အခန်း (၁၁၇-၁၁၈)

စူပါ-ဖမ်း(SFS)

SFS 117

အခန်း ၁၁၇ ။ မုန်ညင်းဆီအတုများကြောင့် ပေါ်ထွက်လာသော သံသယများ

ဝူယင်းက သူတို့နှစ်ဦးကို ကြည့်နေသည့်အကြည့်မှာ အလွန်ထူးဆန်းလှသည်။

လင်းယန် ခံစားရသည်မှာ သူမသည် သူတို့နှစ်ဦးကို ဓာတ်ခွဲခန်းထဲမှ စမ်းသပ်ခံ ကြွက်ဖြူလေးများကို ကြည့်နေသကဲ့သို့ပင် ဖြစ်၏။ သူမသည် ဓာတ်ခွဲခန်းထဲတွင် အချိန်အတော်ကြာ နစ်မွန်းနေခဲ့ပြီး တစ်ခါမျှ အချစ်မရှိခဲ့ဖူးခြင်းကြောင့်လည်း ဖြစ်ပေလိမ့်မည်။ အမျိုးသားနှင့် အမျိုးသမီးကြားရှိ ကိစ္စရပ်များအပေါ် သူမတွင် စပ်စုလိုသည့် စိတ်ဆန္ဒသာ အပြည့်ရှိနေသည်။

ရှက်ရွံ့ခြင်းဆိုသည့် စိတ်ခံစားချက်မျိုးမှာ ဝူယင်းထံတွင် တစ်ခါမျှ ပေါ်မလာခဲ့ဖူးပေ။ သူမ၏အကြည့်ထဲတွင် သူတို့နှစ်ဦးကို ဆက်လက် လုပ်ဆောင်ရန် အားပေးတိုက်တွန်းနေသည့် အရိပ်အယောင်များပင် ပါဝင်နေသေးသည်။ 'ငါ့ရဲ့ စမ်းသပ်ခံတွေအဖြစ် မြန်မြန်လုပ်ကြစမ်းပါ' ဟုပင် ပြောတော့မည့် အတိုင်းပင်။ ဤကဲ့သို့သော ကိစ္စမျိုးကို မည်သို့လျှင် စမ်းသပ်မှုတစ်ခုအဖြစ် သဘောထားနိုင်သည်ကိုတော့ မသိပါချေ။

'တကယ်လို့သာ သူမရှေ့မှာ အကုန်ဖွင့်ဟပြမိရင်၊ မှတ်တမ်းမှတ်ရာတွေ ဘာတွေပါ လုပ်နေဦးမလား မသိဘူး' ဟု လင်းယန် တွေးကြည့်ရုံနှင့်ပင် ကြက်သီးထသွားမိသည်။

သေချာသည်မှာ ဝူယင်းသည် ဓာတ်ခွဲခန်းထဲတွင်မူ လူအများ အားကျရသော တည်ရှိမှုမျိုးဖြစ်သည်။ သို့သော် လက်တွေ့ဘဝတွင်မူ နေထိုင်မှုရော ခံစားချက်ပိုင်းမှာပါ ကြီးမားသော ပြဿနာများ ရှိနေသည်။ ပြဿနာတစ်ခုကို ကြည့်မြင်သည့် အမြင်မှာပင် သာမန်လူများနှင့် မတူပါချေ။ ထို့ကြောင့် သူမအတွက် အနာဂတ်လက်တွဲဖော် ရှာဖွေရန်မှာ အလွန် ခက်ခဲလှပေလိမ့်မည်။

သူမက အလွန် ထူးချွန်လွန်းလှသဖြင့် ထိုနယ်ပယ်တွင် သူမကို ကျော်လွန်နိုင်သူများမှာ မြေးရတော့မည့် ပါမောက္ခအိုကြီးများသာ ရှိတော့သည်။ ထိုအထဲတွင် လင်းယန်မှာ သူမ တစ်ဦးတည်းသော လေးစားရသူ ဖြစ်၏။ ချင်းရှန်းရွာ၏ နွမ်းပါးလှသော အရင်းအမြစ်များကို အသုံးချ၍ တစ်ကမ္ဘာလုံးကို တုန်လှုပ်စေမည့် သီးနှံများကို စိုက်ပျိုးနိုင်ခဲ့သည် မဟုတ်လား။ အချို့သော အရာများမှာ နယ်ပယ်အတွင်းရှိ လူများ၏ သိမြင်နားလည်မှုများကိုပင် လုံးဝ ပြောင်းပြန်လှန်ပစ်ခဲ့သည်။

ပြည်တွင်းရှိ စိုက်ပျိုးရေး သုတေသီများကပင် လင်းယန်သည် 'စိုက်ပျိုးရေး တော်လှန်ရေး' ၏ ခေါင်းလောင်းသံကို စတင်တီးခတ်လိုက်ပြီဟု ယူဆထားကြသည်။ ယခုကဲ့သို့ နိုင်ငံတကာ ပြိုင်ဆိုင်မှု ပြင်းထန်နေချိန်တွင် စိုက်ပျိုးရေးကဏ္ဍတွင် ဦးဆောင်နိုင်မှုမှာ အလွန် အရေးကြီးလှသည်။ ၎င်းသည် လူသားတို့၏ အသက်သွေးကြောနှင့် သက်ဆိုင်နေသောကြောင့် ဖြစ်၏။ အင်တာနက် မရှိလျှင် လူသားတို့ ဆက်လက် ရှင်သန်နိုင်သော်လည်း၊ ထမင်းမရှိပါက ရုန်းရင်းဆန်ခတ်မှုများ ဖြစ်ပေါ်လာပြီး ငတ်ပြတ်သေဆုံးကြရမည်သာ။

'ငါသာ သူ့နောက် လိုက်မယ်ဆိုရင်လည်း မဆိုးပါဘူး' ဟု ဝူယင်း စိတ်ထဲမှ တိတ်တဆိတ် တွေးလိုက်မိသည်။

လင်းယန်နှင့် ယန်ကျင်းလီ သို့မဟုတ် အခြား မိန်းကလေးများကြားရှိ ဆက်ဆံရေးကိုတော့ သူမ ဂရုမစိုက်ပါချေ။ သူမသည် အမျိုးသားထက်စာလျှင် စမ်းသပ်ကိရိယာများကို ပို၍ မြတ်နိုးသူ ဖြစ်သည်။ လင်းယန်သည် ယခုအချိန်အထိ သူမနှင့် ထိုက်တန်သည်ဟု ယူဆရသော တစ်ဦးတည်းသော အမျိုးသား ဖြစ်သည်။

'သူ့ရဲ့ မျိုးဗီဇက အလွန် ထူးချွန်လောက်တယ်၊ ငါတို့နှစ်ယောက်သာ ကလေးမွေးရင် ဘယ်လို ကလေးမျိုး ထွက်လာမလဲ မသိဘူး'

ထိုခဏတွင် ဝူယင်း၏ ရင်ထဲ၌ စိတ်အားထက်သန်မှုများ တောက်လောင်လာသည်။ ဤသည်ကို ခေါင်းစဉ်သစ်တစ်ခုအဖြစ်ပင် သုတေသန လုပ်သင့်သည်ဟု သူမ ယူဆလိုက်မိသည်။ သို့သော်... သူနဲ့ ဘယ်လိုစတင်ရမလဲ? ဤသည်မှာ သူမ၏ ကျွမ်းကျင်မှုနယ်ပယ် မဟုတ်မှန်း ဝူယင်း သိပါသည်။

“ထားလိုက်ပါတော့၊ အလုပ်ကိစ္စပဲ အရင်ပြောရအောင်” ဝူယင်း စိတ်ထဲမှ သက်ပြင်းချလိုက်ပြီးနောက် စကားစလိုက်၏။

“ရှင့်ရဲ့ မုန်ညင်းဆီက အပြင်မှာ အရမ်းကို ရောင်းကောင်းနေတယ်၊ ဈေးကလည်း တော်တော်ကြီးတယ်။ အဲ့ဒီတော့ အတုတွေလည်း ပေါ်လာပြီလေ။ လူတော်တော်များများက ချင်းရှန်းရွာ မုန်ညင်းဆီဆိုတဲ့ နာမည်ကို သုံးပြီး ရိုးရိုးမုန်ညင်းဆီတွေကို ဈေးကြီးကြီးနဲ့ ရောင်းစားနေကြတာ။ အကျိုးအမြတ်တွေ အများကြီး ယူနေကြတယ်”

လင်းယန်၏ မျက်မှောင်များ အနည်းငယ် ကြုတ်သွားသည်။

“ဒီကိစ္စကို ခင်ဗျား ဘယ်လိုလုပ် ဒီလောက် အသေအချာ သိနေတာလဲ?”

“ဓာတ်ခွဲခန်းထဲက ပါမောက္ခအိုကြီးတစ်ယောက်ရဲ့ မိသားစုက ဝယ်လာလို့လေ။ အတုမိပြီး အလိမ်ခံလိုက်ရတာ။ အဲ့ဒါကြောင့် ရှင်သိအောင် လာပြောတာပါ။ ရှင်သာ တစ်ခုခုမလုပ်ဘူးဆိုရင် ချင်းရှန်းရွာရဲ့နာမည်ကတော့ အဲ့ဒီလူတွေလက်ထဲမှာ ပျက်စီးသွားလိမ့်မယ်”

ယန်ကျင်းလီသည် ထိုစကားကို အလွန် အလေးအနက် နားထောင်နေပြီး၊ ဖုန်းကိုထုတ်ကာ ချက်ချင်း ရှာဖွေကြည့်လိုက်သည်။ သူမ၏ ဖုန်းထဲတွင် ချင်းရှန်းရွာ၊ လင်းယန် စသော အချက်အလက်များကိုသာ ရှာဖွေထားသည်ကို တွေ့ရပေမည်။

“တကယ်ပဲ... အခု အင်တာနက်ပေါ်မှာ ရှင့်အပေါ် ဝေဖန်ချက်တွေက အရမ်းဆိုးနေတာပဲ”

လင်းယန်သည်လည်း ဗီဒီယိုများကို ဖွင့်ကြည့်လိုက်ရာ သံသယပွားနေသော အသံများစွာကို တွေ့လိုက်ရသည်။ လူအများအပြားက လင်းယန်ကို တိုက်ရိုက် ဝေဖန်ပုတ်ခတ်နေကြ၏။

[မိုးပျံမတတ် ဈေးကြီးတဲ့ ဖရဲသီးပြီးတော့၊ အခု မိုးပျံမတတ် ဈေးကြီးတဲ့ မုန်ညင်းဆီ ထပ်ထွက်လာပြန်ပြီ။ ဘာအာမခံချက်မှ မရှိတဲ့ ဒီလိုပစ္စည်းမျိုးက ဘာလို့ တစ်ပေါင်ကို ယွမ် ငါးသောင်းတောင် ပေးရတာလဲ?]

[သူငယ်ချင်းတို့ရေ... ဒီခေတ်မှာ မုန်ညင်းဆီတောင် ဝယ်မစားနိုင်တော့ဘူး။ ဖရဲသီးကိုကိုက စူပါမုန်ညင်းစေ့ကို တီထွင်လိုက်ပြီးနောက်မှာ မုန်ညင်းဆီဈေး ကျမသွားတဲ့အပြင် အဆမတန်ကို တက်လာတာ။]

[အခု လူတိုင်းက မုန်ညင်းဆီဟာ ကျန်းမာရေးအတွက် ကောင်းတယ်လို့ ထင်နေကြတယ်။ မုန်ညင်းဆီနဲ့ ပတ်သက်တဲ့ ကုန်စည်ဒိုင်ဈေးကွက်မှာဆိုရင်လည်း ဈေးနှုန်းတွေက ထိုးတက်နေတာပဲ။ ဒီစူပါမုန်ညင်းဆီက တကယ်ပဲ အဲ့ဒီလောက် အစွမ်းထက်လို့လား?]

[ပြည်သူတွေကို အကျိုးပြုရမယ့် ကိစ္စက ဘာလို့ ဒီလို ရလဒ်ဆိုးတွေ ထွက်လာရတာလဲ?]

[ဖရဲသီးကိုကိုက ဒီလောက် ငယ်ငယ်လေးနဲ့ ဘာလို့ ပါမောက္ခ ဖြစ်နေရတာလဲ?]

[ဒါက စိုက်ပျိုးရေး ကဏ္ဍရဲ့ တိုးတက်မှု အစစ်အမှန်လား၊ ဒါမှမဟုတ် သေသေချာချာ စီစဉ်ထားတဲ့ လိမ်လည်မှုတစ်ခုလား?]

အချိန်တိုအတွင်းမှာပင် မုန်ညင်းဆီအတု ကိစ္စကြောင့် လင်းယန်အပေါ် သံသယဝင်သူများ ပိုမို များပြားလာခဲ့သည်။ ထိုဗီဒီယိုများကို ကြည့်ရင်း ယန်ကျင်းလီမှာ အလွန် ဒေါသထွက်သွားပြီး ကောမန့်များ ပြန်ရေးရန် ပြင်တော့သည်။ သို့သော် လင်းယန်က သူမကို အမြန် တားလိုက်၏။

“အင်တာနက် အသုံးပြုသူတွေက သတင်းမှားတွေကြားမှာ လမ်းမှားကုန်ကြတာပါ။ စိတ်တိုနေလို့လည်း ဘာမှ ထူးမှာ မဟုတ်ဘူး”

ယန်ကျင်းလီ စိတ်ကို ပြန်ထိန်းလိုက်သည်။ ဆက်တိုက် တက်လာသော ဝေဖန်ရေး ဗီဒီယိုများကို ကြည့်ပြီးနောက် သူမ တစ်ခုခုကို ရိပ်မိလိုက်၏။

“ဒါက တမင် လုပ်ကြံဖန်တီးတာပဲ! ရှင့်ရဲ့နာမည် ပျက်သွားအောင် နောက်ကွယ်ကနေ တမင် လုပ်နေကြတာ။ သူတို့ ဘာကို လိုချင်နေကြတာလဲ?”

လင်းယန်သည်လည်း ထိုဗီဒီယိုများကို ကြည့်လိုက်သည်။ တည်ငြိမ်စွာ စဉ်းစားနိုင်သူမှာ သိပ်မရှိလှပေ။

“အဓိကကတော့... ဖရဲသီးနက်ပဲ ဖြစ်ဖြစ်၊ စူပါမုန်ညင်းဆီပဲ ဖြစ်ဖြစ် သာမန် ပြည်သူတွေက တစ်ခါမှ မမြင်ဖူးကြဘူးလေ။ ဒဏ္ဍာရီထဲမှာပဲရှိနေတဲ့ အရာတွေလို ဖြစ်နေတော့ အခုလို သံသယဝင်ကြတာပေါ့”

အခြေအနေများမှာ အဘယ်ကြောင့် ဤသို့ ဖြစ်လာရသလဲဆိုသည်ကို လင်းယန် ချက်ချင်း သဘောပေါက်လိုက်သည်။ သူ စိုက်ပျိုးထားသော အရာများမှာ စိုက်ပျိုးရေး တက္ကသိုလ်ကသာ အကုန် သိမ်းယူထားပြီး သုတေသနများ ပြုလုပ်နေကြခြင်းဖြစ်သည်။ သို့သော် 'ဖရဲသီးကိုကို' ဆိုသည့် အမည်ကြောင့် သူ စိုက်သမျှ သီးနှံများမှာ အလွန်နာမည်ကြီးနေသော်လည်း ပြည်သူများမှာ မည်သည့်နည်းနှင့်မျှ ဝယ်ယူ၍ မရနိုင်ကြပေ။

ထိုမျှော်လင့်စောင့်စားရသည့် အချိန်မှာ ကြာမြင့်လွန်းလှပြီ ဖြစ်သည်။ ထို့ကြောင့် 'ဖရဲသီးကိုကို' သို့မဟုတ် 'ချင်းရှန်းရွာ' အမည်ခံထားသော မုန်ညင်းဆီများ ထွက်လာချိန်တွင် ဈေးကြီးသော်လည်း လူအများအပြားမှာ အတုမှန်းမသိဘဲ ဝယ်ယူမိကြတော့သည်။ နောက်ဆုံးတွင်မူ ဤကဲ့သို့သော ပြင်းထန်သည့် ဝေဖန်မှုများ ထွက်ပေါ်လာခြင်းပင်ဖြစ်၏။

လင်းယန်ကို လူလိမ်တစ်ယောက်ဟု သတ်မှတ်လိုက်ကြသည်။ ထို့ပြင် လင်းယန်သည် အလွန် ချမ်းသာသူ ဖြစ်သည့်အားလျော်စွာ၊ ထိုပိုက်ဆံများမှာလည်း လိမ်လည်၍ ရထားခြင်းဖြစ်သည်ဟု ယူဆကုန်ကြသည်။ ရုပ်လေးက ချောပါလျက်နှင့် အလကား ဖြစ်သွားပြီဟုပင် ပြောကြသေးသည်။ သူ၏ စိတ်ဓာတ်ကို ယုံကြည်သော အမျိုးသမီး ပရိသတ် အချို့မှလွဲ၍ ကျန်သူများမှာ ဝိုင်းဝန်း ဆဲဆိုနေကြလေသည်။ လင်းယန်ဘက်မှ ကာကွယ်ပေးချင်သူများ၏ အသံမှာလည်း အလွန်ပင် သေးငယ်လွန်းလှသည်။

“ရှင်သာ နည်းလမ်းတစ်ခုခု မရှာရင်တော့ ရှင့်နာမည်က တကယ်ပဲ ရေထဲမျောတော့မှာပဲ။ ဒါပေမဲ့... စိတ်ပူမနေပါနဲ့၊ ရှင် ကျွန်မရဲ့ ဓာတ်ခွဲခန်းထဲမှာပဲ လာနေလိုက်။ ဒီမမကြီးက ရှင့်ကို ကာကွယ်ပေးမယ်” ဟု ဝူယင်းက ပခုံးလေး တွန့်ကာ ပြောလိုက်သည်။ သူမကတော့ အခြေအနေကို ပိုပြီး ဆိုးသွားစေချင်ပုံရသည်။

ယန်ကျင်းလီမှာမူ ဒေါသထွက်လွန်း၍ ပေါက်ကွဲလုနီးပါး ဖြစ်နေချေပြီ။ လင်းယန်ကတော့ ဖုန်းကို အေးအေးဆေးဆေး ပိတ်လိုက်ပြီး ပခုံးတွန့်ကာ ပြန်ပြောလိုက်၏။

“ငါက ဒီရွာထဲမှာပဲ နေတာလေ၊ ဘာတွေ ထိခိုက်မှာမို့လို့လဲ? သူတို့ ဆဲချင်သလောက် ဆဲပါစေ။ တကယ့် မုန်ညင်းဆီတွေ နေရာအနှံ့ ရောက်သွားတဲ့ အချိန်ကျရင် အဲ့ဒီ ဝေဖန်ချက်တွေ အလိုလို ပျောက်သွားမှာပါ”

“ဒါပေမဲ့ အဲ့ဒီအချိန်ကျရင် ရှင့်နာမည်က လုံးဝ ပျက်စီးနေပြီလေ!” ယန်ကျင်းလီ၏အသံမှာ သိသိသာသာ ပြင်းထန်လာသည်။ သူမသည် လင်းယန်ကို စစ်မှန်သော စေတနာဖြင့် ကာကွယ်ပေးချင်နေခြင်းဖြစ်၏။

လင်းယန်က ပြုံးလိုက်ပြီး ဝူယင်းကို ကြည့်ကာ မေးလိုက်သည်။

“ဒီကိစ္စအတွက် ကျောင်းဘက်က ရှင်းပြတာမျိုး မရှိဘူးလား?”

ဝူယင်းက ရယ်မောကာ ပြန်ဖြေ၏။

“ကျောင်းကတော့ ရှင်းလင်းချက် ထုတ်ပြန်ပြီးသားပါ။ ဒါပေမဲ့... အဲ့ဒီ ရှင်းလင်းချက်က ဝေဖန်မှုတွေအောက်မှာ ချက်ချင်း မြုပ်သွားတာပဲ။ ဘာမှ မထူးခြားဘူး။ အခုဆို လူတွေက ကျောင်းကိုပါ သံသယဝင်နေကြပြီ”

လင်းယန်၏နှုတ်ခမ်းများ တွန့်သွားရသည်။ ဝူယင်း၏ မတုန်မလှုပ် နေနိုင်သော စရိုက်ကို သူ အံ့ဩမိသည်။ ဝူယင်းအတွက်မူ ဓာတ်ခွဲခန်းသာ မပေါက်ကွဲလျှင် ကျန်သည့် အရာများမှာ ကိစ္စကြီးမဟုတ်ဟု ယူဆပုံရသည်။

သို့သော်လည်း ဤဝေဖန်မှုများကိုတော့ တစ်ခုခုလုပ်ဆောင်ရန် လိုအပ်နေပြီဖြစ်သည်။ သူသည် အေးအေးချမ်းချမ်းနေလိုသူ ဖြစ်သော်လည်း၊ လူတိုင်းက ဝိုင်းဆဲနေကြသော 'လမ်းဘေးကြွက်' တစ်ကောင်တော့ မဖြစ်လိုပါချေ။

***

စူပါ-ဖမ်း(SFS)

SFS 118

အခန်း ၁၁၈ ။ ရုတ်တရက် ထိုးတက်လာသော Follower အရေအတွက်

ချင်းရှန်းရွာလေးက သေးငယ်သည့်အတွက် ပြင်ပလောကတွင် လင်းယန်အပေါ် မကောင်းသတင်းများ ထွက်ပေါ်နေသည့်ကိစ္စမှာ ရွာထဲသို့ အလျင်အမြန်ပင် ပျံ့နှံ့သွားခဲ့သည်။ Short Video များပေါ်ရှိ မြင်ကွင်းများကို မြင်တွေ့လိုက်ရသောအခါ လူအများအပြားမှာ အလွန်အမင်း ဒေါသထွက်လာကြတော့၏။

"ဒီလူတွေက ဘာသိလို့လဲ! ငါသွားပြီး အဲ့ဒီကောင်တွေကို သတ်ပစ်မယ်!"

ကတုံးချန်တို့တစ်သိုက်၏ ဒေါသများမှာ ချက်ချင်း ထွက်လာကြသည်။ သူတို့သည် လင်းယန်နှင့် အနီးကပ်ဆုံးနေပြီး လယ်ထဲတွင် သီးနှံများကိုလည်း အတူတူ စိုက်ပျိုးခဲ့ကြသူများ ဖြစ်သည်။ လင်းယန် စိုက်ပျိုးသည့်အရာများ တကယ်ကောင်းမွန်ခြင်း ရှိ၊ မရှိကို သူတို့ထက် သိသူ မရှိပေ။ ထို့ကြောင့်ပင် သူတို့၏ စိတ်နှလုံးထဲ၌ လင်းယန်၏ အဆင့်အတန်းမှာ မည်သည့်အရာနှင့်မျှ နှိုင်းယှဉ်၍မရအောင် မြင့်မားနေခြင်းဖြစ်သည်။

သို့သော် ယခုမူ...

လူအများအပြားက လင်းယန်ကို စွပ်စွဲပုတ်ခတ်နေကြသည်။ ဤသည်ကို သူတို့ လုံးဝ သည်းမခံနိုင်တော့ပေ။ သူတို့ စဉ်းစားမိသည့် နည်းလမ်းမှာလည်း အလွန်ရိုးရှင်းပြီး တိုက်ရိုက်ကျလှသည်။

"ငြိမ်ငြိမ်နေစမ်းပါ၊ မင်းက သူတို့ကို တကယ် သတ်နိုင်လို့လား?" လင်းယန်က တားလိုက်ရသည်။

"သတိပေးတာမျိုးတော့ လုပ်လို့ရတာပဲလေ"

"သူတို့ ဘယ်မှာနေမှန်း မင်းသိလို့လား?"

လင်းယန်၏ မေးခွန်းကြောင့် ကတုံးချန်တို့တစ်သိုက် ချက်ချင်း ငြိမ်ကျသွားကြသည်။ ခုနက သူတို့ တကယ်ပင် စိတ်လိုက်မာန်ပါ ဖြစ်သွားခဲ့ခြင်းကို လင်းယန် ရိပ်မိပါသည်။ အဘယ်ကြောင့်ဆိုသော် သူတို့၏ကတုံးကြီးများမှာ ဒေါသကြောင့် နီရဲနေကြသောကြောင့်ပင်။

စူးရို့ရို့ကတော့ အလွန်လေးနက်တည်ကြည်နေ၏။ "ကျွန်မ မီဒီယာတွေကို ဆက်သွယ်ပြီး ရှင့်အတွက် ရှင်းလင်းချက် ထုတ်ပေးခိုင်းမယ်။"

လင်းယန်က ခေါင်းယမ်းလိုက်သည်။ "အခု အများပြည်သူရဲ့အမြင်ကို အဲ့ဒီလူတွေက မှားယွင်းတဲ့ဘက် ရောက်အောင် ဆွဲဆောင်ထားတာ။ နိုင်ငံပိုင်မီဒီယာတွေတောင် အခြေအနေကို မထိန်းချုပ်နိုင်တော့ဘူး။ အဲ့ဒီလိုလုပ်ရင် မလိုအပ်တဲ့ သံသယတွေတောင် ထပ်တိုးလာနိုင်တယ်။ တကယ်တော့ အကြီးမားဆုံး ပြဿနာက ငါတို့ရဲ့အထွက်နှုန်းက နည်းလွန်းနေတာပဲ။ တကယ့် ပစ္စည်းအစစ်ကို ထိတွေ့ဖူးသူက နည်းလွန်းနေလို့လေ။"

ရှုချင်ကတော့ မျက်နှာလေးမော့ကာ ပြုံးစစဖြင့် ပြောလာသည်။ "ကျွန်မမှာ နည်းလမ်းရှိတယ်။"

အားလုံး၏အကြည့်များက သူမဆီသို့ ရောက်သွားကြသည်။

"ချင်းရှန်းရွာကို အခုမှ ရောက်လာတဲ့ ရွာသားသစ်လေးကို မမေ့ပါနဲ့ဦး။"

"မမရှောင်ချီရဲ့ ဩဇာလွှမ်းမိုးမှုကို သုံးမလို့လား? ဒါက မကောင်းတဲ့ သက်ရောက်မှုတွေ ဖြစ်လာနိုင်မလား?"

"ပြီးတော့ မမရှောင်ချီရဲ့ ဗီဒီယို တစ်ခုထွက်ဖို့က အချိန်အကြာကြီး စောင့်ရတာလေ။ အခုကိစ္စက ဗီဒီယို ထွက်လာတဲ့အထိ စောင့်နေလို့ မရဘူး။"

"ဒါနဲ့ တကယ်တော့ ဘယ်သူက နောက်ကွယ်ကနေ ဒီလို လုပ်နေတာလဲ? ငါတို့က တစ်နေ့ကုန် ရွာထဲမှာပဲ နေတာလေ၊ ဘယ်သူ့ကိုမှလည်း သွားပြီး ရန်မစခဲ့ပါဘူး။"

လင်းယန်၏စိတ်ထဲတွင်လည်း အလွန် ဇဝေဇဝါ ဖြစ်နေမိသည်။ သူသည် ပြဿနာ ရှာတတ်သည့် စရိုက်မျိုး မဟုတ်ပေ။ အဓိက အကြောင်းရင်းမှာ မုန်ညင်းဆီအတုများကို ဈေးကြီးကြီးဖြင့် ရောင်းချနေကြခြင်းကြောင့် ဖြစ်ပေါ်လာသည့် အပျက်သဘောဆောင်သော ဝေဖန်မှုများပင်ဖြစ်၏။ ဤကိစ္စအတွက် အဘိုးစူးကို ခေါ်ယူတိုင်ပင်ရန် လိုအပ်လာသည်။

"ကျွန်မ အဘိုးကို သွားရှာလိုက်မယ်။" စူးရို့ရို့သည် မိုးချုပ်နေပြီဖြစ်သော်လည်း ဂရုမစိုက်ဘဲ အဘိုးစူးကို အတင်း ဆွဲခေါ်လာခဲ့သည်။

"အဘိုး... ဒီကိစ္စကိုတော့ အဘိုး ဘယ်လိုပဲဖြစ်ဖြစ် ဖြေရှင်းပေးမှ ရမယ်နော်။"

လမ်းတွင် အဘိုးစူးသည် အကြောင်းစုံကို သိရှိသွားပြီးဖြစ်ရာ သူ၏ အိပ်ငိုက်နေမှုများ ချက်ချင်း ပျောက်ကွယ်သွားပြီး အကြည့်များက အလွန် လေးနက်သွားသည်။ "ကောင်လေး... ငါ လူလွှတ်ပြီး စုံစမ်းခိုင်းထားတယ်။ မနက်ဖြန် မတိုင်ခင် ရလဒ် သိရလိမ့်မယ်။ အင်တာနက်ဆိုတာ ဥပဒေမဲ့တဲ့ နေရာမဟုတ်ဘူး။ သတင်းအမှားတွေ လွှင့်တဲ့သူတွေက ပြန်ပေးဆပ်ရလိမ့်မယ်။"

လင်းယန် ခေါင်းညိတ်လိုက်သည်။ သာမန် ပြည်သူတစ်ယောက် အနေဖြင့် ဤကဲ့သို့သော ကိစ္စများဖြင့် ကြုံတွေ့ရသည်မှာ တကယ်ကို စိတ်မသက်မသာ ဖြစ်ရသည်။ သူကဲ့သို့ ငွေကြေးနှင့် ဩဇာရှိသူပင် ဤမျှ ခံစားရလျှင်၊ သာမန်လူသာ ဆိုပါက ဤဘဝမှာ လုံးဝ ပျက်စီးသွားလောက်ပြီ ဖြစ်သည်။

တစ်ချိန်တည်းမှာပင် လောင်ဝမ်သည်လည်း အပြေးအလွှား ရောက်ရှိလာသည်။ သူလည်း လုံးဝ ထိုင်မနေနိုင်တော့ပေ။ "အခု ငါတို့ ရထားတဲ့ သုတေသန ရလဒ်တွေကို လူသိရှင်ကြား ထုတ်ပြန်လိုက်ရင်ရော? အဲ့ဒါဆိုရင် သံသယတော်တော်များများကို ရှင်းနိုင်လိမ့်မယ်။"

လင်းယန်က လက်ကာပြလိုက်သည်။ "ဒါက တစ်ဖက်လူက ကျွန်တော်တို့ကို တမင်လုပ်ခိုင်းတာမျိုးလည်း ဖြစ်နိုင်တယ်။"

"မင်းမှာ သံသယရှိတဲ့လူ ရှိလို့လား?"

"ချင်းရှန်းရွာ မုန်ညင်းဆီ အတုလုပ်တဲ့ ကိစ္စကြောင့် လူတော်တော်များများ အလိမ်ခံရတာ မှန်ပေမဲ့၊ ဒါက တစ်နိုင်ငံလုံး ဟိုးဟိုးကျော်သွားလောက်တဲ့အထိတော့ မဖြစ်နိုင်ဘူး။ အခုလို ရုန်းရင်းဆန်ခတ် ဖြစ်နေတဲ့ မြင်ကွင်းကို မြင်ချင်နေတဲ့သူကတော့... ကျွန်တော်တို့ရဲ့ လယ်ထွက်ကုန်တွေအပေါ် မရိုးသားတဲ့ အကြံရှိနေတဲ့သူပဲ ဖြစ်ရမယ်။"

လောင်ဝမ် စဉ်းစားခန်း ဝင်သွားသည်။ "မင်း ဆိုလိုတာက... ပြည်ပက လူတွေလား။"

"ဖြစ်နိုင်ခြေ အရမ်းများတယ်။"

"သောက်ကျိုးနည်း... တော်တော်ကို ရဲတင်းလွန်းတာပဲ။ သူတို့လက်တွေက ဒီအထိတောင် လှမ်းလာတာလား။" လောင်ဝမ်၏စိတ်ထဲတွင်လည်း ပို၍ သေချာသွားသည်။ မည်သို့ပင်ဆိုစေ ပြည်တွင်းရှိ စိုက်ပျိုးရေး သုတေသနဓာတ်ခွဲခန်း အားလုံးမှာ အချက်အလက်အချို့ကို ရရှိထားကြသည်။ အားလုံးက ပူးပေါင်းဆောင်ရွက်နေကြသူများဖြစ်ရာ၊ အနည်းငယ် မနာလိုဖြစ်လျှင်ပင် ဤမျှအထိတော့ လုပ်ကြမည်မဟုတ်ပေ။ ထို့ပြင် Social Media အသံများကို ဝယ်ယူရန်မှာလည်း ငွေကြေးပမာဏ နည်းနည်းနောနော မဟုတ်ပေ။ ဤမျှအထိ သက်ရောက်မှုရှိရန်အတွက် သာမန်လူတစ်ယောက်က ဤဈေးနှုန်းကို ပေးနိုင်မည် မဟုတ်ပေ။

နောက်ဆုံးတွင် လင်းယန်သည် အားလုံး၏ အကြံပြုချက်အရ Short Video Platform တွင် ကိုယ်ပိုင်အကောင့်တစ်ခု ဖွင့်လိုက်တော့သည်။ ဤသည်မှာ မိမိ၏အသံကို ထုတ်ဖော်ရန် အကောင်းဆုံး ပလက်ဖောင်း ဖြစ်ပေလိမ့်မည်။

လင်းယန် ရိုက်ကူးထားသည့် ဗီဒီယိုမှာ အလွန်ရိုးရှင်းပြီး ဖြစ်သလို ရိုက်ထားသည်ဟုပင် ဆိုနိုင်သည်။ သို့သော် စူးရို့ရို့သည် သတင်းထောက်တစ်ဦး ဖြစ်သည့်အားလျော်စွာ ရိုက်ကူးမှုမှာ အလွန် ကျွမ်းကျင်လှသည်။ အနည်းဆုံးတော့ လင်းယန်၏ ချောမောမှုမှာ နည်းနည်းလေးမျှ လျော့မသွားပေ။

ဤ Short Video ကို တင်လိုက်ပြီးနောက်တွင်မူ... မယုံနိုင်စရာ ကောင်းလောက်အောင် မြန်ဆန်သော နှုန်းဖြင့် ကြည့်ရှုသူများ တိုးတက်လာခဲ့သည်။ Short Video Platform ကိုယ်တိုင်ပင် အံ့အားသင့်သွားရသည်။ လင်းယန်၏ အကောင့်အစစ်ဖြစ်ကြောင်း အတည်ပြုပြီးနောက်တွင်မူ ကုမ္ပဏီအတွင်းပိုင်းမှနေ၍ Promotion များပင် ဝိုင်းဝန်း ထည့်ပေးလိုက်ကြတော့သည်။

မည်သို့ပင်ဆိုစေ ဤကိစ္စမှာ ရေပန်းစားနေသဖြင့် သူတို့၏ ပလက်ဖောင်းအတွက် အသုံးပြုသူ အမြောက်အမြားကို ဆွဲဆောင်နိုင်သည် မဟုတ်လား။ သူတို့ကလည်း ဤကဲ့သို့သော အားပြိုင်ပွဲမျိုးကို မြင်တွေ့လိုကြသည်။

အင်တာနက် အသုံးပြုသူ အများအပြားမှာ အလွန်ရိုးရှင်းလွန်းလှသော ဤဗီဒီယိုကို မြင်တွေ့လိုက်ကြရသည်။ ဗီဒီယိုထဲတွင်တော့ ပြစ်မှုကျူးလွန်နေသလားဟု ထင်ရလောက်အောင် ချောမောလွန်းသည့် လင်းယန်၏ မျက်နှာနှင့်၊ ညစ်ညမ်းမှု တစ်စုံတစ်ရာ မရှိဘဲ အပြစ်ကင်းစင်နေသည့် သူ၏ မျက်လုံးများကိုသာ တွေ့ရသည်။

ဗီဒီယို၏ အကြောင်းအရာမှာလည်း အလွန်ပင် တိုတောင်းလှသည်။ "ကျွန်တော် စိုက်ထားတဲ့ မုန်ညင်းက မြေတစ်ဧကစာပဲ ရှိပါတယ်။ ထွက်လာတဲ့ ဆီတွေကိုလည်း မျိုးစေ့ချန်တာ၊ ဓာတ်ခွဲခန်း ပို့တာနဲ့ ကိုယ်တိုင်စားဖို့ကလွဲရင်... ကျွန်တော်ကိုယ်တိုင် အပြင်ကို တစ်ခါမှ မရောင်းဖူးပါဘူး။"

"ဒီမုန်ညင်းဆီက ကျန်းမာရေးအတွက် အထောက်အကူပြုတယ်ဆိုတာကိုလည်း ကျွန်တော် မသိပါဘူး။ မိုးပျံမတတ် ဈေးကြီးကြီးနဲ့ ရောင်းနေတာတွေကတော့ သေချာပေါက် အတုတွေပါပဲ။"

"ဒီမုန်ညင်းဆီက အထွက်နှုန်း အရမ်းများပါတယ်။ အရသာ ကောင်းမွန်ပေမဲ့လည်း ဈေးနှုန်းကတော့ သာမန် ပဲဆီထက်တောင် ပိုပြီး သက်သာသွားမှာ သေချာပါတယ်။"

"နောက်နှစ်ကျရင် လယ်ထဲက မုန်ညင်းတွေ အကုန်ထွက်လာပြီး ဆီကြိတ်ပြီးတဲ့ အခါမှာတော့ အားလုံး ဝယ်ယူနိုင်ကြပါလိမ့်မယ်။ ဒါပေမဲ့ နေရာအနှံ့ အပြည့်အဝ ရောက်ရှိဖို့အတွက်ကတော့ နောက်ထပ် နှစ်အနည်းငယ်လောက် အချိန်ယူရပါလိမ့်မယ်။"

ဤပြောကြားချက်မှာ လက်ရှိ အခြေအနေကို ရိုးရှင်းစွာ ရှင်းပြလိုက်ခြင်းသာ ဖြစ်သည်။ အချိန်အားဖြင့် တစ်မိနစ်ပင် မပြည့်ပေ။ သို့သော် ဤကဲ့သို့သော ဗီဒီယိုမှာ အင်တာနက်ပေါ်တွင် အကြီးအကျယ် ဂယက်ရိုက်သွားခဲ့သည်။

လင်းယန် နာမည်ကြီးလာပြီးနောက် အချိန်အတော်ကြာမှ ပထမဆုံးအကြိမ် ထွက်ပေါ်လာသည့် သတင်းစကားဖြစ်နေသောကြောင့် လူအများက ပို၍ စိတ်ဝင်စားကြသည်။ အကယ်၍ ဤပြဿနာသာ မတက်လျှင် သူသည် ဘယ်တော့မှ ထွက်ပေါ်လာမည် မဟုတ်သကဲ့သို့ပင်။ ဤကိစ္စကြောင့် သူ၏ နာမည်ဂုဏ်သတင်း ထိခိုက်မှုရှိခဲ့သော်လည်း၊ သူ့ရုပ်ရည်ကိုသာ စွဲလန်းနေကြသည့် အမျိုးသမီး ပရိသတ်အချို့ကတော့ ဆက်လက် အားပေးနေကြဆဲဖြစ်သည်။

ထို့အပြင် လင်းယန်၏ ပြောစကားမှာ အလွန် အဓိပ္ပာယ်ရှိလှသည်။ လူတစ်ယောက်တည်းက မည်မျှပင် တော်စေကာမူ မုန်ညင်းဆီ ဘယ်လောက်များ ထွက်နိုင်မှာလဲ? ဈေးကွက်ထဲတွင် ရောင်းချနေသော ဈေးကြီးပေးရသည့် မုန်ညင်းဆီ အရေအတွက်မှာ တွက်ချက်ကြည့်လျှင်ပင် မဖြစ်နိုင်လောက်အောင် များပြားလွန်းနေသည်။ မည်မျှပင် အထွက်နှုန်း ကောင်းစေကာမူ ထိုမျှလောက်တော့ မထွက်နိုင်ပါချေ။

ဤအချက်ကြောင့် လူတော်တော်များများမှာ ပြန်လည် တည်ငြိမ်သွားကြသည်။ သို့သော် အချို့သော လူများကတော့ ဆက်လက်၍ မီးလောင်ရာလေပင့် လုပ်နေကြဆဲပင်။ လင်းယန်သည် အရင်က ယွမ်ငါးထောင်တန် ဖရဲသီးရောင်းခဲ့ခြင်းကို ထောက်ပြကာ သူသည် နဂိုကတည်းက လူလိမ်ဟု စွပ်စွဲကြသည်။ ဤဗီဒီယိုမှာလည်း နောက်ပိုင်းတွင် ငွေလိမ်ရန်အတွက် ဇာတ်တိုက်ထားခြင်းသာ ဖြစ်သည်ဟု ပြောကြသည်။ အချို့ဆိုလျှင် ပြည်တွင်းရှိ စိုက်ပျိုးရေး လောကတစ်ခုလုံးကို လင်းယန်က ဖျက်ဆီးပစ်လိုက်ပြီဟုပင် ကြွေးကြော်နေကြသည်။

သို့သော် ဤသို့သော အဆုံးမသတ်နိုင်သည့် အငြင်းပွားမှုများကပင် ထူးခြားသော ဖြစ်ရပ်တစ်ခုကို ဖန်တီးပေးလိုက်သည်။ ၎င်းမှာ လင်းယန် အကောင့်၏ Follower အရေအတွက်မှာ အဆမတန် ထိုးတက်သွားခြင်းပင်ဖြစ်သည်။

ယန်ကျင်းလီသည် အကောင့်၏ အချက်အလက်များကို ကြည့်ရင်း လုံးဝ အံ့အားသင့်နေမိသည်။ "မိနစ်နှစ်ဆယ်အတွင်းမှာတင် Follower တစ်သန်းကျော်သွားပြီ။"

ယန်ကျင်းလီ၏ မျက်နှာပေါ်တွင် အားကျစိတ်များ အပြည့်ဖြစ်နေသည်။ လင်းယန်နှင့် စတင် သိကျွမ်းစကတည်းက သူမသည် လင်းယန်ကို Social Media တွင် အကောင့်ဖွင့်စေချင်ခဲ့ခြင်းဖြစ်သည်။ ထိုသို့ဆိုလျှင် သူ၏ နာမည်ကြီးမှုကို အသုံးပြု၍ Follower အများအပြား ရရှိနိုင်မည် မဟုတ်လား။ သို့သော် သူမ မထင်မှတ်ထားသည်မှာ လင်းယန်သည် ဗီဒီယို တစ်ခုတည်းဖြင့်ပင် မျက်စိတစ်မှိတ်အတွင်း Follower သန်းချီ ရရှိသွားခြင်းပင်။

ဤသည်မှာ လူအများက ဝိုင်းဝန်းပုတ်ခတ်နေကြသဖြင့် လူစိတ်ဝင်စားမှု ပြန်လည် မြင့်တက်လာခြင်းကြောင့် ဖြစ်သော်လည်း၊ တစ်ဖက်တွင်မူ အခြားဖြစ်ရပ်အချို့ကိုလည်း တွေ့မြင်လာရသည်။ Social Media များ ခေတ်စားလာခြင်းကြောင့် အချို့အချိန်များတွင် သတင်းအမှားများက အစစ်အမှန် ဩဇာအာဏာရှိသော သတင်းများကို ဖုံးလွှမ်းသွားတတ်ခြင်းပင်။

လင်းယန် 'သိပ္ပံနှင့် နည်းပညာ တိုးတက်မှုဆု' ရရှိထားသည့် ကိစ္စကို မည်သူမျှ ဂရုမစိုက်ကြပေ။ အချို့ဆိုလျှင် ဤကိစ္စ၏ မှန်ကန်မှုကိုပင် သံသယဝင်နေကြသည်။ အများပြည်သူ၏အမြင်မှာ သတင်းအမှားများ၏ လမ်းမှားအောင် ဆွဲဆောင်မှုကို အပြည့်အဝ ခံထားရလေပြီ။ တကယ်တမ်းတွင် ဤပြဿနာမှာ ဖြစ်နေသည်မှာ တစ်ရက်နှစ်ရက် မကတော့ပေ၊ လင်းယန်က ယခုမှ သတိထားမိခြင်းသာ ဖြစ်သည်။

သို့သော် အဘိုးစူး ပေးလာသည့် သတင်းကတော့ လင်းယန် ထင်ထားသည်ထက် ပို၍ လေးနက်လှသည်။ ထိုသတင်းကြောင့် အင်တာနက်လောကတစ်ခုလုံး အကြီးအကျယ် တုန်လှုပ်သွားရပေတော့မည်။

***