ငါ့ဆီမှာ မြေပုံတစ်ခုရှိတယ်
Vol. 70 Ch. 738
“ကြယ်နှလုံးသားက ဒီလောက်အရေးကြီးနေတာကို ဘာလို့ ကြိုမရှာထားခဲ့တာလဲ”
ဟုန်းမန်ကျိကျွင်းက အနည်းငယ် နားမလည်နိုင်သလို မေးလိုက်သည်။
နေနတ်ဘုရားက အေးစက်သော အကြည့်ဖြင့် ကြည့်ကာ “မင်းရဲ့ ညီအစ်ကို မောင်နှမတစ်ယောက်ယောက် သေသွားရင် ဘာကိစ္စမှ မရှိသေးတဲ့အချိန်မှာ သူ့သင်္ချိုင်းကို သွားတူးဖို့ မင်း ရွေးချယ်မှာလား”
“အဲဒီလက်နက်က ကျွင်းချန်ချင်းကို သတ်နိုင်တယ်ဆိုမှတော့ ဒီကမ္ဘာပေါ်က ဘယ်သူ့ကိုမဆို သတ်နိုင်တယ်ဆိုတဲ့ သဘောပဲ၊ အဲဒါက တကယ့်ကို အန္တရာယ်များတဲ့ အရာတစ်ခုပဲ”
“တကယ်လို့ အဲဒီလက်နက်ကို အချိန်မတိုင်ခင် ပေါ်လာအောင် လုပ်ခဲ့မယ်ဆိုရင် ခင်ဗျားတို့လို ကျင့်ကြံသူတွေရဲ့ စရိုက်နဲ့ဆို ကျွင်းချန်ချင်း ပြန်မနိုးထခင်မှာတင် ဒီကမ္ဘာကြီးကို အရင် ဖျက်ဆီးပစ်ကြလိမ့်မယ်”
ဟုန်းမန်ကျိကျွင်း ဘာမှ ထပ်မပြောတော့ပေ။
နေနတ်ဘုရား ပြောသည့်စကားမှာ နားဝင်ဆိုးသော်လည်း ငြင်းမရသော အမှန်တရားပင် ဖြစ်သည်။
တကယ်လို့ လူတွေသာ ဒီလောက် အစွမ်းထက်တဲ့ သတ်ဖြတ်ခြင်းလက်နက် ရှိမှန်း သိသွားကြရင် နည်းမျိုးစုံသုံးပြီး သူတို့လက်ထဲ ရောက်အောင် ကြိုးစားကြမှာ အသေအချာပင်။
ထိုသို့ဆိုလျှင် ကျွင်းချန်ချင်း ပြန်မနိုးထလာသေးခင်မှာတင် ကမ္ဘာကြီးမှာ ကပ်ဘေးကြီးတစ်ခုနှင့် ရင်ဆိုင်ရပေလိမ့်မည်။
ကြယ်မြေပုံကို လနတ်သမီး တစ်ယောက်တည်း၏ ဦးနှောက်ထဲတွင်သာ သိမ်းဆည်းထားခြင်းမှာ တကယ့်ကို ပညာရှိသော ရွေးချယ်မှုတစ်ခုပင် ဖြစ်သည်။
ဤကဲ့သို့သော ကိစ္စမျိုးကို လူသိနည်းလေ ကောင်းလေဖြစ်ပြီး လျှို့ဝှက်ချက်ကို ထိန်းသိမ်းထားသူမှာလည်း အစွမ်းထက်လေ ပိုကောင်းလေပင်။
လနတ်သမီးက အသင့်တော်ဆုံးသော လူဖြစ်သည်။
သို့သော် လနတ်သမီးက ဤသို့ ရုတ်တရက် သေဆုံး သွားလိမ့်မည်ဟု မည်သူကမှ ထင်မှတ်မထားခဲ့ကြသလို ကြိုတင်ပြင်ဆင်မှုလည်း မရှိခဲ့ကြပေ။
“ဒါဆို အဲဒီ ကြယ်မြေပုံကို ခြေရာခံနိုင်မယ့် သဲလွန်စမျိုးကော ရှိနိုင်မလား"
" ငါတို့ ရှာကြည့်လို့ ရတာပေါ့”
လုံကျိုကျိုးက ပြော၏ ။
ယခုတစ်ကြိမ်တွင် နေနတ်ဘုရား ရှင်းပြရန် မစောင့်တော့ဘဲ ဟုန်းမန်ကျိကျွင်းက ဦးစွာ ပြောလာသည်။ “ရှာဖူးတယ်၊ ဒါပေမဲ့ ရှာမတွေ့ဘူး”
“ကြယ်မြေပုံ ဆိုတာက ကြယ်တာရာဘိုးဘေး ကွယ်လွန်ပြီးမှ ရှိလာတာ မဟုတ်ဘူး၊ ရှေး ကတည်းက ရှိခဲ့တာ”
“မူလ ဝိညာဉ် ၅ ပါး ထဲမှာ ကြယ်တာရာဘိုးဘေးက အလျှို့ဝှက်ဆုံး တစ်ယောက်ပဲ၊ သူ နေထိုင်တဲ့နေရာကို ဘယ်သူမှ မသိကြဘူး"
" တစ်ချိန်က အစွမ်းထက်တဲ့ ကျင့်ကြံသူ အမြောက်အမြားက ကြယ်တာရာဘိုးဘေးရဲ့ တည်နေရာကို ရှာဖွေဖို့ ကြိုးစားခဲ့ကြပေမဲ့ ဘယ်သူမှ မအောင်မြင်ခဲ့ဘူး”
“အဲဒီတုန်းက ဒီလောကမှာ ကြယ်တာရာဘိုးဘေးရှိရာကို သွားနိုင်တဲ့ ကြယ်မြေပုံ တစ်ခု ရှိတယ်လို့ လူပြောများခဲ့ပေမဲ့ ဘယ်သူမှ ရှာမတွေ့ခဲ့တဲ့အတွက် နောက်ဆုံးတော့ မဟုတ်မမှန်တဲ့ ဒဏ္ဍာရီတစ်ခုလိုပဲ ပျောက်ကွယ်သွားခဲ့တာ"
" အခု နေနတ်ဘုရား ပြန်ပြောမှပဲ ငါ အဲဒီကိစ္စကို သတိရလာတော့တယ်”
နေနတ်ဘုရားက ခေါင်းညိမ့်သည်။ “ဟုတ်တယ်”
“ကြယ်တာရာပင်လယ်က အတိုင်းအဆမရှိ ကျယ်ပြောလှတယ်၊ အဲဒီ ကြယ်မြေပုံက ကုဋေကုဋာမကတဲ့ ကြယ်တွေကြားထဲမှာ ပုန်းကွယ်နေတာ”
“တကယ်ရှာချင်တယ်ဆိုရင် လူအင်အား အမြောက်အမြား သုံးပြီး ကြယ်တွေရဲ့ လမ်းကြောင်းအတိုင်း တစ်ခုချင်းစီ လိုက်ရှာရလိမ့်မယ်"
" ငါတို့မှာ အချိန်လည်း မရှိဘူး၊ လူအင်အားလည်း မလုံလောက်ဘူး၊ အဲဒါကြောင့်...”
သူက လက်ဖဝါးကို ဖြန့်ပြလိုက်ပြီး ဤကိစ္စမှာ ဘာမှမတတ်နိုင်တော့ကြောင်း ဖော်ပြလိုက်သည်။
လူတိုင်း ထပ်မံ တိတ်ဆိတ်သွားကြပြီး ပတ်ဝန်းကျင်မှာ စိတ်ဓာတ်ကျဖွယ် ကောင်းလာသည်။
လနတ်သမီး သေဆုံး ခြင်းနှင့် ကြယ်မြေပုံ ပျောက်ကွယ်သွားခြင်းတို့မှာ ကျွင်းချန်ချင်းကို ရင်ဆိုင်ရန် ကြိုးစားနေသည့် သူတို့အတွက် နှစ်ထပ်ကွမ်း ထိုးနှက်ချက်ပင် ဖြစ်သည်။
ကျွင်းချန်ချင်းကို ကိုင်တွယ်ရန် ပို၍ ခက်ခဲသွားပြီ ဖြစ်သည်။
ထိုအချိန်တွင် ထန်ထျန်းမှာလည်း တိတ်ဆိတ်နေသော်လည်း သူ၏ စိတ်ထဲတွင်မူ အကြီးအကျယ် တုန်လှုပ်နေမိသည်။
နေနတ်ဘုရားက ကြယ်မြေပုံ အကြောင်း ပြောလိုက်သည့်နောက်တွင် လွန်ခဲ့သော နှစ်အနည်းငယ်က တိုက်တိုက်ဆိုင်ဆိုင် သူ ရရှိခဲ့ဖူးသော ကြယ်မြေပုံတစ်ခုကို သတိရသွားသည်။
ထိုစဉ်က သူက တိမ်တိုက်ထျန်းဖူနန်းတော် ထဲသို့ ဝင်ရောက်ကာ နဂါးတံခါး စမ်းသပ်ပွဲကို အောင်မြင် ပြီးစ အချိန်ဖြစ်သည်။
ထိုစဉ်က သူသည် ထုန်းရှန့်တောင်ပေါ်သို့ ရောက်ရှိသွားခဲ့ပြီး ကြယ်ကြည့် စမ်းသပ်ပွဲ အခွင့်အရေး တစ်ခု ရရှိခဲ့သည်။
ထိုစမ်းသပ်ပွဲကို တစ်ယောက်ယောက်က ဖိတ်ခေါ်လို့ သွားခဲ့ခြင်းဖြစ်ပြီး "ထိပ်တန်း ကြယ်ကြည့်ညီလာခံ" ဟု ခေါ်ကြောင်း မှတ်မိနေသည်။
စမ်းသပ်မှု ပြုလုပ်သည့်နေရာမှာ ရှင်းဟယ် အင်မော်တယ် ဧကရာဇ် ကျင့်ကြံစဉ်က ချန်ထားခဲ့သော ကြယ်တာရာ စင်မြင့် တစ်ခု ဖြစ်သည်။
ထို စင်မြင့် အတွင်းမှာပင် ထန်ထျန်းက မထင်မှတ်ဘဲ အလွန်လျှို့ဝှက်သော နေရာလွတ် တစ်ခုအတွင်းသို့ ဝင်မိသွားခဲ့သည်။
ထိုနေရာတွင် သူက ရှင်းဟယ် အင်မော်တယ် ဧကရာဇ်၏ ကွဲထွက်နေသော ဝိညာဉ်ကို ကယ်တင်ခဲ့သလို ကြယ်တာရာခရစ်စတယ် များစွာကိုလည်း ရရှိခဲ့သည်။ ယခု သူ၏ လက်ထဲရှိ ရှင်းယွဲ့ အင်မော်တယ်ဓား မှာလည်း ထိုကြယ်တာရာ ခရစ်စတယ် များကို အခြေခံကာ သွန်းလုပ်ထားခြင်း ဖြစ်သည်။
ဒါတွေအပြင် သူက ရှင်းဟယ် အင်မော်တယ် ဧကရာဇ်၏ လက်ထဲမှ ကြယ် မြေပုံတစ်ခုကိုလည်း ရရှိခဲ့သေးသည်။
ထိုမြေပုံမှာ ရှင်းဟယ် အင်မော်တယ် ဧကရာဇ်၏ ဝိညာဉ်ကို ဝယ်ယူခဲ့သော အထွတ်အထိပ် စိတ်ဆန္ဒ တစ်ခုက သူ့ကို ပေးအပ်ခဲ့ခြင်း ဖြစ်သည်။ ထိုစိတ်ဆန္ဒက လူတစ်ယောက် ရောက်လာမည့်အချိန်ကို စောင့်ဆိုင်းကာ ဤကြယ်မြေပုံကို ထိုလူ့လက်ထဲ အပ်နှံရန် ရှင်းဟယ် အင်မော်တယ် ဧကရာဇ်ကို ခိုင်းစေခဲ့ခြင်း ဖြစ်သည်။
ထိုစဉ်က ထန်ထျန်းသည် ဘာမှမသိသေးသဖြင့် အလွန် ထူးဆန်းနေခဲ့မိသည်။
ဘာဖြစ်လို့ စောင့်နေတဲ့လူက သူ ဖြစ်နေရတာလဲဆိုတာကို သူ နားမလည်ခဲ့ပေ။
ထိုမြေပုံက ဘာအတွက် သုံးရမှန်းလည်း သူ မသိခဲ့ပေ။
အချိန်ကြာလာသည်နှင့်အမျှ သူ၏ လက်ထဲတွင် ပစ္စည်းကောင်း များ ပိုများလာသဖြင့် ဤကိစ္စကို သူ မေ့လျော့နေခဲ့သည်။
နေနတ်ဘုရားက ရုတ်တရက် ထုတ်ပြောမှသာ သူ ပြန်သတိရလာခြင်း ဖြစ်သည်။
ထို့ကြောင့် ထန်ထျန်းက သူ၏ နေရာလွတ် အတွင်းရှိ ထောင့်စွန်းတစ်ခုမှ ထိုကြယ်မြေပုံကို အမြန် ရှာထုတ်လိုက်သည်။
ရှာတွေ့လို့ ကြည့်လိုက်တဲ့အခါမှာတော့ တကယ်ပဲ ထိတ်လန့်သွားရသည်။
အရင်က ကျင့်ကြံခြင်း အဆင့်မမီသေးသဖြင့် ဤမြေပုံ၏ အဓိပ္ပာယ်ကို သူ နားမလည်ခဲ့သော်လည်း ယခုအခါတွင်မူ ဤမြေပုံက သာမန်လူတစ်ယောက်၏ လက်ရာ မဟုတ်ကြောင်း တစ်ချက်ကြည့်ရုံဖြင့် သိလိုက်သည်။
မြေပုံအတွင်းရှိ အဝေးတစ်နေရာသို့ ညွှန်ပြနေသော တောက်ပသည့် မျဉ်း မှာ အသန့်စင် ဆုံးသော ကြယ်တာရာ စွမ်းအားများဖြင့် ဖွဲ့စည်းထားခြင်း ဖြစ်ပြီး ထူးဆန်းသော နိယာမများစွာလည်း ပါဝင်နေသည်။
ထန်ထျန်းက ၎င်းတို့မှာ ကြယ်တာရာ ကမ္ဘာ၏ သီးသန့် နိယာမများ ဖြစ်ကြောင်း ချက်ချင်း သိလိုက်သည်။
ရှင်းဟယ် အင်မော်တယ် ဧကရာဇ် ပြောခဲ့သော စိတ်ဆန္ဒမှာ ပျောက်ကွယ်သွားပြီ ဖြစ်ကြောင်းနှင့် သူကိုယ်တိုင်မှာ ကပ်ဘေးရိပ်သိမ်းသူ ဖြစ်ကြောင်းတို့ကို ပြန်လည် ဆက်စပ်ကြည့်လိုက်သောအခါ ဤမြေပုံက မည်သည့်နေရာကို ညွှန်ပြနေသနည်းဆိုသည့် အဖြေမှာ ရှင်းလင်းသွားတော့သည်။
“အားလုံး အရင်ပြန်နှင့်ကြဦး”
ခဏမျှ တိတ်ဆိတ်သွားပြီးနောက် နေနတ်ဘုရားက ပြောလိုက်သည်။ “ကမ္ဘာကြီးက ကပ်ဘေးကြီးအတွင်း ရောက်နေပြီ၊ အရင်ဆုံး ထိခိုက်မှု ဖြစ်နေတဲ့ ကမ္ဘာတွေကို သွားပြီး အခြေအနေတွေ ထိန်းသိမ်းကြ"
" ငါလည်း ပြန်ပြီး စိတ်အေးအေးထားကာ နောက်ထပ် ဘာလုပ်ရမလဲဆိုတာကို စဉ်းစားရဦးမယ်”
“ခင်ဗျားတို့ ငါ့ဆီက သတင်းကို စောင့်နေကြ"
" အဲဒီ လက်နက်နဲ့ ကြယ်မြေပုံ ကိစ္စကိုတော့ မရှိတော့ဘူးလို့ပဲ သဘောထားလိုက်ကြပါတော့”
ပြောပြီးသည်နှင့် သူက ထွက်သွားရန် ပြင်လိုက်သည်။
သို့သော် ထိုအချိန်တွင် ထန်ထျန်းက သူ့ကို တားလိုက်သည်။
“ခဏလေး”
ထန်ထျန်းသည် နေနတ်ဘုရားကို ကြည့်ကာ အသက်ပြင်းပြင်းရှူပြီး ပြောလိုက်သည် ။“ခုနက ခင်ဗျားတို့ ကြယ်မြေပုံ အကြောင်း ပြောနေကြတယ်၊ ငါ့ဆီမှာ... မြေပုံတစ်ခု ရှိတယ်”
“ကြည့်ရတာ၊ ခံစားရတာကတော့... ဖြစ်နိုင်တာက...”
သူ စကားကို အဆုံးမသတ်သော်လည်း သူ ဘာပြောချင်သလဲဆိုတာကို အားလုံး ခန့်မှန်းမိလိုက်ကြသည်။
နေနတ်ဘုရားက မျက်မှောင်ကြုတ်လိုက်ပြီး ထန်ထျန်း စကားမဆုံးခင်မှာပင် ဖြတ်ပြောလိုက်သည်။
“ရပ်လိုက်”
သူက ထန်ထျန်း ပြောမည့်စကားကို တားဆီးလိုက်ပြီးနောက် အခြားသူများကို တစ်ချက်ကြည့်ကာ ထန်ထျန်းကို ပြောလိုက်သည်။ “ဟိုဘက်လာခဲ့၊ အဲဒီမှာ ပြောရအောင်”
ထို့နောက် သူက ဘေးတစ်ဖက်သို့ အမြန် လျှောက်သွားသည်။
ထန်ထျန်းမှာ ခေတ္တ ကြောင်သွားသော်လည်း နောက်မှ လိုက်သွားခဲ့သည်။
ထို့နောက် နေနတ်ဘုရားက သူ၏ လှံရှည်ကို ဝေ့ယမ်းကာ သူတို့နှစ်ဦးကြားက စကားသံကို မည်သူမျှ မကြားနိုင်စေရန် မီးလျှံအကာအကွယ် တစ်ခု ပြုလုပ်လိုက်သည်။
“အဲဒါ တကယ်ပဲ အဲဒီမြေပုံ ဟုတ်လို့လား”
နေနတ်ဘုရား၏ မျက်နှာမှာ အလွန် တည်ကြည်နေသည်။
ပြောရလျှင် စိတ်လှုပ်ရှားနေပုံပင်။
ထန်ထျန်းက ခဏရပ်ကာ “တော်တော်တော့ ဆင်တယ်၊ ဒါပေမဲ့ သေချာတော့ မပြောတတ်သေးဘူး”
“ဒါက ငါ တိုက်တိုက်ဆိုင်ဆိုင် ရထားတာဆိုတော့ ဘာအတွက် သုံးရမှန်းလည်း လုံးဝ မစဉ်းစားခဲ့ဖူးဘူး"
" ထားပါတော့၊ ခင်ဗျားကို ထုတ်ပြမယ်၊ ကြည့်ကြည့်လိုက်ပါ”
ထို့နောက် နေနတ်ဘုရား၏ စိုးရိမ်စိတ်နှင့် မျှော်လင့်ချက် ပြည့်နှက်နေသော အကြည့်များအောက်တွင် ထန်ထျန်းက သူ၏ နေရာလွတ် အတွင်းမှ ထိုကြယ်မြေပုံကို ထုတ်ယူလိုက်သည်။
ချက်ချင်းပင် နေနတ်ဘုရားမှာ ထိုနေရာမှာပင် မှင်တက်သွားတော့သည်။
“ငါ ဖွင့်ပြမယ်"
"အထဲမှာ အဝေးကြီးမှာ ရှိတဲ့ တည်နေရာတစ်ခုကို ညွှန်ပြထားတာ”
ထန်ထျန်းက ပြောရင်း မြေပုံကို ဖြန့်ရန် ပြင်လိုက်သည်။
“မလိုဘူး”
သို့သော် နေနတ်ဘုရားက ထိုလုပ်ရပ်ကို ချက်ချင်း တားလိုက်သည်။
သူက အသက်ပြင်းပြင်းရှူကာ ထန်ထျန်းကို အလွန် ထူးဆန်းသော အကြည့်ဖြင့် စိုက်ကြည့်နေသည်။
“မလိုတော့ဘူး”
“မင်း အဲဒါကို ထုတ်လိုက်တဲ့ အချိန်ကတည်းက ငါ သေချာသွားပြီ”
“အဲဒါက ကြယ်တာရာဘိုးဘေး သေဆုံး တဲ့ နေရာဆီကို သွားနိုင်တဲ့ ကြယ်မြေပုံ ပဲ”
နေနတ်ဘုရားက သူ၏ ရင်ထဲမှ ဝမ်းသာပီတိဖြစ်မှုကို အစွမ်းကုန် ထိန်းချုပ်ရင်း ပြောလိုက်တော့သည်။