အခန်း (၁-၂)

​အခန်း (၁) - ကမ္ဘာလုံးဆိုင်ရာ မျှော်စင်နှင့် အစကနဦးကပင် ရရှိခဲ့သော SSS အဆင့် 'နတ်ဘုရားအဆင့် ထုတ်ယူခြင်း' စွမ်းရည်

​ကြယ်ပြာဂြိုဟ်၊ အမှတ် ၁၀၅ မျှော်စင်၊ ပထမထပ်အဝင်ဝ။

ပရော်ဖက်ရှင်နယ်ဆန်သော ဝတ်စုံကို ဝတ်ဆင်ထားသည့် အမျိုးသမီး နည်းပြတစ်ဦးသည် တည်ကြည်လေးနက်သော မျက်နှာထားဖြင့် ကျောင်းသားများအား ဤသို့ ပြောကြားနေလေ၏။

​“ကျောင်းသားတို့... ဒီနေ့ဟာ မင်းတို့ဘဝမှာ အရေးအကြီးဆုံးနေ့ပဲ... အားလုံးပဲ စိတ်ကို တင်းတင်းထားကြ... မျှော်စင်ထဲကို ရောက်တာနဲ့ မင်းတို့တစ်ယောက်ချင်းစီဟာ ကိုယ်ပိုင်ပါရမီတစ်ခုစီ နိုးထလာလိမ့်မယ်... အဲဒီပါရမီက မင်းတို့ရဲ့ ကံကြမ္မာကိုတင်မကဘူး၊ လူသားမျိုးနွယ်ရဲ့ အနာဂတ်ကိုပါ အဆုံးအဖြတ် ပေးသွားမှာ ဖြစ်တယ်”

​နည်းပြ၏ ရှေ့မှောက်တွင်ရှိသော ကျောင်းသားတစ်သိုက်သည် ကောင်းကင်သို့ ထိုးတက်နေသည့် ဧရာမမျှော်စင်ကြီးကို ကြည့်ကာ စိတ်လှုပ်ရှားစွာ ဆွေးနွေးနေကြကုန်၏။ လူအုပ်ထဲတွင် ပါဝင်သော လျူယန်သည်လည်း ထူးဆန်းအံ့ဩမှုများဖြင့် ပြည့်နှက်နေလေသည်။ သူသည် လွန်ခဲ့သော တစ်ရက်ကမှ ဤအပြိုင်ကမ္ဘာ ကြယ်ပြာဂြိုဟ်သို့ ကူးပြောင်းရောက်ရှိလာသူ ဖြစ်၏။

​သူ့ပတ်ဝန်းကျင်တွင် အကျွမ်းတဝင်ရှိလှသော အတန်းဖော်များ၊ လှပသော ဆရာမများ ရှိနေသော်လည်း ဤလောကကား လုံးဝ ခြားနားနေချေပြီ။ သူ စုံစမ်းသိရှိရသမျှအရ လွန်ခဲ့သော တစ်နှစ်က ဤကမ္ဘာ၌ ကပ်ဘေးဆိုးကြီး ကျရောက်ခဲ့သည်။ ပြင်းထန်သော နေရောင်ခြည်လျှံထွက်မှုများ၊ မီတာတစ်ရာကျော် မြင့်သော အဆောက်အဦးများကို အလွယ်တကူ တိုက်စားနိုင်သည့် သဲမုန်တိုင်းများ၊ မီးတောင်ပေါက်ကွဲမှုများနှင့် မီတာထောင်ချီ မြင့်သော ဆူနာမီလှိုင်းလုံးကြီးများက ကမ္ဘာကြီးကို ဝါးမြိုခဲ့လေသည်။

​သာ၍ ကြောက်မက်ဖွယ်ကောင်းသည်မှာ မြေအောက်လိုဏ်ဂူများထဲမှ ထွက်ပေါ်လာသော အစွမ်းထက် သတ္တဝါဆိုးများပင် ဖြစ်၏။ လူသားတို့၏ ခေတ်မီလက်နက်များမှာ ထိုသတ္တဝါဆိုးများအပေါ် ထိရောက်မှု မရှိသလောက်ပင်။ ထိုအချိန်မှစ၍ သယံဇာတများ ပြတ်လပ်ကာ လူဦးရေမှာ ထက်ဝက်ကျော် လျော့နည်းသွားခဲ့ပြီး လူသားမျိုးနွယ်တို့သည် ရှင်သန်နိုင်ရန် ရုန်းကန်နေကြရလေသည်။ ယခင်က ထွန်းကားခဲ့သော ယဉ်ကျေးမှုများမှာလည်း ပြိုပျက်ပျက်စီးခဲ့ရချေပြီ။

​သို့သော်လည်း လွန်ခဲ့သော ခြောက်လခန့်က လူသားတို့ မျှော်လင့်ချက် ကုန်ဆုံးလုနီးပါး အချိန်တွင် ကောင်းကင်ဘုံသို့ ထိုးတက်နေသော အနက်ရောင် မျှော်စင်ကြီးများ ကမ္ဘာအနှံ့ ပေါ်ပေါက်လာခဲ့သည်။ ထိုမျှော်စင်တို့သည် မီတာသောင်းချီ မြင့်မားကာ ကမ္ဘာ့လေထုအပြင်ဘက်ထိ ရောက်ရှိသည်ဟု ဆိုကြ၏။

​မျှော်စင်အတွင်း၌ ကမ္ဘာသစ်တစ်ခု ရှိနေသည်။ မျှော်စင်ထဲသို့ ပထမဆုံးအကြိမ် ဝင်ရောက်သူတိုင်းသည် ကိုယ်ပိုင်ပါရမီတစ်ခုကို နိုးထစေနိုင်ပြီး ထူးခြားသော စွမ်းရည်များကို ရရှိနိုင်ကြသည်။ မျှော်စင်အတွင်းဝယ် ကြွယ်ဝသော သယံဇာတများ ရှိသကဲ့သို့ ကြောက်မက်ဖွယ်ကောင်းသော သတ္တဝါဆိုးများလည်း ရှိနေ၏။ ၎င်းတို့ကို အောင်နိုင်ခြင်းဖြင့် လူသားတို့သည် ပိုမိုအစွမ်းထက်လာမည် ဖြစ်သည်။

​အစွမ်းထက်သော ပါရမီရှင်များမှာ လူသားတို့၏ သူရဲကောင်းများနှင့် မျှော်လင့်ချက်များ ဖြစ်လာမည်ဖြစ်ပြီး၊ အားနည်းသူများမှာမူ အားကောင်းသူတို့ ရှင်သန်နိုင်ရန် နောက်တန်းမှ ကူညီပေးကြရမည် ဖြစ်၏။ လျူယန်သည် အလွန်ပင် စိတ်လှုပ်ရှားနေမိသည်။ အဘယ်ကြောင့်ဆိုသော် ယခု နိုးထလာမည့် ပါရမီသည် သူ၏ အနာဂတ်ကို တိုက်ရိုက် အဆုံးအဖြတ် ပေးမည်ဖြစ်သောကြောင့်ပင်။

​ထိုစဉ် နည်းပြဖြစ်သူက အဆင့်မြင့်လက်ပတ်များကို စတင်ဝေငှလေသည်။ မကြာမီ လျူယန်သည် ခရမ်းရောင်လက်ပတ်တစ်ခုကို ရရှိခဲ့၏။ ဤလက်ပတ်သည် မိမိ၏ စွမ်းဆောင်ရည် အခြေအနေများကို အတိအကျ ဖော်ပြပေးနိုင်ရုံသာမက မျှော်စင်အတွင်း၌ အချင်းချင်း ဆက်သွယ်ရန်အတွက်လည်း အသုံးပြုနိုင်လေသည်။

​လျူယန်သည် လက်ပတ်ကို ဝတ်ဆင်ပြီးနောက် မိမိ၏ အခြေအနေကို စစ်ဆေးကြည့်လိုက်၏။

​[ လျူယန် ]

​သွေးပမာဏ (HP): ၁၂၀ / ၁၂၀

​စွမ်းအင်ပမာဏ (MP): ၁၀၀ / ၁၀၀

​ခွန်အား (တိုက်ခိုက်ရေး): ၁၂

​ခံနိုင်ရည် (ကာကွယ်ရေး): ၁၁

​လျင်မြန်မှု (အရှိန်): ၁၁

​စိတ်ဝိညာဉ် (မှော်အင်အား): ၁၃

​လိုက်လျောညီထွေမှု (မှော်ခုခံမှု): ၁၂

​ကံတရား (ဖြစ်နိုင်ခြေ): ၄၃

​ပါရမီ (Talent): နိုးထခြင်း မရှိသေးပါ...

​ထိုစဉ် လှပသော နည်းပြမလေးက ဆက်လက် ရှင်းပြလေသည်။

“ပါရမီဆိုတာ တစ်သက်မှာ တစ်ကြိမ်ပဲ နိုးထခွင့်ရှိတယ်... ပုံမှန်အားဖြင့်တော့ HP နဲ့ MP က ၁၀၀ ဝန်းကျင်၊ တခြား အရည်အချင်းတွေက ၁၀ ဝန်းကျင်ပဲ ရှိတတ်ကြတယ်... ပါရမီအဆင့်တွေကို အနိမ့်ဆုံး F ကနေ အမြင့်ဆုံး SSS အထိ (၉) ဆင့် သတ်မှတ်ထားတယ်... အခုထိ လူသားတွေထဲမှာ အမြင့်ဆုံး နိုးထနိုင်ခဲ့တာက A အဆင့်ပဲ... မင်းတို့အနေနဲ့ D အဆင့်လောက် ရရင်ကို ကျေနပ်စရာပဲ... တကယ်လို့ C အဆင့်သာ ရခဲ့ရင်တော့ မင်းတို့ဟာ အဖွဲ့ချုပ်ရဲ့ အထူးစောင့်ရှောက်မှုကို ခံရမယ့်သူတွေ ဖြစ်လာလိမ့်မယ်”

​ကျောင်းသားများမှာလည်း အချင်းချင်း တိုးတိုးတိတ်တိတ် ဆွေးနွေးနေကြကုန်၏။

“ငါတော့ တိုက်ခိုက်ရေးနဲ့ဆိုင်တဲ့ D အဆင့်လောက် ရရင်ကို ကျေနပ်ပြီ”

“D အဆင့် ရနိုင်ခြေက ၅၀ ရာခိုင်နှုန်းလောက်ပဲ ရှိတာ... E အဆင့်ဆိုရင်တောင် နောက်တန်းမှာ နေလို့ရသေးတယ်... F အဆင့်သာ ဆိုရင်တော့ အမှိုက်ပဲ”

“ပြီးခဲ့တဲ့ အပတ်က အတန်း (၃) ထဲမှာ C အဆင့် ရတဲ့သူ သုံးယောက်တောင် ပါတယ်တဲ့... သူတို့မိသားစုတွေဆို အခု အထူးအခွင့်အရေးတွေနဲ့ ကောင်းကောင်းမွန်မွန် နေနေရပြီ”

​နည်းပြဖြစ်သူက အချိန်ကို ကြည့်ကာ လေးနက်စွာ ဆိုလိုက်၏။

“ကဲ... အချိန်ကျပြီ... အားလုံး မျှော်စင်ထဲကို ဝင်ဖို့ ပြင်ကြတော့... မင်းတို့အားလုံး အစွမ်းထက်တဲ့ ပါရမီတွေ နိုးထပြီး လူသားမျိုးနွယ်ကို မြှင့်တင်ပေးနိုင်ကြပါစေလို့ ငါ ဆုတောင်းပေးတယ်”

​ကျောင်းသားများ တစ်ယောက်ပြီးတစ်ယောက် မျှော်စင်ထဲသို့ ဝင်သွားကြလေသည်။ မကြာမီ လျူယန်၏ အလှည့်သို့ ရောက်ရှိလာ၏။ မျှော်စင်ထဲသို့ ဝင်လိုက်သည်နှင့် လျူယန်သည် တစ်ကိုယ်လုံး အေးစိမ့်သွားပြီး မူးဝေနောက်ကျိမှုကို ခံစားလိုက်ရသည်။

​မျက်လုံးပြန်ဖွင့်လိုက်ချိန်တွင် သူသည် ကမ္ဘာသစ်တစ်ခုသို့ ရောက်ရှိနေချေပြီ။ ပျက်စီးနေသော ကြယ်ပြာနှင့် မတူဘဲ ဤနေရာကား လှပလွန်းလှ၏။ သို့သော်လည်း ဤအလှတရားနောက်ကွယ်၌ အန္တရာယ်များ ရှိနေသည်ကို လျူယန် သတိပြုမိသည်။ ကနဦးကာလတွင် ဝင်ရောက်လာသူများအတွက် အဖြူရောင် အလင်းတန်းက အကာအကွယ် ပေးထားလေ၏။

​ထိုစဉ် လျူယန်၏ လက်ပတ်ထက်၌ အကြောင်းကြားစာများ ဆက်တိုက် တက်လာတော့သည်။ တခြားသော ကျောင်းသားများ၏ ပါရမီများ နိုးထလာခြင်းပင် ဖြစ်၏။

​[ ဂုဏ်ယူပါသည်၊ F အဆင့် ပါရမီ 'အစားအသောက် စားချင်စိတ် တိုးပွားခြင်း' နိုးထလာပါသည် ]

[ ဂုဏ်ယူပါသည်၊ D အဆင့် ပါရမီ 'အတိုင်းအဆမဲ့ ခွန်အား' နိုးထလာပါသည် ]

[ ဂုဏ်ယူပါသည်၊ C အဆင့် ပါရမီ နိုးထလာပါသည် (အလိုအလျောက် ဖျောက်ထားပါသည်) ]

​လျူယန် ကြည့်လိုက်ရသလောက် လူအများစုမှာ F မှ C အဆင့်အတွင်းသာ ရှိကြပြီး B အဆင့်မှာ အလွန်ပင် ရှားပါးလှချေသည်။ ထိုစဉ် လျူယန်သည် တစ်ကိုယ်လုံး ပျော့ခွေသွားပြီး မြေပြင်ပေါ်သို့ လဲကျလုနီးပါး ဖြစ်သွား၏။ ခဏအကြာတွင် ထုံကျင်မှုများ ပျောက်ကွယ်သွားပြီးနောက်...

​[ ပါရမီ နိုးထခြင်း ပြီးဆုံးပါပြီ ]

​သူ လျင်မြန်စွာပင် လက်ပတ်ကို စစ်ဆေးကြည့်လိုက်သည်။

​[ နတ်ဘုရားအဆင့် ထုတ်ယူခြင်း]

​အဆင့်: SSS

​အကျိုးအာနိသင်: မည်သည့်အရာကိုမဆို ထုတ်ယူနိုင်စွမ်း ရှိသည်။ အညစ်အကြေးများကို ထုတ်ယူခြင်းဖြင့် လက်နက်ကိရိယာများကို ပိုမိုခိုင်မာစေနိုင်ပြီး၊ သတ္တဝါဆိုးများထံမှ စွမ်းအင်များကို ထုတ်ယူခြင်းဖြင့် မိမိ၏ အဆင့်ကို မြှင့်တင်နိုင်သည်။ (ကျန်ရှိသော အစွမ်းများကို မိမိဘာသာ ရှာဖွေဖော်ထုတ်ပါ)

​ရိုးရှင်းသော်လည်း အလွန်အစွမ်းထက်သော ဖော်ပြချက်ပင်။ အထူးသဖြင့် SSS ဆိုသည့် အဆင့်သတ်မှတ်ချက်ကြီးက မှင်တက်စရာ ကောင်းလှ၏။ လျူယန်၏ စိတ်ထဲ၌ အတိုင်းမသိ ဝမ်းသာသွားမိသည်။ အမြင့်ဆုံးအဆင့် ပါရမီကို သူ ရရှိခဲ့လေပြီ။

​ထိုစဉ် မျှော်စင်အတွင်းရှိ ကျောင်းသားအားလုံး၏ လက်ပတ်မှ ကြေညာသံတစ်ခု ထွက်ပေါ်လာ၏။

[ ယခုအကြိမ် ပါရမီနိုးထမှု ရလဒ်များမှာ- F အဆင့် ၂၈ ဦး၊ E အဆင့် ၁၀ ဦး၊ D အဆင့် ၉ ဦး၊ C အဆင့် ၆ ဦး၊ B အဆင့် ၁ ဦး၊ A အဆင့် ၀ ဦး၊ S အဆင့်နှင့် အထက် ၁ ဦး ဖြစ်ပါသည် ]

​ပတ်ဝန်းကျင်ရှိ ကျောင်းသားများအားလုံး ဆူညံသွားကြတော့သည်။

“ဟာ... တကယ်ကြီးလား... တစ်ယောက်ယောက်က S အဆင့်ကို နိုးထစေခဲ့တာလား”

“A အဆင့်တောင် ရှားပါတယ်ဆိုမှ S အဆင့်က ဘယ်လိုပေါ်လာတာလဲ”

“အစွမ်းထက်တဲ့သူ တစ်ယောက် ပေါ်ထွက်လာပြီ... ငါတို့ လူသားတွေအတွက် မျှော်လင့်ချက် ရှိပြီဟေ့”

​ဘေးပတ်ဝန်းကျင်မှ ပြောဆိုသံများကို နားထောင်ရင်း လျူယန်သည် တိတ်တဆိတ် ပြုံးနေမိသည်။ အမှန်စင်စစ် သူ နိုးထစေခဲ့သည်မှာ S အဆင့်မျှသာ မဟုတ်ဘဲ၊ ထိုထက်မက မြင့်မားသော SSS အဆင့် ဖြစ်နေသောကြောင့်ပင်။

အခန်း (၂) - အားစိုက်စရာမလိုဘဲ အစွမ်းထက်လာခြင်းနှင့် ကြောက်မက်ဖွယ်ရာ အဆင့် (၁) သတ္တဝါဆိုး

​လျူယန်သည် မိမိရရှိထားသော 'နတ်ဘုရားအဆင့် ထုတ်ယူခြင်း'ပါရမီ၏ အသေးစိတ် ဖော်ပြချက်များကို သေချာစွာ ဖတ်ရှုလေ့လာနေမိ၏။ ထိုဖော်ပြချက်အရ သူသည် မည်သည့်အရာဝတ္ထုထံမှမဆို စွမ်းအင်နှင့် ဂုဏ်သတ္တိများကို ထုတ်ယူနိုင်စွမ်း ရှိလေသည်။ သို့သော် မည်မျှအထိ ထုတ်ယူနိုင်မည်၊ အခြား မည်သည့်အရာများကို ရရှိနိုင်ဦးမည် ဆိုသည်ကိုမူ သူကိုယ်တိုင် ဆက်လက်ရှာဖွေသွားရပေမည်။

​သို့သော်လည်း ဤပါရမီကား ကြောက်ခမန်းလိလိ အစွမ်းထက်လှချေပြီ။ မည်သည့်အရာကိုမဆို ထုတ်ယူနိုင်စွမ်းရှိခြင်းမှာ လျူယန်အနေဖြင့် ကဏ္ဍစုံတွင် မိမိကိုယ်ကိုယ် အဆက်မပြတ် မြှင့်တင်နိုင်မည်ဖြစ်ပြီး ဘက်စုံတော်သော စစ်သည်တော်တစ်ဦး ဖြစ်လာနိုင်သည်ဟု ဆိုလိုခြင်းပင်။ သူ၏ တိုးတက်မှု အလားအလာမှာ အတိုင်းအဆမရှိလှချေ။

​ထိုစဉ် ဘေးပတ်ဝန်းကျင်ရှိ ကျောင်းသားများမှာလည်း မိမိတို့ ရရှိထားသော ပါရမီများအကြောင်းကို အားတက်သရော ပြောဆိုနေကြကုန်၏။

​“တောက်... ငါကတော့ အညံ့ဆုံး F အဆင့်ပဲ ရတယ်၊ အဲဒါတောင်မှ 'အစားအသောက် စားချင်စိတ် တိုးပွားခြင်း' တဲ့လား... ဒါက ဘာလုပ်စားလို့ ရမှာလဲ”

​“ဟားဟား... ငါကတော့ D အဆင့် 'အတိုင်းအဆမဲ့ ခွန်အား' ကို ရထားတာ... အမြင့်ဆုံးအဆင့် မဟုတ်ပေမဲ့ အားကိုးရတဲ့သူတစ်ယောက်တော့ ဖြစ်လာမှာ သေချာတယ်”

​“ငါကတော့ E အဆင့် 'အမြင်အာရုံ ကောင်းမွန်ခြင်း' ပဲ ရတယ်... ငါ့ရဲ့ အမြင်အာရုံက အရင်ထက် အဆပေါင်းများစွာ ကြည်လင်လာသလိုပဲ... နောက်ဆို မင်းတို့ကို ငါကပဲ အကူအညီပေးရမှာပေါ့”

​“ငါကတော့ 'ဘီလူးခွန်အား'ကို ရထားတာ... တစ်ကိုယ်လုံးမှာ အင်အားတွေ ပြည့်လျှံနေသလိုပဲ၊ တကယ်ကို အစွမ်းထက်တာပဲဟေ့”

ထိုသို့ ပြောဆိုရင်း ကျောင်းသားတစ်ဦးသည် အနားရှိ သစ်ပင်ကြီးတစ်ပင်ဆီသို့ လျှောက်သွားကာ လက်သီးဖြင့် အားကုန် ထိုးနှက်လိုက်လေသည်။

​လူသုံးဦးဖက်စာခန့် ရှိသော ထိုသစ်ပင်ကြီးမှာ တုန်ခါသွားပြီး လက်သီးရာကြီးမှာလည်း ထင်ထင်ရှားရှား ကျန်ရစ်ခဲ့၏။ ထိုသူကား 'ယန်ယွမ်ကျိ'ပင် ဖြစ်လေသည်။

​“ဟာ... အစ်ကိုကြီးယန်၊ ခင်ဗျားကတော့ တကယ့်ကို အစွမ်းထက်တာပဲ”

“ဟုတ်ပဗျာ၊ တကယ်ကို အားကိုးစရာကြီးပဲ”

“အစ်ကိုကြီးယန်ရဲ့ ပါရမီက ဘယ်အဆင့်လဲဟင်၊ ကျွန်တော်လည်း ခွန်အားနဲ့ဆိုင်တဲ့ ပါရမီပဲ ရတာ၊ ဒါပေမဲ့ အစ်ကိုကြီးလောက် အားမရှိသလိုပဲ”

“နောက်ဆို ကျွန်တော့်ကိုလည်း စောင့်ရှောက်ပါဦး အစ်ကိုကြီးရယ်”

​ဘေးပတ်ဝန်းကျင်မှ မြှောက်ပင့်သံနှင့် အားကျသံများကို ကြားရသောအခါ ယန်ယွမ်ကျိသည် ကျေနပ်ပီတိဖြစ်ကာ ဘဝင်မြင့်နေလေ၏။ လျူယန်သည်လည်း ထိုသူကို ကြည့်ကာ အနည်းငယ် အံ့ဩမိသည်။ ပါရမီနိုးထပြီးကာမျှဖြင့် ဤမျှ အစွမ်းထက်လာခြင်းမှာ လူသားတစ်ယောက်နှင့်ပင် မတူတော့ချေ။

​“ငါ့ရဲ့ 'ဘီလူးခွန်အား' က C အဆင့် ပါရမီပဲ”

ယန်ယွမ်ကျိက ဂုဏ်ယူဝင့်ကြွားစွာ ပြောလိုက်၏။

​ထိုစကားကို ကြားသောအခါ ကျောင်းသားများမှာ ပို၍ပင် အားကျသွားကြတော့သည်။ C အဆင့် ပါရမီရှင်ဆိုသည်မှာ အဖွဲ့ချုပ်၏ အထူးလေ့ကျင့်ပေးခြင်းကို ခံရမည့်သူဖြစ်ပြီး အလွန်အရေးပါသော ပုဂ္ဂိုလ်တစ်ဦး ဖြစ်လာမည်မှာ မြေကြီးလက်ခတ်မလွဲပင်။

​သို့သော် လျူယန်ကမူ တိတ်တဆိတ် ရယ်မောမိလေသည်။ C အဆင့်ဆိုသည်မှာ သူ၏ SSS အဆင့်နှင့် ယှဉ်လျှင် အဆင့်ငါးဆင့်မျှ ကွာခြားနေပြီး ကောင်းကင်နှင့် မြေကြီးကဲ့သို့ပင် ခြားနားလှ၏။ C အဆင့်တောင် ဤမျှ အစွမ်းထက်နေလျှင် သူ၏ SSS အဆင့်မှာ မည်မျှအထိ ကြောက်မက်ဖွယ်ကောင်းမည်နည်း။

​ထိုစဉ် လူတိုင်း၏ လက်ပတ်မှ အသံတစ်ခု ထွက်ပေါ်လာပြန်သည်။

[ (၇) ရက်အတွင်း မျှော်စင်၏ ဒုတိယအဆင့်သို့ တက်လှမ်းရမည်။ ပျက်ကွက်ပါက မျှော်စင်အတွင်းမှ နှင်ထုတ်ခြင်း ခံရမည် ]

​ဤကြေညာချက်ကို ကြားသောအခါ ကျောင်းသားများမှာ ချက်ချင်းပင် လှုပ်လှုပ်ရှားရှား ဖြစ်သွားကြ၏။ သူတို့အားလုံးသည် မိမိတို့၏ ပါရမီသစ်ကို အသုံးပြုပြီး စမ်းသပ်ကြည့်လိုနေကြပြီ ဖြစ်သည်။ လျူယန်သည်လည်း မိမိ၏ ပါရမီကို စတင်စမ်းသပ်ကြည့်ရန် ဆုံးဖြတ်လိုက်၏။

​ပထမဦးစွာ သူသည် မိမိ၏ ကာကွယ်ရေး ဝတ်စုံကို ကြည့်လိုက်သည်။ ၎င်းမှာ အဖွဲ့ချုပ်မှ ပေးထားသော အနိမ့်ဆုံးအဆင့် ပစ္စည်းတစ်ခုသာ ဖြစ်၏။

​[ အဖွဲ့ချုပ် ကာကွယ်ရေး ဝတ်စုံ ]

​အဆင့်: F

​အကျိုးအာနိသင်: ခံနိုင်ရည် +၁၀

​လျူယန်သည် ထိုဝတ်စုံအတွင်းရှိ အညစ်အကြေးများကို ထုတ်ယူနိုင်မည်ဟု အလိုလို ခံစားလိုက်ရသည်။ သူသည် ပါရမီကို စတင်အသုံးပြုလိုက်၏။ သူ၏ လက်မှ အဖြူရောင် အလင်းဖျော့ဖျော့လေး တစ်ချက် လက်သွားပြီးနောက် ဝတ်စုံမှာ ပိုမိုတောက်ပလာကာ သိသိသာသာ ပြောင်းလဲသွားလေသည်။

​[ နတ်ဘုရားအဆင့် ထုတ်ယူခြင်း အောင်မြင်ပါသည်။ အညစ်အကြေးများကို ထုတ်ယူပြီးနောက် ကာကွယ်ရေးဝတ်စုံကို E အဆင့်သို့ မြှင့်တင်လိုက်ပါပြီ ]

​အညစ်အကြေးများကို ထုတ်ယူရုံမျှဖြင့် ပစ္စည်းကို အဆင့်မြှင့်တင်နိုင်သည်လား။ လျူယန် အံ့ဩသွားမိ၏။ အဖွဲ့ချုပ်တွင် C အဆင့်နှင့်အထက် ပါရမီရှင်များသာ E အဆင့်ရှိသော ပစ္စည်းများကို ကိုင်ဆောင်ခွင့် ရှိကြခြင်း ဖြစ်သည်။ လျူယန်မှာမူ ဘာမျှ အားစိုက်စရာမလိုဘဲ အဆင့်မြင့်ပစ္စည်းတစ်ခုကို ရရှိသွားခဲ့လေပြီ။

​သူသည် နောက်တစ်ကြိမ် ထပ်မံကြိုးစားသော်လည်း အကျိုးသက်ရောက်မှု မရှိတော့ချေ။ အဆင့်မြှင့်တင်နိုင်သည့် အကန့်အသတ် ရှိနေပုံရ၏။ သူ၏ စွမ်းဆောင်ရည်ကို ပြန်လည်စစ်ဆေးကြည့်သောအခါ ခံနိုင်ရည်မှာ ယခင်ကထက် ၅ ဆခန့် တိုးလာသည်ကို တွေ့လိုက်ရသည်။

​ယခုမူ လျူယန်သည် ကာကွယ်ရေးအတွက် လုံလောက်သော အင်အားကို ရရှိသွားပြီဖြစ်၍ မျှော်စင်၏ ပထမအဆင့်ကို စတင်ရှာဖွေရန် အသင့်ဖြစ်နေလေပြီ။ အခြားကျောင်းသားများသည်လည်း ယန်ယွမ်ကျိ၏ ဦးဆောင်မှုဖြင့် ရှေ့သို့ စတင်ထွက်ခွာလာကြ၏။

​“ဒီကမ္ဘာက သတ္တဝါဆိုးတွေက သိပ်အစွမ်းထက်တယ်လို့ ကြားတယ်၊ သတိထားကြဦး”

“ငါတို့ကိုယ်ပေါ်က အကာအကွယ် အလင်းတန်းတွေလည်း မှိန်လာပြီ၊ ကနဦးကာလ အကာအကွယ်က ကုန်တော့မယ် ထင်တယ်”

“ငါတို့အားလုံး အသက်ရှင်လျက် ပြန်လာနိုင်ပါစေလို့ပဲ ဆုတောင်းရမှာပဲ”

​ဘေးပတ်ဝန်းကျင်မှ စိုးရိမ်တကြီး ပြောဆိုသံများကို ကြားသောအခါ ယန်ယွမ်ကျိက လှောင်ပြုံးပြုံးရင်း အနားရှိ သစ်ပင်ကြီးတစ်ပင်ကို လက်ဝါးဖြင့် ရိုက်ချလိုက်၏။

​ဂျွတ်... ဘုန်း...

​လူနှစ်ဦးဖက်စာခန့်ရှိသော သစ်ပင်ကြီးမှာ မြေပြင်ပေါ်သို့ ပြိုလဲသွားလေတော့သည်။

​“တွေ့လား... ငါ အင်အားကို ထိန်းချုပ်နိုင်သွားတော့ ပိုပြီး အစွမ်းထက်လာပြီ... အားလုံး စိတ်မပူကြနဲ့၊ ငါရှိနေသရွေ့ အဲဒီသတ္တဝါဆိုးတွေက အေးဆေးပဲ”

​ယန်ယွမ်ကျိ၏ အစွမ်းကို မြင်သောအခါ ကျောင်းသားများမှာ စိတ်သက်သာရာ ရသွားကြကုန်၏။ သို့သော်လည်း လျူယန်ကမူ မျက်မှောင်ကြုတ်လျက် ရှိနေ၏။ မကြာမီတွင် သူတို့ရှေ့၌ 'ဓားသွားပုံစံအစွယ်ရှိသော ကျား'တစ်ကောင် ပေါ်လာလေသည်။ ၎င်းမှာ ကမ္ဘာပေါ်ရှိ ကျားများနှင့် တူသော်လည်း အရွယ်အစားမှာ လူတစ်ရပ်ခန့် ရှိကာ အလွန်ပင် ကြီးမားလှ၏။

​“ဒါက အဆင့် (၁) ကျားပဲ၊ မျှော်စင်ရဲ့ အခြေခံအကျဆုံး သတ္တဝါဆိုးပဲ”

ကျောင်းသားတစ်ဦးက သတိပေးလိုက်၏။

​ယန်ယွမ်ကျိသည် ကနဦးက အနည်းငယ် ထိတ်လန့်သွားသော်လည်း ချက်ချင်းပင် ပြန်လည်တည်ငြိမ်သွားပြီး တစ်ဦးတည်းပြေးထွက်သွားကာပြောလိုက်သည်။

“အဆင့် (၁) ပဲ ရှိသေးတာပဲ၊ ဘာကြောက်စရာ ရှိလဲ... မင်းတို့ ဒီမှာပဲ စောင့်ကြည့်နေ၊ ငါ အဲဒီကောင်ကို သွားရှင်းလိုက်မယ်”

​ကျောင်းသားများမှာလည်း သူ့ကို အားပေးနေကြကုန်၏။ သို့သော် လျူယန်ကမူ ထိုကျားသည် လုံးဝ အားနည်းပုံမရကြောင်း သတိပြုမိလိုက်သည်။ ယန်ယွမ်ကျိသည် ကျား၏ရှေ့သို့ ရောက်သည်နှင့် အားကုန်သုံး၍ လက်သီးဖြင့် ထိုးနှက်လိုက်၏။

​သို့သော်လည်း ကျားသည် အလွန်လျင်မြန်စွာ ရှောင်တိမ်းလိုက်ပြီးနောက် ပါးစပ်ကို ဖြဲကာ ယန်ယွမ်ကျိ၏ ရင်ဘတ်ကို အစွယ်ဖြင့် ထိုးဖောက်လိုက်လေသည်။ ယန်ယွမ်ကျိသည် မည်သို့မျှ ခုခံနိုင်ခြင်းမရှိဘဲ ထိုနေရာမှာပင် အသက်ပျောက်သွားလေသည်။