ချင်းဟွာ၏ မသေမျိုးရာထူး

"မင်း အခုနားသင့်ပြီ၊ကျန်တာကို ငါ့အတွက်ထားလိုက်ပါ"

ကျစ်ယန်က သူ၏ဖခင်ချန်ထားခဲ့သော မှတ်စုများကိုထုတ်ယူကာရှေ့ဆက်ရမည့်လမ်းကို အလေးအနက်ထား၍ စတင်လေ့လာလိုက်၏။ အကယ်၍ ဤလမ်းကြောင်းသာအောင်မြင်သွားပါက ဟုန်ကျယ်မှ ကျန်ရှိနေသောသူများသည်လည်း ဤအတိုင်းလိုက်လုပ်နိုင်ပါလိမ့်မည်။

အခြားသူများကို ဘေးဖယ်ထားလျှင်ပင် တောင်ပိုင်းဟုန်မှ ဂိုဏ်းချုပ်အသီးသီးက မသေမျိုးမှတ်တမ်းတွင် နေရာတစ်နေရာရရန်ယှဉ်ပြိုင်နိုင်စွမ်းရှိကြသည်ကို နားလည်ထားရမည်။

မည်သူကမျှတစ်ထောင့်တစ်နေရာတွင်သာ ချောင်ပိတ်ခံနေလိုမည် မဟုတ်ပေ။

ဤ ကောင်းကင်ဘုံနယ်ပယ်မှ ထိပ်သီးပုဂ္ဂိုလ်များအပြင် ဂိုဏ်းမှတပည့်များကလည်း လုံလောက်သောအရည်အချင်းရှိပါက အဓိကဂိုဏ်းကြီးသုံးခုအနက်မှ တစ်ခုခုသို့ဝင်ရောက်ခွင့်ရရှိကာ အမြင့်မြတ်ဆုံးသော ကျင့်ကြံခြင်းနည်းစနစ်များကို သင်ယူနိုင်မည့်အခွင့်အရေးရှိကြ၏။

ဥပမာအားဖြင့် ရွှမ်ချင်းဆိုလျှင်... ခန္ဓာကိုယ်ကို ဆုံးရှုံးလိုက်ရခြင်းက ဟုန်ကျယ်တွင်ပြဿနာကြီးတစ်ခုဟုယူဆရသော်လည်း အပြင်ဘက်ရှိ မသေမျိုးများကြားတွင်မူ ရုပ်ခန္ဓာကို ပြန်လည်တည်ဆောက်ခြင်းကဲ့သို့သော စွမ်းရည်များမှာ ရှားပါးလှသည်မဟုတ်ပေ။

သူ၏အံ့မခန်း ပါရမီများအပြင် အဓိကအားဖြင့် သူ၏ဉာဏ်ရည်ဉာဏ်သွေးကြောင့်သာ သူက နိယာမတစ်သောင်းကို ကျွမ်းကျင်ပိုင်နိုင်ခဲ့ခြင်းဖြစ်သည်။

အပြင်ဘက်သို့ အနည်းငယ်မျှထွက်ခွာသွားရုံဖြင့် အခွင့်အရေးတစ်ရပ်ကို ရရှိနိုင်ပေလိမ့်မည်။

မသေမျိုးတစ်ပါးနှင့် ဘိုးဘေးတစ်ပါးဖြစ်လာရန်ဆိုသည်မှာ စိတ်ကူးယဉ်မျှော်လင့်ချက်တစ်ခု မဟုတ်တော့ပေ။

ယခုအခါတွင် ကျင့်ကြံသူအများစုက သွေးရောင်မက်မွန်ပန်းများကို ကိုယ်တိုင်မျက်မြင်တွေ့ရှိခဲ့ကြပြီး မြောက်ပိုင်းဟုန်မှ သက်ရှိများ၏ငိုကြွေးသံများကို ကြားခဲ့ရသောကြောင့် ဟုန်ကျယ်က တစ်ဖန်ပြန်၍ဖရိုဖရဲဖြစ်လာရန် ခဲယဉ်းသွားပြီဖြစ်သည်။

အနည်းဆုံး ဤမျိုးဆက်မကွယ်လွန်သွားခင်အထိ ဟုန်ကျယ်ရှိသက်ရှိအားလုံးက ဟုန်ကျယ်၏အရှင်သခင်ကို ပြစ်မှားမိပါက ကြုံတွေ့ရမည့် ကြောက်မက်ဖွယ်အကျိုးဆက်များကို သိရှိသွားကြပြီဖြစ်သည်။

ဂိုဏ်းချုပ်ရှန်းက အမှန်တကယ်ပင် သာမန်လူမဟုတ်ပေ။ အရှေ့နဂါးနန်းတော်တစ်ခါမှပင် မစဉ်းစားဖူးသည့် နည်းလမ်းမျိုးဖြင့် သူကဟုန်ကျယ်အား ငြိမ်းချမ်းရေးယူဆောင်လာပေးနိုင်ခဲ့သည်။

ကျန်သည့်အရာများကိုမူ သူကိုယ်တိုင်သာ ဆက်လက်လုပ်ဆောင်ရတော့မည်။

"ဟူး..."

ကျစ်ယန်၏အကြည့်များမှာ ပိုမို၍ပြတ်သားလာခဲ့သည်။ သူက ကိုယ်ကျိုးရှာလိုသည့်ရည်ရွယ်ချက်များလုံးဝမရှိသည်တော့ မဟုတ်ပေ။

သူ၏ကိုယ်ပိုင်အင်အား တစ်ခုတည်းကိုသာ အားကိုးနေမည်ဆိုပါက ထိုလူယုတ်မာလက်ထဲမှ ဖခင်ဖြစ်သူကို ကယ်တင်ရန်အလွန်ခက်ခဲလိမ့်မည်ကို သူသိနေခဲ့လေ၏။

ဟုန်ကျယ်တွင်ရှိသော ပါရမီထူးချွန်သူ နှင့် ခိုင်မာသောစိတ်ဓာတ်ရှိသူများကို နတ်ဘုရားနယ်မြေသို့ ခေါ်ဆောင်ကာ၊ဩဇာရှိသူများနှင့် အခွင့်အလမ်းများစွာကိုထိတွေ့စေပြီး လူအများ၏အင်အားကို စုစည်းနိုင်မှသာ မျှော်လင့်ချက် ရောင်ခြည်လေးတစ်ခု ရှိလာနိုင်ပါလိမ့်မည်။

သူ၏အပိုင်းမှာ ဖခင်ဖြစ်သူ ချန်ရစ်ခဲ့သော အဆက်အသွယ်များကိုအသုံးပြု၍ ဤလူများ ယာယီနေထိုင်ရန် နေရာတစ်ခုဖန်တီးပေးရေးပင်။

ထိုအချိန်ရောက်လျှင် မိုး‌နှင့်မြေနယ်ပယ်ကို အသာထား၊ မည်သည့်ကျင့်ကြံခြင်းမျှမရှိသော သေမျိုးများပင်လျှင် သူတို့ဆန္ဒရှိပါက နတ်ဘုရားနယ်မြေသို့ လာရောက်လည်ပတ်နိုင်ပါလိမ့်မည်။

...

လူသားဧကရာဇ်က နတ်ဘုရားနယ်မြေကို အုပ်စိုးထားပါသည်။

သို့သော် နတ်ဘုရားနယ်မြေ၏အထက်တွင်မူ ကောင်းကင်ယံရှိကြယ်များကဲ့သို့ အဆုံးအစမရှိသော မသေမျိုးခုံရုံးရှိနေပြီး သေမျိုးလောကကို လင်းလက်တောက်ပနေစေ၏။

ထူထပ်နေသောတိမ်တိုက်ဖြူဖြူများကြားတွင် ဧရာမကောင်းကင်တံခါးကြီးက ပေါ်တစ်လှည့်ပျောက်တစ်လှည့်ဖြင့် ကြီးမားခမ်းနားစွာတည်ရှိနေပါသည်။

ကောင်းကင်စစ်သည်တော်နှစ်ပါး၏လမ်းပြမှုဖြင့် မြင့်မားလှသော ရွှေရောင်ခန္ဓာဓမ္မကိုယ်ထည်က တိမ်တိုက်များထဲသို့ လှမ်းဝင်သွားခဲ့၏။

မြင့်မား၍ခမ်းနားထည်ဝါလှသော မသေမျိုးခုံရုံးအတွင်း၌သတင်းကြိုတင်ရရှိထားသော မသေမျိုးအရာရှိတစ်ဦးက စားပွဲနောက်မှဖြည်းညှင်းစွာ ထရပ်လိုက်ပြီး ရွှေရောင်ခန္ဓာကိုယ်ကို ပြုံးပြကာ "မိတ်ဆွေမသေမျိုး... ကျေးဇူးပြုပြီး ထိုင်ပါဦး" ဟု ပြောလိုက်သည်။

အခက်အခဲများစွာဖြင့် ရယူထားခဲ့ရသော ထောက်ခံစာများကို ကိုင်ဆောင်ထားသည့် ပတ်ဝန်းကျင်ရှိ သေမျိုးကျင့်ကြံသူများက အံ့ဩတကြီးဖြင့်ခေါင်းမော့ကြည့်လိုက်ကြ၏။

ဤကဲ့သို့ မြင့်မြတ်ပြီးမောက်မာသော မသေမျိုးအရာရှိများ၏မျက်နှာပေါ်တွင် ယခုလို နူးညံ့သိမ်မွေ့သောအပြုံးမျိုးကို သူတို့ တစ်ခါမှမမြင်ဖူးခဲ့ကြပေ။

မသေမျိုးအရာရှိက ရွှေနှင့် ကျောက်စိမ်းများဖြင့် အလှဆင်ထားပြီး လွန်စွာခမ်းနားလှသော ဧရာမ ထိုင်ခုံကြီးတစ်ခုကို ယူဆောင်လာစေခဲ့၏။

အစစ်အမှန် နတ်ဘုရားဂိုဏ်းက အဓိကဂိုဏ်းကြီးသုံးခုအနက်မှ တစ်ခုဖြစ်ပြီး ၎င်း၏တပည့်များထဲတွင် မိုးနှင့် မြေစတင်ဖြစ်ပေါ်ချိန်ကတည်းက မွေးဖွားလာခဲ့ကြသောနတ်ဘုရားများနှင့် နတ်ဆိုးများ ပါဝင်ကာ ၎င်းတို့အများစုမှာ ရွှေရောင်ခန္ဓာကိုယ်ထက်ပင် ပိုမိုမြင့်မားကြသည်။

ထို့ကြောင့် သူက ဤကဲ့သို့ကြီးမားသည့်အရာများနှင့် အသားကျနေပြီဖြစ်သည်။

"..."

ထိုအချိန်တွင် မသေမျိုးအရာရှိက သေမျိုးကျင့်ကြံသူများကို အသံတိတ်အကဲခတ်ကြည့်လိုက်သော်လည်း သူ၏ကိုယ်ပိုင်အပြုအမူတွင် မသင့်တော်သည်များ ဘာတစ်ခုမှမတွေ့ရချေ။

သတ်ဖြတ်မှုများနှင့် ကြိုးကိုင်မှုများမှတစ်ဆင့် အဆင့်တက်လာကြသော ဤတောရိုင်းကျင့်ကြံသူများက ခက်ခဲကြမ်းတမ်းသောကျင့်ကြံခြင်းများနှင့် မသေမျိုးခုံရုံးနှင့် အဆက်အသွယ်များမှတစ်ဆင့်နေရာရလာသော သူ့ရှေ့မှ ပုဂ္ဂိုလ်နှင့် မယှဉ်သာပေ။

အခြားသူများဆိုလျှင် ဆိုင်းငံ့ခံရနိုင်သော်လည်း ကမ္မကုသိုလ်မသေမျိုး တစ်ပါးကိုတော့ အခက်တွေ့အောင်လုပ်နေရန်မလိုပေ။

"ကျေးဇူးတင်ပါတယ်။"

ချင်းဟွာသခင်မ အနည်းငယ်အနေရခက်စွာဖြင့် ဝင်ထိုင်လိုက်၏။

ထိုအချိန်တွင် "နေရာလွတ်မရှိဘူး"ဟူသော စကားကို ကြားရလွန်း၍စိတ်ပျက်နေကြသော ထိုသေမျိုးကျင့်ကြံသူများက ယခုအခါစားပွဲကို လောဘတကြီး စိုက်ကြည့်လာကြသည်။

သူတို့၏မျက်လုံးများက မသေမျိုးအရာရှိ ထုတ်ယူလိုက်သော ကျောက်စိမ်းဖြူကြံ့တံဆိပ်တုံး အပေါ်တွင် စူးစိုက်နေကြ၏။

"ထွက်သွားကြစမ်း"

မျက်မှောင်ကြုတ်ကာ အမိန့်ပေးလိုက်သည်နှင့် ကောင်းကင်စစ်သည်တော်များ ရှေ့ထွက်လာပြီး အနည်းဆုံး ကောင်းကင်ဘုံနယ်ပယ် နှင့် တချို့သော တာအိုနယ်ပယ်အဆင့်ရှိ ကျင့်ကြံသူအုပ်စုကြီးကို အပြင်သို့ တွန်းထုတ်လိုက်ကြ၏။

"ယဉ်ကျေးမှုမရှိတဲ့ အရိုင်းအစိုင်းတွေ။"

သူက တိုးတိုးလေးရေရွတ်လိုက်ပြီးနောက် အပြုံးတစ်ခုသို့ချက်ချင်းပြောင်းလဲကာ ချင်းဟွာသခင်မကို အနည်းငယ် စိတ်ပျက်လက်ပျက်ဟန်ဖြင့် ခေါင်းခါပြရင်း "ဒီလိုအရာကိုမြင်တွေ့ရစေတဲ့အတွက် တောင်းပန်ပါတယ်။"

ထိုသို့ပြောပြီးနောက် သူသည် ကျောက်စိမ်းဖြူကြံ့တံဆိပ်တုံးကို သူမဆီသို့ ညင်သာစွာတွန်းပေးလိုက်သည်။

"ခင်ဗျား တော်တော်လေးကံကောင်းတယ်။ ပုံမှန်ဆိုရင် ခင်ဗျားကိုမသေမျိုးမှတ်တမ်းမှာ အဆင့်ခုနစ်အဖြစ် သတ်မှတ်ရမှာ၊ဒါပေမဲ့ နေရာလွတ်မရှိတဲ့အတွက် ဒီအဆင့်ခုနစ်တံဆိပ်တုံးကပဲ လောလောဆယ်ခင်ဗျားအတွက်ဖြစ်လိမ့်မယ်။ ကြည့်ကြည့်ပါဦး..."

"ဒီရာထူးက ဂုဏ်သိက္ခာရှိပုံမပေါ်ပေမယ့် တော်တော်လေး အေးချမ်းပါတယ်။ တကယ်လို့ ခင်ဗျားမကြိုက်ဘူးဆိုရင်တော့ ပိုပြီးသင့်တော်တဲ့အခြားတစ်ခုအတွက် နည်းနည်းလောက်ထပ်စောင့်လို့ရပါတယ်။ အဆင်ပြေတာနဲ့ ချက်ချင်း စီစဉ်ပေးပါ့မယ်။"

၎င်းကိုကြားသောအခါ ချင်းဟွာသခင်မက ခဏတာတုံ့ဆိုင်းသွားပြီးနောက် ကျောက်စိမ်းဖြူကြံ့တံဆိပ်တုံးကို သူမလက်ထဲသို့ယူလိုက်၏။

ချက်ချင်းပင် ရွှေရောင်စာသားကြောင်းများသည် သူမ၏စိတ်ထဲသို့ စီးဝင်လာခဲ့သည်။

"အင်ပါရီယာမြင်းစောင်းအရန်ခန်းမ၏ကြီးကြပ်ရေးမှူး၊ မြင်းများ၏ကံကြမ္မာ "

"တောင်တံခါးမသေမျိုးရထားလုံးအား အာဏာပိုင်ခွင့်။"

"သူမ၏ကွပ်ကဲမှုအောက်တွင် အဆင့်ခုနစ် ဒု-ကြီးကြပ်ရေးမှူးတစ်ဦး၊ အဆင့်ရှစ် လက်ထောက်-ကြီးကြပ်ရေးမှူး တစ်ဦး၊ အဆင့်ရှစ် ဒု-မော်ကွန်း တစ်ဦး နှင့် အဆင့်ကိုး စစ်သည်တော်အချို့ရှိသည်။"

ချင်းဟွာသခင်မက သူမအတွက်အချိန်မရှိတော့ကြောင်းသိထားပြီး အခြားသူများကဲ့သို့ ရာထူးတစ်ခုအတွက် အချိန်ဆွဲကာစောင့်မနေနိုင်ပေ။

နှစ်သောင်းနှင့်ချီ၍ စောင့်ဆိုင်းရမည်ဆိုလျှင် အလွန်နောက်ကျသွားပေလိမ့်မည်။

ထို့အပြင် သူမက ဤမသေမျိုးရာထူးများနှင့် မရင်းနှီးသဖြင့် အနည်းငယ်မျှမတုံ့ဆိုင်းတော့ဘဲ ခေါင်းကို ညင်သာစွာငြိမ့်ပြလိုက်၏။

"ဒါဆို ကျွန်တော်အခုပဲမှတ်ပုံတင်ပေးပါ့မယ်။"

မသေမျိုးအရာရှိက မှတ်တမ်းစာအုပ်တစ်အုပ်ကို ထုတ်ယူကာရွှေရောင်မင်ထဲသို့စုတ်တံကို နှစ်လိုက်ပြီး တစ်ချက်ဆွဲခြစ်လိုက်သည်နှင့်...

ကျောက်စိမ်းဖြူကြံ့တံဆိပ်တုံး တောက်ပလာပြီး ခမ်းနားထည်ဝါသော ရွှေရောင်ခန္ဓာကိုယ်နှင့် အတင်းအကျပ်ပင် ချိတ်ဆက်သွားခဲ့၏။

"အဆင့်ခုနစ်တံဆိပ်တုံးဆိုတာက တာအိုပေါင်းစည်းခြင်းနယ်ပယ် ကျင့်ကြံသူတွေထက်အများကြီးသာလွန်ပြီး အစစ်အမှန် မသေမျိုးတစ်ပါးရဲ့စွမ်းအင်ကို ပိုင်ဆိုင်ထားတာပါ။အဲဒါနဲ့ ရင်းနှီးအောင်လုပ်ထားပါ မြင်းတွေရဲ့ကံကြမ္မာ၊ ပြီးတော့ပြဿနာမဖြစ်အောင်ကြိုးစားပါ။"

မသေမျိုးအရာရှိက ကြင်နာစွာသတိပေးပြီးနောက် မှတ်တမ်းစာအုပ်ကို ပိတ်လိုက်ကာ တစ်စုံတစ်ယောက်ကို ချင်းဟွာသခင်မအား အပြင်သို့ လိုက်ပို့စေခဲ့၏။

ထို့နောက် နန်းဆောင်အတွင်းသို့ပြန်လည်ဝင်ရောက်လာကြသော ကျင့်ကြံသူအုပ်စုကိုကြည့်ရင်း သူ၏အပြုံးမှာ လျင်မြန်စွာမှေးမှိန်သွားကာ ဂရုမစိုက်သောအသွင်သို့ ပြောင်းလဲသွားတော့သည်။