အခန်း (၂၃၁)

စစ်မြေပြင်မှ ထာဝရရှင်သန်ခြင်းဆီသို့

အခန်း (၂၃၁)

လန်ထျန်းစခန်း၏ တပ်ဖွဲ့များက သူတို့၏ စစ်ဆင်ရေးများကို ဆက်လက်လုပ်ဆောင်နေခဲ့သည်။ တိုက်မြို့ကို သိမ်းပိုက်နိုင်ပြီဖြစ်သောကြောင့် တိုက်နယ်မြေတစ်ခုလုံးကို တစ်လအတွင်း ချင်က သိမ်းပိုက်နိုင်တော့မည်ဖြစ်သည်။ ထိုအချိန်ကျလျှင် ကျောက်နိုင်ငံက ရှိတော့မည်မဟုတ်ပေ။

အချိန်များက လျင်မြန်စွာ ကုန်ဆုံးလာခဲ့သည်။

ဝေနိုင်ငံ၊ တလျန်မြို့။

" အရှင် "စစ်သူကြီးတစ်ယောက်က ဝေဝူကျိဆီသို့ ရောက်လာပြီး စိုးရိမ်တကြီး အစီရင်ခံလိုက်သည်။ " ကျောက်နိုင်ငံ ကျဆုံးသွားပါပြီ။ တိုက်ဘုရင် ကျောက်ယိက တိုက်ပွဲအခြေအနေကြားမှာ ချင်စစ်တပ်ရဲ့ သတ်ဖြတ်ခြင်းကို ခံလိုက်ရပြီး တိုက်နယ်မြေထဲက ကျောက်စစ်တပ်ကလည်း အမြစ်ပြတ်ချေမှုန်းခြင်း ခံလိုက်ရပါပြီ။ "

၎င်းကို ကြားသောအခါ ဝေဝူကျိ၏ လက်ထဲမှ ဝါးချပ်စာလိပ်များက လွတ်ကျသွားခဲ့သည်။ သူ၏ မျက်နှာပေါ်တွင် လေးနက်သော အမူအရာတစ်ခု ပေါ်လာသည်။

" ချင်ရဲ့ အရှိန်အဟုန်ကို ဘယ်လိုမှ တားဆီးလို့မရတော့ဘူး။ ကျင့်နိုင်ငံသုံးခုထဲမှာ ငါ့ရဲ့ ဝေနိုင်ငံတစ်ခုပဲ ကျန်တော့တယ်။ " ဝေဝူကျိက စိတ်ထဲမှ သက်ပြင်းချလိုက်သည်။

" အရှင် " စစ်သူကြီးက တုန်ရီနေသော အသံနှင့် မေးလိုက်သည်။ " ကျောက်နယ်မြေကျဆုံးသွားပြီဆိုတော့ ချင်က ကျောက်နယ်မြေကို ထိန်းချုပ်ပြီးသွားရင် ကျွန်တော်တို့ ဝေကို သေချာပေါက် တိုက်လာတော့မှာပါ။ ဝေအနေနဲ့ ဘယ်လိုခုခံရမလဲ။ "

" မင်းအခု ထွက်သွားလို့ရပြီ။ " ဝေဝူကျိက ထိုစစ်သူကြီးကို ထွက်သွားရန် ပြောလိုက်သည်။

" နားလည်ပါပြီ။ " စစ်သူကြီးက ရိုသေစွာဖြင့် ထွက်ခွာသွားသည်။

" ဟူး...." ဝေဝူကျိက သက်ပြင်းချလိုက်ပြီး သူ၏ စားပွဲအောက်မှ ပိုးထည်စတစ်ခုကို ဆွဲထုတ်လိုက်သည်။ ၎င်းပေါ်တွင် စာများ ရေးသားထားသည်။

" ပြန်လည်တည်ထောင်ရေး မဟာစီမံကိန်း။ "

တိုက်နယ်မြေကို ချင်က သိမ်းပိုက်လိုက်ပြီး ကျောက်ယိသေဆုံးသွားသော သတင်းက နယ်မြေအနှံ့ ပျံ့နှံ့သွားခဲ့ပြီး နိုင်ငံအသီးသီးတွင် စိုးရိမ်ထိတ်လန့်မှုများ ဖြစ်ပေါ်စေခဲ့သည်။ အထူးသဖြင့် ဝေနိုင်ငံဖြစ်သည်။

ရှန်းယန်မြို့။

အမိန့်တော်အလှံကို ကိုင်ဆောင်ထားသော စတင်းပို့သူတစ်ယောက်က မြို့တံခါးသို့ အရှိန်အဟုန်နှင့် ဝင်ရောက်လာသည်။ တာဝန်ကျ မြို့စောင့် စစ်သည်များက အတားအဆီးများကို ချက်ချင်း ဖယ်ရှားပေးလိုက်ကြသည်။ သတင်းပို့သူက မြို့ထဲသို့ အတားအဆီးမရှိ ဝင်ရောက်သွားခဲ့သည်။

" တိုက်မြို့ကို ချင်စစ်တပ်က ထိုးဖောက်ပြီး စစ်သူကြီးကျောက်ဖုန်းက ကျောက်ယိကို သတ်ဖြတ်လိုက်ပြီ။ "

" တိုက်နယ်မြေကို ချင်စစ်တပ်က သိမ်းပိုက်လိုက်ပြီ။ ကျောက်နိုင်ငံ ပျက်စီးသွားပြီ။ "

" ကြီးကျယ်တဲ့ အောင်ပွဲပဲ။ ကျောက်နိုင်ငံ ပျက်စီးသွားပြီ။ ကျောက်နယ်မြေက အခု ငါတို့ချင်ရဲ့ အုပ်ချုပ်မှု​အောက်ကို ရောက်သွားပြီ။ "

သတင်းပို့သူက အမိန့်တော်အလှံကို မြှောက်ကာ တော်ဝင်နန်းတော်သို့ ဦးတည်နေပြီး လမ်းတစ်လျှောက် အော်ဟစ်သွားခဲ့သည်။

" ကျောက်နိုင်ငံမရှိတော့ဘူးလား။ "

" ကောင်းကင်ဘုံက ငါတို့ချင်ကို မျက်နှာသာပေးနေတာပဲ။ ကျောက်နိုင်ငံ ကျဆုံးသွားပြီ။ "

" ဟားဟား.... ဟန်နိုင်ငံလည်း မရှိတော့ဘူး။ အခု ကျောက်လည်း မရှိတော့ဘူး။ "

" ချင်က ကျင့်နိုင်ငံသုံးခုထဲက နှစ်ခုကို အမြစ်ပြတ် ချေမှုန်းလိုက်ပြီ။ ကြီးကျယ်တဲ့အောင်ပွဲပဲ။ "

" နိုင်ငံခုနှစ်ခုက နှစ်ပေါင်းရာနဲ့ချီ ကွဲပြားနေခဲ့တယ်။ ဒါပေမယ့် ငါတို့ချင်က သုံးနှစ်မပြည့်ခင် နိုင်ငံနှစ်ခုကို ဖျက်ဆီးပစ်လိုက်ပြီ။ "

" တစ်နေ့ကျရင် ချင်က တစ်လောကလုံးကို စုစည်းနိုင်လိမ့်မယ်။ "

" ချင်လူမျိုးတွေ မျိုးဆက်ပေါင်းများစွာ မျှော်လင့်ခဲ့တဲ့ ရည်မှန်းချက်က နောက်ဆုံးမှာ ပြည့်တော့မယ်။ "

" တစ်လောကလုံးကို စည်းလုံးဖို့က ငါတို့ ချင်တစ်ခုတည်း လုပ်နိုင်တာပဲ။ "

" သွားကြစို့။ ဒီနေ့က ချင်အတွက် ပျော်စရာနေ့ပဲ။ ညီအကိုတို့ ငါမင်းတို့အားလုံးကို အရက်တိုက်မယ်။ "

" ရှန်းယန်မှာ အင်မော်တယ်ဝိုင်ခန်းမ မရှိတာ နှမြောစရာပဲ။ သူတို့ဝိုင်က တကယ်ရတနာပဲ။ "

" အဲ့ဒီအင်မော်တယ်ဝိုင်ခန်းမက ဘယ်မှာရှိတာလဲ။ ငါ့လူတွေ ပြောတာခဏခဏကြားဖူးတယ်။ ဒါပေမယ့် ကိုယ်တိုင်တော့ မတွေ့ဖူးသေးဘူး။ "

" အဲ့ဒါက မင်း ခေတ်နောက်ကျနေလို့ပေါ့ ညီအကိုရ။ အင်မော်တယ်ဝိုင်ခန်းမက ယင်ချွမ်းမှာရှိတာပဲ။ "

" ငါ ခရီးသွားတုန်းက ဝေမြစ်ကို ဖြတ်သွားတုန်း ဝေမြို့မှာ ဝင်သောက်ခဲ့တာပဲ။ လူတွေဆို ကြိတ်ကြိတ်တိုးပဲ။ "

" အဲ့လောက်တောင် ကောင်းတာလား။ တစ်နေ့ကျရင် သွားသောက်ကြည့်ရမယ်။ "

" ကဲတော်ပြီ။ ချင်က ကျောက်ကို သိမ်းပိုက်နိုင်တာကို သွားပြီး ဂုဏ်ပြုလိုက်ကြစို့။ "

ထိုအချိန်တွင် ရှန်းယန်မြို့တစ်ခုလုံးရှိ ပြည်သူများက အလွန်ဝမ်းသာနေကြသည်။ သူတို့၏ နယ်မြေကို တိုးချဲ့နိုင်ခြင်းက သူတို့ကို စိတ်လှုပ်ရှားစေသည်။ ဖြစ်နိုင်သည်မှာ ချင်ပြည်သူဟောင်းများ၏ သွေးသားထဲမှ ဆင်းသက်လာသော ရည်မှန်းချက်များ ဖြစ်ပေလိမ့်မည်။

တစ်လောကလုံးကို စုစည်းလိုသော ဆန္ဒက ချင်ဘုရင်အဆက်ဆက်၏ ရည်မှန်းချက်ဖြစ်ရုံသာမက ချင်ပြည်သူဟောင်းအားလုံး၏ သွေးထဲမှ ပါလာသော အမွေအနှစ်တစ်ခု ဖြစ်လေသည်။

" အရှင်မင်းကြီး " သတင်းပို့သူက ဦးညွှတ်ပြီး အစီရင်ခံလိုက်သည်။ " ကျောက်နိုင်ငံအပေါ် ကြီးကျယ်တဲ့ အောင်ပွဲရရှိခဲ့ပါပြီ။ တိုက်မြို့ ကျဆုံးသွားပါပြီ။ တိုက်နယ်မြေတစ်ခုလုံးကိုလည်း ချင်က သိမ်းပိုက်လိုက်ပါပြီ။ ကျောက်နိုင်ငံဆိုတာ မရှိတော့ပါဘူး။ "

၎င်းကို ကြားသောအခါ ညီလာခံတစ်ခုလုံး တုန်လှုပ်သွားကြသည်။ ဝန်ကြီးအားလုံးက အံ့အားသင့်သွားကြပြီး သူတို့၏ မျက်နှာပေါ်တွင် ဝမ်းသာသော အမူအရာများ ပေါ်လာကြသည်။

" ကျွန်တော်မျိုးတို့က အရှင်မင်းကြီးကို ဂုဏ်ပြုပါတယ်။ " ဝန်ကြီးများအားလုံးက ရင်ကျန့်ကို ဦးညွှတ်ပြီး ပြောလိုက်ကြသည်။

" အရှင်မင်းကြီး သက်တော်ရာကျော်ရှည်ပါစေ။ ချင်နိုင်ငံကြီး အဓွန့်ရှည်တည်တံ့ပါစေ။ "

ပလ္လင်ပေါ်မှ ရင်ကျန့်က ဝမ်သာစွာဖြင့် ထရပ်လိုက်သော်လည်း သူ၏ သိက္ခာနှင့် တည်ငြိမ်မှုများကို ထိန်းသိမ်းထားဆဲ ဖြစ်သည်။ ညီလာခံ၏ ဂုဏ်ပြုမှုများအောက်တွင် ရင်ကျန့်က သူ၏ လက်နှစ်ဖက်ကို ဆန့်ထုတ်လိုက်ပြီး အနှိုင်းမဲ့သော ဧကရာဇ်အရှိန်အဝါကို ထုတ်ဖော်လိုက်သည်။

" ကောင်းကင်ဘုံရဲ့ ကံကြမ္မာက ချင်ဆီမှာရှိတယ်။ "

" ကောင်းကင်ဘုံရဲ့ ကံကြမ္မာက ချင်ဆီမှာရှိတယ်။ " ဝန်ကြီးများက တစ်ညီတစ်ညွှတ်တည်း ဟိန်းဟောက်လိုက်ကြသည်။

" ချင်က တစ်လောကလုံးကို စုစည်းနိုင်လိမ့်မယ်။ အရှင်မင်းကြီး သက်တော်ရာကျော်ရှည်ပါစေ။ ချင်နိုင်ငံကြီး အဓွန့်ရှည်တည်တံ့ပါစေ။ "

"ငါ့အမိန့်ကို ထုတ်ပြန်လိုက်။ သုံ့ပန်းအဖြစ် ဖမ်းဆီခံလိုက်ရတဲ့ ကျောက်နိုင်ငံက အထက်တန်းလွှာအားလုံးကို ချင်နိုင်ငံဆီ ခေါ်လာရမယ်။ " ရင်ကျန့်က အမိန့်ပေးလိုက်သည်။ " အဲ့ဒီက ဝန်ကြီးတွေနဲ့ သူတို့ရဲ့ မိသားစုဝင်အားလုံးကိုလည်း ချင်ဆီ ခေါ်လာရမယ်။ အားလုံးကို ကျွန်အမှတ်အသား ခတ်နှိပ်ပြီး အားလုံးကို ကျွန်အဆင့်ထိ လျှော့ချပစ်ရမယ်။ "

" သူတို့ ပြန်ရောက်လာတဲ့အခါ တရားရေးဝန်ကြီးက သူတို့ကို စာရင်းပြုစုရမယ်။ ပြီးတော့ အဲ့ဒီကျွန်အားလုံးကို ထိုက်တန်တဲ့ အရာရှိတွေအားလုံးကို ဆုလာဘ်အဖြစ် ပေးအပ်မယ်။ "

" အရှင်မင်းကြီးက ပညာရှိလှပါတယ်။ " ညီလာခံမှ ဝန်ကြီးများက စိတ်လှုပ်ရှားစွာဖြင့် ပြောလိုက်ကြသည်။

" အရှင်မင်းကြီး "ဝမ်ဝမ်က ရှေ့သို့ တိုးပြီး အစီရင်ခံလိုက်သည်။ " ဒီတစ်ခါ ကျောက်ကို တိုက်တဲ့ စစ်ဆင်ရေးမှာ လက်နက်ချစစ်သည်အရေအတွက်က မနည်းပါဘူး။ သူတို့ရဲ့ နေ့စဉ်ရက္ခာသုံးစွဲမှုက အတော်လေးများနေပါတယ်။ "

" ရှောက်ဖူ " ရင်ကျန့်က ယွီလျောင်ကို ကြည့်ပြီး မေးလိုက်သည်။ " အခု ကျောက်နယ်မြေထဲမှာ လက်နက်ချစစ်သည် ဘယ်လောက်ရှိလဲ။ "

" အရှင်မင်းကြီး ကျောက်ရဲ့ ခရိုင်စစ်သည်တွေကိုပါ ထည့်တွက်ရင် ကျောက်နယ်မြေထဲက လက်နက်ချစစ်သည်အရေအတွက် လေးသိန်းနီးပါး ရှိပါတယ်။ " ယွီလျောင်က ရိုသေစွာ ပြောလိုက်သည်။

" လေးသိန်းဆိုတာ တကယ်ကို မနည်ဘူးပဲ။ " ရင်ကျန့်က လေးနက်စွာ ပြောလိုက်သည်။

" အရှင်မင်းကြီး ကျွန်တော်မျိုးအနေနဲ့ လက်နက်ချစစ်သည်တွေထဲက အချို့ကို အရင်နည်းလမ်းအတိုင်းပဲ ကျင့်သုံးသင့်တယ်လို့ ထင်ပါတယ်။ သူတို့ကို မြောက်ဘက်နယ်စပ်ကို ကျေးကျွန်အဖြစ် ပို့ဆောင်ပြီး ချင်တစ်ခွင်လုံးကို ကျေးကျွန်တွေ ဖြန့်ကျက်ထားဖို့ပါပဲ။ " ဝမ်ဝမ်က ရိုသေစွာ ပြောလိုက်သည်။

" ကျွန်တော်မျိုးလည်း သဘောတူပါတယ်။ " ဟွိုင်ကျွမ်းက ထောက်ခံလိုက်သည်။ " တကယ်လို့ စစ်သုံ့ပန်းအားလုံးကို ပြန်လည်ဖွဲ့စည်းမယ်ဆိုရင် ကုန်ကျစရိတ်က အရမ်းများလိမ့်မယ်။ သူတို့ကို ပြန်လည်မဖွဲ့စည်းခင် အရင်ဆုံး စစ်ဆေးရွေးချယ်သင့်ပါတယ်။ "

" တရားရေးဝန်ကြီး မင်းရော ဘယ်လိုထင်လဲ။ " ရင်ကျန့်က လီစီကို ကြည့်လိုက်သည်။

" ချင်စစ်သည်တွေအတွက် သတ်မှတ်ချက်တွေက အရမ်းတင်းကျပ်ပါတယ်။ " လီစီက ချက်ချင်း ပြန်ဖြေလိုက်သည်။ " အထူးစစ်သည်ဖြစ်လာဖို့အတွက် အကြိမ်ကြိမ် စစ်ဆေးအကဲဖြတ်ရပါတယ်။ ဒါပေမယ့် အခြားနိုင်ငံတွေမှာ ဒီလိုအကဲဖြတ်မှုမျိုးတွေ မလုပ်ခဲ့ရပါဘူး။ သူတို့ရဲ့ အရည်အချင်းတွေကလည်း တစ်ယောက်နဲ့ တစ်ယောက် အများကြီး ကွာခြားပါတယ်။ သူတို့ကို အပြစ်ပေးတပ်ဖွဲ့အဖြစ် ပြန်လည်မဖွဲ့စည်းခင်မှာ အရင်ဆုံး စစ်ဆေးရွေးချယ်ရပါမယ်။ "

သူက ဝမ်ဝမ်နှင့် အဆင်မပြေဖြစ်နေသော်လည်း ဤကိစ္စက နိုင်ငံ၏ အုတ်မြစ်နှင့် သက်ဆိုင်နေသဖြင့် လီစီကလည်း အခြေအနေကို ကောင်းစွာ နားလည်ထားသည်။ ဖြစ်နိုင်သည်မှာ ရင်ကျန့်က သူ့ကို ယုံကြည်ရသော အကြောင်းရင်းတစ်ခုလည်း ဖြစ်နိုင်သည်။ လီစီက နိုင်ငံအရေးနှင့် ပက်သက်လာလျှင် အမြဲတမ်း အလေးအနက် ထားခဲ့သည်။

" မင်းတို့အားလုံးက ဒီလိုပြောနေတယ်ဆိုမှတော့ ငါတို့ ဒီလောက်များတဲ့ လက်နက်ချစစ်သည်တွေကို ကိုင်တွယ်ရာမှာ သတိထားရလိမ့်မယ်။ " ရင်ကျန့်က ပြောလိုက်သည်။ " စစ်သေနာပတိချုပ်ဝမ်ကျန့်ဆီကို ငါရဲ့ အမိန့်တော် ပို့လိုက်။ လက်နက်ချစစ်သည်တွေထဲက ချင်စစ်သည်တွေရဲ့ စံနှုန်းနဲ့ ကိုက်ညီပြီး သန်မာထက်မြက်တဲ့ လူငယ်တွေကို ရွေးချယ်ဖို့ သူ့ကို ပြောလိုက်ပါ။ အရည်အချင်းမပြည့်မီတဲ့သူတွေကိုတော့ ကျွန်အဖြစ် လျှော့ချပြီး မြောက်ဘက်နယ်စပ်နဲ့ ရှုဒေသဆီကို ပို့ဆောင်ရမယ်။ "

" အရှင်မင်းကြီးက အမြော်အမြင် ကြီးမားလှပါတယ်။ " ဝန်ကြီးများက တစ်ညီတစ်ညွှတ်တည်း အော်ဟစ်လိုက်ကြသည်။