အခန်း (၁၈၅-၁၈၆)

အပိုင်း ၁၈၅

"ဒီညီအစ်ကိုနှစ်ယောက်ကတော့ Cheung Kong Holdings ကို ဘယ်တုန်းကမှ ဂရုမစိုက်ခဲ့ကြဘူးပဲ"

​လျူယွီတုန်နှင့် မာဟွာထန်တို့၏ အကြည့်များကို ရင်ဆိုင်ရင်း လင်းဖန်က လက်ကာပြကာ ပေါ့ပေါ့ပါးပါးပင် ပြောသည်။

"လွန်ခဲ့တဲ့ ရက်အနည်းငယ်က Penguin Portal မှာ ရေးထားတဲ့ အစီရင်ခံစာတစ်ခု ရှိတယ်။ ဗြိတိန်က Yangtze River (လီကျားချန်၏ စီးပွားရေးအုပ်စု) ကို ဖိအားပေးနေပြီး၊ 'စူပါမင်း' တစ်ယောက် ဝိုင်းရံပိတ်ဆို့မှုထဲမှာ ပိတ်မိနေတယ် ဆိုတာလေ"

​"အာ..."

လျူယွီတုန်နှင့် မာဟွာထန်တို့ နှစ်ဦးစလုံး ဆွံ့အသွားကြသည်။

​Cheung Kong Industrial Group ဆိုသည်မှာ လီကျားချန်အမည်ပေါက်အောက်ရှိ အစစ်မှန်ဆုံး စီးပွားရေးအင်ပါယာကြီး မဟုတ်ပါလား။

၎င်းတွင် Cheung Kong၊ Hutchison နှင့် Electric Power ဟူသော စာရင်းဝင်ကုမ္ပဏီ ၃ ခု ပါဝင်သည်။ ထို့ပြင် အခြေခံအဆောက်အအုံ၊ သက်ရှိသိပ္ပံနည်းပညာ၊ ဆက်သွယ်ရေး၊ ဆိပ်ကမ်းနှင့် မြေယာလုပ်ငန်းများစွာဖြင့် ဖွဲ့စည်းထားသည့် ကမ္ဘာကျော်လုပ်ငန်းစုကြီးလည်း ဖြစ်သည်။

​Cheung Kong Holdings Group သည် ကမ္ဘာ့နိုင်ငံပေါင်း ၅၂ နိုင်ငံတွင် လုပ်ငန်းလည်ပတ်နေပြီး ဝန်ထမ်းပေါင်း ၂၇၀,၀၀၀ ခန့် ရှိသည်။

ဟောင်ကောင်တစ်ခုတည်းမှာပင် စာရင်းဝင်ကုမ္ပဏီ ၈ ခုရှိပြီး Fortune 500 စာရင်းဝင် ကုမ္ပဏီကြီးလည်း ဖြစ်သည်။ အမှန်စင်စစ် ၂၀၀၅ ခုနှစ်ကတည်းက လီကျားချန်သည် ပြည်မကြီးနှင့် ဟောင်ကောင်ရှိ ပိုင်ဆိုင်မှုများကို စတင်ရောင်းချခဲ့သည်။ ၂၀၁၅ ခုနှစ်မှစ၍ ဗြိတိန်တွင် အများပြည်သူဆိုင်ရာ ကဏ္ဍများကို အကြီးအကျယ် ဝယ်ယူရင်း ဟောင်ကောင်ဒေါ်လာ ဘီလီယံ ၈၀၀ ကျော် ရင်းနှီးမြှုပ်နှံခဲ့သည်။

​ဗြိတိန်၏ သဘာဝဓာတ်ငွေ့စျေးကွက် ၃၀ ရာခိုင်နှုန်း၊ ဆက်သွယ်ရေးစျေးကွက် ၄၀ ရာခိုင်နှုန်းကျော်၊ လျှပ်စစ်စျေးကွက် လေးပုံတစ်ပုံနှင့် ဆိပ်ကမ်းများစွာကို လီမိသားစုက ထိန်းချုပ်ထားခြင်းဖြစ်သည်။

​"ဟားဟား..အဘိုးကြီးမာဆီမှာ ဒီလောက်တော်တဲ့လူတွေ ရှိတာပဲ။ တရုတ်ပြည်ရဲ့ အချမ်းသာဆုံးလူရဲ့ အခြေအနေကိုတောင် ကြိုတင်ဟောကိန်းထုတ်နိုင်တယ်ပေါ့"

လျူယွီတုန်က နောက်ပြောင်လိုက်သည်။ မာဟွာထန်မှာမူ မျက်လုံးကလယ်ကလယ် ဖြစ်သွားသည်။ သူဌေးတစ်ယောက်အနေဖြင့် လက်အောက်ငယ်သားတိုင်းကို အမြဲတမ်း ဘယ်လိုလုပ် အာရုံစိုက်နိုင်ပါမည်နည်း။

​"ဟားဟားဟား၊ ဟုတ်တယ် ဒီလိုလူမျိုးကို ရာထူးတိုးပေးပြီး လစာတိုးပေးဖို့ လိုတယ်"

ဘေးက လင်းဖန်ကလည်း ရယ်မောရင်း ဝင်ပြောသည်။

​လင်းဖန်က အချက်ပြလိုက်မှပင် လီကျားချန်သည် ဗြိတိန်တွင် အလွန်အမင်း ရင်းနှီးမြှုပ်နှံထားမိပြီး ဒေသခံအစိုးရအပေါ် သူ၏ သြဇာလွှမ်းမိုးမှုကို အထင်ကြီးလွန်းခဲ့ကြောင်း သူတို့ သဘောပေါက်သွားကြသည်။ ဗြိတိန်သည် အများပြည်သူဆိုင်ရာ လုပ်ငန်းများကို နိုင်ငံပိုင်သိမ်းရန် ကြိုးပမ်းနေပြီဖြစ်ရာ လီမိသားစုအတွက် အရာအားလုံး ဆုံးရှုံးသွားနိုင်သည့် အခြေအနေ ဖြစ်နေသည်။

ထို့ကြောင့်ပင် လီကျားချန်သည် သြစတြေးလျ၊ ကနေဒါနှင့် အရှေ့တောင်အာရှရှိ ပိုင်ဆိုင်မှုများကိုပါ ရောင်းချပြီး ငွေသားအဖြစ် ပြောင်းလဲနေခြင်း ဖြစ်သည်။

​အနှစ်သာရအားဖြင့် ဤလူအိုကြီးသည် သူ၏ ရန်ပုံငွေများကို ကျိဖုပေါင်ထဲသို့ စုပုံထည့်ဝင်ပြီး အဆုံးအဖြတ်ပေးနိုင်သည့် အခွင့်အာဏာကို ရယူလိုခြင်းဖြစ်သည်။ ကျိဖုပေါင်သာ ဗြိတိန်နှင့် ကမ္ဘာ့စျေးကွက်သို့ ထိုးဖောက်နိုင်လျှင် သူ၏ ဗြိတိန်ရှိ ရင်းနှီးမြှုပ်နှံမှုများမှာလည်း ဘေးကင်းသွားပေလိမ့်မည်။ အဘယ်ကြောင့်ဆိုသော် ကမ္ဘာ့အချမ်းသာဆုံး လူများစွာ ပါဝင်နေသည့် စီးပွားရေး မဟာမိတ်အဖွဲ့ကြီးတစ်ခုကို မည်သည့်အစိုးရကမျှ တိုက်ရိုက် ရန်မမူရဲသောကြောင့် ဖြစ်သည်။

​"အခုတော့ အားလုံး ရှင်းသွားပါပြီ။ ဒီတစ်ခါ ငါတို့က အသာစီးရထားတာပဲ"

လျူယွီတုန်က ပြုံးလျက် ပြောသည်။

​"ဟုတ်တယ် ဒီလူတွေကို ကိုင်တွယ်ဖို့ ညီလေးလင်းရဲ့ အတွေ့အကြုံက တကယ့်ကို လိုအပ်တယ်။ ငါက ဟောင်ကောင်နဲ့ နီးစပ်ပါတယ်လို့ ပြောကြပေမဲ့ တစ်လလုံး ဆွေးနွေးတာတောင် ဘာမှ ရေရေရာရာ မသိခဲ့ဘူး။ ရှက်ဖို့တောင် ကောင်းတယ်"

မာဟွာထန်က သက်ပြင်းချရင်း ဆိုသည်။

​ကျိဖုပေါင်၏ ဗဟိုချက်မှာ လုံထန်ဂရုဖြစ်သောကြောင့် လင်းဖန်ကိုယ်တိုင် ရှေ့ထွက်မလာသရွေ့ ထိုမြေခွေးအိုကြီးများကလည်း နှုတ်ဟကြမည် မဟုတ်ပေ။

​"အစ်ကိုတို့ နှစ်ယောက် သတိတော့ထားပါ။ လီကျားချန်က ဟောင်ကောင်ရဲ့ ခေါင်းဆောင်ဆိုပေမဲ့ သူ့အောက်က လူတွေကလည်း သာမန်တွေ မဟုတ်ကြဘူး"

လင်းဖန်က သတိပေးလိုက်သည်။

​ကျိဖုပေါင်သည် အွန်လိုင်းငွေပေးချေမှုတစ်ခုတည်း မဟုတ်ဘဲ ကမ္ဘာကြီးကို ချိတ်ဆက်ပေးမည့် အခြေခံ စီမံကိန်းကြီးဖြစ်သည်။ ဟောင်ကောင်သည် အပေါ်ယံကြည့်လျှင် ရိုးရှင်းသော်လည်း နောက်ကွယ်တွင် ဒေါ်လာဘီလီယံနှင့်ချီ ချမ်းသာပြီး ကမ္ဘာအနှံ့ လုပ်ငန်းများရှိသည့် သူဌေးကြီးများစွာ ရှိနေသေးသည်။

​"နောက်ဆုံးတော့ ငါ နားလည်သွားပြီ။ ဒီကိစ္စမှာ မင်းပဲ ရှေ့ထွက်ရမှာပဲ၊ ငါကတော့ နောက်ကပဲ လိုက်ခဲ့တော့မယ်"

လျူယွီတုန်က လက်လျှော့သံဖြင့် ပြောသည်။

​"ဟုတ်တယ်၊ ငါလည်း အဲဒီလိုပဲ တွေးတယ်"

ဟု မာဟွာထန်ကလည်း ထောက်ခံသည်။

​၎င်းတို့၏ ပုံစံကိုကြည့်ကာ လင်းဖန်က ခါးသက်သက် ပြုံးလိုက်သည်။

- "ထားလိုက်ပါတော့ဗျာ... ရောက်မှပဲ အခြေအနေကြည့်ပြီး ဖြေရှင်းကြတာပေါ့။ သူတို့ဘက်က မလာရင်လည်း ကျွန်တော်တို့ကတော့ ရှေ့ဆက်မှာပဲ"

​ကျိဖုပေါင်စီမံကိန်းသာ စတင်လိုက်လျှင် ဟောင်ကောင်ကို လျင်မြန်စွာ လွှမ်းမိုးသွားမည်ဖြစ်ပြီး ကမ္ဘာ့သူဌေးကြီးများပင် လိုက်ပါလာရပေလိမ့်မည်။ လင်းဖန်၊ မာဟွာထန်နှင့် လျူယွီတုန်၃ ဦး ပေါင်းလိုက်လျှင်ပင် အာရှအတွက် အခြေခံအုတ်မြစ်က ခိုင်မာနေပြီဖြစ်သည်။ ရှန်ကျန့်မြို့ တိုးတက်လာပုံကို ကြည့်ပါ၊ ဟောင်ကောင်နှင့် ကပ်လျက်ရှိသောကြောင့် ခေါင်းဆောင်ကြီးက စက်ဝိုင်းတစ်ကွင်း ဆွဲပေးလိုက်ရုံဖြင့် ဆယ်စုနှစ်တစ်ခုအတွင်း ကမ္ဘာ့အဆင့်မီ မြို့ကြီးဖြစ်လာခဲ့သည်။ ယခုအခါ ရှန်ကျန့်၏ အခြေခံအဆောက်အအုံမှာ ဟောင်ကောင်ထက်ပင် သာလွန်နေပြီဖြစ်သည်။

​ခဏအကြာတွင် လင်းဖန်၊ မာဟွာထန်နှင့် လျူယွီတုန်တို့သည် သက်တော်စောင့်များ ခြံရံလျက် ကားဖြင့် ဆိပ်ကမ်းသို့ ရောက်ရှိလာကြသည်။ လုပ်ထုံးလုပ်နည်းများ ပြည့်စုံသဖြင့် မိနစ် ၃၀ အတွင်းမှာပင် ဟောင်ကောင်နယ်နိမိတ်အတွင်းသို့ ခြေချနိုင်ခဲ့သည်။

​"ဟိုတုန်းကတော့ ဟောင်ကောင်ကို ထွက်ပြေးခဲ့ကြတဲ့ လူအများအပြားဟာ နောက်ဆုံးမှာ ဟောင်ကောင်ရဲ့ အထက်တန်းလွှာ သူဌေးကြီးတွေ ဖြစ်လာလိမ့်မယ်လို့ ဘယ်သူမှ မထင်ခဲ့ကြဘူး"

​မာဟွာထန်က ရှန်ကျန့်မြစ်ကို ဖြတ်ကျော်စဉ် လေးနက်စွာ ပြောလိုက်သည်။ ၁၉၇၀ ပြည့်လွန်နှစ်များက လူအများအပြားသည် အသက်မွေးဝမ်းကျောင်း အခွင့်အလမ်းများအတွက် ရှန်ကျန့်မြစ်ကို ရေကူးဖြတ်ကျော်ကာ ဟောင်ကောင်သို့ ခိုးဝင်ခဲ့ကြသည်။ ယနေ့ ဟောင်ကောင်လူဦးရေ ၇.၅ သန်းအထိ တိုးပွားလာခြင်းမှာ ထိုစဉ်က ထွက်ပြေးလာသူများ၏ အခန်းကဏ္ဍက အဓိကပင် ဖြစ်သည်။

........................................................

​

အပိုင်း ၁၈၆

ဟောင်ကောင်တစ်ခွင်တွင် ဖူကျန်းနှင့် ကွမ်တုံးပြည်နယ်မှ လာသူများက အများစုဖြစ်ပြီး ချောင်ကျိုး နှင့် ဆန်းရှန်း နွယ်ဖွားများကတော့ အထက်တန်းလွှာ လူ့အဖွဲ့အစည်းကို လွှမ်းမိုးထားကြသည်။ ယနေ့မြင်တွေ့နေရသော ကျော်ကြားသူများနှင့် သူဌေးကြီး အများအပြားမှာ ထိုစဉ်က ပြည်မကြီးမှ ထွက်ပြေးလာခဲ့သည့် ချောင်ကျိုးနွယ်ဖွားများ၏ မျိုးဆက်များဖြစ်ကြရာ ၎င်းတို့၏ ကွမ်တုံးစကားမှာ အလွန်ပင် ပီသလှသည်။

​တရုတ်ပြည်၏ အချမ်းသာဆုံးပုဂ္ဂိုလ် လီကျားချန်မှာ အထင်ရှားဆုံး ဥပမာပင်။ သူသည် ကွမ်တုံးပြည်နယ်၊ ချောင်မြို့ရှိ ခရိုင်ငယ်လေးတစ်ခုတွင် မွေးဖွားခဲ့ပြီး ၁၉၃၉ ခုနှစ်၊ ဇွန်လတွင် ဟောင်ကောင်သို့ ပြောင်းရွှေ့လာရာမှ သူ၏ ဂန္ထဝင်ခရီးစဉ်ကို စတင်ခဲ့ခြင်းဖြစ်သည်။

​"ဟားဟားဟား.သခင်လေးလီ... ခင်ဗျားက ဘယ်လိုလုပ်ပြီး ကင်းစောင့်တပ်သား ဖြစ်နေရတာလဲ"

​ခဏအကြာတွင် လင်းဖန်နှင့် အဖွဲ့သည် ဟောင်ကောင်ဆိပ်ကမ်းသို့ ရောက်ရှိလာကြသည်။ အနက်ရောင် တရုတ်ဝတ်စုံကို စတိုင်လ်ကျကျ ဝတ်ဆင်ကာ မတ်မတ်ရပ်နေသော လီကျဲခိုင်ကို မြင်လိုက်ရသည့်အခါ အားလုံးက မရယ်ဘဲ မနေနိုင်ကြတော့ပေ။ ဟောင်ကောင် လီမိသားစု၏ ဂုဏ်သရေရှိ ဒုတိယသခင်လေး၊ Yingke Expansion Group ၏ ဥက္ကဋ္ဌဖြစ်သူက ယခုတော့ ကင်းစောင့်တစ်ယောက်လို ထွက်ကြိုနေရသည် မဟုတ်ပါလား။

​"မပြောပါနဲ့တော့ဗျာ... ကျွန်တော့်အဖေကိုယ်တိုင် ခင်ဗျားတို့ကို လာကြိုရမယ်လို့ အမိန့်ပေးထားလို့ ရောက်နေတာပါ"

လီကျဲခိုင်က ခါးသက်သက် ပြုံးရင်း ခေါင်းခါပြလိုက်သည်။

​လင်းဖန် တစ်ယောက်တည်းဆိုလျှင်ပင် ပုဂ္ဂိုလ်ရေး ခင်မင်မှုကြောင့် သူ လာကြိုရမည်ဖြစ်ရာ၊ ယခုတွင်မူ Jindong Group ဥက္ကဋ္ဌလျူယွီတုန်နှင့် Penguin Group ဥက္ကဋ္ဌ မာဟွာထန်တို့ပါ ပါဝင်နေသည်။ ဟောင်ကောင်တွင် သူတို့ကို မသိသူရှိနိုင်သော်လည်း ပြည်မကြီးနှင့် တစ်ကမ္ဘာလုံးတွင်မူ ဤသုံးဦးပေါင်းလိုက်လျှင် APPLE ကုမ္ပဏီထက်ပင် အင်အားကြီးမားလှသည်။ အွန်လိုင်းနှင့် အော့ဖ်လိုင်း နည်းပညာဘုရင် သုံးဦး၏ အရှိန်အဝါကို ဟောင်ကောင်က တောင့်ခံနိုင်မည် မဟုတ်သဖြင့် သူ ကိုယ်တိုင် ထွက်ကြိုရခြင်း ဖြစ်သည်။

​"ဟား ခင်ဗျားအဖေကိုယ်တိုင် အမိန့်ပေးတာဆိုတော့ ကျွန်တော်တို့တောင် အားနာလာပြီ"

ဟု လင်းဖန်က ကားပေါ်မှ ဆင်းရင်း နောက်ပြောင်လိုက်သည်။

​"အဲဒါက အရေးမကြီးပါဘူး။ ဒီလို အဆင့်အတန်းမျိုးတွေကို ဘယ်သူက လျစ်လျူရှုရဲမှာလဲ"

ဟု လီကျဲခိုင်က အဓိပ္ပာယ်ပါပါ ပြန်ပြောသည်။

​ဟောင်ကောင်၏ မြေလက်မအနည်းငယ်အတွင်း လီမိသားစုက ဤသို့ ခမ်းခမ်းနားနား ကြိုဆိုရသည့် လူမှာ အနည်းငယ်သာ ရှိသည်။ ဟောင်ကောင်၏ ထိပ်သီးပုဂ္ဂိုလ်ပင်ဖြစ်စေ လီကျဲခိုင်က လက်မခံချင်လျှင် မည်သူမျှ ဘာမှမတတ်နိုင်ပေ။

​"ဒါနဲ့... သခင်လေးလီ၊ ခင်ဗျား သတင်းတွေကလည်း မနည်းဘူးနော်။ ဥရောပ စူပါမော်ဒယ် ဟာသာ က တကယ့်ကို ဆွဲဆောင်မှု ရှိတယ်လို့ ကြားတယ်"

မာဟွာထန်က ကားပေါ်မှ ဆင်းဆင်းချင်း စနောက်လိုက်သည်။

​"ဟားဟားဟား"

လင်းဖန်နှင့် လျူယွီတုန်တို့ပါ ကျယ်လောင်စွာ ရယ်မောမိကြသည်။

​လီမိသားစု၏ ဒုတိယသခင်လေးမှာ စည်းကမ်းမဲ့သူအဖြစ် ကျော်ကြားသည်။ အသက် ၁၅ နှစ်အရွယ်ကတည်းက သူ၏ အချစ်ရေးသတင်းများကို ပါပရာဇီများက မျက်ခြေမပြတ် စောင့်ကြည့်ခဲ့ကြသည်။ ဟောင်ကောင်၏ အချို့သော ရိုးရာများအရ ဇနီးမယား အများအပြား ယူဆောင်ခွင့် ရှိသည်ဟု ယူဆကြသော်လည်း (လောင်းကစားဘုရင် ဟီဟောင်ရှန်းကဲ့သို့)၊ လီကျဲခိုင်မှာမူ ထူးခြားသည်။ သူနှင့် ပတ်သက်ခဲ့သည့် အမျိုးသမီးတိုင်းမှာ သူ့ကို လက်ထပ်ရန် ငြင်းဆိုကြပြီး ကလေးမွေးပြီးလျှင်ပင် လမ်းခွဲသွားတတ်ကြသည်။ သူ၏ ရည်းစားဟောင်းစာရင်းတွင် စတန်းဖို့ဒ် တက္ကသိုလ်ကျောင်းသူ၊ ဂျပန်သတင်းတင်ဆက်သူ၊ ရှေ့နေနှင့် ကုမ္ပဏီဝန်ထမ်းများအထိ စုံလင်လှသည်။

​"အစ်ကိုတို့ရာ... ကျွန်တော့်ကို ဒုက္ခမပေးကြပါနဲ့"

လီကျဲခိုင်က လက်ကာပြရင်း အားကိုးရာမဲ့ဟန်ဖြင့် ပြောရှာသည်။

​ပုံမှန်အားဖြင့် သူ့ထက် ၅ နှစ်ငယ်သော မာဟွာထန်မှာ အေးဆေးသူဟု ထင်ရသော်လည်း Penguin Group ၏ အရှိန်အဝါမှာ လီကျားချန်ပင်လျှင် သတိထားဆက်ဆံရသည့် အနေအထား ဖြစ်သည်။ ထို့ကြောင့် လီကျဲခိုင်နှင့် မာဟွာထန်တို့မှာလည်း ရင်းနှီးကြသဖြင့် ဤသို့ နောက်ပြောင်နိုင်ခြင်း ဖြစ်သည်။

​"ကဲ... ကဲ... စကားတွေကို ခဏရပ်ကြပါဦး။ နောက်မှ အေးဆေးပြောကြတာပေါ့၊ မဟုတ်ရင် အဘိုးကြီး စိတ်ဆိုးနေဦးမယ်"

လင်းဖန်က ရယ်မောရင်း တိုက်တွန်းလိုက်သည်။

​"ဟုတ်သားပဲ... ကျွန်တော့်အဖေက ခင်ဗျားတို့ သုံးယောက်လာမှာကို သိတော့ ဟွေ့ဖန်းဟောက်က စားဖိုမှူးကို သီးသန့် ဖိတ်ထားတယ်။ သူ့ရဲ့ လက်ရာက နန်းတွင်းစားဖိုမှူးတွေဆီက ဆင်းသက်လာတာ။ ကျွန်တော့်တောင် ဒီလို ဧည့်ခံမှုမျိုး တစ်ခါမှ မရဖူးဘူး"

လီကျဲခိုင်က မနာလိုဟန်ဖြင့် ပြောလိုက်သည်။

​တရုတ်သူဌေးကြီး လီကျားချန်သည် ချွေတာတတ်သူအဖြစ် နာမည်ကြီးသည်။ သူ၏ စည်းစိမ်နှင့်ဆိုလျှင် နေ့စဉ် နန်းတွင်းအစားအစာများကို စားနိုင်သော်လည်း ငယ်စဉ်က ဆင်းရဲဒုက္ခ ခံခဲ့ရသဖြင့် မိသားစု စားပွဲများတွင်ပင် ရိုးရိုးရှင်းရှင်းသာ စားလေ့ရှိသည်။ ယခုကဲ့သို့ စားဖိုမှူးကို သီးသန့်ဖိတ်ခေါ်ခြင်းမှာ လင်းဖန်တို့အဖွဲ့ကို အလွန်အမင်း အလေးထားကြောင်း ပြသလိုက်ခြင်းပင်။

​ထိုစကားကြောင့် မာဟွာထန်နှင့် လျူယွီတုန်တို့၏ မျက်နှာရိပ်မျက်နှာကဲ အနည်းငယ် ပြောင်းလဲသွားသည်။ လင်းဖန်ကတော့ ထွေထွေထူးထူး မခံစားရသော်လည်း ကားပေါ်သို့ အမြန်တက်ကာ လီကျဲခိုင်၏ ကားနောက်မှ Deep Water Bay သို့ လိုက်ပါသွားခဲ့သည်။

​မိနစ် ၃၀ အကြာတွင် Deep Water Bay တောင်ပတ်လမ်းသို့ ရောက်ရှိလာကြသည်။ လမ်းဘေးမြင်ကွင်းများမှာ တကယ်ကို မှင်တက်ဖွယ်ရာပင်။ Deep Water Bay သည် ဟောင်ကောင်တောင်ပိုင်း၏ အလှပဆုံးနှင့် အတိတ်ဆုံးသော နေရာဖြစ်ပြီး ထိပ်သီးသူဌေးကြီးများ နေထိုင်ရာ နေရာဖြစ်သည်။

​တောင်ပတ်လမ်းတစ်လျှောက်တွင် လျှို့ဝှက်ကင်မရာများ နေရာအနှံ့ရှိနေသည်။ လင်းဖန်တို့ပင်လျှင် ထိုကင်မရာများ၏ တည်နေရာအတိအကျကို မမြင်နိုင်သော်လည်း လမ်းတစ်လျှောက်ရှိ လုံခြုံရေးဝန်ထမ်းများက ထိုနေရာသည် မည်မျှ စည်းကမ်းကြီးကြောင်း သက်သေပြနေသည်။ ဟောင်ကောင်သည် ပြန်ပေးဆွဲမှုများ (အထူးသဖြင့် သူဌေးကြီးများကို) ကြောင့် နာမည်ကြီးခဲ့ဖူးရာ၊ လီကျားချန်သည်လည်း ယခင်က သင်ခန်းစာရခဲ့ဖူးသဖြင့် ယခုအခါ လုံခြုံရေးကို အလွန်အမင်း တင်းကျပ်ထားခြင်းဖြစ်သည်။

​"ဟား... တကယ့်ကို ခမ်းနားတာပဲ"

၁၀ မိနစ်အကြာ ဗီလာကြီး၏ တံခါးဝသို့ ရောက်သောအခါ လျူယွီတုန်က အံ့သြတကြီး ရေရွတ်လိုက်သည်။

​ဟောင်ကောင်ကဲ့သို့ မြေစျေး အလွန်ကြီးသော နေရာတွင် လီကျားချန်က ဤမျှကြီးမားသော ဗီလာကြီးကို ဆောက်ထားနိုင်ခြင်းမှာ အံ့သြစရာပင်။ အရေးကြီးဆုံးမှာ နေရာအထားအသို ဖုန်းရွှေဖြစ်သည်။ တောင်ကို နောက်ခံထားပြီး ရေကို မျက်နှာမူထားသည့် လီကျားချန်၏ ဗီလာမှာ မှူးမတ်များ၊ ဘုရင်များ ခြံရံထားသည့် ပုံစံမျိုးပင် ဖြစ်သည်။

​"တကယ်ကို ခမ်းနားပါတယ်"

မာဟွာထန်ကလည်း ထောက်ခံသည်။

​လင်းဖန်ကတော့ အနည်းငယ် ပြုံးရုံသာ ပြုံးလိုက်သည်။ အခြားသူများ၏ မျက်လုံးထဲတွင် ဤဗီလာမှာ အလွန်ကြီးကျယ်သော်လည်း သူ၏ အမြင်တွင်မူ သာမန်မျှသာ ဖြစ်သည်။ ခန့်မှန်းခြေအရ ဤဗီလာသည် ယွမ် ၃ ဘီလီယံမှ ၄ ဘီလီယံခန့်သာ တန်ဖိုးရှိသော်လည်း၊ သူ၏ ကျင်းလင်မြို့ရှိ ကျန့်ခန်းဥယျာဉ်မှာမူ အနည်းဆုံး ယွမ် ၂၀ ဘီလီယံ တန်ဖိုးရှိပြီး ဖုန်းရွှေပုံစံမှာလည်း ဤထက် များစွာ ပိုမိုကြီးမားလှသည်။

​သို့သော်လည်း ယနေ့ ၎င်းတို့ပိုင်ဆိုင်ထားသည့် စည်းစိမ်ဥစ္စာများအရဆိုလျှင် ဤဗီလာလေးမှာ ပြောပလောက်စရာ မဟုတ်တော့ပေ။ တစ်သက်လုံး ကမ္ဘာ့အရှားပါးဆုံး အစားအစာများကို စားသုံးနေလျှင်ပင် ၎င်းတို့၏ ဘီလီယံပေါင်းများစွာသော ချမ်းသာကြွယ်ဝမှုမှာ ကုန်နိုင်မည် မဟုတ်တော့ချေ။