အခန်း (၁၅၇၃-၁၅၇၄)

အခန်း (၁၅၇၃) : လက်မှတ်ရေးထိုးခြင်း

ချောင်စီချုန်းက သူ့စိတ်ထဲတွင် တွက်ချက်မှုများ ပြုလုပ်လိုက်သည်။ သူ ဝယ်ယူရန် စီစဉ်ထားသည့် အရာအချို့ရှိပြီး ပထမဆုံးအချက်မှာ [ထူးကဲသာလွန်လမ်းစဉ် မိတ်ဆက်] ဟုခေါ်သော စာအုပ်ငယ် ဖြစ်၏။ လဲလှယ်ရေးစာရင်းရှိ ဖော်ပြချက်အရ ဤစာအုပ်သည် ထူးကဲသာလွန်သူတော်စင် တစ်ဦးဖြစ်လာရန် သိထားသင့်သမျှကို မိတ်ဆက်ပေးထားသည်။ သို့သော် ဤစာအုပ်အတွက် ခရမ်းရောင်တိမ်တိုက်ကုသိုလ်အမှတ် အမြောက်အမြား ပေးရလိမ့်မည်။

ထို့နောက်တွင် ချောင်စီချုန်းက သူ့ကိုယ်ပိုင်လမ်းစဉ်ကို ရှာဖွေရန်အတွက် ကမ္ဘာဦးသူတော်စင်အချို့၏ ဟောပြောချက်များကို ဝယ်ယူရမည် ဖြစ်သည်။ သူ့လမ်းစဉ်ကို မတွေ့မချင်း ထိုဟောပြောချက်များကို အကြိမ်မည်မျှ နားထောင်ရမည်ကို သူ မသိသော်လည်း ထိုအရာမှာ ကုန်ကျစရိတ် အလွန်ကြီးမားမည်ကိုတော့ သိထားသည်။

သူ့တွင် ဦးတည်ချက်တစ်ခု ရှိလာပြီဆိုလျှင် ချောင်စီချုန်းအနေနှင့် ချို့ယွင်းချက်ရှိသော နည်းစနစ်တစ်ခုကို ဝယ်ယူပြီး ပြုပြင်မွမ်းမံရမည် ဖြစ်သည်။ ဤသည်မှာ သူ ပြုပြင်နိုင်သည်ဟု ယူဆထားသည့်အခါ ဖြစ်၏။ သူ မပြုပြင်နိုင်ပါက ကောင်းကင်တာအိုထံမှ ဉာဏ်အလင်းပွင့်မှု အကူအညီများကို ဝယ်ယူရမည်ဖြစ်ပြီး ထိုအရာများမှာလည်း အလွန်ပင် ဈေးကြီးလှသည်။

ထို့အပြင် ကျင့်ကြံခြင်းအတွက် သီးခြားပစ္စည်းများ လိုအပ်လိမ့်မည်။ ယင်ကျန်း၏ ထူးကဲသာလွန်လမ်းစဉ်တွင် လူသားဧကရာဇ်ရာထူးနှင့် အခြားအရာများ လိုအပ်သကဲ့သို့ ချောင်စီချုန်း၏ လမ်းစဉ်တွင်လည်း အခြားသော ပစ္စည်းများ သို့မဟုတ် လိုအပ်ချက်များ ရှိနေမည်ဖြစ်ပြီး ၎င်းတို့ကို သူ ဝယ်ယူရမည် ဖြစ်သည်။ ဤသည်မှာ ထိုအရာများ လဲလှယ်ရေးစာရင်းတွင် ရှိနေမည်ဟု ယူဆထားခြင်း ဖြစ်၏။

အမှန်စင်စစ် ကောင်းကင်တာအိုသည် လူသားဧကရာဇ်ဘွဲ့ကဲ့သို့သော အရာများကို စာရင်းတွင် ထည့်သွင်းပေးထားမည် မဟုတ်ပေ။ တကယ်တော့ ထည့်ပေးရန်လည်း မလိုပေ။ အကယ်၍ တစ်စုံတစ်ယောက်က လုံလောက်သော ကုသိုလ်ကို ရရှိပြီး ကမ္ဘာကြီးကို ကယ်တင်ရာတွင် ပါဝင်ခဲ့ပါက ထိုဘွဲ့မှာ သူတို့နှင့် ထိုက်တန်သွားမည်သာ ဖြစ်သည်။

ငါသာ ဒီသဘောတူညီချက်ကို လက်ခံလိုက်ရင် ကုသိုလ်တွေ အများကြီး သက်သာသွားမှာပဲ

ချောင်စီချုန်းက တွေးမိသွားသည်။ အားနည်းချက်မှာ သူသည် ယင်ကျန်း၏ ရန်သူ ဖြစ်လာမည် ဖြစ်သည်။ ထိုအရာကို သူ ဂရုမစိုက်သော်လည်း ပို၍အရေးကြီးသည်မှာ သူ ကြိုးစားပမ်းစား တည်ဆောက်ခဲ့ရသည့် ကိုယ်ပိုင်လွတ်လပ်ခွင့်များကို ဆုံးရှုံးသွားရမည် ဖြစ်သည်။

ငါ ဘာလို့ ဝေခွဲမရဖြစ်နေတာလဲ။ ငါက ဒီလူတွေရဲ့ လက်ခုပ်ထဲကနေ တစ်ခါ ရုန်းထွက်နိုင်ခဲ့တာပဲ။ တစ်ခါလုပ်နိုင်ရင် နောက်တစ်ခါလည်း လုပ်နိုင်တာပေါ့။ မဟုတ်ဘူး... ဒီတစ်ခါတော့ ငါ ရုန်းထွက်ရုံတင်မကဘူး၊ သူတို့ထက် ပိုမြင့်တဲ့ အဆင့်တစ်ခုအထိ တက်လှမ်းပြမယ်

ချောင်စီချုန်းက တွေးလိုက်သည်။

မကြာမီ ကျရောက်တော့မည့် ကပ်ဘေးမှာ ကန့်သတ်ထားသော ထူးကဲသာလွန်အင်အားစု နေရာများအတွက် ပြိုင်ပွဲတစ်ခု ဖြစ်ကြောင်း သူ သိရှိထားပြီးဖြစ်သည်။ ထိုနေရာ မည်မျှရှိသည်ကို သူ မသိသော်လည်း အလွန်နည်းပါးမည်ကိုတော့ သူ ခန့်မှန်းမိသည်။

ချောင်စီချုန်းက ရုတ်တရက် ပြုံးလိုက်ပြီး ပြောလိုက်သည်။

"မင်းရဲ့ သဘောတူညီချက်ကို ငါ လက်ခံတယ်။ ဒါပေမဲ့ ငါ့မှာ အခြေအနေ နှစ်ခုရှိတယ်"

"ပြောပါ"

"မင်းရဲ့ အဆောင်လက်ဖွဲ့က စောင့်ကြည့်ဖို့ပဲ ဖြစ်ရမယ်။ ငါ့ကို လွှမ်းမိုးဖို့ ဒါမှမဟုတ် ထိန်းချုပ်ဖို့အတွက် အသုံးမပြုရဘူးဆိုတဲ့ အချက်ကို ထည့်ပေးပါ"

"ရတာပေါ့" ဝမ်ဝေ့က အေးဆေးစွာ ပြန်ဖြေသည်။ သူသည် တိုင်းပြည်မဟာမိတ်ကို စိတ်မဝင်စားပေ။ သူ့ တွက်ချက်မှုအရ အကယ်၍ ထိုအဖွဲ့က သူတို့၏ ကံကြမ္မာကို ပြန်လည် နိုးထလာအောင် မလုပ်နိုင်ပါက ထိုမျိုးဆက်များသည် ကပ်ဘေးအတွင်း အသက်ရှင်ကျန်ရစ်ဖို့ပင် မလွယ်ကူလှပေ။ ထူးကဲသာလွန်အင်အားစုနေရာအတွက် ယှဉ်ပြိုင်ဖို့ဆိုသည်မှာ ဝေလာဝေးပင် ဖြစ်၏။ အကယ်၍ သူသာ စိတ်ဝင်စားခဲ့ပါက သူ့ လက်အောက်ငယ်သား ကျားဖျင်ကို အသုံးချ၍ အတွင်းပိုင်းမှ ဝင်ရောက် ထိန်းချုပ်ပြီးသား ဖြစ်ပေလိမ့်မည်။

"ငါ့ရဲ့ ဒုတိယအခြေအနေကတော့ အကယ်၍ ယင်ကျန်းက ငါ့ကို တိုက်ခိုက်လာရင် ငါ တိုက်ပွဲမှာ ပါဝင်မှာ မဟုတ်ဘူး"

"အဲဒါလည်း အဆင်ပြေပါတယ်။ ဒါပေမဲ့ ခင်ဗျား ကျုပ်တို့ကို သစ္စာဖောက်ပြီး သူ့ဘက်ကို မပူးပေါင်းရဘူးဆိုတဲ့ အချက်ကိုတော့ ထည့်ရလိမ့်မယ်။ အဲဒီအချက်ကို ဖောက်ဖျက်ရင်တော့ ရလဒ်က အစစ်အမှန် သေဆုံးခြင်းပဲ"

ချောင်စီချုန်းက မျက်မှောင်ကြုတ်လိုက်ပြီးနောက် ခေါင်းညိတ်လိုက်သည်။ ယခု သူတို့ သဘောတူညီချက် ရရှိသွားပြီဖြစ်၍ နှစ်ဦးစလုံး လက်မှတ်ရေးထိုးလိုက်ကြသည်။ ဝမ်ဝေ့က သူ့ လက်ဝါးကို မြှောက်လိုက်ရာ အရာသုံးခု ပေါ်ထွက်လာသည်။

ဘွဲ့အမည်၊ သတင်းအချက်အလက် အဆောင်လက်ဖွဲ့နှင့် စောင့်ကြည့်ရေး အဆောင်လက်ဖွဲ့တို့ ဖြစ်သည်။

"စောင့်ကြည့်ရေး အဆောင်လက်ဖွဲ့က ယာယီပဲ။ ဒီညီလာခံပြီးလို့ နှစ်အနည်းငယ်ကြာရင် အစစ်ကို ပို့ပေးမယ်" ဝမ်ဝေ့က ဆိုသည်။

ဤအဆောင်လက်ဖွဲ့ကို လက်ရှိတွင် ယင်ကျန်းက သူ့ ကျောက်စိမ်းဆွဲသီးကို အသုံးချ၍ ချောင်စီချုန်း၏ တည်ရှိမှုကို တိတ်တဆိတ် မထိခိုက်စေရန် ကာကွယ်ရန်အတွက် အဓိက အသုံးပြုထားခြင်း ဖြစ်သည်။ သို့သော် ဝမ်ဝေ့အနေဖြင့် အန္တရာယ်သတိပေးချက် အစရှိသော အခြားသော အာနိသင်များကို မြှင့်တင်ရန် ပိုမိုကောင်းမွန်သော အဆောင်လက်ဖွဲ့တစ်ခုကို သန့်စင်ရန် လိုအပ်နေသေးသည်။

ချောင်စီချုန်းက စကားအများကြီး မပြောဘဲ အဆောင်လက်ဖွဲ့ကို ယူလိုက်သည်။

"ကျန်တဲ့ ကတိတွေကို ဘယ်တော့ အကောင်အထည်ဖော်မှာလဲ"

"စိတ်မပူပါနဲ့။ လူရိုင်းမျိုးနွယ်စုနဲ့ ကျုပ် သဘောတူညီချက် ရထားပြီးသားပါ။ အခု ခင်ဗျား လက်မှတ်ထိုးလိုက်ပြီဆိုတော့ သူတို့က ခင်ဗျားကို ထောက်ခံပေးလိမ့်မယ်"

ဝမ်ဝေ့က ပြုံးကာ မတ်တတ်ရပ်လိုက်သည်။

သူက ယဉ်ကျေးစွာ ဦးညွှတ်လိုက်ပြီး "ခင်ဗျားနဲ့ တွေ့ရတာ ဝမ်းသာပါတယ် … လူကြီးမင်းချောင်"

ချောင်စီချုန်းသည် ဝမ်ဝေ့ ပျောက်ကွယ်သွားသည်ကို ကြည့်နေမိသည်။ သူသည် စက္ကန့်အနည်းငယ်မျှ တိတ်ဆိတ်သွားပြီးနောက် သက်ပြင်းအရှည်ကြီး ချလိုက်သည်။

"ကျူးကျော်မှုအတွင်းမှာ စိတ်ခံစားချက်တွေနဲ့ ဝိညာဉ်တွေကို ကစားရတာ ဝါသနာပါတဲ့ မိစ္ဆာပေါင်းများစွာကို ငါ တွေ့ဖူးတယ်။ ငါကိုယ်တိုင်တောင် အချို့ကို လှည့်စားခဲ့ဖူးတယ်။ ဒါပေမဲ့ ဒီနေ့ တွေ့ဆုံမှုလောက် ငါ့ကို စက်ဆုပ်မိစေတဲ့ အရာမျိုး တစ်ခါမှ မရှိခဲ့ဖူးဘူး"

ယနေ့မှာ ချောင်စီချုန်းအတွက် တကယ်ကို ဆိုးရွားသောနေ့တစ်နေ့ ဖြစ်သည်။ သူ့ ကျုံးမင်းဆက်ထက် ပို၍ လက်ရာမြောက်သော အစားအသောက်များကို တွေ့ရှိခဲ့သော်လည်း သူ မစားရတော့သလို၊ မိစ္ဆာတစ်ကောင်နှင့်လည်း မသန့်ရှင်းသော သဘောတူညီချက်တစ်ခုကို လုပ်ခဲ့ရသည်။ သူက သက်ပြင်းချလိုက်ပြီး ထိုဝိညာဉ်နယ်ပယ်ကို ဖျက်သိမ်းလိုက်တော့သည်။

…………….

"ပြီးပြီလား" ဝမ်ပေါ်က မေးသည်။

"ပြီးပြီပေါ့" ဝမ်ဝေ့က ပြုံးလျက် ပြောလိုက်သည်။

"ငါ ချောင်စီချုန်းအတွက် စိတ်မကောင်းဖြစ်မိသလိုပဲ" ဝမ်ပေါ်က သက်ပြင်းချလိုက်သည်။

"ဘာလို့လဲ။ ကျွန်တော်က သူ့ရှေ့က လမ်းကို ရှင်းပေးလိုက်တာလေ။ ကုသိုလ်တွေလည်း အများကြီး သက်သာသွားတာပဲကို" ဝမ်ဝေ့က အေးဆေးစွာ ပြောသည်။

"မင်း ပြောသလိုပဲ ဖြစ်မှာပါလေ" လူအိုကြီး ဝမ်ပေါ်က မျက်လုံးလှန်၍ ပြောလိုက်သည်။

နာရီအနည်းငယ် ကြာပြီးနောက် ချီယွမ်နှင့် ယန်းအိုက်တို့ မျက်လုံးဖွင့်လာကြသည်။ လူတိုင်းက သတင်းကို ကြားရန် ရင်တထိတ်ထိတ်ဖြင့် စောင့်နေကြသော်လည်း ဝမ်ဝေ့ ပထမဆုံး လုပ်သည့်အရာမှာ မဟာတံတိုင်းကို စစ်ဆေးခြင်း ဖြစ်သည်။ အန္တရာယ်လက္ခဏာများ ပျောက်ကွယ်သွားသည်ကို သူ ချက်ချင်း သတိပြုမိလိုက်သည်။

ယင်ကျန်း သူ့ဆန္ဒ ပြည့်သွားပြီပေါ့ ဟုတ်လား

"ကဲ... ဘယ်လိုလဲ" ဝမ်ပေါ်က မေးသည်။

"အားလုံး အောင်မြင်သွားပြီ" ချီယွမ်က ဆိုသည်။

"ဒီလောက် မြန်မြန်ကြီးလား" ဝမ်ပေါ်က မေးသည်။

"မေတ္တယျကပဲ လုပ်ပေးလိုက်တာလား"

ချီယွမ်က ခေါင်းခါလိုက်သည်။

"သူမက ကျုပ်တို့ကို အခြေအနေကို ရှင်းပြတယ်။ ယင်ကျန်းက မလုပ်ရင်တောင် ကောင်းကင်တာအိုက သူ့ဘာသာသူ ခုံရုံးကို တည်ထောင်လိမ့်မယ်တဲ့"

"ဘာလို့လဲ" ဝမ်ပေါ်က မျက်မှောင်ကြုတ်၍ မေးသည်။

"အန္တိမသဟဇာတက အဲဒီလောက်တောင် ပျက်စီးစေခဲ့တာလား" ဝမ်ဝေ့က မေးလိုက်သည်။

"ဟုတ်တယ်။ သူက သော့ခလောက်ချတာနဲ့ အခြားကိစ္စတွေအတွက် ကမ္ဘာ့အရင်းအမြစ်စွမ်းအား အတော်များများကို စုပ်ယူခဲ့တာ။ ထပ်ပြီးတော့ ကောင်းကင်တာအိုကလည်း ဒိုင်မေးရှင်းအနိမ့်ရဲ့ လုံခြုံရေးအတွက် အတော်များများကို သုံးထားရတယ်"

"မိုးမြေရဲ့ လားရာပေါ့" ဝမ်ဝေ့က တိုးတိုးလေး ရေရွတ်လိုက်သည်။

"နောက်ဆုံး ရလဒ်တွေက ဘာလဲ" ဝမ်ပေါ်က မေးသည်။

"ချောင်စီချုန်းက မြောက်ပိုင်းဧကရာဇ် ဖြစ်လာမယ်" ယန်းအိုက်က ဝမ်ဝေ့ကို တစ်ချက်ကြည့်ရင်း ပြောလိုက်သည်။

"ဗုဒ္ဓဘာသာက ခုံကို အရှေ့ပိုင်းဧကရာဇ် ဖြစ်စေဖို့ အတင်းအကျပ် တောင်းဆိုခဲ့တယ်။ အံ့ဖွယ်ယုံကြည်မှုဘုံကတော့ ဘေးအန္တရာယ် ကူညီကယ်ဆယ်ရေးဌာနကို စွန့်လွှတ်လိုက်ပြီး တောင်ပိုင်းဧကရာဇ် ရာထူးနဲ့ ကောင်စီက နေရာအများအပြားကို ရရှိသွားတယ်။"

"နောက်ဆုံးအနေနဲ့ အသင်္ချေဂိုဏ်းမဟာမိတ်က ကောင်စီရဲ့ ၁၅% ကို စွန့်လွှတ်ပြီး အနောက်ပိုင်းဧကရာဇ် နေရာကို ယူလိုက်တယ်"

"ဘေးအန္တရာယ် ကူညီကယ်ဆယ်ရေးဌာနကရော"

"သူတော်စင်မ (မေတ္တယျ) က ဌာနချုပ်အကြီးအကဲ ဖြစ်လာမယ်" ချီယွမ်က ထုတ်ဖော်ပြောကြားလိုက်သည်။

"ဒါပေမဲ့ သူမက အမည်ခံသက်သက်ပဲလို့ ပြောတယ်။ ဌာနကိုတော့ ဒုတိယခေါင်းဆောင် သုံးဦးက အမှန်တကယ် စီမံခန့်ခွဲလိမ့်မယ်။ သူတို့ကတော့ ဝူဟုန်၊ ဝိဇ္ဇာသင်္ကေတရောင်ဝါနဲ့ ဝမ်ပေါ် … ခင်ဗျားပဲ "

"ငါလား"

"ဒါက ဧကရာဇ်ရာထူးတွေအတွက် မပြိုင်ဆိုင်တဲ့အတွက် ရလာတဲ့ လိုက်လျောမှုပဲ"

ဝမ်ဝေ့က ခေါင်းညိတ်လိုက်သည်။ အကယ်၍ ကမ္ဘာဦးသူတော်စင်တစ်ပါး၏ တိုက်ပွဲနောက်ဆက်တွဲ ပျက်စီးမှုများကို မည်သို့ ရှင်းလင်းရမည်ကို သိနိုင်သည့်သူ ရှိလျှင် ဤသည်မှာ သူ့ အနာဂတ်ဇနီးလောင်း ဖြစ်ပြီး၊ နောက်တွင် ပညာရပ်လမ်းစဉ်အဖွဲ့အစည်းမှ ဝိဇ္ဇာသင်္ကေတရောင်ဝါ ဖြစ်လိမ့်မည်။ ဝမ်ပေါ်တွင်လည်း ကျွမ်းကျင်မှုအချို့ ရှိသော်လည်း ကျင့်ကြံခြင်းအဆင့်တွင် အားနည်းနေသေးသည်။

"အသင်္ချေမျိုးနွယ်အဖွဲ့အစည်းက ကန့်ကွက်တာ မရှိဘူးလား" ဝမ်ဝေ့က မေးလိုက်သည်။ ထိုအဖွဲ့အစည်းတွင် အရင်းအမြစ်သင်္ကေတခန္ဓာနှင့် ဆင်တူသော သွေးမျိုးဆက်ရှိသည့် ရန်မျိုးနွယ်စု ရှိသည်ကို သူ သိထားသည်။ ဝမ်ပေါ်က တာအိုအခွင့်အလမ်းဂိုဏ်းအတွက် အုတ်မြစ်ဖြစ်သကဲ့သို့ သူတို့ကလည်း ထိုအဖွဲ့အစည်း၏ အခြေခံအုတ်မြစ် ဖြစ်သည်။

"သူတို့လည်း ကန့်ကွက်ခဲ့ကြပါတယ်။ ဒါပေမဲ့ အခြား လိုက်လျောမှုတွေ ရသွားကြတယ်" ချီယွမ်က ဆိုသည်။

"ဒါဆို အားလုံး ပြီးသွားပြီပေါ့" ဝမ်ဝေ့က မေးသည်။

"အခြေခံအားဖြင့်တော့ ဟုတ်တယ်" ချီယွမ်က ခေါင်းညိတ်လိုက်သည်။

"ငါတို့ရဲ့ ဌာနအကြောင်း ပြောရရင် မင်းရော တာဝန်တစ်ခုခု ယူဦးမလား"

"ကျွန်တော့်အတွက် နေရာတစ်ခုတော့ ချန်ထားပေးပါ။ ဒါပေမဲ့ အခုလောလောဆယ် ကျွန်တော့်ရဲ့ ဦးစားပေးက ရှေးဦးမူလတစ်ယောက် အမြန်ဆုံး ဖြစ်လာဖို့ပဲ"

ဝမ်ဝေ့က ပြန်ဖြေသည်။ ခုံရုံးတွင် ရာထူးရခြင်းမှာ ကုသိုလ်ရရှိရန် အကောင်းဆုံးနည်းလမ်းဖြစ်သော်လည်း ၎င်းမှာ ကြီးမားသော ဝန်ထုပ်ဝန်ပိုးတစ်ခုလည်း ဖြစ်သဖြင့် သူ လက်မခံလိုပေ။

"နားလည်ပြီ"

ယခုအခါ အဆိုပြုချက်ကို လက်ခံလိုက်ပြီဖြစ်သဖြင့် နောက်ထပ်အဆင့်မှာ အသေးစိတ်အချက်အလက်များ ဖြစ်သည်။ အင်အားစုတစ်ခုစီက ရာထူးနေရာအသီးသီးအတွက် အဖွဲ့ဝင်များကို ရွေးချယ်ကြသည်။ ထိုလုပ်ငန်းစဉ်မှာ ရက်အနည်းငယ် ကြာမြင့်ခဲ့ပြီးနောက် ကောင်းကင်ခုံရုံးကို တရားဝင် တည်ထောင်နိုင်ခဲ့သည်။ ယင်ကျန်းနှင့် မေတ္တယျတို့သည် ထိုအချိန်ကို အသုံးချ၍ ကောင်းကင်ခုံရုံး၏ တည်နေရာကို သန့်စင်ဖန်တီးခဲ့ကြပြီး ညီလာခံစတင်ပြီး ခုနစ်ရက်အကြာတွင် အခမ်းအနား စတင်ခဲ့သည်။

ယင်ကျန်းသည် ယဇ်ပလ္လင်ရှေ့တွင် ရပ်နေပြီး သူ့နောက်တွင် ချောင်စီချုန်း၊ ဧကရာဇ်ခုံ၊ ရှန်ထျန်းနှင့် တုကုပိုင်ထျန်းတို့ ရှိနေကြသည်။ သူတို့၏ နောက်ကွယ်တွင် ကောင်းကင်ခုံရုံးကြီး တည်ရှိနေစဉ် သူတို့သည် မိုးမြေထံသို့ ဆုတောင်းကြသည်။ ကောင်းကင်တာအို၏ မျက်လုံးများ ပေါ်ထွက်မလာမီ ကောင်းကင်တွင် ထူးခြားသော နိမိတ်များ ပေါ်ထွက်လာသည်။

၎င်းမှာ ပထမဆုံးအနေဖြင့် ဤငါးဦး၏ ရာထူးများကို အသိအမှတ်ပြုသည့်အနေဖြင့် သူတို့၏ ဂုဏ်ဒြပ်ကို ကိုယ်စားပြုသော တောက်ပသော ရွှေရောင်အလင်းတန်းများကို ဆင်းသက်စေခဲ့သည်။ ထို့နောက် မျက်လုံးသည် အပ်နှင်းခံနတ်ဘုရားစာရင်းကို ချပေးခဲ့သည်။ ကောင်းကင်တာအိုသည် ထိုကဲ့သို့ လုပ်ဆောင်ရန် ထိုက်တန်သော တစ်ဦးတည်းသောသူဖြစ်သည့် မေတ္တယျကို သူတော်စင်ရာထူး အပ်နှင်းခဲ့သည်။

နောက်ဆုံးတွင် စာရင်းကို ယင်ကျန်း၏ လက်ထဲသို့ အပ်နှင်းခဲ့သည်။ ပုံမှန်အခြေအနေအရဆိုလျှင် ဤအခိုက်အတန့်မှာ ကောင်းကင်ဧကရာဇ်အတွက် သူ့ လက်အောက်ခံ ဝန်ထမ်းများကို နတ်ဘုရားရာထူးများ အပ်နှင်းခွင့်ရသည့် ဂုဏ်ယူဖွယ် အချိန် ဖြစ်သင့်သည်။ သို့သော် ဤခုံရုံးမှာ ပုံမှန်နည်းလမ်းဖြင့် တည်ထောင်ခဲ့ခြင်း မဟုတ်ပေ။

ယင်ကျန်းသည် ဘွဲ့အပ်နှင်းခြင်း လုပ်ငန်းစဉ်အတွက် စာရင်းကို မေတ္တယျထံသို့ အပ်နှင်းလိုက်သည်။ ဤဖြစ်ရပ်မှာ ဝမ်ဝေ့အတွက် ဤကိစ္စတစ်ခုလုံးတွင် ခံစားခဲ့ရသော ပျော်ရွှင်မှု အနည်းငယ်ထဲမှ တစ်ခု ဖြစ်၏။ အဘယ်ကြောင့်ဆိုသော် ယင်ကျန်း တစ်ယောက် စိတ်ထဲတွင် ဒေါသတကြီး ဖြစ်နေမည်ကို သူ သိသောကြောင့် ဖြစ်သည်။

ဒါပေါ့ ... သူသည် ဤအရာ မည်သို့ ဖြစ်လာမည်ကို သိလျက်နှင့် လုပ်ဆောင်ခဲ့ခြင်းက သူ့ ပြတ်သားမှုနှင့် သူ့ အိပ်မက်အတွက် မည်မျှအထိ သွားနိုင်သည်ကို ပြသနေခြင်းပင် ဖြစ်သည်။

အခန်း (၁၅၇၄) : ညီလာခံ ပြီးဆုံးခြင်း

"တစ်ခုခုတော့ မှားနေပြီ"

မေတ္တယျ၏ အနောက်ဘက် တစ်လှမ်းအကွာတွင် ရပ်နေသော ယင်ကျန်းနှင့် တခြားလေးယောက်ကို ကြည့်၍ ဝမ်ပေါ်က ပြောလိုက်သည်။

"သူတို့ရဲ့ ကြွက်သားတွေက ဘာလို့ ဒီလောက်တောင် တင်းမာနေရတာလဲ။ ကြည့်ရတာ တစ်ခုခုရဲ့ ဖိအားပေးမှုကို အပြင်းအထန် ခံနေရသလိုပဲ"

ဤလူအားလုံးနီးပါးမှာ ရှေးဦးမူလအဆင့်များ ဖြစ်ကြသဖြင့် သူတို့၏ ခွန်အားကို အကြွင်းမဲ့ ထိန်းချုပ်နိုင်စွမ်း ရှိသင့်သည်။ သို့သော် ဝမ်ပေါ်ကဲ့သို့ လူမျိုးပင် သူတို့ဆီမှ မူမမှန်မှုကို သတိပြုမိနေလေ၏။

"ကြည့်ပါဦး … ခုံဆိုရင် ချွေးတွေတောင် ပြန်နေပြီ" ဝမ်ပေါ်က ဆက်ပြောသည်။

"ကောင်းကင်တာအိုရဲ့ ဝန်ထုပ်ဝန်ပိုးကို လျှော့ချပေးရတာ လွယ်တဲ့ကိစ္စလို့ ထင်လို့လား" ဝမ်ဝေ့က ပြန်ပြောလိုက်သည်။ ဤသည်မှာ ကောင်းကင်တာအိုနှင့် တန်းတူဖြစ်နေသော တတိယတန်းစား ဧကရာဇ်တစ်ပါး သို့မဟုတ် ထာဝရဧကရာဇ်တစ်ပါးက တစ်ကမ္ဘာလုံးကို ဖိနှိပ်ထားနိုင်သော ဒိုင်မေးရှင်းအနိမ့် မဟုတ်ပေ။

"ဝန်ထုပ်ဝန်ပိုးကို ခွဲဝေထမ်းဆောင်ဖို့ တခြားသူတွေကို ထပ်ပြီး ရွေးချယ်ပြီးသွားရင် သူတို့ သက်သာသွားမှာပါ" ချီယွမ်က ရှင်းပြသည်။

"အဲဒီဝန်ထုပ်ဝန်ပိုးက လုံးဝ ပြီးဆုံးသွားမှာလား"

"မဟုတ်ဘူး"

"ဒါဆိုရင် ဒီရာထူးက အခွင့်အရေးထက် ဝန်ထုပ်ဝန်ပိုး ဖြစ်မနေဘူးလား" ဝမ်ပေါ်က မေးလိုက်သည်။

"သူက စနစ်ကို အချောသတ်ပြီးသားပါ" ယန်းအိုက်က ဆိုသည်။

"တိုက်ပွဲအတွင်းမှာ ဖိအားတွေကို တိုက်ရိုက်ခံယူပေးနိုင်မဲ့ အထူးအသုံးအဆောင်ပစ္စည်းတစ်ခုကို ငါတို့ ထပ်ပြီး သန့်စင်ဖန်တီးရလိမ့်မယ်"

"ဒိုင်မေးရှင်းအနိမ့်မှာ မင်းတို့ ကြုံတွေ့ခဲ့ရတဲ့ စွန့်စားခန်းတွေအကြောင်း ငါ ပိုပြီး ဖတ်ကြည့်ဖို့ လိုနေပြီထင်တယ်" ဝမ်ပေါ်က ဝမ်ဝေ့ကို စောင်းကြည့်ရင်း ပြောသော်လည်း ဝမ်ဝေ့က သူ့ကို လျစ်လျူရှုထားလိုက်သည်။

"ကျွန်တော် ရုတ်တရက် တစ်ခု စဉ်းစားမိတယ်" ဝမ်ဝေ့က ပြောသည်။

"ကောင်းကင်ဧကရာဇ်နဲ့ ကောင်းကင်ခုံရုံးရဲ့ မူလအယူအဆက တကယ်တော့ ဘယ်လို လည်ပတ်နေတာလဲ"

ကောင်းကင်ဧကရာဇ်ဟူသော အယူအဆမှာ ဤကမ္ဘာတွင် ရှိနှင့်ပြီးသား ဖြစ်သော်လည်း ဝမ်ဝေ့ကမူ သူကိုယ်တိုင် ဖန်တီးထားသော စနစ်ကိုသာ အသုံးပြုခဲ့ပြီး သတ်မှတ်ထားသော လမ်းစဉ်အတိုင်း မလျှောက်လှမ်းခဲ့ပေ။

"ကောင်းကင်ဧကရာဇ် ရာထူးဆိုတာ ကမ္ဘာ့ကောင်းကင်နိယာမတွေ လည်ပတ်မှုမှာ အမှားအယွင်း ဒါမှမဟုတ် ပြဿနာတစ်ခုခု ရှိလာမှပဲ ပေါ်လာရမဲ့အရာပဲ။ ကောင်းကင်ခုံရုံးဆိုတာက နိယာမတွေနဲ့ တိုက်ရိုက်ချိတ်ဆက်ထားတဲ့ အထူးနယ်မြေတစ်ခု ဖြစ်ပြီး ဧကရာဇ်က အဲဒီပြဿနာကို ဖြေရှင်းဖို့အတွက် နှစ်ပေါင်းများစွာ အထီးကျန်စွာနဲ့ အချိန်ကုန်ဆုံးရမှာ" ချီယွမ်က ရှင်းပြသည်။

"အဲဒါက တကယ့်ကို ဆိုးရွားတဲ့ တည်ရှိမှုမျိုးပဲ" ဝမ်ဝေ့က မှတ်ချက်ပေးလိုက်သည်။ သူ မြင်ယောင်နေသည်မှာ ပလ္လင်တစ်ခုပေါ်တွင် တစ်ယောက်တည်း အထီးကျန်စွာ ထိုင်နေရင်း ကမ္ဘာကြီးကို ကယ်တင်ရန် အကြီးမားဆုံး ဝန်ထုပ်ဝန်ပိုးကို ထမ်းထားရသည့် လူတစ်ယောက်အကြောင်း ဖြစ်၏။

"အဲဒါက အဓိကအချက်ပဲလေ" ချီယွမ်က ပြောသည်။

"သတ်မှတ်ထားတဲ့ ကာလတစ်ခု တာဝန်ထမ်းဆောင်ပြီးမှ ကောင်းကင်ဧကရာဇ်က လွတ်မြောက်ခွင့်ရပြီး ဘွဲ့တံဆိပ်နဲ့လည်း ချီးမြှင့်ခံရမှာ။ သူတို့မှာ လွတ်လပ်ခွင့်တွေ ဒါမှမဟုတ် နိုင်ငံရေးအာဏာတွေ ရှိဖို့ မရည်ရွယ်ထားဘူး။ မင်းရဲ့ စနစ်က ဒီရာထူးရဲ့ လည်ပတ်ပုံကို ပြန်လည်အဓိပ္ပာယ်ဖွင့်ဆိုလိုက်တာပဲ။ ကြည့်ရတာ ကောင်းကင်တာအိုရော မဟာတာအိုပါ မင်းရဲ့ နည်းလမ်းကို ပိုသဘောကျပုံရတယ်"

"သူတို့က ကျွန်တော်ရဲ့ အကြံဉာဏ်ကို သဘောကျကြတယ်။ ဒါပေမဲ့ ကျွန်တော်ရတဲ့ လျော်ကြေးက အဲဒီအကြံဉာဏ်ရဲ့ တန်ဖိုးနဲ့ မကိုက်ညီဘူး" ဝမ်ဝေ့က လှောင်ပြုံးဖြင့် ပြောသည်။

"ဒါကို မင်း သူတို့နဲ့ သွားညှိနှိုင်းသင့်တယ်"

"တစ်နေ့ကျရင် ညှိနှိုင်းမှာပါ" ဝမ်ဝေ့က ပြန်ပြောသည်။

"ဒါနဲ့ တခြား စိတ်ထဲ မတင်မကျ ဖြစ်နေတာ တစ်ခု ရှိသေးတယ်။ ဘိုးဘေးက ဘာလို့ ဒီလောက် ငြိမ်နေတာလဲ"

"ဘာကို ဆိုလိုတာလဲ"

"လူတိုင်းက ခြေလှမ်းအကြီးကြီးတွေ လှမ်းနေကြတဲ့အချိန်မှာ အမြဲတမ်း နောက်ကွယ်က ကြိုးကိုင်သူဖြစ်တဲ့ ဘိုးဘေးက ဘာလို့ ငြိမ်နေရတာလဲ။ ဘိုးဘေးက ကျွန်တော်ကိုပဲ စောင့်နေတယ်ဆိုတာကို လုံးဝမယုံဘူး။ ဘိုးဘေး တစ်ခုခု စီစဉ်ထားတာ ရှိမှာပဲ"

"ရှိတယ်။ ဒါပေမဲ့ အခုက အချိန်မကျသေးဘူး" ချီယွမ်က အေးဆေးစွာ ပြောသည်။

"မူလဧကရာဇ် (၁၃) ပါးလုံး ထိပ်သီးစံပြအဆင့် ရောက်လာမှာကို စောင့်နေတာလား"

"အဲဒါက ငါ စောင့်နေတဲ့ အချက်တွေထဲက တစ်ခုပါပဲ" ချီယွမ်က တည်ငြိမ်စွာ ခေါင်းညိတ်ပြသည်။

ဝမ်ဝေ့က မျက်မှောင်ကြုတ်လိုက်သည်။

"ဒီတစ်ချိန်လုံး ကျွန်တော်က ယင်ကျန်းကိုပဲ စိုးရိမ်နေခဲ့ပြီး ဘိုးဘေးကို မေ့နေခဲ့တယ်။ ဘိုးဘေးဆီမှာ ပြီးပြည့်စုံတဲ့ ဝိညာဉ်သာလွန်ခြင်းကျင့်စဉ် ရှိပြီးသားပဲ။ ဘိုးဘေးအတွက် ထူးကဲသာလွန်အုတ်မြစ် အနည်းငယ်ပဲ လိုတော့တာ … အဲဒါဆိုရင် ဘိုးဘေးရဲ့ ထူးကဲသာလွန်လမ်းစဉ်က အဆင်သင့်ဖြစ်ပြီ"

ချီယွမ်က သူ့ကို ကြည့်၍ ပြုံးကာ ခေါင်းခါလိုက်သည်။

"အရာအားလုံးက ဒီလောက် လွယ်ကူရင် ကောင်းမှာပဲ"

ဝမ်ဝေ့က သူ့ကို စိုက်ကြည့်နေသော်လည်း ဘာမှ ထပ်မပြောတော့ပေ။ ဤမြေခွေးအိုကြီး တစ်ခုခု ကြံစည်နေပြီဆိုသည်ကို သူ သိလိုက်ပြီ ဖြစ်၏။ ထို့ကြောင့်လည်း အခုထိ ထုတ်မပြောသေးခြင်း ဖြစ်ပေလိမ့်မည်။

အခမ်းအနားက ဆက်လက်ကျင်းပနေပြီး မေတ္တယျက အပ်နှင်းခံနတ်ဘုရားစာရင်းအတွက် အမည်များကို ဆက်လက်ဖတ်ကြားနေသည်။ ဝန်ထုပ်ဝန်ပိုးများ တဖြည်းဖြည်း လျော့နည်းလာသောကြောင့် ခုံနှင့် တခြားသူများပါ စိတ်သက်သာရာ ရသွားကြသည်။ အခမ်းအနားမှာ နာရီအနည်းငယ်ကြာမြင့်ခဲ့ပြီး တစ်ချိန်လုံး ကောင်းကင်တွင် နိမိတ်ပုံရိပ်များ ဖုံးလွှမ်းနေခဲ့သည်။

ထို့နောက် မေတ္တယျက နောက်ဆုံးအမည်ကို ဖတ်ကြားပြီးချိန်တွင် မိုးမြေထံမှ ပထမအသုတ် ကုသိုလ်အရှိန်အဝါများ ဆင်းသက်လာခဲ့သည်။ ကျင့်ကြံသူများသည် ဝမ်းသာအားရ ပြုံးပျော်နေကြပြီး ဖိအားများ ခံစားနေရဆဲဖြစ်သော အားနည်းသူများပင် ဤအခိုက်အတန့်၌ ဂရုမစိုက်နိုင်တော့ပေ။ စိတ်ဝင်စားဖို့ကောင်းသည်မှာ မည်သည့် နတ်ဘုရားရာထူးမျှ မယူထားသော ဝမ်ဝေ့ပင် ကုသိုလ်အတော်အတန် ရရှိခဲ့ခြင်း ဖြစ်သည်။ ကောင်းကင်တာအိုက ဝမ်ဝေ့၏ မကျေနပ်မှုကို ကြားသွားပြီး ဆုလာဘ် ပေးလိုက်ပုံရသည်။

"ဒါမျိုးမှပေါ့" ဝမ်ဝေ့က ခေါင်းညိတ်ရင်း သူ့ဝေစုကို သိမ်းဆည်းလိုက်သည်။ အခမ်းအနားအပြီးတွင် အားလုံးက ကောင်းကင်ခုံရုံးအတွင်းရှိ သူတို့၏ ဌာနအသီးသီးဆီ ပျံသန်းသွားကြသည်။ ဝမ်ဝေ့နှင့် ယန်းအိုက် နှစ်ယောက်သာ ဂိုဏ်းသို့ ပြန်ကြမည် ဖြစ်သည်။ ချီယွမ်က သူ့ဌာနကို တာဝန်ယူလိုက်ပြီး ဝမ်ပေါ်နှင့် အထွေထွေသောင်းပြောင်းတို့က ဘေးအန္တရာယ်ကူညီကယ်ဆယ်ရေးဌာနတွင် တာဝန်ယူထားသည်။ ထိုက်စုန့်ကလည်း ထိုအဖွဲ့အစည်း၏ ဌာန၌ပင် အလုပ်လုပ်သည်။ အရိပ်အုပ်စိုးသူကမူ လာမည့်စစ်ပွဲအတွက် သူလျှိုများ လေ့ကျင့်ပေးရန် ကင်းထောက်ဌာနတွင် တာဝန်ယူလိုက်သည်။

ဝမ်ဝေ့က မထွက်ခွာမီ ဝူဟုန်ကို ဆက်သွယ်လိုက်သည်။

"မင်း အိမ်ကို အခုချက်ချင်း ပြန်လာမှာ မဟုတ်ဘူးမလား"

"အင်း … ကျွန်မမှာ လုပ်စရာတွေ အများကြီး ရှိသေးတယ်" ဝူဟုန်က ခေါင်းညိတ်ပြသည်။ သူမအနေဖြင့် ခုံရုံးအတွက် အစီအရင် ဖန်တီးပေးရန် လိုအပ်သလို မေတ္တယျနှင့် ဘေးအန္တရာယ် ကူညီကယ်ဆယ်ရေးဌာန၏ လုပ်ငန်းလမ်းညွှန်ချက်များကို ဆွေးနွေးရန် ရှိနေသေးသည်။

"ဒီခုံရုံးအတွက် မင်း အစွမ်းကုန် ကြိုးစားပေးစရာ မလိုဘူးဆိုတာ သိတယ်မလား" ဝမ်ဝေ့က ပြောလိုက်သည်။ ယာယီအကျိုးအမြတ်အတွက်သာ ပူးပေါင်းနေကြသည့် တစ်ကိုယ်ကောင်းဆန်သူများစွာ ရှိနေသော ဤခုံရုံးမှာ ဘယ်လောက်အထိ ထိရောက်မှုရှိမည်ကို ပြောရန်ခက်လှသည်။ ဝမ်ဝေ့၏ အမြင်အရဆိုလျှင် မေတ္တယျက ကောင်းကင်ဧကရာဇ် ရာထူးကိုယူပြီး ဝမ်ဝေ့ ဒိုင်မေးရှင်းအနိမ့်တွင် လုပ်ခဲ့သလို လူတိုင်းကို နာခံခိုင်းသင့်ခြင်း ဖြစ်၏။

"ရှင် ဘာကြောင့် အခုလို ခံစားရလဲဆိုတာ ကျွန်မ နားလည်ပါတယ်။ ဒါပေမဲ့ ဒီခုံရုံးက မေတ္တယျအတွက် အရမ်းအရေးကြီးတာမို့ ကျွန်မ အကောင်းဆုံး ကြိုးစားပေးမှာပါ" ဝူဟုန်က ဆိုသည်။

"အဲလိုလား။ ကောင်းပါပြီ... ကိုယ့်ကိုယ်ကိုယ် ဂရုစိုက်ဦး"

"ဂရုစိုက်ပါ့မယ်"

"အော်... စုန့်ကျန်း ဘယ်မှာလဲ။ ကိုယ် မပြန်ခင် သူ့နဲ့ စကားခဏလောက် ပြောကြည့်ချင်လို့"

ဝူဟုန်က သက်ပြင်းချလိုက်သည်။

"သူ ထွက်သွားပြီ"

"ဒီလောက် မြန်မြန်ကြီးလား"

"သူက ခုံရုံးနဲ့ ဘာပတ်သက်မှုမှ မရှိချင်ဘူးတဲ့လေ။ အိမ်ပြန်ပြီး ဂိုဏ်းကိုပဲ စောင့်ရှောက်ချင်တယ်လို့ ပြောသွားတယ်" ဝူဟုန်က ဆက်ပြောသည်။

"အဲဒီနှစ်ယောက်ကို ကျွန်မ ဒီလောက်အထိ အလိုမလိုက်ခဲ့သင့်ဘူး"

"သူ အဆင်ပြေသွားမှာပါ။ ပထမဆုံး အသည်းကွဲတာက ခက်ခဲတာမှန်ပေမဲ့ အချိန်က အရာအားလုံးကို ကုစားပေးသွားမှာပါ" ဝမ်ဝေ့က နှစ်သိမ့်လိုက်သည်။

"ကောင်းပြီလေ။ ကျွန်မမှာ လုပ်စရာတွေ အများကြီးရှိသေးတယ်။ နောက်မှ တွေ့မယ်"

"နောက်မှ တွေ့မယ်" ဝမ်ဝေ့က စကားပြောခြင်းကို အဆုံးသတ်လိုက်ပြီး ယန်းအိုက်နှင့်အတူ ဂိုဏ်းသို့ ပြန်ရန် ပျံသန်းသွားတော့သည်။

………………….

ကောင်းကင်ဘုံခုံရုံး၊ အရှေ့ပိုင်းဧကရာဇ်နန်းဆောင်

ဧကရာဇ်ခုံသည် မြင့်မြတ်မှုနှင့် အာဏာ၏ ပြယုဂ်ဖြစ်သော ဤခမ်းနားသည့် နန်းတော်အတွင်းသို့ ဖြည်းညှင်းစွာ လမ်းလျှောက်ဝင်လာသည်။ သို့သော် သူ့စိတ်ထဲတွင် မည်သည့် စိတ်လှုပ်ရှားမှု သို့မဟုတ် အောင်မြင်မှု အရသာကိုမျှ မခံစားရဘဲ အရှက်ရမှုသက်သက်ကိုသာ ခံစားနေရသည်။ ပထမဆုံးအနေဖြင့် တာအိုလမ်းစဉ်နှင့် ဗုဒ္ဓဘာသာတို့ကို အဆုံးမဲ့တက်လှမ်းခြင်းကမ္ဘာ၏ တရားဝင် အတွေးအခေါ်နှင့် ဘာသာတရားများအဖြစ် သတ်မှတ်လိုက်ခြင်း ဖြစ်၏။

စာပေလမ်းစဉ်ကို လိုက်စားသူတစ်ယောက်အနေဖြင့် ဧကရာဇ်ခုံသည် ဤရာထူးနေရာများကြောင့် သူ့လမ်းစဉ်အတွက် မည်မျှအထိ ထိခိုက်နစ်နာစေမည်ကို နားလည်ထားသည်။ ရွှေရောင်ခေတ်ကာလအတွင်းမှာပင် စာပေလမ်းစဉ်သည် နောက်ကျကျန်နေခဲ့ပြီး ရှေးဦးမူလအဆင့် တစ်ယောက်သာ ပေါ်ထွက်ခဲ့ကာ အာဏာရှင်အင်အားစုအဆင့်အတန်းရှိသည့် သီးခြားအဖွဲ့အစည်းလည်း မရှိခဲ့ပေ။

ယခုအခါ တာအိုလမ်းစဉ်နှင့် ဗုဒ္ဓဘာသာတို့၏ ကံကြမ္မာနှင့် အရှိန်အဝါသည် ပိုမိုခိုင်မာလာပြီး မြင့်မားသောအဆင့်သို့ပင် တက်လှမ်းသွားခဲ့ပြီ ဖြစ်သည်။ ရှေးဟောင်းမှတ်တမ်းများအရ တစ်ချိန်က ဘာသာတရား သုံးခုစလုံးသည် ကမ္ဘာကြီးကို ယှဉ်တွဲအုပ်ချုပ်ခဲ့ကြသော်လည်း ယခုအခါတွင်မူ စာပေလမ်းစဉ်မှာ အပြတ်အသတ် နိမ့်ကျသွားခဲ့ရပြီ။

ထိုအဆိုပြုချက်သည်ပင် ဧကရာဇ်ခုံအတွက် ကြီးမားသော ထိုးနှက်ချက်ဖြစ်ခဲ့သော်လည်း နောက်ပိုင်းတွင် ဖြစ်ပျက်ခဲ့သည့်အရာများက ပို၍ဆိုးရွားလှသည်။ ညီလာခံ ဆွေးနွေးပွဲများတွင် ခုံ၌ မည်သည့်အာဏာ၊ မည်သည့်သြဇာမှ မရှိခဲ့ပေ။ သူသည် သူတော်စင်၏ မျက်နှာသာပေးမှုနှင့် ကံကောင်းမှုသက်သက်ကြောင့်သာ ဤရာထူးကို ရရှိခဲ့ခြင်း ဖြစ်၏။

"ငါ့ရဲ့ မာနကို အတားအဆီး အဖြစ်မခံသင့်ဘူး" ဧကရာဇ်ခုံက သူ့ကိုယ်သူ ပြန်ပြောလိုက်သည်။

"ငါ့မှာ ရာထူးရှိတယ်။ ငါ့တပည့်တွေမှာလည်း သင့်တော်တဲ့ ရာထူးတွေရှိနေပြီး ကျောင်းတော်လည်း အကျိုးရှိမှာပဲ။ ငါ့ရဲ့ အခုရှိနေတဲ့ ရာထူးကို အသုံးချပြီး အားသာချက်ရအောင်ပဲ အာရုံစိုက်ရမယ်"

ဧကရာဇ်ခုံက အဝေးသို့ လှမ်းကြည့်လိုက်သည်။ ကံကြမ္မာက သူ့ဘက်တွင် ရှိနေသည်ဖြစ်ရာ သူသာ အကွက်စေ့စေ့ ကစားနိုင်မည်ဆိုလျှင် သူသည် ကောင်းကင်ဧကရာဇ် ဖြစ်လာနိုင်ပြီး သူ့ကံ၊ အရှိန်အဝါနှင့် အာဏာတို့ကို တဖြည်းဖြည်း တည်ဆောက်နိုင်မည် ဖြစ်သည်။

ဧကရာဇ်ခုံသည် သက်ပြင်းတစ်ချက်ချကာ ထွက်ခွာသွားသည်။ သူသည် ဤခုံရုံးတွင် နိုင်ငံရေးအာဏာ မရှိသေးသဖြင့် လတ်တလောတွင် သူ့အဓိက အာရုံစိုက်မှုမှာ သေမျိုးဝိညာဉ်တပ်မဟာ ဖွဲ့စည်းတည်ထောင်ရေးပင် ဖြစ်လိမ့်မည်။

………………….

အနောက်ပိုင်းဧကရာဇ်နန်းဆောင်

တုကုပိုင်ထျန်းသည် ပလ္လင်ပေါ်တွင် ထိုင်ရင်း အတွေးနက်နေမိသည်။ ယနေ့ အခမ်းအနားတွင် သူ့အိပ်မက်နှင့် ပန်းတိုင်၏ အရိပ်အယောင်အချို့ကို သူ မြင်တွေ့ခဲ့ရသည်။ သူသည် သက်ရှိအားလုံး၏ အထက်၊ စံပြအဆင့်များ၊ မိုးမြေနိယာမများ၊ သူတော်စင်များပင် သူ့ရှေ့တွင် ဦးညွှတ်ရမည့် အဆင့်အတန်းတွင် ရပ်တည်ရမည် ဖြစ်သည်။ သူသည် ကောင်းကင်နိယာမများမှသည် လူ့လောက၏ လူမှုစည်းမျဉ်းများ၊ သံသရာ၏ ယင်နှင့်ယန်တို့အထိ ဖန်တီးမှုအားလုံးကို ထိန်းချုပ်နိုင်ရမည်။

ယင်ကျန်းရဲ့ လမ်းစဉ်က ငါနဲ့ တော်တော်လေး ကိုက်ညီပေမဲ့ အပြည့်အဝတော့ မဟုတ်သေးဘူး

တုကုပိုင်ထျန်းက တွေးလိုက်သည်။

ဒါပေမဲ့ ငါ ဘာတွေ လိုအပ်နေလဲဆိုတာ သိရအောင် သူ့ဆီကနေ ကောင်းကင်ဧကရာဇ် ရာထူးကို အရင်လုယူကြည့်လို့ ရတာပဲ

သူက ခေါင်းလှည့်ကာ ရှေးဟောင်းနဂါးမြို့တော်ရှိရာဆီ လှမ်းကြည့်လိုက်သည်။

ပုံမှန်ဆိုရင် သင့်တော်တဲ့ အခြေအနေမျိုးမှာ သူ့ကို သတ်နိုင်ဖို့ ငါ ယုံကြည်မှု ရှိပေမဲ့ အခုတော့ တခြား ပြောင်းလဲနိုင်တဲ့ အချက်တွေ ရှိလာပြီ

အစည်းအဝေးအတွင်းမှာ သူ့စိတ်ခံစားမှုအားလုံးက မဟာတံတိုင်းဆီမှ လာသော အန္တရာယ်တစ်ခုကို သတိပေးခဲ့သည်။ ယင်ကျန်း၏ ဝင့်ကြွားနေသည့် အပြုအမူများနှင့် ထိုသတိပေးချက်ကို အခြေခံ၍ ကြည့်မည်ဆိုလျှင် အကြွင်းမဲ့တားမြစ်ချက် ကာလအတွင်း ကံကောင်းခဲ့သူမှာ သူတစ်ယောက်တည်း မဟုတ်ကြောင်း တုကုပိုင်ထျန်း ခန့်မှန်းမိလိုက်သည်။

ဟမ် ...

ထိုစဉ် သူက လျှို့ဝှက်တွေ့ဆုံမှုတစ်ခုအတွက် ဆင့်ခေါ်မှုကို ရုတ်တရက် ခံစားလိုက်ရသည်။

မကောင်းဆိုးဝါးအကြောင်း ပြောနေတုန်းမှာ ရောက်လာတာပဲ …