အခန်း (၄၅၃-၄၅၄)

အခန်း။ ၄၅၃

ဤသို့ဖြင့် ကြောက်မက်ဖွယ်ကောင်းသော ထိုဧရာမမြွေမိစ္ဆာကြီး ဟင်းလင်းပြင်အက်ကြောင်းမှ ထွက်ပေါ်လာပြီးနောက်တွင် ဒုတိယတစ်ကောင်၊ တတိယတစ်ကောင်နှင့် အခြားသော မြွေမိစ္ဆာအမြောက်အမြားမှာလည်း တစ်ကောင်ပြီးတစ်ကောင် အဆက်မပြတ် ထွက်ပေါ်လာခဲ့ကြသည်။

ထင်ရှားသည်မှာ အခြားကမ္ဘာမှ ရောက်ရှိလာကြသော ဤမြွေမိစ္ဆာများသည် တစ်ကောင်တည်း လှည့်လည်သွားလာတတ်သူများ မဟုတ်ဘဲ မျိုးနွယ်စုတစ်ခု၏ အစိတ်အပိုင်းများသာ ဖြစ်ကြသည်။

ဤမြွေမိစ္ဆာများသည် အရွယ်အစားအမျိုးမျိုး ကွဲပြားကြပြီး အသေးဆုံးမှာ အလျား ၁၀ မီတာခန့်သာ ရှိသော်လည်း အကြီးဆုံးကောင်များမှာမူ ပထမဆုံးထွက်ပေါ်လာသည့် မြွေမိစ္ဆာကြီး၏ အရွယ်အစားနီးပါး ရှိကြသည်။ သို့သော် ခြွင်းချက်မရှိသည်မှာ ၎င်းတို့အားလုံးမှာ အလွန်တရာ ကြမ်းကြုတ်ရက်စက်ကြပြီး သွေးဆာနေသည့် မျက်လုံးများ ရှိကြခြင်းပင်။

ဆက်လက်၍ ဤမြွေမိစ္ဆာများသည်လည်း ၎င်းတို့၏ ခေါင်းဆောင်မြွေကြီးကို အတုယူကာ လီမြစ်၏ ဤအပိုင်းအတွင်းရှိ ငါးရိုင်းများကို လောဘတကြီး ဝိုင်းဝန်းအမဲလိုက် ဝါးမြိုကြတော့သည်။ ၎င်းတို့သည် မြစ်အထက်ပိုင်းနှင့် အောက်ပိုင်း တစ်လျှောက်သို့ပင် ပျံ့နှံ့သွားခဲ့ကြသည်။

ဤအချိန်၌ လီမြစ်ကမ်းနားရှိ ကုန်းမြင့်လေးတစ်ခုပေါ်တွင် တောင်ပူစာအငယ်စားလေးတစ်ခုနှင့် တူလှသော ပုံရိပ်တစ်ခုမှာ လှုပ်ရှားမှုမရှိဘဲ ပျင်းရိစွာ နေပူဆာလှုံနေသည်။

မှင်ရည်ရောင်ကျောက်စိမ်းကဲ့သို့ တောက်ပနေသော သူ၏အခွံကြီးကို အားပြုကာ လိပ်ကြီးမှာ ဟောက်သံတဟူးဟူးဖြင့် အိပ်မောကျနေခြင်းပင်။

လီမြစ်အတွင်းသို့ ရောက်ရှိလာကတည်းက လိပ်ကြီး၏ ပျော်ရွှင်စရာ ဘဝသစ်မှာ စတင်ခဲ့သည်။ သူသည် နေ့စဉ်နေ့တိုင်း အိပ်မောကျနေတတ်ပြီး ဗိုက်ဆာလာလျှင် လီမြစ်အတွင်းသို့ ဆင်းကာ အစာရှာစားတတ်သည်။ ပျင်းလာသည့်အခါတွင်လည်း သူ၏ အဖော်လိပ်မလေးများရှိရာသို့ သွားရောက်လည်ပတ်တတ်သဖြင့် အမှန်တကယ်ပင် သာယာသော ဘဝလေးကို ပိုင်ဆိုင်ထားခြင်းပင်။

ဤကဲ့သို့ အေးအေးဆေးဆေး နေထိုင်တတ်သည့် လူနေမှုပုံစံကြောင့် လိပ်ကြီး၏ သတိဝီရိယမှာလည်း သိသိသာသာ လျော့နည်းလာခဲ့ပုံရရာ သူ၏အနားသို့ ချဉ်းကပ်လာနေသော ဘေးအန္တရာယ်ကို လုံးဝ သတိမပြုမိခဲ့ချေ။

မလှမ်းမကမ်းရှိ မြစ်ရေပြင်အောက်တွင် အရိပ်အချို့မှာ ဖြည်းညှင်းစွာ ချဉ်းကပ်လာနေသည်။ ရေအောက်တွင်ပင် နီရဲစွာ တောက်ပနေသော မျက်လုံးအစုံတို့မှာ ကမ်းစပ်တွင်ရှိနေသည့် လိပ်ကြီးပေါ်သို့ စူးစိုက်ကြည့်နေပြီး ဤအသက်ရှိသတ္တဝါကြီးကို မြင်ရသည်မှာ ၎င်းတို့အတွက် လောဘတကြီး စားချင်စရာ ဖြစ်နေပုံပင်။

ဝုန်း...

မျက်တောင်တစ်ခတ်အတွင်းမှာပင် ငြိမ်သက်နေသော ရေမျက်နှာပြင်မှာ ပွင့်ထွက်သွားပြီး မြွေမိစ္ဆာအချို့ ရေပေါ်သို့ ခုန်တက်လာကြသည်။ ၎င်းတို့သည် သွေးစိုနေသော ပါးစပ်ကြီးများကို ဟကာ လိပ်ကြီးကို ကိုက်ခဲရန် ပစ်မှတ်ထားလိုက်ကြပြီး၊ ကြောက်မက်ဖွယ်ရာ အရှိန်အဝါများမှာလည်း နေရာအနှံ့သို့ ဖုံးလွှမ်းသွားခဲ့သည်။

ဤမြွေမိစ္ဆာများသည် အရွယ်အစားအားဖြင့် အလွန်ကြီးမားခြင်းမရှိသေးဘဲ တစ်ကောင်မှာ ၂၀ မီတာခန့်ရှိပြီး ကျန်သုံးကောင်မှာ ၁၀ မီတာကျော်ရုံမျှသာ ရှိကြသေးသည်။

ကမ်းစပ်တွင် အိပ်မောကျနေသော လိပ်ကြီးမှာ ရုတ်တရက် ပေါ်ပေါက်လာသည့် ဆူညံသံကြောင့် လန့်နိုးသွားခဲ့ပြီး သူ၏ ကျောပြင်ပေါ်တွင် အေးစိမ့်သွားသော ခံစားချက်ကြောင့် မျက်လုံးများကို ခပ်မြန်မြန်ပင် ဖွင့်ကြည့်လိုက်လေတော့သတည်း။

"ဝူး... "

သူ့ကို တိုက်ခိုက်လာသည့် မြွေမိစ္ဆာလေးကောင်ကို မြင်လိုက်ရသောအခါ လိပ်ကြီးမှာ လန့်ဖျပ်သွားပြီးနောက် ဒေါသတကြီး ဟိန်းဟောက်လိုက်တော့သည်။

ပုံမှန်ဆိုရင် သူက လီမြစ်ရဲ့ အရှင်သခင်ပဲ သူ့ကို ဘယ်သူက တိုက်ခိုက်ရဲမှာလဲ။

ဤမြွေလေးအနည်းငယ်က အတင့်ရဲလှသည်။ မျက်တောင်တစ်ခတ်အတွင်းမှာပင် လိပ်ကြီးသည် အကျိုးအကြောင်းမသိသော ဤသတ္တဝါများကို သူ၏စိတ်ထဲတွင် သေဒဏ်ပေးလိုက်ပြီ ဖြစ်သည်။

ဝုန်း...

မြွေမိစ္ဆာများသည် လိပ်ကြီးကို ကိုက်ခဲရန် အနားသို့ရောက်ရှိလုဆဲဆဲမှာပင် ၎င်းတို့၏ ခန္ဓာကိုယ်များမှာ လေထဲတွင် သံမဏိနှင်တံများအလား ရုတ်တရက် တောင့်တင်းသွားခဲ့သည်။ မြစ်ရေပြင်ပေါ်မှ ရေစီးကြောင်းများဖြင့် ဖွဲ့စည်းထားသော ရေကြိုးများမှာ အပေါ်သို့ ဆန့်ထွက်လာပြီး မြွေမိစ္ဆာလေးကောင်၏ အမြီးများကို တင်းကျပ်စွာ ချည်နှောင်ကာ ရှေ့သို့ ဆက်မတိုးနိုင်အောင် ဆွဲထားလိုက်ခြင်းပင်။

"ရှူး... "

လေထဲရှိ မြွေမိစ္ဆာလေးကောင်မှာ ဒေါသတကြီး ဟိန်းဟောက်ရင်း ထိုရေကြိုးများမှ လွတ်မြောက်ရန် ခန္ဓာကိုယ်ကို အသည်းအသန် ရုန်းကန်ကာ အောက်သို့ ပြန်လည်ကျဆင်းလာခဲ့သည်။

ဝုန်း... ဝုန်း... ဝုန်း...

မမျှော်လင့်ဘဲ နောက်တစ်ခဏတွင် လိပ်ကြီး၏ ထိန်းချုပ်မှုအောက်၌ မြွေများကို ချည်နှောင်ထားသော ရေကြိုးများသည် အားဖြင့် ဆွဲငင်လိုက်ရာ မြွေမိစ္ဆာလေးကောင်မှာ မူလအရှိန်ဖြင့် မြစ်ရေပြင်ပေါ်သို့ ပြန်လည်ရိုက်ခတ်သွားခဲ့သည်။

ရေပန်းများ အရှိန်အဟုန်ဖြင့် ပွင့်ထွက်သွားသည်နှင့်အမျှ မြွေမိစ္ဆာလေးကောင်မှာ နာကျင်စွာ အော်ဟစ်လိုက်ကြသည်။ ပြီးခဲ့သည့် ရိုက်ချက်မှာ ၎င်းတို့ကို အတော်လေး အထိနာစေခဲ့ပုံပင်။

"ဝူး... "

မြွေမိစ္ဆာလေးကောင်မှာ အကြီးအကျယ် ဒေါသထွက်သွားခဲ့ပြီး ကမ်းစပ်ရှိ လိပ်ကြီးကို ကြည့်ကာ ဟိန်းဟောက်လိုက်သည်။ ထို့နောက် ခန္ဓာကိုယ်ကို လိမ်ကျစ်ကာ ကမ်းစပ်ဆီသို့ တစ်ဟုန်ထိုး ပြေးဝင်ရန် ကြိုးစားကြပြန်သည်။

သို့သော်လည်း အချည်းနှီးပင်။ ၎င်းတို့၏ အမြီးများကို ရေကြိုးများဖြင့် တင်းကျပ်စွာ ချည်နှောင်ထားသဖြင့် ရှေ့သို့ လုံးဝတိုး၍မရပေ။ ထို့ကြောင့် ၎င်းတို့သည် ပါးစပ်များကို ဟကာ လိပ်ကြီးရှိရာသို့ အမည်းရောင် အရည်များကို အရှိန်ဖြင့် ပန်းထုတ်လိုက်ကြလေတော့သတည်း။

ဤအချိန်တွင် ကမ်းစပ်သို့ တွားသွားရောက်ရှိနေပြီဖြစ်သော လိပ်ကြီးသည် လေထဲမှ ပျံသန်းလာသော အမည်းရောင်အရည်များကို ကြည့်ကာ မျက်မှောင်ကြုတ်လိုက်မိသည်။ ထိုအရည်များထံမှ ထွက်ပေါ်နေသော အန္တရာယ်ရှိသည့် အရှိန်အဝါကို သူ ချက်ချင်းပင် အာရုံခံမိလိုက်သည်။

ဗွမ်း...

ရုတ်တရက် လိပ်ကြီး၏ ခန္ဓာကိုယ်ပေါ်တွင် ဝိညာဉ်အလင်းတန်းတစ်ခု တောက်ပလာပြီး မျက်တောင်တစ်ခတ်အတွင်းမှာပင် မြစ်ရေပြင်ပေါ်မှ ထူထဲမြင့်မားလှသော ရေတံတိုင်းကြီး တစ်ခု ထောင်တက်လာခဲ့သည်။

ရှူး...

အမည်းရောင်အရည်များသည် ရေတံတိုင်းကို ပြင်းထန်စွာ ရိုက်ခတ်သွားပြီး စူးရှသောအသံနှင့်အတူ ပေါက်ကွဲသွားသည်။ အလွန်တရာ တိုက်စားနိုင်စွမ်းရှိသော ထိုအမည်းရောင်အရည်များသည် ရေတံတိုင်းတစ်ခုလုံးသို့ လျင်မြန်စွာ ပျံ့နှံ့သွားပြီး ဖောက်ထွက်လုနီးပါးပင် ဖြစ်သွားခဲ့သည်။

ကံကောင်းထောက်မစွာဖြင့် လိပ်ကြီး ဖန်တီးလိုက်သော ရေတံတိုင်းမှာ လုံလောက်စွာ ထူထဲလှသဖြင့် နောက်ဆုံးတွင် ထိုအမည်းရောင်အရည်မှာ ရေတံတိုင်းကို မဖောက်နိုင်ဘဲ ရေထဲသို့သာ ပြန်လည်ရောနှော၍ ကျဆင်းသွားခဲ့ရသည်။

အမည်းရောင်အဆိပ်ရည်များကို ပိတ်ဆို့ပြီးနောက် သတ်ဖြတ်လိုစိတ်များ ပြည့်နှက်နေသော လိပ်ကြီးသည် ရုန်းကန်နေဆဲဖြစ်သည့် မြွေမိစ္ဆာလေးကောင်ထံသို့ အေးစက်သော အကြည့်များဖြင့် ပြန်လည်အာရုံစိုက်လိုက်သည်။

ဝုန်း...

လိပ်ကြီးသည် မြစ်ကမ်းနားတွင် ခြေတစ်ချက် ဆောင့်လိုက်သောအခါ မြစ်ရေလှိုင်းများမှာ တုန်ခါသွားခဲ့ပြီး မြွေမိစ္ဆာလေးကောင်ကို ချည်နှောင်ထားသော ရေကြိုးများမှတစ်ဆင့် ဧရာမ ရေစီးကြောင်းကြီးတစ်ခုမှာ ၎င်းတို့၏ ခန္ဓာကိုယ်တစ်ခုလုံးကို လျင်မြန်စွာ ဝါးမြိုဖုံးလွှမ်းသွားခဲ့သည်။

ဆက်လက်၍ မြွေမိစ္ဆာလေးကောင်ကို ဖုံးလွှမ်းထားသော ရေလုံးကြီးမှာ အရှိန်အဟုန်ဖြင့် စတင်လည်ပတ်လာခဲ့ရာ မြွေမိစ္ဆာများ မခုခံနိုင်လောက်သော ဧရာမဖိအားကြီးကို ဖြစ်ပေါ်စေတော့သည်။ ခဏအတွင်းမှာပင် ထိုရေလုံးကြီးမှာ တဖြည်းဖြည်း နီမြန်းလာခဲ့ပြီး အနီနုရောင်အဖြစ်သို့ လျင်မြန်စွာ ပြောင်းလဲသွားခဲ့သည်။

ဗွမ်း...

အသက်ရှူကြိမ် အနည်းငယ်အကြာတွင် သွေးရောင်လွှမ်းသွားသော ရေများမှာ မိုးရေအလား ကောင်းကင်မှ ကျဆင်းလာခဲ့သည်။ ကျိုးကြေပျက်စီးကာ သွေးချင်းချင်းနီနေသော မြွေမိစ္ဆာအလောင်းလေးခုမှာ အားအင်ကုန်ခမ်းစွာဖြင့် ရေမျက်နှာပြင်ပေါ်သို့ ပြန်လည်လဲကျသွားခဲ့ပြီး ဘေးပတ်ပတ်လည်ရှိ မြစ်ရေများကိုပါ သွေးနီရောင် ဆိုးသွားစေခဲ့သည်။

ရေမျက်နှာပြင်ပေါ်ရှိ မြွေမိစ္ဆာအလောင်းများကို ကြည့်ရင်း လိပ်ကြီး၏ မျက်ဝန်းများတွင် ကျေနပ်သည့် အရိပ်အယောင်များ ဖြတ်ပြေးသွားခဲ့သည်။

သူသည် "ငါ့ကို တိုက်ခိုက်ရဲတဲ့ အကျိုးဆက်က ဒါပဲ" ဟု စိတ်ထဲမှ ဂုဏ်ယူဝင့်ကြွားစွာ တွေးတောနေမိသည်။

ဝုန်း...

မမျှော်လင့်ဘဲ ထိုအချိန်၌ပင် ဝေးကွာသော မြစ်အလယ်မှ ဧရာမ ရေပန်းကြီးများ ပွင့်ထွက်လာခဲ့ပြီး နားကွဲလုမတတ် ဟိန်းဟောက်သံကြီးမှာ ပတ်ဝန်းကျင်တစ်ခုလုံးသို့ ပဲ့တင်ထပ်သွားခဲ့သည်။

ဧရာမ မြွေမိစ္ဆာကြီးများသည် တစ်ကောင်ပြီးတစ်ကောင် ရေပေါ်သို့ ပေါ်ထွက်လာကြပြီး လိပ်ကြီးကို သတ်ဖြတ်လိုသော အငွေ့အသက်များဖြင့် စိုက်ကြည့်နေကြသည်။ လိပ်ကြီး၏ နှလုံးသားမှာ ချက်ချင်းပင် တင်းကျပ်သွားခဲ့ပြီး မကောင်းသော နိမိတ်တစ်ခုကို ပြင်းထန်စွာ ခံစားလိုက်ရသည်။

...

တစ်ချိန်တည်းမှာပင် လီမြစ်အခြေစိုက်စခန်း၏ အပြင်ဘက်၌

မြေပြန့်မြက်ခင်းပြင်ပေါ်တွင် မိုးကြိုးဟိန်းသံသည် ယာယီဖန်တီးထားသော မိုးကြိုးဆွဲကိရိယာတစ်ခု၏ ဘေး၌ အဆင့်တက်လှမ်းရန် ကြိုးပမ်းနေသည်။

ခရမ်းရောင် လျှပ်စီးအလင်းတန်းများ ဖြာထွက်နေသော မိုးကြိုးဟိန်းသံသည် ယခုအချိန်၌ အနည်းငယ်တုန်ခါနေသည့် ခရမ်းရောင် မိုးကြိုးနေမင်းကြီးအလား ထင်မှတ်ရပြီး စူးရှတောက်ပသော အလင်းတန်းများနှင့် နှလုံးတုန်စရာကောင်းသော အရှိန်အဝါများကို ထုတ်လွှတ်နေသည်။

ရုန်းကန်နေသော ဝိညာဉ်အနှစ်သာရများမှာ ခန္ဓာကိုယ်အတွင်း၌ ရူးသွပ်စွာ စီးဆင်းနေသဖြင့် မိုးကြိုးဟိန်းသံမှာ များစွာ နာကျင်ခံစားနေရပြီး ၎င်း၏ ဧရာမ ခန္ဓာကိုယ်ကြီးမှာလည်း အနည်းငယ် တုန်ယင်နေခြင်းကို မရပ်တန့်နိုင်ဘဲ ဖြစ်နေသည်။

ဝုန်း... ဝုန်း... ဝုန်း...

အဆင့်တက်လှမ်းနေစဉ်အတွင်း မိုးကြိုးဟိန်းသံမှာ သူ၏ စွမ်းအားကို အပြည့်အဝ မထိန်းချုပ်နိုင်သေးပုံရရာ ရံဖန်ရံခါတွင် ကြောက်မက်ဖွယ်ရာ မိုးကြိုးလျှပ်စီးများမှာ ခန္ဓာကိုယ်မှ ထွက်ပေါ်လာပြီး မြေပြင်ကို ထိမှန်သွားခဲ့သည်။ ထိုအခါ ကျယ်လောင်သော ပေါက်ကွဲသံများနှင့်အတူ မြေပြင်တွင် ကျင်းကြီးများ ဖြစ်ပေါ်သွားခဲ့သည်။

မလှမ်းမကမ်းရှိ ကောင်းကင်ယံတွင် ကျိရုရွှယ်သည် မိုးကြိုးဟိန်းသံကို မမှိတ်မသုန် ကြည့်နေပြီး ၎င်း၏ အောင်မြင်သော အဆင့်တက်လှမ်းမှုကို စိတ်ထဲမှ တိတ်တဆိတ် မျှော်လင့်နေသည်။

အချိန်ကြာလာသည်နှင့်အမျှ မိုးကြိုးဟိန်းသံ၏ အရှိန်အဝါမှာ ပိုမိုအားကောင်းလာခဲ့ပြီး အဆင့် ၅ ၏ အမြင့်ဆုံး အကန့်အသတ်သို့ ရောက်ရှိသွားခဲ့သည်။

"ဝူး... "

ရုတ်တရက် မိုးကြိုးဟိန်းသံသည် ကောင်းကင်သို့ မော့၍ ဟိန်းဟောက်လိုက်ရာ သူ၏ အရှိန်အဝါမှာ အဆင့် ၆ သို့ ခုန်တက်သွားခဲ့ပြီး ၎င်း၏ ပတ်ပတ်လည်တွင် မိုးကြိုးလျှပ်စီးကွင်းများ ဖြစ်ပေါ်လာခဲ့သည်။

"နောက်ဆုံးတော့ ဒီကောင်ကြီး အဆင့်တက်သွားပြီပဲ "

ကျိရုရွှယ်သည် စိတ်ထဲမှ သက်ပြင်းချလိုက်ပြီး ပြုံးလိုက်မိသည်။

ကျင့်စဉ်ကို စတင်လေ့ကျင့်ကတည်းက မိုးကြိုးဟိန်းသံမှာ လျင်မြန်စွာ အဆင့်တက်ရန် အရှိန်ယူနေခဲ့ရာ ယခုအခါတွင်တော့ အဆင့် ၆ သို့ အောင်မြင်စွာ ခြေချနိုင်ခဲ့ပြီ ဖြစ်သည်။ ယခုကဲ့သို့ ဂြိုဟ်သားမျိုးနွယ်စုများ၏ ကျူးကျော်မှုနှင့် ရင်ဆိုင်နေရချိန်တွင် မိုးကြိုးဟိန်းသံသည် သေချာပေါက် ကောင်းမွန်သော မဟာမိတ်တစ်ဦး ဖြစ်လာပေလိမ့်မည်။

သို့သော်လည်း ရုတ်တရက် ကျိရုရွှယ်၏ မျက်နှာအမူအရာမှာ တစ်စုံတစ်ခုကို အာရုံခံမိသွားသဖြင့် ပြောင်းလဲသွားခဲ့သည်။

လိပ်ကလေးလား …

အခန်း။ ၄၅၄

ယခုလေးတင် ကျိရုရွှယ်သည် လိပ်ကလေးထံမှ အရေးပေါ်အကူအညီတောင်းခံသည့် အချက်ပြမှုကို အာရုံခံမိလိုက်သည်။

ထင်ရှားသည်မှာ တစ်ဖက်လူ လိပ်ကလေးသည် အသက်အန္တရာယ်နှင့် ရင်ဆိုင်နေရခြင်းပင်။

ကျိရုရွှယ်သည် မဆိုင်းမတွဘဲ အချက်ပြမှုနောက်သို့ လိုက်ပါကာ လီမြစ်ကမ်းပါးဆီသို့ အရှိန်အဟုန်ဖြင့် ပြေးထွက်သွားခဲ့သည်။

ဝုန်း...

ဤအချိန်တွင် လိပ်ကြီးမှာ အခက်အခဲကြီးစွာ ရင်ဆိုင်နေရသည်။ သူသည် မြွေမိစ္ဆာ တစ်ဆယ်ကျော်၏ ဝိုင်းရံတိုက်ခိုက်မှုကို ခံနေရပြီး တစ်ကိုယ်လုံးတွင်လည်း ဒဏ်ရာအပြည့်နှင့် ဖြစ်နေသည်။

အမည်းရောင်အကြေးခွံများ ဖုံးလွှမ်းထားသော သူ၏ခြေလက်များပေါ်တွင် သိသာထင်ရှားသော အဆိပ်သင့်၍ တိုက်စားခံထားရသည့် လက္ခဏာများ ရှိနေပြီး အချို့ဒဏ်ရာများမှာ အရိုးပင် မြင်နေရသည်။ အလွန်တရာ ကာကွယ်ရေးစွမ်းအား ကောင်းလှသော မှင်ရည်ရောင် ကျောက်စိမ်းလိပ်ခွံပေါ်တွင်ပင် အလားတူ တိုက်စားခံထားရသည့် အမှတ်အသားများ၊ သွေးချင်းချင်းနီနေသော ဒဏ်ရာများဖြင့် ပြည့်နှက်နေသည်။ ထိုမြွေမိစ္ဆာများ ကိုက်ခဲထားသည့် ဒဏ်ရာများမှလည်း သွေးများ အဆက်မပြတ် စီးကျနေသည်။

စောစောပိုင်းက အလျား ၂၀ မီတာကျော် ရှည်လျားသော ဧရာမမြွေကြီးများ ရုတ်တရက် ပေါ်လာချိန်တွင် လိပ်ကြီးမှာ တိုက်ရိုက်ထွက်မပြေးဘဲ ရန်သူကို စမ်းသပ်ကာ တိုက်ခိုက်ကြည့်ချင်ခဲ့သည်။

ကံဆိုးသည်မှာ သူသည် သူ့ကိုယ်သူ အထင်ကြီးလွန်းသွားခြင်းပင်။ မြွေတစ်ဆယ်ကျော်၏ ဝိုင်းအုံပိတ်ဆို့မှုကို ခံလိုက်ရသောအခါ လိပ်ကြီးမှာ လျင်မြန်စွာပင် အရေးနိမ့်သွားခဲ့ပြီး ဒဏ်ရာအပြည့်ဖြင့် ထွက်ပြေးခဲ့ရတော့သည်။

၎င်းတို့၏ အမျိုးအနွယ်များကို သတ်ဖြတ်ခဲ့သော ဤလိပ်ကြီးအပေါ်တွင် မြွေမိစ္ဆာများသည် သတ်ဖြတ်လိုစိတ်များ ပြည့်နှက်နေကြပြီး ထွက်ပြေးနေသော လိပ်ကြီးနောက်သို့ မရပ်မနား လိုက်လံတိုက်ခိုက်ကာ ရံဖန်ရံခါတွင် အမည်းရောင်အဆိပ်ရည်များကို ပါးစပ်မှ ပန်းထုတ်နေကြသည်။

ယခင်မြွေလေးကောင်နှင့် နှိုင်းယှဉ်လျှင် အလျား ၂၀ မီတာကျော်ရှိသော ဤမြွေကြီးများ၏ အဆိပ်ရည်မှာ တိုက်စားနိုင်စွမ်း ပိုမိုအားကောင်းလှရာ လိပ်ကြီးပင်လျှင် မခုခံနိုင်တော့ပေ။ သူ၏ အလွန်ခိုင်မာသော လိပ်ခွံကြီးပင်လျှင် ဆိုးရွားစွာ တိုက်စားခံလိုက်ရသည်။

ဝုန်း...

အနားသို့ အရှိန်ဖြင့် ချဉ်းကပ်လာစဉ် ကျိရုရွှယ်သည် လီမြစ်ဘက်ဆီမှ ထွက်ပေါ်လာသော ကြီးမားသည့် ဆူညံသံကြီးကို ကြားလိုက်ရသည်။

မျက်တောင်တစ်ခတ်အတွင်းမှာပင် ကျိရုရွှယ်သည် အရှိန်ကိုမြှင့်ကာ ထိုနေရာသို့ ပြေးဝင်သွားခဲ့သည်။

သူ၏သခင် အနားသို့ ရောက်ရှိနေပြီဖြစ်ကြောင်း အာရုံခံမိလိုက်သောအခါ လိပ်ကြီးမှာ အသက်ကယ်ကြိုးကို တွေ့လိုက်ရသကဲ့သို့ သူ၏ခြေလက်များကို အစွမ်းကုန်ဆန့်ထုတ်ကာ ကမ်းစပ်ဆီသို့ ရူးသွပ်မတတ် ပြေးတော့သည်။

မုန်တိုင်းတိမ်တိုက်များကို ဖန်တီးကာ လိုက်ပါလာကြသော မြွေမိစ္ဆာ တစ်ဆယ်ကျော်မှာလည်း လိပ်ကြီး၏နောက်သို့ ထပ်ကြပ်မကွာ လိုက်ပါလာကြပြီး လိပ်ကြီးကို ဝါးမြိုရန်အတွက် ၎င်းတို့၏ ပါးစပ်ကြီးများကို ဟလျက် အငမ်းမရ လိုက်နေကြသည်။

"ဒါက... မျက်လုံးနီ နတ်ဆိုးမြွေတွေလား"

မြစ်ကမ်းနားသို့ ရောက်ရှိလာချိန်တွင် လိပ်ကြီးအား လိုက်လံတိုက်ခိုက်နေသည့် မြွေများကို မြင်လိုက်ရသဖြင့် ကျိရုရွှယ်အံ့အားသင့်သွားခဲ့သည်။ သူမသည် ဤမြွေများကို အခြားကမ္ဘာမှ ရောက်ရှိလာသော မျက်လုံးနီ နတ်ဆိုးမြွေများဖြစ်ကြောင်း မှတ်မိလိုက်သောကြောင့်ပင်။

ဤနတ်ဆိုးမြွေများသည် ကြမ်းကြုတ်ရက်စက်ရုံသာမက အုပ်စုလိုက် နေထိုင်တတ်ကြသဖြင့် ကိုင်တွယ်ရ အလွန်ခက်ခဲသော သတ္တဝါများ ဖြစ်ကြသည်။

သို့သော်လည်း တစ်ကိုယ်လုံးတွင် ဒဏ်ရာအပြည့်နှင့် အားအင်ကုန်ခမ်းနေသော လိပ်ကြီးကို မြင်လိုက်ရသောအခါ ကျိရုရွှယ်၏ ဒေါသမှာ ချက်ချင်းပင် ထွက်ပေါ်လာခဲ့သည်။

"ခွေးကို ရိုက်ရင်တောင် သူ့သခင် မျက်နှာကို ကြည့်ရတယ်" ဟူသော စကားပုံအတိုင်း သူမ၏ အိမ်မွေးတိရစ္ဆာန်ကို ဤသို့ လုပ်ရဲသည့် မျက်လုံးနီ နတ်ဆိုးမြွေများသည် အမှန်တကယ်ပင် သေထိုက်သည်။

"ဟွန့် ဘယ်လောက်တောင် အတင့်ရဲတာလဲ။ ဧကရီရဲ့ အိမ်မွေးတိရစ္ဆာန်ကိုတောင် ထိပါးရဲတယ်ပေါ့ နင်တို့အားလုံး သေပေတော့ "

လေထဲတွင် ပျံသန်းနေသော ကျိရုရွှယ်၏ မျက်နှာမှာ အေးစက်သွားပြီး သူမ၏ အရှိန်အဝါများကို အစွမ်းကုန် ထုတ်လွှတ်လိုက်သည်။ စိတ်စွမ်းအင်မုန်တိုင်းတစ်ခုသည် သတ်ဖြတ်လိုစိတ်များနှင့်အတူ ရှေ့သို့ ဟုန်ခနဲ တိုးဝင်သွားခဲ့သည်။

ကမ်းစပ်သို့ ရောက်ရှိလာသော မျက်လုံးနီ နတ်ဆိုးမြွေ တစ်ဆယ်ကျော်မှာ ကျိရုရွှယ်၏ အရှိန်အဝါကို အာရုံခံမိလိုက်သည်နှင့် ၎င်းတို့၏ မျက်လုံးများတွင် ကြောက်ရွံ့မှုများ အထင်အရှား ပေါ်လာခဲ့သည်။ သေခြင်းတရား၏ အန္တရာယ်က ၎င်းတို့၏ ဒေါသကို ဖုံးလွှမ်းသွားခဲ့ပြီး ချက်ချင်းပင် ကိုယ်ကိုလှည့်ကာ မြစ်ထဲသို့ ထွက်ပြေးရန် ကြိုးစားကြတော့သည်။

သို့သော် ထိုအချိန်၌ပင် ကျိရုရွှယ်၏ စိတ်စွမ်းအင်လှိုင်းများမှာ ၎င်းတို့ထံသို့ ရောက်ရှိလာခဲ့ပြီ ဖြစ်သည်။

မျက်တောင်တစ်ခတ်အတွင်းမှာပင် အသည်းအသန် ရုန်းကန်နေသော နတ်ဆိုးမြွေ တစ်ဆယ်ကျော်မှာ နေရာတင် တောင့်တင်းသွားခဲ့သည်။ မြင်ကွင်းထဲ၌ မမြင်ရသော ဧရာမ လက်ဝါးကြီးတစ်ခုက ၎င်းတို့အားလုံးကို ကမ်းစပ်၌ ဖိနှိပ်၍ ချုပ်ကိုင်ထားသကဲ့သို့ပင်။

ယခုအခါ ၎င်းတို့၏ နီရဲသော မြွေမျက်လုံးများထဲတွင် သေဘေးကို ကြောက်လန့်နေသည့် အရိပ်အယောင်များဖြင့် ပြည့်နှက်နေသည်။ စိတ်လှုပ်ရှားနေသော်လည်း ၎င်းတို့၏ ခန္ဓာကိုယ်များမှာမူ အနည်းငယ်မျှ လှုပ်ရှား၍မရတော့ဘဲ သေခြင်းတရားကိုသာ ငြိမ်သက်စွာ စောင့်ဆိုင်းနေရတော့သည်။

ရှူး... ရှူး... ရှူး...

ထို့နောက် ကျိရုရွှယ်၏ ထိန်းချုပ်မှုအောက်တွင် လက်မခန့် ထုထည်ရှိသော စိတ်စွမ်းအင် အပ်

စိုက်များစွာမှာ သူမ၏ ရှေ့၌ စုစည်းကာ ပေါ်ထွက်လာပြီး ရန်သူများထံသို့ အရှိန်အဟုန်ဖြင့် ပစ်လွှတ်လိုက်တော့သည်။

ဘုန်း...

မျက်တောင်တစ်ခတ်အတွင်းမှာပင် ဧရာမ မျက်လုံးနီ နတ်ဆိုးမြွေများ၏ ခေါင်းများမှာ သွေးများ ပွင့်ထွက်သွားခဲ့ပြီး အပေါက်ကြီးများ ဖြစ်ပေါ်လျက် နေရာတင် အသက်ပျောက်သွားကြသည်။

ဗုန်း... ဗုန်း...

ခေါင်းကို အပ်စိုက်ခံလိုက်ရသည့် မျက်လုံးနီ နတ်ဆိုးမြွေများ၏ မျက်လုံးများထဲမှ အသက်

ဓာတ်မှာ လျင်မြန်စွာ ကွယ်ပျောက်သွားခဲ့သည်။ ကျိရုရွှယ်က သူမ၏ စိတ်စွမ်းအင်ကို ပြန်လည်ရုပ်သိမ်းလိုက်သည်နှင့် ၎င်းတို့၏ ရုပ်အလောင်းများသည် အသက်မဲ့စွာဖြင့် ကမ်းစပ်ပေါ်သို့ လဲကျသွားခဲ့သည်။

ပတ်ဝန်းကျင်တစ်ခုလုံး ပြန်လည်တိတ်ဆိတ်သွားသည်။ နတ်ဆိုးမြွေအားလုံး သေဆုံးသွားသည်ကို အတည်ပြုပြီးနောက် ကျိရုရွှယ်သည် မြေပြင်သို့ ဖြည်းညှင်းစွာ ဆင်းသက်လိုက်သည်။

"ဝူး... "

ဒဏ်ရာရထားသော လိပ်ကြီးမှာမူ သူ၏သခင် ဆင်းသက်လာသည်ကို မြင်သည်နှင့် အပြေးအလွှား ရောက်ရှိလာပြီး ဝမ်းနည်းကြေကွဲဖွယ် ဟိန်းဟောက်သံကြီးကို လွှတ်လိုက်တော့သည်။

ဤကျိန်စာသင့်မြွေများသည် အမှန်တကယ်ပင် သေထိုက်လှသည်။ သူ အေးအေးဆေးဆေး အိပ်စက်နေသည်ကို နှောင့်ယှက်ရုံတင်မက သူ့ကိုပါ အစာအဖြစ် စားပွဲတင်ရန် ကြံရွယ်ခဲ့ကြသည်။ အကယ်၍သာ ယနေ့တွင် သူ၏သခင် အချိန်မီရောက်မလာခဲ့လျှင် သူသည် မြွေ၏ဝမ်းဗိုက်ထဲ၌ အစာခြေခံနေရလောက်ပြီ ဖြစ်သည်။

"ကဲပါ... ကဲပါ... နင်လည်း အားထုတ်ခဲ့ရမှန်း ငါသိပါတယ် ပြောစမ်းပါဦး... ဒီသတ္တဝါတွေ ဘယ်ကနေ ရောက်လာကြတာလဲ"

လိပ်ကြီး၏ ခေါင်းကို ပုတ်ပေးရင်း ကျိရုရွှယ်က ပြုံးလျက် ချော့မြူလိုက်သည်။ ထို့နောက် အခြားကမ္ဘာမှ ရောက်ရှိလာသော ဤမျက်လုံးနီ နတ်ဆိုးမြွေများအကြောင်းကို သတိရကာ လိပ်ကြီးကို အမြန်ဆုံး မေးမြန်းလိုက်ခြင်းပင်။

"ဝူး... ဝူး... "

သခင်ဖြစ်သူ၏ မေးခွန်းကို ကြားသောအခါ လိပ်ကြီးမှာ အတော်လေး နာကျည်းနေသည့် အမူအရာဖြင့် အသံအချို့ ပြန်လည်ပြုလုပ်လိုက်သည်။

"နင်လည်း မသိဘူး ဟုတ်လား ဒီသတ္တဝါတွေက မြစ်ထဲမှာ ရုတ်တရက် ပေါ်လာတာပေါ့ "

ထိုစကားကြောင့် ကျိရုရွှယ် မျက်မှောင်ကြုတ်သွားမိသည်။ ဤမျက်လုံးနီ နတ်ဆိုးမြွေများသည် အခြားကမ္ဘာမှ ရောက်ရှိလာသည်မှာ အထူးပြောနေရန်ပင် မလိုတော့ပေ။ ဆိုလိုသည်မှာ မျက်လုံးနီ နတ်ဆိုးမြွေများ၏ အသိုက်အမြုံနှင့် ဆက်သွယ်ထားသော ဟင်းလင်းပြင်အက်ကြောင်းတစ်ခု သေချာပေါက် ရှိနေရမည်ဖြစ်သည်။

မျက်လုံးနီ နတ်ဆိုးမြွေများသည် လီမြစ်တစ်ခုလုံးတစ်လျှောက် ကူးခတ်သွားလာနိုင်

သော်လည်း ယခုကဲ့သို့ အရေအတွက် အမြောက်အမြား ဤနေရာ၌ တစ်ပြိုင်နက် ပေါ်လာခြင်းမှာ ဟင်းလင်းပြင်အက်ကြောင်းသည် လီမြစ်၏ ဤအပိုင်းအတွင်း၌ပင် ရှိနေနိုင်ခြေ အမြင့်ဆုံးဖြစ်ကြောင်း ညွှန်ပြနေသည်။

ကောက်ချက်တစ်ခုသို့ ရောက်ရှိပြီးနောက် ကျိရုရွှယ်သည် ထိုကိစ္စကို ခေတ္တဘေးဖယ်ထားကာ လိပ်ကြီး၏ ဒဏ်ရာများကို ကြည့်လိုက်သည်။ ထို့နောက် သူမ၏ အကြည့်မှာ မျက်လုံးနီ နတ်ဆိုးမြွေ အလောင်း တစ်ဆယ်ကျော်ထံသို့ ရောက်ရှိသွားခဲ့သည်။

ဤမျက်လုံးနီ နတ်ဆိုးမြွေများ၏ နတ်ဆိုးအမြုတေများမှာ အမှန်တကယ် ကောင်းမွန်သောအရာများပင်။

ဝုန်း...

ဆက်လက်၍ ကျိရုရွှယ်၏ စိတ်စွမ်းအင် ထိန်းချုပ်မှုအောက်တွင် ဧရာမ မြွေအလောင်း တစ်ဆယ်ကျော်မှာ ကမ်းစပ်မှ သူမ၏ရှေ့မှောက်သို့ ပျံသန်းလာပြီးနောက် ဖြည်းညှင်းစွာ ပြန်လည်ကျဆင်းသွားခဲ့သည်။

ရှူး...

ထို့နောက် စိတ်စွမ်းအင်ကို ဓားကဲ့သို့ အသုံးချကာ မျက်လုံးနီ နတ်ဆိုးမြွေများ၏ ခန္ဓာကိုယ်များကို တစ်ခုပြီးတစ်ခု ခွဲထုတ်လိုက်သည်။ ပင်ပေါင်ဘောလုံး အရွယ်အစားခန့်ရှိသော အမည်းရောင် နတ်ဆိုးအမြုတေများမှာ တစ်လုံးပြီးတစ်လုံး ကျိရုရွှယ်၏ လက်ထဲသို့ ပျံဝင်လာကြတော့သည်။

တစ်ချိန်တည်းမှာပင် လိပ်ကြီးသည်လည်း သူ၏ ဒဏ်ရာများ ပြန်လည်သက်သာလာစေရန်အတွက် နတ်ဆိုးမြွေများ၏ ရုပ်အလောင်းများကို စတင်ဝါးမြိုနေပြီ ဖြစ်သည်။ ကျိရုရွှယ်ကလည်း နတ်ဆိုးအမြုတေ အနည်းငယ်ကို လိပ်ကြီး၏ ပါးစပ်ထဲသို့ ပစ်ထည့်ပေးလိုက်သည်။

အလောင်းအချို့နှင့် အမြုတေများကို ဝါးမြိုပြီးနောက် လိပ်ကြီး၏ ဒဏ်ရာများမှာ သိသိသာသာ သက်သာလာခဲ့ပြီး သူ၏ အရှိန်အဝါမှာပင် သိသိသာသာ ပိုမိုအားကောင်းလာခဲ့သည်။

"လိပ်ကလေး... နောက်ထပ် အကောင်အချို့လောက် ထပ်ပြီး မျှားခေါ်လာခဲ့ဦး "

သူမ၏ လက်ထဲရှိ သန့်စင်သော စွမ်းအင်များ ပါဝင်နေသည့် နတ်ဆိုးအမြုတေများကို ကြည့်ရင်း ကျိရုရွှယ်၏ မျက်ဝန်းများမှာ တောက်ပသွားခဲ့သည်။ လိပ်ကြီး အခြေအနေ ကောင်းမွန်လာသည်ကို မြင်ရသဖြင့် သူမက ထပ်မံညွှန်ကြားလိုက်ခြင်းပင်။

အနာသက်သာရုံသာ ရှိသေးသည့် လိပ်ကြီးမှာ ထိုစကားကို ကြားလိုက်ရသောအခါ မျက်နှာကြီး ရှုံ့မဲ့သွားပြီး လုံးဝ မသွားချင်သည့် အမူအရာ ပေါ်လာခဲ့သည်။

ဒါပေမဲ့လည်း မတတ်နိုင်ဘူးလေ... ဒါက သခင့်ရဲ့ အမိန့်ဖြစ်နေတာကိုး ဘယ်လိုလုပ် ငြင်းရဲမှာလဲ။

သူသည် သတိကြီးစွာဖြင့် မြစ်ထဲသို့ တိုးဝင်သွားပြီး မျက်လုံးနီ နတ်ဆိုးမြွေများ၏ အစအနကို လိုက်လံရှာဖွေရတော့သည်။

လိပ်ကြီး မြစ်ထဲသို့ ပျောက်ကွယ်သွားသည်ကို ကြည့်ရင်း ကျိရုရွှယ်သည် ထိုနေရာ၌ပင် ရပ်လျက် စောင့်ဆိုင်းနေခဲ့သည်။ အကယ်၍ လိပ်ကြီးသာ နောက်ထပ် နတ်ဆိုးမြွေများကို မျှားခေါ်လာနိုင်မည်ဆိုပါက လီမြစ်၏ ဤအပိုင်းအတွင်း၌ ဟင်းလင်းပြင်အက်ကြောင်းတစ်ခု သေချာပေါက် ရှိနေကြောင်း အတည်ပြုနိုင်မည် ဖြစ်သည်။

ဘုန်း...

မကြာမီမှာပင် မြစ်ရေပြင်မှာ ထပ်မံပေါက်ကွဲသွားခဲ့ပြီး လိပ်ကြီးမှာ ရေပေါ်သို့ ပေါ်ထွက်လာကာ ထိတ်လန့်တကြားဖြင့် ကမ်းစပ်ဆီသို့ အသည်းအသန် ပြေးလာခဲ့သည်။ နောက်တစ်ခဏတွင်တော့ မျက်လုံးနီ နတ်ဆိုးမြွေများ၏ စူးရှသော ဟိန်းဟောက်သံများမှာလည်း ဆက်တိုက် ထွက်ပေါ်လာခဲ့တော့သည်။

ဝုန်း... ဝုန်း... ဝုန်း...

ရေပန်းများနှင့်အတူ မျက်လုံးနီ နတ်ဆိုးမြွေများသည် ရေထဲမှ ထိုးထွက်လာကြပြီး လိပ်

ကြီး၏နောက်သို့ အတင်းအကျပ် လိုက်နေကြသည်။

"ဒီနည်းဗျူဟာကို မြွေကို အသိုက်ထဲကနေ မျှားထုတ်ခြင်းလို့ ခေါ်တယ် "

ဤမြင်ကွင်းကို ကြည့်ရင်း စောင့်ဆိုင်းနေသော ကျိရုရွှယ်မှာ ပြုံးလိုက်မိသည်။