အခန်း (၇၀၃-၇၀၅)
Vol. 47 Ch. 703-705
အခန်း (၇၀၃) သွေးနီရောင် နတ်ဘုရားမျိုးစေ့။ နေနှင့်လ အတူတောက်ပခြင်း။ (၄)
“ဝုန်း”
လက်သီးနှင့် လက်ဝါးတို့ ထိပ်တိုက်တွေ့ဆုံရာမှ ပြင်းထန်သော ပေါက်ကွဲသံကြီး ထွက်ပေါ်လာသည်။ ချီသွေးအရှိန်အဝါများမှာ ရူးသွပ်စွာ ထွက်ပေါ်လာပြီး နေရောင်ခြည်မှာ ဆူးချွန်များကဲ့သို့ ထိုးဖောက်ဝင်ရောက်လာသည်။
ဂျွတ်... ဂျွတ်... ဂျွတ်
အိမ်တော်အတွင်းရှိ အနီးနားမှ အဆောက်အဦးများမှာ ထိုရိုက်ခတ်မှုကြောင့် တုန်ခါပျက်စီးသွားပြီး မြေပြင်ပေါ်ရှိ ကျောက်တုံးများမှာလည်း လွင့်စင်ထွက်သွားခဲ့သည်။ လော့ယုံ၏ ခန္ဓာကိုယ်မှာ အနည်းငယ် တုန်ခါသွားပြီး ကုဖေးယန်၏ လက်ဝါးချက်မှာ နဂါးကြီးတစ်ကောင် သူ့ကို ဝင်တိုက်လိုက်သကဲ့သို့ ခံစားလိုက်ရသည်။ သူ၏ ချီသွေးများမှာ ထိန်းမနိုင်သိမ်းမရ ဖြစ်သွားခဲ့သည်။
သို့သော် သူသည် သွားကို တင်းတင်းကြုတ်ကာ သူ၏ ဘယ်ဘက်လက်သီးကို သုံးပေမကသော အလင်းတန်းများဖြင့် တောက်ပလာစေပြီး နေမင်းကြီး ပေါက်ကွဲထွက်လာသကဲ့သို့ ပစ်လွှတ်လိုက်သည်။ သူသည် နောက်မဆုတ်ဘဲ အသက်ကိုရင်း၍ တိုက်ခိုက်ရန် ရွေးချယ်လိုက်ခြင်း ဖြစ်သည်။
“ဝုန်း... ဝုန်း... ဝုန်း”
မျက်တောင်တစ်ခတ်အတွင်းမှာပင် သူတို့နှစ်ဦးမှာ အကြိမ်ပေါင်းများစွာ ထိတွေ့တိုက်ခိုက်မိကြသည်။ ထိတွေ့မှုတိုင်းတွင် စွမ်းအင်များ လျှံထွက်လာပြီး ပြင်းထန်သော လေပြင်းများကြောင့် သူတို့အနား ပေ ၃၀ အတွင်း မည်သူမျှ မချဉ်းကပ်နိုင်ကြပေ။
“ဝုန်း”
မြေပြင်ပေါ်တွင် တရွတ်တိုက် နောက်သို့ ဆုတ်သွားပြီးမှ အားကို ထိန်းလိုက်နိုင်သူမှာ လော့ယုံပင် ဖြစ်သည်။
“အဟွတ်... အဟွတ်”
လော့ယုံသည် သူ့ကိုယ်သူ ပြန်လည်တည်ငြိမ်အောင် လုပ်လိုက်သော်လည်း သွေးများကို အလိပ်လိုက် အန်ထုတ်နေရသည်။ သေချာကြည့်လျှင် သူ၏ ရင်ဘတ်ရှိ အဝတ်အစားများမှာ စုတ်ပြတ်နေပြီး ရင်ဘတ်တွင် နက်ရှိုင်းသော လက်ဝါးရာကြီး တစ်ခု ထင်ကျန်နေကာ ရင်ဘတ်တစ်ခုလုံး ချိုင့်ဝင်သွားခဲ့ပြီ ဖြစ်သည်။
“ကောင်းတယ်”
မီးနဂါးအစောင့်တပ်မှ ပညာရှင်များအားလုံး သူတို့၏ နှုတ်ခမ်းထောင့်တွင် အပြုံးအရိပ်အယောင်များ ပေါ်လာသည်။ လော့ယုံမှာ ထိပ်တန်းသိုင်းသမားတစ်ဦး ဖြစ်သော်လည်း ကုဖေးယန်မှာ ပို၍ ထူးကဲလှသည်။ မီးနဂါးအစောင့်တပ် ခေါင်းဆောင် ဖြစ်လာခြင်းမှာ တော်ဝင်မိသားစု၏ ယုံကြည်မှုကို ရရှိထားခြင်းတင်မကဘဲ သူ၏ မွေးရာပါ ပါရမီနှင့် အစွမ်းကြောင့်လည်း ဖြစ်ရာ သူသည် တော်ဝင်မိသားစုကို အမှုထမ်းနေသူများထဲတွင် ရှားပါးလှသော သိုင်းဝိဇ္ဇာသူတော်စင်အဆင့် တိုက်ခိုက်ရေးသမား ဖြစ်သည်။
“အဟွတ်... အဟွတ်... သွေးနဂါး နတ်ဘုရားလက်ဝါး... ကုဖေးယန်... မင်းရဲ့ နာမည်ကျော်ကြားတာက အလကား မဟုတ်ဘူးပဲ။”
လော့ယုံသည် အလွန်အမင်း ချောင်းဆိုးရင်း အကြောများ ပြောင်ထွက်လျက် စကားကို ခက်ခဲစွာ ပြောလိုက်သည်။
“မိသားစုခေါင်းဆောင်”
လော့မိသားစုဝင် အားလုံး၏ မျက်လုံးများမှာ သွေးရောင်လွှမ်းနေကြသည်။ သူတို့၏ ခေါင်းဆောင် ရှုံးနိမ့်သွားသည်ကို မြင်ရသောအခါ သူတို့၏ စိတ်ထဲတွင် စိတ်ပျက်အားငယ်မှုများ ပြည့်နှက်သွားခဲ့သည်။
လော့ယုံသည် သက်ပြင်းချကာ ကောင်းကင်ကို မော့ကြည့်လိုက်ပြီး အိမ်တော်တစ်ခုလုံး ကြားနိုင်လောက်သော အသံဖြင့် အော်ပြောလိုက်သည်။ “လော့ဟွမ်... တွေဝေမနေနဲ့တော့။ အခုပဲ လှုပ်ရှားလိုက်တော့။ မင်း အသက်ရှင်နေသရွေ့နဲ့ သိုင်းဝိဇ္ဇာသူတော်စင်အဆင့်ကို ရောက်နေသရွေ့ ငါတို့ လော့မိသားစုဟာ နောက်တစ်ကြိမ် ပြန်ပြီး တောက်ပနိုင်ဦးမှာပါ။ မင်းအတွက် ငါတို့တွေဟာ ခြေနင်းတုံးတွေ ဖြစ်သွားရတာ ဘာအရေးလဲ။”
“ဟင်”
စူးချန်ခုန်း၏ မျက်မှောင်များ ရုတ်တရက် ကြုတ်သွားသလို ကုဖေးယန်သည်လည်း တစ်ခုခု မှားနေပြီ ဖြစ်ကြောင်း အာရုံခံမိလိုက်သည်။ သူသည် အချိန်မဆွဲဘဲ ရှေ့သို့ တိုးကာ လော့ယုံ၏ ရင်ဘတ်ကို လက်ဝါးဖြင့် ရိုက်ချလိုက်သည်။
“ဂျွတ်”
ပေါက်ကွဲသံများနှင့်အတူ လော့ယုံ၏ ခန္ဓာကိုယ်မှာ ထိုလက်ဝါးချက်ကြောင့်ပင် အစိတ်စိတ်အမွှာမွှာ ဖြစ်သွားပြီး လွင့်စင်ထွက်သွားခဲ့သည်။
“ဝုန်း”
သို့သော် တစ်ချိန်တည်းမှာပင် လော့မိသားစု အိမ်တော်တစ်ခုလုံး ပြင်းထန်စွာ တုန်ခါသွားသည်။ မြေအောက်နက်ရှိုင်းသော နေရာမှ ကစဉ့်ကလျား ဖြစ်နေသော ဝိညာဉ်စွမ်းအင်များမှာ လျှို့ဝှက်ဆန်းပြားသော စီရင်စုအစီအမံတစ်ခုအဖြစ် ပြောင်းလဲသွားခဲ့သည်။
“အားးးးး”
လော့မိသားစုဝင်များ၏ နာကျင်စွာ အော်ဟစ်သံများ ထွက်ပေါ်လာသည်။ သူတို့၏ ခန္ဓာကိုယ်များမှာ အရည်ပျော်ကျလာပြီး အသားများမှာ မြေကြီးထဲသို့ စိမ့်ဝင်သွားသော ဆီးနှင်းများကဲ့သို့ အရည်ပျော်ကုန်ကြသည်။
“ဒါက... နတ်ဘုရားသန့်စင်အစီအရင်ပဲ... ဟင့်အင်း... မဟုတ်ဘူး... ငါ မသေချင်သေးဘူး။”
လော့မိသားစုဝင် အချို့မှာ ငိုယိုတောင်းပန်နေကြသော်လည်း သူတို့၏ ခန္ဓာကိုယ်များ အရည်ပျော်ပျက်စီးသွားခြင်းကို မည်သို့မျှ မတားဆီးနိုင်ကြပေ။
“ဒါက... ဘာကြီးလဲ။”
ဤထူးဆန်းသော မြင်ကွင်းကြောင့် ကုဖေးယန်နှင့် အခြားသူများ မျက်မှောင်ကြုတ်သွားကြသည်။ လော့မိသားစုသည် ယနေ့ကဲ့သို့ ဘေးဒုက္ခမျိုးကို ကြိုတင်မျှော်လင့်ထားပြီး အသေခံလှုပ်ရှားမှုတစ်ခု ပြုလုပ်နေကြောင်း သူတို့ ရိပ်မိလိုက်ကြသည်။
လော့မိသားစုဝင် ၁၀၀ ကျော်မှာ အရည်ပျော်သွားကြပြီး အရိုးစုများသာ ကျန်ရစ်ခဲ့ကာ သူတို့၏ သွေးများမှာ မြေအောက်မှတစ်ဆင့် အိမ်တော်၏ နောက်ဖေးဝင်းဆီသို့ စီးဆင်းသွားကြသည်။
အိမ်တော်နောက်ဖေးဝင်းတွင် လူငယ်တစ်ဦးသည် တိတ်ဆိတ်စွာ တင်ပျဉ်ခွေထိုင်နေ၏။ မြေပြင်ပေါ်မှ သွေးများသည် သွေးမြွေများကဲ့သို့ သူ၏ ခန္ဓာကိုယ်ထဲသို့ တိုးဝင်သွားကြသည်။ ထိုလူငယ်၏ မျက်နှာမှာ ကြမ်းကြုတ်နေလျက်။ “အဖေ၊ ဒုတိယဦးလေး... ပြီးတော့ ဆွေမျိုးတွေ... ကျွန်တော် လော့ဟွမ်က အဖေတို့ရဲ့ အနစ်နာခံမှုကို အမြဲမှတ်ထားပါ့မယ်။ ကျွန်တော် သိုင်းဝိဇ္ဇာသူတော်စင်အဆင့်ကို ရောက်တာနဲ့ ကျွန်တော်တို့ရဲ့ ဘိုးဘေးထက် သာလွန်အောင် လုပ်ပြမယ်။ မိသားစုရဲ့ ဂုဏ်သိက္ခာကို ပြန်ဖော်ဆောင်မယ်။ ပြီးတော့ ရှယန်မိသားစု တစ်ခုလုံးကိုလည်း အမြစ်ပြတ် သတ်ပစ်မယ်။”
သွေးမြွေများစွာသည် ထိုလူငယ်၏ ခန္ဓာကိုယ်ထဲသို့ တိုးဝင်သွားရာ သူ၏ တစ်ကိုယ်လုံးတွင် အကြောများ ထိုးထောင်လာသည်။ အစကတည်းက အစွမ်းထက်သော သွေးမျိုးရိုး ရှိထားပြီးဖြစ်ရာ ယခုအခါ ဆွေမျိုးများ၏ သွေးများကိုပါ စုပ်ယူလိုက်သောအခါ သူ၏ အစွမ်းမှာ အထွတ်အထိပ်သို့ ရောက်ရှိသွားတော့သည်။ သူ၏ ခန္ဓာကိုယ်အတွင်း၌ စက်လုံးတစ်ခု စတင်ဖြစ်ပေါ်လာပြီး တစ်ဖက်မှာ တောက်လောင်နေသော နေမင်းကဲ့သို့ ပူပြင်းကာ အခြားတစ်ဖက်မှာ လမင်းကဲ့သို့ အေးမြနေသည်။
“နောက်ဖေးခြံဝင်းထဲမှာပဲ”
ကုဖေးယန်သည် နောက်ဖေးဝင်းမှ လှုပ်ရှားမှုကို သတိထားမိလိုက်သည်။ သူသည် ခြေတစ်လှမ်း ရှေ့တိုးကာ သွေးရောင်လွှမ်းသော ချီစွမ်းအင်များကို အသုံးချ၍ နဂါးပျံကြီးတစ်ကောင်ကဲ့သို့ နောက်ခြံဖေးဝင်းကို ပြင်းထန်စွာ တိုက်ခိုက်လိုက်သည်။
“ဝူး”
ကုဖေးယန်၏ ဤတိုက်ကွက်မှာ အလွန်အားကောင်းလှသည်။ လေထုမှာပင် နဂါးဟိန်းသံနှင့်အတူ တုန်ခါသွားပြီး ခြံစည်းရိုးတံတိုင်းများကို အလွယ်တကူ ဖြိုဖျက်သွားခဲ့သည်။
နောက်ဖေးဝင်းအတွင်း၌ ကုဖေးယန်၏ တိုက်ကွက်ကို ရင်ဆိုင်လိုက်ရသော လူငယ်မှာ မြေပြင်မှ ထရပ်လိုက်ပြီး သူ၏ ညာလက်သီးကို နေမင်းကြီးကဲ့သို့ တောက်လောင်နေသော အဟုန်ဖြင့် ထိုးထုတ်လိုက်ရာ မီးလုံးပေါင်း ထောင်ချီ တစ်ပြိုင်နက် ပေါက်ကွဲသွားသကဲ့သို့ပင်။
“ဝုန်း”
အပူရှိန်များ ရိုက်ခတ်လာသဖြင့် ကုဖေးယန်၏ သွေးနဂါးမှာ တုန်ခါသွားပြီး ကုဖေးယန်ကိုယ်တိုင်လည်း သူ၏ ချီသွေးများ ကစဉ့်ကလျား ဖြစ်သွားသဖြင့် အနည်းငယ် တုန်ယင်သွားခဲ့သည်။ ထိုလူငယ်မှာမူ တည်ငြိမ်စွာ ရပ်နေပြီး သူ၏ ခန္ဓာကိုယ်ပေါ်မှ သွေးရောင်များမှာ တဖြည်းဖြည်း မှိန်သွားခဲ့သည်။ သူ၏ ရုပ်ရည်မှာ သာမန်ပင် ဖြစ်သော်လည်း မျက်ခုံးကြားတွင် သတ်ဖြတ်လိုသော အရှိန်အဝါများ ရှိနေ၏။
“မင်းက... လော့ဟွမ်လား”
ကုဖေးယန်သည် ထိုလူငယ်ကို စူးစိုက်ကြည့်ကာ မေးလိုက်သည်။ သူသည် လော့မိသားစု၏ အတော်ဆုံး ပါရမီရှင် လော့ဟွမ် ဖြစ်ကြောင်း မှတ်မိလိုက်သည်။ သူတို့ ဖယ်ရှားရမည့် အဓိက ပစ်မှတ်ပင် ဖြစ်သည်။ မဟုတ်ပါက သူသည် နောင်တွင် ကြီးမားသော ဘေးဒုက္ခ ဖြစ်လာပေလိမ့်မည်။
လော့ဟွမ်က စကားဖြင့် ပြန်မဖြေဘဲ သူ၏ စိတ်စွမ်းအားကို အသုံးပြုလိုက်ရာ လက်မထိပ်ခန့်ရှိသော သလင်းကျောက်တစ်ခု သူ၏ ဝမ်းဗိုက်နေရာတွင် ပေါ်လာသည်။ ထိုသလင်းကျောက်မှာ နေကဲ့သို့ ပူပြင်းပြီး လကဲ့သို့ အေးမြကာ ကြောက်မက်ဖွယ်ကောင်းသော မဟာအရှိန်အဝါများကို ထုတ်လွှတ်နေသည်။
“ဒါက... နတ်ဘုရားမျိုးစေ့လား။” ကုဖေးယန်၏ မျက်လုံးများမှာ လော့ဟွမ်၏ ဝမ်းဗိုက်တွင် ပေါ်လာသော အနီနှင့် အငွေရောင် ရောယှက်နေသည့် သလင်းကျောက်ပေါ်သို့ ကျရောက်သွားပြီး စကားနှစ်လုံးကို ရေရွတ်လိုက်သည်။
“နေနှင့်လ နတ်ဘုရားမျိုးစေ့... အဖိုဓာတ်က ဆန့်ကျင်ဘက် အမဓာတ်ကို မွေးဖွားတယ်။ နေနဲ့လ အတူတူ တောက်ပတယ်။”
လော့ဟွမ်၏ မျက်နှာပေါ်တွင် ဝမ်းနည်းမှုနှင့်အတူ ဖုံးကွယ်မရသော ဝမ်းသာမှုများ ပေါ်လာသည်။ ဤသည်မှာ သူ၏ ဖခင်အပါအဝင် လော့မိသားစု တစ်ခုလုံး၏ အသားနှင့် အသက်များကို ရင်းနှီး၍ ဖော်စပ်ခဲ့ရသော ရလဒ်ပင် ဖြစ်သည်။ နတ်ဘုရားမျိုးစေ့တစ်ခုတွင် နတ်ဘုရားအစွမ်းများ ပါဝင်ပြီး ၎င်းတစ်ခုတည်းဖြင့်ပင် သိုင်းဝိဇ္ဇာသူတော်စင်တစ်ဦး ဖြစ်လာနိုင်ချေ ရှိသည်။ ဤကဲ့သို့သော ရှားပါးသည့် နတ်ဘုရားမျိုးစေ့များကို အလွန်အစွမ်းထက်ပြီး ရှေးကျသော မျိုးနွယ်ကြီးများတွင်သာ တွေ့ရတတ်သည်။
လော့မိသားစုတွင် နတ်ဘုရားမျိုးစေ့ ရှိနေသည်ကို ကုဖေးယန် အံ့ဩသွားရသည်။ သတင်းအချက်အလက်များတွင် ဤအကြောင်း မပါဝင်ခဲ့ပေ။ အကယ်၍ လော့မိသားစုတွင် နတ်ဘုရားမျိုးစေ့ အမှန်တကယ် ရှိနေပါက ရှယန်မိသားစုသည် လော့မိသားစုကို ဤမျှ လွယ်လွယ်နှင့် တိုက်ခိုက်လိမ့်မည် မဟုတ်ပေ။
“မင်းရဲ့ ဒီနတ်ဘုရားမျိုးစေ့က တစ်ခုခုတော့ မှားနေသလိုပဲ။ ဒါက အစစ်မဟုတ်ဘူး မဟုတ်လား။”
ထိုအချိန်တွင် သိလိုစိတ်ပါသော အသံတစ်သံ ထွက်ပေါ်လာသည်။
“အကြီးအကဲတာ့” ကုဖေးယန် ခေါင်းလှည့်ကြည့်လိုက်ရာ စကားပြောလိုက်သူမှာ တာ့ဝူဖုန်းပင် ဖြစ်သည်။
စူးချန်ခုန်းသည် လော့ဟွမ်၏ ဝမ်းဗိုက်တွင် ပေါ်နေသော ရိပ်ရိပ်လေး ဖြစ်နေသည့် ပုံရိပ်ကို စူးစမ်းစွာ ကြည့်နေသည်။ စူးချန်ခုန်းသည် ချီနဂါးနန်းတော်တွင် နတ်ဘုရားမျိုးစေ့ အစစ်အမှန်များကို မြင်ဖူးပြီး ၎င်းတို့၏ အရှိန်အဝါကိုလည်း ခံစားဖူးသည်။ သို့သော် သူ၏ အတွေ့အကြုံအရ လော့ဟွမ်၏ နတ်ဘုရားမျိုးစေ့မှာ သူတွေ့ဖူးသည်များနှင့် လုံးဝ မတူပေ။
ယခင်က လော့မိသားစုဝင်များ သွေးအဖြစ် အရည်ပျော်သွားသော ထူးဆန်းသည့် မြင်ကွင်းကို ကြည့်ခြင်းအားဖြင့် ဤနတ်ဘုရားမျိုးစေ့မှာ တစ်ခုခု ချို့ယွင်းချက်ရှိနေကြောင်း ခန့်မှန်းရန် မခက်ခဲပေ။
လော့ဟွမ်သည် စူးချန်ခုန်းကို အေးစက်စွာ ကြည့်လိုက်ပြီး တည်ငြိမ်စွာ ပြောလိုက်သည်။ “မှန်တယ်... ဒါက ‘သွေးနီရောင် နတ်ဘုရားမျိုးစေ့’ပဲ။”
“သွေးနီရောင် နတ်ဘုရားမျိုးစေ့”
ကုဖေးယန် မျက်မှောင်ကြုတ်သွားသည်။ သူသည် ဗဟုသုတ ကြွယ်ဝသူဖြစ်သော်လည်း သွေးနီရောင် နတ်ဘုရားမျိုးစေ့အကြောင်း တစ်ခါမျှ မကြားဖူးပေ။
လော့ဟွမ်၏ မျက်လုံးများအတွင်း ရှုပ်ထွေးသော ခံစားချက်များ ဖြတ်သန်းသွားသည်။ “လွန်ခဲ့တဲ့ တစ်နှစ်က လူတစ်ယောက်က ငါတို့ လော့မိသားစုဆီ ရောက်လာပြီး သွေးနီရောင် နတ်ဘုရားမျိုးစေ့ ဖော်စပ်နည်းကို ပေးခဲ့တယ်။ အစက ငါ ဝေခွဲမရဖြစ်နေခဲ့ပေမဲ့ ကြိုတင်ပြင်ဆင်မှုတွေ လုပ်ထားခဲ့တယ်။ နောက်ဆုံးတော့လည်း ငါတို့ ဒါကိုပဲ အားကိုးလိုက်ရတာပဲ...”
သွေးနီရောင် နတ်ဘုရားမျိုးစေ့ကို သိုင်းဝိဇ္ဇာသူတော်စင် အမွေအနှစ်ရှိသော မိသားစုဝင်များ၏ သွေးဖြင့်သာ ဖော်စပ်နိုင်ပြီး ၎င်းကို အသုံးပြုနိုင်သူမှာလည်း ထိုမိသားစုဝင်ထဲမှ သွေးချင်းတူသူသာ ဖြစ်ရမည်။ ဤနည်းလမ်းကို သိရှိသောအခါ လော့ဟွမ်၏ ဖခင် လော့ယုံကလည်း ထောက်ခံခဲ့သည်။
လော့ယုံ၏ အမြင်တွင် လော့မိသားစုမှာ သာမန်မျိုးနွယ်စုမျှသာ ဖြစ်ပြီး လောကကြီး ကစဉ့်ကလျား ဖြစ်ချိန်တွင် ရှယန်မိသားစုက အခွင့်ကောင်းယူကာ အပြတ်ရှင်းလိမ့်မည်ကို သူ သိထားသည်။ ထို့ကြောင့် ပါရမီအရှိဆုံးဖြစ်သော သူ၏သား လော့ဟွမ်အတွက် အနစ်နာခံရန် သူ ဆုံးဖြတ်ခဲ့ခြင်း ဖြစ်သည်။ အကယ်၍ လော့ဟွမ်သာ ဤအခွင့်အရေးကို သုံး၍ သိုင်းဝိဇ္ဇာသူတော်စင် ဖြစ်လာခဲ့ပါက လော့မိသားစုကို ယခင်ကထက် ပိုမိုခမ်းနားအောင် ပြန်လည်တည်ဆောက်နိုင်မည် မဟုတ်ပါလား။
မိသားစုခေါင်းဆောင် လော့ယုံက သဘောတူခဲ့သော်လည်း အခြားမိသားစုဝင်များကို ပြောပြပါက အများစုက သဘောတူမည် မဟုတ်သည်မှာ သေချာပါသည်။ ထို့ကြောင့် လော့ယုံသည် သွေးနီရောင် နတ်ဘုရားမျိုးစေ့ကို လျှို့ဝှက်စွာ ပြင်ဆင်ခဲ့ခြင်း ဖြစ်သည်။ ၎င်းကို အောင်မြင်စွာ ဖော်စပ်နိုင်ရန် မသေချာသလို အောင်မြင်ခဲ့လျှင်ပင် မိသားစုဝင် အားလုံးကို အသုံးချရမည် ဖြစ်သည်။
၎င်းမှာ ခက်ခဲသော ဆုံးဖြတ်ချက် ဖြစ်သော်လည်း ကုဖေးယန်ကဲ့သို့ အစွမ်းထက်သော ရန်သူကို ရင်ဆိုင်ရချိန်တွင် လော့မိသားစုအတွက် မိမိကိုယ်ကို အနစ်နာခံကာ 'သွေးနီရောင် နတ်ဘုရားမျိုးစေ့' ဖော်စပ်ခြင်းမှလွဲ၍ အခြား ရွေးချယ်စရာ မရှိတော့ပေ။
ကံကောင်းစွာဖြင့်ပင်... ၎င်းမှာ အောင်မြင်သွားခဲ့လေပြီ။
အခန်း (၇၀၄) ဘိုးဘေးတို့၏ ဂုဏ်ရောင်ကို တုန်လှုပ်စေသော လေပြင်းမိုးကြိုးမြား။ မြားတစ်စင်းမှ နေနှင့်လ ပေါ်ပေါက်ခြင်း။ (၁)
“ငါ ထင်ထားတဲ့အတိုင်းပဲ... တစ်ယောက်ယောက်က ငါတို့ကို နောက်ကွယ်ကနေ နှောင့်ယှက်နေတာပဲ။ သွေးနီရောင် နတ်ဘုရားမျိုးစေ့ ဖော်စပ်နည်းကို လော့မိသားစု တစ်ခုတည်း သိတာ မဟုတ်လောက်ဘူး။ နတ်ဘုရားမျိုးစေ့ မရှိတဲ့ တခြားမျိုးနွယ်စုတွေလည်း ဒီနည်းလမ်းကို သိထားကြတဲ့ပုံပဲ။”
ကုဖေးယန်သည် အခြေအနေ၏ အဓိကအချက်ကို ရိပ်မိသွားပြီး မျက်မှောင်ကြုတ်လိုက်သည်။ တစ်စုံတစ်ယောက်က ဤနည်းလမ်းကို တမင်ဖြန့်ဝေထားခြင်းဖြစ်ရာ လော့မိသားစုသာမက အခြားမိသားစုများလည်း ဤ 'သွေးနီရောင် နတ်ဘုရားမျိုးစေ့' ကို လျှို့ဝှက်ဖော်စပ်ပြီး အခွင့်အရေးကို စောင့်ဆိုင်းနေကြပေလိမ့်မည်။ ဤမျိုးစေ့မှာ အစစ်အမှန် မဟုတ်သော်လည်း ထွက်ပေါ်လာသော အရှိန်အဝါမှာ သာမန်မဟုတ်ကြောင်း သူ ခံစားမိသည်။
“ကုဖေးယန်... နောက်တစ်ခါ ငါတို့တွေ့ရင် မင်းရဲ့ ခေါင်းကို ငါ ယူမယ်။”
လော့ဟွမ်သည် ကုဖေးယန်ကို စူးစိုက်ကြည့်ကာ အေးစက်စွာ ပြောလိုက်သည်။ သူသည် ယခုအချိန်တွင် တိုက်ခိုက်ရန် ရည်ရွယ်ချက်မရှိဘဲ ထွက်ခွာရန်သာ ပြင်ဆင်နေသည်။ သူ၏ 'နေနှင့်လ နတ်ဘုရားမျိုးစေ့' မှာ အသစ်စက်စက် ဖော်စပ်ထားခြင်းဖြစ်ရာ ၎င်းကို အပြည့်အဝ ထိန်းချုပ်နိုင်ရန် အချိန်လိုအပ်နေသေးသည်။ သူ၏ ဖခင်ကို သတ်ခဲ့သော ကုဖေးယန်ကို အလွန်အမင်း နာကျည်းနေသော်လည်း သူသည် အခြေအနေကို ဆင်ခြင်တုံတရားဖြင့် ဆုံးဖြတ်နိုင်သူ ဖြစ်သည်။
ကုဖေးယန်၏ မျက်နှာအမူအရာ ပြောင်းလဲသွားပြီး လော့ဟွမ်ကို အနိုင်ရနိုင်ခြေ ရှိ၊ မရှိ တွေးတောနေမိသည်။ သူ၏ အဆင့်တွင် မိမိကိုယ်ကိုယ် ဘေးကင်းရေးမှာ ပထမဦးစားပေး ဖြစ်သည်။ အကယ်၍ အနိုင်ရရန် မသေချာပါက လော့ဟွမ်နှင့် တိုက်ခိုက်ခြင်းမှာ ပညာရှိရာ မရောက်ပေ။ သို့သော် မိသားစုဝင်များကိုပင် ရက်စက်စွာ သတ်ဖြတ်၍ ဆေးဖော်ခဲ့သော လော့ဟွမ်ကို လွှတ်ပေးလိုက်ပါက နောင်တွင် ကြီးမားသော ဘေးအန္တရာယ် ဖြစ်လာပေလိမ့်မည်။
“အကြီးအကဲကု... လော့ဟွမ်ကို ကျွန်တော့်ဆီပဲ လွှတ်ထားလိုက်ပါ။ ဒီသွေးနီရောင် နတ်ဘုရားမျိုးစေ့ကို ကျွန်တော် နည်းနည်း စိတ်ဝင်စားလို့”
ထိုအချိန်တွင် စူးချန်ခုန်းက စကားပြောလိုက်ရာ ကုဖေးယန်သည် သူ့ကို အံ့ဩစွာ ကြည့်လိုက်သည်။ သွေးနီရောင် နတ်ဘုရားမျိုးစေ့မှာ အစစ်မဟုတ်သော်လည်း စူးချန်ခုန်းက လေ့လာလိုစိတ် ဖြစ်ပေါ်နေခြင်း ဖြစ်သည်။
“ကောင်းပြီ.. အကြီးအကဲတာ့ သတိထားပါ။”
ကုဖေးယန်က ချက်ချင်းပင် ခေါင်းငြိမ့် သဘောတူလိုက်သည်။ တာ့ဝူဖုန်းဟူသည့် နာမည်မှာ မကြာသေးမီကမှ ကျော်ကြားလာခြင်းဖြစ်ရာ သူ၏ အစွမ်းမှာ မည်မျှရှိသည်ကို ကုဖေးယန်လည်း မြင်တွေ့လိုနေသည်။ အကယ်၍ စူးချန်ခုန်း အရေးနိမ့်ပါက သူ ဝင်ရောက်ကူညီရန် အသင့်ပြင်ထားသည်။
လော့ဟွမ်၏ မျက်လုံးများ ပိုမိုအေးစက်သွားသည်။ “မင်းမှာ အစွမ်းအစ နဲနဲပါးပါး ရှိနိုင်ပေမဲ့... ငါ့ရဲ့ ရန်သူဖြစ်ဖို့ဆိုရင်တော့ မင်းက...”
နတ်ဘုရားမျိုးစေ့ကို ရရှိထားပြီးဖြစ်ရာ လော့ဟွမ်သည် နတ်ဘုရားစွမ်းရည်တစ်ပိုင်း သိုင်းပညာရှင်ကြီးများကိုပင် အနိုင်ယူနိုင်သည်ဟု ယုံကြည်နေသည်။ အကယ်၍ သူသာ ဤမျိုးစေ့ကို အပြည့်အဝ ထိန်းချုပ်နိုင်ပါက သိုင်းဝိဇ္ဇာသူတော်စင်အောက်တွင် သူသည် ပြိုင်ဘက်ကင်း ဖြစ်လာပေလိမ့်မည်။ သို့သော် လော့ဟွမ် စကားမဆုံးခင်မှာပင် စူးချန်ခုန်းက စတင်လှုပ်ရှားလိုက်သည်။
စူးချန်ခုန်းသည် ခြေတစ်လှမ်းဖြင့်ပင် လော့ဟွမ်၏ ရှေ့သို့ ရောက်ရှိသွားကာ သူ၏ ညာလက်သီးဖြင့် ထိုးနှက်လိုက်သည်။ ထိုလက်သီးချက်မှာ ရိုးရှင်းပုံရသော်လည်း 'ကျားဖြူဟိန်းသံ' အရှိန်အဝါများ ပြည့်နှက်နေ၏။ ဝူချင်းရှီတွင် 'ကျားပြကွက်' မှာ တိုက်စစ်အပြင်းဆုံးနှင့် သတ်ဖြတ်နိုင်စွမ်း အမြင့်ဆုံး ဖြစ်သည်။
“ထိုက်ယန် ချီစွမ်းအား”
စူးချန်ခုန်း၏ တိုက်ကွက်မှာ လျင်မြန်လွန်းသဖြင့် လော့ဟွမ်သည် သူ၏ ချီစွမ်းအင် အကာများကို ချက်ချင်း အသက်သွင်းလိုက်ရသည်။ ပူပြင်းလှသော ချီစွမ်းအားများသည် သူ၏ ခန္ဓာကိုယ်ပတ်လည်တွင် မီးလျှံသံချပ်ကာတစ်ခုအဖြစ် ဖြစ်ပေါ်လာသည်။
“ဝုန်း”
စူးချန်ခုန်း၏ လက်သီးနှင့် ထိတွေ့လိုက်သည်နှင့် အမြောက်ဆန်ပေါင်းများစွာ တစ်ပြိုင်နက် ပေါက်ကွဲသွားသကဲ့သို့ ပြင်းထန်သော အသံကြီး ထွက်ပေါ်လာသည်။
ဂျွတ်... ဂျွတ်
လော့ဟွမ်၏ ခန္ဓာကိုယ်ပေါ်ရှိ ကာကွယ်ရေးချီများမှာ အက်ကွဲပျက်စီးသွားခဲ့သည်။
“နတ်ဘုရားစွမ်းရည်တစ်ပိုင်းလား။”
လော့ဟွမ်၏ မျက်နှာထားမှာ လေးနက်သွားလေ၏။ သူသည် ပါရမီရှင် ဖြစ်သော်လည်း အသက်ငယ်သေးသဖြင့် မိသားစု၏ လျှို့ဝှက်ပညာရပ်များကို နတ်ဘုရားစွမ်းရည်တုအဆင့်အထိ မရောက်သေးပေ။ နတ်ဘုရားစွမ်းရည်များ၏ အစွမ်းမှာ မည်မျှပြင်းထန်ကြောင်း သူသိထားသဖြင့် ရှေ့မှ ရန်သူမှာ မရိုးရှင်းကြောင်း သတိထားမိလိုက်သည်။
“ဒါဆိုရင် ငါ့ရဲ့ ဓားသွားကို မင်းနဲ့ပဲ စမ်းကြည့်ရတာပေါ့။”
လော့ဟွမ်၏ ဝမ်းဗိုက်အတွင်းရှိ နတ်ဘုရားမျိုးစေ့မှာ တုန်ခါသွားလေ၏။ ပြင်းထန်သော နေရောင်ခြည် အလင်းတန်းများသည် သူ၏ ခန္ဓာကိုယ်မှ ထွက်ပေါ်လာပြီး ပတ်ဝန်းကျင်ရှိ မြေပြင်များကိုပင် အပူရှိန်ကြောင့် အက်ကွဲသွားစေသည်။
“နေမင်း မိုးကြိုးလက်သီး”
သွေးနီရောင် နတ်ဘုရားမျိုးစေ့၏ အစွမ်းကို အသုံးချလိုက်သောအခါ လော့ဟွမ်၏ အရှိန်အဝါမှာ လုံးဝ ပြောင်းလဲသွားသည်။ သူ၏ လက်နှစ်ဖက်ကြားတွင် နီရဲသော လက်သီးပုံရိပ်တစ်ခု ဖြစ်ပေါ်လာပြီး လည်ပတ်နေသော နေမင်းကြီးကဲ့သို့ စူးချန်ခုန်းကို ပြင်းထန်စွာ တိုက်ခိုက်လိုက်သည်။
“သူက နတ်ဘုရားစွမ်းရည်တုအဆင့်ကို ရောက်နေပြီပဲ... တခြား နတ်ဘုရားစွမ်းရည်တုအဆင့်တွေထက်တောင် ပိုပြီး အစွမ်းထက်နေသေးတယ်။”
ကုဖေးယန်သည် ဘေးမှကြည့်ရင်း အံ့ဩနေမိသည်။ လော့ဟွမ်၏ တိုက်ကွက်မှာ ထိပ်တန်း နတ်ဘုရားစွမ်းရည်တုအဆင့်တွင် ရှိနေသဖြင့် သူကိုယ်တိုင်ပင် ထိပ်တိုက်ရင်ဆိုင်ရန် ဝံ့မည်မဟုတ်ပေ။
နေမင်းကြီး ပေါက်ကွဲထွက်လာသကဲ့သို့ ရိုက်ခတ်လာသော လက်သီးချက်ကို ရင်ဆိုင်ရသော်လည်း စူးချန်ခုန်းမှာ တည်ငြိမ်နေဆဲဖြစ်သည်။ သူ၏ ခန္ဓာကိုယ်အတွင်းမှ ဆန်းကြယ်လိပ်ချီစွမ်းအင်အရည် တစ်စက်မှာ ချက်ချင်း ပြန့်နှံ့သွားပြီး သူ၏ အရေပြားပေါ်တွင် သမုဒ္ဒရာကျောက်မျက်ရတနာများကဲ့သို့ ခိုင်မာလှသော 'ဆန်းကြယ်လိပ်ချီစွမ်းအင်သံချပ်ကာ' အဖြစ် ဖြစ်ပေါ်လာသည်။
“ဝုန်း”
လော့ဟွမ်၏ လက်သီးချက်မှာ စူးချန်ခုန်း၏ ရင်ဘတ်ကို ပြင်းထန်စွာ ထိမှန်သွားပြီး မီးလျှံများမှာ သံကိုပင် အရည်ပျော်စေနိုင်လောက်အောင် တောက်လောင်နေသည်။ သို့သော် စူးချန်ခုန်း၏ နက်နဲသောလိပ်သံချပ်ကာမှာ အနည်းငယ်မျှသာ တုန်ခါသွားပြီး ထိုပြင်းထန်လှသော အပူရှိန်နှင့် တိုက်ကွက်ကို လုံးဝ ချေဖျက်လိုက်နိုင်ခဲ့သည်။
စူးချန်ခုန်း၏ လိပ်အသက်ရှူနည်းပညာမှာ အဆင့် ၁၁ သို့ ရောက်ရှိနေပြီဖြစ်ရာ ၎င်း၏ ကာကွယ်ရေးစွမ်းအားမှာ အနှိုင်းမဲ့လှသည်။ ဆန်းကြယ်လိပ်ချီစွမ်းအင်အရည်ဖြင့် အားဖြည့်ထားသော သံချပ်ကာမှာ နတ်ဘုရားစွမ်းရည်တုအဆင့် တိုက်ကွက်များကို အေးအေးဆေးဆေး ခံနိုင်ရည်ရှိသည်။
မျောက်ဝံနတ်ဆိုး လေဟာပြင် ဖမ်းဆုပ်ခြင်း။
စူးချန်ခုန်း၏ စိတ်ကူးလိုက်ရုံဖြင့်ပင် ပတ်ဝန်းကျင်ရှိ စွမ်းအင်များ စုစည်းလာပြီး သူ၏ နောက်ကျောတွင် ကြီးမားလှသော မျောက်ဝံနတ်ဆိုးကြီး၏ ပုံရိပ်တစ်ခု ပေါ်လာသည်။ ဆန်းကြယ်လိပ်ချီစွမ်းအင်အရည်တစ်စက်ကို ထပ်မံထည့်သွင်းလိုက်သောအခါ ထိုပုံရိပ်မှာ ပေ ၃၀ ကျော်အထိ ကြီးမားလာပြီး အနက်ရောင် အမွေးအမှင်များမှာ အရှိန်အဝါ ပြင်းထန်လှသည်။
ဂျွတ်... ဂျွတ်
မျောက်ဝံနတ်ဆိုးကြီး၏ လက်နှစ်ဖက်က ကျစ်ကျစ်ပါအောင် ဆုပ်လိုက်သောအခါ လော့ဟွမ်၏ ပတ်ဝန်းကျင်ရှိ ဟင်းလင်းပြင်မှာ စတင်ပြိုကွဲလာသည်။ ပြင်းထန်သော ဖိအားများသည် လော့ဟွမ်ထံသို့ စုစည်းရောက်ရှိလာပြီး လွတ်မြောက်ရာလမ်း မရှိတော့ဘဲ မြေမှုန့်အဖြစ် ပြောင်းလဲသွားတော့မည့်အလား ရှိနေတော့သည်။
အခန်း (၇၀၅) ဘိုးဘေးတို့၏ ဂုဏ်ရောင်ကို တုန်လှုပ်စေသော လေပြင်းမိုးကြိုးမြား။ မြားတစ်စင်းမှ နေနှင့်လ ပေါ်ပေါက်ခြင်း။ (၂)
“မအံ့ဩတော့ပါဘူး... သူက ‘အသက်ခြွေအဖွဲ့အစည်း’ ရဲ့ ဒုခေါင်းဆောင်ကိုတောင် အရှင်ဖမ်းနိုင်ခဲ့တာပဲ။ သူ့ရဲ့ နတ်ဘုရားစွမ်းရည်တုအဆင့်က သာမန်ထက် အများကြီး ပိုပြီး အစွမ်းထက်နေတာပဲ။”
ဤမြင်ကွင်းကြောင့် ကုဖေးယန်၏ မျက်နှာအမူအရာ အမျိုးမျိုး ပြောင်းလဲသွားသည်။ တာ့ဝူဖုန်း၏ နတ်ဘုရားစွမ်းရည်တုမှာ ဤမျှအထိ ပြင်းထန်လိမ့်မည်ဟု သူ မထင်ထားခဲ့ပေ။
“အဖိုဓာတ်က ဆန့်ကျင်ဘက် အမဓာတ်ကို မွေးဖွားခြင်း။ ထိုက်ယင် ချီစွမ်းအား”
လော့ဟွမ်သည် အသက်အန္တရာယ်ကို အာရုံခံမိလိုက်ပြီး တစ်ကိုယ်လုံးရှိ အမွေးအမျှင်များ ထောင်လာသည်။ သူသည် မိမိ၏ သိုင်းဝိဇ္ဇာသူတော်စင် ဘိုးဘေးများထံမှ ဆက်ခံထားသော သွေးမျိုးဆက်ကို အစွမ်းကုန် လှုံ့ဆော်လိုက်ရာ သူ၏ ခန္ဓာကိုယ်အတွင်းရှိ နတ်ဘုရားမျိုးစေ့မှာ ရူးသွပ်စွာ လည်ပတ်လာပြီး သွေးစွမ်းအင်များကို အကန့်အသတ်ထက် ကျော်လွန်အောင် တွန်းထုတ်လိုက်လေသည်။
“ရှူး... ရှူး... ရှူး”
လော့ဟွမ်၏ ခန္ဓာကိုယ်ကို ဖုံးလွှမ်းထားသော ကြီးမားလှသော မီးလျှံများမှာ ငြိမ်သက်သွားပြီး ထိုအစား သူ၏ ခန္ဓာကိုယ်မှာ အေးမြသော လရောင်ခြည်များဖြင့် ဖုံးလွှမ်းသွားသည်။ ထောင်ပေါင်းများစွာသော လရောင်ခြည်များသည် ထက်မြက်သော ဓားသွားများကဲ့သို့ အရပ်မျက်နှာအနှံ့သို့ ရူးသွပ်စွာ ခုတ်ပိုင်းလိုက်ကြသည်။
သူ့ပတ်ဝန်းကျင်ရှိ ပြိုကွဲနေသော ဟင်းလင်းပြင်မှာ သစ်သားချောင်းများကဲ့သို့ ဆွဲဖြဲခံလိုက်ရပြီး စူးချန်ခုန်း၏ သေစေနိုင်သော တိုက်ကွက်ကို အားဖြင့် ချေဖျက်လိုက်နိုင်ခဲ့သည်။ သို့သော် လော့ဟွမ်မှာ သိသိသာသာ ပင်ပန်းနွမ်းနယ်နေပြီး မျက်နှာတွင် အကြောများ တင်းနေ၏။ ဤ 'သွေးနီရောင် နတ်ဘုရားမျိုးစေ့' ကို အသုံးပြုခြင်းမှာ သူ၏ ခန္ဓာကိုယ်အပေါ် ကြီးမားသော ဝန်ထုပ်ဝန်ပိုး ဖြစ်စေသည်။
၎င်းက လော့ဟွမ်၏ မျက်လုံးထဲတွင် သတ်ဖြတ်လိုစိတ်များကို ပေါက်ကွဲစေခဲ့သည်။ သူသည် စူးချန်ခုန်းကို အချိန်တိုအတွင်း အပြတ်သတ်ရမည်။
“နေနှင့်လ အတူတူတောက်ပခြင်း”
လော့ဟွမ်သည် သွားကို တင်းတင်းကြုတ်ကာ သူ၏ သွေးနီရောင် နတ်ဘုရားမျိုးစေ့နှင့် သွေးစွမ်းအင်များကို အထွတ်အထိပ်သို့ ရောက်အောင် တွန်းပို့လိုက်သည်။
“နောက်ဆုတ်ကြ”
ကုဖေးယန်သည် အန္တရာယ်ကို အာရုံခံမိသဖြင့် မျက်ခုံးများ လှုပ်ခတ်သွားကာ အော်ဟစ်သတိပေးရင်း နောက်သို့ အလျင်အမြန် ဆုတ်ခွာလိုက်သည်။ အဝေးတွင်ရှိနေသော အခြား မီးနဂါးအစောင့်တပ်သားများလည်း လော့ဟွမ်ရှိရာနေရာနှင့် ဝေးရာသို့ အတင်းပြေးထွက်သွားကြသည်။
နောက်တစ်စက္ကန့်တွင် လော့ဟွမ်၏ ခန္ဓာကိုယ်မှ နေမင်း၏ အလင်းတန်းများနှင့် လမင်း၏ အရောင်အဝါများ ထွက်ပေါ်လာပြီး အရပ်မျက်နှာအနှံ့သို့ ပြန့်ကားသွားသည်။ ၎င်းတို့ ဖြတ်သန်းသွားသော နေရာတိုင်းရှိ အဆောက်အဦးများသည် တိတ်ဆိတ်စွာပင် မြေမှုန့်အဖြစ် ပြောင်းလဲသွားကြသည်။
အေးမြသော လရောင်နှင့် ပူပြင်းသော နေရောင်ခြည်တို့မှာ မည်သူမျှ မတားဆီးနိုင်သော စွမ်းအားများအဖြစ် အရာအားလုံးကို ဘာမှမရှိသော ဟင်းလင်းပြင်အဖြစ်သို့ လျှော့ချပစ်လိုက်သည်။ ကျယ်ဝန်းလှသော လော့မိသားစု အိမ်တော်ကြီး တစ်ခုလုံးမှာ သဲလွန်စပင် မကျန်တော့ဘဲ မြေပြန့်အတိ ဖြစ်သွားခဲ့သည်။
နံနက်စောစော လမ်းပေါ်ရှိ ဈေးသည်များမှာ လော့မိသားစု အိမ်တော်ရှိရာဘက်မှ နေနှင့်လ အတူတူ ထွက်ပေါ်လာသကဲ့သို့သော ထူးဆန်းသည့် မြင်ကွင်းကို ကြည့်ရင်း မှင်တက်နေကြတော့သည်။
‘တောက်... သူ မသေသေးဘူးလား။’
လော့ဟွမ်၏ နဖူးမှ ချွေးများ စီးကျနေသော်လည်း သူ၏ အစွမ်းကုန် တိုက်ကွက်က စူးချန်ခုန်းကို မသတ်နိုင်ခဲ့ကြောင်း သူ ခံစားနေရသည်။ သူတို့မှာ အလွန်နီးကပ်နေသော်လည်း စူးချန်ခုန်းမှာ သူ၏ တိုက်ကွက်အတွင်းမှ ကြိုတင်၍ ပျောက်ကွယ်သွားသကဲ့သို့ ရှိနေသည်။
“သွားမယ်”
နေရောင်နှင့် လရောင်များ မမှိန်ခင်မှာပင် လော့ဟွမ်သည် တွေဝေခြင်းမရှိဘဲ တစ်ဖက်သို့ ပြေးထွက်သွားသည်။ သူ၏ ‘သွေးနီရောင် နတ်ဘုရားမျိုးစေ့’ မှာ ခန္ဓာကိုယ်ကို အလွန်ပင်ပန်းစေပြီး ထိန်းချုပ်ရန် ခက်ခဲလှသလို အနက်ရောင်ဝတ်စုံနှင့် ထိုလူမှာလည်း နားမလည်နိုင်သော လျှို့ဝှက်နည်းလမ်းများကို ပိုင်ဆိုင်ထားသည်။ နတ်ဘုရားမျိုးစေ့ မရှိဘဲနှင့်ပင် သာမန် နတ်ဘုရား စွမ်းရည်တု ပညာရှင်ကြီးများထက် များစွာ သာလွန်နေသည်။
ယခုအချိန်တွင် လော့ဟွမ်သည် ထွက်ပြေးလိုစိတ်သာရှိတော့သည်။ သူ၏ အရှိန်နှင့် အစွမ်းဖြင့် အစွမ်းကုန် ပြေးသောအခါ သူသည် မြန်ဆန်လှသော အရိပ်တစ်ခုကဲ့သို့ မြို့ရိုးနှင့် အဆောက်အဦးများကို ကျော်လွှားကာ တိလော့မြို့မှ ထွက်ခွာသွားခဲ့သည်။
‘တောက်... ရှယန်မိသားစုမှာ တကယ်ပဲ အဆုံးမရှိတဲ့ ပညာရှင်တွေ ရှိနေတာပဲ။ ငါ ဒီနတ်ဘုရားမျိုးစေ့ကို အပြည့်အဝ ထိန်းချုပ်နိုင်မှပဲ ငါ့မိသားစုအတွက် ကလဲ့စားချေနိုင်မယ်။’
လော့ဟွမ်၏ မျက်နှာမှာ စိတ်လှုပ်ရှားမှုနှင့်အတူ အနည်းငယ် ပျက်ယွင်းနေသည်။ မိသားစုတစ်ခုလုံးကို ရင်းပြီး ရလာသော ဤမျိုးစေ့ကြောင့် သူသည် မပြည့်စုံသေးသော အဆင့်တွင်ပင် နတ်ဘုရားစွမ်းရည်တုအဆင့်ရှိသူကို ထိပ်တိုက်ရင်ဆိုင်နိုင်ခဲ့ပြီ ဖြစ်သည်။ အကယ်၍သာ အပြည့်အဝ သန့်စင်ပြီးပါက သူသည် မွေးရာပါ စွမ်းရည်ရှိသူများကိုပင် ယှဉ်နိုင်မည်မှာ သေချာသည်။
“ဟင်”
သို့သော် လော့ဟွမ်၏ အမူအရာ ပြောင်းလဲသွားသည်။ ကောင်းကင်ယံ တိမ်တိုက်များကြားမှ သက်တံရောင် အလင်းတန်းတစ်ခု ကျဆင်းလာပြီး ‘လေမိုးကြိုးမြား’ နှစ်စင်းအဖြစ် ပြောင်းလဲကာ လေထုကို ဖြတ်သန်းလျက် လော့ဟွမ်ထံသို့ ပစ်မှတ်ထား ရောက်ရှိလာသည်။
တိုက်ခိုက်သူမှာ အခြားသူမဟုတ် စူးချန်ခုန်းပင် ဖြစ်သည်။ မြို့ထဲတွင် တိုက်ခိုက်ခြင်းမှာ ဆူညံလွန်းသဖြင့် စူးချန်ခုန်းက လော့ဟွမ်ကို အပြင်သို့ ထွက်ပြေးစေပြီး လူသူကင်းမဲ့သော တောရိုင်းနယ်မြေသို့ ရောက်မှသာ ကောင်းကင်ယံမှနေ၍ စတင် တိုက်ခိုက်ခြင်း ဖြစ်သည်။
‘လော့ဟွမ်ရဲ့ တိုက်ကွက်က အစွမ်းထက်တယ်... ဒါပေမဲ့ ပေ ၈,၀၀၀၊ ၉,၀၀၀ အမြင့်ကနေ ‘လေမိုးကြိုး မြား’ နဲ့ ပစ်နေရင်တော့ သူ ငါ့ကို ဘယ်လိုမှ မထိနိုင်ဘူး’
ဖြူဖွေးသော ကြိုးကြာငှက်ပုံရိပ်၏ ကျောပေါ်တွင် ရပ်နေသော စူးချန်ခုန်း၏ မျက်နှာမှာ အေးစက်နေလျက်။ လော့ဟွမ်၏ ‘နေနှင့်လ အတူတူတောက်ပခြင်း’ တိုက်ကွက်မှာ တကယ်ပင် ကြောက်စရာကောင်းသော်လည်း စူးချန်ခုန်းက ဆန်းကြယ်လိပ်ချီစွမ်းအင်အရည်ကို သုံး၍ ‘နတ်ဘုရားသမင် ကောင်းကင်ခြေလှမ်း’ ကို လှမ်းလိုက်သဖြင့် အချိန်တိုအတွင်း ထိုတိုက်ကွက်အတွင်းမှ လွတ်မြောက်ခဲ့ခြင်း ဖြစ်သည်။
ယခုမူ စူးချန်ခုန်းက အဝေးမှနေ၍ မြားဖြင့်သာ ပစ်နေတော့သည်။ လော့ဟွမ်မှာ မပျံသန်းနိုင်သဖြင့် ထိုမြားချက်များကို ခုခံနေရရုံသာ။
ပတ်ဝန်းကျင်ရှိ ဝိညာဉ်စွမ်းအင်များကို အမြောက်အမြား စုပ်ယူထားပြီး ဆန်းကြယ်လိပ်ချီစွမ်းအင် ပါဝင်နေသည့် လေမိုးကြိုးမြားကို ရင်ဆိုင်ရသောအခါ လော့ဟွမ်သည် သူ၏ သွေးမျိုးဗီဇကို အတင်းအကြပ် နှိုးဆော်ကာ နေနှင့်လ၏ အလင်းတန်းများဖြင့် ခုခံရတော့သည်။
“ဝုန်း”
မြားချက်မှာ ပေါက်ကွဲသွားပြီး ဟိန်းဟောက်နေသော လေပြင်းနှင့် မိုးကြိုးများသည် လော့ဟွမ်၏ ပတ်ဝန်းကျင် ပေအနည်းငယ်အတွင်းရှိ သစ်ပင်အားလုံးကို မြေမှုန့်အဖြစ် ပြောင်းလဲပစ်လိုက်သည်။ လော့ဟွမ်၏ အရေပြားများမှာ ကွဲအက်သွားပြီး သွေးများ အဆက်မပြတ် ထွက်ပေါ်လာသည်။ နတ်ဘုရားမျိုးစေ့၏ အစွမ်းကို ထပ်ခါတလဲလဲ သုံးရခြင်းက သူ၏ ခန္ဓာကိုယ်ကို ကြီးမားစွာ ထိခိုက်စေသည်။
ထိုအချိန်တွင် စူးချန်ခုန်းမှာမူ တည်ငြိမ်စွာဖြင့် မြားတစ်စင်းပြီးတစ်စင်း ပစ်နေဆဲဖြစ်သည်။ မြားတစ်စင်းချင်းစီမှာ ဆန်းကြယ်လိပ်ချီစွမ်းအင်အရည်၏ အားဖြည့်မှုကြောင့် နတ်ဘုရားစွမ်းရည်တုအဆင့်၏ ဖျက်ဆီးအားမျိုး ရှိနေသည်။
‘ချီးပဲ... ချီးပဲ..နတ်ဘုရားစွမ်းရည်တုအဆင့် သိုင်းပညာတွေက စွမ်းအင် အများကြီး ကုန်ရမှာလေ... ဒါပေမဲ့ ဒီလူက ဘာလို့ ပင်ပန်းတဲ့ အရိပ်အယောင်တောင် မပြတာလဲ။’
လော့ဟွမ်သည် စူးချန်ခုန်း၏ မြား ၃ စင်းကို ဆက်တိုက် ခုခံပြီးနောက် သွေးများကို အလိပ်လိုက် အန်ထုတ်လိုက်ရသည်။ သူ၏ အကြောများမှာ ပြတ်တောက်လုနီးပါး ဖြစ်နေပြီး တစ်ကိုယ်လုံး သွေးချင်းနီနေပြီ ဖြစ်သည်။ အနက်ရောင်ဝတ်စုံနှင့် ထိုလူမှာ ‘အကြီးအကဲတာ့’ဟု သူ မယုံနိုင်လောက်အောင် ဖြစ်နေရသည်။ ထိုသူ၏ စွမ်းအားမှာ ကုန်ခမ်းသွားခြင်း မရှိဘဲ ပြင်းထန်သော တိုက်ကွက်များကို မပင်မပန်း ဆက်တိုက် ထုတ်ဖော်နေခြင်း ဖြစ်သည်။
လော့ဟွမ်မှာမူ ကောင်းကင်ပေါ်သို့ ပြန်လည်မတိုက်ခိုက်နိုင်သဖြင့် အလူးအလဲ ခံနေရုံသာ ရှိတော့သည်။ စူးချန်ခုန်း၏ ဆန်းကြယ်လိပ်ချီစွမ်းအင်အရည် မှာ ၉ စက်အထိ ရှိနေပြီး ယခု ၄ စက်သာ ကုန်ဆုံးရသေးသဖြင့် သူ၏ တိုက်ပွဲဝင်နိုင်စွမ်းမှာ ယခင်ကထက် များစွာ ပိုမိုအားကောင်းနေသည်ကို လော့ဟွမ် သိနိုင်မည် မဟုတ်ပေ။
စူးချန်ခုန်းတွင် နတ်ဘုရားစွမ်းရည်တုအတတ် တစ်ခုတည်းရှိသည် မဟုတ်ဘဲ နှစ်ခုရှိနေပြီး ၎င်းတို့ကို ပေါင်းစပ်အသုံးပြုခြင်းက သူ့ကို ဤကဲ့သို့သော အဆင့်အတန်းသို့ ရောက်ရှိစေခြင်း ဖြစ်လေသည်။