အခန်း (၇၁-၇၂)

အခန်း ၇၁- တံခါးရှစ်ခုထဲမှ ဒုတိယမြောက်တံခါး အနားယူခြင်းတံခါး ပွင့်ပြီ၊ သွမ့်ကျား နတ်ဘုရားစွမ်းရည်၊ မိုင်သန်းချီ တည်နေရာကူးပြောင်းခြင်း

စနစ်၏ ကြည်လင်သော အသိပေးသံ တိုးဝင်ပျောက်ကွယ်သွားသည်နှင့်အမျှ လင်းချန်၏ ခန္ဓာကိုယ်မှာ အနည်းငယ် တုန်ခါသွားခဲ့သည်။

သူ၏ စိတ်အာရုံထဲတွင် ယခင်က တစ်ခါမှ မကြုံဖူးသော ကြည်လင်ပြတ်သားမှုကို ခံစားလိုက်ရ၏။ အထူးတလည် စဉ်းစားနေစရာပင်မလိုဘဲ ယခင်က သူခက်ခက်ခဲခဲ နားလည်အောင် ကြိုးစားခဲ့ရသည့် ကျင့်စဉ်ပြဿနာများအားလုံး တစ်ပြိုင်နက်တည်း ပြေလည်သွားတော့သည်။

ဤအခိုက်အတန့်တွင် နတ်ဘုရားအဆင့် သိမြင်နားလည်မှု ကောင်းချီး ဆိုသည်မှာ အမှန်တကယ် ဘာကို ဆိုလိုသနည်း၊ စစ်မှန်သော... နတ်ဘုရားအဆင့် သိမြင်မှု ဆိုသည်မှာ အဘယ်နည်းကို သူ သိရှိသွားခဲ့ပြီဖြစ်သည်။

ဤသည်မှာ သာမန်သတ္တဝါများ မည်သို့မျှ မမှီနိုင်သော အမြင့်ပေတည်း။ မဟာဧကရာဇ်အဆင့်သို့ ရောက်ရှိပြီးမှသာလျှင် ဤကဲ့သို့သော မြင့်မားသည့် သိမြင်နားလည်မှုကို ပိုင်ဆိုင်နိုင်ပေလိမ့်မည်။

သို့သော် မဟာဧကရာဇ်အဆင့်အောက်တွင်မူ မည်သည့်သတ္တဝါမျှ သက်ရှိအဆင့်အတန်းအမျိုးမျိုး၏ အတားအဆီးများကို ကျော်ဖြတ်ကာ ဤကဲ့သို့သော အထွတ်အထိပ် သိမြင်နားလည်မှုကို မခံစားနိုင်ကြပေ။

ဧကရာဇ်တစ်ပိုင်း အထွတ်အထိပ်အဆင့် ပညာရှင်တစ်ဦးပင် ဖြစ်စေဦးတော့၊ သို့မဟုတ် တားမြစ်နယ်မြေ အထွတ်အထိပ်ပုဂ္ဂိုလ်များပင် ဖြစ်စေကာမူ အခွင့်အရေး မရှိနိုင်ပါချေ။

နတ်ဘုရားအဆင့် သိမြင်နားလည်မှုဆိုသည်မှာ စာသားအရသာ နတ်ဘုရားအဆင့် မဟုတ်ဘဲ နတ်ဘုရားတစ်ပါးသာလျှင် ပိုင်ဆိုင်နိုင်ပြီး အောင်မြင်နိုင်သည့် စစ်မှန်သော သိမြင်နားလည်မှု ဖြစ်သည်။

အကယ်၍ သာမန်ကျင့်ကြံသူတစ်ဦး၏ သိမြင်နားလည်မှုသည် နိမ့်ပါးသောနေရာမှ အထက်သို့ မော့ကြည့်ကာ နားလည်ရန် ကြိုးစားခြင်းဖြစ်ပါက ဤနတ်ဘုရားအဆင့် သိမြင်နားလည်မှု ကောင်းချီးသည် ကျင့်ကြံသူအား အထက်စီးမှနေ၍ အောက်ခြေရှိအရာများကို ငုံ့ကြည့်ကာ နားလည်စေခြင်းပင် ဖြစ်သည်။

ဤသည်မှာ အဆင့်အတန်းချင်း သိသိသာသာ ကွာခြားသွားခြင်း ဖြစ်သည်။

အံ့ဩဖွယ်ရာ နတ်ဘုရားအဆင့် သိမြင်မှု ကောင်းချီးများကြားတွင် လင်းချန်သည် တစ်စက္ကန့်မျှပင် အလဟဿ မဖြုန်းတီးဝံ့ဘဲ အတွင်းတံခါးရှစ်ခုကျင့်စဉ်၏ အတွေးအမြင်များထဲသို့ ချက်ချင်းပင် နစ်မြုပ်ဝင်ရောက်သွားခဲ့သည်။

နတ်ဘုရားအဆင့် သိမြင်မှု ကောင်းချီး၏ ကြာချိန်သည် သုံးရှီချန် (၆ နာရီ) မျှသာ တိုတောင်းကြောင်း သူ မေ့မထားခဲ့ပေ။

သူသည် ဤသုံးရှီချန်ကို အသုံးပြု၍ သူ၏ ရရှိမှုများကို အမြင့်ဆုံးဖြစ်အောင် လုပ်ဆောင်ရမည်ဖြစ်သည်။

ယခုအခါ သူသည် လုံးဝကို နှိမ့်ချသွားခဲ့ပြီဖြစ်ကာ နတ်ဘုရားအဆင့် သိမြင်မှု ကောင်းချီးကို အနည်းငယ်မျှပင် အထင်မသေးရဲတော့ပေ။

မှန်ပါသည်။ သူ၏ကိုယ်တိုင် သိမြင်နားလည်မှုသည်လည်း ထူးကဲလှပြီး နတ်ဘုရားအဆင့်ဟု ခေါ်ဆိုနိုင်သော်လည်း ယခု ဤအဆင့်မြင့် အထွတ်အထိပ် သိမြင်နားလည်မှုနှင့် နှိုင်းယှဉ်လျှင်မူ...

ကွာဟချက်မှာ ဆန်စေ့တစ်စေ့မှ ထွက်ပေါ်လာသော အလင်းတန်းနှင့် တောက်လောင်နေသော နေမင်းကြီး၏ အလင်းရောင်တို့ ယှဉ်ပြိုင်နေသကဲ့သို့ပင်။

နတ်ဘုရားအဆင့် သိမြင်နားလည်မှု ကောင်းချီး ရရှိနေစဉ်အတွင်း လင်းချန်၏ ပထမဆုံးပန်းတိုင်မှာ...

အတွင်းတံခါးရှစ်ခုကျင့်စဉ်၏ ဒုတိယမြောက်တံခါးကို နားလည်သဘောပေါက်ပြီး ဖောက်ထွက်ရန်ဖြစ်သလို သွမ့်ကျား နတ်ဘုရားစွမ်းရည်အပေါ် သူ၏ သိမြင်မှုများကို ပိုမိုနက်ရှိုင်းစေကာ တည်နေရာကူးပြောင်းနိုင်သည့် အကွာအဝေးကို တိုးမြှင့်ရန်ဖြစ်သည်။

သူ၏ ဒုတိယမြောက် ပန်းတိုင်မှာ သူတတ်မြောက်ထားသော အစစ်အမှန် အနှစ်သာရ အားလုံးကို နားလည်သဘော‌ပေါက်ရန်ဖြစ်ပြီး အထူးသဖြင့် ဓားအနှစ်သာရကို နားလည်ကာ မူလဓားစွမ်းအင်ကို တစ်ချက်တည်းဖြင့် ရရှိရန် ကြိုးပမ်းခြင်းဖြစ်သည်။

မူလကပင် လင်းချန်သည် ဒုတိယတံခါးနှင့် ပတ်သက်၍ အမြင်သစ်များ ရှိနေခဲ့ပြီးသားဖြစ်ရာ ယခု နတ်ဘုရားအဆင့် သိမြင်မှု ကောင်းချီး ရောက်ရှိလာခြင်းနှင့်အတူ မရေမတွက်နိုင်သော အမြင်သစ်များစွာ ထပ်မံ၍ တိုးဝင်လာခဲ့သည်။

ဤအမြင်သစ်များအတွင်း၌ သူသည် ဒုတိယတံခါး၏ လျှို့ဝှက်ချက်များကို လုံးဝနားလည်သဘောပေါက်ရန် ပို၍ ပို၍ နီးကပ်လာခဲ့သည်။

အချိန်များ ကုန်ဆုံးသွားခဲ့ပြီး မကြာမီ ၁၅ မိနစ်ခန့် ရှိသွားခဲ့ပြီဖြစ်သည်။

ဤ ၁၅ မိနစ်အတွင်း လင်းချန်သည် အာရုံအနည်းငယ်မျှ မပျံ့လွင့်ဘဲ ဒုတိယတံခါးကို သိမြင်နားလည်ရန် သူ၏ စိတ်ဝိညာဉ်တစ်ခုလုံးကို နှစ်မြှုပ်ထားခဲ့သည်။

အတန်ကြာသော် လင်းချန်၏ ခန္ဓာကိုယ်မှ ပြင်းထန်သော မမြင်နိုင်သည့် လှိုင်းလုံးများ စတင်ထွက်ပေါ်လာပြီး အရပ်မျက်နှာအနှံ့သို့ ဆက်တိုက်ဆိုသလို ပျံ့နှံ့လာခဲ့သည်။

သူ၏ ခန္ဓာကိုယ်အတွင်း၌ ပြင်းထန်သော ဖရိုဖရဲ ဝိညာဉ်စွမ်းအင်များသည် အတားအဆီးတစ်ခုကို အဆက်မပြတ် ရိုက်ခတ်နေ၏။

ရိုက်ခတ်မှုတစ်ခုစီတိုင်းသည် မမြင်ရသော လှိုင်းလုံစတစ်ခုကို လှုပ်ခတ်စေကာ ပတ်ဝန်းကျင်ရှိ ဟင်းလင်းပြင်ကို အနည်းငယ် စုတ်ပြဲသွားစေပြီး အနက်ရောင် အက်ကြောင်းများကို ဖြစ်ပေါ်လာစေခဲ့သည်။

ကံကောင်းထောက်မစွာဖြင့် ဘိုးဘေးနယ်မြေ ကမ္ဘာငယ်လေး၏ ဟင်းလင်းပြင်သည် အလွန်တရာ တည်ငြိမ်လှရာ သာမန် မဟာသူတော်စင်အဆင့် ပညာရှင်တစ်ဦးပင် ဖျက်ဆီးရန် ခက်ခဲလှပေသည်။

ဤကဲ့သို့ ခိုင်မာလှသော ဟင်းလင်းပြင် တည်ငြိမ်မှုအောက်တွင် ထိုမမြင်ရသောလှိုင်းလုံးများကြောင့် ဟင်းလင်းပြင် အက်ကြောင်းအချို့ ပေါ်လာခဲ့သော်လည်း...

ဤဖျက်ဆီးမှုအဆင့်သည် ဘိုးဘေးနယ်မြေ ကမ္ဘာငယ်လေးတစ်ခုလုံးအပေါ် ကြီးမားသော သက်ရောက်မှု ဖြစ်စေရန်တော့ မလုံလောက်ခဲ့ပေ။

ဘိုးဘေးနယ်မြေ ကမ္ဘာငယ်လေးအတွင်း အရပ်ရပ်၌ တည်ရှိနေကြသော ရှေးဟောင်းကန္တာရ လင်းမိသားစု၏ ဘိုးဘေးများအား မြှုပ်နှံထားသည့် အနက်ရောင်ဂူသင်္ချိုင်းကမ္ဗည်းတိုင်များသည် အစွမ်းထက်လှသော နတ်ဘုရားအဆင့် ပစ္စည်းများဖြင့် ပြုလုပ်ထားခြင်းဖြစ်သည်။

ဤပစ္စည်းများသည် နတ်ဘုရားအဆင့် လက်နက်များကို သွန်းလုပ်ရာတွင်သာ အသုံးပြုလေ့ရှိသော ပစ္စည်းများဖြစ်သော်လည်း ဤနေရာတွင်မူ ၎င်းတို့ကို အနက်ရောင်ဂူသင်္ချိုင်းကမ္ဗည်းတိုင်များ ပြုလုပ်ရန်အတွက် အခြေခံပစ္စည်းများအဖြစ်သာ အသုံးပြုထားသည်။

နတ်ဘုရားအဆင့် ပစ္စည်းများဖြင့် ပြုလုပ်ထားသော ထိုအနက်ရောင်ကမ္ဗည်းတိုင်များကို မဟာသူတော်စင်အဆင့် စွမ်းအားဖြင့် မဆိုထားနှင့် သူတော်စင်ဘုရင်အဆင့်၏ စွမ်းပကားဖြင့်ပင် ဖျက်ဆီး၍ မရနိုင်ပေ။

ထို့ကြောင့်လည်း လင်းချန်သည် ဘိုးဘေးနယ်မြေအတွင်း၌ မည်သည့်စိုးရိမ်ပူပန်မှုမျှမရှိဘဲ အတွင်းတံခါးရှစ်ခုကျင့်စဉ်၏ တံခါးအသစ်ကို ဖောက်ထွက်ရဲခြင်းဖြစ်သည်။

အမှန်တကယ်ပင် ၁၅ မိနစ်ကြာ နတ်ဘုရားအဆင့် သိမြင်နားလည်မှုအပြီးတွင် သူသည် အတွင်းတံခါးရှစ်ခုကျင့်စဉ်၏ ဒုတိယမြောက်တံခါးကို အပြည့်အဝ နားလည်သွားခဲ့ပြီဖြစ်သည်။ ယခု လိုအပ်နေသည်မှာ ဒုတိယတံခါး၏ အတားအဆီးကို ချိုးဖျက်ကာ...အနားယူခြင်းတံခါးကို အမှန်တကယ် ဖွင့်လှစ်ရန်သာ ဖြစ်သည်။

“ဝုန်း”

“ဝုန်း”

“ဝုန်း”

“...”

မရပ်မနား၊ ဇွဲနပဲဖြင့် ထပ်တလဲလဲ ရိုက်ခတ်မှုများကြောင့် ကျယ်ပြောလှပြီး စင်ကြယ်သည့် ငွေရောင်နှင့် မီးခိုးရောင် ဖရိုဖရဲ ဝိညာဉ်စွမ်းအင်များသည် လင်းချန်၏ ခန္ဓာကိုယ်မျက်နှာပြင်မှပင် လျှံထွက်လာခဲ့၏။ အရပ်မျက်နှာအနှံ့သို့ ပျံ့နှံ့နေသော မမြင်ရသည့် လှိုင်းလုံးများ၏ စွမ်းအားသည်လည်း တစ်စစ တိုးလာခဲ့သည်။

ထွက်ပေါ်လာသည့် အနက်ရောင် ဟင်းလင်းပြင်အက်ကြောင်းများ၏ အကြိမ်ရေနှင့် အက်ကြောင်းအကျယ်အဝန်းတို့သည်လည်း အချိုးကျ ပိုမိုမြန်ဆန်စွာ ကြီးမားလာခဲ့သည်။ သို့သော် လင်းချန်သည် ထိုအရာများကို အာရုံမစိုက်အားပေ။

ဒုတိယတံခါးဖြစ်သော အနားယူခြင်းတံခါး၏ အတားအဆီးသည် ပျက်စီးနေပြီဖြစ်ကာ မကြာမီ အမှန်တကယ် ပွင့်ထွက်သွားတော့မည်ကို သူ ခံစားသိရှိနေခဲ့သည်။ ထို့ကြောင့် သူသည် ခန္ဓာကိုယ်အတွင်းရှိ ဖရိုဖရဲ ဝိညာဉ်စွမ်းအင်များကို လှည့်ပတ်သည့်အရှိန်ကို ပိုမိုမြှင့်တင်လိုက်ပြီး တံခါး၏အတားအဆီးကို ပို၍လျင်မြန်စွာ ချိုးဖျက်ရန် ကြိုးစားလိုက်လေသည်။

ထိုမျှသာမက အတွင်းတံခါးရှစ်ခုကျင့်စဉ်၏ ဒုတိယတံခါးကို ဖောက်ထွက်နေစဉ်မှာပင် လင်းချန်သည် အာရုံခွဲကာ သွမ့်ကျား နတ်ဘုရားစွမ်းရည်ကိုလည်း တစ်ပြိုင်နက်တည်း သိမြင်နားလည်အောင် ကြိုးစားနေခဲ့သည်။

ယခင်က သွမ့်ကျားနတ်ဘုရားစွမ်းရည်သည် တစ်ခဏချင်းအတွင်း မိုင်တစ်သောင်းခရီးကိုသာ ရွှေ့ပြောင်းနိုင်ခဲ့သော်လည်း ယခုအခါ သူ၏သိမြင်မှုကြောင့် ဤအကွာအဝေးမှာ ဆပွားတိုးတက်လာခဲ့သည်။

မိုင်ပေါင်းသုံးသောင်း...။

တံခါးအတားအဆီးကို ဖောက်ထွက်နေသည့် အချိန်လေးအတွင်း သိမြင်နားလည်လိုက်ရုံဖြင့်ပင် သူသည် သွမ့်ကျားစွမ်းရည်၏ ရွှေ့ပြောင်းနိုင်သော အကွာအဝေးကို မိုင်ပေါင်းသုံးသောင်းအထိ တိုးမြှင့်နိုင်ခဲ့သည်။ ဤအကွာအဝေးသည်လည်း အချိန်နှင့်အမျှ အဆက်မပြတ် လျင်မြန်စွာ ဆက်လက်ကျယ်ပြန့်နေဆဲပင်။

အနားယူခြင်းတံခါး၏ အတားအဆီးများ တဖြည်းဖြည်း ကြေမွပျက်စီးလာမှုနှင့် သွမ့်ကျားနတ်ဘုရားစွမ်းရည်၏ တည်နေရာကူးပြောင်းနိုင်စွမ်း မြင့်တက်လာမှုကို ခံစားရင်း လင်းချန်၏နှလုံးသားထဲ၌ အတိုင်းအဆမရှိ ဝမ်းမြောက်နေမိသည်။

ဤ လက်မှတ်ထိုးဝင်ခြင်း ဆုလာဘ်သည် အပေါ်ယံကြည့်လျှင် သာမန်ဟုသာ ထင်ရသော်လည်း သူ၏ တိုက်ခိုက်ရေးစွမ်းရည်တစ်ခုလုံးအပေါ် မြှင့်တင်ပေးမှုမှာမူ အလွန်ပင် ကြီးမားလှပေသည်။

နတ်ဘုရားအဆင့် သိမြင်နားလည်မှု ကောင်းချီး၏ သုံးရှီချန် ကြာချိန် မကုန်ဆုံးမီတွင် သူ အဆင့်မြှင့်တင်ထားသော ဓားအနှစ်သာရကိုပါ အသွင်ကူးပြောင်းမှု ဖြစ်ပေါ်စေနိုင်လိမ့်မည်ဟု သူ ယုံကြည်ချက် အပြည့်ရှိနေပြီဖြစ်သည်။

၎င်းမှာ မူလဓားစွမ်းပင်းကို ရရှိရန်အတွက်ပင်...။

“ဝုန်း”

“ခရက်... ဘုန်း”

နောက်ဆုံးတွင် ဖရိုဖရဲ ဝိညာဉ်စွမ်းအင်များဖြင့် ၁၅ မိနစ်တိုင်တိုင် အဆက်မပြတ် ရိုက်ခတ်ပြီးနောက် အတွင်းတံခါးရှစ်ခုကျင့်စဉ်၏ ဒုတိယမြောက်တံခါး အနားယူခြင်းတံခါး၏ အတားအဆီးသည် အဆုံး၌ ကြေမွပျက်စီးသွားခဲ့ပြီဖြစ်သည်။

“ဝီ... ဝီ... ဝီ...”

လင်းချန်၏ ခန္ဓာကိုယ်မှ ပြင်းထန်ပြီး ထိတ်လန့်ဖွယ်ကောင်းသော အရှိန်အဝါများ ပေါက်ကွဲထွက်ပေါ်လာကာ ပတ်ဝန်းကျင် မိုင်တစ်သောင်းအတွင်းရှိ ဟင်းလင်းပြင်တစ်ခုလုံးကို လွှမ်းခြုံသွားခဲ့သည်။ ဟင်းလင်းပြင်တစ်ခုလုံးသည် လင်းချန်၏ အားကောင်းလှသော အရှိန်အဝါများအောက်သို့ ရောက်ရှိသွားခဲ့တော့လေသည်။

ဤအရှိန်အဝါအတွင်း၌ အားကောင်းသော ခန္ဓာကိုယ်ဖိအား၊ နတ်ဘုရားစိတ်ဝိညာဉ်ဖိအားနှင့် ဝိညာဉ်စွမ်းအင်ဖိအားတို့ တစ်ပြိုင်နက်တည်း ပါဝင်နေ၏။

သူ၏ ကျင့်စဉ်သုံးမျိုးပေါင်းစပ်ထားသော ဖိအားအောက်တွင် မဟာသူတော်စင်အဆင့် ပညာရှင်တစ်ဦးပင်လျှင် ဤနေရာ၌ ခေါင်းငုံ့ရမည်ဖြစ်ပြီး ခုခံလိုစိတ် အနည်းငယ်မျှပင် မွေးမြူဝံ့မည်မဟုတ်ပေ။

သို့သော် တစ်ခဏအတွင်းမှာပင် ထိုထိတ်လန့်ဖွယ်ရာ ဖိအားများသည် မည်သည့်အခါကမျှ မရှိခဲ့ဖူးသည့်အလား အစအနမကျန် ပျောက်ကွယ်သွားခဲ့သည်။ ခန္ဓာကိုယ်အတွင်းရှိ စွမ်းအားများကို ပြန်လည်ရုပ်သိမ်းလိုက်ပြီးနောက် လင်းချန်သည် တံခါးအတားအဆီးကို ဖောက်ထွက်ရန် အသုံးပြုခဲ့သော အာရုံစူးစိုက်မှုအားလုံးကို သွမ့်ကျား နတ်ဘုရားစွမ်းရည်ကို သိမြင်နားလည်ရန်အတွက် ပြောင်းလဲအသုံးပြုလိုက်သည်။

ဒုတိယမြောက်တံခါးဖြစ်သော အနားယူခြင်းတံခါးကို ဖွင့်လှစ်နိုင်ခဲ့သည့်အတွက် သူ အလွန်ဝမ်းသာမိသော်လည်း ယခုအချိန်သည် ပျော်မြူးနေရမည့်အချိန်မဟုတ်မှန်း သူသိပေသည်။

ယခု သူလုပ်ဆောင်ရမည့်အရာမှာ ကျန်ရှိနေသေးသော အချိန်များကို အပြည့်အဝ အကျိုးရှိရှိ အသုံးချနိုင်ရန်အတွက် သူ၏ စိတ်ဝိညာဉ်တစ်ခုလုံးကို သိမြင်နားလည်မှုများထဲ၌ နှစ်မြှုပ်ထားရန်ပင် ဖြစ်သည်။

သွမ့်ကျားနတ်ဘုရားစွမ်းရည်၏ ကူးပြောင်းနိုင်သော အကွာအဝေးမှာ ယခုအခါ ပိုမိုတိုးတက်လာပြီး မိုင်ပေါင်းငါးသောင်းအထိ ရောက်ရှိသွားခဲ့ပြီဖြစ်သည်။ သို့သော် လင်းချန်အတွက်မူ ဤသည်မှာ မလုံလောက်သေးပေ။ လိုအပ်ချက်နှင့် အလွန်ဝေးကွာနေသေးသည်။

မိုင်ပေါင်းငါးသောင်းဆိုသည်မှာ အသံကြားရရုံဖြင့် ဝေးကွာသည်ဟု ထင်ရသော်လည်း အမှန်တကယ် အစွမ်းထက်သော ပညာရှင်များအတွက်မူ လက်တစ်ကမ်းအကွာအဝေးမျှသာ ဖြစ်သည်။

ယခုတစ်ကြိမ်တွင်မူ သူသည် သွမ့်ကျားနတ်ဘုရားစွမ်းရည်၏ တည်နေရာကူးပြောင်းနိုင်သော အကွာအဝေးကို မိုင်တစ်သန်း အထိ ရောက်ရှိရန် ပန်းတိုင်သတ်မှတ်လိုက်လေသည်။

မိုင်တစ်သန်းခရီးအထိ ရွှေ့ပြောင်းနိုင်မှသာလျှင် သူသည် မိသားစုနယ်မြေ ပြင်ပသို့ ထွက်ခွာ၍ အတွေ့အကြုံရှာဖွေရာတွင် စိတ်အေးလက်အေး ရှိနိုင်မည်ဖြစ်သည်။

ထိုအချိန်ကျလျှင် ပြင်ပလောက၌ တားမြစ်နယ်မြေ အထွတ်အထိပ်ပုဂ္ဂိုလ်မျာနှင့်ပင် ရင်ဆိုင်ရပါစေ ဧကရာဇ်အဆင့် အဆောင်လက်ဖွဲ့နှင့် သွမ့်ကျားနတ်ဘုရားစွမ်းရည်ကို အသုံးပြု၍ မိသားစုထံသို့ ဘေးကင်းလုံခြုံစွာ ပြန်လာနိုင်မည်ဖြစ်သည်။

လင်းချန်သည် သွမ့်ကျားနတ်ဘုရားစွမ်းရည်ကို သိမြင်နားလည်ရန် သူ၏ စိတ်အာရုံအားလုံးကို စူးစိုက်လိုက်သည်နှင့်အမျှ ကူးပြောင်းနိုင်သော အကွာအဝေး တိုးတက်မှုနှုန်းမှာ ချက်ချင်းပင် နှစ်ဆတိုးကာ မြင့်တက်လာခဲ့သည်။

နတ်ဘုရားအဆင့် သိမြင်နားလည်မှု ကောင်းချီးအောက်တွင် နောက်ထပ် မိနစ် ၃၀ ခန့် လျင်မြန်စွာ ကုန်ဆုံးသွားခဲ့သည်။ ကနဦး သိမြင်နားလည်မှု အချိန်နှင့်ပေါင်းလိုက်လျှင် နတ်ဘုရားအဆင့် သိမြင်မှု ကောင်းချီးသည် တစ်နာရီတိတိ ကြာမြင့်သွားခဲ့ပြီဖြစ်သည်။

ကံကောင်းစွာဖြင့် ဤတစ်နာရီအတွင်း ရရှိခဲ့သော ရလဒ်မှာလည်း အလွန်ပင် ထူးခြားလှပေသည်။

“ဟူး...”

သိမြင်နားလည်မှုများ ပြုလုပ်နေစဉ်အတွင်း လင်းချန်သည် အသက်ပြင်းပြင်းတစ်ချက် ရှူထုတ်လိုက်ပြီး သူ၏ နှုတ်ခမ်းထောင့်၌ အပြုံးစတစ်ခု ဖြစ်ပေါ်လာခဲ့သည်။

သွမ်ြကျားနတ်ဘုရားစွမ်းရည်၏ မိုင်တစ်သန်း တည်နေရာကူးပြောင်းနိုင်ခြင်း ပန်းတိုင်ကို သူ အောင်မြင်စွာ ရရှိသွားခဲ့ချေပြီ။

နောက်တစ်ဆင့်မှာမူ သူပိုင်ဆိုင်ထားသော အစစ်အမှန် အနှစ်သာရ စွမ်းအားများကို သိမြင်နားလည်ရန် အချိန်ကျရောက်လာပြီဖြစ်သည်။

လက်သီးအနှစ်သာရ၊ ဖရိုဖရဲအနှစ်သာရနှင့်... ဓားအနှစ်သာရတို့ပင် ဖြစ်သည်။

အခန်း ၇၂- ဓားအနှစ်သာရ အသွင်ကူးပြောင်းခြင်း၊ မူလဓားစွမ်းအင်၊ ဖရိုဖရဲအနှစ်သာရ ပြီးပြည့်စုံခြင်းအဆင့်သို့ ထိုးဖောက်ခြင်း

အတွေးတစ်ခုနှင့်အတူ လင်းချန်သည် စိတ်ထဲမှ ဝမ်းသာပီတိများကို ထိန်းချုပ်ကာ အမြင်သစ်များထဲသို့ တစ်ဖန်ပြန်လည် နစ်မြုပ်သွားခဲ့ပြန်သည်။

ယခု သူ၏ အစစ်အမှန် အနှစ်သာရ စွမ်းအားများအတွက် ပထမဆုံးပန်းတိုင်မှာ ပြီးပြည့်စုံခြင်းအဆင့်သို့ ရောက်ရှိထားပြီးဖြစ်သော ဓားအနှစ်သာရပင် ဖြစ်သည်။

ဓားအနှစ်သာရသာ အသွင်ကူးပြောင်းမှု ပြီးမြောက်၍ မူလဓားစွမ်းအင်အဆင့်သို့ ထိုးဖောက်နိုင်ခဲ့ပါက သူ၏ တိုက်ခိုက်ရေးစွမ်းအား တစ်ခုလုံးသည် နောက်ထပ် အဆင့်တစ်ခုသို့ ခုန်တက်သွားပေလိမ့်မည်။

မကြာမီမှာပင် လင်းချန်၏ စိတ်အာရုံသည် ဓားအနှစ်သာရ အသွင်ကူးပြောင်းရေးအတွက် သိမြင်မှုများထဲသို့ နစ်ဝင်သွားခဲ့သည်။

ဓားတာအိုနှင့် ပတ်သက်သည့် မရေမတွက်နိုင်သော နားလည်မှုများသည် သူ၏နှလုံးသားထဲသို့ အဆက်မပြတ် တိုးဝင်လာပြီး မူလဓားစွမ်းအား နယ်ပယ်သို့ ပိုမိုနီးကပ်လာခဲ့သည်။

လက်သီးအနှစ်သာရနှင့် ဖရိုဖရဲအနှစ်သာရတို့မှာ လင်းချန် သိမြင်နားလည်ထားပြီးသားဖြစ်သော အစစ်အမှန် အနှစ်သာရ စွမ်းအားများဖြစ်သည်။ ၎င်းတို့အနက် လက်သီးအနှစ်သာရအပေါ် သူ၏ နားလည်မှုမှာ ပို၍မြင့်မားကာ ၆၀ ရာခိုင်နှုန်းအထိ ရှိနေပြီဖြစ်သည်။

သူ၏ ဖရိုဖရဲအနှစ်သာရမှာ အနည်းငယ်နိမ့်ကျသော်လည်း ယခင်က နတ်ဘုရား ပင်မမျှော်စင်သို့ တက်လှမ်းစဉ်အတွင်း တိုးတက်လာခဲ့ရာ ၅၀ ရာခိုင်နှုန်း နားလည်မှုအဆင့်သို့ ရောက်ရှိနေပြီဖြစ်သည်။

ဖရိုဖရဲအနှစ်သာရသည် အားလုံးထဲတွင် အထူးခြားဆုံးနှင့် အနှိုင်းမဲ့စွမ်းအားဖြစ်ပြီး မည်သည့်နက်နဲသောအမှန်တရားအဖြစ်မဆို ပြောင်းလဲနိုင်စွမ်းရှိကာ တူညီသော သိမြင်နားလည်မှုအဆင့်ရှိသည့် အခြားမည်သည့် အစစ်အမှန် အနှစ်သာရစွမ်းအားကိုမဆို နှိမ်နင်းနိုင်စွမ်းရှိပေသည်။ ၎င်းကို အားအကောင်းဆုံး အစစ်အမှန် အနှစ်သာရစွမ်းအားဟု ခေါ်ဆိုလျှင်လည်း လွန်အံ့မထင်ပေ။

အမှန်စင်စစ် ၎င်းသည် လင်းချန်အတွက် အကြီးမားဆုံး အထောက်အပံ့ဖြစ်စေသည်မှာ သူ လက်ရှိပိုင်ဆိုင်ထားသော အစစ်အမှန် အနှစ်သာရ စွမ်းအားအားလုံးကို ပေါင်းစပ်ပေးနိုင်စွမ်းပင် ဖြစ်သည်။

ထိုစွမ်းအားဖြင့် သူသည် အစစ်အမှန် အနှစ်သာရ သုံးမျိုးစလုံးကို ဖော်ပြ၍မရနိုင်လောက်အောင် အစွမ်းထက်ပြီး လုံးဝနီးပါး ပြီးပြည့်စုံသည့် အမည်မသိ စွမ်းအားတစ်ခုအဖြစ် ပြောင်းလဲပေးနိုင်ပေလိမ့်သည်။

ဓားအနှစ်သာရကို ထိုးဖောက် အသွင်ပြောင်းပြီးနောက် လင်းချန် ဆက်လက်လုပ်ဆောင်လိုသည်မှာ ဖရိုဖရဲအနှစ်သာရကို ပိုမိုသိမြင်နားလည်ရန်ပင် ဖြစ်သည်။

ဖရိုဖရဲအနှစ်သာရသာ ဆက်လက် အားကောင်းနေသရွေ့ တစ်နေ့တွင် သူသည် ထိုစွမ်းအားကို အသုံးပြု၍ မဟာတာအို သုံးထောင်၏ စွမ်းအားကို ထိန်းချုပ်နိုင်ပေလိမ့်မည်။ ဤသည်မှာ လင်းချန်၏ ရေရှည်ပန်းတိုင်ဖြစ်ပြီး ယခုအခါ ထိုပန်းတိုင်သို့ မှန်မှန်ကန်ကန် တက်လှမ်းနေပြီဖြစ်သည်။

“ဝီ... ဝီ... ဝီ...”

သူသည် မူလဓားစွမ်းအားကို သိမြင်နားလည်ရန် သူ၏ စိတ်ဝိညာဉ်တစ်ခုလုံးကို စူးစိုက်လိုက်သည်နှင့်အမျှ တုန်ခါသံများ ဆက်တိုက်ထွက်ပေါ်လာခဲ့သည်။ လင်းချန်၏ ခန္ဓာကိုယ်ပေါ်တွင် အားကောင်းပြီး ထက်ရှသော ဓားအနှစ်သာရ စွမ်းအားများ ရစ်သိုင်းလာခဲ့သည်။

ဤဓားအနှစ်သာရစွမ်းအားသည် ပတ်ဝန်းကျင်ရှိ ဟင်းလင်းပြင်ကို အဆက်မပြတ် ပိုင်းဖြတ်နေ၏။ ဘိုးဘေးနယ်မြေ ကမ္ဘာငယ်လေးအတွင်းရှိ ဟင်းလင်းပြင်သည် အလွန်တည်ငြိမ်သော်လည်း ပြီးပြည့်စုံခြင်းအဆင့် ဓားအနှစ်သာရစွမ်းအား၏ ပိုင်းဖြတ်မှုအောက်တွင် အပေါက်ငယ်များ ဖြစ်ပေါ်လာခဲ့သည်။

နတ်ဘုရားအဆင့် သိမြင်နားလည်မှု ကောင်းချီးမှ ပေးအပ်သော နက်ရှိုင်းသည့် သိမြင်နားလည်မှုများကြားတွင် အချိန်သည် တစ်ဖန် တိတ်ဆိတ်စွာ ကုန်ဆုံးသွားခဲ့ပြန်သည်။

မျက်စိတစ်မှိတ်အတွင်းမှာပင် နောက်ထပ် နာရီဝက်ခန့် ကုန်လွန်သွားခဲ့ပြီဖြစ်သည်။

ဤနာရီဝက်အတွင်း လင်းချန်သည် သတိပြန်မဝင်လာဘဲ သူ၏ စိတ်အာရုံတစ်ခုလုံးကို မူလဓားစွမ်းအားကို သိမြင်နားလည်ရန်နှင့် အသွင်ပြောင်းရန်အတွက်သာ အသုံးချခဲ့သည်။ နာရီဝက်အကြာတွင် ဓားအနှစ်သာရအပေါ် သူ၏ကျွမ်းကျင်မှုသည် ပိုမိုတိုးတက်လာပြီး စစ်မှန်သော ပြီးပြည့်စုံသည့် သိမြင်နားလည်မှုအဆင့်သို့ ရောက်ရှိသွားခဲ့သည်။

သို့သော် မူလဓားစွမ်းအားနယ်ပယ်သို့ အသွင်ကူးပြောင်းရန်မှာ အနည်းငယ် လိုအပ်နေသေးသည်။

လင်းချန်သည် ဤအချက်အပေါ် စိတ်လှုပ်ရှားခြင်းမရှိဘဲ ယခင်အတိုင်းပင် ဓားအနှစ်သာရကို ပိုမိုနက်ရှိုင်းအောင် သိမြင်နားလည်ရန်နှင့် အသွင်ကူးပြောင်းမှုလမ်းစဉ်ကို အဆုံးသတ်ရန် ဆက်လက်ကြိုးစားနေခဲ့သည်။

သုံးနာရီကြာမြင့်သည့် နတ်ဘုရားအဆင့် သိမြင်မှု ကောင်းချီး၏ သုံးပုံတစ်ပုံဖြစ်သော တစ်နာရီသာ ကုန်ဆုံးသေးသည်။ ကျန်ရှိနေသေးသော နှစ်နာရီအတွင်း ဓားအနှစ်သာရကို အသွင်မပြောင်းနိုင်ဘဲ မူလဓားစွမ်းအားနယ်ပယ်သို့ မရောက်ရှိနိုင်စရာ အကြောင်းမရှိဟု သူ ယုံကြည်ထားသည်။

မူလဓားစွမ်းအားနယ်ပယ်ဆိုသည်မှာ နတ်ဘုရားအဆင့် ပညာရှင်များသာ ရောက်ရှိနိုင်သော အမြင့်ပေဖြစ်ပြီး နတ်ဘုရားအဆင့်သို့ ထိုးဖောက်ရန်အတွက် မရှိမဖြစ်လိုအပ်ချက်တစ်ခု ဖြစ်နေလင့်ကစား သူသည် လက်လျှော့မည်မဟုတ်ပေ။

သို့သော် သူသည် နတ်ဘုရားအဆင့် သိမြင်နားလည်မှု ကောင်းချီးကို အလွန်အမင်း ယုံကြည်ချက်ရှိနေ၏။ သူသည် နောက်ထပ် နှစ်နာရီ မဆိုထားနှင့် တစ်နာရီပင် ကြာမြင့်လိမ့်မည်မဟုတ်ပေ။

သူသည် သူ၏ ပြီးပြည့်စုံခြင်းအဆင့်ရှိသော ဓားအနှစ်သာရကို အသွင်ပြောင်းကာ မူလဓားစွမ်းအားနယ်ပယ်သို့ တက်လှမ်းနိုင်ပေလိမ့်မည်။

အချိန်များ ကုန်ဆုံးသွားခဲ့ပြီး နောက်ထပ် နာရီဝက်ခန့် လျင်မြန်စွာ ကုန်လွန်သွားခဲ့ပြန်သည်။ ယခုအခါ လင်းချန်၏ ခန္ဓာကိုယ်ပတ်ပတ်လည်ရှိ ဟင်းလင်းပြင်သည် သိပ်သည်းလှသော ဓားစွမ်းအားများဖြင့် ပြည့်နှက်နေပြီဖြစ်သည်။ ဤဓားစွမ်းအားများ တည်ရှိရာနေရာရှိ ဟင်းလင်းပြင်မှာ ဆက်လက်မတည်ရှိနိုင်တော့ဘဲ အနက်ရောင် ဟင်းလင်းပြင်တွင်းနက်ကြီးသာလျှင် ၎င်း၏ စွမ်းပကားကို ခံနိုင်ရည်ရှိတော့သည်။

ဘိုးဘေးနယ်မြေ ကမ္ဘာငယ်လေး၏ နိယာမများသည် ပျက်စီးသွားသော ဟင်းလင်းပြင်ကို ပြန်လည်ပြုပြင်ရန် ကြိုးစားနေသော်လည်း သမုဒ္ဒရာထဲသို့ ရေတစ်စက် ချလိုက်သကဲ့သို့ပင် အချည်းနှီးသာ ဖြစ်နေခဲ့သည်။

ဟင်းလင်းပြင်သည် အနည်းငယ် ပြန်လည်ကောင်းမွန်လာသည်နှင့် တစ်ပြိုင်နက် ချက်ချင်းဆိုသလို ပြန်လည်စုတ်ပြဲသွားခဲ့ရာ လုံးဝဥဿုံ ပြန်လည်ကုသရန်မှာ မဖြစ်နိုင်တော့ပေ။

လင်းချန်၏ မျက်နှာပေါ်တွင် အလွန်လေးနက်သော အရိပ်အယောင်တစ်ခု ဖြစ်ပေါ်လာခဲ့သည်။

ဓားအနှစ်သာရ အသွင်ကူးပြောင်းခြင်းသည် ယခုအခါ အရေးကြီးဆုံး အခိုက်အတန့်သို့ ရောက်ရှိနေပြီဖြစ်သည်။

နောက်ထပ် ခြေလှမ်းတစ်လှမ်း လှမ်းရုံဖြင့် သူသည် ဓားအနှစ်သာရကို ဖောက်ထွက်စေပြီး ပိုမိုမြင့်မားသော အဆင့်ဖြစ်သည့် မူလဓားစွမ်းအားကို ရရှိနိုင်တော့မည်ဖြစ်သည်။ သူသည် ဤအသွင်ကူးပြောင်းမှုကို တစ်ချက်တည်းဖြင့် အပြီးသတ်ရပေလိမ့်မည်။

အတန်ကြာသော် လင်းချန်၏ အမူအရာမှာ တောင့်တင်းသွားပြီး သူ၏ အနှစ်သာရ၊ စွမ်းအင်နှင့် စိတ်ဝိညာဉ်အားလုံးသည် တစ်ပြိုင်နက်တည်း ပေါင်းစည်းသွားကာ အတားအဆီးတစ်ခုဆီသို့ အရှိန်အဟုန်ဖြင့် ပြေးဝင်သွားခဲ့သည်။

“ဝုန်း”

ထိုအခိုက်အတန့်တွင် လင်းချန်၏ ပတ်ဝန်းကျင်ရှိ အရာအားလုံးသည် လုံးဝဥဿုံ ပျက်စီးသွားခဲ့ပြီး အနက်ရောင် ဟင်းလင်းပြင်နယ်ပယ်ပင်လျှင် အဆက်မပြတ် တုန်ခါနေခဲ့သည်။ မူလက ဓားအနှစ်သာရနှင့် သက်ဆိုင်သော ဓားတာအို အရှိန်အဝါသည် အံ့အားသင့်ဖွယ် ပြောင်းပြန်လှန်မှုကို စတင်ခဲ့ပြီး ပိုမိုမြင့်မားသော အတိုင်းအတာရှိသည့် စွမ်းအားတစ်ခုအဖြစ်သို့ စတင်ပြောင်းလဲလာခဲ့သည်။

ထိုအရာမှာ... မူလဓားစွမ်းအားပင် ဖြစ်သည်။

ဓားအနှစ်သာရ အသွင်ကူးပြောင်းနေစဉ်အတွင်း မျက်စိမှိတ်ထားသော လင်းချန်၏ နှုတ်ခမ်းထောင့်တွင် စစ်မှန်သော အပြုံးတစ်ခု ဖြစ်ပေါ်လာခဲ့သည်။ နောက်ဆုံးတွင် သူ၏ ပြီးပြည့်စုံခြင်းအဆင့် ဓားအနှစ်သာရသည် ထိုးဖောက်သွားနိုင်ခဲ့ပြီဖြစ်ပြီး မူလဓားစွမ်းအားနယ်ပယ်သို့ တက်လှမ်းနိုင်ခဲ့ပြီဖြစ်သည်။

ဤနည်းဖြင့် သူသည် ယခုအချိန်တွင် နတ်ဘုရားအဆင့်သို့ တက်လှမ်းမည်ဆိုပါက မည်သည့်ကန့်သတ်ချက်မျှ ရှိတော့မည်မဟုတ်ပေ။ သူသည် မူလဓားစွမ်းအားကို တိုက်ရိုက်အသုံးပြု၍ နတ်ဘုရားအဆင့်သို့ ထိုးဖောက်နိုင်ပြီဖြစ်သည်။

ဟုတ်ပေသည်။ နတ်ဘုရားအဆင့်သို့ ထိုးဖောက်ရန်အတွက် မူလစွမ်းအားကို သိမြင်နားလည်ရုံသာမက ကြီးမားခမ်းနားသော စွမ်းအင်ပမာဏလည်း လိုအပ်ပေသည်။ ယခုအချိန်တွင် လင်းချန်သည် လိုအပ်ချက်တစ်ခုကိုသာ ဖြည့်ဆည်းနိုင်သေးခြင်းဖြစ်ပြီး စစ်မှန်သော နတ်ဘုရားအဆင့်သို့ ရောက်ရှိရန် လမ်းခရီးမှာ အတော်ဝေးသေးသည်။

ခဏတာ ဝမ်းမြောက်ပြီးနောက် လင်းချန်သည် စိတ်ကိုပြန်လည်တည်ငြိမ်အောင် ထိန်းလိုက်ပြီး သူ၏ အာရုံအားလုံးကို ပြန်လည်စုစည်းလိုက်သည်။ နတ်ဘုရားအဆင့် သိမြင်နားလည်မှု ကောင်းချီး၏ အချိန်မှာ တစ်နာရီခွဲခန့် ကုန်ဆုံးသွားခဲ့ပြီဖြစ်ရာ အချိန်တစ်ဝက်ကျော်သာ ကျန်ရှိတော့သည်။

သူသည် ဤကျန်ရှိနေသော အချိန်ကို ကောင်းစွာ အသုံးချရပေမည်။

နောက်ထပ် ပန်းတိုင်မှာ ဖရိုဖရဲအနှစ်သာရ စွမ်းအားကို ပြီးပြည့်စုံခြင်းအဆင့်သို့ မြှင့်တင်ရန်ပင် ဖြစ်သည်။

မည်သည့် တွန့်ဆုတ်မှုမျှမရှိဘဲ လင်းချန်၏ စိတ်အာရုံသည် အတွေးတစ်ချက်ဖြင့် အမြင်သစ်များထဲသို့ ပြန်လည်ဝင်ရောက်သွားခဲ့သည်။ ယခုတစ်ကြိမ်တွင်မူ သူ သိမြင်နားလည်ရန် ကြိုးစားနေသောအရာမှာ အခြားမဟုတ်ဘဲ သူ၏ ဖရိုဖရဲအနှစ်သာရ စွမ်းအားပင် ဖြစ်သည်။

ဖရိုဖရဲအနှစ်သာရသည် ဓားအနှစ်သာရထက်ပင် ပိုမိုဆန်းကြယ်လှပြီး ထိုးဖောက်ရန်အတွက် သိမြင်နားလည်မှု ရယူရန်မှာလည်း ပို၍ပင် ခက်ခဲလှသည်။ ကံကောင်းသည်မှာ ယခုတစ်ကြိမ်တွင် သူသည် ဖရိုဖရဲအနှစ်သာရကို ဖရိုဖရဲ မူလနယ်ပယ်သို့ အသွင်ပြောင်းရန် မရည်ရွယ်သေးဘဲ ၎င်း၏ အနှစ်သာရအဆင့်အတွင်း၌သာ တိုးတက်ရန် ကြိုးစားခြင်းဖြစ်သည်။

နတ်ဘုရားအဆင့် သိမြင်နားလည်မှု ကောင်းချီးနှင့်ဆိုလျှင် ကျန်ရှိသော တစ်နာရီခွဲအချိန်သည်ပင် သူ၏ ဖရိုဖရဲအနှစ်သာရကို အဆင့်အတော်များများ မြှင့်တင်ရန် လုံလောက်သင့်ပေသည်။

သိမြင်နားလည်မှုရယူခြင်း လုပ်ငန်းစဉ်သည် အလွန်ငြီးငွေ့ဖွယ်ကောင်းသော်လည်း လင်းချန်ကမူ ၎င်းကို ပျော်မွေ့နေခဲ့သည်။ သူ၏ အစွမ်းများ တိုးတက်လာသည်ဟူသော ခံစားချက်က သူ့ကို အလွန်အမင်း စွဲလန်းစေပြီး ဤအခြေအနေထဲတွင် ထာဝရ နစ်မြုပ်နေချင်စိတ်ပင် ပေါက်လာစေလေသည်။

ကံဆိုးစွာပင် နတ်ဘုရားအဆင့် သိမြင်နားလည်မှု ကောင်းချီးသည် ထာဝရ တည်မြဲနေမည် မဟုတ်ပေ။ စွမ်းအားများ အရှိန်အဟုန်ဖြင့် ထိုးတက်သွားသည့် ဤခံစားချက်ကို ဤတိုတောင်းသော အချိန်ကာလအတွင်း၌သာ ခံစားနိုင်မည်ဖြစ်သည်။

မကြာမီမှာပင် တစ်နာရီ ကုန်လွန်သွားခဲ့၏။

ဤတစ်နာရီအတွင်း လင်းချန်သည် ယခင်အတိုင်းပင် အနည်းငယ်မျှ ပျင်းရိမနေဘဲ ဖရိုဖရဲအနှစ်သာရကို သိမြင်နားလည်ရန် သူ၏ စိတ်နှလုံးတစ်ခုလုံးကို နှစ်မြှုပ်ထားခဲ့သည်။ ကြိုးစားမှု၏ ရလဒ်အနေဖြင့် ဖရိုဖရဲအနှစ်သာရသည် ယခုအခါ ၉၉ ရာခိုင်နှုန်း သိမြင်နားလည်မှုအဆင့်သို့ ရောက်ရှိသွားခဲ့ပြီ ဖြစ်သည်။

ဖရိုဖရဲအနှစ်သာရ၏ ပြီးပြည့်စုံခြင်းအဆင့်သို့ ရောက်ရှိရန် နောက်ဆုံးလက်ကျန် အစိတ်အပိုင်းလေးတစ်ခုသာ လိုတော့သည်။

ဤအချိန်အတွင်း လင်းချန်၏ အတွေ့အကြုံမှာ အလွန်ပင် ဆန်းကြယ်လှပေသည်။ သူသည် ဖရိုဖရဲအနှစ်သာရကို အသုံးပြု၍ အခြားမည်သည့် စစ်အမှန်အနှစ်သာရ စွမ်းအားကိုမဆို အစားထိုးနိုင်ကြောင်း ခံစားနေရပြီး ၎င်း၏ စွမ်းအားမှာလည်း မူလစွမ်းအားထက်ပင် ပိုမိုအားကောင်းကာ ပိုမိုနူးညံ့သိမ်မွေ့နေခဲ့သည်။

ထိုအစစ်အမှန် အနှစ်သာရ စွမ်းအားများအကြောင်းကို အသေးစိတ် သိရှိနေရန်ပင် မလိုဘဲ တစ်ချက်ကြည့်လိုက်ရုံဖြင့် တိုက်ပွဲတွင် အသုံးပြုရန်အတွက် ၎င်းတို့ကို ပြီးပြည့်စုံစွာ ဆင့်ကဲပြောင်းလဲနိုင်စွမ်း ရှိလာခဲ့သည်။

“ဝုန်း”

နောက်ဆုံးတွင် ဆန်းကြယ်လှသော အတွေ့အကြုံများကြား၌ လင်းချန်၏ ဖရိုဖရဲအနှစ်သာရသည် နောက်ထပ် ခြေလှမ်းတစ်လှမ်း တက်လှမ်းနိုင်ခဲ့ပြီး ပြီးပြည့်စုံခြင်းအဆင့်သို့ အမှန်တကယ် ရောက်ရှိသွားခဲ့ပြီဖြစ်သည်။

လင်းချန်သည် မျက်လုံးများကို ရုတ်တရက် ဖွင့်လိုက်ပြီး သူ၏ လက်ဖဝါးကို မယုံကြည်နိုင်သည့် မျက်ဝန်းများဖြင့် ငုံ့ကြည့်မိလိုက်၏။ အစစ်အမှန် အနှစ်သာရ စွမ်းအားများကို သိမြင်နားလည်ရန် ဤမျှအထိ လွယ်ကူလိမ့်မည်ဟု သူ မထင်ထားခဲ့မိပေ။

ဖရိုဖရဲအနှစ်သာရ ၅၀ ရာခိုင်နှုန်း သိမြင်နားလည်မှုမှသည် ပြီစပြည့်စုံခြင်းအဆင့်သို့ ဤမျှ လျင်မြန်စွာ တိုးတက်သွားခြင်းလော။

နတ်ဘုရားအဆင့် သိမြင်နားလည်မှု ကောင်းချီးသည် နောက်ထပ် နာရီဝက်ပင် မပြည့်တော့သော အချိန်သာ ကျန်ရှိတော့လေသည်။ ဤနောက်ဆုံး နာရီဝက်အတွင်း သူ ဘာကို ဆက်လက် သိမြင်နားလည်အောင် လုပ်ဆောင်သင့်သနည်း။