အနောက်ပိုင်းဟုန်ကို တာဝန်ယူခြင်း

သွေးစွန်းနေသော မက်မွန်ပန်းများက နဂါး၏ ခန္ဓာကိုယ်မှနေ၍ပျံ့နှံ့သွားပြီး၊ မိုးမြေနယ်ပယ်ကို နောက်တစ်ကြိမ် ဖုံးကွယ်သွားလေသည်။

အနောက်ပိုင်းဟုန်၏ အနက်ရှိုင်းဆုံး အစိတ်အပိုင်း၊ အလင်းရောင်ကင်းမဲ့နေသော ချောက်ကမ်းပါးကြီး၏ အပြင်ဘက်တွင်..

ရှန်းယီက မြေပြင်မှထလာရင်း သက်ပြင်းပြင်းပြင်းတစ်ချက် ရှူလိုက်၏။ သူ၏မျက်လုံးများထဲမှ မီးခိုးရောင်များ မှေးမှိန်သွားပြီး၊ သူ၏ရင်ဘတ်ပေါ်ရှိ ထိုးဖောက်ဝင်နေသော ဓားခုတ်ရာကို ညင်သာစွာပွတ်သပ်လိုက်သည်။

မသေမျိုးနိယာမ၏ စွမ်းအင်သုံးစွဲမှုမှာ ကြီးမားလှပြီး၊ နန်ယန်ကိုယ်တိုင်ကလည်း အမြင့်မြတ်ဆုံး ရတနာနယ်မြေတစ်ခု မဟုတ်ဘဲအခြေခံအုတ်မြစ်များပါးလျလှ၏။ အဓိကမသေမျိုးနိယာမ နှစ်ခုနှင့် နတ်ဘုရားစွမ်းရည်နှစ်ခုကို တစ်ပြိုင်နက်တည်း အသုံးပြုမှသာ အနောက်ပိုင်းနဂါးဘုရင် နှင့် ထိပ်တိုက်ရင်ဆိုင်နိုင်စွမ်းကို သူရရှိခဲ့ခြင်းဖြစ်သည်။

ပွင့်ပွင့်လင်းလင်းပြောရလျှင် နာရီအနည်းငယ်မျှသာကြာမြင့်သောပြင်းထန်သည့် တိုက်ပွဲကပင် ရှန်းယီကိုဆီခန်းပြီး မီးစာကုန်နေသောအခြေအနေသို့ ရောက်ရှိသွားစေခဲ့သည်။

ဤလုပ်ရပ်မှာ အလွန်အန္တရာယ်များလွန်းလှ၏။

ကံကောင်းထောက်မစွာဖြင့်... သူ အနိုင်ရခဲ့ပါသည်။

"ဟူး။"

ရှန်းယီက မတ်မတ်ရပ်လိုက်ပြီး၊ သူ၏လက်များကို ဘေးသို့ချကာ ဤအလင်းရောင်ကင်းမဲ့နေသော ချောက်ကမ်းပါးကြီး၏အစွန်းတွင် ရပ်နေလိုက်၏။

ယခင်က တစ်ကြိမ်မျှမခံစားဖူးသော သက်တောင့်သက်သာရှိမှု ခံစားချက်တစ်ခုက သူ၏ခန္ဓာကိုယ်တစ်ခုလုံးသို့ ပျံ့နှံ့သွားပြီး၊ သူ၏နှုတ်ခမ်းပေါ်တွင် နှလုံးသားထဲမှလာသော အပြုံးတစ်ခုပေါ်လာစေသည်။

အနောက်ပိုင်းဟုန်နှင့် တောင်ပိုင်းဟုန်တို့၏ စွမ်းအင်များကို ပေါင်းစပ်လိုက်လျှင်ပင်၊ ကျန်ရှိနေသောအရှေ့ပိုင်းဟုန် နှင့် မြောက်ပိုင်းဟုန်တို့ကို ကျော်လွန်သောအစွမ်းများနှင့် နှိုင်းယှဉ်လျှင် အလှမ်းဝေးနေဆဲပင်။

သို့သော်အနည်းဆုံးတော့ ယခုအခါ သူနှင့် ဟုန်ကျယ်မသေမျိုးတို့သည် အဆင့်အတန်း တူညီသွားပြီဖြစ်ပြီး၊ ပြိုင်ဘက်၏အကြည့်တစ်ချက်တည်းဖြင့်သတ်ဖြတ်ခံရနိုင်သော ပုရွက်ဆိတ်မဟုတ်တော့ပေ။

၎င်းကို တွေးမိသောအခါ ရှန်းယီသည် စနစ်မျက်နှာပြင်ဆီသို့ လှမ်းကြည့်လိုက်၏။

[လက်ကျန် နတ်ဆိုးသက်တမ်း : ၁၆၃၇၀၀၀၀ နှစ်]

အနောက်ပိုင်းဟုန်သို့ ရောက်ရှိလာကတည်းက၊ နတ်ဆိုးသက်တမ်း၏တစ်ခုတည်းသော သုံးစွဲမှုမှာ လောဘဝံပုလွေကြယ်တာရာဖွဲ့စည်းပုံမသေမျိုးအစီအရင်ကို ပြီးမြောက်စေရန်အသုံးပြုခဲ့သော နှစ်သိန်းပေါင်းအနည်းငယ်မျှသာဖြစ်ပြီး ကျန်ရှိနေသည်များမှာ ဤနေရာတွင်အားလုံးရှိနေသေး၏။

ဤအရေအတွက်မှာ ရှန်းယီမျှော်လင့်ထားသည့်အရာ မဟုတ်သည်မှာ ရှင်းလင်းနေပါသည်။

နတ်ဆိုးအင်ပါယာတံဆိပ်တုံးနှစ်ခုကို ပေါင်းစည်းရန်အတွက်သိသာထင်ရှားသော ကွာဟချက်တစ်ခု ရှိနေဆဲပင်။

အဓိကအကြောင်းရင်းမှာ ကျောက်စိမ်းဦးချို ငွေရောင်နဂါး အသိုက်အမြုံတစ်ခုလုံးနီးပါးကို သူ သတ်ဖြတ်ခဲ့ပြီးတစ်ဒါဇင်ခန့်သာ ကျန်ရှိတော့သောကြောင့်ဖြစ်သည်။နှစ်သန်းပေါင်း နှစ်သန်းခန့် ရရှိထားခြင်းကပင် လုံလောက်နေပြီဖြစ်သည်။

နတ်ဆိုးသက်တမ်း၏အမှန်တကယ် များပြားသော ပမာဏမှာ အနောက်ပိုင်းနဂါးနန်းတော်၏ လက်အောက်ခံအင်အားစုများထံမှ လာသင့်သော်လည်း ယနေ့ညအပြီးတွင်၊ သူတို့သည် ထွက်ပြေးသွားနိုင်သဖြင့် တောင်ပိုင်းဟုန်မှ စီနီယာများ၏လက်ချက်ဖြင့် သေဆုံးသွားကြခြင်း သို့မဟုတ် ကျယ်ပြောလှသောရေပြင်ထဲတွင် လူစုကွဲကာပုန်းအောင်းသွားကြဖွယ်ရှိသည်။

အင်းလေ... အမြတ်နဲ့ အရှုံးဆိုတာ ရှိတာပဲ။

မည်သို့ပင်ဆိုစေကာမူ ရှန်းယီက လူတစ်ယောက်သာဖြစ်ပြီး စစ်မှန်သော ယမသေမျိုးနတ်ဘုရားတစ်ပါး မဟုတ်ပေ။ အရာရာ ပြီးပြည့်စုံရန် သေချာစွာမလုပ်နိုင်ဘဲ သူ၏အကောင်းဆုံးကြိုးစားအားထုတ်မှုကိုသာ ပြုလုပ်နိုင်သည်။

နတ်ဆိုးသက်တမ်းကို ဖြည်းဖြည်းချင်းစုဆောင်းနိုင်ပါသည်၊ သို့မဟုတ်ပါက သူသည် ဤရေပြင်တစ်ခုလုံးတွင်လိုက်လံရှာဖွေရုံသာ ရှိတော့၏။

သို့သော် အနောက်ပိုင်းဟုန်၏ မသေမျိုးစွမ်းအားကိုကြိုတင်ဆုပ်ကိုင်မထားပါက သူသာလျှင် သေဆုံးရသူဖြစ်သွားနိုင်လေ၏။

"စကြရအောင်။"

သူမြန်မြန်လုပ်ရမည်ဖြစ်ပြီး၊ အပြင်ဘက်တွင် အရှေ့ပိုင်းဟုန်မှ မောင်နှမနှစ်ဦး စောင့်နေကြောင်းကို မမေ့သင့်ပေ။ ပူးပေါင်းဆောင်ရွက်သည့် ဆက်ဆံရေးဖြစ်သော်လည်း၊ ရှန်းယီသည် ဤမျှ ထိတ်လန့်ဖွယ်ကောင်းသော ကိစ္စရပ်များကို ဖော်ထုတ်ပြသလိုခြင်း မရှိချေ။

သူသည် အချိန်အတော်ကြာ ဂနာမငြိမ်ဖြစ်နေသော ခယ်ရှစ်စန်းကို သတိပေးလိုက်ပြီး၊ မဟာနတ်ဆိုးဖိနှိပ်ခြင်းကျောက်တုံးတစ်ခုကို ပေါင်းစည်းရန် သူ၏လက်ကို ဝှေ့ယမ်းလိုက်ကာ၊တစ်ချိန်တည်းမှာပင် ချီကျောက်ဝမ်၏ နတ်ဆိုးဝိညာဉ်ကို စတင်ပုံဖော်လိုက်၏။

ဤနဂါးသိုက်ကို ဖိနှိပ်ရန်အတွက် အဆင့်မီရုံကလေးမျှသာရှိသော အနောက်ပိုင်းနဂါးနန်းတော်၏ဒုတိယမင်းသားမှာ လုံလောက်ပါသည်။ ၎င်းထက်နိမ့်ပါက သွေးမျိုးဆက်ပြင်းအားလုံလောက်မည်မဟုတ်ဘဲ၊၎င်းထက်မြင့်သော အနောက်ပိုင်းနဂါးဘုရင်ကဲ့သို့သော သူများကိုမူ... ရှန်းယီ စတေးရန်ဆန္ဒမရှိခဲ့ချေ။

မည်သို့ပင်ဆိုစေ သူသည် ခယ်ရှစ်စန်းကို တာအိုနယ်ပယ်သို့ ဝင်ရောက်နိုင်ရန်ကူညီပေးရာတွင် ဤနဂါးအလောင်းများကို အသုံးပြုရန်မှီခိုနေရဆဲပင်။

"ကျောက်ဝမ်က သခင်ကို အရိုအသေပေးပါတယ်။"

မကြာမီပင်၊ရှည်လျားသော လှေကားထစ်ပေါ်တွင် ဖိခြေသတ်ဖြတ်ခံခဲ့ရသော ချီကျောက်ဝမ်က ရှန်းယီ၏ရှေ့တွင် ဒူးထောက်နေလေပြီဖြစ်၏။

ချက်ချင်းပင် ရှန်းယီက သူ့ကို ဖမ်းဆွဲကာ နဂါးသိုက်ထဲသို့ တိုက်ရိုက်ပစ်ချလိုက်ပါသည်။

"..."

ချီကျောက်ဝမ်က သိပ်သည်းလှသော ငွေဖြူရောင် အလင်းတန်းများထဲသို့ ထိုးဆင်းသွား၏။ သူ၏ ရူးသွပ်ဆုံးအိပ်မက်များထက် ကျော်လွန်နေသော ထူးဆန်းသည့်နည်းလမ်းဖြင့် နဂါးသိုက်ကို သူ ပိုင်ဆိုင်ရလိမ့်မည်ဟု ဘယ်သောအခါကမျှ စိတ်ကူးမယဉ်ခဲ့ဖူးချေ။

သူ၏အမြင်အာရုံထဲတွင်၊ နက်မှောင်သော ရွှေချည်မျှင်ဝတ်ရုံကို ဝတ်ဆင်ထားသည့် အရပ်မြင့်မြင့်နှင့် ခွန်အားကြီးမားသောပုံရိပ်တစ်ခုက သူ၏သခင်ဘေးတွင် ပေါ်လာခဲ့သည်။

ရွှေရောင်လွှမ်းနေသောအကြည့်များရှိသည့် ထိုနဂါးနတ်ဆိုးက၊ ထူးဆန်းသောမကောင်းဆိုးဝါး အငွေ့အသက်များကို သယ်ဆောင်လာကာ အေးစက်စွာ ငုံ့ကြည့်နေ၏။

"နတ်ဆိုးတစ်သောင်းခန်းမ၊ အရှေ့ပိုင်း ခန်းမသခင် လား"

သူပဲ ချီကျောက်ဝမ်က သူ၏ဖခင်အပေါ် ကြီးမားသော ဖိအားများပေးနိုင်သည့် ဤကြောက်မက်ဖွယ်ကောင်းသော ပုဂ္ဂိုလ်နှင့် လွန်စွာ ရင်းနှီးကျွမ်းဝင်နေပါသည်။

တစ်ခဏချင်းမှာပင်၊ ဘာတွေဖြစ်နေသည်ကို သူ ရုတ်တရက်နားလည်သွားပြီး ထိတ်လန့်စွာဖြင့် သူ၏မျက်လုံးများ ပြူးကျယ်သွားတော့သည်။

အနောက်ပိုင်းဟုန်တွင် ပဟေဠိဆန်ဆန်ထွက်ပေါ်လာသော သေမင်းတမန်ရန်သူများမှာ များများစားစား မရှိခဲ့ဖူးချေ။ အစမှအဆုံး၊ အရာအားလုံးသည် လူတစ်ယောက်ကိုစော်ကားမိခြင်းကြောင့်သာ ဖြစ်ပါသည်။

ခယ်ရှစ်စန်း၏ လေးစားမှုနှင့် နှိမ့်ချမှုအပြည့်ရှိသော အမူအရာကို ကြည့်ရင်း။

ချီကျောက်ဝမ်က သူ၏ ရင်ဘတ်ကို တင်းကြပ်စွာ ဖိထားလိုက်မိသည်။

အနန္တတာအိုအင်ပါယာဂိုဏ်း၏ အပယ်ခံ၊ နန်ယန်၏ဂိုဏ်းချုပ်ဟု ယူဆရသော သူ၏လက်ရှိသခင်သည်၊ အမှန်တကယ်တော့ နတ်ဆိုးတစ်သောင်းခန်းမ၏ အရှင်သခင်လည်း ဖြစ်နေသေး၏။

"ကဲ၊ ဆက်မကြည့်နဲ့တော့။"

ဤနဂါးသားတော်က နဂါးသိုက်ရှိ ပုံမှန်မဟုတ်သောအခြေအနေများကို အဆင့်မီရုံကလေးမျှ ထိန်းချုပ်နိုင်ကြောင်း ရှန်းယီအတည်ပြုပြီးသည်နှင့်၊ ပြိုကျပျက်စီးနေပြီဖြစ်သော ခန်းမကြီးဆီသို့ ပြတ်သားစွာ လှည့်ကြည့်လိုက်သည်။

များပြားလှသောသက်တမ်းများက နတ်ဆိုးတစ်သောင်း အနောက်ပိုင်းခန်းမအတွင်းသို့ လျင်မြန်စွာ စီးဆင်းသွားသည်။

အန်းယီက ရာဇပလ္လင်အလယ်တွင် ထိုင်နေပြီး၊ သူမ၏လက်များက လက်ရန်းများကို ရုတ်တရက် တင်းကျပ်စွာ ဆုပ်ကိုင်လိုက်၏။ ထိုအချိန်တွင် အောက်ဘက်ရှိ နတ်ဆိုးအုပ်စုကြီးသည် မြင့်တက်လာသောအနက်ရောင်ချီစွမ်းအင်များကြားတွင် တညီတညွတ်တည်း ဒူးထောက်လိုက်ကြပါသည်။

တစ်ခဏချင်းမှာပင်၊ နတ်ဆိုးတစ်သောင်းခန်းမ၏ ခမ်းနားထည်ဝါသောစွမ်းအင်ကြီးများသည် ဤနေရာသို့ ပြင်းထန်စွာဆင်းသက်လာလေသည်။

နတ်ဆိုးသက်တမ်းများမှာ ရူးသွပ်စွာ စီးဆင်းသွားပြီး ကွက်လပ်မှန်သမျှကို ဖြည့်ဆည်းကာ၊ အပြည့်အဝလွှမ်းခြုံရင်း ပြီးပြည့်စုံစေရန် ကြိုးပမ်းနေသည်။

သို့သော် ဤပမာဏမှာနတ်ဆိုးအင်ပါယာ တံဆိပ်တုံးကို ပေါင်းစည်းရန်လိုအပ်သော နတ်ဆိုးသက်တမ်းနှင့် နှိုင်းယှဉ်ပါက အနည်းငယ်မျှသာ ရှိသေးသည်။

သွေးစွန်းနေသော ကျောက်စိမ်းနီနှင့်တူသည့် တံဆိပ်တုံးတစ်ခုက အန်းယီ၏ရှေ့တွင် တဖြည်းဖြည်း ထွက်ပေါ်လာပါသည်။

အရှေ့ပိုင်းခန်းမ၏ မိုးပြာရောင်နဂါး တံဆိပ်တုံးပေါ်ထွက်လာပြီးနောက်၊ အနောက်ပိုင်းခန်းမ၏ နှင်းကျားတံဆိပ်တုံးကိုလည်း ဖွဲ့စည်းလိုက်နိုင်ပြီဖြစ်သည်။

တစ်ချိန်တည်းမှာပင်၊ ရှန်းယီ၏ စိတ်အာရုံသည် သူပိုင်ဆိုင်ထားပြီးဖြစ်သော ပြင်ပရှိ ကျယ်ပြောလှသည့် ရေနှင့်ကုန်းမြေများဆီသို့ အခြားသော ထပ်တူခမ်းနားသည့် ရေနှင့်ကုန်းမြေသစ်တစ်ခုကို ချိတ်ဆက်လိုက်၏။

ဟုန်နှစ်ခု၏ မသေမျိုးစွမ်းအားများမှာ ယခုအခါ သူ၏ပိုင်ဆိုင်မှု ဖြစ်လာခဲ့ပြီဖြစ်သည်။

ရှန်းယီ မျက်လုံးများကို မှိတ်ကာ၊ အသက်ရှူသံ အနည်းငယ်မျှပင်မထွက်ပေါ်စေဘဲ ထိုနေရာတွင် တိတ်ဆိတ်စွာ ရပ်နေလိုက်သည်။

သို့သော် သခင်၏ကျောပြင်ကို ကြည့်နေသော ခယ်ရှစ်စန်းသည် သူ၏အငွေ့အသက် ပြောင်းလဲသွားမှုကို ရှင်းလင်းစွာခံစားသိရှိနိုင်လေသည်။ လုံးဝ မျှော်လင့်ချက်ကင်းမဲ့သွားစေလောက်သည့် ဖိအားတစ်ခုပင်။

ယခုအခါ သူသည် ကောင်းကင်ဘုံနယ်ပယ် ပြီးပြည့်စုံခြင်းအဆင့်ရှိ မဟာနတ်ဆိုးဖိနှိပ်ခြင်း ကျောက်တုံးတစ်တုံးဖြစ်နေသော်လည်း၊ ဤသွယ်လျကာ အားနည်းနေသောပုံရိပ်၏ ရှေ့မှောက်တွင်၊ တည့်တည့်မကြည့်ရဲသည့် ခံစားချက်မျိုးရှိနေဆဲဖြစ်ပြီးအလိုအလျောက်ပင် ဒူးထောက်ချင်စိတ်များ ဖြစ်ပေါ်နေမိ၏။

ပိုးဟပ်တစ်ကောင်က ကောင်းကင်ကို မော့ကြည့်နေရသလိုမျိုးပင်။

ရှန်းယီ မျက်လုံးများကို ဖွင့်လိုက်ပြီး၊ သူ၏ရှေ့တွင် ဝပ်နေသော ခယ်ရှစ်စန်းကို ကြည့်ကာ သူ၏လက်ကို တသ်ဖက်လူ၏ နဖူးပေါ်တွင် တင်လိုက်ပါသည်။