အခန်း (၃၇-၃၈)
Vol. 4 Ch. 37-38
အခန်း (၃၇) သစ်သားအရုပ်
ချင်လဲ့သည် အဖွဲ့၏ ရှေ့ဆုံးတွင် ရပ်လျက် သစ်သားအရုပ်ကို ငွေရောင်အတောင်ပံ နတ်ဆိုးဝံပုလွေ ၁၁ ကောင်ရှိရာဘက်သို့ မြှောက်ကိုင်ထားလိုက်၏။
"သူတို့ အခု ရပ်သွားတော့မှာပါ..."
ချင်လဲ့သည် စိတ်ထဲမှ တိတ်တဆိတ် ရေရွတ်ရင်း ဝံပုလွေအုပ် အလိုအလျောက် ရပ်တန့်သွားမည်ကို အေးအေးဆေးဆေး စောင့်ကြည့်နေ၏။ သူ၏အဘိုး ပြောကြားချက်အရ ဤနတ်ဆိုးဝံပုလွေများသည် ထိုသစ်သားအရုပ်ကို မှတ်မိကြလိမ့်မည် ဖြစ်သည်။ ဤအရုပ်ကို ထုတ်ပြလိုက်သည်နှင့် ဝံပုလွေများ၏ တိုက်ခိုက်မှုမှ သူတို့ လွတ်မြောက်နိုင်မည် ဖြစ်၏။
သူ၏ အဘိုးစကားကို မယုံကြည်ရန် အကြောင်းမရှိသဖြင့် ချင်လဲ့မှာ အပြည့်အဝ ယုံကြည်မှု ရှိနေသည်။ ဝံပုလွေများ ဤအရုပ်ကို မြင်သည်နှင့် သူတို့၏ အရှိန်ကို လျှော့ချသွားလိမ့်မည်ဟု သူ ထင်မြင်နေ၏။
"သူ ဘာလုပ်နေတာလဲ။ ဝံပုလွေတွေကို သူ့ကိုယ်သူ အစာကျွေးနေတာလား။ သူ့ကို ကိုက်ဖြတ်စားပြီးရင် ဝံပုလွေတွေက ငါတို့ကို လွှတ်ပေးမယ်လို့ သူ ထင်နေတာလား" မိမိကိုယ်ကိုယ် အဆုံးစီရင်ရန် ပြင်နေသော ကောင်းမိသားစုဝင် ကျင့်ကြံသူက တိုးတိုးလေး ညည်းတွားလိုက်၏။ ချင်လဲ့၏ ပြုမူပုံကို မြင်ရသည်မှာ သူ့အတွက် လုံးဝ နားမလည်နိုင်စရာ ဖြစ်နေသည်။
"ချင်လဲ့၊ ဘာလုပ်နေတာလဲ၊ မြန်မြန် ပြန်လာခဲ့" လင်ယွီရှီးမှာ အလွန်စိုးရိမ်မကင်း ဖြစ်သွားရသည်။ သူမသည် ခံစစ်ပုံစံကိုပင် ဂရုမစိုက်နိုင်တော့ဘဲ လက်ထဲရှိ နှလုံးသားညီနောင် ကွင်းနှစ်ကွင်းကို ကိုင်လျက် ချင်လဲ့ရှိရာသို့ အပြေးအလွှား သွားလိုက်၏။
"အဲဒီ သစ်သားအရုပ်က... တကယ့်ကို အစွမ်းထက်တဲ့ ဝိညာဉ်လက်နက် တစ်ခုခုပဲ ဖြစ်ရမယ်" လျိုရန်မှာလည်း ခဏမျှ မှင်တက်သွားသော်လည်း ချက်ချင်းပင် သတိဝင်လာကာ အသေအချာ ပြောလိုက်သည်။ "ချင်လဲ့မှာ အစီအစဉ် တစ်ခုခု ရှိမှာပါ၊ သူ ဘယ်လို အံ့ဖွယ်အမှုတွေကို ဖန်တီးပြမလဲဆိုတာ ကြည့်ကြတာပေါ့"
ချင်လဲ့နှင့် စတင်တွေ့ဆုံကတည်းက ဤလူငယ်သည် လျှို့ဝှက်ချက်များဖြင့် ပြည့်နှက်နေသူဖြစ်ကြောင်း လျိုရန် ခံစားမိထားသည်။ ထို့ကြောင့် ချင်လဲ့ ယုံကြည်ချက်အပြည့်ဖြင့် မြှောက်ကိုင်ထားသော အရုပ်မှာ လူတိုင်းကို ဝံပုလွေများလက်မှ ကာကွယ်ပေးနိုင်သည့် အလွန်အစွမ်းထက်သော ဝိညာဉ်လက်နက်တစ်ခု ဖြစ်လိမ့်မည်ဟု သူ ယုံကြည်နေခြင်း ဖြစ်သည်။
"ဒါက အဘိုးချင်ရှန်း ထွင်းထားတဲ့ အရုပ် မဟုတ်လား" လင်ဖုန်းက အံ့အားသင့်တကြီး မေးမြန်းလိုက်၏။ "ဒါက ဘယ်လိုဖြစ်နိုင်မှာလဲ။ ဒီအရုပ်လေးက ဝံပုလွေတွေကို ဟန့်တားနိုင်တယ် ဟုတ်လား။ မဖြစ်နိုင်တာ"
လင်မိသားစုဝင် အတော်များများမှာလည်း ထိုသို့ပင် ခံစားနေရ၏။ သူတို့၏ မျက်လုံးများတွင် ထူးဆန်းသော အကြည့်များဖြင့် ပြည့်နှက်နေပြီး ချင်လဲ့၏ ပြုမူပုံမှာ အနည်းငယ် ရယ်စရာကောင်းနေသည်ဟု ထင်မြင်နေကြသည်။
"ဟင်... ဘာလို့ မရပ်ကြတာလဲ" စက္ကန့်အနည်းငယ် ကြာပြီးနောက် ဝံပုလွေများမှာ အရှိန်လျော့မသွားသည်ကို မြင်ရသောအခါ ချင်လဲ့လည်း မှင်တက်သွားရသည်။ "မဖြစ်နိုင်တာ၊ အဘိုးပြောသလို တစ်ခုမှ မဟုတ်ပါလား။ ဒုက္ခပဲ"
ယခင်က ဝံပုလွေများသည် အတော်လေး ဝေးကွာသော နေရာတွင် ရှိနေသော်လည်း ယခုမူ အရှိန်အဟုန်ဖြင့် ပြေးဝင်လာကြသဖြင့် အနီးအနားသို့ပင် ရောက်ရှိနေပြီ ဖြစ်သည်။ ရှေ့ဆုံးမှ ဝံပုလွေကြီးမှာ ချင်လဲ့ဆီသို့ တိုက်ရိုက် ဦးတည်နေပြီး အားပါသော ဟိန်းသံကြီးနှင့်အတူ ရုတ်ချည်း ခုန်အုပ်လိုက်တော့သည်။
ထိုနတ်ဆိုးဝံပုလွေ၏ ကိုယ်ပေါ်မှ ကြောက်မက်ဖွယ်ကောင်းသော ဖိအားများ ထွက်ပေါ်နေ၏။ သူ၏ ကျယ်ပြန့်သော အတောင်ပံများမှ ဖြာထွက်နေသည့် ငွေရောင်အလင်းတန်းများမှာ လွှသွားကဲ့သို့ ထက်မြက်လှသည်ဟု လူတိုင်း ခံစားလိုက်ရသည်။
"ချင်လဲ့၊ ငေးမနေနဲ့"
လင်ယွီရှီးက အော်ဟစ်လိုက်ပြီး လက်ထဲမှ နှလုံးသားညီနောင် ကွင်းနှစ်ကွင်းကို တစ်ပြိုင်တည်း ပစ်လွှတ်လိုက်၏။ ၎င်းသည် အလင်းတန်းများသဖွယ် ဖြစ်သွားကာ ချင်လဲ့အား ကာကွယ်ပေးရန်အတွက် အမြန်ဆုံးပြေးဝင်လာသော ဝံပုလွေဆီသို့ ဦးတည်သွားတော့သည်။
"အာဝူး..."
ထိုနတ်ဆိုးဝံပုလွေက ကြမ်းတမ်းစွာ ဟိန်းဟောက်လိုက်ပြီး သူ၏ ခြေသည်းများဖြင့် ကွင်းနှစ်ကွင်းကို ပြင်းထန်စွာ ရိုက်ချလိုက်၏။ ကွင်းနှစ်ကွင်းမှာ သတ္တုချင်း ထိခိုက်သံနှင့်အတူ ကောင်းကင်ပေါ်သို့ လွင့်စင်သွားပြီး ဝိညာဉ်စွမ်းအင်များဖြင့် တည်ဆောက်ထားသော အလင်းအတားအဆီးမှာလည်း ရုတ်ချည်း ပျက်စီးသွားရတော့သည်။
လင်ယွီရှီး၏ လှပသော မျက်နှာလေးမှာ ပြာနှမ်းသွားသော်လည်း သူမသည် နောက်ထပ် မည်သည်မျှ မစဉ်းစားတော့ဘဲ ချင်လဲ့၏ ရှေ့တွင် ရပ်ကာ သူမ၏ နုနယ်သော လက်ကလေးများဖြင့် ဝိညာဉ်စွမ်းအင်များကို စုစည်းလျက် ဝံပုလွေ၏ တိုက်ခိုက်မှုအား တားဆီးရန် ပြင်လိုက်၏။
သူမသည် ချင်လဲ့အတွက် သေစေနိုင်သော တိုက်ခိုက်မှုကို မိမိကိုယ်တိုင် ခံယူရန် ပြင်လိုက်ခြင်း ဖြစ်၏။
နတ်ဆိုးဝံပုလွေ၏ မျက်လုံးထဲမှ ကြောက်မက်ဖွယ် အလင်းရောင်များမှာ ထိတ်လန့်စရာ ကောင်းလှသည်။ ၎င်းသည် လင်ယွီရှီးကို လှောင်ပြောင်သကဲ့သို့ ကြည့်ကာ အတောင်ပံများကို ဖြန့်ကျက်လျက် သူမ၏ အပေါ်မှနေ၍ ထိုးဆင်းလိုက်၏။ အပျိုမလေးတစ်ယောက်၏ အသားမှာ ပိုမို အရသာရှိမည်ဟု ထင်မြင်ပုံရသဖြင့် ၎င်းသည် ချင်လဲ့ကိုပင် ထားရစ်ခဲ့ကာ လင်ယွီရှီးကိုသာ ဦးတည်လိုက်တော့သည်။
"မြန်မြန် ပြေးတော့" လင်ယွီရှီးက အော်ဟစ်လိုက်၏။
ချင်လဲ့မှာ သူ ထင်ထားသလို သစ်သားအရုပ်က အလုပ်မဖြစ်သဖြင့် ခဏမျှ ကြောင်အသွားရသည်။ သို့သော် သတိပြန်ဝင်လာသည့် ခဏတွင် လင်ယွီရှီးမှာ သူ့ရှေ့တွင် ရောက်ရှိနေပြီး သူမ၏ အသက်ကိုပင် ပဓာနမထားဘဲ ဝံပုလွေ၏ တိုက်ခိုက်မှုအား ဟန့်တားရန် ပြင်နေသည်ကို မြင်တွေ့လိုက်ရ၏။
လင်ယွီရှီးမှာ ခန္ဓာကိုယ်သန့်စင်ခြင်း အဆင့် ၈ သာ ရှိသေးသော်လည်း ဤဝံပုလွေမှာ ဝိညာဉ်ပေါက်ဖွားခြင်းအဆင့်နှင့် ညီမျှသော အဆင့် ၂ သားရဲ ဖြစ်သည်။ သူမ၏ လက်နက်များ လွင့်စင်သွားပုံကို ကြည့်ခြင်းအားဖြင့် သူမသည် ဤဝံပုလွေအား မည်သို့မျှ ယှဉ်နိုင်မည် မဟုတ်ပေ။
ချင်လဲ့ သတိဝင်လာချိန်တွင် လင်ယွီရှီး၏ ခန္ဓာကိုယ်လေးမှာ ဝံပုလွေ၏ ရိုက်ချက်ကို ခံရတော့မည့် အခြေအနေတွင် ရှိနေသည်။ သူ၏ အစိမ်းရောင်အတောင်ပံ ပုဆိန်အား ထုတ်ယူရန် အချိန်မမီတော့သဖြင့် လက်ထဲရှိ သစ်သားအရုပ်ကိုပင် လက်နက်အဖြစ် အသုံးပြုကာ တိုက်ခိုက်လိုက်တော့၏။
ကောင်းကင်မိုးကြိုးနှိမ်နင်းခြင်း ကျင့်စဉ်ကို လည်ပတ်လိုက်ရာ သူ၏ ဝိညာဉ်စွမ်းအင်နှင့်အတူ ရောယှက်နေသော မိုးကြိုးနှင့် လျှပ်စစ်စွမ်းအင်များသည် သစ်သားအရုပ်အတွင်းသို့ အရှိန်အဟုန်ဖြင့် စီးဝင်သွားတော့သည်။
"ဝုန်း..."
မယုံကြည်နိုင်လောက်သော ပြင်းထန်သော စွမ်းအားကြီးတစ်ခုသည် သစ်သားအရုပ်အတွင်းမှ ပေါက်ကွဲထွက်ပေါ်လာ၏။
သစ်သားအရုပ်၏ ထိပ်ပိုင်းမှ လက်ညှိုးခန့်ရှိသော အပြာရောင် လျှပ်စီးတန်း တစ်ဆယ်ကျော်မှာ ရုတ်ချည်း ထွက်ပေါ်လာတော့သည်။ ထိုလျှပ်စီးတန်းများသည် လျှပ်စစ်ပိုက်ကွန်ကြီး တစ်ခုအသွင်ဖြင့် ရှေ့ရှိ လေးမီတာခန့် ဧရိယာကို လွှမ်းခြုံသွားတော့၏။
"ဖြန်း... ဖြန်း... ဖြန်း... ဝုန်း... ဝုန်း... ဝုန်း"
မိုးခြိမ်းသံကြီးနှင့်အတူ လျှပ်စီးတန်းများမှာ ပြင်းထန်စွာ ထွက်ပေါ်နေသည်။ သစ်သားအရုပ်မှ ထွက်ပေါ်လာသော လျှပ်စစ်ပိုက်ကွန်မှာ ကြောက်မက်ဖွယ်ကောင်းသော ဖိအားများကို ထုတ်လွှတ်နေ၏!
"ဘုန်း..."
နတ်ဆိုးဝံပုလွေ၏ မျက်လုံးတွင် ကြောက်ရွံ့မှုများ အရိပ်ထင်သွားသော်လည်း သူ၏ ခန္ဓာကိုယ်အရှိန်ကို မထိန်းနိုင်ဘဲ လျှပ်စစ်ပိုက်ကွန်ထဲသို့ တိုက်ရိုက် တိုးဝင်မိသွားတော့သည်။
"အာဝူး..."
စူးရှသော အော်ဟစ်သံကြီးနှင့်အတူ ဝံပုလွေ၏ ငွေရောင်အမွှေးအမျှင်များမှာ လောင်ကျွမ်းကာ ထောင်ထွက်သွားပြီး မိုးကြိုးပစ်ခံရသူအလား ကောင်းကင်ပေါ်မှ ပြုတ်ကျကာ ခွေလိပ်သွားတော့သည်။
"ဂျိန်း... ဂျိန်း... ဂျိန်း"
သစ်သားအရုပ်မှ ထွက်ပေါ်နေသော လျှပ်စစ်ပိုက်ကွန်မှာ ပြင်းထန်သော လျှပ်စီးကြောင်းများကို အဆက်မပြတ် ထုတ်လွှတ်နေဆဲ ဖြစ်သည်။ လျှပ်စီးတန်းတစ်ခုချင်းစီမှာ မြွေများအလား လိမ်ရှုပ်နေပြီး အလွန်ပင် ကြောက်မက်ဖွယ်ကောင်းလှ၏။
"ဂလောင်... ဂလောင်"
လင်ယွီရှီးမှာ မြေပြင်ပေါ် ပြုတ်ကျသွားသော သူမ၏ လက်နက်များကိုပင် ပြန်မကောက်နိုင်သေးပေ။ သူမသည် သူမအား ကာကွယ်ပေးထားသော ချင်လဲ့နှင့် သူ၏ လက်ထဲမှ ထွက်ပေါ်နေသော လျှပ်စစ်ပိုက်ကွန်ကြီးကိုသာ ငေးကြည့်နေမိ၏။ သေမင်းတံခါးဝမှ ပြန်လည်လွတ်မြောက်လာခဲ့သဖြင့် သူမ၏ ရင်ထဲတွင် ခံစားချက်ပေါင်းစုံ ဖြစ်ပေါ်နေတော့သည်။
"ငါ သိသားပဲ။ ဒီကောင်လေးမှာ ယုံကြည်မှု မရှိရင် ဘာလို့ ခံစစ်ပုံစံထဲကနေ ထွက်သွားမှာလဲ" လျိုရန်က ခေါင်းညိတ်ကာ ချင်လဲ့ကို အသေအချာ ကြည့်ရင်း ပြောလိုက်သည်။ "ဒီကောင်က ငါ ထင်သလိုပါပဲ။ လျှို့ဝှက်ချက်တွေနဲ့ ပြည့်နေတာပဲ၊ အလွယ်တကူ သေမယ့်သူ မဟုတ်ဘူး"
"အစ်ကိုလျိုက တကယ့်ကို အမြော်အမြင် ရှိတာပဲ" လင်ရှင်းက လှိုက်လှိုက်လှဲလှဲ ချီးကျူးလိုက်၏။ လျိုရန်က အသာအယာ ပြုံးပြလိုက်သည်။
"အာဝူး..."
မြေပြင်ပေါ် လဲကျနေသော ဝံပုလွေမှာ နာကျင်စွာ အော်ဟစ်နေပြီး သူ၏ ကိုယ်ပေါ်တွင် လျှပ်စစ်စီးကြောင်းအချို့ လက်ကျန်ရှိနေသေး၏။ ၎င်းသည် မတ်တပ်ရပ်လိုက်ပြီးနောက် ချင်လဲ့၏ လက်ထဲမှ အရုပ်ကို ကြောက်လန့်တကြား ကြည့်ကာ နောက်သို့ ဆုတ်သွားတော့သည်။ နောက်ထပ် တိုက်ခိုက်ရန် မဝံ့တော့ပေ။
နောက်မှ လိုက်ပါလာသော ဝံပုလွေများမှာလည်း ၎င်းတို့၏ အဖော် ရှုံးနိမ့်သွားသည်ကို မြင်သောအခါ ချက်ချင်း ရပ်တန့်သွားကြ၏။ ဝံပုလွေ တစ်ကောင်ချင်းစီမှာ တစ်ကောင်နောက် တစ်ကောင် တန်းစီရပ်လျက် လျှပ်စစ်ပိုက်ကွန်ကြီးကို ကြောက်ရွံ့တုန်လှုပ်စွာ ကြည့်နေကြတော့သည်။
ချင်လဲ့ကိုယ်တိုင်လည်း မှင်တက်သွားရ၏။
သူသည် အရုပ်၏ ခြေထောက်ကို ကိုင်ထားပြီး ဦးခေါင်းပိုင်းကို ဝံပုလွေအုပ်ရှိရာသို့ ချိန်ထားသည်။ သူ၏ ဝိညာဉ်စွမ်းအင်နှင့် မိုးကြိုးစွမ်းအင်များကို ထည့်သွင်းလိုက်သည့်အခါ အရုပ်၏ ဦးခေါင်းမှ အံ့အားသင့်ဖွယ် လျှပ်စစ်စီးကြောင်းများ ထွက်ပေါ်လာပြီး ရှေ့ရှိ ဧရိယာတစ်ခုလုံးကို လွှမ်းခြုံထားခြင်း ဖြစ်သည်။
"ဒါ... ဒါက တကယ့် ဝိညာဉ်လက်နက် တစ်ခုပါလား..."
သူ၏ အဘိုး ချန်ထားခဲ့သော အရုပ်မှာ ဝိညာဉ်လက်နက်တစ်ခု ဖြစ်လိမ့်မည်ဟု သူ လုံးဝ မထင်မှတ်ထားခဲ့ပေ။ ထို့ကြောင့်လည်း ဤအရုပ်ကို ရခဲ့သည့်နေ့မှစ၍ သူသည် ဝိညာဉ်စွမ်းအင် ထည့်သွင်းကာ စမ်းသပ်ခြင်း မပြုခဲ့ဖူးပေ။
ယခု အရေးကြီးသော ခဏတွင် သူသည် စဉ်းစားရန် အချိန်မရှိခဲ့ပေ။ အရုပ်ကို ကိုင်လျက် ဝံပုလွေကို တိုက်ခိုက်ရန် ပြင်လိုက်ချိန်တွင် လင်ယွီရှီးအား ကယ်တင်ရန်အတွက် သူ၏ အစွမ်းရှိသမျှကို ထည့်သွင်းလိုက်ခြင်း ဖြစ်သည်။ သို့သော် ထိုအရုပ်က သူ့ကို ဤမျှအထိ အံ့အားသင့်စေမည်ဟု သူ မမျှော်လင့်ထားခဲ့ပေ။
ယခင်က ဤအရုပ်ကို ဝိညာဉ်လက်နက်ဟု မထင်မှတ်ခဲ့သဖြင့် စိတ်စွမ်းအား ထည့်သွင်းကာ အတွင်းပိုင်းအား မစစ်ဆေးခဲ့ဖူးပေ။ ယခုအခါ ဝံပုလွေများ ရပ်တန့်သွားသဖြင့် အချိန်ရသွားပြီ ဖြစ်ရာ သူသည် ဝိညာဉ်စွမ်းအင်နှင့်အတူ စိတ်စွမ်းအားအချို့ကို အရုပ်အတွင်းသို့ စိမ့်ဝင်စေကာ စစ်ဆေးကြည့်လိုက်၏။
သူ၏ စိတ်စွမ်းအား စိမ့်ဝင်သွားသည့် ခဏမှာပင် ချင်လဲ့၏ မျက်နှာမှာ ဝင်းပသွားပြီး စိတ်ထဲမှ အော်ဟစ်လိုက်မိသည်။" တကယ့်ကို အံ့ဩစရာကောင်းတဲ့ လက်နက်ပြုပြင်နည်းပဲ"
ထိုအရုပ်လေးထဲတွင် အနည်းဆုံး ဝိညာဉ်အစီရင် ခြောက်မျိုးခန့် ပါရှိနေ၏။ အခြေခံ အစီရင် လေးမျိုးလုံး ဖြစ်သော ဝိညာဉ်စုဆောင်းခြင်း၊ စွမ်းအားမြှင့်တင်ခြင်း၊ ဝိညာဉ်သိုလှောင်ခြင်း နှင့် ကြံ့ခိုင်စေခြင်းတို့ အားလုံး ပါဝင်နေသည်။
သူ့ဆီတွင် ရှိသော ဝိညာဉ်နှိမ်နင်းခြင်း ပုတီးစေ့ထဲရှိ အစီရင်များနှင့် ယှဉ်လျှင် အနည်းငယ် ရိုးရှင်းသော်လည်း သူ ယခင်က ပြင်ခဲ့ဖူးသော အစိမ်းရောင်အတောင်ပံ ပုဆိန် နှင့် ခြောက်မြောင့်ပုံစံဒိုင်းတို့ထက်မူ အဆပေါင်းများစွာ ပိုမိုနက်နဲကာ ရှုပ်ထွေးလှပေသည်။
ဤအရုပ်လေးထဲရှိ အစီရင်များသည် အလွန်အမင်း အသေးစိတ်လှပြီး တစ်ခုနှင့်တစ်ခု အချိတ်အဆက်မိစွာ အလုပ်လုပ်နေကြသည်။ ထိုအခြေခံ လေးမျိုးအပြင် အလွန်ပင် ရှုပ်ထွေးလှသော အခြားအစီရင် နှစ်ခုလည်း ပါရှိနေသေး၏။ ထိုအစီရင် နှစ်ခုမှာ ဤအရုပ်၏ အဓိက အသက်ဝိညာဉ် ဖြစ်ပုံရသည်။
အစီရင် ခြောက်မျိုးလုံးသည် အရုပ်အတွင်း နေရာယူထားပြီး ဝိညာဉ်လမ်းကြောင်းများမှာ လူ့ခန္ဓာကိုယ်ရှိ သွေးကြောလမ်းကြောင်းများအလား ရှုပ်ထွေးစွာ ယှက်နွယ်နေသဖြင့် ချင်လဲ့ကို အလွန်ပင် မှင်တက်သွားစေ၏။ ရုတ်တရက်ဆိုသလို ဤအရုပ်လေးမှာ သက်ရှိတစ်ခုအလား ခံစားလိုက်ရသည်။ အဘယ်ကြောင့်ဆိုသော် ၎င်းတွင် လူသားများကဲ့သို့ ကြွက်သားများ၊ သွေးကြောလမ်းကြောင်းများနှင့် အသားစများ ရှိနေသကဲ့သို့ ခံစားရသောကြောင့် ဖြစ်၏။
အစီရင်အတွင်း စီးဆင်းနေသော ဝိညာဉ်စွမ်းအင်မှာ ကျင့်ကြံသူများ အစွမ်းထုတ်ဖော်သကဲ့သို့ပင် အလွန်ပင် အံ့အားသင့်ဖွယ် ကောင်းလှသည်။ ချင်လဲ့သည် ပန်းပဲပညာရှင် စစ်စစ် မဟုတ်သေးသော်လည်း သူ၏ အနည်းငယ်သော ဗဟုသုတအရ ဤအရုပ်ထဲရှိ အစီရင်မှာ တကယ့် ပန်းပဲပညာရှင် တစ်ဦး၏ လက်ရာဖြစ်ကြောင်း သူ အသေအချာ သိလိုက်၏။
ဤအရုပ်သည် အလွန်ပင် ထူးခြားဆန်းကြယ်သော ဝိညာဉ်လက်နက်တစ်ခု ဖြစ်ရပေမည်။ ၎င်းနှင့် ယှဉ်လိုက်လျှင် သူ ပြင်ခဲ့ဖူးသော လက်နက်များမှာ ကလေးကစားစရာအလား ဖြစ်သွားရသည်။
ဤအရုပ်ထဲရှိ အစီရင်များသည် ထူးခြားလှသဖြင့် သူ၏ စွမ်းအားများကို ထည့်သွင်းလိုက်သည့်အခါ ၎င်းမှာ အဆပေါင်းများစွာ ပိုမိုအားကောင်းသွားကာ သူကိုယ်တိုင်ပင် မယုံကြည်နိုင်လောက်အောင် ဖြစ်သွားရသည်။ ထို့ကြောင့်လည်း ဝံပုလွေများမှာ ဆက်မတိုက်ဝံ့တော့ဘဲ နောက်ဆုတ်သွားကြခြင်း ဖြစ်၏။
"ချင်လဲ့၊ ပြန်လာခဲ့တော့။ ဝိညာဉ်စွမ်းအင်တွေ အကုန်မသုံးနဲ့ဦး" လျိုရန်က ရုတ်တရက် သတိပေးလိုက်၏။
"အင်း... အရင်ဆုံး နောက်ဆုတ်ကြစို့။ အားအင်တွေ အလဟဿ မဖြုန်းနဲ့တော့" လင်ယွီရှီးကလည်း တိုးတိုးလေး ဆိုလိုက်၏။ ထို့နောက် သူမသည် သူမ၏ လက်နက်များကို အမြန်ကောက်ယူလိုက်၏။ လျှပ်စစ်ပိုက်ကွန်မှ ထွက်ပေါ်နေသော ပြင်းထန်သည့် စွမ်းအားကို ခံစားရင်း သူမ တိတ်တဆိတ် အံ့အားသင့်နေမိသည်။ ဤစွမ်းအားမှာ ဝိညာဉ်သန့်စင်ခြင်း အဆင့်ရှိသူတစ်ဦး ထုတ်ဖော်နိုင်သော စွမ်းအားမဟုတ်ကြောင်း သူမ အသေအချာ သိထား၏။
"ဒါ ဘယ်အဆင့်ရှိတဲ့ ဝိညာဉ်လက်နက် ဖြစ်မလဲ..." သူမသည် စိတ်ထဲမှ တွေးတောနေမိ၏။ ဤအရုပ်သည် ချင်လဲ့၏ ခွန်အားကို အဆပေါင်းများစွာ မြင့်တက်စေသည်မှာ အမှန်ပင် ဖြစ်၏။
ချင်လဲ့ သတိပြန်ဝင်လာပြီး ခေါင်းညိတ်ကာ ဝိညာဉ်စွမ်းအင် ထည့်သွင်းခြင်းကို ရပ်တန့်လိုက်၏။ သူ စွမ်းအားများကို ရပ်တန့်လိုက်သည့်အခါ လျှပ်စစ်ပိုက်ကွန်မှာ ချက်ချင်း ပျောက်ကွယ်မသွားဘဲ တဖြည်းဖြည်း သေးငယ်သွားတော့သည်။
"ဒီအရုပ်ထဲမှာ ဝိညာဉ်စွမ်းအင်တွေ သိုလှောင်ထားပြီးသားပဲ"
အရုပ်အတွင်းရှိ ဝိညာဉ်သိုလှောင်ခြင်း အစီရင်ထဲတွင် တောက်ပနေသော အဖြူရောင် အရာတစ်ခု ရှိနေသည်ကို ချင်လဲ့ ချက်ချင်း တွေ့လိုက်ရ၏။ ၎င်းမှာ အထဲတွင် သိုလှောင်ထားပြီးသား ဝိညာဉ်စွမ်းအင် ဖြစ်၏။ သူ ယခုကဲ့သို့ စွမ်းအားကြီးသော လျှပ်စစ်ပိုက်ကွန်ကို ထုတ်ဖော်နိုင်ခြင်းမှာ ထိုသိုလှောင်ထားသော ဝိညာဉ်စွမ်းအင်အား သူ၏ စွမ်းအားဖြင့် လှုံ့ဆော်ပေးလိုက်သောကြောင့် ဖြစ်ရပေမည်။
ဤဝိညာဉ်စွမ်းအင်မှာ အရုပ်အတွင်း နှစ်ပေါင်းများစွာ ရှိနေခဲ့သော်လည်း ထုတ်ဖော်လိုက်သည့်အခါတွင်မူ အလွန်ပင် ပြင်းထန်လှပြီး တစ်ကြိမ်တည်းနှင့်လည်း ကုန်ဆုံးမသွားပေ။ ဤဝိညာဉ်စွမ်းအင်မှာ မည်မျှအထိ သန့်စင်ပြီး များပြားနေသနည်း။
"ဒါကို ငါ့အဘိုးက တကယ်ပဲ ထွင်းထုခဲ့ပြီး ဒီလောက် ကြောက်စရာကောင်းတဲ့ စွမ်းအင်တွေကို ချန်ထားခဲ့တာလား။ တကယ်လို့ ဒါဟာ အဘိုးရဲ့ လက်ရာဆိုရင် အဘိုးက ငါ့ကို ဘာတွေများ ဖုံးကွယ်ထားခဲ့သေးတာလဲ..." ချင်လဲ့မှာ အလွန်ပင် တုန်လှုပ်အံ့အားသင့် သွားရတော့သည်။
အခန်း (၃၈) ထပ်ဆင့်ဝိုင်းရံခြင်း
ချင်လဲ့နှင့် လင်ယွီရှီးတို့သည် ခံစစ်ပုံစံအတွင်းသို့ အတူတကွ ပြန်လည်ဝင်ရောက်လာပြီး လူတိုင်းနှင့်အတူ တိုက်ပွဲဝင်ရန် ပြင်ဆင်လိုက်ကြ၏။
"ဟူး... ဟူး... ဟူး"
လျိုရန်၏ ခြောက်မြောင့်ပုံစံဒိုင်းမှ ငွေရောင်အလင်းတန်းများ တစ်တန်းပြီးတစ်တန်း ထွက်ပေါ်လာပြီး အလင်းတန်း ခြောက်တန်းမှာ အကာအကွယ် အဝိုင်းတစ်ခုအဖြစ် ပေါင်းစပ်သွားတော့သည်။ လင်ဖုန်းနှင့် လင်ယွီရှီးတို့သည်လည်း ၎င်းတို့၏ ဝိညာဉ်လက်နက်များကို အသီးသီး ထုတ်ယူကာ ဝိညာဉ်စွမ်းအင်များ ထည့်သွင်းလျက် အစွမ်းပြရန် အသင့်ပြင်လိုက်ကြ၏။
ကောင်းယွီက အေးစက်သော အမူအရာဖြင့် ဝံပုလွေအုပ်ကို ကြည့်ကာ သူ၏ ဘီလူးမျက်နှာ လက်စွပ်နှစ်ကွင်းကို လှုံ့ဆော်လိုက်သည်။ နာကျင်စွာ အော်ဟစ်နေသော ဝိညာဉ်ဦးခေါင်းခွံများမှာ သူ၏ ခန္ဓာကိုယ်ရှေ့တွင် တိမ်တိုက်မည်းကြီးအလား ပေါ်ထွက်လာပြီး ပတ်ဝန်းကျင်အား အေးစက်စေကာ စိတ်ဓာတ်ကို တုန်လှုပ်စေသော စွမ်းအားများဖြင့် ခံစစ်အလွှာတစ်ခု တည်ဆောက်လိုက်၏။
ချင်လဲ့မှာမူ သစ်သားအရုပ်ကို တင်းတင်းဆုပ်ကိုင်လျက် ဦးခေါင်းပိုင်းအား ဝံပုလွေအုပ်ရှိရာသို့ ချိန်ထားသည်။ လျှပ်စစ်ဖြန်းသံများနှင့်အတူ မိုးကြိုးလျှပ်စစ်ပိုက်ကွန်ကြီးမှာ တဖြည်းဖြည်း ပြန့်ကားလာတော့သည်။
"အာဝူး..."
ယခင်က ဒဏ်ရာရခဲ့သော နတ်ဆိုးဝံပုလွေက အသံတိုးတိုးဖြင့် အူလိုက်ရာ ဝံပုလွေအုပ်မှာ လူစုခွဲလျက် လူအုပ်ကို ဝိုင်းရံပိတ်ဆို့လိုက်ကြ၏။
"အားလုံး သတိထား။ ဒီဝံပုလွေတွေက အသိဉာဏ်ရှိတယ်၊ သူတို့က အားနည်းတဲ့နေရာကို ရှာတိုက်တတ်ကြတယ်။ အစုအဖွဲ့ ပျက်မသွားစေနဲ့"
လျိုရန်က လေးနက်သော အသံဖြင့် သတိပေးလိုက်၏။ လူတိုင်းမှာ ခံစစ်အဝိုင်းအတွင်းတွင် ပုန်းအောင်းနေကြပြီး ချင်လဲ့၊ လင်ယွီရှီး၊ လင်ဖုန်း၊ ကောင်းယွီနှင့် လျိုရန်တို့ကသာ အပြင်ဘက်တွင် ရှိနေကြသည်။ ကျန်ရှိသူများမှာမူ လှံတို၊ လှံရှည်၊ လေးနှင့်မြား စသည့် အဝေးပစ်လက်နက်များကို ကိုင်ဆောင်လျက် ဝံပုလွေများ အနားသို့ ကပ်လာမည့်အချိန်အား စောင့်ဆိုင်းနေကြ၏။
"လာကြပြီ"
လျိုရန်က အော်ဟစ်လိုက်သည်နှင့် သူ၏ ဒိုင်းမှ ရောင်စုံအလင်းတန်း ခြောက်တန်း ထွက်ပေါ်လာပြီး စွမ်းအားကြီးသော ဖိအားများ ပြန့်လွင့်လာတော့သည်။ နတ်ဆိုးဝံပုလွေ တစ်ဆယ့်တစ်ကောင်လုံးမှာ လေးဘက်လေးတန်မှ တစ်ပြိုင်နက် ခုန်အုပ်လာကြရာ ချင်လဲ့နှင့် အဖွဲ့မှာလည်း ဝိညာဉ်လက်နက်များအတွင်းသို့ စွမ်းအားများ အရှိန်အဟုန်ဖြင့် ထည့်သွင်းလိုက်ကြ၏။
ထိုခဏတွင် ဝိညာဉ်လက်နက်များမှ ရောင်စုံအလင်းတန်းများ ထွက်ပေါ်လာပြီး ဝံပုလွေများ၏ မျက်လုံးများကို စူးရှသွားစေတော့သည်။ ရောင်စုံအလင်းတန်းများ၊ လျှပ်စစ်ပိုက်ကွန်များ၊ မီးတိမ်တိုက်များနှင့် ဝိညာဉ်ဦးခေါင်းခွံများမှာ ခံစစ်အလွှာများအဖြစ် ပေါင်းစပ်သွားပြီး ပြေးဝင်လာသော ဝံပုလွေများကို ဆီးကြိုလိုက်ကြ၏။ သူတို့နောက်ရှိ လူများကလည်း မြားများနှင့် လှံများကို ဝံပုလွေအုပ်ထဲသို့ အဆက်မပြတ် ပစ်လွှတ်နေကြသည်။
"အာဝူး..."
ဝံပုလွေများသည် အားပါလှသော အူသံကြီးနှင့်အတူ ဝိညာဉ်လက်နက်များဖြင့် တည်ဆောက်ထားသော ခံစစ်ကို တိုက်ခိုက်ကြတော့သည်။ မြားများနှင့် လှံများမှာ ဝံပုလွေများ၏ ခန္ဓာကိုယ်ပေါ်သို့ ကျရောက်သော်လည်း ၎င်းတို့၏ အရေပြားကို အပေါ်ယံသာ ရှပ်ထိနိုင်ကြ၏။
ချင်လဲ့၊ လျိုရန်နှင့် ကောင်းယွီတို့၏ တိုက်ခိုက်မှုများကသာ ဝံပုလွေများကို နာကျင်စေနိုင်သဖြင့် ဝံပုလွေများမှာ ထိတ်လန့်တကြား ရှောင်ကွင်းနေကြရသည်။ ပထမအကျော့ တိုက်ခိုက်မှုတွင် ဝံပုလွေများသည် ခံစစ်ကို မဖောက်နိုင်ဘဲ ဒဏ်ရာအချို့ ရရှိကာ ခေတ္တ နောက်ဆုတ်သွားကြ၏။
"အာဝူး..."
ချင်လဲ့နှင့် တိုက်ခိုက်ခဲ့သော ဝံပုလွေက လူအုပ်ကို လှည့်ပတ်ကြည့်ရင်း အသံနိမ့်နိမ့်ဖြင့် အူလိုက်ရာ ဝံပုလွေအားလုံးမှာ ထူးဆန်းစွာ နောက်သို့ ဖြည်းဖြည်းချင်း ဆုတ်ခွာသွားကြတော့သည်။
"မဖြစ်နိုင်တာ... သူတို့ ထွက်သွားကြပြီလား" လင်ရှင်းက မျက်နှာပြာနှမ်းလျက် မြေပြင်ပေါ် ထိုင်ချလိုက်၏။ "ငါတို့ တကယ် ကိုက်ဖြတ်စားခံရတော့မယ်လို့ ထင်နေတာ။ ငါတို့အင်အားနဲ့တော့ သူတို့ကို မနိုင်နိုင်ဘူး၊ ဒါပေမဲ့ သူတို့ ဘာလို့ ထွက်သွားကြတာလဲ"
ဤမေးခွန်းမှာ လူတိုင်း၏ စိတ်ထဲတွင် ပေါ်ပေါက်နေ၏။ အဆင့် ၂ ဝံပုလွေ တစ်ဆယ့်တစ်ကောင်မှာ ဝိညာဉ်ပေါက်ဖွားခြင်း အဆင့်ရှိသူ တစ်ဆယ့်တစ်ယောက်နှင့် ညီမျှရာ ၎င်းတို့အတွက် ဤလူအုပ်ကို သတ်ဖြတ်ရန်မှာ ခက်ခဲသော အလုပ်မဟုတ်ပေ။
"ဖြစ်နိုင်တာကတော့... အစ်ကိုလျို၊ ကောင်းယွီနဲ့ ချင်လဲ့တို့က အတော်လေး အစွမ်းထက်တယ်ဆိုတာ သူတို့ သိသွားလို့နေမှာ။ သူတို့ဖက်က အထိအခိုက်မခံချင်လို့ လွှတ်ပေးလိုက်တာ ဖြစ်နိုင်တယ်" လင်ဖုန်းက သုံးသပ်ပြလိုက်၏။ လျိုရန်နှင့် လင်ယွီရှီးတို့ကလည်း ထိုစကားကို ခေါင်းညိတ် ထောက်ခံကြသည်။
"မဟုတ်ဘူး" ကောင်းယွီက ဝံပုလွေများ ထွက်သွားရာ အရပ်ကို ကြည့်ရင်း ပြောလိုက်သည်။ "ခုနက ဝံပုလွေတွေ တိုက်ခိုက်နေတုန်း ဝေးကွာတဲ့ နေရာကနေ ဝံပုလွေအူသံတစ်သံကို ငါ ကြားလိုက်ရတယ်။ ငါ မမှားဘူးဆိုရင် သူတို့ ခေါင်းဆောင်က သူတို့ကို ခေါ်လိုက်တာပဲ"
ထိုစကားကြောင့် လူတိုင်းမှာ ပြန်လည် ထိတ်လန့်သွားကြရသည်။ "နောက်ထပ် ဝံပုလွေအုပ် ရှိနေသေးတာလား။ တကယ်လို့ သူတို့ခေါင်းဆောင်က တခြားအုပ်စုနဲ့ ရှိနေတယ်ဆိုရင် အဲဒီအုပ်စုက အခုအုပ်စုထက် ပိုပြီး ကြောက်စရာကောင်းမှာ အသေအချာပဲ" လင်ဖုန်းက တုန်လှုပ်စွာ ပြောလိုက်၏။
ချင်လဲ့သည် ကောင်းယွီကို အံ့အားသင့်စွာ ကြည့်လိုက်ပြီးနောက် ခါးသီးစွာ ပြောလိုက်သည်။ "လူတိုင်းကို စိတ်မကောင်းအောင် မလုပ်ချင်ပေမဲ့ ဒါကို ပြောမှဖြစ်မယ်။ ဝေးကွာတဲ့ နေရာက အူသံကို ငါလည်း ကြားလိုက်တယ်။ အရင်က ငါ နားကြားမှားတာလို့ ထင်နေတာ၊ ဒါပေမဲ့ ကောင်းယွီပါ ကြားတယ်ဆိုရင်တော့ ငါ မမှားတော့ဘူး။ သူ ပြောတာ မှန်လိမ့်မယ်၊ ဒီတောအုပ်ထဲမှာ သူတို့ ခေါင်းဆောင်နဲ့ ပိုပြီး ကြောက်စရာကောင်းတဲ့ ဝံပုလွေအုပ်ရှိနေတယ်"
လူတိုင်း၏ မျက်နှာမှာ ပြာနှမ်းသွားရတော့သည်။ ကောင်းယွီက မျက်မှောင်ကြုတ်လျက် ချင်လဲ့ကို တစ်ချက်ကြည့်ကာ ခပ်တိုးတိုး ရေရွတ်လိုက်သည်။ "လင်မိသားစုထဲမှာ လူဖျင်းတွေချည်းပဲ ရှိတာ မဟုတ်ဘူးပဲ..."
"အခု ကျွန်တော်တို့ ဘာလုပ်ကြမလဲ" လင်ဖုန်းက လျိုရန်ကို မေးမြန်းလိုက်၏။ လျိုရန်က ကောင်းယွီနှင့် ချင်လဲ့ကို ကြည့်ကာ မေးလိုက်သည်။ "မင်းတို့နှစ်ယောက် ဘာလုပ်သင့်တယ်လို့ ထင်လဲ"
သူ မေးလိုက်ရာ နှစ်ယောက်လုံးက တစ်ပြိုင်နက်တည်း အော်ဟစ်လိုက်ကြသည်။ "ပြေးရမှာပေါ့"
၁၅ မိနစ်ခန့် ကြာပြီးနောက်...
"အား..."
စူးရှသော အော်ဟစ်သံများမှာ သူတို့ သွားနေသော လမ်းကြောင်းဘက်မှ ထွက်ပေါ်လာ၏။ ရေခဲပြင်နန်းတော် ဝတ်စုံကို ဝတ်ဆင်ထားသော လူတစ်ယောက်မှာ တစ်ကိုယ်လုံး သွေးချင်းချင်းနီလျက် ဘယ်ဘက်လက်ပြတ်ကာ တောအုပ်ထဲမှ ပြေးထွက်လာသည်ကို မြင်တွေ့လိုက်ရသည်။ ငွေရောင်အတောင်ပံ ဝံပုလွေတစ်ကောင်က ကောင်းကင်မှ ထိုးဆင်းကာ ထိုသူ၏ လည်ပင်းကို နောက်ကွယ်မှ ကိုက်ဖြတ်လိုက်ရာ သွေးများမှာ ပန်းထွက်သွားပြီး ထိုသူမှာ သူတို့မျက်စိရှေ့မှာပင် သေဆုံးသွားတော့သည်။
"ဒါဆိုရင် တခြားဝံပုလွေအုပ်က ရေခဲပြင်နန်းတော်ကလူတွေနဲ့ တွေ့နေတာပေါ့..." လူတိုင်း အခြေအနေကို နားလည်သွားကြ၏။ ဝံပုလွေအုပ် ရုတ်တရက် ဆုတ်ခွာသွားရခြင်းမှာ ဤအကြောင်းကြောင့်ပင် ဖြစ်ရပေမည်။
"ငါတို့ ကံကောင်းတယ်လို့ ပြောရမလားပဲ... အနည်းဆုံးတော့ ခေါင်းဆောင်ပါတဲ့ အုပ်စုနဲ့ ငါတို့ မတွေ့ခဲ့ဘူး" လင်ဖုန်းက ရှေ့မှ ကြောက်မက်ဖွယ် မြင်ကွင်းကို ကြည့်ရင်း ခါးသီးစွာ ဆိုလိုက်၏။ ဝံပုလွေသည် ထိုလူသေကို ကိုက်ဖြတ်စားသုံးရင်း အော်ဟစ်လိုက်ရာ အနီးအနားမှ အခြားဝံပုလွေ အူသံများ ပြန်လည်ထွက်ပေါ်လာ၏။ ဤဝံပုလွေသည် ချင်လဲ့တို့အဖွဲ့ကို ရေခဲပြင်နန်းတော်မှလူများဟု ထင်မှတ်ပုံရပြီး ၎င်း၏ မျက်လုံးများတွင် ရက်စက်သော အလင်းရောင်များ လက်လှမ်းနေတော့သည်။
"ဒီဘက်ကို၊ ဒီဘက်ကို ဆုတ်ကြ။ ဟင်... မြူတိမ်ဆောင်က လူတွေလား။ သူတို့ ဒီမှာ ရှိနေတာပဲ" ရေခဲပြင်နန်းတော်မှ နောက်ထပ် လူတစ်ယောက် ထွက်ပေါ်လာပြီး အော်ဟစ်လိုက်၏။
ထိုအော်သံကြောင့် အရပ်မျက်နှာအသီးသီးမှ လူများစုရုံးလာကြသည်။ ရေခဲပြင်နန်းတော်မှ လူများသည် အခြေအနေကို သိရှိသွားကြပြီး ချင်လဲ့တို့အဖွဲ့ရှိရာသို့ စုရုံးလာကြတော့သည်။
"မင်းတို့ အမေကို..." လင်ရှင်းက ဒေါသတကြီး ဆဲဆိုလိုက်၏။ သူတို့သည် မိမိတို့ဆီသို့ ဝံပုလွေများကို ဆွဲခေါ်လာပြီး အတူတူ သေကြရန် ကြံစည်နေခြင်း ဖြစ်ကြောင်း သိသာလှသည်။
ဖုန်းယီနှင့် ဖုန်းမိသားစုဝင် အချို့လည်း သွေးချင်းချင်းနီလျက် ရောက်ရှိလာကြ၏။ "ငါတို့ ဖောက်ထွက်ကြမလား" လင်ရှင်းက အော်ဟစ်လိုက်၏။
"မလုပ်နဲ့၊ ဝံပုလွေတွေက တောအုပ်ထဲမှာ ဝိုင်းထားတုန်းပဲ။ အစုအဖွဲ့ ပျက်သွားရင် ပိုပြီး အသေမြန်လိမ့်မယ်။ ခံစစ်ကိုပဲ မြဲမြဲထိန်းထားကြ" လျိုရန်က အော်ဟစ်တားဆီးလိုက်၏။ သို့သော် ကောင်းမိသားစုဝင် တစ်ယောက်မှာ စိတ်မထိန်းနိုင်ဘဲ ရေခဲပြင်နန်းတော်မှ လူကို သတ်ရန် ပြေးထွက်သွားတော့သည်။
"ဝှစ်..."
အေးစက်သော အလင်းတန်းတစ်တန်း တောအုပ်ထဲမှ ထွက်ပေါ်လာပြီး ထိုသူ၏ ရင်ဘတ်ကို ဖောက်ထွက်သွားရာ ၎င်းမှာ နေရာမှာပင် အသက်ပျောက်သွားတော့သည်။ "မင်းက ငါ့ကို သတ်နိုင်မယ် ထင်နေတာလား" ရေခဲပြင်နန်းတော်မှ ရန်ချင်းစုန် ဆိုသူက လှောင်ပြောင်လိုက်၏။ "အားလုံးကို ဒီဘက် ခေါ်လာခဲ့ကြ! ငါတို့ချည်းပဲ သေလို့မဖြစ်ဘူး၊ သူတို့ကိုပါ တစ်ခါတည်း ဆွဲခေါ်သွားရမယ်"
မကြာမီမှာပင် ရေခဲပြင်နန်းတော်၏ အကြီးအကဲ ရန်တယ်ဝူပင်လျှင် ဒဏ်ရာများဖြင့် ရောက်ရှိလာတော့သည်။ သူ၏ မျက်လုံးများမှာ ရက်စက်မှုများ ပြည့်နှက်နေပြီး ပြောလိုက်သည်။ "မင်းတို့ကို သတ်ဖို့ ငါတို့ အများကြီး ရင်းနှီးခဲ့ရတယ်။ အခုတော့ အေးအေးဆေးဆေး သေလို့ရပြီ"
ရန်တယ်ဝူကို မြင်လိုက်သည့်အခါ ကောင်းယွီမှာလည်း ဆက်မတိုးဝံ့တော့ဘဲ အံကြိတ်ကာ ရပ်တန့်သွားရသည်။
"ဒီတစ်ခါတော့ ငါတို့ တကယ် လွတ်လမ်းမရှိတော့ဘူး" လျိုရန်က ခါးသီးစွာ ပြုံးလျက် ပြောလိုက်သည်။ "ရေခဲပြင်နန်းတော်ကလူတွေ သတ်တာပဲဖြစ်ဖြစ်၊ ဝံပုလွေတွေ ကိုက်စားတာပဲဖြစ်ဖြစ် ခံရတော့မှာပဲ။ အဲဒီတော့ ရေခဲပြင်နန်းတော်က လူတွေကို များများသတ်နိုင်အောင် ကြိုးစားကြတာပေါ့။ ငါတို့ သေရင်တောင် သူတို့ပါ ဝံပုလွေတွေလက်ထဲမှာ သေရမှာဆိုတော့ တန်ပါတယ်"
လျိုရန်၏ စကားအဆုံးတွင် ပတ်ဝန်းကျင်မှ ဝံပုလွေ ဟိန်းသံကြီး ထွက်ပေါ်လာတော့သည်။ ထိုအသံကြောင့် ရန်တယ်ဝူပင်လျှင် ထိတ်လန့်သွားရ၏။ ဝံပုလွေများသည် အလွန်ပင် စနစ်တကျ ရှိကြလှသည်။ ခေါင်းဆောင်၏ ဟိန်းသံနှင့်အတူ သူတို့သည် အရှိန်အဟုန်ဖြင့် လူအုပ်ကြီး တစ်အုပ်လုံးကို ဝိုင်းရံလိုက်ကြတော့သည်။
ယခုအခါတွင် ရေခဲပြင်နန်းတော်အဖွဲ့နှင့် ချင်လဲ့တို့အဖွဲ့မှာ တစ်ဖက်နှင့်တစ်ဖက် မျက်နှာချင်းဆိုင်လျက် ရှိနေကြပြီး သူတို့ နှစ်ဖွဲ့စလုံးကိုမူ ရက်စက်ကြမ်းကြုတ်သော နတ်ဆိုးဝံပုလွေအုပ်ကြီးက ထပ်ဆင့် ဝိုင်းရံထားကြတော့သည်။