အခန်း (၆၃၇-၆၃၈)

အခန်း ၆၃၇ ခြံဝင်းများကို ပေါင်းစပ်ခြင်း၊ ရေသူမျိုးနွယ်၏ အမွေအနှစ်နယ်မြေသို့ ရောက်ရှိခြင်း

ရေထဲတွင်တိုက်ခိုက်ရာ၌ ရှောင်းယီသည် အဆုံးမရှိသော ခုခံမှုကို ခံစားလိုက်ရသည်။ ဓားရှည်တစ်ချက်လွှဲရန်မှာ ကုန်းမြေပေါ်နှင့်နှိုင်းယှဉ်ပါက နှစ်ဆခန့် ပိုမိုအားစိုက်ထုတ်ရသည်။

“ဒါက ငါ့ရဲ့စစ်ရေးကျွမ်းကျင်မှုတွေကို သွေးဖို့အတွက် နေရာကောင်းတစ်ခုဖြစ်ပုံပဲ။”

ရှောင်းယီက သူ့ဘာသာ တွေးလိုက်မိသည်။

“ဒါက နယ်မြေကောင်းတစ်ခုပဲ။”

ရေကာကွယ်ပုလဲများ လုံလုံလောက်လောက် ရရှိနိုင်သရွေ့ သူသည် လေ့ကျင့်ရန်အတွက် ပင်လယ်ထဲသို့ လူများအား ပိုမိုခွင့်ပြုနိုင်မည်ဖြစ်သည်။

ပင်လယ်ထဲတွင် စိတ်ချ‌လက်ချရှိနေနိုင်ပါက ကုန်းမြေပေါ်သို့ ပြန်ရောက်သောအခါ ၎င်းတို့၏အင်အားသည် သိသိသာသာ တိုးတက်လာမည်ဖြစ်သည်။

ရှောင်းယီသည် ရွှမ်းယွမ်ဓား၏ ထက်ရှမှုကို အသုံးပြု၍ ပင်လယ်ပုစွန်ကို နှစ်ပိုင်းပိုင်းလိုက်သည်။

ရေကာကွယ်ပုလဲ အခြားတစ်လုံးကို ထပ်မံရရှိခဲ့ကာ ရှောင်းယီသည် ၎င်းကိုသိမ်းလိုက်ပြီး ရေသူမျိုးနွယ်၏ အမွေအနှစ်နယ်မြေသို့ ဆက်လက်ခရီးဆက်လိုက်သည်။

ထိုအချိန်တွင် ရှောင်းယီ၏ကျွန်းရှိ ခြံဝင်းကို ရှင်းလင်းပြီးသွားပြီဖြစ်သည်။

ယွမ်နွန်ထံမှ ပညာသင်ယူနေသူများသည် သူ့ကို အံ့အားသင့်စွာကြည့်လိုက်ကြ၏။ သူသည် အဘယ်ကြောင့် စိုက်ပျိုးခြင်းကို ရပ်တန့်လိုက်သနည်းဟု အံ့အားသင့်နေခဲ့ကြသည်။

ရှောင်းယီ၏အိပ်ယာခြံဝင်းတွင် အပူထိန်းစနစ်တစ်ခုရှိကြောင်း သူတို့သိထားကြသည်။ ထို့ကြောင့် အချိန်မရွေး စိုက်ပျိုးနိုင်ပြီး မည်သည့်အခါကမျှ နှောင့်နှေးစေခြင်းမရှိခဲ့ဖူးပေ။

ထို့အပြင် အကူအညီပေးရန်အတွက် စိုက်ပျိုးရေးအကူများလည်း ရှိသဖြင့် ၎င်းတို့သည် လက်တစ်ဖက်ပင် လှုပ်ရှားစရာ မလိုအပ်ပေ။ ထိုအဆင့်မြင့်အဆောက်အဦးကို အလွတ်ထားရှိခြင်းက အလွန်ဖြုန်းတီးရာကျလွန်းပေသည်။

အပြင်ဘက်ရှိ အပူချိန်လျော့ကျလာသည်နှင့်အမျှ အပြင်ဘက်တွင်စိုက်ပျိုးရန်မှာ မသင့်လျော်တော့ပေ။

ဟုတ်ပါသည်။ ယွမ်နွန်၏လမ်းညွှန်မှုအောက်တွင် နယ်ပယ်အပြင်ဘက်တွင်လည်း ဖန်လုံအိမ်များတပ်ဆင်ထားခဲ့ပြီး သူတို့အား ပိုမိုကြာရှည်စွာစိုက်ပျိုးနိုင်စေခဲ့သည်။

“အန်းရန် ငါ ဒီမှာအဆင်သင့်ဖြစ်နေပြီ။”

ယွမ်နွန်က ဖုန်းဖြင့် အန်းရန်အား ပြောလိုက်သည်။

အန်းရန်က တုံ့ပြန်လိုက်ပြီး စူပါပေါင်းစပ်ခြင်းစက်ဖြင့် ရောက်ရှိလာကာ ပေါင်းစပ်ရန်ပစ်မှတ်ကို သူမ၏ရှေ့ရှိ S အဆင့် အိမ်ယာခြံဝင်းနှစ်ခုအဖြစ် သတ်မှတ်လိုက်သည်။

အိမ်ယာခြံဝင်းများသည် ရှောင်းယီနှင့် သူ၏တပ်ဖွဲ့အား အရည်အသွေးမြင့် အစားအစာများစွာ ပေးဆောင်ခဲ့ပြီး ပြင်ပပတ်ဝန်းကျင်အခြေအနေများ၏ သက်ရောက်မှုကို မခံရဘဲ စိုက်ပျိုးခြင်းကို ဆက်လက်လုပ်ဆောင်နိုင်စေသည်။ ၎င်းတို့၏အရေးပါမှုသည် အစားထိုး၍မရနိုင်ချေ။

ထို့ကြောင့် ရှောင်းယီသည် အဆောက်အဦးအဆင့်မြှင့်တင်ခြင်းကတ် ရရှိသောအခါ သူသည် ၎င်းကို အိမ်ယာခြံဝင်းတွင်အသုံးပြုရန် စီစဉ်ထားခဲ့ခြင်းဖြစ်သည်။

S အဆင့်အိမ်ယာခြံဝင်းနှစ်ခုကို SS အဆင့်အိမ်ယာခြံဝင်းအဖြစ် ပေါင်းစပ်ပြီးနောက် အဆင့်မြှင့်တင်ခြင်းကတ်ကို အသုံးပြု၍ ၎င်းကို SSS အဆင့်အဖြစ်သို့ အဆင့်မြှင့်တင်နိုင်ခဲ့ပြီး သူ၏ အိမ်ယာခြံဝင်းကို တိုက်ရိုက်ပင် ထိပ်ဆုံးအဆင့်သို့ ခေါ်ဆောင်သွားနိုင်မည်ဖြစ်သည်။

အိမ်ယာခြံဝင်းနှစ်ခုမှ တစ်ခုတည်းဖြစ်သွားခဲ့သော်လည်း ရှောင်းယီသည် SSS အဆင့်အိမ်ယာခြံဝင်းက သူ့ကို စိတ်ပျက်စေမည်မဟုတ်ဟု ယုံကြည်ပေသည်။

ရှောင်းယီ၏ခန့်မှန်းချက်အရ အဆင့်မြှင့်တင်ပြီးနောက် ဧရိယာမှာ သိသိသာသာ တိုးလာနိုင်ပေသည်။ ထို့ကြောင့် ရှောင်းယီသည် အန်းရန်အား ဦးစွာပေါင်းစပ်ခိုင်းထားခဲ့ပြီး သူ ရေသူမျိုးနွယ်မှ ပြန်လာပြီးနောက် ၎င်းကို အဆင့်မြှင့်တင်မည်ဖြစ်သည်။

ထို့အပြင် ဤအဆင့်မြှင့်တင်မှုမှတစ်ဆင့် အုတ်မြစ်ကျောက်အမြောက်အမြားရရှိနိုင်မည့် အခွင့်အရေးတစ်ခုကိုရှာဖွေရမည်ဖြစ်သည်။ အဘယ်ကြောင့်ဆိုသော် အုတ်မြစ်ကျောက်အမြောက်အမြားရရှိသောအခါမှသာ ကျွန်းပေါ်ရှိအဆောက်အအုံများကို ပြန်လည်နေရာချထားရန် အခွင့်အရေးရရှိမည်ဖြစ်သောကြောင့်ပင်။

စူပါပေါင်းစပ်ခြင်းစက်၏အကျိုးသက်ရောက်မှုအောက်တွင် အိပ်ယာခြံဝင်းနှစ်ခုသည် တစ်ခုတည်းအဖြစ်သို့ ပေါင်းစပ်သွားသော်လည်း ၎င်း၏အသွင်အပြင်မှာမူ လုံးဝကွဲပြားသွားခဲ့သည်။

ခြံဝင်းအတွင်းရှိ အဆောက်အအုံများသည် ပိုမိုမြင့်မားလာပြီး စိုက်ပျိုးရေးနယ်ပယ်နှင့် တိရစ္ဆာန်နှင့် ကြက်၊ဘဲ၊ငှက်မွေးမြုရေးနေရာ၏ ဧရိယာသည်လည်း ပိုမိုကြီးမားလာခဲ့သည်။ အများဆုံးစိုက်ပျိုးရေးအဆင့်ကိုလည်း SS အဆင့်သို့ မြှင့်တင်ထားခဲ့သည်။

“ရပြီ ယွမ်လောင် ကျွန်းပိုင်ရှင်က နောက်မှ ထပ်ပြီးအဆင့်မြှင့်တင်မယ်လို့ ပြောထားတယ်။ အဲ့ဒါကြောင့် ရှင် အခုချိန်မှာ အသုံးပြုလို့ရပါတယ်။”

အန်းရန်က ပြောလိုက်သည်။

ယွမ်နွန်က ခေါင်းညိတ်ပြလိုက်ပြီး သူ၏လူများကို ခေါ်သွားခဲ့သည်။ ဤခြံဝင်းအသစ်နဲ့ မြန်မြန်ရင်းနှီးကျွမ်းဝင်အောင်လုပ်ရန် လိုအပ်ပေသည်။

ထိုအချိန်တွင် ရှောင်းယီနှင့် အခြားသူများသည် အမျိုးမျိုးသော SS အဆင့် ရေနေသတ္တဝါကြီးရှစ်ကောင်နှင့် ရင်ဆိုင်ခဲ့ရသည်။ ရှောင်းယီနှင့် တပိုင်တို့၏ ပူးပေါင်းဆောင်ရွက်ခြင်းဖြင့် ၎င်းတို့ကို မြန်မြန်ဆန်ဆန် ကိုင်တွယ်ဖြေရှင်းနိုင်ခဲ့သည်။

ပင်လယ်ထဲတွင် တိုက်ခိုက်ရသည်ကို ပိုမိုကျွမ်းကျင်လာသည်နှင့်အမျှ ၎င်းတို့၏သတ်ဖြတ်မှုအရှိန်သည်လည်း ပိုမိုမြန်ဆန်လာခဲ့သည်။

“ဒီတစ်ကောင်မှာ ရေကာကွယ်ပုလဲမရှိဘူး။”

ရှောင်းယီက ပြောလိုက်သည်။

“ပုဇွန်စစ်သည်တိုင်းနဲ့ ကဏန်းဗိုလ်ချုပ်တိုင်းမှာ ရေကာကွယ်ပုလဲတွေ မရှိတဲ့ပုံပဲ။”

“ဒါက စွမ်းအားနဲ့များ ဆက်စပ်နေမလား။ အားလုံးက SS အဆင့်မှာ ရှိနေပေမယ့် အားကောင်းတဲ့ကောင်နဲ့ အားနည်းတဲ့ကောင်က ရှင်းနေတယ်လေ။”

လင်းရှားက ရေကူးကာ ရောက်လာပြီး ပြောလိုက်သည်။

“ဖြစ်နိုင်တယ်။”

ရှောင်းယီက ခေါင်းညိတ်လိုက်ပြီး ဆက်လက်၍ ရှေ့ဆက်သွားလိုက်သည်။

ထိုစဉ် အဝေးမှ သတ္တုချင်း ထိခတ်သံများ ထွက်ပေါ်လာခဲ့သည်။

လင်းရှား၏အမူအရာ အနည်းငယ်ပြောင်းလဲသွားခဲ့သည်။

“အို မဟုတ်ဘူး။ တစ်ယောက်ယောက်က အမွေအနှစ်နယ်မြေကို တိုက်ခိုက်နေတယ်။”

ရှောင်းယီသည် ချက်ချင်းပင် စိုးရိမ်လွန်ပြီး ဝင်ရောက်တိုက်ခိုက်ရန်လုပ်နေသော လင်းရှားကို ဆွဲကိုင်လိုက်၏။

“တစ်ယောက်ယောက်က အမွေအနှစ်နယ်မြေကို တိုက်ခိုက်နေတယ်ဆိုရင်တောင် မင်း အခုလိုမျိုး အလောတကြီးလို့မရဘူး။ တစ်ဖက်လူက မင်းကို ဖမ်းမိသွားရင် သူတို့ကို လက်ဆောင်ပေးသလိုဖြစ်သွားလိမ့်မယ်။”

“ဒါဆို ကျွန်မ ဘာလုပ်ရမလဲ။”

လင်းရှားက စိုးရိမ်တကြီးဖြင့် ပြောလိုက်သည်။

“နှစ်ဖက်စလုံး ဆက်ပြီးတိုက်ခိုက်နေသေးတယ်ဆိုတော့ သူတို့ အထဲမဝင်နိုင်သေးဘူးလို့ ဆိုလိုတာပဲ။ ဒါကြောင့် စိုးရိမ်စရာမလိုပါဘူး။”

ရှောင်းယီက အကြံပေးလိုက်ပြီး သူတို့ကို အနီးရှိ သန္တာကျောက်တန်းဆီသို့ ခေါ်ဆောင်သွားခဲ့သည်။

မကြာမီ သူတို့သည် အဖွဲ့နှစ်ဖွဲ့ တိုက်ခိုက်နေသည်ကို မြင်လိုက်ရသည်။ တစ်ဖက်သည် ရေသူမျိုးနွယ်ဖြစ်ပြီး နောက်တစ်ဖက်သည် ပုဇွန်စစ်သည်များနှင့် ကဏန်းဗိုလ်ချုပ်များဖြစ်သည်။

ရှောင်းယီက သူတို့ကို တစ်ချက်ကြည့်ပြီး ပြောလိုက်သည်။

“အဲဒီထဲက အားအကောင်းဆုံးတစ်ယောက်က မင်းအဖေ လင်းနီကျိလား။”

လင်းရှားက ချက်ချင်းခေါင်းညိတ်ပြီး ပြန်ဖြေလိုက်သည်။

“ကျွန်မတို့မျိုးနွယ်မှာ SS အဆင့် က ကျွန်မအဖေတစ်ယောက်တည်းပဲရှိတယ်။ ကျန်တာတွေက S အဆင့် ဒါမှမဟုတ် အဲ့အဆင့်နဲ့အောက်မှာချည်းပဲ။ ကျွန်းပိုင်ရှင် ကျေးဇူးပြုပြီး သူတို့ကို မြန်မြန်ကူညီပေးပါ။”

ရှေ့တန်းစစ်မျက်နှာပြင်တွင် ပုဇွန်စစ်သည်များနှင့် ကဏန်းဗိုလ်ချုပ်များသည် ရေသူမျိုးနွယ်ကို လွှမ်းမိုးလုနီးပါးဖြစ်နေခဲ့သည်။ ရေသူစစ်သည်အချို့သည် ဒဏ်ရာရပြီး တိုက်ခိုက်နိုင်စွမ်းများ ဆုံးရှုံးသွားခဲ့ပြီးဖြစ်ကာ လင်းနီကျိ၏ ဖိအားများမှာ တိုးလာနေခဲ့သည်။

“မင်းတို့ အရင်ပြန်ဆုတ်ပြီး အမွေအနှစ်နယ်မြေထဲကို ပြန်ဝင်ကြ။”

လင်းနီကျိက အော်ဟစ်လိုက်သည်။

“မဟုတ်ဘူး မျိုးနွယ်စုခေါင်းဆောင် ကျုပ်တို့ အတူတူပြန်ဆုတ်မယ်။”

ဝန်းရံနေသော ရေသူစစ်သားများက ချက်ချင်းပင် အော်ဟစ်လိုက်ကြသည်။

“အမိန့်ကိုနာခံကြစမ်း မဟုတ်ရင် မင်းတို့ကို ဂရုစိုက်ဖို့အတွက် ငါ့ရဲ့အာရုံကို ခွဲထုတ်နေရလိမ့်မယ်။”

လင်းနီကျီက အော်ငေါက်လိုက်သည်။

စစ်သားများသည် ဝမ်းနည်းပူဆွေးနေကြသော်လည်း ၎င်းတို့၏မျိုးနွယ်စုခေါင်းဆောင်အား ကူညီနိုင်ခြင်းမရှိပေ။

“လူတိုင်းဆုတ်ခွာကြ။ မျိုးနွယ်စုခေါင်းဆောင်ကို အာရုံမထွေပြားစေနဲ့။”

စစ်သည်ဗိုလ်ချုပ်ကြီးတစ်ဦးက ဒေါသတကြီး အော်ဟစ်လိုက်သည်။

ရေသူစစ်သည်များသည် တိုက်ခိုက်ရင်းဖြင့် ၎င်းတို့၏အမွေအနှစ်နယ်မြေထဲသို့ ဆုတ်ခွာသွားခဲ့ကြသည်။

သို့သော် ပုဇွန်စစ်သည်များနှင့် ကဏန်းဗိုလ်ချုပ်များသည် ချက်ချင်းပင် ၎င်းတို့နောက်သို့ မရပ်မနား လိုက်လံဖမ်းဆီးကြလေသည်။

ရှောင်းယီသည် ပတ်ဝန်းကျင်ကို ဂရုတစိုက်စစ်ဆေးလိုက်ပြီး ပုဇွန်စစ်သည်နှင့် ကဏန်းဗိုလ်ချုပ်များကို ထပ်မတွေ့ရတော့ပေ။ စနစ်မှ သတိပေးထားသော ဤပုဇွန်စစ်သည်များနှင့် ကဏန်းဗိုလ်ချုပ်များသည် အသိဉာဏ်ကင်းမဲ့သည်ဟူသည့် အချက်ကို ပြန်တွေးမိလိုက်ပြီး သူတို့သည် မြင်ကွင်းထဲမှပျောက်ကွယ်သွားသည်နှင့် လိုက်၍တိုက်ခိုက်လောက်တော့မည်မဟုတ်ချေ။

“တပိုင် သွား သူတို့အားလုံးကို ဒီမှာချန်ထားဖို့ ကြိုးစားကြည့်လိုက်။”

ရှောင်းယီက ညွှန်ကြားလိုက်သည်။

တပိုင်က ခေါင်းညိတ်ပြီး လူတစ်ယောက်နှင့် ဝက်ဝံတစ်ကောင်သည် စစ်မျက်နှာစာဆီသို့ လျှို့ဝှက်စွာရောက်ရှိလာခဲ့ကြသည်။

သူတို့နှစ်ယောက်စလုံးသည် အားကောင်းသော်လည်း ၎င်းတို့၏ပြိုင်ဘက်များကို ကိုင်တွယ်ဖြေရှင်းရန်အတွက် ခွန်အားကို အနည်းငယ်ချွေတာနိုင်ပါက ၎င်းတို့သည် သဘာဝအတိုင်း ပိုမိုလွယ်ကူသောနည်းလမ်းကိုသာ ရွေးချယ်ကြမည်ဖြစ်သည်။

ထိုအချိန်တွင် ရေသူစစ်သည်အနည်းငယ် ကျဆုံးခဲ့ရပြီးနောက် ၎င်းတို့သည် နောက်ဆုံးတွင် အမွေအနှစ်နယ်မြေ၏ဝင်ပေါက်သို့ ဆုတ်ခွာနိုင်ခဲ့ကြပြီး လင်းနီကျိတစ်ဦးတည်းသာ တိုက်ခိုက်ရန် ကျန်ရှိခဲ့တော့သည်။

ဆွစ်

ပင်လယ်ကဏန်း၏ညှပ်သည် လင်းနီကျိ၏ခန္ဓာကိုယ်ပေါ်တွင် ဒဏ်ရာတစ်ခု ကျန်ရစ်စေခဲ့သည်။

လင်းနီကျိသည် သူ၏သုံးခွမှိန်းကို လွှဲယမ်းပြီး သူ့အနားသို့ ကပ်လာသော ရန်သူများကို ပျံသန်းသွားစေခဲ့သည်။

ပုဇွန်စစ်သည်များနှင့် ကဏန်းဗိုလ်ချုပ်များသည် လွှင့်ပစ်ခံလိုက်ရသော်လည်း ထိခိုက်မှုမှာ အကန့်အသတ်ရှိပြီး သူတို့သည် သူ့ကို ထပ်မံဝိုင်းရံလိုက်ကြပြန်သည်။

သူတို့ဝိုင်းရံခံလိုက်ရစဉ် လင်းနိကျိသည် ရုတ်တရက် သန္တာကျောက်တန်းနောက်မှ အမည်းရောင်ပုံရိပ်နှစ်ခု ထွက်ပေါ်လာပြီး ပုဇွန်စစ်သည်များနှင့် ကဏန်းဗိုလ်ချုပ်များဆီသို့ လျှို့ဝှက်စွာသွားနေသည်ကို မြင်လိုက်ရသည်။

ထိုပုံရိပ်နှစ်ခုသည် ရေသူမျိုးနွယ်များမဟုတ်သည်မှာ ထင်ရှားလှပေသည်။ ဤအချိန်တွင် အခြားမျိုးနွယ်များ ထွက်ပေါ်လာခြင်းသည် ကောင်းသောအရာတစ်ခုမဟုတ်ချေ။

လင်းနီကျိသည် သူ၏သုံးခွမှိန်းကို တင်းတင်းကျပ်ကျပ်ဆုပ်ကိုင်လိုက်ပြီး စိတ်ထဲမှ သက်ပြင်းချလိုက်မိသည်။

“ရှားရှား မင်းရဲ့အကူအညီတွေကို ရှာတွေ့သည်ဖြစ်စေ မတွေ့သည်ဖြစ်စေ ပြန်မလာခဲ့နဲ့တော့။”

ဤနေ့သည် သူသေဆုံးရမည့်နေ့ဖြစ်ကြောင်း သူသိထားပေသည်။ ဤပုစွန်စစ်သည်များနှင့် ကဏန်းဗိုလ်ချုပ်များအားလုံးကို သတ်ပစ်နိုင်မည်မဟုတ်ချေ။ ထို့ပြင် ၎င်းတို့၏အဆင့်များသည်လည်း အလွန်မြင့်မားကြပေသည်။ သူတို့မျိုးနွယ်က ၎င်းတို့ကို အနိုင်ယူနိုင်မည်မဟုတ်ပေ။ မျိုးနွယ်တစ်ခုလုံးရွှေ့ပြောင်းနေထိုင်ချင်လျှင်ပင် ယခုအချိန်တွင် ရန်သူများ၏အကာအကွယ်ကို မချိုးဖျက်နိုင်တော့ချေ။

လင်းနီကျိသည် ရှေ့တိုးပြီး အသေခံတိုက်ရန် စိတ်ကူးလိုက်စဉ် ပုဇွန်စစ်သည်များနှင့် ကဏန်းဗိုလ်ချုပ်များ၏နောက်က အနက်ရောင်ပုံရိပ်များ ရုတ်တရက် လှုပ်ရှားသွားခဲ့သည်။

“ဖျစ်”

လင်းနီကျိအား အံ့အားသင့်စေခဲ့သည်မှာ လူသားပုံစံ သတ္တဝါတစ်ကောင်သည် သူ့လက်ထဲရှိဓားဖြင့် ပင်လယ်ပုစွန်တစ်ကောင်ကို ပင်လယ်ကြမ်းပြင်ပေါ်တွင် ထိုးစိုက်ထားခဲ့ပြီး အခြားဧရာမ ခြေလေးချောင်းသတ္တဝါက ပင်လယ်ကဏန်း၏ညှပ်ကို ဆုတ်ဖြဲပစ်လိုက်ခြင်းပင်ဖြစ်သည်။

အခန်း ၆၃၈: အချိန်မီရောက်ရှိလာခဲ့သော စစ်ကူ၊ သတ်ဖြတ်ခြင်းနှင့် နန်းတော်ကိုရှာဖွေတွေ့ရှိခြင်း

ရှောင်းယီနှင့် တပိုင်တို့၏လုပ်ရပ်များကြောင့် လင်းနီကျိသည် ၎င်းတို့၏ပစ်မှတ်သည်လည်း ဤပုစွန်စစ်သည်များနှင့် ကဏန်းဗိုလ်ချုပ်များဖြစ်ကြောင်း နားလည်သွားခဲ့သည်။

အနည်းဆုံး ယခုအချိန်တွင် နှစ်ဖက်စလုံးသည် ပူးပေါင်း၍ရနိုင်ပေသည်။

ရှောင်းယီနှင့် အခြားသူများ စတင်လှုပ်ရှားလိုက်ပြီဖြစ်ကြောင်း မြင်လိုက်ရသောအခါ လင်းရှားက ချက်ချင်းပြောလိုက်သည်။

“အဖေ ဒီနှစ်ယောက်က ကျွန်မရှာတွေ့ခဲ့တဲ့ အကူအညီတွေပါ။”

လင်းရှား၏စကားကို ကြားလိုက်ရသောအခါ လင်းနီကျိသည် အံ့အားသင့်သွားခဲ့ပြီးနောက် စိုးရိမ်သွားခဲ့သည်။

လင်းရှား အမှန်တကယ် အကူအညီရှာတွေ့ခဲ့ခြင်းက သူ့ကို အံ့အားသင့်စေခဲ့သော်လည်း ၎င်းတို့တွင် နှစ်ဦးတည်းသာရှိသောကြောင့် သူစိုးရိမ်သွားခဲ့သည်။ ဤပုစွန်စစ်သည်များနှင့် ကဏန်းဗိုလ်ချုပ်များသည် အမှန်တကယ်အဆုံးမဲ့ကြောင်း သင်သိထားရမည်ဖြစ်သည်။

သို့သော် ယခုတွင် သူသည် အလွန်အမင်းမတွေးဝံ့တော့ပဲ ချက်ချင်းရှေ့တက်သွားပြီး ရန်သူ၏အာရုံကို ဆက်လက်ဆွဲဆောင်လိုက်သည်။

ရှောင်းယီနှင့် တပိုင်တို့ စတင်လိုက်ပြီဖြစ်သောကြောင့် ထိုပုစွန်စစ်သည်များနှင့် ကဏန်းဗိုလ်ချုပ်များသည် သဘာဝအတိုင်း ၎င်းတို့ကို ရှာဖွေတွေ့ရှိသွားခဲ့ပြီး ချက်ချင်းပင် ရှောင်းယီတို့နှစ်ဦးဆီသို့ သူတို့ထဲမှခြောက်ကောင်ကို စေလွှတ်လိုက်သည်။

မူလက အမွေအနှစ်နယ်မြေ၏ဝင်ပေါက်သို့ ဆုတ်ခွာသွားသော ရေသူစစ်သည်များသည် လင်းရှား၏စကားကို ကြားလိုက်ရသောအခါ ချက်ချင်းပင် စိတ်လှုပ်ရှားသွားခဲ့သည်။

“မင်းသမီးက တကယ်ကို အကူအညီတွေ ရှာတွေ့လာခဲ့တာပဲ။”

“ကောင်းတယ်။ ငါတို့ ကယ်တင်ခံရပြီ။”

“ဒါပေမယ့် ဘာလို့ တပ်ကူက နှစ်ယောက်ပဲရှိတာလဲ။”

“ဒီနှစ်ခုက အရမ်းအားကောင်းရမယ်။ ကြည့်လိုက် သူတို့ တစ်ချက်လှုပ်ရှားလိုက်တာနဲ့ ဟိုဘက်ကနှစ်ကောင်ကို ဂရုစိုက်ပြီးသွားပြီ။”

“ဟုတ်တယ် တစ်ဖက်မှာ ဘယ်လောက်ပဲလူများများ အခုသူတို့နဲ့ ပူးပေါင်းပြီး ဒီဟာတွေအားလုံးကို မြန်မြန်သတ်ဖြတ်ပစ်ရမယ်။”

“ဟုတ်တယ် တိုက်ကြ”

ရေသူစစ်သားများသည်လည်း တိုက်ပွဲထဲသို့ ထပ်မံဝင်ရောက်လာခဲ့ကြသည်။

၎င်းတို့၏ဝင်ရောက်တိုက်ခိုက်လာမှုက ထိုပုစွန်စစ်သည်များနှင့် ကဏန်းဗိုလ်ချုပ်များကို တစ်ဖန်ပြန်၍ ပျံ့ကျဲသွားစေခဲ့ပြန်သည်။

ရှောင်းယီသည် SS အဆင့်ပုစွန်စစ်သည်နှင့် ကဏန်းဗိုလ်ချုပ်လေးဦးကို တစ်ယောက်တည်း ရင်ဆိုင်ရာ၌ အနည်းငယ်ရုန်းကန်နေရသည်။

သူသည် SSS အဆင့် ကိုယ်ကျပ်ဝတ်စုံဝတ်ထားသောကြောင့် ထိုပုစွန်နှင့်ကဏန်းများသည် သူ့ကို လုံးဝထိခိုက်စေနိုင်ခြင်းမရှိသော်လည်း သဲအိတ်အဖြစ်အသုံးပြုကာ ရိုက်နှက်ခံရခြင်းသည် အလွန်ကောင်းမွန်သောခံစားချက်မဟုတ်ပေ။

ထွက်ပြေးသွားသော ထိုစစ်သားများ တိုက်ပွဲအတွင်းသို့ ပြန်လည်ဝင်ရောက်လာခြင်းက ထိုပုစွန်နှင့်ကဏန်းများကို ခေါ်ဆောင်သွားခဲ့ပြီး သူသည် တစ်ကောင်တည်းကိုသာ ရင်ဆိုင်ရတော့သောကြောင့် ပိုမိုလွယ်ကူသွားခဲ့သည်။

ရှောင်းယီ၊ တပိုင်တို့နှင့်အတူ နောက်တစ်ကြိမ်တိုက်ပွဲမှာ အလွန်ရိုးရှင်းသွားခဲ့သည်။ ရေသူစစ်သားများသည် အချိန်ဆွဲထားရန်သာ တာဝန်ရှိပြီး ရှောင်းယီနှင့် တပိုင်တို့က သတ်ဖြတ်ရန် တာဝန်ယူမည်ဖြစ်သည်။

နာရီဝက်မပြည့်မီတွင် ပုစွန်နှင့်ကဏန်း ၁၀ ကောင်ကို ရှောင်းယီနှင့် အခြားသူများက လုံးဝသတ်ပစ်ခဲ့ကြသည်။

“အရမ်းကောင်းတယ်။ ငါတို့ နိုင်သွားပြီ။”

ရေသူစစ်သားများက ကျယ်လောင်စွာ အော်ဟစ်လိုက်ကြသည်။

ဤပုစွန်စစ်သည်များနှင့် ကဏန်းဗိုလ်ချုပ်များ ပေါ်ပေါက်လာသည့်အချိန်မှစ၍ ရေသူမျိုးနွယ်သည် အဆက်မပြတ် ဖိနှိပ်ခံရပြီး ရိုက်နှက်ခံခဲ့ရသည်။ သို့သော် ယနေ့တွင် သူတို့ ဤတစ်ကြိမ်သာအနိုင်ရခဲ့ခြင်းဖြစ်သော်လည်း ဆုံးရှုံးမှုအနည်းငယ်ဖြင့် အနိုင်ရခဲ့ခြင်းမှာ ပထမဆုံးအကြိမ်ဖြစ်သည်။

အတိတ်တုန်းက သူတို့သည် ဤပုစွန်နဲ့ ကဏန်းများ၏ အရေအတွက်အတွက်ဖြင့် အနိုင်ကျင့်ခြင့်ကို အမြဲတမ်းခံခဲ့သည်။ ဤတစ်ကြိမ်တိုက်ပွဲသည် သာမန်ထက်ထူးကဲသည့် အဓိပ္ပယ်ရှိပေသည်။

လင်းရှားသည် ချက်ချင်းပင် လင်းနီကျိထံသို့ ပြေးသွားပြီး သူ၏လက်မောင်းပေါ်ရှိ ဒဏ်ရာများကို ကြည့်ရှုရင်း ဝမ်းနည်းပူဆွေးမှုကြောင့် မျက်ရည်များစီးကျလာခဲ့သည်။

“အဖေအဆင်ပြေတယ် ပျော်ပျော်နေပါ။”

လင်းနီကျိက လင်းရှား၏ပခုံးကို ဖွဖွပုတ်ကာ ပြောလိုက်ပြီး ရှောင်းယီတို့နှစ်ဦးဆီသို့ လျှောက်သွားလိုက်သည်။

“ကျုပ်တို့ကို ကူညီဖို့ ရောက်လာပေးတဲ့အတွက် ကျေးဇူးတင်ပါတယ်။ ကျေးဇူးပြုပြီး ကျုပ်နဲ့အတူ အမွေအနှစ်နယ်မြေထဲကို လိုက်ခဲ့ပြီး ကျုပ်တို့ကို ဧည့်ခံခွင့်ပြုပါ။”

လင်းနီကျိက ဖိတ်ခေါ်လိုက်သည်။

သူသည် ရှောင်းယီက သူ၏စကားအား နားမလည်နိုင်မည်ကို စိုးရိမ်နေဆဲဖြစ်သောကြောင့် လင်းရှားအား ဘာသာပြန်ဆိုရန် ခေါင်းကို ခတ်မြန်မြန်ဆတ်ပြလိုက်သည်။

လင်းရှားသည် နေရာမှပင်ရွေ့စရာမလိုလိုက်ခင် ရှောင်းယီက ပြောလိုက်သည်။

“ရပါတယ်။ ခင်ဗျားက မျိုးနွယ်စုခေါင်းဆောင် လင်းနီကျိပဲဖြစ်ရမယ်။ ကျုပ်နာမည်က ရှောင်းယီပါ။ လူသားတစ်ယောက်ပေါ့။ ခင်ဗျားတို့ပါးစပ်ထဲမှာ အပြင်လူလို့ခေါ်တဲ့သူပါ။”

လင်းနီကျိသည် သူ၏ပြူးကျယ်သွားသောမျက်လုံးများကိုဖွင့်ပြီး ရှောင်းယီကိုကြည့်ကာ မေးလိုက်သည်။

“မင်းက ရေသူဘာသာစကားကို နားလည်နိုင်တယ်လား။ ကျုပ်ကရော မင်းရဲ့စကားကို ဘယ်လိုလုပ်ပြီး နားလည်နိုင်နေတာလဲ။”

“ဒါက ကျုပ်ရဲ့ကျွမ်းကျင်မှုတစ်ခုပါ။ မျိုးနွယ်စုခေါင်းဆောင်လင်း စိုးရိမ်စရာမလိုပါဘူး။”

ရှောင်းယီက ပြန်ပြောလိုက်သည်။

လင်းနီကျိက ခေါင်းညိတ်လိုက်ပြီး သူတို့ကိုယ်ပေါ်ကအနက်ရောင်ဝတ်စုံများကိုကြည့်ကာ မေးလိုက်သည်။

“မင်း ရေအောက်မှာ စကားပြောပြီး တိုက်ခိုက်နိုင်တာက ဒီဝတ်စုံကြောင့်မဟုတ်လား။”

“ဟုတ်ပါတယ်။”

ထို့နောက် လင်းနီကျိသည် ရှောင်းယီအား သူနှင့်အတူ အမွေအနှစ်နယ်မြေသို့ ဝင်ရောက်ရန် လက်ဟန်ပြလိုက်သည်။

ရေသူမျိုးနွယ်၏ အမွေအနှစ်နယ်မြေမှာ ရေအောက်လိုဏ်ဂူတစ်ခုဖြစ်သည်။

သို့သော် တွေးကြည့်လိုက်လျှင် ထိုအရာမှာ အဓိပ္ပါယ်ရှိပေသည်။ ၎င်းသာ ရေအောက်မြို့တစ်မြို့ဖြစ်ခဲ့လျှင် ဤပုစွန်စစ်သားများနှင့် ကဏန်းဗိုလ်ချုပ်များက ဘက်ပေါင်းစုံမှ တိုက်ခိုက်လာနိုင်သည်။

ပင်လယ်ကြမ်းပြင်သည် ကုန်းမြေကဲ့သို့မဟုတ်ပေ။ ထိုနေရာတွင် မြို့ရိုးတစ်ခုသည် ရန်သူအား အပေါ်သို့ကုတ်တွယ်တက်ရန် ဖိအားပေးနိုင်သည်။

သို့သော် ပင်လယ်ကြမ်းပြင်တွင်မူ ရေကူးခြင်းဖြင့်ပင် အပေါ်မှ ကျူးကျော်ဝင်ရောက်နိုင်ပေသည်။

လိုဏ်ဂူတစ်ခုအတွက်မူ ဝင်ပေါက်ကိုသာ စောင့်ရှောက်ရန် လိုအပ်ပေသည်။

အမွေအနှစ်နယ်မြေအတွင်းသို့ ဝင်ရောက်လာပြီးနောက် အတွင်းတွင် ရေသူများစွာရှိသော်လည်း ၎င်းတို့၏မျက်နှာများတွင် စိုးရိမ်မှုများဖြင့် ပြည့်နှက်နေခဲ့သည်။

လင်းရှား ပြန်ရောက်လာပြီး ကူညီသည်ဟူသည့် သတင်းကောင်းယူလာသည်ကို ထိုစစ်သားများကြားသိလိုက်ရသောအခါ ၎င်းတို့သည် နောက်ဆုံးတွင် ပျော်ရွှင်သွားခဲ့ကြသည်။

“လင်းရှားက စစ်ကူဘယ်နှစ်ယောက်ခေါ်လာခဲ့တာလဲ။”

တစ်စုံတစ်ယောက်က မေးလိုက်သည်။

“မင်း မမြင်လိုက်ဘူးလား။”

“အာ အဲ့ဒီနှစ်ခုတည်းလား။”

“ဟုတ်တယ်လေ။ အဲ့ဒီနှစ်ခုကို လျှော့မတွက်မိစေနဲ့။ သူတို့က အရမ်းအားကောင်းတယ်။ ရန်သူတွေကို သတ်ပစ်တာများ ဟင်းသီးဟင်းရွက်ပုံလိုမျိုးပဲ။”

“အဲ့လောက်တောင် အားကောင်းတာလား။”

ရှောင်းယီသည် လင်းနီကျိနောက်သို့လိုက်သွားပြီး အခန်းတစ်ခုလုံးကို အလင်းပေးထားသော အလင်းများပေါ်ထွက်နေသည့် ငါးများရှိသည့် ဖွင့်ထားသောအခန်းငယ်လေးတစ်ခုအတွင်းသို့ ရောက်ရှိလာခဲ့သည်။

“မင်း ဘာကြိုက်တတ်လဲဆိုတာ မသိတော့ ကျုပ်ဘာမှမပြင်ဆင်ထားမိခဲ့ဘူး။ ခွင့်လွှတ်ပေးပါ။”

လင်းနီကျိက ရှက်ရွံ့စွာဖြင့် ပြောလိုက်သည်။

“အဆင်ပြေပါတယ်။ ဘယ်လိုပဲပြောပြော ကျုပ်တို့လည်း ဒီမှာနေမှာမှမဟုတ်တာ။ ခင်ဗျားမြင်တဲ့အတိုင်းပဲ ကျုပ်ရဲ့အဝတ်အစားက စားသောက်ဖို့အတွက် မသင့်တော်ဘူးလေ။”

ရှောင်းယီက လက်ကာပြကာ ပြန်ပြောလိုက်သည်။

လင်းနီကျိက ခေါင်းညိတ်ပြီး ထပ်မံကျေးဇူးတင်စကားပြောလိုက်၏။

“ဒီတစ်ကြိမ်မှာတော့ မင်းကို အမှန်တကယ်ကျေးဇူးတင်ရမှာပါ။ မဟုတ်ရင် ကျုပ်တို့ရေသူမျိုးနွယ်တွေ အဆုံးသတ်သွားရလိမ့်မယ်။”

“ရပါတယ်။ ကျုပ်မေးချင်တာက ခင်ဗျားတို့ ဒီပုစွန်စစ်သည်တွေနဲ့ ကဏန်းဗိုလ်ချုပ်တွေကို သတ်တုန်းက ဒီလိုပုတီးစေ့မျိုးကို တွေ့ခဲ့သေးလား။”

ရှောင်းယီက ရေကာကွယ်ပုလဲကို ထုတ်ယူကာ မေးလိုက်ခဲ့သည်။

လင်းနီကျိသည် ရှောင်းယီလက်ထဲရှိ ပုလဲကိုကြည့်ပြီး မျက်မှောင်ကျုံ့ကာ ပြောလိုက်သည်။

“မတွေ့မိဘူး။ ကျုပ်တို့က သတ်ပြီးတာနဲ့ ချက်ချင်းထွက်လာလေ့ရှိတယ်။ တစ်နေရာတည်းမှာ အကြာကြီးမနေဘူး။ အဲ့ဒါကြောင့် မသေချာဘူး။”

“ကောင်းပါပြီ ဒါဆို နောက်ပိုင်းမှာ ဒီကိစ္စကို ဂရုစိုက်ဖို့ ခင်ဗျားကို ဒုက္ခပေးရတော့မှာပဲ။”

ရှောင်းယီက ပြောလိုက်သည်။

“ပြဿနာမရှိပါဘူး။”

ရှောင်းယီခေါင်းညိတ်ကာ ဆက်လက်ပြောသည်။

“ကျုပ်ကို အဲ့ဒီနန်းတော်ကို ကြည့်ဖို့ ခေါ်သွားပေးပါ။”

“အို အဲ့ဒီနန်းတော်ကို အနီးကပ်ကြည့်ချင်တာ သေချာလား။”

လင်းနီကျိက မျက်မှောင်ကြုံ့ကာ မေးလိုက်သည်။

“ဟုတ်တယ်။ ကျုပ်က ဒီကို ပြဿနာကို ဖြေရှင်းဖို့လာခဲ့တာ။ အပြင်ဘက်က အသစ်ပေါ်လာတဲ့ မကောင်းဆိုးဝါးတွေကို တိုက်ခိုက်ရုံနဲ့ ပြဿနာအရင်းမြစ်ကို ဖြေရှင်းလို့မရဘူး။”

ရှောင်းယီက ပြန်ဖြေလိုက်သည်။

ရှောင်းယီ၏စကားထဲရှိ ဤဝေါဟာရအသစ်များကို သူ၊မကြားဖူးသော်လည်း လင်းနီကျိသည် သူဆိုလိုရင်းကို နားလည်နိုင်ခဲ့သည်။

“ကောင်းပြီ ကျုပ် အခုပဲ မင်းကို ခေါ်သွားပေးမယ်။”

လင်းနီကျိက ထိုသို့ပြောလိုက်ပြီး မျိုးနွယ်အတွင်းရှိ ကိစ္စရပ်များကို စီစဉ်ပြီးနောက် ရှောင်းယီနှင့် တပိုင်တို့ကို နန်းတော်တည်ရှိရာနေရာသို့ ခေါ်ဆောင်သွားခဲ့သည်။

“ဂရုစိုက်ပါ။”

လင်းရှားက သူတို့ ထွက်ခွာလာချိန်တွင် အထပ်ထပ်မှာနေခဲ့သည်။

ထွက်ခွာလာခဲ့ပြီးနောက် လင်းနီကျိသည် ဤကျွမ်းကျင်မှုမြင့်မားသော တပ်ကူနှစ်ယောက်သည် ရေအောက်တွင် ထိခိုက်လွယ်သောအမြန်နှုန်းဖြင့် ရွေ့လျားနေသည်ကို သတိပြုမိသွားခဲ့သည်။

သူသည် ရွေးချယ်စရာမရှိတော့ဘဲ ရှောင်းယီနှင့် တပိုင်တို့အား နေရာတစ်ခုသို့ ရေကူးကာ ဆွဲခေါ်သွားခဲ့သည်။ ဝန်နှစ်ခုကို သယ်ဆောင်နေရသော်လည်း ၎င်း၏အမြန်နှုန်းသည် ရှောင်းယီနှင့် အခြားသူများထက် ပိုမိုလျင်မြန်နေခဲ့သည်။

“နောက်ပိုင်းမှာ ရေထဲမှာ လေ့ကျင့်ခန်းလုပ်ဖို့ တကယ်ကို လိုအပ်နေပြီ။ ဒါက ငါ့အတွက် အဆင့်ချိုးဖျက်ဖို့ အခွင့်အရေးတစ်ခုလည်း ဖြစ်လာနိုင်တယ်။”

ရှောင်းယီက သူ့ကိုယ်သူ တွေးလိုက်မိသည်။

တစ်နာရီခန့်အကြာတွင် လင်းနီကျိက သက်ပြသင်းချပြီး ပြောလိုက်သည်။

“ကျုပ်တို့ ရောက်ခါနီးနေပြီ။ အနီးအနားက ပုစွန်စစ်သည်တွေနဲ့ ကဏန်းဗိုလ်ချုပ်တွေရဲ့ သိပ်သည်းမှုက အတော်လေးများတယ်။ သတိထားကြရအောင်။”

ထိုအချိန်တွင် လင်းနီကျိသည် ကားကားကားကားဖြင့် မလျှောက်သွားရဲတော့ဘဲ ရှောင်းယီတို့ကို ဦးဆောင်ပြီး ရွာထဲသို့ တိတ်တဆိတ်ဝင်ရောက်ရန်သာ ရွေးချယ်နိုင်ခဲ့သည်။

အချိန်ကုန်သက်သာစေရန်အတွက် သူတို့သည် ပုစွန်နှင့် ကဏန်းများနှင့် တိုက်ခိုက်ခြင်းမပြုဘဲ ရန်သူများကို ရှောင်ကွင်းပြီးနောက် နန်းတော်၏အလုံးစုံသောပုံရိပ်ကို နောက်ဆုံးတွင် တွေ့လိုက်ကြရသည်။

တောက်ပသောအလင်းရောင်များဖြင့် ခန့်ညားထည်ဝါလှသောနန်းတော်ကြီးတစ်ခုသည် မှောင်မိုက်နေသောပင်လယ်ကြမ်းပြင်ပေါ်တွင် တည်ရှိနေခဲ့သည်။

“အရှေ့ပင်လယ်နဂါးနန်းတော်- ......”

ရှောင်းယီသည် အရှေ့ပင်လယ်နဂါးနန်းတော်နှင့်ပတ်သက်သည့် စနစ်သတိပေးချက်ကို ဂရုတစိုက်ကြည့်ရှုရန် အချိန်မရလိုက်မီ စနစ်က သတိပေးချက်တစ်ခု ထပ်မံပေးပို့ခဲ့လေသည်။