အခန်း (၂၄၂၇-၂၄၂၈)

အပိုင်း(၂၄၂၇)

"သေးသိမ်တဲ့ သောက်ကောင်မ..."

တောက်ပသော ကြယ်နန်းတော်သခင် က တိုးညင်းစွာ ကျိန်ဆဲလိုက်၏။ သူ၏ စကားလုံးများကို ပဲ့တင်ထပ် ချီစွမ်းအင် များဖြင့် ပြင်းထန်စွာ ဖုံးကွယ်ထားသောကြောင့် ဝေ့ဝူယင် မှလွဲ၍ မည်သူမျှ ကြားနိုင်မည် သို့မဟုတ် သိရှိနိုင်မည် မဟုတ်ပေ။ မကောင်းဆိုးဝါး ဖျက်ဆီးခြင်း အရှင်သခင် ဤအကြောင်း သိသွားစေရန် သူ မစွန့်စားဝံ့ခဲ့ပေ။

ဝေ့ဝူယင် က သဘောကျစွာ ရယ်မောလိုက်၏။ ထို့နောက် သူ၏ အကြည့်များသည် မကောင်းဆိုးဝါး ဖျက်ဆီးခြင်း အရှင်သခင် ရှိရာ အရပ်ဆီသို့ ရွေ့လျားသွားလေသည်။ ကောင်းကင်ဘုံနတ်မျက်လုံးများ သည် မရေမတွက်နိုင်သော ကန့်လန့်ကာများကို ထိုးဖောက်သွားပြီး ဆိုဖာနှင့်တူသော ပလ္လင်တစ်ခုပေါ်တွင် ပျင်းရိလေးတွဲစွာ ထိုင်နေသော သူမကို ရှာတွေ့သွားခဲ့၏။ သူမ၏ ဘေးတွင် လုံးဝ ဝတ်လစ်စလစ် ဖြစ်နေသော လှပသည့် အမျိုးသမီး နှစ်ဦး ရှိနေပြီး သူမကို စပျစ်သီးများ ခွံ့ကျွေးကာ သူမ၏ ခြေကျင်းဝတ်များကို ဆီများဖြင့် နှိပ်နယ်ပေးနေကြလေသည်။

သူမ ကိုယ်တိုင်လည်း လုံးဝ ဝတ်လစ်စလစ် ဖြစ်နေပြီး သူမ မွေးဖွားလာစဉ်က အခြေအနေ အတိုင်းပင် ဖြစ်၏။ သူမ၏ အောက်နှုတ်ခမ်း အရောင်ဖြစ်စေ၊ သူမ၏ ခန္ဓာကိုယ် ကောက်ကြောင်းများ ဖြစ်စေ၊ သို့မဟုတ် သူမ၏ ချက်ကလေးက အတွင်းဝင်နေသလား အပြင်ထွက်နေသလား ဆိုသည်ဖြစ်စေ စိတ်ကူးယဉ်စရာ မကျန်အောင် အားလုံး ပေါ်လွင်နေပေသည်။ သူမ၏ ချက်ကလေးမှာ အတွင်းဝင်နေလေသည်။

မကောင်းဆိုးဝါး ဖျက်ဆီးခြင်း အရှင်သခင်က မျက်မှောင်ကြုတ်လိုက်၏။ တစ်စုံတစ်ယောက်က ကြည့်နေသကဲ့သို့ သူမ ခံစားလိုက်ရသည်။ သို့သော် သူမ၏ ဖုံးကွယ်ခြင်း အစီအရင်များနှင့် ဝင်္ကပါများက မည်သည့် ဝိညာဉ်အမြင် ကိုမဆို တားဆီးနိုင်ပြီး၊ အကယ်၍ မတားဆီးနိုင်လျှင်ပင် အမြင် အာရုံ ကျူးကျော်ဝင်ရောက်လာမှုကို သူမ ချက်ချင်း သတိပြုမိမည် ဖြစ်လေသည်။

ဝေ့ဝူယင် ၏ အသံသည် ဟင်းလင်းပြင် ကို ဖြတ်သန်းကာ သူမ၏ သင်္ဘောအတွင်း ရုတ်တရက် ပဲ့တင်ထပ်သွား၏။

"ခင်ဗျားရဲ့ သေးသိမ်တဲ့ ဒေါသတကြီး တိုက်ခိုက်မှုကြောင့် ကျွန်တော့်ရဲ့ လက်သန်း လက်သည်းခွံလေးမှာ အစင်းရာလေး တစ်ခု ထင်သွားပြီး စိတ်ပိုင်းဆိုင်ရာ ထိခိုက်မှု နည်းနည်း ရသွားတယ်... ကျွန်တော် လျော်ကြေး တောင်းချင်တယ်... လျှို့ဝှက်ကောင်းကင် အမတေ ကျောက်တုံး တစ်တုံးတည်း ဆိုရင် လုံလောက်ပါတယ်... ကျွန်တော် အချိန် စက္ကန့် သုံးဆယ် ပေးမယ်... မဟုတ်ရင် အဆတစ်ရာ တိုးသွားလိမ့်မယ်... နောက်တစ်ခါ ဒီလောက် သေးသိမ်တဲ့ အလုပ်မျိုး မလုပ်ပါနဲ့..."

"..."

ချက်ချင်းဆိုသလိုပင် မကောင်းဆိုးဝါး ဖျက်ဆီးခြင်း အရှင်သခင် သည် မတ်တတ်ရပ်လိုက်၏။ သူမ၏ ခန္ဓာကိုယ်ပေါ်တွင် အဝတ်အစားများ အလိုအလျောက် ပေါ်လာ၏။

"ဪ... ပြီးတော့ ခင်ဗျားဆီမှာ ကမ္ဘာတည်သရွေ့ အံ့မခန်း ဖြစ်လောက်မယ့် မယုံနိုင်စရာကောင်းအောင် လှပတဲ့ ခန္ဓာကိုယ်လေး ရှိတာပဲ... နှမြောစရာကြီး..."

ဝေ့ဝူယင် က ထွက်မသွားမီ မှတ်ချက်ချလိုက်၏။ သူမ၏ မျက်လုံးများက အဆုံးစွန်ထိ ပြူးကျယ်သွားလေသည်။

တောက်ပသော ကြယ်နန်းတော်၏ ဟင်းလင်းပြင် သင်္ဘော ဖြစ်သော ကြယ်တာရာ တောက်ပခြင်း ထဲတွင်မူ နန်းတော်သခင် နှင့် ဒုတိယ နန်းတော်သခင် တို့၏ ပါးစပ်များမှာ အံ့ဩမှုကြောင့် ဟောင်းလောင်းပွင့်နေခဲ့၏။ ဝေ့ဝူယင် သည် ထိုစကားများကို အသံထွက်၍ ပြောဆိုခဲ့ပြီး သူက ၎င်းတို့ကို ဟင်းလင်းပြင် ဝိညာဉ်ကျင့်စဉ် တစ်ခုခုမှတစ်ဆင့် ပေးပို့လိုက်ကြောင်း သူတို့ သိနိုင်လေသည်။

ကျိုးယီရင် သည် အလွန်အမင်း အံ့အားသင့်သွားသဖြင့် ပြူးကျယ်နေသော မျက်လုံးများ၊ ပြင်းထန်စွာ ခုန်ပေါက်နေသော နှလုံးသားတို့နှင့်အတူ ဝေ့ဝူယင်၏ ခါးဖက်ထားမှု အောက်တွင် ထိုနေရာ၌ပင် ရပ်နေမိလေသည်။

"ခင်... ခင်ဗျား..."

တောက်ပသော ကြယ်နန်းတော်သခင် သည် အပြောအဆို ဆွံ့အသွားခဲ့၏။

"စောင့်ကြည့်နေလိုက်..."

ဝေ့ဝူယင်၏ နှုတ်ခမ်းများက သေးငယ်သော အပြုံးတစ်ခုအဖြစ် ကွေးတက်သွား၏။

မကြာမီ စက္ကန့်များစွာ ကုန်လွန်သွားလေသည်။

ထို့နောက် နှစ်ဆယ့်ရှစ်စက္ကန့် အကြာတွင် ကောင်းကင် အလင်းတန်း ဥက္ကာပျံ တစ်ခုသည် ထိုးဖောက်ဝင်ရောက်လာပြီး ကြယ်တာရာ တောက်ပခြင်း ၏ အကာအကွယ် နယ်နိမိတ်သို့ ရောက်ရှိလာ၏။ ၎င်းက အကာအကွယ် အလွှာကို ညင်သာစွာ လာရောက် တိုက်ခတ်လေသည်။

"ကပ်သီးလေးပဲ..."

ဝေ့ဝူယင် က သူ၏ လက်ကို ဝှေ့ယမ်းကာ လျှို့ဝှက်ကောင်းကင် အမတေ ကျောက်တုံး ကို သိမ်းဆည်းလိုက်ရင်း လျှာသပ်ကာ မှတ်ချက်ချလိုက်၏။

"အဲဒီ ကောင်မလေးကို အချိန် နည်းနည်းပဲ ပေးခဲ့သင့်တာ..."

"..."

တောက်ပသော ကြယ်နန်းတော်သခင် ။

"..."

ကျိုးယီရင် ။

"..."

သင်္ဘောသားများ ။

သင်္ဘောဦးခန်း တစ်ခုလုံး၌ လက်ဆုပ်လက်ကိုင်ပြနိုင်လောက်သည့် တိတ်ဆိတ်မှုကြီးက လွှမ်းခြုံသွားလေသည်။ သူတို့သည် ဤသူစိမ်း… မဟုတ်သေး... မကြာသေးမီကမှ ဌာနေသား အဖြစ် လက်ခံထားသော ဤကောင်းကင် ရှန့်ထို အဂ္ဂိရတ်ပညာရှင်သည် တစ်စုံတစ်ယောက်ထံမှ လျှို့ဝှက်ကောင်းကင် အမတေကျောက်တုံးတစ်တုံးကို အတင်းအကျပ် တောင်းယူနေခြင်းလော။

သင်္ဘောသားများသည် ဤအထွတ်အထိပ် တည်ရှိမှုများ၏ ဆွေးနွေးပြောဆိုမှုများကို ကြားနာနိုင်ရန် အခွင့်အာဏာရှိသူများ သို့မဟုတ် စွမ်းအားပြည့်ဝသူများ မဟုတ်ကြပေ။

ထို့ကြောင့် သူတို့သည် မိမိတို့၏ နန်းတော်သခင်မှ ဖြေရှင်းပေးခဲ့သော ရုတ်တရက်ပေါ်ပေါက်လာသည့် အာကာသ မုန်တိုင်းနှင့် ကြုံတွေ့ရခြင်းမှလွဲ၍ အပြင်ဘက်တွင် မည်သို့ဖြစ်ပျက်ခဲ့သည်ဆိုသည့် အသေးစိတ် အချက်အလက်များကို မသိရှိခဲ့ကြချေ။

သို့သော်ငြားလည်း... သူတို့အားလုံးသည် မကောင်းဆိုးဝါး ဖျက်ဆီးခြင်း အရှင်သခင်ထံသို့ ပြောဆိုလိုက်သော ဝေ့ဝူယင်၏ စကားလုံးတိုင်းကိုမူ ရှင်းလင်းပြတ်သားစွာ ကြားနာခွင့် ရရှိခဲ့ကြသည်။

သူ၏ လက်သန်းမှ လက်သည်းခွံလေးတွင် အစင်းကြောင်းလေး ထင်သွားသည် ဆိုသည့် ရယ်စရာကောင်းသော အကြောင်းပြချက်ဖြင့် လျော်ကြေးတောင်းခံခြင်းပဲ ဖြစ်ဖြစ်၊ တရားခံ၏ ခန္ဓာကိုယ်နှင့် ပတ်သက်ပြီး ရိုင်းပျစွာ တိုက်ရိုက် ဝေဖန်ပြောဆိုခြင်းပဲ ဖြစ်ဖြစ်... အားလုံးပို သူတို့ ကြားလိုက်ရသည်။

ထိုသူကား မည်သူနည်းဟု မေးမြန်းချင်စိတ်များက သူတို့ကို လွှမ်းမိုးနေခဲ့သည်။ သို့သော်လည်း အထွတ်အထိပ် တည်ရှိမှုများသည် မတူညီသော တည်ရှိမှုအဆင့်တစ်ခု၌ ရှိနေကြောင်း သူတို့ ကောင်းစွာ သိရှိထားကြသည်။ ထို့ကြောင့် ခန့်မှန်း၍မရနိုင်သော အကျိုးဆက်များကို ကြောက်ရွံ့၍ ထိုကိစ္စများကို ရင်ထဲတွင်သာ သိမ်းဆည်းထားခြင်းက အကောင်းဆုံးဖြစ်ကြောင်း နားလည်ထားကြလေသည်။

ဝေ့ဝူယင်သည် ထိုအမတေကျောက်တုံးကို လက်ထဲတွင် ကိုင်ဆောင်ထားလေသည်။ ထို့နောက် ကောင်းကင်ဘုံ၏ ရောင်ခြည်များကဲ့သို့ တောက်ပနေသော လှပသည့် အရောင်အဝါကို ငေးမောကြည့်ရှုနေခဲ့၏။

"အာ...."

ကျိုးယီရင်၏ မျက်လုံးများသည် အံ့သြမှု၊ ပြိုင်ဘက်ကင်းသော တန်ဖိုးထားမှုတို့ဖြင့် တောက်ပနေခဲ့လေ၏။ လျှို့ဝှက်ကောင်းကင် အမတေကျောက်တုံး၏ အလှတရားသည် သူမ၏ အမြင်အာရုံနှင့် ခံစားမှုများတွင် ပြိုင်ဘက်ကင်းနေလေသည်။ ပြင်းပြသော တောင့်တမှုတစ်ခုက သူမ၏ နှလုံးသားကို ရိုက်ခတ်သွားခဲ့သည်။ ထို့ကြောင့် သူမ၏ နူးညံ့သော ခါးလေးကို ဖက်ထားသည့် အမျိုးသားတစ်ဦး၏ ခိုင်မာသော လက်မောင်းများကိုပင် မေ့လျော့သွားခဲ့လေသည်။

တောက်ပသောကြယ် နန်းတော်ရှိ ဒုတိယ နန်းတော်သခင် နှစ်ဦးထဲမှ တစ်ဦးဖြစ်လင့်ကစား သူမ၏ နှစ်တစ်ထောင်စာ လစာသည် လျှို့ဝှက်လောက အမတေကျောက်တုံး သုံးသန်းခန့်သာ ရှိလေသည်။ တစ်နှစ်လျှင် လျှို့ဝှက်လောက အမတေကျောက်တုံး သုံးသောင်းခန့်သာ ရရှိခြင်းဖြစ်သည်။ သူမ၏ ကြိုးစားအားထုတ်မှုများ၊ အရောင်းအဝယ်များနှင့် ရင်းနှီးမြှုပ်နှံမှု အားလုံးမှ ရရှိသော အကျိုးအမြတ်များသည်ပင် ထိုကျောက်တုံးတစ်တုံး၏ တန်ဖိုးကို မမီနိုင်သေးချေ။

အစွမ်းကုန် သန့်စင်ခြင်း ဂလက်ဆီ၏ ကြီးကျယ်ခမ်းနားသော ဘဏ္ဍာရေး စီးပွားရေးလောကတွင် ၎င်း၏ တန်ဖိုးကို လျှော့တွက်၍ မရနိုင်ပေ။

ထိပ်တန်း စီးပွားရေး အဖွဲ့အစည်း လေးခုပါဝင်သော လျှို့ဝှက် ကစားပွဲများတွင် လျှို့ဝှက်ကောင်းကင် အမတေကျောက်တုံး ရာနှင့်ချီ၍ လောင်းကြေးထပ်လေ့ရှိကြသော်လည်း ယင်းမှာ အလွန် ချဲ့ကားထားသော အခြေအနေမျိုးသာ ဖြစ်သည်။

ဤမျှ ကြီးမားလှသော ဓနဥစ္စာများကို လွတ်လပ်စွာ ဖလှယ်ခြင်း သို့မဟုတ် ကစားပွဲတစ်ခုအတွက် လောင်းကြေးအဖြစ် အသုံးပြုခြင်းမျိုးကား အလွန် ရှားပါးလှသည်။

အကယ်၍ ဝေ့ဝူယင်၏ ပါဝင်ပတ်သက်မှု၊ လျှို့ဝှက် စာချုပ်များနှင့် ဤအဖွဲ့အစည်းများ၏ ဂုဏ်သိက္ခာတို့သာ မပါဝင်ခဲ့ပါက သူတို့သည် ဤမျှလောက်များပြားသော လောင်းကြေးကို လုံးဝ (လုံးဝ) ထပ်မည်မဟုတ်ချေ။

ဝေ့ဝူယင်၏ လက်ထဲရှိ ကောင်းကင် အမတေ ကျောက်တုံးသည် ကျိုးယီရင်၏ အမြင်အာရုံထဲ၌ ပို၍ ကြီးမားလာသယောင် ရှိနေ၏။ သူမ၏ လှပသော မျက်နှာသွင်ပြင်ကို ကောင်းကင်ဘုံ၏ အလင်းရောင်များဖြင့် ခြယ်မှုန်းပေးနေသလို ခံစားရသဖြင့် မိန်းကလေးမှာ တံတွေးပင်မြိုချလိုက်မိသည်။

လျှို့ဝှက်ကောင်းကင် အမတေကျောက်တုံးများသည် နူးညံ့သိမ်မွေ့သော အပူငွေ့လေးတစ်ခုကို ထုတ်လွှတ်ပေးလေသည်။ ၎င်း၏ အလင်းတန်းများ သို့မဟုတ် အပူရှိန်နှင့် ထိတွေ့ရုံဖြင့်ပင် ကောင်းကင်ဘုံ၏ ပျော်ရွှင်ကြည်နူးမှုကို ခံစားရစေရန် လုံလောက်လုနီးပါး ဖြစ်၏။

ဉာဏ်အလင်းရ သူတော်စင် တစ်ဦးဖြစ်သော သူမ၏ ကျင့်ကြံခြင်း အခြေခံကြောင့် ထိုခံစားမှုက ပို၍ ပြင်းထန်လာခဲ့သည်။ သူမသည် ကျင့်ကြံခြင်း ဝိညာဉ်ဖြင့် ကောင်းကင်ဘုံနှင့် ပဲ့တင်ထပ်ကာ ပဲ့တင်ထပ် ဝိညာဉ် အဆင့်ကို စိန်ခေါ်ရန် အရည်အချင်းပြည့်မီသော လူနည်းစုထဲမှ တစ်ဦးဖြစ်လေသည်။

"ခင်ဗျားက ဒီကျောက်တုံးလေးကို သဘောကျနေပုံရတယ်...."

ဝေ့ဝူယင်က ပြုံးလျက် ကျောက်တုံးကို အနည်းငယ် ပိုနီးကပ်အောင် ယူဆောင်လာရင်း ပြောလိုက်သည်။ သူမ၏ ခန္ဓာကိုယ်လေးသည် အနည်းငယ် လှုပ်ရှားသွားခဲ့သည်။ ထို့နောက် သူမသည် သေချာရေရာမှုမရှိသော လေသံဖြင့် တီးတိုးရေရွတ်လိုက်၏။

"သဘောကျတယ်၊ တကယ်ကိုပါ...."

ဤသို့ ဆက်လုပ်နေပါက သူမ သွားရည်ကျလာနိုင်သည်ဟု ဝေ့ဝူယင် သံသယဝင်သွားမိသည်။ တောက်ပသောကြယ် နန်းတော်သည် ဤမျှလောက်ပင် ဆင်းရဲမွဲတေနေခဲ့သလော။ ဒုတိယ နန်းတော်သခင် ကိုယ်တိုင်ပင် ဤကျောက်တုံးကို မြင်ရုံဖြင့် တည်ငြိမ်မှုများ ဆုံးရှုံးသွားခြင်းက နန်းတော်၏ ဆင်းရဲနွမ်းပါးသော အခြေအနေနှင့် ပတ်သက်၍ မျိုးစုံသော အတွေးများကို ပေါ်ပေါက်လာစေနိုင်သည်။

တောက်ပသောကြယ် နန်းတော်သည် အဂ္ဂိရတ်ပညာ မသုံးသော အဖွဲ့အစည်းများထဲတွင် အချမ်းသာဆုံး အဖွဲ့အစည်းများထဲမှ တစ်ခုဖြစ်သော်လည်း ပန်းပဲ၊ နိမိတ်ဖတ်၊ သတင်းအချက်အလက် စသည့် အဓိက ထိပ်တန်း အဖွဲ့အစည်းများ၏ အောက်တွင်သာရှိသည်။

တစ်ချိန်တည်းမှာပင်... အစွမ်းကုန် သန့်စင်ခြင်း ဂလက်ဆီသည် အဂ္ဂိရတ်ပညာကို လွှမ်းမိုးထားနိုင်မှုနှင့် ၎င်း၏ အလွန်တရာ ဈေးကြီးလှသော အဂ္ဂိရတ် ထုတ်ကုန်များကြောင့် သန့်စင်သော ကံကြမ္မာ ဟင်းလင်းပြင်အတွင်း အချမ်းသာဆုံး ဂလက်ဆီ ဖြစ်နေလေသည်။

ဤကဲ့သို့ အဆင့်အတန်း ရှိလင့်ကစား လျှို့ဝှက်ကောင်းကင် အမတေကျောက်တုံး တစ်တုံးသည် လျှို့ဝှက်လောက အမတေကျောက်တုံး ဘီလီယံနှင့်ချီ၍ တန်ဖိုးရှိသောကြောင့် အမှန်တကယ်ပင် အလွန်တရာ များပြားလှသော ပမာဏတစ်ခုဖြစ်သည်။

လျှို့ဝှက်ကောင်းကင် အမတေ ကျောက်တုံးများကို အထွတ်အထိပ် သူတော်စင်များကသာ သီးသန့် ရယူ ကိုင်တွယ်လေ့ရှိကြသည်။

မိမိတို့၏ ဓနဥစ္စာများကို မိမိကိုယ်တိုင် စုဆောင်းသိမ်းဆည်းထားနိုင်သော အဂ္ဂိရတ်ပညာရှင်များနှင့် ခြားနားစွာပင် သူရဲကောင်း တာအိုနန်းတော်ကဲ့သို့ ကျင့်ကြံခြင်း အခြေခံ အဖွဲ့အစည်းများ၊ သယ်ယူပို့ဆောင်ရေးနှင့် အစောင့်အရှောက် ဝန်ဆောင်မှုများ ပေးသော တောက်ပသောကြယ် နန်းတော်ကဲ့သို့ သီးသန့် အဖွဲ့အစည်းများသည် သူတို့၏ အလုပ်သမားများကို လစာပေးခြင်းနှင့် ဝင်ငွေရှာပေးသူများကို ထိန်းသိမ်းခြင်းတို့ဖြင့် သူတို့၏ ဓနဥစ္စာများကို စဉ်ဆက်မပြတ် ပြန်လည် ရင်းနှီးမြှုပ်နှံရလေသည်။

ထို့ပြင် သူတို့သည် ဝန်ဆောင်မှု ပေးရန် အခွင့်အလမ်းကောင်း မပေါက်ပေါက်လာပါက၊ သို့မဟုတ်... ယှဉ်ပြိုင်မှုများ ပိုမိုပြင်းထန်လာသည်နှင့်အမျှ တန်ဖိုးကျဆင်းသွားနိုင်ခြေ ရှိသည်။ ဓနဥစ္စာအတွက် ထုတ်လုပ်မှု နည်းလမ်းကို ပိုင်ဆိုင်လေ့ရှိသော အဂ္ဂိရတ်ပညာရှင်များနှင့် ခြားနားစွာပင် သာမန် ကျင့်ကြံသူများသည် ကြိုးစားအားထုတ်မှုနှင့် ကောင်းမွန်သော ဝန်ဆောင်မှုများမှတစ်ဆင့် အလုပ်လုပ်ကြရလေသည်။

သူတော်စင် နိုးထခြင်း ဆေးရည် တစ်သုတ်ကို ဖော်စပ်ရုံနှင့် လျှို့ဝှက်ကောင်းကင် အမတေ ကျောက်တုံး ၆ တုံး ရရှိမည့် ဝင်ငွေလမ်းကြောင်းမျိုး သူတို့ထံတွင် မရှိပါချေ။

***

အပိုင်း(၂၄၂၈)

"ကောင်းကင်ရှန့်ထို အာရုဏ်ဦးက ကျုပ်တို့ ဒုတိယ နန်းတော်သခင်ကို စနောက်နေတာလား...."

တောက်ပသောကြယ် နန်းတော်သခင်၏ ခန့်ညားသော မျက်နှာပေါ်ရှိ နှုတ်ခမ်းများက မချိပြုံးတစ်ခုကို ဖန်တီးလိုက်သည်။

ကံကောင်းထောက်မစွာပင်... ဤအမူအရာနှင့် ရင်းနှီးကျွမ်းဝင်မှုသည် ကျိုးယီရင်၏ ဂုဏ်သိက္ခာကို ထိခိုက်စေမည်မဟုတ်ဘဲ အစွမ်းကုန် သန့်စင်ခြင်း ဂလက်ဆီရှိ သူမ၏ အဆင့်အတန်းကိုသာ မြင့်တက်စေမည်ဖြစ်သည်။ အာရုဏ်ဦး အဂ္ဂိရတ် ရှန့်ထိုသည် မိုးကုပ်စက်ဝိုင်းများနှင့် ယှဉ်၍ပင် ရူးသွပ်လောက်စရာ စွမ်းအား၊ အာဏာနှင့် ဓနဥစ္စာတို့ကို ပြသနိုင်ခဲ့သည်။ သူသည် ဂလက်ဆီအတွင်း၌ အခြေခံအုတ်မြစ်များကို တည်ဆောက်၍ မပြီးသေးသော်လည်း သူ၏ ကိုယ်ပိုင်အင်အားနှင့် အဂ္ဂိရတ် စွမ်းရည်တို့ကတော့ ခိုင်မာစွာ အခြေတည်နေပြီ ဖြစ်သည်။

သို့မဟုတ်ပါက တာအို တရားဥပဒေ ထိန်းသိမ်းသူ တစ်ဦးထံမှ လျှို့ဝှက်ကောင်းကင် အမတေ ကျောက်တုံး တစ်တုံးကို သူ မည်သို့ အတင်းအကျပ် တောင်းယူနိုင်မည်နည်း။

'လုံရှီယာက အားလုံးအတွက် ဥပမာ အနေနဲ့ ပြသလိုက်တာပဲ... ဒီတော့ အခြေခံအုတ်မြစ်ကို ခိုင်မာအောင် မလုပ်ရသေးတဲ့ အထွတ်အထိပ် သူတော်စင်တွေအနေနဲ့ မဖြစ်မနေ ကိစ္စသာ မဟုတ်ရင် သူ့ကို ဘယ်တော့မှ တိုက်ခိုက်မှာ မဟုတ်ဘူး....'

တောက်ပသောကြယ် နန်းတော်သခင်သည် ရင်ထဲ၌ ခါးသီးမှု အနည်းငယ်ဖြင့် တွေးလိုက်သည်။ သူသည် မကောင်းဆိုးဝါး ဖျက်ဆီးခြင်း အရှင်သခင်၏ လက်တုံ့ပြန်မှုကို ကြောက်ရွံ့၍ သူ၏ နှုတ်ထွက်စကားများကို အထူးတလည် ဖုံးကွယ်ထားခဲ့ရသော်လည်း ဝေ့ဝူယင်ကမူ ပွင့်လင်းစွာနှင့် ရိုင်းပျစွာ ပြုမူခဲ့လေသည်။

"ဟား ဟား...."

ဝေ့ဝူယင်သည် အနည်းငယ် စိတ်လိုက်မာပါ ဖြစ်သွားသည်ဟု ခံစားရကာ ရယ်မောလိုက်သည်။

"ကောင်းပြီလေ... သူသာ လိုချင်ရင် ကျွန်တော်ကလည်း ပေးဖို့ ဆန္ဒရှိနိုင်ပါတယ်...."

"အိုး...."

တောက်ပသောကြယ် နန်းတော်သခင်၏ ဘယ်ဘက်မျက်ခုံးက စိတ်ဝင်တစားဖြင့် မြင့်တက်သွားသည်။

တစ်ချိန်တည်း၌... ကျိုးယီရင်မှာ ဝေ့ဝူယင်၏ ခန့်ညား ချောမောလှသော မျက်နှာကို မော့ကြည့်လိုက်မိ၏။ သူမ၏ နှလုံးသားက ချက်ချင်းပင် ရိုင်းစိုင်းစွာ ခုန်ပေါက်သွားခဲ့လေသည်။

နောက်ဆုံးတွင် သူမ၏ ခါးကို ဤအမျိုးသားက တင်းကြပ်စွာ ဖက်ထားကြောင်း သူမ သတိပြုမိသွားသည်။ သူမ ဘာပြောရမှန်း မသိတော့ချေ။

သူမ ကိုယ်စား တောက်ပသောကြယ် နန်းတော်သခင်က မေးလိုက်သည်။

"ခင်ဗျားရဲ့ ကရုဏာကြောင့် ရလာတဲ့ ဒီလို ကောင်းကင်ဘုံက ကောင်းချီးမျိုးကို ဒုတိယ နန်းတော်သခင်က သေချာပေါက် ငြင်းဆန်မှာ မဟုတ်ပါဘူး.... ကောင်းကင်ရှန့်ထို အာရုဏ်ဦးမှာ ဘယ်လို စည်းကမ်းချက်တွေ ရှိလို့လဲ...."

ကျိုးယီရင်သည် သူမ၏ နန်းတော်သခင်ကို ကျေးဇူးတင်မိလေသည်။ ဤသည်မှာ ကောင်းကင်ဘုံက ပေးအပ်သော အခွင့်အရေးတစ်ခုဖြစ်ကြောင်း သတိပေးခံရပြီးနောက် သူမသည် စိတ်စွမ်းအင်အားလုံးကို အသုံးပြု၍ တည်ငြိမ်အောင် ကြိုးစားခဲ့၏။ သူမ၏ အမြင်တွင် ဤအရာသည် အခွန်အခ သို့မဟုတ် တာဝန်ဝတ္တရား တစ်စုံတစ်ရာ မရှိဘဲ နှစ်ပေါင်း နှစ်ထောင်စာ လစာနှင့် ညီမျှနေလေသည်။ ၎င်းကား ကောင်းကင်ဘုံမှ ပေးသနားသော လက်ဆောင်တစ်ခုပင် ဖြစ်၏။ သူမသည် ၎င်းကို အရယူရပေမည်။

"ကောင်းပြီလေ... ဒီလိုလုပ်ရင်ရော ဘယ်လိုလဲ၊ ကျွန်တော်တွေးမိတာကတော့...."

ဝေ့ဝူယင်သည် စကားကို ဆွဲဆန့်ပြောလိုက်၏။ ထို့နောက် သူ၏ အတုမဲ့ ဖန်တီးခြင်း အဂ္ဂိရတ် ကြယ်တာရာ မျက်လုံးများကို လှည့်ကာ ကျိုးယီရင်၏ မျက်လုံးများထဲသို့ စိုက်ကြည့်လိုက်လေသည်။ ထိုမှတစ်ဆင့် သူမ၏ စိုစွတ်ကာ ဆွဲဆောင်မှုရှိသော နှုတ်ခမ်းများဆီသို့ ဖြည်းညင်းစွာ အကြည့်ရွှေ့သွားခဲ့၏။ သူ၏ ဝိညာဉ်အတွင်း၌ ရမ္မက်ဆန္ဒ တစ်စွန်းတစ်စ ပေါ်ထွက်လာခဲ့သည်။ ထို့ကြောင့် သူ၏ ဘယ်ဘက်လက်မောင်းသည် စူးရှသော နာကျင်မှုဖြင့် တဆစ်ဆစ် ကိုက်ခဲသွားလေသည်။

တောက်ပသောကြယ် နန်းတော်သခင်သည် လည်ချောင်းကို ညင်သာစွာ ရှင်းလိုက်သည်။ ထို့နောက် ဝေ့ဝူယင်ကို တည်ငြိမ်သော အကြည့်ဖြင့် စိုက်ကြည့်လိုက်၏။ ကျိုးယီရင်တွင် အသက်ထင်ရှား ရှိနေပြီး လှုပ်ရှားသွားလာနေသော ခင်ပွန်းတစ်ယောက် ရှိလေသည်။ သူသည် ကောင်းကင်ရှန့်ထို တစ်ဦးသာ ဖြစ်သော်လည်း သူတို့၏ ဆက်ဆံရေးမှာ ရှင်သန်နေဆဲပင် ဖြစ်သည်။ သို့သော်လည်း ပြောရမည်ဆိုလျှင် ထိုခင်ပွန်းဖြစ်သူ၌ အမျိုးသမီး နှစ်ဒါဇင်ကျော် ပါဝင်သော ကိုယ်ပိုင် မောင်းမဆောင်တစ်ခု ရှိလေသည်။ ကလေးများစွာရှိသော ကြီးမားသည့် မိသားစုနှင့်အတူ သူတို့အားလုံးသည် ကျိုးမျိုးနွယ်စု၏ အစိတ်အပိုင်းတစ်ခု ဖြစ်ကြ၏။ သို့ရာတွင် ထိုသူနှစ်ဦးအနက် ပို၍ စွမ်းအားကြီးမားသော သူမသည် တစ်သက်တာလုံး အမျိုးသားတစ်ဦးတည်းအပေါ်၌သာ သစ္စာရှိခဲ့လေသည်။

ကျင့်ကြံခြင်းလမ်းစဉ်ကား ခက်ခဲကြမ်းတမ်းလှသည်။ အစပိုင်း၌ ဆက်ဆံရေးတစ်ခုတွင် အစွမ်းအထက်ဆုံးနှင့် ပါရမီအပါဆုံးသူသည် အခြားသူတစ်ဦးက အခွင့်အရေးများကို အရယူသွားသောအခါ လှုပ်ရှားပြောင်းလဲမှုများကြား၌ ပြိုကွဲသွားတတ်သည့် အချိန်များ ရှိတတ်လေသည်။ ဤသည်မှာ ထိုအရာ၏ ဥပမာတစ်ခုသာ ဖြစ်၏။

ကျိုးယီရင်သည် ခင်ပွန်းဖြစ်သူ၏ မိသားစုထဲသို့ ဟိုးအစကတည်းက လက်ထပ်ဝင်ရောက်ခဲ့ရုံသာမက သူမ၏ အမြွှာမောင်လေးသည်လည်း သူတို့၏ မူလ မျိုးရိုးနာမည်ကို ပြောင်းလဲခဲ့ရလေသည်။ သူတို့၏ ထူးခြားသော အရည်အသွေးများက တောက်ပသောကြယ် နန်းတော်သခင်၏ အာရုံစိုက်မှုကို ရရှိခဲ့၏။ ထို့နောက်တွင် သူတို့သည် ပိုမိုကြီးမားသော ရာထူးများအတွက် ငှားရမ်းခံခဲ့ရသည်။ သူတို့သည် ကျိုးမျိုးနွယ်စုမှ ပေးစွမ်းနိုင်သည်ထက် သိသာထင်ရှားစွာ ပိုမိုမြင့်မားသော ဓနဥစ္စာနှင့် အရင်းအမြစ်များကို ခံစားခွင့် ရရှိခဲ့ကြသည်။ အချိန်တစ်ခုသို့ ရောက်သောအခါ ကျိုးမျိုးနွယ်စုက သူတို့ကို ထောက်ပံ့နေခြင်းမဟုတ်ဘဲ သူတို့၏ လစာကသာ မျိုးနွယ်စုကို ထောက်ပံ့ပေးနေခဲ့ခြင်း ဖြစ်လေသည်။

ဝေ့ဝူယင်သည် သူမဘက်သို့ ကိုင်းညွတ်သွားသည်။ ထို့နောက် ကျိုးကျီယီ၏ နားထဲသို့ သူ၏ တောင်းဆိုချက်ကို ညင်သာစွာ တီးတိုးပြောလိုက်လေသည်။ သူမ၏ မျက်လုံးများသည် အံ့အားသင့်မှုကြောင့် ရုတ်တရက် ပြူးကျယ်သွားခဲ့၏။ ထို့နောက် ကြီးလေးသော စဉ်းစားတွေးတောမှုဖြင့် အာရုံစိုက်သွားလေသည်။

တောက်ပသောကြယ် နန်းတော်သခင်ကတော့ ကျိုးယီရင်အတွက် ခါးသီးမှုနှင့် ဝမ်းမြောက်မှုတို့ ရောယှက်နေသော ထူးဆန်းသည့် ခံစားချက်ကို ရင်ထဲ၌ သိမ်းဆည်းထားခဲ့လေသည်။

ဝေ့ဝူယင်က နောက်သို့ ပြန်ဆုတ်လိုက်ကာ သူမကို ကိုယ်တိုင် မတ်တတ်ရပ်စေခဲ့သည်။ သို့သော် သူ၏ လက်ကတော့ သူမ၏ ခါးပေါ်တွင် ရှိနေဆဲပင် ဖြစ်၏။ သူမသည်လည်း ဖယ်ခွာမသွားခဲ့ချေ။ အဂ္ဂိရတ် တာအို၏ ပြိုင်ဘက်ကင်းသော သန့်စင်မှုကို ရောင်ပြန်ဟပ်နေသည့် ထိုခုနစ်ရောင်ခြယ် မျက်လုံးများကိုသာ စိုက်ကြည့်နေခဲ့သည်။ သူမ၏ အကြည့်သည် တည်ငြိမ်နေပြီး မတုန်မလှုပ် ရှိနေလေသည်။ သူမက လျှို့ဝှက်ကောင်းကင် အမတေကျောက်တုံးကို တစ်ချက်ကြည့်လိုက်ပြီး မေးလိုက်၏။

"ပြီးတော့ လျှို့ဝှက်ကောင်းကင် ကျောက်တုံးက ကျွန်မအတွက် ဖြစ်လာမှာလား...."

ဤအခြေအနေမှာ မယုံနိုင်စရာကောင်းသည်ဟု သူမ ခံစားလိုက်ရသည်။ သူမကိုယ်သူမ ထိုမျှလောက် တန်ဖိုးရှိသည်ဟု လုံးဝ မထင်ထားခဲ့ချေ။ မည်သို့ပင်ဖြစ်စေ... သူမသည် အစစ်အမှန် ဝိညာဉ် အဆင့် ကျင့်ကြံခြင်း အခြေခံ ရှိနေသော်လည်း လျှို့ဝှက်ကောင်းကင် အမတေကျောက်တုံး တစ်တုံးကို ဝယ်ယူနိုင်ရန် လုံလောက်သော ဓနဥစ္စာကို ရရှိဖို့ရာ နှစ်သုံးသောင်းတိုင်တိုင် အလုပ်လုပ်ရမည် ဖြစ်သည်။

ဤသည်မှာ မျိုးနွယ်စု တစ်ခုလုံး၏ ကံကြမ္မာကို ပြောင်းလဲပစ်နိုင်သည့် ဓနဥစ္စာပင် ဖြစ်လေသည်။ ၎င်းသည် သူမ၏ ကံကြမ္မာကိုလည်း ပြောင်းလဲပစ်လိမ့်မည်။

ဝေ့ဝူယင်က မိန်းကလေးကို အကဲခတ်လိုက်၏။ အဆင့်နိမ့် ဂလက်ဆီများ၏ ရတနာများစွာကို သိမ်းပိုက်ပြီးနောက် ဓနဥစ္စာနှင့် ပတ်သက်သော သူ့ အမြင်သည် များစွာ ပုံပျက်သွားခြင်း မရှိခဲ့ပေ။ သို့သော်လည်း... အချိန်မရွေး ဘာမှမရှိရာမှ ဓနဥစ္စာကို ဖန်တီးနိုင်စွမ်းရှိသော သူ့အတွက်မူ ဤကျောက်တုံးတစ်တုံးသည် ကျင့်ကြံသူတစ်ဦးအတွက် မည်မျှ အရေးပါကြောင်း နားလည်ရန် ခက်ခဲလှသည်။ ရမ္မက်ကို အခြေခံသော တောင်းဆိုချက်ကို ပြုလုပ်ပြီးနောက် ကျိုးယီရင်၏ စိတ်ပိုင်းဆိုင်ရာ လှုပ်ရှားမှုများနှင့် လေးနက်သော စဉ်းစားတွေးတောမှုများကို သိရှိနားလည်လာသည့် အခါမှသာ သူ ပိုင်ဆိုင်ထားသည့် စည်းစိမ် ဥစ္စာအတိမ်အနက်က မည်မျှနက်ရှိုင်းကြောင်းကို အမှန်တကယ် နားလည်နိုင်ခဲ့လေသည်။

"...."

ကျိုးယီရင်၏ မျှော်လင့်ချက်များကို မြင့်တက်သွားစေခဲ့သည့်အတွက် ဝေ့ဝူယင် တစ်ယောက် မိမိ၏ ရုတ်တရက် စိတ်လိုက်မာပါဖြစ်မှုနှင့် မိန်းကလေးအား စနောက်လိုသော ဆန္ဒကိုသာ အပြစ်တင်နိုင်တော့သည်။ ဤကဲ့သို့သော ဖလှယ်မှုမျိုးအတွက် သူ၏ ကြီးမားလှသော ဓနဥစ္စာကို ပေါ်တင်ကြီး အသုံးချလိုခြင်း မရှိခဲ့ချေ။

"ဟား ဟား... သေချာပေါက် မဟုတ်ရပါဘူး...."

ဝေ့ဝူယင်သည် နောက်သို့ တစ်လှမ်းဆုတ်ကာ ရယ်မောရင်း သူမ၏ ခါးမှ လက်ကို ဖယ်ရှားလိုက်သည်။ ထိုကိစ္စကို သည်အတိုင်းထားလိုက်ဖို့ ဟန်ပြင်လိုက်စဉ်မှာပင် ကျိုးယီရင်၏ စိတ်အတွင်း၌ စိတ်ဓာတ်ကျဆင်းမှုနှင့် မိမိကိုယ်ကို အပြစ်တင်မှုတို့ ရုတ်တရက် ပြင်းထန်စွာ ဖြစ်ပေါ်လာသည်ကို သူ ခံစားလိုက်ရလေသည်။

ထိုလျှို့ဝှက် ကောင်းကင် အမတေ ကျောက်တုံးဖြင့် ပြုလုပ်မည့် သူမ၏ အစီအစဉ်များအားလုံး ပျက်စီးသွားကာ ပါးစပ်ထဲတွင်ပင် ခြောက်သွေ့သော ဖုန်မှုန့်များကဲ့သို့ ကြေမွသွားသလိုပင်...။

မိမိ၏ တုံ့ဆိုင်းမှုကြောင့် ကောင်းကင်ဘုံမှ အခွင့်အရေးတစ်ခုကို လက်လွတ်ဆုံးရှုံးသွားသကဲ့သို့ ခံစားလိုက်ရသဖြင့် သူမသည် ချက်ချင်းပင် စိတ်ဓာတ်ကျဆင်းသွားခဲ့သည်။

"...."

ဝေ့ဝူယင်သည် တောက်ပသောကြယ် နန်းတော်သခင်၏ စိတ်ပျက်မှုကိုပင် ခံစားသိရှိနိုင်လေသည်။ လက်အောက်ငယ်သားများအား အခွင့်အရေးတိုင်းကို တုံ့ဆိုင်းမနေဘဲ ဆုပ်ကိုင်ရန် သင်ကြားပေးခဲ့သူ တစ်ဦး၏ မျက်လုံးများသည် ဝမ်းနည်းမှုများဖြင့် ပြည့်နှက်နေခဲ့သည်။ အထူးသဖြင့် ဤအခြေအနေကို တရားဝင်ဖြစ်စေရန် သူမကိုယ်စား သူက ဝင်ရောက်ပြောဆိုပေးခဲ့ပြီးနောက်တွင်ပင်။ အကယ်၍ သူမသာ သဘောတူပါသည်ဟု ပြောခဲ့လျှင် ဝေ့ဝူယင်သည် ဤကဲ့သို့ နောက်ဆုတ်နိုင်မည် မဟုတ်ချေ။

ပဲ့တင်ထပ် ဝိညာဉ် အဆင့်သို့ ဝင်ရောက်နိုင်မည့် အလားအလာရှိသော အခွင့်အရေးတစ်ခုနှင့် ညီမျှနိုင်သည့် အရာကို မည်သူက စိတ်လိုက်မာန်ပါ ပေးအပ်မည်နည်း။ အဆင့်နိမ့် ဝိညာဉ်ဆေးလုံး တစ်လုံးသည်ပင်လျှင် လျှို့ဝှက်ကောင်းကင် အမတေကျောက်တုံး တစ်တုံးနှင့် ညီမျှပေသည်။

တောက်ပသော ကြယ်နန်းတော်သခင်၏ အတွေးထဲတွင် ကောင်းကင်ဘုံက ဤအခွင့်အရေးကို သူမအတွက် သီးသန့် ဖန်တီးပေးထားခြင်း ဖြစ်သည်ဟု ထင်မြင်နေမိသည်။

'သူက ဒီအခွင့်အရေးကို လွှင့်ပစ်လိုက်တာပဲ....'

သူ စိတ်ထဲမှ သက်ပြင်းတစ်ချက် ချလိုက်လေသည်။

"...."

“ဟမ်...”

ရုတ်တရက် ဝေ့ဝူယင်သည် တစ်စုံတစ်ခုကို သတိရသွားကာ တုန်လှုပ်သွားခဲ့၏။

“ငါ လွှမ်းမိုးခံလိုက်ရတာလား...”

***