အခန်း (၆၅၂-၆၅၄)

အခန်း (၆၅၂) ရွှမ်းမင် နတ်ဆေးလုံး။ ရွှမ်းမင်အရှင်။ (၁)

"ဟူး..."

စူးချန်ခုန်းသည် စိတ်အာရုံကို အသုံးပြု၍ ဝိညာဉ်စွမ်းအင်များကို မှိန်ပျပျ အရှိန်အဝါများ ဝန်းရံထားသော ကြိုးကြာဖြူတစ်ကောင်အဖြစ် ဖန်တီးလိုက်သည်။ သူသည် ထိုကြိုးကြာဖြူ၏ ကျောပေါ်သို့ ခုန်တက်လိုက်ရာ ဝိညာဉ်အတောင်ပံများ ခတ်ပြီး ကောင်းကင်ယံသို့ ပျံတက်သွားကာ အဝေးသို့ ထွက်ခွာသွားတော့သည်။

"အဲဒီလူက... ပျံသန်းတဲ့ တိရစ္ဆာန်နဲ့ ထွက်သွားပြီလား"

ရွှယ်အန်းတောင်၏ ပတ်ဝန်းကျင်တွင် ရှိနေကြသော ဂိုဏ်းသားများသည် ကောင်းကင်ယံကို အမြဲမပြတ် စောင့်ကြည့်နေခဲ့ကြသည်။ သူတို့ထဲမှ မျက်စိလျင်သူအချို့က အဖြူရောင်အရိပ်တစ်ခု ကောင်းကင်သို့ မြန်မြန်ဆန်ဆန် တက်လှမ်းသွားပြီး အဝေးတွင် ပျောက်ကွယ်သွားသည်ကို မြင်လိုက်ရသည်။ ရန်သူ ထွက်သွားပြီဖြစ်ကြောင်း သိလိုက်ရသဖြင့် သူတို့ ချက်ချင်းပင် အားတက်သွားကြသည်။

"မြန်မြန်... ဂိုဏ်းထဲကို ပြန်ကြည့်ကြရအောင်။ ဒုဂိုဏ်းချုပ်တို့ ဘယ်လိုနေလဲဆိုတာ သွားကြည့်ကြ"

ရွှယ်အန်းဂိုဏ်းသားများသည် ဂိုဏ်းအတွင်းသို့ ချက်ချင်း ပြန်ဝင်သွားကြသည်။ သို့သော် ရောက်သွားတော့အခါ မြင်တွေ့လိုက်ရသော မြင်ကွင်းကြောင့် သူတို့အားလုံး တုန်လှုပ်ခြောက်ခြားသွားရသည်။

"ရွှယ်အန်းတောင်ရဲ့ ဝိညာဉ်စွမ်းအင်တွေ အကုန်ပျောက်သွားပြီ... ဝိညာဉ်ကြော ဖျက်ဆီးခံလိုက်ရတာလား။ တော်တော်ယုတ်မာတဲ့ကောင်။ ဘယ်လောက်တောင် ရက်စက်တဲ့ နည်းလမ်းလဲ"

"ဒုဂိုဏ်းချုပ်လည်း ပျောက်သွားပြီ။ သူတို့ရဲ့ အလောင်းတွေကိုတောင် ရှာမတွေ့တော့ဘူး။ သေချာပေါက် ဘေးဒုက္ခနဲ့ ကြုံခဲ့ရပြီပဲ"

"ဝိညာဉ်စိုက်ခင်း၊ စာကြည့်တိုက်နဲ့ ရတနာတိုက်... အားလုံး အဲဒီလူရဲ့ လက်ချက်မိသွားပြီ"

ဂိုဏ်းသားများသည် မှင်သက်စွာ ငေးကြည့်နေကြပြီး အချို့မှာ မယုံနိုင်အောင် ဖြစ်နေကြသည်။ မနေ့ကအထိ သူတို့ဂိုဏ်းမှာ အရာအားလုံး အဆင်ပြေနေခဲ့ခြင်း ဖြစ်သည်။ သို့သော် တစ်ရက်အတွင်းမှာပင် ဒုဂိုဏ်းချုပ် အပါအဝင် ထင်ရှားသော သိုင်းပညာရှင်များမှာ သေဆုံး သို့မဟုတ် ဒဏ်ရာအပြင်းအထန် ရခဲ့ကြသည်။ ဝိညာဉ်စွမ်းအင်စိုက်ခင်းများ၊ စာကြည့်တိုက်နှင့် ရတနာတိုက်တို့မှာလည်း ပြောင်စင်အောင် လုယက်ခံလိုက်ရသည်။ ဤနည်းဗျူဟာများမှာ ယခင်က သူတို့ ရွှယ်အန်းဂိုဏ်းက အခြားသော အင်အားစုများနှင့် သိုင်းဂိုဏ်းများအပေါ် အသုံးပြုခဲ့သည့် နည်းလမ်းများပင် ဖြစ်သည်။

"ဂိုဏ်းချုပ်... ဘယ်တော့မှ ပြန်လာမှာလဲ။ လူမဆန်တဲ့ ဒီလိုလူမျိုးကို အရှင်လတ်လတ် အရေခွံဆုတ်ပြီး အပိုင်းပိုင်း ခုတ်ပစ်ရမယ်"

ကျန်အကြီးအကဲများ၏ မျက်လုံးများမှာ နီရဲနေ၏။ ထိုသိုင်းပညာရှင်၏ လုပ်ရပ်မှာ ဓားပြများထက်ပင် ပိုမိုရက်စက်ပြီး လူမဆန်လှပေ။ ဝိညာဉ်ကြောမှာ ပျက်စီးသွားပြီ ဂိုဏ်း၏ လျှို့ဝှက်ကျမ်းစာများ၊ ဝိညာဉ်ဆေးပင်များ၊ ဝိညာဉ်ကျောက်တုံးများနှင့် ဆေးလုံးများ အားလုံး အလုခံလိုက်ရသဖြင့် ရွှယ်အန်းဂိုဏ်းမှာ ပြင်းပြင်းထန်ထန် အထိနာသွားပြီး အချိန်အတော်ကြာအောင် ပြန်နာလန်ထူရန် ခက်ခဲသွားပေလိမ့်မည်။

အချို့သော ဂိုဏ်းသားများမှာ ဂိုဏ်းချုပ် "ရွှမ်းမင်အရှင်" ပြန်လာရန်သာ မျှော်လင့်နေကြသည်။ သူ၏ စိတ်နေစိတ်ထားအရ ဤကိစ္စကို အလွယ်တကူ လွှတ်ထားမည်မဟုတ်ပေ။ ကျူးလွန်သူမှာ မည်သူပင်ဖြစ်စေ တန်ဖိုးကြီးကြီးမားမား ပြန်ပေးဆပ်ရမည်ဖြစ်သည်။

စူးချန်ခုန်းကမူ ရွှယ်အန်းဂိုဏ်းသားများ မည်မျှပင် ဒေါသထွက်နေပါစေ မည်သို့ ကလဲ့စားချေရန် ကြံစည်နေပါစေ ဂရုမစိုက်ပေ။ စူးချန်ခုန်း၏ ရည်မှန်းချက်မှာ မိမိ၏ အင်အားကို တောင့်တင်းအောင် လုပ်ဆောင်ရန်သာ ဖြစ်သည်။ သူသာ လုံလောက်အောင် အင်အားကြီးမားပါက ဤမိစ္ဆာဂိုဏ်းသားများမှာ သူ၏လက်ဖဝါးဖြင့် ဖိခြေနိုင်သော ပုရွက်ဆိတ်များသာ ဖြစ်ပေလိမ့်မည်။

သွေးနတ်ဆိုးတံခါးသည် မဟာမီးလျှံအင်ပါယာကြီး၏ မြောက်ဘက်နယ်စပ်ရှိ သွေးနတ်ဆိုးတောင်ထိပ်တွင် တည်ရှိသော နတ်ဆိုးတံခါး ၃၆ ခုထဲမှ တစ်ခုဖြစ်သည်။ သွေးနတ်ဆိုးတံခါး၏ အခြေခံအုတ်မြစ်မှာ ရွှယ်အန်းဂိုဏ်းထက် မနိမ့်ကျပေ။ သူတို့၏ ဂိုဏ်းချုပ် "သွေးနတ်ဆိုးသူငယ်" မှာလည်း လွန်ခဲ့သော နှစ်ပေါင်းများစွာက "မူလဓာတ်ငါးပါးသိုင်းပညာရှင်" သုံးဦးကို သတ်ဖြတ်ခဲ့ဖူးသဖြင့် ကြောက်မက်ဖွယ်ကောင်းသော ကျော်ကြားမှု ရှိထားသူဖြစ်သည်။ ယခုအခါ သူသည် သွေးနတ်ဆိုးတောင်အတွင်း၌ တိတ်တဆိတ် ကျင့်ကြံနေသည်။

နာရီအနည်းငယ်အတွင်းမှာပင် စူးချန်ခုန်းသည် မိုင်ပေါင်းသောင်းချီ ခရီးနှင်ခဲ့ပြီး သွေးနတ်ဆိုးတောင်၏ အထက်သို့ ရောက်ရှိလာသည်။ သွေးနတ်ဆိုးတောင်၏ လေထုထဲတွင် သွေးညှီနံ့များ ပြည့်နှက်နေလျက်။ အဆောက်အဦးများအားလုံးမှာ အနီရင့်ရောင်ဖြစ်ပြီး သွေးနတ်ဆိုးဂိုဏ်းသားများမှာလည်း အနီရင့်ရောင် ဝတ်စုံများကို ဝတ်ဆင်ထားကြသည်။ သူတို့၏ မျက်နှာများမှာ ဖြူဖျော့နေပြီး မျက်လုံးများမှာ နီရဲနေ၏။

ကြိုးကြာဖြူ၏ ကျောပေါ်တွင် ထိုင်နေသော စူးချန်ခုန်းသည် လေကို အသာအယာ ရှူရှိုက်ကြည့်လိုက်ပြီး "ဒီလောက် သိပ်သည်းတဲ့ သွေးနံ့တွေက... တိရစ္ဆာန်တွေဆီကတင် မဟုတ်ဘဲ လူတွေဆီကပါ လာတာပဲ။ အရင်းအမြစ်က သွေးနတ်ဆိုးတောင်ရဲ့ နောက်ဘက်မှာ။"

လင်းယုန်တစ်ကောင်ကဲ့သို့ စူးရှသော သူ၏မျက်လုံးများဖြင့် ကြည့်လိုက်ရာ သွေးနတ်ဆိုးတောင် အနောက်ဘက်ရှိ ကုန်းတက်တစ်ခုကို မြင်လိုက်ရသည်။ တောက်ယင်ကျင့်စဉ်က ပေးစွမ်းသော ဝိညာဉ်အာရုံခံစားမှုကြောင့် ဂူအတွင်း၌ ရေကန်ငယ်တစ်ခုကဲ့သို့ ထူထပ်လှသော သွေးအရှိန်အဝါများကို စူးချန်ခုန်း မြင်တွေ့လိုက်ရသည်။ ထိုလှုပ်ခတ်နေသော သွေးအရှိန်အဝါများကြားတွင် လူရိပ်တစ်ခု ရှိနေသည်။ ဤလူ၏ သွေးစွမ်းအင်မှာ ပင်လယ် သို့မဟုတ် ရေကန်ကြီးတစ်ခုကဲ့သို့ အားကောင်းလှသည်။ "နတ်ဘုရားသွေး" ကို ပေါင်းစည်းထားသော စူးချန်ခုန်းနှင့်ပင် ယှဉ်နိုင်လောက်ပြီး အနည်းငယ်ပင် ပို၍ အားကောင်းနေနိုင်သေးသည်။

သို့သော် စူးချန်ခုန်း၏ မီးလျှံကဲ့သို့ တောက်လောင်သော ချီသွေးစွမ်းအင်မျိုး မဟုတ်ဘဲ ဤလူ၏ စွမ်းအင်မှာ အေးစက်ပြီး ရှုပ်ထွေးကာ ယုတ်မာညစ်ထေးလှသည်။

"ထွမ်မုထောင်ပေးတဲ့ သတင်းအရ သွေးနတ်ဆိုးတံခါးမှာ 'သွေးနတ်ဆိုးကျင့်စဉ်' ဆိုတဲ့ ပြိုင်ဘက်ကင်းလုနီးပါး သိုင်းပညာတစ်ခု ရှိတယ်။ ဒီကျင့်စဉ်က နက်နဲပြီး ခန့်မှန်းရခက်တယ်။ အဓိကက သွေးနဲ့ ချီစွမ်းအင်ကို ကျင့်ကြံတာဖြစ်ပြီး ကျင့်ကြံနေစဉ်အတွင်းမှာ ရှားပါးတဲ့ ငှက်တွေ၊ တိရစ္ဆာန်တွေနဲ့ လူသားသွေးတွေကို ရောစပ်ထားတဲ့ 'ဝိညာဉ်တစ်ရာသွေး' ကို သောက်သုံးဖို့ လိုအပ်တယ်"

ဤမျှ ထူထဲသော သွေးနှင့် ချီစွမ်းအင်မျိုး ရှိနေသူမှာ သွေးနတ်ဆိုးတံခါး၏ ဂိုဏ်းချုပ် "သွေးနတ်ဆိုးသူငယ်" မှတစ်ပါး အခြားမရှိနိုင်ကြောင်း စူးချန်ခုန်း ကောက်ချက်ချလိုက်သည်။

"ဒါဆို သူ့ကို အရင်ဆုံး သတ်ပစ်မယ်"

စူးချန်ခုန်း၏ မျက်လုံးများ အေးစက်သွားလေ၏။ သူသည် ကြယ်ပုံစံ ရွှေရောင်လေးကို ဆွဲကာ မြှားတစ်စင်း တပ်လိုက်ပြီး သူ၏ စိတ်၊ ဝိညာဉ်၊ စွမ်းအင်တို့ကို စုစည်းကာ လေဟာပြင်ကို ဖောက်ထွက်လိုက်တော့သည်။ ကြယ်ပုံစံ ရွှေရောင်မြှားမှာ ပျံသန်းနေစဉ်အတွင်း သဘာဝ၏ ဝိညာဉ်စွမ်းအင်များကို စုပ်ယူကာ သုံးစင်းအဖြစ် ကွဲထွက်သွားသည်။ လေနှင့် လျှပ်စီးမြှားနှစ်စင်းက ဗဟိုမြှားကို ဝန်းရံကာ လေထုကို ဟိန်းဟောက်ဖြတ်သန်းရင်း တောင်ဂူအတွင်းရှိ သွေးနတ်ဆိုးသူငယ်ထံသို့ တိုက်ရိုက် ဦးတည်သွားတော့သည်။

စူးချန်ခုန်းသည် သွေးနတ်ဆိုးတောင်၏ ဝိညာဉ်ကြောကို အလိုရှိနေသဖြင့် သွေးနတ်ဆိုးသူငယ်နှင့် ထိပ်တိုက်တွေ့ရန်မှာ ရှောင်လွှဲ၍မရပေ။ ၎င်းမှာ သွေးနတ်ဆိုးတံခါး ဂိုဏ်းချုပ်၏ အစွမ်းကို စမ်းသပ်ရန် အခွင့်အရေးလည်း ဖြစ်သည်။

"ဟင်..."

ထိုခဏမှာပင် ဂူအတွင်းရှိ သွေးရေကန်ထဲတွင် စိမ်နေသော ဖြူဖျော့သည့် အသားအရေနှင့် သွေးရောင်မျက်လုံးများရှိသည့် ချောမောသော အမျိုးသားတစ်ဦးသည် သူ၏မျက်လုံးများကို ရုတ်တရက် ဖွင့်လိုက်သည်။ စူးချန်ခုန်း မြှားကိုလွှတ်လိုက်သည်နှင့် သူ သိလိုက်သည်။ နောက်တစ်စက္ကန့်တွင် မြှားအလင်းတန်း သုံးခုမှာ တောင်နံရံကို ဖောက်ထွက်လာပြီး ဂူအပေါ်ပိုင်းကို ပြိုကျစေကာ သွေးရေကန်ထဲရှိ သွေးနတ်ဆိုးသူငယ်ကို တိကျစွာ ပစ်မှတ်ထားလာတော့သည်။

"ရွှီး..."

ထူးဆန်းစွာပင် ထိုမြှားသုံးစင်းမှာ သွေးမြူနှင်းများကို ဖြတ်သန်းသွားချိန်တွင် ပျစ်ချွဲသော ကော်ရည်ထဲသို့ ရောက်သွားသကဲ့သို့ နှေးကွေးသွားပြီး သူတို့၏ စွမ်းအားများမှာ တဖြည်းဖြည်း ပျောက်ကွယ်သွားတော့သည်။ သွေးလှိုင်းတစ်ခုက မြှားများကို လွှမ်းခြုံလိုက်ရာ စူးချန်ခုန်း၏ ပြင်းထန်သော မြှားချက်မှာ ငှက်မွှေးတစ်ခုကဲ့သို့ အားအင်ကင်းမဲ့စွာဖြင့် အလွယ်တကူ ချေဖျက်ခြင်း ခံလိုက်ရတော့သည်။

အခန်း (၆၅၃) ရွှမ်းမင် နတ်ဆေးလုံး။ ရွှမ်းမင်အရှင်။ (၂)

"ဒီသွေးနတ်ဆိုးသူငယ်က တော်တော်လေး အားကောင်းတာပဲ။ အရင်က ရုပ်သေးကြယ်စင်ဂိုဏ်းက ရှဲ့ခွေထက်တောင် အားမနည်းဘူး"

စူးချန်ခုန်းသည် သူ၏ 'မြှားအလင်းခွဲထွက်ခြင်း' အတတ်ကို သွေးနတ်ဆိုးသူငယ်က အလွယ်တကူ ဖျက်ထုတ်နိုင်သည်ကို မြင်သောအခါ အနည်းငယ် အံ့သြသွားသည်။

ပြိုကျနေသော ဂူအတွင်းမှနေ၍ သွေးနတ်ဆိုးသူငယ်၏ နီနီရဲရဲ မျက်လုံးများသည် မြှားလာရာ လမ်းကြောင်းအတိုင်း လိုက်ကြည့်လိုက်ရာ ကောင်းကင်ယံရှိ ကြိုးကြာဖြူပေါ်တွင် ထိုင်နေသော စူးချန်ခုန်းကို ချက်ချင်း တွေ့လိုက်ရသည်။ သွေးနတ်ဆိုးသူငယ်၏ မျက်နှာပေါ်တွင် ရက်စက်ယုတ်မာသော အမူအရာတစ်ခု ပေါ်လာပြီး စူးချန်ခုန်းကို စိုက်ကြည့်ကာ ဒေါသတကြီး အော်ပြောလိုက်သည်။

"အောက်ကို ဆင်းလာခဲ့"

ကျူးကျော်သူမှာ ရန်သူဖြစ်ကြောင်း သိသာပါသည်။ သွေးနတ်ဆိုးသူငယ်၏ သတ်ဖြတ်လိုစိတ်များ မြင့်တက်နေ၏။ တစ်ဖက်လူက ကောင်းကင်ယံမှနေ၍ သူ့ကို အရင်ပစ်ခတ်ခဲ့ခြင်း ဖြစ်ရာ ထိုသူမှာ မည်သူပင်ဖြစ်စေ သူ၏သွေးကို သောက်ရန် သွေးနတ်ဆိုးသူငယ် ဆုံးဖြတ်လိုက်ပြီဖြစ်သည်။

အော်သံမှာ မိုးကြိုးပစ်ချလိုက်သကဲ့သို့ ပြင်းထန်လှရာ သွေးနတ်ဆိုးဂိုဏ်းအတွင်းရှိ ကြားရသူတိုင်းမှာ သွေးနှင့်ချီစွမ်းအင်များ တုန်လှုပ်သွားပြီး မူးဝေနောက်ကျိသွားကြသည်။

"ဒါ ဂိုဏ်းချုပ်ပဲ။ တစ်ယောက်ယောက်က ဂိုဏ်းချုပ်ကို တိုက်ခိုက်နေတာလား။ ဘယ်လိုတောင် ရဲတင်းတာလဲ။"

သွေးနတ်ဆိုးဂိုဏ်းမှ တပည့်များစွာ ထိတ်လန့်သွားကြလေ၏။ ကောင်းကင်ယံတွင် ဖြတ်သန်းသွားသော မြှားအလင်းတန်းကို မြင်တွေ့ခဲ့သူများနှင့် တောင်အနောက်ဘက်တွင် ကျင့်ကြံနေသော ဂိုဏ်းချုပ်၏ ဒေါသတကြီး အော်သံကို ကြားလိုက်ရသူများမှာလည်း မနည်းလှပေ။

ထိုအသံမှာ စူးချန်ခုန်း၏ နားထဲတွင် ပဲ့တင်ထပ်သွားသည်။ အောက်ဘက်ရှိ ဂူထဲမှနေ၍ သူ့ကို ရက်ရက်စက်စက် စိုက်ကြည့်နေသော သွေးနတ်ဆိုးသူငယ်ကို ကြည့်ရင်း စူးချန်ခုန်း၏ မျက်နှာမှာ အေးစက်သွားလေ၏။

"ဒါဆိုလည်း... မင်းဆန္ဒအတိုင်းပဲပေါ့။"

စူးချန်ခုန်းသည် မီတာထောင်ချီမြင့်သော ကောင်းကင်ယံမှ ခုန်ချလိုက်သည်။ လေထဲမှ ဆင်းသက်လာစဉ်မှာပင် သူသည် သဘာဝ၏ ဝိညာဉ်စွမ်းအင်များကို စတင်ဆွဲယူလိုက်သည်။ သူ၏နောက်ကွယ်တွင် အညိုရောင်အမွေးရှိသော ဧရာမဝက်ဝံကြီးတစ်ကောင်၏ ပုံရိပ် ပေါ်ထွက်လာသည်။ ဝိညာဉ်စွမ်းအင် အမြောက်အမြား စီးဝင်လာမှုကြောင့် ထိုပုံရိပ်မှာ ပေခုနစ်ဆယ်၊ ရှစ်ဆယ်ခန့်အထိ လျင်မြန်စွာ ကြီးထွားလာပြီး ကောင်းကင်မှ ကျလာသော ဥက္ကာခဲတစ်ခုကဲ့သို့ မြေပြင်ပေါ် ပြုတ်ကျလာတော့သည်။

မြေကမ္ဘာကို တုန်ခါစေနိုင်သော အင်အားများ ပါရှိသည့် ဧရာမဝံလက်ဝါးကြီးများက အောက်ဘက်သို့ ရိုက်ချလိုက်သည်။

ဝူချင်းရှီ၊ ဝက်ဝံရိုင်း မြေပြင် တုန်ခါစေခြင်း။

ဆင်းသက်လာသော အရှိန်မှာ ပိုမိုမြန်ဆန်လာပြီး ဝက်ဝံပုံရိပ်ယောင်၏ လက်ဝါးများ မြေပြင်ကို မထိမီမှာပင် တောင်ပြိုကျသကဲ့သို့ ပြင်းထန်သော ဖိအားများက အောက်ဘက်ရှိ တောင်ကုန်းကိုပင် အက်ကွဲသွားစေတော့သည်။

"ဒါ... နတ်ဘုရားစွမ်းရည်တစ်ပိုင်းလား"

ဤအံ့သြဖွယ် မြင်ကွင်းကြောင့် သွေးနတ်ဆိုးသူငယ်၏ မျက်နှာမှာ သိသိသာသာ ပျက်ယွင်းသွားသည်။ ဤအရာမှာ နတ်ဘုရားစွမ်းရည်တစ်ပိုင်းအဆင့်ရှိသော သိုင်းပညာတစ်ခုဖြစ်ကြောင်း သူ ချက်ချင်း သိလိုက်သည်။ တိုက်ခိုက်သူမှာ မဟာသိုင်းပညာရှင်တစ်ဦးပင်။

"ဒါ ဘယ်က နတ်ဘုရားစွမ်းရည်တစ်ပိုင်း မဟာသိုင်းပညာရှင်လဲ။ ငါ ဒီလိုပုဂ္ဂိုလ်မျိုးကို သွားစော်ကားမိလို့လား"

သူ့ကို ဘာကြောင့် လာရောက်တိုက်ခိုက်သည်ကို မသိသော်လည်း သွေးနတ်ဆိုးသူငယ်မှာ တွန့်ဆုတ်မနေဝံ့ဘဲ သူ၏ 'သွေးနတ်ဆိုးကျင့်စဉ်' ကို အမြန်ဆုံး အသက်သွင်းလိုက်သည်။ ပတ်ဝန်းကျင်ရှိ သွေးရေများမှာ ဆူပွက်လာပြီး သူ့ကို ဝန်းရံကာ သွေးရောင်စက်လုံးတစ်ခုအဖြစ် ပြောင်းလဲသွားသည်။ နောက်တစ်စက္ကန့်တွင် စူးချန်ခုန်းမှာ ကီလိုမီတာချီ မြင့်သော ကောင်းကင်မှ ကျဆင်းလာပြီး သူ၏နောက်ကွယ်မှ ဧရာမဝက်ဝံပုံရိပ်၏ လက်ဝါးများက တောင်ကုန်းထိပ်ကို ဒေါသတကြီး ရိုက်ချလိုက်တော့သည်။

"ဘုန်း"

ကောင်းကင်နှင့် မြေကြီးကို တုန်ခါသွားစေသော အသံကြီးမှာ သွေးနတ်ဆိုးဂိုဏ်း တစ်ခုလုံးတွင် ပဲ့တင်ထပ်သွားလေ၏။ ထိုပြင်းထန်သော ရိုက်ချက်ကို ခံလိုက်ရသော တောင်ကုန်းမှာ အက်ကွဲကာ ပေါက်ကွဲထွက်သွားပြီး ကျောက်တုံးစများ အရပ်မျက်နှာအနှံ့ လွင့်စင်ကုန်သည်။ ရိုက်ခတ်မှုကြောင့် ဖြစ်ပေါ်လာသော လေလှိုင်းများမှာ ဘေးပတ်ဝန်းကျင်သို့ ပြန့်နှံ့သွားလေ၏။

ကိုက်တစ်ရာအတွင်းရှိ ပန်းများ၊ သစ်ပင်များနှင့် ကျောက်ဆောင်များမှာ ခဏချင်းမှာပင် အမှုန့်ဖြစ်သွားပြီး မြေပြင်မှာ ကျွံဝင်သွားကာ ပြင်းထန်သော တုန်ခါမှုကြီးကို သွေးနတ်ဆိုးဂိုဏ်း တစ်ခုလုံးတွင် ခံစားလိုက်ရသည်။ သိုင်းပညာရှင်များအားလုံးမှာ တောင်အနောက်ဘက်မှ ထွက်ပေါ်လာသော ဖုန်မှုန့်များနှင့် တုန်ခါမှုများကို ကြည့်ရင်း ကြက်သီးမွေးညင်းများ ထသွားကြသည်။ လူသားတစ်ဦး၏ ခန္ဓာကိုယ်မှ ဤမျှ ကြောက်မက်ဖွယ်ကောင်းသော စွမ်းအားမျိုး ထွက်ပေါ်လာနိုင်သည်ကို သူတို့ မယုံနိုင်အောင် ဖြစ်နေကြရသည်။ ၎င်းမှာ ဒဏ္ဍာရီလာ သိုင်းဝိဇ္ဇာသူတော်စင်များ၏ အစွမ်းနှင့်ပင် တူနေတော့သည်။

"တစ်ယောက်ယောက်က သွေးနတ်ဆိုးဂိုဏ်းကို တိုက်ခိုက်နေတာလား"

"ဒီလောက်ပြင်းထန်တဲ့ အသံက... ဒါ သိုင်းဝိဇ္ဇာသူတော်စင်လား"

အချို့သော သွေးနတ်ဆိုးဂိုဏ်းသားများမှာ ကြောက်လန့်လွန်းသဖြင့် ဒူးများတုန်ကာ မြေပြင်ပေါ်သို့ ပြိုလဲကျကုန်သည်။ သူတို့၏ နှလုံးခုန်သံများမှာလည်း ထိန်းမနိုင်သိမ်းမရ ဖြစ်နေကြသည်။

"သွေးနတ်ဆိုးသူငယ်... ငါ ဆင်းလာပြီ"

တောင်နောက်ဘက်ရှိ ဧရာမချိုင့်ခွက်ကြီးထဲမှ ဖုန်မှုန့်များကြားတွင် စူးချန်ခုန်းက အေးစက်စွာ ပြောလိုက်သည်။ အက်ကြောင်းများစွာ ထင်နေသော သွေးရောင်စက်လုံးကို ကြည့်ရင်း သူ၏အသံမှာ အေးစက်သော ဆောင်းလေကဲ့သို့ပင်။

သွေးစက်လုံးအတွင်း၌ သွေးနတ်ဆိုးသူငယ်မှာ ကျောရိုးတစ်လျှောက် အေးစိမ့်သွားလေ၏။ သူသည် သွေးနတ်ဆိုးကျင့်စဉ်ကို အစွမ်းကုန် အသုံးချကာ သွေးနှင့်ချီစွမ်းအင်များကို သဘာဝဝိညာဉ်စွမ်းအင်နှင့် ပေါင်းစပ်ပြီး အကာအကွယ်တစ်ခု ပြုလုပ်ထားသဖြင့်သာ အမှုန့်ဖြစ်မသွားခြင်း ဖြစ်သည်။ သို့သော်လည်း တစ်ဖက်လူက ဤကဲ့သို့သော တိုက်ခိုက်မှုမျိုးကို နောက်ထပ် အနည်းငယ်မျှ လုပ်ဆောင်ပါက သူ သေဆုံးမှာ သေချာပေသည်။

သွေးနတ်ဆိုးသူငယ်က ဒေါသတကြီးနှင့် ကြောက်လန့်တကြား အော်ပြောလိုက်သည်။ "မင်းက ဘယ်သူလဲ။ ငါတို့ကို ဘာလို့ တိုက်ခိုက်တာလဲ။ ငါတို့ သွေးနတ်ဆိုးဂိုဏ်းက 'မြင့်မြတ်သောနှလုံးသား မဟာမိတ်' ရဲ့ အဖွဲ့ဝင်ပဲ။ အားလုံးရဲ့ ဒေါသကို မီးမွှေးမိမှာ မကြောက်ဘူးလား"

'မြင့်မြတ်သောနှလုံးသား မဟာမိတ်' ဆိုသည်မှာ အမှန်တော့ မိစ္ဆာဂိုဏ်းများနှင့် နတ်ဆိုးတံခါးများ အချင်းချင်း အင်အားစုစည်းရန် ဖွဲ့စည်းထားသော မဟာမိတ်အဖွဲ့ ဖြစ်သည်။ မငြိမ်မသက်ဖြစ်နေသော အချိန်အခါတွင် သူတို့သည် မိမိကိုယ်ကိုယ် ကာကွယ်ရန်နှင့် အခွင့်အရေးများကို လုယူရန်အတွက် ပူးပေါင်းထားကြခြင်း ဖြစ်သည်။ သူ၏ရှေ့မှ အနက်ရောင်ဝတ်စုံနှင့်လူငယ်မှာ ခန့်မှန်းရခက်လောက်အောင် အစွမ်းထက်သည့် နတ်ဘုရားစွမ်းရည်တစ်ပိုင်း မဟာသိုင်းပညာရှင် ဖြစ်နေသဖြင့် စူးချန်ခုန်းကို တွန့်ဆုတ်သွားစေရန် မဟာမိတ်အဖွဲ့ အမည်ကို အသုံးချကာ ခြိမ်းခြောက်လိုက်ခြင်း ဖြစ်သည်။

"အားလုံးရဲ့ ဒေါသကို မီးမွှေးမိမယ်တဲ့လား။ မင်းသေရင် သူတို့တွေ လက်ခုပ်တီးပြီးတောင် အားပေးကြဦးမယ်" စူးချန်ခုန်းက လှောင်ပြောင်လိုက်သည်။ သူသာ ကြောက်နေခဲ့လျှင် ဤနေရာသို့ လာခဲ့မည်မဟုတ်ပေ။

စကားများများ ပြောမနေတော့ဘဲ စူးချန်ခုန်းက ဆက်လက်တိုက်ခိုက်လိုက်သည်။

"သွား"

နတ်ဘုရားစွမ်းရည်တစ်ပိုင်း မဟာသိုင်းပညာရှင်တစ်ဦးကို ရင်ဆိုင်ရခြင်း၏ ကြောက်စရာကောင်းပုံကို သိထားသဖြင့် မိမိတွင်လည်း နတ်ဘုရားစွမ်းရည်တစ်ပိုင်း မရှိပါက အဆင့်ကွာခြားမှုကြောင့် ဖိနှိပ်ခံရမည်ကို သွေးနတ်ဆိုးသူငယ် နားလည်ထားသည်။ သူ၏ လက်ရှိအစွမ်းဖြင့် ရင်ဆိုင်ရန်မှာ လုံးဝ မဖြစ်နိုင်ပေ။

သူ၏ သွေးစက်လုံးမှာ လှုပ်ရှားသွားပြီး သွေးရောင် မြွေကြီးတစ်ကောင်ကဲ့သို့ ရှည်လျားသွားကာ မြေပြင်ပေါ်တွင် လျင်မြန်စွာ လျှောတိုက်၍ ထွက်ပြေးရန် ကြိုးစားတော့သည်။

မျောက်ဝံနတ်ဆိုးလေဟာပြင် ဖမ်းဆုပ်ခြင်း။

သို့သော် စူးချန်ခုန်းက သူ၏လက်များကို ဆန့်ထုတ်ကာ အားဖြင့် ဆုပ်ကိုင်လိုက်ရာ ပြင်းထန်သော ချီစွမ်းအင်များနှင့် ဝိညာဉ်စွမ်းအင်များ ပေါင်းစပ်ကာ ထွက်ပြေးရန် ကြိုးစားနေသော သွေးနတ်ဆိုးသူငယ်ကို လှုပ်မရအောင် ဖမ်းချုပ်လိုက်တော့သည်။

ထို့နောက်တွင်တော့ ဝက်ဝံပုံရိပ်ကြီး၏ ပြင်းထန်သော ရိုက်ချက်များ တစ်ခုပြီးတစ်ခု ကျရောက်လာတော့သည်။ ဧရာမ ဝက်ဝံလက်ဖဝါးကြီးများမှာ ဝိညာဉ်စွမ်းအင်များကို စုစည်းကာ ကမ္ဘာမြေနှင့် တောင်တန်းများကို တုန်ခါစေနိုင်သော နတ်ဘုရားစွမ်းအားများဖြင့် သွေးနှင့်ချီစွမ်းအင်များ ဝန်းရံထားသော သွေးနတ်ဆိုးသူငယ်ကို မညှာမတာ ထုနှက်တော့သည်။

"ဘုန်း ဘုန်း ဘုန်း"

မြေပြင်မှာ အကြိမ်ကြိမ် တုန်ခါနေပြီး တောင်နောက်ဘက်ရှိ သစ်ပင်များစွာ ကျိုးကြေကာ ကျောက်ဆောင်များနှင့် ကုန်းတက်များ ပြိုကျကုန်သည်။ စကေး ၁၂ ရှိသော ငလျင်တစ်ခုကဲ့သို့ ပြင်းထန်လှသော တုန်ခါမှုကြောင့် သွေးနတ်ဆိုးဂိုဏ်းသားများမှာ အနားသို့ပင် မကပ်ရဲကြတော့ပေ။

အခန်း (၆၅၄) ရွှမ်းမင် နတ်ဆေးလုံး။ ရွှမ်းမင်အရှင်။ (၃)

"ငါ့မှာ... ငါ့မှာသာ နောက်ထပ် နှစ်အနည်းငယ်၊ သုံးနှစ်ထက်မပိုတဲ့ အချိန်ရှိခဲ့မယ်ဆိုရင်... ငါလည်း နတ်ဘုရားစွမ်းရည်တစ်ပိုင်းကို ကျင့်ကြံနိုင်မှာပဲ။" သွေးနတ်ဆိုးသူငယ်သည် စူးချန်ခုန်း၏ ပြင်းထန်သော ထုနှက်ချက်များကို ခုခံရန် သူ၏ကျင့်စဉ်နှင့် ချီစွမ်းအင်များကိုသာ အသည်းအသန် လည်ပတ်စေနိုင်သည်။ 'မျောက်ဝံနတ်ဆိုး လေဟာပြင်ကို ဖမ်းချုပ်ခြင်း' ကြောင့် ပိတ်မိနေသဖြင့် သူသည် ထွက်ပြေးရန်ပင် မတတ်နိုင်တော့ပေ။ သူ၏နှလုံးသားထဲတွင် ရူးသွပ်မှုနှင့် မကျေနပ်မှုများဖြင့် အော်ဟစ်နေတော့သည်။

ယခုခေတ်ကာလတွင် ကမ္ဘာကြီးမှာ အမြဲမပြတ် ပြောင်းလဲနေပြီး ကျင့်ကြံသူများအတွက် အကောင်းဆုံး ခေတ်ကာလတစ်ခု ဖြစ်သည်။ သွေးနတ်ဆိုးသူငယ်သည် သူ၏ကျင့်စဉ်မှာ အောင်မြင်မှုအဆင့်သို့ ရောက်ရန် အလွန်နီးစပ်နေပြီဟု ခံစားနေရသည်။ နောက်ထပ် တစ်ဆင့်၊ အများဆုံး သုံးနှစ်အတွင်း သူသည် နတ်ဘုရားစွမ်းရည်တစ်ပိုင်းကို ကျင့်ကြံနိုင်ပြီး မဟာသိုင်းပညာရှင် တစ်ဦး ဖြစ်လာနိုင်ပေသည်။

"အား... မင်း အသေဆိုးနဲ့ သေပါစေ။"

လက်ဝါးရိုက်ချက် အနည်းငယ်အတွင်းမှာပင် ကမ္ဘာမြေကို ဖျက်ဆီးနိုင်သော 'ဝက်ဝံရိုင်း မြေကမ္ဘာ တုန်ဟီးစေခြင်း' ၏ ကြောက်မက်ဖွယ်စွမ်းအားမှာ သွေးနတ်ဆိုးသူငယ်၏ ခန္ဓာကိုယ်ပတ်လည်ရှိ သွေးရေကန်ကဲ့သို့ ထူထဲသော သွေးနှင့်စွမ်းအင်များကို လွင့်စင်သွားစေသည်။ သွေးနတ်ဆိုးသူငယ်သည် မကျေမနပ် ကျိန်ဆဲသံတစ်ချက်သာ အော်ဟစ်နိုင်လိုက်ပြီး သူ၏ခန္ဓာကိုယ်မှာ ပေါက်ကွဲသွားကာ သွေးများ ပန်းထွက်၍ အပိုင်းပိုင်းပြတ်လျက် ထိုနေရာမှာပင် သေဆုံးသွားတော့သည်။

သွေးနတ်ဆိုးသူငယ်မှာ အားနည်းသူမဟုတ်ပေ။ လွန်ခဲ့သော နှစ်ပေါင်းများစွာကပင် သူသည် မူလဓာတ်ငါးပါးသိုင်းပညာရှင် သုံးဦးကို သတ်ဖြတ်ခဲ့ဖူးပြီး ထိုအဆင့်ရှိသူများကြားတွင် အမြင့်ဆုံး၌ ရှိနေကာ ပြိုင်ဘက်ကင်း ဖြစ်ခဲ့သည်။ သို့သော် နတ်ဘုရားစွမ်းရည်တစ်ပိုင်းကို ကျင့်ကြံထားသော စူးချန်ခုန်းနှင့် ရင်ဆိုင်ရချိန်တွင်မူ အားကြီးသူက အားနည်းသူကို နှိပ်စက်သကဲ့သို့ ဖြစ်နေပြီး သူသည် ထွက်ပြေးရန်ပင် အခွင့်အရေး မရခဲ့ပေ။

"ဂိုဏ်းချုပ်... သေသွားပြီလား"

သွေးနတ်ဆိုးသူငယ်၏ နောက်ဆုံး အော်သံကြောင့် သွေးနတ်ဆိုးတံခါးမှ တပည့်အားလုံး မျက်နှာဖြူဖျော့ကုန်ကြသည်။ တိုက်ပွဲမှာ ခဏတာမျှသာ ဖြစ်သော်လည်း တောင်နောက်ဘက်မှ ထွက်ပေါ်လာသော ကြောက်မက်ဖွယ် တုန်ခါမှုကြီးကို ကောင်းကင်နှင့် မြေကြီး တုန်ခါသွားသကဲ့သို့ လူတိုင်း ခံစားလိုက်ရသည်။ တစ်စုံတစ်ယောက်က သွေးနတ်ဆိုးသူငယ်ကို တိုက်ခိုက်ပြီး အချိန်တိုအတွင်း၊ လှုပ်ရှားမှု အနည်းငယ်အတွင်းမှာပင် အမှုန့်ဖြစ်အောင် သတ်ပစ်လိုက်ခြင်းမှာ သူတို့၏ စိတ်ကူးထက်ပင် ကျော်လွန်နေတော့သည်။

သွေးနတ်ဆိုးသူငယ်ကို သတ်ဖြတ်ပြီးနောက် စူးချန်ခုန်း၏ စိတ်ခံစားချက်မှာ ထူးထူးခြားခြား ပြောင်းလဲခြင်း မရှိပေ။ လက်ရှိအချိန်တွင် နတ်ဘုရားစွမ်းရည်တစ်ပိုင်း ကျင့်ကြံထားသော အခြားသိုင်းပညာရှင် သို့မဟုတ် မိစ္ဆာသိုင်းပညာရှင် ဖန်ရှန့်ဝူ ကဲ့သို့သော ကြောက်စရာ ပုဂ္ဂိုလ်မျိုးမှလွဲ၍ ကျော်ကြားသော မူလဓာတ်ငါးပါး သိုင်းပညာရှင်များပင်လျှင် သူ၏ရှေ့တွင် အားနည်းသူများသာ ဖြစ်ကြသည်။

"အချိန်ကို အသုံးချပြီး မူလချီစွမ်းအင်တွေကို ပေါင်းစည်းရမယ်"

စူးချန်ခုန်းသည် တွန့်ဆုတ်မနေဘဲ သွေးနတ်ဆိုးတံခါး၏ ဝိညာဉ်ကြော တည်ရှိရာနေရာကို အာရုံခံလိုက်ပြီး တောက်ယင်ကျင့်စဉ်ကို အသုံးပြု၍ ဝိညာဉ်စွမ်းအင်များကို ထုတ်ယူကာ မူလချီစွမ်းအင်များအဖြစ် စတင်ပြောင်းလဲတော့သည်။ အကယ်၍ သွေးနတ်ဆိုးဂိုဏ်းသားများက သူ့ကို လာရောက်နှောင့်ယှက်ရဲပါက သူ သတ်ပစ်လိုက်မည်သာ ဖြစ်သည်။

ဤညမှာ သွေးနတ်ဆိုးတံခါးမှ သိုင်းပညာရှင်များအတွက် မမေ့နိုင်သော ညတစ်ည ဖြစ်ခဲ့သည်။

နောက်တစ်နေ့ ရောက်ရှိလာချိန်တွင် သွေးနတ်ဆိုးတံခါး၏ ဝိညာဉ်ကြောကို ခမ်းခြောက်အောင် စုပ်ယူပြီးနောက် စူးချန်ခုန်းက အသာအယာ ခေါင်းညိတ်လိုက်သည်။ "မဆိုးပါဘူး... ဒီသွေးနတ်ဆိုးတံခါးရဲ့ ဝိညာဉ်ကြောက ရွှယ်ဂိုဏ်းထက်တောင် ပိုပြီး ကြွယ်ဝသေးတယ်။ မူလချီစွမ်းအင် အမျှင်တန်း ၃၀၀ တောင် ရတယ်ဟ။"

မိစ္ဆာဂိုဏ်း နှစ်ခုကို ပစ်မှတ်ထားပြီးနောက် စူးချန်ခုန်းသည် အကျိုးအမြတ် ကြီးကြီမားမား ရရှိခဲ့သည်။ ယခု သူ၏လက်ထဲတွင် မူလချီစွမ်းအင် အမျှင် ၆၀၀ ရှိနေပြီဖြစ်သည်။ နောက်ထပ် ဂိုဏ်းတစ်ခု သို့မဟုတ် နှစ်ခုကို ထပ်မံသွားရောက်ပြီးပါက သူ၏ ရည်မှန်းချက်ဖြစ်သော အမျှင်ပေါင်း တစ်ထောင် ပြည့်တော့မည် ဖြစ်သည်။

စူးချန်ခုန်းသည် "လူသတ်၊ မီးရှို့ပြီး ရွှေခါးပတ်ပတ်သည်" ဟူသော စကားပုံ၏ အဓိပ္ပာယ်ကို နက်နက်ရှိုင်းရှိုင်း နားလည်သွားသည်။ အင်အားရှိပါက ငွေကြေး၊ ရတနာနှင့် အရင်းအမြစ်များကို လက်တစ်ကမ်းတွင် ပိုင်ဆိုင်နိုင်ပေသည်။

ပုံမှန်အတိုင်းပင် စူးချန်ခုန်းသည် သွေးနတ်ဆိုးတံခါးအတွင်းရှိ ဝိညာဉ်ဆေးပင်များ၊ ဆေးလုံးများ၊ ဝိညာဉ်ကျောက်တုံးများနှင့် လျှို့ဝှက်ကျမ်းစာ အားလုံးကို သိမ်းကျုံးယူလိုက်သည်။ ခုခံသော သွေးနတ်ဆိုးဂိုဏ်းသားများကိုလည်း ညှာတာမှုမရှိဘဲ ချက်ချင်း သတ်ဖြတ်ပစ်ခဲ့သည်။

"အချိန်ကို အသုံးချရမယ်... ကြာလေလေ ပိုပြီး အန္တရာယ်ရှိလေလေပဲ"

အရာအားလုံး ပြီးဆုံးပြီးနောက် စူးချန်ခုန်းသည် အေးအေးလူလူပင် ထွက်ခွာသွားပြီး နောက်ထပ် ပန်းတိုင်သို့ ဦးတည်လိုက်သည်။

တစ်ချိန်တည်းမှာပင် စူးချန်ခုန်းက မိစ္ဆာဂိုဏ်းများကို လုယက်နေစဉ်အတွင်း လူသူမရှိ အပင်နှင့် တိရစ္ဆာန်များပင် အသက်မရှင်နိုင်သော ဆိတ်သုဉ်းသည့် တောင်တန်းတစ်ခုတွင် မီးခိုးရောင်ဝတ်စုံဝတ် အမျိုးသားတစ်ဦးသည် အလွန်မြန်သော အရှိန်ဖြင့် ပြေးလွှားနေသည်။ ဤလူမှာ ရွှယ်အန်းဂိုဏ်းမှ အကြီးအကဲတစ်ဦး ဖြစ်ပြီး ဒုတိယဂိုဏ်းချုပ် ဖန်ကောင်း၏ အမိန့်အရ ဤနေရာတွင် တံခါးပိတ်ကျင့်ကြံနေသော ရွှမ်းမင်အရှင်ကို လာရှာတာ ဖြစ်သည်။

"ဒါ ယို့တောင်တန်းလား။ အရမ်းတိတ်ဆိတ်တာပဲ... အရမ်းလည်းခြောက်ကပ်နေတယ်..." မီးခိုးရောင်ဝတ်စုံနှင့်လူသည် ကြမ်းတမ်းသော တောင်လမ်းအတိုင်း လျှောက်လာရင်း တံတွေးကို မြိုချလိုက်သည်။ ဤနေရာမှာ မြွေ သို့မဟုတ် ပိုးမွှားပင် မရှိလောက်အောင် တိတ်ဆိတ်ခြောက်ကပ်နေသည်ဟု ခံစားရသည်။

ရွှမ်းမင်အရှင်မှာ လွန်ခဲ့သော နှစ်ပေါင်းသုံးဆယ်ကပင် ဂိုဏ်းရေးရာများကို စွန့်ခွာကာ ဤအန္တရာယ်များသော ယို့တောင်တန်းတွင် တံခါးပိတ်ကျင့်ကြံနေခြင်း ဖြစ်သည်။ အကယ်၍ ရွှမ်းမင်အရှင်သာ ဤနေရာမှ ထွက်သွားခဲ့လျှင် သူ အလကား ရောက်လာသလို ဖြစ်သွားမည်ကိုလည်း စိုးရိမ်နေမိသည်။

"ဟင်"

ရုတ်တရက် မီးခိုးရောင်ဝတ်စုံနှင့်လူ၏ မျက်နှာ အမူအရာ ပြောင်းလဲသွားသည်။ ယို့တောင်တန်း၏ အတွင်းပိုင်းတွင် ဧရာမ သားရဲကြီးတစ်ကောင် အသက်ရှူနေသကဲ့သို့ ခံစားလိုက်ရသည်။ ကောင်းကင်ယံရှိ တိမ်တိုက်များမှာ လိပ်တက်နေပြီး ဝိညာဉ်စွမ်းအင် အမြောက်အမြားမှာ ဆွဲယူခြင်း ခံနေရကာ သစ်ပင်များမှာလည်း ဦးညွှတ်နေကြသကဲ့သို့ ကွေးညွတ်ကုန်ကြသည်။

"မကောင်းတော့ဘူး"

မီးခိုးရောင်ဝတ်စုံနှင့်လူကို ထိတ်လန့်သွားစေသည်မှာ ထိုအသက်ရှူနေသော အရာက သူ ရှိနေသည်ကို သတိပြုမိသွားပုံရသည်။ ပြင်းထန်သော စုပ်အားတစ်ခု ပေါ်ထွက်လာပြီး သူ၏ခြေထောက်များမှာ မြေပြင်မှ ကြွတက်သွားကာ ယို့တောင်တန်း၏ အတွင်းပိုင်းသို့ သူ့အလိုလို လွင့်ပျံသွားတော့သည်။ သူ၏သွေးများနှင့် စစ်မှန်သောစွမ်းအင်များမှာ အတင်းအဓမ္မ စုပ်ထုတ်ခံနေရပြီး သူ၏ခန္ဓာကိုယ်မှာ နာကျင်လွန်းသဖြင့် ကွဲအက်တော့မည့်အတိုင်း ခံစားရသည်။ သို့သော် သူသည် လျှပ်စစ်စီးနေသကဲ့သို့ ဖြစ်နေပြီး အနည်းငယ်မျှပင် မခုခံနိုင်တော့ပေ။

"ဂိုဏ်းချုပ်.. ကျွန်တော်.. ကန်ဖုန်းပါ။" မီးခိုးရောင်ဝတ်စုံဝတ်က အသည်းအသန် အော်ပြောလိုက်သည်။

"ဘုန်း"

နောက်တစ်စက္ကန့်တွင် ထိုစုပ်အားမှာ ရပ်တန့်သွားပြီး ကန်ဖုန်းမှာ မြေပြင်ပေါ်သို့ ပြင်းထန်စွာ ပြုတ်ကျသွားတော့သည်။ သူ၏အရိုးများ ပျော့ခွေသွားပြီး ခြေထောက်များ အားမရှိတော့သဖြင့် အတော်ကြာအောင် ထမရနိုင်ဖြစ်နေသည်။

"ကန်ဖုန်း... ငါ ကျင့်ကြံနေတာကို မနှောင့်ယှက်ဖို့ မပြောထားဘူးလား။ ဂိုဏ်းမှာ တစ်ခုခု ပြဿနာတက်လို့လား" အနည်းငယ် အက်ရှရှရှိသော အသံတစ်ခု ထွက်ပေါ်လာသည်။

ကန်ဖုန်းသည် အမြန်ပင် မော့ကြည့်လိုက်ရာ ကျောက်ဆောင်တစ်ခုပေါ်တွင် ရိုးရှင်းသော တာအိုဝတ်စုံကို ဝတ်ဆင်၍ တင်ပျဉ်ခွေထိုင်နေသော အမျိုးသားတစ်ဦးကို မြင်လိုက်ရသည်။ ထိုသူမှာ မုတ်ဆိတ်ရှည်ရှိပြီး အရိုးတည်ဆောက်ပုံ ကြံ့ခိုင်ကာ ချောမောသော ရုပ်ရည်ရှိသည်။ အသက်သုံးဆယ်ဝန်းကျင်ဟု ထင်ရသော်လည်း သူ၏မျက်လုံးကျဉ်းကျဉ်းလေးများမှာ အရိုးထဲထိ အေးစိမ့်သွားလောက်အောင် စူးရှလှသည်။

ပို၍ အံ့သြစရာကောင်းသည်မှာ ထိုသူ၏ ဝမ်းဗိုက်အနီးတွင် လက်မထိပ်ခန့်ရှိသော အနက်ရောင် ဆေးလုံးလေးတစ်လုံး မှိန်ပျပျ ပေါ်ထွက်နေခြင်း ဖြစ်သည်။ ထိုဆေးလုံးလေးမှာ အရာအားလုံးကို ဝါးမြိုထားသကဲ့သို့ ရှိနေပြီး တစ်ချက်ကြည့်လိုက်ရုံဖြင့် ကန်ဖုန်းမှာ သူ၏ဝိညာဉ်မှာ အပြင်သို့ ဆွဲထုတ်ခံရတော့မည့်အလား တုန်လှုပ်သွားရသည်။

တာအိုဝတ်စုံနှင့် လူက စိတ်ကူးတစ်ချက်ဖြင့် ထိုအနက်ရောင်ဆေးလုံးလေးမှာ ဝမ်းဗိုက်အတွင်းသို့ ပြန်လည် ဝင်ရောက်သွားသည်။ ကန်ဖုန်းသည် သတိပြန်ဝင်လာပြီး တုန်တုန်ယင်ယင်ဖြင့် ပြောလိုက်သည်။ "ဒါ... ဒါက ဒဏ္ဍာရီလာ 'ရွှမ်းမင် နတ်ဆေးလုံး' လား။ ဂိုဏ်းချုပ်... ဂိုဏ်းချုပ်က ရွှမ်းမင်လျှို့ဝှက်ကျမ်းစာကို ကြီးမားတဲ့ အောင်မြင်မှုအဆင့်ထိ ကျင့်ကြံနိုင်သွားပြီလား"

ကန်ဖုန်း၏ မျက်နှာမှာ စိတ်လှုပ်ရှားမှုကြောင့် နီရဲသွားလေ၏။ ၎င်းမှာ ရွှမ်းမင်အရှင် အောင်မြင်စွာ အဆင့်တက်နိုင်ခဲ့ပြီဟု အဓိပ္ပာယ်ရသည်။ သူသည် ဂိုဏ်းတည်ထောင်သူ ဘိုးဘေးနှင့်ပင် ယှဉ်နိုင်လောက်သော အဆင့်သို့ ရောက်ရှိသွားပြီ ဖြစ်သည်။ ဤတာအိုဝတ်စုံနှင့်လူမှာ ရွှယ်အန်းဂိုဏ်း၏ ဂိုဏ်းချုပ် "ရွှမ်းမင်အရှင်" ပင် ဖြစ်သည်။ သူသည် ငယ်စဉ်ကတည်းက ပါရမီရှင်တစ်ဦးဖြစ်ပြီး မည်သည့်သိုင်းပညာကိုမဆို သင်ယူလိုက်သည်နှင့် တတ်မြောက်ကာ ကျင့်ကြံတိုင်းလည်း အောင်မြင်မှု ရရှိသူ ဖြစ်သည်။

ရွှမ်းမင်အရှင်၏ အေးစက်သော မျက်လုံးများက သူ့ကို စိုက်ကြည့်နေသည်ကို မြင်သောအခါ ကန်ဖုန်းသည် သတိဝင်လာပြီး အမြန်ပင် ပြောလိုက်သည်။ "ဂိုဏ်းချုပ်... ရွှယ်အန်းဂိုဏ်း တစ်ခုခု ဖြစ်သွားပါပြီ။ ကြိုးကြာဖြူတစ်ကောင် စီးထားတဲ့ အမည်မသိ လေးပညာရှင်တစ်ယောက်က ပျံသန်းနိုင်စွမ်းကို အသုံးပြုပြီး ကျွန်တော်တို့ရဲ့ မူလနယ်ပယ်သိုင်းပညာရှင် ဆယ်ယောက်ကျော်ကို လုပ်ကြံသွားပါတယ်။ ကျွန်တော်တို့မှာ သူ့ကို ရင်ဆိုင်ဖို့ နည်းလမ်းမရှိလို့ ဂိုဏ်းချုပ်ကို လာရှာရတာပါ"

"ပျံသန်းတဲ့ တိရစ္ဆာန်ကို စီးထားတဲ့ လေးပညာရှင်လား" ရွှမ်းမင်အရှင်၏ မျက်ခုံးများ အနည်းငယ် တွန့်သွားသည်။

မကြာသေးမီ နှစ်များအတွင်း ကမ္ဘာကြီးတွင် ကြီးမားသော ပြောင်းလဲမှုများ ဖြစ်ပေါ်နေသည်။ သူသည် ထိုအခွင့်အရေးကို အသုံးပြု၍ သူ အိပ်မက်မက်ခဲ့သော နယ်ပယ်သို့ အောင်မြင်စွာ တက်လှမ်းနိုင်ခဲ့ခြင်း ဖြစ်သည်။ နှစ်ပေါင်းသုံးဆယ်အတွင်း မည်သည့် ဘေးဒုက္ခနှင့်မျှ မကြုံခဲ့ရသော ရွှယ်အန်းဂိုဏ်းမှာ ယခု ဒုက္ခရောက်နေသည်ဆိုသည်မှာ သာမန်ကိစ္စ မဟုတ်တန်ရာ။

"ဒါက ကိစ္စသေးသေးလေးတော့ မဟုတ်ဘူး... ပြန်သွားပြီး ကိုယ်တိုင်ပဲ ကြည့်ကြတာပေါ့။"

ရွှမ်းမင်အရှင်၏ အတွေးမှာ လျှပ်စီးကဲ့သို့ မြန်ဆန်လှသည်။ ရန်သူမှာ မည်သူပင်ဖြစ်စေ သူ အလွယ်တကူ နှိမ်နင်းနိုင်မည်ဟု သူ ယုံကြည်ပါသည်။ ၎င်းမှာ သူ၏ ကိုယ်ပိုင်အစွမ်းအပေါ် ယုံကြည်မှုပင် ဖြစ်သည်။ သူ၏ လက်ရှိ ရည်မှန်းချက်မှာ ပွင့်လန်းလာမည့် ဤခေတ်သစ်တွင် ရေဆန်တက်လှမ်းကာ မြင့်မြတ်သော "သိုင်းဝိဇ္ဇာသူတော်စင်” နယ်ပယ်သို့ ရောက်ရှိရန်နှင့် ယခင်လူများထက် သာလွန်ရန်ပင် ဖြစ်သည်။