အခန်း (၁၀၁-၁၀၂)

အခန်း ၁၀၁ ။ ကြိုတင် စီစဉ်ထားသော ဘဝ

"တကယ် ရှာတွေ့တာလား။" စူးဝေ့နှင့် သူ၏ ဆေးမီးဖိုကြီးမှာ အလွန်အံ့ဩသွားကြသည်။ ကျိုကျိုးတွင် သန့်စင်သော ပိုင်ဇီသွေး မရှိတော့သည်ကို သူတို့ သိထားကြသည်။ ပိုင်ဇီသွေးကို ဘယ်ကနေ ရှာတွေ့ခဲ့တာလဲ။

ပိုင်ဇီသွေး ရှာတွေ့ပြီဆိုမှတော့ ချက်ချင်း ဆေးဖော်ရမည်။ အချိန်ကြာသွား၍ ပိုင်ဇီသွေး မလတ်ဆတ်တော့ပါက ချွန်းရွှဲ့ဆေးကို ဖော်စပ်နိုင်တော့မည် မဟုတ်ပေ။

ကျန်းလီသည် ပိုင်ဇီသွေးတစ်စက်ကို ထုတ်ယူကာ လက်ဖဝါးပေါ်တွင် လွင့်မျောစေပြီး ဝိညာဉ်စွမ်းအားဖြင့် ဖုံးအုပ်ကာ စူးဝေ့ထံသို့ ပေးအပ်လိုက်သည်။

စူးဝေ့မှာ စိတ်လှုပ်ရှားလွန်း၍ လက်များကိုပင် ပွတ်သပ်နေမိသည်။ ပိုင်ဇီသွေးဖြင့် ချွန်းရွှဲ့ဆေး ဖော်စပ်ရခြင်းမှာ သူ၏ တစ်သက်တာတွင် ပထမဆုံးအကြိမ်ဖြစ်သည်။

"ဖယ်လိုက်။ ငါ့ကို ပေး။"

ချီဝူမီးဖိုကြီးနှင့် စူးဝေ့တို့သည် ဆေးဖော်ရန် အလုအယက် ဖြစ်နေကြသော်လည်း၊ နောက်ဆုံးတွင် ကျန်းလီက စူးဝေ့ကိုသာ ဖော်စပ်ရန် ရွေးချယ်လိုက်သဖြင့်၊ ချီဝူမီးဖိုကြီးမှာ အသာတကြည်ပင် ဆေးမီးဖို၏တာဝန်ကိုသာ ထမ်းဆောင်ရတော့သည်။

ချီဝူမီးဖိုကြီး၏ ဆေးဖော်စပ်မှုစွမ်းရည်မှာ စူးဝေ့ထက် ပို၍ ကောင်းမွန်နိုင်သော်လည်း၊ ၎င်း၏ ဖော်စပ်ပုံမှာ အလွန် ဖြစ်ကတတ်ဆန်းနိုင်လွန်းလှသဖြင့်၊ တစ်ခုခုလွဲချော်သွားမည်ကို ကျန်းလီ စိုးရိမ်မိသည်။ စူးဝေ့၏ တပည့်လေးက 'မဟာ ဖေယွမ်ဆေး' ကြီးကို ဘောလုံးကန်သလို ကန်နေသည်ကို ကျန်းလီ မြင်တွေ့ခဲ့ရသည် မဟုတ်လား။

စနစ်က အားကိုးရပြီး ပိုင်ဇီသွေးတစ်စက် ပေးထားသည်ကို၊ ချီဝူမီးဖိုကြီးက ထူးဆန်းသော ဆေးလုံးအဖြစ် ပြောင်းလဲပစ်လိုက်မည်ကို ကျန်းလီ မလိုလားပေ။

ကျန်းလီက ပြောလိုက်သဖြင့် ချီဝူမီးဖိုကြီးမှာ မငြင်းဆန်ရဲတော့ဘဲ၊ ဆေးမီးဖိုတစ်ခု၏ တာဝန်ကိုသာ သေချာစွာ ထမ်းဆောင်တော့သည်။

သန့်စင်သော ပိုင်ဇီတွင် မွေးရာပါ ပါရမီတစ်ခုရှိသည်။ ၎င်းမှာ ကျိုကျိုးအတွင်း၌ ဖြစ်ပျက်နေသော မည်သည့်ကိစ္စကိုမဆို သိရှိနိုင်စွမ်းဖြစ်သည်။

သို့သော် ထိုပါရမီကို အသုံးပြုရာတွင် အကြိမ်အရေအတွက် ကန့်သတ်ချက်ရှိသည်။ အတိဒုက္ခဖြတ်ကျော်ခြင်းအဆင့် မတိုင်မီတွင် တစ်ကြိမ်သာ သုံးနိုင်ပြီး၊ အတိဒုက္ခဖြတ်ကျော်ခြင်းအဆင့်သို့ ရောက်ပြီးနောက် သုံးကြိမ် သုံးနိုင်မည် ဖြစ်သည်။

ကျန်းလီသည် ပိုင်ဇီဧကရာဇ်ကို သန့်စင်သော ပိုင်ဇီအဖြစ် ပြောင်းလဲစေပြီး၊ ကောင်းကင်နတ်ဘုရားအဆင့်ရှိ နယ်ပယ်ပြင်ပ နတ်ဆိုး ဘယ်မှာရှိသလဲဆိုသည်ကို တွက်ချက်ခိုင်းရန် ရည်ရွယ်ထားခြင်းဖြစ်သည်။

ကျန်းလီ သိချင်သော အကြောင်းအရာများစွာ ရှိသော်လည်း၊ မည်သည့်အရာကမျှ နယ်ပယ်ပြင်ပ နတ်ဆိုးလောက် မအရေးကြီးပေ။ ကောင်းကင်နတ်ဘုရားအဆင့်နတ်ဆိုး ကျိုကျိုးတွင် ပုန်းအောင်းနေခြင်းမှာ ကျန်းလီအတွက် လည်ချောင်းထဲတွင် အရိုးစူးနေသကဲ့သို့ ဖြစ်နေပြီး၊ တစ်ရက် မရှင်းလင်းရသေးပါက သူ တစ်ရက်မျှ စိတ်အေးနိုင်မည် မဟုတ်ပေ။

နတ်ဆိုး၏အဆင့်ကို မပြောဘဲထားဦး၊ နတ်ဘုရားသိုက်ဂိုဏ်း ကိစ္စတစ်ခုတည်းနှင့်ပင် ကျိုကျိုးကို မိစ္ဆာလမ်းစဉ်၏ ချောက်နက်ထဲသို့ ဆွဲချကာ စည်းကမ်းများ အားလုံးကို ပျက်စီးသွားစေနိုင်စွမ်းရှိသည်။

ထို့ပြင် ကောင်းကင်နတ်ဘုရားအဆင့်ကို ရင်ဆိုင်နိုင်ရန်၊ ကျိုကျိုးတစ်ခုလုံးတွင် ကျန်းလီနှင့် ကောင်းကင်နတ်ဘုရားအဆင့်ဟု ယူဆရသော ဟုန်ချန်းနတ်သမီးတို့ နှစ်ဦးသာ ရှိသည်။

ချွန်းရွှဲ့ဆေး ဖော်စပ်ရန် ၇ ရက် အချိန်ယူရမည်ဖြစ်ရာ၊ ကျန်းလီသည် စိတ်ရှည်စွာဖြင့် စောင့်ဆိုင်းနေလိုက်သည်။

…..

၆ ရက်မြောက်နေ့တွင် စနစ်က ရုတ်တရက် တာဝန်တစ်ခု ထုတ်ပြန်လိုက်သည်။

【တာဝန် ထုတ်ပြန်ခြင်း - ညနေခင်းအချိန်တွင် သင်သည် ရေကန်ထဲ၌ ရေချိုးရန် သွားရောက်ခဲ့သည်။ သို့သော် ရေကန်ထဲတွင် ဆံပင်အဖြူရောင်ဖြင့် လျှို့ဝှက်ဆန်းကြယ်သော မိန်းမလှလေးတစ်ဦးလည်း ရေချိုးနေသည်ကို မမျှော်လင့်ဘဲ တွေ့ရှိလိုက်ရသည်။ သင်တို့ နှစ်ဦးစလုံး အဝတ်မပါဘဲ ဆုံတွေ့သွားကြပြီး၊ အလန့်တကြား အော်ဟစ်လိုက်ကြသည်။ တစ်ဖက်လူ၏ စွမ်းအားမှာ အောက်ခြေမမြင်ရလောက်အောင် နက်ရှိုင်းလှပြီး၊ သင့်အား ပြင်းထန်သော သင်ခန်းစာပေးရန် ကြိုးစားလာသည်။ ဆံပင်အဖြူနှင့် မိန်းကလေး၏ အပြစ်ပေးမှုကို ရှောင်ကွင်းပါ။】

【ဤတာဝန်ကို စွန့်လွှတ်ရန် အကြံမပြုပါ။】

【ဆုလာဘ် မရှိပါ။】

【စနစ်၏ အကြံပြုချက်ကို ရယူရန် ရင်းမြစ်အမှတ် ၅၀၀ အသုံးပြုနိုင်ပါသည်။】

【လျှို့ဝှက်ဆန်းကြယ်သော ဆံပင်အဖြူနှင့် မိန်းကလေး၏ အချက်အလက်များကို ရယူရန် ရင်းမြစ်အမှတ် ၅ သောင်း အသုံးပြုနိုင်ပါသည်။】

"ရင်းမြစ်အမှတ် ၅၀၀ အသုံးပြုမယ်။"

【စနစ်၏ အကြံပြုချက် - သင့်တွင် ပိုင်ဇီသွေးရှိကြောင်း တစ်ဖက်လူကို ပြသနိုင်ပါသည်။】

"... ရင်းမြစ်အမှတ် ၅ သောင်း အသုံးပြုမယ်။"

【ပိုင်ရွှယ်လင် - လက်ရှိ ပိုင်ဇီဧကရာဇ်၊ ခန္ဓာပေါင်းစည်းခြင်းအဆင့်။ ဖခင်မှာ ယခင် ပိုင်ဇီဧကရာဇ်ဖြစ်ပြီး၊ မိခင်မှာ သန့်စင်သော ချီလင် ဖြစ်သည်။ မိဘနှစ်ပါးစလုံး နယ်ပယ်ပြင်ပ နတ်ဆိုးများ၏ လက်ချက်ဖြင့် သေဆုံးခဲ့ရသည်။ နယ်ပယ်ပြင်ပ နတ်ဆိုးများအပေါ် သင်၏မုန်းတီးမှုကို ပြသခြင်းဖြင့် သူမ၏ သဘောကျမှုကို တိုးပွားစေနိုင်သည်။】

【သူမသည် သွေးနှော ပိုင်ဇီဖြစ်သောကြောင့် အခြားမိစ္ဆာသားရဲများ၏ အသိအမှတ်ပြုခြင်းကို မခံရပေ။ နယ်စားဘုရင် ရှစ်ပါးမှာလည်း သူမ၏ အမိန့်ကို မနာခံဘဲ ထီးနန်းလုရန် ကြံစည်နေကြသည်။ နယ်စားဘုရင် ရှစ်ပါး၏ အင်အားစုအချို့ကို နှိမ်နင်းပေးခြင်းဖြင့် သူမ၏ သဘောကျမှုကို တိုးပွားစေနိုင်သည်။】

【လက်ရှိတွင် သူမသည် နယ်စားဘုရင်များ၏ အဆိပ်ခတ်ခြင်းကို ခံထားရပြီး အဆိပ်မှာ အရိုးထဲအထိ စိမ့်ဝင်နေသည်။ သူမ၏ခွန်အားများမှာ မူလ၏ ရာပုံတစ်ပုံပင် မကျန်တော့ဘဲ ဖြေဆေးရှာရန် ခက်ခဲနေသည်။ သူမကို အဆိပ်ဖြေဆေး ပေးခြင်းဖြင့် သဘောကျမှုကို တိုးပွားစေနိုင်သည်။ (စနစ်၏ အကြံပြုချက် - စနစ်အရောင်းဆိုင်မှ ဝယ်ယူနိုင်ပါသည်)】

【ချွန်းရွှဲ့ဆေး ဖော်စပ်ရန်အတွက် ပိုင်ဇီသွေး လိုအပ်သည်။ သူမအား ပိုင်ဇီသွေး ပေးအပ်ခြင်းဖြင့် သူမ၏ ကြီးမားသော သဘောကျမှုကို ရရှိနိုင်ပြီး၊ ချွန်းရွှဲ့ဆေးကိုပါ ပေးအပ်ပါက သူမ သင့်ကို ချစ်မြတ်နိုးသွားစေနိုင်သည်။】

"..."

ကျန်းလီ၏ရင်ထဲတွင် မြင်းရိုင်းငါးသောင်းခန့် ပြေးလွှားသွားသကဲ့သို့ ခံစားလိုက်ရသည်။

ဒါ့ကြောင့်မို့လို့ အရင်တာဝန်တုန်းက စနစ်က ပြီးမြောက်အောင် လုပ်ဖို့ အကြံပြုခဲ့တာကိုး၊ ဒီမှာ လာစောင့်နေတာပဲ။

မင်းက မိန်းမချောလေးတွေကို လိုက်တဲ့ ဂိမ်း ဆော့နေတာလား။

ကျန်းလီ မျက်မှောင်ကြုတ်သွားသည်။ အကယ်၍သာ ချွန်းရွှဲ့ဆေးကိုပေးလိုက်လျှင် ပိုင်ဇီဧကရာဇ်က သူ့ကို ချစ်မြတ်နိုးသွားမည်ဆိုသည်ကို မသိခဲ့လျှင်၊ သူက သေချာပေါက် ပေးမည် ဖြစ်သည်။

သို့သော် ယခု သူသည် ထိုသို့ဖြစ်လာမည်ကို ကြိုတင်သိရှိနေပါလျက်နှင့် ချွန်းရွှဲ့ဆေးကို ပေးရမည်ဆိုပါက၊ သူ အနည်းငယ် စိတ်မသက်မသာ ဖြစ်မိသည်။

ပိုင်ဇီဧကရာဇ်သည် ထိန်းချုပ်ခံနေရပြီး စနစ်၏ ကိရိယာတစ်ခုအဖြစ် အသုံးပြုခံနေရသည်ဟု သူ ခံစားရစေသည်။

ရှားရှားပါးပါးပင် ကျန်းလီသည် စနစ်အပေါ် ရွံရှာစိတ် အနည်းငယ် ဖြစ်ပေါ်လာမိသည်။

စနစ်၏ အစိတ်အပိုင်း နှစ်ခုရှိရာ၊ တစ်ခုမှာ ပုံမှန် အသုံးပြုနိုင်သော လုပ်ဆောင်ချက်များဖြစ်ပြီး၊ ၎င်းက ကျန်းလီအတွက် အလွန်အဆင်ပြေစေကာ အလုပ်များစွာ သက်သာစေသည်။

အခြားတစ်ခုမှာ စနစ်က ပုံသေထုတ်ပြန်သော တာဝန်များ ဖြစ်သည်။ ၎င်းမှာ စနစ်၏ မူလ အချိန်လမ်းကြောင်းဖြစ်ပြီး၊ ကျန်းလီ ဤကမ္ဘာသို့ ရောက်လာကတည်းက စနစ်ကို အသုံးပြုခဲ့မည်ဆိုပါက သူ၏ ဘဝလမ်းကြောင်းတစ်ခုလုံးကို စနစ်က ကြိုတင်စီစဉ်ထားပြီးသား ဖြစ်နေမည်ဟု ဆိုလိုသည်။

စနစ်၏ အချိန်လမ်းကြောင်းအရ၊ ထိုအချိန်က သူသည် အခြေခံတည်ဆောက်ခြင်းအဆင့်သာ ရှိသေးမည်ဖြစ်ရာ၊ ရင်းမြစ်အမှတ် ၅ သောင်း ပေးနိုင်မည် မဟုတ်ပေ။ သို့သော် ရင်းမြစ်အမှတ် ၅၀၀ ပေး၍ စနစ်၏အကြံပြုချက်ကို ရယူပြီးနောက် ပိုင်ဇီသွေးကို ထုတ်ပြကာ ပိုင်ဇီဧကရာဇ်၏ သဘောကျမှုကို ရယူနိုင်လိမ့်မည်။ ထိုမှတစ်ဆင့် ပိုင်ဇီဧကရာဇ်နှင့် ရင်းနှီးသော ဆက်ဆံရေးများ ဖြစ်ပေါ်လာပြီး၊ နောက်ဆုံးတွင် ချစ်သူများအဖြစ်သို့ပင် ရောက်ရှိသွားနိုင်ချေရှိသည်။

ထိုအရာအတွက်ဆိုလျှင် သူ လက်ခံနိုင်ပါသည်။ ဘာပဲဖြစ်ဖြစ် ထိုအချိန်က သူသည် ရင်းမြစ်အမှတ် ၅ သောင်းတန် အချက်အလက်များကို မြင်နိုင်မည်မဟုတ်ဘဲ၊ ထိုသို့လုပ်ခြင်းဖြင့် ပိုင်ဇီဧကရာဇ်၏ သဘောကျမှုကို ရရှိမည်ကို သိမည်မဟုတ်သောကြောင့်ဖြစ်သည်။

စနစ်သည် မည်သို့သော တည်ရှိမှုမျိုးလဲဆိုသည့် မေးခွန်းကို ကျန်းလီ ယခင်ကလည်း တွေးတောခဲ့ဖူးသော်လည်း အဖြေ မရခဲ့ပေ။ သူ့ဘဝကို စနစ်က ဘာကြောင့် ကြိုတင် စီစဉ်ထားသလဲဆိုသည်ကိုလည်း သူ မစူးစမ်းလိုပေ။ သူ ဂရုမစိုက်ပါ။ မည်သို့ပင်ဖြစ်စေ သူသည် ယခုအခါ မဟာယာနအဆင့်သို့ ရောက်ရှိနေပြီး ကျိုကျိုးတွင် အသန်မာဆုံး ဖြစ်နေပြီဖြစ်ရာ၊ စနစ်က သူ့ကို လွှမ်းမိုးနိုင်မည် မဟုတ်တော့ပေ။ အလွန်ဆုံး တာဝန်တွေကို မလုပ်ဘဲ နေလိုက်ရုံသာရှိသည်။

သို့သော် စနစ်က အခြားသူများကိုပါ ကြိုတင်စီစဉ်ထားပြီး၊ ထိုသူများ၏ ခံစားချက်များကို စနစ်ထဲတွင် ဈေးနှုန်းသတ်မှတ်ကာ ပြသထားခြင်းကိုမူ သူ လုံးဝ သည်းမခံနိုင်ပေ။

စနစ်သည် မည်သို့သော တည်ရှိမှုမျိုး ဖြစ်နေသလဲ။ ထိုမေးခွန်းကို သူ ထပ်မံ တွေးတောကြည့်သော်လည်း၊ အဖြေ မရနိုင်သေးပေ။

...

"ပိုင်ဇီဧကရာဇ်... မင်းကို မေးစရာကိစ္စတစ်ခုရှိတယ်။"

၇ ရက်မြောက်နေ့တွင် ကျန်းလီသည် ပိုင်ဇီအင်ပါယာသို့ ရောက်ရှိလာပြီး ပိုင်ဇီဧကရာဇ်ကို ရှာတွေ့ခဲ့သည်။

ပိုင်ဇီဧကရာဇ် ပိုင်ရွှယ်လင်သည် နှင်းကဲ့သို့ ဖြူဖွေးသော ဆံပင်များ၊ အင်္ကျီလက်တိုနှင့် စကတ်တိုကို ဝတ်ဆင်ထားပြီး၊ အရပ်ရှည်ကာ တစ်တိုင်းပြည်လုံးကို ဆွဲဆောင်နိုင်လောက်အောင် လှပသည်။ သူမသည် မဏ္ဍပ်တစ်ခုအတွင်း၌ လူသားဧကရာဇ်ကျန်းကို ကြိုဆိုနေပြီး၊ လက်နှစ်ဖက်ကို ယှက်ကာ ဖြူဝင်းနေသော ပေါင်တံလေးများပေါ်တွင် တင်ထားသည်။ နံနက်ခင်း နေရောင်ခြည်က သူမ၏ ဆံပင်ဖြူများကြားမှ ဖြတ်သန်းသွားသောအခါ၊ သူမ၏ တစ်ကိုယ်လုံးမှာ ပွင့်လင်းမြင်သာနေသကဲ့သို့ ဖြစ်နေပြီး ပန်းချီကားထဲမှ ထွက်လာသူနှင့်ပင် တူနေသည်။

မိစ္ဆာသားရဲများသည် ပွင့်လင်းလွတ်လပ်သူများ ဖြစ်ကြသဖြင့် ဝတ်စားဆင်ယင်မှုမှာလည်း လူသားများကဲ့သို့ မရှေးရိုးဆန်ပေ။ ကွန်ဖြူးရှပ်ဂိုဏ်းက ၎င်းကို "ယဉ်ကျေးမှု မရှိခြင်း" ဟု ပြစ်တင်လေ့ရှိသော်လည်း၊ ကျင့်ကြံသူများစွာကမူ မိစ္ဆာသားရဲများ၏ ယဉ်ကျေးမှုမရှိသော ထိုအခြမ်းကို ကြည့်ရှုရသည်ကို သဘောကျကြသည်။

"လူသားဧကရာဇ်ကျန်း... ပြောပါ။"

ပိုင်ရွှယ်လင် အနည်းငယ် အံ့ဩသွားသည်။ သူမသည် လူသားဧကရာဇ်ကျန်းနှင့် အကြိမ်ကြိမ် တွေ့ဆုံဖူးသော်လည်း၊ သူ ဤမျှအထိ တည်ကြည်လေးနက်နေသည်ကို ရှားရှားပါးပါးပင် မြင်ဖူးခြင်း ဖြစ်သည်။

"အကယ်၍ ငါက မင်းကို 'ချွန်းရွှဲ့ဆေး' တစ်လုံးပေးပြီး သန့်စင်တဲ့ ပိုင်ဇီဖြစ်အောင် လုပ်ပေးမယ်ဆိုရင်... မင်း ငါ့ကို ချစ်မြတ်နိုးသွားမလား။" ကျန်းလီက ဘာကိုမျှ ဖုံးကွယ်မထားဘဲ တိုက်ရိုက်ပင် မေးလိုက်သည်။

ပိုင်ရွှယ်လင်သည် မျက်တောင်တစ်ချက် ခတ်လိုက်ပြီးနောက်၊ ကျန်းလီ၏စကားကို သဘောပေါက်သွားရာ မျက်နှာလေး နီရဲသွားပြီး အနည်းငယ် စိတ်ဆိုးသွားသည် - "လူသားဧကရာဇ်ကျန်း... ဒီပြတ်လုံးက သိပ်မရယ်ရဘူးနော်။"

"ငါ နောက်နေတာ မဟုတ်ဘူး။" ကျန်းလီက ရိုးသားစွာ ခေါင်းခါပြလိုက်ပြီး၊ သစ်သားသေတ္တာလေး တစ်လုံးကို ဖွင့်ပြလိုက်သည်။ မွှေးကြိုင်လှသော ဆေးရနံ့များက လေထဲသို့ ပျံ့နှံ့သွားသည်။

၎င်းမှာ ပိုင်ဇီသွေးကို အခြေခံ၍ ဖော်စပ်ထားသော 'ချွန်းရွှဲ့ဆေး' ပင် ဖြစ်သည်။

၎င်းမှာ ပိုင်ရွှယ်လင် အမြဲအိပ်မက်မက်နေခဲ့သော ဆေးလုံးပင် ဖြစ်သည်။ သို့သော် သူမ ဝမ်းသာမှု မဖြစ်ပေါ်ဘဲ ကျန်းလီ၏ လုပ်ရပ်အပေါ် ဒေါသသာ ထွက်သွားသည်။

"ရှင့်အဓိပ္ပာယ်က ကျွန်မက ရှင့်ကို ချစ်မြတ်နိုးမှပဲ ဒီချွန်းရွှဲ့ဆေးကို ပေးမယ်လို့ ဆိုလိုတာလား။ ရှင်က ရတနာကို ကိုင်ပြီး လူကို ခြိမ်းခြောက်နေတာပဲ။"

"မင်း အထင်လွဲနေပါပြီ။" ကျန်းလီက ရှင်းပြသည် - "ငါ ကြားဖူးတာတစ်ခု ရှိလို့ပါ။ လွန်ခဲ့တဲ့ အနှစ် ၅၀၀ လောက်က မင်းကို နယ်စားဘုရင်တွေ အဆိပ်ခတ်လို့ အပြင်းအထန် ဒဏ်ရာရနေတဲ့ အချိန်တုန်းက... မင်းရဲ့ ခန္ဓာကိုယ်ကိုလည်း မြင်ဖူးပြီး၊ ချွန်းရွှဲ့ဆေးကိုလည်း ထုတ်ပေးနိုင်တဲ့ အခြေခံတည်ဆောက်ခြင်းအဆင့် ကျင့်ကြံသူလေး တစ်ယောက်သာ ပေါ်လာခဲ့ရင်... မင်း သူ့ကို ချစ်မြတ်နိုးသွားနိုင်တယ်ဆိုတာ တကယ်ပဲလား။"

ကျန်းလီ၏စကားများမှာ ကိုယ်တိုင် မြင်တွေ့ခဲ့ရသကဲ့သို့ အလွန် တိကျနေပြီး နောက်ပြောင်နေပုံ မပေါ်သဖြင့်၊ ပိုင်ရွှယ်လင်သည် ထိုအခြေအနေကို ကိုယ်ချင်းစာ တွေးကြည့်လိုက်ပြီးနောက်၊ နောက်ဆုံးတွင် မတတ်သာဘဲ ခေါင်းညိတ် ဝန်ခံလိုက်ရသည်။

"ရှင် ဘယ်သူ့ဆီက ကြားလာလဲတော့ မသိဘူး။ ဒါပေမဲ့ ရှင်ပြောတဲ့အတိုင်း တကယ်ဖြစ်ခဲ့မယ်ဆိုရင်... ကျွန်မ အဲ့ဒီ ကျင့်ကြံသူလေးကို ချစ်မြတ်နိုးသွားဖို့ အခွင့်အရေး တကယ်ရှိပါတယ်။"

***

မဟာယာနအဆင့်ရောက်မှ စနစ်က ပေါ်လာသတဲ့

Mahayana 102

အခန်း ၁၀၂ ။ ငါကလည်း လျှို့ဝှက်ဆန်းကြယ်တဲ့သူပဲလေ

"ကျွန်မက အဲ့ဒီလိုမျိုး အခြေအနေမှာဆိုရင် သူများအကူအညီကို မှီခိုချင်စိတ် ဖြစ်လာမှာပဲ... သူက အခြေခံတည်ဆောက်ခြင်းအဆင့်ပဲ ဖြစ်ဖြစ်၊ မဟာယာနအဆင့်ပဲ ဖြစ်ဖြစ်ပေါ့။" ပိုင်ရွှယ်လင်က အနည်းငယ် အားကိုးရာမဲ့သည့်ပုံစံ၊ ဒေါသထွက်သည့်ပုံစံဖြင့် ဝန်ခံလိုက်သည်။ သူမ၏အကြောင်းကို ဤမျှအထိ အသေးစိတ် သိရှိထားသူမှာ မည်သူဖြစ်မည်ကို သူမ နားမလည်နိုင်အောင် ဖြစ်နေသည်။

"ပြီးတော့ ရှင်ပြောတဲ့အတိုင်းပဲ... အခြေခံတည်ဆောက်ခြင်းအဆင့် ကျင့်ကြံသူလေးတစ်ယောက်က ချွန်းရွှဲ့ဆေးကို ထုတ်ပေးနိုင်တယ်ဆိုရင်၊ သူက တော်တော်လေး လျှို့ဝှက်ဆန်းကြယ်တဲ့ သူဖြစ်နေမှာပေါ့။ လျှို့ဝှက်ဆန်းကြယ်တဲ့ အမျိုးသားတွေက မိန်းကလေးတွေကို ဆွဲဆောင်နိုင်တဲ့ ထူးခြားတဲ့ အားသာချက်တွေ ရှိတယ်လေ။"

"ငါကလည်း လျှို့ဝှက်ဆန်းကြယ်တဲ့ သူပဲလေ။" ကျန်းလီက ဝင်ပြောလိုက်သည် - "ကြည့်လေ... လောကကြီးမှာ သန့်စင်တဲ့ ပိုင်ဇီဆိုလို့ တစ်ကောင်မှ မရှိတော့တာတောင်၊ ငါက ပိုင်ဇီသွေးကို ရှာတွေ့ပြီး ချွန်းရွှဲ့ဆေးကို ဖော်နိုင်သေးတာပဲ။"

ပိုင်ရွှယ်လင် မျက်လုံးလှန်လိုက်မိသည်။ သူမ၏ ဧကရာဇ်ဂုဏ်သိက္ခာကို ထိန်းသိမ်းစရာ မလိုလျှင် မျက်နှာကိုပင် အုပ်ထားချင်စိတ် ပေါက်သွားသည်။

"လူသားဧကရာဇ်ကျန်း... ရှင့်ရဲ့တည်ရှိမှုက ကျွန်မတို့အတွက် ဘာကို ဆိုလိုသလဲဆိုတာ ရှင် သိရဲ့လား။"

"နားထောင်ပါရစေ။"

"ရှင်ကိုယ်တိုင်ကကို လျှို့ဝှက်ဆန်းကြယ်မှုတွေရဲ့ ပြယုဂ်ပဲလေ။ ရှင့်အနေနဲ့ ပိုင်ဇီသွေးကို ထုတ်ပြနိုင်တာကို မပြောနဲ့ဦး... ရှင်က အချိန်တွေကို ပြောင်းပြန်လှန်ပစ်နိုင်တယ်၊ ကံကြမ္မာကို ပြောင်းလဲပစ်နိုင်တယ်၊ တစ်ပါးတည်းသော တာအိုကို သက်သေပြနိုင်တယ်လို့ ပြောလာရင်တောင်မှ၊ ကျွန်မကတော့ လုံးဝ အံ့ဩမှာ မဟုတ်ဘူး။"

"ခုနက ရှင် ချွန်းရွှဲ့ဆေးကို ထုတ်ပြတုန်းက၊ ကျွန်မရဲ့ မျက်လုံးထဲမှာ နည်းနည်းလေးတောင် တုန်လှုပ်သွားတာကို ရှင် မြင်လိုက်လို့လား။"

"မမြင်ဘူး။"

"သေချာတာပေါ့။" ပိုင်ရွှယ်လင်က ပေါ့ပေါ့ပါးပါးပင် ပြောလိုက်သည် - "ခုနက ကျွန်မ စိတ်ထဲမှာ တွေးလိုက်တာက... 'ဪ၊ လူသားဧကရာဇ်ကျန်းက ချွန်းရွှဲ့ဆေးကို ထုတ်ပြနိုင်တာပဲ၊ ဒါက သိပ်ပြီး ပုံမှန်ဖြစ်နေတဲ့ ကိစ္စပါပဲ' လို့ တွေးလိုက်တာ။"

ပိုင်ရွှယ်လင်က ဆက်ပြောသည် - "ကျွန်မက နည်းနည်းလေးမှ မအံ့ဩခဲ့ဘူး။"

"ရှင် ပြောခဲ့သေးတယ်လေ... အဲ့ဒီ ကျင့်ကြံသူလေးက ကျွန်မရဲ့ ခန္ဓာကိုယ်ကို မြင်သွားရင်၊ ကျွန်မက သူ့ကို သတ်ချင် သတ်ပစ်လိမ့်မယ်လို့။ ဒါပေမဲ့ သူက ချွန်းရွှဲ့ဆေးကို ထုတ်ပေးနိုင်တယ်ဆိုရင်၊ သူ့ကို သတ်လိုက်ရင် ချွန်းရွှဲ့ဆေးကို ဘယ်တော့မှ ပြန်ရနိုင်မှာ မဟုတ်ဘူးလေ။ အဲ့ဒီအခါကျရင် ကျွန်မက အရမ်း ဗျာများသွားလိမ့်မယ်။ အဲ့ဒီလို ဗျာများနေတယ်ဆိုတာကပဲ ကျွန်မရဲ့ စိတ်အာရုံအားလုံးက အဲ့ဒီ ကျင့်ကြံသူလေးဆီ ရောက်သွားတယ်ဆိုတဲ့ အဓိပ္ပာယ်ပဲ။ ဒါဟာ သူ့ကို ချစ်မြတ်နိုးသွားစေမယ့် အစပြုရာ ဖြစ်လာလိမ့်မယ်။ ပြီးတော့... တိုက်ဆိုင်မှုတွေဖြစ်တဲ့... ကျွန်မ အဆိပ်မိနေတာတို့၊ သူက အရမ်း ကြင်နာတတ်တာတို့ စသဖြင့် အားလုံး ပေါင်းစပ်လိုက်ရင်... ယေဘုယျအားဖြင့်တော့ ကျွန်မ အဲ့ဒီ ကျင့်ကြံသူလေးကို ချစ်မြတ်နိုးသွားနိုင်ခြေ အများကြီး ရှိပါတယ်။"

"အခု ရှင် နားလည်ပြီလား။ ချွန်းရွှဲ့ဆေး ထုတ်ပြနိုင်တဲ့ သူတိုင်းကို ကျွန်မ ချစ်မြတ်နိုးသွားမှာ မဟုတ်ဘူး။ တိုက်ဆိုင်မှုအမျိုးမျိုး ကြုံတွေ့ပြီးမှသာ တစ်ယောက်ယောက်ကို ချစ်မြတ်နိုးသွားတာပါ။"

"ဪ... ဒီလိုကိုး။" ကျန်းလီ မျက်စိပွင့်သွားသည်။ ဤကိစ္စများထဲတွင် ဤမျှလောက် ရှုပ်ထွေးသော တွေးခေါ်မှုများ ပါဝင်နေမည်ဟု သူ မထင်ထားခဲ့ပေ။

"အခု ရှင် ကျွန်မကို ပြောပြလို့ ရပြီလား။ ကျွန်မရဲ့ စိတ်နေစိတ်ထားတွေကို ဒီလောက်အထိ အသေးစိတ် သိနေတဲ့သူက ဘယ်သူလဲ။ ကျွန်မရဲ့ အဲ့ဒီ ချီလင်ငတုံးအစ်ကိုလား။" ထိုစကားကို ပြောလိုက်ချိန်တွင် ပိုင်ရွှယ်လင်၏ မျက်လုံးထောင့်များ၌ သတ်ဖြတ်လိုစိတ် အနည်းငယ် ပေါ်ထွက်လာသည်။

ယုတ္တိအရဆိုလျှင် သူမသည် ဤအစ်ကိုဖြစ်သူကို အစောကြီးကတည်းက သတ်ပစ်သင့်ပြီဖြစ်သည်။ သို့သော် ချီလင်ဆိုသည်မှာ ကံကောင်းခြင်း၏ သင်္ကေတဖြစ်ရာ၊ ချီလင်ဘုရင်ဖြစ်သော သူမ၏ အစ်ကိုမှာလည်း မယုံနိုင်လောက်အောင် ကံကောင်းလွန်းလှသည်။ သူမက သူ့ကို သတ်ရန် ကြိုးစားတိုင်း၊ သူသည် တိုက်ဆိုင်မှုအမျိုးမျိုးဖြင့် သေဘေးမှ အမြဲတမ်း လွတ်မြောက်သွားလေ့ ရှိသည်။

"ချီလင်ဘုရင် မဟုတ်ဘူး။" ကျန်းလီ ခေါင်းခါလိုက်သည် - "လက်ရှိ ငါကိုယ်တိုင်တောင် နားမလည်နိုင်သေးတဲ့ တည်ရှိမှု တစ်ခုပဲ။"

"ဒီလိုလား။"

ကျန်းလီ၏ စကားကို ကြားလိုက်ရသဖြင့်၊ ပိုင်ရွှယ်လင်သည် ထိုသူကို သတ်၍ မရနိုင်တော့မှန်း သဘောပေါက်သွားသည်။ လူသားဧကရာဇ်ကျန်းပင် နားမလည်နိုင်သော တည်ရှိမှုကို သူမက ဘယ်လိုလုပ် နိုင်မလဲ။

ကျန်းလီသည် ချွန်းရွှဲ့ဆေးကို ပိုင်ရွှယ်လင်ရှေ့သို့ တွန်းပေးလိုက်သည်။

"တကယ်ပဲ ကျွန်မကို ပေးတာလား။" အဖြေကို သိနေသော်လည်း ပိုင်ရွှယ်လင်မှာ အလွန် ဝမ်းသာသွားသည်။ ခုနက သူမ ဝမ်းမသာခဲ့ခြင်းမှာ ကျန်းလီက သူမကို စော်ကားနေသည်ဟု ထင်မှတ်ခဲ့သောကြောင့် ဖြစ်သည်။ ယခု အထင်အမြင်လွဲမှုများ ရှင်းလင်းသွားပြီဖြစ်ရာ၊ သူမသည် သန့်စင်သော ပိုင်ဇီအဖြစ်သို့ ဆင့်ကဲပြောင်းလဲနိုင်တော့မည်ဖြစ်သဖြင့် ဘယ်လိုလုပ် ဝမ်းမသာဘဲ နေမလဲ။

လက်ရှိအချိန်တွင် သူမ၌ ချီလင်၏ကံကောင်းမှုများ ပါဝင်သလို၊ ပိုင်ဇီ၏ တန်ခိုးစွမ်းအားများလည်း ပါဝင်နေသဖြင့် ခန္ဓာပေါင်းစည်းခြင်းအဆင့်တွင် အလွန်သန်မာနေသည်။ သို့သော် ဤသွေးမျိုးရိုး နှစ်ခုမှာ သူမ၏ မိဘများကဲ့သို့ သဟဇာတ မဖြစ်ကြပေ။ အထူးသဖြင့် ကျင့်ကြံမှုအဆင့် မြင့်မားလာသည်နှင့်အမျှ၊ သွေးမျိုးရိုး နှစ်ခု၏ တိုက်ခိုက်မှုမှာ ပိုမို ပြင်းထန်လာခဲ့သည်။ အကယ်၍သာ သူမသည် အလွန် သန်မာသူ မဟုတ်ခဲ့လျှင်၊ ကိုယ်ခံပညာကို တွဲဖက်မကျင့်ကြံခဲ့လျှင်၊ သို့မဟုတ် နဂါးနန်းတော်မှ 《ကျန်းလီ၏ လူသားဧကရာဇ် ကျင့်စဉ်》 ကို ခိုးမသင်ခဲ့လျှင်... သူမ၏ ခန္ဓာကိုယ်မှာ သွေးကြောများ ပေါက်ထွက်ပြီး သေဆုံးသွားသည်မှာ ကြာလှလေပြီ။

"မင်းက ငါ့ကို ဘယ်လိုမှ ချစ်လာမှာ မဟုတ်ဘူးဆိုတော့၊ ငါလည်း စိတ်အေးလက်အေးနဲ့ ဒီဆေးကို ပေးလို့ ရသွားပြီပေါ့။"

"..."

သူတော်စင်ကျန့်ရှင်းက ဒီလိုလူမျိုးကို သဘောကျနေတာ... တကယ်ကို မျက်စိကန်းတာပဲ။ ဟု ပိုင်ရွှယ်လင် စိတ်ထဲမှ တွေးလိုက်မိသည်။

"အလကားပေးတာတော့ မဟုတ်ဘူးနော်။ စည်းကမ်းချက် တစ်ခုရှိတယ်။ မင်းရဲ့ မွေးရာပါ ပါရမီဖြစ်တဲ့ 'အရာအားလုံးကို သိမြင်နိုင်စွမ်း' ကို သုံးပြီး ကိစ္စတစ်ခုလောက် တွက်ချက်ပေးရမယ်။"

ပိုင်ရွှယ်လင်က ချက်ချင်း သဘောတူလိုက်သည်။

သူမသည် အပေါ်သို့ ခုန်တက်လိုက်ရာ၊ သမင်ဂျိုနှင့် နဂါးအမြီးပါရှိပြီး တစ်ကိုယ်လုံး ဖြူဖွေးနေသော ခန့်ညားလှသည့် ချီလင်ကြီးတစ်ကောင်အဖြစ် ပြောင်းလဲသွားသည်။

သူမသည် ပတ်ဝန်းကျင်ကို မျှော်ကြည့်လိုက်ရာ၊ လောကကြီးကို အုပ်စိုးသော ရှင်ဘုရင်တစ်ပါးအလား ဖြစ်နေသည်။ အရပ်မျက်နှာအသီးသီးတွင် ပျံ့နှံ့နေသော နယ်စားဘုရင်များကို မသိမသာ ကျောချမ်းသွားစေပြီး၊ မကောင်းသော အဖြစ်အပျက်တစ်ခုခု ဖြစ်တော့မည်ဟု ကြိုတင် ခံစားလိုက်ရစေသည်။

ပိုင်ရွှယ်လင်သည် ခေါင်းကိုမော့ကာ ချွန်းရွှဲ့ဆေးကို မျိုချလိုက်ပြီး၊ လေထဲတွင် မျက်လုံးမှိတ်ကာ ခွေထိုင်လိုက်သည်။

ကျန်းလီသည် ပိုင်ရွှယ်လင်၏ ချီလင်ခန္ဓာကိုယ်မှ သွေးမျိုးရိုး နှစ်ခု ကွဲထွက်လာပြီး၊ ရွှေရောင် ချီလင်နှင့် အဖြူရောင် ပိုင်ဇီတို့၏ မူလပုံစံများ ထွက်ပေါ်လာသည်ကို မြင်တွေ့လိုက်ရသည်။

ချီလင်နှင့် ပိုင်ဇီတို့သည် အပြင်းအထန် တိုက်ခိုက်နေကြပြီး၊ တစ်ကောင်ကိုတစ်ကောင် အလျှော့မပေးကြပေ။ ဤမြင့်မြတ်သော သားရဲမြတ် နှစ်မျိုး၏ သွေးမျိုးရိုးများမှာ အဆင့်အတန်း တူညီကြသဖြင့် မူလက အနိုင်အရှုံး ခွဲခြား၍ မရနိုင်ပေ။

သို့သော် ယခုတစ်ကြိမ်တွင်မူ အခြေအနေများ ပြောင်းလဲသွားခဲ့ပြီ။ ပိုင်ဇီတွင် ယင်ဓာတ်နှင့် ယန်ဓာတ် စွမ်းအား နှစ်ခု ပေါင်းစပ်ပါဝင်လာသဖြင့် စိတ်ကူး၍မရနိုင်လောက်အောင် သန်မာလာပြီး ချီလင်ကို အနိုင်ယူရန် ကြိုးစားလာသည်။

ချီလင်ကလည်း အလွယ်တကူ အရှုံးမပေးဘဲ၊ ဤဆင့်ကဲပြောင်းလဲမှုကို ဖျက်ဆီးရန်အတွက် ကံကြမ္မာပါရမီကို အသုံးပြုလိုက်သည်။

ရွှေရောင်နှင့် အဖြူရောင် အလင်းတန်းများမှာ နေမင်းနှစ်စင်းအလား အလွန်တောက်ပနေပြီး၊ ပိုင်ဇီအင်ပါယာ တစ်ခုလုံးကို လင်းထိန်သွားစေသည်။

"ဒါ... ပိုင်ဇီဧကရာဇ် ကောင်မလေးပဲ။"

နယ်စားဘုရင်အချို့က ချက်ချင်း သဘောပေါက်သွားကြသည်။ ဤသည်မှာ ပိုင်ဇီဧကရာဇ်က သန့်စင်သော ပိုင်ဇီအဖြစ်သို့ ဆင့်ကဲပြောင်းလဲနေခြင်းပင်။

"သူမကို ဆက်လုပ်ခွင့် ပေးလို့ မဖြစ်ဘူး။"

"သူမသာ သန့်စင်တဲ့ ပိုင်ဇီ ဖြစ်သွားရင်၊ ငါတို့တွေ တစ်သက်လုံး ခေါင်းမော့နိုင်တော့မှာ မဟုတ်ဘူး။"

"ငါတို့က သီးခြား ဘုရင်လုပ်ဖို့ ကြံစည်ထားတာ၊ သူမသာ အောင်မြင်သွားရင် ငါတို့ကို လွယ်လွယ်နဲ့ လွှတ်ပေးမှာ မဟုတ်ဘူး။"

နယ်စားဘုရင်များအကြား အဝေးရောက် ဆက်သွယ်ရေး အဆောင်စာရွက်ဖြင့် ဆက်သွယ်ထားခြင်း မရှိသော်လည်း၊ သူတို့၏အတွေးများမှာ တူညီနေကြသည်။ ပိုင်ရွှယ်လင်က ချွန်းရွှဲ့ဆေးကို ဘယ်ကနေ ရလာသည်ဖြစ်စေ၊ သူမကို စစ်မှန်သော ပိုင်ဇီဧကရာဇ်ဖြစ်ခွင့် လုံးဝ မပေးနိုင်ပေ။

သူတို့အားလုံးသည် မိမိတို့၏ အခြေစိုက်စခန်းများမှ တစ်ပြိုင်နက်ထွက်ခွာလာပြီး မြို့တော်ဆီသို့ ဦးတည်သွားကြသည်။

ပိုင်ရွှယ်လင်က ယခုအချိန်တွင် ချွန်းရွှဲ့ဆေးကို ရဲရဲဝံ့ဝံ့ သောက်သုံးရဲသည်ဆိုကတည်းက၊ သူတို့ကို တားဆီးရန် သေချာပေါက် ကြိုတင်ပြင်ဆင်မှုများ လုပ်ထားမည်ကို သူတို့ သိကြသည်။

ချုံချီဘုရင်မှာ ထျန်းယွမ်အင်ပါယာတွင် သေဆုံးသွားပြီဖြစ်ရာ ယခုအခါ နယ်စားဘုရင် ၇ ပါးသာ ကျန်ရှိတော့သည်။

အဲ့တော့ရော ဘာဖြစ်လဲ။ သန့်စင်သော သွေးမျိုးရိုးသို့ ပြောင်းလဲသည့် လုပ်ငန်းစဉ်တွင် အနည်းငယ်မျှ အနှောင့်အယှက် ပေး၍မရပေ။ သူတို့ ၇ ပါးစလုံးမှာ ခန္ဓာပေါင်းစည်းခြင်း နှောင်းပိုင်းအဆင့် မိစ္ဆာသားရဲများ ဖြစ်ကြရာ၊ ပိုင်ရွှယ်လင် ဘာတွေပဲ ပြင်ဆင်ထားပါစေ၊ သူတို့ ဖျက်ဆီးနိုင်မည်ဟု ယုံကြည်မှုအပြည့် ရှိနေကြသည်။

ဒေါသတကြီးဖြင့် မြို့တော်သို့ ရောက်ရှိလာသော နယ်စားဘုရင် ၇ ပါးသည်၊ ပိုင်ရွှယ်လင်၏ ပတ်လည်တွင် မြူခိုးများ ဖုံးလွှမ်းနေပြီး သွေးနှင့် လေများ ကောင်းကင်သို့ ထိုးတက်နေသည်ကို မြင်လိုက်ရသည်။ သူမ၏ ခန္ဓာကိုယ်အတွင်း ပြင်းထန်သော တိုက်ပွဲများ ဖြစ်ပွားနေပြီး၊ ပိုင်ဇီသွေးမျိုးရိုးက အသာစီး ရနေသည်ကို ရှင်းလင်းစွာ မြင်တွေ့ရသည်။

သူတို့ တိုက်ခိုက်ရန် ပြင်လိုက်စဉ်မှာပင်... ပိုင်ရွှယ်လင်၏ အောက်ဘက်တွင်ရပ်နေသော ကျန်းလီက သူတို့ကို လက်လှမ်းပြနေသည်ကို တွေ့လိုက်ရသည်။

ထိုအခိုက်အတန့်တွင် သူတို့၏အသည်းနှလုံးများ ကွဲအက်မတတ် ထိတ်လန့်သွားကြသည်။

"လီးပဲ... လူသားဧကရာဇ် ပါလား။"

"ပြန်ကြစို့၊ ပြန်ကြစို့။ သန့်စင်တဲ့ ပိုင်ဇီဖြစ်သွားတာ ဘာများ ဆန်းလို့လဲ။ မကြည့်ကြနဲ့တော့၊ ပြန်ကြမယ်။"

"ဟား... ဟား... ငါ ဘယ်ရောက်နေတာလဲ... ငါ့ရဲ့ အိပ်မက်လမ်းလျှောက်တဲ့ ရောဂါက မပျောက်သေးဘူးပဲ။ သွားမယ် သွားမယ်... အိမ်ပြန်အိပ်တော့မယ်။"

"မင်း အိပ်ချင်မူးတူးဖြစ်နေတာ၊ တခြားနေရာကို လွဲသွားမှာစိုးလို့ ငါ လိုက်ပို့ပေးမယ်လေ။"

***