ချက်အသက်ရှူခြင်း ပညာရပ်၏ အထောက်အကူကြောင့် ထိုတိုက်ကွက်အားလုံးမှာ အလယ်အလတ်နှင့် အဝေးထိ တိုက်ခိုက်မှုများ ဖြစ်ကုန်ကြ၏။
ယွမ်တာရှန့်မှာမူ မိမိ၏ ကိုယ်ဟန်ကို အတတ်နိုင်ဆုံး ကျုံ့ထားပြီး မျက်နှာကို ကာကွယ်ရန် လက်မောင်းများကို ဒိုင်းသဖွယ် အသုံးပြုလျက် ပညာရပ်တိုင်းကို ဖောက်ထွက်ကာ နင်းကျော့ထံသို့သာ တည့်တည့်မတ်မတ် ပြေးဝင်နေတော့သည်။
ဤနည်းဗျူဟာမှာ သံသယဖြစ်ဖွယ်မရှိ မှန်ကန်လှပေသည်။
သို့သော်လည်း ရှုံးနိမ့်ခြင်းမှတော့ သူ မလွတ်မြောက်နိုင်ခဲ့ပေ။
ခဏအကြာတွင် ယွမ်တာရှန့်၏ ရုပ်သေးခန္ဓာကိုယ်မှာ ပြိုလဲသွားခဲ့ရသည်။
အချို့အစိတ်အပိုင်းများမှာ လောင်ကျွမ်းနေပြီး အချို့မှာမူ ရေခဲများ ဖုံးလွှမ်းနေသလို အချို့မှာလည်း ကြီးမားသော အတားအဆီးများအဖြစ် ပေါက်ရောက်လာသည့် သစ်သားများဖြင့် ရစ်ပတ်နေခဲ့ချေပြီ..။
မလဲပြိုမီ ယွမ်တာရှန့်သည် ခေါင်းကို နောက်သို့လှန်ကာ ဒေါသတကြီး ဟိန်းဟောက်လိုက်သည်။ ထိုအသံထဲတွင် မကျေနပ်မှု၊ နာကျည်းမှုနှင့် ခိုကိုးရာမဲ့မှုတို့ အပြည့်အဝ ပါဝင်နေ၏။
သူသည် အလွန်တရာ ခံပြင်းနေမိသည်။
ဤသည်မှာ သူ၏ တကယ့်အစွမ်းမှ မဟုတ်ပေ။
“သူ့ကို တားဆီးနိုင်ခဲ့ပြီ။” နင်းကျော့က သက်ပြင်းတစ်ချက်ချရင်း စိတ်အေးသွားတော့သည်။
သူချထားသော စက်မှုထောင်ချောက်များမှာ ယွမ်တာရှန့်အပေါ် ထိရောက်မှု မရှိခဲ့ပေ။ သူကိုယ်တိုင် ကြားဝင်နှောက်ယှက်မှသာ ထိုသူ၏ ရှေ့ဆက်တိုးမှုကို ဟန့်တားနိုင်ခဲ့ခြင်း ဖြစ်ပေတော့သည်။
အခန်း(၆၀)
နဂါးလိပ် မီးလျှံဝိညာဉ်၏ ဟိန်းဟောက်သံက ချော်ရည်နန်းတော်၏ ပင်မဆောင်အတွင်း ဟိန်းထွက်သွားတော့သည်။
"ဝူး..."
ယွမ်တာရှန့် အရေးနိမ့်သွားသည်ကို မြင်လိုက်ရသောအခါ နဂါးလိပ် မီးလျှံဝိညာဉ်သည် ဒေါသတကြီးဖြင့် ခေါင်းမော့ကာ ၎င်း၏နဂါးလက်သည်းဖြင့် ပလ္လင်လက်ရန်းကို ပြင်းထန်စွာ ရိုက်ချလိုက်လေသည်။
ချော်ရည်နန်းတော်၏ စမ်းသပ်မှု တိုးတက်မှုစာရင်းတွင် အတိအလင်း မဖော်ပြထားသော်လည်း ယွမ်တာရှန့်၏ မိစ္ဆာစွမ်းအားသည် အဆင့်ကိုး၌ ရှိနေကြောင်းနှင့် ၎င်း၏ သန်မာလှသော ခန္ဓာကိုယ်နှင့် အကောင်းဆုံး ပေါင်းစပ်ထားကြောင်း နဂါးလိပ် မီးလျှံဝိညာဉ်က ကောင်းစွာ သိရှိထားသည်။
ပြဿနာမှာ ယွမ်တာရှန့်သည် နန်းတော်အတွင်း ပိတ်မိနေပြီး မူလခန္ဓာကိုယ် ပျောက်ဆုံးကာ ရုပ်သေးခန္ဓာကိုယ်ကိုသာ ပိုင်ဆိုင်ထားခြင်းပင် ဖြစ်သည်။
အခန်း (၉) ကျော်လွန်ရှိ မိစ္ဆာဂိုဏ်းနှင့် မတွေ့ဆုံရသရွေ့ သစ်သားရုပ်သေးခန္ဓာကိုယ်တွင် သွေးအနှစ်သာရ မရှိနိုင်ပေ။
ထိုအချိန်၌သာ ယွမ်တာရှန့်သည် သူ၏ စွမ်းအားအစစ်အမှန်ကို အနည်းငယ်မျှ ထုတ်သုံးနိုင်မည်ဆိုပါက မည်သူမျှ မတားဆီးနိုင်ဘဲ ကောင်းကင်သို့ ပျံတက်နိုင်မည် ဖြစ်သည်။
သို့သော် ယခုမူ နင်းကျော့က ၎င်းကို အဟန့်အတား ပြုခဲ့လေပြီ။ နဂါးလိပ် မီးလျှံဝိညာဉ်သည် တိုက်ပွဲအတွင်း နင်းကျော့ အမှားတစ်ခုခု ကျူးလွန်မိရန်သာ မျှော်လင့်ချက် ထားနေခဲ့သော်လည်း နင်းကျော့သည် အစမှအဆုံးတိုင် ယွမ်တာရှန့်နှင့် အနီးကပ် တိုက်ခိုက်ခြင်းကို လုံးဝ ရှောင်ရှားသွားခဲ့ရာ နဂါးလိပ် မီးလျှံဝိညာဉ်၏ မျှော်လင့်ချက်များ အကုန်အစင် ပျက်သုဉ်းသွားရတော့သည်။
နဂါးလိပ် မီးလျှံဝိညာဉ်ကို ပို၍ ဒေါသထွက်စေသည်မှာ စမ်းသပ်မှု တိုးတက်မှုစာရင်းပေါ်ရှိ နင်းကျော့၏ အမည်ပင် ဖြစ်သည်။
"တော်တော်လေးကို လည်တဲ့ နာမည်ပဲ"
ယွမ်တာရှန့်မှာ လုံးဝ အလှည့်ဖျား ခံလိုက်ရခြင်းပင်။
နဂါးလိပ် မီးလျှံဝိညာဉ်သည် ထိုအမည်ကို ကိုယ်တိုင်ပင် ခြစ်ထုတ်ပစ်ချင်စိတ် ပေါက်နေသော်လည်း စမ်းသပ်မှုတွင် ပါဝင်သည့် မည်သည့်တပည့်ကိုမဆို သတင်းအချက်အလက် ပေးပိုခြင်း မပြုရန် ဘိုးဘေးကြီး သုံးဦး၏ တင်းကျပ်သော ကန့်သတ်ချက် ရှိနေသောကြောင့် မတတ်နိုင်ခဲ့ပေ။
အခန်း (၈) အတွင်း၌ နင်းကျော့သည် စစ်မြေပြင်ကို စတင် ရှင်းလင်းနေပြီ ဖြစ်သည်။ သူ အနိုင်ရရှိခဲ့သော်လည်း ဝမ်းသာပီတိ ဖြစ်မနေပေ။ ဤတိုက်ပွဲ၏ ရလဒ်မှာ သူ ကြိုတင် ခန့်မှန်းထားသည့်အတိုင်းပင် ဖြစ်သည်။
ယခုအခါ သူသည် ပညာရပ် မြောက်မြားစွာကို ပိုင်ဆိုင်ထားသည့်အပြင် ကိုက်ညီသော စက်မှုအစိတ်အပိုင်းများ၊ ဝိညာဉ်ကျောက်တုံးများနှင့် ယွမ်တာရှန့်ထက် သာလွန်သော ဝိညာဉ်စွမ်းအားများ ရှိနေသဖြင့် သူ၏ စွမ်းဆောင်ရည်မှာ အတော်ပင် တောင့်တင်းနေပြီ ဖြစ်သည်။
ထို့ပြင် သူသည် ယွမ်တာရှန့်ကို ယခင်ကတည်းက စောင့်ကြည့်လေ့လာခဲ့သဖြင့် ၎င်း၏ အရှိန်၊ ခွန်အားနှင့် တိုက်ခိုက်ပုံ အသေးစိတ်ကိုလည်း သိရှိထားသည်။ ဤတိုက်ပွဲမှာ ခဲရာခဲဆစ် အနိုင်ယူခဲ့ရခြင်းထက် အမဲလိုက်ခြင်းနှင့် ပို၍ တူနေတော့သည်။
နင်းကျော့က "ဒါပေမဲ့ ငါ သူ့ကို ဘယ်နှစ်ကြိမ်ပဲ နိုင်နိုင်၊ သူကတော့ ပြန်ပြန်လာမှာပဲ။ အပြီးတိုင် သေသွားမှာမှ မဟုတ်တာ" ဟု တစ်ကိုယ်တည်း ရေရွတ်လိုက်သည်။
ထို့ကြောင့် ဤသည်မှာ ပြဿနာကို အမြစ်ပြတ် ဖြေရှင်းနိုင်ခြင်း မဟုတ်သေးပေ။ နင်းကျော့သည် ယွမ်တာရှန့်၏ စက်မှုအစိတ်အပိုင်းများကို အသေးစိတ် စစ်ဆေးကြည့်သည်။
ချော်ရည်နန်းတော်က စစ်မြေပြင်ကို မရှင်းလင်းသေးသည့် အခွင့်အရေးကို အသုံးချကာ အမြန် စစ်ဆေးခြင်း ဖြစ်သည်။ တစ်ဖက်သတ် တိုက်ခိုက်နိုင်ခဲ့သော်လည်း ယွမ်တာရှန့်တွင် တစ်စုံတစ်ရာသော ပါရမီ ရှိနေနိုင်သည်ဟု သံသယရှိသဖြင့် နင်းကျော့ အတော်လေး ဖိအားဝင်နေခဲ့သည်။
ပါရမီဟူသည်မှာ စက်မှုအစိတ်အပိုင်းများကို ကြည့်လျှင် သိသာနိုင်သည်။ နင်းကျော့၏ ပါရမီထူးမှာ သူ၏ ဦးခေါင်းကြီးခြင်းကို ကြည့်၍ သိနိုင်သကဲ့သို့ပင် ဖြစ်သည်။
သို့သော် အစိတ်အပိုင်းများကို နှစ်ကြိမ်၊ သုံးကြိမ်တိုင် စစ်ဆေးသော်လည်း ထူးခြားမှုကို မတွေ့ရပေ။ အစိတ်အပိုင်းများမှာ ကြီးမားသော်လည်း တစ်ခုနှင့်တစ်ခု အချိုးအစား ကျနနေပြီး ထူးထူးခြားခြား ပေါ်လွင်နေသည်မျိုး မရှိပေ။
"မုန့်ချုံရဲ့ လျှပ်စီးအဟုန် ပညာရပ်လိုမျိုး ထုတ်သုံးမှ မြင်ရတာမျိုးလား... မဟုတ်နိုင်ပါဘူး၊ ထုတ်သုံးလို့ ရမယ်ဆိုရင် ခုနက တိုက်ပွဲမှာ သုံးလိုက်မှာပေါ့"
"ဒါမှမဟုတ် ရုပ်သေးခန္ဓာကိုယ် ဖြစ်နေလို့ သုံးလို့မရတာလား၊ တခြား ကန့်သတ်ချက်တွေ ရှိနေလို့လား..."
နင်းကျော့ သက်ပြင်းချလိုက်မိသည်။ ဤသို့ ရှာဖွေခြင်းမှ ရလဒ် ထွက်မလာခဲ့ပေ။ မကြာမီ သူသည် အခန်း (၈) မှ ထွက်ခွာကာ စက်မှုထောင်ချောက်များကို ပြင်ဆင်ရန် အမြန် ပြန်လာခဲ့သည်။
သူ အေးခဲထားခဲ့သည့် ကွန်ဖူးရုပ်သေးများကိုလည်း အလုပ်ရုံသို့ ယူဆောင်လာပြီး စက်မှုပညာရပ်ဆိုင်ရာ စင်များပေါ် တင်ကာ လိုအပ်သည့် ကိရိယာများဖြင့် ပြင်ဆင် အားဖြည့်ပေးလိုက်သည်။
ထောင်ချောက်အားလုံး ပြန်လည် ကောင်းမွန်သွားပြီ ဖြစ်ကြောင်း အတည်ပြုပြီးနောက် နင်းကျော့သည် ရှေ့ဆုံး စစ်ဆေးရေးဂိတ်သို့ ပြန်လာခဲ့သည်။
သူ၏ လက်ရှိ အမြင့်ဆုံး တိုးတက်မှုမှာ တာအိုဂိုဏ်းနှင့် မိစ္ဆာဂိုဏ်းတို့၏ ပထမဦးဆုံးသော အခန်းများဖြစ်ပြီး ဗုဒ္ဓဘာသာဂိုဏ်းသို့မူ မဝင်ရောက်ရသေးပေ။
တာအိုဂိုဏ်း၏ ပထမအခန်း၌ သူသည် စမ်းသပ်ခံတပည့်အမှတ်အသားကို အာရုံခံကာ မသေမျိုးနန်းတော်မှ ကိုယ့်သဘောနှင့်ကိုယ် ထွက်ခွာခဲ့သည်။
ယွမ်တာရှန့်သည် အခန်း (၇) အထိ တစ်ဆက်တည်း ဖြတ်ကျော်နိုင်ခဲ့သဖြင့် အခြားသူများတွင်လည်း ထိုကဲ့သို့သော စွမ်းဆောင်ရည်မျိုး ရှိနိုင်ပေသည်။
ထို့ကြောင့် သူသည် ပို၍ လုံခြုံသော နေရာအထိ ဆုတ်ခွာကာ သူ၏ တည်ရှိမှုကို တတ်နိုင်သမျှ ဖုံးကွယ်ထားခဲ့သည်။ နင်းကျော့သည် သူ၏ ပေါ့ဆမှုကြောင့် ဆုံးရှုံးမှုများ ထပ်မံ မဖြစ်ပေါ်စေရန် ဤအသေးစိတ် အချက်အလက်များကို အထူး ဂရုစိုက်နေခြင်း ဖြစ်သည်။
မိမိခန္ဓာကိုယ်ထဲသို့ ပြန်လည်ရောက်ရှိပြီးနောက် နင်းကျော့သည် မျောက်ခေါင်းဂိုဏ်းနှင့် ယွမ်တာရှန့်တို့အကြောင်းကို ဆက်လက် လေ့လာခဲ့သည်။
သတင်းအချက်အလက်များအရ ယွမ်ယီသည် ပါရမီညံ့ဖျင်းပြီး ဆင်းရဲနိမ့်ပါးသော မိသားစုမှ လာသူဖြစ်ကာ တစ်ချိန်က တောင်းရမ်းစားသောက်ခဲ့ရဖူးသည်။
သူသည် သူတောင်းစားဂိုဏ်းသို့ အတင်းအကျပ် သွတ်သွင်းခံရပြီး မီးလျှံနတ်ဆိုး ချော်ရည်တွင်းသို့ စူးစမ်းလေ့လာသူအဖြစ် စေလွှတ်ခြင်း ခံခဲ့ရသည်။
ထိုသို့ စူးစမ်းစဉ်အတွင်း သူသည် ဒဏ်ရာရနေသော ချော်ရည်နတ်ဆိုးမျောက် အကောင်ပေါက်လေးတစ်ကောင်ကို တွေ့ရှိခဲ့သည်။ ယွမ်ယီသည် ထိုမျောက်လေးကို မီးတောင်အပြင်ဘက်သို့ ခေါ်ဆောင်လာပြီး ပဋိညာဉ် ဖွဲ့ခဲ့သည်။
ထိုမျောက်လေးမှာ နောက်ပိုင်းတွင် ယွမ်တာရှန့် ဖြစ်လာခဲ့ခြင်း ဖြစ်သည်။
အစပိုင်းတွင် ယွမ်ယီက ၎င်းကို 'တာရှန့်' ဟု အမည်ပေးခဲ့ပြီး နှစ်ဦးသား အခက်အခဲများစွာကြားမှ အပြန်အလှန် မှီခိုကာ နေထိုင်ခဲ့ကြသည်။
ချော်ရည်နတ်ဆိုးမျောက် တဖြည်းဖြည်း ကြီးထွားလာပြီး သန်မာလာသောအခါ သူတို့၏ အခြေအနေမှာ တိုးတက်လာခဲ့သည်။ သူတို့သည် သူတောင်းစားဂိုဏ်းမှ ထွက်ခွာပြီး သားရဲတိုက်ခိုက်ပွဲများဖြင့် အသက်မွေးခဲ့ကြသည်။
တာရှန့်သည် သွေးချောင်းစီး တိုက်ပွဲပေါင်းများစွာကို ဆင်နွှဲခဲ့ပြီးနောက် လူသိများလာခဲ့သည်။
သို့သော် မှောင်ခိုဈေးကွက်အတွင်း သားရဲတိုက်ပွဲများကို နှိမ်နင်းခြင်း ခံလိုက်ရသောအခါ ယွမ်ယီနှင့် တာရှန့်တို့မှာ အလုပ်လက်မဲ့ ပြန်ဖြစ်သွားပြန်သည်။
သူတောင်းစားဂိုဏ်းကလည်း ရန်ငြိုးဖြင့် ယွမ်ယီကို ထောင်ချောက်ဆင် ဖမ်းဆီးခဲ့သည်။ ယွမ်ယီနှင့် တာရှန့်တို့သည် အကျဉ်းကျခဲ့သော်လည်း အခြား အကျဉ်းသားများနှင့် ပူးပေါင်းကာ လမ်းပေါ်တိုက်ပွဲများတွင် ရက်စက်စွာ ပြန်လည် တိုက်ခိုက်ခဲ့ပြီး နောက်ဆုံး၌ သူတောင်းစားဂိုဏ်းကို အမြစ်ပြတ် ချေမှုန်းနိုင်ခဲ့ကြသည်။
ထိုတိုက်ပွဲအပြီးတွင် ယွမ်ယီသည် သူရဲကောင်းအဖြစ် အသိအမှတ်ပြုခံရပြီး အားလုံး၏ ခေါင်းဆောင်အဖြစ် တင်မြှောက်ခြင်း ခံရသည်။
သူသည် ထိုအခွင့်အရေးကို အသုံးချကာ မျောက်ခေါင်းဂိုဏ်းကို တည်ထောင်ခဲ့လေသည်။
မျောက်ခေါင်းဂိုဏ်း စတင်တည်ထောင်စ အချိန်က မီးလျှံတောင် မသေမျိုးမြို့တော်အတွင်းရှိ အခြားဂိုဏ်းများ၏ ဖိနှိပ်မှုကို ခံခဲ့ရသဖြင့် အမြဲတမ်းလိုလို ပဋိပက္ခများ ကြုံတွေ့ခဲ့ရသည်။
တာရှန့်၏ ရဲရဲဝံ့ဝံ့ တိုက်ခိုက်မှုများကြောင့်သာ သူတို့မှာ အခြေကုပ်မြဲလာပြီး တဖြည်းဖြည်း အင်အားကြီးထွားလာခဲ့ခြင်း ဖြစ်သည်။
ထိုကဲ့သို့ ကြမ်းတမ်းလှသော ဖြစ်စဉ်များကြားတွင် တာရှန့်ဟူသော အမည်မှာ မှေးမှိန်သွားပြီး လူအများက ၎င်းကို 'တာရှန့်' ဟုသာ ရိုသေစွာ ခေါ်ဆိုလာကြသည်။
ဂိုဏ်း၏ ဂုဏ်သိက္ခာကို ငဲ့ကွက်၍ ယွမ်ယီက ၎င်းကို မျိုးရိုးအမည် ပေးလိုက်ရာမှ နောက်ဆုံးတွင် 'ယွမ်တာရှန့်' ဖြစ်လာခဲ့တော့သည်။
"သူက သာမန်လူတန်းစားကနေ ကိုယ်တိုင် အခြေချနိုင်ခဲ့တဲ့ ပါရမီရှင် တစ်ယောက်ပဲ။ သွေးနဲ့ မီးကြားမှာ စမ်းသပ်ခံပြီး အခြေခံကောင်းတွေကို တည်ဆောက်နိုင်ခဲ့တာ" ဟု နင်းကျော့က တွေးတောမိသည်။
နင်းကျော့သည် သားရဲတိုက်ပွဲများအတွင်း ဒါရှန့်၏ အနိုင်ရရှိမှုနှုန်းနှင့် နောက်ပိုင်း ဂိုဏ်းချင်း တိုက်ပွဲများရှိ အဓိက တိုက်ပွဲများကို အသေအချာ လေ့လာနေခဲ့သည်။
"တစ်ဦးချင်းအနေနဲ့ ကြည့်ရင် ယွမ်တာရှန့်ရဲ့ တိုက်ပွဲတွေမှာ ရှုံးတာရော၊ နိုင်တာရော ရှိတယ်။ ဒါပေမဲ့ စုစုပေါင်း အနိုင်ရမှုနှုန်းကို တွက်ကြည့်ရင်တော့ သိသိသာသာကို ထူးခြားနေတယ်။ သူ့ရဲ့ အနိုင်ရမှုနှုန်းက မြင့်လွန်းနေတာပဲ။ ဒါကို ကြည့်ရင် သူ့ဆီမှာ အစွမ်းထက်တဲ့ လျှို့ဝှက်လက်နက် တစ်ခုခု ရှိနေရမယ်"
ယေဘုယျအားဖြင့် နိမ့်ပါးသော ဘဝမှ တက်လာပြီး အန္တရာယ်များစွာ ကြုံတွေ့ရသူအဖို့ မိမိ၏ လျှို့ဝှက်ချက်ကို ဖုံးကွယ်ထားရန် ခဲယဉ်းလှသည်။ သို့သော် ယွမ်တာရှန့်ကမူ ဖုံးကွယ်ထားနိုင်ခဲ့သည်။
"သူ့မှာ ပါရမီထူး တစ်ခုခု ရှိနေဖို့ အလားအလာ အရမ်းများတယ်။ ဒါပေမဲ့ ခုနက တိုက်ပွဲမှာတော့ ငါ ဒါကို မတွေ့ခဲ့ရဘူး"
နင်းကျော့ မျက်မှောင်ကြုတ်ကာ အသည်းအသန် စဉ်းစားနေမိသည်။ မြေအောက်အလုပ်ရုံအတွင်း တစ်လောကလုံး တိတ်ဆိတ်နေပြီး လေထုမှာလည်း လေးလံကာ ဖိအားပေးနေသကဲ့သို့ ခံစားနေရသည်။
ယွမ်တာရှန့်၏ အစွမ်းမှာ အတော်ပင် ထူးကဲလှသဖြင့် နင်းကျော့၏ ဦးဆောင်မှုကို ခြိမ်းခြောက်နေသည့်အပြင် သူ၏ အစီအစဉ်များကိုလည်း အကြီးအကျယ် အနှောင့်အယှက် ပေးနေသည်။
ပို၍ ကြောက်စရာကောင်းသည်မှာ ယွမ်တာရှန့်၏ တည်ရှိမှုသာ ပေါက်ကြားသွားပါက အခြား အင်အားကြီး အုပ်စုလေးခု၏ တုံ့ပြန်မှုပင် ဖြစ်သည်။
ထိုသူများ၏ တုံ့ပြန်မှုမှာ တစ်ပုံစံတည်း ဖြစ်နေပေလိမ့်မည်။ ယင်းမှာ ယွမ်တာရှန့်ကို သူတို့အတွက် အလုပ်လုပ်ပေးရန် အကျပ်ကိုင်ခြင်း သို့မဟုတ် စည်းရုံးခြင်းပင် ဖြစ်သည်။
ထိုကဲ့သို့သော လက်နက်ကောင်း တစ်ခုကို ပိုင်ဆိုင်လိုက်ရပါက မည်သည့်အဖွဲ့မဆို သိသာသော အားသာချက်ကို ရရှိသွားမည်ဖြစ်ပြီး နောက်ဆုံးတွင် ချော်ရည်နန်းတော်ကိုပင် သိမ်းပိုက်နိုင်ပေလိမ့်မည်။
ယွမ်တာရှန့် မိစ္ဆာပညာရပ်များ ကျင့်ကြံနေခြင်းမှာ သူတို့အတွက် အရေးမကြီးပေ။ အင်အားကြီး ဂိုဏ်းများတွင် မိစ္ဆာကျင့်ကြံသူများကို လက်ပါးစေအဖြစ် ထားရှိနေသည်မှာ အဆန်း မဟုတ်ချေ။
တခါတရံတွင်မူ တရားသော ကျင့်ကြံသူများ ကိုယ်တိုင်ပင် မိစ္ဆာကျင့်ကြံသူအဖြစ် ဟန်ဆောင်ကာ မတော်မတရားမှုများကို ပြုလုပ်လေ့ ရှိကြသည်။
ထို့ပြင် ယွမ်တာရှန့်မှာလည်း ထိန်းချုပ်ရ လွယ်ကူလှသည်။
မျောက်ခေါင်းဂိုဏ်းနှင့် ယွမ်အာတို့မှာ သူ၏ အားနည်းချက်များပင် ဖြစ်သည်။ အင်အားကြီးသော မဟာမိတ်များ ဖွဲ့စည်းသွားပါက နင်းကျော့ အရေးနိမ့်ရန်မှာ သေချာသလောက် ရှိနေပြီ ဖြစ်သည်။
နောက်ဆက်တွဲ ဖြစ်ရပ်များကို ခန့်မှန်းရသည်မှာ မခဲယဉ်းပေ။ အင်အားကြီး အုပ်စုများနှင့် ယွမ်တာရှန့်တို့ ပူးပေါင်းကာ ထောင်ချောက်များကို ဖယ်ရှားပြီး နင်းကျော့ကို အမြန် ကျော်တက်သွားကြပေလိမ့်မည်။
နောက်ဆုံးတွင် သူတို့သည် ချော်ရည်နန်းတော်၏ အရှင်သခင် ဖြစ်လာကာ မှတ်တမ်းများကို ပြန်ကြည့်ပြီး နင်းကျော့၏ လုပ်ရပ်များကို သိရှိသွားကြကာ သူ့ကို ဖမ်းဆီးပြီး ဗုဒ္ဓနှလုံးသား မိစ္ဆာတံဆိပ်တော်ကိုပါ ဖော်ထုတ်သွားကြပေလိမ့်မည်။