အခန်း (၄၅-၄၆)

အခန်း ၄၅ - ဘိုးဘေးနဂါးကို စိန်ခေါ်ခြင်း၊ အဆင့်တူတိုက်ပွဲ၊ စီနီယာဘိုးဘေးနဂါး... အနိုင်အရှုံးကို ဆုံးဖြတ်ရမယ့် အချိန်ရောက်ပြီ

သူ့အသံ ဟိန်းထွက်လာသည်နှင့်အမျှ လင်းချန်၏ ခန္ဓာကိုယ်မှ ထွက်ပေါ်လာသော ဖိအားမှာ ကောင်းကင်ဘုံ လှမ်းတက်ခြင်းအဆင့်၏ အထွတ်အထိပ် ပညာရှင်တစ်ဦးကိုပင် ထိတ်လန့်တုန်လှုပ်စေနိုင်သည့် အရှိန်အဝါမျိုး ဖြစ်သည်။

တစ်ခဏချင်းမှာပင် ထိုဖိအားများသည် ပတ်ဝန်းကျင်ရှိ ကစဉ့်ကလျားမြေရိုင်းအတွင်းသို့ ပျံ့နှံ့သွားပြီး ဘိုးဘေးနဂါး၏ ကြီးမားလှသော ခန္ဓာကိုယ်ကြီးမှာလည်း ထိုဖိအားအောက်တွင် ဝိုင်းရံပိတ်ဆို့ခြင်း ခံလိုက်ရတော့သည်။

ထိုဖိအားများ၏ လွှမ်းမိုးမှုအောက်တွင် မိုင်ပေါင်းတစ်သောင်း ရှည်လျားသော ဘိုးဘေးနဂါးသည် သူ၏ ခန္ဓာကိုယ်ကြီးမှာ အားကောင်းလှသော စွမ်းအားတစ်ခု၏ ဖိနှိပ်မှုကြောင့် ရုတ်တရက် လေးလံသွားသကဲ့သို့ ခံစားလိုက်ရသည်။ သို့သော် ဘိုးဘေးနဂါးသည် ထိုသို့ ခံစားရခြင်းအပေါ် အနည်းငယ်မျှ စိတ်အနှောင့်အယှက်မဖြစ်ဘဲ သူ၏ မျက်နှာထက်တွင် လူသားတစ်ဦးကဲ့သို့ စိတ်လှုပ်ရှားနေသော အမူအရာမျိုး ဖြစ်ပေါ်လာတော့သည်။

“မဆိုးဘူး။ အဆင့်တူနယ်ပယ်မှာ ငါ့ကို ဒီလောက်အထိ ပြင်းထန်တဲ့ ဖိအားပေးနိုင်တာကြည့်ရင် မင်းဟာ တကယ့်ကို အံ့ဩစရာကောင်းတဲ့သူပဲ။

ဒီတစ်ကြိမ်မှာတော့ ငါ တကယ့်ကို အားရပါးရ တိုက်ခိုက်နိုင်တော့မယ် ထင်တယ်။”

“ဂါးးးးးး”

စကားမဆုံးမီမှာပင် စင်ကြယ်လှသော နဂါးဟိန်းသံကြီး ထွက်ပေါ်လာပြီး မိုင်ပေါင်းတစ်သောင်းပတ်လည်ရှိ ရှုခင်းများကို တုန်ခါသွားစေခဲ့သည်။ ထိုနဂါးဟိန်းသံနှင့်အတူ လင်းချန်၏ ဖိနှိပ်ထားသော အရှိန်အဝါများသည် ချက်ချင်းပင် အစိတ်စိတ်အမွှာမွှာ ကွဲအက်သွားပြီး အပြန်အလှန် ထိပ်တိုက်ရင်ဆိုင်သည့် အခြေအနေသို့ ရောက်ရှိသွားတော့သည်။

ဘိုးဘေးနဂါးအနေဖြင့် အဆင့်တူနယ်ပယ်ရှိ ပညာရှင်တစ်ဦးထံမှ ဤကဲ့သို့သော ဖိအားမျိုးကို တစ်ခါမျှ မခံစားခဲ့ဖူးပေ။ လင်းချန်သည် ပထမဦးဆုံးပင်။

နဂါးဟိန်းသံအတွင်းမှ အားကောင်းလှသော ဖျက်ဆီးခြင်းစွမ်းအားများကို ခံစားမိလိုက်သောအခါ လင်းချန်လည်း စိတ်လှုပ်ရှားစွာဖြင့် ပြုံးလိုက်မိသည်။ သံသယဖြစ်စရာမလိုဘဲ ဘိုးဘေးနဂါးသည် လွမ်ထက်ပင် ပိုမိုအစွမ်းထက်ပြီး ကြောက်မက်ဖွယ်ကောင်းလှသည်။

လွမ်သည် မိမိကိုယ်ကိုယ် ပါရမီတွင် နံပါတ်တစ်ဟု ဂုဏ်ယူနေပြီး နှိုင်းယှဉ်မဲ့ပါရမီရှင်ဟု သတ်မှတ်ထားသော်လည်း လက်တွေ့တွင်မူ သူ၏ စိတ်ကူးများမှာ ကောင်းကင်ထက် မြင့်မားနေသည့် မောက်မာမှုသက်သက်သာ ဖြစ်သည်။ ဘိုးဘေးနဂါးကမူ ဤနဂါးဟိန်းသံ တစ်ချက်တည်းဖြင့်ပင် သူ၏ သာလွန်မှုကို သက်သေပြနိုင်ခဲ့ချေပြီ။

လွမ် မပေါ်ပေါက်မီ ကာလရှည်ကြီးကတည်းက နိဗ္ဗာန်သို့ ရောက်ရှိခဲ့ပြီးသော မိစ္ဆာအပေါင်းတို့၏ ဘိုးဘေးနှင့် နှိုင်းယှဉ်လျှင် လွမ်သည် ကလေးကစားစရာအဆင့်မျှသာ ဖြစ်ပေသည်။

အနည်းငယ်မျှ တွေဝေခြင်းမရှိဘဲ လင်းချန်၏ ဖရိုဖရဲဝိညာဉ်စွမ်းအားများသည် သူ၏ ခန္ဓာကိုယ်အတွင်းရှိ ပွင့်ပြီးသားဖြစ်သော တံခါးများနှင့် တိုက်ရိုက်ဆက်သွယ်လိုက်တော့သည်။ ဘိုးဘေးနဂါးနှင့် ရင်ဆိုင်ရာတွင် သူသည် မည်သည့်အရာကိုမျှ ချန်လှပ်ထားခြင်း မရှိသင့်ပေ။ ဤသည်မှာ ဘိုးဘေးနဂါးအပေါ် ထားရှိသော လေးစားမှုဖြစ်သလို မိမိကိုယ်ကိုယ် လေးစားမှုလည်း ဖြစ်ပေသည်။

တစ်ခဏအတွင်း လင်းချန်၏ ဖိအားမှာ ပြင်းထန်စွာ မြင့်တက်လာပြီး အဆင့်ကျော်ကာ ပြောင်းလဲသွားခဲ့သည်။ လင်းချန်၏ အရှိန်အဝါမှာ တဖြည်းဖြည်း ပိုမိုအားကောင်းလာသည်ကို သတိပြုမိသောအခါ ဘိုးဘေးနဂါးသည် အကဲခတ်နေခြင်းကို ရပ်တန့်လိုက်ပြီး ပထမဦးဆုံး တိုက်ခိုက်မှုကို စတင်လိုက်တော့သည်။

သူ၏ ခံ့ညားသောအသံ ဟိန်းထွက်လာသည်နှင့်အမျှ ကြီးမားလှသော နဂါးခန္ဓာကိုယ်ကြီးမှာ လှုပ်ရှားသွားတော့သည်။

“လင်းချန်... မင်း ငါ့ကို ကျေနပ်အောင် လုပ်နိုင်မယ်လို့ ငါမျှော်လင့်တယ်။”

“ဝုန်း”

ငွေမီးခိုးရောင် ကစဉ့်ကလျားစွမ်းအင်များမှာ ဘိုးဘေးနဂါး၏ ခန္ဓာကိုယ် အစိတ်အပိုင်းတိုင်းမှ ပေါက်ကွဲထွက်လာပြီး နဂါးအမြီးကြီးမှာ အရှိန်အဟုန်ဖြင့် ကျဆင်းလာခဲ့သည်။ ၎င်းမှာ အမြီးဖြင့် ရိုက်ချက်မျှသာ ဖြစ်သော်လည်း ဘိုးဘေးနဂါး၏ ခန္ဓာကိုယ်မှာ အလွန်တရာ ကြီးမားလှသဖြင့် လင်းချန်ရှိရာ အရပ်မျက်နှာအားလုံးကို ပိတ်ဆို့ထားကာ အခြားမည်သည့်အရာကိုမျှ မမြင်နိုင်တော့သည့် အခြေအနေသို့ ရောက်သွားစေခဲ့သည်။

အဆုံးမဲ့သော ကစဉ့်ကလျားမြေရိုင်းအတွင်းမှာပင် ထိုနဂါးအမြီး၏ ပြင်းထန်လှသော စွမ်းအားကြောင့် ဟင်းလင်းပြင်များ ဆုတ်ဖြဲခံလိုက်ရပြီး အမည်မသိ အရှိန်အဝါများ ထွက်ပေါ်နေသည့် အက်ကြောင်းကြီးများ ပေါ်ပေါက်လာခဲ့သည်။

လင်းချန်သည် ကောင်းကင်ကျောက်တိုင်ကြီးကဲ့သို့ ကျဆင်းလာသော နဂါးအမြီးကို ကြည့်ပြီး ပြုံးလိုက်၏။

“စိတ်မပူပါနဲ့ စီနီယာ။ ကျုပ်က စီနီယာ့ကို ကျေနပ်စေရုံတင်မကဘဲ... စီနီယာ့ကိုပါ အနိုင်ယူပြမှာပါ။”

ပြောပြောဆိုဆိုနှင့်ပင် သူသည် နောက်မဆုတ်ဘဲ ရှေ့သို့ တိုးဝင်လိုက်ကာ အထက်မှ ကျဆင်းလာသော နဂါးအမြီးဆီသို့ သူ၏ ဓားဖြင့် ခုတ်ပိုင်းလိုက်တော့သည်။

“ကမ္ဘာဦးဖရိုဖရဲ ဓားကိုးချက် - ပထမဓားချက်။”

“ဝုန်း...”

နက်နဲလှသော နိယာမစွမ်းအားများ ပါဝင်နေသည့် ငွေမီးခိုးရောင် ဓားအလင်းတန်းသည် လမ်းကြောင်းပေါ်ရှိ အရာအားလုံးကို ဖြတ်တောက်ကာ နဂါးအမြီးပေါ်သို့ တိုက်ရိုက် ကျရောက်သွားတော့သည်။

လက်ရှိတွင် လင်းချန်သည် ကမ္ဘာဦးဖရိုဖရဲ ဓားကိုးချက်ထဲမှ ပထမငါးချက်ကိုသာ ထုတ်ဖော်နိုင်သေးသည်။ သူ၏ကျင့်ကြံမှုအဆင့်မှာ နောက်ထပ်လေးချက်အတွက် မလုံလောက်သေးသလို ခန္ဓာကိုယ်အတွင်းရှိ ဝိညာဉ်စွမ်းအားမှာလည်း ထိုဓားချက်များကို ထောက်ပံ့ပေးရန် မပြည့်စုံသေးပေ။

သို့သော်လည်း ဤပထမငါးချက်သည်ပင် လက်ရှိတိုက်ပွဲကို ကိုင်တွယ်ရန် လုံလောက်နေပြီဖြစ်သည်။

“ကလန်...ကလန်...ကလန်။”

“ဝုန်း”

နောက်တစ်ခဏတွင် သတ္တုချင်း ထိခိုက်မိသံများမှာ ကစဉ့်ကလျား ဟင်းလင်းပြင်အတွင်း ပဲ့တင်ထပ်သွား၏။ ငွေမီးခိုးရောင် ဓားအလင်းတန်းမှာ ပေတစ်ရာခန့် ရှည်လျားသော်လည်း ကြီးမားလွန်းလှသော နဂါးအမြီးနှင့် နှိုင်းယှဉ်လျှင်မူ သေးငယ်နေဆဲပင်။

ငွေမီးခိုးရောင် နဂါးအမြီးပေါ်သို့ ဓားချက်ကျရောက်သွားသောအခါ မီးပွင့်များသာ ထွက်ပေါ်လာ၏။ ဓားအလင်းတန်း၏ စွမ်းအားကုန်ဆုံးသွားချိန်တွင် နဂါးကြေးခွံများပေါ်၌ အဖြူရောင် အမှတ်အသားအချို့သာ ကျန်ရစ်ခဲ့ပြီး အစစ်အမှန် ကာကွယ်မှုကိုမူ မထိုးဖောက်နိုင်ခဲ့ပေ။

သို့သော်လည်း ဓားအလင်းတန်းတွင် ပါဝင်သော ပြင်းထန်သည့် ရိုက်ခတ်မှုကြောင့် နဂါးအမြီး၏ လမ်းကြောင်းမှာ လွှဲချော်သွားကာ နောက်သို့ လန်သွားခဲ့သည်။ ဘိုးဘေးနဂါးမှာမူ ဤအခြေအနေကို ကြိုတင်တွက်ဆထားပုံရသည်။ ထိုတွန်းကန်အားကို အသုံးချကာ သူ၏ခန္ဓာကိုယ်ကို ဇောက်ထိုးလှန်လိုက်ပြီး နဂါးလက်သည်းတစ်ခုဖြင့် ကစဉ့်ကလျားဟင်းလင်းပြင်ကို ဆုတ်ဖြဲကာ လင်းချန်ရှိရာသို့ လှမ်း၍ တိုက်ခိုက်လိုက်တော့သည်။

သာမန် ကောင်းကင်ဘုံတက်လှမ်းခြင်းအဆင့် ထိပ်သီးပညာရှင်တစ်ဦးသာ ဤလက်သည်းချက်နှင့် ရင်ဆိုင်ရပါက... ရလဒ်မှာ သေဆုံးခြင်း သာ ရှိပေလိမ့်မည်။

လင်းချန်သည်လည်း ဘိုးဘေးနဂါးကဲ့သို့ပင် ပထမဓားချက်နှင့်တင် အောင်မြင်မှုရလိမ့်မည်ဟု မျှော်လင့်မထားခဲ့ပေ။ ဓားချက်ထုတ်ပြီးသည်နှင့် သူ၏ခန္ဓာကိုယ်မှာ အခြားတစ်နေရာသို့ ကူးပြောင်းသွားပြီး နောက်ထပ်ဓားချက်တစ်ချက်ကို ထပ်မံဝှေ့ယမ်းလိုက်သည်။

“ကမ္ဘာဦးဖရိုဖရဲ ဓားကိုးချက် - ဒုတိယဓားချက်။”

ဤဓားချက်၏ အရှိန်အဝါမှာ ယခင်တစ်ခုထက် ဆထက်များစွာ ပိုမိုအားကောင်းလှပေသည်။

“ဝုန်း”

နဂါးလက်သည်းနှင့် ဓားအလင်းတန်းတို့ ထိပ်တိုက်တွေ့ဆုံသွားပြီး ကောင်းကင်ကိုပင် တုန်ဟိန်းစေသော အသံကြီး ပေါက်ကွဲထွက်လာခဲ့သည်။ သူတို့နှစ်ဦးမှာ အင်အားချင်း ညီမျှနေဆဲပင်။

ဤသည်ကို မြင်သောအခါ လင်းချန်နှင့် ဘိုးဘေးနဂါးတို့၏ မျက်ဝန်းအိမ်ထဲမှ စိတ်လှုပ်ရှားမှုများမှာ ပိုမိုပြင်းထန်လာခဲ့သည်။ သူတို့၏ ခန္ဓာကိုယ်များသည် အဆက်မပြတ် လှုပ်ရှားနေပြီး တစ်ခုပြီးတစ်ခု ထိခိုက်မိနေကြသည်။

“ဒုန်း”

“ဗုန်း ဗုန်း ဗုန်း”

“ဝုန်း”

...

အဆုံးအစမဲ့သော ကစဉ့်ကလျား ဟင်းလင်းပြင်အတွင်း လင်းချန်နှင့် ဘိုးဘေးနဂါးတို့၏ ပုံရိပ်များသည် နေရာအနှံ့သို့ လျင်မြန်စွာ ကူးပြောင်းနေကြ၏။ သူတို့ရောက်ရှိရာ နေရာတိုင်းတွင် ဟင်းလင်းပြင်များမှာ ဆုတ်ဖြဲခံရပြီး အချိန်အတော်ကြာသည်အထိ ပြန်လည်ကောင်းမွန်နိုင်ခြင်း မရှိတော့ပေ။

လင်းချန်၏ သေးငယ်သော ခန္ဓာကိုယ်မှာ ဘိုးဘေးနဂါးနှင့် ယှဉ်လျှင် အချိုးအစား မမျှသော်လည်း တိုက်ခိုက်မှုများအတွင်း အနည်းငယ်မျှ အသာစီးပေးရခြင်း မရှိပေ။ ထိပ်တိုက်တွေ့မှုတိုင်းနီးပါးမှာ သရေကျနေပြီး မည်သူကမျှ အားနည်းခြင်း မရှိကြချေ။

ရံဖန်ရံခါ တိုက်ခိုက်မှုများတွင်မှသာ နည်းဗျူဟာအသာစီးရမှုပေါ် မူတည်ပြီး အနိုင်အရှုံး အနည်းငယ် ကွာဟသွားတတ်သည်။ အစပိုင်းတွင် လင်းချန်သည် ဓားတာအို စွမ်းရည်များကိုသာ အသုံးပြုခဲ့သော်လည်း တိုက်ပွဲကြာလာသည်နှင့်အမျှ သူအကျွမ်းကျင်ဆုံးဖြစ်သော လက်သီးနတ်ဘုရားစွမ်းရည်များကိုပါ စတင်အသုံးပြုလာခဲ့သည်။

တဖြည်းဖြည်းနှင့် လင်းချန်နှင့် ဘိုးဘေးနဂါးတို့၏ ခန္ဓာကိုယ်ပေါ်တွင် ဒဏ်ရာအနာအဆာများ ဖြစ်ပေါ်းလာပြီး သူတို့၏ အရှိန်အဝါများမှာလည်း ဖရိုဖရဲ ဖြစ်လာခဲ့တော့သည်။ သို့သော် လင်းချန်နှင့် ဘိုးဘေးနဂါးတို့မှာ ရပ်တန့်ခြင်းမရှိဘဲ စိတ်လှုပ်ရှားနေသော မျက်နှာပေးများဖြင့် အချင်းချင်း ဆက်လက်တိုက်ခိုက်နေကြဆဲပင်။

သူတို့နှစ်ဦးစလုံးသည် အဆင့်တူနယ်ပယ်အတွင်း ဤမျှအစွမ်းထက်သော တည်ရှိမှုမျိုးနှင့် တစ်ခါမျှ မဆုံဖူးခဲ့ကြပေ။ ယခုတစ်ကြိမ်တွင်မူ သူတို့သည် အားရပါးရ တိုက်ခိုက်နေကြခြင်းဖြစ်သည်။

လင်းချန်ပင်လျှင် အနိုင်အရှုံးကို မေ့လျော့သွားပြီး သူသည် ယခုအခါ နတ်ဘုရားမျှော်စင်ကို တက်လှမ်းနေခြင်းဖြစ်ကြောင်းနှင့် သူ၏ပြိုင်ဘက်မှာ ပုံရိပ်ယောင်မျှသာ ဖြစ်သည်ဆိုသည်ကိုပါ မေ့လျော့နေတော့သည်။

သူသိသည်မှာ သူသည် တိုက်ခိုက်နေသည်၊ သူနှင့် အင်အားချင်း တန်းတူညီမျှသော ပြိုင်ဘက်၊ နှိုင်းယှဉ်မဲ့ ပါရမီရှင်တစ်ဦးနှင့် တိုက်ခိုက်နေသည်ဟူသောအချက်ကိုသာ သိတော့သည်။

“ဝုန်း”

တစ်နာရီကြာ အချိန်ကုန်ဆုံးသွားခဲ့ပြီး အဆုံးအစမဲ့သော ကစဉ့်ကလျား ဟင်းလင်းပြင်ကြီးတစ်ခုလုံးတွင် လင်းချန်နှင့် ဘိုးဘေးနဂါးတို့၏ တိုက်ပွဲအကြွင်းအကျန်များမှာ နေရာအနှံ့ ပျံ့နှံ့နေတော့သည်။

ဤတစ်နာရီအတွင်း လင်းချန်နှင့် ဘိုးဘေးနဂါးတို့မှာ တစ်စက္ကန့်မျှပင် ရပ်နားခြင်းမရှိဘဲ အချိန်တိုင်းနီးပါး တိုက်ခိုက်နေခဲ့ကြ၏။ လင်းချန်နှင့် ဘိုးဘေးနဂါးတို့၏ အခြေခံအုတ်မြစ်မှာ အလွန်ပင် ခိုင်မာတောင့်တင်းလှသော်လည်း ယခုအခါ သူတို့၏ အခြေအနေမှာ တဖြည်းဖြည်း ကျဆင်းလာခဲ့ပြီ ဖြစ်သည်။

သို့သော်လည်း လင်းချန်နှင့် ဘိုးဘေးနဂါးတို့၏ တိုက်ပွဲဝင်စိတ်ဓာတ်မှာမူ လျော့ပါးသွားခြင်းမရှိဘဲ အစပိုင်းထက်ပင် ပိုမိုပြင်းထန်လာနေခဲ့သည်။

ထိပ်တိုက်တွေ့မှုတစ်ခုတွင် လင်းချန်၏ ပုံရိပ်မှာ မိုင်ပေါင်းများစွာ နောက်သို့ လွင့်စင်သွားခဲ့ရ၏။ သူ၏ ခန္ဓာကိုယ်ကို ပြန်လည်ထိန်းညှိလိုက်ချိန်တွင် သူ၏မျက်နှာထက်၌ အတိုင်းထက်အလွန် ကျေနပ်အားရနေသည့် အမူအရာများ ဖုံးလွှမ်းနေခဲ့သည်။

သူ၏ ခန္ဓာကိုယ်ပေါ်တွင် လက်သည်းများဖြင့် ဆုတ်ဖြဲခံထားရသည့် ဒဏ်ရာများနှင့် နဂါးအမြီးဖြင့် ရိုက်နှက်ခံထားရသည့် အမှတ်အသားများကို အထင်အရှား မြင်တွေ့နေရကာ သူ၏ပုံစံမှာ အတော်ပင် ဖရိုဖရဲ ဖြစ်နေချေပြီ။

ဤသည်မှာ သူ၏ သမိုင်းတစ်လျှောက်တွင် ပထမဦးဆုံးအကြိမ် အဆင့်တူနယ်ပယ်အတွင်း အားရပါးရ တိုက်ခိုက်ခဲ့ရသည့် တိုက်ပွဲပင် ဖြစ်သည်။ အဆင့်တူ ကျင့်ကြံခြင်းနယ်ပယ်အတွင်း သူ့ကို အားအကုန်သုံး တိုက်ခိုက်စေနိုင်ပြီး အနိုင်ရရှိရန် ခက်ခဲနေစေသည့် ပြိုင်ဘက်မျိုး သူတစ်ခါမျှ မကြုံဖူးခဲ့ပေ။

ယခင်က ရင်ဆိုင်ခဲ့ရသော လွမ်ပင်လျှင် လင်းချန်က အတည်အပေါက် စတင်တိုက်ခိုက်ချိန်၌ပင် ခံနိုင်ရည်မရှိဘဲ ပြိုလဲသွားခဲ့ရသည်။ လက်ရှိတွင်မူ သူသည် အသုံးမပြုရသေးသော အနှိုင်းမဲ့ နှစ်မွှာမျက်လုံး၏ စွမ်းအားမှလွဲ၍ ကျန်ရှိသမျှသော တိုက်ခိုက်ရေးစွမ်းရည်များနှင့် နည်းဗျူဟာအားလုံးကို အသုံးပြုထားပြီး ဖြစ်သည်။

သို့သော်ငြားလည်း သူနှင့် ဘိုးဘေးနဂါးတို့မှာ အင်အားချင်း တန်းတူညီမျှနေဆဲပင်။

အဝေးတစ်နေရာတွင် ဘိုးဘေးနဂါး၏ ကြီးမားလှသော ခန္ဓာကိုယ်ကြီးမှာလည်း နောက်သို့ ဆုတ်ခွာသွားခဲ့ရကာ အနေအထားကို ပြန်လည်ထိန်းညှိရင်း အသံကျယ်ကြီးဖြင့် စတင်ပြောဆိုလိုက်သည်။

“လင်းချန်... မင်းဟာ တကယ်ကို သန်မာတာပဲ။ အလွန်အမင်းကို သန်မာလွန်းတယ်။ ငါ့ရဲ့ ခန္ဓာကိုယ်က အနှိုင်းမဲ့သန်မာပြီး တခြားဘယ်လို ကိုယ်ထည်မျိုးထက်မဆို ပိုပြီး ကြံ့ခိုင်တယ်။

ဒါပေမဲ့ ငါနဲ့ ဒီလောက်အကြာကြီး တိုက်ခိုက်ပြီးတာတောင် မင်းရဲ့ ရုပ်ခန္ဓာက ပြိုလဲမသွားဘဲ ဒဏ်ရာအနည်းငယ်ပဲ ရရှိထားတာကိုကြည့်ရင် မင်းဟာ ငါတွေ့ဖူးသမျှထဲမှာ အသန်မာဆုံး ပါရမီရှင်လို့ ခေါ်ဖို့ ထိုက်တန်တယ်။”

ချွင်းချက်မရှိ ချီးကျူးစကားမှာ အဆုံးမဲ့သော ကစဉ့်ကလျား ဟင်းလင်းပြင်ကြီးတစ်ခုလုံးတွင် ဟိန်းထွက်သွား၏။ ထိုအချိန်တွင် ဘိုးဘေးနဂါး၏ ခန္ဓာကိုယ်ပေါ်မှ နဂါးကြေးခွံအချို့မှာ ကျွတ်ထွက်နေပြီး အသားစများကိုလည်း မြင်တွေ့နေရသည်။

ဘိုးဘေးနဂါးအတွက်မူ သွေးစအနည်းငယ် စိမ့်ထွက်လာခြင်းမျှသာ ဖြစ်သော်လည်း ၎င်းမှာ ကစဉ့်ကလျား ဟင်းလင်းပြင်၏ တစ်စိတ်တစ်ပိုင်းတွင် မြစ်တစ်စင်းကဲ့သို့ စီးဆင်းနေခဲ့သည်။ ထိုအချက်ကို ကြည့်ခြင်းအားဖြင့် ခုနက တိုက်ပွဲအတွင်း ဘိုးဘေးနဂါးပင်လျှင် ဒဏ်ရာရရှိခဲ့ကြောင်း သိသာလှပေသည်။

ထိုစကားကို ကြားလိုက်ရသောအခါ လင်းချန်သည် မမျှော်လင့်ဘဲ ချီးကျူးခံလိုက်ရသဖြင့် အနည်းငယ် ဂုဏ်ယူမိသွားသည်။ မိစ္ဆာအပေါင်းတို့၏ ဘိုးဘေးထံမှ ဤမျှကြီးမားသော ချီးကျူးမှုကို ရရှိခြင်းမှာ သမိုင်းတွင် သူတစ်ဦးတည်းသာ ဖြစ်ပေလိမ့်မည်။ သို့သော် သူသည် မိမိကိုယ်ကိုယ် နှိမ့်ချနေခြင်း မရှိပေ။ ဤချီးကျူးမှုနှင့် သူ လင်းချန်သည် အမှန်တကယ်ပင် ထိုက်တန်လှသည်။

လင်းချန်သည် အသက်ကို ပြင်းပြင်းရှုလိုက်ပြီး ပြုံးလိုက်သည်။

“စီနီယာ ဘိုးဘေးနဂါးရဲ့ ချီးကျူးမှုအတွက် ကျေးဇူးတင်ပါတယ်။ ဒါပေမဲ့ စီနီယာ... နောက်တစ်ဆင့်က ကျုပ်တို့ကြားက... အနိုင်အရှုံးကို ဆုံးဖြတ်ရမည့် အချိန်ရောက်ပြီ။”

ထိုသို့ပြောပြီးသည်နှင့် သူ၏ မျက်ဝန်းအိမ်အတွင်းမှ နှစ်မွှာမျက်ဝန်းများ ပြန်လည်ထွက်ပေါ်လာပြီး ကြောက်မက်ဖွယ်ကောင်းသော စွမ်းအားများကို ထုတ်လွှတ်လိုက်တော့သည်။ ၎င်းမှာ ကြီးမားလှသော ကြယ်တာရာကြီးများ ပေါ်ထွန်းလာပြီး ဤနေရာသို့ ကျဆင်းလာတော့မည့်အလား ထင်မှတ်ရပေတော့သည်။

အခန်း (၄၆) - အစွမ်းကုန်ထုတ်သုံးခြင်း၊ စိတ်ကျေနပ်ဖွယ်တိုက်ပွဲ၊ စီနီယာ... ကျုပ်အကွက်ကို ကြည့်လိုက်...

ထိုခဏတွင် လင်းချန်၏ အရှိန်အဝါသည် သူ၏ အမြင့်ဆုံးအထွတ်အထိပ်သို့ ရုတ်ချည်း မြင့်တက်သွား၏။

လင်းချန်၏ အခြေအနေမှာ အရာအားလုံးကို လွှမ်းခြုံနိုင်လောက်အောင် ပေါက်ကွဲထွက်လာရာ ပတ်ဝန်းကျင်ရှိ အရာခပ်သိမ်းသည်ပင် ဖိအားဒဏ်ကို မခံနိုင်တော့သယောင် ရှိနေခဲ့လေသည်။

လင်းချန်၏ တစ်ဖန်ပြန်၍ ကောင်းကင်သို့ထိုးတက်သွားသော အရှိန်အဝါကို ခံစားမိလိုက်ရာ ဘိုးဘေးနဂါး၏ မျက်လုံးများထဲတွင် ပထမဆုံးအကြိမ်အဖြစ် တည်ကြည်လေးနက်သည့် အရိပ်အယောင်များ ဖြစ်ပေါ်လာခဲ့သည်။

တူညီသော နယ်ပယ်အတွင်းရှိ ရန်သူများနှင့် ရင်ဆိုင်ရချိန်တွင် သူ၏ စိတ်အခြေအနေမှာ အထွတ်အထိပ်သို့ ရောက်ရှိနေခဲ့ပြီ ဖြစ်သည်။ သို့သော် ယခုအခါ ထိုအထွတ်အထိပ်သည် ပို၍ပင် မြင့်တက်သွားကာ တည်ကြည်လေးနက်မှုမှသည်... စစ်မှန်သော “ထိတ်လန့်ကြောက်ရွံ့မှု” အဖြစ်သို့ ပြောင်းလဲသွားခဲ့ပြီ ဖြစ်သည်။

တိုက်ပွဲသည် ဤအဆင့်သို့ ရောက်ရှိလာသော်လည်း လင်းချန်တွင် ဝှက်ဖဲတစ်ခု ကျန်ရှိနေသေးလိမ့်မည်ဟု သူ မထင်မှတ်ထားခဲ့ပေ။ သူကိုယ်တိုင်မှာမူ ခုနကပင် သူ၏ အစွမ်းကုန်ကို ထုတ်သုံးထားခဲ့ပြီး ဖြစ်သည်။

သူသည် လင်းချန်နှင့် အကြိတ်အနယ် ဖြစ်စေရန်အတွက်သာ သူ၏ စွမ်းအားအပြည့်နှင့် ကျွမ်းကျင်မှုအားလုံးကို အသုံးပြုခဲ့ရခြင်း ဖြစ်သည်။ ယခုအခါ လင်းချန်က နောက်ထပ် ဝှက်ဖဲတစ်ခုကို ထုတ်ပြလိုက်ပြီဆိုလျှင် လင်းချန်၏ စုစုပေါင်း အင်အားသည် သူ၏ အင်အားထက် ပို၍ ကြီးမားသွားပြီဟု မဆိုလိုနိုင်ပါသလော။

ဤအခိုက်အတန့်တွင် ဘိုးဘေးနဂါးသည် လင်းချန်အား အင်အားကြီးသော ရန်သူတစ်ဦးအဖြစ် အမှန်တကယ်ပင် အသိအမှတ်ပြုလိုက်ရတော့သည်။

ယခင်က သူသည် လင်းချန်အား ရင်ဘောင်တန်းနိုင်သော ပြိုင်ဘက်တစ်ဦးဟုသာ သတ်မှတ်ခဲ့ပြီး ထိုပြိုင်ဘက်အား သူ မယှဉ်နိုင်တော့မည့် အခြေအနေမျိုး ရောက်လာလိမ့်မည်ဟု တစ်ခါမျှ မတွေးတောခဲ့ဖူးပေ။

သူ၏ စိတ်ကို တည်ငြိမ်အောင် ထိန်းလိုက်ပြီးနောက် ဘိုးဘေးနဂါး၏ ခန့်ညားထည်ဝါသော အသံသည် အဆုံးမဲ့သော ဖရိုဖရဲနယ်မြေတစ်ခွင် ဟိန်းထွက်သွားတော့သည်။

“လင်းချန်... မင်းမှာ နောက်ထပ် လှည့်ကွက်တစ်ခု ရှိနေဦးမယ်လို့ ငါ တကယ်ကို မမျှော်လင့်ထားခဲ့ဘူး။ မင်းက တခြားသူတွေကို အံ့အားသင့်အောင် လုပ်တဲ့နေရာမှာ တကယ် ကျွမ်းကျင်တာပဲ။”

လင်းချန်သည် ကောင်းကင်သတ်ဓားကို တင်းတင်းဆုပ်ကိုင်ကာ အပြုံးဖျော့ဖျော့ တစ်ခုကို ပြသလိုက်၏။

“စီနီယာ ဘိုးဘေးနဂါး...ဒါက အံ့အားသင့်စရာ မဟုတ်ပါဘူး။ တိုက်ပွဲမစခင်ကတည်းက ကျုပ် ပြောခဲ့ပြီးသားပါ။

ဒီတစ်ခါ စီနီယာ့ကို စိန်ခေါ်တာက စီနီယာ့ရဲ့ ပျော်ရွှင်မှုအတွက်တင် မဟုတ်ဘူး... အဓိကက စီနီယာ့ကို အနိုင်ယူဖို့ပဲ။

စီနီယာ... ကျုပ်ရဲ့ ဒီတစ်ကွက်ကို ကြည့်လိုက်ပါ...။”

ဝုန်း

“အသင်္ချေကမ္ဘာများ၏ အနိမ့်အမြင့်...။”

သူ၏ ထူးကဲသော မျက်လုံးအစုံ အတွင်းရှိ ကြယ်တာရာကြီးများသည် စိတ်ကူးယဉ်ပုံရိပ်များ မဟုတ်တော့ဘဲ အစစ်အမှန် ဒြပ်ထုများအဖြစ် ပေါ်ပေါက်လာတော့သည်။

ဘုန်း...ဘုန်း...ဘုန်း

ဘိုးဘေးနဂါး၏ ခန္ဓာကိုယ်နီးပါး ကြီးမားသော ကြယ်တာရာများသည် အရှိန်အဟုန်ဖြင့် ကျဆင်းလာကာ ဘိုးဘေးနဂါးအား အသေအချာ ပစ်မှတ်ထား ပိတ်ဆို့လိုက်တော့သည်။

တစ်ချိန်တည်းမှာပင် လင်းချန်သည် သူ၏ ညာဘက်လက်ရှိ ကောင်းကင်သတ်ဓားကို ဝှေ့ယမ်းကာ သူအသုံးပြုနိုင်သမျှ အင်အားအကောင်းဆုံး တိုက်ကွက်ကို ထုတ်ဖော်လိုက်၏။

“ကမ္ဘာဦးဖရိုဖရဲ ဓားကိုးချက်- ပဉ္စမဓားချက်”

စွမ်းအားကြီးမားသော နတ်ဘုရားစွမ်းရည်ကို အသုံးပြုနိုင်ရန်အတွက် ဝိညာဉ်အင်အား အထောက်အပံ့သာမက သန်မာသော ရုပ်ခန္ဓာလည်း လိုအပ်ပေသည်။

လက်ရှိတွင် လင်းချန်၏ ရုပ်ခန္ဓာနှင့် ဝိညာဉ်အင်အားတို့သည် ဤ ပဉ္စမမြောက် ဓားချက်ကိုသာ ထိန်းညှိ ထုတ်ဖော်နိုင်စွမ်း ရှိသေးသည်။

အမျိုးမျိုးသော အမှန်တရားစွမ်းအားများ ပေါင်းစပ်ထားသည့် နက်နဲသော အနှစ်သာရနှင့် ပေါင်းစပ်လိုက်သောအခါ ဤတိုက်ကွက်တစ်ခုတည်း၏ စွမ်းအားသည် ကောင်းကင်နှင့် မြေကြီးကိုပင် ဖျက်ဆီးပစ်ရန် လုံလောက်နေပြီ ဖြစ်သည်။

ထိုမျှမကသေးဘဲ သူ၏ အားလပ်နေသော ဘယ်ဘက်လက်သည်လည်း အငြိမ်မနေပေ။ ကောင်းကင်သတ်ဓားက ခုတ်ပိုင်းချလိုက်ချိန်မှာပင် ကြယ်တာရာများ၏ ပိတ်ဆို့ခြင်းကို ခံထားရသော ဘိုးဘေးနဂါးထံသို့ သူ၏ လက်သီးကိုပါ ပစ်သွင်းလိုက်တော့သည်။

“ဖရိုဖရဲ လက်သီး...။”

ဘုန်း

ဤအခိုက်အတန့်တွင် လင်းချန်သည် သူ၏ ဘဝတွင် အစွမ်းထက်ဆုံးသော နတ်ဘုရားစွမ်းရည် သုံးခုကို တစ်ပြိုင်နက်တည်း ထုတ်ဖော်လိုက်ခြင်း ဖြစ်သည်။

ထိုစွမ်းရည် သုံးခုအတွင်း ပါရှိသည့် ကြီးမားလှသော အင်အားကို ခံစားမိလိုက်ချိန်တွင် ဘိုးဘေးနဂါး၏ ဧရာမခန္ဓာကိုယ်ကြီးမှာ ရုတ်ချည်း တင်းမာသွားတော့သည်။

ထိုစွမ်းရည် သုံးခုအနက် မည်သည့်အရာကိုမျှ လျစ်လျူရှု၍ မရနိုင်ကြောင်း သူ သိရှိလိုက်သည်။ မည်သည့် တိုက်ကွက်တစ်ခုကိုမဆို ခုခံမှုမရှိဘဲ တိုက်ရိုက်ထိမှန်ခံရပါက ပြင်းထန်သော ဒဏ်ရာကို ရရှိစေမည် ဖြစ်သည်။

သူသည် ထိုစွမ်းရည် သုံးခုစလုံးကို တစ်ပြိုင်နက်တည်း တားဆီးနိုင်မှသာ ဖြစ်မည်။ သို့မဟုတ်ပါက... သူ သေရပေလိမ့်မည်။

မိမိ၏ အသက်အန္တရာယ်ကို ခြိမ်းခြောက်ခံနေရသည့် ဤခံစားချက်မှာ ဘိုးဘေးနဂါးအတွက် အလွန်ပင် ထူးဆန်းဆန်းသစ်နေတော့သည်။

ပြန်စဉ်းစားကြည့်လျှင် သူသည် တစ်သက်တာတွင် ဤကဲ့သို့သော ခံစားချက်မျိုးကို တစ်ခါမျှ မကြုံတွေ့ခဲ့ရဖူးပေ။

အဆုံးမဲ့သော ဖရိုဖရဲနယ်မြေအတွင်း မွေးဖွားလာကတည်းက သူသည် အမြဲတမ်း အနှိုင်းမဲ့ အစွမ်းထက်ခဲ့သူ ဖြစ်သည်။ တူညီသော နယ်ပယ်တွင်ဖြစ်စေ၊ နယ်ပယ်အကျော်တွင်ဖြစ်စေ သူသည် ငြင်းဆို၍မရသော အင်အားအကြီးဆုံး ပုဂ္ဂိုလ်ဖြစ်ခဲ့သည်။

သို့သော် ယခုအခါ တူညီသော နယ်ပယ်အတွင်းရှိ ကျင့်ကြံသူတစ်ဦးနှင့် ရင်ဆိုင်ရချိန်တွင် သူသည် ယခင်က တစ်ခါမျှ မခံစားဖူးသည့် ကြီးမားလှသော ခြိမ်းခြောက်မှုကို ခံစားနေရ၏...။ ၎င်းမှာ သေခြင်းတရား၏ ခြိမ်းခြောက်မှုပင် ဖြစ်သည်။

အသက်အန္တရာယ်အပေါ် ပြင်းထန်သော ခြိမ်းခြောက်မှုအောက်တွင် ဘိုးဘေးနဂါး၏ စိတ်လှုပ်ရှားမှုများသည် ပိုမိုမြင့်တက်လာပြီး ရူးသွပ်မှုအဆင့်သို့ပင် ရောက်ရှိလုနီးပါး ဖြစ်လာခဲ့လေသည်။

“ဟားဟားဟား...ကောင်းတယ်။ တကယ် ကောင်းတယ်။ ဒါက ငါ တစ်ခါမှ မရဖူးတဲ့ ခံစားချက်ပဲ။ ဒီလို ခံစားချက်မျိုးက တကယ်ကို... စကားလုံးတွေနဲ့ ဖော်ပြလို့မရအောင် အံ့သြဖို့ကောင်းတာပဲ။”

အဆုံးမဲ့သော သန့်စင်သည့် ဖရိုဖရဲစွမ်းအားများသည် ဘိုးဘေးနဂါး၏ ခန္ဓာကိုယ်အတွင်းမှ ပေါက်ကွဲထွက်လာပြီး ပတ်ဝန်းကျင်ရှိ အရာအားလုံးကို ဖုံးလွှမ်းသွားတော့သည်။

ဤဖရိုဖရဲစွမ်းအားမှာ ဘိုးဘေးနဂါး၏ အသန့်စင်ဆုံးသော စွမ်းအားဖြစ်ပြီး သူ၏ ခွန်အား၏ အခြေခံအုတ်မြစ်လည်း ဖြစ်သည်။

သာမန်တိုက်ပွဲများတွင်မူ သူသည် ဤဖရိုဖရဲစွမ်းအားမှတစ်ဆင့် ရိုးရိုးဖရိုဖရဲစွမ်းအင်များကို ထုတ်ယူသုံးစွဲလေ့ရှိသည်။

သို့သော် ယခုမူ သူသည် ဤမူလဖရိုဖရဲစွမ်းအားကို တိုက်ရိုက်ပင် လှုပ်နှိုးလိုက်ပြီ ဖြစ်သည်။

လင်းချန်က သူ၏ အစွမ်းကုန်ကို ထုတ်သုံးနေသည်ဖြစ်ရာ သူသည်လည်း ဤမကြုံစဖူးသော တိုက်ပွဲကြီးကို ပြီးပြည့်စုံခြင်းသို့ ရောက်ရှိစေရန် အရာအားလုံးကို ပုံအောထုတ်သုံးတော့မည် ဖြစ်သည်။

ဝုန်း

ဘုန်း ဘုန်း ဘုန်း

...

အဆုံးမဲ့သော သန့်စင်သည့် ဖရိုဖရဲစွမ်းအားများနှင့် နတ်ဘုရားစွမ်းရည် သုံးခုတို့ ထိပ်တိုက်တွေ့ဆုံမှုကြောင့် ကမ္ဘာသစ်တစ်ခုကို ဖန်တီးလိုက်သည့်အလား ကျယ်လောင်လှသော အသံကြီးများ စဉ်ဆက်မပြတ် ထွက်ပေါ်လာတော့သည်။

ထိတ်လန့်ဖွယ်ရာ နောက်ဆက်တွဲ ရိုက်ခတ်မှုလှိုင်းများသည် မိုင်ပေါင်းသောင်းချီ၍ ပျံ့နှံ့သွားပြီး ထိုအကွာအဝေးအတွင်းရှိ အရာအားလုံးကို လုံးဝဥဿုံ ဖျက်ဆီးပစ်လိုက်သည်။

လင်းချန်နှင့် ဘိုးဘေးနဂါးတို့၏ ပုံရိပ်များသည် ထိပ်တိုက်တွေ့ဆုံမှုကြောင့် ပေါ်ပေါက်လာသည့် ငွေမီးခိုးရောင် စွမ်းအင်လှိုင်းများအတွင်း ပျောက်ကွယ်သွားပြီး သူတို့၏ အခြေအနေကို မသိရှိနိုင်တော့ပေ။

နတ်ဘုရားမျှော်စင်၏ အပြင်ဘက်တွင်မူ...

မိစ္ဆာအဆင့် ပါရမီရှင်များ အားလုံးသည် တံတွေးများကို အနိုင်နိုင် မျိုချနေကြရပြီး ကောင်းကင်ယံရှိ အလင်းမျက်နှာပြင်ကို မျက်တောင်မခတ်တမ်း ကြည့်ရှုကာ ရလဒ်ကို စောင့်ဆိုင်းနေခဲ့ကြသည်။

စောစောက တိုက်ပွဲကြီးမှာ သူတို့အား အသက်ရှူရန်ပင် အချိန်မပေးခဲ့ဘဲ သူတို့ကိုယ်တိုင်လည်း အသက်ရှူရန်ပင် မေ့လျော့နေခဲ့ကြသည်။

ရင်ခုန်စိတ်လှုပ်ရှားစရာ ကောင်းလှ၏။

သူတို့ကိုယ်တိုင် တိုက်ခိုက်နေခြင်း မဟုတ်သော်လည်း အလွန်တရာ ရင်ခုန်စိတ်လှုပ်ရှားစရာ ကောင်းသည်ဟု ခံစားနေကြရသည်။

ဤသို့သော တိုက်ပွဲမျိုးမှသာ စစ်မှန်သော စိတ်ကျေနပ်ဖွယ် တိုက်ပွဲဟု ခေါ်ဆိုနိုင်ပေလိမ့်မည်။

ထိုက်တန်သော ပြိုင်ဘက်နှစ်ဦးသည် တာအိုပြည်တယ်သုံးထောင်ရှိ သက်ရှိအပေါင်းတို့၏ ရှေ့မှောက်တွင် ခေတ်ကာလများကို ဖြတ်ကျော်ကာ ဤတိုက်ပွဲကြီးကို ဆင်နွှဲခဲ့ကြခြင်း ဖြစ်သည်။

ပါရမီရှင် အဆင့်သတ်မှတ်ချက်၏ ထိပ်တန်းဆယ်ဦးတွင် ပါဝင်သော ယန်လျိုရှား၊ လင်းရှန်ဟဲ၊ လင်းထင်ထောင်း၊ အောက်ထျန်းကျွင်းနှင့် အခြားသော ပါရမီရှင်များ၏ မျက်နှာတွင် အံ့သြကြည်ညိုမှုများဖြင့်သာ ပြည့်နှက်နေခဲ့သည်။

သူတို့သည် လင်းချန်ကို နောက်ကျော်တက်ရန် သို့မဟုတ် စိန်ခေါ်ရန် စိတ်ကူးများကို လုံးဝလက်မလျှော့သေးသည့်တိုင်အောင်...

ယခုအချိန်တွင်မူ လင်းချန်အပေါ် နက်ရှိုင်းသော ကြောက်ရွံ့လေးစားမှုကိုသာ ခံစားနေကြရသည်။

ဤကဲ့သို့သော ပုဂ္ဂိုလ်မျိုးသည် စစ်မှန်သော ကောင်းကင်ကို ဆန့်ကျင်သည့် ပါရမီရှင်ပင် ဖြစ်သည်။

ရှေးယခင်ခေတ်များမှစ၍ ယနေ့တိုင် တစ်ခါမျှ မတွေ့ဖူးသည့် အနှိုင်းမဲ့ ပါရမီရှင်...။

ဤပါရမီရှင်များသာမက တာအိုပြည်နယ်သုံးထောင်တစ်ခွင်ရှိ မရေမတွက်နိုင်သော အဖွဲ့အစည်းများမှ ကျွမ်းကျင်သူများသည်လည်း ချီးကျူးအံ့သြမှုများဖြင့် ပြည့်နှက်နေကြသည်။

သူသည် ဘိုးဘေးနဂါးကို ဤအဆင့်အထိ ယှဉ်ပြိုင်နိုင်ရုံတင်မကဘဲ အဆုံးသတ်တွင် အသာစီးပင် ရယူနိုင်ခဲ့သည့်အလား ရှိနေ၏။

ဤသည်မှာ ကပ်ဘေးကိုးခုနယ်ပယ် အဆင့်ရှိ တိုက်ပွဲသာ ဖြစ်သော်လည်း ပေါက်ကွဲထွက်လာသည့် စွမ်းအားမှာမူ ကောင်းကင် တက်လှမ်းခြင်း နယ်ပယ်ရှိ မည်သည့်တိုက်ပွဲထက်မဆို ပိုမိုပြင်းထန်လှပေသည်။

ဤတိုက်ပွဲသည် သူတို့အတွက် အမှန်တကယ်ပင် မျက်စိပွင့်စေခဲ့ပြီဖြစ်သည်။

မိစ္ဆာသားရဲနတ်ဘုရားနယ်မြေတွင်မူ သင်္ချိုင်းကဲ့သို့ တိတ်ဆိတ်လျက်ရှိနေ၏။

မရေမတွက်နိုင်သော မိစ္ဆာသားရဲမျိုးနွယ် ကျွမ်းကျင်သူများသည် ကြောင်တောင်တောင် အမူအရာများဖြင့် ရှိနေကြတော့သည်။

ခုနကဖြစ်ပွားခဲ့သော တိုက်ပွဲကြီးမှာ သူတို့အား အချိန်အတော်ကြာသည်အထိ စိတ်မလေနိုင်အောင် မှင်သက်သွားစေခဲ့သည်။

တူညီသောနယ်ပယ်တွင် အနှိုင်းမဲ့အင်အားကြီးမားလှသည့် အရှင်ဘိုးဘေးနဂါးသည် လင်းချန်နှင့် သရေကျသည်အထိ တိုက်ခိုက်ခဲ့ရသည် မဟုတ်ပါလော။

နောက်ဆုံးအချိန်၌ သူသည် သူ၏မူလစွမ်းအားကိုပင် အကုန်အစင် ထုတ်သုံးခဲ့ရသေးသည်။

ဤတစ်ကြိမ်တွင်မူ သူတို့၏ မိစ္ဆာသားရဲမျိုးနွယ်စုမှ အထွတ်အထိပ်ဖြစ်သော အရှင်ဘိုးဘေးနဂါးကြီး... တကယ်ပဲ ရှုံးနိမ့်သွားတော့မှာလား။