အခန်း (၂၉၇-၂၉၈)

အခန်း ၂၉၇ - အနောက်ဘက်ဒေသ၏ ဆယ်နှစ်တာကာလ

ရှောင်မို သေဆုံးသွားပြီဟူသော သတင်းက အနောက်ဘက်ဒေသ တစ်ခုလုံးသို့ အလွန်တရာ မြန်ဆန်သော နှုန်းထားဖြင့် ပြန့်နှံ့သွားခဲ့လေ၏။

မည်သူပင်ဖြစ်စေကာမူ ရှောင်မို ကျဆုံးသွားပြီဟူသော သတင်းကို ကြားလိုက်ရသောအခါ သူတို့၏ ရင်ထဲတွင် မယုံကြည်နိုင်မှုများဖြင့် ပြည့်နှက်သွားပြီး သူတို့၏ ပထမဆုံး အတွေးက ၎င်းမှာ သတင်းမှားတစ်ခု သက်သက်သာ ဖြစ်မည်ဟု တွေးထင်ခဲ့ကြပေသည်။

အဘယ်ကြောင့်ဆိုသော် သူတို့က ဤကိစ္စကို စိတ်ကူးပင် မယဉ်နိုင်ခဲ့ကြသောကြောင့်တည်း။

တစ်ချိန်က မည်သူမျှ ယှဉ်ပြိုင်နိုင်ခြင်း မရှိခဲ့သော၊ ထိုမျှလောက် မာနထောင်လွှားလှသည့် အမျိုးသားက တကယ်ကြီး ဤကဲ့သို့ပင် ကျဆုံးသွားခဲ့ရလေသလား။

သူတို့၏ ရင်ထဲတွင် သူတို့က ရှောင်မိုကို မုန်းတီးသည်ဖြစ်စေ၊ ကြောက်ရွံ့သည်ဖြစ်စေ။

ရှောင်မိုအပေါ် မည်သို့သော ခံစားချက်မျိုး ထားရှိသည်ဖြစ်စေကာမူ။

အနောက်ဘက်ဒေသရှိ လူတိုင်းက ရှောင်မိုနှင့် ပတ်သက်၍ တူညီသော နားလည်သဘောပေါက်မှု တစ်ခု ရှိနေခဲ့လေ၏။ ယင်းမှာ ရှောင်မို၏ စွမ်းအားက ရှေးခေတ်ကာလများကတည်းက အကြီးကျယ်ဆုံး ဖြစ်သည်ဆိုသည့် အချက်ပင်တည်း။

ရှောင်မို၏ ပါရမီနှင့်ဆိုလျှင် ဒဏ္ဍာရီလာ ပျောက်ဆုံးနေသော အဆင့်နှစ်ခုသို့ သူ ဝင်ရောက်ရန်မှာ မဖြစ်နိုင်သည့် အရာတစ်ခု မဟုတ်ဟုပင် လူတိုင်းက ယုံကြည်ထားခဲ့ကြပေသည်။

မည်သို့ပင်ဆိုစေကာမူ မသေမျိုးအဆင့်တွင် ရှိနေစဉ်မှာပင် ဤလောကတွင် ပြိုင်ဘက်ကင်းနေသော ကျင့်ကြံသူ တစ်ယောက်ကို တစ်ခါဖူးမျှ မြင်တွေ့ဖူးကြပါသလား။

ရှောင်မို၏ စွမ်းအားနှင့်ဆိုလျှင် သူက အနောက်ဘက်ဒေသကို နှစ်ပေါင်း သောင်းနှင့်ချီ၍ အုပ်စိုးသွားသင့်သည်ဟု သူတို့အားလုံး ယုံကြည်ထားခဲ့ကြလေ၏။

ရှောင်မို မသေဆုံးမချင်း မည်သည့် ကျင့်ကြံသူကမျှ သူ့ကို မော့ကြည့်ပြီး သူ၏ အကြည့်ကို ရင်ဆိုင်ရဲမည် မဟုတ်ပေ။

သို့ဆိုလျှင် ကောလာဟလတွေက ရှောင်မို သေသွားပြီဟု ဆိုနေသည်လား။

ရှောင်မိုက ဘယ်လိုလုပ်ပြီး သေနိုင်မှာလဲ။

သူ့ကို ဘယ်သူကများ သတ်နိုင်မှာလဲ။

သို့သော် နောက်ပိုင်းတွင် အကြိမ်ကြိမ် စုံစမ်းမေးမြန်းပြီးနောက် ယင်းမှာ အမှန်တရား ဖြစ်ကြောင်းကို သူတို့ သိရှိလိုက်ကြရလေ၏။

ထိုမာနကြီးလှသော ရှောင်မိုသည် နောက်ဆုံးတွင် မဟာတာအိုကို ဆန့်ကျင်ခဲ့ပြီး သူ၏ စည်းမျဉ်းများကို မဟာတာအိုထဲသို့ ပေါင်းစပ်နိုင်ရန်အတွက် နောက်ဆုံးတွင် သူ၏ ခန္ဓာကိုယ်ရော တာအိုပါ ပျက်စီးကာ သေဆုံးသွားခဲ့ရချေပြီ။

အနောက်ဘက်ဒေသရှိ ကျင့်ကြံသူများက ဤသတင်းကို သိရှိသွားသောအခါ သူတို့မှာ မချိတင်ကဲ သက်ပြင်းမချဘဲ မနေနိုင်ခဲ့ကြချေ။

ရှောင်မိုက ဘာကြောင့်များ ဤကဲ့သို့ ပြုလုပ်ခဲ့သလဲ ဆိုတာကို သူတို့ နားမလည်နိုင်ခဲ့ပေ။

အနောက်ဘက်ဒေသ၏ အုပ်စိုးရှင် တစ်ယောက် ဖြစ်ရတာ မကောင်းလို့လား။ သူက ဘာလို့ သူ့ရဲ့ တောက်ပနေတဲ့ အနာဂတ်ကို စွန့်လွှတ်ခဲ့ရတာလဲ။

သို့သော် မည်သို့ပင်ဖြစ်စေကာမူ လူအများစု၏ ရင်ထဲတွင် ရှောင်မိုက ကောင်းကင်တာအိုကို ဆန့်ကျင်ပြီး အနောက်ဘက်ဒေသအတွက် စည်းမျဉ်းများကို ချမှတ်ပေးခဲ့သောကြောင့် ရှောင်မိုအပေါ် သူတို့၏ လေးစားမှုက နောက်ထပ် အဆင့်တစ်ဆင့်သို့ မြင့်တက်သွားခဲ့လေ၏။

သာမန်ပြည်သူများ၏ ရင်ထဲတွင်ပင် ရှောင်မိုက နတ်ဘုရားတစ်ပါးအလား ဖြစ်နေခဲ့ချေပြီ။

အနောက်ဘက်ဒေသရှိ သာမန်ပြည်သူ မင်းဆက် အများအပြားက ရှောင်မိုအတွက် ကျောင်းဆောင်များကိုပင် အလိုအလျောက် တည်ဆောက်ပေးခဲ့ကြပေသည်။

ရှောင်မိုက အနောက်ဘက်ဒေသရှိ လူဦးရေ ခုနစ်ဆယ်ရာခိုင်နှုန်း၏ သက်တမ်း ဆယ်ပုံနှစ်ပုံကို ယူဆောင်သွားခဲ့သည်မှာ မှန်ပေ၏။

သို့သော် ရှောင်မို ချမှတ်ပေးခဲ့သော စည်းမျဉ်းများက အနောက်ဘက်ဒေသအတွက် နှစ်ခြောက်ထောင် တိုင်တိုင် တည်ငြိမ်အေးချမ်းမှုကို ယူဆောင်ပေးလာမည် မဟုတ်ပါလား။

သို့ရာတွင် ရှောင်မို သေဆုံးသွားပြီးနောက် ဂိုဏ်းများစွာက သူတို့တွင် အသက်ရှူချောင်မည့် အခွင့်အရေးတစ်ခု ရရှိသွားပြီဖြစ်ကြောင်း သတိပြုမိသွားခဲ့ကြလေ၏။

ထို့အပြင် အနောက်ဘက်ဒေသ တစ်ခုလုံးရှိ ဂိုဏ်းများ အားလုံးက ကြီးမားလှသော ကံကြမ္မာအခွင့်အရေးကြီး တစ်ခုကို ရင်ဆိုင်ရတော့မည် ဖြစ်ကြောင်းကိုလည်း သူတို့ နားလည်သဘောပေါက်သွားခဲ့ကြပေသည်။

အဘယ်ကြောင့်ဆိုသော် ထိုအချိန်က ရှောင်မိုသည် အရှေ့၊ အနောက်၊ တောင်၊ မြောက် စစ်ချီခဲ့ပြီး မရေမတွက်နိုင်သော ဂိုဏ်းများကို ဖျက်ဆီးကာ ဂိုဏ်းများ၏ အဆင့်မြင့် အရာရှိ အများအပြားကို သတ်ဖြတ်ခဲ့သောကြောင့်ပင်။

ရှောင်မိုတွင် ဤဂိုဏ်းများကို ပေါင်းစည်းရန် အချိန်မရလိုက်ချေ။

ဖျက်ဆီးခံလိုက်ရသော ဂိုဏ်းများစွာအတွက် ရှောင်မိုက သူတို့၏ ဘဏ္ဍာတိုက်များကို ဖွင့်ကာ သူ၏ တပ်ဖွဲ့ဝင်များကို ဆုချလေ့ရှိသည်မှာ မှန်ပေ၏။

သို့သော် ရှောင်မိုက ဂိုဏ်းများစွာကို ဖျက်ဆီးခဲ့ပြီး ရတနာများလွန်းလှစွာ ရရှိခဲ့သောကြောင့် ဂိုဏ်းရတနာ အများအပြားမှာ ဆုမချရသေးဘဲ ထိုနေရာတွင်သာ ပုံအောနေခဲ့ကာ မည်သူကမျှ မထိရဲခဲ့ကြပေ။

ရတနာများအပြင် ကောင်းချီးပေးခံရသော မြေမြတ်များနှင့် လိုဏ်ဂူ ကောင်းကင်ဘုံများက ပို၍ပင် ရှားပါးသော တည်ရှိမှုများ ဖြစ်ကြပြီး ဝိညာဉ်ချီများ ပေါကြွယ်ဝသော နေရာကို ရှာဖွေရန်မှာ အလွန် ခက်ခဲလှပေသည်။

ရှောင်မိုက ဂိုဏ်းများစွာကို ဖျက်ဆီးခဲ့သောကြောင့် ပိုင်ရှင်မဲ့ နယ်မြေများစွာ ဖြစ်ပေါ်လာခဲ့ရာ ကျင့်ကြံသူ အများအပြားက ထိုနေရာများကို ကြာမြင့်စွာကတည်းက တပ်မက်နေခဲ့ကြချေပြီ။

ရှောင်မိုထံ အညံ့ခံခဲ့သော ဂိုဏ်းများနှင့် ပတ်သက်၍ဆိုလျှင် ကောင်းကင်တာအို စာလိပ်ပေါ်တွင် အသိဝိညာဉ် သစ္စာဆိုကာ သစ္စာစောင့်သိခဲ့ကြသော ဂိုဏ်းကြီးများမှလွဲ၍ ဂိုဏ်းအများစုက ရှောင်မိုကို နှုတ်ဖြင့်သာ သစ္စာခံခဲ့ကြခြင်း ဖြစ်လေ၏။

မည်သို့ပင်ဆိုစေကာမူ ကောင်းကင်တာအို စာလိပ်မှာ မူလကတည်းကပင် အလွန်တရာ အဖိုးတန်လှပြီး ၎င်းနှင့် ပြုလုပ်ထားသော သစ္စာတရားများက မဟာတာအိုနှင့် ချိတ်ဆက်နေသောကြောင့် မည်သည့် သာမန်လူကမျှ ကောင်းကင်တာအို စာလိပ်ကို အသုံးပြု၍ မရနိုင်ပေ။

ဤအကြောင်းရင်းများ အားလုံးကြောင့် ရှောင်မို၏ သေဆုံးမှုက မိစ္ဆာနှိမ်နင်းရေး စေတီတော်ကြီး ပြိုကျသွားသည်နှင့် တူညီသွားခဲ့လေတော့သည်။

မိစ္ဆာဂိုဏ်းများနှင့် ဗုဒ္ဓကျောင်းတော်များ နှစ်ခုစလုံးက ပြန်လည် ထူထောင်မှုများစွာကို မြင်တွေ့လာရပြီး သူတို့က ထိုပိုင်ရှင်မဲ့ နယ်မြေများအတွက် အခြား ဂိုဏ်းများနှင့်လည်း အပြိုင်အဆိုင် လုယူနေခဲ့ကြလေ၏။

ရှောင်မို၏ ဆုလာဘ်များကို ရရှိကာ သန္ဓေတည်ဝိညာဉ်အဆင့်သို့ ဖောက်ထွက်နိုင်ခဲ့ကြသော ကျင့်ကြံသူ အချို့က လူအနည်းငယ်ကို စုစည်း၍ သူတို့၏ ကိုယ်ပိုင် ဂိုဏ်းများကိုပင် တည်ထောင်လိုက်ကြပေသည်။

ထို့အပြင် ဤအချိန်၌ အနောက်ဘက်ဒေသတွင် ကောင်းကင်ဘုံတက်လှမ်းခြင်းအဆင့် ကျင့်ကြံသူများကဲ့သို့သော ထိပ်တန်း အစွမ်းထက် ကျင့်ကြံသူကြီးများ မရှိတော့ဘဲ မသေမျိုးအဆင့် ကျင့်ကြံသူ အသီးသီးက စစ်ပြီးကာလ ကိစ္စရပ်များနှင့် အလုပ်ရှုပ်နေကြသောကြောင့် ဤကျင့်ကြံသူများက ပို၍ပင် ရဲတင်းလာခဲ့ကြလေ၏။

သို့သော် ဤကိစ္စများက သာမန်ပြည်သူများနှင့်တော့ မသက်ဆိုင်ခဲ့ချေ။

ထို့အပြင် အနောက်ဘက်ဒေသရှိ ကျင့်ကြံသူ အများစုမှာ ယခုအခါ အခြားသူများ၏ သွေးသားနှင့် အသိဝိညာဉ်ကို အာဟာရအဖြစ် အသုံးပြုသော မိစ္ဆာကျင့်စဉ်များကို မကျင့်ကြံရဲကြတော့ပေ။

ယေဘုယျအားဖြင့် ဆိုရလျှင် စစ်ပြီးကာလ မတည်မငြိမ် ဖြစ်နေသည့် အချိန်တွင်ပင် အနောက်ဘက်ဒေသမှာ ယခင် သာမန်အချိန်များထက် ပိုမို တည်ငြိမ်နေခဲ့ချေပြီ။

ရှောင်မို သေဆုံးပြီးနောက် အနန္တတာအို ဂိုဏ်း၏ အခြေအနေနှင့် ပတ်သက်၍ဆိုရလျှင်။

အနန္တတာအို ဂိုဏ်းမှ ကျင့်ကြံသူ အများစုမှာ ရှောင်မို သေဆုံးသွားပြီဟူသော သတင်းကို ကြားလိုက်ရသောအခါ အလွန်အမင်း စိုးရိမ်ပူပန်သွားခဲ့ကြလေ၏။

မူလက သူတို့မှာ သူတို့၏ အနာဂတ်အတွက် မျှော်လင့်ချက်များဖြင့် ပြည့်နှက်နေခဲ့ကြပေသည်။

မည်သို့ပင်ဆိုစေကာမူ ဂိုဏ်းချုပ်ရှောင်က အနန္တတာအို ဂိုဏ်း၏ ဂိုဏ်းချုပ် ဖြစ်လာကတည်းက သူတို့က ဂိုဏ်းချုပ်ရှောင်၏ နောက်သို့ အမြဲတစေ လိုက်ပါခဲ့ကြလေ၏။

အနန္တတာအို ဂိုဏ်းက ဝိုင်းရံပိတ်ဆို့ ခံထားရချိန်တွင်ပင် သူတို့ထဲမှ တစ်ယောက်မျှ ထွက်ပြေးခြင်း မရှိခဲ့ကြချေ။

ထို့အပြင် ဂိုဏ်းချုပ်၏ စစ်ချီမှုများနှင့်အတူ အနန္တတာအို ဂိုဏ်းက အကြီးမားဆုံး ဂိုဏ်းကြီးတစ်ခု ဖြစ်လာခဲ့ပြီး အခြား မိစ္ဆာဂိုဏ်းကြီး ကိုးခုကလည်း သူတို့၏ အနန္တတာအို ဂိုဏ်းထံသို့ အညံ့ခံခဲ့ကြပြီ ဖြစ်လေ၏။

အနန္တတာအို ဂိုဏ်း၏ တပည့်များအနေဖြင့် သူတို့ကလည်း သဘာဝကျကျပင် အကျိုးအမြတ်များစွာကို ခံစားခဲ့ကြရပေသည်။

သို့သော် မမျှော်လင့်ဘဲ အနန္တတာအို ဂိုဏ်းက အနောက်ဘက်ဒေသ၏ နံပါတ်တစ် ဂိုဏ်းကြီး ဖြစ်လာပြီးနောက် မကြာမီမှာပင် ရုတ်တရက် ကျဆင်းသွားခဲ့လေ၏။

ကျဆင်းသွားခြင်းက ကိစ္စတစ်ခု ဖြစ်သော်လည်း အဓိက အကြောင်းရင်းမှာ ဂိုဏ်းချုပ်က သူ သက်ရှိထင်ရှား ရှိစဉ်ကာလအတွင်း ဂိုဏ်းများစွာနှင့် ကျင့်ကြံသူ အများအပြားကို စော်ကားမိခဲ့သောကြောင့်ပင်။

အနောက်ဘက်ဒေသ တစ်ခုလုံး နီးပါးက ဂိုဏ်းချုပ်၏ ပြောင်ပြောင်တင်းတင်း ဖျက်ဆီးလုယက်ခြင်းကို ခံခဲ့ရလေ၏။

အနန္တတာအို ဂိုဏ်းမှ ကျင့်ကြံသူများမှာ အနောက်ဘက်ဒေသ တစ်ခုလုံး၊ အထူးသဖြင့် ဗုဒ္ဓကျောင်းတော်များ၏ တိုက်ခိုက်ခြင်းကို ခံရမည်ကို အလွန်အမင်း စိုးရိမ်ပူပန်နေခဲ့ကြပေသည်။

အနန္တတာအိုဂိုဏ်းမှ ကျင့်ကြံသူများ၏ အမြင်တွင် ဗုဒ္ဓကျောင်းတော်များနှင့် ဂိုဏ်းချုပ်ရှောင်တို့မှာ သေတပန် သက်တစ်ဆုံး ရန်သူများ ဖြစ်ကြလေ၏။

ဂိုဏ်းချုပ် မရှိတော့သည့်နောက် ဗုဒ္ဓကျောင်းတော်များက သူတို့၏ ဒေါသကို အနန္တတာအို ဂိုဏ်းအပေါ် ပုံချလာမည်မှာ သဘာဝပင်။

သို့သော် အချိန်များ ကုန်ဆုံးလာသည်နှင့်အမျှ သူတို့က အချက်တစ်ချက်ကို ရှာဖွေတွေ့ရှိသွားခဲ့ကြလေ၏။

ယင်းမှာ ဗုဒ္ဓကျောင်းတော်များက သူတို့၏ အနန္တတာအို ဂိုဏ်းကို ပြဿနာ လာမရှာကြခြင်းပင်။

ဗုဒ္ဓကျောင်းတော်များက လက်စားချေရန်အတွက် အနန္တတာအို ဂိုဏ်းကို တန်ပြန်တိုက်ခိုက်ချင်နေကြကြောင်း အနန္တတာအို ဂိုဏ်းမှ တပည့်များ ကြားသိခဲ့ရသည်မှာ မှန်ပေ၏။

သို့သော် ခုန်းနျန်ကျောင်းတော်မှ ကျောင်းထိုင်ဆရာတော် ရွှီကျင်းနှင့် ဝမ်ရှင်းတို့၏ ကန့်ကွက်မှုကြောင့် ဗုဒ္ဓကျောင်းတော်များမှာ လက်လျှော့လိုက်ရုံသာ တတ်နိုင်ကြလေတော့သည်။

ခုန်းနျန်ကျောင်းတော်၏ ကန့်ကွက်မှုအပြင် ဗုဒ္ဓကျောင်းတော် အများအပြားမှာလည်း စစ်ပြီးနောက်ပိုင်း သူတို့၏ ဩဇာလွှမ်းမိုးမှုကို တိုးချဲ့ရန်နှင့် အခြားသော ကျောင်းတော်များကို သိမ်းပိုက်ရန် အလုပ်ရှုပ်နေခဲ့ကြပေသည်။

ထို့ကြောင့် ဗုဒ္ဓကျောင်းတော် အများစုတွင် တကယ်တမ်း၌ အားလပ်ချိန် သိပ်မရှိခဲ့ကြချေ။

မကြာမီမှာပင် အနန္တတာအို ဂိုဏ်းမှ တပည့်များ၏ စိုးရိမ်ပူပန်နေသော နှလုံးသားများက တဖြည်းဖြည်း တည်ငြိမ်သွားခဲ့လေ၏။

တကယ်တော့ စိတ်အေးအေးထားပြီးနောက် သူတို့က အလွန်အကျွံ စိုးရိမ်ပူပန်ခဲ့မိကြောင်းကို သတိပြုမိသွားခဲ့ကြပေသည်။

အဘယ်ကြောင့်ဆိုသော် လက်ရှိ အခြေအနေအရ အနာဂတ်ရှိ အတော်အတန် ကြာမြင့်မည့် အချိန်ကာလ တစ်ခုအထိ အနောက်ဘက်ဒေသတွင် မည်သည့် ကောင်းကင်ဘုံတက်လှမ်းခြင်းအဆင့် ကျင့်ကြံသူမှ ထွက်ပေါ်လာမည် မဟုတ်သောကြောင့်ပင်။

ထို့ကြောင့် မသေမျိုးအဆင့် ကျင့်ကြံသူများကသာ အမြင့်မားဆုံး တိုက်ခိုက်ရေးစွမ်းအားများ ဖြစ်နေခဲ့လေ၏။

အနန္တတာအို ဂိုဏ်းတွင် မသေမျိုးအဆင့် အစွမ်းထက် ကျင့်ကြံသူကြီး အချို့ ကျန်ရှိနေသေးသည့်အပြင် ဂိုဏ်းကာကွယ်ရေးဝင်္ကပါ၏ ကောင်းချီးပေးမှုကလည်း ရှိနေသေးလေ၏။

သူတို့၏ အနန္တတာအို ဂိုဏ်းတွင် မည်သည့် ပြည်တွင်းရေး ပြဿနာမှ မရှိသရွေ့ အခြေခံအားဖြင့် မည်သူကမျှ အနန္တတာအို ဂိုဏ်းကို ဘာမှ လုပ်နိုင်မည် မဟုတ်ပေ။

ကံကောင်းထောက်မစွာဖြင့် အနန္တတာအို ဂိုဏ်းအတွင်းရှိ ကျင့်ကြံသူများ အားလုံးမှာ ရှောင်မို စစ်မချီခင်ကတည်းက သုတ်သင်ရှင်းလင်း ခံခဲ့ရပြီး ဖြစ်လေ၏။

ယခု အနန္တတာအို ဂိုဏ်းတွင် ကျန်ရှိနေသော ကျင့်ကြံသူများမှာ အနန္တတာအို ဂိုဏ်းအပေါ် ပိုင်ဆိုင်မှု ခံစားချက် အနည်းနှင့်အများ ရှိနေကြပြီ ဖြစ်ပေသည်။

ထို့အပြင် အနန္တတာအို ဂိုဏ်း၏ အကြီးအကဲများကလည်း အချိန်ကာလက ပိုမို အရေးကြီးလေလေ သူတို့က ပိုမို စည်းလုံးညီညွတ်ရန် လိုအပ်လေလေဖြစ်ပြီး ပြည်တွင်းရေး ပဋိပက္ခများထဲသို့ လုံးဝ ကျဆင်းသွား၍ မဖြစ်ကြောင်းကို သိရှိထားကြလေ၏။

ထို့ကြောင့် အောက်ခြေအဆင့် အပြင်စည်းတပည့်များပင် ဖြစ်စေ၊ အထက်အဆင့် ခန်းမသခင်များ၊ တောင်ထွတ်သခင်များနှင့် အကြီးအကဲများပင် ဖြစ်စေ လူတိုင်းက အတူတကွ ပူးပေါင်း ဆောင်ရွက်ခဲ့ကြပေသည်။

လက်ရှိအချိန်က ရှောင်မို သေဆုံးပြီးနောက် တတိယမြောက် လတွင် ဖြစ်လေ၏။

အခန်း ၂၉၈ - အနောက်ဘက်ဒေသ၏ ဆယ်နှစ်တာကာလ

အနန္တတာအို ဂိုဏ်းက ရှောင်မိုအတွက် ခမ်းနားကြီးကျယ်သော ဈာပနအခမ်းအနားကို ကျင်းပခဲ့လေ၏။

ရှောင်မိုက မည်သည့် ရုပ်အလောင်းမျှ ချန်ထားရစ်ခဲ့ခြင်း မရှိသောကြောင့် အထိမ်းအမှတ် ဂူဗိမာန်တစ်ခုကိုသာ တည်ဆောက်နိုင်ခဲ့ပေသည်။

ရှောင်မိုကို ယခင် အနန္တတာအို ဂိုဏ်း၏ ဂိုဏ်းချုပ်များ မြှုပ်နှံရာ ဂူဗိမာန်တွင် မမြှုပ်နှံခဲ့ဘဲ ထိုမြေပြန့်လွင်ပြင်ငယ်လေးထဲတွင်သာ မြှုပ်နှံခဲ့လေ၏။

ဈာပနအခမ်းအနား အပြီးတွင် လူတိုင်း လူစုခွဲသွားကြပြီးနောက် ဝမ်းနည်းပူဆွေးမှု အထိမ်းအမှတ် အဝတ်အစားများကို ဝတ်ဆင်ထားသော ယွီယွင်ဝေ့က သူမ၏ ဂိုဏ်းတူအစ်ကို၏ အုတ်ဂူကျောက်တိုင်ရှေ့တွင် အချိန်အတော်ကြာအောင် တစ်ယောက်တည်း ဒူးထောက်နေခဲ့လေတော့သည်။

ရှောင်မို ကွယ်လွန်သွားခြင်းနှင့်အတူ အနန္တတာအို ဂိုဏ်းကလည်း ဂိုဏ်းချုပ်သစ် တစ်ဦးကို ရွေးချယ်တင်မြှောက်ရန် လိုအပ်လာခဲ့ပေသည်။

သို့သော် မမျှော်လင့်ဘဲ မည်သည့် အကြီးအကဲ၊ ခန်းမသခင်၊ သို့မဟုတ် တောင်ထွတ်သခင်ကမျှ အနန္တတာအို ဂိုဏ်း၏ ဂိုဏ်းချုပ်နေရာကို တပ်မက်ခြင်း မရှိခဲ့ကြချေ။

သူတို့အားလုံးက ရှောင်မို၏ ဂိုဏ်းတူညီမ ယွီယွင်ဝေ့ကို အနန္တတာအို ဂိုဏ်း၏ ဂိုဏ်းချုပ်သစ်အဖြစ် အတူတကွ ပူးပေါင်း၍ အမည်စာရင်း တင်သွင်းခဲ့ကြလေ၏။

ဤသတင်း ပြန့်နှံ့သွားပြီးနောက် အနန္တတာအို ဂိုဏ်းကို စောင့်ကြည့်နေခဲ့ကြသော ကျင့်ကြံသူ အများအပြားမှာ နားမလည်နိုင်အောင် ဖြစ်သွားခဲ့ကြပေသည်။

အဘယ်ကြောင့်ဆိုသော် ယွီယွင်ဝေ့က ကျောက်စိမ်းသန့်စင်ခြင်းအဆင့် ကျင့်ကြံသူ တစ်ဦး သက်သက်သာ ဖြစ်သောကြောင့်တည်း။

သူမက ဘယ်လိုလုပ်ပြီး ခန်းမသခင်များ၊ တောင်ထွတ်သခင်များနှင့် အကြီးအကဲများ အားလုံးကို သူမအား တညီတညွတ်တည်း ကူညီပံ့ပိုးလာအောင် စွမ်းဆောင်နိုင်ခဲ့တာလဲ။

လူအချို့က ယွီယွင်ဝေ့၏ ကိစ္စရပ်များကို ကိုင်တွယ်ဖြေရှင်းပုံ နည်းလမ်းများက အလွန်တရာ ရင့်ကျက်ပြီး ရက်စက်ပြတ်သားလှသဖြင့် မျိုးဆက်ဟောင်း အများအပြားကိုပင် သိမ်ငယ်သွားစေသောကြောင့်ဟု ခန့်မှန်းခဲ့ကြလေ၏။ ဥပမာအားဖြင့် ရှောင်မိုက အနောက်ဘက်ဒေသတွင် စစ်ချီနေစဉ်အတွင်း အနန္တတာအို ဂိုဏ်းရှိ အရာအားလုံးကို ယွီယွင်ဝေ့က စီမံအုပ်ချုပ်ခဲ့ပြီး နှစ်အနည်းငယ်အတွင်း ပြဿနာတစ်စုံတစ်ရာမျှ မပေါ်ပေါက်ခဲ့ခြင်းက အကောင်းဆုံး သက်သေပင် ဖြစ်ပေသည်။

အခြားသူများကမူ ယွီယွင်ဝေ့၏ ကျောက်စိမ်းသန့်စင်ခြင်းအဆင့် စွမ်းအားက ရှောင်မိုကဲ့သို့ပင် ချဲ့ကားပြောဆိုလောက်စရာ ကောင်းနေပြီး သူမ၏ ကျောက်စိမ်းသန့်စင်ခြင်းအဆင့်က အခြားသူများ၏ မသေမျိုးအဆင့်နှင့် နှိုင်းယှဉ်နိုင်သောကြောင့် မျိုးဆက်ဟောင်းများက ယွီယွင်ဝေ့ကို အလျှော့ပေးခဲ့ခြင်း ဖြစ်မည်ဟု ခန့်မှန်းကြပြန်လေ၏။

အချို့ကလည်း အနန္တတာအို ဂိုဏ်း၏ အကြီးအကဲများက ယွီယွင်ဝေ့၏ စွမ်းအားသည် သူမ၏ ဂိုဏ်းတူအစ်ကိုနှင့် နှိုင်းယှဉ်နိုင်လောက်သည်ဟု လောကကြီးက ယုံကြည်လာစေရန် တမင်သက်သက် မှားယွင်းသော အထင်အမြင်တစ်ခုကို ဖန်တီးခဲ့ကြခြင်း ဖြစ်မည်ဟု ယုံကြည်ကြလေသည်။

သို့သော် မည်သို့ပင်ဆိုစေကာမူ ယွီယွင်ဝေ့က နောက်ဆုံးတွင် အနန္တတာအို ဂိုဏ်း၏ ဂိုဏ်းချုပ်နေရာသို့ တက်လှမ်းသွားခဲ့ချေပြီ။

ပြီးတော့ ရှောင်မို၏ ဤဂိုဏ်းတူညီမလေး၏ စွမ်းအားကို မည်သူကမျှ တကယ်တမ်း မစမ်းသပ်ရဲခဲ့ကြချေ။

အကယ်၍ စမ်းသပ်ခြင်းက သေဆုံးခြင်းဟု အဓိပ္ပာယ်ရနေခဲ့လျှင်ကော ဘယ်လိုလုပ်မလဲ။

သို့ရာတွင် ယင်းက ရှောင်မို ကွယ်လွန်ပြီး တတိယမြောက်နှစ်တွင် ဖြစ်လေ၏။

အနန္တတာအို ဂိုဏ်းချုပ် ယွီယွင်ဝေ့က မသေမျိုးအဆင့်သို့ ဖောက်ထွက် ဝင်ရောက်သွားခဲ့ပေသည်။

တိုက်ဆိုင်စွာပင် ယွီယွင်ဝေ့ မသေမျိုးအဆင့်သို့ ဖောက်ထွက်ပြီး စတုတ္ထမြောက်နေ့တွင် သတင်းများ မပြန့်နှံ့ခင်မှာပင်၊ အမြော်အမြင်နည်းပါးသော ဂိုဏ်းအချို့က သူတို့ကိုယ်သူတို့ စွမ်းအားပြည့်ဝနေပြီဟု ခံစားရကာ အနည်းငယ် မာနထောင်လွှားလာပြီး သူတို့၏ ယခင် နာကြည်းချက်များကို လက်စားချေရန်အတွက် အနန္တတာအို ဂိုဏ်းကို ကျူးကျော်ရန် ပူးပေါင်းခဲ့ကြလေ၏။

ထိုစဉ်က သူမ၏ ဂိုဏ်းတူအစ်ကို ပြုလုပ်ခဲ့သလိုပင်။

အနက်ရောင် ဝတ်စုံကို ဝတ်ဆင်ထားသော ယွီယွင်ဝေ့က တောင်ထွတ်ပေါ်တွင် တစ်ယောက်တည်း ထိုင်ကာ အနန္တတာအို ဂိုဏ်းကို စောင့်ကြပ်နေခဲ့ပေသည်။

ထိုကျင့်ကြံသူများက ဂိုဏ်းကို ကျူးကျော်ဝင်ရောက်လာပြီး ယွီယွင်ဝေ့၏ အရှေ့သို့ ရောက်ရှိလာသောအခါ။

ယွီယွင်ဝေ့က သူမ၏ ခါးမှ ကြက်သွေးရောင် အရက်ဘူးကို ဖြုတ်ယူလိုက်ပြီး ခေါင်းကို မော့ကာ ဆန်းလော့သေရည် တစ်ငုံကို သောက်လိုက်လေ၏။ လက်တစ်ဖက်တွင် ဆရာသခင်၏ သွေးရောင် ဓားရှည်နှင့် အခြားလက်တစ်ဖက်တွင် ဂိုဏ်းတူအစ်ကို၏ အနက်ရောင် ကျိုးပဲ့နေသော ဓားကို ကိုင်ဆောင်ထားရင်း သောင်းနှင့်ချီသော ကျင့်ကြံသူ မဟာမိတ်တပ်ဖွဲ့ထံသို့ တစ်လှမ်းချင်း လျှောက်သွားခဲ့လေတော့သည်။

အမွှေးတိုင် တစ်ဝက်စာ အချိန်ကြာပြီးနောက် ယွီယွင်ဝေ့က အိတ်ထဲမှ ပစ္စည်းတစ်ခုကို နှိုက်ယူလိုက်သည့်အလား မသေမျိုးအဆင့် ကျင့်ကြံသူ နှစ်ဦး၏ ခေါင်းများကို အလွယ်တကူ ခုတ်ဖြတ်ပစ်လိုက်လေ၏။

ယွီယွင်ဝေ့က အဆင့်ကျော်လွန်၍ ရန်သူများကို မသတ်ဖြတ်နိုင်ခဲ့သော်လည်း တူညီသော အဆင့်တွင်မူ သူတို့၏ မသေမျိုးအဆင့် ဂိုဏ်းချုပ်များပင် ယွီယွင်ဝေ့၏ လက်ထဲတွင် အချီတစ်ရာတိုင်အောင် မခံနိုင်ခဲ့ကြချေ။

ဤအရာက သူမ၏ စွမ်းအား မည်မျှလောက် ချဲ့ကားလွန်းနေကြောင်းကို ပြသနေခဲ့ပေသည်။

မဟာမိတ် ကျင့်ကြံသူ တပ်ဖွဲ့ကြီးမှာ ဖရိုဖရဲ ထွက်ပြေးသွားကြလေတော့သည်။

ထိုဖြစ်ရပ်အပြီးတွင် သူမ၏ အလှအပအပြင် ယွီယွင်ဝေ့၏ စွမ်းအားက လူတိုင်းကို အံ့သြမင်တက်သွားစေခဲ့လေ၏။

အနန္တတာအို ဂိုဏ်း၏ အတွင်းအပြင် နှစ်ခုစလုံးတွင် မည်သူကမျှ ယွီယွင်ဝေ့၏ စွမ်းအားကို နောက်တစ်ကြိမ် မေးခွန်းမထုတ်ရဲကြတော့ချေ။

သူမက အနန္တတာအို ဂိုဏ်း၏ ဂိုဏ်းချုပ်နေရာကို ခိုင်မာစွာ ရယူနိုင်ခဲ့ချေပြီ။

သတိမထားမိလိုက်ဘဲ နောက်ထပ် သုံးနှစ် ကုန်ဆုံးသွားခဲ့ပြန်ပေသည်။

ရှောင်မို သေဆုံးသွားခဲ့သည်မှာ အချိန်အတော်ကြာပြီ ဖြစ်သောကြောင့် အချို့သော ကျင့်ကြံသူများက စတင်၍ မေ့လျော့လာကြပြီး ရှောင်မို ချမှတ်ထားခဲ့သော စည်းမျဉ်းများကို အလေးအနက် မထားကြတော့ချေ။

သေချာပေါက်ပင် သူတို့က ရှောင်မိုသည် မည်သို့ပင်ဖြစ်စေကာမူ နောက်ဆုံး၌ မသေမျိုးအဆင့် ကျင့်ကြံသူ တစ်ဦး သက်သက်သာ ဖြစ်ပြီး မဟာတာအို၏ စည်းမျဉ်းများကို သူက တကယ်ကြီး ဝင်ရောက်စွက်ဖက်နိုင်ပါ့မလား ဟုလည်း တွေးထင်ခဲ့ကြပုံရပေသည်။

ထို့ကြောင့် သူတို့က စမ်းသပ်ကြည့်ချင်ကြပြီး မိစ္ဆာကျင့်စဉ်များကို ဆက်လက် ကျင့်ကြံချင်ခဲ့ကြလေ၏။

မည်သို့ပင်ဆိုစေကာမူ ပင်ပန်းဆင်းရဲစွာ ကျင့်ကြံရခြင်းနှင့် နှိုင်းယှဉ်လျှင် မိစ္ဆာကျင့်စဉ်များကို ကျင့်ကြံရခြင်းက အလွန်အမင်း သက်တောင့်သက်သာ ရှိလွန်းပြီး ကျင့်ကြံခြင်းအဆင့် တိုးတက်လာမှုကလည်း မျက်စိဖြင့် မြင်တွေ့နိုင်လောက်အောင် မြန်ဆန်လှပေသည်။

အစပိုင်းတွင် ဤကျင့်ကြံသူများက တကယ်ပင် အလွန် ချောမွေ့စွာ ကျင့်ကြံနိုင်ခဲ့ကြလေ၏။

သို့သော် သူတို့က ကောင်းကင်ဒဏ်ခတ်မှုကို ဖြတ်ကျော်ရသောအခါ ထိုကောင်းကင်ဒဏ်ခတ်မှုက ပုံမှန် ကျင့်ကြံသူများထက် ငါးဆ၊ ခြောက်ဆခန့် ပိုမို ပြင်းထန်ပြီး အလွန်အမင်း ကြောက်မက်ဖွယ် ကောင်းနေကြောင်းကို တွေ့ရှိလိုက်ကြရပေသည်။

အခြားသူများ၏ သွေးသားနှင့် အသိဝိညာဉ်ကို အာဟာရအဖြစ် အသုံးပြုကာ ကျင့်ကြံသော မည်သည့် ကျင့်ကြံသူမဆို ချွင်းချက်မရှိ ကောင်းကင်မိုးကြိုးဒဏ်ခတ်မှုတွင် သေဆုံးသွားခဲ့ကြရလေတော့သည်။

ထို့အပြင် အပြစ်ကင်းစင်သော သာမန်ပြည်သူများကို သတ်ဖြတ်သည့် မည်သည့် ကျင့်ကြံသူမဆို နက်နဲသော ကံကြမ္မာ အကျိုးဆက်တစ်ခု၏ ဆွဲငင်ခြင်းကို ခံလိုက်ကြရပေသည်။

ဤပုဂ္ဂိုလ်များက အန္တရာယ်များသော အခြေအနေများသို့ အလွယ်တကူ ကျရောက်သွားတတ်ပြီး ဘေးအန္တရာယ်များနှင့် ကြုံတွေ့ရသောအခါ ၎င်းတို့ကို မကြာခဏဆိုသလို မဖြတ်ကျော်နိုင်ကြဘဲ သူတို့၏ ဝိညာဉ်လွင့်စင်ပျောက်ကွယ်ခြင်းဆီသို့ တိုက်ရိုက် ဦးတည်သွားစေခဲ့လေ၏။

မကြာမီမှာပင် ကျင့်ကြံသူများ အားလုံး လုံးဝ လက်လျှော့သွားကြလေတော့သည်။

ရှောင်မို သေဆုံးပြီးနောက် ဆယ်နှစ်မြောက်နှစ်... ခုန်းနျန်ကျောင်းတော်ရှိ အခန်းတစ်ခန်းထဲတွင် မိန်းကလေးငယ် တစ်ဦးက သူမ၏ ခရီးဆောင်အိတ်များကို ထုပ်ပိုးနေခဲ့ချေပြီ။

"မီကူ"

ဟွန်တွန်းလေး မီကူက ခုတင်ဘေးမှ ခေါင်းမော့လာပြီး ၎င်း၏ သခင်ကို ကြည့်လိုက်လေ၏။

"ငါ ထုပ်ပိုးလို့ ပြီးပြီ မီကူ၊ နင့်အနေနဲ့ ယူသွားချင်တာ တစ်ခုခု ရှိသေးလား။ ဒီတစ်ခေါက် ခရီးက ငါတို့ အရမ်းကြာအောင် သွားရမှာ။"

ဝမ်ရှင်းက သူမ၏ အသံကို ညင်သာစွာ ထား၍ ဟွန်တွန်းလေးကို မေးလိုက်ပေသည်။

"မီကူ၊ မီကူ..." ဟွန်တွန်းလေးက ခေါင်းခါပြလိုက်ပြီး ဝမ်ရှင်း၏ ပခုံးပေါ်သို့ ခုန်တက်သွားခဲ့လေ၏။

"ကောင်းပြီ၊ ဒါဆို သွားကြစို့။"

လွန်ခဲ့သော ဆယ်နှစ်ကလိုပင် ဝမ်ရှင်းက ဟွန်တွန်းလေးနှင့်အတူ ခြံဝင်းထဲမှ လျှောက်ထွက်လာခဲ့ပေသည်။

ပြီးတော့ လွန်ခဲ့တဲ့ နှစ်အနည်းငယ်ကလိုပင် ဝမ်ရှင်းက ခြံဝင်းတံခါးမှ ခြေလှမ်းထွက်လိုက်သည်နှင့် တစ်ပြိုင်နက် ကျောင်းထိုင်ဆရာတော်ကို မြင်တွေ့လိုက်ရလေ၏။

"ကျောင်းထိုင်ဆရာတော် ဘိုးဘိုး" ဝမ်ရှင်းက လက်အုပ်ချီကာ အရိုအသေပေးလိုက်ပေသည်။

"မင်း သွားတော့မလို့လား။" ကျောင်းထိုင်ဆရာတော်က မိန်းကလေး၏ ခရီးဆောင်အိတ်ကို တစ်ချက်ကြည့်ကာ မေးလိုက်လေ၏။

"ဟုတ်ကဲ့။" ဝမ်ရှင်းက ခေါင်းညိတ်လိုက်ရာ သူမ၏ ကြည်လင်သော မျက်လုံးများက စိတ်ပိုင်းဖြတ်ထားမှုများဖြင့် ပြည့်နှက်နေခဲ့ပေသည်။ "ကျွန်မ သူ့ကို သွားရှာတော့မလို့။"

"ဟူး"

ကျောင်းထိုင်ဆရာတော်က မြေးမလေးတစ်ယောက်ကဲ့သို့ ဖြစ်နေသော ဤတပည့်ကို ကြည့်ရင်း သက်ပြင်းချလိုက်လေ၏။

"ရှောင်မိုက သံသရာထဲကို ဝင်ရောက်သွားပြီ ဆိုပေမဲ့ ဝမ်ရှင်း၊ ဒီကျယ်ပြောလှတဲ့ လူပင်လယ်ကြီးထဲမှာ၊ ငါတို့ အနောက်ဘက်ဒေသ တစ်ခုတည်း တင်မကဘူး၊ သူ့ကို ရှာဖွေရတာက သမုဒ္ဒရာထဲမှာ အပ်ကျတာကို ရှာရသလို ဖြစ်နေလိမ့်မယ်။"

"ကျွန်မ သိပါတယ် ကျောင်းထိုင်ဆရာတော် ဘိုးဘိုး။ ဒါပေမဲ့ ကျွန်မက မသေမျိုးအဆင့်မှာ ရှိနေတာမို့ ကျွန်မက အရမ်း အချိန်အကြာကြီးအသက်ရှင်နိုင်ပါတယ်။"

ဝမ်ရှင်းက ခေါင်းညိတ်ကာ လေးနက်စွာ ပြောလိုက်ပေသည်။

"ပြီးတော့ ကျောင်းထိုင်ဆရာတော် ဘိုးဘိုး၊ ကျောင်းထိုင်ဆရာတော် ဘိုးဘိုး ပြောသလို ဖြစ်နေရင်တောင်မှ ကိစ္စမရှိပါဘူး။ ရှောင်မိုက ဒီလောကကြီးထဲမှာ ရှိနေသေးသရွေ့ အပ်တစ်ချောင်း မဆိုထားနဲ့၊ သူက သဲပွင့်လေး တစ်ပွင့် ဖြစ်နေရင်တောင်မှ သူ့ကို ကျွန်မ ရှာတွေ့အောင် ရှာမှာပါ။"

"အမိတာဘာ"

ကျောင်းထိုင်ဆရာတော်က ခေါင်းခါကာ ဗုဒ္ဓဘာသာ ဘွဲ့တော်ကို ရွတ်ဆိုလိုက်လေ၏။

သူက ဝမ်ရှင်းကို ဆက်လက် တားဆီးခြင်း မပြုတော့ဘဲ မျက်လုံးများကို မှိတ်ကာ လမ်းဖယ်ပေးလိုက်တော့သည်။

ဝမ်ရှင်းက လက်အုပ်ချီကာ ကျောင်းထိုင်ဆရာတော် ဘိုးဘိုးကို အရိုအသေပေးလိုက်ပြီးနောက် တောင်အောက်သို့ လျှောက်ဆင်းသွားခဲ့လေ၏။

"ဟူး။"

ဤအရာအားလုံးကို စောင့်ကြည့်နေရင်း ရှောင်မိုက ခေါင်းခါလိုက်ပေသည်။

ယွင်ဝေ့ပဲဖြစ်ဖြစ်၊ ဝမ်ရှင်းပဲဖြစ်ဖြစ်၊ သူတို့ကို ဤမျှလောက်အထိ ဇွဲကောင်းနေကြသည်ကို သူ မမြင်ချင်ခဲ့ချေ။

သူက ဤစာအုပ်ထဲရှိ ခရီးသွား ဧည့်သည်တစ်ယောက် သက်သက်သာ ဖြစ်လေ၏။

ဖြစ်နိုင်တာက...

အချိန်အကြာကြီး ရှာဖွေပြီးတဲ့နောက်မှာ သူတို့ လက်လျှော့သွားကြမှာပါ...

【ဘဝတစ်ရာကျမ်း၏ ဆုလာဘ်များ တွက်ချက်မှု ပြီးမြောက်သွားပါပြီ။ ပိုင်ရှင်သည် အချိန်မြစ်ထဲမှ ထွက်ခွာရတော့မည် ဖြစ်ပါသည်။ ပိုင်ရှင် ကျေးဇူးပြု၍ ပြင်ဆင်ထားပါ။】

ရှောင်မို သက်ပြင်းချနေစဉ်မှာပင် ဘဝတစ်ရာကျမ်း၏ အသံက ရှောင်မို၏ စိတ်ထဲသို့ ဝင်ရောက်လာခဲ့လေ၏။

【သုံး...】

ဘဝတစ်ရာကျမ်း၏ အသံက ပြယ်လွင့်သွားသည်နှင့်အမျှ ရှောင်မို၏ ဝိညာဉ်ပုံရိပ်ယောင်ကလည်း လေနှင့်အတူ လွင့်ပါ ပျောက်ကွယ်သွားခဲ့လေတော့သည်။

လေညင်းလေး တစ်ခုက တိမ်ဖြူလေးများကို သယ်ဆောင်လာကာ တောအုပ်ကို ဖြတ်သန်းပြီး မြေပြန့်လွင်ပြင်ကို ကျော်ဖြတ်ကာ ပန်းပင်လယ်ပြင်ကို ဖြတ်သန်းသွားပြီးနောက် မိန်းကလေး၏ နက်မှောင်နေသော ဆံကေသာကို ကပ်တိုးလေး တိုက်ခတ်သွားခဲ့ပေသည်။

တောင်အောက်သို့ ဆင်းတော့မည့် မိန်းကလေးက လေကြောင့် လွင့်ပျံသွားသော သူမ၏ ဆံပင်များကို ညင်သာစွာ ဖိချထားလိုက်လေ၏။

သူမက ခေါင်းကို လှည့်ကြည့်လိုက်သော်လည်း မည်သည့်အရာကိုမျှ မမြင်တွေ့ရဘဲ လေညင်းလေးက သူမ၏ ပါးပြင်ကို ပွတ်တိုက်သွားပြီး သူမ၏ လက်ချောင်းများကြားသို့ ဖြတ်သန်းသွားခြင်းကိုသာ ခွင့်ပြုထားလိုက်တော့သည်။

အချိန်အတော်ကြာပြီးနောက် မိန်းကလေးက သူမ၏ အကြည့်ကို ရုပ်သိမ်းလိုက်ပြီး ပခုံးပေါ်ရှိ လွယ်အိတ်ကို ဆွဲတင်လိုက်လေ၏။

အဝတ်ဖိနပ်လေးများကို စီးထားသော မိန်းကလေး၏ ခြေထောက်သေးသေးလေးများက ရှေ့သို့ နောက်တစ်ကြိမ် လှမ်းထွက်သွားခဲ့ပေသည်။

ထပ်ပြီး နောက်လှည့်မကြည့်တော့ချေ။