နဂါးကြင်ယာတော်ရဲ့ အချစ်လေးလား

...

မှိန်ပျပျလင်းနေသော နဂါးဘုရင်နန်းတော်၏ အပြင်ဘက်တွင်၊ များစွာသော ပုံရိပ်များသည် သူတို့၏ လက်များကို ဘေးချလျက်ရပ်နေကြသည်။

သူတို့ထဲမှ အများစုမှာ အသက်အရွယ်ကြီးရင့်သူများဖြစ်ကြပြီး၊ ဆံဖြူမုတ်ဆိတ်ဖြူများနှင့် ခမ်းနားထည်ဝါသောဝတ်ရုံများကို ဝတ်ဆင်ထားကာ၊ ထူးခြားသော အရှိန်အဝါကို ထုတ်လွှင့်နေကြ၏။

သို့သော် ဤကြီးမားမြင့်မားသော ခန်းမကြီး၏ ရှေ့တွင်၊ သူတို့သည် သူတို့၏ ပုံမှန်တည်ငြိမ်မှုကို ဆုံးရှုံးသွားကြပြီး လူငယ်တစ်ဦး၏ စိစစ်စစ်ဆေးမှုကို ရိုးသားစွာလက်ခံနေကြပါသည်။

"မြို့သုံးမြို့။"

"မြို့သုံးမြို့။"

ရွှယ်ယန် သည် ဤဂိုဏ်းချုပ်ဆိုသူများအနက်မှ စိတ်ဝင်စားမှုမရှိဘဲ ဖြတ်လျှောက်သွားကာ နောက်တစ်ယောက်ထံရောက်လာသည်။ သူသည် မျက်ခုံးပင့်လိုက်ပြီး သူ့ရှေ့မှအဘိုးအိုကို အနည်းငယ် အဓိပ္ပာယ်မဲ့စွာ စိုက်ကြည့်လိုက်၏။

"မြို့နှစ်မြို့နဲ့ တာအိုပေါင်းစည်းခြင်းလား"

ဤဖုံးကွယ်ထားခြင်းမရှိသော ကဲ့ရဲ့လှောင်ပြောင်မှုနှင့် ရင်ဆိုင်ရချိန်တွင်၊ ထိုဂိုဏ်းချုပ်သည် ရှက်ရွံ့စွာဖြင့် ခေါင်းငုံ့သွားသည်။

ဂိုဏ်းသည် ဆုတ်ယုတ်ကျဆင်းနေသော်လည်း၊ ရတနာနယ်မြေကို အလဟဿမထားသင့်ဘူးမဟုတ်လော။

"ဟား။"

ရွှယ်ယန် ခေါင်းလှည့်လိုက်ပြီး ယွဲ့မိသားစု၏ အစောင့်အရှောက် အကြီးအကဲဆီသို့ ကြည့်လိုက်၏။ သူ ဘာမှမပြောသော်လည်း၊ ထိုရယ်မောသံသည် အနောက်ပိုင်းဟုန်မှ ကျင့်ကြံသူများကို အလွန်အမင်း နာကြည်းခံပြင်းသွားစေရန် လုံလောက်ပေသည်။

ငါတို့ကို အထင်သေးရင်လည်း လုံးဝ မသုံးနဲ့လေ။

နတ်ဆိုးတစ်သောင်းခန်းမကို မကျော်လွှားနိုင်မှာ စိုးရိမ်မှာနေရက်နဲ့၊ ရွေးချယ်မှုတွေလုပ်နေသေးတယ်။အကျင့်ပျက်ပြီးမှ ကိုယ့်ကိုယ်ကိုယ်ဖြူစင်သယောင်ဟန်ဆောင်နေတာပဲ၊တကယ်ကို ရွံစရာကောင်းလိုက်တာ။

...

ယွဲ့ကုန်းကွေ့ခေါင်းငုံ့လိုက်ပြီး၊ တိတ်တဆိတ် ရယ်မောကာ သူ၏ နားထင်များကို ညင်သာစွာ နှိပ်နယ်လိုက်သည်။

ရွှယ်ယန်သည်လည်း မြို့လေးမြို့မှဖြစ်သော်လည်း၊ မြောက်ပိုင်းဟုန်အတွက်မူ အထူးသဖြင့် အနန္တတာအိုအင်ပါယာဂိုဏ်းကဲ့သို့ ကြီးမားသော ဂိုဏ်းတစ်ခုအတွက်၊ ဂိုဏ်းခွဲ ဂိုဏ်းချုပ်တစ်ဦးကို ရွေးချယ်ခြင်းနှင့် မသေမျိုးမြို့တော်လေးခုကိုဖွင့်လှစ်ခြင်းမှာ သတ်မှတ်ချက်တစ်ခုသာ ဖြစ်သည်။

မည်သို့ပင်ဆိုစေကာမူ လွန်ခဲ့သောနှစ်ပေါင်း သောင်းနှင့်ချီသည့်ကာလအတွင်း တစ်ဦး သို့မဟုတ် နှစ်ဦးသာ ရွေးချယ်ခံခဲ့ရ၏။

ဤသခင်ရွှယ် သည် မြို့လေးမြို့၏ နာမည်ကြီး ပါရမီရှင်များစွာထဲမှထွက်ပေါ်လာခြင်း ဖြစ်သည်။ တူညီသောအဆင့်တွင်ပင်၊ သူတို့သည် ကျင့်စဉ်များ၊ တာအိုလက်နက်များနှင့် တာအိုပညာရပ်များကို နားလည်သဘောပေါက်မှုတို့တွင်လည်း ယှဉ်ပြိုင်ကြရ၏။

သို့သော် ပြောရမည်ဆိုလျှင်၊ ယွဲ့မိသားစု၏ စံနှုန်းများအရပင်လျှင် ဤကျင့်ကြံသူများသည် အလွန် ညံ့ဖျင်းလွန်းသည်။

ဖြစ်နိုင်သည်မှာ ဤအကြောင်းကြောင့်ပင် နတ်ဆိုးတစ်သောင်းခန်းမသည် အနောက်ပိုင်းဟုန်တွင် သောင်းကျန်းနေသော်လည်း၊ မြောက်ပိုင်းဟုန် သို့မဟုတ် အရှေ့ပိုင်းဟုန်တွင် မည်သည့်သတင်းမျှ မရရှိခဲ့ခြင်း ဖြစ်ပေမည်။

သူတို့သည် ဤလူရိုင်းကျင့်ကြံသူများကိုသာ အနိုင်ကျင့်နိုင်ပေသည်။

"တော်ပြီ၊ ဆက်မကြည့်ကြနဲ့တော့"

ရွှယ်ယန် ခေါင်းခါလိုက်ပြီး လျှော်ကြမ်းအဝတ်အစားနှင့် အဘိုးအိုတစ်ဦးထံသို့ အချက်ပြလိုက်၏။

"လာ၊ အစီအရင် မြေပုံကို ယူပြီး သူတို့ကို ဝေပေးလိုက်ပါ"

ထိုသို့ပြောပြီး သူသည် အဘိုးအိုဘေးရှိ အနက်ရောင်ဝတ်စုံနှင့် လူငယ်လေးကို ခေတ္တမျှလှမ်းကြည့်လိုက်၏။

ခေတ်နောက်ကျနေသော အဘိုးအိုတစ်စုကြားတွင်၊ ဤချောမောသောလူငယ်လေးမှာ အလွန်တိတ်ဆိတ်နေသော်လည်း ထင်ရှားပေါ်လွင်နေဆဲပင်။

သို့သော် ကြိုးကြာငှက်ဖြစ်စေ၊ ကြက်ဖြစ်စေ၊ နှစ်ကောင်စလုံးမှာ ကမ္ဘာကြီး၏အစစ်အမှန် မျက်နှာစာကို မမြင်ဖူးကြသလို မသေမျိုးဆိုသည်မှာ မည်သည့်အရာဖြစ်ကြောင်း မသိကြသော သာမန်ငှက်များသာ ဖြစ်ကြ၏။

သူ့မှာ အရည်အချင်းတစ်ချို့ရှိကောင်း ရှိနိုင်သော်လည်း၊ ထိုမျှသာပင်။

"သူသာ မျက်လုံးဖွင့်ပြီးမင်းကို ကြည့်ရဲရင်၊ သူ့ရဲ့ တာအိုနှလုံးသား ချက်ချင်းကွဲကြေသွားမလားဆိုတာ ငါ တကယ်သိချင်မိတယ်"

ဟွမ်ဝမ်ဖာ သည် ရွှယ်ယန်ထံသို့ လျှောက်သွားစဉ် မလိုမုန်းထားမှုအနည်းငယ်ပါဝင်သော အပြုံးတစ်ခုဖြင့် အသံလွှင့်ကာပြောလိုက်၏။

...

ရှန်းယီက သူ့ကို တိတ်တဆိတ်လှမ်းကြည့်လိုက်သည်။

သူ၏မသေမျိုးမြို့တော်သည် နတ်ဆိုးတစ်သောင်းခန်းမကို အကာအကွယ်အဖြစ်ထားရှိသည်။ မြေကမ္ဘာနယ်ပယ် ကျင့်ကြံသူတစ်ဦးက ၎င်းကို ဖောက်ထွင်းမြင်နိုင်သည်ဆိုပါက အဓိပ္ပာယ်မဲ့လွန်းပေမည်။

ဤခရီးစဉ်၏ ရည်ရွယ်ချက်မှာ သတ်ဖြတ်ရန် ဖြစ်သည်။ သူသည် အခြားသူများ၏ အာရုံစိုက်မှုကို တမင်တကာဆွဲဆောင်လိုသော အကျင့်ဆိုးမျိုး သေချာပေါက် မရှိပေ။

"ဒီ လောဘဝံပုလွေအစီအရင်မှာ ခင်ဗျားတို့အားလုံး အစီအရင်ကျောက်တုံးတွေ ဖြစ်လာဖို့ လိုအပ်တယ်။ကျုပ်က အစီအရင်ကိုထိန်းချုပ်မယ်၊ ခင်ဗျားတို့က အစီအရင်မြေပုံကို သေချာလေ့လာဖို့ပဲ လိုတယ်၊အစီအရင်နဲ့အညီ လှုပ်ရှားပါ၊ တခြား ဘာမှမတွေးနဲ့"

ရွှယ်ယန်သည် ထပ်မံ၍ သူ၏ အင်္ကျီလက်စကို ဝှေ့ယမ်းလိုက်ရာကျင့်ကြံသူများ၏ လက်များထဲသို့ ဝိညာဉ်ကျောက်စိမ်းများကျရောက်သွားသည်။

"အချိန်တန်ရင် ကျုပ်အမိန့်တွေကို လိုက်နာပါ၊ ခင်ဗျားတို့ရဲ့ အသက်အန္တရာယ်ကင်းရှင်းဖို့ ကျုပ် အာမခံတယ်"

ပြောပြီးနောက်၊ သူသည် ချီလောင်ဝူ နှင့် ယွဲ့ကုန်းကွေ့တို့ဆီသို့ ကြည့်လိုက်၏။

"ကျန်တာက ခင်ဗျားတို့အပေါ်မှာပဲ မူတည်တယ်"

ထိုအချိန်မှာပင် ရွှယ်ယန်၏ မျက်နှာအမူအရာမှာ သိမ်မွေ့စွာ ပြောင်းလဲသွားပြီး၊ သူ၏ မျက်လုံးများထဲရှိ အထင်အမြင်သေးမှုများလျင်မြန်စွာ ပျောက်ကွယ်သွားကာ အဝေးမှ တစ်စုံတစ်ဦးဆီသို့ ဦးညွှတ်လိုက်ပါသည်။

"အကြီးအကဲ ကျစ်ရှန်း အကြံဉာဏ်များစရာရှိပါသလား"

အနောက်ပိုင်း နဂါးဘုရင်နှင့် ရင်ဆိုင်ရချိန်၌ပင် သူ ဤမျှ မလေးနက်ခဲ့ဖူးပေ။

၎င်းမှာ ရိုးရှင်းသောအကြောင်းပြချက်ပင်။ ရွှယ်ယန်၏ အမြင်တွင်၊ ဟုန်ကျယ်နယ်မြေများ၌ မသေမျိုးတို့၏အောက်တွင် ဖော်ပြရကျိုးနပ်သော အင်အားစု သုံးခုသာရှိပြီး၊ ကျန်သူများအားလုံးမှာ အစေခံများသာ ဖြစ်ကြပေ၏။

အနန္တတာအိုအင်ပါယာဂိုဏ်း၊ မြောက်ပိုင်း နဂါးနန်းတော်၊ အရှေ့ပိုင်း နဂါးနန်းတော်။

"အကြံဉာဏ် မရှိပါဘူး၊ လူတစ်ယောက်ကို လာခေါ်တာပါ"

ကျစ်ရှန်းသည် ဤလူငယ်အား ကောင်းမွန်သော မျက်နှာသာပေးရန် စိတ်မဝင်စားဘဲ၊ ဂိုဏ်းချုပ်များ အုပ်စုဆီသို့ ဖြည်းညှင်းစွာ လျှောက်သွားသည်။

...

ရွှယ်ယန်နှင့် အခြားသူများမှာ တိတ်ဆိတ်စွာ ရပ်နေကြပြီး၊ သူမ ပြဿနာရှာနေသည်ကိုသာ ကြည့်နေနိုင်ကြ၏။

ထိုအမျိုးသမီး နီးကပ်လာသည်ကို မြင်သောအခါ၊ ဟွမ်ဝမ်ဖာမှာ အနည်းငယ်စိုးရိမ်လာကာ ရှန်းယီ၏ အနီးသို့ တိုးကပ်သွားမိသည်။ အနောက်ပိုင်းဟုန်မှ ကျင့်ကြံသူတစ်ဦးအနေဖြင့် ယွီတောင်၏ နဂါးကြင်ယာတော် ကျော်ကြားမှုကို သူ မည်သို့ မသိဘဲနေမည်နည်း။

သူမ၏ ထင်ရှားသော ကိုယ်ပိုင်လက္ခဏာနှင့် နှိုင်းယှဉ်ပါက၊ အမှန်တကယ်ကြောက်မက်ဖွယ်ကောင်းသည်မှာ သူမ၏ အခြားသော ကိုယ်ပိုင်လက္ခဏာပင်။

အရှေ့ပိုင်း နဂါးဘုရင်၏ အချစ်တော်သမီး။

သူမ၏ လုပ်ရပ်တိုင်းသည် အနောက်ပိုင်းဟုန်ရှိ သတ္တဝါများအတွက် နတ်ဘုရား၏ ပြစ်ဒဏ်ပေးခြင်းနီးပါးကဲ့သို့ပင်။

"ငါနဲ့ လိုက်ခဲ့"

ကျစ်ရှန်းသည် ရှန်းယီ၏အင်္ကျီလက်စကို တိုက်ရိုက်ဆွဲကိုင်လိုက်ပြီး၊ လူတိုင်း၏ အကြည့်အောက်တွင် သူ့ကိုလူအုပ်ထဲမှ အတင်းအကျပ် ဆွဲထုတ်ကာ အဝေးတစ်နေရာသို့ ခေါ်ဆောင်သွားလေသည်။

"ကျွတ်။"

ရွှယ်ယန်နှင့် ယွဲ့ကုန်းကွေ့တို့ အချင်းချင်း အကြည့်ချင်းဖလှယ်လိုက်ကြရာ၊ သူတို့၏ မျက်လုံးများတွင် ထူးဆန်းသောအတွေးတစ်ခု ထင်ဟပ်နေပြီး၊ သူတို့ ရပ်နေသည့် နေရာတွင်ပင် ဆက်လက်ရပ်နေကြ၏။

သိထားသင့်သည်မှာ၊ ကျစ်ရှန်းသည် အမည်ခံအားဖြင့် ချီကျောက်ယီ၏ ဇနီးအဖြစ် ရှိနေသေးသည်။ ယခု အနောက်ပိုင်း နဂါးနန်းတော်အတွင်း၌၊ သူမသည် ပြင်ပလူများကို လုံးဝဂရုမစိုက်ဘဲ လူငယ်ကျင့်ကြံသူတစ်ဦးကို ရဲတင်းစွာ ဆွဲခေါ်သွားခဲ့၏။

ချီလောင်ဝူ ဒေါသထွက်လွန်း၍ မျက်နှာများ ခရမ်းရောင်သန်းလာသည်ကို မည်သူမျှသတိမပြုမိဘဲ မနေခဲ့ပေ။

ထိုလူငယ်လေး ပြဿနာတက်မည်ကို သူမ စိုးရိမ်နေသည်လော။

"အရှေ့ပိုင်းရဲ့ သမီးတော်က ချောမောတဲ့ကောင်လေးတစ်ယောက်ကို သိမ်းထားချင်တုန်းပဲ"

ရွှယ်ယန် နောက်ဆုံးတွင် တိုးတိုးလေးရယ်မောလိုက်သော်လည်း သူ၏ အသံတွင် မလိုမုန်းထားမှု အနည်းငယ် ပါဝင်နေသည်။

နဂါးမိန်းမပျိုလေး၏ မျက်နှာသာပေးမှုကို ခံရခြင်းက ကောင်းကင်ဘုံ၏မျက်နှာသာပေးခံသူများ၏ လမ်းကြောင်းအပေါ် ဂုဏ်ကျက်သရေတစ်စွန်းတစ်စကို ထပ်လောင်းပေးလိုက်ခြင်းလည်း ဖြစ်သည်။

"တော်ပြီ၊တစ်ယောက် လျော့သွားတာပဲ လျော့သွားပါစေ၊ အဲဒါက ဘာမှ တန်ဖိုးရှိတာမှ မဟုတ်တာ"

ရွှယ်ယန် လက်ယမ်းပြပြီးနောက် ပင်မခန်းမကြီးဆီသို့ ပြန်လျှောက်သွားခဲ့၏။

ဟွမ်ဝမ်ဖာသည် အဝေးသို့ စိုးရိမ်တကြီး လှမ်းကြည့်လိုက်သည်။ ဂိုဏ်းချုပ် ရှန်းက မည်ကဲ့သို့ ချောမောသည့် ကောင်လေးတစ်ယောက်ဖြစ်နိုင်မည်နည်း၊ သူ လုပ်ကိုင်ပုံများကိုကြည့်လျှင်၊ ရှန်းယီနှင့် ယွီတောင်၏ နဂါးကြင်ယာတော်ကြားတွင် အချစ်ရေးကိစ္စတစ်ခုခုထက် ရန်ငြိုးတစ်ခုခု ရှိနေသည်မှာ ပိုယုံကြည်စရာကောင်းနေလေ၏။

ယွီတောင်၏ နဂါးကြင်ယာတော် ခင်ပွန်းမှာ တောင်ပိုင်းဟုန်တွင် ဂိုဏ်းချုပ် ရှန်း ကိုယ်တိုင် သတ်ဖြတ်ခြင်းကို ခံခဲ့ရသည်ကိုတော့ ပြောစရာပင် မလိုတော့ပေ။

ကံမကောင်းစွာဖြင့်၊ ဟွမ်ဝမ်ဖာ၏ အဆင့်အတန်းအရ၊ဤနေရာတွင် လွတ်လပ်စွာသွားလာခွင့် မရှိပေ။ သူသည် ချီလောင်ဝူ၏ မကျေမနပ်ဖြစ်နေသောအကြည့်အောက်တွင် ဤနဂါးသားတော်၏ နောက်သို့လိုက်ကာ အနားယူရာနေရာတစ်ခုသို့ သွားရောက်ရင်း စောင့်ကြည့်နေရုံသာ တတ်နိုင်လေ၏။