အခန်း (၉-၁၀)

အခန်း (၉) - တိုက်ပွဲအတွင်း အင်အားမြှင့်တင်ခြင်းနှင့် သွေးစွန်းသောတိုက်ပွဲ

​ကြွက်ဘုရင်၏ မူလခန္ဓာကိုယ်မှာပင် လူနှစ်ကိုယ်စာခန့် မြင့်မားလှပြီ ဖြစ်၏။ သို့သော် ဆုန့်ယွီ၏ အလောင်းကို ဝါးမြိုပြီးနောက်တွင်မူ ၎င်း၏ ကိုယ်ထည်မှာ (၄) မီတာမှ (၅) မီတာခန့်အထိ ထိုးတက်ကြီးမားလာချေပြီ။

​လျူယန် အံ့အားသင့်သွားမိသည်။ ကြွက်ဘုရင်မှာ မျိုးဗီဇပြောင်းလဲကာ အဆင့်တက်သွားခြင်းပင်! သူသည် လက်ပတ်ကို အသုံးပြုကာ အမြန်စစ်ဆေးလိုက်၏။

​[ မျိုးဗီဇပြောင်း ကြွက်ဘုရင် ]

​အဆင့်: ၃

​HP: ၇၀၀ / ၇၀၀

​ခွန်အား: ၄၀ | ခံနိုင်ရည်: ၄၃ | လျင်မြန်မှု: ၃၈

​စွမ်းရည်: ထိုးဖောက်တိုက်ခိုက်ခြင်း၊ ဝါးမြိုခြင်း၊ အဆိပ်ငွေ့

​အဆင့် (၃) သို့ ရောက်ရှိသွားသော ထိုသတ္တဝါကြီးမှာ အရည်အချင်းများ သိသိသာသာ တိုးတက်လာရုံသာမက စွမ်းရည်သစ်တစ်ခုပါ ရရှိထားချေပြီ။ မျိုးဗီဇပြောင်း သတ္တဝါတစ်ကောင်၏ အစွမ်းမှာ သာမန်အဆင့် (၄) သို့မဟုတ် အဆင့် (၅) သတ္တဝါများနှင့်ပင် ရင်ဆိုင်နိုင်စွမ်း ရှိပေသည်။

​ထိုစဉ် ကြွက်ဘုရင်ကြီး၏ ကိုယ်ခန္ဓာမှ စိမ်းဖန့်ဖန့် အလင်းများ ထွက်ပေါ်လာပြီး ပတ်ဝန်းကျင် မီတာ (၅၀) အတွင်းသို့ ပုပ်စော်နံလှသော အဆိပ်ငွေ့များ ပျံ့နှံ့သွားတော့သည်။ လျူယန်၏ အရေပြားမှာ ပူလောင်လာပြီး သွေးပမာဏ (HP) လည်း တဖြည်းဖြည်း လျော့နည်းလာ၏။ အဆိုးဆုံးမှာ ဆုန့်ယွီ၏ 'ကြန့်ကြာစေခြင်း'အာနိသင်ကိုပါ ဝါးမြိုထားသဖြင့် လျူယန်၏ ကိုယ်ခန္ဓာမှာ ရုတ်တရက် လေးလံထိုင်းမှိုင်းသွားခြင်းပင်။

​အဆင့် (၂) သာ ရှိသေးသော လျူယန်အတွက် ဤသည်မှာ ကြီးမားသော စိန်ခေါ်မှု ဖြစ်နေချေပြီ။

​တစ်ဖက်တွင်မူ ထွက်ပြေးရန် ကြိုးစားနေသော ဝမ်ချင်းမှာ အဆိပ်ငွေ့မိကာ အရှိန်လျော့သွားသဖြင့် ကြွက်အုပ်ကြီး၏ ဝိုင်းအုံကိုက်ခဲခြင်းကို ခံလိုက်ရ၏။ သူသည် အော်ဟစ်တုန့်ပြန်ရန်ပင် အချိန်မရလိုက်ဘဲ အဆင့် (၁) ကြွက်ငယ်လေးများ၏ လက်ချက်ဖြင့် အသက်ပျောက်သွားတော့သည်။ ကျန်နိုးထသူ နှစ်ဦးမှာမူ အသက်လုကာ တောနက်ထဲသို့ ထွက်ပြေးလွတ်မြောက်သွားကြ၏။

​လျူယန်မှာမူ မိမိ၏ လျင်မြန်မှုကို အထင်ကြီးမိသဖြင့် အဆိပ်ငွေ့အလယ်တွင် ပိတ်မိနေခဲ့ပြီ။ သူသည် အမြန်ဆုံး ဆုံးဖြတ်ချက်ချကာ ကျောပိုးအိတ်ထဲမှ ချန်ထားသော 'ခရမ်းရောင် ဆေးဖက်ဝင်အပင်' ကို ထုတ်၍ ဝါးစားလိုက်၏။ ဆေးအာနိသင်ကြောင့် ပူလောင်မှုများ ပျောက်ကွယ်သွားသော်လည်း 'ကြန့်ကြာစေခြင်း' အာနိသင်မှာမူ အလုံးစုံ မပျောက်ပျက်သေးချေ။

​သူသည် 'ဝိညာဉ်ခြေလှမ်း'ကို အသက်သွင်းလိုက်မှသာ လျင်မြန်မှုမှာ ပုံမှန်အခြေအနေသို့ ပြန်ရောက်လာတော့သည်။ သို့သော် ကြွက်အုပ်ကြီး၏ ကြားတွင် ညှပ်နေသဖြင့် ထိပ်တိုက်ရင်ဆိုင်ရန် မဖြစ်နိုင်သေးချေ။

​‘ငါ့အင်အားက မလုံလောက်သေးဘူး၊ အခုချက်ချင်း အင်အားမြှင့်မှ ဖြစ်မယ်"

​လျူယန်သည် ဘေးနားရှိ ဝမ်ချင်း၏ အလောင်းဆီသို့ လျှပ်ခနဲ ရောက်သွားပြီး သူ၏ ပါရမီကို အသုံးပြုလိုက်၏။

​[ နိုးထသူအလောင်းထံမှ ထုတ်ယူခြင်း အောင်မြင်ပါသည်။ ရရှိမှု - B အဆင့် စွမ်းရည် 'အကောင်းဆုံး ပစ်မှတ်ထားခြင်း' နှင့် 'အဆိပ်ထိန်းချုပ်ခြင်း']

​လျူယန် အံ့အားသင့်သွားရပြန်သည်။ အဆင့်တူ B အဆင့် စွမ်းရည်နှစ်ခုကို တစ်ပြိုင်နက် ရရှိလိုက်ခြင်းပင်။ ယခုအခါ လျူယန်သည် လေးနှင့်မြားကို ကျွမ်းကျင်စွာ အသုံးပြုနိုင်စွမ်း ရှိလာရုံသာမက မိမိ၏ တိုက်ခိုက်မှုတိုင်းတွင် အဆိပ်များကိုပါ ထည့်သွင်း ထိန်းချုပ်နိုင်စွမ်း ရှိလာပြီ ဖြစ်သည်။

​သူသည် ဝမ်ချင်း၏ လက်ထဲမှ လေးနှင့်မြားကို ကောက်ယူလိုက်၏။ 'စိတ်ဝိညာဉ် အမြင်အာရုံ' ဖြင့် ကြည့်လိုက်သောအခါ ကြွက်ဘုရင်၏ အားနည်းချက်မှာ အရေခွံမာ မဖုံးအုပ်ထားသော ၎င်း၏ 'ဘယ်ဘက်မျက်လုံး' ဖြစ်ကြောင်း တွေ့လိုက်ရသည်။

​လျူယန်သည် 'ခွန်အား မြှင့်တင်ခြင်း' ကို အသုံးပြုကာ လေးကြိုးကို လမင်းသဏ္ဌာန် ပြည့်အောင် ဆွဲလိုက်၏။ မြားတံပေါ်တွင် 'အဆိပ်ထိန်းချုပ်ခြင်း' စွမ်းရည်ဖြင့် စိမ်းမြသောအဆိပ်များကို သုတ်လိမ်းလိုက်ပြီးနောက် 'အကောင်းဆုံး ပစ်မှတ်ထားခြင်း' ဖြင့် ချိန်ရွယ်ကာ လွှတ်တင်လိုက်တော့သည်။

​ရွှတ်...

​လေထုကို ဖြတ်သန်းသွားသော မြားတံမှာ ကြွက်ဘုရင်၏ ဘယ်ဘက်မျက်လုံးထဲသို့ တည့်တည့်မတ်မတ် စိုက်ဝင်သွားတော့၏။ အဆိပ်များမှာ သတ္တဝါကြီး၏ ဦးနှောက်အတွင်းသို့ တမဟုတ်ချင်း ပျံ့နှံ့သွားကာ ကြွက်ဘုရင်ကြီးမှာ နာကျင်စွာ အော်ဟစ်ရင်း မြေပြင်ပေါ်သို့ ဘုန်းဘုန်းလဲကျ သေဆုံးသွားလေတော့သည်။

​လျူယန်သည် အသက်ပြင်းပြင်းတစ်ချက် ရှူလိုက်၏။ သူသည် အဆင့် (၃) မျိုးဗီဇပြောင်း သတ္တဝါကြီးကို တစ်ကိုယ်တော် အောင်မြင်စွာ အနိုင်ယူနိုင်ခဲ့ပြီ ဖြစ်သည်။

​[ တိုက်ပွဲအနိုင်ရမှုအတွက် ဂုဏ်ယူပါသည်။ အတွေ့အကြုံမှတ် (EXP) ၂၀၀ ရရှိပါသည်! ]

​လက်ပတ်မှ အကြောင်းကြားစာကို မြင်လိုက်ရသောအခါ လျူယန် အလွန်ပင် ကျေနပ်သွားမိ၏။ သာမန်အဆင့် (၃) သတ္တဝါများထံမှ အတွေ့အကြုံမှတ် (၁၂၀) ခန့်သာ ရရှိနိုင်သော်လည်း ယခု မျိုးဗီဇပြောင်းလဲသွားသော ကြွက်ဘုရင်ထံမှ ၂၀၀ အထိ ရရှိလိုက်ခြင်းမှာ ၎င်း၏ အစွမ်းထက်မှုကြောင့် ဖြစ်ပေလိမ့်မည်။

​ပတ်ဝန်းကျင်ရှိ အဆင့် (၁) ကြွက်ငယ်လေးများမှာ သူတို့၏ ခေါင်းဆောင်ကြီး တစ်ချက်တည်းဖြင့် အသက်ပျောက်သွားသည်ကို မြင်သောအခါ ကြောက်လန့်တကြားဖြင့် နောက်ဆုတ်သွားကြတော့သည်။ လျူယန်မှာမူ ထိုကြွက်ငယ်များကို ဂရုမစိုက်ဘဲ သေဆုံးသွားသော ကြွက်ဘုရင်ကြီး၏ အလောင်းနားသို့ သွားကာ ပါရမီကို အသုံးပြုလိုက်၏။

​[ မျိုးဗီဇပြောင်း ကြွက်ဘုရင် အလောင်းထံမှ ထုတ်ယူခြင်း အောင်မြင်ပါသည်။ ]

[ ရရှိမှု - ခွန်အား +၁၂၊ ခံနိုင်ရည် +၁၃၊ လိုက်လျောညီထွေမှု +၈ ]

[ စွမ်းရည်များ ရရှိမှု - ဆိုးယုတ်အဆိပ်ငွေ့ (C)၊ အဆိပ် (E)၊ ထုံကျဉ်ခြင်း (D)၊ ကြန့်ကြာစေခြင်း (C) ]

​[ 'ဆိုယုတ်အဆိပ်ငွေ့'၊ 'အဆိပ်'၊ 'ထုံကျဉ်ခြင်း' နှင့် 'ကြန့်ကြာစေခြင်း' စွမ်းရည်များ ပေါင်းစည်းသွားပါပြီ။ B အဆင့် စွမ်းရည် [မြူမှောင်]ကို ရရှိပါသည်! ]

​[ မြူမှောင်]

​အဆင့်: B

​အာနိသင်: ဧရိယာအလိုက် တိုက်ခိုက်သော စွမ်းရည်။ အသုံးပြုသူ၏ ပတ်ဝန်းကျင် မီတာ ၅၀ အတွင်း မြူထူများ ဖုံးလွှမ်းသွားစေပြီး ရန်သူ၏ အမြင်အာရုံကို ပိတ်ပင်ထားမည်။ ထိုမြူများအတွင်း၌ အဆိပ်၊ ထုံကျဉ်ခြင်းနှင့် ကြန့်ကြာစေခြင်း အာနိသင်များ ပါဝင်သည်။

​လျူယန်မှာ ဝမ်းသာအားရ ဖြစ်သွားမိ၏။ ဤစွမ်းရည်မှာ ရန်သူများကို ထိန်းချုပ်ရန်သာမက အဆိပ်ခတ်ရန်ပါ အလွန်ပင် ကောင်းမွန်လှပေသည်။ သူသည် ထွက်ပြေးရန် ပြင်နေသော ကြွက်အုပ်စုကို ကြည့်ကာ စမ်းသပ်ရန် ဆုံးဖြတ်လိုက်၏။ ဤကြွက်များသည် သူ၏ အတွေ့အကြုံမှတ်များ မဟုတ်ပါလော။

​"မြူမှောင်... အသက်သွင်းစမ်း"

​ချက်ချင်းပင် လျူယန်၏ ပတ်ဝန်းကျင် မီတာ ၅၀ အတွင်း၌ ဆီးနှင်းအလား ဖြူဖွေးလှသော မြူထူများ အလုံးအရင်းနှင့် ထွက်ပေါ်လာတော့သည်။ ထိုမြူများအတွင်း၌ လျူယန်၏ အာရုံခံစားမှုမှာ ပိုမို ထက်မြက်လာပြီး မျက်စိဖြင့် မကြည့်ဘဲ မြူအတွင်းရှိ အရာအားလုံးကို ထိတွေ့နေရသကဲ့သို့ ရှင်းလင်းစွာ သိမြင်နေရ၏။ ဤသည်မှာ မြူမှောင်စွမ်းရည်၏ ဖော်ပြမထားသော ဆန်းကြယ်မှုပင် ဖြစ်ပေလိမ့်မည်။

​မြူထူများအတွင်း ပိတ်မိနေသော ကြွက်ငယ်လေးများမှာမူ အဆိပ်မိကာ ကိုယ်ခန္ဓာများ ထုံကျဉ်လာပြီး ထွက်ပြေးရန် အင်အားပင် မရှိတော့ချေ။ လျူယန်သည် မြူများကြားတွင် လွတ်လပ်စွာ လှုပ်ရှားရင်း ဒဏ်ရာရနေသော ကြွက်များကို တစ်ကောင်ပြီးတစ်ကောင် အမြစ်ဖြတ်လိုက်လေသည်။

​ခေတ္တအကြာတွင် မြူများ ကွယ်ပျောက်သွားပြီးနောက် မြေပြင်ပေါ်၌ ကြွက်လောင်းများစွာ ပြန့်ကျဲနေတော့၏။

​[ ဂုဏ်ယူပါသည်။ သင်သည် အဆင့် (၃) သို့ ရောက်ရှိသွားပါပြီ။ ]

​လျူယန်သည် သူ၏ အရည်အချင်းပြကွက်ကို ပြန်လည်စစ်ဆေးလိုက်ရာ ခွန်အား၊ ခံနိုင်ရည်နှင့် လျင်မြန်မှုတို့မှာ ၅၀ ကျော်သို့ ရောက်ရှိနေပြီဖြစ်ကြောင်း တွေ့လိုက်ရသည်။ သူ၏ စုစုပေါင်း တိုက်ခိုက်ရေးစွမ်းအားမှာ မျှော်စင်ထဲသို့ စတင်ဝင်ရောက်ချိန်ကထက် ၁၀ ဆမက သန်မာလာခဲ့ချေပြီ။

​သူသည် ကျန်ရှိနေသော ကြွက်လောင်းများကိုလည်း နှမြောသဖြင့် 'နတ်ဘုရားအဆင့် ထုတ်ယူခြင်း' ကို ဆက်တိုက် အသုံးပြုလိုက်ပြန်သည်။

​[ ကြွက်အလောင်းထံမှ ထုတ်ယူခြင်း အောင်မြင်ပါသည်။ ခွန်အား +၂၊ ခံနိုင်ရည် +၂၊ လျင်မြန်မှု +၁ ရရှိပြီး [မြူမှောင်] ၏ အဆိပ်အာနိသင် ၁၀% တိုးတက်သွားပါသည်။ ]

​ကြွက်အလောင်း (၁၀) ကောင်ကျော်ထံမှ ထုတ်ယူပြီးနောက် လျူယန်၏ ခွန်အားမှာ ၂၁ မှတ်၊ ခံနိုင်ရည် ၁၈ မှတ်နှင့် လျင်မြန်မှု ၁၅ မှတ် ထပ်မံ တိုးတက်လာ၏။ ထို့ပြင် [မြူမှောင်] စွမ်းရည်၏ အဆိပ်အာနိသင်မှာ ၄၀% နှင့် ထုံကျဉ်မှု အာနိသင်မှာ ၃၀% အထိ မြင့်တက်သွားလေသည်။

​လျူယန်သည် သူ၏ တစ်ကိုယ်တော် ခရီးစဉ်အတွင်း ရရှိလာသော ဤမျှများပြားလှသော ဆုလာဘ်များကြောင့် အားရကျေနပ်စွာဖြင့် မျှော်စင်၏ ဒုတိယအဆင့်ဆီသို့ ဆက်လက် ဦးတည်လိုက်လေသည်။

အခန်း (၁၀) - ပထမဆုံးသတ်ဖြတ်မှုဆုလာဘ်နှင့် ငွေရောင်ရတနာသေတ္တာ

​လျူယန်သည် သူရရှိထားသော ကြီးမားလှသည့် အကျိုးအမြတ်များကို ရေတွက်ရင်း ကျေနပ်နေစဉ်မှာပင် မျှော်စင်အတွင်းရှိ နိုးထသူအားလုံး၏ လက်ပတ်များထံမှ အကြောင်းကြားစာတစ်ခု ပြိုင်တူမြည်ဟည်းလာတော့သည်။

​[ ဂုဏ်ယူပါသည်။ စိမ်းလန်းသောတောအုပ်အတွင်းရှိ 'ထူးချွန်သတ္တဝါ'ကို ပထမဆုံး သတ်ဖြတ်နိုင်သူ ပေါ်ထွက်လာပါပြီ။ ဆုလာဘ် - ငွေရောင်ရတနာသေတ္တာ တစ်လုံး]

​မျှော်စင်အတွင်းရှိ နိုးထသူအားလုံး မှင်သက်သွားကြ၏။

"ဘာ... တစ်ယောက်ယောက်က ထူးချွန်သတ္တဝါကို သတ်နိုင်သွားပြီလား"

"ထူးချွန်သတ္တဝါရဲ့ အစွမ်းက သာမန်အဆင့်တူ သတ္တဝါတွေထက် သုံးဆမက သန်မာတာလေ၊ ဘယ်သူက လုပ်လိုက်တာလဲ"

"အဖွဲ့လိုက် စုပေါင်းတိုက်ကြတာ ဖြစ်မှာပါ... ရတနာသေတ္တာထဲက ပစ္စည်းတွေက တော်တော်တန်ဖိုးရှိမှာပဲ"

​ထိုစဉ် လျူယန်၏ ရှေ့မှောက်၌ပင် ငွေရောင်အလင်းတန်းများ စုစည်းလာပြီး ရတနာသေတ္တာတစ်လုံး ပေါ်ထွက်လာလေသည်။ ကြွက်ဘုရင်မှာ မျိုးဗီဇပြောင်းလဲရုံသာမက 'ထူးချွန်သတ္တဝါ' အဆင့်ဖြစ်နေသဖြင့် ယခုကဲ့သို့ ဆုလာဘ် ရရှိခြင်းပင်။ လျူယန်သည် သေတ္တာကို ဖွင့်ကြည့်လိုက်ရာ အတွင်း၌ ကျောက်သားနှင့်တူသော်လည်း ထိတွေ့လိုက်လျှင် နွေးထွေးအိစက်နေသော သာမန်လက်စွပ်တစ်ကွင်းကို တွေ့လိုက်ရ၏။

​[ အခြေခံ ဟင်းလင်းပြင်လက်စွပ် ]

​အဆင့်: B

​အာနိသင်: သက်မဲ့ပစ္စည်းများကို သိမ်းဆည်းနိုင်ခြင်း။ အတွင်းခန်းကျယ်ဝန်းမှု - ၁၀၀ ကုဗမီတာ။

​လျူယန် အံ့ဩဝမ်းသာသွားမိသည်။ ဤလက်စွပ်သည် အလေးချိန်မည်မျှပင်ရှိစေကာမူ ငှက်မွေးတစ်ခုကဲ့သို့ ပေါ့ပါးနေမည်ဖြစ်ရာ ပစ္စည်းများသယ်ဆောင်ရန် အလွန်ပင် အဆင်ပြေလှပေသည်။ သူသည် လက်ချောင်းကို ဓားဖြင့် အသာလှီးကာ သွေးအနည်းငယ် ချလိုက်ရာ လက်စွပ်က သွေးကို စုပ်ယူသွားပြီး လျူယန်နှင့် စိတ်ချင်းဆက်သွယ်သွားတော့သည်။ ယခုအခါ လျူယန် သေဆုံးမှသာ အခြားသူတစ်ဦးက ဤလက်စွပ်ကို အသုံးပြုနိုင်မည် ဖြစ်သည်။

​လျူယန်သည် ဝမ်ချင်းတို့အဖွဲ့ ပစ်ထားခဲ့သော ပစ္စည်းများကို စုဆောင်းကာ လက်စွပ်ထဲသို့ ထည့်လိုက်၏။ ထိုအထဲတွင် ဆီးနှင်းအလား ဖြူဖွေးသော 'တိမ်လွှာနင်းဖိနပ်'တစ်စုံလည်း ပါဝင်သည်။ သူသည် သူ၏ SSS အဆင့် 'နတ်ဘုရားအဆင့် ထုတ်ယူခြင်း' ကို အသုံးပြု၍ ဖိနပ်နှင့် ဝမ်ချင်း၏ လေးကို အဆင့်မြှင့်တင်လိုက်၏။

​[ တိမ်လွှာနင်းဖိနပ် ] (D အဆင့်)

​အာနိသင်: လျင်မြန်မှု +၈၀၊ ခုန်ကူးနိုင်စွမ်း မြှင့်တင်ပေးခြင်း။

​[ ဖက်ဒရေးရှင်းစံနှုန်း လေးနှင့်မြား ] (E အဆင့်)

​အာနိသင်: မြားအရှိန် +၃၀၊ တိုက်ခိုက်မှုစွမ်းအား +၃၀။

​D အဆင့် ဖိနပ်မှာ အံ့ဩစရာပင်။ လျူယန်သည် ထိုဖိနပ်ကို ဝတ်ဆင်ကာ အသာအယာ ခုန်လိုက်ရာ မီတာ (၁၀) ကျော်မြင့်သော သစ်ပင်ကြီးပေါ်သို့ တန်းခနဲ ရောက်ရှိသွားတော့သည်။ အကယ်၍ သူသာ အားကုန်သုံးလျှင် အထပ် (၁၀) ထပ်စာခန့် မြင့်သော မီတာ (၃၀) အထိ ခုန်တက်နိုင်မည် ဖြစ်ရာ သူသည် လူသားတစ်ဦးထက် မိစ္ဆာတစ်ကောင်နှင့် ပို၍ တူနေချေပြီ။

​လျူယန်သည် သူ၏ ပစ္စည်းများကို သိမ်းဆည်းပြီးနောက် ကျောပိုးအိတ်ကိုပါ လွှင့်ပစ်ခဲ့ကာ လက်ပတ်တွင် ညွှန်ပြထားသော 'အစပြုစခန်း' ဆီသို့ ဦးတည်ထွက်ခွာလာခဲ့၏။ သူ၏ ကိုယ်ခန္ဓာမှာ သွေးများဖြင့် စွန်းထင်နေပြီး ဓားတစ်လက်သာ ပါရှိသဖြင့် ကြည့်ရသည်မှာ အတော်ပင် သနားစဖွယ် အခြေအနေ ဖြစ်နေလေသည်။

​စခန်းသို့ ရောက်သောအခါ ဝမ်ချင်း၏ နောက်လိုက်များဖြစ်သော ဇူယုနှင့် ကျိုးဖန်တို့က လျူယန်ကို မြင်သည်နှင့် လှောင်ပြောင်ကြတော့သည်။

"ဟေ့ကောင်... မင်းကတော့ အသက်လုပြေးလာရတာနဲ့ တူတယ်၊ ပစ္စည်းတွေလည်း ဘာမှ မပါတော့ပါလား"

"ငါတို့ ဝမ်ချင်းအစ်ကိုကြီးက ထူးချွန်သတ္တဝါကို သတ်ပြီး ငွေရောင်သေတ္တာ ရထားတာကွ၊ မင်းကတော့ အသုံးမကျတဲ့ တစ်ကိုယ်တော်သမားပဲ"

​လျူယန်သည် ၎င်းတို့၏ လှောင်ပြောင်မှုကို ဂရုမစိုက်ဘဲ ရေချိုးသန့်စင်ကာ အဝတ်အစားလဲလိုက်၏။ ဝမ်ချင်း သေဆုံးသွားသည်ကို ၎င်းတို့ မသိသေးခြင်းမှာ ရယ်စရာပင်။

​ညဉ့်နက်ပိုင်းသို့ ရောက်သောအခါ လက်ပတ်မှ တစ်ကမ္ဘာလုံးသို့ ကြေညာချက်တစ်ခု ထွက်ပေါ်လာတော့သည်။

[ ယခုအချိန်အထိ နိုးထသူ ထက်ဝက်ကျော် သေဆုံးသွားပါပြီ။ သေဆုံးသူများမှာ - ယန်ယွမ်ကျိ၊ ဆုန့်ယွီ၊ ဝမ်ချင်း... ]

​ဝမ်ချင်း၏ အမည်ကို ကြားလိုက်ရချိန်တွင် ဇူယုနှင့် ကျိုးဖန်တို့မှာ မျက်နှာများ ဖြူလျော့သွားပြီး မျှော်လင့်ချက်မဲ့စွာ လဲကျသွားကြတော့သည်။ ၎င်းတို့ အားကိုးနေသော ခေါင်းဆောင်ကြီးမှာ သေဆုံးသွားခဲ့ချေပြီ။ စခန်းအတွင်းရှိ နိုးထသူအားလုံးမှာလည်း ထိတ်လန့်တကြား ဖြစ်ကုန်ကြ၏။

​လျူယန်မှာမူ သက်တောင့်သက်သာ လဲလျောင်းရင်း စိတ်ထဲမှ ညည်းညူလိုက်မိသည်။

‘မနက်ဖြန်အထိ ထပ်စောင့်ရဦးမှာလား၊ တကယ်ပဲ အချိန်ဖြုန်းနေတာပဲ... အခုချက်ချင်း ဒုတိယအဆင့်ကို တက်လို့ရရင် ကောင်းမှာပဲ’

​အစပြုစခန်းအတွင်းရှိ နိုးထသူများ၏ လက်ပတ်များထံမှ ကြေညာချက်များ ဆက်တိုက် ထွက်ပေါ်လာနေတော့၏။

​[ မနက်ဖြန်သည် မျှော်စင်၏ ပထမအဆင့်ကို ဖွင့်လှစ်မည့် နောက်ဆုံးရက် ဖြစ်သည်။ မနက်ဖြန် ညနေ (၆) နာရီတွင် မျှော်စင်စောင့် သတ္တဝါဆိုးများသည် 'သားရဲဒီလှိုင်း' သဏ္ဌာန်ဖြင့် အလုံးအရင်း တိုက်ခိုက်လာလိမ့်မည်။ နိုးထသူများအနေဖြင့် စုပေါင်းခုခံကြရမည်။ ]

​[ ထိုသားရဲဒီလှိုင်းအတွင်းရှိ မျှော်စင်စောင့် သတ္တဝါ (၂) ကောင်ကို သတ်ဖြတ်နိုင်သူတိုင်း ဒုတိယအဆင့်သို့ တက်ရောက်ခွင့် ရရှိမည် ဖြစ်သည်။ ]

​ဤကြေညာချက်ကို ကြားလိုက်ရချိန်တွင် နိုးထသူအများစု၏ မျက်နှာများမှာ သွေးမရှိတော့သကဲ့သို့ ဖြူလျော့သွားကြသည်။ အဖွဲ့လိုက် ဝိုင်းတိုက်လျှင်ပင် သာမန်သတ္တဝါကို သတ်ရန် ခဲယဉ်းနေချိန်တွင် အဆင့်တူသတ္တဝါထက် များစွာသန်မာသော 'မျှော်စင်စောင့် သတ္တဝါ' ကို တစ်ဦးတည်း (၂) ကောင် သတ်ရမည်ဟူသော အချက်မှာ ၎င်းတို့အတွက် သေမိန့်ပေးလိုက်သကဲ့သို့ပင်။

​"ငါတို့ ထွက်ပြေးကြရင်ကော"

တစ်ဦးက အကြံပြုသော်လည်း အတွေ့အကြုံရှိသူတစ်ဦးက ခါးသီးစွာ ပြန်ပြောလိုက်၏။

"အလကားပဲ... ငါတို့လက်ပတ်တွေက ဒီသတ္တဝါတွေကို ဆွဲဆောင်နေတာ.. ထွက်ပြေးရင် တစ်ယောက်ချင်း အသတ်ခံရရုံပဲ ရှိမယ်၊ စုပေါင်းတိုက်တာကမှ အသက်ဆက်ဖို့ မျှော်လင့်ချက် ရှိဦးမယ်"

​လျူယန်မှာမူ အခြားသူများနှင့်မတူဘဲ စိတ်လှုပ်ရှားနေမိသည်။ သာမန်သတ္တဝါများထံမှ ရရှိသော အကျိုးအမြတ်မှာ သူ၏အဆင့်တွင် နည်းပါးနေပြီဖြစ်ရာ အစွမ်းထက်သော မျှော်စင်စောင့်သတ္တဝါများမှာ သူ၏ အင်အားမြှင့်တင်ရန်အတွက် အကောင်းဆုံး 'သားကောင်' များပင် ဖြစ်ပေလိမ့်မည်။

​နောက်တစ်နေ့တွင် နိုးထသူများမှာ အသက်လုကာ လေ့ကျင့်နေကြသော်လည်း လျူယန်မှာမူ စခန်းထဲ၌ပင် အေးဆေးစွာ အနားယူနေ၏။ ၎င်းကို မြင်သောအခါ အခြားသူများက လှောင်ပြောင်ကြပြန်သည်။

"ကြည့်စမ်း... ဟိုကောင်ကတော့ လက်လျှော့လိုက်ပြီ ထင်တယ်၊ တစ်နေ့လုံး အိပ်နေတာပဲ"

"သူ့အတွက်တော့ ဒီနေ့က နောက်ဆုံးနေ့ဆိုတော့ အေးအေးဆေးဆေး အသေခံချင်လို့ ဖြစ်မှာပေါ့"

​ညနေ (၆) နာရီ ထိုးသည်နှင့် မြေပြင်မှာ ပြင်းထန်စွာ တုန်ခါလာတော့သည်။ ဝေးလံသော အရပ်မှနေ၍ ဖုန်လုံးကြီးများနှင့်အတူ မရေမတွက်နိုင်သော သတ္တဝါဆိုးကြီးများ တံတိုင်းကြီးသဖွယ် ပြေးဝင်လာသည်ကို မြင်လိုက်ရ၏။ ထိုမြင်ကွင်းမှာ ကြောက်မက်ဖွယ် ကောင်းလှသဖြင့် နိုးထသူအချို့မှာ ခြေမခိုင်တော့ဘဲ လဲကျကုန်ကြသည်။

​တိုက်ပွဲစသည်နှင့် အစောပိုင်းက ကတိကဝတ်များ ပျက်ပြားကာ နိုးထသူများမှာ ထိတ်လန့်တကြား ထွက်ပြေးကြတော့သည်။ သို့သော် သားရဲများမှာ လက်ပတ်အချက်ပြမှုနောက်သို့ လိုက်ကာ တစ်ဦးပြီးတစ်ဦးကို ရက်ရက်စက်စက် သတ်ဖြတ်နေတော့၏။

​လျူယန်မှာမူ အခြားသူများနှင့် ဆန့်ကျင်ဘက်သို့ ဦးတည်လိုက်သည်။ သူသည် စခန်းမှ ထွက်ခွာကာ တောနက်အတွင်းသို့ ပြန်လည်ဝင်ရောက်ခဲ့၏။ သူ၏ 'တိမ်လွှာနင်းဖိနပ်' ကို အသုံးပြုကာ သစ်ပင်ကြီးများ၏ ထိပ်ဖျားသို့ ခုန်တက်ကာ အခြေအနေကို စောင့်ကြည့်နေလိုက်သည်။

​ထိုစဉ် လျူယန် ထူးခြားသော အချက်တစ်ခုကို သတိပြုမိလိုက်၏။ မျှော်စင်စောင့် သတ္တဝါများသည် နိုးထသူများကို သတ်ဖြတ်ပြီးနောက် အလောင်းများကို တောနက်ထဲရှိ ၎င်းတို့၏ အသိုက်ဆီသို့ ပြန်လည်သယ်ဆောင်သွားကြခြင်းပင်။

​လျူယန်၏ မျက်လုံးများ ဝင်းလက်သွားသည်။

‘ဒါဆိုရင်... တောအုပ်ရဲ့ အလယ်ဗဟိုမှာ နိုးထသူတွေရဲ့ အလောင်းတွေ အများကြီး ရှိနေမှာပေါ့’

​အကယ်၍ ထိုအလောင်းများထံမှ ပါရမီများကို 'နတ်ဘုရားအဆင့် ထုတ်ယူခြင်း' ဖြင့် ထုတ်ယူနိုင်ပါက သူ၏ အင်အားမှာ မည်မျှအထိ တိုးတက်သွားမည်နည်း။ ယခုအချိန်တွင် သူ၏ ထုတ်ယူခြင်း အကြိမ်ရေမှာလည်း အပြည့်ရှိနေချေပြီ။

​အန္တရာယ်နှင့် အခွင့်အရေးမှာ ဒွန်တွဲနေသည်ဟု ဆုံးဖြတ်ကာ လျူယန်သည် သစ်ပင်ထိပ်ဖျားများပေါ်မှ တစ်ဆင့် သားရဲများ၏ အသိုက်ရှိရာ တောနက်အလယ်ဗဟိုဆီသို့ တစ်ကိုယ်တော် ခုန်ပျံဝင်ရောက်သွားလေတော့သည်။