အခန်း (၇၁၀-၇၁၂)

အခန်း ၇၁၀- ပျက်စီးခြင်းမျိုးနွယ်ဘုရင်မ အမိန့်တော်ပြား

အစည်းအဝေးခန်းမကို စောင့်ကြပ်နေသည့် ပျက်စီးခြင်းမျိုးနွယ်စစ်သည်များထံသို့ ယီယွင် လျှောက်လှမ်းသွားသည်ကို မြင်သောအခါ မြို့တော်ဝန်၊ ခန်းယန်နှင့် အဖွဲ့သားများမှာ မှင်တက်သွားကြသည်။

သူတို့သည် လူသားများဖြစ်သည့်အားလျော်စွာ သူတို့၏ အမြင်တွင် ပျက်စီးခြင်းမျိုးနွယ်စုမှာ အလွန်ခက်ထန်ပြီး စည်းကမ်းကြီးလှသည်။ အကယ်၍ တစ်စုံတစ်ရာ မှားယွင်းသွားပါက မည်သည့်ခွင့်လွှတ်မှုမျိုးမှမရှိဘဲ သတ်ဖြတ်ခံရနိုင်သည်ဟု သူတို့က ယူဆထားကြသည်။

ယီယွင်သည် မြန်မြန်လျှောက်နေသည်ဟု မထင်ရသော်လည်း ခြေလှမ်းအနည်းငယ်အတွင်းမှာပင် ကွင်းပြင်သို့ ရောက်ရှိသွားသည်။ ထိုနေရာကို စောင့်ကြပ်နေသော ထောင်နှင့်ချီသည့် ပျက်စီးခြင်းမျိုးနွယ်စစ်သည်များမှာ ယီယွင်နှင့် လင်ရှင်းထုံကို မြင်သည်နှင့် ချက်ချင်း တားဆီးလိုက်ကြသည်။

သူတို့က ယီယွင်ကို အကဲခတ်ယင်း ပြောလိုက်သည်။

"မင်းက ဘယ်သူလဲ အခု ပျက်စီးခြင်းမျိုးနွယ်ဘုရင်မကြီးက လူသားမျိုးနွယ်စုနဲ့ အရေးကြီးတာတွေ ဆွေးနွေးနေတာ။ အထဲကို ပေးမဝင်ဘူး"

ဤစစ်သည်များမှာ ကောင်းကင်မြေခွေး အဖွဲ့ဝင်များ မဟုတ်သဖြင့် ယီယွင်ကို မမှတ်မိကြချေ။

"ဟေ့ညီလေး... မင်း ဘာလုပ်နေတာလဲ ဒီလောက် စိတ်လိုက်မာန်ပါ လုပ်ရင် အဖမ်းခံရလိမ့်မယ်။ တစ်ခုခုဖြစ်ရင် လင်မိသားစုတောင် မင်းကို ကာကွယ်ပေးနိုင်မှာ မဟုတ်ဘူး"

ခန်းယန်က အပြေးအလွှား လိုက်လာပြီး တားလိုက်သည်။ သူသည် တောရိုင်းနယ်မြေတွင် ဆယ်နှစ်ကျော်ကြာ အကျဉ်းကျခံခဲ့ရဖူးသဖြင့် ပျက်စီးခြင်းမျိုးနွယ်စု၏ ပြင်းထန်သော စည်းကမ်းများကို ကောင်းကောင်း သိထားသည်။

ယခုအခြေအနေမှာ ထျန်းယွမ်တိုက်ကြီးမှ ဂိုဏ်းကြီး ၁၀ ဂိုဏ်းကျော် စုပေါင်းထားလျှင်ပင် ပျက်စီးခြင်းမျိုးနွယ်စုနှင့်ယှဉ်လျှင် အင်အားနည်းနေသေးသည်။ ထျန်းယွမ်တိုက်ကြီး၏ အင်အားအကြီးဆုံးဖြစ်သော သန့်စင်ရာနယ်မြေ ကျွန်းပိုင်ရှင် ဇနီးမောင်နှံပင်လျှင် ပျက်စီးခြင်းမျိုးနွယ်စုရှေ့၌ ရိုသေနေရပါက လင်မိသားစုမှာ ပြောနေစရာပင် မလိုတော့ချေ။

ခန်းယန်က ယီယွင်ကို ဆွဲခေါ်သွားရန် ပြင်လိုက်စဉ်မှာပင် ယီယွင်က ပြုံးလိုက်ပြီး သူ၏ သိုလှောင်လက်စွပ်ကို ထိလိုက်သည်။ လက်တစ်ချက် ဝေ့ယမ်းလိုက်ရုံဖြင့် သူ၏ လက်ထဲ၌ ရှေးဟောင်း ကြေးဝါအမိန့်တော်ပြားတစ်ခု ပေါ်လာပြီး ပျက်စီးခြင်းမျိုးနွယ်စစ်သည်များရှေ့တွင် ပြလိုက်သည်။

ယီယွင်သည် သူ့ကို တားထားသော စစ်သည်များကို မည်သည့်စကားမျှ ရှင်းပြမနေတော့ဘဲ ကျန်းရှောင်ယု ပေးထားသည့် အမိန့်တော်ပြားကိုသာ ထုတ်ပြလိုက်ခြင်း ဖြစ်သည်။ ထိုရိုးရှင်းသော အမိန့်တော်ပြားပေါ်တွင် ရှေးဟောင်း တောရိုင်းစာလုံး သုံးလုံးကို ထွင်းထုထားပြီး ကျောဘက်တွင်တော့ အသက်ဝင်လှသော အမှီးခြောက်ခုကောင်းကင်မြေခွေး ပုံစံ ရှိနေသည်။

ထိုအမိန့်တော်ပြားကို မြင်လိုက်ရသည်နှင့် ပျက်စီးခြင်းမျိုးနွယ်စစ်သည်များမှာ အကြီးအကျယ် တုန်လှုပ်သွားကြသည်။

ပျက်စီးခြင်းမျိုးနွယ်ဘုရင်မ အမိန့်တော်ပြား.......

ဤအမိန့်တော်ပြားမှာ အုပ်ချုပ်သူ ပျက်စီးခြင်းမျိုးနွယ်ဘုရင်မကိုယ်တိုင်သာ ပေးပိုင်ခွင့်ရှိသော အရာဖြစ်သည်။ ပျက်စီးခြင်းမျိုးနွယ်စုတစ်ခုလုံးတွင် ဤအမိန့်တော်ပြားကို ပိုင်ဆိုင်ထားသူမှာ လမ်းပြလူငယ် ကဲ့သို့သော အဆင့်အတန်းရှိသူများသာ ဖြစ်သည်။

သို့သော် သူတို့ရှေ့မှ လူငယ်မှာ ဝတ်စုံအရ ကြည့်လျှင် ပျက်စီးခြင်းမျိုးနွယ်စုဝင် မဟုတ်ဘဲ လူသားတစ်ဦးနှင့် ပိုတူနေသည်။ ထိုသူက အဘယ်ကြောင့် ဤမျှ အရေးကြီးသော အမိန့်တော်ပြားကို ပိုင်ဆိုင်ထားရသနည်း။

ဤစစ်သည်များမှာ ထိုအမိန့်တော်ပြားကို စာအုပ်များထဲတွင်သာ မြင်ဖူးကြသော်လည်း ၎င်းမှာ အတုမဟုတ်ကြောင်းကိုမူ ချက်ချင်း သိလိုက်ကြသည်။ အဘယ်ကြောင့်ဆိုသော် အမိန့်တော်ပြား ထွက်ပေါ်လာသည်နှင့် သူတို့၏ သွေးသားထဲမှ ပျက်စီးခြင်းမျိုးနွယ်ဘုရင်မအပေါ် ရိုသေလေးစားမှု အလိုလို ဖြစ်ပေါ်လာသောကြောင့်ပင်။

ပျက်စီးခြင်းမျိုးနွယ်စစ်သည်များမှာ မည်သည့်စကားမျှ ထပ်မပြောတော့ဘဲ အမိန့်တော်ပြားကို အရိုအသေပေးလိုက်ကြသည်။ ဤအမိန့်တော်ပြားကို မြင်ရခြင်းမှာ ဘုရင်မကြီးကို ကိုယ်တိုင် မြင်တွေ့ရသကဲ့သို့ပင် ဖြစ်သည်။

"မင်းက..."

အရိုအသေပေးပြီးနောက် စစ်သည်ခေါင်းဆောင်က ယီယွင်ကို ယဉ်ကျေးစွာ မေးလိုက်သည်။ သူသည် ခန့်မှန်းခြေအားဖြင့် သိထားပြီးသား ဖြစ်သည်။ လူသားတစ်ဦးအနေနှင့် ဤအမိန့်တော်ပြားကို ပိုင်ဆိုင်ထားသူမှာ ဘုရင်မကြီး၏ မောင်ဖြစ်သူ ယီယွင် သာ ဖြစ်ရပေမည်။

ယီယွင်သည် ဘုရင်မကြီး၏ မောင်ဖြစ်ရုံသာမက အလွန်အစွမ်းထက်ပြီး ဝိညာဉ်ဂူဗိမာန်အတွင်း၌ ကျန်းရှောင်ယုနှင့် ကောင်းကင်မြေခွေး အဖွဲ့ကို ကယ်တင်ခဲ့ဖူးသူ ဖြစ်သဖြင့် ပျက်စီးခြင်းမျိုးနွယ်စုအတွင်း၌ အလွန်ကျော်ကြားသူ ဖြစ်သည်။

သူ၏ ဂုဏ်သိက္ခာမှာ လမ်းပြလူငယ်နှင့် မခြားနားလှပေ။ အထူးသဖြင့် လူငယ်စစ်သည်များကြားတွင် ယီယွင်မှာ သူတို့၏ စံပြပုဂ္ဂိုလ်ပင် ဖြစ်နေတော့သည်။

"အခု ကျွန်တော် ဝင်လို့ရပြီလား" ယီယွင်က မေးလိုက်သည်။

"ရပါတယ်... ရပါတယ်ခင်ဗျာ"

ပျက်စီးခြင်းမျိုးနွယ်စစ်သည်များမှာ ချက်ချင်းပင် လမ်းဖယ်ပေးကာ ယီယွင်ကို လိုက်ပါပို့ဆောင်ရန် ပြင်လိုက်ကြသည်။ သူတို့၏ ယဉ်ကျေးပျူငှာမှုမှာ ယီယွင်ကို ထမ်းစင်ဖြင့်ပင် ထမ်းခေါ်သွားချင်သည့် ပုံစံမျိုး ဖြစ်နေသည်။ ထိုရိုသေမှုမှာ အမိန့်တော်ပြားကြောင့်သာမက သူတို့၏ ရင်ထဲမှ အမှန်တကယ် လေးစားခြင်းလည်း ဖြစ်သည်။

ယီယွင်၏ နောက်ကွယ်မှ ခန်းယန်နှင့် ကျန်းကဲ့တို့မှာမူ ဤမြင်ကွင်းကို ကြည့်ယင်း လုံးဝ ပါးစပ်အဟောင်းသား ဖြစ်နေကြသည်။ အမြဲတမ်း တည်ငြိမ်လှသော မြို့တော်ဝန်ပင်လျှင် စကားတစ်လုံးမျှ မပြောနိုင်ဘဲ ဖြစ်နေရှာသည်။

"ဒါ... ဒါက ဘာတွေလဲ"

ရန်ချင်းယွမ်၏ ပါးစပ်မှာ ငုံးဥလေး တစ်လုံးဝင်လောက်အောင် ဟသွားသည်။ သူမသည် ယီယွင်လက်ထဲမှ အမိန့်တော်ပြားကို မှင်တက်စွာ စိုက်ကြည့်နေမိသည်။ ထိုအရာက ဤမျှအထိ စွမ်းအားရှိသလော ယီယွင်က ထိုအရာကို ဘယ်လိုရခဲ့တာလဲ။

တိုင်အာနတ်မြို့တော်မှ လူများထဲတွင် ခန်းယန်မှာ အစပ်စုဆုံးလူ ဖြစ်သည်။ သူသည် အံ့သြဝမ်းသာစွာဖြင့် ယီယွင်ဘေးသို့ အပြေးရောက်လာပြီး တိုးတိုးလေး မေးလိုက်သည်။

"ယီယွင်... မြန်မြန်ပြောစမ်း။ မင်း အဲဒီအမိန့်တော်ပြားကို ဘယ်ကရတာလဲ"

ဆယ်နှစ်ကျော်ကြာ အကျဉ်းကျခံနေရပြီးမှ အေးစက်ခက်ထန်သော ပျက်စီးခြင်းမျိုးနွယ်စစ်သည်များက သူတို့ဘက်သို့ ရိုရိုသေသေ ဆက်ဆံလာသည်ကို မြင်ရသဖြင့် ခန်းယန်မှာ အလွန်ပင် ကျေနပ်နေမိသည်။ သူသည် ယီယွင်၏ ဂုဏ်ရှိန်ကို အမှီပြုကာ ခေါင်းကို မော့ပြီး လမ်းလျှောက်နေတော့သည်။

ယီယွင်က ပြုံးကာ ပေါ့ပေါ့ပါးပါးပင် ပြန်ပြောလိုက်သည်။ "ဒီအမိန့်တော်ပြားက ကျွန်တော်နဲ့ ပျက်စီးခြင်းမျိုးနွယ်စုကြားမှာ ပတ်သက်မှုတချို့ ရှိလို့ပါ။ လွန်ခဲ့တဲ့ တစ်နှစ်လောက်က ရခဲ့တာ... ဒီလောက် သုံးလို့ကောင်းမယ်မှန်း ကျွန်တော်လည်း မသိခဲ့ဘူး"

ကျန်းရှောင်ယုက သူ့ကို ပေးခဲ့စဉ်က ခရီးသွားရာတွင် အဆင်ပြေစေရန်သာ ဖြစ်မည်ဟု သူ ထင်ခဲ့ခြင်း ဖြစ်သည်။ ယနေ့မှသာ ဤအရာမှာ ပျက်စီးခြင်းမျိုးနွယ်စုအတွင်း အလွန်ရှားပါးသော အရာဖြစ်ကြောင်း သူ သိလိုက်ရသည်။

ယီယွင်၏ ပေါ့ပေါ့ပါးပါး ရှင်းပြချက်ကြောင့် လမ်းပြနေသော ပျက်စီးခြင်းမျိုးနွယ်စစ်သည်များမှာ ခြေချော်ပင် လဲမတတ် ဖြစ်သွားကြသည်။

ဘုရင်မကြီး အချစ်ဆုံးသော မောင်ဖြစ်ပြီးမှ "ပတ်သက်မှုတချို့ ရှိလို့ပါ" ဟု ပြောနေသည်မှာ သူတို့အတွက်တော့ တကယ်ကို အံ့သြစရာပင်။

"မင်းမှာ ပျက်စီးခြင်းမျိုးနွယ်စုထဲမှာ ဆွေမျိုးရှိတယ်" ခန်းယန်မှာ လုံးဝ ဆွံ့အသွားရသည်။ ကျန်းကဲ့နှင့် ရန်ချင်းယွမ်တို့လည်း အံ့သြနေကြသည်။ လူသားတစ်ယောက်ဖြစ်သော ယီယွင်က ပျက်စီးခြင်းမျိုးနွယ်စုထဲမှာ ဘယ်လိုဆွေမျိုးမျိုး ရှိနေတာလဲ ပြီးတော့ ထိုဆွေမျိုးမှာ မည်မျှအထိ အဆင့်မြင့်နေသလဲ။

ရန်ချင်းယွမ်က ထပ်မံမေးမြန်းရန် ပြင်လိုက်စဉ်မှာပင် အစည်းအဝေးခန်းမအတွင်းမှ ပေါက်ကွဲသံကြီးတစ်ခု ထွက်ပေါ်လာသည်။ မြင့်မြတ်သော အလင်းတန်းတစ်ခုမှာ ခန်းမ၏ အမိုးကို ဖောက်ထွက်ကာ ကောင်းကင်သို့ ပျံတက်သွားပြီး ဧရာမ ရှေးဟောင်းသားရဲကြီးတစ်ကောင်၏ ပုံရိပ် အဖြစ် ပြောင်းလဲသွားခဲ့သည်။

ဟင်..

ယီယွင် အံ့သြသွားသည်။ အစည်းအဝေးခန်းမထဲမှာ ဘာတွေဖြစ်နေတာလဲ

အခန်း ၇၁၁- ဥပဒေသတို့ လွှမ်းမိုးသော စကားသံ

ကောင်းကင်ယံတွင် ပျံသန်းနေသော ရှေးဟောင်းသားရဲ ရှုထောင့်ပုံရိပ်ကြီးမှာ အတောင်ပံနှစ်ဖက်ပါရှိသည့် ကျားသစ်တစ်ကောင်နှင့် တူလှသည်။ ၎င်း၏ မျက်လုံးများမှာ ဟင်းလင်းပြင်ကို ဖောက်ထွက်မည့် လျှပ်စစ်တန်းကြီးများကဲ့သို့ တောက်ပနေပြီး၊ ၎င်း၏ အရှိန်အဝါမှာ အစည်းအဝေးခန်းမ တစ်ခုလုံးကို လွှမ်းခြုံထားသည်။

"ဒါက ကောင်းကင်ဘုံတက်လှမ်းခြင်း အဆင့်ရှိတဲ့ လူသားပညာရှင်တစ်ယောက်ရဲ့ ရှုထောင့်ပုံရိပ်ပဲ"

ယီယွင် ချက်ချင်း မှတ်မိလိုက်သည်။ ပုံမှန်အားဖြင့် ဤကဲ့သို့ ရှုထောင့်ပုံရိပ် ကို အပြည့်အဝ ထုတ်ဖော်ခြင်းမှာ တိုက်ပွဲပြင်းထန်နေချိန်တွင်သာ ဖြစ်လေ့ရှိသည်။

ယခု လူသားများနှင့် ပျက်စီးခြင်းမျိုးနွယ်စုတို့ ဆွေးနွေးနေစဉ်အတွင်း ဤမျှ ပြင်းထန်သော စွမ်းအားများ ထုတ်ဖော်နေခြင်းမှာ ညှိနှိုင်းမှုများ အလွန်အမင်း တင်းမာနေပြီဖြစ်ကြောင်း ပြသနေသည်။

"ဝုန်း... ဝုန်း... ဝုန်း..."

ထိုစဉ် ဝေးလံသော တောင်တန်းများဆီမှ ကမ္ဘာမြေတုန်ဟည်းမတတ် ဟိန်းဟောက်သံများ ထွက်ပေါ်လာသည်။ တောင်ကြီးများပမာ ကြီးမားလှသော ရှေးဦးသားရဲကြီး ခုနစ်ကောင်မှာ မတ်တပ်ရပ်ကာ တုံ့ပြန်လိုက်ကြသည်။ ထိုအရှိန်အဝါမှာ ကောင်းကင်ယံမှ ကျားသစ် ရှုထောင့်ပုံရိပ် ထက်ပင် ပို၍ အစွမ်းထက်နေသေးသည်။

ဤမျှ မြင့်မားသော အဆင့်ရှိ ပညာရှင်များ၏ ထိပ်တိုက်ရင်ဆိုင်မှုကို မြို့တော်ဝန်တို့ တစ်ခါမျှ မမြင်ဖူးခဲ့ကြပေ။

"ယီယွင်... မင်း အခု တကယ်ဝင်မှာလား"

မြို့တော်ဝန်က စိုးရိမ်တကြီး တားလိုက်သည်။ သူ၏ အမြင်တွင် အခြေအနေမှာ ပေါက်ကွဲလုနီးပါး ဖြစ်နေပြီး သူတို့ကဲ့သို့ အဆင့်နိမ့်သူများ ဝင်သွားရန် မသင့်တော်ပေ။

သို့သော် ယီယွင်သည် မည်သည့်စကားမျှ မပြောဘဲ ခန်းမအတွင်းသို့ အေးအေးဆေးဆေးပင် လှမ်းဝင်သွားသည်။ သူ၏ လက်ထဲ၌ ပျက်စီးခြင်းမျိုးနွယ်ဘုရင်မ အမိန့်တော်ပြား ရှိနေသဖြင့် စစ်သည်များကလည်း မတားဆီးရဲကြပေ။

ယီယွင်၏ နောက်မှလိုက်လာသော ခန်းယန်နှင့် ကျန်းကဲ့တို့မှာ ကြောက်ရွံ့တုန်ရင်နေကြသည်။ သို့သော် ယီယွင်မှာမူ ပတ်ဝန်းကျင်မှ ဖိအားများကို ဂရုမစိုက်ဘဲ တည်ငြိမ်စွာ လျှောက်လှမ်းနေသည်။

သူ၏ ယုံကြည်ချက်အပြည့်ရှိသော အမူအရာမှာ ခန်းယန်တို့ကို အံ့အားသင့်စေသည်။ လွန်ခဲ့သော ဆယ်နှစ်က ယီယွင်မှာ လူငယ်လေးတစ်ဦးသာ ဖြစ်သော်လည်း ယခုအခါတွင်မူ သူ၏ အရှိန်အဝါမှာ လုံးဝ ပြောင်းလဲသွားပြီ ဖြစ်သည်။

ယီယွင်သည် ခန်းမအတွင်းရှိ အတွင်းတံခါး လက်ကိုင်ကို ဆွဲဖွင့်လိုက်သည်။

"ကျွီ..."

တံခါးပွင့်သွားသည်နှင့် ကြောက်မက်ဖွယ်ကောင်းသော စွမ်းအင်ဖိအားများမှာ အပြင်သို့ တိုးထွက်လာသည်။ ယီယွင်၏ ဆံပင်နှင့် ဝတ်ရုံများမှာ လွင့်ပျံသွားသော်လည်း သူသည် ကျောက်ဆောင်တစ်ခုကဲ့သို့ မလှုပ်မယှက် ရပ်နေခဲ့သည်။

ခန်းမအတွင်း၌ အင်အားစု နှစ်ဖက်မှာ ထိပ်တိုက် ရင်ဆိုင်နေကြသည်။ တစ်ဖက်တွင် လူသားပညာရှင်များနှင့် သန့်စင်ရာနယ်မြေ ဇနီးမောင်နှံ၊ အခြားတစ်ဖက်တွင်တော့ ယခင်ပျက်စီးခြင်းမျိုးနွယ်ဘုရင်မနှင့် လမ်းပြလူငယ်တို့ ရှိနေကြသည်။

သူတို့အားလုံး၏ အကြည့်များမှာ ယီယွင်ထံသို့ ကျရောက်လာသည်။

"ယီယွင်"

"ယွင်အာ..မောင်လေး"

လူသားပညာရှင်များမှာ ယီယွင်၏ ရုတ်တရက် ပေါ်လာမှုကြောင့် အံ့သြသွားကြသလို၊ ကျန်းရှောင်ယုမှာလည်း ဝမ်းသာအားရ ဖြစ်သွားရသည်။

ယီယွင်သည် ခန်းမအတွင်းကို ဝေ့ကြည့်လိုက်သည်။ ရှုထောင့်ပုံရိပ်ကို ထုတ်ထားသူမှာ အနက်ရောင်ဝတ် အဘိုးအိုတစ်ဦး ဖြစ်သည်။ သူသည် အစောပိုင်းက ယီယွင်ကို မြင်လိုက်ရချိန်တွင် သူ၏ အရှိန်အဝါများမှာ ရုတ်တရက် အားနည်းသွားခဲ့သည်။ သူသည် ယခင်က ယီယွင်၏ ကြောက်မက်ဖွယ် တိုက်ခိုက်နိုင်စွမ်းကို ကိုယ်တိုင် မြင်တွေ့ခဲ့ဖူးသူ ဖြစ်သည်။

ယီယွင်၏ အကြည့်နှင့် ဆုံလိုက်ချိန်တွင် ထိုအဘိုးအိုမှာ ရင်ထဲ၌ ထိတ်လန့်သွားရသည်။ ယီယွင်၏ မျက်လုံးများမှာ နက်ရှိုင်းလှသော ဟင်းလင်းပြင်ကြီးတစ်ခုကဲ့သို့ ခံစားရပြီး သူ၏ ဝိညာဉ်ပင် စုပ်ယူခံရတော့မည့်အလား ဖြစ်နေသည်။

"ဘာတွေဖြစ်နေတာလဲ ကျွန်တော်တို့ ထိုင်ပြီး အေးအေးဆေးဆေး ဆွေးနွေးလို့ မရဘူးလား"

ယီယွင်က ထိုစကားကို ပေါ့ပေါ့ပါးပါးပင် ပြောလိုက်သည်။ သို့သော် ထိုစကားသံမှာ နက်ရှိုင်းသော ဥပဒေသစွမ်းအားများ ပါဝင်နေပြီး နံနက်ခင်း ခေါင်းလောင်းသံကဲ့သို့ လူသားပညာရှင်၏ နားထဲတွင် ဟိန်းထွက်သွားသည်။

ထိုခဏမှာပင် အနက်ရောင်ဝတ် အဘိုးအို၏ အရှိန်အဝါများမှာ လွင့်စင်သွားပြီး၊ ကောင်းကင်ယံမှ ကျားသစ် ရှုထောင့်ပုံရိပ် ကြီးမှာလည်း လေလျှော့လိုက်သည့် ဘောလုံးတစ်ခုကဲ့သို့ ရှုံ့ဝင်ကာ သူ၏ ခန္ဓာကိုယ်ထဲသို့ ပြန်ဝင်သွားတော့သည်။

ထိုအဘိုးအို၏ မျက်နှာမှာ အလွန်ပင် ပျက်ယွင်းသွားသည်။ ယီယွင်၏ စကားတစ်ခွန်းတည်းဖြင့် သူ၏ စွမ်းအားအားလုံးမှာ ပျောက်ကွယ်သွားရခြင်း ဖြစ်သည်။

ယီယွင်သည် ထိုသူကို ထပ်မကြည့်တော့ဘဲ သန့်စင်ရာနယ်မြေ ဇနီးမောင်နှံဘက်သို့ လှည့်ကာ ပြုံးလျက် မေးလိုက်သည်။

"ဘာတွေ ဆွေးနွေးနေကြတာလဲ ဘာလို့ ဒီလောက် တင်းမာနေရတာလဲ"

ယီယွင်သည် အစည်းအဝေး စားပွဲဝိုင်းဆီသို့ လျှောက်သွားပြီး အနက်ရောင်ဝတ် အဘိုးအို ထရပ်သွားသဖြင့် လွတ်နေသော နေရာတွင် အရှိန်အဝါအပြည့်ဖြင့် ထိုင်ချလိုက်သည်။

တကယ်တော့ ထိုအဘိုးအိုမှာ အဆင့်မြင့်ပညာရှင်တစ်ဦး ဖြစ်သဖြင့် မည်သည့်နေရာတွင်မဆို ထိုင်ခုံရစမြဲ ဖြစ်သော်လည်း၊ ယခုအခါတွင်မူ ယီယွင်က သူ၏ နေရာကို ယူလိုက်သဖြင့် သူသည် မတ်တပ်ရပ်ရုံသာ တတ်နိုင်တော့သည်။ သူသည် အလွန်အရှက်ရသွားသော်လည်း ယီယွင်ကို ဖယ်ခိုင်းရန် မဝံ့ရဲပေ။

သန့်စင်ရာနယ်မြေ ကျွန်းပိုင်ရှင်က ပြုံးကာ ပြန်ဖြေလိုက်သည်။

"အငြင်းပွားမှုလေး နည်းနည်းရှိလို့ပါ... အဲဒီလောက်လည်း မပြင်းထန်ပါဘူး"

ယီယွင် ပေါ်လာရုံမျှဖြင့် ပေါက်ကွဲလုနီးပါး ဖြစ်နေသော အခြေအနေမှာ ရုတ်တရက် ငြိမ်သက်သွားခဲ့သည်။ ခန်းမအတွင်းရှိ စွမ်းအင်စီးဆင်းမှုများမှာလည်း ပြန်လည် တည်ငြိမ်သွားပြီး၊ ယီယွင် ထိုင်နေသည့် နေရာမှာ အစည်းအဝေး၏ ဗဟိုချက်မ ဖြစ်သွားတော့သည်။

ခန်းမတံခါးဝတွင် ရပ်နေခဲ့သော ခန်းယန်၊ ကျန်းကဲ့၊ မြို့တော်ဝန်နှင့် ရန်ချင်းယွမ်တို့မှာတော့ နေ့ခင်းကြောင်တောင် နတ်ဘုရားကို မြင်လိုက်ရသကဲ့သို့ မှင်တက်နေကြဆဲ ဖြစ်သည်။

သူတို့၏ အမြင်တွင် အသက် ၃၀ ပင် မပြည့်သေးသော ယီယွင်သည် လူငယ်မျိုးဆက်သစ် တစ်ဦးသာ ဖြစ်သည်။ သို့သော် ယခု သူက လူသားပညာရှင်တစ်ဦး၏ အရှိန်အဝါကို စကားတစ်ခွန်းဖြင့် ဖျက်ဆီးပစ်နိုင်ရုံတင်မက၊ သန့်စင်ရာနယ်မြေ ဇနီးမောင်နှံကပင် သူ့ကို ရိုသေလေးစားစွာ ဆက်ဆံနေသည်မှာ သူတို့၏ နားလည်နိုင်စွမ်းကို ကျော်လွန်နေပြီ ဖြစ်သည်။

ခန်းယန်မှာ ယီယွင်၏ အစွမ်းအတွက် ကြိုတင်ပြင်ဆင်ထားပါသည်ဟု ဆိုခဲ့သော်လည်း၊ ယခုမြင်ကွင်းမှာ သူ ထင်ထားသည်ထက် အဆပေါင်းများစွာ ပို၍ အံ့သြစရာ ကောင်းနေတော့သည်။

ယီယွင်... မင်းက တကယ်ပဲ ဘယ်လိုလူမျိုးလဲကွာ......။

အခန်း ၇၁၂- အရှက်ရခြင်း

ယီယွင် ထိုင်ခုံတွင် နေရာယူလိုက်ပြီးနောက် အနက်ရောင်ဝတ် အဘိုးအို မှာ သစ်သားတိုင်တစ်ခုကဲ့သို့ ဘေးတွင် မတ်တပ်ရပ်ကျန်ရစ်ခဲ့သည်။

သူ၏ မျက်နှာမှာ အလွန်ပင် ပျက်ယွင်းနေသည်။ အစောပိုင်းက ယီယွင်က သူ့ကို "ထိုင်ပြီး အေးအေးဆေးဆေး ဆွေးနွေးလို့ မရဘူးလား" ဟု မေးခဲ့သော်လည်း ယခုတော့ သူ့မှာ ထိုင်စရာနေရာပင် မရှိတော့ပေ။

ခန်းမအတွင်းရှိ ပညာရှင်အားလုံးက သူ့ကို ဝိုင်းကြည့်နေကြသဖြင့် သူသည် အလွန်အမင်း အရှက်ရနေမိသည်။

ထိုစဉ် ယခင်ပျက်စီးခြင်းမျိုးနွယ်ဘုရင်မက လက်တစ်ချက် ဝေ့ယမ်းလိုက်ရာ စစ်သည်များက ထိုင်ခုံတစ်လုံး ထပ်မံယူဆောင်လာပြီး ယီယွင်၏ ဘေးတွင် ချပေးလိုက်သည်။

ထိုင်ခုံ ရောက်လာသည်ကို မြင်သောအခါ အနက်ရောင်ဝတ်အဖိုးအို မှာ အသက်ရှူချောင်သွားပြီး ထိုင်ရန် ပြင်လိုက်သည်။ သို့သော် သူ မထိုင်မီမှာပင် ယီယွင်က ထိုင်ခုံလက်တန်းကို အသာအယာ ဖိထားလိုက်ပြီး လင်ရှင်းထုံကို လှမ်းခေါ်လိုက်သည်။

"ရှင်းထုံ... ဒီကိုလာပြီး ထိုင်ပါဦး"

ဟင်.....

အနက်ရောင်ဝတ်အဖိုးအို မှာ ကြောင်တောင်တောင် ဖြစ်သွားရသည်။ ရှေ့သို့ လှမ်းပြီးသား သူ၏ ခြေထောက်မှာ လေထဲတွင်ပင် ရပ်တန့်သွားသည်။ အဖြူရောင် ဝတ်စုံဖြင့် လင်ရှင်းထုံသည် မှောင်မည်းနေသော ခန်းမအတွင်း၌ နတ်သမီးတစ်ပါးကဲ့သို့ ယဉ်ကျေးစွာ လျှောက်လှမ်းလာသည်။

အနက်ရောင်ဝတ်အဖိုးအို သည် ထိုထိုင်ခုံနှင့် အနီးဆုံးတွင် ရှိနေသော်လည်း လင်ရှင်းထုံထက် အရင်ဦးအောင် သွားထိုင်ရန် သတ္တိမရှိပေ။ ယီယွင်က သူ့ကို တစ်ခုခု လုပ်မည်ကို ကြောက်ခြင်းထက် လင်ရှင်းထုံ၏ ခြေလှမ်းတိုင်းတွင် ပေါ်ထွက်နေသော ဥပဒေသစွမ်းအားများက သူ့ကို တုန်လှုပ်စေခြင်း ဖြစ်သည်။ ဤမိန်းကလေး၏ အစွမ်းမှာ သူနှင့် လုံးဝ အဆင့်အတန်း ကွာခြားနေပြီ ဖြစ်ကြောင်း သူ ရိပ်မိလိုက်သည်။

ပညာရှင်တို့၏ လောကတွင် အစွမ်းထက်သူကသာ နေရာရစမြဲ ဖြစ်သည်။ ထို့ကြောင့် သူသည် အံကြိတ်ကာ ကြည့်နေယင်း လင်ရှင်းထုံ အေးအေးဆေးဆေး ထိုင်သွားသည်ကိုသာ ငေးကြည့်နေခဲ့ရသည်။ အနက်ရောင်ဝတ်အဖိုးအို ၏ မျက်နှာမှာ ဒေါသကြောင့် မည်းမှောင်နေတော့သည်။

ဤမြင်ကွင်းကို ကြည့်နေသော ခန်းယန်တို့အဖွဲ့မှာတော့ တစ်ခုကို သေချာ နားလည်သွားကြသည်။ ၎င်းမှာ ယီယွင်နှင့် လင်ရှင်းထုံတို့သည် အဆင့်အတန်း မြင့်မားရုံတင်မကဘဲ သူတို့၏ အစွမ်းမှာလည်း ထျန်းယွမ်တိုက်ကြီး၏ ထိပ်တန်းအဆင့်သို့ ရောက်ရှိနေပြီ ဖြစ်ကြောင်းပင်။

သူတို့ရှေ့တွင် အနက်ရောင်ဝတ်အဖိုးအို ကဲ့သို့သော ပညာရှင်ကြီးပင်လျှင် ငြိမ်ကုပ်နေရသည် မဟုတ်ပါလား။

အနက်ရောင်ဝတ်အဖိုးအို အလွန်အရှက်ရနေစဉ်တွင် ယခင်ဘုရင်မက ဒုတိယမြောက် ထိုင်ခုံတစ်လုံးကို ထပ်မံ ယူခိုင်းလိုက်သည်။ သို့သော် ထိုခုံမှာ စားပွဲဝိုင်း၏ ထောင့်စွန်း အဝေးတစ်နေရာတွင်သာ ဖြစ်သည်။

"ဆန်းကျယ်ကျားမင်း (အနက်ရောင်ဝတ်အဖိုးအို)... ဟိုဘက်မှာ ထိုင်ရတာကိုတော့ စိတ်မရှိဘူးမလား"

ယခင်ဘုရင်မက လှောင်ပြောင်သော အပြုံးဖြင့် ဆိုလိုက်သည်။

သူမသည် ဤအဘိုးကြီးကို အစကတည်းက အမြင်မကြည်ပေ။ အနက်ရောင်ဝတ်အဖိုးအို သည် ဒေါသဖြင့် ထွက်သွားချင်သော်လည်း၊ အခုထွက်သွားလျှင် ပို၍ အရှက်ရမည်ဖြစ်ပြီး ဆွေးနွေးပွဲမှာလည်း မပြီးသေးသဖြင့် အောင့်ကာအမ်းကာဖြင့်ပင် သွားထိုင်လိုက်ရသည်။

"စိတ်မရှိပါနဲ့ ဆန်းကြယ်ကျားမင်းရယ်... အခု သူတို့ ခဏလောက် ဘဝင်မြင့်နေပါစေဦး။

မိစ္ဆာနတ်ဘုရားက မကြာခင် ရောက်တော့မှာပဲ။ ကျန်းရှောင်ယုက မိစ္ဆာနတ်ဘုရားရဲ့ ပစ်မှတ် ဖြစ်နေတာဆိုတော့ သူမက သေလူစာယင်းထဲ ပါပြီးသားပဲ။ ပျက်စီးခြင်းမျိုးနွယ်စုက ဘယ်လောက်ကြာကြာ မာန်တက်နိုင်ဦးမှာမလို့လဲ။ ပြီးတော့ ယီယွင်ကရော ကျန်းရှောင်ယုကို ဒီအတိုင်း ပစ်ထားမှာတဲ့လား သူ ဘယ်လိုကာကွယ်မလဲဆိုတာ ငါတို့ စောင့်ကြည့်ကြတာပေါ့"

အနက်ရောင်ဝတ်အဖိုးအို ၏ နားထဲသို့ ထျန်းယွမ်အကြီးအကဲအဖွဲ့ဝင် နောက်တစ်ဦးက ယွမ်ချီအသံပို့လွှတ်ကာ လှမ်းပြောလိုက်သည်။ လွန်ခဲ့သော ၁၀ လခန့်က ဓားရှည် တောင်ကုန်းတွင် ယီယွင်၏ အစွမ်းကို သူတို့ မြင်တွေ့ခဲ့ဖူးသဖြင့် ယီယွင် အောင်မြင်နေသည်ကို သူတို့ မနာလို ဖြစ်နေကြခြင်း ဖြစ်သည်။

အနက်ရောင်ဝတ်အဖိုးအို ကလည်း အံကြိတ်ကာ ပြန်ပြောလိုက်သည်။ "မင်းပြောတာ မှန်တယ်။ အဲဒီ ပျက်စီးခြင်းမျိုးနွယ်စု ကောင်မလေးက နောက်ရက်ပိုင်းထက် ပိုမနေရတော့ပါဘူး။ ယီယွင်နဲ့ ပျက်စီးခြင်းမျိုးနွယ်စု အတူတူ ပျက်စီးသွားတာကိုပဲ ငါမြင်ချင်တယ်"

ယီယွင်သည် ထိုသူတို့၏ ရန်လိုမှုကို အာရုံခံနိုင်သော်လည်း ဂရုမစိုက်ပေ။ သူသည် သန့်စင်ရာနယ်မြေ ကျွန်းပိုင်ရှင်နှင့် စကားပြောနေယင်း တစ်ဖက်မှလည်း ကျန်းရှောင်ယုနှင့် ယွမ်ချီအသံပို့လွှတ်ကာ ဆက်သွယ်နေသည်။

အခြေအနေ အရပ်ရပ်ကို မေးမြန်းကြည့်သောအခါ ယီယွင်၏ ရင်ထဲ၌ တင်းကျပ်သွားရသည်။

"အစ်မရှောင်ယု... မိစ္ဆာနတ်ဘုရားက ဘာလို့ အစ်မကို ပစ်မှတ်ထားနေရတာလဲ"

"အစ်မလည်း မသိဘူး..." ကျန်းရှောင်ယုက သက်ပြင်းချကာ ဆိုလိုက်သည်။ သူမကြောင့် ယီယွင်နှင့် မျိုးနွယ်စုကို ဒုက္ခပေးမိနေသကဲ့သို့ သူမ ခံစားနေရသည်။

ယခုအခါ မိစ္ဆာနတ်ဘုရား၏ ဝိညာဉ်ပိတ်ဆို့မှု ကို သူမ ခပ်ပါးပါး ခံစားနေရဆဲ ဖြစ်သည်။

နောက်တစ်စက္ကန့်တွင်ပင် မိစ္ဆာနတ်ဘုရား ရုတ်တရက် ရောက်လာနိုင်သည့် အနေအထားတွင် ရှိနေသည်။ လူသားမျိုးနွယ်စုကလည်း ၎င်းကို ရိပ်မိသဖြင့် ပျက်စီးခြင်းမျိုးနွယ်စုနှင့် အပြင်းအထန် ဆွေးနွေးနေကြခြင်း ဖြစ်သည်။

လူသားမျိုးနွယ်စုတွင် ပျက်စီးခြင်းမျိုးနွယ်စုကို အမိန့်ပေးနိုင်သော အခွင့်အာဏာ မရှိသော်လည်း၊ သူတို့တွင်လည်း တင်ပြစရာ အချက်အလက်များ ရှိနေပုံရသည်။