အခန်း (၆၅၈-၆၆၀)

အခန်း (၆၅၈) နတ်ဘုရားစွမ်းရည် တိုက်ပွဲ။ မဟာသိုင်းပညာရှင်များ၏ အဆုံးအဖြတ်တိုက်ပွဲ။ (၁)

"ဒေါင်... ဒေါင်... ဒေါင်..."

စူးရှသော ခေါင်းလောင်းသံများမှာ ဟွမ်ချွမ်ဂိုဏ်းတစ်ခုလုံးတွင် ပျံ့လွင့်သွားပြီး ဂိုဏ်းတစ်ခုလုံးကို ဖရိုဖရဲ ဖြစ်သွားစေသည်။ တစ်စုံတစ်ယောက်က ကျူးကျော်ဝင်ရောက်လာပြီး ဂိုဏ်းချုပ် ဟွမ်ကျင်ရှကို သတ်လိုက်ပြီ ဖြစ်သည်။

"ဂိုဏ်းချုပ်ကို ဒီလောက် အေးအေးဆေးဆေး သတ်နိုင်ပြီးတော့... ဟွမ်ချွမ်ဂိုဏ်းရဲ့ ဗဟိုဆီကို ဘာသံမှမထွက်ဘဲ ကျူးကျော်နိုင်တာလား။ ဒါ ဘယ်လောက်တောင် ကြောက်စရာကောင်းတဲ့ ပညာရှင်မျိုးလဲ" ဂိုဏ်းအတွင်းရှိ အကြီးအကဲများမှာ ထိတ်လန့်တုန်လှုပ်နေကြသည်။

မည်သည့် တိုက်ခိုက်သံမျှ မကြားရဘဲ ဟွမ်ကျင်ရှမှာ အသတ်ခံလိုက်ရခြင်း ဖြစ်သည်။ ကျူးကျော်သူ၏ အစွမ်းမှာ သူတို့ ရင်ဆိုင်နိုင်သော အဆင့်တွင် မရှိတော့ပေ။

သို့သော် စူးချန်ခုန်းမှာမူ ထိုအရာများကို ဂရုမစိုက်ပေ။ "ဒီဟွမ်ချွမ်ဂိုဏ်းရဲ့ ဝိညာဉ်ကြောမှာ မူလချီစွမ်းအင် နှစ်ရာကျော် ရှိနေတာပဲ။ ဒါဆိုရင် လုံလောက်သွားပြီ။"

ဂိုဏ်းအတွင်းရှိ သိုင်းသမားများနှင့် အကြီးအကဲများ မည်သူမျှ အနားမကပ်ဝံ့ကြပေ။ အနားကပ်ပါက သေရမည်ဖြစ်ကြောင်း သူတို့ ကြိုတင်သိနေကြသည်။

ကောင်းကင်ယံမှာ မှောင်မိုက်နေဆဲ ဖြစ်သော်လည်း အရုဏ်တက်ရန် နီးကပ်လာပြီ ဖြစ်သည်။ ဟွမ်ချွမ်ကျွန်းပေါ်ရှိ ထူထဲသော သဘာဝဝိညာဉ်စွမ်းအင်များမှာ ယခုအခါ အလွန်ပင် ခမ်းခြောက်သွားခဲ့လေပြီ။

"ကောင်းလိုက်တာ။ မူလချီစွမ်းအင် အမျှင်ပေါင်း ၂၀၀ ရပြီ။ အရင်ရထားတာတွေနဲ့ ပေါင်းရင် အားလုံး ၁၀၀၀ တိတိပဲ။"

စူးချန်ခုန်း၏ နှလုံးသားထဲတွင် ဝမ်းသာပီတိ ဖြစ်နေမိသည်။ သူ၏ 'စာပေရနံ့အိတ်' ထဲတွင် ယခုအခါ မူလချီစွမ်းအင် အမျှင်တန်း ၁၀၀၀ ရှိနေပြီ ဖြစ်သည်။

အချိန်တိုလေး လေးရက်အတွင်းမှာပင် စူးချန်ခုန်းသည် မူလချီစွမ်းအင် အမျှင်တန်း ၁၀၀၀ ကို စုဆောင်းနိုင်ခဲ့သည်။ ၎င်းမှာ ရိုးရှင်းသည်ဟု ထင်ရသော်လည်း လက်တွေ့တွင် စူးချန်ခုန်းကဲ့သို့ ပုဂ္ဂိုလ်မျိုးသာ ထိုသို့ လုပ်ဆောင်နိုင်သည်။ သူ၏ အစွမ်းကြောင့်သာမက မိစ္ဆာဂိုဏ်းများကြားတွင် အချိန်တိုအတွင်း ပျံသန်းသွားလာနိုင်စွမ်း ရှိသောကြောင့် ရန်သူများဘက်မှ ပြင်ဆင်ချိန် သို့မဟုတ် တုံ့ပြန်ချိန် မရခဲ့ခြင်း ဖြစ်သည်။

ရှေးဟောင်း မိစ္ဆာဂိုဏ်း လေးခု၏ ဝိညာဉ်ကြောများကို စူးချန်ခုန်းက စုပ်ယူခဲ့ခြင်း ဖြစ်သည်။ ထိုဝိညာဉ်ကြောများ ပြန်လည်ကောင်းမွန်ရန်အတွက် နှစ်ပေါင်းရာချီ၊ ထောင်ချီ အချိန်ယူရမည်ဖြစ်သော်လည်း စူးချန်ခုန်းကတော့ ထိုအရာကို မူလချီစွမ်းအင်နှင့် လဲလှယ်လိုက်ခြင်း ဖြစ်သည်။

ဒုတိယတန်းစား သို့မဟုတ် တတိယတန်းစား ဂိုဏ်းများအတွက်မူ သူတို့၏ ဝိညာဉ်ကြောတစ်ခုလုံးကို စုပ်ယူလျှင်ပင် မူလချီစွမ်းအင် အမျှင်ပေါင်း သုံးဆယ်၊ လေးဆယ်ခန့်သာ ရရှိမည်ဖြစ်သည်။ ၎င်းမှာ ငါးဖမ်းရန်အတွက် ကန်ထဲမှ ရေကို ခမ်းခြောက်အောင် စုပ်ထုတ်လိုက်သကဲ့သို့ပင်။

"တစ်ယောက်ယောက်က ငါတို့ ဟွမ်ချွမ်ဂိုဏ်းရဲ့ ဝိညာဉ်ကြောကို ဖျက်ဆီးလိုက်တာလား"

"တကယ်ကို ရက်စက်လွန်းတာပဲ။"

ဟွမ်ချွမ်ကျွန်း၏ ဝိညာဉ်စွမ်းအင်များ လျော့နည်းလာသည်ကို ခံစားမိသော အကြီးအကဲများမှာ မျက်နှာပျက်ကုန်ကြသည်။ သို့သော် စူးချန်ခုန်းက ဂိုဏ်းချုပ်ကို အလွယ်တကူ သတ်နိုင်သည်ကို မြင်ထားသဖြင့် သူတို့မှာ အသက်နှင့်ရင်း၍ မတားဝံ့ဘဲ ဝိညာဉ်ကြော ခမ်းခြောက်သွားသည်ကိုသာ ငေးကြည့်နေရတော့သည်။

"ဟင်"

စူးချန်ခုန်းသည် ကျန်ရှိနေသော ဝိညာဉ်စွမ်းအင်များကို ဆက်လက်စုပ်ယူရန် ပြင်ဆင်နေစဉ် ရုတ်တရက် မျက်လုံးများကို ဖွင့်လိုက်သည်။ သူ၏မျက်လုံးများတွင် အံ့သြရိပ်များ ယှက်သန်းသွားပြီး ကောင်းကင်ယံသို့ မော့ကြည့်လိုက်သည်။

"အဲဒါ ဘာကြီးလဲ။ ငှက်တွေ အများကြီးပဲ"

"ငှက်တွေရဲ့ ကျောပေါ်မှာ လူတွေ ပါလာတယ်ဟ။"

ဟွမ်ချွမ်ဂိုဏ်းသားများသည်လည်း အဝေးမှ ထိတ်လန့်ဖွယ် မြင်ကွင်းကို မြင်လိုက်ရသည်။ အရုဏ်တက်ချိန်တွင် ငှက်အုပ်ကြီးမှာ တိမ်တိုက်များကဲ့သို့ ကောင်းကင်တစ်ခုလုံးကို ဖုံးလွှမ်းလာပြီး ငှက်တစ်ကောင်စီ၏ ကျောပေါ်တွင် လူနှစ်ဦးစီ ပါလာသည်။

ထိုလူများထဲမှ တစ်ဦးမှာ အညိုရောင် တာအိုဝတ်စုံကို ဝတ်ဆင်ထားပြီး ချောမောသော ရုပ်ရည်နှင့် အေးစက်စူးရှသော မျက်လုံးများ ရှိသည်။ အခြားတစ်ဦးမှာမူ အိုမင်းမစွမ်း ဖြစ်နေပုံရသော ပိန်လှီသည့် အဖိုးအိုတစ်ဦး ဖြစ်သည်။

လာရောက်သူများမှာ ရွှယ်အန်းဂိုဏ်း၏ ဂိုဏ်းချုပ် ရွှမ်းမင်အရှင်နှင့် ကောင်းကင်နတ်ဆိုးဂိုဏ်းမှ ကောင်းကင်နတ်ဆိုး အဖိုးအိုတို့ပင် ဖြစ်သည်။ သူတို့နှစ်ဦးမှာ သွေးနတ်ဆိုးတံခါးသို့ အရင်သွားခဲ့ပြီး ထိုနေရာတွင် စူးချန်ခုန်း ချန်ထားခဲ့သော စွမ်းအင်အကြွင်းအကျန်များကို အသုံးပြု၍ ကောင်းကင်နတ်ဆိုး အဖိုးအိုက ဤနေရာသို့ တိုက်ရိုက် လမ်းပြလာခြင်း ဖြစ်သည်။

"ပညာရှင်ပဲ"

စူးချန်ခုန်း၏ အကြည့်များ စူးရှသွားလေ၏။ အဝေးမှပင် ထိုအဖိုးအိုမှာ ခန့်မှန်းရခက်သော ပုဂ္ဂိုလ်ဖြစ်ကြောင်း စူးချန်ခုန်း ခံစားလိုက်ရသည်။ သူ၏ စွမ်းအင်ကိုပင် စူးချန်ခုန်း အာရုံမခံနိုင်ပေ။ အခြားတစ်ဦးဖြစ်သော ရွှမ်းမင်အရှင်မှာမူ သူ၏ ပတ်ဝန်းကျင်ရှိ အရာအားလုံးကို ဝါးမြိုနေသော 'တွင်းနက်' ကြီးတစ်ခုကဲ့သို့ပင်။

"သူပဲ... ငါတို့ရဲ့ လျှို့ဝှက်ကျမ်းစာတွေ၊ ဆေးလုံးတွေကို လုယူပြီး ရွှယ်အန်းတောင်ရဲ့ ဝိညာဉ်ကြောကို သိမ်းပိုက်သွားတဲ့လူက သူပဲ။"

ရွှမ်းမင်အရှင်က စူးချန်ခုန်းကို စိုက်ကြည့်နေ၏။ သူ၏ မျက်လုံးကျဉ်းကျဉ်းလေးထဲမှ အေးစက်သော အလင်းတန်းများမှလွဲ၍ သူ၏မျက်နှာမှာ မည်သည့် စိတ်ခံစားချက်မျှ မရှိပေ။

"ဒီလူငယ်က ထူးခြားတာပဲ။ သူက ဒီဟွမ်ချွမ်ကျွန်းရဲ့ ဝိညာဉ်ကြောကိုလည်း လက်ဆော့ထားတာလား။ ဒါ ဘယ်လို နည်းလမ်းမျိုးလဲ။ ဝိညာဉ်ကြောကို တိုက်ရိုက် ဖျက်ဆီးပစ်တာမျိုးလည်း မဟုတ်ဘူး..." ကောင်းကင်နတ်ဆိုး အဖိုးအိုက စိတ်ဝင်တစား ကြည့်နေသည်။ သူသည် သက်တမ်း အလွန်ရှည်ကြာသူ ဖြစ်သဖြင့် သူ၏ စိတ်ဝင်စားမှုကို ဆွဲဆောင်နိုင်သော လူ သို့မဟုတ် ကိစ္စမျိုးမှာ အလွန်ရှားလှသည်။

စူးချန်ခုန်းသည် ရှေ့မှ လူနှစ်ဦးမှာ မိစ္ဆာဂိုဏ်းများမှ ဖြစ်ကြောင်း သိသော်လည်း ချက်ချင်း ထွက်ပြေးရန် အစီအစဉ် မရှိပေ။ သူတို့က သူ့ကို မည်သို့ အတိအကျ ခြေရာခံနိုင်သနည်းဆိုသည်ကို သူ သိလိုသည်။ သူသည် ပျံသန်းလာခဲ့ခြင်း ဖြစ်သော်လည်း သူတို့က လိုက်လာနိုင်ခဲ့သည်။ ၎င်းကို သူ နားလည်အောင် လုပ်ရမည်ဖြစ်ပြီး သို့မှသာ နောင်တွင် သူ၏တံခါးကို လာခေါက်ချိန်၌ ပြင်ဆင်ထားနိုင်မည် ဖြစ်သည်။

ရွှမ်းမင်အရှင်နှင့် ကောင်းကင်နတ်ဆိုး အဖိုးအိုတို့မှာ ငှက်ကျောပေါ်မှ ဆင်းလိုက်ကြသည်။ သူတို့၏ လှုပ်ရှားမှုမှာ ညင်သာပြီး ဟွမ်ချွမ်ဂိုဏ်းအတွင်း စူးချန်ခုန်း၏ ဆန့်ကျင်ဘက်တွင် နေရာယူလိုက်ကြသည်။

"မိတ်ဆွေတို့... ခင်ဗျားတို့ကို ဘယ်လို ခေါ်ရမလဲ"

စူးချန်ခုန်းက မတ်တတ်ရပ်ကာ သူတို့ကို ကြည့်လိုက်သည်။ တာအိုဝတ်စုံနှင့် လူမှာ သူ့အပေါ် ကြီးမားသော အငြိုးအတေး ရှိပုံရပြီး သတ်ဖြတ်လိုစိတ်ကို ဖုံးကွယ်ထားခြင်း မရှိပေ။

ပိန်လှီသော ကောင်းကင်နတ်ဆိုး အဖိုးအိုမှာ လက်နှစ်ဖက်ကို နောက်ပစ်ကာ ဘာကိုမှ ဂရုမစိုက်ပုံဖြင့် ရပ်နေသည်။ သူက ပြုံးလိုက်ပြီး "ဒီအဖိုးကြီးကတော့ ကောင်းကင်နတ်ဆိုးဂိုဏ်းက လူအိုကြီးတစ်ယောက်ပါပဲ" ဟု ပြန်ဖြေသည်။

"သူက... အလောင်းနတ်ဆိုးဂိုဏ်းရဲ့ ဂိုဏ်းချုပ်လား" စူးချန်ခုန်းသည် အဖိုးအို၏ အဆင့်အတန်းကို ချက်ချင်း သိလိုက်သည်။ ထွမ်မုထောင် ပေးထားသော သတင်းများအရ ကောင်းကင်နတ်ဆိုး အဖိုးအိုမှာ သက်တမ်း ငါးရာကျော်ရှိပြီး ခန့်မှန်းရခက်သော မိစ္ဆာလောက၏ အင်အားကြီး ပုဂ္ဂိုလ်တစ်ဦး ဖြစ်သည်။ သတင်းအချက်အလက်ထဲတွင် သူ့ကို မနှောင့်ယှက်မိစေရန် အထူးသတိပေးထားသည်။

"ရွှမ်းမင်အရှင်"

တာအိုဝတ်စုံနှင့် လူက စကားလုံး အနည်းငယ်ကို အေးစက်စွာ ပြောလိုက်သည်။ ထိုအခါ စူးချန်ခုန်းသည် ထိုသူမှာ ရွှယ်အန်းဂိုဏ်း၏ ဂိုဏ်းချုပ်ဖြစ်ကြောင်း ချက်ချင်း သိလိုက်သည်။ သူ ထိုဂိုဏ်းသို့ သွားစဉ်က ဤသူမှာ အပြင်သို့ ရောက်နေတာ ဖြစ်ရမည်။ ယခုအခါ ဂိုဏ်းတွင် ဖြစ်ပျက်ခဲ့သည်များကို သိရှိသွားပြီး ကလဲ့စားချေရန် ရောက်လာသည့်ပုံပင်။

ရွှမ်းမင်အရှင်က စူးချန်ခုန်းကို စိုက်ကြည့်ကာ "ငါက အမည်မရှိတဲ့လူတွေကို မသတ်ဘူး" ဟု ဆိုသည်။

"တာ့ဝူဖုန်း"

စူးချန်ခုန်းသည် သူ၏ အမည်ရင်းကို ထုတ်ဖော်ပြောကြားခြင်း မရှိဘဲ 'တာ့ဝူဖုန်း' ဟူသော နာမည်ဝှက်ကိုသာ ပြောလိုက်တော့သည်။

အခန်း (၆၅၉) နတ်ဘုရားစွမ်းရည် တိုက်ပွဲ။ မဟာသိုင်းပညာရှင်များ၏ အဆုံးအဖြတ်တိုက်ပွဲ။ (၂)

ယန်အင်ပါယာ တော်ဝင်မိသားစုသည် သူ သတင်းအချက်အလက်များကို လိုက်လံစုဆောင်းနေသည်ကို သိထားပြီးဖြစ်ရာ ၎င်းမှာ သူတို့အနေဖြင့် မိစ္ဆာဂိုဏ်းများနှင့် နတ်ဆိုးတံခါးများကို အရေးယူရန် ပြင်ဆင်နေခြင်းပင် ဖြစ်သည်။ ဤကိစ္စကို ဖုံးကွယ်ထားလျှင်ပင် မိစ္ဆာလောကသားများက စုံစမ်းသိရှိနိုင်မည်ဖြစ်ရာ ထပ်မံဖုံးကွယ်ထားရန် မလိုတော့ပေ။

"တာ့ဝူဖုန်းလား။ ငါ သူ့အကြောင်း နည်းနည်းကြားဖူးတယ်... အသက်ခြွေအဖွဲ့အစည်းနဲ့ ရန်ငြိုးရှိပုံရတယ်။ အဲဒီအဖွဲ့က သူ့ကို အခုထိ ဘာလို့ လက်စမသတ်နိုင်သေးတာလဲဆိုတာ အံ့သြစရာပဲ... သူက နတ်ဘုရားစွမ်းရည်တစ်ပိုင်းကို တတ်မြောက်ထားတဲ့ မဟာသိုင်းပညာရှင်ကိုး။"

နှစ်ပေါင်းများစွာ တံခါးပိတ်ကျင့်ကြံနေခဲ့သော ရွှမ်းမင်အရှင်မှာ ထိုအမည်ကို မကြားဖူးသော်လည်း ကောင်းကင်နတ်ဆိုး အဖိုးအို၏ မျက်လုံးများမှာမူ အနည်းငယ် လှုပ်ရှားသွားပြီး သူသည် တာ့ဝူဖုန်းအကြောင်း သတင်းများကို သိထားကြောင်း ဖော်ပြလိုက်သည်။

သူသည် နတ်ဆိုးနှိမ်နင်းရေးဌာနမှ ချီကန်းကို သတ်ဖြတ်ခဲ့ပြီး အသက်ခြွေအဖွဲ့အစည်း၏ ဌာနခွဲတစ်ခုကို အမြစ်ပြတ်ချေမှုန်းခဲ့သူ ဖြစ်သည်။ ထိုသတင်းများအပြင် အခြားသတင်းများ မရှိပေ။ အသက်ခြွေအဖွဲ့အစည်းကဲ့သို့ ကြောက်စရာကောင်းသောအဖွဲ့ကို ရန်စထားသော်လည်း တာ့ဝူဖုန်း ဘာကြောင့် ကောင်းမွန်စွာ အသက်ရှင်နေနိုင်သနည်းဆိုသည်ကို ကောင်းကင်နတ်ဆိုး အဖိုးအို နားလည်သွားသည်။ နတ်ဘုရားစွမ်းရည်တစ်ပိုင်း အဆင့်ရှိသော မဟာသိုင်းပညာရှင်တစ်ဦးကို သတ်ရန်မှာ ထိုအသင်းရှိ ထိပ်သီးအဖိုးကြီးများ ကိုယ်တိုင် ထွက်လာမှသာ ဖြစ်နိုင်ပေလိမ့်မည်။

စူးချန်ခုန်းက သိလိုစိတ်ဖြင့် "ကျွန်တော့်ကို ဘယ်လိုရှာတွေ့တာလဲ" ဟု မေးလိုက်သည်။ ၎င်းမှာ စူးချန်ခုန်းအတွက် အလွန်ဇဝေဇဝါဖြစ်စေသော အချက်ဖြစ်ပြီး နောင်တွင် ကြိုတင်ကာကွယ်နိုင်ရန် သူ သိထားရမည်ဖြစ်သည်။

ကောင်းကင်နတ်ဆိုး အဖိုးအိုက ဖော်ရွေသော မျက်နှာထားဖြင့် "ဒီအဖိုးကြီးက ခြေရာခံတဲ့ အတတ်မှာ နည်းနည်းကျွမ်းကျင်လို့ပါ။ မင်းသွားခဲ့တဲ့ နေရာတွေမှာ မင်းရဲ့ အရှိန်အဝါတွေ ကျန်နေသေးတယ်လေ။ အဲဒါတွေက မပျောက်သွားသေးဘူး။ အဲဒါက ချည်မျှင်တစ်ချောင်းလိုပဲ။ အဲဒီအရှိန်အဝါနောက်ကို လိုက်လာရင်းနဲ့ မင်းကို ရှာတွေ့တာပဲ"

ကောင်းကင်နတ်ဆိုး အဖိုးအို၏ အဖြေမှာ ရိုးရှင်းသော်လည်း စူးချန်ခုန်း၏ ကျောရိုးထဲအထိ အေးစိမ့်သွားစေသည်။ ဤခြေရာခံအတတ်ကို သိထားလျှင်ပင် ကြိုတင်ကာကွယ်ရန်မှာ မဖြစ်နိုင်သလောက်ပင်။ တစ်နေရာတွင် တိုက်ခိုက်မှုပြုလုပ်ပြီး အရှိန်အဝါ အနည်းငယ် ကျန်ရစ်ရုံဖြင့် ကောင်းကင်နတ်ဆိုး အဖိုးအိုက လိုက်လာနိုင်ခြင်း ဖြစ်သည်။ ၎င်းမှာ သာမန်ခြေရာခံခြင်းထက် များစွာ သာလွန်နေပြီ ဖြစ်သည်။

ရာစုနှစ်ချီ ရှင်သန်နေသော ဤမိစ္ဆာအိုကြီးမှာ ရင်ဆိုင်ရန် မလွယ်ကူလှပေ။

"ဒီအဖိုးကြီးကတော့ ရွှမ်းမင်ရဲ့ တောင်းဆိုချက်အရ မင်းကို ရှာပေးဖို့ပဲ လိုက်လာတာပါ။ ရန်ငြိုးက သူ့ရန်ငြိုးပဲ။ ငါနဲ့ မဆိုင်ဘူး... ငါကတော့ ဘေးကနေ ပျော်စရာကြည့်ဖို့ပဲ လာတာပါ" ဟု သူက ဆိုသည်။

ကောင်းကင်နတ်ဆိုး အဖိုးအို၏ မျက်နှာပေါ်ရှိ အရေးအကြောင်းများမှာ အပြုံးများဖြင့် ပြည့်နှက်နေပြီး သူ တိုက်ခိုက်မည်မဟုတ်ကြောင်း ပြသနေသည်။ သို့သော် စူးချန်ခုန်းကမူ ထိုစကားကို နားထောင်ရုံသာ နားထောင်လိုက်သည်။ မိစ္ဆာဂိုဏ်းသားများ၏ စကားကို အလွယ်တကူ မယုံကြည်သင့်ဘဲ အမြဲတမ်း သတိရှိနေရမည်ဖြစ်သည်။

ရွှမ်းမင်အရှင်၏ မျက်နှာမှာမူ ဆီးနှင်းများ ဖုံးလွှမ်းနေသကဲ့သို့ အေးစက်နေ၏။ "မင်း ကျင့်ကြံဖို့ အရင်းအမြစ်တွေအတွက် နေရာအနှံ့မှာ ပြဿနာရှာနေတာက ငါနဲ့ မဆိုင်ဘူး။ ဒါပေမဲ့ မင်း မလုပ်သင့်ဆုံး အလုပ်က... ငါ့ကို လာပြီး ရန်စတာပဲ။"

ရွှမ်းမင်အရှင်၌ သတ်ဖြတ်လိုစိတ် ပြည့်နှက်နေသည်မှာ သံသယဖြစ်ဖွယ် မရှိပေ။ သူ၏ဂိုဏ်းမှာ ပြောင်စင်အောင် လုယက်ခံရပြီး ဝိညာဉ်ကြောပါ ပျက်စီးသွားသဖြင့် ဂိုဏ်းတစ်ခုလုံး နေရာပြောင်းရတော့မည် ဖြစ်သည်။ ဤလူငယ်လေးက အသက်ခြွေအဖွဲ့အစည်းဂိုဏ်းကို ပထမဆုံး ပစ်မှတ်ထားခဲ့ခြင်းမှာ သူ့ကို အလေးမထားကြောင်း ပြသနေခြင်းပင်။

စူးချန်ခုန်းကလည်း စကားအများကြီး မပြောတော့ပေ။ အစွမ်းရှိသူကသာ အမှန်တရား ဖြစ်သည်ဟု သူ ယူဆသည်။ ရွှယ်အန်းဂိုဏ်းက အခြားဂိုဏ်းများကို လုယက်နိုင်လျှင် သူကလည်း ရွှယ်အန်းဂိုဏ်းကို ပြန်လည် လုယက်နိုင်သည်မှာ သဘာဝကျပါသည်။ သူက အေးစက်စွာ ပြန်ပြောလိုက်သည်။ "ငါ့ကို တိုက်ခိုက်ချင်တယ်ဆိုရင် သေဖို့သာ ပြင်ထားလိုက်တော့။"

"မောက်မာလိုက်တာ။"

ရွှမ်းမင်အရှင်၏ သတ်ဖြတ်လိုစိတ်မှာ အထွက်အထိပ်သို့ ရောက်ရှိသွားသည်။ ရှေ့က တာ့ဝူဖုန်းဆိုသူမှာ သူ တံခါးပိတ်ကျင့်ကြံနေစဉ်အတွင်း ထွက်ပေါ်လာသော လူသစ်တစ်ဦး ဖြစ်ရမည်။ ထို့အပြင် နတ်ဘုရားစွမ်းရည်တစ်ပိုင်းကို တတ်မြောက်ထားသော ပညာရှင်တစ်ဦးလည်း ဖြစ်နိုင်သည်။ သို့သော် ရွှမ်းမင်အရှင်မှာ မိမိကိုယ်ကိုယ် ယုံကြည်မှု အပြည့်ရှိသည်။

သူသည် ငယ်စဉ်ကတည်းကပင် ရွယ်တူများကြား ပြိုင်ဘက်ကင်းသော ပါရမီရှင် ဖြစ်ခဲ့သည်။ ယို့တောင်တန်းတွင် နှစ်ပေါင်းသုံးဆယ်ကြာ ကျင့်ကြံပြီးနောက် ဂိုဏ်း၏ လျှို့ဝှက်ကျမ်းစာကို အပြီးသတ် တတ်မြောက်ခဲ့ပြီး ဂိုဏ်းတည်ထောင်သူနှင့်ပင် အစွမ်းချင်း တူနေပြီ ဖြစ်သည်။ ဤလူသစ်ကို အနိုင်ယူပြီး မိမိ၏ တိုးတက်မှုအတွက် အာဟာရအဖြစ် အသုံးချနိုင်မည်ဟု သူ ယုံကြည်သည်။

"မောက်မာလိုက်တာ။"

ထိုစကားမှာ ရိုးရှင်းလှသော်လည်း ကြောက်မက်ဖွယ်ကောင်းသော ချီစွမ်းအင်များ ပါဝင်နေသည်။ လေထုထဲတွင် ရုတ်တရက် မိုးကြိုးပစ်သကဲ့သို့ ပေါက်ကွဲသံများ ထွက်ပေါ်လာပြီး အသံလှိုင်းများမှာ ပြင်းထန်သော ရေလှိုင်းကြီးများကဲ့သို့ လွင့်စင်လာသည်။

"ဂျောက်... ဂျောက်"

ထိုအသံလှိုင်းများ ဖြတ်သန်းသွားသော နေရာတိုင်းတွင် ဟွမ်ချွမ်ဂိုဏ်း၏ ခမ်းနားသော အိမ်များမှာ အက်ကွဲကြောင်းများ ပေါ်လာပြီး ပြိုကျပျက်စီးကုန်သည်။ ကျောက်ခင်းထားသော ကြမ်းပြင်များမှာ ကွာကျလာပြီး စူးချန်ခုန်းဆီသို့ အရှိန်အဟုန်ဖြင့် လွင့်စင်လာသည်။ ရွှမ်းမင်အရှင်၏ အော်သံတစ်ခုတည်းနှင့်ပင် သူ၏ မြင့်မားသော ကျင့်စဉ်အဆင့်ကို သိသာစေသည်။

"သူ့ရဲ့ စွမ်းအင်က ငါ့ထက် အများကြီး ပိုနက်နဲတာပဲ။" စူးချန်ခုန်း စိတ်ထဲမှ အံ့သြသွားသည်။

စူးချန်ခုန်း၏ ဧရာမဝေလငါးကျင့်စဉ်နှင့် လိပ်အသက်ရှူနည်းကျင့်စဉ်မှာ မြင့်မားသော အဆင့်သို့ ရောက်ရှိနေပြီး အတွင်းအားမှာလည်း နက်နဲလှသည်။ သို့သော် ရွှမ်းမင်အရှင်နှင့် ယှဉ်လျှင်မူ သူက တစ်ဆင့်နိမ့်နေဆဲပင်။ သို့သော် ဒါက သဘာဝကျပါသည်။ ရွှယ်အန်းဂိုဏ်း၏ သိုင်းပညာမှာ အခြားသူများ၏ စွမ်းအင်ကို စုပ်ယူ၍ မိမိကိုယ်ကို အားဖြည့်ခြင်းတွင် ကျော်ကြားလှသည်။ လူတိုင်းတွင် ကိုယ်စီအားသာချက်များ ရှိကြရာ ဤအချက်တွင် စူးချန်ခုန်း အားနည်းနေတာ မဆန်းပေ။

"ဝေါင်း..."

ပြင်းထန်သော အသံလှိုင်းများကို ရင်ဆိုင်ရင်း စူးချန်ခုန်းသည် အသက်ကို ပြင်းပြင်းရှူသွင်းလိုက်ပြီးနောက် လည်ချောင်းထဲမှ ဟိန်းသံတစ်ခုကို ထုတ်လွှတ်လိုက်သည်။ တောအုပ်ထဲမှ ကျားတစ်ကောင် ဟိန်းဟောက်လိုက်သကဲ့သို့ အသံမှာ အဆက်မပြတ် ထွက်ပေါ်လာသည်။

"ဂျောက်... ဂျောက်... ဂျောက်"

မျက်စိဖြင့် မြင်နိုင်သော အသံလှိုင်းများမှာ အရှိန်အဟုန်ဖြင့် ပြေးလွှားလာကာ မြေပြင်ကို အက်ကွဲစေပြီး အဆောက်အဦးများကို ပြိုကျစေသည်။

"ဒုန်း"

အသံလှိုင်းနှစ်ခု ထိပ်တိုက်တွေ့ဆုံလိုက်ရာ လေဟာနယ်တစ်ခုလုံး တုန်ခါသွားပြီး မိုးကြိုးပစ်သံကဲ့သို့ ပေါက်ကွဲသံများမှာ ဟွမ်ချွမ်ကျွန်းတစ်ခုလုံးတွင် ပဲ့တင်ထပ်သွားတော့သည်။

"အား... ငါ့ခေါင်း... ငါ့ခေါင်း ကွဲတော့မယ်"

ဟွမ်ချွမ်ဂိုဏ်းအတွင်းရှိ ကျင့်စဉ်နိမ့်သော သိုင်းသမားများမှာ ထိုအသံကို ကြားရသောအခါ နားစည်များ ပြတ်ထွက်မတတ် ခံစားရပြီး နားထဲမှ သွေးများ ထွက်လာကြသည်။ သူတို့၏ ဦးခေါင်းများမှာ ပေါက်ထွက်တော့မည့်အလား ခံစားနေရသည်။

"အဲဒါ... အဲဒါ ရွှမ်းမင်အရှင်နဲ့ ဟိုလူ တိုက်နေကြတာလား။ တကယ်ကို ကြောက်စရာကောင်းတဲ့ ကျင့်စဉ်ပါလား" ဟွမ်ချွမ်ဂိုဏ်းမှ အကြီးအကဲအချို့က ရွှမ်းမင်အရှင်ကို မှတ်မိသွားကြသည်။ သူတို့၏ နှလုံးသားများ တုန်လှုပ်နေကြသည်။ ရွှမ်းမင်အရှင်နှင့် ထိုကျူးကျော်သူတို့ တိုက်ခိုက်မှုမှာ သာမန်လူများ စိတ်ကူးကြည့်၍ပင် မရနိုင်သော အဆင့်တွင် ရှိနေသည်။

"သူ့ရဲ့ ချီစွမ်းအင်က ငါ့ထက် အားနည်းပေမဲ့ ငါနဲ့ ယှဉ်နိုင်နေတာလား... ဒါ နတ်ဘုရားစွမ်းရည်တစ်ပိုင်းရဲ့ ထူးခြားချက်ပဲ။" ရွှမ်းမင်အရှင်က တွေးလိုက်သည်။ အင်အားတစ်စိတ်တစ်ပိုင်းကို ဆယ်ဆမကသော ဖျက်ဆီးအားအဖြစ် ပြောင်းလဲနိုင်စွမ်းမှာ နတ်ဘုရားစွမ်းရည် အတတ်တစ်ပိုင်း၏ အားသာချက်ပင် ဖြစ်သည်။

"ရှုး"

အခန်း (၆၆၀) နတ်ဘုရားစွမ်းရည် တိုက်ပွဲ။ မဟာသိုင်းပညာရှင်များ၏ အဆုံးအဖြတ်တိုက်ပွဲ။ (၃)

ကျောက်ခဲများ ကြေမွပျက်စီးကာ ကောင်းကင်ယံ၌ လွင့်စင်ကုန်သည်။ ထိုဖုန်မှုန့်များ မငြိမ်သက်မီမှာပင် ရွှမ်းမင်အရှင်၏ ရှေ့မှ ဝေဝါးသော အရိပ်တစ်ခုမှာ ရုတ်တရက် ပျောက်ကွယ်သွားလေ၏။ စူးချန်ခုန်းသည် ခဏချင်းပင် ရွှမ်းမင်အရှင်၏ ရှေ့မှောက်သို့ ချက်ချင်း ရောက်လာခြင်း ဖြစ်သည်။

သူ၏ ညာလက်သီးမှာ တိုက်ရိုက် ထိုးနှက်လိုက်ရာ လက်ချောင်းများကြားရှိ လေဟာနယ်တွင် သိသာထင်ရှားသော အက်ကွဲကြောင်းများ ပေါ်ထွက်လာသည်။ ဤလက်သီးချက်၏ နက်နဲမှုမှာ လေဟာပြင်ကိုပင် သက်ရောက်မှု ရှိနေပြီး 'အဆင့်' တစ်ခုရှိသော နတ်ဘုရားစွမ်းရည်တစ်ပိုင်းပင် ဖြစ်သည်။

ရွှမ်းမင်အရှင်ဘက်မှ တုံ့ပြန်ရန် အချိန်မရလိုက်သကဲ့သို့ စူးချန်ခုန်း၏ ပြင်းထန်သော လက်သီးချက်မှာ သူ၏ ရင်ဘတ်တည့်တည့်သို့ ထိမှန်သွားတော့သည်။

"ဂျောက်"

ပေါက်ကွဲသံနှင့်အတူ ရွှမ်းမင်အရှင်၏ ပတ်ဝန်းကျင်ရှိ ဟင်းလင်းပြင်မှာ ဆက်တိုက်ဆိုသလို ပေါက်ကွဲသွားပုံရပြီး မြေပြင်ပေါ်တွင် ထူထဲသော အက်ကွဲကြောင်းများမှာ ရက်စက်စွာ ပျံ့နှံ့သွားသည်။ လက်သီးမှ ထွက်ပေါ်လာသော တုန်ခါမှု စွမ်းအားမှာ အသံလှိုင်းတစ်ခုကဲ့သို့ ပဲ့တင်ထပ်ကာ အရာအားလုံးကို ကြေမွစေပြီး ရွှမ်းမင်အရှင်၏ ခန္ဓာကိုယ်ထဲသို့ ထိုးဖောက်ဝင်ရောက်သွားကာ သူ့ကို ဖုန်မှုန့်များအဖြစ် ပေါက်ကွဲသွားစေရန် ခြိမ်းခြောက်နေသည်။

သို့သော် လူတိုင်းကို အံ့အားသင့်စေသည်မှာ ရွှမ်းမင်အရှင် ရပ်နေသော မြေပြင်မှာ လျှံထွက်လာသော စွမ်းအားများကြောင့် ပျက်စီးသွားသော်လည်း သူကိုယ်တိုင်မှာမူ နတ်ဘုရားစွမ်းရည် ပါဝင်သော စူးချန်ခုန်း၏ လက်သီးချက်ကို တစ်လက်မမျှ မလှုပ်ရှားဘဲ ခံယူထားခြင်း ဖြစ်သည်။ ထိုအံ့သြဖွယ် လက်သီးချက်မှာ အစွမ်းမရှိသကဲ့သို့ပင် ဖြစ်နေသည်။

"ဟင်,,, ငါ့လက်သီးရဲ့ အရှိန်ကို သူ ချေဖျက်လိုက်တာလား"

"ဒီရွှမ်းမင်အရှင်က... နတ်ဘုရားစွမ်းရည်တစ်ပိုင်း ကျင့်ကြံထားတဲ့ မဟာသိုင်းပညာရှင် တစ်ယောက်ပဲ။" စူးချန်ခုန်း၏ နတ်ဘုရားစွမ်းရည် နက်နဲမှု ပါဝင်သော လက်သီးကို ချေဖျက်နိုင်သည်မှာ ရွှမ်းမင်အရှင်သည်လည်း သိုင်းပညာကို နတ်ဘုရားစွမ်းရည်တစ်ပိုင်း အဆင့်အထိ ကျင့်ကြံထားကြောင်း သံသယဖြစ်ဖွယ် မရှိပေ။

အရင်တုန်းက မိမိ၏ ပါရမီဖြင့် သိုင်းပညာကို နတ်ဘုရားစွမ်းရည်တစ်ပိုင်း အဆင့်အထိ ကျင့်ကြံနိုင်သူတိုင်းမှာ နှိုင်းယှဉ်၍မရသော ပါရမီရှင်များအဖြစ် သတ်မှတ်ခံရပြီး သိုင်းဝိဇ္ဇာသူတော်စင်အဆင့်သို့ ရောက်ရှိရန် မျှော်လင့်ချက် ရှိသူများ ဖြစ်ကြသည်။

"မီးတောက်သတ်ဖြတ်ခြင်း လက်ဝါး"

ရွှမ်းမင်အရှင်၏ ညာလက်ဝါးတွင် ချီစွမ်းအင်များ စုစည်းလာပြီး သဘာဝဝိညာဉ်စွမ်းအင် အမြောက်အမြားကို ဆွဲယူကာ သွေးနီရောင် မီးတောက်များအဖြစ် ပြောင်းလဲလိုက်သည်။ ထိုမီးတောက်များမှာ ဝိညာဉ်နှင့် သိစိတ်ပင်လယ်ကိုပါ လောင်ကျွမ်းစေနိုင်သော ပြင်းထန်သည့် အပူရှိန်များ ပြည့်နှက်နေပြီး သူက လက်ဝါးဖြင့် ရိုက်ထုတ်လိုက်သည်။

လာနေသော မီးတောက်များမှာ မီးတောင်ပေါက်ကွဲသကဲ့သို့ တားဆီး၍မရသော အင်အား ရှိပြီး ၎င်းကို တားဆီးဝံ့သူ မည်သူမဆို ပြာအဖြစ် ပြောင်းလဲသွားပေလိမ့်မည်။

"ဒုန်း"

သူ လက်ဝါးကို တွန်းထုတ်လိုက်သည်နှင့် မီးတောက်များ ပေါက်ကွဲသွားပြီး လေဟာနယ်မှာ ပြင်းထန်စွာ တုန်ခါသွားသည်။ ရှေ့ရှိ အဆောက်အဦးများမှာ လွင့်စင်သွားပြီး မီးတောက်များကြားတွင် ပြင်းထန်စွာ လောင်ကျွမ်းကုန်သည်။ ရွှမ်းမင်အရှင်၏ ပတ်ဝန်းကျင် ဆယ်ကိုက်အတွင်းတွင် ဆူပွက်နေသော မီးတောက်များက ဟင်းလင်းပြင်ကို ဝါးမြိုသွားပြီး လေထုကိုယ်တိုင်မှာပင် မီးစွဲလောင်သွားတော့သည်။

ကောင်းကင်နတ်ဆိုး အဖိုးအိုသည် နောက်သို့ ဆုတ်ခွာလိုက်ပြီး အံ့သြသော မျက်နှာထားဖြင့် "တကယ်ကို နက်နဲတဲ့ အတွင်းအားပဲ... ထူးထူးခြားခြား လျှို့ဝှက်ချက်တော့ မဟုတ်ဘူး။ ဒါပေမဲ့ သူပိုင်ဆိုင်ထားတဲ့ ကြီးမားလှတဲ့ ချီစွမ်းအင်တွေရဲ့ ထောက်ပံ့မှုကြောင့် နတ်ဘုရားစွမ်းရည်တစ်ပိုင်းနဲ့ နီးပါးတူတဲ့ ဖျက်ဆီးအား ရှိနေတာပဲ။"

နတ်ဘုရားစွမ်းရည်တစ်ပိုင်း၏ အစွမ်းမှာ ၎င်း၏ နက်နဲမှုတွင် ရှိသည်။ ၎င်းမှာ နတ်ဘုရားစွမ်းရည်၏ အစပျိုးပုံစံဖြစ်ပြီး စွမ်းအား အနည်းငယ်ဖြင့် ဆယ်ဆမကသော သတ်ဖြတ်နိုင်စွမ်းကို ထုတ်ဖော်နိုင်သည်။ သို့သော် ရွှမ်းမင်အရှင်မှာမူ သူ၏ နက်နဲသော အတွင်းအားကိုသာ အားကိုး၍ သာမန်တိုက်ခိုက်မှု တစ်ခုဖြင့်ပင် ဆယ်ဆမကသော စွမ်းအားကို ထုတ်ဖော်နိုင်ခြင်းမှာ အမှန်တကယ် ကြောက်စရာကောင်းလှသည်။ အခြားသူများ၏ အတွင်းအားကို စုပ်ယူနိုင်သော ရွှမ်းမင်အရှင်ကဲ့သို့ ပုဂ္ဂိုလ်အတွက်မူ သူ၏ အတွင်းအား အနက်မှာ သိုင်းဝိဇ္ဇာသူတော်စင် အဆင့်အောက်တွင် ပြိုင်ဘက်ကင်းလှသည်။

ရွှမ်းမင်အရှင်၏ အံ့သြဖွယ် လက်ဝါးရိုက်ချက်မှာ လွဲချော်သွားသည်။ "နတ်သမင် ကောင်းကင်နင်းခြေလှမ်း" ၏ လျင်မြန်မှုကို အသုံးပြု၍ စူးချန်ခုန်းသည် လွယ်ကူစွာ ရှောင်တိမ်းနိုင်ခဲ့သည်။

ဝူချင်းရှီ၊ ဝက်ဝံရိုင်း မြေပြင်တုန်ခါခြင်း။

တောက်လောင်နေသော မီးတောက်များကြားတွင် သဘာဝဝိညာဉ်စွမ်းအင်များမှာ ပြင်းထန်စွာ လှုပ်ရှားလာပြီး ပေခုနှစ်ဆယ် ရှစ်ဆယ်ခန့် မြင့်သော ဧရာမဝက်ဝံကြီး တစ်ကောင်မှာ မီးတောက်များကြားမှ ပေါ်ထွက်လာသည်။ ၎င်းသည် မတ်တတ်ရပ်ကာ ဝက်ဝံလက်ဝါးကြီးများဖြင့် ရွှမ်းမင်အရှင်ကို အမြင့်မှနေ၍ ပြင်းထန်စွာ ရိုက်ချလိုက်တော့သည်။

"ဂျောက် ဂျောက် ဂျောက်"

လက်ဝါး မထိမိခင်မှာပင် ကြီးမားသော ဖိအားကြောင့် ရွှမ်းမင်အရှင် ရပ်နေသော မြေပြင်မှာ ပြင်းထန်စွာ ပြိုကျသွားပြီး လေထုမှာလည်း ဆက်တိုက်ဆိုသလို ပေါက်ကွဲသံများ ထွက်ပေါ်လာသည်။

"လာစမ်း"

ရွှမ်းမင်အရှင်သည် ဆံပင်များ လွင့်ပျံနေလျက် ရှောင်တိမ်းခြင်း မပြုဘဲ "ကောင်းကင်ဘုရင် မျှော်စင်ကို ထိန်းခြင်း" ဟူသော ကိုယ်ဟန်ဖြင့် တုံ့ပြန်လိုက်သည်။ သူ၏ လက်ဝါးများကို အပေါ်သို့ မြှောက်ကာ တွန်းတင်လိုက်ရာ တောက်လောင်နေသော မီးတောက်များမှာ ဝဲကယက်သဖွယ် လည်ပတ်လျက် ပူပြင်းလှသော နေလုံးကြီးတစ်ခုသဖွယ် ဖြစ်ပေါ်လာသည်။

"ဒုန်း"

မမျှတသော အင်အားနှစ်ခု ထိပ်တိုက်တွေ့ဆုံချိန်တွင် ပူပြင်းသော မီးတောက်များမှာ ကောင်းကင်ယံသို့ လွင့်တက်သွားပြီး ကောင်းကင်တစ်ခုလုံးကို ဖုံးလွှမ်းသွားသည်။ လေထုထဲရှိ ရေငွေ့များမှာ အကုန်အစင် ခမ်းခြောက်သွားပြီး မြေပြင်မှာ တုန်ခါကာ ချိုင့်ခွက်ကြီး ဖြစ်သွားတော့သည်။ ရိုက်ခတ်မှုလှိုင်းများမှာ ပတ်ဝန်းကျင် ကိုက်တစ်ရာအတွင်းရှိ အရာအားလုံးကို ဖျက်ဆီးပစ်လိုက်သည်။

အိမ်တန်းများ ပျက်စီးသွားပြီး ကျောက်တုံးများနှင့် သစ်ပင်များမှာ ဖုန်မှုန့်အဖြစ် ပေါက်ကွဲသွားသည်။ ဟွမ်ချွမ်ဂိုဏ်းတစ်ခုလုံးတွင် ငလျင်လှုပ်သကဲ့သို့ တုန်ခါမှုများကို ခံစားလိုက်ရသည်။

"ဒါ... ဒါ သိုင်းဝိဇ္ဇာသူတော်စင်တွေ တိုက်နေကြတာလား"

ဤကြောက်မက်ဖွယ် မြင်ကွင်းကို မြင်လိုက်ရသော ဟွမ်ချွမ်ဂိုဏ်း အကြီးအကဲများမှာ ထိတ်လန့်တုန်လှုပ်နေကြပြီး သူတို့၏ နှလုံးခုန်သံများပင် ရပ်တန့်မတတ် ဖြစ်နေကြသည်။ မိစ္ဆာလောက၏ နာမည်ကြီး ပညာရှင် ရွှမ်းမင်အရှင်နှင့် သူတို့ဂိုဏ်းချုပ်ကို သတ်သွားသော အနက်ရောင်ဝတ်စုံနှင့် လူငယ်လေးတို့၏ တိုက်ပွဲမှာ ဒဏ္ဍာရီလာ သိုင်းဝိဇ္ဇာသူတော်စင် နှစ်ပါး တိုက်ခိုက်နေကြသကဲ့သို့ပင်။ ဟွမ်ကျင်ရှ သေဆုံးမှုအတွက် သူတို့ကို သွားရောက် မတိုက်ခိုက်ခဲ့မိသည်မှာ ကံကောင်းသည်ဟု သူတို့ ခံစားလိုက်ရသည်။ မဟုတ်ပါက သေမည့်သူမှာ သူတို့သာ ဖြစ်ပေလိမ့်မည်။

"ဒီ တာ့ဝူဖုန်းဆိုတဲ့လူက ဘယ်ကလဲဟ။ သူ သုံးနေတဲ့ သိုင်းပညာက ငါသိတဲ့ ပြိုင်ဘက်ကင်း ကျင့်စဉ်တွေထဲမှာ တစ်ခုမှ မပါဘူး..."

ဖရိုဖရဲ ဖြစ်နေသော ပတ်ဝန်းကျင်ကြားတွင် ကောင်းကင်နတ်ဆိုး အဖိုးအိုမှာ မတ်တတ်ရပ်လျက် စဉ်းစားနေသည်။ နတ်ဘုရားစွမ်းရည်တစ်ပိုင်း ပိုင်ဆိုင်ထားသော စူးချန်ခုန်းသည် ပြိုင်ဘက်ကင်း ကျင့်စဉ်များကို အထွက်အထိပ်အဆင့်အထိ ကျင့်ကြံထားတာ ဖြစ်ရမည်။ သက်တမ်း အလွန်ရှည်ကြာပြီး ဗဟုသုတ ကြွယ်ဝသော ကောင်းကင်နတ်ဆိုး အဖိုးအိုပင်လျှင် စူးချန်ခုန်း၏ အစွမ်းမှာ မည်သည့်ကျင့်စဉ်မှ ဖြစ်ကြောင်း မသိနိုင်ဘဲ ဖြစ်နေသည်။

ကောင်းကင်နတ်ဆိုး အဖိုးအိုအနေဖြင့် စူးချန်ခုန်း အသုံးပြုနေသည်မှာ မည်သည့် ပြိုင်ဘက်ကင်းကျင့်စဉ်မှ မဟုတ်ဘဲ လူတိုင်းသိသော သာမန် "ကျန်းမာရေးလက်သီး" သာ ဖြစ်ကြောင်း သိနိုင်မည် မဟုတ်ပေ။

"ရွှမ်းမင်အရှင်ရဲ့ ခန္ဓာကိုယ်က တွင်းနက်ကြီးတစ်ခုလိုပဲ။ သူ့အပေါ် ရောက်လာတဲ့ ဘယ်တိုက်ခိုက်မှုကိုမဆို ဝါးမြိုပြီး ချေဖျက်နိုင်စွမ်း ရှိတယ်..."

ရွှမ်းမင်အရှင်နှင့် တိုက်ခိုက်ရင်း စူးချန်ခုန်း၏ စိတ်မှာလည်း လေးလံနေသည်။ ဤသည်မှာ စူးချန်ခုန်းအတွက် နတ်ဘုရားစွမ်းရည်တစ်ပိုင်း အဆင့်သို့ ရောက်ရှိထားသော မဟာသိုင်းပညာရှင်တစ်ဦးနှင့် ပထမဆုံးအကြိမ် ရင်ဆိုင်ရခြင်း ဖြစ်သည်။ ရွှမ်းမင်အရှင်မှာ အမှန်တကယ်ပင် လျှော့တွက်၍မရသော ရန်သူပင်။

မျောက်ဝံနတ်ဆိုး လေဟာပြင် ဖမ်းဆုပ်ခြင်း။

စူးချန်ခုန်း၏ နောက်ဘက်မှ ဧရာမဝက်ဝံကြီးမှာ အနက်ရောင် မျောက်ဝံကြီးအဖြစ် ပြောင်းလဲသွားသည်။ ၎င်း၏ လက်မောင်းများကို ဖိသိပ်လိုက်ရာ ရွှမ်းမင်အရှင်၏ ပတ်ဝန်းကျင်ရှိ လေဟာပြင်မှာ စုစည်းကာ ဖိသိပ်ခံလိုက်ရသည်။

"ဝေါင်း..."

ကိုက်ရာချီရှိသော သဘာဝဝိညာဉ်စွမ်းအင်များမှာ စူးချန်ခုန်း၏ အမိန့်အရ လှုပ်ရှားလာသည်။ သူ၏ ညာလက်သီးတွင် "ကျားဖြူဟိန်းသံဖြင့် သတ်ဖြတ်ခြင်း" အသံ ပါဝင်နေပြီး ကောင်းကင်နှင့် မြေပြင်ကို တုန်ခါစေလျက် ဟင်းလင်းပြင်ကို ဖောက်ထွက်လာသော ကျားရဲတစ်ကောင်ကဲ့သို့ ပိတ်မိနေသော ရွှမ်းမင်အရှင်၏ ရင်ဘတ်ကို ပြင်းထန်စွာ ထိုးနှက်လိုက်တော့သည်။

"ဝုန်း"

ပေါက်ကွဲသံနှင့်အတူ ရွှမ်းမင်အရှင်သည် အမြောက်ကျည်ဆန်တစ်ခုကဲ့သို့ လွင့်စင်သွားပြီး နံရံများကို တစ်ခုပြီးတစ်ခု တိုးဝင်ကာ ဖောက်ထွက်သွားသည်။ သူသည် ကိုက်တစ်ရာခန့်အထိ လွင့်ထွက်သွားပြီး ဟွမ်ချွမ်ကျွန်းအပြင်ဘက် ပင်လယ်ထဲသို့ ကျသွားကာ ဆိပ်ကပ်ထားသော သစ်သားလှေကိုပင် အစအနများ ဖြစ်သွားစေသည်။

သို့သော် နောက်တစ်စက္ကန့်တွင် ရွှမ်းမင်အရှင်သည် ပင်လယ်ထဲမှ ခုန်ထွက်လာပြီး ရေမျက်နှာပြင်ပေါ်တွင် ရပ်လိုက်သည်။ လှုပ်ခတ်နေသော ရေလှိုင်းများမှာ ချက်ချင်းပင် တည်ငြိမ်သွားပြီး မှန်သားပြင်ကဲ့သို့ ချောမွေ့သွားတော့သည်။

ရွှမ်းမင်အရှင်၏ မျက်နှာမှာ အေးစက်သော သတ်ဖြတ်လိုစိတ်များဖြင့် ပြည့်နှက်နေပြီး စူးချန်ခုန်းကို စိုက်ကြည့်ကာ "မင်းရဲ့ သိုင်းပညာတွေက အစုံအလင်ရှိပြီး ကိစ္စတော်တော်များများကို ဖြေရှင်းနိုင်တယ်... ဒါပေမဲ့ အဲဒါတွေက အရေအတွက်ပဲ ရှိပြီး တကယ့် အရည်အချင်း မရှိဘူး။ အဲဒီ စွမ်းအားတွေက ငါ့ရဲ့ ကျင့်စဉ်ကို ဖောက်ထွက်ဖို့ မလုံလောက်ဘူး။"

သူ၏ အသံမှာ တောင်ပြိုသံ၊ လှိုင်းကြီးသံများကဲ့သို့ လေထုထဲတွင် ပဲ့တင်ထပ်သွားသည်။

ရွှမ်းမင်အရှင် ပြောတာ အမှန်ပင် ဖြစ်သည်။ စူးချန်ခုန်း၏ ဝူချင်းရှီကျင့်စဉ်မှ အကွက်ငါးကွက်မှာ တစ်ခုချင်းစီ၌ အားသာချက်များ ရှိကြသော်လည်း နတ်ဘုရားစွမ်းရည်တစ်ပိုင်း အဆင့်တွင်မူ ပြိုင်ဘက်ကို အပြတ်အသတ် ဖိနှိပ်နိုင်သော စွမ်းအားမျိုး မရှိသေးပေ။ အရာအားလုံး တတ်မြောက်နေခြင်းမှာ တစ်ခါတစ်ရံတွင် အလယ်အလတ်အဆင့်မှာပင် ရှိနေခြင်းကို ဆိုလိုသည်။

"တကယ့် နတ်ဘုရားအတတ်တပိုင်းစွမ်းရည်ဆိုတာ ဘာလဲဆိုတာ ငါ မင်းကို ပြမယ်။"

ရွှမ်းမင်အရှင်သည် ပြင်းထန်စွာ ဟိန်းဟောက်လိုက်ပြီး သူ၏ ဝမ်းဗိုက်ထဲမှ အနက်ရောင် ဆေးလုံးတစ်လုံး ထွက်ပေါ်လာသည်။ ၎င်းမှာ လက်မထိပ်ခန့်သာ ရှိသော်လည်း နက်ရှိုင်းသော ပင်လယ်ကြီးကဲ့သို့ ကြီးမားလှသော ခံစားချက်ကို ပေးစွမ်းနေသည်။ သူ၏ ခြေထောက်အောက်ရှိ ရေမျက်နှာပြင်မှာလည်း အလေးချိန် တန်ချိန်သောင်းချီဖြင့် ဖိနှိပ်ခံထားရသကဲ့သို့ အောက်သို့ ချိုင့်ဝင်သွားလေတော့သည်။